Author name: 23?Racing_Horse

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Kaabọ si ọsẹ miran ninu oṣu Belu 2023. Adura mi ni pe ki Ọlọrun da ọ lare ni gbogbo ibi ti a ti n yan ọ jẹ tabi ti a ko ti mojuto ọ ni ọna ti o tọ, ki O si tun gba wọn fun ọ, ohun rere gbogbo ti o jẹ tirẹ ṣugbọn ti awọn miran n fi pamọ fun ọ. Amin.

Ọkan lara awọn ẹkọ ti a kọ lati ara itan inu bibeli nipa Hagari, iransẹbinri Sara, ni pe ko si ẹni naa ti ọrọ rẹ ko jẹ Ọlọrun logun. Nitoripe ọrọ ẹnikọọkan wa ninu aye yi wa jẹ ẹ logun, O ma n fi gbogbo igba ṣe iṣọ lori aye wa lati ri nkan ti o n lọ nibẹ ati lati jẹ ki ohun gbogbo ṣiṣẹ pọ si rere fun wa. Amọ awa naa wa gbọdọ ni eyi lọkan, ki a ba le fi igbekẹle wa sinu rẹ patapata ati ki a ma ba fi ara wa jin fun iwa ibi yowu ti o le di imuṣẹ ete rẹ rere fun aye wa ṣẹ.

Bi itan Hagari ti ṣe lọ, oluwa rẹ, Sara, mu tọ ọkọ rẹ Aburahamu lọ ni igba kan, ki o ba le ba a sun. Ki si ni idi? Idi ni pe ọkan wọn n pongbẹ lati ni ọmọ ti ara wọn. Bi o tilẹ wa jẹ wipe Ọlọrun ti ṣeleri lati fun wọn ni ọmọ naa, Sara si tun ro wipe asiko ti n lọ fun oun. Nitorina, o mu Hagari wọ inu ọrọ naa, pẹlu ero wipe ọmọ ti o ba bi fun ọkọ oun yoo di ti oun. (Wo: Jẹ́nẹ́sísì 16:1-3)

Wayi o, gbogbo eto ti wọn to dabi ẹni pe o n lọ ni mẹlọmẹlọ fun gbogbo wọn ki o to di wipe Hagari loyun. Nigba ti o ri wipe oun ti loyun, o bẹrẹ si ni kẹgan Sara, oluwa rẹ. Eyi tunmọ si pe igberaga gba iṣakoso ọkan rẹ, o si dẹkun lati ma fi ọwọ ti o tọ fun oluwa rẹ. Ki ni idi? O ṣeeṣe ki o ro wipe oun ni o kan lati gba isakoso ati lati di oluwa ile naa.

Ṣugbọn fun abamọ rẹ, Aburahamu ko ni lọkan lati fi aye gba ọmọdebinrin onibajẹ kankan lati da igbeyawo rẹ ru, bi o tilẹ jẹ wipe ọmọdebinrin onibajẹ naa n ru oyun rẹ kaakiri. Nitorina, nigba ti Sara fi ẹjọ Hagari sun un, o sọ fun pe ki o da seriya fun bi o ba ti dara si loju rẹ. O si wa da seriya fun to bẹẹ gẹẹ ti o fi sa kuro nile. Ta wa ni o yẹ ki a bu julọ fun ikan ti o ṣẹlẹ si? Oun naa la gbọ bu julọ. Oun ni o ṣi oore-ọfẹ ti a fun lati ma ba ọga rẹ pin ọkọ rẹ lo. Oun ni o wa nidi ikoro aye rẹ. (Wo: Jẹ́nẹ́sísì 16:4-6)

Sibẹsibẹ, nibi ti o ti n sa a lọ, Oluwa wa ri, O si sọ ọrọ itunu si. Wo diẹ lara nkan ti sọ lori eyi ninu bibeli: “Angẹli Oluwa si ri Agai ni ẹgbẹ isun omi ni iju, isun omi ti o wa ni ẹgbẹ ọna ti o lọ si Ṣuri. O si wi pe, “Hagari, iransẹ Sarai, nibo ni o ti n bọ, nibo si ni iwọ n lọ?” O si dahun pe, “Mo n sa lọ kuro lọdọ ọga mi Sarai ni.” Angẹli Oluwa si wi fun un pe, “Pada lọ si ọdọ ọga rẹ ki o si tẹriba fun un.” Angẹli naa si fi kun fun un pe, “Emi yoo sọ ọ di orilẹ-ede nla, iran rẹ ki yoo si loonka.” (Jẹ́nẹ́sísì 16:7-10)

Njẹ o ri bayi pe bi o tilẹ jẹ wipe Hagari mọ ibi ti o ti n bọ ni asiko yi, ko ma mọ ibi ti o n lọ ni pato? O kan ṣa a woye pe o yẹ ki oun sa kuro lọdọ ọga oun. Ṣugbọn Oluwa sọ fun pe sisa kuro lọdọ oluwa rẹ kọ ni ọna abayọ si iṣoro rẹ. Ọna abayọ si iṣoro rẹ ni ki o ya ara ya igberaga ti o wa ninu rẹ, ki o si pada lọ tẹriba fun oluwa rẹ. Kini idi? Idi ni pe ti ko ba yanju igberaga ti o wa ninu rẹ, ko ni dẹkun lati ma ṣe awọn nkan ti yoo mu ki awọn ti o nifẹ rẹ le danu kuro lọdọ wọn.

Siwaju si, ki o ba le mọ pe ọrọ oun jẹ Ọlọrun logun, bi o tilẹ jẹ wipe ẹrú ni, O sọ fun pe Oun yoo sọ iru ọmọ rẹ di ilọpo-ilọpo ni orilẹ-aye, debi wipe ko si ẹni ti yoo le ka wọn. Yatọ si eyi, Ọlọrun tẹsiwaju lati sọ awọn aṣiri kan fun nipa ọjọ́-ọ̀la ọmọkunrin ti yoo bi. Idi eyi si ni ki o ma ba fi aye gba ipo rẹ gẹgẹ bi ẹru ni asiko naa lati jẹ ki o sọ ireti nu. (Wo: Jẹ́nẹ́sísì 16:12)

