Eko Bibeli

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

(Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kẹyin ninu lẹta Pọọlu si awọn ara Galatia, a ri iha ti o yẹ ki a kọ si awọn ara wa ninu Kirisiti ti o ba ṣubu sinu ẹṣẹ. Iha wo si ni o yẹ ki a kọ si wọn? Iha imupadabọsipo ni o yẹ ki a kọ si wọn. Eyi tunmọ si pe ojuṣe wa ni lati ri daju pe iru awọn Kirisitiẹni bẹ ko ku tabi sọnu patapata sinu ẹṣẹ. Ki eleyi wa to o ṣeeṣe, awa ti a fẹ mu wọn padabọsipo gbọdọ jẹ ẹni ti o n tẹle itọni Ẹmi Ọlọrun, onisuuru ati onirẹlẹ. Aijẹbẹ, o ṣeeṣe ki a ba nkan jẹ ju bi o ti ṣe wa lọ. Amọ bi a tun ti ṣe kọ ninu ẹkọ yi, ko pọn dandan ki ẹnikẹni ninu wa ṣubu sinu ẹṣẹ. Ti gbogbo wa ba tilẹ mura gidigidi lati jẹ alabaapin ninu aye awọn ọmọ ijọ wa, ọpọ igba ni Ọlọrun yoo ri wa lo lati dena ki wọn ko sinu pakute ẹṣẹ. Ṣugbọn ti a ba gbe igberaga wọ bi ẹwu, ti a ko si ṣetan lati ba awọn ọmọ Ọlọrun ti o wa ninu aye wa ṣe pọ tabi lati fi aye gba wọn lati mọ bi nkan ti ṣe n lọ ninu aye wa, ko si ni ki Satani ma ri wa ya sọtọ ni awọn abala aye wa kan lati fi iya jẹ wa tabi lati sọ igbagbọ wa di igbagbe.

ÌGBÉRAẸNI-NÍGBỌ̀NWỌ́
Ori ọrọ yi si tun ni Pọọlu wa ninu abala lẹta rẹ si awọn ara Galatia ti a fẹ gbe yẹwo ninu ẹkọ yi. Nkan ti o si fẹ ki o ye awọn ọmọ Ọlọrun yi naa ni pataki ki wọn ma gbe ara wọn ni igbọnwọ ninu irinajo wọn. Lotitọ, olukuluku ọmọ Ọlọrun ni yoo dahun funrarẹ nigba ti Ọlọrun ba n ṣe idajọ. Ko si si ẹnikankan ninu wa ti yoo ni awijare tabi ti yoo le sọ wipe oun kuna nitori aṣiṣe awọn kan tabi nitoripe oun ko ni onigbọnwọ. Nitorina, ẹnikọọkan wa gbọdọ mura lati mojuto ohun gbogbo ti o ba jẹ ojuṣe rẹ lati tẹ Ọlọrun lọrun ninu gbogbo ibaṣepọ rẹ, yala o ri ẹni ti yoo ran an lọwọ tabi ko ri.

Sibẹsibẹ, ifẹ Ọlọrun ni ki ẹnikọọkan wa ma fi gbogbo igba duro bi oluranlọwọ fun awọn ara wa. Aijẹbẹ, a ko ni mu ofin Kirisiti ṣẹ. Eyi si le jẹ ki a jẹbi iṣubu tabi ikuna awọn ara wa kan tabi omiran. Idi niyi ti Pọọlu ṣe sọ wipe ki ẹnikọọkan wa gbe igberaga ju sigbo, ki a si dẹkun lati ma ri ara wa ni bàbàrà, ki Ọlọrun ba le ri wa lo lati ma gbe awọn ara wa ninu Kirisiti nigbọnwọ. Iwọ naa wo nkan ti o sọ:

“Nitori bi eniyan kan ba n ro ara rẹ si ẹni pataki kan, nigba ti ko jẹ nnkan, o n tan ara rẹ jẹ. Ṣugbọn ki olukuluku ki o yẹ iṣẹ ara rẹ wo, nigba naa ni yoo si ni ohun isogo nipa ti ara rẹ nikan, ki yoo si ṣe nipa ti ọmọnikeji rẹ. Nitori olukuluku ni yoo ru ẹru ara rẹ. Ṣugbọn ki ẹni ti a n kọ ninu ọrọ naa maa ṣe alabaapin ohun rere gbogbo ti o ni fun ẹni ti o n kọ ọ.” (Gàlátíà 6:3-6)

Njẹ o ri bayi? Igberaga ni o ma n fa ti awọn ọmọ Ọlọrun ko ki i fi ba ara wọn ṣepọ lọna ti o tọ ati ti o yẹ. Niwọn igba ti wọn ko ba si ni ibaṣepọ ti o munadoko laarin ara wọn, ko si bi wọn ṣe le ran ara wọn lọwọ lọna ti o peye. Ki wa lo n fa irufẹ igberaga yi? Nkan kan gbogi ti o ma n fa naa ni ki a ma fi iṣẹ́ igbagbọ wa we ti awọn ọmọ Ọlọrun miran. Eyi ni o le jẹ ki a ka ara wa si ẹni pataki niwaju ara wa, nigba ti a ko si ja mọ nkankan laisi Ọlọrun.

Ko si idi kankan lati fi iṣẹ igbagbọ wa we ti ẹnikẹni. Ti a ba n ṣe agbeyẹwo iṣẹ wa, nṣe ni o yẹ ki a ma ṣe ni ibamu pẹlu ireti Ọlọrun lori rẹ. Ti a ba si n ṣe agbeyẹwo irinajo igbagbọ wa bakanna, nṣe ni o yẹ ki a ma ṣe ni ibamu pẹlu nkan ti Ọlọrun n reti lati ọdọ wa. Eyi jasi pe a ko gbọdọ ma wo aago-alaago sare tabi wo iṣẹ oniṣẹ ṣiṣẹ. Eyi ni ko ni jẹ ki a ba ẹnikẹni ninu ijọ wa lo pẹlu ọkan igberaga tabi pẹlu ọkan ẹni ti ko ja mọ nkankan niwaju Ọlọrun.

Gbogbo wa ni a ṣe pataki si Ọlọrun ati si ijọba rẹ. Idi si niyi ti o ṣe jẹ wipe gbogbo wa ni o ran ọmọ rẹ Jesu Kirisiti lati rapada. O ṣeeṣe, lotitọ, ki oye bi a ti ṣe n gbe aye tẹ ẹ lọrun tete ye awa kan ju awọn kan lọ, eyi ko tunmọ si pe a ṣe pataki ju awọn wọnyi lọ niwaju rẹ. Nitori eyi, ọna ti a o gba ma ran igbagbọ ati aye wọn lọwọ ni a gbọdọ ma fi gbogbo igba san, ko ki i ṣe bi a o ti ṣe fi ẹnu tẹnbẹlu wọn tabi ja wọn kulẹ.

Bi mo ti ṣe wa sọ siwaju, wipe a gbọdọ ma ran ara wa lọwọ ninu ijọ ko tunmọ si pe ki a wa sọ ara wa di bukata fun awọn ọmọ Ọlọrun miran. Ko tunmọ si pe ki a fi ojuṣe adura gbigba wa, ojuṣe mimọ ifẹ Ọlọrun wa tabi awọn ojuṣe itọju ile wa kọ awọn ọmọ Ọlọrun miran lọrun. Eyi ko bojumu rara, ko si wa ni ibamu pẹlu ifẹ Ọlọrun fun wa. Ki a tilẹ sọ otitọ, imọtaraẹninikan ni yoo jẹ ki a ṣe eleyi. O si lewu fun igbagbọ wa. Nitorina, gẹgẹ bi Pọọlu ṣe wi, ẹnikọọkan gbọdọ mura lati gbe bukata rẹ, lalai duro de ẹnikẹni fun iranwọ.

Amọ ṣa o, Pọọlu tun wa la ọrọ rẹ, ki a ma ba ṣi i tunmọ. Lọna wo? O jẹ ki o ye wa pe bi o tilẹ jẹ wipe ẹnikọọkan ninu ijọ Ọlọrun gbọdọ mura lati gbe ẹru aye rẹ, eyi ko jasi pe ki a pa awọn ti o n fi ọrọ Ọlọrun bọ wa ti ṣẹgbẹ kan, ki a si ọ pe ki awọn naa lọ ma mojuto bukata wọn funra wọn. Dipo eyi, a gbọdọ mọ pe ara ojuṣe wa ni lati ma a pin awọn ti o n fi ọrọ Ọlọrun bọ wa ninu ohun rere gbogbo ti a ba n rigba lọwọ rẹ. Ko yẹ ki a gbagbe pe awọn wọnyi ni o n kọ wa ni ọrọ Ọlọrun ti a n mulo ti aye wa fi n lọ deede. Nitorinaa, aṣẹ Ọlọrun ni pe bi aye wa ti n tipasẹ wọn lọ deede naa ni o yẹ ki a ma tọju wọn pẹlu awọn nkan ini wa. (Wo:1Kọrinnti 9:14)

Yatọ si eyi, ti enikan ba tọ wa sọna nipa ti ara, ti itọsọna rẹ si ja si igbega tabi ọrọ fun wa, ṣe ko yẹ ki a fi ẹmi imoore han siru ẹni bẹ ẹ? O yẹ! Nitorinaa, ma ṣe jẹ ki o ni ọ lara rara lati ma fifun awọn ti o n bọ ọ pẹlu ọrọ Ọlọrun, ti o si n ṣọna ninu adura lori aye rẹ, ni ibamu pẹlu bi a ti ṣe bukun fun ọ. O lere lori pupọ. (Wo: Numeri 10:29-3)

Eyi lo si fa ti Pọọlu fi tẹsiwaju lati sọ awọn ọrọ pataki yi fun wa lori fififunni:

“Ki a ma ṣe tan yin jẹ; a ko le gan Ọlọrun: nitori ohunkohun ti eniyan ba funrugbin, oun ni yoo ka. Nitori ẹni ti o ba n funrugbin sipa ti ara rẹ, nipa ti ara ni yoo ka idibajẹ; ṣugbọn ẹni ti o ba n funrugbin sipa ti Ẹmi, nipa ti Ẹmi ni yoo ka iye ainipẹkun. Ẹ ma si jẹ ki agara da wa ni rere e ṣe: nitori a yoo kaa nigba ti akoko ba de, bi a ko ba rẹwẹsi. Njẹ bi a ti n ri akoko, ẹ jẹ ki a maa ṣoore fun gbogbo eniyan, ati paapaa fun awọn ti i ṣe ara wa ninu igbagbọ.” (Gàlátíà 6:7-10)

Njẹ o ri bayi? Wipe Ọlọrun fẹ ki a ma fifun awọn ti o n bọ wa pẹlu ọrọ rẹ, ti o si n ṣọna lori aye wa, ati awọn miran ti O pa wa lasẹ lati ma fifun ko tunmọ si pe ki a kan ṣe bi a ba ti ṣe fẹ. Alakalẹ fififunni wa ninu iwe mimọ ti a gbọdọ tẹle. Aijẹbẹ, a kan tan ara wa jẹ ni – ififunni wa ko ni ni ere kankan lori. Bi Pọọlu ti ṣe fi ye wa ninu awọn ẹṣẹ bibeli ti o wa loke yi, Ọlọrun ko si lara awọn ti a le gan tabi tan jẹ. Nkan ti a ba ṣe ni a o gba ere rẹ lọwọ rẹ. Irugbin ti a ba fun ni Ọlọrun yoo fi ibukun ati ere sori rẹ. Ti a funrugbin nipa ti ara, ni ibamu pẹlu ifẹ inu wa, ninu rikiṣi, ọtẹ, itanjẹ ati ikunsinu, eso ti ara ti o jẹ idibajẹ naa ni a o ka. Ti a ba si funrugbin nipa ti Ẹmi, ni ibamu pẹlu ifẹ Ọlọrun bi a ti ṣe la a kalẹ ninu iwe mimọ, eso ti Ẹmi ti a o ma gbadun titi ayeraye naa ni a o ka.

O wa ku sọwọ wa irufẹ irugbin ti a fẹ fun ati bi a ti ṣe fẹ fun. Amọ iyanju Pọọlu si wa ni pe ki a ma ṣe jẹ ki agara da wa ni rere ṣiṣe si gbogbo eniyan, paapaa julọ awọn ti o jẹ ọmọ Ọlọrun. Dipo bẹẹ, ki a ma ṣe amulo gbogbo anfaani ti Ọlọrun ba fun wa lati fifunni ati lati fifunni ni ibamu pẹlu ifẹ rẹ. Ki si ni idi? Idi ni pe ni akoko ti o tọ, Ọlọrun yoo pin wa lere. Ọlọrun nikan ni O mọ akoko ti o tọ fun ere ohun rere yowu ti a ba ṣe. Oun nikan naa si tun ni O mọ irufẹ ere ti o tọ si wa laye yi ati ninu ijọba ayeraye rẹ. Ko wa yẹ ki a ma ṣe oore ni ireti pe ọna kan pato ni Ọlọrun gbọdọ gba lati san wa lẹsan rẹ. Ifurugbin nipa ti ara ni eyi jasi. O si ṣeeṣe ki a ma ri nkankan gba lori rẹ.

Ọ̀RỌ̀ ÌPARÍ
Ọmọ Ọlọrun kọọkan gbọdọ mura lati gbe ẹru rẹ dipo eyi ti yoo fi sọ ara rẹ di bukata fun awọn ara rẹ ninu Kirisiti. Sibẹsibẹ, ifẹ Ọlọrun ni fun wa lati ma ran awọn ara wa lọwọ lati gbe ẹru aye wọn ati lati rin irinajo igbagbọ wọn ni pipe. Ọna ti a wa n gba ṣe eleyi ṣe pataki pupọ si Ọlọrun. A si nilo lati mọ ọn, ki a si tun tẹle. Aijẹbẹ, a ko ni ri ere kankan gba fun ohun rere yowu ti a ba ṣe.

ÌBÉÈRÈ

• Ọna pataki wo ni Pọọlu sọ ninu ẹkọ yi pe a le gba lati dena iṣubu awọn ara wa ninu Kirisiti?
• Ki ni o ṣe pataki julọ si ọ ninu ẹkọ yi?

Lati ọwọ Johnson O. Lawal

Copyright © 2023 Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07025105978)

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.”

(Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kẹyin ninu iwe Pọọlu si awọn ara Galatia, a ri wipe bi o tilẹ jẹ wipe a ti di ominira ninu Kirisiti, a ko sọ wa di ominira ninu rẹ ki a ba le ma gbe igbe aye ti o wu wa. Dipo eyi, a sọ wa di ominira ninu rẹ ki a ba le ma gbe igbe aye igbagbọ ti o n ṣiṣẹ pẹlu ifẹ. Amọ ti a ko ba fi ara wa jin fun itọni ẹmi Ọlọrun, ki a si gbe ọkan wa le fun okun lati gbe igbe aye ifẹ, ko si ni ki ẹran ara ma gba iṣakoso aye wa. Ti eyi ba si wa ribẹ, dipo ti a o fi ma so eso ẹmi, nṣe ni a o ma mu ifẹkufẹ ẹran ara ṣẹ.

TÍ KÌRÌSÌTÍẸ̀NÌ BÁ ṢUBÚ SÍNÚ Ẹ̀ṢẸ̀
Bi Pọọlu ṣe wa fi ye wa, niwọn igba ti a ba n rin nipa itọni ati ipese Ẹmi Ọlọrun, a ko ni mu ifẹkufẹ ẹran ara ṣẹ. Ti a ba wa ri ẹni ti o mu ifẹ ẹran ara ṣẹ nkọ, lẹyin igba ti o ti di ọmọ Ọlọrun? Ti a ba ri ninu wa ti o bọ sinu pakute ẹṣẹ kan tabi omiran nkọ? Ki ni ki a ṣe fun iru ẹni bẹ? Ṣe ki a gba pe ẹni naa ko ki i ṣe ọmọ Ọlọrun rara ni tabi pe ko ki i ṣe ọmọ rẹ mọ?

Ọpọ ni o ti pada lẹyin Kirisiti nitori pe wọn ṣe awọn aṣiṣe kan ni awọn akoko kan, ti Satani si lo eyi lati jẹ ki wọn ri ara wọn bi ẹni ti ko ki i ṣe ọmọ Ọlọrun rara. A si ri awọn miran ti o jẹ wipe ijọ Ọlọrun ni o fi ẹnu ati iṣesi le wọn kuro lẹyin Jesu lẹyin igba ti a mu wọn ninu ẹṣẹ kan tabi omiran. Ara idi si niyi ti awọn miran ṣe n di atunbi loorekoore. Ẹlomiran ko tilẹ le sọ iye igba ti o ti di atunbi. Nitoripe igbakigba ti o ba ti bọ sinu pakute ẹṣẹ ni yoo tun mura lẹkansi lati di atunbi.

Ṣe awọn nkan wọnyi wa wa ni ibamu pẹlu ọrọ Ọlọrun bi? Gẹgẹ bi Pọọlu ṣe fi ye wa ninu abala lẹta rẹ si awọn ara Galatia ti a fẹ gbe yẹwo yi, awọn nkan wọnyi ko wa ni ibamu pẹlu ọrọ rẹ rara. Lotitọ, o ṣeeṣe ki ọmọ Ọlọrun, ti o ti di ominira ninu Kirisiti , ṣubu ṣinu ẹṣẹ kan tabi omiran. Eyi ko wa jasi pe ko ki i ṣe ọmọ Ọlọrun mọ tabi pe ki a le kuro ninu ijọ, ki ba orukọ rẹ jẹ tabi ki a sọ di alaiwulo laarin awọn ọmọ Ọlọrun. Ko si tun jasi pe o nilo lati tun di atunbi lẹkansi. Nkan ti irufẹ ẹni bẹ nilo, niwọn igba ti o ba ti mọ ẹṣẹ rẹ ni ẹṣẹ, ni imupadabọsipo.

Iwọ naa wo nkan ti Pọọlu sọ lori eyi:

“Ara, bi a tilẹ mu eniyan ninu ẹṣẹ kan, ki ẹyin ti i ṣe ti Ẹmi ki o mu iru ẹni bẹẹ bọ sipo ninu ẹmi iwa tutu; ki iwọ tikararẹ ma kiyesara, ki a ma baa dan iwọ naa wo pẹlu.” (Galatia 6:1)

Ki ni nkan akọkọ ti a kiyesi ninu ọrọ Pọọlu yi? Oun naa ni pe o ṣeeṣe ki ọmọ Ọlọrun jin sinu ọfin ẹṣẹ. Ko pọn dandan ki eyi ṣẹlẹ ṣa o. Amọ o ṣeeṣe. Ti eyi ba si ṣẹlẹ, ti a si mọ si, igbesẹ wo ni o yẹ ki a gbe? Pọọlu sọ wipe imupadabọsipo iru ẹni bẹ ni a gbọdọ ṣiṣẹ le lori. Si kiyesi, ko sọ wipe nṣe ni ki a le ẹni bẹ kuro ninu ijọ. Ko si sọ pe nṣe ni a sọ pe ki irufẹ ẹni bẹ pada di atunbi lẹkansi. Dipo eyi, o sọ wipe ki a mu ẹni yi padabọsipo. Igba ti a ba wa bẹrẹ si ni gbe igbesẹ lati mu ẹni naa padabọsipo, ti a si ri iha ti o kọ si nkan ti a n ṣe, ni a to le sọ pe ko ki i ṣe ọmọ Ọlọrun tẹlẹ.

