latori tabili paito

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu ọsẹ akọkọ ninu oṣu Belu 2026. Adura mi si ni pe ki Ọlọrun yi ohun gbogbo ti a ti ṣe lodi si ọ ninu ọdun yi pada si rere fun ọ, bi o ti ṣe n la oṣu naa kọja, ni orukọ Jesu. Amin.

Bi a ti ṣe ri ninu bibeli, lẹyin iku Jakọbu, awọn arakurin Josẹfu bẹrẹ si ni bẹru wipe o le fẹ jẹ wọn niya fun gbogbo awọn nkan buruku ti wọn ti ṣe si i. Nitorina, wọn ran iṣẹ si lati sọ fun pe baba wọn fi ọrọ silẹ fun lati bẹbẹ pe ki o dariji wọn fun gbogbo awọn ipalara ti wọn ti ṣe si i. Nigba ti Josẹfu gbọ eyi, o sọkun. Eyi ni akọsilẹ nkan ti o sọ fu wọn:

“Ṣugbọn Josẹfu wi fun wọn pe, “Ẹ ma ṣe bẹru, emi ha wa ni ipo Ọlọrun bi? Bi o tilẹ jẹ pe ẹ gbero lati ṣe mi ni ibi, ṣugbọn Ọlọrun gbero lati fi ṣe rere ti n ṣe lọwọ yii; ni gbigba ẹmi ọpọlọpọ Eniyan la.”” (Jẹ́nẹ́sísì 50:19-20)

Njẹ o ri bayẹn? Josẹfu ko ṣetan lati jẹ awọn arakunrin rẹ niya tabi fi ibi san ibi ti wọn ṣe si i. Ki ni idi? Idi ni pe o ri wipe Ọlọrun ṣiṣẹ ninu ohun gbogbo ti o ṣẹlẹ si i. O ri bi O ti ṣe yi gbogbo nkan ti awọn arakunrin rẹ ṣe lati palara pada si rere fun un. Nitorina, ko ri idi kankan lati jẹ wọn niya fun iwa ika wọn. Ijiya yowu ti Ọlọrun ati ẹri-ọkan wọn n fun wọn ti to.

Nibakana, Ọlọrun le yi wọn pada si rere fun ọ gbogbo ibi ti awọn Eniyan ti ṣe tabi ti wọn n ṣe si ọ. Nkan ti o ṣe pataki ju ni ki o ma a fi igba gbogbo fi igbẹkẹle rẹ sinu rẹ. Bibeli sọ fun wa pe ẹnikẹni ti o ba fi igbẹkẹle rẹ sinu rẹ oju ko ni ti (Róòmù 10:11). Nitorina, niwọn igba ti igbẹkẹle rẹ ba ti wa ninu rẹ, oju ko ni ti ọ, bi o ti wu ki ipalara ti awọn eniyan ṣe si ọ ti le to.

Wayi o, Ọlọrun si tun n san awọn Eniyan lẹsan fun iṣẹ aṣekara ati iṣẹ afọkansi wọn pẹlu igbega ati iṣoriire, bi o ti wu ki awọn ipo ti wọn ba ara wọn ninu rẹ ti le nira to. Nitorina, bi o tilẹ jẹ wipe ipo ti ko rọgbọ ni o ti ba ara rẹ laye, nṣe ni ki o tẹsiwaju lati maa ṣiṣẹ karakara ati pẹlu tọkantọkan. Nigba ti asiko ba si to, Ọlọrun yoo san ọ lẹsan fun iṣẹ aṣekara rẹ pẹlu igbega ati iṣoriire ni awọn ọna ti o kọja ireti rẹ.

Ni akotan, o gbọdọ tẹsiwaju lati ma a rin ninu ododo. Aijẹbẹ, o le fi aaye silẹ fun ọta lati sọ eto Ọlọrun fun aye rẹ di asan. Josẹfu ko fi aaye silẹ fun awọn iwa ika awọn arakunrin rẹ lati ran an. Ko fi aaye silẹ fun awọn iwa ika ti wọn wu si lati sọ oun naa di ika Eniyan. Dipo eyi, nṣe ni o mura si rinrin ninu ibẹru Ọlọrun. Nitorina, Satani ko ri aaye lati sọ eto Ọlọrun fun aye rẹ di asan.

Iwọ naa ko gbọdọ fi aaye gba awọn iwa ika ti a wu si ọ lati sọ ọ di ika Eniyan. Dipo eyi, nṣe ni ki o tẹsiwaju lati ma a rin ni ipa ọna ododo. Nigba ti asiko ba si to, Ọlọrun yoo yi ohun gbogbo pada si rere fun ọ, yoo si tun gbe ọ ga. Adura mi wa ni pe ki Ọlọrun fi okun fun ọkan rẹ lati pa awọn ọrọ yi mọ sinu ọkan rẹ, bi o ti ṣe n la oṣu yi kọja, ati lati ṣiṣẹ tọ wọn. Amin.

Kí o ní oṣù Belu 2026 alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o gbẹyin oṣu Ọ̀wàrà 2026. Adura mi ni pe a ko tun ni lailai fi awọn nkan ti o nilo fun iṣerere rẹ laye pamọ fun ọ mọ ni abala yowu ti o le wa laye, ni orukọ Jesu. Amin.

Bi a ti ṣe ri ninu bibeli, ti Ọlọrun ko ba ṣi oju awọn eniyan si awọn nkan ti wọn ni lati ṣe lati ni iriri alaafia ati iṣerere, ki wọn ba a le bẹrẹ si ni ṣe wọn, wọn le fi gbogbo ọjọ aye wọn ma a tiraka, ki wọn si ma ni iriri alaafia ati iṣerere. Fun apẹrẹ, ti Ọlọrun ko ba ṣi oju Ruutu ni asiko, lẹyin igba ti o ti padanu ọkọ rẹ, lati bẹrẹ si ni gbe igbesẹ ti yoo yọri si imupadabọsipo ati igbe aye alaafia ati iṣoriire fun-un, a le ma lailai gbọ nkankan nipa rẹ. (Wo: Rúùtù 1)

Ṣugbọn Ọlọrun ṣi oju rẹ, lakọkọ, lati kọ awọn oriṣa awọn eniyan rẹ silẹ ati lati tẹwọgba a gẹgẹ bi Ọlọrun rẹ. Lafikun, nigba ti o dabi ẹni pe ko mu ọgbọn lọwọ lati tẹle iya-ọkọ rẹ ati lati ma a toju rẹ, Ọlọrun ṣi oju ọkan rẹ lati ri wipe ṣiṣe bẹẹ gẹgẹ ni o tọ fun un. O si ṣe bẹẹ.

