Olufẹ: Ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olurapada wa. Kaabọ si ọsẹ miran ninu oṣu Ọ̀wàrà 2023. Mo gbadura pe ki ọkan rẹ ma fi gbogbo igba gba okun lati ma ṣe tẹba ti ohunkohun ti o ba kere si nkan ti Ọlọrun fẹ ki o ni ati ki o gbadun laye yi, ni orukọ Jesu. Amin.
Ọkan lara awọn nkan ti a ri ninu Iwe mimọ ni pe Ọlọrun ko ki i fi tipatipa mu eniyan lati tẹwọgba ipese rẹ fun wọn ati lati gbadun rẹ. Ti a ko ba ni tẹwọgba oun ti O n naa si wa, O le ma ṣe ohunkohun lati ri daju pe a ri gba. Ti a ko ba si tun pinnu lati ma tẹba ti ohun yowu ti ko ba to ohun ti O fẹ ki a ni, O le ma ṣe nkankan lati ri wipe a ni ohun gbogbo ti O fẹ ki a ni.
Fun apẹrẹ, bi a ti fi han wa ninu bibeli, nigbati Ọba Jehoasi ti Isiraẹli lọ ki Wolii Eliṣa ki o to ku, o fi ara rẹ han bi ẹni ti ko ni itara to lati ni iriri irufẹ iṣẹgun ti o ga ti Ọlọrun fẹ ki o ni lori awọn ọta rẹ. Bi akọsilẹ naa ṣe lọ, Eliṣa sọ fun ọba yi lasiko yi pe ki o mu ọrun kan ati ọfa melokan lati ta. Ki si ni idi? Ṣe o fẹ ki o fi da oun laraya ni? Rara o! Dipo eyi, nkan ti o ni ki o ṣe yi jẹ nkan àmì ninu ẹmi. Bi Eliṣa ti ṣe jẹ ki o ye, awọn ọfa ti yoo taa yi jẹ ọfa Oluwa fun iṣẹgun lori awọn ara Aramu. (Wo: 2Àwọn Ọba 13:14-17)
Ki o to di asiko yi, awọn ara Aramu ti n pọn awọn ọmọ Isiraẹli loju gidigidi. Ọrọ naa si buru debi wipe a ko fi silẹ fun baba Jehoasi yi ti o ti jade laye ju aadọta ọkunrin ẹlẹṣin, kẹkẹ ogun mẹwa ati ẹgbẹrun mẹwa ọmọ ogun ẹlẹsẹ — gbogbo iyoku awọn ọmọ-ogun rẹ ni a ti parun patapata (2Àwọn Ọba 13:7). Nitorina, ti ilẹ naa yoo gba idande, ki a si tun fi idi rẹ mulẹ sinu iṣoriire bi tatẹyinwa, yoo nilo lati ni iṣẹgun leralera lori awọn ara Aramu yi ni iye igba ti o ba wu ki o jẹ.
Amọ eyi yoo nilo ki iyanu ṣẹlẹ. Ọlọrun yoo nilo lati da si ọrọ naa ati lati fun wọn ni iṣẹgun lera-lera ki wọn ba le bọ patapata kuro ninu ipọniloju awọn ara Aramu. Ki wa lo de ti ko gbe igbesẹ, ki O si fun wọn ni gbogbo iṣẹgun ti wọn nilo? Ṣe ọrọ wọn ko jẹ ẹ logun to lati ṣe bẹẹ ni? Abi ṣe dandan ni ki wọn kọkọ gbadura si ki O to fi han pe ọrọ wọn jẹ Oun logun ni?
Ni kukuru, lati dahun awọn ibere wọnyi, ọrọ awọn ọmọ Isiraẹli yi jẹ Ọlọrun logun nitootọ, O si tun fẹ tu wọn silẹ kuro lọwọ awọn ti o n niwọn lara. Bi a si ṣe ri ninu itan naa, ko tilẹ ṣetan lati duro de igba ti gbogbo wọn ba to korajọpọ lati gbadura si ki O to ṣe nkankan lori ọrọ wọn. Amọ ṣa o, ko fẹ ṣe ohunkohun lori ọrọ wọn lalai kọkọ jẹ ki wọn mọ pe Oun ni O n ṣiṣẹ. Aijẹbẹ, wọn le gbe oriyin ti o yẹ ki wọn gbe fun fun ara wọn tabi fun awọn oku oriṣa kan. Idi si ni yi ti O fi sọ fun Eliṣa lati kọkọ sọ fun ọba wọn nipa ohun ti O fẹ ṣe fun wọn ki o to bẹrẹ si ni ṣẹlẹ.