Wayi o, ṣe Hagari wa tẹle aṣẹ Oluwa si tabi ko tẹle? O tẹle! Yatọ si iyẹn, o tun sọ kanga ti o wa nibi ti Ọlọrun ti fi ara han ni ‘Beeri-Lahai-Roi’, eyi ti o tunmọ si ‘Kanga Ẹni Alààyè naa ti o ri mi.´ Njẹ o wa mọ wipe Ẹni Alaaye yi kanna ri iwọ naa pẹlu, bi o ti wu ki nkan dabi ẹni pe o buru to fun ọ ati nkan yowu ti o gbe ọ de ibi ti o wa? Yatọ si pe O ri ọ, O tun ni ọna abayọ si awọn ipenija ti o n dojukọ lọwọ. O mọ ibi ti o yẹ ki o wa ati awọn aṣiri ọjọ́-ọ̀la rẹ. Iwọ kan ni ki o tẹti silẹ gbọ nkan ti O ni lati sọ fun ọ, ki o si tun ṣetan lati ṣiṣẹ lori rẹ. Ohun gbogbo ti o si wa ni i ṣe pẹlu ainireti yoo fi iwọ naa silẹ, iwọ yoo si ba ara rẹ ni oju ọna ti ete rẹ ni rere gbogbo fun aye rẹ yoo ti wa si imuṣẹ lẹkunrẹrẹ.

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Belu 2023. Adura mi ni pe ki Ọlọrun ma fi igba gbogbo kun ọkan rẹ pẹlu ọgbọn ati igboya ti o peye lati lo aṣẹ ti O fifun ọ ninu Kirisiti Jesu lati pa iṣẹ eṣu run ninu aye rẹ ati ni ayika rẹ. Amin.

Njẹ o tilẹ mọ wipe Ọlọrun ti fun gbogbo awa ti a jẹ ọmọ rẹ ni aṣẹ lori eṣu ati gbogbo iṣẹ rẹ? Bẹẹni, O ti ṣe bẹẹ nipasẹ ọmọ rẹ, Jesu Kirisiti. Iwọ naa wo nkan ti Jesu Oluwa wa funrarẹ rẹ sọ lori eyi: “Kiyesi i, emi fun yin ni aṣẹ lati tẹ ejo ati akeeke mọlẹ, ati lori gbogbo agbara ọta; ko si si ohun kan bi o ti wu ki o ṣe, ti yoo pa yin lara.” (Lúùkù 10:19) Njẹ o ri bayẹn? Satani ni agbara nitootọ. Idi si niyi ti o fi le da oniruuru wahala silẹ ninu aye yi ati pẹlupẹlu ninu aye wa.

Amọ ṣa o, Oluwa sọ fun wa pe Oun ti fun wa ni aṣẹ lati bori agbara rẹ ati lati pa iṣẹ rẹ run. Iwọ naa ro wo. Ko ki i ṣe pe O fẹ fun wa ni aṣẹ lori eṣu ati iṣẹ rẹ — O ti kanlẹ fun wa ni aṣẹ yi ni. O wa ku si ọwọ wa lati jẹwọ ohun ti a ti rigba lọwọ rẹ. Bẹẹni, o ku si ọwọ wa lati ma fi ojoojumọ gbe igbe aye awọn ti Ọlọrun ti fun ni aṣẹ lati pa iṣẹ eṣu run.

Ranti wipe a sọ nipa Jesu Oluwa wa pe O wa lati pa iṣẹ eṣu run (1Jòhánù 3:8). A tun sọ nipa rẹ pe O n kiri ṣoore, O si tun n wo gbogbo awọn ti eṣu n pọn loju san (Ìṣe Àpọ́sítélì 10:38). Bi o tilẹ wa jẹ wipe Oun ko si ninu aye yi mọ nipa ti ara, O ti fun awa ti a gbagbọ ninu rẹ ni aṣẹ lati tẹsiwaju pẹlu iṣẹ ti O n ṣe nigba ti O wa nibi. O ti fun wa ni aṣẹ lati doju ija kọ eṣu ninu aye wa ati ni ayika wa, ki o si sa.

Àmọ́, a wá gbọdọ fi han pe a ti ri aṣẹ yi gba nitootọ lati ọdọ Oluwa. Lọna wo? Akọkọ, a le fi han nipa didupẹ lọwọ rẹ fun un. A kọ sinu bibeli pe gbogbo igba ni awọn eniyan ma n yin Ọlọrun logo fun bi O ti ṣe fun ọmọniyan ni aṣẹ lati pa iṣẹ eṣu run nigbakugba ti Jesu ba tu ẹnikan silẹ (Mátíù 9:8 & 15:31).

Ona keji lati fi han pe a ti gba aṣẹ lọwọ Ọlọrun lati bori gbogbo agbara eṣu ni nipa lilo aṣẹ yi. Aṣẹ ti a ko ba lo lati mu ete ti a fi fun wa ṣẹ ko ja mọ nkankan. Nitorina, niwọn igba ti a ko ba bẹrẹ si ni lo aṣẹ ti Ọlọrun fun wa lori eṣu lati fooro rẹ ati awọn angẹli rẹ pẹlu ọpọlọ pipe, aṣẹ naa ko le ja mọ nkankan ni ọwọ wa.

Wo o, lilo aṣẹ ti Ọlọrun fun wa lori eṣu nikan ni o le jẹ ki alaafia, ayọ, iṣoriire ati iwosan jọba ninu aye wa ati ni ilẹ wa. Lilo aṣẹ yi ni yoo mu igbala tọ aye ọpọ wa. Fun apẹrẹ, Luuku, nigba ti o n sọrọ nipa iṣẹ iranṣẹ Pọọlu ni Filipi, sọ fun wa nipa arabrin kan ti o ni ẹmi afọsẹ ti wọn ṣe alabapade. Gẹgẹ bi o ti ṣe sọ, arabinrin yii n yọ wọn lẹnu fun ọpọlọpọ ọjọ nipasẹ ẹmi afọsẹ rẹ. Idi si ni pe nṣe ni o n tẹle wọn kaakiri lati ma sọ fun awọn eniyan pe iransẹ Ọlọrun ni wọn ati lati ma jẹ ki wọn lero pe ẹmi kanna ni o jọ n lo wọn papọ. (Wo: Ìṣe Àpọ́sítélì 16:16-18)

Si iyalẹnu eniyan, Ọlọrun ko ma ṣe nkankan si arabinrin yi. Ọlọrun ko le danu tabi ki O dawọ bi o ti ṣe n yọ awọn apọsiteli yi lẹnu duro. Ki ni idi? Idi ni pe O ti fun wọn ni aṣẹ lati ba ẹmi inu rẹ wi. Ti wọn ba wa yan lati ma ba wi, iṣoro ti wọn ni eyi, ko ki i ṣe iṣoro tirẹ. Ṣugbọn nipa ti Pọọlu ba ẹmi inu rẹ yi wi ni orukọ Jesu, o fi silẹ, a si tu u silẹ. Nitorina, o dẹkun lati ma yọ wọn lẹnu ati lati ma tan awọn eniyan jẹ.

