Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Ẹrẹ́nà 2023. Adura mi ni pe ki Ọlọrun gbe ọ ro lati jẹ ẹni naa ti yoo le ma fi gbogbo igba gbẹkẹle lati di dẹkun iwa ibi tabi lati ṣe idajọ rẹ nibikibi ti o ba wa, ki ododo rẹ ba le jọba nibẹ, ni orukọ Jesu. Amin.

Wayi o, ṣiṣe idajọ ibi tabi idajọ iwa aidara awọn eniyan ko ki fi gbogbo igba jẹ nkan ti o rọrun lati ṣe, pẹlupẹlu ninu ijọ Ọlọrun. Idi si ni pe ọpọ igba ni awọn eniyan ma n koro oju si tabi gbogun ti. Sibẹsibẹ, nkan ti o gbọdọ ma waye loorekoore ni, ti a ba fẹ ki awujọ wa wa ni ilera, ki o si tun wa ni ailewu fun wa lati gbe. Kiki awọn ti o ba si ṣetan lati ṣe idajọ iwa bi ati iwa aidara ni awọn ọna ti o tọna nikan naa ni o le jẹ adari otitọ fun Ọlọrun, yala nipa nkan ti aye yi ni tabi nipa nkan ti ẹmi.

Solomọni, ninu iwe rẹ, Oniwaasu, sọ eyi fun wa: “Nigba ti a ko ba tete ṣe idajọ fun ẹlẹṣẹ kiakia, ọkan awọn eniyan a maa kun fun ọpọlọpọ imọ lati ṣe ibi.” (Ìwé Oníwàásù 8:11) Ṣe o ri bayi? Ti awọn eniyan ba n ṣiwawu, ti ko si si ẹni ti yoo da wọn lẹjọ fun iwa aidara wọn, nṣe ni awọn ati awọn miran ti wọn ri bi wọn ti ṣe n ṣe ika ti wọn si n mu u jẹ yoo gba okun si lati tun ṣiwawu ṣiwaju si i. Ti eyi ba si tẹsiwaju, ti akoko kan ba to, Ọlọrun yoo nilo lati gbe igbesẹ lati ṣe idajọ awọn ika funrarẹ.

Fun apẹẹrẹ, asiko kan wa ti awọn ọkunrin Isiraẹli ti Mose ko jade lati Ijibiti wa bẹrẹ si ni ti ọwọ bọ ẹṣẹ agbere pẹlu awọn ọmọbinrin Moabu. Awọn ọmọbinrin yi si lo eyi lati tan wọn wọ inu ibọriṣa lọ. Nitorina, Ọlọrun ran ajakalẹ-arun si arin wa lati pa wọn run. Ki ni idi? Idi ni pe ko si ẹnikankan ti o mojuto tabi ṣe idajọ ọrọ naa nigba ti o bẹrẹ. Ki a ni pe ẹnikan ti mojuto ọrọ naa, ti o si tun ṣe idajọ rẹ nigba ti o ṣẹṣẹ bẹrẹ ni, ọpọ ninu awọn ọkunrin naa ko ba ma ti kopa ninu radarada naa ati pe Ọlọrun ko ba ma ti gbe igbesẹ lori rẹ.

Ni kukuru, igba ti Mose yoo fi ṣọji lati ṣe idajọ ọrọ naa, ọpọ eniyan ni o ti sọ ẹmi wọn nu. Nigba ti o tilẹ tun wa bẹrẹ si ni ba awọn onidajọ aarin awọn eniyan naa sọrọ lati ṣe iwadi ọrọ na ati lati ṣe idajọ awọn ti o kopa ninu rẹ, nṣe ni ọmọkurin ọkan lara awọn adari wọn tun mọ ọmọbirin Moabu kan wọ inu agọ rẹ lọ niwaju gbogbo wọn lati ṣe iṣekuṣe pẹlu rẹ. Eyi, bi mo to ṣe sọ ṣẹyin, ni o ma n ṣaba ṣẹlẹ nigba ti awọn eniyan ba n ṣiwawu, ti ko si si ẹni ti yoo da wọn lẹkun. Nṣe ni aya wọn yoo ki si lati ṣe nkan ti o buru ju eyi ti wọn ti ṣe ṣẹyin lọ. (Wo: Nọmba 25)

Ki a wa fọpẹ fun Ọlọrun pe ọdọmọkurin alufa kan kọ lati fi aye gba radarada yi lati tẹsiwaju ni ilẹ naa. Ẹni na ni Finehasi, ọmọ-ọmọ Aarọni. Ọkunrin yi mu ọ̀kọ̀ rẹ, o tẹle alagidi ọmọ Isiraẹli yi, o si pa oun ati ẹnikeji rẹ nibi ti wọn ti n wuwa ibi wọn. Nigba ti o si ṣe eyi tan, bi akọsilẹ iṣẹlẹ naa tun ṣe fi ye wa, lẹsẹkẹsẹ ni ajakalẹ-arun naa ṣiwọ. Ọlọrun wa sọ awọn ọrọ iwuri yi nipa rẹ fun Mose:

“Finehasi, ọmọ Eliasa, ọmọ Aarọni alufaa ti yi ibinu mi pada kuro lara awọn ọmọ Isiraẹli, nipa itara rẹ nitori mi laarin wọn, ki emi ki o ma baa ṣe run awọn ọmọ Isiraẹli ninu ọwọ mi. Nitori naa wi pe, kiyesi i, emi fi majẹmu alaafia mi fun un. Yoo jẹ tirẹ ati ti iru ọmọ rẹ lẹyin rẹ, ani majemu iṣẹ alufaa titi aye; nitori ti o ṣe itara fun Ọlọrun rẹ, o si ṣe etutu fun awọn ọmọ Isiraẹli” (Nọ́mbà 25:11-13)

Njẹ o ri bayẹn? Ọlọrun sọ wipe idi ti Oun ko ṣe pa awọn ọmọ Isiraẹli run fun ẹṣẹ wọn ni asiko ti a n sọ yi ni Finehasi. Lọna wo? Gẹgẹ bi Ọlọrun ti sọ, Finehasi ṣe etutu fun ẹṣẹ awọn eniyan naa nipa ṣiṣe idajọ ọkunrin yẹn ati enikeji rẹ ninu ẹṣẹ wọn. Nitorina, igbakigba ti awa naa ba n ṣe idajọ iwa aidara tabi iwa-ika-ki-iwa-ika ni ọna ti o tọ, bi igba ti a n ṣe etutu fun ẹṣe awọn eniyan wa ni. Bi Ọlọrun si ṣe gboriyin fun Finehasi ni igba yẹn naa ni yoo ṣe gbe oriyin fun awọn naa.

Nitorina, ibibiki ti o ba ti wa ni ipo lati ṣe idajọ iwa ibi tabi lati ṣe idajọ iwa aidara awọn eniyan, ma ṣe lọra rara lati ṣe e. Bẹẹni, awọn ti ọrọ naa kan, pẹlupẹlu ninu ijọ, le da ọ lẹbi tabi sọ ọ ni orukọ-ko-rukọ fun ṣiṣe bẹ ẹ. Ṣugbọn o nilo lati ṣe ohun ti o nilo lati ṣe. Aijẹbẹ, gẹgẹ bi Eli ti o kuna lati ṣe idajọ iwa ibi awọn ọmọkunrin rẹ, nṣe ni iwọ naa yoo ma ranṣẹ pe Ọlọrun wa lati ṣe idajọ ọrọ naa funrarẹ. Ta wa ni o mọ ọna ti yoo gba dajọ?

Ki o ni ọsẹ ologo.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia di pupọ si fun ọ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ ti so oṣu Èrèlé ati oṣu Ẹrẹ́nà mọ ara wọn. Mo si gbadura pe ki Ọlọrun jẹ ki ọkan rẹ ma fi gbogbo igba tẹ́wọ́gba ọrọ rẹ ti O sọ silẹ fun igbala ọkan rẹ pẹlu irẹlẹ. Amin.

