Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Agẹmọ 2024. Adura mi si ni pe ki Ọlọrun ranti ohun rere gbogbo ti O ti pete-pero lati ṣe ninu aye rẹ ninu ọdun yi, ki O si bẹrẹ si ni ṣe wọn ni kiakia, ki ogo rẹ ba a le fi ara han lakọtun ninu aye rẹ ki ọdun yi to pari, ni orukọ Jesu. Amin.

Ọkan lara awọn nkan ti a fi han wa ninu Iwe mimọ ni pe Ọlọrun ko ki i gbagbe tabi fojufo iṣẹ rere awọn eniyan. Bakan naa si ni pẹlu, ko ki i gbagbe tabi fojufo iṣẹ buburu awọn eniyan. Lotitọ, ti eniyan ika ba wa oju Ọlọrun fun aanu ati idariji, ti o si tun yi pada kuro ninu iwa ika rẹ, Ọlọrun yoo gbagbe gbogbo awọn iṣẹ ibi ti o ti ṣe ṣẹyin, ko si ni jẹ ẹ niya fun wọn. Idi si ni pe Ọlọrun aanu ni. (Wo: Iṣikiẹli 18:21-23)

Amọ niwọn igba ti ika ba tẹsiwaju lati ma gbe ninu iwa ika rẹ, Ọlọrun ko ni gbagbe iṣẹ ibi rẹ rara. Nigba ti asiko ba si to, bi o tilẹ jẹ wipe lẹyin ẹgbẹrun ọdun ni, yoo fi iya jẹ ẹ dandan ni ibamu pẹlu iwa ika rẹ. Fun apẹrẹ, nigba ti Sọọlu jẹ ọba lori Isiraẹli, Ọlọrun ran ọrọ yi si i nipa awọn ara AmalekiL “Emi ranti eyi ti Amalẹki ti ṣe si Isiraẹli, bi o ti lugọ de e ni ọna, nigba ti oun goke ti Ijibiti jade wa. Lọ nisisinyi ki o si kọlu Amaleki, ki o si pa gbogbo nnkan wọn ni aparun, ma si ṣe da wọn si; ṣugbọn pa ati ọkunrin ati obinrin wọn, ọmọ kekere ati awọn ti o wa ni ẹnu ọmu, maluu ati aguntan, rankunmi ati kẹtẹkẹtẹ.” (1Sámúẹ́lì 15:2-3)

Njẹ o ri bayẹn? Bi o tilẹ jẹ wipe ọpọlọpọ ọdun ti kọja lọ, Ọlọrun ko gbagbe iwa ika awọn ara Amaleki si awọn ọmọ Isiraẹli nigba ti wọn ṣeṣẹ ti Ijibiti jade wa (Ẹ́kísódù 17). Dipo bẹ ẹ, nṣe ni O ranti dadara ohun gbogbo ti wọn ṣe, ti O si pinnu lati fi iya jẹ wọn le lori ni asiko Ọba Sọọlu. Idi si ni pe Oun jẹ Ọlọrun onidajọ ododo. Nitorina, ti o ba n ṣe ibi lọwọlọwọ yi, ti O si dabi ẹni pe Ọlọrun ko kọbiara si, idi ni pe asiko fun ijiya rẹ ko i ti to. Nigba ti asiko fun ijiya rẹ ba to, Ọlọrun ko ni gbagbe lati ba ọ wi lọna ti o tọ ati ti o yẹ.

Nibakan naa, ti o ba n ṣe rere, ti o si dabi ẹni pe Ọlọrun ko kọbiara si rara, ma dawọduro. Idi si ni pe Ọlọrun ko ni gbagbe tabi fojufo iṣẹ rere rẹ. Bibeli sọ wipe, “Nitori Ọlọrun ki i ṣe alaiṣododo ti yoo fi gbagbe iṣẹ yin ati ifẹ ti ẹyin fihan si orukọ rẹ, nipa iṣẹ iranṣẹ ti ẹ ti ṣe ati eyi ti ẹ si n ṣe fun awọn eniyan mimọ.” (Hébérù 6:10) Njẹ o ri bayẹn? Ọlọrun ko ki i ṣe alaiṣododo Ọlọrun. Ko ki i ṣe Ọlọrun ti O ma n ranti lati ṣan awọn ika eniyan lẹsan fun iṣẹ ika wọn ṣugbọn ti ko ki i ranti lati san awọn olododo lẹsan fun iṣẹ rere wọn.

Awa kan ti ni awọn ọga kan ri lẹnu iṣẹ ti wọn ma n fi igba gbogbo ranti lati bu wa ati lati fi iya jẹ wa fun awọn ikuna wa ṣugbọn ti wọn ko ki i ranti lati yin wa tabu lati pin wa ni ere fun awọn aṣeyọri ti a mu wa fun wọn. O si di dandan ki eyi fi irẹwẹsi si ọkan wa ni ọpọlọpọ ọna. Ṣugbọn Ọlọrun ko ri bayẹn. Oun o ki i ṣe Ọlọrun ti O ma n ranti kiki iwa ika awọn eniyan, ki O ba a le jẹ wọn niya ni ibamu pẹlu rẹ. Dipo eyi, Oun jẹ Ọlọrun ti O tun ma n ranti iṣẹ rere awọn eniyan pẹlu, ki O ba a le pi wọn lere ni ibamu pẹlu rẹ.

Amọ ṣa o, asiko ti Ọlọrun ma n fun awọn eniyan lere ko ki i ṣe eyi ti ẹnikẹni ninu wa le yan fun. Ko si ọkankan ninu wa ti o gbọn to lati yan asiko fun Ọlọrun lati san wa lẹsan fun awọn nkan rere ti a n ṣe. Oun nikan ni O gbọn to lati san wa lẹsan ni asiko ti o tọ, ni asiko ti a o le fi ara balẹ jẹgbadun ohunkohun ti O ba fun gẹgẹ bi ere. Idi si ni yi ti a fi sọ fun wa pe ki a ma ṣe jẹ ki rere su wa lati ma a ṣe, nitoripe Ọlọrun yoo ranti lati san wa ni ẹsan fun ni asiko ti o yẹ, ti a ko ba rẹwẹsi (Galati 6:9).

Nitorina, bi ko tilẹ da bi ẹnipe ohun rere kankan yoo jẹyọ lati ara awọn nkan ti o n ṣe fun Oluwa, fun awọn eniyan rẹ ati fun awọn ti o wa ni ayika rẹ, ma ṣe rẹwẹsi. Idi ni pe Ọlọrun n kiyesi ohun gbogbo. Nigba ti asiko ba si to, yoo ranti lati ṣan ọ lẹsan. Amọ ti o ba ti fi aye gba irẹwẹsi nitoripe o ko ri ere awọn nkan ti o n ṣe fun Ọlọrun ni kiakia, mọ wipe Oun naa ko ni ranti lati fun ọ ni ere fun iṣẹ rere ti o ko ṣe fun un. Nitorina, ma ṣe dẹkn lati ma ṣe rere. Dipo bẹ ẹ, nṣe ni ki o ma ṣe e lọpọlọpọ si i. Mo si gbadura pe ohunkohun ko ni fi idibajẹ sinu iṣẹ rere rẹ, ki o si jẹ ki o padanu awọn ere ti o tọ si ọ fun un, ni orukọ Jesu. Amin.

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kiristi Oluwa wa. Inu mi dun lati ki ọ kaabọ sinu ọsẹ keji ninu oṣu Agẹmọ 2024. Mo gbadura pe ki ọkan rẹ ma fi ojoojumọ gba okun lati duro gẹgẹ bi olotitọ si Oluwa, bi gbogbo awọn ti o wa ni ayika rẹ ba tilẹ n ja a kulẹ. Amin.

Bi Jesu Oluwa wa ti ṣe tọka si fun wa, ọkan lara awọn nkan ti yoo fi han pe a jẹ ọmọlẹyin rẹ nitootọ ni imura wa lati korira awọn ti o sunmọ wa. Wo bi Luuku ti ṣe gbe eyi kalẹ ninu iyinrere rẹ:

“Awọn ọpọ ijọ eniyan n ba a lọ; o si yipada, o si wi fun wọn pe, “Bi ẹnikẹni ba tọ mi wa, ti ko si korira baba rẹ, ati iya, ati aya, ati ọmọ, ati arakunrin, ati arabinrin, ani ati ọkan ara rẹ pẹlu, ko le ṣe ọmọ-ẹyin mi. Ẹnikẹni ti ko ba ru agbelebuu rẹ, ki o si maa tọ mi lẹyin, ko le ṣe ọmọ-ẹyin mi.” (Lúùkù 14:25-27)

Njẹ o ri bayẹn? Ẹnikẹni ti yoo ba jẹ ọmọlẹyin Jesu Kirisiti Oluwa wa nitootọ gbọdọ korira baba ati iya rẹ, aya ati ọmọ rẹ, arakunrin ati arabinrin rẹ ati pẹlupẹlu aye oun tikararẹ. Ṣe eyi ko wa tako ọrọ ifẹ ti Jesu Kirisiti n fi ṣe iwaasu bi? Rara!

