Eko Bibeli

Ẹ̀KỌ́ NÍNÚ ÌWÉ TẸSALÓNÍKÀ KÍNNÍ

AYỌKA: 1TẸSALÓNÍKÀ 5:12-13

ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ

Lẹta akọkọ Pọọlu si awọn ara Tẹsalonika jẹ eyi ti a kọ lati fun ijọ wọn ni oriya ni gbigbe igbe aye Kirisitiẹni ati ni mimura silẹ de Jesu Kirisiti Oluwa wa. Bi a ti ṣe ri ninu ọrọ akọsọ rẹ, ijọ awọn ara Tẹsalonika jẹ awokọṣe rere fun gbogbo awọn ijọ Ọlọrun ti o wa ni ayika wọn ati awọn ti wọn n gburo wọn. Ki si ni idi? Idi ni wipe igbagbọ wọn, ifẹ wọn ati ireti wọn ninu Kirisiti jẹ alaiṣẹtan ati eyi ti o munadoko. Awọn ijọ Tẹsalonika ko ki i ṣe kòṣeku-kòṣẹyẹ, kògbóná-kòtutù. Nṣe ni wọn duro ṣinṣin ninu Jesu lati igba ti wọn ti yipada kuro ninu ibọriṣa lati ma sin Ọlọrun ati lati ma fojusọna fun ijọba ayeraye rẹ. Nitorina, Pọọlu ko kọ lẹta yi si wọn lati ba wọn wi ṣugbọn lati gba wọn niyanju lati tẹramọ igbe aye ti o wu Ọlọrun ti wọn n gbe ati lati ma fi ojoojumọ ṣọna ati wa ni aisun de Jesu Oluwa wa, ẹni ti O n bọ lati gba wa la.

ÌHÀ TÍ Ó TỌ́ SÍ ÀWỌN ADARÍ ÌJỌ

Wayi o, ki Pọọlu to wa pari lẹta yi, o tun gbiyanju lati ba awọn ara ijọ Tẹsalonika sọrọ lori iha ti o yẹ ki wọn kọ si awọn ti o jẹ adari laarin wọn, iyẹn awọn bi pasitọ ati olukọ, wolii, ajinhinrere, diakoni ati bẹẹ bẹẹ lọ ni arin wọn. Wo nkan ti o sọ: “Ṣugbọn awa n bẹ yin, ara, lati maa mọ awọn ti n ṣe laalaa laarin yin, ti wọn n si n ṣe olori yin ninu Oluwa, ti wọn si n kilọ fun yin; Ki ẹ si maa bu ọla fun wọn gidigidi ninu ifẹ, nitori iṣẹ wọn. Ẹ si maa wa ni alaafia laarin ara yin.” (1Tẹsalonika 5:12-13)

Ki ni awọn aradimu ninu ọrọ ti apọsiteli yi sọ silẹ yi? Akọkọ ni pe a gbọdọ da awọn adari ijọ wa mọ gẹgẹ bi adari wa. Eyi tunmọ si pe ni kete ti a ba n darapọ mọ ijọ Ọlọrun yowu ti a ba darapọ mọ ni a gbọdọ ṣe iwadi lati mọ awọn ti o jẹ adari ni ibẹ. O tunmọ si pe bi ẹnikẹni ba ṣe n darapọ mọ ijọ wa, yala lati ilu ti a wa ni tabi lati agbegbe miran tabi nipasẹ didi atunbi, ojuṣe awa ti a ba kọkọ gba wọn wọle ni lati jẹ ki wọn mọ awọn ti o jẹ adari ni aarin wa, ti wọn n fi ọrọ Ọlọrun bọ wa, ti wọn n gbadura fun wa, ti wọn si n tọ wa sọna ki a ba le jẹ ohun gbogbo ti Ọlọrun fẹ ki a jẹ, ki a si wa ni yiyẹ lati wa pẹlu rẹ ninu ijọba ayeraye rẹ. Ki wa ni idi ti o fi yẹ ki a da awọn adari ijọ wa mọ? Idi naa ni ki a le ba kọ iha ti o tọ si wọn. Gẹgẹ bi a ti ṣe ri ninu bibeli, Ọlọrun ko ki i fẹ ki ẹnikẹni fi awọn ojiṣẹ rẹ ti O ran lati dari awọn eniyan rẹ ṣere rara tabi ṣe ẹlẹya. Aijẹbẹ, ijiya ti ko ṣe e fẹnusọ le de ba ẹni naa. Fun apẹẹrẹ, a ri bi Miriamu, ẹgbọn Mose, ṣe di adẹtẹ nitoripe o ṣọrọ si pẹlu aibikita. A tun ri bi abo bíà meji ṣe fa awọn ọmọ kekeke mejilelogoji ya pẹrẹpẹrẹ nitori pe wọn fi wolii Eliṣa ṣe ẹlẹya. Ti awọn jagunjagun ọba Iṣiraẹli nkọ, ti ina sọkalẹ lati ọrun, ti o ṣi jo wọn run nitori pe wọn ko ba wolii Elija sọrọ pẹlu ọwọ? (Wo: Númérì 12:1-15; 2Àwọn Ọba 1; Àwọn Ọba 2:23-25) Lotitọ, Ọlọrun ko fẹ ki awọn ojiṣẹ rẹ ṣi aṣẹ ti O fun wọn lori awọn eniyan rẹ lo, aṣẹ ti O fun wọn lati gbe wọn ro dipo lati bi wọn lulẹ (2Kọ́rínntì 10:8&13:10). Ko fẹ ki wọn ma lo aṣẹ yi lati ṣepe, fi ẹnikẹni bu tabi sọ ọrọ odi sinu aye ẹnikẹni. Idi si ni pe eyi lodi si igbe aye ti Jesu pe wa lati gbe ati si ifẹ inu rere Ọlọrun ti O n fi ba awọn ọmọ eniyan lo lati gba wọn la ati lati ri wipe wọn ko parun (Lúùkù 9:51-56). Amọ ṣa o, ti a ko ba kọ bi a ti ṣe n ba awọn ti o jẹ adari wa tabi ojiṣẹ Ọlọrun lo pọ, bi wọn ko tilẹ sọ ọrọ odi si wa, a le ṣi ilẹkun aye wa silẹ fun idajọ Ọlọrun ti a ba ri wọn fin tabi ti a ko ba ṣe amojuto wọn bi o ti ṣe tọ.

A ri wipe Ananaya ati iyawo rẹ Safira ku iku ojiji nitori pe wọn pa irọ fun awọn apọsiteli nipa fififunni wọn (Ìṣe Àpọ́sítélì 5:1-11). Ọlọrun nikan lo wa mọ iye awọn ti o ti ku, ti o wa ni idibulẹ aiṣan tabi ti nkan ko lọ deede fun mọ nitori pe wọn n fi ẹtan tabi arekereke ba awọn adari ijọ wọn lo pọ. A tun ri wipe Ọlọrun sọ fun awọn eniyan rẹ lati ẹnu wolii rẹ, Malaki, wipe ọkan pataki lara idi ti ilẹkun ibukun rẹ ṣe ti mọ wọn, ti awọn ajẹnirun si n jẹ orilẹ-ede wọn run ni wipe wọn n fi ebi pa awọn ojiṣẹ rẹ ati awọn miran pẹlu ti O ti pa aṣẹ fun wọn lati ma tọju pẹlu idamẹwa ati ọrẹ wọn. Ọlọrun tilẹ sọ wipe ole ni gbogbo wọn ati wipe abẹ egun ni wọn wa nitori eyi. (Wo: Málákì 3:6-12)

Wayi o, a mọ daju ṣaka wipe a ko pa awọn aṣẹ ti a pa fun awọn Juu yi fun awọn awa ti a jẹ Kirisitiẹni nipa idamẹwa ati ọrẹ. A si tun mọ wipe a ko si ni abẹ egun kankan nitori iṣẹ irapada Jesu fun wa. Ṣugbọn awa naa le ti ilẹkun igbadun ibukun Ọlọrun mọ ara wa tabi ki a si ilẹkun aye wa silẹ fun awọn ajẹnirun lati jẹ wa run ti a ko ba mu aṣẹ ti Jesu pa fun wa lori titọju awọn ojiṣẹ rẹ si wa lo, bi o ti tọ ati bi o ti yẹ. (Wo: Luuku 10:1-7; 1Kọ́rínntì 9:13-14; Gàlátíà 6:6; Fílípì 4:14-19; 1Timoti 5:17-18)

Ni kukuru, Pọọlu sọ fun awọn ara Tẹsalonika pe o ṣe pataki ki wọn da awọn adari ijọ wọn mọ ki wọn ba le kọ iha ti o tọ si wọn. Irufẹ iha si ni o yẹ fun wọn lati kọ si wọn? Iha ẹni ti a n bu ọla fun gigigidi ni a gbọdọ kọ si wọn. Ki si ni idi? Ṣe nitori pe wọn ṣe pataki niwaju Ọlọrun ju wa lọ ni tabi ṣe nitoripe igbala ti wọn ṣe iyebiye loju Ọlọrun ju ti wa lọ ni? Rara o! Wọn ko ṣe pataki si Ọlọrun ju wa lọ, bẹẹ si ni igbala wọn ko ṣe iyebiye loju rẹ ju ti wa lọ. Amọ, gẹgẹ bi ọrọ Pọọlu, nitori iṣẹ ti Ọlọrun gbe fun wọn lati ṣe laarin wa ati nitori wa, a gbọdọ bu ọla fun wọn gidigidi.