Ninu ẹpisiteli rẹ, Jèmíìsì sọ eyi fun wa nipa ọrọ Ọlọrun ati nipa iha ti o yẹ ki a kọ si: “Nitori naa, ẹ lepa lati bori gbogbo eeri ati iwa buburu ti o gbilẹ yika, ki ẹ si fi ọkan tutu gba ọrọ naa ti a gbin ti o le gba ọkan yin la.” (Jákọ́bù 1:21) Ki ni o yẹ ki a ṣe pẹlu ọrọ Ọlọrun ti a n gbin sinu ọkan wa? Gẹgẹ bi apọsiteli yi ti ṣe wi, nṣe ni o yẹ ki a tẹwọgba pẹlu irẹlẹ. Eyi tunmọ si pe niwọn igba ti nkan ti o n tọ wa wa ba ti jẹ ọrọ Ọlọrun, a ko gbọdọ kọ ọ silẹ, gbe ju sẹgbẹkan tabi ba a jiyan. Dipo eyi, nṣe ni o yẹ ki a tẹwọ gba a pẹlu irẹlẹ, pẹlu imoye pe bi ọrọ rẹ tilẹ da bi ọrọ omugọ leti wa, agọ̀ Ọlọrun ṣi gbọn ju ọgbọn wa lọ. (Wo: 1Kọ́ríntì 1:25)

Idi wo wa ni o ṣe yẹ ki a fi irẹlẹ tẹwọgba ọrọ Ọlọrun, bi Jemiisi ti ṣe sọ fun wa? Idi naa ni pe ọrọ naa le gba ọkan wa la. Ọrọ Ọlọrun ni agbara lati gba wa la kuro lọwọ aye ibajẹ yi ati kuro lọwọ gbogbo ete eṣu lati pa wa run. Ṣugbọn a ko ni ni iriri agbara igbala ọrọ rẹ ti a ko ba fi irẹlẹ tẹwọ gba a, ki a si tun ṣe amulo rẹ.

O wa ṣeni laanu pe ọpọ ti o pe ara wọn ni ọmọ Ọlọrun, ti wọn si n gbọ ọrọ rẹ loorekoore ni ko ko ki rẹ ara wọn silẹ lati tẹwọ gba a ati lati ṣe amulo rẹ. Ki si ni idi? Idi ni pe wọn gberaga. Wọn ro wipe awọn gbọn tabi jafafa ju Ọlọrun lọ ati wipe awọn le mojuto ara wọn lalai fi tirẹ ṣe. Ṣugbọn ṣe a ri ẹni naa lara wa ti o gbọn bi Ọlọrun ẹlẹda wa? Ṣe a ri ẹni naa ti o le mojuto ọrọ aye rẹ funrarẹ lalai ma pa a run nikẹyinkẹyin? Ko si ẹni naa lara wa ti o dangajia fun eyi.

Amọ igbakigba ti a ba kọ ohun ti Ọlọrun n sọ fun wa silẹ, ti a si yan lati ṣe bi a ti ṣe fẹ, nkan ti a n sọ ni pe a lọpọlọ ju u lọ ati wipe a ko nilo itọni tabi ipese rẹ. Ibi yowu ti eyi ba si ti ri bẹ ẹ, o di dandan ki igbala fo wa ru. Eyi si ni alaye fun bi a ti ṣe ri ọpọ ọmọ Ọlọrun ti ko kuro loju kanna fun ọpọ ọdun tabi ti ko ni iriri igbala kuro lọwọ awọn iṣẹ eṣu kan ninu aye wọn. Wọn n fi gbogbo igba gbọ ọrọ Ọlọrun ṣugbọn wọn ko fi irẹlẹ tẹwọ gba a. Nitorina, ọrọ naa ko le e gba wọn la.

Boya bi nkan si ṣe ri fun iwọ naa ni eyi. Boya idi ti ọrọ Ọlọrun ko fi ma a ṣiṣẹ ninu aye rẹ ni pe iwọ naa ko rẹ ara rẹ silẹ lati tẹwọ gba a ati lati ṣe ohun ti O n sọ fun ọ nipa aye rẹ, igbagbọ rẹ, iṣẹ rẹ, okowo rẹ, ẹkọ rẹ, igbeyawo rẹ, ilera rẹ, eto isuna rẹ ati bẹẹ bẹẹ lọ. A jẹ wipe o nilo lati ronupiwada, ki o si yi ọna rẹ pada niyẹn. Ki ni láríjà ki o ma lo ọpọlọpọ wakati lọsọọsẹ lati gbọ ọrọ ti o ko ni ṣiṣẹ le lori? Ṣe ko kuku san ki o ma gbọ rara?

Ni kukuru, ti a ba fẹ sọ otitọ, ki o ma gbọ ọrọ Ọlọrun rara buru ju ki o gbọ ki o ma mulo lọ. Idi si ni pe gbogbo anfaani lati di ẹni igbala ni ipasẹ rẹ ni iwọ yoo ti ti ilẹkun rẹ mọ ara rẹ. Nitorina, o nilo lati tẹsiwaju lati ma gbọ ọrọ rẹ. Ṣugbọn iyẹn ko to fun ọrọ yi lati ṣiṣẹ ninu aye rẹ. Fun un lati ṣiṣẹ ninu aye rẹ ati lati ya ọ ya ainitẹsiwaju ati iparun, o nilo lati rẹ ara rẹ silẹ lati tẹwọ gba a ati lati ṣe amulo rẹ. Adura mi si ni pe ki ọkan rẹ gba okun lati ma fi gbogbo igba ṣe eyi, ni orukọ Jesu. Amin.

Kí o ní ọ̀sẹ̀ tí ó dára.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Àkórí: Tí ààyò Ọlọ́run bá le kùnà
Láti ọwọ́: J.O. Lawal
Ọjọ́: Èrèlé 19, 2022
Àtẹ̀léra: Látorí tábìlì Pásítọ̀
Nọ́múbà: Vol. 11, No. 42

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Èrèlé 2023. Mo gbadura pe ki Ọlọrun jẹ ki alaafia rẹ jọba ninu aye wa ati ni ibi gbogbo ni orilẹ-ede yi ninu gbogbo ọsẹ naa, ni orukọ Jesu. Amin.

Ko jẹ iroyin mọ pe, gẹgẹ bi orilẹ-ede, a ti wọnu awọn ọsẹ idibo. Awọn eniyan kaakiri orilẹ-ede yi yoo si bẹrẹ si ni jade lọ lati lọ di ibo wọn fun awọn oludije ti o ba wu wọn. Bi o tilẹ wa jẹ wipe ko ki i ṣe iṣẹ mi ni lati sọ ẹni ti o yẹ ki o dibo fun tabi ti ko yẹ ki o dibo fun lara awọn oludije ti o wa nilẹ han ọ, iṣẹ mi ni lati sọ fun ọ pe ki o ma ṣe fi igbẹkẹle rẹ sinu ọkankan ninu wọn ṣugbọn sinu Ọlọrun.

Lotitọ, o jẹ dandan ki o ni idi ti o ṣẹ fẹ fi ibo rẹ gbe ẹni ti o fẹ fi gbe wọle wọle. Amọ, bi o ti wu ki idi ti o ṣe mu eni yi suwọn ati dangajia to, ma ṣe fi igbẹkẹle rẹ sinu ẹni naa ayafi sinu Ọlọrun. Ki si ni idi ti ko ṣe yẹ ki o fi igbẹkẹle rẹ sinu wọn? Idi naa ni pe bi ẹni naa tilẹ jẹ oludije ti Ọlọrun funrarẹ yan, o ṣi le kuna.