Ṣe o ri, nigba ti Oluwa sọ nkan wọnyi, ko tunmọ si pe ki a ma fẹran awọn eniyan wa rara. Ranti pe Oun funrarẹ ni O sọ fun wa pe ki a fẹran awọn ọta wa, ki a si tun ma gbadura fun wọn. Ti O ba si fẹ ki a fẹran awọn ọta wa ati pẹlupẹlu awọn ti o n ṣe inunibini si wa, ki a si tun ma gbadura fun wọn, ṣe ko wa ni fẹ ki fẹran awọn ẹbi ati ọrẹ wa ju bẹ ẹ lọ bi? Yoo fẹ ẹ. (Wo: Mátíù 5:43-48)

Nitorina, nigba ti O sọ wipe ki a korira awọn eniyan wa ki a ba le jẹ ọmọlẹyin rẹ, ko tunmọ si pe ki a ma ba wọn ṣe pọ pẹlu ifẹ. Dipo bẹẹ, nkan ti O n sọ ni pe a gbọdọ fẹran Oun, ki a si tun mu ni pataki ju wọn lọ. Eyi jasi pe, Oun ni O gbọdọ ma fi gbogbo igba siwaju ninu aye wa. Ti O ba si jẹ wipe Oun ni ẹni akọkọ ninu aye wa, a jẹ wipe ti awọn ẹbi tabi ọrẹ wa ba n ṣe oun ti o lodi si ifẹ rẹ, a ko ni darapọ mọ wọn. Dipo bẹẹ, nṣe ni a o duro ṣinṣin lati tako wọn.

Fun apẹrẹ, nigba ti Mose fẹ ṣe idajọ awọn ọmọ Isiraẹli fun ṣiṣe ere wura fun ara wọn lati ma jọsin dipo Ọlọrun ati fun sisọ ìjánu wọn nu ninu ajọyọ dindinrin ti wọn n ṣe, O bere lọwọ awọn eniyan naa, “Tani o wa ni iha ti Oluwa?” Gbogbo awọn ọmọ Lefi si ya wa si ọdọ rẹ. O wa fun wọn ni aṣẹ Oluwa, eyi ti o ni i ṣe pẹlu ki wọn mu ida wọn, ki wọn la agbo awọn ọmọ Isiraẹli kọja, ki wọn si pa ẹnikẹni ti ara rẹ ko i ti balẹ, bi ti o tilẹ jẹ wipe ẹbi wọn, ọrẹ wọn tabi aladugbo wọn ni ẹni naa. Wọn si ṣe bẹẹ.

Njẹ o wa le jẹ nkan ti o rọrun fun awọn ọmọ Lefi yi lati pa awọn obi wọn, ọmọ wọn, arakunrin wọn, arabinrin wọn, ọrẹ wọn tabi aladugbo wọn ni ọjọ yi. Rara! Agbelebu ti o wuwo jọjọ ni eyi jẹ fun wọn lati gbe, nitori fun gbogbo iyoku ọjọ aye wọn ni wọn yoo fi ma ranti pe awọn pa awọn eniyan awọn. Ṣugbọn nitoripe ifẹ wọn si Ọlọrun pọ ju eyi ti wọn ni si awọn eniyan wọnyi lọ, wọn pa wọn. Nitoripe wọn si ṣe bẹ, bibeli tẹsiwaju lati sọ eyi fun wa: “Nigba naa ni Mose wi pe, “Ẹ ti ya ara yin sọtọ fun Oluwa lonii, nitori iwọ ti dide si awọn ọmọ rẹ ati arakunrin rẹ, o si ti bukun fun ọ lonii,” (Ẹ́kísódù 32:29)

Ṣe o wa ri idi ti Ọlọrun ṣe yan ẹya Lefi lati arin gbogbo ẹya Isiraẹli yoku lati fi ara rẹ ha wọn, ki wọn ba a le ma ṣin in ninu tẹmipili rẹ? Idi naa ko ju wipe wọn korira awọn ẹbi wọn, ọrẹ wọn ati aladugbo wọn lati le bu ọla fun Ọlọrun. Jesu Oluwa wa si wa n sọ wipe awa naa gbọdọ mura lati rin pẹlu ẹmi kan naa, ti a ba fẹ jẹ ọmọlẹyin rẹ nitootọ.

Eyi ko wa jasi pe awa naa gbọdọ ṣetan lati pa awọn ẹbi tabi ọrẹ wa, nitoripe a fẹ fi ifẹ wa si Ọlọrun ati Jesu Oluwa wa han. O si wa ṣeni laanu pe a si tun ri ọpọ ẹsin ninu aye loni ninu eyi ti awọn eniyan ti ro wipe pipa ẹlomiran fun Ọlọrun jẹ ọna ti o ga lati fi ifẹ wọn han si i. Ṣugbọn Ọlọrun ko ran ẹnikẹni lati pa ẹnikẹni fun un loni. Idi si ni pe O ti fa Jesu kalẹ gẹgẹ bi etutu fun gbogbo wa.

Amọ ṣa o, nkan ti O n sọ fun wa ni pe a gbọdọ ṣetan lati duro ṣinṣin lati tako ohunkohun ti Oun ba lodi si, bi o tilẹ jẹ wipe nkan naa kan awọn ẹjẹ ati ẹran ara wa. Ṣe a wa ṣetan lati ṣe eyi? Ṣe a ṣetan lati tako awọn obi, arakunrin, arabinrin, ọrẹ, aya, ọkọ ati ọmọ wa, ti wọn ba n rin lodi si ifẹ Ọlọrun? Kiki awọn ti o ba ṣetan lati ṣe eyi ni wọn jẹ ọmọlẹyin Jesu Kirisiti Oluwa wa ni tootọ, ko ki i ṣe awọn ti wọn kan n fi ọrọ ẹnu nikan pe ara wọn ni ọmọlẹyin. Mo si gbadura pe ki gbogbo wa gba okun lọdọ Ẹmi Ọlọrun lati ma fi ojoojumọ wa ni imura lati gbe agbelebu yowu ti a ni lati gbe lati jẹ ọmọlẹyin Jesu Oluwa tootọ. Amin.

Ki o ni ọ̀sẹ̀ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ si ọjọ ti o kẹyin oṣu yi ati si ọsẹ kini ninu oṣu Agẹmọ ti a ṣẹṣẹ fẹ wọ inu rẹ. Adura mi si ni pe ki o ni iriri ogo Ọlọrun ninu aye rẹ ni awọn ọna ti o kọja ero rẹ ni ọṣẹ yi ati ninu gbogbo oṣu tuntun ti o wa niwaju wa, ni orukọ Jesu. Amin.

Wayi o, mo fẹ gba ọ niyanju lori pataki ki o mu ibaṣepọ tikararẹ pẹlu Ọlọrun ni ọkunkundun, dipo eyi ti o o fi ma gbẹkẹle ibaṣepọ awọn miran pẹlu rẹ gẹgẹ bi ọna lati jẹgbadun rẹ. Mo si n pe akiyesi rẹ si eyi nitoripe ọpọ lo wa loni ti wọn pe ara wọn ni onigbagbọ ninu Kirisiti Jesu ṣugbọn ti o jẹ wipe ori igbagbọ awọn adari ijọ wọn ninu Ọlọrun tabi igbagbọ awọn kan ninu ẹbi wọn ninu Ọlọrun ni wọn gbojule fun ilọsiwaju tabi fun aabo wọn laye. Eyi si le ni ewu gidigidi fun wọn.

Fun apẹrẹ, a sọ eyi fun wa ninu bibeli nipa ọba Juda kan ti a n pe ni Joasi: “Joasi ṣe ohun ti o dara ni oju Oluwa ni gbogbo akoko Jehoiada alufaa.” (2Kironika 24:2) Ki ni idi ti ọkunrin yi ṣe ṣe ohun ti o tọ niwaju Ọlọrun ni asiko alufaa Jehoiada? Idi ni pe alufaa yii n dari rẹ ni ipa ọna ododo. A tilẹ ti sọ fun wa ninu akọsilẹ igbe aye rẹ pe alufaa yi gan an ni o yan awọn iyawo meji ti o fẹ fun un (2Kíróníkà 24:2).

