CyberHawk – Page 2 – Búlọ́ọ̀gì Wa | Ìjọ Òtítọ́ Bíbélì

Ọ̀tá ara rẹ | Pst. J.O. Lawal | Òkúdù 26, 2022 | Vol. 11, No. 8

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Tayọtayọ ni mo fi ki ọ kaabọ sinu ọsẹ ti o kẹyin oṣu Òkúdù 2022. Adura mi si ni pe ki Ọlọrun ya aye rẹ ya ohun gbogbo ti o n di ifarahan ibukun rẹ lọna ti o peye ninu aye rẹ lọwọ, ni orukọ Jesu. Amin.

Ninu ààlọ́ ti Jesu pa lori ọkunrin kan ti o fun awọn iranṣẹ rẹ ni owo kan lati fi ṣiṣẹ, a ri ẹkọ atigbadegba kan ti o ṣe pataki dimu. Oun naa si ni pe ẹnikẹni ti ko ba ni fi ọpọlọ pipe ṣe amulo awọn ibaṣepọ, amuyẹ, anfaani tabi oore-ọfẹ ti Ọlọrun fun laye yi ko ni pọ si ni iṣẹ rere ati ni awọn nkan daradara ti aye yi. Kiki awọn ti o ba n lo ọpọlọ wọn lati fi gbogbo igba ṣe amulo awọn nkan ti Ọlọrun fun wọn ni yoo tẹsiwaju lati ma pọ si ni iṣẹ rere ati ni nkan daradara.

Bi akọsilẹ naa ti ṣe lọ, ọkunran kan ti o n lọ si irin-ajo jinjin pinnu lọkan rẹ lati fun awọn ọmọ ọdọ rẹ kan ni diẹ lara owo rẹ, ki wọn ba le fi ṣiṣẹ. Eyi jasi pe ko fẹ ki owo rẹ kan joko kalẹ sinu kolo rẹ, ki eruku ma bo mọ ibẹ nigba ti ko ba si nile. Nitorina, o fun awọn iranṣẹ rẹ lara rẹ lati ṣiṣẹ, gẹgẹ bi ipa ẹnikọọkan wọn ti mọ. O fun ẹnikan ni talẹnti marun-un. O fun elomiran ni talẹnti meji. O si tun fun elomiran ẹwẹ ni talẹnti kan.

Wayi o, lẹyin ọjọ pipẹ, ọkunrin yi pade lati irin-ajo rẹ, o si bẹrẹ si ni ṣe agbeyẹwo nkan ti awọn ọmọ ẹyin rẹ ṣe pẹlu owo ti o fun wọn. Si iyalẹnu rẹ, meji pere lara wọn ni o ṣiṣẹ pẹlu owo ti o fun wọn, ti wọn si sọ di pupọ si. Ọkunrin ti o gba talẹnti marun-un jẹ ere talẹnti marun-un miran pẹlu owo ti a fun. Bẹẹ si ni pẹlu, ọkunrin ti o gba talẹnti meji naa jẹ ere talẹnti meji miran pẹlu owo ti a fun. Amọ awawi lasan ni ọkunrin ti a fun ni talẹnti kan mu wa. Ko ṣe nkankan pẹlu talẹnti ti a fun. Nitorina ko jẹ ere kankan pẹlu rẹ.

Ki wa lo fa ti ọkunrin yi ko fi ṣe nkankan pẹlu talẹnti tirẹ? Idahun ti awọn eniyan ṣaba ma n fun ibere yi ni pe ọkunrin yi ko ṣe nkankan pẹlu talẹnti tirẹ nitoripe o woye pe o ti kere ju, ti a ba ṣe afiwe re pẹlu eyi ti a fun awọn yoku. Ṣugbọn eyi ko ki i ṣe idi ti ko fi lo rara. Lakọkọ, oluwa wa fun ẹnikọọkan wọn ni owo ti o fun un ni ibamu pẹlu ipa rẹ. Nitorina, nkan ti ipa iranṣẹ yi ka ni a fun. Ekeji, awọn olukọtan jẹ ki o ye wa pe talẹnti kan ni akoko yi dabi ki a ko owo iṣẹ ojumọ alagbese kan jọ fun bi ogun ọdun. Nitorina, ọpọlọpọ owo ni a fun ọkunrin yi.

Eyi wa jẹ ki o ye wa pe ko ki i ṣe nitoripe owo ti a fun kere ni ko ṣe ṣe nkankan pẹlu rẹ. Dipo bẹẹ, gẹgẹ bi ọrọ oun funrarẹ, nitoripe ẹru lati padanu owo naa n ba a ni ko ṣe ṣe nkankan pẹlu rẹ (Matiu 25:25). Ṣugbọn bi oluwa rẹ ti ṣe sọ fun, ti o ba jẹ wipe o fi owo yi si ile ifowopamọsi ni, nṣe ni ko ba gba a pada pẹlu èlé lori rẹ. Nitorina, ẹ̀rù ko to gẹgẹ bi idi fun lati ma ṣe nkankan pẹlu aduru owo nla yi. O ni iṣoro miran, eyi si ni imẹlẹ. O tunmọ si pe nitoripe ọkunrin yi ya ọlẹ ninu ọpọlọ rẹ ati pẹlu ọwọ rẹ ni ko ṣe gbiyanju rara lati wo ọna ti o le gba sọ owo ti a fun di pupọ si. Nitori eyi, o wa papa jẹ ki nkan ti oluwa rẹ ko fẹ ki o ṣẹlẹ ṣẹlẹ — o jẹ ki owo rẹ kan wa ni ojukan laipọsi.

Ki a ma fa ọrọ gun, yatọ si ijiya ti a fun ọkunrin ọlẹ ati alailere yi, oluwa rẹ tun paṣẹ pe ki a gba owo ti a fun kuro lọwọ rẹ, ki a si fun ọkan lara awọn iransẹ ti wọn ti fi ara wọn han gẹgẹ bi ẹni ti o dangajia lati ri nkan gba si lọwọ ọga wọn. Ni ipari, Jesu Oluwa wa wa sọ wipe bi nkan ti ṣe ri gẹlẹ niyi ninu ijọba Ọlọrun. Awọn ti o ba kọbiara si nkan ti Ọlọrun fun wọn – eniyan, dukia, amuyẹ, ẹbun, ẹkọ, ipo ati bẹẹbẹẹ lọ – bi o ti wu ki awọn nkan yi kere tabi ki wọn ma ṣe pataki to – ti wọn si n ṣe amulo to peye wọn nikan naa ni yoo tẹsiwaju lati maa gbe ga ati lati jẹ ki wọn ma pọ si ni nkan rere. Ṣugbọn awọn ti ko ṣe nkankan pẹlu nkan ti O fun wọn ko ni ireti mi ju pe ki a tun gba nkan ti a fun wọn kuro lọwọ wọn, bi o ti wu ki nkan naa kere to. Eyi si ni alaye fun bi awọn otoṣi eniyan ni ọpọ igba ṣe ma n toṣi si ati ti awọn olowo ati gbajumọ eniyan ni ọpọ igba ṣe ma n di olowo ati ilumọọka si.

Nitorina, ti o ko ba ma ṣe amulo awọn nkan ti Ọlọrun fun ọ tabi tí Ó ti jẹ ki o ri gba nipa oore-ọfẹ rẹ, nṣe ni o n fi ara rẹ han bi alailere ati bi ẹni ti ibi giga ko tọ si laye yi. Iwọ gan an wa ni ọta ara rẹ lori ọrọ yi, bi awawi rẹ ṣe wu ko ri. Iwọ ni o n de ara rẹ lọna, ti o si tun n ja ara rẹ kulẹ. Nitorina, ma ṣe reti ki nkan dara si fun ọ nigba ti o jẹ pe yoo buru si ni.

Wayi o, adura mi ni pe ki nkan ma fi gbogbo igba dara siwaju ati siwaju fun ọ dipo ko ma buru si. Ṣugbọn gbigbadura nipa rẹ nikan ko to. Iwọ na nilo lati ji kuro ninu oorun rẹ, ki o ye wa awawi fun ikuna tabi ìṣẹ́ rẹ mọ, ki O si ṣe ìdámọ̀ ati àmúlò ohun gbogbo ti Ọlọrun fun ọ ti o le lo lati pọ si ni iwulo, iṣẹ rere ati dukia ni aye yi. Bi o ba si ṣe n ṣe eyi, iyalẹnu ni yoo jẹ fun ọ nigba ti o ba ri bi awọn iIbukun Ọlọrun ti o ti farasin ninu aye ṣe bẹrẹ si ni farahan ni ẹkunrẹrẹ.

Ki o ni ọsẹ alarinrin.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ọ̀tá ara rẹ | Pst. J.O. Lawal | Òkúdù 26, 2022 | Vol. 11, No. 8 Read More »

Ẹ̀KỌ́ NÍNÚ ÌWÉ TẸSALÓNÍKÀ KÍNNÍ. | AYỌKA: 1TẸSALÓNÍKÀ 2:13-16 | ỌJỌ́RÚ 08, ÒKÚDÙ 2022

Leave a Comment

ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ

Ninu ẹkọ ti a kọ pari ninu lẹta Pọọlu kinni si ijọ Ọlọrun ti o wa ni Tẹsalonika, a ri irufẹ iṣẹ iranṣẹ ti o le mu ifẹ Ọlọrun wa si imuṣẹ laarin alaigbagbọ ati laarin awọn ti o gbagbọ pẹlu. Eyi si jẹ iṣẹ iranṣẹ ti afojusun rẹ duro lori bi yoo ṣe gba oriyin Ọlọrun dipo oriyin eniyan ati eyi ti ko ki i wo bi nkan ba ti ṣe rọrun si ki o to fi ara rẹ jin fun ifẹ Ọlọrun. Amọ ṣa o, pe iṣẹ iranṣẹ ojiṣẹ Ọlọrun kan munadoko ko wa tunmọ si pe o di dandan ki o so eso rere ninu aye awọn ti o ba tọ wa tabi ti o n waasu si. Iha ti awọn ti a mu ọrọ Ọlọrun tọ wa ba kọ si ọrọ ti a mu tọ wọn wa naa ni ipa pataki lati ko lori irufẹ eso ti aye wọn yoo so.