Nibakanna, awọn igba ma n wa ti o jẹ wipe ti a ba kọ lati lo aṣẹ ti Ọlọrun fun wa lati ba eṣu wi, Ọlọrun le ma ṣe ohunkohun nipa iṣẹ rẹ ninu aye wa tabi ni ayika wa. Lotitọ, a le wa ninu irora, ki inu wa si ma dun nitori iṣẹ ibi Satani. Sibẹsibẹ, ti a ba kọ lati lo aṣẹ ti a ni ninu orukọ Jesu lati ba a wi, o ṣeeṣe ki Ọlọrun kan ma wo wa niran. Boya eyi si ni o fa ti o fi n ni iriri inira ati ibanujẹ ni awọn abala aye rẹ kan lọwọlọwọ yi. Iwọ n duro de Ọlọrun lati ṣe nkankan nipa inira ti o ni; Oun naa si n duro de ọ lati lo aṣẹ rẹ lati sọ ara rẹ di ominira. Adura mi wa nipe ki a fun ọkan rẹ ni okun lati dide lati bẹrẹ si ni lo aṣẹ ti o jẹ tirẹ ninu Kirisiti Jesu lati fi opin si gbogbo iṣẹ eṣu ninu aye rẹ ati ni ayika rẹ, ki o ba le ni iriri alaafia ti o peye. Amin.

Kí oṣú Belu 2023 rẹ jẹ́ alárinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ pẹlu inu didun sinu ọsẹ ti o so oṣu Ọ̀wàrà ati Belu 2023 pọ mọ ara wọn. Adura mi fun ọ si ni pe ki o ṣe aṣeyọri ninu gbogbo ifẹ Ọlọrun fun aye rẹ, ni orukọ Jesu. Amin.

Wayi o, ọkan lara awọn nkan ti o duro fun ifẹ Ọlọrun fun aye rẹ ni ki o tayọ ninu ifarajin rẹ lati ma gbe awọn ti o n bọ ọ pẹlu ọrọ Ọlọrun larugẹ pẹlu awọn nkan ini rẹ. Wo nkan ti ọrọ Ọlọrun sọ nipa eyi: “Ṣugbọn ki ẹni ti a n kọ ninu ọrọ naa maa pese ohun rere gbogbo fun ẹni ti n kọni.” (Gàlátíà 6:6)

Tani ki o ma pese ohun rere gbogbo fun ẹni ti o n kọ? Gbogbo awọn ti a ba n kọ ni ọrọ Ọlọrun ni! Eyi jasi pe, ko si ẹnikẹni ti a kọ ni ọrọ Ọlọrun ti o gbọdọ gbẹyin ninu ọrọ yi. Dipo bẹẹ, gbogbo wọn patapata ni o gbọdọ ma kopa ninu rẹ. Ṣe gbogbo awa ti a wa n kọ ni ọrọ Ọlọrun ni o ni agbara lati le kopa ninu fifun awọn ti o n kọ wa ni ọrọ rẹ lati ara awọn nkan ini wa? Bẹẹni, gbogbo awa ti a n kọ ni ọrọ Ọlọrun ni a ni agbara lati le ma gbe awọn ti o n kọ wa larugẹ pẹlu awọn nkan ini wa.

Lọna wo ni eyi gba ri bẹẹ? O ri bẹẹ nitoripe ireti Ọlọrun kọ ni pe pe ki a fun wọn ni ohun ti a ko ni bikoṣe pe ki a fifun wọn lati ara ohun ti a ni. Pọọlu, nigba ti o n ba awọn ara Kọrinti sọrọ lori bi a ti ṣe n fifunni lọna ti o tẹ Ọlọrun lọrun, sọ wipe, “Nitori bi imura tẹlẹ ba wa ṣaaju, o jasi itẹwọgba gẹgẹ bi ohun ti eniyan ba ni, ki i ṣe gẹgẹ bi ohun ti ko ni.” (2Kọ́rínntì 8:12) Njẹ o ri bayẹn? Imura (Iṣetan) wa lati gbọran si Ọlọrun lọrun ni ohun akọkọ ti O ma n fi oju si ninu ibaṣepọ wa pẹlu rẹ. Nitorina, niwọn igba ti a ba ti muratan lati gbọran si aṣẹ ti O pa pe ki a ma gbe awọn ti o n bọ wa pẹlu ọrọ rẹ larugẹ pẹlu awọn nkan ini wa, inu rẹ yoo dun si wa.

Amọ kiki ki a ṣetan lati fifun wọn nikan kọ ni ohun ti O n fẹ lati ọdọ wa; O tun n fẹ pe ki a fifun wọn lotitọ. Ko fẹ ki a ma sọ wipe, “Ọlọrun si ri ọkan pe mo fẹ fifun ọ o. O kan jẹ wipe n ko ni lọwọ ni.” Dipo eyi, nṣe ni O fẹ ki a ma fifun wọn ni ibamu pẹlu nkan ti a ni dipo ni ibamu pẹlu nkan ti a ko ni. Eyi jasi pe bi o ti wu ki nkan ini wa kere to, O si n reti pe ki a fifun wọn lati ara rẹ, ki a si ma ṣe aroye. Idi si ni pe niwọn igba ti o ba ti wa lati ọkan wa, ohun yowu ti a ba fifun wọn yoo jẹ itẹwọgba si i, ni ibamu pẹlu ohun ti a ni dipo ni ibamu pẹlu ohun ti a ko ni.