Bawo wa ni ki a ṣe ma bu ọla fun wọn? Ṣe ki a sọ wọn di oriṣa akunlẹbọ laarin wa ni? Rara o! A bi ṣe ki a gbe gbogbo iṣakoso aye wa le wọn lọwọ ni, ki a ma si le da inu ro tabi ṣe ohunkohun tí kò bá jẹ́ wípé wọn sọ pe ki a ṣe e? Rara o! O wa ṣeni laanu pe ọpọ loti ṣi eyi tunmọ, ti wọn si ti sọ awọn adari ijọ wọn di ọriṣa lori aye wọn, ti wọn n bọ wọn, ti wọn si n fi wọn si ipo ti o tọ si Ọlọrun nikan ninu aye wọn. Awọn ti o wa n ṣe eleyi ati awọn ti a n ṣe e si ko le ṣalai ma jẹ iya nkan ti wọn n ṣe lẹkunrẹrẹ, ni ibamu pẹlu idajọ Ọlọrun lori wọn.

Bibu ọla gidigidi fun awọn adari wa ni i ṣe pẹlu ki a kọkọ ma fi gbogbo igba bọwọ fun wọn. Eyi si gbọdọ farahan ninu iru ọrọ ti a o ma sọ si wọn tabi sọ nipa wọn. Ekeji, o ni i ṣe pẹlu ki a tẹriba fun wọn, ki a si ma tẹle ọrọ wọn, niwọn igba ti nkan ti wọn n kọ wa ba ti wa ni ibamu pẹlu ọrọ Ọlọrun. Ko ni itumọ ki a sọ wipe a bọwọ fun eniyan, ki a si ma mu ọrọ rẹ ni pataki. Itanraẹnijẹ lasan ni eyi. Nitorina, ti o ko ba ki i tẹle ọrọ Ọlọrun ti awọn adari rẹ ninu ijọ n ba ọ sọ, a jẹ wipe o ko si lara awọn ti o n bu ọla fun wọn niyẹn. Nṣe ni o n jẹ ki iṣẹ wọn nira si. Eyi ko si le gbe ọ rara. (Wo: Heberu 13:17)

Ẹkẹta, bibu ọla fun awọn adari ijọ wa ni i ṣe pẹlu ki a ma tọju wọn gẹgẹ bi aṣẹ Jesu Kirisiti fun wa. Ẹkẹrin, o ni i ṣe pẹlu ki a ma ran iṣẹ iranṣẹ wọn lọwọ. Ti a ba si gbagbọ lotitọ ninu wọn ati ninu iṣẹ iranṣẹ ti Ọlọrun ran wọn lati ṣe, ko yẹ ki a nilo ẹnikankan lati ṣẹṣẹ ma kọ wa pe o ye ki a ma fi gbogbo igba wo ọna ti a fi le tọju wọn ati ti a fi le jẹ ki iṣẹ iranṣẹ wọn rọrun si fun wọn.

O wa ṣeni laanu pe ọpọ ninu ijọ loni ni oye nkan wọnyi ko ye. Nitorina, o rọrun fun wọn lati sọrọ sakala si awọn adari ijọ wọn tabi nipa wọn. O si tun rọrun fun wọn lati ma a wo wọn ki ebi ma a pa wọn, tabi ki iya ma a jẹ awọn ati ẹbi wọn. Ọpọ ninu ijọ lo tilẹ la oju wọn silẹ, ti wọn ko si ri nkankan ti wọn le ma mu ṣe lati tọju awọn adari ijọ wọn tabi lati ran iṣẹ iranṣẹ wọn lọwọ. Ko di igba ti awọn adari wa ba to sọ fun wa pe ki a fun wọn ni owo tabi ra aṣọ, ounjẹ, bata, ọkọ ati bẹẹbẹẹ lọ fun wọn ki a to mọ pe ojuṣe wa ni awọn nkan wọnyi. O ṣi yẹ ki a ma ṣe wọn ni ibamu pẹlu bi nkan ini wa ti ṣe pọ to. Ko si yẹ ko di igba ti wọn ba sọ fun wa pe ki a ba wọn fọ ọkọ ayọkẹlẹ wọn tabi tun ile tabi ọ́fìsì wọn ṣe tabi ba wọn kọ iwe tabi ba wọn wo awọn ọna ti iṣẹ iranṣẹ wọn ṣe le tan kalẹ si ki a to mọ pe ojuṣe wa ni lati ma ṣe awọn nkan wọnyi fun iranlọwọ iṣẹ iranṣẹ wọn.

Amọ, nitori pe ọpọ ninu awọn ijọ wa loni ni oye ko ye, dipo ki a ma bọwọ fun awọn adari wa, ki a si tun ma lakaka lati ri pe iṣẹ iranṣẹ wọn rọ wọn lọrun, nṣe ni a o ma lepa lati tabuku wọn ati lati fi wọn ṣe ẹlẹya. Awọn ti ko si tabuku tabi fi wọn ṣe ẹlẹya le ma ni nkankan pato ti wọn n ṣe lati ran iṣẹ iranṣẹ wọn lọwọ. Nitorina, awọn adari wọn ko sin wọn pẹlu inu didun, ayọ ati oriya. Abalajọ ti ọpọ ijọ Ọlọrun loni ṣe wa ni ipo iṣẹ nipa ti ẹmi ati nipa ti ara. Abalajọ pẹlu ti ọpọ adari ijọ ṣe sọ ara wọn di ole, ọlẹ ati olojukokoro, ti wọn a si ma ṣe oniruuru nkan ti ko tọ lati pese fun ara wọn ati ile wọn. Amọ ṣa o, ijiya n bẹ fun adari naa tabi ọmọ ijọ naa ti o mọ ojuṣe rẹ ninu ijọ ti ko si ṣe tabi ti ko lepa lati mọ ojuṣe rẹ ki o ba le ṣe e. (Wo: Luuku 12:47-48)

Ọ̀RỌ̀ ÌPARÍ

Iha ti awọn ọmọ Ọlọrun ba kọ si awọn adari wọn ninu ijọ ni ipa ti o ga lati ko lori idagbasoke ati ilọsiwaju nipa ti ẹmi ati nipa ti ara. Nitorina, o ṣe pataki ki a da awọn adari ijọ wa mọ, ki a si tun ma fi gbogbo igba kọ ati lepa lati kọ iha ti o tọ si wọn ati si iṣẹ iranṣẹ wọn. Aijẹbẹ, a le ma kuro ni ipo aràrá nipa ti ara ati nipa ti ẹmi titi Jesu Oluwa wa yoo fi de tabi ti akoko wa ni aye yi yoo fi wa si opin.

ÌBÉÈRÈ –

Mẹnuba awọn ọna ti o ro wipe awọn ọmọ Ọlọrun le ma gba lati ran iṣẹ iranṣẹ awọn adari ijọ wọn lọwọ. – Ki ni o ṣe pataki julọ si ọ ninu ẹkọ yi? Láti ọwọ́ Johnson O. Lawal Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

ÀKỌ́RÍ: Ẹ̀KỌ́ NÍNÚ ÌWÉ TẸSALÓNÍKÀ KÍNNÍ AYỌKA: 1TẸSALÓNÍKÀ 5:1-111

ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ
Ninu ẹkọ ti a kọ kọja lọ, a ri wipe ko tọ ki awọn Kirisitiẹni ma banujẹ bi awọn alaigbagbọ lori awọn eniyan ti o ba ku tabi ti o ti ku, paapaa julọ ti awọn ti a n sọ yi ba jẹ Kirisitiẹni. Eyi ko wa tunmọ si pe wọn ko lẹtọ lati banujẹ rara. Wọn lẹtọ lati banujẹ. Amọ wọn ko gbọdọ banujẹ bi awọn ti ko ni ireti bibọ Jesu ati bibọ awọn ti o sun ninu rẹ ni opin ohun gbogbo. Jesu n padabọ pẹlu awọn ti o ti sun ninu rẹ. Awa ti a si jẹ tirẹ ti a ba wa laye nigba ti O ba de yoo ri wọn, a o si gba wa soke lati darapọ mọ wọn titi lailai. Nkan ti bibeli fi ye wa ni eyi. Amọ, igba wo ni eyi yoo ṣẹlẹ? Bi ọpọ wa ti ṣe mọ, oniruuru awọn eniyan ni wọn ti dide ni oniruuru akoko, ti wọn si sọ wipe awọn mọ ọjọ ti Jesu n bọ wa. Ṣugbọn irọ ati ofo ni ipolongo ati isọtẹlẹ wọn jasi. Ki lo fa? Nkan ti o fa naa ni pe Jesu Oluwa wa funrarẹ ti jẹ ki a mọ wipe ko si ẹni ti o mọ ọjọ tabi akoko ti Oun yoo pada de. Nitorina, tiwa kọ ni ki a mọ igba ti yoo de; tiwa ni ki a mura silẹ de e, igbakugba ti O ba wu ki O de. (Wo: Matiu 24:36-44)