Fun apẹẹrẹ, bi o tilẹ jẹ wipe iṣẹ iranṣẹ Mose munadoko, ti o si jẹ eyi ti Ọlọrun funrarẹ tẹwọgba, ko so eso rere ninu aye ọpọ awọn ọmọ Isiraẹli ti o ko jade lati ilẹ Ijibiti. Gẹgẹ bi a ti fi ye wa ninu bibeli, ọpọlọpọ wọn ni ko wọ ilẹ ileri ti a mu wọn jade lati wọ. Ki si ni idi? Idi ni pe wọn ko kọ iha ti o tọ si iṣẹ iranṣẹ Mose ati awọn ọrọ Ọlọrun ti o mu tọ wọn wa. Nitorina, ọtọ ni ki ojiṣẹ Ọlọrun ja fafa, ki o si mu iṣẹ ti Ọlọrun gbe fun ni pataki ati pẹlu ọkan ti o pe; ọtọ si tun ni ki awọn ti a ran si naa mu ọrọ Ọlọrun ti o mu tọ wọn wa ni pataki, ki wọn si gba pẹlu ọkan ti o pe. Aijẹbẹ, ete Ọlọrun ko ni wa si imuṣẹ lori aye wọn.

Wayi o, a n sọ eleyi kí á ma bà rò wípé òjíṣẹ́ Ọlọrun naa ni a gbọdọ da ẹbi le lori ti awọn ọmọ ijọ rẹ ko ba dagba soke ninu ẹmi tabi ki wọn ma rin ni pipe niwaju Ọlọrun, bi o ti ṣe tọ ati yẹ. Ọpọ ninu ijọ ni ko dagba soke bi o ti ṣe tọ loni nitoripe awọn funra wọn ko kọ iha ti o tọ si iṣẹ iranṣẹ awọn ti a ran si wọn. Ọpọ ni o si wa ni ipo aigbagbọ loni pẹlu, ti Eṣu ati awọn ọmọ ogun rẹ n pọn loju nitoripe wọn kọ lati ṣe amulo oore-ọfẹ Ọlọrun ti a n mu tọ wọn wa lojoojumọ tabi loorekoore.

Ranti pe Jesu Oluwa wa sọ wipe, “Ẹni ti o ba gba wolii ni orukọ wolii, yoo jẹ ere wolii; ẹni ti o ba si gba olododo ni orukọ olododo yoo jẹ ere olododo.” (Matiu 10:41) O si sọ eyi nitoripe ọpọ awọn eniyan rẹ, iyẹn awọn Juu ti O ni anfaani lati jẹ igbadun iṣẹ iranṣẹ rẹ ni ko jẹ igbadun rẹ. Ki si ni idi? Idi ni wipe wọn ko gbaagbọ tabi gba ọrọ Ọlọrun ti O mu tọ wọn wa gbọ. Nitorina, ọrọ rẹ ko so eso ti Ọlọrun fẹ ki o so ninu aye wọn. Ti iṣẹ iranṣẹ Jesu ba wa kuna lati so eso rere ninu aye ọpọ ti o ni oore-ọfẹ lati gbọ ọrọ rẹ, o yẹ ki a mọ pe ko si ara kankan ti iranṣẹ rẹ kankan le da ti awọn ti a ran si ba kuna lati gba ọrọ rẹ gbọ, ki wọn si ṣiṣẹ ni ibamu pẹlu rẹ. (Wo: Johanu 1:10-13; Johanu 15:18-25)

ÌHÀ TÍ Ó TỌ́ SÍ Ọ̀RỌ̀ ỌLỌ́RUN

Nkan ti a n sọ nipe ko si bi iṣẹ iranṣẹ awọn ojiṣẹ Ọlọrun ti o n tọ wa wa ṣe le munadoko to, ti a ko ba tẹwọgba wọn ati ọrọ Ọlọrun ti wọn n mu tọ wa wa bi o ti ṣe tọ ati bi o ti ṣe yẹ, iṣẹ iranṣẹ wọn ko ni so eso rere ninu aye wa. Gẹgẹ bi Pọọlu ti sọ siwaju ninu lẹta yi, iṣẹ iranṣẹ rẹ so eso rere ninu aye awọn ara Tẹsalonika to bẹẹ gẹẹ ti iroyin igbagbọ wọn ṣe n tan kalẹ kaakiri gbogbo ilu ati awọn agbegbe ti o yi wọn ka. Ki lo si fa? Iha ti wọn kọ si iṣẹ iranṣẹ apọsiteli yi ati awọn alabaṣiṣẹpọ rẹ ni o fa. Iwọ naa wo nkan ti Pọọlu sọ lori eyi:

“Nitori eyi ni awa ṣe n dupẹ lọwọ Ọlọrun pẹlu ni aisinmi. Pe nigba ti ẹyin gba ọrọ ti ẹyin gbọ lọdọ wa, ani ọrọ Ọlọrun, ẹyin ko gba a bi ẹni pe ọrọ eniyan. Ṣugbọn ẹ gba a gẹgẹ bi o ti jẹ nitootọ, bi ọrọ Ọlọrun, eyi ti o ṣiṣẹ gidigidi ninu ẹyin ti o gbagbọ pẹlu.” (1Tẹsalonika 2:13)

Njẹ o ri bayi? Awọn ara Tẹsalonika yi ko ri ọrọ Ọlọrun ti a mu tọ wọn gba gẹgẹ bi ahesọ ṣugbọn wọn ri gẹgẹ bi otitọ ọrọ Ọlọrun. Lotitọ, ko ki i ṣe bi ẹnu oniwaasu ba ṣe dun si tabi bi o ba ṣe mọ ọrọ gbe kalẹ si ni yoo ṣokunfa igbagbọ awọn ti o ba gbọ ọrọ rẹ. Iṣẹ Ẹmi mimọ ni lati jẹ ki awọn eniyan ri ọrọ Ọlọrun gẹgẹ bi otitọ ninu ọkan wọn, ki wọn si gbe igbesẹ ti o tọ lori rẹ (Johanu 16:8-11; 1Kọrinnti 12:3). Amọ ẹni ti o ba ni lọkan lati ṣe ifẹ Ọlọrun tẹlẹ ni yoo kọbiara si oye ti Ẹmi Ọlọrun fẹ fi ye lori otitọ ọrọ rẹ (Jọhanu 7:17). Ẹni ti ko ba fẹ ṣe ifẹ Ọlọrun ko ni kọbiara si ọrọ rẹ, bi o tilẹ mọ ninu ọkan rẹ pe otitọ ni.

Awọn ara Tẹsalonika, ti wọn ti fi igba kan ri jẹ abọriṣa gba ọrọ Ọlọrun ti Pọọlu mu tọ wọn wa gẹgẹ bi otitọ. Eyi si fi ye wa pe awọn ti o gbagbọ yi ti ni lọkan lati mọ otitọ ati lati ṣiṣe le lori ki wọn to ṣe alabapade iṣẹ iranṣẹ Pọọlu. Niwọn igba ti wọn si ti gbagbọ, ọrọ Ọlọrun ti wọn gbọ bẹrẹ si ni ṣisẹ ninu aye wọn, o si bẹrẹ si ni so eso ti Ọlọrun fẹ ko so nibẹ, to bẹẹ gẹ ti Pọọlu ṣe tẹsiwaju lati sọ nipa wọn pe, “Nitori, ara, ẹyin ṣe afarawe awọn ijọ Ọlọrun ti n bẹ ni Judia, ninu Kirisiti Jesu. Idi ni pe ẹyin pẹlu jiya ju wọn lọ lọwọ awọn ara ilu yin, gẹgẹ bi awọn pẹlu ti jiya lọwọ awọn Juu.” (1Tẹsalonika 2:14)

Nibakanna, ti awa naa ba fẹ ṣe ifẹ Ọlọrun, ti a ba ni lọkan lati pilẹ aye wa ati ohun gbogbo ti a n ṣe lori otitọ, o di dandan ki a gba ọrọ otitọ rẹ gbọ nigba yowu ti o ba tọ wa wa. Ti a ba si gba ọrọ otitọ rẹ gbọ, o di dandan ki o ṣiṣẹ ninu aye wa, ki o si so eso ti Ọlọrun fẹ ki o so. Ti a ba wa woye pe aye wa ko so eso ti Ọlọrun fẹ ki o so tabi pe ko lọ ni ibamu pẹlu ifẹ rẹ, nṣe ni o yẹ ki a kọkọ wo iha ti a kọ si ọrọ rẹ dipo ti a o fi ma da awọn ojiṣẹ rẹ ti a ran si wa lẹbi.

Ọpọ ni o n lọ lati inu ijọ kan de inu ijọ miran loni, bi ọpọ miran si tun ṣe n lọ lati ori oke kan de ori oke miran. Ki lo si fa? Wọn ko ni igbagbọ to ninu iṣẹ iranṣẹ awọn alufa tabi adari ijọ wọn. Amọ bi mo ti ṣe sọ siwaju, ko ki i ṣe gbogbo igba naa ni o jẹ wipe iṣẹ iransẹ awọn ti a ran si wa ti ko munadoko to ni ko jẹ ki aye wa dagba soke tabi lọ siwaju bi o ti ṣe tọ ati bi o ti ṣe yẹ. Niwọn igba ti a ko ba ti kọ iha ti o tọ si iṣẹ iranṣẹ wọn, ko si ni bi aye wa yoo ṣe jere iṣẹ iranṣẹ naa.

ỌRỌ IPARI

Ọrọ Ọlọrun lagbara lati ṣiṣẹ ninu aye wa fun imuṣẹ ifẹ rẹ. Amọ ti a ko ba kọ iha ti o tọ si, ki a si gba ọrọ rẹ bi ọrọ rẹ dipo bi ọrọ eniyan, ko ni so eso rere ninu aye wa, bi o ti wu ki awọn ti o n bọ wa pẹlu ọrọ rẹ munadoko to.

IBEERE

– Ki ni o ro pe o fa ti ọpọ ko ki fi gba ọrọ Ọlọrun gẹgẹ bi ọrọ rẹ ninu ijọ loni?

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

Ẹ̀KỌ́ NÍNÚ ÌWÉ TẸSALÓNÍKÀ KÍNNÍ. | AYỌKA: 1TẸSALÓNÍKÀ 2:13-16 | ỌJỌ́RÚ 08, ÒKÚDÙ 2022 Read More »

Tan ìhìnrere náà kálẹ̀. | Pst. J.O. Lawal. | Òkúdù 19, 2022. | Vol. 11, No. 7

Leave a Comment

Olufẹ: ki oore-ọfẹ ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu yi. Mo gbadura pe ki a ka ọ yẹ fun ipe Ọlọrun ti o ti ri gba ninu ọsẹ naa ati ni gbogbo iyoku ọjọ aye rẹ. Amin.

