Olufẹ: ki oore-ọfẹ, aanu ati alaafia jẹ tirẹ nilọpo-ilọpo lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ keji ninu oṣu Ẹrẹna 2025. Mo si gbadura pe ki Ọlọrun ma jẹ ki o ko si sinu pakute yowu ti eṣu le ti dẹ fun ọkan rẹ, ki o ba a le duro lailẹbi nigba ti Jesu Kirisiti Oluwa wa ba farahan. Amin.
Bi a ti ṣe n bẹrẹ ọsẹ tuntun yi, mo fẹ ki ọ nilọ pẹlu awọn ọrọ Jesu Kirisiti Oluwa wa wọnyi:
“Ṣugbọn ẹ maa kiye sara yin, ki ọkan yin ki o ma ṣe kun fun wọbia, ati fun ọti imupara, ati fun aniyan aye yii, ti ọjọ naa yoo fi de ba yin lojiji bi ikẹkun. Nitori bẹẹ ni yoo de ba gbogbo awọn ti n gbe ori gbogbo ilẹ aye. Njẹ ki ẹ maa ṣọna, ki ẹ si maa gbadura nigba gbogbo, ki ẹ ba le la gbogbo nnkan wọnyi ti n bọ wa ṣe ja, ki ẹ si le duro niwaju ọmọ-eniyan.” (Lúùkù 21:34-36)
Ki ni awọn nkan gbogi ti Oluwa wa fẹ ki a kiyesi, ki a si mu ni pataki, bi a ti ṣe ri ninu awọn ẹsẹ bibeli yi? Akọkọ ninu wọn ni pataki ki a kiyesara. Ki ni idi ti a fi nilo lati kiyesara? Idi ni pe ojooojumọ ni ọta wa, Satani, yoo ma lo oniruuru nkan lati ba ọkan wa ja, ki o ba a le mu wa lẹru, ki o si jẹ ki a gbagbe pe aye yi ko ki i ṣe ile wa titi lailai. Ti a ko ba si kiyesara, a o ti sọ ara wọn nu sinu aniyan aye yi ati sinu oniruuru iwa aiwa-bi-Ọlọrun ti o le pa aye ati ọkan wa run, iyẹn ki a to mọ nkan ti o n ṣẹlẹ.
Nitorina, kiyesara. Kiyesara lori awọn ibi ti o n lọ. Kiyesara lori awọn ti o n ba ṣọrẹ. Kiyesara lori awọn nkan ti o n jẹ ki oju rẹ ri ati lori awọn nkan ti o n jẹ ki eti rẹ gbọ. Si tun kiyesara lori irufẹ ero ti o n fi aye silẹ fun ninu ọkan rẹ. Aijẹbẹ, o le e ti padanu ara rẹ sinu aye yi ati sọwọ eṣu ki o to mọ nkan ti o n ṣẹlẹ.
Nkan ekeji ti Oluwa wa fẹ ki a kiyesi, bi a ti ṣe ri ninu awọn ẹṣẹ bibeli yẹn, ni ifarajin wa fun adura gbigba. Lotitọ, oniruuru adura ni o wa. Ṣugbọn irufẹ adura ti O n sọrọ nipa nibiyi ni i ṣe pẹlu ipamọ ọkan wọn ni awọn ọjọ ikẹyin yi. Nitorina, lakọkọ, O sọ fun wa pe ki a gbadura pe ki a le bọ ninu awọn iṣẹlẹ ibi, ijamba, ajalu, ajakalẹ-arun, iyan ati bẹẹbẹẹ lọ, ti yoo ma ṣẹlẹ ni awọn ọjọ ikẹyin yi. Ekeji, O sọ fun wa pe ki a gbadura pe ki a le duro niwaju Oun nigba ti Oun ba pada de.
Ki wa gan ni koko gbogbo awọn nkan wọnyi? Oun naa ni pe ko si ọkankan ninu wa ti o le bọ ninu awọn ewu ati idibajẹ awọn ọjọ ikẹyin yi, ti Ọlọrun funrarẹ ko ba pa wa mọ. Igboya, ipinnu ati imọkan-le wa ko to lati pa wa mọ. Ọlọrun funrarẹ ni lati pa wa mọ. Aijẹbẹ, nṣe ni a o ji ni ọjọ kan, ti a o si wa ri wipe awa gan-an ti da gbogbo nkan ti a ti fi igbakanri waasu lodi si.
Nitorina, yatọ si pe ki a ma fi ojoojumọ kiyesara ninu irinajo wa laye yi, a tun nilo lati fi ara wa jin fun gbigbadura pẹlu itara pe ki Ọlọrun, ninu aanu rẹ, pa ati aye ati ọkan wa mọ kuro ninu gbogbo awọn ewu ati idibajẹ awọn ọjọ ikẹyin wọnyi. Ti a ba si n ṣe eyi lemọ́lemọ́ pẹlu igbagbọ, a ko ni dojuti wa. Dipo bẹẹ, nṣe ni a o pa wa mọ lati wa ni mimọ ati alailẹbi nigba ti Jesu Oluwa wa ba pada de.
Kí o ní ọ̀sẹ̀ alárinrin.
Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)