BI OLE LORU
Eyi wa ni Pọọlu tẹsiwaju lati ran awọn ara Tẹsalonika leti ninu abala lẹta rẹ ti a n gbe yẹwo ninu ẹkọ yi. Iwọ naa wo nkan ti o sọ:

“Nisinsinyii, ara, a ko nilo lati kọ iwe si i yin mọ nipa akoko ati igba, nitori ẹyin paapaa mọ wi pe ọjọ Oluwa yoo waa bi ole loru. Ni akoko gan an ti awọn eniyan yoo maa wi pe, “Alafia ati aabo,” nigba naa ni iparun ojiji yoo de sori wọn gẹgẹ bi irọbi obinrin ti o loyin, wọn ko si ri ibi aabo lati sa si. Ṣugbọn ẹyin ara, ko si ninu okukun nipa nnkan wọnyi ti ọjọ Oluwa yoo fi de ba yin bi ole. Nitori gbogbo yin ni ọmọ imọlẹ ati ọmọ ọsan gangan. Ẹ ki i ṣe ti oru tabi ti okunkun mọ.” (1Tẹsalonika 5:1-5)

Ki ni awọn nkan ti a ri dimu ninu ọrọ iyanju Pọọlu yi? Akọkọ ni pe ko si ẹni ti o mọ ọjọ tabi wakati ti Jesu yoo pada de pẹlu awọn ayanfẹ rẹ ti o ti sun ninu rẹ. Nitorina, ti ẹnikẹni ba jẹ ki ẹnikẹni tan oun jẹ lori ọrọ yi, a jẹ wipe o mọn-ọn-mọn kọ eti ikún si nkan ti a kọ silẹ ninu ọrọ Ọlọrun ni.

Bi Pọọlu ti ṣe fi ye, ọrọ Jesu Oluwa wa funrarẹ ni pe dide Oun yoo dabi dide ole loru. Ni akoko ti awọn eniyan ro pe ibalẹ-ọkan ti wa, ti wọn ro wipe wọn ti n rojutu ọrọ aye yi ni Oun yoo de, ti iparun yoo si wa sori wọn. Jesu Oluwa wa tilẹ fi ye wa pe bi nkan ti ṣe ri ni igba aye Noa ni yoo ti sẹ ri ni igba ti Oun naa ba pada de. Ko ni si nkan ti yoo fu awọn eniyan lara pe dide rẹ ti wa ni ẹnu ọna wọn. Awọn miran ti o gbagbọ gan yoo ti bẹrẹ si ni fi ẹnu wọn kẹgan ati sọ isọkusọ pe Jesu ko ni pada wa kankan, pe erémọdé lasan ni gbogbo nkan ti a n sọ (2Peteru 3:3-4). Ṣugbọn, boya wọn fẹ tabi wọn kọ, Jesu yoo pada wa lati mu awọn ayanfẹ rẹ, lati ṣe idajọ aye ati lati fi idi ijọba ayeraye Ọlọrun mulẹ ninu aye tuntun ti Ọlọrun ti pese silẹ fun wa.

Nkan ekeji ti Pọọlu fẹ ki o yẹ awọn ara Tẹsalonika yi ati awa naa pẹlu ni pe bibọ Jesu ko ni lati dabi wiwa ole loru fun awọn ti o jẹ ọmọ Ọlọrun. Lotitọ, a ko mọ ọjọ tabi akoko ti yoo de. Amọ O ti sọ fun wa pe o di dandan ki Oun pada wa lati mu wa sọdọ rẹ. O si tọ oniruuru iṣẹlẹ ti yoo ma ṣẹlẹ laye ti yoo ran wa lọwọ lati kiyesi pe O ti de tan. Nitorina, ti dide rẹ ba tun wa ba wa ni ojiji, a jẹ wipe a ko mọ nkan ti a n ṣe niyẹn.

Gẹgẹ bi alaye apọsiteli yi, awa ọmọ Ọlọrun ko si ninu okunkun rara lori ọrọ yi. Inu imọlẹ ni a wa. Ọmọ imọlẹ ati ọmọ ọsan gangan ni a si jẹ. Nitorina, awọn nkan ti yoo ṣẹlẹ si aye yi ati awọn ti o wa ninu rẹ ko ṣokunkun si wa rara. Bẹẹ si ni, awọn nkan ti yoo ṣẹlẹ si ọrun ti a n wo yi ati si ijọba Satani ati awọn ẹmikẹmi rẹ ko ṣokunkun si wa. A ti sọ wọn fun wa ki o ti di wipe wọn yoo bẹrẹ si ni ṣẹlẹ. Ti a ba si wa gba awọn nkan wọnyi gbọ, a gbọdọ bẹrẹ si gbe aye wa ni ibamu pẹlu wọn.

Nigba ti Ọlọrun kilọ fun Noa, ti O si sọ nkan ti yoo ṣẹlẹ si aye ati awọn ti o n gbe inu rẹ fun, ko kan fọwọ lẹran, ki o joko tẹtẹrẹ, ki o si ma woran. Nṣe ni o gbe igbese ni ibamu pẹlu aṣẹ Ọlọrun lati gba ẹmi rẹ ati ẹmi awọn ara ile rẹ la. Nitorina, ti awa naa ba gba nkan ti Jesu ati awọn apọsiteli ati wolii rẹ igbani ba wa sọ lori bibọ rẹ ati lori opin ohun gbogbo, o di dandan ki a fi ojoojumọ bẹrẹ si ni murasilẹ de e. Eyi lo fa ti Pọọlu tun ṣe sọ eyi fun wa:

“Nitori naa, ẹ kiyesara yin ki ẹ ma ṣe sun bi awọn ẹlomiran. Ẹ maa ṣọna ki ẹ si maa pa ara yin mọ. Nitori awọn ti wọn n sun, a maa sun ni oru, awọn ẹni ti n mu amupara, a maa mu un ni oru. Ṣugbọn awa jẹ ti imọlẹ, ẹ jẹ ki a pa ara wa mọ, ni gbigbe igbagbọ wọ ati ifẹ bi awo igbaaya ni oru ati ireti igbala bi asibori. Nitoripe, Ọlọrun ko yan wa lati da ibinu rẹ gbigbona si ori wa, ṣugbọn o yan lati gba wa la nipasẹ Oluwa wa Jesu Kirisiti. Jesu ku fun wa ki a le ba a gbe titi laelae. Eyi yoo ri bẹẹ yala a sun tabi a wa laaye pẹlu rẹ. Nitori naa, ẹ maa gba ara yin niyanju, ki ẹ si maa gbe ara yin ro, gẹg bi e ti n ṣe.” (1Tẹsalonika 5:6-11)

Njẹ o ri bayi? Ojuṣe ẹnikọọkan awa ti a jẹ Kirisitiẹni ni lati ma a ṣọna ati lati ma a mura silẹ de Jesu Oluwa wa. A wa ni a gbọdọ ri wipe a ko sun lọ rara nipa fifi aye gba ẹṣẹ ati ainitara fun Ọlọrun laaye ninu aye wa. A si le ṣe eyi nipa diduro ṣinṣin ninu igbagbọ, ifẹ ati ireeti wa. Bi Pọọlu ti ṣe fi ye wa, Ọlọrun ko ya wa sọta lati da ibinu gbigbona rẹ le wa lori. Dipo eyi, nṣe ni o ya wa sọtọ lati gba wa la nipasẹ Jesu Oluwa wa, boya a wa laaye nigba ti O ba de tabi a ti sun ninu rẹ. Nitorina ni o ṣe yẹ ki a wa ni imurasilẹ de e, ki a si ma gba ara wa niyanju pẹlu awọn ọrọ itunu yi titi yoo fi de e.

ỌRỌ IPARI
Noa, nigba ti a kilọ fun nipa ohun ti o bọ wa sori aye ati awọn ọmọ eniyan, mura silẹ ni ibamu pẹlu ọrọ Ọlọrun ti o gbọ. Idi niyi ti ikun omi ko fi gbe oun ati awọn idile rẹ lọ. Ti ko ba wa mura silẹ, ti ikun omi si de ba a, njẹ yoo lẹtọ lati sọ wipe ojiji ni iparun de ba oun bi? Ko ni lẹtọ lati sọ eyi rara. Bẹẹ gẹgẹ ni o si ri fun awa ti a jẹ Kirisitiẹni naa. Ipadabọ Jesi Oluwa wa ko gbọdọ ba wa ni ojiji rara. Idi si ni pe a ti sọ fun wa tẹlẹ pe O n bọ wa ati pe ki a mura silẹ de e. Nitorina, ojuṣe kan gbogi ti a ni bayi ni pe ki a ma fi gbogbo igba wa ni imurasilẹ de e, nitori a ko mọ igba tabi akoko ti O le de.

