ÀKỌ́RÍ: ÍDÁMẸ́WÀÁ | ÀYỌKÀ: DITARONOMI 14:22-29 | ỌJỌ́RÚ 23, Ọ̀WÀRÀ 2024

ÀKỌ́SÓRÍ: “Ẹ ri i daju pe ẹ n fi ida kan ninu mẹwaa ninu ire oko yin lọdọọdun pamọ si apakan.” (Ditarónómì 14:22)

Ọ̀RỌ̀ ÌSÀÁJÚ

Ki ni idamẹwaa? Bawo ni o ti ṣe ṣẹ? Aṣẹ wo ni a pa fun awọn iru ọmọ Israẹli lori idamẹwaa? Aṣẹ wo ni a pa fun awọn ọmọ Ọlọrun nipasẹ igbagbọ ninu Kirisiti lori rẹ? Njẹ ègún n bẹ lori ẹni ti ko ba san idamẹwaa bi? Ki gan an ni ifẹ Ọlọrun fun wa loni lori idamẹwaa? Awọn nkan ti a fẹ gbe yẹwo ninu ẹkọ yi niyi. Mo si gbadura pe ki Ọlọrun fun wa ni oye ti o peye lori ẹkọ naa, ki a ba le e ma mu ohun gbogbo ti o jẹ ifẹ rẹ fun wa ṣẹ. Amin.

KÍ NI ÌDÁMẸ́WÀÁ?

Ki ni idamẹwaa? Idamẹwaa jẹ ida kan ninu idasimẹwaa awọn nkan ti eniyan ba ni tabi ba ko lọwọ. Bawo wa ni o ṣe di ede ti a n fi igba gbogbo pe ni aarin awọn ọmọ Ọlọrun? O di ede ti a n fi igba gbogbo pe ni aarin wa nipasẹ oniruuru akọsilẹ lori awọn ti o fun Ọlọrun ni idamẹwaa ati aṣẹ Ọlọrun lori rẹ si awọn eniyan rẹ. Yatọ si eyi, o tun jẹ ọkan lara awọn nkan ti o ṣaba ma n fa ariyanjiyan laarin awọn ọmọ Ọlọrun. Nitorina, oye ohun ti o jẹ ati iha ti o yẹ ki a kọ si i ni ibamu pẹlu ifẹ Ọlọrun yẹ ki o ye wa.

Ti a ba wa fẹ ni oye ti o ye kooro lori idamẹwaa ati iha ti o yẹ ki a kọ si i ni ibamu pẹlu ifẹ Ọlọrun, a nilo lati fi ara balẹ wo nkan ti Ẹmi Mimọ sọ fun wa lori rẹ ninu bibeli, ki a si dirọ mọ ọn, bi o tilẹ yatọ si awọn nkan ti a ti kọ wa tabi gbagbọ lori rẹ tẹlẹtẹlẹ. Ki wa ni bibeli sọ lori idamẹwaa? Awọn nkan ti o sọ lori rẹ ṣe diẹ. Amọ awọn ti o ṣe pataki julọ lara wọn ni o ni i ṣe pẹlu ipilẹ idamẹwaa, ofin lori idamẹwaa, irufẹ idamẹwaa ti o wa ati nkan ti idamẹwaa n tọka si fun awọn eniyan Ọlọrun.

ÌPÌLẸ̀ ÌDÁMẸ́WÀÁ

Ki a wa ti ibi pẹlẹbẹ mu ọlẹ jẹ, ki a bẹrẹ lati ori ipilẹ idamẹwaa. Ibo ni o ti ṣẹ wa? Ta ni o kọkọ ṣan idamẹwaa? Ta ni ẹni naa fun un? Ta ni o pa laṣẹ fun un lati fun ẹni naa? Bi a ti ṣe ri ninu bibeli, Aburahamu ni ẹni akọkọ ti a ri ka ninu bibeli pe o san idamẹwaa. Iwọ naa wo nkan ti a kọ silẹ lori eyi:

“Nigba ti Aburamu ti ṣẹgun Kẹdolaomeri ati awọn ọba ti o pẹlu rẹ, ọba Sodomu lọ pade e rẹ ni afonifoji Safẹ (eyi ti o tumọ si Afonifoji ọba). Melkisedeki ọba Salẹmu (Jẹrusalẹmu) si mu ounjẹ ati ọti waini jade wa. Oun ni alufaa Ọlọrun, ọga ogo. O si sure fun Aburamu wi pe, “Ibukun ni fun Aburamu lati ọdọ Ọlọrun ọga ogo ti o da ọrun oun aye. Ibukun si ni fun Ọlọrun ọga ogo julọ ti o fi awọn ọta rẹ le ọ lọwọ.” Aburamu si fun un ni idamẹwaa ohun gbogbo.” (Jẹ́nẹ́sísì 14:17-19)

Njẹ o ri bayẹn pe Aburamu ni ẹni akọkọ ti bibeli tọkasi pe o san idamẹwaa. O ṣeeṣe ki a ri awọn miran ti wọn ti san idamẹwaa ṣaaju rẹ o. Amọ, ninu bibeli, oun ni ẹni akọkọ ti o san idamẹwaa. Alufaa Ọlọrun kan ni a si sọ wipe o san an fun. Melkisedeki ni a pe orukọ alufaa Ọlọrun yi.

Bawo wa ni ti Melkisedeki ṣe jẹ ti Aburamu fi fun ni idamẹwaa? Ki tilẹ lo ṣokunfa bi o ti ṣe fun ni idamẹwaa? Akọkọ naa, a ri wipe Aburamu ṣẹṣẹ pade ti oju ogun de ni asiko ti a n sọ yi ni. Melkisedeki si ni ẹni akọkọ ti o wa pade rẹ lati ki i ati lati fi ogo fun Ọlọrun lori iṣẹgun rẹ. O tilẹ tun mu ounjẹ ati waini lọwọ fun ajọyọ pẹlu Aburamu. Bawo wa ni tirẹ ṣe jẹ?

Bi a ti ṣe ri ninu bibeli, a ko sọ ọrọ pupọ lori ẹni ti ọkunrin jẹ ni abala iwe Jẹnẹsisi ti a ti kọkọ sọrọ rẹ kọja wipe o jẹ Alufaa Ọlọrun alaaye ati pe o jẹ Ọba Salẹmu. Ṣugbọn ninu iwe Heberu, ori ikeje, a jẹ ki o ye wa pe orukọ rẹ tunmọ si Ọba Ododo. A tun pe e ni Ọba Salẹmu, iyẹn Ọba alaafia. Yatọ si eyi, a jẹ ki o ye wa pe Alufaa Ọlọrun yi i ko ni iya tabi baba, ko si tun ni ibẹrẹ aye tabi opin aye. Iyẹn tunmọ si pe Alufaa Ọlọrun ni titi lailai ati wipe ko ki i ṣe eniyan tabi angẹli bikoṣe ifarahan Ẹmi Ọlọrun funrarẹ. (Wo: Hébérù 7:1-3)

Nibo wa ni Aburamu ti ba ẹni yi i pade? A ko sọ fun wa. A kan jẹ ki o ye wa pe o sure fun Aburamu ni ọjọ ti a n wi yi ati wipe Aburamu naa wa fun un ni idamẹwaa gbogbo ikogun ti o ri lẹyin igba ti o jagun gba Lọọti ati awọn ara Sodomu silẹ tan. Ta wa lo sọ fun Aburamu pe ko fun ẹni yi ni idamẹwaa ikogun rẹ? Ko si. O kan mọn ninu ọkan rẹ pe o yẹ ki oun ṣe bẹ ẹ ni. O kan mọ ni wipe o yẹ ki oun fun iriju Ọlọrun ti o tọ oun wa ni idamẹwaa gbogbo ere ogun rẹ lati mọ riri oore ti Ọlọrun ṣe fun un.