Amọ sa o, lẹyin iku alufaa yi, nkan yi pada fun Joasi. O pa Oluwa ti, O si bẹrẹ si ni ṣe bi o ti ṣe wu u. Wo nkan ti a sọ ninu bibeli lori eyi:

“Lẹyin iku Jehoiada, awọn oniṣẹ Juda wa lati fi iforibalẹ wọn han si ọba. O si fesi si wọn. Wọn pa ile Oluwa ti, Ọlọrun baba a wọn. Wo si n sin awọn ere Aṣerah ati awọn oriṣa. Nitori ẹṣẹ wọn yii, ibinu Ọlọrun de sori Juda ati Jerusalẹmu. Bi o ti wu ki o ri, Oluwa ran awọn wolii si awọn eniyan lati mu wọn pada si ọdọ rẹ. Bi o tilẹ jẹ wi pe, wọn jẹrii nipa wọn, wọn ki yoo gbọ.” (2Kíróníkà 24:17-19)

Njẹ o ri bayẹn? Lẹyin iku Jehoiada, awọn adari ilẹ naa tan Joasi wọ inu ibọriṣa. O si tẹlẹ wọn. Ki ni idi ti o fi tẹle wọn? O tẹle wọn nitoripe oun funararẹ ko ni ibaṣepọ kankan ti o danmọran pẹlu Ọlọrun. Nitorina, o ṣe ohun yowu ti o ṣe fun Ọlọrun ṣaaju asiko yi nitori Jehoiada ni, ko ki i ṣe nitoripe o gbagbọ ninu Ọlọrun tabi ni ifẹ rẹ ni tootọ. Eyi tunmọ si pe o kan n ṣe oju aye ni. O kan n gbiyanju lati tẹ Jehoiada lọrun ni nitoripe oun ni ko jẹ ki wọn ti pa nigba ti o si jẹ ọmọ-ọwọ ati wipe oun ni o tọ ọ dagba, ti o si tun jẹ ki o ṣeeṣe fun lati di ọba. (Wo: 2Kíróníkà 22-23)

Amọ nigba ti ọkunrin yi ku, ti ko si si idi kankan fun lati ṣe ohunkohun lati tẹ lọrun mọ, o pa Ọlọrun ti, O si tẹle awọn miran wọ inu ibọriṣa lọ. Nitorina, a ke ijọba rẹ kuru, o si ku iku aitọjọ. Eyi, bi mo si ti ṣe sọ tẹlẹ, n fi han wa pe o ṣe pataki ki awa tikarawa ni ibaṣepọ tiwa pẹlu Ọlọrun. Eyi tunmọ si pe ma ṣe sin Ọlọrun, lọ si ipade sọọsi tabi ṣe bi eniyan mimọ nitoripe o kan fẹ tẹ awọn obi, ọrẹ, ọkọ, aya tabi ẹni ti o gba ọ ṣiṣẹ lọrun. Dipo eyi, nṣe ni ki o sin Ọlọrun, ki o si gbe igbe aye iwa mimọ nitoripe o ti mọ daju pe Oun ni ẹni naa ti O to gba ijọsin rẹ. Aijẹbẹ, asiko n bọ ti yoo han kedere si gbogbo awọn eniyan pe eke ni ọ lati ibẹrẹpẹpẹ.

Ni afikun, ti o ko ba ni ibaṣepọ ti ara rẹ pẹlu Ọlọrun, ti o si je wipe ojurere Ọlọrun ti o wa ninu aye awọn miran ni o gbojule, asiko le de ninu eyi ti o jẹ wipe awọn nikan ni igbagbọ wọn ninu Ọlọrun yoo le ṣiṣẹ fun, ko ni i le ṣiṣẹ fun ọ. Wo nkan ti Ọlọrun funrarẹ ni lati sọ fun wa lori eyi:

“Ọrọ Ọluwa tọ mi wa wi pe: “Ọmọ Eniyan bi orilẹ-ede kan ba dẹṣẹ si mi nipa iwa aiṣododo, emi yoo nawọ mi jade si wọn, lati gẹ ipese ounjẹ wọn, emi yoo ran iyan si wọn, emi yoo si pa eniyan ati ẹranko inu rẹ, bi awọn ọkinrin mẹta yii, Noa, Daniẹli ati Jobu tilẹ wa ninu wọn rẹ, kiki ẹmi ara wọn nikan ni wọn le fi ododo wọn gbala, Oluwa Olodumare wi.”” (Ìsíkíẹ́lì 14:12-14)

Mo mọ daju pe o ti ri alaye fun iku aitọjọ ti gbogbo awọn ọmọ Joobu ku ni ọjọ kan bayẹn (Joobu 1). Lati ibẹrẹpẹpẹ, igbagbọ baba wọn ninu Ọlọrun ni o n gbe wọn ro. Ṣugbọn igbagbọ rẹ ko le daabo bo wọn kuro lọwọ eṣu ni ọjọ ti o wa lati kọ lu ẹbi wọn; ohun nikan ni igbagbọ rẹ le da aabo bo. Ka wa lọ sọ wipe awọn naa mu Ọlọrun ni ọkunkundun bi oun ti ṣe mu ni ọkunkundun ni, o ṣeeṣe ki ọrọ naa ma lọ bi o ti ṣe lọ. Nitorina, ni igbagbọ ti ara rẹ ninu Ọlọrun dipo eyi ti o o fi ma gbojule igbagbọ awọn miran ninu rẹ. Nipa bayi, ti igbagbọ awọn miran ninu rẹ ba tilẹ kuna tabi rẹwẹsi, igbagbọ tirẹ ninu rẹ yoo le gbe ọ bori.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu Òkúdù 2024. Adura mi si ni pe ki Ọlọrun ri daju pe ohun rere gbogbo ti o yẹ ki o jẹ tirẹ lọsu yi jẹ tirẹ ki oṣu naa to pari, ni orukọ Jesu. Amin.

Bi a ti ṣe n lọ lọsẹ yi, mo fẹ gba ọ niyanju pẹlu diẹ lara ọrọ Pọọlu si awọn ọmọ ijọ Kọrinti lori awọn ara ijọ Masidonia, eyi ti o sọ wi pe:

“Pẹlupẹlu, ara, awa n sọ fun yin ni ti oore-ọfẹ Ọlọrun ti a fifun awọn ijọ Masidonia; Bi o tilẹ jẹ wi pe a dan wọn wo nipa ipọnju, ti wọn si jẹ alaini, ṣugbọn wọn fi funni lọpọlọpọ. Nitori mo jẹrii pe gẹgẹ bi agbara wọn, ani ju agbara wọn, wọn ṣe e lati ifẹ inu ara wọn. Wọn n fi ẹbẹ pupọ rọ wa, ki awọn pẹlu le ni oore-ọfẹ lati ṣe alabaapin ninu iṣẹ-iranṣẹ ti ififunni fun awọn eniyan mimọ. Eyi si ju bi awa ti ro o si lọ, ṣugbọn wọn tete kọ fi awọn tikarawọn fun Oluwa, ati fun wa, nipa ifẹ Ọlọrun. (2Kọ́ríntì 8:1-5)

Ki ni apọsiteli yi fẹ ki awọn ara Korinti mọ nipa awọn ijọ ti o wa ni Masidonia? O fẹ ki wọn mọ nipa oore-ọfẹ ara-ọtọ kan ti Ọlọrun fi fun wọn. Irufẹ oore-ọfẹ wo wa ni yẹn? Oore-ọfẹ ififunni ni. Ṣugbọn ṣe o wa le jẹ wipe awọ ijọ Masidonia nikan ni o n fifun iṣẹ Oluwa ni asiko ti Pọọlu kọ lẹta yi bi? Rara o! Ki wa lo fa ti o ṣe n pe akiyesi awọn onigbagbọ yoku si ififunni wọn? O n ṣe eyi nitori pe irufẹ ififunni wọn ko wọpọ, o si tun jẹ eyi ti o n peni nija.

Bi Pọọlu ti ṣe fi ye wa, awọn ara Masidonia ko fi ara wọn jin lati ma fifun awọn apọsiteli ati awọn eniyan Ọlọrun miran nitoripe wọn ni owo gidigidi tabi nitoripe wọn ni ọrọ ju awọn ijọ Ọlọrun yoku lọ. Dipo eyi, ni asiko ti o kọ lẹta yi, ọpọ awọn ara yi ni o n ba iṣẹ ti o lagbara finra. A ko mọ ohun ti o fa iṣẹ fun wọn ni asiko yi. Ṣibẹsibẹ, wọn fifun Pọọlu ati awọn alabaṣiṣẹpọ rẹ lati ran awọn eniyan Ọlọrun miran lọwọ pẹlu ayọ ati lọpọlọpọ.

Bi Pọọlu tilẹ ṣe tẹsiwaju lati fi ha wa ninu awọn ẹsẹ bibeli ti o wa loke yẹn, awọn ara yi fifunni kọja bi wọn ti ṣe lówó lọ́wọ́ si ni asiko naa. Yatọ si iyẹn, wọn tun bẹ apọsiteli yi lati fi aaye gba wọn lati fifunni. Eyi jasi pe, ti a ba ni ki a wo bi nkan ti ṣe ri fun wọn ni asiko yẹn, Pọọlu ko tilẹ ni fẹ ki wọn fun oun tabi ẹnikẹni ni ohunkohun rara. Ṣugbọn wọn bẹ ẹ lati ma fi anfaani lati fifun Ọlọrun ni ọna yi dun wọn. O wa yẹ ki o ri kedere bayi idi ti Pọọlu ṣe n pe akiyesi awọn ijọ Ọlọrun yoku si nkan ti awọn eniyan wọnyi ṣe. O jẹ nkan ti ko wọpọ, ti o si tun n peni nija.