Ọkan lara awọn nkan ti Oluwa n reti ki ẹnikọọkan ti o ti jẹ ajogun didara ati igbala rẹ ma ṣe ni titan ihinrere awọn nkan ti O ti ṣe fun wọn de ọdọ awọn miran. Nipa ṣiṣe eyi, awọn ti wọn ba tan ihin naa de ọdọ wọn yoo le ni iwuri lati wa sọdọ rẹ lati ni iriri didara rẹ ninu aye ti awọn naa. Fun apẹẹrẹ, lẹyin igba ti O ti tu ọkunrin were ti awọn legioni ẹmi eṣu n gbe inu rẹ silẹ tan, Oluwa sọ fun pe, “Lọ si ile rẹ ki o si sọ fun awọn ara ile rẹ, bi Oluwa ti ṣe ohun nla fun ọ, ati bi o si ti ṣaanu fun ọ.” (Maaku 5:19)

Njẹ ọkunrin yi wa ṣe bi Oluwa ti paṣẹ fun bi tabi ko ṣe bẹẹ? O ṣe bẹẹ! Ka tilẹ sọ otitọ, o ṣe ju bi a ti lero pe yoo ṣe lọ. Ko ki i ṣe awọn ara ile rẹ nikan ni o sọ nkan ti Ọlọrun ṣe fun fun. Nṣe ni o tun lọ kaakiri lati ma sọ fun gbogbo awọn ti o bikita lati gbọ tirẹ ni agbegbe kan ti a n pe ni ‘Dekapoli, eyi ti o tunmọ si ‘Ilu Mẹwa’.

Iwọ naa gbe yẹwo. Ọkunrin yi lọ kaakiri agbegbe ilu mẹwa tan, o si n sọrọ nipa nkan ti Jesu ṣe fun nibẹ. Ki ni idi? Akọkọ, idi ni pe o mọ nkan ti Oluwa ṣe fun loore gidigidi. Ekeji, idi ni pe o fẹ ki awọn miran ti wọn wa labẹ ide Satani naa mọ pe wọn le gba idande nipa titọ Oluwa wa, bi o ti wu ki ọrọ wọn buru to.

Nibakana, ti Oluwa ba ti dara si wa nitootọ ninu ijọ wa, ojuṣe wa si ni lati jẹ ki awọn miran mọ nipa rẹ. Ti o ba jẹ pe nitootọ ni O n yi aye wa pada si rere, ti O si n mu ki a ni itẹsiwaju nipasẹ ọrọ rẹ, o wa yẹ ki a jẹ ki awọn ọrẹ, ẹbi, akẹgbẹ wa ni ibi iṣẹ tabi ni ile-ẹkọ ati aladugbo mọ pe awọn naa le jẹ alajọpin didara rẹ pẹlu wa. Bi mo si ti ṣe sọ siwaju, Ọlọrun funrarẹ n reti pe ki a ṣe eyi. Idi si ni pe ọkan pataki lara awọn idi ti O fi n ṣe rere fun wa ni ki a ba le jẹ ilẹkun fun lati le wọnu aye awọn ti o wa ni ayika wa, ki O si ṣe rere fun awọn naa pẹlu.

Nkan ti eyi wa tunmọ si ni pe ti a ba kọ lati tan ihinrere didara rẹ si wa de ọdọ awọn ti o wa ni ayika wa, ko ki i ṣe pe a n fi ara wa han gẹgẹ bi alanikanjọpọn nikan, nṣe ni a tun n di iṣẹ rẹ lọwọ. Ko si wa si bi a o ṣe ma fi anikanjọpọn di iṣẹ Ọlọrun lọwọ ti a ko si ni jẹ iya rẹ, okere ni o tabi o pọ. Boya eyi gan tilẹ ni idi ti awa kan fi n ni iriri ainitẹsiwaju ninu aye wa. Yoo wa bojumu ti a ba tete ronupiwada, ki a si bẹrẹ si ni fi itara dari awọn ti o wa ni ayika wa lati ni iriri didara Ọlọrun ti a n jẹ igbadun rẹ lọwọlọwọ.

Wayi o, eyi ko wa jasi pe ki a fi túláàsì tabi àrékérekè mu ẹnikẹni lati di alabapin pẹlu wa ninu igbadun didara Ọlọrun. Dipo bẹẹ, o tunmọ si pe ki a ṣe ohun gbogbo ti o wa ni ikawọ wa lati fun iye awọn yowu ti a ba ni oore-ọfẹ lati fun ni iwuri lati wa sọdọ Oluwa funra wọn, ki wọn ba le ri bi O ti ṣe le dara si wọn ati ṣe wọn ni aanu to. Ki Ẹmi Ọlọrun si ma fi gbogbo igba kọ ọkan wa ati fun un ni okun lati mu ọrọ yi ni pataki ninu aye wa, ni orukọ Jesu. Amin.

Ki o ni ọsẹ alarinrin.

Tan ìhìnrere náà kálẹ̀. | Pst. J.O. Lawal. | Òkúdù 19, 2022. | Vol. 11, No. 7 Read More »

Fi ara rẹ si ipo irẹlẹ. | Pst. J.O. Lawal. | Òkúdù 12, 2022. | Vol. 11, No. 6

Leave a Comment

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Òkúdù 2022. Mo si gbadura pe ki Ọlọrun jẹ ki ọkan rẹ wa ni itẹriba niwaju rẹ ni gbogbo igba, ki ainitẹsiwaju ma ba gba ijọba aye rẹ, ni orukọ Jesu. Amin.

Gẹgẹ bi a ti sọ fun wa ninu bibeli, idi ti angẹli Ọlọrun ti a n pe ni Satani loni fi di ẹni ti a n pe ni Satani ni igberaga. Ni ibẹrẹ-pẹpẹ, Ọlọrun da ni pipe ninu ẹwa ati ninu ọgbọn, a si tun fi si ipo nla laarin awọn angẹli Ọlọrun yoku. Ṣugbọn nigba ti o jẹ ki ẹwa rẹ ko si lori, Ọlọrun re jabọ kuro ni ipo atata ati ipo agbara ti o wa. (Isikiẹli 28:11-19)

Ki wa ni idi ti a fi sọ eyi fun wa ninu bibeli? Oun naa ni ki a le mọ pe Ọlọrun korira igberaga. Ki lo si fa ti O fi korira igberaga? Idi ni pe igberega jẹ ami wipe a ko fẹ gbe oriyin ti o jẹ tirẹ fun lori awọn nkan daradara ti a ni tabi ti a n gbe ṣe. Bi a si ti ri ninu bibeli, gbogbo wa ko jẹ nkankan lalaisi Ọlọrun ati pe a ko le da ohunkohun ni lailisi rẹ. Oun ni ẹlẹda wa ati ẹlẹda ohun gbogbo ti o n bẹ. Nitorina, ko si nkan ti a le sogo le lori ninu aye yi tabi ninu aye eyi ti o n bọ. Òun ti wà ki ohun gbogbo to wa ati pe ohun gbogbo wa lati ọdọ rẹ, wọn si tun jẹ tirẹ. (Wo: Saamu 24:1; Kolose 1:16:17; Ifihan 4:11)

Ṣugbọn nigba ti a ba kọ lati gba ododo yi, ti a si bẹrẹ si ni ṣe bi pe a ja mọ nkan, boya si Ọlọrun tabi si awọn eniyan, nṣe ni a n gbe ara wa gori ẹṣin aáyán, ti a si n fi ara wa si ipo ti Ọlọrun yoo fi re wa jabọ, gẹgẹ bi O ti ṣe re Satani jabọ. Bibeli sọ wipe, “Ọlọrun n kọ oju ija si awọn agberega; ṣugbọn O n fi oore-ọfẹ fun awọn onirẹlẹ.” Nitorina, iru ẹni yowu ti a jẹ tabi ipo yowu ti a wa ni aye yi, ni kete ti a ba ti fi aye gba igberaga ninu aye wa, ni kete ti a ba ti bẹrẹ si ni ronu tabi wiwu bi igba ti o jẹ pe Ọlọrun ni wa naa ni a o ti ri pe O ti n doju ija kọ wa. Ti a ba si wa kọ lati ronupiwada ni kiakia, ko ni pẹ rara ti a o fi ri pe a ti di ẹni itẹmọlẹ tabi pe a ti di ero ọrun apadi. (Wo: Jemisi 4:6; 1Peteru 5:5)

Nitorina, ma ṣe fi aye silẹ fun irufẹ igberaga kankan ninu aye rẹ, bi o ti wu ki aye ma lọ ni mẹlọmẹlọ fun ọ to tabi bi ipo atata ti o wa ti le ga to tabi bi o ti wu ki o wulo ni ọwọ Ọlọrun to. Ranti pe Satani naa ti fi igba kan ri jẹ ohun elo iyin ti o ga ni ọwọ Ọlọrun. Ṣugbọn igberaga ba aye rẹ jẹ. O ṣi le ba aye awa naa jẹ pẹlu. O le fi idibajẹ sinu ẹwa, ọgbọn, imọ, ipo ati iwulo wa, ti awa naa ba fi aye gba. O le sọ wa di eranko buburu, ẹranko buburu ti Ọlọrun ko ni fẹ ba ni ohunkohun ṣe pẹlu.

Ṣe nkan ti o wa fẹ ni eyi? Ṣe o wa fẹ di ẹni ti Ọlọrun yoo ma lepa lati gbe ju sọnu tabi palẹ rẹ mọ? Mo mọ pe o ko fẹ ki nkan ri bẹ fun ọ. Ṣugbọn nkan le papa ri bẹ fun ọ, ti o ba fi aye gba irufẹ igberaga kan tabi omiran ninu aye rẹ, Nitori eyi, ṣọ ara rẹ. Kiyesi bi o ti ṣe n ba Ọlọrun ati awọn eniyan lopọ. Njẹ ki Ẹmi Ọlọrun ṣi oju rẹ si irufẹ igberaga yowu ti o le wa ninu rẹ, ki o ba le ṣe ohun ti o tọ nipa rẹ ki o to yọri si iṣubu rẹ, ni orukọ Jesu. Amin.

Ki o ni ọsẹ alarinrin.

Fi ara rẹ si ipo irẹlẹ. | Pst. J.O. Lawal. | Òkúdù 12, 2022. | Vol. 11, No. 6 Read More »

Ṣiṣẹ́ kárakára si fun un. | Pst. J.O. Lawal. | Òkúdù 05, 2022. | Vol. 11, No. 5

2 Comments

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Òkúdù 2022. Mo si gbadura pe ki ọkan rẹ ma fi gbogbo igba gba okun ati iwuri lati ma pọ si ninu iṣẹ Oluwa dipo ki o ma rẹwẹsi ninu rẹ ni gbogbo oṣu yi ati titi Oluwa wa yoo fi de. Amin.