Bi Jesu Oluwa wa ṣe fi ye wa, ti arakunrin tabi arabinrin wa ninu igbagbọ ba kuna tabi ṣubu sinu ẹṣẹ, ẹṣẹ ti ọrọ Ọlọrun fi idi rẹ mulẹ gẹgẹ bi ẹṣẹ, iṣẹ awa ti a mọ si ni lati fi aṣiṣe rẹ han an. Ti o ba si gba lati ṣe atunṣe, Jesu ni ki a jẹ ki ọrọ naa tan si ibẹ. Ti ko ba gba, O ni ki a tun wa enikan tabi ẹni meji lati mu lọ sọdọ rẹ, ki a ba le fi aṣiṣe rẹ han an. Ti o ba si gba lati ṣe atunṣe, ki a jẹ ki ọrọ naa tan si ibẹ. Amọ ti ko ba gba, Oluwa sọ wipe ki a jẹ ki ijọ Ọlọrun mọ nkan ti o n ṣẹlẹ, ki awọn agbagba ninu rẹ ba le ba a sọrọ. Ti ko ba si tun wa gba lati ṣe atunṣe, nṣe ni ki a bẹrẹ si ni ri ẹni naa gẹgẹ bi ẹni ti ko mọ Ọlọrun tẹlẹ, ti o si nilo lati ṣẹṣẹ di ẹni igbala. (Wo: Matiu 18:15-17)

Ṣugbọn daju ṣaka ni pe nkan ti Ọlọrun fẹ ni pe ti ẹnikẹni ninu wa ba bọ sinu pakute ẹṣẹ, bi a o ti ṣe mu padabọsipo lo gbọdọ wa lọkan wa. Ohunkohun ti ijọkijọ ba si n ṣe, eyi ti o lodi si eyi, ko ki i ṣe ifẹ Ọlọrun. Nitorina, ko le yọri ṣi igbero ati ifidimulẹ awọn ọmọ Ọlọrun ninu Kirisiti Jesu. Igbero wọn ati iduroṣinṣin wọn ni o si yẹ ki o jẹ wa logun. Idi ni yi ti Jemisi ṣe sọ fun wa ninu lẹta rẹ: “Ara, bi ẹnikẹni ninu yin ba ṣina kuro ninu otitọ, ti ẹnikan si mu n bọ sipo ninu igbagbọ. Ki ẹyin ki o mọ pe, ẹni ti o ba yi ẹlẹsẹ kan pada kuro ninu iṣina rẹ, yoo gba ọkan kan la kuro lọwọ iku, yoo si mu ki a dari ọpọlọpọ ẹṣẹ ji ẹni naa.” (Jemisi 5:19-20)

Wayi o, yatọ si pe ki a mura lati ṣiṣẹ fun imupadabọsipo awọn ọmọ Ọlọrun ti o ba kuna, awọn ti yoo ṣiṣẹ yi ati ọna ti wọn yoo gba ṣe naa ṣe pataki pẹlu. Gẹgẹ bi Pọọlu ti fi ye wa ninu lẹta yi, awọn ti wọn ba n rin nipa ti Ẹmi Ọlọrun nikan ni o ni anfaani lati ṣiṣẹ imupadabọsipo fun ẹnikẹni ti o ba jin ṣinu ọfin ẹṣẹ. Eyi jasi pe awa ti a ba si n gbe ninu ẹṣẹ kan tabi omiran tabi ti irin-ajo igbagbọ wa ko fi ogo fun Ọlọrun ni ọna ti o han kedere ko lẹtọ lati da si iru ọrọ yi. Nṣe ni o yẹ ki a lọ gbajumọ ọrọ aye ara wa, ki awa funrawa ba le wa ni pipe ni ìṣe niwaju Ọlọrun.

Siwaju si, Pọọlu ti jẹ ki o ye wa pe bi o tilẹ jẹ wipe awọn ti o n rin nipa ti Ẹmi Ọlọrun ni o le mu awọn eniyan padabọsipo kuro ninu pakute ẹṣẹ, awọn wọnyi naa gbọdọ ṣiṣẹ yi pẹlu iwa tutu, oju-aanu ati ikiyesara. O tunmọ si wipe wọn ko gbọdọ gbogun ti ẹni ti wọn fẹ mu pada bọsipo. Wọn ko gbọdọ duro ni iduro pe awọn san ju u lọ, ki wọn si ma sọrọ si ṣakaṣaka, bi igba ti ẹni naa ko lọgbọn lori tabi ja mọ nkankan rara. Eyi ko wa ni ibamu pẹlu ifẹ Ọlọrun. Eyi paapaa si le ṣi ilẹkun silẹ fun idanwo Satani lati wọle tọ awọn naa wa nibi ti wọn ko ti reti rẹ, ki a si gbe wọn ṣubu.

Ranti pe bibeli sọ wipe, “Nitori ẹni ti ko ṣaanu, ni a o ṣe idajọ fun laisi aanu; ṣugbọn aanu a maa bori idajọ.” (Jemisi 2:13) Lafikun, o tun sọ wipe, “Nitori iru idajọ ti ẹyin ba ṣe, oun ni a o ṣi ṣe fun yin. Iru oṣuwọn ti ẹyin ba fi wọn, oun ni a o si fi wọn fun un yin.” (Matiu 7:3) Nitorina, a gbọdọ mọ iru iha ti a o kọ si ẹnikẹni ti o ba ṣubu ṣinu ẹṣẹ laarin wa, ki a ma ba ti ara wọn jẹbi, kọṣẹ tabi ṣi ilẹkun silẹ fun iṣubu ti awa tikara wa.

Pọọlu wa kasẹ ọrọ yi nilẹ nipa sisọ eyi: “Ẹ maa ṣe alabaapin ninu awọn iṣoro ati idaamu ọmọnikeji yin, ki ẹ si fi bẹẹ mu ofin Kirisiti ṣe.” (Galatia 6:1-2) Ki ni idi ti o fi sọ eyi? O sọ ọ lati jẹ ki a mọ pe ti a ba n mojuto ara wa, gẹgẹ bi ijọ Ọlọrun, ti a n kiyesi nkan ti o n lọ ninu aye ẹnikọọkan wa, o ṣeeṣe ki a le dena iṣubu awọn arakunrin ati arabinrin wa sinu ẹṣẹ. Amọ ti a ba pa ara wa ti, ti ẹnikọọkan si n ṣe bi o ba ti ṣe wu, a ko rin ninu ofin Kirisiti, ti i ṣe ifẹ. Lafikun, ti a ba kọ lati fi aye fun awọn ara wa lati mọ bi o ti ṣe n lọ ninu aye wa, paapaa julọ niwọn igba ti a mọ daju pe wọn ko ni ibi lọkan si wa, nṣe ni a n ṣilẹkun aye wa silẹ fun eṣu lati ya wa sọtọ jẹ niya. Awọn nkan wọnyi si ni o yẹ ki awọn ọmọ Ọlọrun mọ ninu gbogbo awọn ijọ wa, ki a ba le ma fi gbogbo igba ran awa wa lọwọ lati duro ṣinṣin ninu igbagbọ wa ati lati ma fi aye gba Satani lati ri aye ṣiṣẹ ninu aye wa tabi laarin ijọ wa.

Ọ̀RỌ̀ ÌPARÍ
O ṣeeṣe ki ọmọ Ọlọrun tootọ ṣubu sinu ẹṣẹ. Amọ awa ti a jẹ ọmọ Ọlọrun ti o sunmọ wọn, ti o si n rin ninu ifẹ rẹ ko gbọdọ jẹ ki wọn di titẹmọlẹ sinu ẹṣẹ wọn. Ojuṣe wa si wọn ni lati mu wọn padabọsipo, ki eṣu ma ba ṣogo lori wọn. Eyi ko wa ni i ṣeeṣe ti a ko ba tọ wọn wa pẹlu ẹmi irẹlẹ, suuru ati ikiyesara.

ÌBÉÈRÈ

• Ki ni awọn nkan ti o le fa Kirisitiẹni ṣubu sinu ẹṣẹ?
• Ọna wo ni ẹkọ yi gba tun imọ rẹ ṣe lori iha ti o yẹ ki a kọ si iṣubu Kirisiẹtiẹni sinu ẹṣẹ?

Lati ọwọ Johnson O. Lawal

Copyright © 2023 Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07025105978)

download your pdf version here

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kẹyin ninu iwe Galatia, a ri awọn ewu ti o sorọ mọ ki a pa Jesu Kirisiti ti gẹgẹ bi ọna lati di ẹni idalare niwaju Ọlọrun, ki a si wa ma tẹle ofin Mose. Bi Pọọlu ti ṣe fi ye wa, ẹnikẹni ti o ba ṣe eyi ko le ri ere kankan jẹ lara Kirisiti. Yatọ si eyi, irufẹ ẹni bẹ gbọdọ mura lati ṣe ohun gbogbo ti ofin Mose pa laṣẹ fun awọn ti a fun. Aijẹbẹ, nṣe ni yoo fi ara rẹ si abẹ egun ofin naa. Siwaju si, Pọọlu jẹ ki o ye wa pe ẹnikẹni ti o ba si tun dirọ mọ ofin Mose gẹgẹ bi ọna lati di ẹni idalare niwaju Ọlọrun, lẹyin igba ti o ti gba Jesu gbọ gẹgẹ bi Oluwa ati Olugbala rẹ, ti ṣubu kuro ninu oore-ọfẹ Jesu Kirisiti. Nitorina, a gbọdọ ṣọ ara wa gidigidi gẹgẹ bi Kirisitẹni, ki a si ma fi aye gba ẹnikẹni, bi o ti wu ki ẹni naa lọla tabi gbajumọ ninu ijọ to, lati ge wa kuro ni ara Kirisiti nipa fifi wa si abẹ igbekun ofin Mose.

MÁ ṢI ÒMÌNIRA RẸ NÍNÚ KÍRÍSÌTÌ LÒ
Wayi o, pe a ti wa di ominira ninu Kirisiti, ti a ko si si labẹ ofin Mose, ko jasi pe a kan le ma gbe igbe aye ti o wu wa. O si wa ṣeni laanu pe ọpọ ni o n ṣiwawu nitori pe wọn n ṣi ọrọ iwe mimọ nipa ominira wa ati oore-ọfẹ wa ninu Kirisiti tunmọ. Awọn wọnyi ro wipe niwọn igba ti a ko ti si ni abẹ ofin Mose ṣugbọn ti a wa ni abẹ oorẹ-ọfẹ Kirisiti, a le ma gbe igbe aye ti o ba wu wa, ki a ma tinu ẹṣẹ bọ ṣinu ẹṣẹ – oore-ọfẹ Jesu gbe e. Idi si niyi ti o fi dabi ẹni pe awọn ti wọn dirọ ofin Mose ma n ri ọrọ sọ, ti wọn si ma n fẹ ki o ye awọn eniyan pe awọn gan ni awọn mọ nkan ti awọn n sọ ati ti awọn n ṣe.

Eyi ko si jẹ tuntun rara. O wọpọ nigba aye awọn Pọọlu naa. Nitorina, ninu abala lẹta rẹ si awọn ara Galatia ti a fẹ gbe yẹwo ninu ẹkọ yi, o ba wa sọrọ lori rẹ. O si jẹ ki o ye wa pe wipe a ko si ni abẹ ofini Mose ko tunmọ si pe ẹru ẹṣẹ ni wa tabi pe ki a ma ṣi ominira wa ninu Kirisiti lo. Iwọ naa wo diẹ lara nkan ti o sọ:

“Nitori a ti pe yin si ominira, ara kiki pe ki ẹ ma ṣe lo ominira yin bi anfaani sipa ti ara, ṣugbọn ẹ maa fi ifẹ sin ọmọnikeji yin. Nitori pe a ko gbogbo ofin ja ninu eyi pe, “Iwọ fẹ ọmọnikeji rẹ gẹgẹ bi ara rẹ.” Ṣugbọn bi ẹyin ba n bu ara yin san, ti ẹ si n jẹ ara yin run, ẹ kiyesara ki ẹ ma ṣe pa ara yin run.” (Gàlátíà 5:13-15)

Njẹ o ri bayi? Aṣilo ominira ninu Kirisiti wa. Eyi ti o jasi pe a le bẹrẹ si ni ṣiwawu, ki a ma ṣe ifẹ inu ara wa nitoripe a ri ara wa gẹgẹ bi ẹni ti ko si ni abẹ ofin Mose. A ko si si ni abẹ ofin Mose lotitọ. Amọ ṣa o, gẹgẹ bi Pọọlu ti fi ye wa, a ko sọ wa di ominira ninu Kirisiti ki a ba le ma gbe igbe aye ti o wu wa. Dipo eyi, a sọ wa di ominira ninu rẹ ki a ba le ma gbe igbe aye ti o wu Ọlọrun. Igbe aye wo ni o si wu Ọlọrun? Igbe aye ifẹ ni i.

Ti a ko ba gbagbe, Pọọlu ti jẹ ki o ye wa siwaju ninu lẹta yi pe nkan ẹyọkan ṣoṣo ti o ṣe pataki si Ọlọrun ni igbagbọ ti o n ṣiṣẹ nipa ifẹ (Gàlàtìá 5:6). Nitorina, igbe aye ti o tọ niwaju Ọlọrun, igbe aye ti yoo ri oriyin gba lọwọ rẹ ni eyi ti o n fi ifẹ sin awọn ti o wa ni ayika rẹ. Ti a ba si wo daradara, nkan ti gbogbo ofin Mose da le lori ni eyi. O da lori ki a ma rin ninu ifẹ si Ọlọrun ati si ọmọnikeji wa. Nitorina, ẹnikẹni ti o ba n rin ninu ifẹ ti ko gbogbo ofin ja.

Ki wa ni koko nkan ti a n sọ? Koko nkan ti a n sọ ni pe bi o tilẹ jẹ wipe Kirisitiẹni ko si ni abẹ ofin Mose, ti ko si nilo lati mura lati gbe igbe aye rẹ ni ibamu pẹlu ofin yin, afojusun rẹ ni gbogbo igba gbọdọ wa lori gbigbe igbe aye ifẹ. A si ti ṣe wa yẹ lati ṣe eyi. A ti tun wa bi lati ṣe eyi. Amọ ṣe a o wa ma gbe igbe aye ifẹ bi? Ṣe a o ma gbe igba aye ti o ko gbogbo ofin ja bi?

Bi Pọọlu ti ṣe fi ye wa, wipe a di ọmọ Ọlọrun ati ominira ninu Kirisiti Jesu ko tunmọ si pe a o ma gbe igbe aye ifẹ. Idi si ni pe ọpọ igba ni ijakadi n waye laarin ẹmi Ọlọrun ti o n gbe inu wa, ti ẹmi wa si ti di ọkan pẹlu rẹ, ati ẹran ara wa. Wo nkan ti apọsiteli yi sọ lori eyi:

“Njẹ mo ni, ẹ maa rin nipa ti Ẹmi, ẹyin ki yoo si mu ifẹkufẹ ti ara ṣẹ. Nitori ti ara n ṣe ifẹkufẹ lodi si Ẹmi, ati Ẹmi lodi si ara: awọn wọnyi si lodi si ara wọn; ki ẹ ma baa le ṣe ohun ti ẹyin n fẹ. Ṣugbọn bi a ba n ti ọwọ Ẹmi ṣamọna yin, ẹyin ko si labẹ ofin.” (Galatia 5:16-18)

Ṣe o ri bayẹn? Bi o tilẹ jẹ wipe a ti di ọmọ Ọlọrun nipasẹ Kirisiti Jesu, bi o tilẹ jẹ wipe a ti di ẹni idalare niwaju Ọlọrun ninu Kirisiti, ti Ẹmi Ọlọrun si n gbe inu wa, ọpọ igba ni ẹran ara wa ma n fẹ ṣe awọn nkan ti o lodi si ifẹ Ọlọrun fun wa. Ṣugbọn Ẹmi Ọlọrun ko ni fi aye gba a. Ọpọ igba naa si ni Ẹmi Ọlọrun a ma dari wa lati ṣe ifẹ Ọlọrun, ti ẹran ara wa yoo si ta ko o. Idi si ni yi ti a fi ma n ri awọn miran ti wọn n pe ara wọn ni ọmọ Ọlọrun ti iwa wọn ko si jọ ti ọmọ rẹ. Lotitọ wọn le ti di ọmọ rẹ. Amọ ẹran ara ni o n ṣe akosọ aye wọn. Ifẹkufẹ rẹ ni wọn si n tẹle. Idi si ni pe wọn ko rin nipa ti Ẹmi – wọn ko fi ara wọn si abẹ iṣakoso Ẹmi Ọlọrun lati dari wọn ati lati ma fun wọn ni okun lati gbe igbe aye ti o tẹ Ọlọrun lọrun.

Nkan ti Pọọlu sọ nibi yi wa n ran wa leti ọrọ Jesu ti o sọ wipe, “Ẹmi fẹ, ṣugbọn o ṣe ailera fun ara.” (Wo: Mátíù 26:41) Ti eyi ba si ribẹ, a gbọdọ fi okun fun ẹran ara lati tẹriba fun Ẹmi Ọlọrun ati lati ma ṣe ifẹ rẹ. Idi ni yi ti Jesu fi kọ wa pe ki a ma gbadura lai ṣinmi ati lai ṣaarẹ fun okun lati ṣe ifẹ Ọlọrun dipo ifẹ ẹran ara. Idi naa si tun ni yi ti a fi kọ wa ninu ọrọ Ọlọrun lati fi ara wa jin fun ọrọ rẹ, ki o ba le wẹ wa mọ, ki a si tun fun wa ni okun lati gbe igbe aye ti o tẹ ẹ lọrun.