Wayi o, nitoripe o fi si ọkan rẹ lati tẹle iya-ọkọ rẹ, Naomi, pada wa si ilẹ Isiraẹli lati le ma a sin Ọlọrun ati lati mojuto iya arugbo yi i, Ọlọrun ru ọkan iya naa soke lati dari rẹ lati gbe igbesẹ ti yoo yi ohun gbogbo pada si rere fun un. Wo diẹ lara nkan ti bibeli sọ lori eyi:

“Ni ọjọ kan, Naomi, iya ọkọ Rutu wi fun un pe, ‘Ọmọbinrin mi, njẹ ko yẹ ki emi ba ọ wa ile ọkọ miiran, nibi ti wọn yoo ti le e maa tọju rẹ?” (Rutu 3:1)

Njẹ o ri bayẹn? Naomi fi si ọkan rẹ lati ri daju pe Ruutu, ẹni ti o ti padanu ọkọ rẹ ni rewerewe ati ẹni ti ko ti lọmọ laye, gba imupadabọsipo ati pe a fi a fi idi rẹ mulẹ sinu ile ifẹ, ayọ, alaafia ati iṣerere. Ọlọrun si fun un ṣe. Nitorina, Ruutu di ọkan lara awọn iya-nla Dafidi ati Jesu Oluwa wa. (Wo: Ruutu 3-4)

Ṣugbọn ki ni o fa ti Naomi ṣe fi si ọkan lati ṣe eyi fun Ruutu? Idi ni pe Ruutu funrarẹ gan dara si i. Yatọ si pe Ruutu ti gba Ọlọrun Isiraẹli gẹgẹ bi Ọlọrun otitọ, ti o si ti ṣetan lati sin in fun iyoku ọjọ aye rẹ, o tun boju aanu wo Naomi, ẹni ti o ti padanu ọmọkunrin rẹ meji, ti ko si tun ni ọmọ-ọmọ kankan ti o le ma a mojuto o. Idi ni yi ti o ṣe duro ti i nigba ti wọn pada de ilẹ Isiraẹli, ti o si n tọju rẹ, dipo ti yoo fi lọ fẹ ọkunrin miran lẹsẹkẹsẹ. Niwọn igba ti Naomi funrarẹ naa ko si ki ṣe ẹnikan ti o mọ tara rẹ nikan, ko pẹ rara ti o fi bẹrẹ si ni ṣiṣẹ lori bi inu Ruutu naa yoo ṣe pada dun.

Ki wa ni koko nkan wọnyi? Oun naa ni pe nipa fifi tọkan-tọkan ran awọn ti o wa ninu aye wa ti wọn nilo iranlọwọ lotitọ lọwọ, a le ma a la ọna fun aye awa tikara wa lati fi idi mulẹ sinu alaafia ati iṣerere. Awọn ti a n ran lọwọ le ma dabi ẹni ti o le gbe nkankan ti o ṣe pataki ṣe lori aṣeyọri ati ibalẹ-ọkan wa laye, gẹgẹ bi Naomi ko ṣe dabi ẹni ti o le gbe nkan rere kankan ṣe lori aye Ruutu. Ki a tilẹ sọ otitọ, oun funrarẹ sọ fun Ruutu ki wọn to kuro ni ilẹ Moabu pe oun ko ni nkan rere kankan ti oun le ṣe fun mọ. Sibẹsibẹ, Ruutu tẹle. Ki ni idi? Idi ni pe ko fi ọkan si nkan ti iya yi le ṣe fun oun bikoṣe nkan ti oun le ṣe lati mu aye rọrun fun iya naa. Bi Ọlọrun si ti wa jẹ ki ọrọ lọ, Naomi yi ni o wa papa dari rẹ sinu ile alaafia, ayọ ati ọpọlọpọ ohun rere gbogbo.

Nitorina, ma di oju rẹ si awọn nkan ti Ọlọrun n fi han ọ nipa awọn ti o wa ni ayika rẹ ti o le ran lọwọ, ti o le jẹ ki aye rọrun si fun wọn. Awọn wọnyi le jẹ awọn agbalagba kan ti o wa ni ayika rẹ, awọn ọmọde adugbo, awọn kan ninu ẹbi tabi ninu ijọ tabi awọn akẹgbẹ rẹ lẹnu iṣẹ tabi ni ile iwe. Irufẹ ẹni yowu ti wọn le jẹ, ṣe amulo ti o peye awọn anfaani ti Ọlọrun n fun ọ lati jẹ ki aye rọrun si fun wọn. Idi si ni pe o le ma a mọ ọna ti Ọlọrun le gba lo awọn nkan ti o n ṣe wọnyi lati mu aye rọrun fun iwọ naa pẹlu, yala loni tabi ni ọjọ iwaju.

Lafikun, ti Ọlọrun ba n lo ẹnikẹni lati mu aye rọrun fun ọ, ma ya alanikanjọpọn ninu ibaṣepọ rẹ pẹlu wọn. Ma fi oju si kiki nkan ti o le ti ara wọn jere. Nṣe ni ki iwọn naa ma a ronu nipa nkan ti awọn naa le ti ara rẹ jere. Ma a ronu nipa awọn nkan ti iwọ naa le ṣe lati mu aye rọrun si fun wọn. Aijẹbẹ, ti o ba to asiko kan, Ọlọrun le ti iẹlkun iranwọ ti o n rigba nipasẹ wọn. Eyi si le e pa ọ lara lọna ti o ga. Nitorina, jẹ ki igbayegbadun awọn ti igbayegbadun rẹ jẹ logun jẹ iwọ naa logun. Njẹ ki Ọlọrun ma a fi igba gbogbo kun aye rẹ pẹlu isinmi. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu ọsẹ miran ninu oṣu Ọ̀wàrà 2026. Mo gbadura pe ki Ọlọrun ma a fi ojoojumọ tun ọ ṣe ni okun lati fi otitọ ṣe gbogbo iṣẹ rere ti O tun ọ da lati ṣe, ki o ba a le ri ere rẹ gba lọwọ rẹ lẹkunrẹrẹ. Amin.

Ninu iwe Pọọlu si awọn ara Efesu, o sọ eyi fun wa:

“Nitori awa ni iṣẹ ọwọ rẹ ti a da ninu Kristi Jesu fun awọn iṣẹ rere, eyi ti Ọlọrun ti pese tẹlẹ, fun wa lati ṣe.” (Éfésù 2:10)

Ki ni Ọlọrun tun wa da fun, bi a ti ṣe ri ninu ẹsẹ bibeli yi? O tun wa da lati ṣe awọn iṣẹ rere ti O ti pese silẹ ṣaaju asiko ti a wa yi lati ṣe. Nitorina, awọn iṣẹ rere wa ti Ọlọrun fẹ ki ẹnikọọkan wa ṣe pẹlu asiko wa ni aye yi. Njẹ a wa mọ wọn? Ti a ko ba mọ wọn, a ni lati bẹrẹ si ni gbadura si i pe ki O ma a fi ojoojumọ kun ọkan wa pẹlu ifihan nipa wọn, ki a ba a le fi ara wa jin fun ṣiṣe wọn.

Ki ni idi ti eyi ṣe ṣe pataki? O ṣe pataki nitoripe kiki awọn iṣẹ rere ti Ọlọrun ba yan fun wa ni yoo san wa ni ẹsan fun. Ki a tilẹ sọ otitọ, dandan ni ki a pade ifooro ati ikuna, ti a ma ba n lọ gbe igbesẹ lati ṣe awọn iṣẹ rere ti ko yan fun wa lati ṣe. Kiki awọn iṣẹ rere ti O yan fun wa ni a le reti lati ṣe aṣeyọri ninu wọn ati lati gba ere le lori. Nitorina, o ṣe pataki ki ẹnikọọkan wa mọ gbogbo iṣẹ rere ti Ọlọrun fẹ ki o ṣe ni ojoojumọ. Nipa bayi, a o le fi ara wa jin fun ṣiṣe wọn.