Wayi o, gbogbo wa naa ni a mọ wipe Ọlọrun mo ohun ti ẹnikọọkan wa ni. Nitorina, O mọ ohun ti ipa wa ka lati fi ran awọn ti o n bọ wa pẹlu ọrọ rẹ lọwọ, bi o ti wu ki nkan ini wa kere to. O wa ku si ọwọ wa lati gbọran si lẹnu, ki a si fifun wọn, tabi lati ṣe aigbọran si lẹnu, ki a si fi ohun yowu ti o yẹ ki a fifun wọn pamọ fun ara wa. Ṣugbọn ki a tun fi sọkan pe a ko le gan an tabi tan an jẹ lori ọrọ fifi funni. Ohun ti a ba gbin naa ni a o ka – a ko ni ka ohun ti a ko ba gbin. Eyi tunmọ si pe Ọlọrun ko ni pin wa lere fun ohun ti a ko ṣe fun un tabi fun awọn iranṣẹ rẹ. (Wo: Gàlátíà 6:7)

Ranti opo Sarefati. Ọlọrun mọ pe gbogbo nkan ti o ni nile rẹ ko ju ikunwọ iyẹfun kan ati ororo diẹ ninu kolobo lọ . Sibẹsibẹ O paṣẹ fun pe ki o pese ounjẹ fun iranṣẹ rẹ, Elija, lati ara rẹ. Wa kiyesi pe Ọlọrun ko ni ki o lọ ya owo lati se ounjẹ fun Elija tabi pe ki o duro di igba ti o ba di milionia ki o to fifun un. Dipo eyi, O sọ fun pe ki o fun ni ounjẹ lara kekere ti o ni ni asiko naa. Ki si ni idi? Idi ni pe niwọn igba ti o ba ti ṣetan lati gbọran si Ọlọrun lẹnu, diẹ kekere ti o fẹ fifun Elija lara kekere ti o ni yoo dun mọ ọn ninu, yoo si tun jẹ itẹwọgba lọwọ rẹ. (Wo: 1Awọn Ọba 17:8-24)

Awa dupẹ pe arabinrin yi gbọran si Ọlọrun lẹnu. Nitoripe o si gbọran si lẹnu, Ọlọrun pin lere pẹlu iṣẹ ara isọdọtun ojoojumọ ni gbogbo asiko ti iyan fi mu ni ilẹ naa. Lọna wo? O kan kiyesi wipe nṣe ni iyẹfun ati ororo rẹ n sọ ara wọn di ọtun ni ojoojumọ, debi wipe ko le ri wọn lo tan titi iyan naa fi pari. Eyi si jẹ nkan iyalẹnu gidigidi lati mọ.

Ti arabinrin yi ko ba wa gbọran si Ọlọrun lẹnu nkọ, lori awawi pe nkan ti o ni lọwọ kere? Ṣe a o ri oun ati ọmọ rẹ pamọ ni asiko iyan yi? Rara! Ki ni ko ba wa ṣẹlẹ si Elija? Ọlọrun ko ba tun wa ọna miran lati mojuto ni, bi O ti ma n ṣe tẹlẹ. Nitorina, Ọlọrun yoo tọju awọn ti O ba ran lati mojuto wa, yala a tọju wọn tabi a ko tọju wọn. Ṣugbọn a ko ni gba ere itọju ti a ko fun wọn lọwọ rẹ. Nitori eyi, ma ṣe gbẹyin ni fifi fun awọn ti o n bọ ọ pẹlu ọrọ Ọlọrun. Adura mi ni pe o ko ni padanu awọn iṣẹ ara ti o yẹ ki o waye ninu aye rẹ nipasẹ lilawọ rẹ si wọn, ni orukọ Jesu. Amin.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ ṣi ọsẹ miran ninu oṣu Ọ̀wàrà 2023. Adura mi si ni pe ki Ọlọrun pese fun gbogbo aini rẹ lọsẹ yi ati ni gbogbo eyi ti o ku ninu ọdun yi ni ibamu pẹlu ìlawọ́ rẹ, ni orukọ Jesu. Amin.

Bi Iwe mimọ ti ṣe sọ, a le bere lọwọ Ọlọrun ohunkohun ti a ba nilo, ki a si reti pe ki O dawa lohun, niwọn igba ti a ba ti bere ni ibamu pẹlu ifẹ rẹ (1Jòhánù 5:14). Amọ ṣa o, bi a tilẹ n gbadura ni ibamu pẹlu ifẹ rẹ, a tun gbọdọ kọ láti má fi ireti idahun rẹ si adura wa sinu bi a ti ṣe n gbadura karakara to tabi sinu bi nkan ti a n bere lọwọ rẹ ti ṣe pọ to. Dipo eyi, nṣe ni ki a fi ireti idahun rẹ si adura wa sinu ilawọ rẹ.

Wo bi Pọọlu ti ṣe gbadura fun awọn ara Filipi ni ibamu pẹlu eyi: “Ṣugbọn Ọlọrun mi yoo pese ni kikun fun gbogbo aini yin, gẹgẹ bi ọrọ̀ rẹ ninu ogo ninu Kirisiti Jesu.” (Fílípì 4:19) Iwọ naa ro wo. Pọọlu ko bere pe ki Ọlọrun pese fun aini awọn ara yi ni ibamu pẹlu ohun ti wọn nilo tabi fẹ. Lafikun, ko sọ fun pe ki o pese fun aini wọn ni ibamu pẹlu laala wọn tabi ni ibamu pẹlu lilawọ wọn si awọn miran. Dipo eyi, o sọ fun pe ki o pese fun aini wọn ni ibamu pẹlu ọrọ̀ rẹ ninu Kirisiti Jesu.

Wayi o, lotitọ, Ọlọrun le pese fun aini awọn eniyan ni ibamu pẹlu ohun ti wọn nilo. Ṣugbọn ti O ba pese fun aini wọn nikan, ṣe awọn naa yoo le ran awọn miran lọwọ lọna ti o ni itumọ bi? Ko fẹrẹ jọ bẹẹ! Lafikun, Ọlọrun le pese fun aini awọn eniyan ni ibamu pẹlu laala wọn. Ṣugbọn ṣe oun ti yoo fun wọn nipasẹ laala wọn yoo to lati mojuto wọn ati awọn miran ti o yẹ ki wọn tọju? Ko fẹrẹ jọ bẹẹ!

Siwaju si, ti Ọlọrun ba tilẹ pinnu lati pese fun wa ni ibamu pẹlu bi a ti ṣe lawọ si, melo ninu wa ni yoo ri nkan ti o lojutu gba lọwọ rẹ? A ri lara wa awọn ti wọn n fi gbogbo igba ṣe ahun si Ọlọrun, awọn iranṣẹ rẹ ati awọn miran ni ayika wọn, bi o tilẹ jẹ wipe a ti gbọ oniruuru iwasu lori pataki ki a lawọ ki awọn ibukun Ọlọrun kan ba le ṣan bi omi lalai ni idiwọ ninu aye wa. Ti Ọlọrun ba wa wo eyi lati pese fun aini wa, ṣe nkan ti a o ma rigba lọwọ rẹ yoo to lati mu inu wa dun bi? Mi o ro bẹẹ.

