February 2024 – Búlọ́ọ̀gì Wa | Ìjọ Òtítọ́ Bíbélì

Kò ní fi ẹlòmíràn rópọ̀ rẹ | Láti ọwọ́: J.O. Lawal | Ọjọ́: Èrèlé 25, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 43

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ ti o pari oṣu Èrèlé 2024. Adura mi si ni pe ki Ọlọrun jẹ ki iwọ ati ohun gbogbo ti o jẹ tirẹ wa ni ailewu ati ni pipe ni gbogbo ọsẹ naa, ki O si tun ma jẹ ki o ṣe ohunkohun ti yoo jẹ ki o padanu ipo ti O ti yan fun ọ si ọwọ ẹlomiran, ni orukọ Jesu. Amin.

Bi a ti ṣe ri ninu bibeli, Ọba Sọọlu, iyẹn ọba akọkọ fun orilẹ-ede Isiraẹli, ko ki i ṣe ààyò awọn eniyan tabi ààyò eniyan Ọlọrun ti o n dari orilẹ-ede naa ni asiko naa, iyẹn Samuẹli. Dipo eyi, ààyò Ọlọrun ni o jẹ. Ọlọrun funrarẹ ni O mọ-ọn-mọ ṣe awari rẹ, ti O si tun yan an lati jẹ ọba lori awọn eniyan rẹ. Sibẹsibẹ, ni asiko kan, Ọlọrun kọ ọ ni ọba, O si wa elomiran lati rọpo rẹ. (Wo: 1Sámúẹ́lì 9-15)

Ki ni eyi n sọ fn wa? Oun naa ni pe wipe Ọlọrun yan eniyan fun ipo tabi iṣẹ kan ko tunmọ si pe ko le kọ ẹni naa silẹ, ki O si wa ẹlomiran lati fi rọpo rẹ. O le ṣe bẹẹ. Amọ ṣa o, eyi ko wa jasi pe Ọlọrun yoo kọ ẹni naa silẹ gẹgẹ bi ọkan lara awọn eniyan rẹ. Ti a ko ba kọ Ọlọrun silẹ gẹgẹ bi Ọlọrun wa, Oun naa ko ni kọ wa silẹ gẹgẹ bi eniyan rẹ. Ṣugbọn O le kọ wa silẹ gẹgẹ bi ẹni ti ko yẹ tabi ti ko koju osuwọn fun ipo tabi iṣẹ ti O ti fi igba kan ri yan wa fun.

Fun apẹrẹ, bi o tilẹ jẹ wipe Ọlọrun kọ Sọọlu ni ọba, ti O si tun fi ẹlomiran dipo rẹ, ko kọ ọ ṣilẹ gẹgẹ bi ọkan lara awọn eniyan rẹ. Ṣugbọn nigba ti Sọọlu kọ ọ gẹgẹ bi Ọlọrun, ti o si wa iranwọ lọ si ọdọ àjẹ́ kan, Ọlọrun naa kọ ọ gẹgẹ bi ọkan lara awọn eniyan rẹ. Nitorina, iṣoro yowu ti a le ma dojukọ, bi o tilẹ jẹ eyi ti a fi ọwọ ara wa fa sori ara wa ni, a ko gbọdọ lailai kọ Ọlọrun silẹ tabi yi pada kuro lọdọ rẹ. Aijẹbẹ, Oun naa ko ni ṣemeni-ṣemeji ju ki O kọ wa silẹ lọ. (Wo: 1Sámúẹ́lì 28; 2Tímótì 2:12)

Ki wa lo fa ti a fi kọ Sọọlu, ti a si tun fi ẹlomiran rọpo rẹ? Wo nkan ti awọn akọsilẹ iwe Mimọ yi sọ nipa rẹ:

“Samuẹli si wi fun un pe, “Iwọ hu iwa aṣiwere, iwọ ko si pa ofin ti Oluwa Ọlọrn rẹ fi fun ọ mọ, bi o ko ba ṣe bẹẹ, oun iba fi idi ijọba rẹ kalẹ lori Isirẹli laelae. Ṣugbọn nisinsin yii ijọba rẹ ki yoo duro pẹ, Oluwa ti wa ọkunrin ti o wu u ni ọkan rẹ fun ara rẹ, o si ti yan an lati ṣe olori fun awọn eniyan rẹ, nitori pe iwọ ko pa ofin Oluwa mọ.” (1Sámúẹ́lì 13:13-14)

“Ṣugbọn Samuẹli wi fun un pe, “Emi ko ni ba ọ pada. Iwọ ti kọ ọrọ Oluwa silẹ, Oluwa si ti kọ ọ ni ọba lori Isirẹli!”” (1Sámúẹ́lì 15:26)

Ṣe o ri wipe iṣoro Sọọlu ni pe ko mu ọrọ Ọlọrun ni pataki? Ṣugbọn Ọlọrun lo sọ ọ di ọba; ko sọ ara rẹ di ọba. Yatọ si iyẹn, Ọlọrun, ti o yan lati di ọba, tun fẹ fi idi ijọba rẹ mulẹ fun gbogbo igba. Ṣugbọn nitoripe, ni asiko kan, o bẹrẹ si ni ro wipe oun gbọn ju Ọlọrun lọ ati wipe oun le lọ aṣẹ Ọlọrun lọrun bi o ṣe wu oun, ki oun si tun tabuku wolii rẹ, Ọlọrun yi ọkan rẹ pada lori ọrọ rẹ, O kọ ọ silẹ, O si tun yan ọdọmọdekurin kan rọpo rẹ.

Nitorina, ti o ba ni aṣa ki o ma gbe oye rẹ leke awọn aṣẹ Ọlọrun fun aye rẹ, o wa labẹ ewu ki Ọlọrun kọ ọ silẹ, ki O si tun fi ẹlọmiran rọpo rẹ fun awọn ipo giga tabi awọn iṣẹ rere kan ni aye yi, bi o tilẹ jẹ wipe iwọ ni ẹni naa ti a kọkọ yan fun wọn. Lotitọ, o le ni awọn idi ti o fi ma n fẹ ki ifẹ tirẹ leke ifẹ Ọlọrun tabi ti o ko fi ni ọ̀wọ̀ ti ko nitunmọ kankan fun awọn ti o yan le ọ lori. Ṣugbọn ni opin ohun gbogbo, iwọ naa yoo ri wipe awọn idi wọnyi ko kọja awawi asan ti Ọlọrun ko le lailai tẹwọgba.

Sọọlu naa ni awọn idi ti o fi tabuku ọrọ Ọlọrun ati wolii rẹ. Itara gbigbona rẹ lati di itẹ rẹ mu jẹ ọkan. Ibẹru awọn jagunjagun rẹ jẹ omiran. Ṣibẹsibẹ, Ọlọrun kọ ọ, O si tun fi ẹlomiran rọpo rẹ. Ko si wa si nkankan ti o ṣe lati gba itẹ rẹ fun awọn arọmọdọmọ rẹ ti o ṣiṣẹ. Ko si si nkankan ti awa naa le ṣe lati gba ipokipo tabi iṣẹkiṣẹ ti Ọlọrun ba ti gba kuro lọwọ wa fun ara wa. Nitorina, nṣe ni ki a ṣọ ara wa, ki a si ma fi aye gba aigbagbọ, agidi-inu, ibẹru, itara-gbigbona, ojukokoro, ifẹkufẹ, ẹtanu, igberaga, ilara tabi ohun miran lati fi aye silẹ fun un lati fi ẹlomiran ropo wa. Adura mi si ni pe ki a ma fi gbogbo igba kun wa pẹlu ọgbọn ati okun ti o peye lati rin pẹlu afiyesi eyi, ni orikọ Jesu. Amin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Kò ní fi ẹlòmíràn rópọ̀ rẹ | Láti ọwọ́: J.O. Lawal | Ọjọ́: Èrèlé 25, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 43 Read More »