Amọ ṣa o, mimọ awọn iṣẹ rere ti Ọlọrun n fẹ ki a ṣe ko ma to; a tun ni lati ni itara lati ṣe wọn. Nigba ti a ba ni itara lati ṣe awọn iṣẹ rere ti O fẹ ki a ṣe ni a le ni iwuri lati kọ ẹkọ ninu Iwe mimọ lori wọn ati lati gbadura lori ki a ṣe aṣeyọri ni ṣiṣe wọn. Ọkan lari idi ti Ọlọrun fi wa wẹ wa mọ ninu Kiristi Jesu ni ki a ba a le ni itara lati ṣe iṣẹ rere. Wo nkan ti Pọọlu sọ nipa eyi:

“Ẹni ti o fi ara rẹ fun wa lati irapada kuro ninu iwa buburu gbogbo ati ki o si le wẹ awọn eniyan kan mọ fun ara rẹ fun ini ohun tikara rẹ, awọn to n ni itara fun iṣẹ rere.” (Títù 2:14)

Njẹ o ri bayẹn? Iṣẹ iwẹnumọ Ẹmi Mimọ ninu aye wa yẹ ki o mojuto ohunkohun ti o ba ni i ṣe pẹlu iwa ailakasi yowu ti o le wa ninu wa si ṣiṣe ifẹ Ọlọrun. Nitorina, ti o ba ṣakiyesi pe o ko ni itara lati sin Ọlọrun tabi lati ṣe oore fun awọn ti o wa ni ayika rẹ, tabi ti o ba ri wipe o ma n fi igba gbogbo ṣaroye tabi ṣe awawi ni igbakugba ti a ba pe ọ lati ṣe oore fun awọn miran, o le jẹ wipe nṣe ni o n fi orikunkun di iṣẹ Ẹmi Mimọ lọwọ ninu aye rẹ. Idi si ni pe ko si bi yoo ṣe ma ṣiṣẹ ninu rẹ ni ọna ti kun, ti o ko ni ni itara lati ṣe iṣẹ rere yowu ti Ọlọrun le ma a pe ọ lati ṣe, yala ninu ẹbi rẹ, adugbo rẹ, ile-iwe rẹ, ibi-iṣẹ rẹ, ijọ rẹ tabi ibi yowu ti o ti le ba ara rẹ.

Ni kukukuru, koko nkan ti mo n sọ ni pe kiki awọn ti o ba ni itara lati ṣe iṣẹ rere ni yoo rọrun fun Ẹmi Ọlọrun lati dari wọn lati ṣe gbogbo iṣẹ rere ti Ọlọrun le fẹ ki wọn ṣe ni aye yi. Ti o ba wa ri wipe o ṣe alaini itara ti o to ni ṣiṣẹ rere, nṣe ni ki o bẹrẹ si ni gbadura pe ki Ẹmi Ọlọrun ya aye rẹ ya ohun gbogbo ti o ni ṣe pẹlu ainitara lati ṣe ohun rere. Nipa bayi, a o le dari iwọ naa lati bẹrẹ si ni ṣe gbogbo iṣẹ rere ti Ọlọrun yoo fẹ ki o ṣe ki asiko rẹ laye yi to tan. Nigba ti o ba si wa duro niwaju rẹ ninu ijọba ayeraye rẹ, ere nla ni iwọ yoo ri gba.

Ki o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ti o ga ni mo ki ọ kaabọ sinu ọsẹ miran ninu oṣu Ọ̀wàrà 2026. Adura mi si ni pe ki Ọlọrun ma a fi ojoojumọ fun ọkan rẹ ni okun lati gbe aye rẹ pẹlu otitọ inu ni ipo yowu ti o le ba ara rẹ, yala awọn eniyan n wo ọ tabi wọn ko wo ọ, ki aye rẹ ba a le ma a fi igba gbogbo jẹ ki awọn eniyan yin orukọ mimọ rẹ. Amin.

Ki ni idi ti Pọtifari ṣe fi Josẹfu ṣe alakoso ohun gbogbo ti o ni, yatọ si aya rẹ? Idi ni pe o jẹ ẹnikan ti o ṣe e fọkan tan lati ṣe ohun ti o tọ, yala ẹnikẹni n wo tabi wọn ko wo. Eyi ja si pe Josẹfu ko ki ṣe ẹnikan ti o fi ara rẹ fun oju-aye ṣiṣe. Dipo bẹ ẹ, o jẹ ẹnikan ti yoo ṣe nkan ti o tọ ati ti o lere lori fun oluwa rẹ, yala o wa nibẹ o tabi ko si nibẹ. Abalajọ ti ohun gbogbo ti oluwa rẹ ni ṣe gberu labẹ amojuto rẹ. (Wo: Jẹ́nẹ́sísì 39:1-6)

Wayi o, irufẹ eniyan wọnyi ni Ọlọrun fẹ ki ọkọọkan ninu awọn ọmọ rẹ jẹ. O fẹ ki a jẹ ẹni ti awọn ti o wa ninu aye wa le fi ọkan tan lati ṣe ohun ti o yẹ, yala wọn wa nibẹ pẹlu wa tabi wọn ko si nibẹ. Wo awọn ọrọ Iwe mimọ wọnyi:

“Kìki ki ẹ sá jẹ ki ìwa-aiye nyin ki o mã ri gẹgẹ bi ihinrere Kristi: pe yala bi mo tilẹ wá wò nyin, tabi bi emi kò si, ki emi ki o le mã gburó bi ẹ ti nṣe, pe ẹnyin duro ṣinṣin ninu Ẹmí kan, ẹnyin jùmọ njijakadi nitori igbagbọ́ ihinrere, pẹlu ọkàn kan.” (Fílípì 1:27)

“Ẹyin ẹru, ẹ gbọ ti awọn olowo yin nipa ti ara ni ohun gbogbo; ki i ṣe ni arọjuṣe, bi awọn alaṣehan; ṣugbọn ni otitọ inu, ni ibẹru Ọlọrun. Ohunkohun ti ẹyin ba n ṣe, ẹ maa fi tọkantọkan ṣe e fun Oluwa, ki i ṣe fun eniyan; ki ẹ mọ pe lọwọ Oluwa ni ẹyin o gba ere, nitori ẹyin n sin Oluwa Kirisiti. Ṣugbọn ẹnikẹni ti o ba ṣe aiṣododo, yoo gba a pada nitori aiṣododo naa ti o ti ṣe: ko si si ojuṣaaju.” (Kólósè 3:22-25)

Ki ni awọn ọrọ Iwe mimọ wọnyi n sọ fun wa? Wọn n sọ fun wa pe a ni lati jẹ ẹni ti Ọlọrun ati eniyan le fọkantan lati ṣe ohun ti o tọ ni ipokipo ti a le wa, yala a n wo wa tabi a ko wo wa. Ki ni idi? Idi ni pe kiki awọn ti o ba n gbe aye wọn ni ọna yi ni yoo pada gba oriyin lọdọ Ọlọrun, bi wọn ko tilẹ ni anfaani lati di ipo ti o ga kankan mu laye ti a wa yi.

Njẹ mo wa jẹ irufẹ eniyan ti Ọlọrun ati awọn eniyan le fi ọkan tan lati ṣe ohun ti o tọ ati ti o dara ninu gbogbo awọn ibaṣepọ mi, yala a n wo mi tabi a ko wo mi? Njẹ iwọ naa jẹ irufẹ eniyan yi bi? Ṣe awọn ti a n ba gbele, ti a n ba ṣiṣẹ, ti a n ṣiṣẹ fun tabi ti a jọ wa ninu ijọ kan naa le fi ọkan tan wa lati ma a fi igba gbogbo ṣe ohun ti o yẹ ati ti o dara, yala wọn wa pẹlu wa tabi wọn ko si pẹlu wa?