Ọpọ loni ni inu wọn ko dun si Ọlọrun ati si awọn nkan ti O n fun wọn nitoripe wọn ro wipe nkan ti awọn lẹtọ si pọ ju nkan ti O n fun wọn lọ. Awọn wọnyi n woye nkan ti o fa ti awọn ti ko gbọn to wọn, ti ko ki i ṣiṣẹ karakara to wọn, ti ko ki i gbadura karakara to wọn ati boya ti ko tilẹ lawọ to wọn ṣe n rigba lọwọ Ọlọrun ju wọn lọ. Wọn wo pe eyi ko tọna. Nkan wọnyi si ti wa n pa ifarajin wọn fun un lara.

Njẹ Ọlọrun wa n ṣe aidara si wọn bi? Rara o! Ti o ba fẹ ki Ọlọrun pese fun ọ ni ibamu pẹlu iṣẹ ọwọ rẹ, adura gbigba rẹ ati ilawọ rẹ, yoo ṣe bẹẹ gẹgẹ, ayafi ti O ba kan fẹ ṣaanu fun ọ loku. Ti O ba si wa ṣe eyi, iwọ gan yoo ri wipe iṣẹ ọwọ rẹ ko to fun ọ lati jẹ igbadun awọn nkan ti o dara julọ ti O fẹ fun ọ. Ara awọn nkan ti Jesu Oluwa wa si kọ wa nipasẹ owe agbẹ kan ti o jade lọ lọjọ kan lati gba awọn alagbaro lati ṣiṣẹ ninu ọgba ajara rẹ ni eyi. (Wo: Mátíù 20:1-15)

Wayi o, bi itan naa ti ṣe lọ, awọn ẹni akọkọ ti ọkunrin agbẹ yi gba lọjọ ti a n wi yi sọ fun iye ti awọn fẹ ki o san fun wọn fun iṣẹ òòjọ́. O si gba. Ṣugbọn lẹyin igba ti wọn ti bẹrẹ si ni ṣiṣẹ, o ri wipe wọn ko pọ to lati pari iṣẹ ọjọ naa. Nitorina, o bẹrẹ si ni jade lọ titi di ọwọ irọlẹ ọjọ kanna yi lati mu awọn eniyan wa si lati ṣiṣẹ fun un. Ṣugbọn, ko ni adehun kankan pẹlu awọn ti o gba lẹyin eyi lori iye ti yoo san fun wọn. O kan sọ fun wọn pe oun yoo san nkan ti o ba tọ fun wọn ni.

Ni kukuru, nigba ti asiko to fun ọkunrin yi lati san owo ẹnikọọkan ti o ṣiṣẹ fun lọjọ naa, o sọ fun olori awọn oṣiṣẹ rẹ pe ko san iye kanna fun gbogbo wọn, bẹrẹ lati ori awọn ti a gba ṣiṣẹ kẹyin lọ si ori awọn ti a kọkọ gba ṣiṣẹ. Eyi si wa jẹ ki awọn ti o kọkọ gba ṣiṣẹ, ti wọn si ro wipe awọn yoo gba owo ju awọn yoku lọ, fi apa jánú pe ọkunrin yi i ko ṣe daradara. Ṣugbọn o sọ fun wọn pe ohun ko ṣe aidara si wọn rara bikoṣe pe oun san owo fun wọn ni ibamu pẹlu nkan ti wọn ṣe adehun lati gba lọwọ oun, ti oun si wa san owo fun awọn yoku ni ibamu pẹlu ilawọ oun.

Kini koko ọrọ? Oun naa ni pe bi o tilẹ ṣe pataki fun wa lati fi ara wa jin lati sin Ọlọrun, lati ma gbadura si i, lati lawọ si i ati si awọn miran ati lati ma ṣiṣẹ tọkantọkan, a ko gbọdọ lailai lepa lati gba ohunkohun lọwọ rẹ ni ibamu pẹlu awọn nkan ti a ṣe tabi ti a ti ṣe sẹyin. Dipo bẹẹ, nṣe ni ki a ma fi igba gbogbo lepa lati rigba lọwọ rẹ ni ibamu pẹlu ilawọ rẹ. Idi si ni pe kiki awọn nkan ti O ba pese fun wa ni ibamu pẹlu ilawọ rẹ ni yoo tẹ wa lọrun, ti yoo si tun mu inu wa dun. Mo si gbadura pe ki a ma fi igba gbogbo gba okun lati kọ otitọ yi ni kiakia ati lati bẹrẹ si ni fi ojoojumọ ṣe amulo rẹ ninu aye wa, ni orukọ Jesu. Amin.

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ keji oṣu Ọwara 2023. Adura mi ni pe ki Ọlọrun la ọna fun ọ lati ri wọn gba ati lati jẹ igbadun wọn ohun gbogbo ti O fẹ ki o ni lọdun yi ti o ko i ti ni, ni orukọ Jesu. Amin.

Wayi o, ọkan lara awọn ọna lati ri awọn nkan ti Ọlọrun ti fun ọ gba ni kiakia tabi lati ni iriri igbala kuro ninu ipọniloju satani ni lati ṣe amulo ti o peye wiwa awọn adari ti O yan le ọ lori ninu ijọ rẹ. Bi a ti ṣe ri ninu iwe mimọ, ara awọn idi ti Ọlọrun ṣe fun wa ni awọn adari ninu awọn ijọ wa kaakiri ni ki wọn ba le ma ṣe ẹ̀ṣọ́ lori aye wọn, ki wọn si tun ma pese awọn ohun ti o ku diẹ kaato ninu igbagbọ wa nipa agbara Ẹmi Ọlọrun. Nitorina, a fun wọn ni aṣẹ lati sọ awọn ọrọ ti yoo yi aye wa pada titi lailai, lati gbadura si Ọlọrun fun wa ati lati gba idahun ati lati ba eṣu wi ati lati fooro iṣẹ rẹ ninu aye wa. (Wo: 2Kọ́ríntì 10:8; 1Tẹsalóníkà 3:10; Hébérù 13:17)
Amọ ṣa o, a gbọdọ kọ lati ṣe idamọ ipo ti wọn wa ninu aye wa ati lati ma ṣe amulo rẹ lọna ti o peye lati le jẹ igbadun iṣẹ iranṣẹ wọn lẹkunrẹrẹ. Fun apẹẹrẹ, a sọ fun wa ninu Iwe Mimọ bi obinrin opo kan ṣe sa tọ Wolii Eliṣa lọ fun iranwọ, ti o si ri gba. Bi akọsilẹ naa ti ṣe lọ, lẹyin igba ti ọkọ rẹ ku, ọkunrin kan ti o jẹ ni owo bẹrẹ si ni leri lati wa ko awọn ọmọkurin rẹ mejiji lọ gẹgẹ bi ẹrú. A ko wa sọ fun wa boya arabinrin yi kọkọ lọ ba awọn ẹbi tabi ọrẹ wọn lati ran wọn lọwọ kuro ninu iṣoro naa tabi ko lọ ba wọn. Ti o ba si jẹ wipe o lọ ba wọn, o ṣeeṣe pe wọn ko ni iranlọwọ kankan lati ṣe fun un. Ṣugbọn o ranti pe idile oun ni ibaṣepọ ti o loorin pẹlu Wolii Eliṣa. Wolii yi tilẹ mọ ọkọ rẹ daradara debi wipe o le fọwọ ṣọya lati sọ fun ẹnikẹni pe olododo eniyan ni. Nitorina, o sa tọ ọ lọ fun iranwọ. (2Àwọn Ọba 4:1)