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

Ẹ̀KỌ́ NÍNÚ ÌWÉ TẸSALÓNÍKÀ KÍNNÍ AYỌKA: 1TẸSALÓNÍKÀ 4:13-18 ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ

Ninu ẹkọ ti a kọ kọja lọ ninu lẹta Pọọlu si awọn ara Tẹsalonika, a ri wipe o ṣe pataki ki ẹnikẹni ti o ba pe ara rẹ ni Kirisitiẹni fi ara rẹ jin fun gbigbe igbe aye ti o wu Ọlọrun. Idi si ni wipe nkan ti a da wa fun ni eyi. Ṣugbọn ti a ko ba mọ awọn nkan ti o sorọ mọ gbigbe igbe aye yi, bi a tilẹ ni lọkan lati gbe e, a ko ni gbe e. Eyi si wa lara idi ti Pọọlu ati awọn yoku rẹ ninu iṣẹ iranṣẹ ṣe fi ara balẹ kọ awọn ara Tẹsalonika ni awọn nkan ti wọn nilo lati mọ nipa gbigbe igbe aye ti o wu Ọlọrun. Bi a si ti ri ninu lẹta yi, igbe aye ti o wu Ọlọrun jẹ igbe eye aileri, igbe aye ifẹ ati igbe aye ẹni ti o to oju bọ. Amọ ṣa o, aye yi kọ ni ohun gbogbo pari si fun Kirisitiẹni. Ijọba ayeraye Ọlọrun si n bọ wa fi idi mulẹ ni akoko ti O ti yan. Eyi si jẹ nkan ti ẹnikọọkan wa gbọdọ mura silẹ de. Ṣugbọn, niwọn igba ti a ko mọ ọjọ tabi akoko ti eyi yoo waye, ko si ni ki awọn ara wa kan ma sun ninu Oluwa ki akoko yi to de. Ọpọlọpọ ni o si tun sun ninu rẹ tabi ku fun oniruuru idi. Bawo wa ni o ṣe yẹ ki a tẹwọgba eyi, gẹgẹ bi Kirisitiẹni? Nkan ti Pọọlu n ba awọn ara Tẹsalonika sọrọ le lori ni eyi ninu abala lẹta rẹ ti a fẹ gbe yẹwo ninu ẹkọ yi. O si ṣe pataki ki a kọbiara si, ki a si ma ṣe amulo rẹ, ki gbogbo idamu, wahala ati iku ti o sọrọ mọ gbigbe aye yi ma ba fi irẹwẹsi sọkan wa, ki wọn si jẹ ki a yẹ ẹsẹ ninu irinajo igbagbọ wa.

MÁ ṢE ṢE BÍ ÀWỌN TÍ KÒ NÍ ÌRÈTÍ

Wayi o, ninu lẹta rẹ si awọn ara Éfésù, ori ikeji, Pọọlu jẹ ki o ye wa pe ẹnikẹni ti ko ba ni Jesu, ko ni ireti ifọkanbalẹ tabi igbadun kankan kọja aye ti a wa yi (Éfésù 2:12). Aye yi ni gbogbo igbadun, ifọkanbalẹ ati aye jijẹ rẹ mọ. Lẹyin eyi, idajọ ti o tọ si awọn ti ko mọ Ọlọrun ni yoo ba pade. Eyi yoo si yọri si ipọnju ati irora ayeraye, eyi ti ko ṣe fẹnusọ fun. Amọ bawo wa ni ti Kirisitiẹni ti ṣe jẹ? Ṣe inu aye yi naa ni gbogbo igbadun tabi ifọkanbalẹ rẹ mọ bi? Rara o! Aye yi kọ ni igbadun rẹ mọ. Ṣugbọn aye yi ni gbogbo irora, aibalẹọkan, ẹkun, ijakulẹ, oṣe ati idamu yowu ti o le ba pade mọ. Idi si ni pe Ọlọrun ti pese aye silẹ fun ninu ijọba ayeraye rẹ, eyi ti o n bọ wa. A sọ eyi nipa ijọba yi ninu iwe ifihan: “Mo si gbọ ohun nla kan lati ori itẹ ni wa, n wi pe, Kiyesi i, agọ Ọlọrun wa laarin awọn eniyan, oun o si maa ba wọn gbe, wọn o si maa jẹ eniyan rẹ, ati Ọlọrun tikararẹ yoo wa pẹlu wọn, yoo si maa jẹ Ọlọrun wọn. Ọlọrun yoo si nu omije gbogbo nu kuro ni oju wọn; ki yoo si si iku mọ, tabi ọfọ, tabi ẹkun, bẹẹ ni ki yoo si irora mọ: nitori pe ohun atijọ ti kọja lọ.” (Ìfihàn 21:4-5)

Nitori eyi, Kirisitiẹni ni gbogbo idi lati foju sọna fun ọjọ yi, ọjọ ti ilẹ yoo mọ, ti yoo si bọ sinu ile ayọ ayeraye ti Ọlọrun ti pese silẹ fun. Amọ ṣa o, niwọn igba ti o ba si wa ni aye yi, ti Jesu ko si ti de, ko si bi ko ṣe ni ba ara rẹ ni awọn asiko ti yoo sọrọ mọ pipadanu awọn ẹni ti o fẹran tabi ti o sunmọ gidigidi sọwọ iku, bi awọn wọnyi tilẹ jẹ Kirisitiẹni. O le jẹ nipasẹ aisan, ogun, ijamba, inunibini tabi ajalu. O tilẹ le jẹ wipe awọn ti a n sọ yi ti dagba, ti wọn si ti da arugbo ki wọn to kun. Ṣugbọn a ko le fẹ iru rẹ ku nitoripe aye ti a wa ninu rẹ jẹ eyi ti ko ni wa titi lailai. Bẹẹ si ni awa ti a wa ninu aye naa ko ni wa ninu rẹ titi lailai. O di dandan ki a kuro ninu rẹ lọjọ kan, boya nipasẹ iku ni o tabi nipasẹ bibọ Jesu. Ti a ba wa ri pe eniyan wa kan fi aye silẹ, ko yẹ ki a ṣe bi awọn ti ko mọ Ọlọrun ti ṣe n ṣe rara. Nṣe ni o yẹ ki a ṣe bi ẹni ti o ni imọ ati imoye nkan ti Ọlọrun ti sọ nipa ayeraye ti o n bọ, yala fun awọn ti o gba a gbọ tabi awọn ti ko gba a gbọ.

Eyi si ni Pọọlu fẹ ki o ye awọn ara Tẹsalonika ninu abala lẹta rẹ ti a n gbe yẹwo bayi. Wo nkan ti o sọ lori rẹ:

“Ṣugbọn awa ko fẹ ki ẹyin ko jẹ ope, ara, ni ti awọn ti o ti sun, pe ki ẹ ma banu jẹ gẹgẹ bi awọn yooku ti ko ni ireti. Nitori bi awa ba gbagbọ pe Jesu ti ku, o si ti ji dide, gẹgẹ bẹẹ ni Ọlọrun yoo mu awọn ti o ti sun pẹlu ninu Jesu wa pẹlu ara rẹ. Nitori eyi yii ni awa n wi fun yin nipa ọrọ Oluwa, pe awa ti o wa laye, ti a si ku lẹyin de atiwa Oluwa, bi o ti wu ki o ri, ki yoo ṣaaju awọn ti o sun lati pade rẹ. Nitori Oluwa tikararẹ yoo sọ kalẹ lati ọrun wa ti oun ti ariwo, pẹlu ipe Ọlọrun; awọn oku ninu Kirisiti ni yoo si kọ ji dide. Nigba naa ni a o si gba awa ti o wa laaye ti o si ku lẹyin soke pẹlu wọn sinu ikuukuu, lati pade Oluwa ni oju ọrun. Bẹ ni awa o si maa wa lọdọ Oluwa titi lae. Nitori naa, ẹ maa fi ọrọ wọnyi tu ara yin ninu.” (1Tẹsalóníkà 4:13-18)

Bi a ko tilẹ sọ ninu lẹta yi, o ṣeeṣe pe lara iroyin ti Timoti mu wa fun Pọọlu nipa ijọ yi ni pe wọn n ṣọfọ, wọn si n barajẹ gidigidi nitori awọn ara wọn kan ti wọn ku tabi ki a sọ wipe ti wọn sun ninu Oluwa. Ti a ko ba gbagbe, gẹgẹ bi akọsilẹ Luuku ninu Iṣe Awọn Apọsiteli, nigba ti arabinrin kan ti a n pe ni Dọkasi, ti o jẹ ọmọ ijọ Joopa, ku, awọn ọmọ ijọ rẹ, paapaa julọ awọn opo ijọ naa ti o ti ran lọwọ lọpọlọpọ, bẹrẹ si ni sukun, ti wọn si n ba ara jẹ pupọ. Ti ko ba wa ṣe pe Peteru wa si ọdọ wọn, ti Ọlọrun si lo lati ji arabinrin yi, o ṣeeṣe ki iku rẹ fi irẹwẹsi si ọkan ọpọ ninu awọn ọmọ ijọ rẹ ati awọn miran ti wọn mọ gẹgẹ bi ẹni ire. (Wo: Iṣe Apọsiteli 9:36-42)

Irufẹ irẹwẹsi yi lo wa fẹ dabi ẹni pe o n ba ijọ awọn ara Tẹsalonika yi finra ni akoko yi. Nitorina, Pọọlu gba wọn niyanju lori iha ti o yẹ ki wọn kọ si iku awọn onigbagbọ. Ki si ni awọn nkan ti o sọ lori eyi? Akọkọ, o fẹ ki wọn mọ pe awọn onigbagbọ ti o ba ku ninu aye yi kan sun ni. Eyi jasi pe nipa ti ara nikan ni wọn ti ku – nipa ti ẹmi wọn wa laaye. Eyi yoo si di mimọ daju fun wa nigba ti Jesu Oluwa wa ba pada wa lati ko awa ti a jẹ ayanfẹ rẹ wa sọdọ rẹ.