Wo o, aye yi ko fi igba kankan ṣe alaini anito awọn alaṣehan. Nitorina, ti o ba jẹ ẹnikan ti ko fi ara rẹ fun oju-aye ṣiṣe ṣugbọn ti o n fi igba gbogbo ṣe ohun ti o dara ati ti o yẹ, yala awọn eniyan n wo o tabi wọn ko wo o, awọn ti o n ba ọ ni ajọsepọ yoo ma a fi gbogbo igba ri ara wọn bi alabukunfun. Idi si ni pe wọn yoo mọ wipe awọn ko ni lati yọnu lori ohunkohun ti wọn ba fi si abẹ isakoso rẹ – wọn ti mọ wipe wa a mojuto pẹlu ifarabalẹ.

Ṣugbọn ti o ba jẹ ẹnikan ti o fi ara rẹ fun oju-aye ṣiṣe, ko ni pẹ rara ti awọn ti o wa ni ayika rẹ yoo fi da ọ mọ fun ẹni ti o jẹ gan an. Bi wọn ko tilẹ wa bẹnu atẹ lu ọ ni gbangba, wọn yoo fi si ọkan pe o ko le lailai ṣoju wọn bi o ti ṣe tọ lori ọrọ kankan, ayafi ti wọn ba wa nibẹ. Bi eyi yoo ṣe wa pa ọ lara si jẹ ohun ti ẹnikẹni ko le e sọ. Nitorina, bẹrẹ si ni mọ-ọn-mọ gbadura si Ọlọrun lati ya aye rẹ ya ohunkohun ti o ni i ṣe pẹlu oju-aye ati lati fun ọkan rẹ ni okun lati ma a fi igba gbogbo jẹ oninukan ati ẹni ti o jafafa. Nipa bayi, iwọ yoo le de awọn ibi giga ti O fẹ ki o de laye.

Kí o ní ọ̀ṣẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Olurapda wa. Inu mi dun lati ki ọ kaabọ sinu ọsẹ akọkọ ninu oṣu Ọ̀wàrà 2026. Adura mi si nipe nibikibi ti o ba lọ Ọlọrun ko ni jẹ ki o lugbadi ẹtan awọn oniwaasu eke awọn ọjọ ikẹyin wọnyi. Amin.

Bi a ti ṣe fi han wa ninu bibeli, awọn ọjọ ikẹyin yi jẹ awọn ọjọ ninu eyi ti a o ri ọpọ eke oniwaasu. Awọn wọnyi si ni eṣu yoo ma a lo lati tan ọpọ eniyan jẹ ati lati dari wọn kuro ninu otitọ. Nitorina, a fun wa ni awọn aṣẹ wọnyi ninu bibeli lori wọn:

“Ẹ mã kiyesi awọn eke woli ti o ntọ̀ nyin wá li awọ agutan, ṣugbọn apanijẹ ikõkò ni nwọn ninu. Eso wọn li ẹnyin o fi mọ̀ wọn…” (Mátíù 7:15-16)

“OLUFẸ, ẹ máṣe gbà gbogbo ẹmí gbọ́, ṣugbọn ẹ dán awọn ẹmí wò bi nwọn ba ṣe ti Ọlọrun: nitori awọn woli eke pupọ̀ ti jade lọ sinu aiye.” (1 Jòhánù 4:1)

Ki ni awọn aṣẹ ti a fun wa ninu awọn ẹṣẹ bibeli wọnyi? Akọkọ, a ni lati kiyesi awọn eke oniwaasu. Ki si ni idi ti a ṣe ni lati kiyesi wọn? Idi ni pe alarekereke ni wọn. Wọn ko ni fi ete inu wọn han wa lẹsẹkẹsẹ ti wọn ba tọ wa wa. Dipo bẹẹ, nṣe ni wọn yoo fi ara wọn han bi ẹni ti o fẹran wa, ti o si fẹ ki a ṣe rere. Ṣugbọn bi wọn yoo ṣe jẹ aye wa run nipasẹ ojukokoro, iṣekuṣe ati awọn iwa ika miran ni wọn n wa.

Aṣẹ keji ti a gba ni pe ki a ma a dan gbogbo awọn oniwaasu ti o n tọ wa wa wo. Ki ni idi? Idi ni pe eyi ni yoo jẹ ki a le da awọn eke ti o wa ni aarin wọn mọ. Bi a ti ṣe ri ninu awọn ẹsẹ bibeli yẹn, ọpọ eke oniwaasu ni wọn ti jade lọ sinu aye. Lati ibo si ni wọn ti jade lọ sinu aye? Lati inu ijọ ni! Nitorina, ki a to fi ara wa jin lati ma a tẹle oniwaasu kankan, a sọ fun wa pe ki a kọkọ dan wọn wo naa.

Bawo wa ni ki a ṣe dan wọn wo? Ọrọ Ọlọrun ni a o lo lati dan wọn wo. Ọrọ Ọlọrun fi han wa kedere bi a ti ṣe le mọ iyatọ laarin awọn ojulowo oniwaasu ati awọn eke. Fun apẹrẹ, ọrọ Ọlọrun sọ wipe nipa eso wọn ni a o fi mọ wọn. Nitorina, oniwaasu yowu ti ko ba ti so eso Ẹmi, eso ifẹ, ayọ, alaafia, iwa-pẹlẹ, suuru, irẹlẹ, ikora-ẹni-nijanu ati awọn wọn iwa rere miran ti a mẹnuba ninu bibeli, ko ki i ṣe ti Ọlọrun. Nitorina a gbọdọ takete si i.

Lafikun, oniwaasu yowu ti iṣọwọ ṣe iṣẹ iranṣẹ rẹ ko ba ti wa ni ibamu pẹlu nkan ti a ri ninu bibeli ko ki i ṣe ti Ọlọrun. A si ni ọpọ wọn loni ti wọn n ṣe oniruuru nkan ti ko wa ni ibamu pẹlu ọrọ Ọlọrun. Awọn wọnyi a ma a yan adura ti o takọ ọrọ Ọlọrun. Wọn a ma a bu awọn ẹda ọrun. Wọn a ma a ta ororo, omi ati awọn nkan miran. Wọn a tun ma ṣe iṣẹ oṣọ, pẹlu iboju pe awọn n ṣe akanṣe eto itusilẹ fun awọn eniyan.

Wayi o, ọrọ Ọlọrun sọ fun wa pe a gbọdọ takete si irufẹ awọn eniyan wọnyi, bi o ti wu ki awọn iṣẹ amin, iṣẹ iyanu ati iṣẹ ara ti wọn n ṣe le ga to. Aijẹbẹ, Satani yo o lo wọn lati pa aye wa run. Lafikun, nipa dida ara wa pọ mọ wọn, awọn naa le di alajọpin ninu idajọ Ọlọrun yowu ti o ba wa sori wọn. Nitorina, takete si awọn eke oniwaasu. Fun anfaani rẹ si ni lati ṣe bẹẹ gẹgẹ.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: Ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olurapada wa. Inu mi dun lati ki ọ kaabọ sinu ọsẹ ti o so oṣu Òwewè ati Ọ̀wàrà ọdun 2026 mọ ara wọn. Adura mi ni pe ki Ọlọrun jẹ ki igbagbọ rẹ ninu rẹ wa ni iduro-ṣinṣin titi de opin, bi o ti wu ki awọn ipenija ti iwọ yoo koju ninu irin rẹ pẹlu Jesu Oluwa ri, ki o ba le gba oriyin rẹ lẹyin ohun gbogbo. Amin.