Njẹ Eliṣa wa da arabinrin yi lohun nigba ti o lọ si ọdọ rẹ tabi ko da lohun? O da lohun. Lọna wo? Ṣe o fun ni owo ni? Rara o! Boya ko tilẹ ni owo ti o peye lọwọ lati fun lati yanju gbese ọkọ rẹ. Ṣugbọn o ni aṣe ti ẹmi ti o peye to lati bukun fun un ati lati sọ nkan ti o ni di ilọpo-ilọpo, ki o ba le san gbese rẹ, ki o si bọ kuro ninu iṣẹ. Eyiyi gan ni o si ṣe. O fun ni ọrọ Ibukun ti o yi aye rẹ pada titi lailai. (2Àwọn Ọba 4:2-7)

Ṣugbọn ṣe o mọ wipe ọkọ arabinrin yii naa ko ba ti ṣe amulo ibaṣepọ ti o ni pẹlu Eliṣa lati gba ọrọ ibukun ti yoo yanju gbese rẹ ki o to ku? Boya ti o ba ti ṣe eyi, ko ba ma ti ku iku aitọjọ ti o ku. Ko si ẹni ti o mọ. Ni kukuru, iyawo rẹ ṣe nkan ti ko ṣe, o si gba idile rẹ la kuro ninu iṣẹ atirandiran.

Nibakana, iwọ naa, nipa ṣiṣe amulo ti o peye aṣẹ ẹmi ti awọn adari ijọ rẹ, le gba okowo rẹ, igbeyawo rẹ tabi ẹbi rẹ la kuro lọwọ awọn iṣoro kan ti o ti kọ lati fi yin silẹ. Njẹ iwo yoo ṣe bẹ bi? Ṣe igberaga yoo jẹ ki o ṣe bẹ? Ṣe ojo yoo jẹ ki o ṣe bẹ? Ṣe ifarajiin rẹ fun igbe aye ikọkọ yoo rẹ yoo jẹ ki o ṣe bẹ?

Wo o, ọpọ awọn ọmọ Ọlọrun ni o n jiya ninu agọ ara wọn, ninu eto iṣunna wọn tabi ninu igbeyawo wọn nitoripe wọn ko ni ṣe amulo iṣẹ iranṣẹ awọn adari ijọ wọ. Awọn wọnyi si le ku sinu ijiya wọn, ti wọn ba kọ lati ṣe ohun ti o tọ. Wo nkan ti Jemisi sọ lori eyi: “Ẹnikẹni ṣe aisan ninu yin bi? Ki o pe awọn agba ijọ, ki wọn si gbadura sori rẹ, ki wọn fi ororo kun un ni orukọ Oluwa: Adura igbagbọ yoo si gba alaisan naa la, Oluwa yoo si gbe e dide; bi o ba si ṣe pe o ti dẹṣẹ, a o dari ji i.” (Jákọ́bù 5:14-15)

Njẹ o ri bayi? Ọmọ Ọlọrun kankan ti o ba n ṣe aisan ko ni lati ku sori ibusun aisan rẹ, bi o tile jẹ wipe ẹṣẹ ni o wa nidi aisan rẹ. O kan ni lati jẹ ki awọn adari ijọ rẹ gbadura fun ninu igbagbọ lasan ni. A o si wo o san, a o si tun dariji, ti o ba tilẹ ṣe. Ki ni idi? Idi ni pe a ti fun wọn ni aṣẹ lati gba iwosan ati idariji fun un nipasẹ igbagbọ ninu Kirisiti Jesu. Amọ ti ko ba wa ke si wọn fun adura nkọ? O ṣeeṣe ki o ku sinu aisan rẹ.

Wayi o, emi naa mọ pe ko ki i ṣe gbogbo awọn ti wọn pe ara wọn ni adari ijọ naa ni onigbagbọ eniyan ati ẹni ti o ṣe e gbẹkẹle lati ṣe oun ti o dara fun awọn ọmọ Ọlọrun ti o wa ni abẹ wọn. Amọ niwọn igba ti iwọ ba ti mọ pe awọn adari ijọ tirẹ jẹ onigbagbọ eniyan ati ẹni ti o ṣe fi ọkan tan lati ma fi igba gbogbo ṣiṣẹ fun rere rẹ, nṣe ni o yẹ ki o kọ lati ma ṣe amulo ti o peye aṣẹ ẹmi ti wọn ni fun iwosan, igbega ati igbala rẹ kuro lọwọ ikọlu ọta. Ki Ẹmi Ọlọrun si ma fi igba gbogbo kun ọkan rẹ pẹlu ọgbọn ati oye ti o peye lati ṣe bẹ ẹ gẹgẹ, ni orukọ Jesu. Amin.

Kí o ní ọ̀ṣẹ̀ alárinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa ati Olugbala wa. Mo ki ọ kaabọ sinu oṣu Ọ̀wàrà 2023, oṣu ayajọ ominira fun Naijeria. Mo si gbadura pe ki Ọlọrun kun aye ati ile rẹ pẹlu adun ati isinmi ni ojoojumọ oṣu naa, ni orukọ Jesu. Amin.

Wayi o, bi oni tilẹ jẹ ọjọ naa ti o pe ọdun mẹtalelọgọta ti orilẹ-ede yi ti gba ominira, ọpọ ni ko ri nkankan ninu ominira naa ti o yẹ ki gba ilu, ki a si ma jo le lori. Ki ni idi? Idi ni pe ominira wa ko ti yọri si idagbasoke ati ilọsiwaju ti o giriki fun wa gẹgẹ bi orilẹ-ede. Ki si ni idi ti ko ṣe ti yọri si awọn nkan wọnyi fun wa? Pataki julọ lara idi naa ni wipe, gẹgẹ bi adari ati awọn ti wọn n dari, a ko fi ara wa jin lati ma ṣe awọn nkan ti yoo yọri si idagbasoke ati ilọsiwaju.

