Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu ọsẹ miran ninu oṣu Agẹmọ 2023. Adura mi si ni pe a ko ni fi ohukohun ti o nilo fun iṣoriire ati alaafia rẹ pamọ fun ọ, ni orukọ Jesu. Amin.
Ara awọn nkan ti a fi han wa ninu Iwe mimọ ni pe a ko gbọdọ lalai lo awọn idojukọ wa gẹgẹ bi awawi fun gbigbe igbe aye ti ko ni itumọ ati ti ko lere. Dipo eyi, irufẹ idojukọ yowu ti a le ni, nṣe ni o yẹ ki a ṣi oju wa si awọn nkan ti o tọna ti a le ṣe pẹlu ọwọ wa lati jẹ ki aye dara si fun wa ati fun awọn ti o wa ni ayika wa. Awọn ti o ba si n ṣe eyi ni yoo ni iriri ogo ati igbega Ọlọrun ninu aye wọn, bi o ti wu ki ipo ti wọn wa laye kere to.
Fun apẹrẹ, nigba ti Ruutu de si ilẹ Isiraẹli pẹlu Naomi, iya ọkọ rẹ, ko de pẹlu nkankan, bẹẹni ko si tun ba nkankan nilẹ. O de si ibi ti ko ti ni ọrẹ tabi ẹbi ti o le tọ lọ fun iranwọ. Ṣibẹsibẹ, o nilo lati bori asiko yi lati le tọju ara rẹ ati iya ọkọ rẹ ti o ti darugbo. Ṣe o wa bẹrẹ si ni sọkun bi, ki o si ma sọ wipe aṣiṣe ni oun ṣe nipa fifi awọn eniyan oun silẹ lati tẹle Naomi? Rara o! Tabi ṣe o bẹrẹ si ni jade lọ lati ṣe iṣẹ aṣewo bi? Rara o! (Wo: Ruutu 1:19-22)
Ṣe o ri, Ruutu ni awọn idi ti o nitunmọ lati fi awọn eniyan rẹ ati ibalẹ-ọkan ti ko ba ma jẹgbadun pẹlu wọn silẹ. Ifẹ rẹ ni lati sa patapata fun ibọriṣa, iṣekuṣe ati iwa ika ti wọpọ laarin wọn. Ipinnu rẹ la si ti ṣe eyi ni o jẹ ki o tẹlẹ iya ọkọ rẹ, iya ọkọ ti ko ni nkankan ti o le ṣe fun, lọ si ilẹ Isiraẹli. Nitorina, o mọ pe o ṣeeṣe ki oun bẹrẹ igbe aye tuntun yi bi ọkan lara awọn akuṣẹ-julọ ti o wa nilu nigba ti o ba de ibẹ. Sibẹsibẹ, o wa nitoripe o woye pe o san fun oun lati jẹ akuṣẹ laarin awọn eniyan Ọlọrun ju lati jẹ ọlọrọ-julọ laarin awọn ika eniyan (84:10).
Nibakanna, ipinnu wa lati gbe aye wa fun Jesu Kirisiti le fi wa si ipo iṣẹ tabi idojuti ni awujọ wa. Ṣugbọn eyi ko jasi pe Ọlọrun fẹ ki a wa ni ipo naa titi lailai. Nkan ti O fẹ ni ki awọn eniyan rẹ ma wa ni ipo oke dipo ipo isalẹ. Nitorina, irufẹ ibi ipo kekere yowu ti a le wa laye lọwọlọwọ yi, Ọlọrun le gbe wa soke lati ibẹ lọ si ibi ti o yẹ ki a wa.