Nibakanna, awọn asiko kan ma n wa ti Ọlọrun le nilo lati fi awọn iran tabi ala kan han wa tabi ki O ran awọn wolii tabi angẹli kan si wa ki O to ṣe awọn nkankan fun wa. Idi si ni ki a ba le mọ wipe aṣeyọri, iwosan tabi aabo ti a n jẹgbadun ko ki i ṣe eyi ti o ti ara ṣababi tabi ohun ti a ṣiṣẹ tọ funra wa jade wa. Dipo eyi, o jẹ eyi ti o ti ara iṣẹ rere rẹ ninu aye wa jẹ jade.
Siwaju si, Ọlọrun fẹ ki ọba yi, Jehoasi, ri bi oun tikararẹ ṣe ni itara si lati bori awọn ọta rẹ ati lati fi idi orilẹ-ede rẹ mulẹ ninu alaafia ati iṣoriire. Nitorina, O sọ fun Eliṣa lati sọ fun pe ki o ta awọn ọfa iṣẹgun lori awọn ara Aramu ti o wa lọwọ rẹ. O wa ṣeni laanu pe, bi o tilẹ jẹ wipe ọkunrin yi mọ nkan ti o sọrọ mọ nkan ti o n ṣe, ọfa mẹta pere ni o ta ti o fi ṣiwọ. Eyi tunmọ si pe o tẹ ẹ lọrun lati bori awọn ara Aramu ni igba mẹta pere. (Wo: 2Àwọn Ọba 13:18)
Ṣe iṣẹgun igba mẹta pere wa to lati ba gbogbo ajaga ti a gbe le awọn ara Isiraẹli lori jẹ patapata? Rara! Eliṣa gan, ti ko ki i ṣe jagunjagun tabi oloṣelu, mọ wipe iṣẹgun ẹẹmẹta leralera lori awọn ara Aramu ko to lati fun wọn ni alaafia ni kikun. Wọn yoo nilo iṣẹgun leralera bi igba marun tabi mẹfa ki eyi to le waye. Ibanujẹ ni o wa jẹ wipe, fun awọn idi kan tabi omiran, olori ilẹ wọn, ẹni ti o tun jẹ aṣoju gbogbo wọn niwaju Ọlọrun, pinnu lọkan tirẹ pe iṣẹgun igba mẹta leralera ti to fun oun. Ọlọrun si fi aṣẹ si. Ko tilẹ wa sọ fun pe ki o lọ tun aṣiṣe rẹ ṣe. Nṣe ni O kan bu ọwọ lu nkan ti o yan.
Nibakanna, ti awa naa, yala nitori ẹru, imẹlẹ tabi ẹ̀mí-ìjákulẹ̀, ba lọ tẹwọgba ohunkohun ti o kere si nkan ti Ọlọrun fẹ ki a ni, O ṣeeṣe ki Oun naa fi ọrọ naa silẹ bẹẹ. Ṣugbọn laipẹ jọjọ ni yoo ye wa pe ohun yowu ti o ba kere si nkan ti Ọlọrun fẹ ki a ni ko le fi igba kankan to fun iriri alaafia, isinmi ati isesorere ti O fẹ ki a jẹgbadun laye. Nitorina, ninu ibaṣepọ rẹ pẹlu Ọlọrun, ma tun lailai lọ fun ohunkohun ti ko ba kaju nkan ti O fẹ ki o ni tabi ti o nilo mọ. Aijẹbẹ, o le fi gbogbo ayeraye rẹ kabamọ pe o ṣe bẹẹ.
Ki o ni ọsẹ ti o ga.
Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)