Nitorina, ifarahan fifunni ni idamẹwaa ti a kọkọ ri ninu bibeli ko ni i ṣe pẹlu aṣẹ Ọlọrun tabi ofin rẹ. Dipo bẹẹ, o ni i ṣe pẹlu ifihan ifẹ rẹ si ọkan ẹniyan. Ki si ni ifẹ yi? Oun naa ni pe o yẹ ki a ma fi tọkan-tọkan mọ riri didara rẹ si wa nipa fifun-un ni ida ti o jọju laara awọn nkan ti O ba fi ta wa lọrẹ.

Ibi keji ti a tun ti ri ifarahan idamẹwaa ninu bibeli ni eyi:

“Nigba ti Jakọbu ji loju oorun rẹ, o ro ninu ara rẹ pe, “Dajudaju Oluwa n bẹ ni ihin yii, emi ko si mọ.” Ẹru si ba a, o si wi pe, “Ihin yii ni ẹru gidigidi; Ibi ki i ṣe ibomiran bi ko ṣe ile Ọlọrun, ani ẹnu ibode ọrun niyii.” Jakọbu si dide ni kutukutu owurọ, o si gbe okuta ti o fi ṣe irọri lele bi òpó, o si da ororo si lori. O si pe orukọ ibẹ ni Bẹtẹli (Ile Ọlọrun) bi o tilẹ jẹ pe ilu naa n jẹ Lusi tẹlẹ ri. Jakọbu si jẹ ẹjẹ nibẹ pe, “Bi Ọlọrun yoo ba wa pẹlu mi, ti yoo si pa mi mọ ni irinajo mi ti mo n lọ, ti yoo si fun mi ni ounjẹ lati jẹ ati aṣọ lati wọ, ti mo si pada sile baba mi ni alaafia, nigba naa Oluwa ni yoo jẹ Ọlọrun mi, Okuta yii ti mo gbe kalẹ bi ọwọn yoo jẹ ile Ọlọrun, gbogbo ohun ti O ba si fun mi, emi yoo fun Ọ ni idamẹwaa rẹ.”” (Jẹ́nẹ́sísì 28:16-22)

Ta ni o sọ wipe oun yoo fun Ọlọrun ni idamẹwaa ninu awọn ẹsẹ bibeli yi? Jakọbu ni! Ki lo fa ti o fi fẹ fun Ọlọrun ni idamewaa? Ṣe Ọlọrun lo pa a lasẹ fun pe ki o ṣe bẹ ẹ ni? Rara o! Ọlọrun kan fi ara rẹ han ni ọjọ ti a n wi yi ni loju oorun. Nigba ti o si ji, o woye pe o yẹ ki o n juba Ọlọrun ti O fi ara rẹ han an. Idi niyi ti o fi ru ẹbọ ororo si, ti o si wa jẹjẹ pe ti Ọlọrun ba le mojuto oun, ki O si tun mu oun pada layọ wa si ile baba oun lẹyin irinajo ti o n rin, oun yoo fun ni idamẹwaa ohun gbogbo ti oun ba ni.

Iyatọ wo ni o wa wa laarin idamẹwaa ti Jakọbu ati ti Aburamu? Iyatọ akọkọ ti o wa nibẹ ni pe idamẹwaa ti Aburamu jẹ eyi ti o fun alufa Ọlọrun ti o fojuri, nigbati idamẹwaa ti Jakọbu jẹ ẹjẹ si Ọlọrun airi. A ko wa sọ ọna ti Jakọbu gba san ẹjẹ naa tabi asiko ti o san an ninu bibeli. Ṣugbọn a mọ wipe o di dandan fun un lati san an nitoripe Ọlọrun pa a mọ nitootọ, O si tun mu pada wa sile layọ.

Iyatọ keji ti o wa laarin idamẹwaa Jakọbu ati Aburamu ni pe nigbati Aburamu san idamẹwaa tirẹ lori kiki ikogun rẹ lẹyin igba ti o jagun-ṣẹgun ọba Kẹdolaomeri, Jakọbu pinu lati ṣan idamẹwaa tirẹ lori gbogbo nkan ti o ba ko pada wa sile gẹgẹ bi ini ati dukia rẹ lẹyin irinajo rẹ. Eyi jasi pe idamẹwaa ti Aburamu san ko ki i ṣe lori gbogbo nkan ti o ni. Bẹẹ si ni idamẹwaa ti Jakọbu san naa ko ki i ṣe lori gbogbo nkan ti o ti ni sẹyin ki o to rin irinajo lọ sọdọ Labani tabi lori awọn nkan ti o pada ni lẹyin igba ti o pada ti ọdọ Labani de e. Dipo eyi, o da lori kiki nkan ti o ri kojọ nigba ti o n ṣe atipo ni ile Labani.

Eyi si jẹ ki o ye wa pe awọn eniyan yii ko san idamẹwaa ni gbogbo igba tabi lọdọọdun tabi loṣooṣu tabi lọsọọsẹ. Dipo bẹẹ, wọn san bi o ti ṣe wa si wọn lọkan ni ati ni asiko ti o wa si wọn lọkan. Nitorina, ati Jakọbu ati Aburamu, ko si eyi ti Ọlọrun paṣẹ idamẹwaa fun ninu wọn. O kan wa lati inu ọkan awọn mejeeji lati fun ni idamẹwaa ni. Eyi si jasi pe, ni ibẹrẹpẹpẹ, idamẹwaa jẹ nkan ti awọn eniyan n fun Ọlọrun lati inu ọkan wọn wa. Wọn si n fun un nitori pe wọn oye ye wọn ninu ọkan wọn pe Ọlọrun jẹ ẹni ti o yẹ ki wọn ma fi nkan ini wọn bu ọla fun. Bi o si ṣe yẹ ki o ri niyi. Ohunkohun ti a ba fun Ọlọrun, yala idamẹwaa ni tabi ọrẹ, gbọdọ jẹ eyi ti a n fi fun un lati inu ọkan wa wa dipo afẹkunṣe. Bẹẹni, o gbọdọ jẹ nkan ti a fifun un nitoripe oye ye wa pe o tọna fun wa lati ma bu ọla ati iyi fun un pẹlu nkan ini wa.

ÌDÁMẸ́WÀÁ LÁBẸ́ ÒFIN MÓSÈ

Òfin ìdámẹ́wàá

Wayi o, lẹyin awọn apẹrẹ meji pere yi ti a ri ninu iwe Jẹnẹsisi lori sisan idamẹwaa, a ko ri akọsilẹ tabi aṣẹ tabi ikilọ miran mọ lori rẹ titi a fi ko awọn ọmọ Isiraẹli jade kuro loko ẹru. Lẹyin igba ti a ko wọn jade tan, ti Ọlọrun si ba wọn da majẹmu lati jẹ Ọlọrun wọn, ki wọn ba a le jẹ eniyan rẹ, ni a tun to gburo ọrọ lori idamẹwaa. Asiko yi si wa ni a fi idamẹwaa sisan lọlẹ fun awọn ọmọ Isiraẹli. Iwọ naa wo diẹ lara awọn aṣẹ ti Ọlọrun pa fun wọn lori rẹ:

“‘Gbogbo idamẹwaa ilẹ naa yala ti eso ilẹ ni, tabi ti eso igi, ti Oluwa ni. Mimọ ni fun Oluwa. Bi ẹnikẹni ba fẹ ra idamẹwaa nnkan rẹ pada: o gbọdọ fi marun-un kun un. Gbogbo idamẹwaa agbo ati ẹran ọsin, ani idamẹwaa ẹran to ba kọja labẹ ọpa-darandaran ki o jẹ mimọ fun Oluwa. Eniyan ko gbọdọ wadii boya o dara tabi ko dara, ko si gbọdọ paarọ rẹ. Bi o ba paarọ rẹ: ati eyi ti o paarọ ati eyi to fi paarọ ni ki o jẹ mimọ. Wọn ko gbọdọ ra a pada.’ Awọn aṣẹ wọnyi ni Oluwa pa fun Moṣe fun awọn ọmọ Isirẹli ni ori oke Sinai.” (Lẹ̀fítíkù 27:30-34)

Njẹ o ri bayi pe aṣẹ ni awọn nkan ti a kọ silẹ yi jẹ fun awọn ọmọ Isiraẹli lati ọdọ Ọlọrun. Aṣẹ lori kini? Aṣẹ lori idamẹwaa ni. Ki ni Ọlọrun ni ki wọn san idamẹwaa le lori? O ni ki wọn san idamẹwa lori gbogbo nkan oko wọn ati lori gbogbo nkan ọsin wọn. Lọna wo ni ki wọn gba a ya a sọtọ? Bi a ti ṣe ri ka ninu awọn ẹsẹ bibeli yi, wọn yoo ma a ka awọn nkan oko wọn ati nkan ọsin wọn ni ẹyọkọọkan de ori ikẹwa. Ikẹwa, eyi yowu ti o le jẹ, oun ni wọn yoo ya sọtọ gẹgẹ bi idamẹwaa fun Oluwa. Lotitọ, ere oko tabi nkan ọsin ikẹwa yi le ma dara. Amọ wọn ko ni anfaani lati paarọ rẹ. Ẹni ti o ba si wa wo pe oun ko le fun Ọlọrun ni idamẹwaa ti ko dara, ti o si fẹ paarọ rẹ, gbọdọ fi ati idamẹwaa ati eyi ti o fẹ ẹ fi paarọ rẹ silẹ fun Ọlọrun. Ofin idamẹwaa ni eyi.

Oríṣìríṣìí ìdámẹ́wàá

Ọna wo wa ni awọn ọmọ Isiraẹli ni lati gba lati san idamẹwaa wọn ati wipe tani o yẹ ki wọn san fun? Fun ọpọlọpọ ọdun ni ọpọ awọn onka bibeli fi gbagbọ pe gbogbo idamẹwaa ti awọn ọmọ Isiraẹli ba san ti awọn alufaa ati awọn ọmọ Lefi ni. Bẹẹ si ni a ri awọn abala bibeli ti o tọka si pe ti awọn alufaa ati awọn ọmọ Lefi ni awọn idamẹwaa ti awọn ọmọ Isiraẹli ba mu wa. Amọ bi a tun ti ṣe ri ni awọn abala bibeli miran, ko ki i ṣe gbogbo idamẹwaa naa ni o jẹ ti awọn alufaa ati awọn ọmọ Lefi.

Nitorinaa, ki a to le sọ pato ẹni ti o yẹ ki awọn ọmọ Isiraẹli fun ni idamẹwaa wọn ati ọna ti wọn yoo gba fun wọn, a nilo lati mọ oriṣi idamẹwaa ti o wa tabi ti Ọlọrun pa laṣẹ fun awọn ọmọ Isiraẹli. Oriṣi idamẹwaa melo ni o wa wa? Oriṣi idamẹwaa meji ni o wa. Akọkọ, eyi ti ọpọ eniyan si mọ daju, ni idamẹwa ti awọn alufaa ati awọn ọmọ Lefi n gba. Wo diẹ lara awọn nkan ti a sọ nipa eyi ninu bibeli:

“Oluwa sọ fun Aroni pe, “O ko ni ni ogun ninu ilẹ wọn bẹẹ ni iwọn ko ni ni ipin laarin wọn, Emi ni ipin ati ogun rẹ laarin awọn ọmọ Isirẹli. Mo ti fun awọn ọmọ Lefi ni gbogbo idamẹwaa ni Isirẹli gẹgẹ bi ogun fun iṣẹ ti wọn ṣe, nigba ti wọn n ṣiṣẹ nibi agọ ipade. Lati isinsinyii awọn ọmọ Isirẹli ko gbọdọ sunmọ agọ ipade, bi wọn ba ṣe bẹẹ wọn yoo jẹ iya ẹṣẹ wọn, wọn a si ku. Awọn ọmọ Lefi ni o gbọdọ ṣe iṣẹ ti o wa ninu agọ ipade, wọn yoo si jiya ẹṣẹ wọn bi wọn ba kuro lati ṣe e. Eyi ni ilana laelae fun awọn iran ti o n bọ. Wọn ko ni gba ogun kankan laarin awọn ọmọ Isirẹli. Kaka bẹẹ, mo fun awọn ọmọ Lefi gẹgẹ bi ogun wọn, ida kan ninu ida mẹwaa ti awọn ọmọ Isirẹli pese gẹgẹ bi ọrẹ si Oluwa. Eyi ni mo wi nipa wọn: Wọn ko ni gba ogun kankan laarin awọn ọmọ Isirẹli.” (Nọ́ḿbà 18:20-24)

“Sọ fun awọn ọmọ Lefi ki o si wi fun wọn pe: Nigba ti idamẹwaa ba n wọle lati ọdọ awọn ọmọ Isirẹli gẹgẹ bi ogun rẹ. O gbọdọ mu idamẹwaa lara rẹ gẹgẹ bi ọrẹ Oluwa. Bayi ni iwọ gan an naa yoo mu ọrẹ wa fun Oluwa lati ara idamẹwaa ti iwọ gba lati ọdọ awọn ọmọ Isirẹli. Lati ara idamẹwaa o gbọdọ mu ọrẹ Oluwa fun Aroni alufaa. Iwọ gbọdọ mu wa gẹgẹ bi ipin Oluwa eyi ti o dara julọ ati ti o jẹ mimọ julọ lara gbogbo nnkan ti wọn mu wa fun ọ.” (Nọ́ḿbà 18:26-29)

Pẹlu awọn nkan ti a ri ninu awọn ẹsẹ bibeli yi, awọn idamẹwaa ti awọn ọmọ Isiraẹli ba mu wa gbọdọ lọ si ọdọ awọn ọmọ Lefi. Idi si ni pe Ọlọrun ya wọn sọtọ fun iṣẹ ninu agọ rẹ, ko si fun wọn ini ni aarin awọn ọmọ Isiraẹli. Awọn naa tun wa gbọdọ ya idamẹwaa laara eyi ti wọn ba gba lọwọ ọmọ Isiraẹli sọtọ fun Ọlọrun. Eyi ni yoo si jẹ ti awọn alufaa ti o wa laarin wọn.