Pọọlu, ninu lẹta rẹ kan si awọn ara Kọrinnti, sọ wipe, “Ṣugbọn nipa oore-ọfẹ Ọlọrun, ni mo ṣe ri bi mo ti ri: oore-ọfẹ rẹ ti a fi fun mi ko si jẹ asan; ṣugbọn mo ṣiṣẹ lọpọlọpọ ju gbogbo wọn lọ: ṣugbọn ki i ṣe emi, bi ko ṣe oore-ọfẹ Ọlọrun ti o wa pẹlu mi.” (1Kọrinnti 15:10) Bawo ni o ṣe ṣeeṣe fun Pọọlu lati ṣiṣẹ karakara fun Oluwa ju awọn apọsiteli rẹ yoku lọ? Nipasẹ oore-ọfẹ Ọlọrun ni. Nitorina, ko ki i ṣe nitori pe o ja fafa ju wọn lọ, ni imọ ju wọn lọ tabi ṣe olododo ju wọn lọ ni o se ṣiṣẹ karakara ju wọn lọ; dipo eyi, nitori pe o ṣe amulo ti o peye gbogbo nkan ti Ọlọrun pese fun lati sin in ni o ṣe ṣiṣẹ karakara ju wọn lọ.

Ṣe Pọọlu lotitọ wa ṣiṣẹ karakara ju gbogbo awọn apọsiteli Oluwa yoku lọ? Ni lilo oṣuwọn ti ara rẹ, o gbagbọ pe oun ṣiṣẹ julọ wọn lọ. Boya o wa jana tabi ko jana lori ọrọ yi jẹ nkan ti a o ma mọ nigba ti Oluwa wa ba de lati pin ere fun gbogbo awọn eniyan mimọ rẹ. Ṣugbọn, eyi ko ki i ṣe nkan ti o yẹ ki a ma ṣe àríyànjiyàn le lori. Nkan ti o ṣe pataki si wa lati kọbiara si lori ọrọ yi ni pe ọkunrin yi ko jẹ ki oore-ọfẹ Ọlọrun ti a tu le lori lẹkunrẹrẹ ṣofo. Dipo ki o fi ṣofo, nṣe ni o lo lati sin in tọkantọkan, lati sin lọpọlọpọ si titi ti akoko rẹ ni aye yi fi wa si opin.

Amọ ṣe awa naa le sọ nkankanna nipa ara wa? Ṣe a le sọ pe awa naa n ṣe amulo oore-ọfẹ Ọlọrun lati pọ si ninu iṣẹ irẹ? Pọọlu, ninu lẹta kanna si awọn ara Kọrinnti, sọ fun wọn pe, “Nitori naa ẹyin ara mi olufẹ, ẹ maa duro ṣinṣin, laiyẹsẹ, ki ẹ si maa tẹsiwaju ninu ṣiṣe iṣẹ Oluwa nigba gbogbo, niwọn bi ẹyin ti mọ pe iṣẹ yin kii ṣe asan ninu Oluwa.” (1Kọrinnti 15:58) Ṣe o ri bayi? A gba awọn ara yi niyanju lati ma ya ọ̀lẹ nidi iṣẹ Ọlọrun ṣugbọn lati ma fi ara wọn jin fun ni gbogbo igba.

Ki si ni idi? Idi ni pe laalaa wọn ko ni lọ lasan. Eyi tunmọ si pe Ọlọrun yoo pin wọn ni ere fun ohunkohun ti wọn ba ṣe fun. Iwọ naa wa ro wo. Bi o tilẹ jẹ wipe Oluwa ni O n pese ohun gbogbo ti a nilo lati sin in, sibẹsibẹ O ṣe ileri lati pin wa ni ere fun ohunkohun ti a ba ṣe fun un. Bi o si tun tilẹ jẹ wipe gbogbo ogo aṣeyọri wa ni ṣiṣẹ sin jẹ tirẹ nikan, sibẹsibẹ O ṣe ileri lati pin wa ni ere fun laalaa yowu ti a ba ṣe fun.

Idi wa niyi ti a ṣe nilo lati jígìrì, ti o ba jẹ wipe a ti n ṣun, ki a si mura si iṣẹ rẹ. Bẹẹni, a nilo lati dẹkun lati ma fi ara pamọ tabi sa fun iṣẹ rẹ tabi lati ma wa awawi fun bi a ṣe n rẹwẹsi ni ṣiṣe iṣẹ rẹ dipo ki a ma pọ si ni ṣiṣe e. A si tun nilo lati dẹkun lati ma fi oju alaṣeju tabi alaṣehan wo awọn ti o ba mura si iṣẹ rẹ layika wa. Idi si ni pe ko tọ si wa lati ṣe idajọ bi iṣẹ ẹnikẹni fun Ọlọrun ṣe munadoko si. Iṣẹ Ọlọrun pọ́nbélé ni eyi jẹ.

Iṣẹ tiwa, ẹwẹ, ni ki a ṣe bi Pọọlu ti ṣe, ki a si ma woye bi a ṣe le ṣe amulo oore-ọfẹ Ọlọrun ni ojumọ kọọkan lati ṣiṣẹ karakara si fun ju ti atẹyin wa lọ ati ju awọn ti o wa ni ayika wa lọ? Ki si ni idi? Ṣe ki a ba le ma fọ́nu lori iṣẹ wa ni? Rara O! Dipo bẹẹ, idi ni pe eyi yoo jẹ ki a le ru awọn ọmọ Ọlọrun ti o wa ni ayika wa soke lati ma fi ara wọn jin siwaju ati siwaju si lati fun ni iṣẹ-sin ti o tọ, ti o si munadoko. Adura mi si ni pe ki ọkan rẹ ma fi gbogbo igba gbinájẹ lati ṣe eyi, ni orukọ Jesu. Amin.

Kí o ní oṣù Òkúdù alárinrin

Ṣiṣẹ́ kárakára si fun un. | Pst. J.O. Lawal. | Òkúdù 05, 2022. | Vol. 11, No. 5 Read More »

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN (2) | Pst. J.O Lawal |TÍMÓTÌ 4:7-11 | ỌJỌ́RÚ 25, ÈBÌBÍ 2022

Leave a Comment

ÀKỌ́SÓRÍ: “Má ṣe fetí sí ọ̀rọ̀ tàbí ìtàn asán; ṣùgbọ́n tọ́ ara rẹ sí ìwà-bí-Ọlọ́run.” (Tímótì 4:11)

Ọ̀RỌ̀ ÀKỌ́SỌ

Ninu ẹkọ ti a kọ kẹyin lori ọna lati tọ ara wa si iwa-bi-Ọlọrun, a mẹnuba awọn ipese Ọlọrun fun wa lati gbe igbe aye iwa-bi-Ọlọrun ati pataki ki a ṣe amulo wọn. Ki si wa ni awọn ipese wọnyi? Awọn naa ni Ẹmi mimọ, ọrọ Ọlọrun, anfaani adura gbigba, anfaani ibaṣepọ pẹlu awọn ọmọ Ọlọrun ati iṣẹ iranṣẹ awọn angẹli. Ninu ẹkọ eyi ẹwẹ, a tun fẹ wo igbesẹ miran ti a nilo lati ma a gbe lati le tọ ara wa si iwa-bi-Ọlọrun. Lalai si mọ igbesẹ yi, ki a si ma gbe e, yoo ṣoro fun wa lati ma fi gbogbo igba gbe igbe aye ẹni ti o wa bi Ọlọrun.

YẸRA FUN IBASEPỌ AIDỌGBA PẸLU AWỌN ALAIGBAGBỌ

Igbesẹ miran wo lo wa yẹ ki a ma gbe lati tọ ara wa si iwa-bi-Ọlọrun yatọ si pe ki a ma ṣe amulo awọn ipese Ọlọrun fun wa lati ṣe bẹẹ? Oun naa ni o ni i ṣe pẹlu yiyẹra fun ibasepọ ti ko dọgba pẹlu awọn alaigbagbọ. Iwọ naa wo ọkan lara awọn nkan ti Pọọlu sọ lori ọrọ yi: “Ki a ma tan yin jẹ: ẹgbẹ buburu ba iwa rere jẹ.” (1Kọrinnti 15:33) Ki ni idi ti o fi nira fun ọpọ lati gbe igbe aye iwa-bi-Ọlọrun loni? Oun naa la ri ninu ọrọ ti Pọọlu sọ silẹ yi. O ni ki a ma ṣe jẹ ki ẹnikẹni tan wa jẹ: ẹgbẹ buburu ma n ba iwa rere jẹ. Eyi jasi pe niwọn igba ti a ba n kọwọ rin pẹlu awọn alaiwa-bi-Ọlọrun, o didan ki awa na ma wuwa bi ti wọn lẹkọkan tabi ni ọpọ igba. Niwọn igba ti a ba si ti n wuwa bi wọn ti ṣe n wuwa, ko si ni ki o ma mu ipalara wa fun igbe aye iwa-bi-Ọlọrun wa.

Pọọlu tun sọ eyi lori ọrọ yi kannaa: “Ẹ ma ṣe fi aidọgba dapọ pẹlu awọn alaigbagbọ: nitori idapọ kin ni ododo ni pẹlu aiṣododo? Idapọ ki ni imọlẹ si ni pẹlu okunkun? Irẹpọ kin ni Kirisiti ni pẹlu Belili? Tabi ipin wo ni ẹni ti o gbagbọ ni pẹlu alaigbagbọ? Irẹpọ ki ni Tẹmpili Ọlọrun ni pẹlu oriṣa? Nitori ẹyin ni tẹmpili Ọlọrun alaaye; gẹgẹ bi Ọlọrun ti wi pe, Emi o maa gbe inu wọn, emi o si maa rin ninu wọn; emi o si jẹ Ọlọrun wọn, wọn o si jẹ eniyan mi.” (2Kọrinnti 6:14-16)

Ṣe o tun ri bayi? A ki wa nilọ nibiyi pe ki a ma ṣe fi aidọgba dapọ pẹlu awọn alaigbagbọ. Eyi tunmọ si pe ibadapọ pẹlu awọn alaigbagbọ pin si ọna meji pataki. Akọkọ ni ibadọpọ ti o dọgba. Eyi ni i ṣe pẹlu ibaṣepọ wa pẹlu awọn alaigbagbọ ti o jẹ obi wa, ọmọ wa, aya wa, ọkọ wa, ara wa, ibatan wa, aladugbo wa, ọga wa nibi iṣẹ, akẹgbẹ wa nibi iṣẹ tabi ni ile-iwe ati bẹẹbẹẹ lọ. A ko le sọ wipe a ko ni ni nkankan ṣe pẹlu awọn eniyan yi nitoripe alaigbagbọ ni wọn. A gbọdọ ni nkan ṣe pẹlu wọn, ki a si ma ṣe ojuṣe wa lori wọn ni gbogbo igba. Ayafi ti a ba fẹ fi aye yi silẹ nikan ni a ko ṣe ni ni nkankan ba awọn ẹni wọnyi ṣe papọ. (Wo: 1Kọrinnti 5:10)

Irufẹ ibadapọ keji ti a le ni pẹlu awọn alaigbagbọ, eyi ti a si n kilọ fun wa ninu bibeli pe ki a ma ni, ni ibapadọ aidọgba. Ki ni idi ti a si ṣe n kiwa nilọ pe ki a ma ni irufẹ ibadapọ yi pẹlu wọn? Idi ni pe nigba ti a wa jẹ ododo, awọn je aiṣododo. Nigba ti awa si jẹ imọlẹ, awọn jẹ okunkun. Bẹẹ si ni, nigba ti awa jẹ Kirisiti, awọn jẹ Belili. Eyi lo wa tunmọ si pe, ni akọkọ, ibaṣepọ yowu ti a o ni pẹlu awọn alaigbagbọ ti yoo sọ wa di alaiṣododo si Ọlọrun tabi si eniyan jẹ eyi ti a gbọdọ yẹra fun.