A tú sílẹ̀ kúrò lọ́wọ́ gbogbo ìbẹ̀rù rẹ̀. | Láti ọwọ́: J.O. Lawal | Ọjọ́: Èrèlé 18, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 42

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọṣẹ miran ninu oṣu Èrèlé 2024. Mo si tun gbadura pe ki Ọlọrun ya ọkan rẹ ya ero ibẹru yowu ti o n sọ ọ di alailagbara, ti o si tun n di ọ lọwọ lati gbe awọn igbesẹ ti o tọ lati ni iriri isoriire ti o le jẹ tirẹ laye yi, ni orukọ Jesu. Amin.

Ninu owe ọkunrin kan ti o fun awọn iranṣẹ rẹ ni owo lati fi ṣiṣẹ, eyi ti Jesu Oluwa wa sọ fun wa, idi ti iransẹ ti ko ṣe nkankan pẹlu owo ti a fun ko ṣe ṣe nkankan pẹlu rẹ ni pe ẹru ba a. Fun ọpọ ọdun, awọn oniwaasu kọ wa pe idi ti ko ṣe ṣe nkankan pẹlu owo ti a fun ni pe o woye pe o kere ju fun oun, iyẹn ti a ba wo si owo ti a fun awọn yoku. Ṣugbọn ko si nkankan ninu akọsilẹ ọrọ yi ti o sọ bẹ ẹ tabi ti o fun wa ni ero ti o jọ bẹ ẹ. (Wo: Mátíù 25:14-30)

Ni akọkọ, bi a ti se ri ninu akọsilẹ ọrọ yi, nkan ti oluwa iransẹ yi fun pọ gidigidi, bi o tilẹ jẹ wipe talẹnti kan pere ni. Idi si ni pe, ni asiko ti a n sọ yi, ọpọlọpọ owo ni talẹnti kan jẹ. Ekeji, oluwa rẹ fun oun ati awọn iransẹ yoku bi tirẹ ni owo ni ibamu pẹlu bi agbara wọn lati ṣe amulo rẹ ti ṣe to (Mátíù 25:15). Nitorina, ko ki i ṣe nitori pe owo ti a fun un kere pupọ tabi pe ko to ti awọn yoku ni ko ṣe ṣe nkankan pẹlu rẹ. Gẹgẹ bi ọrọ oun funrarẹ, ko ṣe nkankan pẹlu rẹ nitoripe o bẹru ati padanu rẹ. (Wo: Mátíù 25:24-25)

Ni kukuru, nitoripe iransẹ yi jẹ ki ibẹru pe oun yoo padanu owo ti a fun un ki o gbakoso ọkan rẹ, oju rẹ fọ si gbogbo anfaani ti ko ba ṣe amulo lati lo owo naa ati lati sọ di ilọpo-ilọpo. Nitorina, nigba ti awọn iransẹ yoku bi tirẹ n sọ talenti ti wọn di ilọpo-ilọpo, nṣe ni o tẹpamọ awọn nkan ti ko nitunmọ, awọn nkan ti oluwa rẹ ko ni bere ọrọ lọwọ rẹ lori wọn. Bayi si ni o ṣe padanu talẹnti rẹ si ọwọ ọkan lara awọn ti o ṣiṣẹ aṣekara pẹlu talẹnti tiwọn, ti o si tun padanu ipo rẹ niwaju oluwa rẹ, dipo ki a gbe e ga. (Wo: Mátíù 25:24-30)

Ki si ni ẹkọ yi n kọ wa? Oun naa ni pe ẹru ma n sọni di abirun. Kiki ikuna nikan si ni ẹru ma n ṣi oju awọn eniyan si. Ti gbogbo nkan ti o wa n ri ko ba wa ju ikuna lọ, ko si ki o ma ba gbagbe pe o ni Ọlọrun ati wipe O le fi ọna han ọ lati sọ ikuna di aṣeyọri. Nitorina, nṣe ni wa ka ri wipe o ti sọ ireti nu, ti o si ti yọnda ara rẹ fun ikuna, ikú tabi ìṣẹ́.