Eyi, o wa ṣeni lanu, ni ko ye ọpọ awọn adari ijọ wa ti o n sọtẹlẹ ati ti o n sọ oniruuru ọrọ nipa awọn kan ti wọn gbagbọ pe Ọlọrun ti yan lati jẹ adari fun orilẹ-ede wa ati awọn ipinlẹ wa. Eyi ko si ye wọn nitoripe wọn ko ma kiyesi ọrọ Iwe mimọ. Iwe mimọ fi han wa pe bi o tilẹ jẹ wipe Ọlọrun ni o ya eniyan si ipo adari, ko tunmọ si pe yoo ṣe daradara tabi pe yoo jẹ alabukun fun awọn eniyan rẹ. O ṣeeṣe ki o pada jẹ egun fun wọn ati idojuti fun Ọlọrun.

Fun apẹrẹ, a sọ fun wa ninu bibeli pe Ọlọrun ni o yan Sọọlu, ọmọ Kiṣi, ti O si tun ta ororo le lori gẹgẹ bi ọba akọkọ fun Isiraẹli. Ṣe o wa ṣe daradara bi? Rara o, ko ṣe daradara. Nitorina, ni igba ti o to asiko kan, ọrọ rẹ su Ọlọrun. Iwọ naa wo nkan ti a sọ ninu bibeli lori eyi: “Nigba naa ni ọrọ Ọlọwa tọ Samuẹli wa pe, “Emi kaanu gigigidi pe mo fi Sọọlu jọba, nitori pe o ti yipada kuro lẹyin mi, ko si pa ọrọ mi mọ.” Inu Samuẹli si bajẹ gidigidi, o si kepe Oluwa ni gbogbo oru naa.” (1Samuẹli 15:10-11) Njẹ o ri bayẹn? Bi o tilẹ jẹ wipe Ọlọrun funrarẹ ni o yan Sọọlu, ti O si tun de ni ade gẹgẹ bi Ọba, O pada kabamọ pe Oun yan an.

Wayi o, awọn eniyan a ma sọ ni ọpọ igba pe Ọlọrun ko ki i kabamọ lori ohunkohun. Amọ ero tara wọn lasan ni eyi, o si lodi si nkan ti o wa ninu iwe minọ. Bi a ti ṣe ri ninu Iwe mimọ, awọn asiko kan wa ti Ọlọrun kabamọ pe Oun ṣe awọn nkankan. Ko si wa pa irọ fun ara rẹ ni awọn asiko yi. Dipo bẹẹ, nṣe ni O dojukọ eyi ti o jẹ ododo nipa awọn nkan naa ti o mu abamọ wa fun un, ti O si mojuto wọn. Nitorina, ti iwọ naa ba n ni ero abamọ tabi ijakulẹ lori awọn igbesẹ kan ti o gbe sẹyin, awọn igbesẹ ti o dabi ẹni pe o dara ni akoko naa ṣugbọn ti o ti wa yipada si eyi ti ko suwọn, ma ṣe gbogun ti ara rẹ pupọju. Dipo eyi, nṣe ni o ko gbajumọ eyi ti o jẹ okodoro ọrọ lori nkan ti o ṣẹlẹ, ki o si ṣe nkan ti o tọ nipa rẹ.

Ọlọrun nilo lati dojuko nkan ti o jẹ otitọ lori ọrọ Sọọlu ati lati ṣe ohun ti o yẹ lori rẹ. O nilo lati ta ororo le elomiran lori dipo rẹ, bi o tilẹ jẹ wipe o ṣi wa lori itẹ. Ṣe inu rẹ wa dun pe Oun ni lati ṣe eyi? Rara! Bawo wa ni ti Wolii Samuẹli ti o ṣoju fun Ọlọrun lati fi Sọọlu jọba? Ṣe inu tirẹ dun si bi ọkunrin ṣe ṣina, ti a ko si le mu wa si ironupiwada? Rara! Dipo bẹẹ, a jẹ ki o ye wa ninu bibeli pe nṣe ni o n ṣọfọ lori Sọọlu titi Ọlọrun fi da a lẹkun rẹ, ti O si sọ fun pe ki o lọ ya elomiran sọtọ dipo rẹ.

Kini koko ọrọ mi? Oun naa ni pe bi o tilẹ jẹ wipe awọn eni iyasọtọ Ọlọrun ni o dibo fun ninu awọn eto idibo ti o n bọ yi, o ko le fi ọwọ rẹ sọya pe wọn ko ni ja ọ kulẹ, nitori wọn le ja ati Ọlọrun ati iwọ kulẹ. Ti ẹni iyasọtọ Ọlọrun ba wa ja wa ku lẹ, ṣe a wa le fọwọ sọya pe awọn ayanfẹ tiwa ko ni ja wa kulẹ? A ko le ṣe bẹ. Ti wọn ba wa ja wa kulẹ, ki ni a fẹ ṣe? Ṣe awa naa yoo wa ma ṣọfọ bi Samuẹli titi di akoko idibo miran ni bi, iyẹn lẹyin ọdun mẹrin si asiko yi?

Adura mi ni pe ko ni si ọkankan ninu awọn ti yoo di adari wa ninu eto idibo yi ti yoo pada wa jẹ ki a ṣọfọ ni orilẹ-ede yi. Ṣugbọn a gbọdọ kiyesara lati ma fi igbẹkẹle wa sinu ẹnikankan ninu wọn ayafi sinu Ọlọrun. Nipa ṣiṣe bayi, bi wọn ba tilẹ ja wa kulẹ, a o le gbojule Ọlọrun lati yi ikuna wọn pada si rere fun wa.

Kí o ní ọ̀sẹ̀ alárinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore ọfẹ ati aanu di pupọ si fun ọ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Èrèlé 2023. Mo si gbadura pe ki Ọlọrun tikararẹ ṣe ọ ni mimọ ati ailabuku, lọkan, lẹmi ati lara, nigba ti Jesu Oluwa ati Olugbala wa ba de. Amin.

Bi a ti ṣe ri ninu iwe mimọ, Jesu Kirisiti Oluwa wa n pada bọ wa fun ijọ rẹ ni akoko ti Ọlọrun Baba ti yan. Ṣugbọn ko ki i ṣe ijọ eleeri tabi ijọ ti o ti dibajẹ ni O n pada bọ wa fun. Dipo eyi, O n pada bọ wa fun ijọ ti ko ni abuku, ti ko ni abawọn ati eyi ti yo wa ni ibarẹ pẹlu rẹ nigba ti o ba de. (Wo: Efesu 5:26; 2Peteru 3:14)

Amọ ṣe a wa le wa ni ailabawọn, ailabuku ati aini ohunkohun ti le fa idojuti nigba ti O ba pada wa? Bẹẹni, a le e wa bẹ ẹ. A le e wa bẹ ẹ nitoripe Ẹmi Ọlọrun wa ninu wa, O si n fi gbogbo ara ṣiṣẹ lati ri pe eyi ri bẹ. Bẹẹni, O n ṣiṣẹ ni gbogbo igba lati ri daju pe iṣẹ rere ti O bẹrẹ ninu wa nigba ti a ṣẹṣẹ di atunbi jẹ ṣiṣe titi di ọjọ Oluwa. Nitorina, wiwa ni ailabuku wa nigba ti Jesu ba de ko da lori ifẹ wa tabi ilakaka wa ṣugbọn o da lori iṣẹ Ẹmi Ọlọrun ninu wa ati lori wa. (Wo: Filipi 1:6 & 2:12-13)

Amo ṣa o, awa naa si wa tun gbọdọ ni lọkan lati wa ni ailabaku nigba ti O ba pada de. Yatọ si iyẹn, a tun gbọdọ ma ṣe amulo oore-ọfẹ rẹ lati gbe igbe aye ti O fẹ ki a gbe. Aijẹbẹ, o ṣeeṣe ki o jẹ wipe awa gan ni a o papa wa fooro iṣẹ ti O n ṣe lati jẹ ki a wa ni alailabuku.
Siwaju si, o ṣe pataki ki a ma fi oju silẹ lati ṣọ ara wa, ki Satani ma ba ṣe aṣeyọri ni titan ẹnikẹni kuro laarin wa lọ si ibi ti yoo ti pa igbagbọ ati aye wọn run. Bibeli sọ awọn nkan wọnyin fun wa lori ọrọ yi:

“Ẹ kiye sara, ara, ki ẹnikẹni ninu yin ki o ma ṣe ni ọkan buburu ati ti aigbagbọ, eyi ti yoo mu yin kuro lọdọ Ọlọrun alaiye.” (Heberu 3:12)

“Ẹ maa kiye sara ki ẹnikẹni ki o ma ṣe kuna oore-ọfẹ Ọlọrun, ki gbongbo ikoro kan ki o ma baa hu soke ki o si yọ yin lẹnu, ọpọlọpọ a ti ipa rẹ di aimọ. Ki ẹnikẹni ma baa di alagbere tabi alaiwa-bi-Ọlọrun bi Isọ, ẹni ti o ti itori okele ounjẹ kan ta ogun ibi rẹ. Nitori ẹyin mọ pe lẹyin naa, nigba ti o fẹ lati jogun ibukun naa, a kọ ọ (nitori ko ri aaye ironupiwada) bi o tilẹ jẹ wi pe o fi omije wa a gidigidi.” (Heberu 12:15-17)

Njẹ o ri bayẹn? Ti gbogbo wa ba fẹ wa ni mimọ ati ailabuku nigba ti Jesu Oluwa wa ba pada de, a gbọdọ fi oju silẹ lati ma ṣọ ara wa. Nipa ṣiṣe eyi, a o le gbe igbesẹ akin lati tọ ara wa sọna, lati ba ara wa wi ati lati daabo bo awọn ara wa, ti a ba kẹfin pe Satani n ṣiṣẹ lati fi pakute mu wọn nipasẹ owu jijẹ, ojukokoro, ẹtanu, iṣọtẹ, ainitẹlọrun, pansaga tabi iṣẹ ẹran ara miran.

Fun apẹrẹ, nigba ti awọn ara ile Kloe ti ijọ awọn ara Kọrinti ri pe ẹran ara ti gba ijọba ijọ yi, wọn ko fi akoko ṣofo rara lati fi to Apọsiteli Pọọlu, ti o jẹ adari wọn ninu ẹmi, leti. Wọn ri wipe iyapa, owu jijẹ, igberaga, iṣekuṣe, iyanjẹ ati aibikita fun igbagbọ awọn ti wọn ṣi jẹ ọmọ ọwọ ninu igbagbọ ti n fa ijọ yi ya. Nitori eyi wọn kọ lẹta si apọsiteli yi, wọn si bere fun amojuto rẹ ni kiakia. Idi niyi ti o ṣe kọ 1Kọrinti. Nitorina, lẹta yi jẹ idahun si ipohunrere ati adura awọn ọmọ ijọ kan ti wọn fẹ ri pe ijọ Ọlọrun wa ni mimọ ati ni ailabuku nigba ti Jesu ba de.

O wa ṣeni laanu pe, loni, ti awọn ara kan ba n ṣe nkan ti o jọ mọ eyi, ti wọn bẹrẹ si ni gbe igbesẹ lati ri wipe ijọ wọn wa ni yiya si mimọ si Oluwa, nṣe ni awọn ara miran yoo ma pe wọn ni orukọ, ti wọn yoo si ma ba wọn ja. Ki ni idi? Idi ni pe ifẹ wọn si okunkun si wa digbi. Nitorina, wọn ko fẹ ki iṣẹ rẹ di fifihan tabi mimojuto. Ti a ba wa fi aye gba irufẹ awọn wọnyi lati pa otitọ lẹnu mọ tabi tẹ ori rẹ ba laarin wa, nṣe ni a o ma ran wọn lọwọ lati pa ara wọn ati awọn miran run ati lati ba orukọ Ọlọrun jẹ.

Nitorina, ti wiwa wa ni ailabuku nigba ti Jesu ba de ba ka ọ lara, fi oju rẹ silẹ, ki i si ṣe lati ṣọ ara rẹ nikan ṣugbọn lati ṣọ awọn ara rẹ yoku naa. Ti o ba si wa ri wipe wọn n kuna ni ọna kan tabi omiran, ma ṣe fa ṣẹyin rara lati koju wọn tabi awọn ti o le ran wọn lọwọ pẹlu otitọ, yala inu wọn dun si tabi ko dun si. Amọ ọjọ kan n bọ ti wọn yoo dupẹ lọwọ rẹ fun ṣiṣe oun ti o tọna lati gba wọn la tabi ti wọn yoo da ara wọn lẹbi fun kikọ ifẹ Ọlọrun fun aye wọn silẹ.

Ki o ni ọṣẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Èrèlé 2023. Mo si gbadura pe ki Ọlọrun pa ọ mọ kuro ninu gbogbo ibi awọn ọjọ ikẹyin yi ti o n pa igbagbọ ati aye awọn eniyan run. Amin.

Mo gba adura yi si Ọlọrun fun ọ nitoripe mo mọ pe ifẹ rẹ ni lati pa gbogbo awa ti a jẹ ọmọ rẹ mọ kuro ninu idibajẹ ati awọn ibi ti o wa ninu awọ ọjọ ikẹyin yi. Bibeli tilẹ sọ fun wa pe a le gbẹkẹle lati pa wọn mọ nitori olododo Ọlọrun ni o jẹ (1Tẹsalóníkà 5:23-24). Ṣugbọn ọtọ ni ki Ọlọrun mura giri lati pa aye ati igbagbọ wa mọ; ọtọ tun si ni ki awa naa fi ara wa si ibi ti yoo ti le ṣe bẹ ẹ. Ti o ko ba fi ara rẹ si ibi ti Ọlọrun ti le pa aye ati igbagbọ rẹ mọ, o ko le wa ni ipamọ. Eyi ko si ki ṣe epe. Otitọ pọnbele ni.

Bawo wa ni o ṣe le fi ara rẹ si ibi ti Ọlọrun ti le pa ọ mọ kuro ninu awọn idibajẹ awọn ọjọ ikẹyin yi? O le ṣe eyi nipa fifi ara rẹ jin fun ọrọ otitọ rẹ, yala o rọrun fun ọ lati tẹwọgba tabi ko rọrun fun ọ lati tẹwọgba. Pọọlu, ninu lẹta rẹ si Timoti, sọ eyi:

“Nitori naa mo paṣẹ fun ọ niwaju Ọlọrun, ati Kirisiti Jesu, ẹni ti yoo ṣe idajọ alaaye ati oku, ati nitori ifarahan rẹ ati ijọba rẹ. Waasu ọrọ naa, ṣe aisinmi ni akoko ti o wọ, ati akoko ti ko wọ; baniwi, ṣe itọni, gbani niyanju pẹlu ipamọra ati ẹkọ gbogbo. Nitori pe igba yoo de, ti wọn ki yoo le gba ẹkọ ti o ye kooro, ṣugbọn bi wọn ti jẹ ẹni ti eti n rin, wọn o lọ ko olukọ jọ fun ara wọn ninu ifẹkufẹ ara wọn. Wọn o si yi eti wọn pada kuro ninu otitọ, wọn o si yipada si itan asan.” (2Tìmótíù 4:1-4)

Ki ni Pọọlu sọ fun Timoti ninu akọsilẹ yi? Akọkọ, o sọ fun pe ki o ma waasu ọrọ Ọlọrun dipo ti yoo fi ma fi ero ọkan tirẹ, ero ọkan awọn eniyan ti o gbaju-gbaja lawujọ, itan adugbo tabi iṣeṣe ṣe iwaasu. Ekeji, o sọ fun pe ki o ma wa ni igbaradi lati tọ awọn ọmọ Ọlọrun sọna, lati ba wọn wi ati lati gba wọn niyanju, yala o rọrun fun tabi ko rọrun fun. Ṣugbọn ṣe ko yẹ ki Timoti ti mọ awọn nkan wọnyi tẹlẹ ni, paapaa julọ niwọn igba ti o jẹ wipe pasitọ awọn pasitọ ni o jẹ? O yẹ ki o ti mọ wọn.