Amọ ṣa o, bi mo ti ṣe sọ siwaju, eyi ko tunmọ si pe gbogbo idamẹwaa ti awọn ọmọ Isiraẹli ba gba jọ naa ni o gbọdọ lọ si ọdọ awọn ọmọ Lefi ati awọn alufaa wọn. A tun ni oriṣi idamẹwaa miran, eyi si ni idamẹwaa ti awọn ọmọ Isiraẹli ni lati jẹ niwaju Ọlọrun. Iwọ naa wo nkan ti bibeli sọ lori eyi:

“Ki iwọ ki o ma ṣe jẹ idamẹwaa oka rẹ ninu ibode rẹ tabi ti waini rẹ, tabi ti ororo rẹ, tabi ti akọbi ọwọ-ẹran rẹ, tabi ti agbo-ẹran rẹ, tabi ti ẹjẹ rẹ ti iwọ jẹ, tabi ẹbọ ifẹ-atinuwa rẹ, tabi ẹbọ igbesọsoke rẹ. Bi ko ṣe ki iwọ ki o jẹ wọn niwaju Oluwa Ọlọrun rẹ, ni ibi ti Oluwa Ọlọrun rẹ yoo gbe yan, iwọ ati ọmọ rẹ ọkunrin ati ọmọ rẹ obinrin, ati ọmọ-ọdọ rẹ ọkunrin, ati ọmọ-ọdọ rẹ obinrin, ati ọmọ Lefi ti n bẹ ninu ibode rẹ: ki iwọ ki o si maa yọ niwaju Oluwa Ọlọrun rẹ ninu ohun gbogbo ti iwọ fi ọwọ rẹ le. Maa ṣọ ara rẹ ki iwọ ki o ma ṣe kọ ọmọ Lefi silẹ ni gbogbo ọjọ rẹ lori ilẹ.” (Ditarónómì 12:17-19)

“Ki iwọ ki o da idamẹwaa gbogbo ibisi irugbin rẹ, ti n ti oko rẹ wa ni ọdọọdun. Niwaju Oluwa Ọlọrun rẹ, ni ibi ti oun o gbe yan lati fi orukọ rẹ si ni ki iwọ ki o si maa jẹ idamẹwaa ọka rẹ, ti waini rẹ, ati ti ororo rẹ, ati akọbi ọwọ ẹran rẹ, ati ti agbo ẹran rẹ, ki iwọ ki o le maa kọ lati bẹru Oluwa Ọlọrun rẹ nigba gbogbo. Bi ọna ba si jin ju fun ọ, ti iwọ ki yoo fi le ru u lọ, tabi bi ibi ti Oluwa Ọlọrun rẹ yoo yan lati fi orukọ rẹ si ba jin ju fun ọ, nigba ti Oluwa Ọlọrun rẹ ba bukun ọ: njẹ ki iwọ ki o yi i si owo, ki iwọ ki o si di owo naa ni ọwọ rẹ, ki o si lọ si ibi naa ti Oluwa Ọlọrun rẹ yoo yan. Ki iwọ ki o si na owo naa si ohunkohun ti ọkan rẹ ba fẹ, si akọ maalu, tabi agutan, tabi waini, tabi ọti lile kan, tabi si ohunkohun ti ọkan rẹ ba fẹ: ki iwọ ki o si maa jẹ nibẹ niwaju Oluwa Ọlọrun rẹ, ki iwọ ki o si maa yọ, iwọ, ati awọn ara ile rẹ. Ati ọmọ Lefi ti n bẹ ninu ibode rẹ; iwọ ko gbọdọ kọ ọ silẹ; nitori ti ko ni ipin tabi ini pẹlu rẹ. Ni opin ọdun mẹta ni ki iwọ ki o mu gbogbo idamẹwaa ibisi rẹ wa ni ọdun naa, ki iwọ ki i o si gbe kalẹ ninu ibode rẹ. Ati ọmọ Lefi, nitori ti ko ni ipin tabi ini pẹlu rẹ, ati alejo, ati alaini-baba, ati opo, ti n bẹ ninu ibode rẹ, yoo wa, wọn o si jẹ, wọn o si yo; ki Oluwa Ọlọrun rẹ ki o le bukun fun ọ ninu gbogbo iṣẹ ọwọ rẹ ti iwọ n ṣe.” (Ditarónómì 14:22-29)

“Nigba ti iwọ ba da idamẹwaa ire oko rẹ tan ni ọdun kẹta, ti i ṣe ọdun idamẹwaa, ti iwọ si ti fun ọmọ Lefi, alejo, alainibaba, ati opo ki wọn maa jẹ ni ẹnu bode rẹ, ki wọn si yo; Nigba naa ni ki iwọ ki o wi niwaju Oluwa Ọlọrun rẹ pe, Emi ti mu ohun ọwọ kuro ninu ile mi, mo si ti fi wọn fun ọmọ Lefi, ati fun alejo, ati fun alaini baba, at fun opo, gẹgẹ bi gbogbo aṣẹ rẹ ti iwọ ti pa fun mi: emi ko re aṣẹ rẹ kọja, bẹẹ ni emi ko gbagbe wọn.” (Ditarónómì 26:12-13)

Ki ni awọn nkan ti a fi ẹsẹ wọn mulẹ fun wa lori idamẹwaa ninu awọn ayọka ẹsẹ bibeli wọnyi? Akọkọ naa ni pe ko ki i ṣe gbogbo idamẹwaa naa ni Ọlọrun ni ki wọn ma fun awọn ọmọ Lefi. Lotitọ, Ọlọrun ko fẹ ki awọn ọmọ Isiraẹli gbagbe awọn ọmọ Lefi wọnyi rara. Idi si ni pe wọn ko ni ipin tabi ini laarin wọn. Yatọ si eyi, bi mo ti ṣe sọ siwaju, Ọlọrun ti ya wọn sọtọ fun iṣẹ isin ti o ni i ṣe pẹlu agọ tabi tẹmupili rẹ. Nitorina, ebi ko gbọdọ pa wọn.

Amọ ko ki i wa ṣe gbogbo idamẹwaa naa ni a fi fun wọn. Bi a ti ṣe ri ninu awọn ẹsẹ bibeli ti o wa loke yi, ọdun kẹta-kẹta nikan ni a pa a lasẹ fun awọn ọmọ Isiraẹli lati ma ko gbogbo idamẹwaa wọn wa fun awọn ọmọ Lefi ati awọn alejo ati awọn alaini ati awọn opo ti o wa ni ilẹ naa. Eyi jasi pe ti a ba ti gba gbogbo idamẹwaa orilẹ-ede jọ tan ni ọdun kẹta-kẹta, awọn ọmọ Lefi ti o n ṣe amojuto rẹ gbọdọ ri daju pe awọn nikan kọ ni wọn pin laarin ara wọn. Wọn tun gbọdọ pin fun awọn alaini, awọn opo ati awọn alejo ti ko ri jajẹ ti o wa ni aarin wọn.

Ki wa ni ki awọn ọmọ Isiraẹli ṣe pẹlu awọn idamẹwaa ti wọn ba kojọ ni awọn ọdun ti o la awọn ọdun kẹta-kẹta wọnyi laarin? Aṣẹ Ọlọrun fun wọn ni pe ki wọn jẹ awọn idamẹwaa yi niwaju Oun ni ibi ti Oun yoo yan fun wọn lati ma jọsin. A si ri wipe Jerusalẹmu ni Ọlọrun yan fun wọn nigbẹyin-gbẹyin gẹgẹ bi ibi ti wọn yoo ti ma a jọsin rẹ. Nitorina, ibẹ ni gbogbo wọn yoo ma a lọ ni ọdọọdun pẹlu idamẹwaa wọn lati jẹ tayọtayọ niwaju Ọlọrun. Ọlọrun tilẹ sọ fun wọn pe awọn ti idamẹwaa wọn ba pọju lati gbe lọ si ibi ti O yan yi le ta a, ki wọn sọ di owo. Owo yii ni wọn yoo wa mu lọwọ lọ si ibi ti O yan fun wọn lati fi ra ohun yowu ti o ba wu wọn lati jẹ ati lati fi ṣe ajọyọ pẹlu awọn ẹbi wọn ati awọn iransẹ ati awọn ẹru wọn ati awọn ọmọ Lefi ati awọn talaka niwaju Ọlọrun.