O wa ṣeeṣe ki a ri awọn ti yoo fẹ sọ wipe awọn ko mọ ọna ti ẹran ara n gba lodi si Ẹmi Ọlọrun tabi ti wọn yoo sọ pe awọn ko mọ iṣẹ ara yatọ si ti Ẹmi. Nitori awọn wọnyi ni Pọọlu ṣe tẹsiwaju lati sọ eyi:

“Njẹ awọn iṣẹ ti ara farahan, tii ṣe iwọnyi; pansaga, agbere, iwa eeri, wọbia, ibọriṣa, oṣo, ikorira, ija, ilara, ibinu, imọtara-ẹni nikan, iyapa, ẹkọ-odi. Arankan, ipaniyan, imutipara, irede-oru, ati iru iwọnyi; awọn ohun ti mo n wi fun yin tẹlẹ, ri pe, awọn ti n ṣe nnkan bawọnyi ki yoo jogun ijọba Ọlọrun. Ṣugbọn eeso ti Ẹmi ni ifẹ, ayọ, alaafia, ipamọra, iwapẹlẹ, iṣoore, igbagbọ, iwa-tutu, ati ikora-ẹni-nijanu: ofin kan ko lodi si iru wọnyi, Awọn ti i ṣe ti Kirisiti Jesu ti kan ara wọn mọ agbelebuu pẹlu ifẹ ati ifẹkufẹẹ rẹ. Bi awa ba wa laaye sipa ti Ẹmi, ẹ jẹ ki a si maa riin nipa ti Ẹmi. Ẹ ma ṣe jẹ ki a maa ṣogo-asan, ki a ma mu ọmọnikeji wa binu, ki a ma ṣe ilara ọmọnikeji wa.” (Galatia 5:19-26)

Ṣe o ti ri bayẹn? Iṣẹ ẹran ara yatọ gedegbe si eso Ẹmi Ọlọrun, bi okunkun ṣe yatọ gedegbe si imọlẹ. Nitorina, ko si ẹni ti o le ri awijare ṣe lori fifi ara rẹ jin fun iṣẹ ẹran ara. Ẹnikẹni ti o ba si fi ara rẹ jin fun wọn, bi o tilẹ sọ wipe oun ti di ominira ninu Kirisiti, kan n tan ara rẹ jẹ ni. O ṣeeṣe ki irufẹ ẹni bẹ ma jẹ ti Kirisiti rara. Idi si ni pe awọn ti wọn n ṣe awọn nkan wọnyi ko le jogun ijọba Ọlọrun. Ko wa yẹ ki a ma ṣogo asan ninu Kirisiti Jesu. Ko yẹ ki a ma polongo ara wa gẹgẹ bi ọmọ Ọlọrun ninu Kirisiti Jesu, ki aye wa si ma so eeso Ẹmi rẹ. Itanraẹnijẹ gba ni eyi. Ko si le ṣe wa ni anfaani kankan. Idi si niyi ti Pọọlu ṣe sọ pe ti a ba gba wipe abẹ iṣakoso Ẹmi Ọlọrun ni aye wa wa nitootọ, nṣe ni o yẹ ki a ma rin ni ibamu pẹlu itọni rẹ.

Ọ̀RỌ̀ ÌPARÍ
Pe a di ominira ninu Kirisiti ko tunmọ si pe ki a ma gbe igbe aye arufin. Amọ ti a ko ba fi aye gba Ẹmi Ọlọrun lati tọ wa ati lati ma fun wa ni okun ti o peye, ko si ni ki ẹran ara ma ti wa lati ma gbe igbe aye arufin. Eyi ni a wa gbọdọ fi sọkan gẹgẹ bi ọmọ Ọlọrun ki a ma ba ṣi ipo ominira wa ninu Kirisiti lo, ki a si fi ara wa han bi eke Kirisitiẹni lẹyinọrẹyin.

ÌBÉÈRÈ

• Awọn ọna wo ni ẹkọ yi ṣe gba wulo fun ọ gẹgẹ bi Kirisitiẹni?
  Láti ọwọ́ Johnson O. Lawal

Copyright © 2023 Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07025105978)

DOWNLOAD E-COPY HERE

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kẹyin ninu lẹta Pọọlu si awọn ara Galatia, o ṣalaye lẹkunrẹrẹ fun wọn pe ipo ẹru ni awọn ti o wa labẹ ofin Moṣe wa. O tilẹ jẹ ki o ye wọn pe nkan ti ofin gan sọ ni eyi. Ara idi si ni yi ti a ṣe ran Jesu Oluwa wa lati gba awọn ti o wa labẹ ofin yi kuro ninu igbekun ati egun rẹ. Ti awọn ti a didi fun ni ofin Mose ba wa nilo irapada kuro labẹ rẹ ati kuro labẹ egun rẹ, ṣe o wa yẹ ki awọn ti a ko fun ni ofin yi fi ara wọn si abẹ igbekun rẹ? Ko yẹ rara. Nitorina, ninu abala lẹta yi ti a fẹ gbe yẹwo ninu ẹkọ yi, Pọọlu tẹsiwaju ninu alaye rẹ lati fi nkan ti o sorọ mọ ki a fi ara wa si abẹ igbekun ofin Mose han awọn ara Galatia. O si wa yẹ ki gbogbo awọn ti o jẹ Kirisitiẹni loni, ti awọn naa si n gbiyanju lati fi ara wọn si abẹ ofin Mose ṣe aṣaro ti o peye lori awọn nkan ti apositeli yi sọ ninu awọn ẹsẹ lẹta ti a fẹ yẹwo naa.

MÁ ṢE TI ỌRÙN BỌ ÀJÀGÀ ÒFIN MÓSÈ
Ewu wo lo wa sorọ mọ ki a fi ara wa sabẹ igbekun ofin Mose? Tabi ki a sọ wipe awọn ọna wo ni ki a fi ara wa sabẹ isinru ofin Mose ṣe le pa igbagbọ wa ninu Kirisiti Jesu lara? Awọn nkan ti Pọọlu sọ lorin ọrọ naa niyi:

“Nitori naa, ẹ duro ṣinṣin ninu ominira naa eyi ti Kirisiti fi sọ wa di ominira, ki ẹma si ṣe tun fi ọrun bọ ajaga ẹru mọ. Kiyesi i, emi Pọọlu ni o wi fun yin pe, bi a ba kọ yin nila, Kirisiti ki yoo lere fun yin ni ohunkohun. Mo si tun sọ fun olukuluku eniyan ti a kọ ni ila pe, o di ajigbese lati pa gbogbo ofin mọ. A ti ya yin kuro lọdọ Kirisiti, ẹyin ti n fẹ ki a da yin lare nipa ofin; pe ẹ ti ṣubu kuro ninu oore-ọfẹ.” (Galatia 5:1-4)

Nkan akọkọ ti apọsiteli yi jẹ ki o ye wa ni pe Kirisiti ti sọ wa di ominira. Ti a ba wa sọ pe Kirisiti sọ wa di ominira, o yẹ ki a mọ nkan ti O sọ wa di ominira kuro ninu rẹ. Bi a ti fihan ninu bibeli, Kirisiti ti sọ wa di ominira kuro ninu igbekun ẹṣẹ ati igbekun eṣu ati gbogbo iṣẹ ibi rẹ. Nitorina, a gbọdọ ma fi gbogbo igba ri ara wa bi ominira. Yatọ si eyi, Kirisiti tun ti sọ awọn Juu di ominira kuro ninu igbekun ofin Mose. Nitorina, awọn naa gbọdọ ma fi gbogbo igba ri ara wọn gẹgẹ bi ẹni ti o ti di ominira kuro labẹ ofin Mose.

Nkan ekeji ti Pọọlu tun pe akiyesi wa si ni pataki ki a duro ṣiṣin ninu ominira ti a ti ri gba lọwọ Kirisiti. Kirisiti ko sọ wa di ominira ki a ba le ma gbe igbe aye ẹru. Amọ ti a ko ba pinnu lati duro ṣinṣin gẹgẹ bi ẹni ti o ti di ominira, ko si ni ki eṣu, ẹṣẹ, ẹran-ara, aye ati oniruru ofin atọwọda awọn eniyan ma tun fẹ mu wa ni igbekun. Nkan ti a n sọ ni pe, pe a ti sọ wa di ominira ko sọ wipe ki awọn ẹṣẹ ti a ti gba wa lọwọ wọn ma tun fẹ jẹ gaba lori aye wa. Bẹẹ si ni ko sọ wipe ki aisan, airoju, airaye, egun idile, iku-ojiji ati bẹẹbẹẹ lọ ma fẹ ṣe ijọba lori aye wa. Awa ni a gbọdọ mura, ki a si pinnu lọkan wa lati ma fi aye gba ohunkohun tabi ẹnikẹni lati tun ma ṣe ijọba lori aye wa yatọ si Jesu Kirisiti Oluwa ati Olugbala wa.

Siwaju si, pe Jesu sọ awọn Juu di ominira kuro ninu igbekun ofin Mose ko sọ wipe ki ero-ọkan wọn nipa ofin yi ma tun fẹ lo ofin naa lati fi wọn sinu ide. Eyi lo si fa ti a fi ri awọn Juu ni akoko ti Pọọlu kọ lẹta yi ti ko fẹ kọ ofin Mose silẹ gẹgẹ bi ọna lati di ẹni itẹwọgba niwaju Ọlọrun, bi o tilẹ jẹ wipe wọn ti da Kirisitiẹni. Luuku tilẹ sọrọ akoko kan fun wa ninu iwe Iṣe Awọn Apọsiteli ninu eyi ti a ti rọ Pọọlu lati darapọ mọ awọn Juu ẹgbẹ rẹ kan lati tun rubọ ninu Tẹmipili, ni ibamu pẹlu ofin Mose. Kini o fa eyi? Aimuratan lati kọ ofin Mose ati awọn ilana rẹ silẹ gẹgẹ bi ọna fun igbala ati m didi ẹni itẹwọgba niwaju Ọlọrun lo fa. (Wo: Iṣe Apọsiteli 21:18-26)

Nikukuru, irufẹ awọn Juu yi naa ni o lọ kaakiri, ti wọn si n gbiyanju lati mu awọn Heleni ti o ti gba Jesu gbọ ni tipatipa lati bẹrẹ si ni pa ofin Mose mọ, paapaa julọ eyi ti o ni i ṣe pẹlu ikọla abẹ. Pọọlu wa n jẹ ki o ye awọn ara Galatia pe ọwọ wọn lo ku si lati ri pe wọn ko fi aye gba awọn eniyan yi lati sọ wọn si abẹ igbekun ofin Mose. Bẹẹ gẹgẹ ni o si gbọdọ ri fun awa naa. Awa naa gbọdọ mura, ki a si ri daju pe a ko fi aye gba ẹnikẹni, bi o ti wu ki ẹni naa lọla to laarin awọn ọmọ Ọlọrun, lati fi wa si abẹ ofin Mose gẹgẹ bi ẹru rẹ.

Ki si ni idi ti a fi gbọdọ mura lati ma ṣe fi aye gba ẹnikẹni lati fi wa si abẹ igbekun ofin Mose? Idi akọkọ, gẹgẹ bi Pọọlu ti ṣe fi ye wa, ni pe a ko ni jẹ ere iṣẹ irapada ati isọdọmọ ti Kirisiti ṣe fun wa, niwọn igba ti a ba fi aye gba ofin Mose lati jẹ oluwa fun wa. Eyi tunmọ si pe ẹnikẹni ti o ba ro wipe ohun o ri nkankan gba lọwọ Ọlọrun nitori pe oun tẹle ilana ofin Mose kan n tan ara rẹ jẹ ni. Ko le ri ibukun kankan ti o sorọ mọ ki a jẹ ọmọ Ọlọrun nipa igbagbọ ninu Kirisiti gba.

Bawo wa ni ti awọn Kirisitiẹni ti o n fi gbogbo igba jẹri awọn nkan ti Ọlọrun n ṣe fun wọn nipasẹ pipa ofin Mose mọ? Nkan ti awọn wọnyi ko mọ ni pe ko ki i ṣe nitoripe wọn n pa ofin Mose mọ ni Ọlọrun ṣe dara si wọn. Ọlọrun dara si wọn nitoripe alaanu ni, O si ma n ṣe daradara si awọn ika eniyan paapaa lati fi aye ironupiwada silẹ fun wọn (Matiu 5:44-45). Eyi jẹ ki a mọ pe eniyan le ma ṣe nkan ti o tako ifẹ Ọlọrun ki o si tun ma jẹ igbadun didara rẹ ni ọpọlọpọ ọna. Ṣugbọn ọjọ naa n bọ ti Ọlọrun yoo san ẹnikọọkan ni ẹsan fun iṣẹ ọwọ rẹ, yala o ba ifẹ rẹ mu tabi ko ba ifẹ rẹ.

Ki a ma fi ọrọ silẹ sọ nkan miran, koko nkan ti a n sọ ni pe ẹnikẹni ti o ba pe ara rẹ ni Kirisitiẹni, ti o si tun wa dirọ mọ ofin Mose gẹgẹ bi ọna lati jẹ ẹni itẹwọgba niwaju Ọlọrun ko le jẹ igbadun ipese Kirisiti ninu aye rẹ gẹgẹ bi o ti yẹ ki o ma jẹ ẹ. Awọn iṣẹ ti Kirisiti fẹ ṣe ninu aye rẹ ko ni le ṣeeṣe nitoripe igbagbọ rẹ ko si ninu iṣẹ Jesu Kirisiti mọ bikoṣe ninu iṣẹ ọwọ ara rẹ.

Idi keji, gẹgẹ bi Pọọlu ti ṣe fi ye wa, ti a fi gbọdọ mura lati ma jẹ ki ẹnikẹni fi wa si abẹ ajaga ofin Mose ni pe fifi ara wa jin lati pa abalakabala ninu ofin yi mọ yo sọ wa di onigbese ti o gbọdọ pa gbogbo abala ofin naa mọ. Eyi jasi pe niwọn igba ti a ba ti pinnu lọkan wa pe ofin Mose ni a fẹ tẹle gẹgẹ bi ọna lati di ẹni itẹwọgba tabi idalare niwaju Ọlọrun, a gbọdọ mura lati bẹrẹ si ni pa gbogbo nkan ti ofin naa sọ mọ. Nkan wọnyi ni ko si ye awọn ara Galatia ti wọn fi ara wọn jin pe ki a kọ wọn ni ila abẹ, ni ibamu pẹlu ofin Mose. Wọn ko mọ wipe ko tọna fun wọn lati pa abala ofin yi kan mọ, ki wọn si wa kọ awọn abala yoku silẹ. Eyi yoo fi wọn si abẹ egun ofin naa ti o sọ wipe egbe ni fi ẹni naa ti ko ba tẹsiwaju lati ma pa gbogbo ọrọ ofin yi mọ (Ditaronomi 27:26).

Ṣe o wa mu ọgbọn wa ki eniyan tun lọ fi ara rẹ si abẹ egun ofin Mose lẹyin igba ti Jesu ti ku lati ra awọn ti o wa labẹ egun ofin yi pada? Ko mu ọgbọn wa rara. Nitorina, gbogbo awọn ọmọ Ọlọrun ti wọn n mura kankan loni pe dandanla awọn gbọdọ ma tẹle ofin Mose gbọdọ mura bakanna lati pa gbogbo nkan ti a sọ sinu ofin naa mọ. Aijẹbẹ, abẹ egun ni wọn wa – awọn ibukun ọfẹ Kirisiti ti ẹnikẹni ti o ba gbagbọ ninu rẹ lẹtọ lati jẹgbadun ko si le ṣiṣẹ lọna ti o peye ninu aye wọn.

Idi kẹta ti Pọọlu tun fun wa, eyi ti o ṣe ṣe pataki ki a ma fi ara wa si abẹ ofin Mose ni pe gbogbo Kirisitiẹni ti o ba fi ara wọn si abẹ ofin yi ni a ti ya kuro ni ara Kirisiti, ti wọn si ti ṣubu kuro ninu oore-ọfẹ rẹ. Bi Adamu ṣe ṣubu kuro ninu oore-ọfẹ Ọlọrun ninu ọgba Edẹni, ti a si le kuro nibi ipese Ọlọrun lati lọ ma fi oogun oju rẹ wa ounjẹ oojọ rẹ, bẹẹ gẹgẹ naa ni o ṣe ri fun gbogbo awọn ti o ba pa igbagbọ ninu Kirisiti ti lati ma tẹle ofin Mose. Awọn naa yoo nilo lati gboju le iṣẹ ọwọ wọn lati jẹ igbadun ipese Ọlọrun ni –oore-ọfẹ Kirisiti ko le ṣiṣẹ fun wọn mọ.

Lotitọ, irufẹ awọn wọnyi le ma gbadura ni orukọ Jesu, ki wọn ma gbawẹ ni orukọ rẹ, ki wọn si tun ma jọsin pẹlu awọn ọmọ Ọlọrun miran. Ṣugbọn a ti ya wọn ya Kirisiti nitori ifarajin wọn fun ofin Mose. Bawo wa ni yoo ṣe buru to ki eniyan ro wipe oun wa pẹlu Kirisiti, ki o si ma wa pẹlu rẹ? Bawo ni yoo ṣe bani lọkanjẹ to lati gbọ lati ẹnu Kirisiti Jesu nigba ti O ba de pe Oun ko mọ wa ri, lẹyin igba ti a ti fi ọpọlọpọ ọjọ aye wa jọsin ni orukọ rẹ, ti a si mura gidigidi lati gbe igbe aye olododo? Yoo buru jọjọ. (Wo: Matiu 7:21-23)

Pọọlu wa tẹsiwaju lati jẹ ki eyi ye wa:

“Nitori nipa Ẹmi awa n fi igbagbọ duro de ireti ododo. Nitori ninu Kirisiti Jesu ikọla ko jẹ ohun kan, tabi aikọla; ṣugbọn igbagbọ ti n ṣiṣẹ nipa ifẹ.” (Galatia 5:5-6)

Nibo ni ireti ipadabọ Jesu lati fi idi ijọba ayeraye Ọlọrun mulẹ ti a ni ti wa? O wa nipasẹ Ẹmi Ọlọrun ti O tun wa bi, ti O si n gbe inu wa. Ko ki i ṣe nipasẹ ofin Mose tabi ẹkọ ti o kọ ni a ṣe ni ireti yi. Nitorina ni Pọọlu se wa sọ wipe pipa ofin Mose mọ nipa kikọ ila abẹ ko ja mọ nkankan. Idi si ni pe ikọla abẹ gan ni pataki julọ ninu awọn ofin Mose ti awọn ti o n yọ awọn ara Galatia yi lẹnu n tẹnumọ. Wọn n sọ wipe bi awọn ti ko ki i ṣe Juu ko ba tilẹ ni pa ofin Mose miran mọ, wọn gbọdọ pa ti ikọla abẹ mọ, ki wọn ba le jẹ ẹni itẹwọgba niwaju Ọlọrun.

Ṣugbọn, bi Pọọlu ti jẹ ki o ye wa, ninu Kirisiti Jesu ikọla abẹ ko ja mọ nkankan, bẹẹ si ni aikọla abẹ naa ko ja mọ nkankan. Nkan ti o ṣe pataki julọ ni igbagbọ ninu Jesu Kirisiti ti o n gbe igbe aye ifẹ. Ifẹ si ni akoja gbogbo ofin. Nitorina, nkan ti awọn ti o gbagbọ ninu Jesu nilo lati gbaju mọ ni igbe aye ifẹ. Niwọn igba ti afojusun wọn ba ti da lori ki wọn ma ṣe ohun gbogbo ninu ifẹ, ko si ni bi wọn ko ṣe ni gbe igbe aye ti o wu Ọlọrun.