Ki wa lo de ti o fi nilo ẹnikan lati ṣeṣẹ ma pasẹ fun lati fi ara rẹ jin fun ṣiṣe awọn nkan wọnyi? Bi a ti ri ninu akọsilẹ yi, idi ni pe akoko kan n bọ (akoko naa si ti de bayi) ti ọpọ awọn ti o pe ara wọn ni onigbagbọ ninu Kirisiti Jesu ko ni fi ara mọ ẹkọ ti o ye kooro ṣugbọn ti wọn yoo wa awọn ti yoo ma sọ nkan ti eti ti o n rin wọn fẹ gbọ fun wọn. Pọọlu tilẹ tẹsiwaju lati sọ wipe awọn wọnyi yoo yi eti wọn pada kuro lọdọ otitọ ki wọn ba le ma gbọ awọn itan abalaye ati irọ. Nigbati ti eyi ba si ṣẹlẹ, o ṣeeṣe ki Timoti bẹrẹ si ni ro wipe boya oun ti fe le mọ wọn ju, ki o si wa titori eyi bẹrẹ si ni yi iwaasu rẹ pada lati tẹ ifẹ wọn lọrun. Nitorina, Pọọlu kilọ fun niwaju Ọlọrun ati niwaju Jesu Kirisiti lati ma ṣe bẹ ẹ. Aijẹbẹ, yoo pa iṣẹ iranṣẹ rẹ run, yoo si tun padanu ere rẹ.

Nibakanna, ọpọ ninu ijọ loni ni ko fẹ fi ara mọ otitọ mọ, iyẹn ti wọn ba tilẹ ti fi igban kankan tẹlẹ fi ara mọ ọn. Idi si niyi ti wọn fi n gba inu ijọ kan de inu ijọ miran, ti ko si jẹ fi idi mọlẹ si ibi kankan. Awọn adari bi Aarọni ti yoo fun wọn ni ohunkohun ti wọn ba fẹ, bi o tilẹ jẹ ere wura ni, tẹ awọn wọnyi lọrun ju awọn adari ti yoo koju wọn pẹlu otitọ nipa aye wọn ati nipa ifẹ Ọlọrun fun wọn. (Wo: Ẹ́kísódù 32)

Wayi o, otitọ ti o wa nibẹ ni pe Ọlọrun ko le pa irufẹ awọn eniyan bi eyi mọ kuro ninu idibajẹ tabi ko wọn yọ ki eṣu ma ba ṣi wọn lọna tabi pa wọn run. Ti iwọ naa ko ba si fẹ ki opin aye rẹ ri bi ti wọn, ti o ba fẹ ki Ọlọrun ko ọ yọ ni awọn ọjọ ikẹyin yi, ki O si tun jẹ ki igbagbọ rẹ duro deede, nṣe ni ki o ya fi ara rẹ jin fun ọrọ rẹ ti o ye kooro ati fun itọni ti Ẹmi, dipo eyi ti iwọ yoo fi ma wa awọn ti yoo ma fi ọwọ ra ọ lori ti o o fi ṣegbe kiri. Mo si tun fẹ ki o mọ eyi daju: awa kan si wa ti a ko ni yi iwaasu wa pada lati tẹ ọ lọrun. Bẹẹni, awa kan si wa ti a ko jẹ fun ọ ni ere wura kankan lati bọ, ohun yowu ki o sọ nipa wa tabi ki o ro nipa wa. Idi si ni pe iwọ kọ ni a o jiyin fun bikoṣe Ọlọrun ti O ran wa niṣẹ. Njẹ ki Ọlọrun fun ọ ni ọkan ti yoo ma fi igba gbogbo wa ni irẹlẹ lati tẹwọgba ọrọ otitọ rẹ lalai jiyan. Amin.

Kí o ní oṣu Èrèlé 2023 tí ó ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: Ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọṣẹ miran lọdun yi. Mo si gbadura pe ki Ọlọrun jẹ ki ọkan rẹ wa ni pipe ati ni irẹlẹ niwaju rẹ ni gbogbo igba, ki o ma ba ni iriri iṣubu kankan ṣugbọn iriri igbega lọdun yi, ni orukọ Jesu. Amin.

Bi bibeli ti ṣe sọ fun wa, igberaga jẹ ọkan pataki lara awọn idi ti awọn eniyan fi ma n ni iriri iṣubu tabi ti a fi ma n di wọn lọwọ lati ni iriri igbega laye yi. Ti a ba si wa n rin ninu igberaga, a je wipe o ṣeeṣe ki a bi wa lulẹ lati ipo atata yowu ti a le wa tabi ki a ma jẹ ki a gberi kọja ibi ti a wa laye. Nitorina, ṣọra fun oniruuru igberaga, ki o si ri wipe o ko fi aye gba ọkankan ninu wọn lati fi gbongbo mulẹ ninu aye rẹ. (Wo: Iwe Owe 16:18; Jemisi 4:6-7; 1Peteru 5:5-6)

Wayi o, ọkan lara oniruuru igberaga ti awọn ọmọ Ọlọrun ko ki i tete damọ, ṣugbọn ti o si wa ninu ọpọlọpọ wa, ni o ni i ṣe pẹlu aigbọran si awọn alaṣẹ nipa ti ẹmi. Ti mo ba si n sọrọ nipa awọn alaṣẹ nipa ti ẹmi, mo n sọrọ nipa awọn ti Ọlọrun yan le ọ lori ninu ijọ rẹ. Awọn wọnyi ni O yan lati bọ ọ pẹlu ọrọ rẹ ati lati ma ṣọna lori ọkan rẹ nipa adura gbigba ati ibaṣepọ igbagbọ. Nitorina, nkan ti mo n sọ kọ nipe gbogbo pasitọ, wolii, ajinyinrere tabi apọsiteli ti o ba pade naa ni adari ẹmi fun ọ, ti o si gbọdọ gbọran si lẹnu.

Ti eniyan ko ba ki i ṣe adari ninu ijọ rẹ, ko pọn dandan fun ọ lati tẹle aṣe yowu ti o ba pa fun ọ, yala o dara tabi ko dara, ti ko ba ki i ṣe pe ẹ ti jọ ni ajọsepọ tẹlẹ, ti o si tun mọn-ọn si ẹni ti o le fọkantan. Ṣugbọn ti eniyan ba jẹ adari ijọ rẹ, o pọn dandan fun ọ lati gbọran si aṣẹ rẹ, niwọn igba ti awọn aṣẹ naa ba ti wa ni ibamu pẹlu ifẹ Ọlọrun. O wa ṣeni laanu pe ọpọ igba ni a ma n ri awọn ọmọ Ọlọrun ti wọn n bu ọla ti o ga fun awọn adari ijọ ti a ko yan le wọn lori nigba ti wọn a si ma tabuku awọn ti a yan le wọn lori ninu ijọ wọn.

Ṣugbọn eyi ko tọna rara, o si tun lodi si ifẹ Ọlọrun fun aye wa. Pọọlu, nigba ti o n ba awọn ara Kọrinnti sọrọ lori nkan wọnyi, sọ wipe niwọn igba ti wọn n ran awọn adari ijọ kan ti ko si lori awọn ijọ wọn lọwọ, ti wọn si tun n bọwọ fun wọn, ṣe ko wa yẹ ki wọn ran oun tikararẹ lọwọ, ki wọn si tun bọwọ fun ju awọn wọnyi lọ, niwọn igba ti o jẹ pe oun ni baba wọn ninu igbagbọ ati pe ko fi igba kankan dẹkun lati ma sin wọn pẹlu ọrọ Ọlọrun ati adura? O yẹ bẹẹ. (Wo: 1Kọrinnti 9:11-12)

Nibakanna, ti o ba rọ iwọ naa lọrun lati ran awọn adari ijọ kan ti ko ma ṣọna le ọ lori ninu igbagbọ tabi ti o ko tilẹ ti fi igba kankan pade lọwọ ati lati bọwọ fun wọn, ṣe o wa yẹ ki o ṣoro fun ọ lati bọwọ fun awọn adari ijọ rẹ ti o n fi gbogbo igba sin ọ ati lati ran wọn lọwọ ju awọn wọnyẹ lọ? Ni kukuru, ara idi ti a fi ma n ri awọn adari ijọ wa fin lọna yi ni igberaga. Nigba ti a ba woye pe adari ijọ kan ko ni imọ to tabi dagba to tabi jafafa to tabi ka iwe to lati paṣẹ fun wa tabi dari wa, a ko ni gbọran si lẹnu tabi mu ni pataki.