Nkan ti a n sọ ni pe niwọn igba ti ibaṣepọ wa pẹlu alaigbagbọ kan tabi omiran tabi awọn eto tabi irinṣẹ ti wọn gbe kalẹ ba ti jẹ eyi ti ko ni jẹ ki a jẹ olotitọ ni sisin Ọlọrun tabi si awọn eniyan, yala awọn ẹbi wa ni, ijọba ni, ijọ Ọlọrun ni, akẹgbẹ wa ni tabi aladugbo wa ni, ko tọna. A si gbọdọ fi opin si, ti o ba jẹ wipe o ti n waye. Aijẹbẹ, a ko ni le gbe igbe aye iwa-bi-Ọlọrun.

Nkan keji ti ọrọ yi tun fi ye wa ni pe ibadapọ yowu ti a le ni pẹlu awọn alaigbagbọ ti o si le sọ imọlẹ wa di okunkun jẹ eyi ti ko gbọdọ waye rara. Bẹẹni ibadapọ yowu ti a le ni pẹlu wọn ti yoo jẹ ki a bẹrẹ si ni ṣe nkan ikọkọ tabi ti ko ni jẹ ki a le ba wọn wi ninu aiwa-bi-Ọlọrun wọn jẹ eyi ti a ko gbọdọ jẹ ki o waye. Nitori irufẹ awọn ibaṣepọ yi ni o ma n sọ ọmọ Ọlọrun di ẹlẹṣẹ nikẹyinkẹyin.

Nkan ẹkẹta ti ọrọ Pọọlu tun n fi ye wa ni pe ibadapọ yowu ti a le ni pẹlu awọn alaigbagbọ ti ko ni jẹ ki a le ṣe iyatọ wa si wọn, ti ko ni jẹ ki awọn eniyan mọ pe ti Kirisiti ni a jẹ ati pe a ko ki i ṣe ti Eṣu jẹ eyi ti a ko gbọdọ faye gba. Ibadapọ aidọgba ni. O si wa ṣe ni laanu loni pe ọpọ awọn ọmọ Ọlọrun ni a ko le ṣe iyatọ laarin wọn ati awọn alaigbagbọ ti wọn jọ n ko ara wọn kaakiri. Idi si ni pe aguntan wọn ti ba aja rin, o si ti jẹ ìgbẹ́, o ti ba ẹkùn rin, o ti wọ ẹ̀wù ẹ̀jẹ̀.

Lotitọ, kíkọ̀ lati ni ibaṣepọ aidọgba pẹlu awọn alaigbagbọ le ma ba irọrun de. O tilẹ le fi aye silẹ fun inunibini lati ọdọ wọn. Ṣugbọn ti ibaṣepọ ayeraye ti a ni pẹlu Ọlọrun ba jẹ wa logun, a gbọdọ fi ara da ohun yowu ti o ba ti ẹyin kíkọ̀ lati fi aidọgba lo pọ pẹlu awọn alaigbagbọ le mu lọwọ. Aijẹbẹ, gbogbo awọn iwa palapala, iwa omugọ ati iwa eeri ti a ti kọ silẹ nitoripe a jẹ ti Jesu ko ni ṣalai tun ma ma fi ara han ninu aye wa.

ỌRỌ IPARI

Ti a ba fẹ ṣe aṣẹyọri ni gbigbe igbe aye iwa-bi-Ọlọrun, a gbọdọ yẹra fun fifi aidọgba ba awọn alaigbagbọ ti o wa ninu aye wa tabi ni ayika wa lopọ. Eyi ni yoo fi iyatọ han laarin awa ati awọn. Aijẹbẹ, ibaṣepọ wa pẹlu wọn ko ni ṣai pa igbe aye iwa-bi-Ọlọrun wa lara.

IBEERE

Irufẹ ibadapọ melo ni a le ni pẹlu awọn alaigbagbọ? Darukọ wọn.

Ki ni o ṣe pataki julọ si ọ ninu ẹkọ yi?

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN (2) | Pst. J.O Lawal |TÍMÓTÌ 4:7-11 | ỌJỌ́RÚ 25, ÈBÌBÍ 2022 Read More »

Ó burú jọjọ bí kò tilẹ̀ jẹ́ tuntun | J.O. Lawal

Leave a Comment

LTP-Ebibi-2022_11_3

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Ebibi 2022. Mo gbadura pe ki iwọ ati ohun gbogbo ti o jẹ tirẹ ma fi gbogbo igba wa ni ipamọ kuro ninu gbogbo erongba ati akitiyan ibi awọn ọta ẹsin Kirisitiẹni, ni orukọ Jesu. Amin.

Ni aipẹ yi, igbe-rara jade lọ lati ibi gbogbo ni orilẹ-ede yi lodi si ipakupa ti a pa Debora Yakubu Samuẹli, ọmọ ile-iwe giga ti awọn olukọ kan ti o wa ni ipinlẹ Sokoto. Bi iṣẹlẹ yi ṣe wa buru jọjọ to, ti o si jẹ eyi ti a gbọdọ bu ẹnu atẹ lu pẹlu, ko jẹ tuntun tabi ajeji si aye yi. Irufẹ awọn iṣẹlẹ bẹẹ ti ṣẹlẹ sẹyinsẹyin, bi wọn si tun ti ṣe n ṣẹlẹ lọwọlọwọ yi kaakiri gbogbo agbaye, paapaa-julọ ni awọn ibi ti awọn eniyan ti ro pe ojuṣe wọn ni lati gbe Ọlọrun nija tabi lati da aabo bo iyi rẹ.

Njẹ o tilẹ mọ pe ni abẹ idari awọn alufa ijọ Katoliki mimọ ti Roomu, ni ọgọọgọrun ọdun sẹyin, ọpọlọpọ awọn eniyan rere ati olododo eniyan ni a sọ ni okuta pa, ti a ge lori tabi ti a dana sun laitọ nitori isọrọ-odi tabi isọkusọ? Nitorina, ti ijọ ko ba pa awọn ọmọ rẹ mọ loni, ko ki i ṣe nitoripe ko lailai ṣe bẹẹ ri; dipo eyi, o je nitoripe Ẹmi Ọlọrun ti fọ ọ mọ kuro ninu aimọkanmọkan rẹ, ti O si tun ti tun un ṣe.

Siwaju si, ko yẹ ki a gbagbe pe idi ti awọn adari ẹsin Juu ti igba aye Jesu fi pa a nipa ika. Nitori isọrọ-odi ni. Awọn Juu wọnyi, bi a ti ṣe ri ninu bibeli, ko fi aye gba isọrọ-odi rara-rara. Nitorina, nigba ti Jesu bẹrẹ si ni pe ara rẹ ni ọmọ Ọlọrun, wọn ṣiro ọrọ rẹ si isọrọ-odi, wọn si bẹrẹ si ni bere fun ori rẹ. Ṣugbọn awọn adari wọn ko kan dede ki i mọlẹ ni oju ọna, ki wọn si pa a, bi awọn ọgọrọ eniyan ti inu n bi yoo ti ṣe. Dipo eyi, nṣe ni wọn mu, wọn wa awọn ti yoo jẹri lodi si, wọn si wa da ẹjọ iku fun.

Ki wa lo de ti wọn ko pa Jesu fun isọrọ-odi lẹsẹkẹsẹ ti wọn ti ri mu? Akọkọ, idi ni pe wọn mọ pe ọpọ ni ilẹ naa ni o gbagbọ pe eniyan Ọlọrun tootọ ni Jesu jẹ. Nitori eyi, ti ko ba wa jẹ pe a fi idi rẹ mulẹ daju pe O ṣe nkan èèwọ̀ kan, bi ki O sọ ọrọ odi si Ọlọrun, wọn ko le nawọ gan lailai ba ibinu awọn eniyan pade. Ka tilẹ tun gbe iyẹn sẹgbẹ kan, o lodi si ofin Mose lati pa ẹnikẹni lọna yi lalai ṣe pe a kọkọ gbọ ẹjọ rẹ lọna ti o yẹ. A kọkọ gbọdọ wa o kere ju ẹlẹri meji lati jẹri lodi si. Lẹyin eyi, a gbọdọ fi aye gba oun naa funrarẹ lati wi àwíjàre. Aijẹbẹ, nṣe ni a o ma ta ẹjẹ alaiṣẹ silẹ niwaju Ọlọrun ti a ba pa a. Bẹẹ gẹgẹ si ni a ṣe ṣe si Jesu ki a to da ẹjọ iku fun un lọna aitọ. (Wo: Ditaronomi 17:2-7; Matiu 26:57-66)

Idi keji ti a ko fi pa Jesu ni ẹsẹkẹsẹ ti a mu ni pe ofin miran ti o tun ga ju ti Mose lọ wa ni ilẹ naa nigba naa, iyẹn ofin awọn ara Roomu. Ko si wa si bi wọn yoo ṣe pa gbajumọ eniyan bi ti Jesu, bi O tilẹ jẹbi ẹsun ti a fi kan an, lalai ṣe pe wọn kọkọ gbọ ẹjọ rẹ ni ibamu pẹlu ofin yi, ti wọn ko ni bọ sinu iyọnu ti awọn adari ijọba Roomu ti o wa lori wọn ba mura lati ṣe agbeyẹwo ọrọ naa. Idi niyi ti a ṣe mu Jesu lọdọ sọdọ Pọ́ntíù Pílátù, ki o ba le fi ountẹ jan ẹjọ iku ti a ti da fun un. A ko ba wi wa tu u silẹ, ti ko ba jẹ wipe Pilatu jẹ adari ojo ati kòṣekukòṣẹyẹ kan. (Wo: Johanu 18:26-19:16)