Ṣugbọn o ko nilo lati yọnda ara rẹ fun ikuna, iku tabi ìṣẹ́. Ọkankan ninu wa ko nilo lati yọnda ara rẹ fun awọn nkan wọnyi. Lotitọ, a le koju ija si wa pẹlu oniruuru ẹru nitori asiko ti a ba ara wa tabi asiko ti orilẹ-ede wa wa. A le kọju ija si wa pẹlu ibẹru ebi, ibẹru owo ile-iwe awọn ọmọ wa, ibẹru owo ile ti a n gbe ti a ko i ti san, ibẹrun aisan kan ti o n yọ agọ ara wa lẹnu, ibẹru awọn gbese kan ti a ko i ti ri san, ibẹru okowo tabi iṣẹ kan ti o n kuna lọwọ wa, ibẹru idanwo kan ti o n bọ tabi ibẹru wipe a o padanu ẹnikan ti o ṣe iyebiye si wa.

Irufẹ aṣo yowu ti ibẹru ti a n dojukọ le da a, nkan ti a nilo lati ṣe ni pe ki a ba Ọlọrun sọrọ nipa rẹ. Yoo si mojuto. Dafidi, ninu ọkan ninu awọn orin rẹ, sọ wipe, “Emi wa Oluwa, o si da mi lohun; O si gba mi kuro ninu ibẹru mi gbogbo.” (Sáàmù 34:4) Njẹ o ri bayẹn? Nigba ti Dafidi safẹri Oluwa nipa ohun gbogbo ti o n yọ ọ lẹnu, ti o si n da ẹru ba a, O gba a kuro lọwọ gbogbo ibẹru rẹ.

Bawo ni Oluwa ti ṣe gba ọkunrin yi kuro lọwọ gbogbo ibẹru rẹ? A ko mọ ọn, nitoripe ko salaye rẹ fun wa lẹkunrẹrẹ. Amọ ijẹri rẹ ni wipe nigba ti oun wa Oluwa, a tu oun silẹ kuro lọwọ gbogbo ẹru oun. Nitorina, ti iwọ ko ba mọ tẹlẹ, mọ bayi pe Ọlọrun le gba ọ kuro lọwọ irufẹ ibẹru yowu ti o n kun ọ pẹlu ironu, ti o n jẹ ki o ṣaarẹ tabi ti o n jẹ ki o fẹ ki o salọ tabi gba ẹmi ara rẹ. Nkan ti o nilo lati ṣe naa ko ju ki o wa oju Oluwa lori ọrọ naa. Oun yoo si tu ọ silẹ kuro lọwọ rẹ, yoo ṣi oju rẹ si awọn ipese rẹ fun ọ lati ni iriri aṣeyọri ati iṣẹgun, yoo si tun fun ọ ni ẹri ti o ga lati jẹ.

Ki o ni ọsẹ alarinrin.

A tú sílẹ̀ kúrò lọ́wọ́ gbogbo ìbẹ̀rù rẹ̀. | Láti ọwọ́: J.O. Lawal | Ọjọ́: Èrèlé 18, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 42 Read More »

Ọlọ́run yóò bẹ̀ wá wò lótìtọ́ọ́ pẹ̀lú ìrànwọ́ | Láti ọwọ́: J.O. Lawal | Ọjọ́: Èrèlé 11, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 41

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Èrèlé 2024. Adura mi si ni pe ki Ọlọrun bẹ iwọ ati idile rẹ wo pẹlu asiko itura nibikibi ti ara ba ti n ni yin, ni orukọ Jesu. Amin.