Lotitọ, awọn nkan ti a n so nibiyi le ṣe ajoji si ọpọ ti ko gbọ wọn ri. Amọ nkan ti a sọ fun wa ninu bibeli ni eyi. Ki wa ni idi ti Ọlọrun fi fẹ ki wọn ma jẹ idamẹwaa wọn niwaju rẹ? A ko tọka si eyi fun wa ninu bibeli. A kan ṣa sọ fun wa pe Ọlọrun fẹ ki awọn ọmọ Isiraẹli ma fi idamẹwaa wọn ṣe ipade ajọyọ lọdọọdun niwaju Oun ni. Ọdun kẹta nikan ni o jẹ wipe idamẹwaa ti wọn ba kojọ yoo lọ si ọdọ awọ ọmọ Lefi. Eyi ni a ṣe pe ọdun kẹta ni ỌDUN IDAMẸWAA. Awọn ti o ba si pa aṣẹ yi mọ ni ọdun kẹta ni anfaani lati fi igbọran wọn gbadura si Ọlọrun lati bukun fun wọn.

Àpẹrẹ ìgbọ́ràn àti àìgbọ́ràn sí òfin ìdámẹ́wàá

Ṣe awọn ọmọ Isiraẹli wa gbọran si aṣẹ Ọlọrun lori idamẹwaa? Bi a ti ṣe ri ninu bibeli, ko ki i ṣe gbogbo igba naa ni wọn gbọran si aṣẹ rẹ lori idamẹwaa, iyẹn gẹgẹ bi orilẹ-ede, paapaa-julọ niti ọdun idamẹwaa. Eyi si pa wọn lara lọna ti o ga ju ọgbọn ati oye wọn lọ. Amọ ṣa o, a ri apẹrẹ igbọran wọn ni asiko Ọba Hẹsikaya. Ọba yi gbe igbesẹ ti o tọna lati ri wipe awọn eniyan Juda gbọran si aṣẹ Ọlọrun lati mu gbogbo idamẹwaa ti o tọ si awọn ọmọ Lefi ati awọn alufaa wa fun wọn ni asiko tirẹ. Iwọ naa wo awọn nkan ti a kọ silẹ fun wa ninu bibeli lori eyi:

“Pẹlupẹlu, o pasẹ fun awọn eniyan ti n gbe Jerusalẹmu lati fi ipin awọn alufaa ati awọn ọmọ Lefi, fun wọn ki wọn ki o le di ofin Oluwa mu ṣinṣin. Bi aṣẹ naa ti jade, awọn ọmọ Isiraẹli mu ọpọlọpọ akọso ọka waini ati ororo, oyin wa, ati ninu gbogbo ibisi oko; ati idamẹwaa ohun gbogbo ni wọn mu wa ni ọpọlọpọ. Awọn ọmọ Isiraẹli ati Juda, ti n gbe inu ilu Juda wọn-ọn-ni, awọn pẹlu mu idamẹwaa maalu ati aguntan wa ati idamẹwaa gbogbo ohun mimọ ti a ya si mimọ fun Oluwa Ọlọrun wọn. Wọn si ko wọn jọ ni okiti okiti. Ni oṣu kẹta, wọn bẹrẹ sii ko wọn jọ ni okiti wọn si pari rẹ ni oṣu keje. Nigba ti Hesekaya ati awọn ijoye de, ti wọn si ri okiti wọn-ọn-ni, wọn fi ibukun fun Oluwa ati Isiraẹli eniyan rẹ. Hesekaya si beere lọdọ awọn alufaa ati awọn ọmọ Lefi ni ti okiti wọn-ọn-ni. Asaraya, olori alufaa, ti ile Sadoku, si da a lohun, o si wi pe, Lati igba ti awọn eniyan bẹrẹ sii mu ọrẹ wa sinu ile Oluwa, awa ni to lati jẹ, o si tun ku pupọ silẹ: Oluwa ṣaa ti bukun awọn eniyan rẹ; eyi ti o ku si ni iṣura nla yii.” (2Kíróníkà 31:4-10)

Bi a ti ṣe ri nibiyi, nitori aṣẹ Ọba Hẹsikaya ni awọn eniyan ṣe mura lati mu gbogbo idamẹwa ti o tọ si awọn ọmọ Lefi ati awọn alufaa Ọlọrun ti o wa ni aarin wọn wa. A si ri wipe nigba ti wọn ṣe eyi, olori alufaa gan-an le jẹri si pe ounjẹ pọ jaburata fun gbogbo awọn ọmọ Lefi ati awọn alufaa yoku. Eyi ṣi jẹ ki ọba ati awọn ijoye rẹ fi ogo fun Ọlọrun ti O fi si ọkan awọn eniyan rẹ lati ṣe ifẹ rẹ. Amọ ka sọ wipe ọba yi ko pa a laṣẹ nkọ? O ṣeeṣee ki awọn eniyan ilẹ naa tẹsiwaju lati ma kọ iha kokanmi si ofin Ọlọrun lori idamẹwaa sisan. Eyi yoo si jẹ ki wọn tẹsiwaju lati ma ri idajọ Ọlọrun lori aigbọran wọn.

Bi a tun ti ṣe ri ninu bibeli, ni gbogbo asiko ti awọn ọmọ Isiraẹli ko fi pa ofin Ọlọrun lori idamẹwaa mọ ni idajọ rẹ n wa sori wọn. Lọna wo? Fun apẹrẹ, ni asiko wolii Malaki, Ọlọrun sọ eyi fun awọn eniyan Juda lori aigbọran wọn si ofin idamẹwaa:

“Eniyan yoo haa ja Ọlọrun ni ole bi? Ṣugbọn ẹyin ṣa ti ja mi ni ole. Ṣugbọn ẹyin wi pe, Nipa bawo ni awa ja ọ ni ole? Nipa idamẹwaa ati ọrẹ. Rire ni a o fi yin rẹ: nitori ẹyin ti ja mi ni ole, ani gbogbo orilẹ-ede yii. Ẹ mu gbogbo idamẹwaa wa si ile iṣura mi, ki ounjẹ baa le wa ni ile mi, ẹ si fi eyi dan mi wo nisinsinyi ni Oluwa awọn ọmọ-ogun wi, bi emi ki yoo ba ṣi awọn ferese ọrun fun yin, ki n si tu ibukun jade fun yin, to bẹẹ ti ki yoo si aye to lati gba a. Emi o si ba ajẹnirun wi nitori yin, oun ki yoo si run eso ilẹ yin, bẹẹ ni ajara yin ki yoo rẹ danu ninu oko, ni Oluwa awọn ọmọ ogun wi. Gbogbo orilẹ-ede ni yoo si pe yin ni alabukun-fun nitori ẹyin ti jẹ ilẹ ti o wu ni, ni Oluwa awọn ọmọ-ogun wi.” (Málákì 3:8-12)

Awọn wo ni Ọlọrun fi ẹsun ole-jija kan nibiyi? Ṣe gbogbo orilẹ-ede ni? Rara o! Kiki orilẹ-ede Juda ni Ọlọrun fi ẹsun yi kan. Idi si ni pe awọn nikan ni orilẹ-ede ti O fun ni ofin idamẹwaa. Bi a si ti ṣe ri, ẹsun lori aigbọran si ofin idamẹwaa ni O fi n kan wọn ninu awọn ẹsẹ bibeli yi. O n jẹ ki o ye wọn pe Oun gangan ni wọn n ja lole nipa kikọ lati mu gbogbo idamẹwaa ti o tọ si awọn ọmọ Lefi ati awọn alufaa wọn wa, iyẹn ni gbogbo awọn ọdun idamẹwa. Eyi lo si fa a ti oniruuru ajẹnirun ṣe n ba wọn finra, ti ojo ko rọ bi o ti ṣe yẹ ki o ma rọ, ti oniruuru adanu si n ba iṣẹ ọwọ wọn. O wa ṣeleri fun wọn pe ti wọn ba le ronupiwada, Oun yoo ba ajẹnirun wi fun wọn ati wipe Oun yoo ri wipe wọn pada di alabukunfun ni aarin gbogbo orilẹ-ede yoku.