Bi a ti ṣe ri ninu bibeli, ti igbagbọ wa ninu Jesu Oluwa yoo ba jẹ eyi ti Ọlọrun yoo pin wa lere fun ninu ijọba ayeraye rẹ, o ni lati jẹ igbagbọ lati ibẹrẹ de opin. Ki eyi si to le waye, a ni lati dirọ mọ ọrọ rẹ, bi a tilẹ ri awọn ibi ti ko ti ye wa tabi ibi ti o ti mu wa binu. Idi si ni pe ọrọ rẹ ni otitọ (Jòhánù 17:17)

Wayi o, nitoripe ọrọ Oluwa jẹ otitọ, titẹwọgba ati didirọmọ nikan ni ọna ti irọ eṣu, irọ ẹran-ara ati irọ aye yi ko fi ni le pa wa run. Bẹẹni, nipa titẹwọgba ati didirọmọ ọrọ rẹ nikan naa ni ọna ti ete Ọlọrun fi le jẹ mimuṣẹ ninu aye wa lẹkunrẹrẹ. Njẹ a o wa ma a fi igba gbogbo tẹwọgba ati dirọmọ ọrọ rẹ, bi a ko tilẹ ni oye ọna ti yoo gba ṣe wa ni anfaani tabi bi o tilẹ tako nkan ti o wa ninu ọkan wa?

Bi a ti ṣe ri ninu bibeli, ọjọ kan wa ti awọn apọsiteli ti o wa pẹlu Jesu Oluwa ni lati pinnu lori boya wọn yoo dirọmọ ọrọ rẹ, ki wọn si da ẹni ti Ọlọrun fẹ ki wọn da, tabi wọn yoo kọ ọrọ rẹ silẹ, ki wọn si pada si igba aye ti wọn ti n gbe ki wọn to wa si ọdọ rẹ. Ki si ni idi? Idi ni pe Oluwa sọ awọn nkan kan ni ọjọ naa ti o bi ọpọ awọn ọmọ ẹyin rẹ ninu. O si wa bi wọn ninu debi wipe wọn dẹkun lati ma a tẹle. (Wo: Jòhánù 6:25-66)

Ṣe O wa sọ nkan kan lọjọ naa ti ko ki i ṣe otitọ ni? Rara o, ko kuku ṣe bẹ ẹ. Ki wa ni idi ti inu fi bi wọn debi wipe wọn pada lẹyin rẹ, ti wọn ko si tẹle mọ? Idi naa ni pe wọn ko ṣetan lati tẹwọgba otitọ ti O n sọ fun wọn, ki wọn si ma a gbe ni ibamu pẹlu rẹ. Bibeli si wa sọ fun wa pe a o ri ọpọ awọn ti wọn n pe ara wọn ni onigbagbọ ti wọn yoo ma a ṣe bakanna ni awọn ọjọ ikẹyin yi. Awọn naa yoo yipada kuro ninu otitọ lati fetisi irọ nitoripe wọn ko fẹ tẹwọgba, ki wọn si gbe aye wọn ni ibamu pẹlu rẹ. (Wo: 2 Tímótì 4:3-4)

Ni kukuru, lẹyin igba ti ọpọ awọn ọmọ ẹyin rẹ ti fi silẹ, a sọ fun wa ninu bibeli pe Oluwa kọju si awọn apọsiteli mejila rẹ lati bere lọwọ wọn boya awọn naa ko ni fi silẹ. Wo akọsilẹ Johanu lori eyi:

“Nitorina Jesu wi fun awọn mejila pe, Ẹnyin pẹlu nfẹ lọ bi?  Nigbana ni Simoni Peteru da a lohùn wipe, Oluwa, Ọdọ tali awa o lọ? iwọ li o ni ọ̀rọ ìye ainipẹkun.  Awa si ti gbagbọ́, a si mọ̀ pe, iwọ ni Kristi na, Ọmọ Ọlọrun alãye.” (Jòhánù 6:67-69)

Njẹ o ri bayẹn? Bi o tilẹ jẹ wipe Oluwa funrarẹ lo pe awọn apọsiteli yi lati wa pẹlu rẹ, ko ṣetan lati fi ipa mu wọn lati duro ti i. Dipo eyi, nṣe ni O jẹ ki wọn pinnu funralara wọn boya wiwa pẹlu rẹ lati gbọ ọrọ Ọlọrun, eyi ti o ṣeeṣe ki o bi wọn ninu nigba miran, ṣe iyebiye si wọn tabi ifasiko ṣofo lasan naa.

Bawo wa ni wọn ṣe fọhun si eyi? Kama fọrọgun, Peteru lo dahun fun gbogbo wọn. O si fi ye Oluwa pe awọn ko nibomiran ti awọn n re. Ki ni idi? Gẹgẹ bi o ti sọ, Jesu nikan ni O ni ọrọ iye ainipẹkun ti wọn nilo lati ni iriri imuṣẹ ete Ọlọrun fun aye wọn lọwọ. Ki wa ni idi ti wọn yoo ṣe lọ si ibomiran?

Njẹ ki wa ni idi ti awa naa yoo ṣe lọ si ibomiran, ti a ba ni aridaju pe Jesu Oluwa wa ni ọrọ iye ainipẹkun ti yoo mu ete Ọlọrun ṣẹ ninu aye wa lọwọ? Ki ni idi ti igbagbọ wa ninu rẹ ko ṣe ni jẹ lati ibẹrẹ de opin, ti a ba gba lotitọ pe Oun ni ọna, otitọ ati iye? Lotitọ, ọrọ rẹ le nira nigba miran fun wa lati gba tabi ki o lodi si nkan ti a ti fi gbogbo igba gbagbọ tabi ki o ma wa si imuṣẹ lẹsẹkẹsẹ. Ṣugbọn oun ni otitọ ti yoo sọ wa di ominira, ti yoo si jẹ ki aye wa jẹ nkan ti o yẹ ki wọn jẹ.

Ti a ba wa fẹ ki aye wa jẹ nkan ti o yẹ ki wọn jẹ ni otitọ, nṣe ni ki a ma a fi ojoojumọ tẹwọgba ati dirọmọ ọrọ Oluwa si wa, bi o tilẹ jẹ wipe ṣiṣe bẹ ẹ le ma larinrin fun wa. Aijẹbẹ, nṣe ni ki a rọra fi silẹ bi awọn ọmọ ẹyin asiko naa ṣe fi silẹ, ki a si lọ ṣe ohun yowu ti o ba wu wa pẹlu aye wa. Lẹyin ohun gbogbo, gbogbo wa naa ni yoo ri boya a yan-an re tabi a ko yan-an re, bi o tilẹ jẹ wipe yoo ti pẹ ju ni asiko yi lati ṣe atunṣe kankan. Adura mi ni pe a ko ni yan ohukohun ti yoo pada jẹ ki a kun fun abamọ ayeraye, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com  or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu ayọ ti o ga ni mo ki ọ kaabọ sinu ọsẹ miran ninu oṣu Òwewè 2026. Adura mi ni pe ki Ọlọrun jẹ ki ọkan rẹ jẹ olotitọ si titi lailai, ki o ba a le tẹsiwaju lati ma jẹ igbadun didara rẹ ni orilẹ alaye. Amin.