Pọọlu wa tẹsiwaju lati ṣe alaye bi eyi yoo ti ṣe waye. O jẹ ki o ye wa pe gbogbo wa naa ko ni yoo ku ki Jesu to de. Awa kan yoo wa laaye ni akoko bibọ rẹ. Amọ ṣa o, awa ti a wa laaye kọ ni yoo kọkọ darapọ mọ. Awọn ti o ti ku ni yoo kọkọ darapọ mọ, ti yoo si gba agọ ara tuntun ti o dabi tirẹ (1Kọrinnti 15; Filipi 3:20). Bi a tilẹ ti ṣe ri ninu bibeli, awọn ti o ku ninu Kirisiti ti wa pẹlu rẹ lọwọlọwọ yi (2Kọrinnti 5:1-8; Filipi 1:21-25). Ṣugbọn nigba ti O ba de ni a to tun ri wọn. Awa naa yoo si wa gba agọ ara tuntun nigba ti a ba darapọ pẹlu wọn ati Jesu nigba ti O ba de.

Ki wa ni koko gbogbo nkan ti Pọọlu sọ yi? Oun naa ni pe ko si idi fun wa lati banujẹ tabi ṣọfọ bi awọn alaigbagbọ lori awọn ọmọ Ọlọrun ti a jọ wa ninu ijọ, ti wọn jẹ ẹbi wa tabi ti wọn jẹ ọrẹ wa ti wọn ti ku tabi ti wọn ba ku. Wa kiyesi eyi: Pọọlu ko sọ wipe ki a ma banujẹ rara tabi ṣọfọ rara lori awọn eniyan wa ti wọn ba sun ninu Kirisiti. Ti a ba tilẹ ka lẹta rẹ si awọn ara Roomu, o sọ nibẹ pe ki a ma ba awọn ti o n sukun sukun, ki a si ma ba awọn ti o n yọ yọ (Roomu 12:15).

Nitorina, ko ki i ṣe wipe Pọọlu fẹ ki a ro pe ko tọ fun Kirisitiẹni lati sọkun tabi ṣọfọ lori awọn eniyan tabi ọrẹ rẹ ti o ba ku. Jesu Oluwa wa gan sọkun nigba ti O de iboji Lasaru, iyẹn ki O to ji dide (Johanu 11:35). Ko wa si nkan ti o buru nibẹ ti awọn ọmọ ẹyin rẹ naa ba sukun nitori awọn eniyan wọn ti o ku. Nkan ti Pọọlu kan fẹ ki o ye wa ni pe ko yẹ ki a ma banujẹ tabi ṣọfọ lori wọn bi awọn alaiagbagbọ ti ko ni ireti ati ba Jesu jọba titi lailai.

Awa naa mọ bi awọn alaigbagbọ ṣe ma n ṣọfọ ati barajẹ lori awọn eniyan wọn ti o ba ku. Wọn le ma po ara mọlẹ tabi ki wọn ma gbe ara wọn ṣepe. Awọn miran tilẹ le pa gbogbo ojuṣe wọn si ara wọn ati si awọn miran ti o wa ninu aye wọn ti nitori pe wọn n ṣọfọ. A si ri awọn ti wọn ti jẹ ki aye wọn bajẹ patapata nitori pe wọn padanu awọn kan ninu aye wọn. Ṣugbọn eyi ko gbọdọ ri bẹ pẹlu awa ti a jẹ Kirisitiẹni. Lotitọ, ko si ẹni ti inu rẹ yo dun ti o padanu eniyan rẹ tabi ololufẹ rẹ, bi wọn tilẹ ti di arugbo. Amọ, niwọn igba ti awọn ti o ku yi ba ti ku sinu Kirisiti, a gbọdọ mọ lọkan wa pe oju a tunrari. A o tun pade lọjọ kan lọdọ Jesu. A ko si ni ya ara wa mọ lẹyin ipade yi.

Yatọ si iyẹn, a tun gbọdọ mọ pe bi eniyan tilẹ fi wa silẹ, Ọlọrun ko ni fi igba kankan fi wa silẹ. Gbogbo igba ni O ṣetan lati duro ti wa ati lati ri pe ààyè ẹni ti o fi wa silẹ ko ṣofo ninu aye wa. Tiwa kan ni ki a gba a laye lati tu wa ninu, nitoripe Baba itunu gbogbo ni Oun jẹ (2Kọrinnti 1:3-4). Awọn nkan wọnyi si ni Pọọlu sọ pe ki a ma lo lati gba ara wa niyanju ati lati tu ara wa ninu ti a ba padanu ẹnikẹni ninu Kirisiti, ki a ma ba ba ara jẹ kọja ala, ki a si sọ ara wa di idakuda.

ỌRỌ IPARI

O wa ṣeeṣe ki a ri ẹni ti yoo bere pe iha wo ni o wa yẹ ki a kọ si awọn ti o ku, ti ko si ki i ṣe Kirisitiẹni. Bi o tilẹ jẹ pe awọn wọnyi ko ni ireti ijọba ayeraye, niwọn igba ti wọn ti ku, ko si nkan ti a le ṣe lori ọrọ wọn mọ. Bi o ti wu ki a barajẹ to lori ọrọ wọn, ibarajẹ wa ko le yọ wọn kuro ninu ewu ọrun apadi. O ti bọ na. Awọn ti o ku laye nikan ni a le ran lọwọ ki awọn naa ma ba pari irinajo wọn si ibikanna. Nitorina, boya ẹni ti o ku jẹ ọmọ Ọlọrun tabi ọmọ Eṣu, a ko gbọdọ barajẹ tabi banujẹ lori wọn bi awọn ti ko ni oye ọrọ Ọlọrun. Dipo bẹẹ, nṣe ni ki a ma fi gbogbo mura silẹ lati jẹ alabapin ireti ogo ayeraye wa ti o n bọ, iyẹn Jesu Kirisiti Oluwa wa.

IBEERE – Bawo ni ẹkọ yi ṣe ran oye rẹ lori iku ati ajinde lọwọ si?

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

AYỌKA: 1TẸSALÓNÍKÀ 4:1-12 ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ

Ninu ẹkọ ti a kọ pari ninu lẹta Pọọlu si awọn ara Tẹsalonika, a ri awọn ọna ti o gba ṣe pataki ki a mọ ipo ti awọn ọmọ Ọlọrun ti o wa ninu aye wa wa. Ninu ẹkọ eyi ti a mu yi, ẹwẹ, gbigbe igbe aye ti o wa ni ibamu pẹlu ifẹ Ọlọrun ni a fẹ ṣe agbeyẹwo. Bi Pọọlu ṣe fi ye wa, nigba ti wọn mu ọrọ Ọlọrun tọ awọn ara Tẹsalonika wa, wọn kọkọ kọ wọn bi a ti ṣe n gbe igbe aye ti o wu Ọlọrun, igbe aye ti o tẹ ẹ lọrun. O ṣi ṣe koko ki a kọ ẹnikẹni ti o ba ṣẹṣẹ n fi aye rẹ fun Jesu ni bi a ti ṣe n gbe igbe aye ti o tẹ Ọlọrun lọrun. Aijẹbẹ, a le ma ri iyatọ ninu igbe aye ti wọn n gbe tẹlẹ ati igbe aye ti wọn n gbe lẹyin igba ti wọn ti mọ Jesu. Idi niyi ti Pọọlu ṣe tun ran awọn ara Tẹsalonika leti ninu lẹta yi lara awọn nkan ti wọn kọ wọn nipa gbigbe igbe aye iwa mimọ, ki wọn ba tunbọ le tẹramọ. (Wo: 1Tẹsalonika 4:1)

ÌGBÉ AYÉ TÍ Ó TẸ́ ỌLỌ́RUN LỌ́RÙN

Irufẹ igbe aye wo ni o wa tẹ Ọlọrun lọrun? Gẹgẹ bi Pọọlu ti ṣe fi ye wa ninu lẹta yi, igbe aye ti o tẹ lọọrun jẹ:

– Ìgbé ayé àìléérí: Ninu lẹta yi, Pọọlu fi eyi han wa nipa ifẹ Ọlọrun fun gbogbo eniyan: “Nitori pe, ẹyin mọ aṣẹ ti a pa fun yin lati ọdọ Oluwa Jesu. Nitori ifẹ Ọlọrun ni pe ki ẹ jẹ mimọ, ki ẹ si yago kuro ninu ẹṣẹ agbere, ki ẹnikọọkan yin kọ lati sakoso ara rẹ ni ọna mimọ ati pẹlu ọla, ki i ṣẹ ni ifẹkufẹ gẹgẹ bi awọn alaikọla, ẹni ti ko mọ Ọlọrun; ati pe ninu ọrọ yi, ki ẹnikẹni yin ma ṣẹ kuna arakunrin rẹ nipa ohunkohun. Oluwa yoo jẹ eniyan niya fun gbogbo ẹṣẹ wọn, gẹgẹ bi a ti n sọ fun un yin tẹlẹtẹlẹ. Nitori Ọlọrun ko pe wa sinu aimọ, bi ko ṣe sinu igbe-aye mimọ. Nitori naa, ẹnikẹni ti o kọ ofin yii, ki i ṣe ofin eniyan ni ẹni naa kọ, bi ko ṣe ofin Ọlọrun ẹni ti o fi Ẹmi Mimọ rẹ fun ni.” (1Tẹsalonika 4:2-8) Bi apọsiteli yi ti ṣe la a kalẹ fun wa, a ri wipe igbe aye wa ko le tẹ Ọlọrun lọrun ti a ko ba yago fun agbere, pansaga, iwa eeri ati bẹẹbẹẹ lọ. Nitorina, ojuṣẹ ẹnikọọkan wa ni lati kọ bi yoo ṣe ko ara rẹ ni ijanu ni ọna ti o mọ, ti o si tun ni ọla, ko ki i ṣe ojuṣe Ọlọrun rara.

Bi itan Josẹfu ti lọ ninu bibeli, oun funrarẹ lo ko ara rẹ ni ijanu nigba ti iyawo oluwa rẹ, Pọtifa, bẹrẹ si ni fi ẹṣẹ agbere lọ ọ. Oun lo ba ara rẹ sọrọ pe ohun gbọdọ jina si arabinrin yi ati wipe oun gbọdọ sa fun ẹṣẹ agbere pẹlu rẹ, bi o ti wu ki nkan ri. Ọlọrun ran lọwọ lati jẹ ki eyi ṣeeṣe lotitọ. Amọ idi ti Ọlọrun fi ri ran lọwọ ni pe oun funrarẹ ti pinu lati ṣe ohun ti o tọ pẹlu agọ ara rẹ, ki o si ma ṣẹ si Ọlọrun ati ṣi ọga rẹ. Eyi n jẹ ki o ye wa pe awa naa gbọdọ pinu ni ibamu pẹlu ifẹ Ọlọrun fun wa lati takete tabi sa fun ẹṣẹ agbere nipa ki a ma fi aye gba ifẹkufẹ ninu ọkan wa ati nipa ki a ma fi anfaani silẹ fun ibaṣepọ ti ko tọ pẹlu awọn ti ko ki i ṣe aya tabi ọkọ wa. (Wo: Jẹnẹsisi 39; 1Kọrinnti 6:18)

Lotitọ, aye ti a wa yi jẹ eyi ti o kun fun oniruuru iwa idibajẹ. Idi si ni pe ọpọ lo fẹran iwa ibajẹ ati oniruuru iṣekuṣe. Wọn a si tun ma wa ọna lati mu awọn miran kunra ninu idibajẹ wọn, pẹlupẹlu ninu ijọ. Ti awọn ọmọ Ọlọrun ko ba wa fi si ọkan pe iṣekuṣe, agbere, pansaga ati awọn iwa eeri miran ti o fara pẹ wọn lodi si ifẹ Baba wọn ti O pe wọn, ti O si fi Ẹmi Mimọ rẹ sinu wọn, ko si ni ki wọn ma ba ara wọn jẹ pẹlu awọn idibajẹ aye yi. Ẹni ti o ba si ba ara rẹ jẹ ni ọna yi di dandan ki o ba ijiya pade lati ọwọ Ọlọrun nigba ti akoko ba to.

– Ìgbé ayé ìfẹ́: Yatọ si pe ki a ma fi iṣekuṣe ba ara wa jẹ, a tun gbọdọ fi ara wa jin lati fi ifẹ han si gbogbo awọn ti o ba wa ninu aye wa tabi ti a ba n ni ajọṣepọ pẹlu, lọna kan tabi omiran. Igbe aye ti ko ba si kun fun ifẹ Ọlọrun si awọn eniyan ko tẹ ẹ lọrun rara. Ki a tilẹ sọ otitọ, igbe aye asan, igbe aye ti ko lere ni igbe aye ti ko ba kun fun ifẹ Ọlọrun jẹ (1Kọrinnti 13). Idi si ni pe Jesu funrarẹ ti jẹ ki o ye wa pe nipa rinrin ninu ifẹ ni awọn eniyan yoo ṣe mọ wa gẹgẹ bi ọmọ ẹyin rẹ nitootọ (Johanu 13:34-35). Bi a ti ṣe mọ, a ri awọn ti ko gba Jesu gbọ rara ti ko ki i gbe igbe aye iṣekuṣe tabi agbere rara. Ki wa ni yoo jẹ iyatọ laarin iru awọn wọnyi ati awọn ọmọ Ọlọrun? Igbe aye ifẹ ni! Nitorina, awa ti a jẹ ọmọ Ọlọrun gbọdọ mọ pe ko to ki a yẹra fun ifẹkufẹ ati iwa eeri ninu aye yi; a tun gbọdọ tẹramọ igbe aye ifẹ. Pọọlu si fi eyi han wa ninu nkan ti o sọ fun awọn ara Tẹsalonika pe, “Ṣugbọn nipa ifẹ ara, a o ni lati tun kọwe si i yin, idi ni pe, Ọlọrun paapaa n kọ yin lati fẹran ara yin. Nitootọ, ẹ ni ifẹ fun awọn arakunrin ti o wa kaakiri Makidonia. Sibẹsibẹ awa n bẹ yin, ara, pe ki ẹyin ki o maa tẹsiwaju ninu rẹ.” (1Tẹsalonika 4:9-10) Bi a ti ṣe ri ninu ọrọ rẹ, Ọlọrun funrarẹ ni O kọ awọn ara Tẹsalonika lati ma rin ninu ifẹ nipasẹ Ẹmi Mimọ rẹ ti O fi fun wọn. O ṣi ṣetan lati kọ awa naa lati ma a rin ninu ifẹ nipasẹ Ẹmi Mimọ rẹ, ti a ba fi ara wa jin fun.

– Igbe aye ẹni ti o tojubọ: Nkan miran ti Pọọlu tun sọ fun wa ninu lẹta si awọn ara Tẹsalonika nipa igba aye ti O tẹ Ọlọrun lọrun ni pe o jẹ igbe aye ẹni ti o wulo, ẹni ti o to oju bọ, ti ko si nilo lati ko bukata aye rẹ le ẹnikẹni lori. Iwọ naa wo nkan ti o sọ nipa eyi: “Ẹ jẹ ki eyi jẹ ifẹ ọkan yin lati gbe jẹẹ ati lati mọ ti ara yin ati ki olukuluku kọju si iṣẹ rẹ, gẹgẹ bi a ti wi fun yin. Eyi yoo mu ki awọn ti ki i ṣe Kirisitẹni gbẹkẹle yin ati lati bu ọla fun yin pẹlu. Bi ẹ ba ṣe bẹẹ, ẹ ko ni maa wo oju ẹnikẹni lati fun yin ni owo ti ẹ o fi san gbese.” (1Tẹsalonika 4:11-12) Ki ni eyi n fi ye wa? Oun naa ni pe igbe aye aláìní, igbe aye onigbese, igbe aye atọrọjẹ ko ki i ṣe ifẹ Ọlọrun fun awọn ọmọ rẹ. Ko wu u tabi tẹ ẹ lọrun rara. Ko si fẹ ki a ma sọ wipe nitori Jesu ni aye wa ṣe ri bayi. Idi si niyi ti ko fi fẹ ki a ya ọlẹ, afàjọ̀ọ̀ tabi alainikanṣe. Dipo bẹẹ, O fẹ ki a yago fun abosi, igbesi aye imẹlẹ, ki a tẹra mọ iṣẹ wa, ki a si ma ṣe ni ọna ti a o fi ni anito ati aniṣẹku. Eyi jasi pe Ọlọrun ni lọkan lati bukun fun wa lọpọ yanturu, ti a ba tẹra mọ iṣẹ wa, ti a si n ṣe pẹlu ọgbọn ati oye ti o peye. Pọọlu si tun wa jẹ ki o ye wa pe ti a ba gbe aye wa lọna yi, a ko ni nilo lati ma woju ẹnikẹni fun ounjẹ tabi fun owo lati ṣe ojuṣe wa. Dipo eyi, nṣe ni awọn ti o wa ni ayika wa yoo ma bọwọ fun wa.