Bi a ti ṣe ri ninu bibeli, ni ọjọ wọnni ti awọn Onidajọ n ṣe idari ni Isiraẹli, ìyàn ti o le kan mu, eyi ti o jẹ ki awọn eniyan bẹrẹ si ni fi ilẹ naa silẹ lọ si awọn ibomiran ti wọn gbagbọ pe awọn yoo ti le jẹun daradara ati gbe aye daradara. Asiko yi si ni ọkunrin kan ti a n pe ni Ẹlimeleki ati aya rẹ Naomi fi ilẹ naa silẹ pẹlu awọn ọmọkunrin wọn mejeji lati lọ si Moabu. O wa ṣeni laanu pe iṣipopada wọn lọ si Moabu ko jasi ire fun wọn rara. Idi si ni pe Elimeleki ati awọn ọmọkunrin rẹ mejeji padanu ẹmi wọn nibẹ. Yatọ si iyẹn, awọn ọmọkunrin rẹ mejeji yi ko fi ọmọ kankan silẹ si aye. Nitorina, ko si nkan ti o ku idile yi ku ju opó mẹta lọ. (Wo: Rúùtù 1)

Wayi o, o wa ṣeeṣe ki a ri awọn miran ti awọn naa ko lọ si Moabu tabi si awọn ibomiran ni asiko yi kanna ti ko ni irufẹ iriri buruku ti idile Elimeleki ni. Ṣugbọn ọkan lara ẹkọ ti itan yi n kọ wa ni pe ki a ṣipo-pada kuro ni ibi iṣẹ wa, ile wa, ilu wa tabi orilẹ-ede wa lọ si ibomiran ko ki i fi gbogbo jẹ ọna ti o tọ lati wa ojutu si iyan tabi si asiko inira. Ti a ba paarọ iṣẹ wa tabi ibi ti a n gbe lalai ṣe pe a gba ifihan tabi itọni lati ọdọ Ọlọrun, o ṣeeṣe ki a kabamọ rẹ nigbẹyin.

Nitorina, ma kanju sa jade kuro ni orilẹ-ede yi ni asiko iyan yi nitoripe gbogbo awọn ti o mọ ni o n sa a lọ kuro ninu rẹ. Eyi le ma jẹ ọna ti Ọlọrun fẹ lo lati pa ọ mọ ati lati jẹ ki o ṣe rere. Fun apẹrẹ, bi a tun ti ṣe fi han wa ninu bibeli, asiko kan wa ti Isaki fẹ sọkalẹ lọ si Ijibiti nitori iyan ti o le kan ti o mu nibi ti o wa. Amọ Ọlọrun sọ fun pe ki o ma lọ ṣugbọn ki o duro sibi ti o wa. Ki ni idi? Idi ni pe bi o tilẹ jẹ wipe iyan mu nibẹ, ipese rẹ fun un lati ṣoriire naa wa nibẹ pẹlu. Nkan ti Isaki kan nilo ni ki o ri awọn ipese yi, ki o si bẹrẹ si ni ṣe amulo wọn. Nigba ti o si ri wọn, ti o si bẹrẹ si ni ṣe amulo wọn, o di ọlọrọ to bẹẹ gẹẹ ti gbogbo awọn ti o wa ni ayika rẹ fi bẹrẹ si ni ṣe ilara rẹ. (Wo: Jẹ́nẹ́sísì 26)

Ki wa ni koko eyi? Oun naa ni pe wipe inira wa ni ibikan ko tunmọ si pe ipese Ọlọrun fun wa lati ṣoriire ko si nibẹ fun wa bakanna. Nitorina, ki a to bẹrẹ si ni gbero lati ṣi ipo pada nitori inira ti o wa nibi ti a wa tabi nitori pe anfaani kan jẹyọ fun wa lati gbe igbe aye ti o suwọn si ni ibomiran, o yẹ ki a kọkọ gbadura si Ọlọrun naa, ki a si gbọ ọrọ lati ẹnu rẹ. Aijẹbẹ, a le fi aimọkan-mọkan sa kuro ni bi ti oriire wa wa lọ si ilẹ ofo.