Ki wa ni idi ti awọn ara yi ṣe fifunni ni ọna yi? Ki idi ti ẹnikẹni yoo ṣe fi tayọ-tayọ lawọ si awọn miran ni asiko aini oun tikalara rẹ? Alaye kan ṣoṣo fun eleyi ko ju wipe ifẹ Ọlọrun ti gba akoso aye ẹni naa lọ. Wo o, ọkan lara awọn nkan ti yoo jẹ ki a mọ wipe Ọlọrun ti gba akoso aye eniyan patapata pẹlu ifẹ rẹ ni pe ẹni naa yoo fẹ ẹ fun ni ohunkohun ati ohun gbogbo. Ẹni naa ko ni ma wo nkan ti oun ni tabi eyi ti oun ko ni lati fifunni; dipo eyi, nkan ti yoo ma wo ni awọn aini ti Ọlọrun fẹ ki oun ba pade.

Wo opo Sarefati, fun apẹrẹ. Bi a ti ṣe ri ninu bibeli, ki Elija to wa gbe pẹlu rẹ rara ni Ọlọrun ti kọkọ ba a sọrọ nipa ati lori pataki ki O ba Oun ṣe itọju rẹ. Ki wa ni arabinrin yi ni ni asiko yi? Nkan ti o ni ko ma ju ikunwọ iyẹfun kan ati ororo diẹ lọ. Nkan ti o ni ko tilẹ to lati ṣe ounjẹ ẹẹkan fun oun ati ọmọkunrin kan ṣoṣo ti o ni. Ṣibẹsibẹ Ọlọrun sọ fun pe ki o tọju iransẹ Oun ti O n ran an si. Ṣe o wa gbọran si Ọlọrun lẹnu tabi ko gbọ? O gbọ! Ki ni idi ti o ṣe gbọ? Akọkọ, o gbọ nitoripe o fẹran Ọlọrun to lati fun un ni ohunkohun ti O ba fẹ lati ọwọ rẹ. Ekeji, o gbẹkẹle Ọlọrun to fun itọju oun ati ọmọ rẹ, bi o tilẹ jẹ wipe wọn fun ni gbogbo nkan yoku ti wọn ni lọwọ. Ṣe Ọlọrun wa ja a kulẹ tabi dojuti i? Rara o! (Wo: 1Àwọn Ọba 17)

Nibakan naa, awọn ara Masidonia fifun iṣẹ Ọlọrun bi wọn ti ṣe ṣe nitoripe wọn fẹran rẹ ati nitoripe wọn gbagbọ ninu rẹ. Ki lo si fa ti wọn fi le fẹran rẹ, ki wọn si tun gbẹkẹle bi wọn ti ṣe ṣe? Oun ti o fa nipe wọn fi aaye gba oore-ọfẹ rẹ lati ṣiṣẹ ninu aye wọn, lati kun wọn pẹlu ifẹ rẹ ati lati pa iwa adanikanjọpọn inu wọn run.

Wayi o, ti awa naa ba fi aye gba oore-ọfẹ Ọlọrun, awọn ipese agbara rẹ lati ṣiṣẹ ninu wa, lati yi wa pada, lati yọ ẹru wa danu ati lati pa ohun gbogbo ti o ni i ṣe pẹlu imọtara-ẹni-nikan inu wa run, a ko ni ni iṣoro mọ niti fifẹran rẹ ati gbigbẹkẹle tọkantọkan. Bi a ba si ṣe n fẹran rẹ, ti a si tun gbọkan le tọkantọkan, gẹgẹ bi awọn ijọ Masidonia, awa naa yoo ri wipe nṣe ni a o ma fifun un ni awọn ọna ti yoo pe ọkan awọn miran nija, ti yoo si tun ṣi oniruuru ilẹkun ipese iyanu silẹ fun wa. Njẹ iwọ yoo wa fi aye gba oore-ọfẹ rẹ lati ṣiṣẹ ninu rẹ ati lati pa imọtara-ẹni-nikan inu rẹ ati gbogbo awọn awawi ti o ma n ṣe fun bi o ko ṣe lawọ run bi?

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Òkúdù 2024. Mo si gbadura pe ki ọkan rẹ ma fi ojoojumọ gba okun lati mu ojuṣe rẹ ni gbigbadura fun orilẹ-ede wa ni ọkunkundun, ki asiko itura ba a le tọ gbogbo wa wa lalai si idaduro. Amin.

Bi a ti ṣe sọ fun wa ninu bibeli, gbogbo awa ti a mọ Ọlọrun ni O ti paṣẹ fun pe ki a ma gbadura fun ilẹ wa ati fun awọn adari wa, bi o ti wu ki nkan buru to. Ki ni idi? Akọkọ, idi ni pe ki a ba le ni iriri alaafia ati ilọsiwaju ni ilẹ naa. Ekeji, idi ni pe inu Ọlọrun dun si irufẹ adura bi eyi, O si le lo o lati gba ọpọ la. (Wo: 1Tímótì 2:1-3)

Nitorina, ti o ko ba i ti mu ojuṣe rẹ lati ma gbadura fun orilẹ-ede wa ni ọkunkundun, o ni lati bẹrẹ si ni ṣe bẹ. Lotitọ, nkan ti a n fi ojoojumọ ri ati gbọ le ma fun wa ni iwuri ti o peye lati ma gbadura fun orilẹ-ede wa. Awọn nkan wọnyi tilẹ le jẹ ki a ro wipe ifakoko-ṣofo ni gbigbadura fun orilẹ-ede wa jẹ. Laipẹ yi ni mo gbọ ti arabinrin kan n sọ lori redio wipe iṣoro orilẹ-ede wa ti wa kọja eyi ti adura le yanju bayi. Sibẹsibẹ oun naa n sọ wipe oun gbagbọ ninu adura gbigba.

Njẹ otitọ wa ni wipe awọn iṣoro orilẹ-ede wa ti kọja eyi ti adura le yanju? Rara o, ko ki i ṣe otitọ rara. Lotitọ, awọn nkankan wa ti a tun nilo lati ma ṣe yatọ si adura gbigba lati gba orilẹ-ede wa la. Amọ, lalai ba jẹ wipe a n gbadura si Ọlọrun fun un, ko si irufẹ ọgbọn tabi agbara ti a gbe kalẹ ti yoo le gba a kuro lọwọ iṣakoso eṣu ti a n ba finra lọwọlọwọ yi.

Nitorina, ti o ba wa lara awọn ti o ro wipe ifakoko-sofo ni gbigbadura fun orilẹ-ede yi, o ti ṣina, o si tun ti n fihan wipe o ko gbagbọ mọ ninu agbara Ọlọrun lati gbala ati lati wosan. O si nilo lati ronupiwada. O nilo lati ronipiwada nitoripe Ọlọrun yoo ba ọ wi lọjọ kan fun kikuna rẹ lati ṣe ojuṣe rẹ ni gbigbadura fun irapada ati alaafia orilẹ-ede rẹ. Ki wa ni iwọ yoo sọ fun un ni ọja naa?

Iwọ naa wo ọrọ Iwe Mimọ yi ati nkan ti o sọ nipa ojuṣe wa ni gbigbadura fun orilẹ-ede wa:

“Emi ti fi oluṣọ ranṣẹ sori odi rẹ iwọ Jerusalẹmu; wọn ki yoo le dakẹ tọsan toru. Ẹyin ti n ke pe Oluwa, ẹ ma ṣe fun ara yin ni isinmi, ati ki ẹ ma ṣe fun oun pẹlu ni isinmi titi ti yoo fi fi idi Jerusalẹmu mulẹ ti yoo si fi oun ṣe iyin ori ilẹ aye.” (Àìsáyà 62:6-7)

Ṣe o ri bayẹn? Gbogbo awa ti a jẹ ọmọ Ọlọrun ni Ọlọrun funrarẹ ti gbin gẹgẹ bi iluṣọ sinu orilẹ-ede yi. Ara iṣẹ wa si ni lati ma gbadura fun un laarọ ati ni alẹ. A ko gbọdọ panumọ lori eyi. A ko gbọdọ fun ara wa ni isinmi lori rẹ. A ko si gbọdọ fun Ọlọrun paapaa ni isinmi titi yoo fi gba orilẹ-ede wa la, ti yoo mu bọ wa sipo ti yoo fi ẹsẹ rẹ mulẹ ninu iṣoriire ati ti yoo si tun sọ ọ di iyin fun gbogbo aye.