Pọọlu wa pari ọrọ rẹ ni abala ti a n gbe yẹwo ninu ẹkọ yi nipa sisọ eyi:

“Ẹyin ti n sare daradara; ta ni di yin lọwọ lati ṣe igbọran si otitọ? Iyipada yii ko ti ọdọ ẹni ti o pe yin wa. Iwukara diẹ ni i mu gbogbo iyẹfun wu. Mo ni igbẹkẹle si yin ninu Oluwa pe, ẹyin ki yoo ni ero ohun miiran; ṣugbọn ẹni ti n yọ yin lẹnu yoo ru idajọ tirẹ, ẹnikẹni ti o wu ki o jẹ. Ṣugbọn, ara, bi emi ba n waasu ikọla sibẹ, kin ni idi ti a fi n ṣe inunibini si mi ṣibẹ? Njẹ ikọsẹ agbelebu ti kuro. Emi iba fẹ ki awọn ti n yọ yin lẹnu tilẹ ge ẹya-ara wọn kan kuro.” (Galatia 5:7-12)

Njẹ o ri bayi? Awọn ara Galatia yi ti n sare daradara tẹlẹ nipasẹ igbagbọ wọn ninu Jesu. Ṣugbọn awọn aṣinilọna kan ni wọn ko ba wọn, ti wọn si ti wọn ṣubu kuro ninu oore-ọfẹ Kirisiti. Pọọlu wa n jẹ ki o ye wọn pe o di dandan ki awọn ti o n yọ wọn lẹnu ru ẹru idajọ wọn. Eyi tunmọ si pe Ọlọrun ko ni ṣe alaimajẹwọniya fun yiyọ ijọ rẹ lẹnu. Ti awa naa ba si n yọ ijọ Ọlọrun lẹnu tabi ti a n ṣi awọn ọmọ rẹ lọna, o di dandan ki a ri ijiya ti o tọ si wa, bopẹ-boya.

Ọ̀RỌ̀ ÌKẸ́YÌN
Nibiti ọrọ yi wa ka Pọọlu lara de, o pari ọrọ nipa sisọ wipe ki lo ṣe ti awọn ti o n yọ awọn ara Galatia yi lẹnu ko tilẹ kuku jan ara wọn ni ountẹ, ki wọn si di òkóbó? Nitirẹ, idi ti awọn ju ṣe n ṣe inunibini si ni pe o n jẹ ki awọn eniyan mọ wipe ikọla abẹ ko wulo fun igbala ẹmi wọn. Lotitọ, ikọla abẹ wulo fun eniyan lati jẹ Juu nipa ti ara ati lati jẹ ajogun ilẹ ileri Kenani. Amọ ti a ba n sọrọ nipa Juu ti ẹmi ati ajogun ijọba Ọlọrun, ikọla abẹ ko wulo rara. Igbagbọ ninu Jesu Kirisiti nikan ni o le jẹ ki awọn nkan wọnyi jẹ ti wa. Eyi si ni iyinrere tòótọ́.

ÌBÉÈRÈ

• Pipa Jesu ti lati ma tẹle ofin Mose gẹgẹ bi ọna lati di ẹni itẹwọgba niwaju Ọlọrun lewu. Ṣalaye bi eyi ṣe lewu to.

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

DOWNLOAD E-COPY HERE

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kọja lọ, a ri wipe ipo ọmọ ni Ọlọrun to gbogbo awa ti a gba Jesu Kirisiti gbọ si dipo ipo ẹru. Nitorina, a gbọdọ yago fun ohunkohun ti o ba le fi wa si abẹ igbekun-ki-gbekun ti Ọlọrun ko fi wa si. Boya ofin Mose ni o tabi awọn asa, iṣeṣe tabi eewọ ajogunba ni, a ko gbọdọ gba wọn laye lati fi wa si abẹ isinru mọ, debi pe awọn ni yoo wa ma dari aye wa dipo ẹmi Ọlọrun. Niwọn igba ti a ti di ọmọ Ọlọrun, O ti fi Ẹmi mimọ rẹ sinu wa lati ṣe wa ni ọmọ ninu ero wa ati lati ma dari aye wa. Ọwọ wa lo wa ku si lati fi aye gba Ẹmi yi lati dari wa ati lati ma tun ṣe fi ara wa si abẹ igbekun ti Ọlọrun ko fi wa si.

MÁ ṢE MÚ OLÓTÍTỌ́ NÍ Ọ̀TA
Wayi o, Pọọlu tẹsiwaju ninu abala lẹta rẹ si awọn ara Galatia ti a fẹ gbe yẹwo ninu ẹkọ yi lati ran wọn leti iha ti wọn kọ si i ati si iyinrere ti o mu tọ wọn wa nigba ti wọn kọkọ gbagbọ ati lati jẹ ki wọn mọ bi ọrọ ikuna wọn ninu irinajo igbagbọ wọn ṣe ka lara si. Iwọ naa wo nkan ti o sọ:

“Ara, mo bẹ yin, ẹ da bi emi nitori emi da bi yin: ẹyin ko ṣe mi ni ibi kan. Ṣugbọn ẹyin mọ pe ninu ailera ara mi ni mo waasu iyin-rere fun yin ni ibẹrẹ. Eyi ti o si jẹ idanwo fun yin ni ara mi, oun ni ẹyin ko kẹgan, bẹẹ ni ẹ ko si kọọ; ṣugbọn ẹyin gba mi bii angẹli Ọlọrun, ani bi Kirisiti Jesu. Njẹ ayọ yin igba naa ha da? Nitori mo gba ẹri yin jẹ pe, bi o ba ṣe e ṣe ẹyin i ba yọ oju yin jade, ẹ ba si fi wọn fun mi. Njẹ mo ha di ọta yin nitori mọ sọ otitọ fun yin bi?” (Gàlátíà 4:12-16)

Pẹlu nkan ti Pọọlu sọ nibiyi, akọkọ, a ri wipe oun ati awọn ara Galatia ko ni ija ti tẹlẹ. Iyi tunmọ si pe pẹlu ifẹ ati ayọ ni wọn dijọ n lo pọ nigba ti o kọkọ wa sọdọ wọn. Bi a si ti ri ninu ọrọ rẹ, pẹlu ailera ara ni o fi wa sọdọ wọn lati waasu Jesu fun wọn. Irufẹ ailera wo ni o ni ni akoko yi? A ko le sọ. Awọn kan n jẹ ki o ye wa pe ojú didun ni ailera ti o n sọrọ nipa. Ni iwoye ti wọn, ti ko ba ṣe pe ojú n dun, ko ni sọ ninu lẹta yi pe wọn fẹ le yọ ẹyin oju wọn fun nigba ti o wa sọdọ wọn ati pe oun kọ lẹta yi ni gbàgàdà-gbagada si wọn (Galatia 4:15&6:11).

Ṣugbọn ko si ibi kankan ninu lẹta rẹ yoku tabi ninu iwe Iṣe Awọn Apọsiteli ti a ti ri ohunkohun ti o jọ eyi tabi ti a fi idi rẹ mulẹ. Nkan ti Pọọlu kan n gbiyanju lati sọ ni pe bi o tilẹ jẹ pe oun ni awọn ailera kan nigba ti o n wa si ọdọ wọn, ti wọn si ni anfaani lati fi oju alailera wo oun, wọn ko ṣe bẹ ẹ rara. Dipo eyi, nṣe ni wọn gba tọwọ-tẹsẹ, bi igba ti o jẹ wipe angẹli Ọlọrun ni, ti wọn si gbagbọ ninu Jesu Kirisiti, ẹni ti o ran an niṣẹ. Nibi ti wọn si fẹran rẹ ati tọju rẹ de nigba ti o wa laarin wọn, wọn fẹ le yọ ẹyin oju wọn fun. Eyi n jẹ ki o ye wa pe iṣẹ ọwọ Ẹmi Ọlọrun ni atunbi ati isọdọmọ awọn ara Galatia yi. Ko ki i ṣe iṣẹ ọpọlọ, ọgbọn, oye, ijafafa tabi iwunilori eniyan rara.

Ki lo wa ṣẹlẹ si wọn lẹyin igba ti o kuro lọdọ wọn tan? Ki lo wa fa ti oun ti wọn ti fi igbakanri gba tọwọtẹsẹ wa fẹ di ẹni aìjírí fun wọn? Bawo lo ṣe wa sare di ọta wọn? Awọn Juu kan ti wọn tọ wọn wa ni o wa nidi ọrọ naa. Awọn ni wọn fẹ sọ apọsiteli yi di ọta wọn nipa iyinrere odi, iyinrere ti ki i ṣe iyinrere rara ti wọn mu tọ wọn wa. Awọn ni wọn fẹ ko da bi ẹni pe Pọọlu yan wọn jẹ ni, bi ẹni pe ko ba wọn sọ otitọ ọrọ rara nipa igbala ati didi ẹni idalare wọn niwaju Ọlọrun. Ṣugbọn ẹlẹtan ni awọn Juu yi. Nṣe ni wọn kan wa ọmọlẹyin fun ara wọn nipa kikọ ẹyin awọn Keferi ti o gbagbọ si otitọ Jesu ati si awọn apọsiteli otitọ rẹ.

A si ma n ri iru eyi ni igba miran laarin awọn ọrẹ, laarin lọkọ-laya tabi laarin awọn ọmọ Ọlọrun. Ṣa dede ni awọn ti wọn ti n ṣe daradara si ara wọn tẹlẹ, ti wọn n kẹ ara wọn, ti wọn si tun n gẹ ara wọn yoo bẹrẹ si ni ba ara wọn ja tabi yan odì. Ti a ba wa bẹrẹ si ni ṣe iwadi, a o ri pe ẹnikan tabi awọn kan ni o ko si wọn laarin, awọn kan ti ilara tabi owu jijẹ n yọ lẹnu. Awọn yi ko si fẹ rere fun wọn rara. Wọn kan fẹ fi iyapa si arin wọn ni, ki wọn ba le ma ṣe ti wọn. Ti awọn naa ba wa ya alainironu bi awọn ara Galatia, ifẹ ati ete awọn alakoba eniyan yi di dandan ki o wa si imuṣẹ. Eyi yo wa jẹ ki wọn mu oloore wọn, ololufẹ wọn tabi ẹni ti Ọlọrun ran si wọn lati fi otitọ ọrọ rẹ ti yoo ṣe aye wọn ni rere ni ọta.

Iwọ naa wo nkan ti Pọọlu sọ nipa nnkan wọnyi:

“Wọn n fi itara wa yin, ṣugbọn ki i ṣe fun rere; wọn fẹ lati ya yin kuro lọdọ mi, ki ẹyin le maa wa wọn. Ṣugbọn o dara lati maa fi itara ṣe rere nigba gbogbo, ki i si i ṣe nigba ti mo wa pẹlu yin nikan. Ẹyin ọmọ mi ọwọn, ẹyin ti mo tun n rọbi rẹ titi ẹyin o fi dabi Kirisiti. Iba wu mi lati wa lọdọ yin nisinsinyi, ki emi si yi ohun mi pada, nitori pe mo daamu nitori yin.” (Gàlátíà 4:17-20)

Njẹ o ri bayi? Ilepa awọn Juu ẹlẹkọ eke yi ni lati jẹ ki awọn ara Galatia ni itara fun wọn, bi wọn ti ṣe ni itara fun Pọọlu. Amọ, bi apọsiteli ṣe wa sọ siwaju si, itara wa gbọdọ jẹ fun nkan rere dipo nkan buburu. Ọna ti itara wa ko si fi ni wà fun nnkan buburu ni ki a fi imọ ati oye kun. Ko ki i ṣe gbogbo awọn ti o fẹ ki a ma fi itara tẹle wọn tabi ba wọn lopọ naa ni a le ni nnkan kan tabi omiran i ṣe pẹlu.

Ti a ko ba ni gbagbe, Abusalomu ni asiko kan bẹrẹ si ni ṣiṣẹ lati yi ọkan awọn ọmọ Isiraẹli pada kuro lọdọ baba rẹ nitoripe oun naa fẹ jẹ ọba le wọn lori. Aṣeyọri rẹ wa jẹ ki o ye wa pe pupọ ninu awọn ọmọ orilẹ-ede yi ni ko le da inu ro. Ki ni Abusalomu ṣe fun wọn ti wọn fi ro wipe oun ni o yẹ ki o wa ni ipo ọba ti baba rẹ wa? Ṣe o ti jagun-ṣẹgun fun wọn ri ni tabi ṣe oun ni o gba wọn lọwọ awọn ọta wọn ti o si fun wọn ni isinmi? Rara o. Ko si nkan rere gbogi kan ti wọn le tọka si pe o ti ṣe fun awọn. Amọ nitori arekereke ati ẹtan ọwọ rẹ, o ṣe aṣeyọri lati ya awọn eniyan baba rẹ kuro labẹ iṣedari rẹ. Ti ko ba wa jẹ pe Ọlọrun da si ọrọ naa ni, nnkan ti a n sọ yi kọ ni a ko ba ma sọ. (Wo: 1Sámúẹ́lì 15-18)

Nitorina, ẹnikẹni ti ibaṣepọ ti o fẹ ki a ni pẹlu oun bati tako ifẹ Ọlọrun tabi ọrọ rẹ ko yẹ ni ẹni ti a n tẹle rara. Ẹnikẹni ti o ba si n gbiyanju nipa ọrọ tabi iṣe rẹ lati ba awọn ibaṣepọ wa ti o nitunmọ, ti o si duro lori otitọ Jesu jẹ, ko ki i ṣe ẹni ti a gbọdọ fi ara wa jin fun. Aṣinílọ́nà ni iru ẹni naa jẹ. A si gbọdọ yẹra fun. Eyi gan si ni Pọọlu fẹ ki awọn ara Galatia mọ.

Nṣe wa ni o dabi ẹni pe Pọọlu tun ṣẹṣẹ bẹrẹ si ni rọbi lori wọn lati tun wọn bi ninu Kirisiti Jesu, ki wọn ba le pada si bi wọn ṣe n ṣe latẹyin wa papọ. O tilẹ tun woye pe nṣe ni o dabi pe ki oun wa pẹlu wọn ni akoko ti o n kọ lẹta yi, ki o ba le ba wọn sọ otitọ ọrọ, ki wọn si ri pe ko ki i ṣe ọta wọn rara. O wa tẹsiwaju lati fi nnkan ti iwe mimọ sọ fun wa nipa ipo awọn ti o wa labẹ ofin ati ti awọn ti ko si labẹ ofin ti o si gba Jesu gbọ niwaju Ọlọrun han wọn nipa sisọ eyi:

“Ẹ wi fun mi, ẹyin ti n wa labẹ ofin, ẹ ko ha gbọ ohun ti ofin wi bi? Nitori a ti kọ ọ pe, Aburahamu ni ọmọ ọkunrin meji, ọkan lati ọdọ ẹru-binrin, ati ọkan lati ọdọ ominira-obinrin. Ṣugbọn a bi eyi ti i ṣe ti ẹru-binrin nipa ti ara: ṣugbọn eyi ti ominira-obinrin ni a bi nipa ileri. Nnkan wọnyi jẹ apẹẹrẹ: nitori pe awọn obinrin wọnyi ni majẹmu mejeeji, ọkan lati ori oke Sinai wa, ti a bi ni oko-ẹru pẹlu, ti i ṣe Hagari. Nitori Hagari yii ni oke Sinai Arabia, ti o si duro fun Jerusalẹmu ti o wa nisinsinyi, ti o si wa ni oko-ẹru pẹlu awọn ọmọ rẹ. Ṣugbọn Jerusalẹmu ti oke jẹ ominira, eyi ti i ṣe iya wa. Nitori a ti kọ ọ ninu iwe-mimọ pe, Maa yọ, iwọ agan ti ko bimọ: bu si ayọ ki o si kigbe soke, iwọ ti ko rọbi ri; nitori awọn ọmọ obirin naa ti a kọ silẹ yoo pọ ju ti abilekọ lọ. Njẹ ara, ọmọ ileri ni awa gẹgẹ bi Isaaki. Nitori pe, bi eyi ti a bi nipa ti ara ti ṣe inunibini nigba naa si eyi ti a bi nipa ti Ẹmi, bẹẹ si ni nisinsinyi. Ṣugbọn ki ha ni iwe-mimọ wi? Le ẹru-binrin naa jade ati ọmọ rẹ: nitori ọmọ ẹru-binrin ki yoo ba ọmọ ominira-obinrin jogun pọ. Nitori naa, ara, awa ki i ṣe ọmọ ẹru-binrin, bi ko ṣe ti ọminira-obinrin.” (Galatia 4:21-31)

Ki ni koko nkan ti apọsiteli yi n sọ ninu awọn ẹsẹ lẹta rẹ yi? Oun naa ni pe majẹmu ti o mu ofin Mose wa yatọ si eyi ti o sọ wa di ọmọ Ọlọrun. Majẹmu ti ofin Mose n ba ṣiṣẹ fi awọn ti a fun ni ofin yi ni ori oke Sinai si abẹ isinru. Idi si ni pe ijẹgbadun Ọlọrun wọn da lori bi wọn ba ṣe mu ofin yi ni ọkunkundun si. Amọ majẹmu ti o sọ wa di ọmọ Ọlọrun jẹ eyi ti o wa nipa ileri ti Ọlọrun ṣe fun Aburahamu lati bukun fun gbogbo araye nipasẹ iru-ọmọ rẹ. Nitorina isọdọmọ wa ko ni nkankan ṣe pẹlu boya a pa ofin kan mọ tabi a ko pa mọ; dipo eyi, o ni i ṣe pẹlu igbagbọ wa ninu Jesu Kirisiti, iru ọmọ-Aburahamu.

Nkan wọnyi ni Pọọlu wa gbiyanju lati ṣe alaye nipa lilo bi a ti ṣe bi awọn ọmọkunrin meji ti a bi fun Aburahamu lati ṣe akawe tabi apejuwe. Ọmọ eyi ti a bi nipasẹ iṣẹ ọwọ tabi ilakaka Aburahamu jẹ ọmọ ẹru-binrin rẹ, Hagari. Nitorina, ipo ẹru ni a to o si, eyi ti ko fun ni aye lati jẹ ajogun ini baba rẹ Aburahmu. Ṣugbọn ọmọ ekeji ti a bi fun ọkunrin yi jẹ eyi ti a bi nipasẹ ileri Ọlọrun fun oun ati aya rẹ, Sara. Oun si wa ni ajogun ini rẹ ati pe nipasẹ rẹ ni Jesu Kirisiti ti ṣe wa.