Wo o, idagbasoke ati ilọsiwaju ko ki i waye lasan tabi ni pajawiri. Awọn nkan wa ti o ma n jẹ ki wọn waye. Lotitọ o, ti a ba ni ki a lọ ki a bọ, Ọlọrun naa ni O ma n mu ki ohun gbogbo dagba soke (1Kọrinti 3:6-7). Amọ ṣa o, bi o tilẹ jẹ wipe Ọlọrun ni O ma n jẹ ki ohun gbogbo dagba soke, awọn nkankan si wa ti O fẹ ki a ṣe ki iye rẹ ba le ṣiṣẹ ninu wa tabi ninu ohun yowu ti a n ṣe, ki o si mu dagba soke.

Fun apẹrẹ, bi o tilẹ jẹ wipe Ọlọrun ni O ma n jẹ ki awọn ọmọde-jojolo wa dagba soke ninu ara, ninu ọgbọn ati ninu imọ, a gbọdọ fun wọn ni ounjẹ ti o peye, ki a fi aye silẹ fun wọn lati kọ oniruuru ẹkọ, ki a si tun ki wọn laya lati ma ṣe ere idaraya. Aijẹbẹ, idagbasoke ti wọn ni amuyẹ lati ni ko ni farahan. Eyi ko si ni jẹ ẹbi Ọlọrun.

Nitorina, ti a ba fẹ ki orilẹ-ede wa dagba soke, ki o si di nla laarin awọn orilẹ-ede aye yoku, gbogbo wa gbọdọ ṣe idamọ awọn nkan ti yoo gbe idagbasoke rẹ larugẹ, ki a si fi ara wa jin lati ma a ṣe wọn. Eyi si gbọdọ ṣuyọ ninu irufẹ awọn adari ti a o ma a yan ni asiko idibo wa. A ko le ma fi igba gbogbo yan awọn alanikanjọpọn, olojukokoro ati alainikanṣe eniyan gẹgẹ bi adari, ki a si tun ma reti pe ki wọn ṣe nkan ti yoo yọri si igbega orilẹ-ede wa. A o fẹrẹ nilo to ẹgbẹrun iṣẹ iyanu ki eyi to le waye.

Nibakana, ti a ba fẹ dagba soke ninu ẹmi, gẹgẹ bi ọmọ Ọlọrun, a gbọdọ fi ara wa jin fun awọn nkan ti yoo yọri si idagbasoke wa. Lotitọ, Ọlọrun fẹ ki a dagba soke ninu irinajo wa pẹlu rẹ. Ko fẹ ki a joko si ipo arobo, lẹyin igba ti a ti tun wa bi. Aijẹbẹ, a ko ni le gbe igbe aye ti ko ni ja a kulẹ ninu aye yi. Idi si niyi ti O ṣe paṣẹ fun wa ninu ọrọ rẹ lati dagba soke ninu oore-ọfẹ ati imọ ọmọ rẹ Jesu Kirisiti (2Peteru 3:18).

Ṣugbọn Ọlọrun ko ni mu wa ni tipatipa lati dagba soke ninu ẹmi. Awọn nkan wa ti a gbọdọ ṣe ki eyi ba a le waye. A si sọ awọn nkan wọnyi fun wa ninu bibeli. A sọ fun wa pe ki a fi ara wa jin fun ọrọ Ọlọrun, adura gbigba ati ibaṣepọ pẹlu awọn ọmọ Ọlọrun. Ti ko ba wa jẹ wipe a fi ara wa jin fun awọn nkan wọnyi, Ọlọrun funrarẹ gan ko ni le mu wa dagba soke ninu igbagbọ wa ati ninu iwulo wa fun un.

Nikukuru, nkan ti mo n sọ ni pe irufẹ idagbasoke yowu ti a le fẹ ki o ṣẹlẹ ninu aye wa, a gbọdọ ṣe idamọ awọn nkan ti a nilo lati bẹrẹ si ni ṣe ki o ba le waye. Wayi o, o wa le gba asiko diẹ ki awọn igbasoke kan ti o n waye ninu aye wa to fi ara han, bi a tilẹ n ṣe awọn nkan ti yoo jẹ ki wọn waye. Ṣugbọn niwọn igba ti idagbasoke ba ti n ṣẹlẹ ninu aye wa, o di dandan ki o farahan ni asiko kan wipe a n dagba soke lotitọ.

Nitorina, bi ko ba tilẹ han si ọ tabi si ẹnikẹni ni ayika rẹ pe o n dagba soke ninu ẹmi ati ni awọn abala aye rẹ miran, ma ṣe dẹkun lati ma ṣe awọn nkan ti yoo jẹ ki o dagba soke. Dipo bẹ ẹ, tẹsiwaju lati ma a ṣe wọn. Nigba ti akoko ba si to, idagbasoke ati ilọsiwaju rẹ yoo di mimọ fun gbogbo eniyan. Adura mi si ni pe ki Ọlọrun ṣi oju wa lati ri ohun gbogbo ti a nilo lati ṣe ki a ba le ni iriri idagbasoke ati ilọsiwaju otitiọ ninu aye wa, ile wa ati orilẹ-ede wa, ki O si tun fun wa ni okun lati fi ara wa jin lati ma a ṣe awọn nkan wọnyi. Amin.

A ku ọdun ominira.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati nipasẹ Jesu Kirisiti Oluwa wa. Inu mi dun lati ki ọ kaabọ sinu ọsẹ ti o kẹyin oṣu Owewe 2023. Adura ma si ni pe ki Ọlọrun kọ ọkan rẹ ni bi o ti le ṣe amulo ti o peye gbogbo ipese rẹ fun ọ lati gbe igbe aye ti o nitunmọ ati igbe aye itayọ, ni orukọ Jesu. Amin.

Ọkan lara idi ti ọpọ ti o jẹ Kirisitiẹni ko ki i ṣe ni iriri agbara ati didara Ọlọrun bi a ti ṣe ileri pe o yẹ ki o jẹ ninu Iwe Mimọ ni pe wọn ko ki i fi ara wọn jin lati kẹkọ lọdọ rẹ nipa bi wọn ti le ni awọn iriri yi. Bi a ti ṣe ri ninu Iwe Mimọ, awọn nkan meremere ti Ọlọrun ni ni ipamọ fun awọn ti o fi igbẹkẹle wọn sinu rẹ kọja nkan ti a le ka tabi fi oye wa gbe (Saamu 40:5; 1Kọrinnti 2:9). O si tun wa ti fi ara rẹ jin lati ri wipe a ri awọn nkan wọnyi gba ati wipe a jẹ igbadun gbogbo wọn.