Eyi wa jasi pe titi a o fi ri eso adura wa fun orilẹ-ede wa, a ko gbọdọ dẹkun lati ma a gbadura si Ọlọrun fun un. Rara o, a ko gbọdọ fi aye gba awọn iroyin buburu ati iroyin irẹwẹsi ti a n gbọ lojoojumọ (a si n gbọ ọpọlọpọ wọn) lati da wa lẹkun lati ma gbadura fun un. Idi si ni pe Ọlọrun n gbọ adura wa, bi o tilẹ jẹ wipe ohun ti O n ṣe lati gba ilẹ wa la le ma ti han si ẹnikẹni ninu wa. Ṣugbọn O ti n ṣiṣẹ fun rere wa, ni idahun si adura awọn ọmọ rẹ ti wọn n gbadura si lotitọ, lọsan ati loru. Si wa wo ohun ti O sọ wipe yoo ṣẹlẹ lẹyin igba ti a ba mu ojuṣe adura gbigba wa fun orilẹ-ede wa lọkunkundu:

“Oluwa ti bura pẹlu ọtun rẹ ati nipa agbara apa rẹ: “Emi ki yoo jẹ ki horo rẹ di ounjẹ fun ọta rẹ bẹẹ ni awọn ajeji ki yoo mu waini tuntun rẹ moọ eyi ti iwọ ti ṣe laalaa fun; ṣugbọn awọn ti o ba koore rẹ ni yoo jẹ ẹ ti wọn o si yin Oluwa, ati awọn ti wọn ba ko girepu jọ ni wọn o mu un ninu agbala ile mimọ mi.” (Àìsáyà 62:8-9)

Njẹ o ko fẹran awọn ọrọ wọnyi bi? Emi fẹran wọn. Mo si mọ wipe awọn ni yoo jẹ ẹri wa ni ibi gbogbo ni orilẹ-ede yi. Nitorina, ji lati inu oorun rẹ, ki o si bẹẹ si ni ṣe ojuṣe rẹ ni gbigba adura fun orilẹ-ede yi. Ẹri wa yoo si ga, ni orukọ Jesu. Amin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ keji oṣu yi, iyẹn oṣu Òkúdù 2024. Adura mi ni pe ki Ọlọrun fi adun rẹ pada sinu ohunkohun ninu aye rẹ ti esu ti bajẹ pẹlu ikoro, ki ohun naa ba a le wulo fun igbadun rẹ ati fun ogo rẹ. Amin.

Bi a ti ṣe ri ninu bibeli, lẹyin igba ti awọn ọmọ Isiraẹli ti ri iparun awọn ogun Farao ninu Okun Pupa, wọn kọkọ ri irin-ajo laarin aṣalẹ fun odidi ọjọ mẹta lalai fi oju kan omi. Nigba ti wọn wa de ibikan ti a n pe ni Mara, ti wọn si fẹ bẹrẹ si ni yọ wipe omi wa nibẹ, nṣe ni a tun ke ayọ wọn kuru nitoripe omi ti wọn ri nibẹ korò, ko si ṣe e mu. (Wo: Ẹ́kísódù 15:22-23)

Njẹ ki lo wa fa ti omi Mara fi koro? A ko sọ fun wa. Ṣugbọn daju-ṣaka ni pe Ọlọrun ko ni O sọ di kikoro, nitoripe daradara ni ohun gbogbo ti Ọlọrun da ni atetekọṣe (1Tímótì 4:4). Nitorina, nkankan gbọdọ ti ṣẹlẹ si omi yi ni asiko kan ti o fi ikoro sinu rẹ. Eyi si n fi han wa wipe pe Ọlọrun pese nkan ti o dara fun wa ko tunmọ si pe ikoro ko le wọ inu rẹ. Ikoro le wọ inu rẹ lati ipasẹ iṣẹ ọwọ Satani tabi iṣẹ ọwọ awọn eniyan. Idi si ni yi ti a fi gbọdọ ma fi gbogbo igba gbadura, ki a si tun ma ṣọra, ki a ma ba fi aye gba ikoro lati ba ohun rere yowu ti Ọlọrun ti fi fun wa jẹ.

Ki a ma fọ̀rọ̀gùn, nitori pe omi ti awọn ọmọ Isiraẹli ri ni Mara koro, ara wọn ko balẹ mọ, wọn si bẹrẹ si ni sọrọ si Mose fun bi o ti ṣe mu wọn jade lati Ijibiti lati parun saarin aṣalẹ. Ṣugbọn ni ọjọ mẹta saaju asiko yi, awọn eniyan kan naa yi ni o ri ọwọ agbara Ọlọrun fun itusilẹ wọn kuro ninu oko ẹru ọpọlọpọ ọdun ni Ijibiti. Wọn ri bi O ti ṣe la ọna fun wọn laari Okun Pupa, ti O si tun pa awọn ọta wọn ti o n lepa ẹmi wọn run sinu awọn omi okun yi. Ki wa lo de ti wọn ko ro wipe imojuto ikoro omi Mara ko le jẹ iṣoro fun un? Wọn ko ro eyi nitoripe itura wọn nikan ni o wa ni ọkan wọn; ọkan wọn ko si lori bi wọn ti ṣe le ṣiṣẹ lori ibaṣepọ wọn pẹlu Ọlọrun. (Wo: Ẹ́kísódù 15:23)

O wa ṣeni laanu pe ọpọ ti o jẹ ọmọ Ọlọrun ninu aye loni ni o dabi awọn ọmọ Isiraẹli yi. Nkan ti awọn naa n mojuto ko kọja nkan ti Ọlọrun le ṣe lati tu wọn lara ati lati gbe wọn soke laye. Wọn ko kọbiara si bi wọn ti ṣe le ni ibaṣepọ ti o nitunmọ pẹlu rẹ. Nitorina, igbakigba ti wọn ba dojukọ iṣoro tuntun, wọn yoo gbagbe gbogbo awọn nkan rere ti Ọlọrun ti ṣe fun wọn ṣẹyin patapata, wọn yoo si wa ma ṣaroye pe ko raye ti wọn rara tabi pe ipa ti awọn kan ninu aye wọn n ko ko to.

Ki lo wa fa ti awọn eniyan ṣe ma n ṣe bayi? Idi naa ni pe wọn ro wipe ti Ọlọrun ba wa pẹlu eniyan, ti O si n ṣetọju ẹni naa, ko yẹ ki O fi aye gba eṣinṣin kankan lati fi ọwọ kan iru ẹni bẹẹ. Ṣugbọn ko si ibi ti a kọ si ninu ọrọ Ọlọrun pe a ko ni ba idojukọ pade laye nitoripe Ọlọrun wa pẹlu wa tabi nitoripe O fẹran wa. Ọlọrun nifẹ Jesu gidigidi nigba ti O wa ninu aye yi, O si tun n fi gbogbo igba wa pẹlu rẹ. Ṣibẹsibẹ, iyẹn ko ni ki O ma dojukọ oniruuru idojukọ, pẹlupẹlu iku. Ṣe o wa ṣaroye nitori eyi? Rara o! Ki ni idi ti ko fi ṣaroye? Ko ṣaroye nitoripe O mọ wipe Ọlọrun, ti O fẹran rẹ, ti O si n fi igba gbogbo wa pẹlu rẹ, yoo fun ni iṣẹgun lori gbogbo awọn idojuko yi. Ṣe O si wa fun ni iṣẹgun lori wọn tabi ko fun un? O fun un.

Nibakan naa, bi O ti wu ki awọn idojukọ ti a n ko ni aye tile to, a ko gbọdọ fi igba kankan gbagbe pe Ọlọrun wa pẹlu wa ati wipe yoo fun wa ni iṣẹgun lori gbogbo wọn nitori pe O nifẹ wa. Nitorina, dipo ti a o fi ma kun si i tabi ti a o ma fi ẹ̀sùn kan awọn adari wa ninu ẹmi pe wọn ko gbadura to fun wa, nṣe ni ki a kọju si Ọlọrun ninu adura fun ọna iṣẹgun. Yoo si da wa lohun.

Bi a ti ṣe ri ni ti ọrọ awọn ọmọ Isiraẹli yẹn, nigba ti wọn bẹrẹ si ni kun si Mose ati si Ọlọrun, Mose ko ma darapọ mọ wọn lati kun. Dipo eyi, nṣe ni O siju pada si Ọlọrun fun ọna abayọ si iṣoro ti o wa nilẹ. Wo bi bibeli ti ṣe gbe ọrọ naa kalẹ: “Mose si ke pe Oluwa, Oluwa si fi igi kan han an, o si sọ igi naa sinu omi, omi naa si dun. Nibẹ ni Oluwa ti gbe ilana at ofin kalẹ fun wọn, nibẹ ni o si ti dan wọn wo…” (Ẹ́kísódù 15:25) Ṣe o ri bayẹn? Ẹni ti o kepe Ọlọrun ni O fi aṣiri ọna abayọ han. O fi ohun ti yoo ṣe lati wo omi Mara san kuro ninu okoro rẹ han. Nigba ti o si ṣe ohun ti Ọlọrun ni ki o ṣe, omi naa gba iwosan, o si di eyi ti awọn eniyan le mu.

