Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Òwewè 2022. Adura mi si ni pe ohunkohun ko ni di ọkankan lara awọn nkan daradara ti Ọlọrun ti pese silẹ fun igbadun rẹ ninu oṣu naa lọwọ lati jẹ tirẹ, ni orukọ Jesu. Amin.
Wayi o, ti a ba n sọ wipe awọn eniyan n ni iriri idilọwọ, ko ki i ṣe gbogbo igba naa ni o jẹ wipe Satani ni o wa nidi rẹ. Ni igba miran, Ọlọrun funrarẹ gan ni O ma n wa nidi rẹ. Ki wa ni idi ti Ọlọrun, ti o fẹ araye to bẹ gẹẹ ti O fi fi ọmọ bibi rẹ kan ṣoṣo fun wọn, le fẹ di ọkunrin tabi obinrin kan lọwọ lati ma ni itẹsiwaju laye? Igberaga lo ma n fa a.
Ati Jemisi ati Peteru ni wọn jọ dijọ sọ fun wa ninu episiteli wọn pe Ọlọrun a ma kọ oju-ija si agberaga ṣugbọn a si fi oore-ọfẹ fun onirẹlẹ (Jémìsì 4:6; 1Pétérù 5:5). Nitorina, ti o ba gberaga, o yẹ ki o ma reti Ọlọrun lati di ilọsiwaju rẹ lọwọ ni awọn abala aye rẹ kan tabi ni gbogbo abala aye rẹ. Ọna kan ti a si ma n ṣaba gba fi igberaga han ninu aye wa, lalai tilẹ mọ, ni nipa kikọ lati tẹriba fun awọn alaṣẹ.
Bi a ti ṣe ri ninu bibeli, awọn eniyan wa ti Ọlọrun ti pa aṣẹ fun wa lati tẹriba fun. Fun apẹẹrẹ, awọn obi wa, awọn ọkọ wa, awọn agbaniṣiṣẹ ati ọga wa, awọn adari ilu wa ati awọn adari ijọba wa wa lara awọn ti O fẹ ki a ma tẹriba fun. Ko fẹ ki a tabuku awọn wọnyi tabi ki a ṣe aigbọran si wọn, niwọn igba ti awọn aṣẹ wọn ko ba ti tako ọrọ rẹ ati ilana rẹ fun igbe aye ododo. Ti a ba wa kọ eti didi si eyi, ti a si bẹrẹ si ni tabuku wọn, nṣe ni a n rin ninu igberaga; o si di dandan ki a bẹrẹ si ni ri iṣẹ Ọlọrun lodi si ilọsiwaju wa. Oun nikan lo si wa mọ iye awa ti a n ni idaduro ati idilọwọ laye nitori eyi. (Wo: Róòmù 13:1-5; Éfésù 5:22; Éfésù 6:1-3; 1Pétérù 2:13-14; 1Pétérù 3:1-2)
Siwaju si, ninu ijọ, Oluwa kọ wa lati tẹriba fun awọn adari wa ni ibọwọ fun Kirisiti. Eyi tunmọ si pe ijọ Ọlọrun ko ki i ṣe ibi ti o ti le ma gun ejika, ki o si tun ma ṣe bo ba ti ṣe wu ẹ. Awọn eniyan wa nibẹ ti Ọlọrun ti yan si ori rẹ lati ṣọna lori ọkan rẹ ati lati mojuto ọ, ki o ba le da ohun gbogbo ti O fẹ ki o da. O wa ṣe pataki ki o tẹriba fun awọn wọnyi, ki o si ma jẹ ki o ṣoro fun wọn lati dari rẹ, niwọn igba ti ko ba ki i ṣe pe wọn fẹ dari rẹ kuro ninu otitọ Ọlọrun. Aijẹbẹ, bi bibeli ti ṣe fi ye wa, ko le ṣe ọ ni anfaani rara. Dandan ni ki Ọlọrun ba ọ wi ni ibamu pẹlu igberaga rẹ. (Wo: Hébérù 13:17)
O wa ṣeni laanu pe ọpọ ninu ijọ loni ni igberaga kọ jẹ ki wọn fi ara balẹ kọ awọn nkan ti yoo ṣe wọn ni anfaani tabi ti yoo jẹ ki wọn ni iriri ẹkunrẹrẹ didara Ọlọrun ti ko ba jẹ ti wọn nipasẹ awọn adari wọn. Awọn wọnyi dabi awọn gbajumọ aarin awọn ọkunrin Tẹ́kóà ti a mẹnuba ninu iwe Nehemáyà, ti wọn kọ lati teriba fun awọn adari wọn ni akoko ti gbogbo awọn eniyan n tun odi Jerusalẹmu mọ (Nehemáyà 3:5). Iru awọn eniyan yi n ma n di ilọsiwaju iṣẹ Ọlọrun laarin awọn eniyan rẹ lọwọ laimọ. Nitorina, Oun naa a si din ọwọ iṣẹ rẹ ku ninu aye wọn.
Ṣe o wa ri bayi pe iṣọtẹ si awọn alaṣẹ ko le ṣe ọ ni anfaani rara. Nitorina, ri daju pe o mojuto irufẹ igberaga yowu ti o le wa ninu rẹ, ti o si n jẹ ki o ṣe orikunkun si awọn ti Ọlọrun ti yan gẹgẹ bi adari fun ọ. Ki Ẹmi Ọlọrun dari rẹ, ki O si tun fun ọ ni okun lati ṣe ohun ti o tọ lori ọrọ yi, ni orukọ Jesu. Amin.
Ki o ni ọsẹ alarinrin.
Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)