Lafikun, ti a ko ba ni imọ ewu ti o sorọ mọ ki a ma gbọran si awọn adari ijọ wa lẹnu tabi ki a ma ri wọn fin, ọpọ ninu wa ninu ijọ loni si ni ko ni imọ awọn nkan wọnyi, o ṣeeṣe ki a ma ṣe aigbọran si wọn lẹnu tabi ki a ma tabuku wọn bi o ti ṣe wu wa. Ṣugbọn bi a ti ṣe ri ninu Iwe mimọ, ewu buruku lo sọrọ mọ ki a ma tabuku awọn adari wa ninu ẹmi tabi ki a ma kọ awọn eniyan lati ṣe orikunkun si wọn, bi o ti wu ki awọn adari yi kere lọjọ ori to tabi jẹ ẹni ti ko láapan to. Nitorina, ki ara rẹ nílọ̀ lórí awọn nkan yi. Aijẹbẹ, o le ma pẹ rara ti wa a fi ko ara rẹ sinu iyọnu ti Ọlọrun ko ni ko ọ yọ ninu rẹ. (Wo: Numeri 12&17)

Ni akotan, Pọọlu sọ eyi fun wa nipa bi o ti yẹ ki a ma ṣe si awọn ti ko ba mu awọn adari wa ninu ijọ ni pataki: “Bi ẹnikẹni ko ba si pa ofin wa ninu lẹta yii mọ, ẹ ṣaami si ẹni naa. Ẹ ma ṣe ba a kẹgbẹ ki oju ba a le ti i. Ṣibẹ, ẹ ma ṣe kaa si ọta, ṣugbọn ẹ maa kilọ fun-un gẹgẹ bi arakunrin yin.” (2Tẹsalóníkà 3:14-15) Njẹ o ri bayi? A sọ fun wa pe ki a ṣaami si ẹnikẹni ninu ijọ wa ti ko ba mu awọn adari wa ni pataki, ti o n sọrọ si wọn bi o ti ṣe wu tabi ti o n kọ awọn eniyan lati kọ etí ikún si aṣẹ wọn. Ki si ni idi? Akọkọ, ki a ba le kilọ fun wọn. Ekeji, ki a ba le yẹra fun wọn ti wọn ko ba gbọ ikilọ. Aijẹbẹ, awa funrawa le jẹ alabapin ninu ewu ti o sorọ mọ aigbọran wọn lẹyin-ọ-rẹyin.

Nitorina, ma fi gbogbo igba kiyesi bi awọn ti o n baa rin ninu ijọ ti ṣe n ṣe si awọn adari yin ninu ẹmi, bi o ti wu ki o fẹran wọn to. Eyi ni yoo jẹ ki o mọ boya wọn yoo busi idagbasoke rẹ ninu ijọba Ọlọrun tabi boya wọn yo lọwọ si iṣubu rẹ. Njẹ ki Ọlọrun kun ọ fun oye, okun ati igboya ti o peye lati ṣe eyi, ni orukọ Jesu. Amin.

Ki o ni ọsẹ atata.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Tayọtayọ ni mo ki ọ kaabọ sinu ọsẹ miran ninu oṣu Sẹrẹ 2023. Adura mi si ni pe ki ohun gbogbo ti Ọlọrun ti n sọ fun ọ ṣe aṣeyọri lati sọ ọ di irufẹ ẹni ti O fẹ ki o jẹ ninu aye yi dipo ti yoo fi ṣiṣẹ lodi si ọ ni ọjọ ikẹyin. Amin.

Lọjọkan, nigba ti O n ba awọn Juu sọrọ, Jesu sọ nkan wọnyi fun wọn: “Bi ẹnikẹni ba si gbọ ọrọ mi, ti ko si pa wọn mọ, emi ki yoo ṣe idajọ rẹ nitori ti emi ko wa lati ṣe idajọ aye, bi ko ṣe lati gba aye la. Ẹni ti o ba kọ mi, ti ko si gba ọrọ mi, o ni ẹnikan ti n ṣe idajọ rẹ; ọrọ ti mo ti sọ, oun naa ni yoo ṣe idajọ rẹ ni ọjọ ikẹyin.” (Johanu 12:47-48) Pẹlu nkan ti Oluwa sọ fun awọn eniyan wọnyi, daju ṣaka ni o ye wa pe ko ki i ṣe nkan tuntun ni ki awọn eniyan gbọ ọrọ rẹ, ki wọn si ma mu lo. Nitorina, ti o ba ti n gbọ ọrọ Ọlọrun, ti o ko si mu lo, ko yẹ ki o ya ẹnikẹni lẹnu.

Ni kukuru, Oluwa sọ wipe Oun ko ṣetan lati ṣe idajọ ẹni yowu ti o gbọ ọrọ Oun, ti o si kọ ọ silẹ. Idi si ni pe iṣẹ rẹ ni asiko yi ko da lori ki o ṣe idajọ awọn eniyan bi ko ṣe pe ki o gba wọn la. Eyi ko wa jasi pe awọn ti o kọ ọ silẹ ko ni gba idajọ rara. A o da wọn lẹjọ ni ọkọ ikẹyin. Ta si ni yoo da wọn lẹjọ? Gẹgẹ bi Oluwa ti sọ, ọrọ rẹ ti wọn kọ silẹ gan an ni yoo duro tako wọn ni ọjọ naa.

Nitorina, ti ọrọ Ọlọrun ba n tọ ọ wa, ti o si n kọ lati mu ni ọkunkundun ati lati ṣiṣẹ le lori, mọ wipe ọrọ kanna yi yoo jẹri lodi si ọ ni ọjọ kan. Ọ̀run nikan si kọ ni eyi yoo ti ṣẹlẹ; yoo ṣẹlẹ laye yi naa pẹlu. Fun apẹrẹ, Solomọni, nigba ti o n ba awọn ọmọkunrin rẹ sọrọ lori agbere, jẹ ki o ye wọn kedere pe ti wọn ko ba kọbiara si nkan ti o n sọ fun wọn, ọjọ kan n bọ ti wọn yoo ranti ọrọ rẹ, ti wọn yoo si da ara wọn lẹbi.

Iwọ naa wo ọrọ ti o sọ lori nkan iwọnyi: “Ni igbẹyin aye rẹ iwọ yoo kerora, nigba ti agbara rẹ ati ara rẹ ba ti joro tan. Iwọ yoo wi pe, “Mo ti koriira ẹkọ to! Ọkan mi ṣe wa koorira ibawi! N ko gbọran si awọn olukọ mi lẹnu, tabi ki n feti si awọn ti n kọ mi lẹkọọ. Mo ti bẹrẹ iparun patapata ni aarin gbogbo awujọ eniyan.” (Ìwé Òwe 5:11-14) Njẹ nkan ti o jọ mọ eyi ti ṣẹlẹ si ọ ri bi? Ṣe o ti ba ara rẹ ni ipo ri ti o ti n da ara rẹ lẹjọ fun ikuna rẹ lati ṣe amulo awọn imọran ọlọgbọn ti o ti fi igba kan gba lati ọwọ awọn obi rẹ, adari ijọ rẹ tabi awọn enyan daradara miran ti o wa ninu aye rẹ?