Eyi si njẹ ki o ye wa pe awọn ti wọn ba ro pe ilakaka awọn tabi bi awọn ṣe duro ṣinṣin ninu ofin Mose tabi ofin ara ẹni si ni yoo jẹ ki wọn di ẹni itẹwọgba niwaju Ọlọrun kan n tan ara wọn jẹ ni. Ipo ẹru ni wọn yoo ma fi gbogbo igba wa niwaju rẹ. Ṣugbọn awọn ti o ba gba Ọlọrun ati ohun ti O sọ nipa igbala ọkan wọn gbọ, ti wọn si tẹle, yoo ri aanu gba, a o si jẹ ki wọn fi iṣọdọmọ ṣe ere jẹ. Ṣe inu awọn ti o wa n lakaka lati di ẹni itẹwọgba niwaju Ọlọrun nipa iṣẹ ọwọ wọn, ti ko si bọ si, yoo wa dun si eyi bi? Ko le dun si rara. Idi niyi ti awọn ti o gbọkanle iṣẹ ọwọ wọn ṣe ma n fi ọpọ igba ṣe inunibini awọn ti o di ẹni idalare nigba igbagbọ wọn ninu Kirisiti dipo iṣẹ ọwọ wọn.

ỌRỌ IPARI
A le mu awọn ti Ọlọrun yan lati ṣe aye wa ni aṣẹpe niwaju rẹ, paapaa julọ ninu ijọ rẹ, ni ọta ti a ko ba ni imọ ati oye ọrọ rẹ ti o ye kooro, ki a si tun ma ṣe aṣaro ninu rẹ. Ṣe eyi yoo wa ṣe wa ni oore bi? Rara o! Dipo bẹẹ, nṣe ni yoo fi wa si ipo ẹni ti wọn tun gbọdọ bẹrẹ iṣẹ isọdọmọ ati iduroṣinṣin ninu igbagbọ le lori.

IBEERE

• O yẹ ki a farabalẹ ki a to bẹrẹ si ni fi itara tẹle ẹnikẹni. Ṣe alaye.
• Kini o ṣe pataki julọ si ọ ninu ẹkọ yi.

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

DOWNLOAD E-COPY

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ

Ninu ẹkọ wa ti o gbẹyin ninu iwe Galatia, a ri idi ti Ọlọrun fi fun awọn ọmọ Isiraẹli ni ofin lati ọwọ Mose. Ki si ni idi naa? Idi naa ni ki o ba le jẹ olukọni tabi atukọ fun wọn ninu ifẹ rẹ titi iru-ọmọ Aburahamu ti yoo gba araye la yoo fi de lati sọ wọn di ẹni irapada ati idalare niwaju Ọlọrun. Iru-ọmọ Aburahamu ti a si n sọ yi ni Kirisiti ti O wa lati ku fun ẹṣẹ araye, ki ileri ibukun Ẹmi Ọlọrun ba le jẹ ti wa. Niwọn igba ti Kirisiti si ti wa, iṣẹ ofin ti pari. Iṣẹ igbagbọ ni o ku ba yi, iṣẹ igbagbọ ninu Kirisiti ti a ran wa fun igbala ati isọdọmọ gbogbo araye. Bi Pọọlu ṣe fi ye wa, nipa igbagbọ ninu Ọlọrun ni Aburahamu ṣe ri ileri bibọ Kirisiti gba. Awọn ti o ba wa fẹ di ajogun ileri ibukun Ẹmi Ọlọrun ti a ṣe fun Aburahamu lati ipasẹ Kirisiti naa gbọdọ fi igbagbọ wọn ninu rẹ han. Ti wọn ba si ti fi igbagbọ yi han, wọn yoo di ẹni irapada, ẹni idalare ati ọmọ Ọlọrun nipasẹ Ẹmi Ọlọrun, yala Juu niwọn tabi Keferi, ọkunrin ni wọn tabi obinrin, ọmọde ni wọn tabi agbalagba.

ỌMỌ DÍPÒ ẸRÚ

Pọọlu, ninu abala lẹta yi ti a fẹ gbe yẹwo ninu ẹkọ yi, tun wa tẹsiwaju lati tẹ ẹ mọ awọn ara Galatia leti pe wọn ti di ọmọ Ọlọrun, wọn ko si nilo lati ba a lopọ bi ẹru mọ. O wa fi ọna ti awọn ọmọde, ti wọn jẹ arole tabi ajogun nkan ini awọn obi wọn ṣe ma n de ipo wọn gẹgẹ bi ajogun nitootọ, ṣe apejuwe bi awa, yala Juu niwa ni o tabi Keferi, ṣe di ajogun ileri ati ipese Ọlọrun fun wa. Nkan ti o sọ niyi:

“Njẹ mo wi pe, niwọn igba ti arole naa ba wa ni ewe, ko yatọ ninu ohunkohun si ẹru bi o tilẹ jẹ oluwa ohun gbogbo; Ṣugbọn o wa labẹ olutọju ati iriju titi fi di akoko ti baba ti yan tẹlẹ. Gẹgẹ bẹẹ si ni awa, nigba ti awa wa ni ewe, awa wa labẹ ide awọn ẹmi agbaye: Ṣugbọn nigba ti akoko kikun naa de, Ọlọrun ran ọmọ rẹ wa, ẹni ti a bi ninu obinrin, ti a si bi labẹ ofin, Lati ra awọn ti n bẹ labẹ ofin pada, ki a le di ọmọ Ọlọrun. Ati nitori ti ẹnyin ti n ṣe ọmọ, Ọlọrun ti ran Ẹmi ọmọ rẹ wa sinu ọkan yi, ti n ke pe, Aba! Baba! Nitori naa iwọ ki i ṣe ẹru mọ, bi ko ṣe ọmọ; bi iwọ ba si jẹ ọmọ, njẹ iwọ di arole Ọlọrun nipasẹ Kirisiti.” (Gàlátíà 4:1-7)

Pẹlu nkan ti Pọọlu sọ silẹ yi, nkan akọkọ ti a ri ni wipe ifẹ Ọlọrun ni pe ki gbogbo eniyan wa ni ipo ọmọ rẹ. A si ri awọn abala bibeli ti o tilẹ fi ye wa pe Ọlọrun ti yan wa lati jẹ ọmọ rẹ ati ajogun rẹ ki a to fi ipile aye yi lọlẹ (Efesu 1:3-6). Ṣugbọn gẹgẹ bi a ti ṣe mọ, ko ki ṣe ọjọ ti a ba bimọ naa ni ọmọ naa yoo bẹrẹ si ni ṣe akoso nkan ini wa ti a fẹ fi silẹ fun gẹgẹ bi ogun rẹ. Ọmọ naa gbọdọ dagba naa, ki o si to oju bọ ki o to di pe a o fi akoso ogun tabi ini rẹ le lọwọ. Aijẹbẹ, o ṣeeṣe ki o ṣe ara rẹ leṣe tabi ki o ba nkan jẹ, bi itan ọmọ oninakuna ti Jesu sọ ti ṣe fi ye wa (Luuku 15:11-32).

Wayi o, ni akoko ti ọmọ yi ba n dagba, a o fi si abẹ isakoso oniruuru olukọ, ti yoo maa tọ sọna, ti yoo si ma ṣe idari rẹ titi yoo fi to oju bọ lati le ṣe akoso ohunkohun ti a ba fa le lọwọ ni ọna ti o tọ ati ti o yẹ. Nitorina, ni akoko ti eyi ba n ṣẹlẹ, ọmọ yi ko yatọ si ẹru. Pọọlu wa n jẹ ki o ye wa pe bi o ti ri gẹlẹ fun awa naa ni eyi. Bi o tilẹ jẹ wi pe ipo ọmọ ati ajogun ni Ọlọrun to wa si ni ọkan rẹ, ko le sọ wa di ọmọ ati ajogun rẹ nitootọ ti a ko ba san gbogbo gbesẹ ẹṣẹ wa. Nitorina, O fi awa ti a jẹ Kerefi silẹ gẹgẹ bi ẹru  labẹ oniruuru aṣa, ilana, èèwọ̀, ìṣẹ̀ṣe ati ironu ti awọn ẹmikẹmi agbaye yi fi lọlẹ fun wa. Bakan naa, O fi awọn Juu silẹ sabẹ ofin ati ilana Mose gẹgẹ bi alakoso igbe aye wọn. O si jẹ ki eyi ki o wa bẹẹ titi akoko yoo fi too fun iru-ọmọ obinrin, ti si i tun ṣe iru-ọmọ Aburahamu, ti O fẹ ti ipasẹ rẹ san gbese ẹsẹ wa yoo fi de (Jẹnẹsisi 3:14-15). 

Nigba ti akoko si to, Kirisiti ti a n sọrọ rẹ yi de, O ku fun ẹsẹ wa ki a ba le bọ lọwọ gbogbo awọn nkan ti o mu wa ni ẹru, O si tun ra awọn ọmọ Aburahamu ti o wa labẹ ofin Mose naa pada, ki a ba le sọ awọn naa di ọmọ Ọlọrun nitootọ. Gbogbo awa ti a wa gbaagbọ, yala Juu niwa ni o tabi Heleni, ni a ti tun bi, ti a si ti sọ di ọmọ Ọlọrun. Idi si niyi ti Ọlọrun ṣẹ ran Ẹmi rẹ sinu wa lati ṣe wa ni ọmọ ninu ọkan wa. Nitorina ni ko ṣe jẹ kayefi fun wa lati pe ara wa ni ọmọ Ọlọrun – Ẹmi ọmọ rẹ n gbe inu wa, O si n mu wa ni ọkan le lati pe ni ‘Aba, Baba’, eyi ti o tunmọ si ‘Baba, Baba mi’.

Oju wo ni o wa yẹ ki a fi ma wo ara wa bayi? Oju ọmọ Ọlọrun ni! Oju arole ati ajogun ohun gbogbo ti Ọlọrun ni, paapaa julọ awọn ini rẹ ti ko ki i dibajẹ, ni o yẹ ki a ma fi wo ara wa. A ko gbọdọ tun wo ara wa bi ẹru mọ tabi ki a tun gbiyanju lati fi ara wa sabẹ ofinkofin tabi ilanakilana tabi aṣakaṣa gẹgẹ bi ọna lati di ẹni itẹwọgba niwaju Ọlọrun tabi lati jẹgbadun ipese rẹ fun wa. Ajogun awọn ini rẹ ni a jẹ. Nitorina, a kan nilo lati bere ati lati nawọ gan ohun ti o jẹ ti wa ni aye yi ni, ki a si bẹrẹ si ni jẹgbadun rẹ.

Ailoye eyi ni o wa fa ti ọpọ awọn ọmọ Ọlọrun fi ro wipe boya nipasẹ adura gbigba wọn, awẹ gbigba wọn, ififunni wọn tabi igbe aye iwa mimọ wọn ni awọn yoo ṣe di ẹni idalare niwaju Ọlọrun tabi ri nkan gba lọwọ rẹ. Ṣugbọn awẹ gbigba, adura gbigba, sisan idamẹwa ati ọrẹ tabi igbe aye iwa mimọ kankan ko le jẹ ki o lẹtọ si ogun ti ko ba ki i ṣe tirẹ. Awọn ti o ba jẹ ọmọ ẹni ti o ni ogun nikan ni o lẹtọ si ogun rẹ. Nitorina, nkan ti a nilo lati jẹ igbadun ipese Ọlọrun fun awọn ọmọ rẹ, boya ni aye yi ni o tabi ninu ayeraye ti o n bọ, ni ki a jẹ ọmọ rẹ.

Idi si niyi ti o fi jẹ pe nkan akọkọ ti Ọlọrun ṣe fun wa lati mu wa yẹ lati jẹ alabapin ogun awọn ọmọ rẹ ni pe O sọ wa di ọmọ rẹ nipa titun wa bi (Kolose 1:12). Gbogbo awa ti a si jẹ ọmọ rẹ ni a tun jẹ ajogun ini rẹ. Ohun ti a wa nilo ni ẹkọ lori awọn nkan ti o jẹ ti wa ati ẹkọ lori bi a ṣe le ṣe amulo wọn fun igbaye-gbadun wa. Ko ki i ṣe ofin Mose tabi ilana adayeba kankan ni a nilo. A si ti wa fun wa ni Ẹmi Mimọ lati fun wa ni imọ ati oye awọn nkan wọnyi (1Kọrinnti 2:7-16). Ọwọ wa lo wa ku si lati kẹkọ labẹ Ẹmi yi ati lati ṣẹ amulo ohunkohun ti O ba kọ wa.

Awọn nkan wọnyi ni o fa a ti Pọọlu ṣe wa tẹsiwaju lati sọ eyi fun awọn ara Galatia:

“Ṣugbọn nigba naa ti ẹyin ko tii mọ Ọlọrun ẹyin ti n sinru labẹ awọn ẹda ti ki i ṣe Ọlọrun. Ṣugbọn nisinsinyi, nigba ti ẹyin ti mọ Ọlọrun tan, tabi ki a kuku wi pe, nisinsinyi ti Ọlọrun ti wa yin ri, ee ha ti ri ti ẹ fi tun yi pada lati maa sinru fun awọn alailera ati alagbe ẹda ti aye yii? Ẹyin n kiyesi ọjọ, ati oṣu, akoko ati ọdun. Ẹru n ba mi, ki o ma baa ṣe pe lasan ni gbogbo laalaa ti mo ti ṣe lori yin.” (Gàlátíà 4:8-11)

Apọsiteli  yi n woye pe ṣe ko ki i ṣe pe laalaa rẹ lori awọn ara Galatia yi yoo ja si asan pẹlu bi wọn ti ṣe n ba ọrọ igbagbọ wọn lọ. Idi si ni pe wọn tun ti pada bẹrẹ si ni kiyesi awọn ọjọ, oṣu, akoko ati awọn ọdun kan, gẹgẹ bi a ti la a kalẹ ninu ofin Mose. Ṣugbọn wọn ti pa gbogbo awọn nkan ti o farapẹ iwọnyi, ti o si sọrọ mọ ẹsin abalaye wọn ti tẹlẹ, nigba ti wọn gba Jesu ni Oluwa ati Olugbala wọn. Ki wa ni wọn n reti lati jere nipa pipada sori wọn? Ṣe awọn nkan wọnyi ni yoo sọwọn di ọmọ Ọlọrun ni tabi ṣe awọn ni yoo jẹ ki wọn ri nkan gba lọwọ rẹ?

O si wa ṣeni laanu pe iru ipo ti ọpọ awa ti a jẹ ọmọ Ọlọrun loni wa ni yi. Bi o tilẹ jẹ pe a jẹ ọmọ rẹ, a ko mu ipo wa gẹgẹ bi ọmọ rẹ ni pataki. A ṣi lero pe titẹle ofin Mose ati awọn nkankan ti a ba ṣe ni yoo jẹ ki a di ẹni itẹwọgba niwaju rẹ tabi ti yoo jẹ ki a di ajogun ipese rẹ. Yatọ si eyi, ọpọlọpọ wa ni ko i ti gbe awọn aṣa, eewọ ati ilana atọwọdọ ti a ba laye, ti ko si ni ere kankan lori ju danu. A si tun n jẹ ki awọn nkan wọnyi dari aye wa ati ibaṣepọ wa pẹlu eniyan ati Ọlọrun. Ki wa ni Jesu ku fun wa fun? Ki wa ni O sọ wa di ọmọ Ọlọrun ati ajogun rẹ fun? Njẹ iku ati laalaa rẹ lori wa ko ni jasi asan bayi?

ỌRỌ IPARI

Wiwa Jesu lati ku fun wa ati lati sọ wa di ọmọ Ọlọrun ni opin ohun gbogbo ti o ni i ṣe pẹlu ofin Mose ati awọn ẹsin ati aṣa abalaye wa. Nitorina, nkan ti o yẹ ki a gbajumọ ni bi a o ṣe mọ awọn ohun ti o jẹ ti wa gẹgẹ bi ọmọ Ọlọrun, ti a o si bẹrẹ si ni ṣe amulo wọn lati gbe igbe aye olododo ati ẹni ti a ti da lare niwaju rẹ.

IBEERE

–              Ṣiṣe iṣẹ lati jẹ agojun ipese Ọlọrun ati lati di ẹni idalare niwaju rẹ ko le sọ wa di ajogun ini rẹ. Ṣe alaye.

Lati ọwọ Johnson O. Lawal Copyright © 2022,  Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com  or call: 08037592851 (WhatsApp Number: 07085711280)

Ẹ̀KỌ́ NÍNÚ ÌWÉ GÀLÁTÍÀ

ÀYỌKÀ: GÀLÁTÍÀ 3:15-29

ỌJỌ́RÚ 02, BELU 2022

DOWNLOAD E-COPY HERE

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ sẹyin ninu lẹta Pọọlu si awọn ara Galatia, a ri wipe nipa igbagbọ ninu Ọlọrun ati ọrọ rẹ ni eniyan ṣe n di olododo ati ẹni idalare niwaju rẹ. Aburahamu si ni a lo gẹgẹ bi apẹẹrẹ bi eniyan ṣe n ti ipasẹ igbagbọ ninu Ọlọrun da ẹni idalare niwaju rẹ. Aburahamu gba Ọlọrun gbọ. Ọlọrun si ka igbagbọ rẹ si ododo fun un. Ti awa na ba gba a gbọ, ti a si tẹle ọrọ rẹ si wa lori bi a ti ṣe le di ẹni igbala ati olododo, awọn naa yoo di olododo ati ẹni idalare niwaju rẹ. Ṣugbọn ti a ko ba gba a gbọ, ti a si wa ro wipe iṣẹ ọwọ wa tabi awọn ofin kan ti a n tẹle ni yoo sọ wa di ẹni idalare niwaju rẹ, a jẹ wipe a kan n tan ara wa jẹ ni.

Gẹgẹ bi Pọọlu ṣe jẹ ki o ye wa ninu abala lẹta rẹ yi ti a wo kẹyin, nipasẹ ofin Mose kọ ni Aburahamu ṣe di olododo niwaju Ọlọrun bikoṣe nipaṣẹ igbagbọ. Ko tilẹ si ohun ti o n jẹ ofin Mose ni akoko yi, nitori a ko i ti bi Mose. Yatọ si eleyi, ileri ti Ọlọrun ṣe fun Aburahamu pe Oun yoo bukun fun gbogbo araye nipasẹ iru-ọmọ rẹ ko wa nipasẹ pe o pa ofin kankan mọ. Dipo eyi, o wa nipasẹ igbagbọ. Ofin Mose tilẹ ni akude nitori ti o fi awọn arọmọdọmọ Aburahamu ti a fi fun si abẹ egun. Eyi ko si jẹ ki Ọlọrun le ti ipasẹ wọn bukunfun gbogbo awọn araye bi O ti ba Aburahamu baba nla wọn da majẹmu. Nitorina, yatọ si pe wọn nilo irapada kuro ninu ẹsẹ wọn, wọn tun nilo ki a yọ wọn kuro labẹ egun ofin. Idi si ni yi ti a fi kan Jesu mọ agbelebu, ki a ba le gba wọn kuro labẹ egun ofin, ki ileri Ẹmi mimọ ba le jẹ ti wọn ati ti gbogbo awọn ti o ba gbagbọ ninu rẹ.