Nitorina, ko ki n ṣe nkan tuntun ni ki a pa awọn olododo laitọ labẹ afiboju ẹsin. Iru nkan wọnyi si ma n ṣaba waye nibi ti awọn adari ba ti jẹ ojo bi ti Pilatu, ti wọn si tun fẹran iyin awọn eniyan ju iyin Ọlọrun lọ. Fun apẹẹrẹ, Pọọlu gan, ni akoko kan, ko ba di ẹni ti ọgọrọ awọn Juu kan ti inu n bi ko ba faya pẹrẹpẹrẹ nitori iru ọrọ yi, ti o ba jẹ pe ọgagun awọn jagunjagun Roomu ti a fi si Jerusalẹmu ni akoko yi jẹ ojo tabi lọra lati tete da si ọrọ naa. (Wo: Iṣe Apọsiteli 21:17-23:35)

Ki ni koko ti mo fẹ mu jade lori ọrọ yi? Oun naa ni pe bi a ti ṣe n bere fun idajọ ododo fun Debora Yakubu Samuẹli ati ti a si tun n gbadura pe ki Ọlọrun tu awọn ẹbi rẹ ninu, a ko gbọdọ kuna, gẹgẹ bi ọmọ Ọlọrun, lati kẹkọ lati ara nkan ti o ṣẹlẹ si. Ki si ni awọn ẹkọ fun wa ninu ọrọ naa? Akọkọ ni pe a gbọdọ ma fi gbogbo igba ṣọ ara ṣe ninu ibaṣepọ wa pẹlu awọn ẹlẹsin miran, paapaa-julọ awọn ti o korira ẹsin Kirisitiẹni, ki wọn ma ba fi akoko kankan ni idi ti o daju lati sọrọ odi si wa tabi lati da wa lẹbi.

Ẹkọ keji fun wa ninu ọrọ yi ni pe nibikibi ti iṣedari ibi ti a n gbe ba ti jẹ ojo tabi alailootọ, Ọlọrun le ma le lo o lati da aabo bo wa kurọ lọwọ iwa ika. Nitorina, ti ko ba jẹ wipe a mọ daju pe Ọlọrun fẹ lo ijiya tabi iku wa nibẹ lati ṣe ara rẹ logo, a gbọdọ ṣọra ṣe ni didasi ohunkohun ti o ba ni i ṣe pẹlu ọrọ ẹsin nibẹ. Aijẹbẹ, o ṣeeṣe ki a sun ninu Kirisiti ki akoko wa to to. Njẹ ki Ọlọrun gbogbo oore-ọfẹ tẹsiwaju lati ma pa gbogbo awọn ọmọ rẹ ni orilẹ-ede yi ati ni ibi gbogbo lagbaye mọ kuro lọwọ ibi gbogbo. Amin.

Kí o ní ọ̀sẹ̀ tí ó ga.

Ó burú jọjọ bí kò tilẹ̀ jẹ́ tuntun | J.O. Lawal Read More »

Ǹjẹ́ ọkàn rẹ ṣe déédé níwájú rẹ̀ bí? | Pst. J.O. Lawal | Èbìbí 15, 2022 | Vol. 11, No. 2

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọṣẹ miran ninu oṣu yi. Mo si tun gbadura pe ki Ọlọrun ṣe ọkan rẹ yẹ niwaju rẹ ni gbogbo igba, ki eré-ìje Kirisitiẹni rẹ ninu aye yi ma ba ja si asan. Amin.

Ninu iwe Iṣe awọn Apọsiteli, a ri akọsilẹ arakunriin kan ti a n pe ni Simoni Oṣó. Ọkunrin yi, bi akọsilẹ naa ti ṣe lọ, je olugbe ilu awọn ara Samaria kan ti Filipi ti kọkọ waasu ihinrere Jesu Kirisiti. Nigba ti o si ri awọn iṣẹ iyanu ati ara ti ajinhinrere yi ṣe, ẹnu yaa to bẹẹ gẹẹ ti oun naa fi ṣe iribọmi ni orukọ Oluwa bi awọn ara Samaria yoku ti o wa ninu ilu yi. (Ìṣe Àpọ̀sítélì 8:5-24)

Ṣugbọn oṣo ni ọkunrin yi jẹ, oṣo ti o ti fi akoko kanrí jọ awọn eniyan wọnyi loju pẹlu agbara àlùpàyídà ati oṣo rẹ. Nitorina, nipa ṣiṣe iribọmi ni orukọ Jesu, o n fihan pe oun gba pe Filipi n ṣiṣẹ pẹlu agbara ti o ga, ti o si pọ ju ti oun lọ. Eyi si jẹ nkan ti gbogbo ọmọ Ọlọrun gbọdọ fi sọkan. A n ṣiṣẹ pẹlu agbara ati aṣẹ ti o ga julọ ni ibi yowu ti awọn ẹda Ọlọrun le wa. Nitori eyi, nṣe ni o yẹ ki a gbe gbogbo ibẹru iṣẹ awọn ajẹ, oṣo ati alafọsẹ ti a ni ju ṣọnu. Bẹẹni, nṣẹ ni o yẹ ki a gbe gbogbo ibẹru Eṣu ati awọn ẹmi aimọ rẹ ti a ni ju danu. Idi si ni pe a ni aṣẹ ati agbara lori wọn ninu Kirisiti Jesu – abẹ atẹlẹṣẹ wa ni gbogbo wọn wa. (Wo: Luuku 10:19; Roomu 16:20; 1Johanu 2:14; 1Johanu 4:4)

Ni kukuru, lẹyin igba ti o ti ṣe iribọmi ni orukọ Jesu, Simoni bẹrẹ si ni tẹle Filipi lọ si ibikibi ti o ba lọ, nitoripe awọn iṣẹ ami ati iṣẹ iyanu ti o n ri jọ ọ loju pupọ. Eyi tunmọ si pe oun naa bẹrẹ si ni ṣe bi ọmọ Ọlọrun, bi Kirisitiẹni tootọ. Ṣugbọn nigba ti awọn Apọsiteli Peteru ati Johanu de si ilu kannaa yi, ti wọn si bẹrẹ si ni gbe ọwọ le awọn ti o gbagbọ lori lati gba Ẹmi mimọ, ete ibi inu ọkan Simoni farahan.

Ki gan an lo ṣe? O gbiyanju lati fun wọn ni owo lati rẹ ẹbun Ẹmi mimọ. Ki si ni idi? Idi ni pe oun naa fẹ maa ṣe ohun ti Filipi ati awọn apọsiteli yi n ṣe. O si ni itara lati ṣe to bẹẹ gẹẹ ti o fi ṣetan lati fi owo ra agbara lati ṣe bẹ ẹ. Nitorina, ko jẹ tuntun lati ri awọn eniyan ti wọn ṣetan lati gbe igbesẹ-ki-gbesẹ, pẹlupẹlu didara pọ mọ ẹgbẹ okunkun tabi lilo afọsẹ ati ẹmi oṣo, ti yoo jẹ ki wọn le ma jọ awọn eniyan loju, ki wọn si ma fi ara wọn han gẹgẹ bi eniyan pataki ninu ijọba Ọlọrun.

Bawo wa ni Peteru ṣe fesi si nkan ti Simoni ṣe? O da lohun nipa sisọ awọn ọrọ wọnyi:

“Ki owo rẹ ṣegbe pẹlu rẹ, nitori iwọ ro lati fi owo ra ẹbun Ọlọrun. Iwọ ko ni ipa tabi ipin ninu ọran yii: nitori ọkan rẹ ko ṣe deedee niwaju Ọlọrun. Nitori naa ronupiwada kuro ninu iwa buburu rẹ yii, ki o si gbadura sọdọ Ọlọrun, boya yoo dari ete ọkan rẹ ji ọ. Nitori ti mo woye pe, iwọ kun fun owu kikoro, ati wi pe ẹrú ẹ̀ṣẹ̀ ni iwọ n ṣe.”

Njẹ o ri bayẹn? Ki ni iṣoro ti Simoni ni? Ohun naa ni pe ọkan rẹ ko ṣe deede pẹlu Ọlọrun. Ko fi igba kankan di atunbi ni tootọ. Ko fi igba kankan ni ipa ninu Kirisiti. Ẹ si wa wo o, o n ṣe wọle-wọde pẹlu Filipi ati awọn apọsiteli yi o. O sun mọ wọn pẹkipẹki, o si tun jẹ igbadun ibaṣepọ pẹlu wọn. O tilẹ ṣeeṣe ki o ti ba wọn jẹun papọ ni awọn igba kan tabi ki o ti ba wọn jẹ awọn iṣẹ kọọkan ri. Sibẹsibẹ, ọkan rẹ ko ṣe deede.

Nitorina, pe o n wa si ipade ijọ loorekoore tabi pe o n ṣe wọle-wọde pẹlu awọn oniwasu ati awọn onigbagbọ kan tabi omiran ko tunmọ si pe ọkan rẹ ṣe deede. Lotitọ, awọn eniyan le ma mọ nkan ti o n lọ ninu ọkan rẹ, ti a ko ba fi han wọn, bi a ti ṣe niti Simoni. Wọn le ma mọ pe o kun fun owu, ojukokoro, idibajẹ ati ẹtanu. Ṣugbọn Ọlọrun mọ. Iwọ naa si mọ pẹlu. Ti o ko ba si ronupiwada lakoko ti o tọ, ọjọ kan le de ti awọn iṣẹlẹ kan yoo tu aṣiri ete eke ati ika inu ọkan rẹ.

Yatọ si iyẹn, niwọn igba ti ọkan rẹ ko ba ti ṣe deede niwaju Ọlọrun, bi o tilẹ jẹ atunbi ni tootọ, o di dandan ki o pa iriri didara Ọlọrun ti o yẹ ki o ni lara. Eyi si ni alaye fun bi igbega, iwosan, isesorere, ibalẹ-ọkan ati iṣoriire ti awọn onigbagbọ kan n wa ko ni lailai jẹ ti wọn. Ọkan wọn ko ṣe deede. Ti wọn ko ba si ronupiwada, ko si ni ki nkan ma bajẹ ju bayi lọ fun wọn. Nitori eyi, ṣọ kan rẹ pẹlu ìfarabalẹ̀ ti o ga, ki o si tun ti ilẹ̀kuǹ rẹ̀ mọ́ ojukokoro, ẹtanu, owu ati èrò ìkà gbogbo. Ki Ọlọrun oore-ọfẹ jẹ ki o le ma fi gbogbo igba ṣe eyi fun anfaani ara rẹ, ni orukọ Jesu. Amin.

