Ọjọ: Sẹrẹ 16, 2022 | Atẹlera: Latori tabili | Nọmba: Vol. 10, No. 37
Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ miran ninu oṣu Ṣere 2022. Adura mi si pe ki a fi gbogbo igba ṣe ọ yẹ ati fun ọ ni okun lati rin ni iṣẹgun lori gbogbo awọn nkan ti o n gbogun ti ọkan rẹ, ni orukọ Jesu. Amin.
Wayi o, ọkan lara awọn nkan ti o n fi gbogbo igba gbogun ti ọkan wa gẹgẹ bi ọmọ Ọlọrun ni agbere. O si wa wọpọ loni tobẹ gẹẹ ti o fi jẹ pe ko fẹrẹ si ibi ti o le lọ tabi dojukọ ti o ko ti ni ri nkankan ti yoo pa pe ọ lati kopa ninu rẹ. Ti o ba wa kọ lati ṣe nkan ti ọrọ Ọlọrun sọ lori rẹ, afaimọ ki o ma ya ara rẹ lẹnu nipa ṣiṣe nkan ti o ko fi igbakankan ri lero pe o le ṣe. Eyi ti n ṣẹlẹ si ọpọ ninu awọn ọmọ Ọlọrun lọwọlọwọ yi. Si iyalẹnu wọn, wọn ti turasilẹ fun ẹṣẹ agbere, ni eyi ti wọn ti fi igbakan gbe oju agan si, ti wọn si sọ pe ko sunwọn. Ti wọn ko ba si pada lati lọ bẹrẹ si ni ṣe nkan ti ọrọ Ọlọrun sọ lori agbere, wọn ko ni bọ lọwọ rẹ.
Ki o ba le mọ bi nkan ti mo n sọ ti ṣe buru si, laipe yi, mo ri stetọsi (bi o ti ṣe ri lọkan mi lọwọlọwọ) ti ẹnikan ti o pe ara rẹ ni Kirisitiẹni fi si ori ẹrọ ayelujara, eyi ti o ti n sọ pe oun ṣa fẹ ba ẹnikan sun, eni yowu ti o le jẹ. Lẹyin eyi ni o tun wa fi stetọsi miran sori ẹrọ yi, eyi ti o n fi awọn onigbagbọ kan ti wọn nkọrin nipa iye ayeraye ti a ni ninu Kirisiti Jesu han. Mo wa bere lọwọ ara mi pe, “Njẹ ọmọkunrin yi gbadun bi? Lati ori agbere sori ijọsin Kiristiẹni – bawọ ni wọn ṣe jọ ara wọn?”
Afi bi igba ti mi o ti ri nkankan, niwọn akoko yi naa ni mo tun ri stetọsi ti ẹlomiran ti oun naa pere rẹ ni onigbagbọ tun fi sori ẹrọ ayelukara yi. Nkan ti oun si n sọ ni pe ti ẹnikẹni ba ṣeesi ri oun ninu awọn sinnima iṣekuṣe, eyi ti wọn pe ni sinnima awọn to ti balaga, ki wọn mọ pe iṣẹ owo lo gbe oun de ibẹ – ki wọn ma fi ṣe ibinu rara. Lotitọ, lẹsẹkẹsẹ naa ni mo fi atẹjiṣẹ ranṣẹ si lati bere boya o gbadun. Ṣugbọn awọn nkan wọnyi n tọka si nkankan ni o, eyi si nipe aye ti a wa ninu rẹ yi jẹ eyi ti iṣekuṣe ti gbilẹ, ti o ti di tọrọfọnkale. Nitorina, ti awa ti a jẹ ọmọ Ọlọrun ko ba ṣọ ara wa, a o kan dede ri lọjọ kan pe a ya ara wa lẹnu pẹlu ikopa wa ninu iwa ati nkan eeri ni.