ÌWÚLÒ ÒFIN MÓSÈ
Wayi o, Pọọlu wa tẹsiwaju ninu abala lẹta rẹ si awọn ara Galatia ti a fẹ gbe yẹwo ninu ẹkọ yi lati ṣe alaye siwaju si idi ti yala awọn Juu ni tabi awọn Keferi ni ko ṣe nilo ofin Mose fun igbala tabi fun idalare wọn niwaju Ọlọrun. O si tun ṣe alaye pẹlu idi ti a fi fun awọn Juu ni ofin Mose. Iwọ naa kọkọ wo diẹ lara ọrọ rẹ:

“Ara, emi n sọrọ bi eniyan; Bi o tilẹ jẹ pe majẹmu eniyan ni, bi a ba ti fi idi rẹ mulẹ, ko si ẹni ti o le sọ ọ di asan, tabi ti o le fi kun un mọ. Njẹ fun Aburahamu ati fun iru-ọmọ rẹ ni a ti ṣe awọn ileri naa. Oun ko si wi pe, Fun awọn iru-ọmọ rẹ, bi ẹni pe ọpọlọpọ iru-ọmọ rẹ, ṣugbọn bi eni pe ọkan, ati fun iru-ọmọ rẹ, eyi ti i ṣe Kirisiti. Eyi ni mo n wi pe, majẹmu ti Ọlọrun ti fi idi rẹ mulẹ niṣaaju, ofin ti o de lẹyin ọgbọn-le-nirinwo ọdun ko le sọ ọ di asan tabi ki o sọ ileri naa di alailagbara. Nitori bi ogun naa ba wa nipa ṣiṣe gẹgẹ bi ofin, ki i ṣe ti ileri mọ: ṣugbọn Ọlọrun ti fi i fun Aburahamu nipa ileri. Njẹ ki a ni ofin? A fi kun un nitori irekọja titi oru-ọmọ ti a ti ṣe ileri fun yoo fi de; a si ti ipasẹ awọn angẹli ṣe ilana rẹ lati ọwọ onilaja kan wa. Njẹ onilaja ki i ṣe alarina ti ẹnikan, ṣugbọn ọkan ni Ọlọrun.” (Gàlátíà 3:15-20)

Ki ni Pọọlu fẹ ki o ye wa ni ibi? Ohun naa ni pe ileri ti Ọlọrun ṣe fun Aburahamu lati bukun fun gbogbo araye nipasẹ iru-ọmọ rẹ ko ti ipasẹ ofin Mose wa. O si yẹ ki o ye wa irufẹ ibukun ti a n sọrọ nipa. Bi a ti ṣe ri ninu alaye ti apọsiteli yi ṣe siwaju, ileri ibukun ti a ṣe fun Aburuhamu ni i ṣe pẹlu irapada ati idalare awọn eniyan kuro ninu ẹsẹ, kuro labẹ ibinu Ọlọrun ati gbigba ẹbun Ẹmi mimọ rẹ lati tun wa bi ati lati ma gbe inu wa titi lailai. Eleyi kọja ki a ni owo lọwọ, ni ile lori, ra mọto rẹpẹtẹ, bi ọmọ, ri iwosan gba tabi di gbajumọ. Bi o tilẹ jẹ wipe ibukun Ọlọrun ma n farahan nipasẹ awọn nkan wọnyi, wọn ko ki i ṣe ibukun ayeraye ti ko ni parun rara. Ibukun ogun ayeraye ti ko ni parun tabi dibajẹ ni Ọlọrun ṣeleri fun Aburahamu lati fun awọn eniyan lati ipasẹ iru-ọmọ rẹ.

Pọọlu wa n jẹ ki o ye wa pe mọ ofin Mose ti a fifun awọn ọmọ Isiraẹli lẹyin irinwo ọdun le ni ọgbọn ko le yi majẹmu ti Ọlọrun ba Aburahamu da pada. Bi a ti ṣe mọ, laarin awọn eniyan, ti a ba ti da majẹmu pẹlu ẹnikan, ti a si fi idi rẹ mulẹ, ko si nkankan ti o le yi pada. Bẹẹ gẹgẹ naa ni o si ṣe ri pẹlu Ọlọrun. Majẹmu rẹ ni pe Oun yoo ti ipasẹ iru-ọmọ Aburahamu bukun fun gbogbo araye. Ko si sọ pe ki Aburahamu ṣe nkankan lati ri imuṣẹ eyi. Oun lo ṣe ileri. Ọwọ rẹ lo si wa lati mu u ṣẹ, ko ni nkankan ṣe pẹlu ohun ti Aburahamu ṣe tabi ti ko ṣe. (Wo: Jẹ́nẹ́sísì 12:1-3 & 22:15-18)

Amọ eyi ko ribẹ pẹlu ofin Mose. Awọn angẹli ni o ko ofin yi jọ pọ, gẹgẹ bi Pọọlu ṣe jẹ ki o ye wa, ti a si gbe le Moṣe lọwọ lati fi fun awọn ọmọ Isiraẹli. Ki a to gbe ofin yi le Mose lọwọ fun wọn, Ọlọrun ti kọkọ ba wọn sọrọ lori nkan ti O fẹ ati eyi ti ko fẹ, ki ibukun rẹ to jẹ ti wọn ni ilẹ ti O n mu wọn lọ. Wọn si dahun wipe nkan ti O sọ ba awọn lara mu. Nitorina, O ba wọn da majẹmu pe ibukun Oun yoo jẹ ti wọn, nigbọn igba ti wọn ba pa ofin ati ilana Oun mọ. Ṣugbọn ko ni jẹ ti wọn niwọn igba ti wọn ko ba pa a mọ. Wọn si sọ pe awọn faramọ. Mose wa ni o duro gẹgẹ bi ẹlẹri tabi alarina laarin awọn ati Ọlọrun ni ọjọ ti a da majẹmu yi, ti a si gbe iwe rẹ le wọn lọwọ. (Wo: Ẹ́kísódù 24:1-9; Iṣe Apọsiteli 7:53)

Eyi wa n jẹ ki o ye wa pe majẹmu ti Ọlọrun da pẹlu Aburahamu yatọ patapata si eyi ti o da pẹlu awọn ọmọ Isiraẹli. Majẹmu ti O da pẹlu Aburahamu ni i ṣe pẹlu bi yoo ṣe bukun fun gbogbo araye nipasẹ iru-ọmọ rẹ. Majẹmu yi ko si ni tabi-ṣugbọn ninu. Ṣugbọn eyi ti O da pẹlu awọn ọmọ Isiraẹli ni i ṣe pẹlu igbaye-gbadun wọn ni ilẹ ileri ti O fun wọn, iyẹn ilẹ Kenani. Majẹmu eyi wa ni tabi-ṣugbọn ninu. Amọ, ko ni agbara lati pa ti eyi ti O da pẹlu Aburahamu lara lọna kankan.

Siwaju si, Pọọlu tun jẹ ki o ye wa pe imuṣẹ Majẹmu ti Ọlọrun da pẹlu Aburahamu yi gan ko ni ti ipasẹ gbogbo iru-ọmọ rẹ waye. Idi si ni pe iru-ọmọ rẹ kan ṣoṣo ni Ọlọrun sọ wipe Oun yoo ti ipasẹ rẹ bukun fun gbogbo araye, ko ki i ṣe awọn iru-ọmọ rẹ. Ta wa ni iru-ọmọ rẹ ti a n sọ yi? Kirisiti ni. O si ti wa lati sọ gbogbo awọn ti o ba gbaagbọ di alabukunfun.

Ki wa ni iwulo ofin Mose gan? Abi ṣe ofin yi tako awọn ileri Ọlọrun si Aburahamu ati iru-ọmọ rẹ? Idahun Pọọlu si awọn ibere yi lọ bayi:

“Nitori naa ofin ha lodi si awọn ileri Ọlọrun bi? Ki a ma ri i. Nitori iba ṣe pe a ti fi ofin kan fun ni ti o lagbara lati sọ eniyan di alaaye, nitoootọ ododo iba ti ti ipasẹ ofin wa. Ṣugbọn iwe-mimọ ti fi ye wa pe, gbogbo eniyan ni n bẹ labẹ ide ẹṣẹ, ki a si le fi ileri nipa igbagbọ ninu Jesu Kirisiti fun awọn ti o gbagbọ. Ṣugbọn ki igbagbọ to de, a ti pa wa mọ labẹ ofin, a si ṣe wa mọ de igbagbọ ti a n bọ wa fihan. Nitori naa ofin ti jẹ olukọni lati mu eniyan wa sọdọ Kirisiti, ki a le da wa lare nipa igbagbọ. Ṣugbọn lẹyin igba ti igbagbọ ti de, awa ko si labẹ olukọ mọ. Nitori pe ọmọ Ọlọrun ni ẹyin n ṣe, nipa igbagbọ ninu Kirisiti Jesu. Nitori pe iye ẹyin ti a ti batisi sinu Kirisiti, ti gbe Kirisiti wọ. Ko le si Juu tabi Heleni, ẹru tabi ominira, ọkunrin tabi obinrin nitori pe, ọkan ni gbogbo yin jẹ ninu Kirisiti Jesu. Bi ẹyin ba si jẹ ti Kirisiti, njẹ ẹyin ni iru-ọmọ Aburahamu, ati arole gẹgẹ bi ileri.” (Gàlátíà 3:21-29)

Njẹ o ri bayi? Ofin Mose ko lodi si ileri ibukun igbala, idalare, atunbi ati isọdọmọ Ọlọrun ti Ọlọrun ṣe fun iru-ọmọ Aburahamu rara. Bi Pọọlu ti ṣe fi ye wa, idi ti a ṣe fun awọn ọmọ Isiraẹli ni ofin ni ẹsẹ, ti o ti fi gbogbo eniyan si abẹ ide iparun. Eyi jasi pe a ko fun wọn ni ofin yi lati sọ wọn di olododo ṣugbọn a fun wọn ki o ba le ṣe akoso wọn ninu ifẹ Ọlọrun titi iru-ọmọ Aburahamu ti yoo gba wọn la ati sọ wọn di ọmọ Ọlọrun yoo fi de. Eyi tunmọ si pe Juu ti o ba fi tọkantọkan tẹle ofin Mose ko ni ṣe alaigbagbọ ninu iru-ọmọ Aburahamu, iyẹn Kirisiti, nigba ti O de.

Niwọn igba ti Kirisiti si ti de, ofin Mose ti pari iṣẹ rẹ. Igbagbọ ninu Kiristi ni o ku ti awọn ti o ba fẹ di alabapin ninu ibukun Aburahamu gbọdọ fi han. Gbogbo awọn ti o ba si ti fi igbagbọ han ninu rẹ fun igbala ati idalare wọn ni o ti di ọkan pẹlu rẹ, ti wọn si ti gbe wọ. Awọn wọnyi si ti da ọmọ Ọlọrun ati iru-ọmọ Aburahamu ati arole rẹ pẹlu rẹ, yala Juu ni wọn ni o tabi Heleni, ẹru niwọn ni o tabi ominira, ọkunrin ni wọn ni o tabi obinrin.

Ọ̀RỌ̀ ÌPARÍ
Ileri Ọlọrun lati bukun fun gbogbo aye nipasẹ Aburahamu ko da lori ofin Mose rara. A fun awọn ọmọ Isiraẹli ni ofin Mose lati ṣe amọna wọn titi akoko yoo fi to fun Ọlọrun lati mu ileri ti O ṣe fun Aburahamu ṣẹ ni. Niwọn ti O si ti mu ileri yi ṣe nipa riran Jesu Kirisiti, iru-ọmọ Aburahamu ti a ṣe ileri fun lati bufun fun gbogbo araye nipasẹ rẹ, ofin Mose ti pari iṣẹ rẹ. Kiki ki awọn eniyan gba iru-ọmọ Aburahamu yi gbọ loku fun wọn lati di alabakunfun, ọmọ Ọlọrun ati ajogun iye ayeraye.

ÌBÉÉRÈ

• Bawo ni ẹkọ yi ṣe ran oye rẹ nipa ofin Mose ati iwulo rẹ lọwọ si?
• Ki ni o ṣe pataki si ọ julọ ninu ẹkọ naa?

Láti ọ́wọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

ÀLÀKALẸ̀ Ẹ̀KỌ́ BÍBÉLÌ ÀTI ÀLÀYÉ | ỌJỌ́RÚ 26, ÒWÀRÀ 2022

ÀKỌ́RÍ: Ẹ̀KỌ́ NÍNÚ ÌWÉ GÀLÁTÍÀ | ÀYỌKÀ: GÀLÁTÍÀ 3:6-5

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kẹyin ninu lẹta Pọọlu si awọn ara Galatia, a ri awọn nkan ti o pe akiyesi wọn si nipa bi wọn ti ṣe bẹrẹ irina-ajo wọn pẹlu Ọlọrun ninu Kirisiti ati awọn ọna ti wọn gba ṣe aṣiṣe. O si pe akiyesi wọn si awọn nkan wọnyi lati jẹ ki wọn mọ pe aiṣe amulo ọpọlọ ti Ọlọrun fun wọn lati ṣe agbeyẹwo awọn ẹkọ odi ti a mu tọ wọn wa ni o jẹ ki wọn pa Jesu ti lati tẹle ofin Mose. Gẹgẹ bi o ti se sọ fun wọn, niwọn igba ti Ọlọrun ko kọ lati sọ wọn di ẹda titun, lati fun wọn ni Ẹmi Mimọ rẹ ati lati ṣe oniruuru iṣẹ ami ati iṣẹ iyanu laarin wọn nitoripe wọn ko tẹle ofin Mose, o yẹ ki wọn mọ pe wọn ko nilo lati pa ofin yi mọ lati di ẹni idalare niwaju rẹ. O wa jẹ iyalẹnu pe ọpọ loni naa ni o n rin ni ipasẹ ijọ Galatia, ti awọn naa ko woye pe wọn ko nilo lati pa ofin Mose mọ lati di ẹni idalare niwaju Ọlọrun, niwọn igba ti ko ki i ṣe nipasẹ ofin yi ni Ọlọrun ṣe tun wọn bi. Ti awọn naa ko ba si fẹ kuna oore-ọfẹ Ọlọrun lẹkan si, wọn nilo lati fi ara balẹ ka awọn nkan ti Pọọlu kọ sinu lẹta yi si awọn ara Galatia, ki wọn si bẹrẹ si ni ṣe amulo wọn.

BÍ A TÍ ṢE Ń DI ẸNI ÌDÁLÁRE
Lati wa fi idi nkan ti o kọ awọn ara Galatia ninu lẹta yi mulẹ gidigidi, Pọọlu tẹsiwaju latii fi Aburahamu ṣe apẹẹrẹ bi eniyan ṣe n di ẹni idalare niwaju Ọlọrun fun wọn. Iwọ naa wo lara awọn nkan ti o sọ lori eyi:

“Gẹgẹ bi Aburahamu ti gba Ọlọrun gbọ, ti a si ka a si olododo eniyan. Bẹẹ ni, ki ẹyin ki o mọ pe, awọn tii ṣe tii igbagbọ, awọn naa ni i ṣe ọmọ Aburahamu. Bi iwe-mimọ si ti wi tẹlẹ pe, Ọlọrun yoo da awọn keferi lare nipa igbagbọ, Ọlọrun ti waasu iyinrere yii ṣaaju fun Aburahamu, pe, nipasẹ rẹ ni oun yoo bukun gbogbo eniyan. Gẹgẹ bẹẹ ni awọn ẹni ti o gbagbọ pẹlu jẹ alabakun-fun pẹlu Aburahamu olododo. Nitori pe iye awọn ti o gbẹkẹle iṣẹ ofin n bẹ labẹ egun: nitori ti a ti kọ ọ ninu iwe mimọ pe, Ọlọrun yoo fi ẹnikẹni ti ki i ṣe gẹgẹ bi ohun gbogbo ti a kọ sinu iwe ofin bu. Nitori o damiloju pe, a ko da ẹnikẹni lare niwaju Ọlọrun nipa ṣiṣe gẹgẹ bi ofin nitori pe, olododo yoo ye nipa igbagbọ. Ofin ki i ṣi i ṣe ti igbagbọ ṣugbọn ẹni ti n ṣe wọn yoo ye nipasẹ wọn. Kirisiti ti ra wa pada kuro lọwọ egun ofin, ẹni ti a fi ṣe egun fun wa nitori ti a ti kọ ọ ninu iwe-mimọ pe, Ẹnikẹni ti a gbe kọ sori igi n bẹ labẹ egun Ọlọrun: Ki ibukun naa, eyi ti Ọlọrun ṣe ileri rẹ fun Aburahamu le jẹ ti awọn Keferi nipa Kirisiti Jesu; ki awa ki o le gba ileri Ẹmi nipa igbagbọ.” (Gàlátíà 3:6-14)

Ki ni awọn koko ti Pọọlu fẹ ki awọn ara Galatia ati awa naa pẹlu dimu pẹlu awọn nkan ti o sọ nibiyi? Akọkọ ni pe Aburahamu ti o jẹ baba nla awọn Juu, ti o si jẹ apẹẹrẹ ẹni idalare niwaju Ọlọrun di ẹni idalare niwaju rẹ nipa igbagbọ dipo nipa ofin tabi nipa iṣẹ rere rẹ. Bibeli sọ wipe, “Aburamu si gba Ọlọrun gbọ, a si ka a si ododo fun-un.” (Jẹ́nẹ́sísì 15:6) Njẹ o ri bayi? Ko ki ṣe iṣẹ rere Aburahamu ni Ọlọrun wo lati tẹwọgba tabi lati ka si olododo tabi ẹni idalare niwaju rẹ. Lotitọ, Aburahamu ni awọn iṣẹ rere ti a le tọkasi tabi ti o le fọnnu nipa wọn. Amọ awọn eleyi ko jamọ nkankan niwaju Ọlọrun. Yatọ si eyi, Aburahamu naa tun ni awọn aiṣedede ati aiṣodo tirẹ, ti a tilẹ kọ sinu bibeli fun ẹkọ wa. Ti Ọlọrun ba wa ṣe idajọ rẹ lori awọn nkan wọnyi, ko ni i ka si olododo rara. (Wo: Jẹ́nẹ́sísì 12; Jẹ́nẹ́sísì 16; Jẹ́nẹ́sísì 20; Róòmù 4:1-3)

Amọ Ọlọrun ka Aburahamu si olododo. Ki si ni idi? Idi ni pe o gba ọrọ Ọlọrun gbọ. Nibakana, ẹnikẹni ti Ọlọrun yoo ba tẹwọgba gẹgẹ bi olododo tabi ka si ẹni idalare gbọdọ gba ọrọ rẹ gbọ lori igbala ọkan rẹ. Ki si ni ọrọ rẹ lori igbala ọkan wa? Ohun naa ni pe ki a gba Jesu ni Oluwa wa, a o si gba wa la, a o si tun sọ wa di ẹni itẹwọgba niwaju rẹ (Ìṣe Àpọ́sítélì 16:29-31; Róòmù 10:9-10). Awọn ti o ba si wa ṣe bẹẹ gẹgẹ ni Pọọlu tọka si gẹgẹ bi ọmọ Aburahamu tootọ.