Amọ ṣa o, awa naa gbọdọ ṣetan lati ṣẹ bi Ruutu ni ipo ilẹlẹ yowu ti a le ti ba ara wa, ki a ba le ni iriri ojurere ati igbega Ọlọrun. Bawo si ni obinrin yi ṣe ṣe ti a fi gbe soke kuro ninu iṣẹ sinu ọrọ ati itura? Akọkọ, dipo ti yoo fi ma ṣe aroye nipa ipo ti o ti ba ara rẹ tabi ti yoo fi ma ṣe iranu kiri pẹlu agọ ara rẹ, nṣe ni o wa iṣẹ ṣe. Obinrin yi ko joko sile pẹlu iya-ọkọ rẹ, ki o ma gbadura ati ki o si tun ma reti pe ki Ọlọrun fi owo ranṣẹ si wọn. Dipo bẹẹ, nṣe ni o jade wa iṣẹ lọ. Ọlọrun si dari rẹ sẹnu iṣẹ kan, bi o tilẹ jẹ wipe iṣẹ naa ko le ṣe ju ki o fun wọn ni ounjẹ oojọ lọ ni akoko naa. (Wo o: Ruutu 2:1-3)
Wayi o, nkan ti mo n sọ kọ ni pe Ọlọrun ko le ma fi owo ranṣẹ si Ruutu ati Naomi nile. O le ṣe bẹ ẹ. Ṣugbọn ṣe wọn le sọ igba ti yoo fi owo ọhun ranṣẹ si wọn tabi iye ti yoo fi ranṣẹ si wọn nigbakukgba ti O ba fi ranṣẹ? Rara! Niwọn igba ti ko si ti wa sọ pe wọn ko le jade lọ lati ṣiṣẹ ati lati pawo, nkan ti o mọgbọn wa fun Ruutu ni lati jade lọ lati ṣiṣẹ. Ki o si wa ma reti Ọlọrun lati tipasẹ ṣiṣe eyi mu owo jade fun un.
Nitorina, bi o tilẹ jẹ wipe o suwọn fun ọ lati gbadura ati lati reti Ọlọrun lati pese fun aini rẹ lọna iyanu, o tun gbọdọ wa iṣẹ se, nitori pe Ọlọrun ti pa eyi ni aṣẹ (Efesu 4:28; 1Tẹsalonika 4:11-12). Fun idi eyi, nṣe ni ko wa iṣẹ fun ara rẹ lati ṣe, niwọn igba ti o ba ti jẹ iṣẹ ti o tọna labẹ ofin ni, dipo ti o o fi ma ṣe aroye, jale tabi ba agọ ara rẹ jẹ lati pa owo. Nipa bayi, Ọlọrun le pese fun aini rẹ lati ara iṣẹ yi ati nipa irufẹ ọna iyanu miran ti O ba tun yan.
Nkan keji ti Ruutu ṣe ni pe o ṣe iṣẹ ti o ri pẹlu ijafafa. Lotitọ, iṣẹ ti o ri yi jẹ iṣẹ olowo kekere ni asiko naa. Sibẹsibẹ o ṣe ni ọna ti adari oko ti o n ti n ṣiṣẹ fi kiyesi, ti o si sọrọ rẹ ni daradara fun oluwa rẹ, iyẹn Boasi, ẹni ti o wa lọ jẹ ibatan ọkọ Ruutu ti o ṣe alaisi. Eyi si ṣi ilẹkun ojurere ti o ga fun. Ti iwọ naa ba wa ṣe iṣẹ yowu ti o wa lọwọ rẹ bayi pẹlu gbogbo ọkan ati okun rẹ, o ṣeeṣe ki o jẹ pe ohun ni Ọlọrun yoo lo lati gbe ọ pade awọn ti yoo fi ojurere wo ọ, ti wọn yoo si tun gbe ọ soke. (Wo: Ruutu 2; Oniwaasu 9:10)
Nkan ẹkẹta ti a le ṣe awokọṣe rẹ lati ara Ruutu ni ifarabalẹ rẹ lati gba imọran ti o wa ni ibamu pẹlu ifẹ Ọlọrun (Ruutu 3-4). Lotitọ, o ni iya ọkọ ti o jẹ ẹni-bi-Ọlọrun, ti o si fi gbogbo igba wa ni arọwọto lati fun ni imọran lori irufẹ igbesẹ ti o tọ fun lati ma gbe. Ṣugbọn ti ko ba mu imọran iya yi ni ọkunkundun, ko ba ma ti bọ ninu iṣẹ, ki o si di gbajumọ bi a ti ṣe mọ ọn loni. Iwọ naa gbọdọ ṣe idamọ awọn ti Ọlọrun ti gbin sinu aye rẹ lati fun ọ ni imọran ti o peye. Bi wọn ba si ṣe n gba nimọran, ri daju pe o mu ni pataki ati pe o ṣe amulo rẹ. Nitoripe o le jẹ wipe imọran wọn gan, dipo owo, ni ohun naa ti o nilo lati dide bori gbogbo awọn idojukọ aye rẹ. Adura mi si ni pe ki Ọlọrun fun ọ ni okun lati tẹwọgba awọn nkan wọnyi ati lati ṣe amulo wọn ninu aye rẹ lalai fi asiko ṣofo. Amin.
Ki o ni ọsẹ ti o ga.
Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)