Awọn nkan ti a si wa n sọ yi kọja pe ki a kan ma gbadura si Ọlọrun pe ki O pa wọn mọ kuro ninu ẹṣẹ agbere. O tun ni i ṣe pẹlu pe ki a ma ṣe amulo awọn nkan ti O sọ fun wa nipa ẹṣẹ yi. Ki si ni O sọ fun wa nipa rẹ? O sọ wipe, “Ẹ maa sa fun agbere…” (1Kọrinnti 6:18) Njẹ o ri bayẹn? Bi o tilẹ jẹ pe Ọlọrun ni agbara lati daabo bo wa kuro lọwọ gbogbo iṣoro, O wa n sọ fun wa pe ọna ti Oun la kalẹ fun ipamọ wa kuro ninu ẹṣẹ agbere ni ki a sa a fun. Bẹẹni, yoo fun wa ni okun, yoo si tun ri pe ọna lati sa fun ẹṣẹ yi wa fun wa. Amọ ojuṣe wa ni lati sa a fun. Aijẹbẹ, afaimọ ki a ma jọ ara wa loju nigba ti a ba ba ara wa ninu rẹ.
Wo Josefu igba aye bibeli. Bawo ni ko ṣe ko sinu panpẹ ẹṣẹ agbere pẹlu iyawo ọga rẹ? Ṣe nipa jijoko lati ba fomijomitoro ọrọ ni bi? Rara o! O ti kọkọ gbiyanju lati ba fi ọrọ jomitoro ọrọ, ṣugbọn ko ṣiṣẹ. Idi si nipe ifọrọjomitoro-ọrọ ko ki i ṣiṣẹ rara nibiti ara awọn eniyan ba ti n pongbẹ fun ibalopọ. Idi si ni yi ti a fi ri awọn kan ti wọn ti gbeyawo tabi wa nile ọkọ, ti ile wọn n dun, ti wọn ko si ni idi kankan lati ma ṣe agbere, ti wọn si n tun n ṣe e. Nigba ti awọn wọnyi ba to pa ile wọn run tan ni wọn yoo ṣẹṣẹ wa bẹrẹ si ni bere lọwọ ara wọn pe, “Kini mo ṣe yi? Ki lode ti mi o ba ara mi fọrọjomitoro-ọrọ ki n to lọ ṣe iru aṣiṣe yi?”
Nitorina, ma ṣe ro pe ifọrọjomitoro ọrọ, ọgbọn inu tabi ọkan-akin le pa ọ mọ kuro ninu ẹṣẹ agbere. Ko si ikankan ninu wọn ti o ni agbara lati pa ọ mọ kuro ninu rẹ. Ẹnikan ṣoṣo ti o le pa ọ mọ kuro ninu rẹ naa ni Ọlọrun. O si n sọ fun wa lọwọlọwọ yi pe, “Niwọn igba ti o ba ti ni i ṣe pẹlu ẹṣẹ agbere, sa asala fun ẹmi rẹ.” Nkan ti Josẹfu ṣe ni eyi. Akọkọ, o ri daju pe oun ko fi igba kankan da wa pẹlu iyawo ọga rẹ. Nigba ti obinrin yi si wa ri anfaani lati fa a sinu agbere, nṣe ni o fi ere ge e, lalai wo pe ko yẹ ki oun fi aṣọ ti o gba lọrun oun silẹ fun un. Lotitọ, inu tubu loti ba ara rẹ nitori ọrọ yi. Amọ ko ba iwa mimọ rẹ jẹ. Ọlọrun ṣi da a lare nigba ti o ya. (Wo: Jẹnẹsisi 39:6-15)
Nibakan naa, nṣe ni ki iwọ naa ri daju pe o jinna rere si ẹnikẹni tabi ohunkohun ti o ba le fi aye gba agbere ninu aye rẹ. O ko nilo lati wa pẹlu ọkunrin tabi obinrin yowu ti o ba ma n fẹ ti ọ sinu agbere pẹlu ọrọ eeri tabi ifọwọkan ti ko boju mu. O ko si nilo lati wo sinnima yẹn tabi ki o fi ohun amuṣiṣẹ foonu yowu ti o ba n fi gbogbo igba pe ọ si ẹṣẹ agbere si ori foonu rẹ. Nitorina, ṣe ohun ti o tọ, ki o si fere ge, ti ọkan rẹ ba ṣe iyebiye si ọ, ti o ko si fẹ ko parun. Njẹ ki o ma fi gbogbo igba kun fun okun, igboya ati ọgbọn ti o nilo lati ṣe eyi, ni orukọ Jesu. Amin.
Ki o ni ọsẹ ti o ga.
Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)