Koko ẹkọ keji ti Pọọlu n fi ye wa ninu awọn ẹsẹ bibeli yi ni pe nitori igbagbọ Aburahamu, Ọlọrun ba da majẹmu pe nipasẹ rẹ ni Oun O ti ṣe bukun fun gbogbo araye (Jẹ́nẹ́sìsì 12:1-3 &22:15-18). Eyi wa tunmọ si pe gbogbo awọn ti o ba jẹ ọmọ Aburahamu ni o jẹ ẹni ibukun ti Ọlọrun yoo lo lati ma bukun fun gbogbo awọn ti o ba wa ni ayika wọn. Ṣe eyi wa jasi pe gbogbo awọn Juu ti o jẹ arọmọdọmọ Aburahamu ni ọrọ yi n tọka si bi? Rara o!

Lotitọ, arọmọdọmọ Aburahamu ni awọn Juu jẹ. Awọn ni o si tọ si lati jẹ ere ileri Ọlọrun yi. Ṣugbọn ofin Mose ti a fun wọn ti ba nkan jẹ. Idi si ni pe ofin Mose fi wọn si abẹ egun, gẹgẹ bi Pọọlu ti ṣe fi ye wa. Ofin Mose sọ gbangba-gbangba pe egun ni fun ẹnikẹni ti ko ba pa gbogbo nkan ti o wa ninu iwe ofin yi mọ (Ditarónómì 27:26). Niwọn igba ti ko si si ẹni naa ti o le pa gbogbo awọn nkan ti a kọ sinu iwe ofin Mose mọ, lalai yẹsẹ, a jẹ wipe gbogbo awọn ọmọ Isiraẹli ni o wa labẹ egun niyẹn.

Bawo wa ni awọn ọmọ Isiraẹli yoo ṣe wa wa labẹ egun ofin Mose ti Ọlọrun yoo si tun lo wọn lati bukun fun gbogbo araye? Ko ṣeeṣe. Ayafi ti a ba yọ wọn kuro labẹ egun yi nikan ni eyi yoo ṣe ṣeeṣe. Idi niyi, bi Pọọlu ṣe fi ye wa, ti a fi kan Jesu mọ agbelebu fun wa. Jesu, gẹgẹ bi ẹbọ fun ẹṣẹ gbogbo araye, le gba oniruuru ọna ku. Ṣugbọn iku ori igi agbelebu ni o ku. Awọn Juu gan funran wọn ni wọn sọ fun Pilatu pe nṣe ni ki o kan an mọ agbelebu. Ki ni idi? Idi ni pe Ọlọrun fẹ ki O di egun fun wọn, ki wọn ba le bọ kuro labẹ egun ofin Mose.

Ofin Mose sọ eyi fun wa nipa ẹnikẹni ti a ba gbe kọ sori igi: “Bi ọkunrin kan ti o jẹbi ẹsun ba ni lati ku ti o si ku, ti a si gbe oku rẹ kọ sara igi, o ko gbọdọ fi oku rẹ silẹ sara igi ni gbogbo oru. Gbiyanju lati sin in ni ọjọ naa gan an, nitori ẹni ti a ba gbekọ sori igi wa labẹ egun Ọlọrun. O ko gbọdọ ba ilẹ ti Oluwa Ọlọrun rẹ fun ọ gẹgẹ bi ogun jẹ.” (Ditarónómì 21:23) Ṣe o ri bayi? Nigba ti a kan Jesu mọ ori igi, ara nkan ti o ṣẹlẹ si ni pe o di egun fun gbogbo awọn Juu ti o wa ni abẹ egun ofin Mose. Eyi si ni o jẹ ki o ṣeeṣe fun Ọlọrun lati tu ibukun Ẹmi mimọ rẹ lẹyin iku, ajinde ati igbasoke rẹ sori awọn ti o gbagbọ, akọkọ awọn Juu ati lẹyin eyi awọn Keferi.

Nkan ti a n sọ ni pe, niwọn igba ti Ọlọrun ko i ti mu egun ofin Mose kuro lori awọn ọmọ Isiraẹli, ko le tipasẹ wọn bukun fun ẹnikẹni laye yi. Ṣugbọn ni kete ti O mu egun yi kuro nipa iku Jesu lori igi agbelebu, a ri wipe O tu Ẹmi mimọ rẹ sori awọn Juu ti o jẹ ọmọlẹyin Jesu. Lati igba naa lọ si ni o ti bẹrẹ si ni ti ipasẹ wọn bukun fun awọn Keferi ti o ba gbọgbọ nipa fifun wọn ni ẹbun ọfẹ Ẹmi mimọ rẹ lati tun wọn da ati lati ma gbe inu wọn titi lailai. Gbogbo awọn ti o si wa tipasẹ eyi di alabukunfun naa ni o wa ni ipo ẹni ti Ọlọrun le lo lati bukun fun awọn yowu ti o ba wa ni ayika wọn ti wọn ba gbagbọ.

Niwọn igba ti eyi si ri bẹ, ko wa yẹ ki a ri Kirisitiẹni kankan, yala Juu ni tabi Keferi, ti yoo tun mura tan lati fi ara rẹ si abẹ egun ofin Mose. Amọ o ṣeni laanu pe ailoye nkan wọnyi ti jẹ ki ọpọ fi ara wọn si abẹ egun ti Ọlọrun ko fi wọn si, ti wọn si wa fi aye silẹ fun Satani lati ma pọn wọn loju ati lati jẹ ki o ṣoro fun wọn lati gbe igbe aye ti o tẹ Ọlọrun lọrun. Boya iwọ na tilẹ wa lara awọn ti o fi ara wọn si abẹ egun ofin Mose nipa fifẹ pa awọn abala ofin yi kan mọ. Aṣiṣẹ nla gba ni eyi jẹ nitori ẹnikẹni ti o ba fẹ ṣe amulo ofin Mose gbọdọ ṣe amulo gbogbo rẹ. Aijẹbẹ, nṣe ni yoo fi ara rẹ si abẹ egun ofin naa, ti ko si ni wulo fun Ọlọrun lati lo lati mu ifẹ rẹ ṣẹ ninu aye awọn eniyan. Nitorina, yọ ara rẹ kuro labẹ egun ti Ọlọrun ko fi ọ si, ki o si jẹ ki igbagbọ rẹ ninu Jesu ati iku, ajinde ati igbasoke rẹ to fun ọ.

Ọ̀RỌ̀ ÌPARÍ
Igbagbọ ninu Ọlọrun ati ọrọ rẹ nikan ni o le sọ wa di ẹni igbala ati idalare niwaju rẹ. Ọna ti Aburahamu gba di ẹni idalare ni eyi. Ọna yi kanna si ni gbogbo awọn ti o ba gbagbọ ninu Ọlọrun ati ninu ọmọ rẹ Jesu Kirisiti, ẹni ti o ku fun ẹṣẹ wa, yoo ṣe gba di ẹni igbala ati idalare, gẹgẹ bi Aburahamu. Kirisitiẹni ti o ba wa kọ ọna yi silẹ lati tẹlẹ ofin Mose n fi ara rẹ si abẹ egun ofin yi ni, egun ti Jesu ti ku lati mu kuro lori awọn Juu ti a gbe ofin yi le lọwọ. O si di dandan ki iru ẹnibẹ ṣubu kuro ninu oore-ọfẹ Ọlọrun, ki o si di iṣẹ Ẹmi mimọ ninu ati lori aye rẹ lati sọ di ẹni ti Ọlọrun fẹ ki o jẹ lọwọ.

ÌBÉÈRÈ

• Bawo ni ẹkọ yi ṣe wulo si fun awọn ọmọ Ọlọrun loni ti oye iha ti o yẹ ki wọn kọ si ofin Mose ko ye?

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

ALAYTHIA BIBLE CHURCH (ÌJỌ ÒTÍTỌ́ BÍBÉLÌ) ÀLÀKALẸ̀ Ẹ̀KỌ́ BÍBÉLÌ ÀTI ÀLÀYÉ ỌJỌ́RÚ 28, ÒWEWÉ 2022 ÀKỌ́RÍ: Ẹ̀KỌ́ NÍNÚ ÌWÉ GÀLÁTÍÀ

ÀYỌKÀ: GÀLÁTÍÀ 2:1-10

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ Ninu ẹkọ ti a kọ kẹyin ninu lẹta Pọọlu si awọn ara Galatia, a ri awọn nkan ti a le pe ni ẹri igbala apọsiteli yi. Gẹgẹ bi o ti ṣe fi ye wa, oun tikararẹ ti fi igbakanri gbogun ti awọn ọmọ Ọlọrun ati iyinrere Jesu nitori itara rẹ fun ẹsin awọn Juu ati ofin Mose. Ti oun yi kanna, ti o ti kọkọ fi gbogbo okun ati agbara gbiyanju lati pa iyinrere Jesu run, ba wa n lọ kaakiri lati polongo iyinrere ti o ti fi igbakanri tiraka lati parun, o yẹ ki a mọ pe o gbọdọ ni idi. Idi naa si ni pe o ti ba Jesu pade, o si ti di ẹni igbala. Iyinrere ti Jesu si wa gbe le lọwọ ni o n waasu kaakiri ibi gbogbo ti o ba lọ. Iyinrere yi naa ni o waasu si awọn ara Galatia ti wọn fi di ẹni igbala. Ṣugbọn, bi o ti jẹ ki o ye wa ninu lẹta rẹ yi si wọn, awọn Juu kan ti wa sọdọ wọn, wọn si ti bu ẹnu atẹ lu iyinrere otitọ ti wọn tẹwọgba, ti o si sọ wọn di ẹni igbala ati olododo niwaju Ọlọrun. Awọn yi n jẹ ki o ye wọn pe ayafi ti wọn ba pa awọn abala ofin Mose kan mọ, paapaa julọ eyi ti o n sọrọ nipa ikọla abẹ, wọn ko ni di ẹni igbala, bi o tilẹ jẹ wipe wọn ti gba Jesu gbọ. Eyi ni o fa ti Pọọlu fi kọ lẹta yi si wọn, ki o ba le pe wọn pada sọdọ Jesu, ẹni ti o gba wọn la.

ÌFÌDÍMÚLẸ̀ ÌYÌNRERE ÒTÍTỌ́ Ki Pọọlu ba wa le fi idi otitọ iyinrere ti o n waasu mulẹ fun awọn ara Galatia yi, o tẹsiwaju ninu lẹta yi lati jẹ ki wọn mọ lara awọn igbesẹ ti o ti gbe sẹyin lori rẹ. Irufẹ igbesẹ wo ni o gbe? O fi akoko kan ṣe ipade pẹlu awọn ti o ti jẹ apọsiteli ṣiwaju rẹ, ti wọn si jẹ opomulero laarin awọn apọsiteli yoku lati fi iyinrere ti o n waasu laarin awọn Keferi han wọn. Ki wa ni idi ti o fi ṣe eyi? Ṣe ẹru n ba pe iyinrere ti o n waasu ko dangajia to ni, ti o si nilo alaye ti o peye si i lati ọdọ wọn? A bi ṣe o fẹ oriyin lati ọdọ wọn ni? Bi o ti ṣe fi han wa ninu lẹta yi, ko ki i ṣe nitori pe ẹru n ba tabi nitori ki wọn ba le gbe oriyin fun ni o ṣe tẹ́ koko iyinrere ti o n waasu siwaju wọn. Idi mẹta pataki ni o ṣe ṣe eyi, bi a ti ri ninu awọn ọrọ wọnyi:

“Lẹyin ọdun mẹrinla, nigba naa ni mo tun lọ si ilu Jerusalẹmu pẹlu Banaba, mo si mu Titu lọ pẹlu mi. Mo si lọ nitori ohun ti Ọlọrun fi han mi, mo si fi iyinrere naa ti mo n waasu laarin awọn Keferi ye awọn ti o jẹ ẹni nla ninu wọn, ẹyiini ni ikọkọ, ki emi ma baa sare, tabi ki o ma baa jẹ pe mo ti sare lasan. Ṣugbọn a ko fi agbara mu Titu ti o wa pẹlu mi, ẹni ti i ṣe ara Heleni, lati kọla: Ati nitori awọn eke arakunrin ti wọn yọ wọ aarin wa gẹgẹ bi amí lati mọ eredi ominira eyi ti a ni ninu Kirisiti Jesu, ki wọn ki o le mu wa wa sinu ide ilana ẹsin Juu. Awọn ẹni ti a ko fun ni anfaani lati gbọ ọrọ wọn fun iṣẹju kan; ki ẹyin o le maa tẹ siwaju ninu otitọ iyinrere naa. Ṣugbọn ni ti awọn ti wọn dabi ẹni-nla, ohunkohun ti o wu ki wọn jẹ, ko jẹ nnkan kan fun mi: Ọlọrun kii ṣe ojusaaju ẹnikẹni: ani awọn ti o dabi ẹni-nla naa, ko kọ mi ni nkankan.” (Gàlátíà 2:1-6)

Pẹlu akọsilẹ Pọọlu yi, a ri pe idi akọkọ ti o ṣe lọ ṣe ipade ikọkọ pẹlu awọn ti o jẹ bi opomulero laarin awọn ti o jẹ apọsiteli saaju rẹ ni pe Ọlọrun kọ si lati ṣe bẹẹ. O sọ wipe oun lọ ni ibamu pẹlu ifihan ti Ọlọrun fun oun. Ki wa lo le fa a ti Ọlọrun fi sọ fun apọsiteli yi lati la ṣe ipade pẹlu awọn apọsiteli Oluwa miran, ki o si tẹ iyinrere ti o n waasu kaakiri kalẹ fun wọn lati ṣe agbeyẹwo rẹ? Nkan kan ti o le fa ni pe Ọlọrun fẹ ki wọn wa ni iṣọkan; Ọlọrun fẹ ki gbogbo wọn ri ara wọn gẹgẹ bi ọkan ninu Kirisiti. Niwọn igba ti o jẹ wipe Jesu Kirisiti kan naa ni wọn jọ gbagbọ fun igbala ẹmi wọn, ti o si tun jẹ wipe iyinrere rẹ kan naa ni wọn dijọ n polongo, ko si nkan naa ti o ni ki wọn ma wa ni irẹpọ.

Yatọ si eyi, ko si iyapa ninu Kirisiti. Ara kan naa ni gbogbo awọn ti o gbagbọ ninu rẹ. Nitori naa, bi awa ti a gbagbọ ninu rẹ ko tilẹ si ni ilu kan naa tabi ki a dijọ ma jọsin papọ, eyi ko tunmọ si pe iyapa wa laarin wa tabi pe a ko ki i ṣe ara kan naa mọ. A wa gbọdọ jẹ ki eyi ki o ye wa daradara, ki a si ma sọ ara wa di ọta awọn ọmọ Ọlọrun miran nitori pe wọn ko jọsin pẹlu wa tabi nitori pe wọn ko tẹle awọn adari kan ti awa n tẹle. (Wo: 1Kọrinnti 3 & 12)

Idi keji ti Pọọlu tun ṣe lọ ni wipe oun funrarẹ fẹ ri aridaju pe iyinrere ti o n waasu kaakiri ko yatọ tabi lodi si eyi ti awọn ti o ti di apọsiteli Oluwa ṣaaju rẹ n waasu. Bi o ti ṣe fi ye wa ninu abala lẹta yi ti a n gbe yẹwo ati eyi ti a ti gbe yẹwo sẹyin, ko si ẹnikẹni ti o kọ ni iyinrere ti o n waasu; Jesu funrarẹ ni O fun ni ifihan iyinrere yi, ti O si tun kọ ọ ni awọn nkan ti o n ṣe, ti o si n sọ. Nitorina, o mọ daju-ṣaka pe iyinrere otitọ ni o n waasu. Amọ ẹru tun n ba ni ọna kan pe ti awọn ti o jẹ apọsiteli ṣaaju rẹ ba ti lọ pa iyinrere ti Jesu gbe le wọn lọwọ ti ṣegbẹ kan, ti wọn si n waasu adamọdi iyinrere rẹ, o ṣeeṣe ki laala rẹ laarin awọn Keferi ja si asan. Idi si ni wipe yoo rọrun fun awọn eniyan lati gba awọn ti o jẹ apọsiteli Oluwa saaju rẹ gbọ ju lọ. Eyi si le jẹ ki gbogbo iṣẹ ti o ti ṣe silẹ parun, bi o tilẹ jẹ wipe o ṣe awọn iṣẹ yi lori otitọ Jesu. Nibakan naa, o yẹ ki awa na kọbiara si ohunkohun ti o le pa iṣẹ iranṣẹ wa lara, ki a si mojuto. Aijẹbẹ, o ṣeeṣe ki a ṣe laala lasan ninu ijọba Ọlọrun, bi o tilẹ jẹ wipe ori ododo ni iṣẹ ti a n ṣe da le.

Idi kẹta ti Pọọlu ṣe tun ṣe ipade pẹlu awọn apọsiteli yi ni lati fi opin si gbogbo awuyewuye awọn Juu ti wọn n lọ sọdọ awọn Keferi ti o gba Jesu gbọ, ti wọn si n gbiyanju lati fi wọn si abẹ ide ilana ẹsin awọn Juu (Iṣe Apọsiteli 15:1-34). Nkan ti o wa lọkan rẹ si ni pe ki o fi idi rẹ mulẹ pe awọn apọsiteli Jesu yoku ko lọwọ si fifi awọn Keferi ti o gbagbọ si abẹ ilana ẹsin awọn Juu, bi o tilẹ jẹ wipe Juu ni awọn naa. Niwọn igba ti o ba si ti fi idi eyi mulẹ, awọn Keferi ti o gbagbọ yoo le mu iduro wọn ninu Jesu ṣinṣin, wọn ko si ni gba ibọde awọn Juu yi ti o n tiraka lati sọ iyinrere Jesu di alailagbara. Eyi si jẹ ki o ye wa pe iduro-ṣinṣin awọn ti o gbagbọ ninu Jesu jẹ Pọọlu logun gidigidi. Idi si ni yi ti ko fi fi akoko kankan fi aye gba awọn ti o gbiyanju lati fi ẹnu tẹnbẹlu tito Jesu fun igbala awọn eniyan ati fun itẹwọgba wa niwaju Ọlọrun.

Wayi o, bawo wa ni ipade Pọọlu pẹlu awọn apọsiteli ti o pade yi ṣe lọ? Didun ni ọsan ipade naa so, gẹgẹ bi akọsilẹ rẹ. Akọkọ, o jẹ ki o ye wa pe bi o tilẹ jẹ wipe oun mu Titu lọwọ, ẹni ti o jẹ Keferi ti o gbagbọ, awọn apọsiteli yi, Jemiisi, Peteru ati Johanu, ko fi tipa-tipa mu un lati kọ ila abẹ. Eyi si n fi han pe awọn kọ ni o ran awọn Juu ti o n lọ kaakiri lati sọ wipe awọn Keferi ti o gbagbọ gbọdọ kọ ila abẹ, ni ibamu pẹlu ofin Mose, ki wọn to di ẹni igbala.