Nitorina, Ọlọrun le fi ọna lati wo ohunkohun ti a ba ni, ti idibajẹ si ti de ba nipasẹ ikoro ti o wa ninu rẹ, san han wa. Ohun ti a nilo ko ju ki a kan kepe fun ifihan lori ohun ti a nilo lati ṣe lọ. Yoo si da wa lohun. Nigba naa ni a o rọpo ikoro ti a n ni iriri rẹ nipa lilo awọn ipese rẹ fun wa pẹlu adun. Ṣe iwọ yoo wa bẹrẹ si ni ba a sọrọ lori awọn nkan naa ninu aye rẹ ti ikoro ti bajẹ bi?

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. O dun mọ mi ninu lati ki ọ kaabọ sinu oṣu miran ninu ọdun yi, iyẹn oṣu Okúdù 2024. Adura mi si ni pe ki Ọlọrun fi ààyè gba ọ lati gberu nibikibi ti o ba lọ tabi ti o ba ti ba ara rẹ ninu oṣu naa, ni orukọ Jesu. Amin.

Wayi o, bi o tilẹ jẹ wipe Ọlọrun le fi aaye gba wa lati ṣe rere nibikibi, ko tunmọ si pe a ko ni ba idojukọ kankan pade. A ko le sa lọ fun idojukọ laye yi. Ọrọ Ọlọrun sọ fun wa pe ninu aye yi a o ri ipọnju. Amọ ṣa o, o tun wa sọ fun wa pe ki a tujuka. Ki ni idi? Idi ni pe Jesu Kirisiti ti ṣẹgun aye fun wa. Niwọn igba ti O si ti ṣẹgun aye fun wa, O le dari wa lati iṣẹgun de iṣẹgun laye. (Wo: Jòhánù 16:33)

Siwaju si, ọrọ Ọlọrun sọ fun wa pe Ọlọrun ko ni lailai jẹ ki a koju awọn idojukọ ti o ga ju nkan ti a le mojuto lọ. Dipo eyi, asiko yowu ti a ba koju idojukọ, yoo ṣeto ọna iṣẹgun lori rẹ fun wa. Nitorina, igba yowu ti a ba koju idojukọ, a ko nilo lati ba ọkan jẹ tabi sọ ireti nu lori aye wa. Dipo eyi, a kan nilo lati gbadura si i ni pe ki O ṣi oju wa lati ri ọna iṣẹgun ti O ti pese fun wa, ki O si tun fun wa ni okun lati tọ ọ. (Wo: 1Kọ́ríntì 10:13)

Amọ ṣa o, kiki igba ti a ba n rin ninu ifẹ Ọlọrun nikan ni ofin yi le ṣiṣẹ fun wa. Nkan ti mo n sọ ni pe kiki igba ti a ba n rin ninu ifẹ Ọlọrun nikan ni a ko ni koju idojukọ ti o ga ju wa lọ. Ti a ko ba rin ninu ifẹ rẹ, o di dandan ki a koju idojukọ ti ko yẹ ki a koju rara laye. Ranti Lọti. Ranti pe aye ati igbagbọ oun ati ẹbi rẹ ko ba di piparun ni Sodomu, ti ko ba ṣe wipe Ọlọrun ṣaanu fun wọn. Ṣugbọn ṣe o yẹ ki wọn koju awọn idojukọ buruku ti wọn koju nigba ti wọn wa ni Sodomu bi? Rara! Ki lo wa fa a ti wọn fi koju wọn? Wọn koju wọn nitoripe irin wọn ko ṣe deede pẹlu ifẹ Ọlọrun fun wọn. (Wo: Jẹ́nẹ́sísì 13&19)

Nitorina, ti o ko ba fẹ koju awọn idojukọ ti Ọlọrun ko ṣe ọ yẹ lati mojuto laye, duro ninu ifẹ rẹ. Lotitọ, Ọlọrun le e ṣaanu fun wa, ki O si daabo bo wa, bi a tilẹ yẹṣẹ kuro ninu ifẹ rẹ fun aye wa. Ṣugbọn awọn irora kan wa ti aanu Ọlọrun ko le pa wa mọ pe ki a ma ni wọn, niwọn igba ti a ko ba ti duro sinu ifẹ rẹ fun wa.

Ni kukuru, koko nkan ti mo n sọ ni pe Ọlọrun le e fi aye gba wa lati gberu nibikibi ti a ba wa, niwọn igba ti a ba ti wa ninu ifẹ rẹ. Nitorina, bi a tilẹ n koju awọn idojukọ ti o fẹ fa wa sẹyin tabi ti ko fẹ ka ni ilọsiwaju, a ko gbọdọ rẹwẹsi. Dipo eyi, nṣe ni a ki tẹsiwaju lati ma gbe ọkan le Ọlọrun fun iṣẹgun, ki a si tun ma lakaka lati tẹsiwaju ni oju ọna ilọsiwaju. Bopẹ-boya, a o ri pe gbogbo idena ni a ti fọ tuutu ni abẹ ẹsẹ wa.

Fun apẹrẹ, bi o tilẹ jẹ wipe Ọlọrun ni O sọ fun Isaki lati duro si Gẹra, awọn eniyan ibẹ buru si, wọn si tun ṣe ohun gbogbo ti wọn le ṣe lati di iṣerere rẹ lọwọ. Ṣugbọn ko sọ ireti nu tabi ki o dawọ iṣẹ duro lati ṣoriire. Ki ni idi? Idi ni pe o mọ wipe inu ifẹ Ọlọrun ni o n wa ati wipe Ọlọrun wa pẹlu oun. Nitorina, Ọlọrun fi aaye gba lati gberu laarin awọn ọta rẹ. (Wo: Jẹ́nẹ́sísì 26)

Nibakan naa, Ọlọrun le fi aaye gba ọ lati gberu laarin wọn ọta rẹ. Nitorina, ma ṣe sọ ireti nu nitori awọn idojukọ ti o n ba pade. Ma ṣe rẹwẹsi nitori pe ọpọ eniyan n gbogun ti ọ. Dipo bẹẹ, nṣe ni ki o ma la kaka lati tẹsiwaju lati ṣe amulo gbogbo anfani ti Ọlọrun ba mu wa si oju ọna rẹ lati pọ si ni iwulo ati isesorere. Ki o si to mọ nkan ti o n ṣẹlẹ, iwọ funrarẹ yoo ri pe ko si ohun ti o le da ọ duro nitoripe Ọlọrun wa pẹlu rẹ.

Ki o ni oṣu Okudu 2024 alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o kẹyin oṣu yi, iyẹn oṣu Èbìbí 2024. Adura mi si ni pe ki Ọlọrun ma fi ojoojumọ fun ọkan rẹ ni okun lati ni itara ti o to lati ri awọn ipese rẹ fun ọ lati tayọ ati lati gbe igbe ninu isinmi ni gbogbo eyi ti o ku ni ọjọ aye rẹ gba ati lati jẹgbadun awọn ipese naa, ni orukọ Jesu. Amin.

Bi a ti ṣe ri ninu Iwe Mimọ, ẹnikẹni ti yoo ba ri ohunkohun gba lọwọ Ọlọrun gbọdọ mura, ki o si tun ni itara lati ri gba. Eyi jasi pe, ko to fun wa lati sọ wipe a ni igbagbọ lati rigba lọwọ Ọlọrun; a tun gbọdọ fi imura ati itara kun igbagbọ wa ninu rẹ. Aijẹbẹ, a le ma ri nkan ti ọkan wa fẹ gba lọwọ rẹ.

Otitọ ni pe Ọlọrun ma n ṣe ọpọlọpọ nkan fun wa lalai duro de imura tabi itara wa lati rigba lọwọ rẹ. Ṣugbọn awọn nkankan wa ti a ko le rigba lọwọ rẹ, ti ọkan wa ko ba mura, ki o si tara lati ri wọn gba. Ki wa ni awọn nkan naa? Emi ko le sọ ni pato nkan ti wọn jẹ. Idi si ni pe, bi mo ti ṣe sọ tẹlẹ, ọpọ ni o n fi ojoojumọ gba oniruuru nkan daradara lati ọwọ Ọlọrun ti wọn ko si mu un ni pataki. Amọ ṣa o, irufẹ awọn wọnyi naa yoo si tun pada ri wipe awọn nkankan wa ti wọn ko le rigba lọwọ Ọlọrun lalai ba jẹ wipe wọn mura, ti wọn si tun tara lati ri wọn gba lọwọ rẹ.