Elimeleki ati idile rẹ fi Isiraẹli silẹ lọ si Moabu nitoripe wọn woye pe ibẹ yoo jẹ ile iṣoriire ati isinmi fun wọn. Ṣugbọn, wọn wa pada ri ibẹ bi ilẹ ofo fun wọn. Nitorina, bi o tilẹ jẹ wipe wọn lọ si ilẹ yi pẹlu ọpọ, nṣe ni Naomi, ẹnikanṣoṣo ti o ye laarin wọn, pada pẹlu ọwọ ofifo. Njẹ ki o ma fi aye rẹ, nkan ini rẹ ati ifarajin rẹ ṣofo lori lile ofo, ni orukọ Jesu. Amin.

Ni kukuru, nigba ti Naomi si wa ni ilẹ Moabu, ti ko si mọ nkan ti yoo ṣe pẹlu aye rẹ ati aye awọn iyawo awọn ọmọ rẹ, Ọlọrun bẹ orilẹ-ede Isiraẹli wo. Bibeli sọ pe, “Nigba ti Naomi gbọ ni Moabu ti o wa wi pe Oluwa ti bẹ awọn eniyan rẹ wo nipa fi fun wọn ni ọpọ ounjẹ. O si dide pẹlu awọn iyawọ ọmọ rẹ mejeeji lati pada si ilu rẹ.” (Rúùtù 1:6) Njẹ o ri bayẹn? Ọlọrun pàpà bẹ awọn eniyan rẹ wo pẹlu iranwọ nipa pipese ounjẹ fun wọn. Ibẹwo yi si ga to bẹẹ gẹẹ ti Naomi gan fi ranti ile, ti o si mura lati pada si ibẹ.

Nitorina, bi o ti wu ki nkan le to fun wa ni orilẹ-ede yi ni asiko yi, Ọlọrun si le bẹ wa wo pẹlu iranwọ ti o ga, eyi ti yoo jẹ ki gbogbo awọn eniyan wa ti wọn ti ko lọ si orilẹ-ede miran bẹrẹ si ni pada wale. Ọlọrun yoo si bẹ wa wo lotitọ pẹlu irawọ nitoripe awa kan n gbadura laisinmi pe ki O ṣe bẹẹ. Adura mi si ni pe ibi ti o yẹ ki o wa gẹlẹ ni iwọ yoo wa nigba ti iranwọ rẹ ba papa de, ti a si mu awọn asiko itura tọ wa wa. Amin.

Ki o ni ọsẹ ti o ga.

Ọlọ́run yóò bẹ̀ wá wò lótìtọ́ọ́ pẹ̀lú ìrànwọ́ | Láti ọwọ́: J.O. Lawal | Ọjọ́: Èrèlé 11, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 41 Read More »

Ìbòjú fún ibi | Láti ọwọ́: J.O. Lawal | Ọjọ́: Èrèlé 04, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 40

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Èrèlé 2024. Mo si gbadura pe ki Ọlọrun jẹ ki ojurere rẹ ki o di ilọpo-ilọpo si fun ọ ni gbogbo igba ninu oṣu naa, ki o ma ba ṣe alaini ohun rere kankan ninu rẹ. Amin.