Ǹjẹ́ ọkàn rẹ ṣe déédé níwájú rẹ̀ bí? | Pst. J.O. Lawal | Èbìbí 15, 2022 | Vol. 11, No. 2 Read More »

Kí ni ìwọ ń ṣe níhìn-ín | Pásítọ̀ J.O. Lawal

Leave a Comment

Ọjọ́: Èbìbí 08, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 1

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Kaabọ sinu osẹ tuntun miran ninu oṣu Èbìbí 2022. Adura mi si ni pe ki Ọlọrun ri daju pe a fi idi rẹ mulẹ si ibugbe ti o tọ fun ete rẹ lati wa si imu ṣẹ ninu aye rẹ, ni orukọ Jesu. Amin.

Ni igba kan ri, Ọlọrun fi ara han Wolii Elija ni ori oke Horẹbu, O si bere ibere nla yi lọwọ rẹ lẹẹmeji: “Kini o n ṣe nibiyi?” Wayi o, igba wo ni a ma n bere iru ibere yi lọwọ eniyan? Akọkọ, a ma n bere rẹ lọwọ wọn nigba ti a ko ba reti lati ri wọn ni ibi ti a ti ri wọn, ti o si jẹ wipe ibomiran ni a n woye pe o yẹ ki wọn wa. Ẹkeji, a ma n bere rẹ lọwọ wọn nigba ti a ba fẹ mọ nkan ti wọn n ṣe nibi ti wọn wa ati ti a ba fẹ ẹ mọ boya nkan naa ti wọn n ṣe nibẹ to lati mu wa si ibẹ tabi duro si ibẹ.

Nitorina, nigba ti Ọlọrun bere lọwọ Elija pe, “Ki ni iwọ n ṣe nihin-yin?” akọkọ, O fẹ ki o mọ pe Oun ko reti lati ri nibẹ ni akoko naa. Ẹkeji, O fẹ mọ nkan ti o ba wa si ibẹ. Ṣe ko wa mọ nkan ti o ba wa sibẹ ni? O mọ ọn. Ṣibẹsibẹ, O fẹ ti ẹnu oun tikararẹ gbọ. (Wo: 1Ọba 19)

Kama fa ọrọ gun, idi yowu ti Elija fi wa ni Horẹbu ni akoko yi ko ja mọ nkankan si Ọlọrun. Idi si nipe ko yẹ ki o tilẹ wa nibẹ rara. Lotitọ, idamu aye ni o ti lọ si ibẹ lati tọrọ fun iku. Ṣugbọn ko yẹ ki o wa ni ibẹ. Idi si ni pe iṣẹ rẹ laye ko i ti pari. Nitorina, Ọlọrun sọ fun pe ki o gba ọna ti o gba wa pada lati lọ pari iṣẹ rẹ. O si ṣe bẹẹ gẹgẹ.

Ni ọna kanna, a ri awọn eniyan loni ti o wa ni ibi ti ko tọ ki wọn wa ni aye. Eyi si ni idi ti wọn ko ṣe gberu si tabi ri imuṣẹ ete Ọlọrun lori aye wọn. Lotitọ, bi Elija tabi Haga, iranṣẹbirin Sara, idamu aye ni o le wọn kuro ni ibi ti Ọlọrun fẹ ki wọn wa lọ si ibi ti ko yẹ ki wọn wa. Ṣibẹsibẹ, bi o ti wu ki ara tu wọn to ni ibi to ko tọ fun wọn lati wa ti wọn si wa yi, ete Ọlọrun ko le wa si imuṣẹ lori aye wọn lẹkunrẹrẹ. (Wo: Jẹnẹsisi 16)

Nitorina, wọn nilo lati ri nkan wọnyi, ki wọn si kuro ni ibi ti wọn wa lọ si ibi ti Ọlọrun fẹ ki wọn wa. Oun gan si ti wa n kọ si wọn pe, “Ki ni oun ṣe nibi ti o wa yi? Njẹ o mọ wipe ko yẹ ki o wa ni ibi yi? Njẹ o mọ wipe ete ati ileri mi fun ọ ko le wa si imuṣẹ nibi ti o wa yi?” Amọ ṣe wọn tilẹ le gbọ ohun rẹ? Ti wọn ba si le gbọ, ṣe wọn ṣetan lati gbera lati ibi ti wọn wa lọ si ibi ti o fẹ ki wọn wa, ki wọn ba le ri ààyè lati gberu ati lati ni iriri imuṣẹ ete rẹ rere fun wọn?

Boya iwọ naa si wa jẹ ọkan lara irufẹ awọn eniyan yi. Adura mi fun ọ ni pe ki Ọlọrun ṣi eti rẹ lati gbọ ohun ti o n sọ fun ọ, ki O si tun fun ọ ni okun lati gbe igbesẹ ni ibamu pẹlu rẹ, ni orukọ Jesu. Amin.

Kí o ní ọ̀sẹ̀ ìtura.

Kí ni ìwọ ń ṣe níhìn-ín | Pásítọ̀ J.O. Lawal Read More »

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN AYỌKA: TÍMÓTÌ 4:7-11 ỌJỌ́RÚ 27, IGBE 2022

Leave a Comment

ÀKỌ́SÓRÍ: “Má ṣe fetí sí ọ̀rọ̀ tàbí ìtàn asán; ṣùgbọ́n tọ́ ara rẹ sí ìwà-bí-Ọlọ́run.” (Tímótì 4:11)

Ọ̀RỌ̀ ÀKỌ́SỌ

Bi a ti ṣe kọ ninu ẹkọ ti a kọ sẹyin lori titọ ara wa si iwa-bi-Ọlọrun, iwa-bi-Ọlọrun ko ki ṣa dede jẹyọ ninu aye eniyan, bi o tilẹ ti ni amuyẹ lati ọdọ Ọlọrun fun un. A gbọdọ tọ ara wa lati wa bi Ọlọrun ki iwa-bi-Ọlọrun to le bẹrẹ si ni jẹyọ laye wa lọna ti o ni apẹẹrẹ. Aijẹbẹ, bi a tilẹ pe ara wa ni ọmọ rẹ, iwa ati iṣeṣi wa le ma fi taratara jọ tirẹ ni ọna pupọ. Eyi si ni o jẹ ki ọpọ Kirisitiẹni loni ri bi wọn ti ṣe ri, ti igbe aye wọn ko si wú awọn ti o wa ni ayika wọn lori debi pe wọn yoo fẹ ba Ọlọrun ni ajọṣepọ. Ti a ba wa fẹ ki awọn ti o wa ni ayika wa tabi ni awujọ wa gba iwuri lati ba Ọlọrun ṣepọ nipasẹ igbe aye ti a ngbe, a gbọdọ tọ ara wa lati wa bi i rẹ.

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN

Bawo wa ni a ṣe le tọ ara wa si iwa-bi-Ọlọrun? A le tọ ara wa si iwa bi Ọlọrun nipa ṣiṣe amulo awọn ipese rẹ fun wa lati gbe igbe aye ti o dabi tirẹ. Ranti wipe Peteru ṣọ eyi fun wa nipa iwa-bi-Ọlọrun: “Gẹ́gẹ́ bí agbára Ọlọ́run ti fún wa ní ohun gbogbo tí í ṣe ti ìyè àti ìwà-bí-Ọlọ́run, nípa ìmọ̀ ẹni tí ó pè wá nípa ògo áti ọlá ńlá rẹ̀. Nípa èyí tí o ti fi àwọn ìlérí rẹ̀ tí ó tóbi púpọ̀ tí ó si ṣe iyebíye fún wa: pé nìpa ìwọ̀nyí ni kí ẹ̀yin kí ó le di alábáápín nínú ìwà bí Ọlọ́run, nígbà tí ẹ̀yin bá ti yọ kúrò nínú ìbàjẹ ti n bẹ ninu aye nipa ifẹkufẹẹ.” (2Pétérù 1:3-4) Njẹ o ri bayẹn? Nipa mimọ Ọlọrun, a ti di ajogun awọn ipese rẹ fun wa lati gbe igbe aye ìwà-bí-Ọlọ́run.

Lafikun, Pọọlu naa sọ eyi fun wa: “Nítorí oore-ọ̀fẹ́ Ọlọ́run tí ń mú ìgbàlà wà fùn gbogbo ènìyàn ti farahàn. Ó ń kọ wa pé, kí á ṣẹ́ àìwà-bí-Ọlọ́run àti ìfẹ́kúfẹ̀ẹ́ ayé, kí a si maa wà ní àìrékọjá, ní òdodo, àti ní ìwà-bí-Ọlọ́run ní ayé ìsinsìnyí.” (Títù 2:11-12) Ṣe o tun ri bayẹn? Ẹkọ wa fun gbogbo wa lati kọ lori bi a ti ṣe n gbe igbe aye iwa-bi-Ọlọrun ninu aye ti a wa yi. A si le kọ ẹkọ yi nipasẹ oore-ọfẹ Ọlọrun, eyi ti a tun le pe ni ipese rẹ.