Siwaju si, o tun sọ eyi nipa ipade naa: “Ṣugbọn kaka bẹẹ, nigba ti wọn rii pe Ọlọrun ti fi iṣẹ iyinrere ti awọn alaikọla le mi lọwọ, bi a ti fi iṣẹ iyinrere ti awọn ikọla le Peteru lọwọ. Nitori Ọlọrun, ẹni ti o ṣiṣẹ ninu iṣẹ iranṣẹ Peteru gẹgẹ bi Apọsiteli si awọn Juu, oun kan naa ni o ṣiṣẹ ninu iṣẹ iranṣẹ mi gẹgẹ bi Apọsiteli si awọn alaikọla. Jakọbu, Peteru ati Johanu, awọn ẹni ti o dabi ọwọn, fun emi ati Banaba ni ọwọ ọtun idapọ nigba ti wọn ri oore-ọfẹ ti a fi fun mi, wọn si gba pe ki awa naa tọ awọn alaikọla lọ, nigba ti awọn naa lọ sọdọ awọn Juu. Ohun gbogbo ti wọn beere fun ni wi pe ki a maa ranti awọn talaka, ohun kan naa gan-an ti mo n lakaka lati ṣe.” (Galatia 2:7-10)

Pẹlu nkan ti o sọ yi, daju-ṣaka ni pe awọn apọsiteli yi ti Pọọlu pẹlu Banaba ba ṣe ipade tẹwọgba wọn tọwọ-tẹsẹ. Nigba ti wọn gbọ iyinrere ti Pọọlu waasu, wọn ri wipe ko yatọ rara si nkan ti Jesu gbe le wọn lọwọ. O tilẹ gbọdọ ya wọn lẹnu pe ọkunrin yi ti ko wa pẹlu wọn nigba ti Jesu wa ninu aye yi mọ gbogbo nkan ti awọn mọ, titi kan nkan ti o ṣẹlẹ ni alẹ ọjọ ti a mu Jesu, ti a si kan mọ agbelebu. Ni kukuru, wọn fi tayọtayọ gba Pọọlu gẹgẹ bi apọsiteli Oluwa ti a ran si awọn Keferi. Wọn si gba oun ati Banaba ni iyanju lati tẹramọṣẹ ati lati maa ranti awọn alaini ni ibi gbogbo ti wọn ba lọ.

Nitorina, iyinrere Pọọlu ko yatọ rara si iyinrere awọn apọsiteli Jesu yoku. Peteru tilẹ sọ eyi lati kin ọrọ Pọọlu lẹyin ninu lẹta rẹ keji, ori ikẹta, lati ẹsẹ ikarundinlogun: “Ki ẹ si maa ka a si pe, suuru Oluwa wa igbala ni; bi Pọọlu pẹlu arakunrin wa olufẹ, ti kọwe si yin gẹgẹ bi ọgbọn ti a fi fun un. Bi o ti n sọrọ nnkan wọnyi pẹlu ninu iwe rẹ gbogbo ninu eyi ti ohun miiran ṣoro lati ye ni gbe wa, eyi ti awọn ope ati awọn alaiduro nibikan ń lọ́, bi wọn ti n lọ iwe-mimọ iyoku , si iparun ara wọn.” (2Peteru 3:15-16)

Njẹ o ri bayi pe awọn apọsiteli yoku gba Pọọlu gẹgẹ bi apọsiteli otitọ, wọn si tun gba ọrọ rẹ gẹgẹ bi otitọ ọrọ Ọlọrun. Ti a ba ri ẹnikẹni loni, bi a ti ri ni igba aye Pọọlu, ti o sọ pe ti Pọọlu bawo, a jẹ wipe ope ni ẹni naa, gẹgẹ bi ọrọ Peteru. O ṣi wa ṣeni laanu pe a ri irufẹ awọn wọnyi kaakiri inu awọn ijọ wa loni, ti wọn ro wipe ọrọ Pọọlu tako ọrọ Jesu ati ọrọ awọn apọsiteli yoku. Eṣu ni o si n ya awọn wọnyi lo lati di iyinrere Jesu lọwọ ati lati fi awọn ọmọ Ọlọrun si abẹ igbekun ẹsin awọn Juu ati awọn nkan miran ti o fara pẹ ẹ. A ko wa gbọdọ fi aye gba wọn lati fiwa tabi lati fi awọn ọmọ Ọlọrun miran ti a jọ n ṣepọ sinu ide wọn.

ỌRỌ IPARI Pọọlu tiraka, ni ibamu pẹlu ifẹ Ọlọrun, lati fi idi rẹ mulẹ nigba ti o wa laye pe oun ati awọn apọsiteli Jesu yoku ko tako ara wọn lọna kankan lori iyinrere Jesu ati igbagbọ ninu rẹ. Awa naa wa gbọdọ ri daju pe igbagbọ wa, iwaasu wa ati iṣẹ iṣin wa, bi o ti wu ki o dawa loju to, ko tako tabi yatọ si nkan ti awọn apọsiteli yi gbe kalẹ fun wa lọna kankan. Aijẹbẹ, a ti rin jin na si Jesu. Ti a ko ba si ṣọra, ki a si pada ni kiakia sọdọ rẹ, ere ije igbagbọ wa di dandan ki o ja si asán.

IBEERE – Bawo ni o ṣe ṣe pataki si fun wa lati ri daju pe igbagbọ wa ninu Kirisiti ati iṣẹ isin wa ninu rẹ wa ni ibamu pẹlu alakalẹ awọn apọsiteli rẹ ti o ti kọja lọ?

Láti ọwọ́ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

DOWNLOAD THE PDF FILE HERE

ÀKỌ́SÓRÍ: “Emi ko sọ oore-ọfẹ Ọlọrun di asan: nitori pe, bi a ba ti ipasẹ ofin sọ eniyan di olododo, njẹ iku Kirisiti jẹ asan.” (Galatia 2:21)

Ọ̀RỌ̀ ÀKỌ́SỌ
Ninu ẹkọ ti a kọ kọja lọ ninu iwe Galatia, a ri wipe lẹta ibawi ni lẹta yi ti Pọọlu kọ si awọn ara Galatia jẹ. Ki ni o si fa? Nkan ti o fa naa ni wipe ko pẹ si igba ti apọsiteli yi kuro ni ọdọ awọn ara Galatia yi ti wọn fi pa iyinrere ti o mu tọ wọn wa, ti wọn si gbagbọ, ti si ẹgbẹ kan, ti wọn si wa dirọ mọ iyinrere miran ti ko ki i ṣe iyinrere rara. Ki si ni iyinrere ti wọn dirọ mọ yi da le lori? Bi a o ti ṣe ri ninu lẹta yi, o da leri pipa awọn abala ofin Mose kan mọ, paapaa julọ eyi ti o ni ṣe pẹlu kikọ ilá abẹ́. Pọọlu wa n jẹ ki o ye wọn pe kikọ iyinrere Jesu Kirisiti ti a mu tọ wọn wa silẹ ko yatọ si kikọ Jesu Kirisiti Oluwa wa funrarẹ silẹ ati wipe egbe ni fun ẹnikẹni ti o ba wa nidi ki a ma polongo iyinrere miran ti o yatọ si eyi ti o fi Jesu han bi ẹnikan ṣoṣo ti Ọlọfun fa kalẹ fun igbala ati iṣelogo awọn ọmọ eniyan.

ẸRI IGBALA PỌỌLU
Ninu ẹkọ eyi ti a wa mu yi, ẹwẹ, Pọọlu jẹ ki o ye awọn ara Galatia ti o kọ iwe yi si irufẹ iyinrere ti o n tan kalẹ ni ibi gbogbo ti o n lọ ati ọna ti o gba gba iyinrere yi. O tun jẹ ẹri ranpẹ lori igbala rẹ ati iha ti awọn ti o mọ ọn tabi gbọ nipa rẹ ki o to di ẹni igbala kọ si iṣẹlẹ igbala rẹ ati awọn igbesẹ ti o bẹrẹ si ni gbe lẹyin ti o di ẹni igbala. Iwọ naa wo awọn nkan ti o sọ:

“Ṣugbọn, ara, mo fẹ ki ẹ mọ pe iyinrere ti mo ti waasu kii ṣe nipa ti eniyan. Nitori kii ṣe lọwọ eniyan ni mo ti gba a, bẹẹ ni a ko fi kọ mi, ṣugbọn nipa ifihan Jesu Kirisiti. Nitori ẹyin ti gburo igbe-aye mi ti atijọ, nigba naa ti mo n tẹle ẹsin awọn Juu, bi mo ti ṣe inunibini si ijọ eniyan Ọlọrun re kọja ala, ti mo si ba a jẹ. Mo si ta ọpọlọpọ awọn ojugba mi yọ ninu ẹsin awọn Juu laarin awọn ara ilu mi bakan naa, mo ni itara ọpọlọpọ si ofin atọwọdọwọ awọn Baba mi. Ṣugbọn nigba ti o wu Ọlọrun, ẹni ti o ya mi sọtọ lati inu iya mi wa, ti o si pe mi nipa oore-ọfẹ rẹ, Lati fi ọmọ rẹ han nipasẹ mi ki emi le maa waasu rẹ laarin awọn Keferi loju kan naa emi ko ba ara ati ẹjẹ gbimọ pọ. Bẹẹ ni emi ko goke lọ si Jerusalẹmu tọ awọn ti ṣe Apọsiteli ṣaaju mi; ṣugbọn mo lọ si Arebia, mo si tun pada wa si Damasiku. Lẹyin ọdun mẹta, mo lọ si ilu Jerusalẹmu lati lọ ki Peteru, mo si gbe ọdọ rẹ fun ọjọ mẹẹdogun. Ṣugbọn emi ko ri awọn Apọsiteli miiran, bi ko ṣe Jemisi arakunrin Oluwa. Otitọ ni awọn ohun ti mo n kọ si yin wọnyi, kiyesi i, Niwaju Ọlọrun emi ko ṣeke. Lẹyin naa ni mo si lọ si ẹkun Siria ati ti Siliṣia; Awọn ijọ ti o wa ninu Kirisiti ni Judia ko si mọ oju mi: Kiki ohun wọn-ọn-ni ti awọn eniyan n sọ ni wọn ti gbọ wi pe Ẹni ti o ti n ṣe inunibini si wa ri, ti n waasu igbagbọ naa nisinsinyi ti oun n bajẹ nigba kan ri. Wọn si yin Ọlọrun logo nitori mi.” (Galatia 1:11-24)

Pẹlu awọn nkan ti Pọọlu sọ silẹ yi, akọkọ, a ri dimu pe ẹnikẹni ko kọ tabi ṣalaye iyinrere ti o n waasu fun. Jesu Oluwa wa funrarẹ ni O fi awọn nkan wọnyi han an, ti O si fi oye wọn ye e. Ara idi niyi ti o fi sọ wipe lẹyin igba ti oun gbagbọ tan, oun ko lọ ba ọkankan lara awọn ti o jẹ apọsiteli ṣaaju rẹ. Dipo eyi, nṣe ni o gba Arebia lọ. Lẹyin ọdun melokan si lo to ṣẹ ẹ lọ ki Peteru ati Jemisi, arakunrin Jesu Oluwa.

Nitorinaa, awọn ti o ti jẹ apọsiteli ṣaaju Pọọlu kọ ni o kọ ni iyinree ti o n tan kalẹ. Awọn kọ ni wọn ṣe alaye igbagbọ, ireti ati ifẹ ninu Jesu fun. Awọn kọ ni wọn kọ ni bi a ti ṣe le di olododo, ki a si tun ma gbe igbe aye olododo. Awọn kọ ni wọn ṣalaye fun nipa iku, ajinde ati igbasoke Jesu. Awọn kọ ni wọn kọ nipa ipadabọ Jesu ati igbasoke awọn ayanfẹ rẹ. Bẹẹ si ni awọn kọ ni wọn ṣalaye fun nipa ounjẹ alẹ Oluwa ati awọn nkan ti o ṣẹlẹ lalẹ ọjọ ti a kọkọ jẹ ounjẹ yi. A si ri pe o mọ gbogbo awọn nkan wọnyi daju, o si tọka si wọn ninu awọn lẹta rẹ si ijọ Ọlọrun. Bawo lo ṣe wa mọ wọn? Nipasẹ ifihan Jesu Kirisiti ni! (Wo: 1Kọrinnti 15:3-7; 2Kọrinnti 12:1-4)

Ṣe nkan ti Jesu wa fi han apọsiteli yi, ti O si tun kọ lodi tabi yatọ si awọn nkan ti O ti kọ ati fi han awọn aṣiwaju rẹ ninu igbagbọ? Rara o! Nitorina, ẹnikẹni ti o ba n sọ wipe a fi awọn nkankan han oun nipa igbagbọ ninu Jesu tabi lori iyinrere rẹ gbọdọ ri daju pe ohun ti a fi han wa ni ibamu pẹlu awọn nkan ti Jesu fa le awọn aṣiwaju wa ninu igbagbọ lọwọ. Aijẹbẹ, irọ pata-porongodo ni ohun yowu ti a fi han an.

Nkan keji ti Pọọlu tun mẹnuba ninu awọn ẹsẹ lẹta rẹ yi, bi mo ti ṣe sọ tẹlẹ, ni ẹri igbala rẹ. Ki si ni idi? O fẹ ki o ye awọn ara Galatia ti o kọ iwe yi si pe ohun funra oun ti kọkọ gbe ẹsin awọn Juu ka ori nigbakan ri, ti oun si tayọ gidigidi ninu rẹ ju awọn ti o jẹ akagbẹ rẹ lọ. Yatọ si eyi, o tun ti ṣe inunibini awọn ọmọ Ọlọrun ti o gbagbọ ninu Jesu ri, ti o si mura tan lati pa igbagbọ ninu Jesu run.

Ki lo wa fa ti o fi pa gbogbo nkan wọnyi ti, ti o si bẹrẹ si ni waasu ni ijẹri nkan ti o ti fẹ parun tẹlẹ? Ifarahan Jesu Kirisiti si ni o fa. Jesu, ni ọjọ kan ti ọkunrin yi n lọ si Damasiku lati tun lọ ti awọn ọmọ Ọlọrun ti o wa nibẹ mọle, fi ara rẹ han lati jẹ ki o mọ wipe igbe aye ti a ya a sọtọ lati inu iya rẹ wa lati gbe kọ ni o n gbe. A ya a sọtọ lati inu iya rẹ ki o ba le fi Jesu han si gbogbo araye gẹgẹ bi ọmọ Ọlọrun, iyẹn ninu ọrọ, ninu iwa ati ninu iṣe rẹ. Eyi si lo fa ti oun naa fi bẹrẹ si ni fi gbogbo okun ati agbara rẹ jẹ ki awọn eniyan mọ pe ko si igbala ninu ẹlomiran, ayafi ninu Jesu. Nṣe si ni inu gbogbo awọn ti o mọ tẹlẹ, ti wọn si gbọ si ọrọ yi bẹrẹ si ni dun, ti wọn si n gbe orukọ Ọlọrun ga lati ara rẹ. (Wo: Iṣe Apọsiteli 9:1-30, 22:1-21; 26:1-32)

Njẹ awọn ti o mọ awa naa tẹlẹ tilẹ ni idi loni lati ma gbe orukọ Ọlọrun ga nipasẹ wa bi? Njẹ wọn tilẹ le sọ daju-ṣaka pe iyatọ wa gedegbe laarin igbe aye ti a n gbe ki a to di atunbi ati igbe aye ti a n gbe nisinsinyi ti a sọ wipe a ti di atunbi? Awọn eniyan n fi ogo fun Ọlọrun nitori aye tuntun ti Pọọlu n gbe lẹyin ti o ti di atunbi. Ti ko ba wa si ẹni ti o n fi ogo fun Ọlọrun lori aye wa, nṣe ni o yẹ ki a yẹ ara wa wo.

Wayi o, ti Pọọlu ba wa n jẹ ki o ye awọn eniyan pe Jesu ti to fun igbala wọn ati wipe wọn ko nilo lati pa ohunkohun ninu ofin Mose mọ ki wọn to di ẹni itẹwọgba niwaju Ọlọrun, o mọ nkan ti o n sọ. Ko sọ eyi nitori pe ko ni imọ rara tabi imọ to ninu ofin Mose. O ni imọ ti o jinlẹ ninu ofin Mose. O tilẹ ti fi igba kan jẹ ọkan lara awọn Farisi ri (Iṣe Apọsiteli 23:6-8; Filipi 3:5). Ṣugbọn Ọlọrun ti jẹ ki o ni oye ti o jinlẹ ninu ọmọ rẹ Jesu Kirisiti. Idi si ni yi ti o fi n lo gbogbo itara lati jẹ ki o ye awọn eniyan, paapaa julọ awọn Juu pe wọn ko nilo lati pa abala ofin Mose kankan ma lati di ẹni igbala ati ẹni itẹwọgba niwaju Ọlọrun. Jesu Kirisiti ati iṣẹ ti Ọlọrun ran wa ṣe ti to fun wọn.

O wa ṣeni laanu pe awọn ara Galatia, ni akoko ti a kọ lẹta yi si wọn, ko ni oye awọn nkan wọnyi. Nitorina, wọn ti gbe igbagbọ ninu Jesu gẹgẹ bi ọna lati jẹ ẹni itẹwọgba niwaju Ọlọrun ju si ẹgbẹ kan, wọn si ti bẹrẹ si ni tẹle ofin Mose ati awọn ilana ti o wa ninu rẹ. Pọọlu wa nilo lati mu wọn pada wa sinu otitọ pẹlu lẹta yi, ki wọn ma ba di ẹni itanu ni ikẹyinkẹyin.

Ọ̀RỌ̀ ÌPARÍ
Bi o ti ṣe ri pẹlu awọn ara Galatia ni akoko ti Pọọlu kọ lẹta si wọn naa ni o ti ṣe ri pẹlu ọpọ ijọ Ọlọrun loni. Awọn naa ti gbe igbagbọ ninu Jesu gẹgẹ bi ọna lati di ẹni igbala ati ẹni itẹwọgba niwaju Ọlọrun ju sẹgbẹ kan, wọn si ti dirọ mọ ofin Mose. Nkan ti ko si ye wọn ni pe ti ofin Mose ba le fun awọn eniyan ni igbala pipe, ki o si sọ wọn di ẹni itẹwọgba niwaju Ọlọrun, iwasaye Jesu, iku rẹ ati ajinde rẹ ko ni itunmọ niyẹn. Amọ awọn nkan yi ni itumọ ti o ga, ti a si gbọdọ dirọmọ. Aijẹbẹ, bi awọn ara Galati ṣe tipasẹ ailoye otitọ ọrọ Ọlọrun kẹyin si Jesu naa ni awa naa yoo ṣe kẹyin si, bi o tilẹ jẹ wipe a n ṣe oniruuru nkan ni orukọ rẹ. Boya a tilẹ ti kọ ẹyin si?

IBEERE

• Bawo ni ijẹri igbala awọn ọmọ Ọlọrun ṣe wulo si?
• Ki ni o ṣe pataki julọ si ọ ninu ẹkọ yi?

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)