Ki a ma fa ọrọ gun, emi ti wa ni irufẹ ipo yi ri. Mo si fẹ ki o gba mi gbọ pe ko ki i ṣe iriri ti o sunwọ̀n rara. Mo n sọrọ nipa ipo ninu eyi ti iwọ funrarẹ ti mọ pe iwọ gan ni o ṣe ara rẹ. Idi si ni pe o le ranti daada gbogbo awọn ọrọ ikilọ ati ikiyesara ti o gbọ, ti o si kọ lati ṣe amulo rẹ. O wa bẹrẹ si ni woye pe ki o ti mọ, ki o ti mu awọn ọrọ yi lo; ki o ti mọ, ki o ti ma ya olorikunkun. Sibẹsibẹ, o tun mọ wipe ẹpa ko boro mọ ati wipe ti ko ba jẹ wipe Ọlọrun ba ṣaanu fun ọ, o di dandan ki o ma ba ọran ti o da finra titi o o fi jade laye. Ti o ba tilẹ wa pọn ara rẹ loju, ti o si da ara rẹ lẹbi niru asiko naa, ko ni yi nkankan pada.

Wayi o, bi ọrọ Ọlọrun ti ma n ṣe idajọ awọn eniyan ati bi yoo ti ṣe ṣe idajọ wọn ni ọjọ ikẹyin gan an niyẹn. Wọn yoo ranti gbogbo otitọ ti wọn ti gbọ, ti wọn si ti kọ lati ṣe amulo. Wọn a si mọ pe ko si awawi kankan fun ikuna wọn niwaju Ọlọrun. Wọn a mọ pe ko si awawi kankan fun biba aye ara wọn jẹ tabi fun yiyan ọrun apadi ni ile. Ṣugbọn yoo ti wa pẹ ju lati yi ohunkohun pada ni akoko yi. Yoo ti pẹ ju lati le yi awọn èso iṣẹ ọwọ wọn pada. Nitorina, nṣe ni wọn yoo ba awọn nkan wọnyi finra titi lailai.

Ṣugbọn niwọn igba ti a ba si wa ninu aye yi, awọn nkan ti a le yi pada wa. Niwọn igba ti èémí ìyè ba si wa ninu wa, a si le yi pada kuro ni ọna aigbọran-si-Ọlọrun, ki a si bẹrẹ si ni gbọran si lẹnu, ki a si tun ma mu ọrọ rẹ ni pataki. Nipa ṣiṣe eyi, Oun yoo le wo wa san, gba wa lọwọ idamu ti o sorọ mọ awọn aṣiṣe ti a ṣe ṣẹyin ati tun aye wa ṣe. Nitorina, a ko ni nilo lati ma fi ayeraye kabamọ lori awọn aṣiṣe wa. Adura mi si ni pe ki o fi awọn ọrọ yi si ọkan, ki o si yi pada kuro ninu ṣiṣe awọn nkan ti yoo jẹ ki ọrọ Ọlọrun dide lodi si ọ ninu aye yi lọjọkan tabi ni ọjọ Oluwa. Amin.

Ki o ni ọsẹ ire.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa ati Olugbala wa. Inu mi dun lati ki ọ kaabọ sinu ọsẹ kẹta ninu ọdun tuntun yi. Mo si gbadura pe ki Ọlọrun jẹ ki o tayọ ninu ohun gbogbo ti o dara, ti o si tọna niwaju rẹ ni ojumọ kọọkan ninu ọdun tuntun yi, ki aye rẹ ba le jẹ ki awọn ti o wa ni ayika rẹ fi ogo fun ọrukọ rẹ, ni orukọ Jesu. Amin.

Pọọlu, ninu lẹta rẹ si awọn ara Kọrinnti, sọ eyi: “Ṣugbọn bi ẹyin ti n pọ si ni ohun gbogbo, ni igbagbọ, ati ọrọ ati imọ, ati ninu aapọn gbogbo, ati ni ifẹ yin si wa, ẹ kiyesi, ki ẹyin ki o maa pọ sii ninu iṣẹ ore-ọfẹ [fififunni] yii pẹlu.” (2Kọrinnti 8:7 – pẹ̀lú àfikún)

O wa ṣeni laanu pe ọpọ awọn eniyan Ọlọrun kaakiri awọn ijọ wa kaakiri agbaye loni ni o n rẹyin ninu awọn nkan wọnyi. Ẹyin patapata ni wọn wa ninu igbagbọ wọn ninu Ọlọrun, ninu imọ rẹ ti wọn ni, ninu itara wọn fun, ninu isọrọ pẹlu oore-ọfẹ ati ninu ifẹ wọn fun ara wọn. Nitorina, bi o tilẹ jẹ wipe wọn n fi ẹnu jẹwọ pe awọn mọ Ọlọrun, o nira fun awọn eniyan lati gbagbọ pe eniyan rẹ ni wọn jẹ.

Ṣe o wa le jẹ pe bi awa naa ṣe ri niyi? A n fi ẹnu wa jẹwọ pe a mọ Ọlọrun ṣugbọn ko han gbangba-gbangba rara si awọn ti o wa ni ayika wa pe tirẹ ni a n ṣe. Idi si ni pe ko si nkankan ti o farapẹ titayọ nipa igbagbọ wa, ifẹ wa, isọrọ wa, imọ wa ati itara wa fun Ọlọrun. Eyi ko si ki i ṣe ifẹ Ọlọrun fun wa. Ifẹ rẹ fun wa ni pe ki a tayọ ninu ohun rere gbogbo. Ti a ko ba wa fẹ tẹsiwaju lati ma gbe igbe aye alaileso ati alailere, a nilo lati bẹrẹ si ni ṣe amulo oore-ọfẹ rẹ ti o n fi gbogbo wa ni arowọto wa, ti o si tun peye, lati lakaka lati tayọ ninu awọn nkan ti yoo jẹ ki awọn eniyan ma fi ogo fun nipasẹ wa.

Bi a ti ṣe ri ni ti awọn ara Kọrinnti, Pọọlu le fi igboya sọ pe wọn tayọ ninu igbagbọ, isọrọ, itara, imọ ati ifẹ. Ibi kan ṣoṣo ti wọn n rẹyin naa ni o ni i ṣe pẹlu ififunni. Nitorina, o sọ fun wọn pe, “Bi ẹyin ti ṣe tayọ ninu awọn eso Ẹmi yoku, nṣe ni ki ẹ ri daju pe ẹ tun tayọ ninu oore-ọfẹ ififunni.”

Nkan ti eyi si tunmọ si ni pe ko si abala aye wa kankan ninu eyi ti Ọlọrun ko ti fẹ ki a tayọ. Nitorina, ti a ba ri abala aye wa kan ninu eyi ti a ti n rẹyin, o di dandan ki Ọlọrun pe akiyesi wa si. O le ṣe eyi nigba ti a ba n ṣe agbeyẹwo aye wa funrawa pẹlu ọrọ rẹ. O si tun le ṣe eyi nipasẹ awọn adari ijọ wa tabi awọn kan lara wa ninu ijọ.

Bi o ti wu ki o ri, niwọn igba ti Ọlọrun ba ti n fi abala aye wa ninu eyi ti a ti nilo lati lakaka fun itayọ han wa, a ko gbọdọ ba a tabi awọn ti o ran si wa jiyan tabi ma wa awawi fun bi a ti ṣe n rẹyin. Dipo eyi, nṣe ni o yẹ ki a tẹwọgba ohunkohun ti o ba sọ fun wa, ki a si bẹrẹ si ni lakaka ni kiakia lati tayọ ni ibikibi ti a ba ti nilo lati tayọ. Eyi ni yoo fi han pe a mura lati dagba soke ati lati di ohun gbogbo ti O fẹ ki a da.