Bi a ti ṣe fi han wa ninu bibeli, ọkan lari idi ti Ọlọrun fi kọ Sọọlu ni ọba lori Isiraẹli ni pe o lagidi, o si tun gberaga. Lotitọ, o ṣe awọn aṣiṣe kan. Ṣugbọn ko si ẹni ti ko le ṣe aṣiṣe. Bibeli tilẹ sọ fun wa pe gbogbo wa ni a ma n kọsẹ ni ọna pupọ. (Wo: Jákọ́bù 3:2)

Nitorina, Ọlọrun ko kọ Sọọlu ni ọba nitoripe o kan ṣe awọn aṣiṣe melokan nikan. Dipo eyi, O kọ ọ nitoripe o lagidi, o si tun gberaga. Ti ko ba lagidi, ti ko si tun gberaga ni, nṣe ni ko ba wa oju Ọlọrun fun idariji awọn aṣiṣe ti o ṣe. Niwọn igba ti Ọlọrun si jẹ Ọlọrun alaanu, nṣe ni ko ba forijin, ki a sọ wipe o wa oju rẹ fun idariji awọn ẹṣẹ rẹ.

Ṣugbọn Sọọlu jẹ alagidi ati onigbera eniyan. Nitorina, ko ṣetan lati wa oju Ọlọrun fun idariji awọn ẹṣẹ rẹ. Dipo eyi, nṣe ni o n ṣe bi igba ti o jẹ wipe aigbọran rẹ si Ọlọrun ko ja mọ nkankan. Nitorina, Samuẹli, eniyan Ọlọrun ti o yan-an gẹgẹ bi ọba lori Isiraẹli, yago fun patapata. Iwọ naa wo nkan ti a sọ ninu bibeli lori eyi:

“Samueli si lọ si Rama; Saulu si goke lọ si ile rẹ̀ ni Gibea ti Saulu. Samueli kò si tun pada wá mọ lati wo Saulu titi o fi di ọjọ ikú rẹ̀: ṣugbọn Samueli kãnu fun Saulu: o si dùn Oluwa nitori on fi Saulu jẹ ọba lori Israeli.” (1 Sámúẹ́lì 15:34-35)

Njẹ o ri bayẹn? Lẹyin igba ti Samuẹli ti ba Sọọlu wi tan lori aigbọran rẹ si Ọlọrun lẹẹkeji, ko wa lati bẹ ẹ wo mọ. O si wa ṣeni laanu pe Sọọlu naa ko gbe igbesẹ lati wa Samuẹli lọ mọ titi ọjọ ti o fi ẹ mu Dafidi ni ọdọ Samuẹli. Ki ni idi? O woye pe oun ko nilo eniyan Ọlọrun naa mọ. O woye pe oun le da ṣe iṣakoso ijọba naa ṣe funra oun, lalai nilo itọni Ẹmi ti Samuẹli mọ. (Wo: 1 Sámúẹ́lì 19:18-24)

Njẹ ki ni ka pe iyẹn? Igberaga ati agidi ni. Nitori igberaga ati agidi Sọọlu yi, o pada wa iṣẹ-oṣo lọ fun itọna ni igba ti opin ijọba rẹ sumọn etile. Eyi naa si ni ọna ti o gba pa ara rẹ run patapata lalai si atunṣe. (Wo: 1 Sámúẹ́lì 28)

Nibakana, a ri ọpọ ninu ijọ loni ti wọn kun fun igberaga ati agidi bi Ọba Sọọlu. Awọn naa ko ni gba ibawi tabi itọni kankan ti o wa ni ibamu pẹlu ọrọ Ọlọrun. Ti wọn ba si ri wipe o ko ni fi aaye gba wọn lati ṣe bi o ti ṣe wu wọn, wọn yoo ba kuku jina rere si ọ patapata. Nitorina, ọ tẹ wọn lọrun ki wọn ma lọ si oniruuru ijọ awọn Kirisitiẹni ju ki wọn duro sinu ijọ kan nibi ti a o ti le ṣamojuto wọn ati dari wọn ninu ifẹ Ọlọrun.

Ibanujẹ ni o wa jẹ pe nkan ti irufẹ awọn eniyan wọnyi ko loye rẹ ni pe ko si ni ki igbẹyin ti wọn naa ba fẹrẹ dabi ti Sọọlu. Awọn naa, niwọn igba ti wọn ko ni tẹwọgba itọni Ẹmi, yoo fẹrẹ pari irinajo wọn sinu ibọriṣa. Idi si ni pe nigba ti wọn ba nilo iranwọ Ọlọrun pẹlu ikanju, ko ni da wọn lohun. Ko si ni da wọn lohun nitoripe, bi Ọba Sọọlu, wọn ko ni wa a pẹlu ọkan otitọ, bi o tilẹ jẹ wipe wọn nilo iranwọ rẹ pẹlu ikanju.

Nitorina, ti o ba n wuwa agidi ati igberaga si awọn ti Ọlọrun yan lati dari rẹ nipasẹ ti Ẹmi, nṣe ni ko yara tete tun ọna rẹ ṣe ki o to pẹ ju. Aijẹbẹ, agidi ati igberaga rẹ ko ni gba kiki ipese Ọlọrun kuro lọwọ rẹ, o tun le jẹ ki o padanu ọkan rẹ. Njẹ ki eyi ma jẹ ipin rẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Òwewè 2026. Adura mi si ni pe ki Ọlọrun, nipasẹ Ẹmi rẹ ti O n gbe inu wa, ma a fi ojoojumọ kun ọkan rẹ pẹlu oye ete, eto ati ipese rẹ fun ọ lọna ti o peye, ki o ba a le da ohun gbogbo ti O fẹ ki o da laye yi, ni orukọ Jesu. Amin.

Lẹyin ajinde Jesu Kirisiti Oluwa wa, O bẹrẹ si ni fi ara rẹ han ọmọ ẹyin rẹ ni oniruuru ibi ati ni oniruuru akoko. Lara awọn akoko naa ni O ti sọ awọn nkan melokan fun diẹ lara awọn ọmọ ẹyin wọnyi nipa ara rẹ, gẹgẹ bi a ti kọ ọ sinu Iwe mimọ. Ṣugbọn fun wọn lati ni oye nkan ti O n fi han wọn lati inu Iwe mimọ, wọn nilo ki a ṣi wọn ni iye. Nkan ti Luuku sọ lori eyi niyi:

“O si wi fun wọn pe, Nwọnyi li ọrọ ti mo sọ fun nyin, nigbati emi ti wà pẹlu nyin pe, A kò le ṣe alaimu ohun gbogbo ṣẹ, ti a ti kọ ninu ofin Mose, ati ninu iwe awọn woli, ati ninu Psalmu, nipasẹ̀ mi. Nigbana li o ṣí wọn ni iyè, ki iwe-mimọ́ ki o le yé wọn,” (Lúùkú 24:44-45)

Njẹ o ri bayẹn? Jesu Oluwa wa ṣi awọn ọmọ ẹyin rẹ ni iye ki wọn ki o ba a le ni oye nkan ti O n fi han wọn ninu Iwe mimọ. Eyi jasi pe a ko le lailai ni oye Iwe mimọ ti Ọlọrun funrarẹ ko ba i ti ṣi iye wa lati ni oye rẹ. Ti a ko ba si ni oye rẹ, a ko ni le gbe aye wa ni ibamu pẹlu ete, eto ati ipese Ọlọrun fun wa lọna ti o peye.