Ni kukuru, niwọn igba ti a ko le sọ ni pato awọn nkan ti Ọlọrun yoo ṣe fun wa lọfẹ, lalai reti imura tabi itara lati ọdọ wa, yoo jẹ nkan ti o mọgbọn wa fun wa lati mura ati lati ni itara nigbakigba ti a ba nilo ohunkohun lati ọwọ rẹ. Bi bibeli si ṣe wa sọ, awọn ti o ba fi imura ati itara ṣafẹri rẹ ko ni lọ kuro lọdọ rẹ pẹlu ọwọ́-òfo. (Wo: Hébérù 11:6)

Fun apẹrẹ, a sọ fun wa ninu bibeli bi arabinrin Kenani kan ṣe gba itusilẹ ọmọdebinrin rẹ lọwọ Oluwa nipa igbagbọ, imura ati itara rẹ. Bi akọsilẹ naa ti ṣe lọ, nigba ti obinrin yi gbọ pe Jesu wa ni agbegbe rẹ, o kọkọ lọ ṣe iwadi ibi ti O wa. O si wa ibi ti O wa kan, bi o tilẹ jẹ wipe ko fẹ ki ẹnikẹni mọ wipe O n wa nibẹ. A wa ni lati jẹ wipe itara ati imura arabinrin yi ga gan niyẹn. (Wo: Máàkù 7:24-26)

Siwaju si, lẹyin gba ti o ti wa ibi ti Jesu wa kan, arabinrin yi tọ ọ wa, o si bẹrẹ si ni bẹ ẹ lati wo ọmọdebinrin rẹ ti ẹmi aimọ n gbe inu rẹ san. Ṣugbọn Jesu ko gbọ tirẹ tabi da a lohun. O kan ṣe bi igba ti ko gbọ nkan ti o n sọ ni. Ki ni idi? Idi ni pe iṣẹ iranṣẹ rẹ laye ni asiko yii ko kọja ki O pe awọn iru ọmọ Aburahamu pada si ọdọ Ọlọrun, ko si ni i ṣe pẹlu ki O kan si awọn keferi. Awọn keferi ni a o pada pe lẹyin iku, isinku, ajinde ati igbasoke rẹ. (Wo: Mátíù 15:24)

Bi nkan tilẹ wa ri bayi, arabinrin yi ko ma sọ ireti nu. Ko pòṣé, ki o yi pada, ki o si ma fi oju agberaga ọkunrin wo Jesu. Dipo eyi, nṣe ni o tẹsiwaju lati ma a tẹle ati lati ma a bẹ ẹ pe ki O wo ọdọmọdebinrin oun san. Nigba ti Jesu si wa pada fun ni aye lati sọrọ, awọn ọrọ wọnyi ni O sọ fun un: “Ko tọ ki a gbe ounjẹ awọn ọmọ fun awọn aja.” (Mátíù 15:26) Njẹ o ri bayẹn? Oluwa pe arabinrin yi ati ọmọ rẹ ni aja, aja awọn ọmọ Isiraẹli. O tun sọ siwaju pe wọn ko yẹ lati jẹ igbadun ohun ti Ọlọrun n fun ọrilẹ-ede Isiraẹli.

Sibẹsibẹ, obinrin yi ko ma binu. Dipo ti yoo fi binu, nṣe ni o da Oluwa wa lohun wipe, “Bẹẹ ni, sibẹsibẹ awọn aja a maa jẹ eerun ti o ti ori tabili olowo wọn bọ silẹ.” (Mátíù 15:27) Eyi jasi pe, bi o tilẹ jẹ wipe aja wọn ọmọ Isiraẹli ni wọn jẹ, wọn si le kopa ninu awọn nkan ti awọn ọmọ Isiraẹli n jẹgbadun, pẹlupẹlu iwosan. Nitoripe o si sọrọ bi eyi, Oluwa da a lohun, O si sọ ọrọ naa ti o tu ọmọ rẹ silẹ. (Wo: Mátíù 15:28)

Njẹ ki wa ni idi ti arabinrin yi fi rigba lọwọ Oluwa, pẹlupẹlu awọn iyọnu ati èébú ti o gba? Idi ni pe o mura, o si tun tara nipa itusilẹ ọdọmọdebinrin rẹ. Ti o ba si wa jẹ wipe ki o farada awọn eebu diẹ ni yoo jẹ ki eyi waye, o ṣetan lati farada wọn. Nitorina, ko kuro pẹlu ọwọ́-òfo.

Nibakan naa, ti awa naa ba mura, ti a si tun tara lati ri ohun yowu ti a ba fẹ gba lọwọ Ọlọrun gba, a ko ni kọbiara si idenakidena loju ọna wa; a ko ni kọbiara si eebu tabi ọrọ odi awọn eniyan. Lafikun, a ko ni wo iye asiko tabi ọjọ ti a o lo lati gbadura si Ọlọrun lati ri nkan ti a fẹ gba lọwọ rẹ gba. Dipo eyi, nṣe ni a o tẹ oju wa mọ, ti a ko si ni gbe e kuro titi a o fi ri ohun ti a fẹ gba lọwọ rẹ gba. Amọ ṣe a wa ṣetan lati ṣe eyi? Ṣe a ṣetan lati mura ati lati tara nigbakigba ti a ba fẹ gba nkan lọwọ Ọlọrun? Mo wa gbadura pe a o ṣe ọkan wa yẹ lati ṣe eyi, ki ayọ wa ba a le kun ni gbogbo abala aye wa, ni orukọ Jesu. Amin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia di ilọ̀po, ilọpo fun ọ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ṣe ki ọ kaabọ sinu ọsẹ miran ninu oṣu Ebibi 2024. Mo si gbadura pe ki Ọlọrun, ti O ti gba wa kuro lọwọ ijọba okunkun, ti O si mu wa wa sinu ijọ ọmọ rẹ, fi opin si ohun gbogbo ti o ni i ṣe pẹlu iriri ìraǹmù ninu aye rẹ, ki o ba le farabalẹ jẹgbadun aye rẹ bi O ti fẹ ki o jẹ, ni orukọ Jesu. Amin.

Wayi o, mo gbadura yẹn fun ọ nitoripe ko ki i ṣe ifẹ Ọlọrun ni fun wa lati ranmu laye. Idi si ni pe igbe aye iranmu ko ki i ṣe igbe aye isimi otitọ. Ko ki i ṣe igbe aye igbadun otitọ. Fun apẹrẹ, Ọlọrun sọ fun Kaini, lẹyin igba ti o pa arakunrin rẹ, pe isansa ati alarinkiri ni yoo jẹ. Ki ni eyi tunmọ si? Ki a ma fọrọgun, o tunmọ si pe bi o ti wu ki ibi yowu ti o ba ara rẹ ti dara to, ko ni ni itẹlọrun tabi idunnu nibẹ. Ki ni idi? O le jẹ wipe iṣẹ ọwọ rẹ ko ni lọ deede nibẹ. Tabi ki o jẹ wipe awọn eniyan ti o wa nibẹ yoo korira rẹ. Nkankan yoo ṣaa wa nibikibi ti o ba wa ti yoo ja a lole itẹlọrun. (Wo: Jẹ́nẹ́sísì 4)

Nitorina, Kaini yoo nilo lati ma parọ ibi ti yoo ma gbe lore-koore. Niwọn igba ti o ba si ni parọ ilegbe rẹ lati igba-de-igba, ko ni i le fi ara lelẹ jẹgbadun awọn eso laala rẹ. Yatọ si iyẹn, ti awọn iyawo ati ọmọ rẹ ko ba ṣetan lati ma ba a ranmu kaakiri, ko tun ni le jẹ igbadun ibaṣepọ rẹ pẹlu awọn naa. O yẹ ki o wa ri bayẹn pe igbe aye iranmu kiri ko ki i ṣe eyi ti o dara rara. Ọpọ igba ni o si ma n jẹ igbe aye adanikanṣe.

O wa ṣeni laanu pe igbe aye iranmu yi gan an ni ọpọ n gbe. Fun ọpọ ọdun, nṣe ni wọn n ranmu lati ibikan de ibikan, lati ibi iṣẹ de ibi iṣẹ, lati inu ijọ de inu ijọ ati pẹlupẹlu lati inu igbeyawo de inu igbeyawo. Sibẹsibẹ, wọn ko i ti ri itẹlọrun, alaafia ati isinmi ti wọn n wa laye. Ki ni idi? O ma a fẹrẹ ni lati jẹ wipe wọn ko mu Ọlọrun ni pataki ni tabi pe wọn ko kọbiara si ohun ti O n sọ fun wọn.

Ranti wipe bi o tilẹ jẹ wipe Ọlọrun ni O mu awọn ọmọ Isiraẹli jade kuro ninu Ijibiti, ki O ba a le mu wọn wọ ilẹ isinmi ti O ti pese silẹ fun wọn, ọpọ ninu wọn ni o jẹ wipe nṣe ni wọn ranmu titi ninu aginju fun ogoji ọdun. Ṣibẹsibẹ wọn ko si tun papa de ibi isinmi ti a ti pese silẹ fun wọn. Ki ni idi? Idi ni wipe wọn ko mu Ọlọrun ni ọkunkundun. Wọn ko gbagbọ pe O le dari awọn sinu ibi isinmi ti O ti pese silẹ fun wọn. Nitorina, wọn fi ogoji ọdun aye wọn ṣofo lori riranmu kiri ninu aginju, ti wọn ko si le jẹgbadun aye bi wọn ko ba ti jẹgbadun rẹ. (Wo: Númérì 13&14; Hébérù 3:15-19)

Wayi o, o wa ṣeeṣe ki o jẹ wipe iwọ naa ti n ranmu kiri laye yi, ti o ko si le sọ wipe o ti figbakanri ni iriri isinmi ati itẹlọrun ni awọn ibi ti o ti gbe tabi lori awọn iṣẹ tabi okowo ti o ti ṣe. O nilo lati kọkọ gba wipe o ti n ranmu laye ati wipe opin gbọdọ de ba iranmu rẹ. Ekeji, o nilo lati gbadura si Ọlọrun pe ki O ṣaanu fun ọ, ki O si fi opin si ohun gbogbo ti o ni i ṣe pẹlu iriri iranmu ninu aye rẹ, nkan yowu ti o le fa a wa sori aye rẹ. Yoo si da ọ lohun, yoo dari rẹ si ibi isinmi, yoo si tun fi ẹṣẹ rẹ mulẹ nibẹ.