Ju gbogbo rẹ lọ, nkan ti a n sọ naa ni wipe ofin idamẹwaa ti o wa ninu iwe Ofin Mose wa fun awọn ọmọ Isiraẹli nikan. A ko fi fun gbogbo eniyan. Nitorina, egun ti Ọlọrun sọ wipe o wa lori awọn ọmọ Isiraẹli fun bi wọn ko ṣe pa ofin idamẹwaa mọ ko si lori gbogbo eniyan. Njẹ eyi wa tunmọ si pe ko tọna ki awọn ti ko ki i ṣe ọmọ Isiraẹli lati ma san idamẹwa? Rara o! O tọna. O tọna nitoripe bi a ti ṣe sọ siwaju, awọn eniyan ti n fun Ọlọrun ni idamẹwaa ki a to fun awọn ọmọ Isiraẹli ni Ofin Mose. Amọ wọn ko fun un ni awọn idamẹwaa yi nitoripe a pa a lasẹ fun wọn. Dipo bẹẹ, wọn fun un nitoripe a fun wọn ni oye lati ṣe bẹẹ nipa ifihan, o si tun wa lati inu ọkan wọn lati ṣe bẹẹ. Ọna ti wọn gba ṣe e ati awọn nkan ti o sọrọ mọ bi wọn ṣe gba ṣe e nikan naa ni o yatọ.

ÌDÁMẸ́WÀÁ LÁBẸ́ MÁJẸ̀MÚ TITUN

Bawo wa ni ti idamẹwaa labẹ majẹmu titun, iyẹn laarin awọn onigbagbọ ninu Jesu Kirisiti? Iha wo ni o yẹ ki wọn kọ si? Ti a ba wo oniruuru ijọ Ọlọrun loni, a o ri wipe oniruuru iha ni wọn kọ si ọrọ lori idamẹwaa. Awọn kan ka a si aṣẹ Ọlọrun fun gbogbo awọn Kirisitiẹni pẹlu. Nitorina, ni iwoye ti wọn, Kirisitiẹni yowu ti ko ba pa ofin idamẹwaa mọ naa wa ni abẹ egun, bi Ọlọrun ti ṣe sọ fun awọn Juu igba aye wolii Malaki. Bẹẹ si ni, a tun ri awọn ijọ miran ti wọn n sọ pe idamẹwaa ko kan ọmọ Ọlọrun. Ki ni idi? Ni iwoye ti awọn naa pẹlu, Jesu ti pa Ofin Mose ti o sọ idamẹwaa sisan di ọranyan rẹ. Nitorina, ko si nkan ti o kan ọmọ Ọlọrun kankan pẹlu a n san idamẹwaa.

Ewo wa ni iha ti o tọ ki a kọ si ọrọ idamẹwaa ninu awọn iha mejeeji yi? Bi a ti ṣe ri ninu bibeli, ko si eyi ti o tọ ninu iha mejeeji. Lakọkọ, bi a ti ṣe sọ siwaju, kiki orilẹ-ede Isiraẹli ni Ọlọrun fun ni ofin idamẹwaa, ko ki i ṣe gbogbo orilẹ-ede. Nitorina, ẹni ti ko ba ki i ṣe Juu ko si ni abẹ ofin idamẹwa, ko si si ẹnikẹni ti o gbọdọ mu ni tipatipa lati pa a mọ. Ọlọrun ko tilẹ ni ṣe idajọ ẹni naa lọna-kọna nipa Ofin Mose, ofin ti ko fun un. Wo nkan ti Pọọlu sọ lori eyi:

“Nitori Ọlọrun kii ṣe ojuṣaaju ẹnikẹni. Nitori iye awọn ti o ṣẹ ni ailofin, wọn o gba ijiya wọn gẹgẹ bi alailofin: ati iye awọn ti o ṣẹ labẹ ofin, awọn ni a o fi ofin da lẹjọ.” (Róòmù 2:11-12)

“Awa si nmọ pe ohunkohun ti ofin ba wi, o n wi i fun awọn ti o wa labẹ ofin, ki ẹnikẹni ma baa ni awawi kan, ati ki a le mu gbogbo araye wa sabẹ idajọ Ọlọrun.” (Róòmù 3:19)

Njẹ o ri bayẹn? Gbogbo nkan ti Ọlọrun pa a lasẹ fun awọn ọmọ Isiraẹli lori idamẹwaa ko kan awọn Keferi rara. Nitoriana, a ko le ba wọn ja tabi fi wọn re nitoripe wọn ko pa wọn mọ. Ọrọ nla!

Ẹkeji, Jesu ti fi opin si iṣẹ Ofin Mose nipasẹ iku rẹ nitootọ. Iṣẹ Ofin Mose wo ni O fi opin si? Iṣẹ Ofin Mose ti o fi iyapa si aarin awọn Juu ati awọn orilẹ-ede agbaye yoku ati iṣẹ Ofin Mose ti o n pe akiyesi eniyan si ẹṣẹ ṣugbọn ti ko ni agbara lati gba a lọwọ ẹṣẹ tabi lati sọ ọ di olododo niwaju Ọlọrun. Iwọ naa wo diẹ laara nkan ti a sọ nipa Ofin Mose ati nkan ti Jesu ṣe si i:

“Nitori naa ofin ti jẹ olukọni lati mu eniyan wa sọdọ Kirisiti, ki a le da wa lare nipa igbagbọ. Ṣugbọn lẹyin igba ti igbagbọ ti de, awa ko si labẹ olukọ mọ. Nitori pe ọmọ Ọlọrun ni ẹyin n ṣe, nipa igbagbọ ninu Kirisiti Jesu. Nitori pe iye ẹyin ti a ti batisi ninu Kirisiti, ti gbe Kirisiti wọ. Ko le si Juu tabi Heleni, ẹru tabi ominira, ọkunrin tabi obinrin: nitori pe, ọkan ni gbogbo yin jẹ ninu Kirisit Jesu.” (Gàlátíà 3:24-28)

“Nitori Kirisiti ni alaafia wa, ẹni ti o ti ṣe Juu ati Keferi ni ọkan, ti o si ti wo ogiri iṣodisi ti n bẹ laarin wa palẹ; O si ti fi opin si ọta naa ninu ara rẹ, ani ofin ati aṣẹ wọn-ọn-ni ti n bẹ ninu ilana; ki o le sọ awọn mejeeji di ẹni tuntun kan ninu ara rẹ, ki o si ṣe ilaja.” (Éfésù 2:14-15)

Njẹ o ri bayẹn? Yala Juu ni ọ ni tabi Keferi, niwọn igba ti o ba ti wa ninu Kirisiti Jesu, o ko si ni abẹ Ofin Mose mọ. Ko si ni dara ki o gbiyanju lati fi ara rẹ si abẹ rẹ. Nitoripe ko si anfaani kankan ti eyi yoo ṣe ọ. Idi si ni yi ti Kirisitẹni ko fi le tẹle Ofin Idamẹwaa ti a fifun awọn ọmọ Isiraẹli. Ko tilẹ ni itunmọ ki o tẹlẹ ofin naa. Nitoripe, yoo tunmọ si pe iwọ naa yoo ma jẹ idamẹwaa rẹ niwaju Ọlọrun fun odidi ọdun meji gbako. Yatọ si iyẹn, ibo ni o fẹ wa awọn ọmọ Lefi ati awọn alufaa iran Aaroni lọ lati ma ko idamẹwaa rẹ fun ni ọdun kẹta-kẹta?