Jesu le e gbe aye rẹ lọna ti o peye ni ibamu pẹlu ete, eto ati ipese Ọlọrun fun un nitoripe O ni oye Iwe mimọ ati nkan ti o ṣọ nipa rẹ. Bi Luuku si tun ṣe sọ fun wa, nigba ti O n ba meji lara awọn ọmọ ẹyin rẹ sọrọ lẹyin ajinde rẹ, Jesu sọ fun wọn nipa ete, eto ati ipese Ọlọrun lori rẹ fun wọn lati inu Iwe mimọ, bẹrẹ lati ori Mose ati gbogbo awọn wolii. Bi O si ṣe n sọ awọn nkan wọnyi fun wọn, nṣe ni ọkan wọn n gbina ninu wọn. (Wo: Lúùkù 24:13-32)

Ki wa lo fa ti o ṣe ṣeeṣe fun Jesu lati ba awọn ọmọ ẹyin wọnyi sọrọ nipa ara rẹ lati ipasẹ Iwe mimọ? Idi ni pe O ni oye Iwe mimọ lọna ti o peye. Bawo ni O si ṣe ni oye rẹ lọna ti o peye? Nipasẹ Ẹmi Mimọ ni!

Nibakana, awa naa le ni oye ete, eto ati ipese Ọlọrun fun wa lati ipasẹ Iwe mimọ. Ṣugbọn Ẹmi Mimọ yoo nilo lati ṣi wa ni iye ki eyi to le ṣelẹ, gẹgẹ bi Jesu ti ṣe ṣi awọn ọmọ ẹyin rẹ ni iye ki wọn ki o le ni oye Iwe mimọ. Aijẹbẹ, a le ma ṣi nkan gbe si ara wọn, bi o tilẹ jẹ wipe a n kẹkọ ninu Iwe mimọ pẹlu ifarajin ti o ga, ki a si tun bẹrẹ si ni ṣe awọn nkan ti o lodi si ete, eto ati ipese rẹ fun wa. Eyi ko si ni suwọn fun wa rara.

Ranti wipe awọn ti o n fi ojoojumọ kẹkọ ninu Iwe imọ lati wadi ẹni ti yoo jẹ Mesaya wọn ati asiko ti yoo tọ wọn wa ni o kan Jesu mọ agbelebu. Ki wa ni ko jẹ ki wọn da Jesu mọ gẹgẹ bi Mesaya wọn? Idi ni pe a ko ṣi wọn ni iye lati ni oye Iwe mimọ ti wọn n kẹkọ ninu rẹ. (Wo: Ìṣe Àpósítélì 13:27)

Nitorina, ko to lati ma a kẹkọ ninu Iwe mimọ; o tun ṣe pataki ki Ọlọrun ṣi wa ni iye lati ni oye nkan ti o n sọ. Aijẹbẹ, nkan ti a n kẹkọ le lori ninu rẹ ko ni ṣe wa ni anfaani. Adura mi wa ni pe ki Ọlọrun ma a fi ojoojumọ ṣi ọ ni iye lati ni oye ọrọ rẹ ni igbakigba ti o ba n gbọ, ka a, kẹkọ ninu rẹ tabi ṣaṣaro ninu rẹ, ki gbogbo ete ati eto rẹ fun aye rẹ le jẹ mimuṣẹ. Amin.

Kí o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala. Inu mi dun lati ki ọ kaabọ sinu ọsẹ miran ninu oṣu Òwewè 2026. Adura mi ni pe ki Ọlọrun ma a fi ojoojumọ ṣe ọ yẹ pẹlu ohun gbogbo ti yoo ṣe ọ ni olujọsin tọọtọ ni iwaju rẹ, ni orukọ Jesu. Amin.

Bi a ti ṣe fi han wa ninu bibeli, Ọlọrun ma n fi gbogbo igba wo ọkan awọn eniyan ni ibi gbogbo. Nkan ti O ba si ri ninu ọkan wọn jẹ ọkan lara awọn nkan ti yoo sọ iha ti yoo kọ si wọn. Fun apẹrẹ, lẹyin igba ti Ọba Asa bẹrẹ si ni wuwa igberaga, Ọlọrun ran wolii kan lati sọ eyi fun un:

“Nitoriti oju Oluwa nlọ siwa sẹhin ni gbogbo aiye, lati fi agbara fun awọn ẹni ọlọkàn pípe si ọdọ rẹ̀…” (2 Kíróníkà 16:9)

Njẹ o ri bayẹn? Oju Ọlọrun ma n fi igba gbogbo wa lori ilẹ aye lati wa awọn ti ọkan wọn ṣe olootọ si, iyẹn awọn ti ọkan wọn ko ni lailai gbẹkẹle elomiran tabi ohun miran yatọ si. Ki si ni idi ti O ṣe n wa irufẹ awọn wọnyi? O n wa wọn ki o ba a le fi agbara rẹ han lori ọrọ wọn. O n wa wọn ki O ba a le fi ara rẹ han gẹgẹ bi ẹni ti o lagbara to lati mojuto wọn, lalai ka irufẹ idojukọ yowu ti wọn n ba finra laye si.

Lafikun, nigba ti Jesu n ba arabarin Samaria kan sọrọ, O sọ eyi fun un:

“Ṣugbọn wakati mbọ̀, o si de tan nisisiyi, nigbati awọn olusin tõtọ yio ma sìn Baba li ẹmí ati li otitọ: nitori irú wọn ni Baba nwá ki o ma sìn on.” (Jòhánù 4:23)

Iru awọn olujọsin wo ni Ọlọrun n wa? O n wa awọn ti yoo ma a sin ni ẹmi ati ni otitọ. Eyi ja si pe, O n wa awọn ti yoo sin pẹlu gbogbo ọkan wọn, ti wọn ko si ni ṣe alaiṣootọ si ni ọna kankan ninu ibaṣepọ wọn pẹlu rẹ. Irufẹ awọn wọnyi ni O le fi ọkan tan lati fun ni ifihan ara rẹ ati agbara rẹ. Irufẹ awọn wọnyi ni O le fi ọkan tan lati gbe awọn iṣẹ rere ti O fẹ ṣe laye le lọwọ. Idi si ni pe awọn nikan ni yoo sin-in lotitọ, bi o ti wu ki igba ati asiko aye wọn ri, yala o rọrun fun wọn tabi ko rọrun fun wọn lati sin in.

Awọn miran lara wa le ma woye idi ti Ọlọrun ko ṣe ma a fi ara rẹ han wa tabi lo wa lati ṣe awọn iṣẹ rere kan ti O n tipasẹ awọn miran ṣe, bi o tilẹ jẹ wipe a n lọ si ipade ijọ deede tabi fi ọrẹ ati idamẹwa silẹ deede. Nkan ti ko ye wa ni pe ko ki i ṣe awọn ti yoo ma a wa si ipade ijọ tabi fi ọrẹ silẹ deede ni Ọlọrun n wa, bi o tilẹ jẹ wipe awọn nkan wọnyi ṣe pataki. Dipo eyi, nṣe ni O n wa awọn ti yoo ma a sin in tọkan-tọkan, bi o ti wu ki igba tabi asiko aye wọn le e ri. Ti a ko ba si ki i ṣe iru eniyan yi, awọn nkan kan wa ti Ọlọrun ko ni lailai ka wa yẹ fun un.