Ọ̀RỌ̀ ÌPARÍ

Iwọ naa wo igbe aye ti o n gbe. Njẹ o ba ifẹ Ọlọrun mu bi? Ṣe igbe aye aileeri, igbe aye ifẹ ati igbe aye ẹni ti o toju bọ ni bi? Abi igbe aye iṣekuṣe, ikorira ati alaiwulo ni? Mọ lọkan rẹ pe Ọlọrun fẹ ki gbogbo awa ti a jẹ ọmọ rẹ mọ irufẹ igbe aye ti O tẹ ẹ lọrun, ki a si tun tẹramọ ati ma a gbe. Ẹnikẹni ti ko ba wa mọ eyi, ki o si mu ni pataki n fi ara rẹ han bi ẹni ti ko i ti ba Jesu pade rara tabi ti ko ni oye nkan ti a n pe ni igbe aye Kirisitiẹni.

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ Ninu ẹkọ ti a kọ ṣẹyin ninu lẹta Pọọlu si ijọ Ọlọrun ti o wa ni Tẹsalonika, a ri daju wipe iha ti a ba kọ si ọrọ Ọlọrun ti a mu tọ wa wa ati si iṣẹ iranṣẹ awọn ti a ba ran si wa ni ipa ti o ga lati ko lori igbala ati idagbasoke wa ninu ẹmi. Gẹgẹ bi Pọọlu ti jẹ ki o ye wa ninu lẹta yi, awọn ara Tẹsalonika yi tẹwọgba ọrọ Ọlọrun ti a mu tọ wọn wa gẹgẹ bi ọrọ rẹ tootọ. Wọn ko foju tẹnbẹlu rẹ bi ọrọ lasan tabi ọrọ ẹlẹran ara. Idi si ni yi ti ọrọ naa ṣe bẹrẹ si ni ṣiṣẹ ninu aye wọn, ti o si n so eso rere nibẹ (1Tẹsalonika 2:13). Eyi si n jẹ ki o ye wa pe ti awa naa ko ba ri ọrọ Ọlọrun ti o n tọ wa wa gẹgẹ bi ọrọ eniyan ṣugbọn bi ọrọ rẹ, o di dandan ki o ṣiṣẹ gidigidi ninu aye awa naa, ki o si so eso ti o yẹ ki o so. Amọ niwọn igba ti a ko ba ti kọbiara si ọrọ rẹ tabi ti a ri bi ọrọ lasan, aye wa ko ni gba iyipada ọtun ti o yẹ ki o gba. Pataki lara awọn nkan ti yoo si jẹ ki a gba ọrọ Ọlọrun bi o ti ṣe tọ ati bi o ti ṣe yẹ ni ki a gba awọn iransẹ rẹ ti O n ra si wa gẹgẹ bi iranṣẹ rẹ tootọ. Ti a ko ba gba wọn gẹgẹ bi iransẹ rẹ, yoo nira fun wa lati gba ọrọ yowu ti wọn ba n sọ fun wa gbọ. Yoo si tun nira fun wa pẹlu lati fi aye gba iṣẹ yowu ti Ọlọrun ba fẹ tipasẹ wọn ṣe fun wa. Idi kan gbogi si ni yi ti ọpọ ko ṣe ni itẹsiwaju ninu irin-ajo igbagbọ wọn, ti wọn ko si ma gbadun Ọlọrun bi o ti ṣe tọ ati yẹ. Ti wọn ko ba si ronupiwada, ki wọn si bẹrẹ si ni kọ iha ti o tọ ati ti o yẹ si iṣẹ iranṣẹ awọn ti a ran si wọn ati si ọrọ Ọlọrun ti wọn n mu tọ wọn wa, aye wọn ati irin-ajo igbagbọ wọn ko ni lọ bi o ti ṣe yẹ ki o lọ.

PÀTÀKÌ MÍMỌ IPÒ ÀWỌN ỌMỌ ỌLỌ́RUN

Bi a ti ṣe wa ri ninu lẹta Pọọlu yi, aye awọn ọmọ ijọ Tẹsalonika n lọ bi o ti ṣe yẹ ki o lọ ninu irina-ajo igbagbọ wọn pẹlu Kirisiti Jesu, bi o tilẹ jẹ wipe awọn apọsiteli yi ko duro pẹ lọdọ wọn. Bawo ni wọn ṣe wa mọ pe aye awọn onigbagbọ yi n lọ bi o ti ṣe yẹ ki o lọ nigba ti o jẹ wipe wọn ko si pẹlu wọn? Nipasẹ Timoti, ẹni ti o ṣe ibẹwo si wọn, ni wọn ṣe mọ. Eyi tilẹ wa jẹ ki Pọọlu mẹnuba diẹ lara pataki ki gbogbo wa ti a jẹ ọmọ Ọlọrun, paapaa julọ awọn adari wa, ma fi gbogbogb igba mọ ipo awọn ọmọ Ọlọrun ti a jọ n jọsin papọ, ti a jọ n gbe papọ, ti wọn jẹ ẹbi wa tabi ti wọn wa ni abẹ isakoso wa. Gẹgẹ bi o ti ṣe sọ, igba meji ọtọọtọ ni o tikararẹ gbiyanju lati yọju si awọn ara Tẹsalonika yi, lẹyin igba ti inunibini ti jẹ ki wọn kuro ni ilu wọn, ki o ba le mọ ipo wọn. Wo alaye rẹ lori ọrọ yi:

“Ṣugbọn ara, awa ti a ya nipa kuro lọdọ yin fun saa kan nipa ti ara, kii ṣe ni nipa ti ẹmi. Pẹlu ọpọlọpọ itara ni awa ṣe aniyan ti a si fẹ gidigidi lati ri oju yin. Nitori awa fẹ lati tọ yin wa, ani emi Pọọlu lẹẹkinni ati lẹẹkeji, Satani si de wa ni ọna.” (1Tẹsalonika 2:17-18)

Pọọlu ko salaye lẹkunrẹrẹ ninu lẹta yi ọna ti Satani gba di oun ati awọn alabaṣiṣẹ rẹ lọwọ lati yọju si awọn ara Tẹsalonika yi. Ṣugbọn pẹlu nkan ti o sọ yi, a ri daju pe Satani le di ọmọ Ọlọrun lọwọ lati ṣe ifẹ rẹ. O le lo ọ̀dá owo, inunibini, aisan, ijamba, ajalu, ofin ailojutu ati bẹẹbẹẹ lọ lati di wọn lọwọ. Ti a ko ba wọn ni imọ eyi, a ko ni gbe igbesẹ ti o loorin lati doju ija kọ oun ati awọn iṣẹ ibi rẹ pẹlu awọn ohun ija ti Ọlọrun ti fun wa, ki a si rin ni iṣẹgun lori wọn.

Ni kukuru, Satani di Pọọlu ati awọn iyoku rẹ lọwọ lati de Tẹsalonika nitori pe o mọ pataki ki wọn yọju si awọn onigbagbọ yi, ki wọn si mọ ipo ti wọn wa. Ki wa ni pataki ki a mọ ipo awọn onigbagbọ ti o wa labẹ iṣakoso wa tabi ninu aye wa? Lara rẹ ni iwọnyi, gẹgẹ bi Pọọlu ti jẹ ki o ye wa:

– Fun ifẹsẹmulẹ awọn ọmọ Ọlọrun ninu igbagbọ (1Tẹsalonika 3:1-4): Ki a di atunbi kọ ni opin ohun gbogbo ninu irin-ajo Kirisitiẹni; ipilẹ lasan ni o jẹ. Ṣugbọn ọpọ ni eyi ko ye. Nitorina eṣu gba wọn danu lẹyin ti wọn ti di atunbi tan, ko si jẹ ki wọn fi ẹsẹ mulẹ ninu igbagbọ wọn. O wa le jẹ nitoripe wọn ko fi aye silẹ fun awọn ọmọ Ọlọrun ti òye ye lati ṣe amojuto aye wọn ni ibamu pẹlu ifẹ rẹ ni eyi ṣe waye tabi ki o jẹ wipe awọn ọmọ Ọlọrun ti o wa ninu aye wọn ko ni oye pe ojuṣe wọn ni lati jẹ olutọju fun awọn ara wọn. Amọ òye eyi ye Pọọlu daradara. O mọ wipe oniruuru idojukọ ni awọn ti o ba gbagbọ ninu Jesu yoo ba pade ninu aye yi ati nitori igbagbọ wọn. O si ti tẹnumọ eyi fun awọn ara Tẹsalonika nigba ti o wa lọdọ wọn. Idi niyi ti oun ati awọn alajọṣiṣẹpọ rẹ ṣe lepa pẹlu itara lati yọju si awọn ara yi, ki wọn ba le tu wọn ninu, fi ọrọ Ọlọrun bọ wọn ati fun wọn ni oriya lati ṣe amulo oore-ọfẹ Kirisiti Jesu lati fi ẹsẹ mulẹ ninu igbagbọ wọn, bi o ti wu ki idojukọ ati inunibini ti wọn n ba pade pọ to. Ti awa naa ba fẹ ki awọn ọmọ Ọlọrun ti a jọ n jọsin pọ tabi ti o wa ninu aye wa fi ẹsẹ mulẹ ninu igbagbọ wọn, a gbọdọ ma fi gbogbo igba lepa lati mọ ipo ti wọn wa ati lati ṣe ohun yowu ti Ọlọrun ba fun wa ni oore-ọfẹ lati ṣe ki igbagbọ wọn ba le duro ṣinṣin.