Ṣe o wa ri idi bayi ti ko fi si aṣẹ kankan tabi ilana kankan ti a kọ silẹ lati ọdọ awọn apọsiteli igbaani lori idamẹwaa? Ko ki i ṣe wipe wọn ko mọ nipa idamẹwaa tabi wipe wọn gbagbe nipa rẹ. Oye rẹ ye wọn daradara. Amọ wọn ni imọ pe ko ki i ṣe aṣẹ fun awọn Kirisitiẹni lati ma a tẹlẹ.

Wayi o, pẹlu gbogbo nkan ti a sọ silẹ yi, njẹ ko fẹrẹ dabi ẹni pe ko yẹ ki Kirisitiẹni ma san idamẹwaa rara? Lotitọ, o fẹrẹ jọ bẹẹ. Amọ ko ki i ṣe bẹẹ. Ko ki i ṣe bẹẹ nitoripe bi a ti ṣe sọ siwaju, awọn eniyan ti n fun Ọlọrun ni idamẹwaa awọn nkan ti wọn ni ki a to fun awọn ọmọ Isiraẹli ni Ofin Mose. Ọlọrun si n tẹwọgba lọwọ wọn nitoripe wọn n fi fun un pẹlu igbagbọ ati ọkan ti o peye. Niwọn igba ti eyi si ribẹ, a jẹ wipe Ọlọrun ko tako ki a ma fun un ni idamẹwaa wa niyẹn. Amọ awa naa gbọdọ fifun un nigbakigba ti a ba n fifun un pẹlu igbagbọ wipe O lẹtọ si i. A si gbọdọ ṣe eyi pẹlu ọkan ti o peye.

Ta wa ni o yẹ ki a fun ni idamẹwaa wa, niwọn igba ti o jẹ wipe a ko ni nkankan ṣe pẹlu ofin idamẹwaa ti inu awọn Iwe Mose? Tani Jakọbu fun ni idamẹwaa tirẹ? A ko sọ fun wa. Tabi ṣe o jẹ idamẹwaa rẹ bi awọn ọmọ Isiraẹli ṣe ma n jẹ ti wọn ni? A ko sọ fun wa. Amọ a sọ fun wa ẹni ti Aburahamu fun ni idamẹwa tirẹ. Melkisedeki alufaa Ọlọrun Ọga-ogo ni o fun ni tirẹ. O tunmọ si pe iranṣẹ Ọlọrun ti Aburahamu bọwọ fun ni o tẹwọgba idamẹwaa rẹ.

Bi a si tun ṣe ri ni abẹ Ofin Mose, awọn iranṣẹ Ọlọrun naa ni a pa a laṣẹ pe ki awọn eniyan naa ma fun ni idamẹwa wọn ni ọdun kẹta-kẹta. Awọn iranṣẹ Ọlọrun yi ni yoo wa mọ bi wọn yoo ti ṣe jẹ ki o de ọdọ awọn opo, alaini-baba, alejo ati bẹẹbẹẹ lọ. Nitorina ti awa naa ba fẹ san idamẹwaa wa fun Ọlọrun, yoo mu ọgbọn wa fun wa lati fi fun awọn iranṣẹ Ọlọrun ti a yan le wa lori.

Ba wo wa ni ki a ṣe ma fun Ọlọrun ni idamẹwaa wa ni lemọlemọ si? Ko si ẹni ti o le kọ wa ni eyi? O ni i ṣe pẹlu ifihan Ọlọrun si ọkan wa ati bi oye rẹ ti ṣe mulẹ to ninu ọkan wa. Ẹ ranti pe ko ki i ṣe aṣẹ ni fifun Ọlọrun ni idamẹwaa jẹ fun wa. Dipo eyi, o jẹ nkan ti o gbọdọ wa lati ọkan wa lati ṣe, gẹgẹ bi o ti wa lati ọkan Aburahamu ati Jakọbu lati fun ni idamẹwaa awọn nkan wọn ni asiko kan. Amọ, bi a tun ti ti ṣe ri ninu bibeli, nigbati Aburahamu fun Ọlọrun ni idamẹwaa rẹ, alufaa Ọlọrun ti o gba ni ọwọ rẹ suure fun un. Nitorinaa, bi awa naa ba ṣe pongbẹ fun ire awọn iransẹ Ọlọrun wa si ni ki a ṣe ma fi idamẹwaa wa sọwọ́ si wọn ni lemọlemọ si.

ÌTỌ́JÚ ÀWỌN ÌRÁNṢẸ́ ỌLỌ́RUN LÁBẸ́ MÁJẸ̀MÚ TITUN

Nigba ti ọrọ wa ri bayi, ti o jẹ wipe idamẹwaa sisan ko ki i ṣe ofin fun awọn Kirisitiẹni, bawo ni ki wọn ṣe ma ṣe itọju awọn iranṣẹ Ọlọrun ti o wa lori wọn? Akọkọ naa, ti awa naa ba pinnu lati ma fi gbogbo idamẹwaa wa ṣọwọ si awọn ti o jẹ iranṣẹ Ọlọrun lori wa fun itọju wọn, ko lewọ rara. Ko ṣa ti wa lati ọkan wa lati ṣe bẹẹ ni o ṣe pataki ju.

Amọ, bi a ko tilẹ ṣe eyi, a ri wipe Kirisiti ti pa a laṣẹ fun wa lati ma ṣe ipinfunni ti o nitumọ pẹlu awọn ti o jẹ adari wa ninu ijọ, ti o n bọ wa pẹlu ọrọ rẹ. Iwọ naa wo diẹ lara aṣẹ ti a pa fun wa:

“Gẹgẹ bẹẹ ni Oluwa si ṣe ilana pe, awọn ti n waasu iyinrere ki wọn o si maa jẹ nipa iyinrere.” (1Kọ́ríntì 9:14)

“Ṣugbọn ki ẹni ti a n kọ ninu ọrọ naa maa ṣe alabaapin ohun rere gbogbo ti o ni fun ẹni ti n kọ ọ.” (Gàlátíà 6:6)

Njẹ o ri bayẹn? Yala a fun awọn iranṣẹ Ọlọrun ti o wa lori wa ni idamẹwaa wa tabi a ko fun wọn, ojuṣe wa ni lati ri wipe ebi ko pa wọn ati wipe awọn naa n ri ọwọ yọ. Ṣe a wa ri igbọran si eyi ninu bibeli bi? Bẹẹni, a ri igbọran si, gẹgẹ bi a tun ti ṣe ri aigbọran si.

Akọkọ naa, aigbọran si aṣẹ Oluwa yi ni o fa ọpọ nkan ti Pọọlu sọ fun awọn ara Kọrinti lori fififun awọn ti o n bọ wọn pẹlu ọrọ Ọlọrun (1Kọ́ríntì 9) Ko si ki wa ṣe kiki awọn ijọ Kọrinti nikan ni o kuna lori ọrọ yi. Ọpọlọpọ ijọ ti Pọọlu jẹ adari fun ni o kuna lori rẹ. Wo nkan ti o sọ fun awọn ara ijọ Filipi lori ọrọ yi i kanna:

“Ẹyin paapaa ṣa mọ pẹlu, ẹyin ara Filipi, pe ni ibẹrẹ iyinrere, nigba ti mo kuro ni Makedonia, ko si ijọ kan ti o fun mi ni iranlọwọ owo, bi ko ṣe ẹyin nikanṣoṣo. Nitori nigba ti mo wa ni Tẹsalonika, ẹyin ranṣẹ, ẹ si tun ranṣẹ lati pese fun aini mi.” (Fílípì 4:15-16)

Njẹ o ri bayẹn? Ni aarin gbogbo awọn ijọ awọn Keferi ti Pọọlu ti ṣiṣẹ iranṣẹ, ijọ Filipi nikan ni o mu aṣẹ Ọlọrun lati tọju awọn iranṣẹ Ọlọrun wọn ni asiko yi ṣẹ. Njẹ eyi wa bojumu bi? Ko bojumu rara. Eyi si wa lara awọn nkan ti o n ti awọn alufaa loni ti wọn fi n kan an ni tipatipa pe ki awọn Kirisitiẹni naa ma pa ofin idamẹwa ti a fun awọn ọmọ Isiraẹli mọ. Ẹru n ba wọn pe ti wọn ko ba ṣe eyi, o ṣeeṣe ki ebi lu awọn pa, ki awọn si ma ri ọwọ yọ, nigba ti awọn ọmọ ijọ wọn ba kọ lati pa aṣẹ Ọlọrun ti o sọ pe ki wọn ma tọju wọn mọ.