Bi a ti ṣe n bẹrẹ oṣu tuntun yi, mo fẹ gba ọ niyanju pẹlu ọrọ Peteru ti o sọ wipe, “Ẹ maa gbe gẹgẹ bi ẹni ominira, ṣugbọn ẹ maṣe lo ominira yin lati bo ibi mọlẹ; ṣugbọn ki ẹ gbe gẹgẹ bi iranṣẹ Ọlọrun.” (1Pétérù 2:16) Tani ki o ma gbe gẹgẹ bi ominira enyan? Awa ti a ti tu silẹ npasẹ Jesu Oluwa wa kuro lọwọ awọn ẹṣẹ wa ati kuro lọwọ agbara eṣu ni. Ranti wipe ọrọ Ọlọrun sọ pe, “Ti ọmọ ba sọ yin di ominira, ẹ o si di ominira nitootọ.” O si ti tu wa silẹ. Nitorina, a ti di ominira nitootọ, ominara lododo. (Wo: Jòhánù 8:36)

Wayi o, niwọn igba ti a ti di ominira eniyan, Peteru wa sọ fun pe ki a tẹsiwaju, ki a si bẹrẹ si ni gbe igbe aye awọn ẹni ti o ti di ominira nitootọ. Eyi jasi pe ki a tẹsiwaju, ki a si ma gbe ile aye wa gẹgẹ bi awọn ti ko si ni abẹ agbara ẹṣẹ, eṣu ati awọn aṣa eniyan ti o n pani lara. Bẹẹni, ki a tẹsiwaju, ki a si ma gbe igbe aye ti o larinrin, ti o si tun kun fun ayọ pẹlu.

Amọ ṣa o, bi Peteru tun ṣe wa tẹsiwaju lati fi han wa, a ko gbọdọ lo ominira wa ninu Kirisiti Jesu gẹgẹ bi boju-boju fun iṣẹ ibi kankan. Ki ni idi ti o ṣe sọ eyi? O ṣọ eyi nitoripe o ṣeeṣe fun wa lati lo ominira wa ninu Kirisiti Jesu gẹgẹ bi boju-boju fun oniruuru iṣẹ ibi.

Lọna wa ni eyi gba ṣeeṣe? Nikukuru, o ṣeeṣe ni ọna yi: ti a ba gbe aye awa gẹgẹ bi onigbagbọ ododo ninu Kirisiti Jesu fun igba ti o pẹ diẹ, awọn ti o wa ni ayika wa yoo bẹrẹ si ni gbagbọ pe a ti gba wa la nitootọ kuro lọwọ ẹṣẹ, kuro lọwọ eṣu ati kuro lọwọ awọn imisi buburu aṣa awọn eniyan. Ibi ti eyi ba si ti ri bẹ, awọn eniyan yoo bẹrẹ si ni fi ọkan tan wa, wọn o si tun ma ri wa gẹgẹ bi ẹni ti ko le kopa ninu iṣẹ ibi kankan. Asiko yi gan an wa ni a le tan wọn jẹ, ki a si lo igbẹkẹle ti wọn ti ni ninu wa gẹgẹ bi iboju fun iṣẹ ibi.

Wo Judasi Isikariọti, fun apẹrẹ. Johanu sọ fun wa ninu iyinrere rẹ pe ole ni. O ma n ji owo Jesu. Bawo ni Johanu ṣe mọ eyi? Jesu funrarẹ lo gbọdọ sọ fun un, nitori awọn ọmọ ẹyin yoku ko mọ ni asiko naa. Bawo si ni Jesu ṣe mọ? Ṣe o gba mu lọrun ọwọ ni? Rara! Ti o ba jẹ bẹ ni, a ko ba kọ ọ sinu bibeli. Bawo gan ni O ṣe wa mọ pe Judasi n ja Oun lole? Nipa ifihan ni O ṣe mọ. Ṣe O si wa ba sọ nkankan tààrà-táárá lori ọrọ naa? Rara o! Kini idi? Idi ni pe iwaasu ti o ti gbọ ti to lati jẹ ki o yi iṣesi rẹ pada. (Wo: Jòhánù 12:4-6)

O wa ṣeni laanu pe ọpọ ni o wa loni ninu ijọ ti a ko le ma mọ nkankan nipa awọn iwa ibajẹ ti wọn n wu, ti Ọlọrun ko ba fi han wa. Ki si ni idi? Wọn ti jagbọn bi a ti ṣe n ṣe boju-boju. Wọn ti kọ bi a ti ṣe n ṣi igbẹkẹle awọn eniyan ninu wọn bi ọmọ Ọlọrun lo lati jale, ṣe agbere, lu jibiti, ṣiṣẹ oṣo tabi kopa ninu oniruuru iṣẹ ibi.