Nitorina, bi a ti ṣe n bẹrẹ ọsẹ tuntun yi, bere lọwọ ara rẹ, “Ti Ọlọrun ba n wa ẹni ti o le fọkan tan lati fun mi imọ ara rẹ, imọ ifẹ rẹ, imọ ipese rẹ tabi awọn iṣẹ rere kan ti O fẹ ki o jẹ ṣiṣe nibi ti mo wa, njẹ yoo ka mi yẹ fun un?” Ranti wi pe Ọlọrun ko ki i ṣoju-ṣaaju. Nitorina, bi O tilẹ jẹ wipe O fẹran gbogbo wa bakan naa, kiki awọn ti o ba n fi tọkantọkan fi ara wọn jin fun ni yoo le gbẹkele lati ṣe ohunkohun ti o ba ṣe pataki si i. Idi si ni yi ti a ṣe gbọdọ ma a fi igba gbogbo gbadura pe ki Ọlọrun ya wa ya ohunkohun ti o le ma di wa lọwọ lati fi gbogbo ọkan wa jin lati sin in. Eyi ni yoo jẹ ki O bẹrẹ si ni ri wa gẹgẹ bi awọn ti O le ka yẹ fun oniruuru iṣẹ rere.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti. Inu mi dun lati ki ọ kaabọ sinu ọsẹ ti o so oṣu Ògún ati Òwewè 2026 mọ ara wọn. Adura mi ni pe ki Ọlọrun kun ọ pẹlu oye ti o peye lori ipo rẹ ninu ijọba rẹ, ki o ma ba a gbẹyin ninu nini iriri didara rẹ ni ọna kankan. Amin.

Bi a ti ṣe ri ninu bibeli, ipo ti gbogbo awa ti o gbagbọ ninu Jesu Kirisiti wa ninu ijọba Ọlọrun jẹ ipo ọmọ. O si ṣe pataki ki a ma a fi igba gbogbo fi eyi sọkan, ki a ba a le ma gbe ni ibamu pẹlu rẹ. Wo nkan ti Pọọlu sọ lori rẹ:

“Ẹmí tikararẹ̀ li o mba ẹmí wa jẹrí pe, ọmọ Ọlọrun li awa iṣe: Bi awa ba si jẹ ọmọ, njẹ ajogun li awa, ajogun Ọlọrun, ati ajumọ-jogun pẹlu Kristi; biobaṣepe awa bá a jìya, ki a si le ṣe wa logo pẹlu rẹ̀.” (Róòmù 8:16-17)

Ṣe o ri bayẹn? Ọmọ Ọlọrun ni a jẹ. Niwọn igba ti a si jẹ ọmọ Ọlọrun, ajogun rẹ ni a tun jẹ pẹlu. Ṣugbọn ki a to le ni oye ti o peye lori nkan ti o tunmọsi lati jẹ ajogun Ọlọrun, a kọkọ gbọdọ ni oye pe ọmọ rẹ ni a jẹ ati wipe inu ẹbi rẹ ni a wa. Jòhánù 1:12 sọ wipe, “Ṣugbọn iye awọn ti o gbà a, awọn li o fi agbara fun lati di ọmọ Ọlọrun, ani awọn na ti o gbà orukọ rẹ̀ gbọ́.”

Wayi o, jijẹ ọmọ Ọlọrun ko ni nkankan ṣe pẹlu ọrọ wa, ilu-abinibi wa, ẹkọ wa tabi ipo wa lawujọ. O ni i ṣe pẹlu igbagbọ ninu Jesu Kirisiti. Nitorina, ti o ba ni igbagbọ ninu Jesu Kirisiti Oluwa, ọmọ Ọlọrun ni o jẹ (Gàlátíà 3:26). Ti o ba si wa jẹ ọmọ Ọlọrun, a jẹ wipe ajogun rẹ ni o jẹ pẹlu.

Ta wa ni ajogun? Ajogun ni ẹni ti o ni lẹtọ labẹ ofin lati gba ogun kan tabi omiran. Roomu 8:17 sọ fun wa pe niwọn igba ti a ba jẹ ọmọ Ọlọrun, ajogun rẹ ati ajumọ-jogun pẹlu Kiristi ni a jẹ. Eyi jasi pe ibaṣepọ wa pẹlu Ọlọrun ko ja si asan. Ogun wa ti o soro mọ jijẹ tirẹ.

Ni Gàlátíà 4:17, Pọọlu sọ fun wa pe, “Nitorina iwọ kì iṣe ẹrú mọ́, bikoṣe ọmọ; ati bi iwọ ba iṣe ọmọ, njẹ iwọ di arole Ọlọrun nipasẹ Kristi.” Ki wa ni ogun wa? Akọkọ, a ni lati mọ wipe ogun wa kọja nkan ti aye yi. 1 Pétérù 1:4 sapejuwe ogun wa lọna yi: “Ogún aidibajẹ, ati ailabawọn, ati eyi ti kì iṣá. Bi a si tun ṣe ri ninu bibeli, a ti jogun awọn nkan wọnyi lati ọwọ Ọlọrun:

• Iye ainipẹkun – Jòhánù 3:16
• Idurotini Ẹmi Mimọ – Éfésù 1:13-14
• Ijọba Ọlọrun – Jèmíísì 2:5
• Irẹpọ pẹlu Ọlọrun – Róòmù 5:1
• Ireti ogo ainipẹkun – 1 Pétérù 1:3-4

Wayi o, mimọ pe a jẹ ajogun Ọlọrun yẹ ki o yi bi a ṣe n gbe aye pada. Ajogun tabi arole gbọdọ ma a gbe ile aye bi Baba rẹ ni. Nitorina, a gbọdọ ma a ṣoju Baba wa daradara. Ọrọ wa, iwa wa, ibaṣepọ wa ati iṣesi wa gbọdọ fi han pe ti Ọlọrun ti a n ṣe, lalai fi ti ipo ti a wa ṣe. Nitorina, ma jẹ ki ipo ti o ba ara rẹ lasiko yi jẹ ki o gbagbe ẹni ti o jẹ.

Siwaju si, pe a jẹ ajogun Ọlọrun ko tunmọ si pe a ko ni ba iṣoro pade. Róòmù 8:17 naa sọ fun wa pe ara nkan ti o sorọ mọ jijẹ ajumọjogun pẹlu Kirisiti ni ki a pin ninu ijiya rẹ ki a to di alabapin ninu ogo rẹ. Amọ ṣa o, awọn ijiya ti a n dojukọ lọwọlọwọ ko le fagile ogun wa ti a fipamọ de wa. Roomu 8:18 sọ pe, “Nitori mo ṣíro rẹ̀ pe, ìya igba isisiyi kò yẹ lati fi ṣe akawe ogo ti a o fihàn ninu wa.”

Nitorina, bi o tilẹ jẹ wipe o ko ni ohun gbogbo ti o wu ọ lati ni loni, ti o ba jẹ ti Kirisiti, o ni ogun ti ko le parun. Eyi si yẹ ki o fun ọ ni iwuri lati ma a fi ojoojumọ gbe aye rẹ lati bu ọla fun Ọlọrun. Mo si gbadura pe ki o gba okun lati ṣe bẹẹ gẹgẹ, ni orukọ Jesu. Amin.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)