Ki wa ni awọn nkan ti Ọlọrun ti pese fun lati gbe igbe ayẹ bi tirẹ ninu aye yi, ti a si le ṣe amulọ wọn? Awọn naa ni iwọnyi:

– Ẹ̀mí Ọlọ́run: Pataki ninu awọn ipese Ọlọrun fun gbogbo awọn ọmọ rẹ lati gbe igbe aye ìwà-bí-Ọlọ́run ni Ẹmi Mimọ rẹ ti O fun wa lati ma ba wa gbe titi lailai. Ki si ni idi ti Ọlọrun fi fun wọn ni Ẹmi rẹ lati ma ba wọn gbe titi lailai? Idi ni ki O ba le dari wọn sinu gbogbo ọtitọ ti wọn nilo lati mọ lati gbe irufẹ aye ti O fẹ ki wọn gbe ati lati fun wọn ni okun, igboya, oriya ati itunu ti wọn nilo lati gbe aye naa. Ọlọrun ti mọ pe ko si nkankan ti a le da se lailai jẹ wipe Ẹmi rẹ ṣe wa yẹ lati ṣe (Jòhánù 15:5). Idi naa niyi ti O fi fi Ẹmi rẹ jinki wa lọfẹ. Awa ni a wa gbọdọ kọ lati ma fi gbogbo igba rin pẹlu afiyesi pe a ko le gbe igba aye ìwà-bí-Ọlọ́run laifi ti Ẹmi mimọ ṣe. Niwọn igba ti a ba si ti da ara le Ẹmi yi fun okun, igboya, ifaraji ati ohun yowu ti a tun le nilo lati gbe igbe aye ti Ọlọrun fẹ ki a gbe, ko si ni ki a ma ṣe aṣeyọri ninu gbigbe igbe aye naa. (Wo: Ìsíkíẹ̀lì 36:27; Jòhánù 14:26; Jòhánù 16:12-15; 2Kọ́rínntì 3:4-6; Gàlátíà 5:16; Fílípì 3:3)

– Ọ̀rọ̀ Ọlọ́run: Bi a ti ṣe sọ siwaju, a nilo lati ṣe amulo wiwa Ẹmi Ọlọrun ninu aye wa lati gbe igba aye iwa-bi-Ọlọrun. Amọ ti a ko ba mọ ọna lati ṣe eyi, wiwa rẹ ninu wa ko ni jamọ nkankan taarataara. Ọkan lara ọna ti a wa le gba ṣe amulo wiwa rẹ ninu wa ati pẹlu wa ni fifi ara wa jin fun ọrọ iwe mimọ. Nkan ti a n sọ nipe ọrọ Ọlọrun, ti a kọ silẹ fun wa ninu bibeli, jẹ ọkan lara nkan ti Ẹmi Ọlọrun ma n lo lati ṣe awọn Ọmọ Ọlọrun yẹ fun igbe aye iwa mimọ. Iwọ naa wo nkan ti Pọọlu sọ fun awọn alagba ijọ Efesu lori eyi: “Njẹ nisinsinyi, ara, mo fi yin le Ọlọrun lọwọ ati ọrọ oore-ọfẹ rẹ, ti o le gbe yin duro, ti o si le fun yin ni ini laarin gbogbo awọn ti Oluwa sọ di mimọ.” (Iṣe Apọsiteli 20:32) Nitorina, ẹnikẹni ti o ba fẹ mọ ifẹ Ọlọrun daju lori bi o ṣe yẹ ki o gbe aye rẹ lati wu u ninu ohun gbogbo, ki o si tun duro ṣinṣin ninu ifẹ rẹ naa ti o mọ gbọdọ fi ara rẹ jin fun ọrọ Ọlọrun. O gbọdọ maa ka a, ki o maa tẹti gbọ ọ, ki o si ma ṣe asaro ninu rẹ lojoojumọ ki o ba le yee, ki o si le ṣe amulo rẹ (Jọ́súà 1:8; Mátíù 13:1-23). Aijẹbẹ, ko si bi yoo ṣe le gbe igbe aye iwa-bi-Ọlọrun.

– Ànfààní àdúrà gbígbà: Ipese Ọlọrun miran fun awọn ọmọ rẹ lati gbe igbe aye iwa-bi-Ọlọrun ni anfaani adura gbigba si i. Bi a ti ṣe ri ninu bibeli, gbogbo awa ti a jẹ ọmọ rẹ ninu Kirisiti Jesu ni a le tọ ọ wa pelu igboya ati laibẹru nigbakigba lati tẹwọgba awọn nkan ti O ti pese silẹ fun igbayegbadun wa ati igbayetẹlọrun wa (Éfésù 3:12; Hébérù 4:16). Nitorina, ẹnikẹni ninu wa ti o ba wa fẹ ri ifarahan iṣẹ Ẹmi Ọlọrun ninu rẹ ni ọna ti o peye, ti ko si fẹ ṣe alaini ohun ti o dara kankan lati gbe aye ti o wu Ọlọrun, gbọdọ fi ara rẹ jin fun adura gbigba, ni aisimi ati ni aiṣaarẹ. Bi Jesu Oluwa wa si ti fi ye wa, lalai ṣe pe a ba n fi gbogbo igba gbadura si Ọlọrun lati fun wa ni okun nipasẹ Ẹmi rẹ, ko si ni bi a ko ṣe ni ṣubu sinu idanwo Eṣu. Bẹẹni, o ṣeeṣe ki ọkan wa fẹ ṣe ohun ti o tọ, ti o si yẹ. Ṣugbọn niwọn igba ti ko ba ti si okun fun ailera ara wa, ko si bi iwa-bi-Ọlọrun yoo ṣe ṣeeṣe fun wa. Idi niyi ti a ko fi gbọdọ fi adura gbigba ṣere rara, boya adura gbigba fun ara wa ni o tabi adura gbigba pẹlu awọn ọmọ Ọlọrun miran, paapaa julọ awọn ti ijọ wa wa. (Wo: Lúùkù 22:31-32&39)

– Ànfààní ìbáṣepọ̀ pẹ̀lú àwọn ọmọ Ọlọ́run míràn: Pataki lara awọn nkan ti ẹnikẹni ti o ba ṣẹṣẹ di atunbi ninu Jesu gbọdọ mọ ni pe nṣe ni a tun un bi sinu idile Ọlọrun, sinu agbo ile igbagbọ, sinu ara Kirisiti (1Kọ́rínntì 12:12-13; Gàlátíà 6:10; 1Tímótì 3:14-15). Nitorina, igbe aye ìwà-bí-Ọlọ́run ati ìgbáyégbádùn ko ki i ṣe adagbe ni fun un bikoṣe eyi ti yoo gbe pẹlu itọni, iranlọwọ ati ibawi awọn ọmọ Ọlọrun yoku. Idi si ni yi ti o fi gbọdọ pọn ni dandan fun ara rẹ lati darapọ mọ agbo awọn ọmọ Ọlọrun yowu ti o ba wa ni arọwọto rẹ, ti o si ri pe oye bi a ti ṣe n gbe aye tẹ Ọlọrun lọrun ye wọn. Awọn wọnyi ni Ọlọrun yoo ma lo lati kọ ọ, lati gba a niyanju, lati tu u ninu ati ran a lọwọ ni akoko ailera rẹ ati lati ṣe aṣọna fun ẹmi rẹ. Aijẹbẹ, ko si bi yoo ṣe le gbe igbe aye ìwà-bí-Ọlọ́run. Ọpọ ni aimọkan ti wa jẹ ki wọn ṣe aṣiṣe lori eyi, ti Eṣu si ti rapala wọle lati ṣi wọn lọna ati lati jẹ wọn niya, nitoripe wọn ko ṣe amulo ti o peye ibaṣepọ ti wọn ni anfaani rẹ pẹlu ijọ ọmọ Ọlọrun kankan. Wọn ro lọkan wọn pe awọn le da igbe aye Kirisitiẹni gbe ni. Amọ aṣiṣe yi gan an ni Eṣu lo lati ya wọn sọtọ lati rẹ wọn jẹ. Ti awa naa ko ba si fẹ ki Eṣu ni anfaani lati ya wa sọtọ kuro lọdọ awọn ọmọ Ọlọrun ti o le ran igbagbọ wa ati ìwà-bí-Ọlọ́run wa lọwọ, a gbọdọ mu ibaṣepọ pẹlu awọn ọmọ ijọ wa ni ọ́kúnkúndùn. (Wo: Ìṣe Àpọ́sítélì 20:28-31; Éfésù 4:11-16; Hébérù 3:12-13; Hébérù 10:24-25; Hébérú 12:15-17)

– Iṣẹ iranṣẹ awọn angẹli Ọlọrun: Bibeli sọ eyi fun wa nipa awọn angẹli: “Ẹ̀mí tí ń jísẹ́ ha kọ́ ni gbogbo wọn í ṣe bí, tí a n rán lọ láti maa jọ́sìn nítorí àwọn tí yoo jogún ìgbàlà?” (Hébérù 1:14) Ki ni nkan ti eyi n jẹ ki o ye wa? O n jẹ ki o ye wa pe iṣẹ iranṣẹ gbogbo awọn angẹli ni lati ṣiṣẹ ran awọn ọmọ Ọlọrun lọwọ. Idi si ni yi ti a fi kọ wa lati ma ṣoore fun awọn eniyan, paapaa-julọ awọn alejo ati awọn ti a ko mọ ri. Nitoripe a ko le sọ igba ti a o ṣoore fun angẹli kan tabi omiran ti a ran lati yọ wa ninu ewu tabi ran wa lọwọ (Hébérù 13:2). A si ri oniruuru àpẹrẹ ninu bibeli awọn ti a ran angẹli si lati ran igbe aye iwa mimọ wọn lọwọ tabi laye yọ wọn kuro ninu ewu ti o sọrọ mọ gbigbe igbe aye yi. Lọọti, Daniẹli ati Jesu Kirisiti Oluwa wa si wa lara awọn wọnyi (Jẹnẹsisi 19; Daniẹli 6; Luke 22:39-44). Nitorina, gbogbo awa ti a jẹ ọmọ Ọlọrun ni a nilo lati ma fi gbogbo igba fi sọkan pe awọn angẹli Ọlọrun rọgba yi wa ka lati ran igbe aye ìwà-bí-Ọlọ́run wa lọwọ. Niwọn ti a ba si n rin pẹlu afiyesi yi, ẹru ko ni fi igba kankan ba wa lati duro lori ẹsẹ wa lati ṣe ifẹ Ọlọrun, bi o ti wu ki inunibini awọn ti o wa ni ayika tabi awujọ wa to. Aiwa ni oye yi ni o jẹ ki ọpọ ọmọ Ọlọrun fi ibẹrubojo fi ara wọn jin fun oniruuru ẹṣẹ ati iwa aitọ lawujọ wọn.

Ọ̀RỌ̀ ÌPARÍ

Igbe aye ìwà-bí-Ọlọ́run jẹ eyi ti ọmọ rẹ kọọkan gbọdọ lepa lati gbe. Idi si ni pe Ọlọrun ti pese gbogbo nkan ti wọn nilo lati gbe igbe aye yi fun wọn. Awọn ti o ba wa lepa lati ṣe amulo awọn ipese yi nikan naa ni yoo ri igbe aye yi gbe pẹlu irọrun, nitoripe Ẹmi Ọlọrun yoo ṣe ni irọrun fun wọn.

ÌBÉÈRÈ

– Bawo ni o ṣe ṣe pataki si fun awọn ọmọ Ọlọrun lati ni oye ipese Ọlọrun fun wọn lati gbe igbe aye ti O fẹ ki wọn gbe?

– Mẹnuba diẹ lara awọn nkan ti o ṣe pataki julọ si ọ ninu ẹkọ yi.

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN AYỌKA: TÍMÓTÌ 4:7-11 ỌJỌ́RÚ 27, IGBE 2022 Read More »

Author name: CyberHawk