Bi Judasi si ṣe n ṣe niyẹn. O bẹrẹ, gẹgẹ bi awọn apọsiteli yoku naa ṣe bẹrẹ, gẹgẹ bi ẹni ti o ni igbagbọ otitọ ninu Kirisiti Jesu. Nitori ijẹri igbagbọ ati ifọkantan rẹ, Jesu si wa fi ṣe akapo rẹ. Ṣugbọn nigba ti o ṣe diẹ si, o bẹrẹ si ni ja Oluwa lole. Ṣibẹṣibẹ ko si ọkankan ninu awọn apọsiteli ti o fura si. Kini idi? Wọn n ro wipe ẹni ti awọn mọ ọn si tẹlẹ naa ni o si jẹ. Ṣugbọn o ti yipada, o si ti di olojukokoro ati onikupani eniyan. Nṣe ni o kan n lo iwa rere ti o ti ni sẹyin lati bo nkan ti o n ṣe mọlẹ.

Njẹ ki wa ni bibeli sọ nipa awọn ti o n ṣe bayi, awọn ti o n bo ẹṣẹ wọn mọlẹ? O sọ wipe wọn ko ni ṣe rere. Nkan ti o si ṣẹlẹ si Judasi Isikariọti naa leyi. Ko ṣe rere. Dipo bẹẹ, o ṣegbe lalai si atunṣe. Ko si ọkankan ninu awọn apọsiteli yoku ti o le ran an lọwọ tabi gba a la, nitori wọn ko mọ nkan ti o n ba kaakiri. O ti ṣe aṣepe iṣẹ lati bo ohun gbogbo mọlẹ pẹlu ẹri iwa rere ti o ni tẹlẹ. (Wo: Ìwé Òwe 28:13)

Ni kukuru, koko nkan ti a n sọ ni pe a gbọdọ kiyesara lati ma fi ominira wa ninu Kirisiti Jesu ṣe boju-boju fun ibi. Ki a ma fi igbẹkẹle awọn eniyan ninu wa gẹgẹ bi Kirisitiẹni rere ṣe boju-boju lati ma tan wọn jẹ, ja wọn lole, lu wọn ni jibiti tabi kẹ pakute iṣekuṣe fun wọn. Nṣe ni a o ma di ifarahan iṣẹ ibukun Ọlọrun ninu aye wa lọwọ, ti a ba n ṣe eyi. Ọlọrun si wa le ma sọ nkankan tààrà-táárá fun wa lori ọrọ yi, ti O ba gbagbọ pe a ti gbọ ọrọ rẹ to lati yi iṣesi wa pada. Lafikun, O le ma fun ẹnikẹni ni ifihan nipa wa ti yoo jẹ ki wọn le gba wa la. Ibi ti eyi ba si ti ri bẹ, o ṣeeṣe ki a kan parun lojiji lalai si atunṣe. Njẹ ki eyi ma jẹ ipin rẹ ni orukọ Jesu. Amin. Ṣugbọn dẹkun lati ma fi ominira rẹ ninu Kirisiti Jesu ṣe boju-boju fun ibi.

A ku oṣu tuntun.

Ìbòjú fún ibi | Láti ọwọ́: J.O. Lawal | Ọjọ́: Èrèlé 04, 2024 | Àtẹ̀léra: Látorí tábìlì Pásítọ̀ | Nọ́múbà: Vol. 12, No. 40 Read More »