Nitorina, bi o ti ṣe n lọ lọsẹ yi, mura lọkan rẹ lati bẹ aye rẹ wo ninu imọlẹ ọrọ Ọlọrun, ki o ba le ri awọn ibi ti o ti n rẹyin ninu titayọ. Bi o si ṣe n ṣe eyi, Ẹmi Ọlọrun yoo ṣi oju rẹ lati ri ohun gbogbo ti o nilo lati ri, yoo si tun fun ọ ni okun lati ṣe ohun ti o nilo lati ṣe lati wa ni ibi ti Ọlọrun fẹ ki o wa.

Kí o ní ọ̀sẹ̀ aláririn.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ keji ninu ọdun tuntun yi, ọdun 2023. Mo si gbadura pe ki Ọlọrun funrarẹ gbe o ga ninu ọdun naa ni gbogbo abala aye rẹ ti igbega ti tọ si ọ, ni orukọ Jesu. Amin.

Bi a ti ṣe ri ninu bibeli, ẹnikan ṣoṣo ti o ni agbara lati gbe awọn eniyan ga tabi rẹ wọn silẹ ni Ọlọrun. Fun apẹrẹ, Pọọlu, ninu lẹta rẹ si awọn ara Filipi, sọ eyi fun wọn nipa Jesu Oluwa wa: “Nitori naa, Ọlọrun pẹlu si ti gbe e ga gidigidi, o si ti fun un ni orukọ kan ti o tobi ju gbogbo orukọ lọ…” (Fílípì 2:9) Tani O gbe Jesu lọ si ipele ti o ga julọ ni gbogbo iṣẹda? Ọlọrun ni! Ta tun ni O fun Jesu ni orukọ ologo, orukọ mimọ ati orukọ ti o lagbara? Ọlọrun ni!

Nitori naa, Jesu Oluwa wa ko di Oluwa gbogbo ẹda Ọlọrun, pẹlu awọn angẹli ati awọn ẹmi eṣu, funrarẹ. Ọlọrun ni o gbe ga si ipo ti O ti ni aṣẹ ati agbara lori gbogbo ẹda ati lori ohun gbogbo. Lafikun, Oun kọ ni O sọ orukọ ara rẹ di ologo, alagbara ati eyi ti o ni iyi. Ọlọrun ni O fun ni orukọ yi i, ti O si tun ro pẹlu gbogbo aṣẹ rẹ. Idi si ni yi ti orukọ rẹ ṣe jẹ eyi ti a n bọwọ fun ni ibi gbogbo ti ẹda Ọlọrun wa, lorilẹ aye yi, ni ọrun ati ni isalẹ aye yi; idi ni yi ti gbogbo eékún fi gbọdọ wole ti a ba ti darukọ rẹ ati ti gbogbo ahọn fi gbọdọ jẹwọ pe Oun ni Oluwa, fun ogo Ọlọrun Baba.

Wayi o, niwọn igba ti Jesu Oluwa wa ko le gbe ara rẹ ga, ti o si jẹ wipe Ọlọrun funrarẹ ni O gbe e ga, ta wa ni ẹni naa laye yi ti o le gbe ara rẹ ga? Ko si! Siwaju si, niwọn igba ti Jesu Oluwa wa ko le sọ orukọ ara rẹ di nla ati alagbara ṣugbọn ti O nilo Ọlọrun lati sọ ọ di orukọ nla, orukọ ti o lagbara ati orukọ ti o dun leti lati gbọ, ta wa ni ẹni naa laye yi ti o le sọ orukọ ara rẹ di nla, alagbara ati eyi ti o dun un gbọ leti? Ko si!

Lotitọ, awọn eniyan le gbiyanju lati gbe ara wọn ga nipasẹ iṣẹ aṣekara, ijafafa, ibaṣepọ pẹlu awọn ti o ti di ẹni nla, arekereke, iwa ipa tabi iṣẹ oṣo. Ṣugbọn ti Ọlọrun ko ba fẹ wọn ni ibi giga laye yi, ko si nkan ti wọn le ṣe ti wọn yoo fi de ibẹ. Nibakan naa, awọn eniyan le ṣe oniruuru nkan lati ni orukọ ti o ga ati ti o dara, orukọ ti awọn eniyan yoo ma wari fun ti a ba ti mẹnuba a. Ṣugbọn ti Ọlọrun ko ba fun wa ni orukọ ti o ga, ti o si niyi gẹgẹ bi ẹbun, gbogbo akitiyan wa lati sọ orukọ wa di nla ko ni ja mọ nkankan.

Lafikun, lati fi han wa pe Ọlọrun nikan ni O le gbe awọn eniyan ga, ki O si tun bukun fun wọn pẹlu orukọ ti o ga, ti o si tun lagbara, awọn igba ma n wa ti yoo rẹ awọn ti a ti gbe ga ati ti a ti sọ di nla tẹlẹ silẹ nitoripe wọn ko ri i gẹgẹ bi orisun igbega wọn. Fun apẹrẹ, ninu iwe Daniẹli, ori ikẹrin, Ọba Nebukadinesari sọ iriri rẹ pẹlu Ọlọrun lori ọrọ yi fun wa. O sọ bi oun ti ṣe fi igbakanri ro wipe oun ni oun sọ ara oun di ẹni nla ati alagbara ati bi Ọlọrun ṣe rẹ oun silẹ, ki oun ba le kẹkọ lori igbega ti oun ni. Ki a si to wa tun ọkunrin yi gbe ga lẹkansi, o ti kokọ lo igba melokan lati gbe ile aye bi ẹranko, bi asínwín.

Nitorina, ti a ba fẹ ki a gbe wa ga laye yi, o si yẹ ki a fẹ bẹ, ti a ba fẹ di ẹni nla laye, o si yẹ ki a fẹ bẹ, ẹnikan ṣoṣo ti a gbọdọ ma wo fun eyi ni Ọlọrun. A ko gbọdọ fi igbẹkẹle wa sinu agbara wa, ẹkọ wa, ọgbọ́n wa, ọrọ̀ wa tabi ibaṣepọ wa pẹlu awọn eniyan nla kan. Ko si ikankan ninu awọn nkan wọnyi ti yoo ṣiṣẹ. Ki a tilẹ sọ otitọ, igberaga ni yoo jẹ ki a fi igbẹkẹle wa sinu agbara wa tabi awọn ibaṣepọ wa fun igbega wa tabi iṣọdi ẹni nla wa. Bi bibeli si ṣe sọ fun wọn, nkan ẹyọkan ṣoṣo ni awọn agberaga le reti lati ọwọ Ọlọrun – idojuti. (Wo: Jemisi 4:6; 1Peteru 5:6)

Nitorina, ti a ba fẹ lati ni iriri igbega ninu aye wa lọdun yi, ẹ jẹ ki a rẹ ara wa silẹ niwaju Ọlọrun ati niwaju ọrọ oore-ọfẹ rẹ. Yoo si ri daju pe a ko fo wa ru nigba ti akoko igbega wa ba to. Ọna ti a gba gbe Jesu Oluwa wa ga leyi o. Bibeli sọ wipe bi o tilẹ jẹ wipe ọkan ni Oun ati Ọlọrun Baba, O sọ ara rẹ di aláìjámọ́nkànkan, O rẹ ara rẹ silẹ niwaju Ọlọrun, O si gbọran si i lẹnu, titi de oju iku ori igi agbelebu (Filipi 2:5-8). Nitori naa, Ọlọrun gbe e ga si ipele ti o ga ju ninu gbogbo iṣẹda rẹ. Ti awa naa ba si ṣe awokọṣe irẹlẹ rẹ, bi a ti ṣe paṣẹ fun wa ninu Iwe Mimọ, ti a n gbọran si Ọlọrun lẹnu ninu ohun gbogbo ti O fẹ ki a ṣe, bi a tilẹ dojukọ iku, Oun yoo gbe awa naa ga pẹlu. Ko si si ẹni naa ti yoo le sọ ibi ti yoo gbe wa ga de. Nitorina, rẹ ara rẹ silẹ niwaju Ọlọrun lọdun tuntun yi, yoo si gbe ọ lọ lati inu igbega si igbega.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)