Sibẹsibẹ, ko si awawi fun iranṣẹ Ọlọrun kankan lati ṣi awọn ọmọ Ọlọrun lọna lori ọrọ idamẹwaa. Pọọlu ko wa awawi lati ṣi wọn lọna. Awọn apọsiteli yoku igbaani naa ko wa awawi lati ṣi awọn ọmọ Ọlọrun lọna lori ọrọ idamẹwaa. Dipo bẹẹ, nṣe ni wọn kọ wọn ni awọn nkan ti o yẹ ki o ye wọn lori ififuuni. Idi niyi ti wọn fi le yọ ọpọ awọn ọmọ Ọlọrun kuro ninu iṣẹ ni asiko yi. Wo diẹ lara nkan ti a sọ lori eyi:

“Awọn apọsiteli si n fi agbara nla jẹrii ajinde Jesu Oluwa; Ọlọrun si fun wọn ni oore-ọfẹ pupọ. Nitori ko si ẹnikan ninu wọn ti o ṣe alaini: nitori iye awọn ti o ni ilẹ tabi ile n ta wọn, wọn si mu owo ohun ti wọn ta wa. Wọn si mu wọn wa fun awọn apọsiteli, lati pin in fun olukuluku awọn ti o ṣe alaini, gẹgẹ bi aini wọn.” (Ìṣe Àpọ́sítélì 4:33-35)

Ki lo fa ti awọn apọsiteli fi fi agbara nla jẹrii ajinde Jesu Oluwa? Ara nkan ti o fa ni pe wọn ni anito ati aniṣẹku ohun gbogbo. Nitorina, wọn le pa ọkan pọ lati ṣe iṣẹ ti Ọlọrun gbe le wọn lọwọ. Ọpọ oniwaasu loni ni ko le pa ọkan pọ lati ṣe iṣẹ ti Ọlọrun gbe le wọn lọwọ. Ara idi si ni pe awọn ọmọ Ọlọrun ti wọn n ṣakoso ko mu itọju wọn ni pataki. Nitorina, wọn nilo lati sare-siwa ati ṣẹyin lati le mojuto ara wọn ati awọn ẹbi wọn. Ka wa lọ sọ wipe Pọọlu ni aya ati ọmọ nile ni, o ṣeeṣe ki oun naa ma le ṣe iṣẹ iranṣẹ rẹ bi o ti ṣe tọ ati yẹ pẹlu iha ti ọpọ ijọ kọ si itọju rẹ.

Ṣugbọn, a ri ninu awọn ẹṣẹ bibeli ti o wa loke yi pe ko ri bẹẹ rara nigba ti ijọ bẹrẹ. Awọn ọmọ Ọlọrun n mu nkan wa loorekoore fun awọn adari wọn ninu ijọ. Eyi si jẹ ki wọn le gbaju mọ iṣẹ iranṣẹ wọn. Yatọ si eyi, o tun jẹ ki wọn le tọju awọn alaini ti o wa ninu ijọ bi o ti ṣe yẹ. Ka wa lọ sọ wipe diẹ perete lara wọn ni o n mu nkan wa fun awọn iranṣẹ Ọlọrun wọn yi ni, ṣe wọn o le yọ awọn eniyan kuro ninu iṣẹ debi wipe ko ni si alaini kankan ni aarin wọn? Wọn ko ni le e ṣe bẹ.

Nitorina, yatọ si ti ojukokoro ọpọ adari ijọ loni, ara idi ti ijọ Ọlọrun ko ṣe ni agbara owó to lati yọ awọn ọmọ ijọ wọn kuro ninu iṣẹ ni pe ọpọ wa ya ahun si awọn adari wọnyi. Ṣe adari ijọ ti ko i ti ri ounjẹ jẹ tabi ti ko i ti ri owo ile-iwe awọn ọmọ rẹ san ni yoo ma a lepa lati yọ ẹnikẹni kuro ninu iṣẹ? Ohun ti eniyan ko ba ni, ko le fun ẹlomiran. Nitorina a nilo lati ronupiwada gidi lori ọrọ yi. Aijẹbẹ, bi o ti wu ki a mura si adura to, ọpọ ninu ijọ ni ko ni kuro ni ipo talika tabi akuṣẹ.

Ki ẹ si wa ma wo o, ko si ẹnikẹni ninu wa ti ko le pa aṣẹ Kirisiti lori ọrọ yi mọ o. Idi si ni pe ilana Ọlọrun ni pe ki gbogbo ifififunni wa wa ni ibamu pẹlu nkan ti a ni dipo nkan ti a ko ni. Idi niyi ti Jesu fi gboriyin fun opo talika kan ti o kan fi owo-idẹ wẹwẹ meji silẹ gẹgẹ bi ọrẹ lọjọ kan. Lotitọ, ọrẹ rẹ kere jọjọ loju awọn eniyan. Amọ ko kere rara loju Ọlọrun. Jesu tilẹ sọ wipe ọrẹ rẹ lo tobi julọ niwaju Ọlọrun ninu gbogbo ọrẹ ti awọn eniyan fi silẹ lọjọ naa. Ki lo faa? Nkan ti o fa a naa ni pe arabinrin yi fi ọrẹ rẹ silẹ ni ibamu pẹlu nkan ti o ni. Gbogbo nkan ti o ni lọwọ ni o tilẹ ko silẹ lọjọ naa. Nitori eyi, ti awa naa ba n fi tọkantọkan fifun awọn ti o jẹ iransẹ Ọlọrun le wa lori ni ibamu pẹlu bi a ti ṣe ni lọwọ si, Ọlọrun yoo tẹwọgba ọrẹ wa, bi awọn funra wọn gan ko tilẹ tẹwọgba.

(Wo: Lúùkù 21:1-2; 2Kọ́ríntì 8:12)

Ọ̀RỌ̀ ÌPARÍ

Ju gbogbo rẹ lọ, nkan ti a fẹ ki o ye wa naa ni pe sisan idamẹwaa wa ni ibamu pẹlu ifẹ Ọlọrun, o si ma n fa ìre awọn iransẹ Ọlọrun sori eniyan. Amọ ko si ẹnikẹni ti o wa labẹ egun loni nitoripe ko ki i san idamẹwaa. Ṣugbọn ẹni ti o ba fẹ ki ibukun Ọlọrun ṣiṣẹ ninu aye oun lẹkunrẹrẹ, gbọdọ kọ lati ma pa aṣẹ rẹ mọ lori ififunni, paapaa-julọ si awọn iransẹ Ọlọrun, yala o n san idamẹwa tabi ko san an.

ÌBÉÈRÈ

– Bawo ni o ṣe ro wipe ẹkọ yi ṣe pataki to fun awọn ọmọ Ọlọrun?

Láti ọwọ́ Johnson O. Lawal

Copyright © 2024 Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07025105978)