– Ki laala awọn adari tabi olusọ awọn ọmọ Ọlọrun ma ba ja si asan (1Tẹsalonika 3:5-9): Pọọlu ati awọn yoku rẹ ti ṣiṣẹ karakara laarin awọn ara Tẹsalonika ki wọn to fi wọn silẹ. Ṣe o wa yẹ ki laala wọn lori awọn ara yi jasi asan bi? Ṣe o wa yẹ ki wọn de ijọba ayeraye Ọlọrun ki wọn si ma ba awọn eniyan yi nibẹ? Ko yẹ ki o ri bẹ. Ṣugbọn, gẹgẹ bi owe ti o sọ wipe, “Kí ojú má rí ibi, gbogbo ara lòògùn rẹ̀,” ti wọn ko ba gbe igbesẹ lati mọ ipo awọn ara yi, ki wọn si mọ bi wọn ti ṣe n ṣe deede si ninu irin-ajo igbagbọ wọn, o ṣeeṣe ki laala ti wọn ti ṣe lori wọn ja si asan. Idi si niyi ti wọn fi ṣe ran Timoti lati yọju si wọn, nigba ti wọn ri pe ko ṣeeṣe fun gbogbo wọn lati lọ. Ti awa naa ko ba fẹ ki gbogbo laala wa, adura wa, fififunni wa ati awọn ọrọ iyanju wa si awọn ọmọ Ọlọrun ti o wa ninu aye wa tabi ti a fi si abẹ akoso wa ja si pabo, a gbọdọ ri daju pe a mọ bi o ti ṣe n lọ ninu aye wọn ati pe a ko jina si wọn rara. Eyi yoo jẹ ki Ọlọrun le lo wa lati daabo bo wọn kuro lọwọ iṣẹ ati akitiyan Eṣu lati bi wọn lulẹ. Ti a ba wa ṣe ohun gbogbo ti o yẹ ki a ṣe fun awọn eniyan, ti wọn si papa wa ṣegbe, Ọlọrun funrarẹ yoo mọ wipe a ṣe iwọn ti a le ṣe, yoo si pin wa ni ere ti o tọ fun iṣẹ wa. Amọ ṣe a le fọwọ ṣoya pe a n ṣe ohun gbogbo ti o yẹ ki a ṣe ki laala wa lori awọn ọmọ rẹ ma ba ja si asan bi?

– Ki a le mu atunṣe tabi aṣepe ba kudiẹ-kudiẹ yowu ti o ba sọrọ mọ igbagbọ awọn ọmọ Ọlọrun (1Tẹsalonika 3:10): Pe a fi ẹsẹ mulẹ ninu igbagbọ wa ninu Kiristi ko tunmọ si pe a ti di pipe patapata ni iwa, ero, iṣe, iwa-mimọ, ifẹ ati awọn eso tabi ẹbun ẹmi yoku. Nitorina, a nilo ibaṣepọ ti o loorin pẹlu awọn ọmọ Ọlọrun miran bi tiwa, ti awọn naa duro ṣinṣin, ki Ọlọrun ba le ti ipasẹ wọn ṣe aṣepe awọn nkan ti o ku-diẹ-kaato ninu irin-ajo igbagbọ wa. Bi Pọọlu ti ṣe fi ye wa ninu lẹta yi, awọn Ijọ Tẹsalonika jẹ awokọsẹ rere fun gbogbo awọn ọmọ Ọlọrun ti o wa ni ayika wọn. Idi si ni pe igbagbọ, ifẹ ati ireti wọn ninu Kirisiti Jesu munadoko. Sibẹsibẹ, apọsiteli yi mọ wipe o ṣeeṣe ki a si ri awọn kan lara wọn tabi awọn abala aye wọn kan ti nkan ko ti ṣe deede to ninu irin-ajo igbagbọ wọn. Fun apẹẹrẹ, bi lẹta rẹ keji ti ṣe fi ye wa, a ri awọn ọlẹ ati onimẹlẹ eniyan laarin wọn, awọn ti wọn n titori pe awọn n duro de Jesu kọ lati ṣiṣẹ ati lati wulo fun ara wọn ati fun awọn miran (2Tẹsalonika 3). Nitorina, o ri wipe o ṣe pataki ki oun yọju si wọn lati mọ ipo wọn, ki o ba le mojuto awọn kudiẹ-kudiẹ yowu ti o ba foju gáání ni aarin wọn. Awa naa wa gbọdọ fi eyi ṣe ẹkọ, ki a si ma fi gbogbo igba kiyesi awọn nkan ti a ba woye pe ko dara to ninu aye awọn ara wa, ki a ba le ṣe atunṣe wọn pẹlu ọgbọn Ẹmi mimọ.

– Awọn ọmọ Ọlọrun ti o ba tipasẹ wa duro ṣinṣin yoo jẹ ade ogo ati ayọ fun wa nigba ti Jesu ba de (1Tẹsalonika 2:19-20): Bi o tilẹ jẹ wipe koko yi gan ni Pọọlu kọkọ mẹnuba ninu lẹta yi gẹgẹ bẹ ọkan pataki lari idi ti a ṣe gbọdọ ma fi gbogbo igba mọ ipo awọn ọmọ Ọlọrun ti o wa ni abẹ iṣakoso wa tabi ti o wa ninu aye wa, ki a si ran iduro-ṣinṣin wọn lọwọ, oun ni yoo jẹ iriri ti a o ni kẹyin. Iriri yi ko si ni waye ninu aye yi bikoṣe ninu ijoba ayeraye ti Ọlọrun yoo fi lọlẹ ni akoko tirẹ. Ki ni nkan ti a n sọ? Oun naa ni wipe gbogbo awọn ti Ọlọrun ba lo wa lati jẹ ki wọn duro ṣinṣin ninu igbagbọ de opin ni yoo jẹ ade ogo ati ayọ fun wa nigba ti Jesu ba de. Ọpọ ọmọ Ọlọrun ni o n wa ogo wọn ti o sọnu kaakiri loni nitori pe oye nkan ti a n pe ni ogo ko ye wọn. Fun apẹẹrẹ, ki ni ogo Òrùn? Ogo Òrùn ni ki o tan imọlẹ kaakiri aye. Nitorina, ogo Kirisitiẹni ni ki ó gbe igbe aye ti Ọlọrun fẹ ki o gbe, ki o si ṣe awọn iṣẹ ti O fẹ ki o ṣe lẹkunrẹrẹ. Ara awọn iṣẹ ti O si fẹ ki ó ṣe ni ki ó mojuto awọn ọmọ rẹ ti ó wa ninu aye rẹ tabi ti o wa ni abẹ akoso rẹ, Ti o ba si ṣe iṣẹ yi debi pe awọn eniyan yi de ijoba ayeraye rẹ, o didan ki o ri ere gba lọwọ Ọlọrun. Ere yi ni Pọọlu ati Peteru pẹlu pe ni ade ogo ti ki i ṣa (1Peteru 5:1-4). Njẹ iwọ ha nifẹ si ade yi bi? Ti o ba nifẹ si, ripe o ṣe iṣẹ iranṣẹ rẹ fun iduro ṣinṣin awọn ọmọ Ọlọrun de opin ni aṣepe.

ỌRỌ IPARI

Ni ipari, Pọọlu gba adura pe ki Ọlọrun la ọna ti Satani di fun wọn lati le de ọdọ awọn ara Tẹsalonika yi, ki wọn ba le mu ifẹ rẹ ṣẹ lori aye wọn (1Tẹsalonika 3:11). O si tun gba adura fun awọn ara yi naa pe ki Ọlọrun mu wọn pọ si ninu ifẹ rẹ, ki O si tun fi okun fun ọkan wọn lati wa ni alailabuku ati ni mimọ nigba ti Jesu Oluwa wa ba farahan (1Tẹsalonika 3:12-13). Awa na si gbọdọ kọ lati ma gba irufẹ awọn adura yi. A gbọdọ ko lati ma gbadura pe ki Ọlọrun la ọna fun wa lati ṣe ifẹ rẹ ni igbakigba ti a ba woye pe Satani n gbogun lati di wa lọwọ. A tun gbọdọ ma fi gbogbo igba gba a ladura pe ki Ọlọrun fi okun fun ọkan wa lati wa ni alailabuku ati ni mimọ nigba yowu ti Jesu Oluwa wa ba de. Aijẹbẹ, ipa wa ati akitiyan wa lati ṣe ifẹ rẹ ati lati duro ni pipe niwaju rẹ ni gbogbo igba di dandan ki o ja wa kulẹ.

IBEERE – Ọpọ ọmọ Ọlọrun ni ko ni oye pe Satani le di wọn lọwọ lati ṣe ifẹ Ọlọrun. Ki ni idi?

– Ki ni o ṣe pataki julọ si ọ ninu ẹkọ yi?

Lati ọwọ Johnson O. Lawal Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)