Iwọ naa wo nkan ti a sọ ninu bibeli nipa ohun ti Ọlọrun ṣe fun awọn kan ti awọn naa ti fi igbakanri n ranmu kiri laye ri:

“Wọn n rin kaakiri ni aṣalẹ nibi ti ọna ko si: wọn ko ri ilu lati maa gbe. Ebi pa wọn, oungbẹ si gbẹ wọn, o rẹ ọkan wọn ninu wọn. Nigba naa, ni wọn kigbe pe Oluwa ninu ipọnju wọn, o si yọ wọn kuro ninu iṣẹ wọn. O si mu wọn jade nipa ọna titọ, ki wọn ki o le lọ si ilu ti wọn o maa gbe.” (Sáàmù 107:4-7)

Njẹ o ri bayẹn? Nigba ti awọn eniyan wọnyi ke pe Oluwa ninu iṣoro wọn, O da wọn lohun, O si tun tu wọn silẹ. Lọna wo? Nipa didari wọn si ibi isinmi ni. Yoo si ṣe ohun kanna fun ọ tabi fun ẹni naa ti o sunmọ ọ ti si n gbe igbe aye iranmu kiri, ti iwọ naa yoo ba kigbe si fun iranlọwọ. Ki wa ni o n duro de? Kigbe si fun iranlọwọ nibayi-bayi, o si dandan ki o ni ẹri ti o ga lati jẹ, lati ọsẹ yi lọ.

Ki ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia di ilọpo-ilọpo si fun ọ lati ọdọ Ọlọrun Baba wa ati Jesu Kirisiti Oluwa wa. O dun mọ mi ninu gidigidi lati ki ọ kaabọ sinu ọsẹ miran ninu oṣu yi, oṣu Ebibi 2024, ati lati ki ọ kaabọ sinu ọdun ibabapọ ati iṣẹ-iranṣẹ miran gẹgẹ bi ijọ. Adura si ni pe Ọlọrun yoo ṣe ohun gbogbo ti o ni i ṣe pẹlu ijọ wa laṣepe, yoo si tun mu ohun gbogbo ti o dun mọ ọn ninu wa si imuṣẹ ninu aye gbogbo wa, ki a ba le jẹ awokọse ninu ohun rere gbogbo fun gbogbo awọn eniyan rẹ kaakiri agbaye. Amin.

Bi gbogbo wa ti ṣe mọ, o pe ọdun mejila bayi ti a ti n pade gẹgẹ bi ijọ ninu ilu yi, Ẹdẹ. Nṣe si ni Ọlọrun wa fi gbogbo ọdun mejejila yi dara si wa. O n tọju wa ni gbogbo ọna. O si tun n jẹ ki a pọ si ninu ohun rere gbogbo ni ilọpo-ilọpo, laisi fi aye gba Satani lati ba ẹri wa jẹ gẹgẹ bi eniyan mimọ rẹ. Nitorina, o yẹ ki a fi imoore wa han si fun ohun gbogbo ti a ti jẹgbadun lati ọwọ rẹ ati fun ohun gbogbo ti yoo si tun ṣe fun wa, ninu wa ati nipasẹ wa ni awọn ọdun ti o n bọ niwaju.

Amọ ṣa o, bi a ti wa n yọ mọ Ọlọrun fun ohun gbogbo ti O ti ṣe fun wa, ninu wa ati nipasẹ wa ni awọn ọdun mejila yi, o yẹ ki a tun bere lọwọ ara wa pe, “Ọna wo ni gbogbo awọn nkan ti O ti ṣe fun wa gba yi wa pada?” Bẹẹni, ni olorijori ati lapapọ, o yẹ ki a bere lọwọ ara wa pe, “Ọna wo ni ọrọ rẹ ti a ti n gbọ lati igba ti a ti darapọ mọ ijọ yi gba yi aye wa pada? Bawo ni iṣẹ Ẹmi rẹ ninu ijọ yi ti ṣe yi wa pada si? Ṣe o tilẹ farahan si wa ati si awọn miran ni ayika wa pe aye wa n gba iyipada kankan nipa jijẹ ọmọ ijọ yi?”

Woo, nkan ti o ṣe koko si Ọlọrun kọ ni iye ọdun ti a ti fi gbe ile aye gẹgẹ bi Kirisitiẹni aláfẹnujẹ́ tabi ti a ti lo ninu ijọ wa tabi ti a ti fi gbọ ọrọ rẹ tabi ti a ti fi ni iriri iṣẹ Ẹmi rẹ. Ohun ti O ṣe koko si i ni ipa ti awọn nkan wọnyi n ri ko lori aye wa. Fun apẹẹrẹ, wo nkan ti Jeremaya sọ fun awọn ara Juda lori iṣẹ-iranṣẹ ti Ọlọrun fun un laarin wọn:

“Fun odidi ọdun mẹtalelogun, bẹrẹ lati ọdun kẹtala Josaya, ọmọ Amoni Ọba Juda, titi di ọjọ yii, ọrọ Oluwa si tọ mi wa, mo si ti sọ ọ fun un yin lati igba de igba, amọ ẹyin ko feti silẹ.” (Jeremáyà 25:3)

Njẹ o ri bayẹn? Jeremaya n mu ọrọ Ọlọrun tọ awọn eniyan wọnyi wa lera-lera fun ọdun mẹta-le-logun. Njẹ wọn wa tẹti silẹ si i? Rara o! Ṣe ọrọ Ọlọrun ti o n tọ wọn wa fun gbogbo awọn ọdun mẹta-le-logun wọnyi yi aye wọn pada? Irọ o! Ṣe ọrọ rẹ ti wọn gbọ le di wọn lọwọ lati ma papa lọ si oko ẹru? Irọ o! Ki ni idi? Idi ni pe wọn ko mu ọrọ rẹ ti o tọ wọn wa ni ọkunkundun.

Lafikun, wo awọn ọmọ Isiraẹli ti Mose mu jade lati Ijibiti wa. Njẹ ọrọ Ọlọrun ti wọn gbọ lera-lera lati ẹnu Mose ṣe gbogbo wọn ni anfaani bi? Rara o! Ṣe gbogbo awọn iṣẹ iyanu ti wọn n ri ati ti wọn n jegbadun rẹ lojoojumọ ran wọn lọwọ bi lati tete gba ilẹ ti Ọlọrun ti ṣeleri lati fun wọn? Irọ o! Ki ni idi ti awọn nkan wọnyi ko ṣe ran wọn lọwọ tabi ṣe wọn ni anfaani? Idi ni pe wọn ko mu wọn ni ọkunkundun.

Ti o ba jẹ wipe wọn lọ mu ọrọ Ọlọrun ti a n fi ojoojumọ mu tọ wọn wa ati awọn iṣẹ iyanu ti Ọlọrun n fi ojoojumọ ṣe fun wọn ni ọkunkundun ni, nṣe ni igbagbọ wọn ko ba ma fi ojoojumọ pọ si. Iba si ma wa pẹ rara ti wọn yoo fi wọ ilẹ-ileri naa, ti wọn yoo si gba a. Ṣugbọn nitoripe wọ ko mu nkan ti Ọlọrun n sọ fun wọn ati ṣe fun wọn ni ọkunkundun, nṣe ni wọn pada rànmú fun ogoji ọdun lori aṣalẹ ilẹ. Ṣibẹsibẹ ọpọ ninu wọn ni ko si tun papa wọ ilẹ ileri naa.

Nitorina, wipe a ni anfaani lati ri ọrọ Ọlọrun ati oore-ọfẹ ati agbara rẹ gba fun ọdun mejila ninu ijọ yi kọ ni o ṣe pataki. Nkan ti o ṣe pataki gan ni bi anfaani ti a ni yi ṣe yọri si iyipada aye wa. Eyi si ni mo fẹ ki o ma ṣe aṣaro lori rẹ, bi a ti ṣe darapọ ni ọjọ isinmi oni yi fun ajọdun ọdun kejila ijọ wa. Mo si gbadura pe, bi o ti ṣe n ṣe bẹẹ, ki Ọlọrun ṣi oju rẹ lati ri awọn ibi ti itara rẹ ti ku diẹ-kaato ninu ibaṣepọ rẹ pẹlu rẹ, ki O si tun fun ọ ni okun lati ṣe ohun ti o tọ lori rẹ, ni orukọ Jesu. Amin.

A ku ajọdun o!

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)