Amọ ṣa o, a ni lati kọ bi a ti ṣe n ri nkan gba lọwọ rẹ ati bi a ti ṣe n jẹ igbadun awọn nkan ti O ti pese fun wa. Fun apẹrẹ, nigba ti o ku diẹ ki iṣẹ iranṣẹ Wolii Elija pari ninu aye yi, Ọlọrun sọ fun pe ki o lọ ya Eliṣa, ọmọ Ṣafati, sọtọ lati rọpọ rẹ gẹgẹ bi aṣiwaju laarin awọn wolii ni Isiraẹli. O si lọ, o si ya a sọtọ ni gbangba, bi ko tilẹ lo ororo ṣugbọn agbada rẹ, ninu oko rẹ, gẹgẹ bi Ọlọrun ti pa a lasẹ fun un. (Wo: 1Awọn Ọba 19:15-19)

Wayi o, Eliṣa, lẹyin igba ti a ti ya a sọtọ bi eyi tan ni gbangba-gbàǹgbà, le bẹrẹ si ni lọ kaakiri orilẹ-ede rẹ, ki o si ma sọ fun ẹnikẹni ti o ba pade pe ki wọn ma pe oun ni ‘Wolii Eliṣa’ ati ‘aayo Ọlọrun lati rọpọ Elija’. Ki wa ni eyi ko ba yọri si? Ijamba iṣẹ iransẹ! Kini idi? Idi ni pe bi o tilẹ jẹ wipe Elija ti ya ọkunrin yi sọtọ gẹgẹ bi wolii ti yoo rọpo rẹ ni ọjọ naa ti o wa a kan, aṣẹ ati agbara lati ṣiṣẹ gẹgẹ bi wolii yii ko ba le lọjọ ti a n wi yi. Yatọ si eyi, bi o tilẹ jẹ wipe Ọlọrun ti yan an gẹgẹ bi wolii, gbogbo nkan ti o mọ lasiko naa ko kọja iṣẹ agbẹ, eyi ti o si yatọ si ki a duro gẹgẹ bi agbẹnusọ fun Ọlọrun.

Ki Eliṣa ba wa le duro gẹgẹ bi agbẹnusọ fun Ọlọrun, o nilo lati kẹkọ. Aijẹbẹ, o ṣeeṣe ki Ọlọrun kọ ọ silẹ nikẹyin-kẹyin, ki O si fi ẹlomiran rọpo rẹ, gẹgẹ bi o ti ṣẹlẹ si Ọba Sọọlu. Eliṣa naa funrarẹ, lọna kan tabi omiran, si wa mọ eyi. Nitorina, o fi iṣẹ rẹ gẹgẹ bi agbẹ silẹ, o tẹle Elija, o si di iranṣẹ rẹ ki o ba le kẹkọ lati ọdọ rẹ nipa bi o ti ṣe le di irufẹ wolii ti Ọlọrun yan an lati jẹ. (Wo: 1Awọn Ọba 19:20-21)

Ṣe igbesẹ yi wa lere lori fun Eliṣa tabi ko ni i? O ni i. Idi si ni pe, bi a ti ṣe fi han wa siwaju si ninu Iwe Mimọ, ni ọjọ ti Ọlọrun n gba Elija soke, o jẹ ki o ye Eliṣa pe bi o tilẹ jẹ wipe oun ti ko ipa ti oun lati fi han ni gbangba gẹgẹ bi wolii ti yoo rọpo oun, ko si ni ikawọ oun lati fun ni aṣẹ ati agbara ti o nilo fun ipo yi. Iṣẹ Ọlọrun ni eyi jẹ. Ti ko ba si ni ṣe e, a jẹ wipe o ṣeeṣe ki O ti yan ẹlomiran fun ipo na niyẹn. (Wo: 2Awọn Ọba 2:1-15)

Awa dupẹ pe, ni ọjọ ti a n wi yi, Eliṣa jẹwọ pe oun ti kọ ẹkọ to lọdọ Elija lati le ri ohun ti o nilo lati ri ki o ba le gba aṣẹ ati agbara ti o nilo lati duro gẹgẹ bi adari awọn wolii ni Isiraẹli. Nitorina, o tẹsiwaju lati sin Ọlọrun lotitọ lati ibẹrẹ de opin. Ko fi idibajẹ sinu ipo rẹ gẹgẹ bi wolii tabi ko ṣi ipo naa lo. Dipo eyi, o lo ipo naa lati mu aye san si fun awọn eniyan rẹ.

O wa ṣeni laanu pe a ko le sọ nkan kan naa nipa Gehasi, ọmọkunrin ti o pada di iranṣẹ Eliṣa. Bi o tilẹ jẹ wipe gbogbo igba ni o fi wa pẹlu wolii yi, ti o si tun n tẹle lọ si ibikibi ti o ba lọ, ko kọ ẹkọ kankan ti o lojutu to lati le rọpo rẹ gẹgẹ bi asiwaju wolii Ọlọrun ni Isiraẹli. Dipo eyi, nṣe ni o fi idibajẹ si oju ọna ara rẹ pẹlu ojukokoro ti o si di adẹtẹ. Nitorina, dipo ki o fi di ẹni ti Ọlọrun yan an lati jẹ, nṣe ni o gbẹyin aye rẹ gẹgẹ bi olusọtan ninu aafin ọba Isiraẹli. O ma ṣe o! (Wo: 2Awọn Ọba 5 & 8:1-6)

Ni kukuru, ni ibamu pẹlu awọn nkan wọnyi, Jesu Oluwa wa sọ fun wa pe, “Ẹ wa sọdọ mi gbogbo ẹyin ti n ṣiṣẹ, ti a si di ẹru wuwo le lori, emi o si fi isinmi fun yi. Ẹ gba ajaga mi si ọrun yin, ki ẹ si maa kọ ẹkọ lọdọ mi nitori oninu tutu ati onirẹlẹ ọkan ni emi; ẹyin o si ri isinmi fun ọkan yin. Nitori ajaga mi rọrun ẹru mi si fuyẹ.” (Matiu 11:28-30) Njẹ o ri bayẹn? Ti a ba fẹ jẹ igbadun isinmi lati ọdọ Jesu Oluwa wa, ki a si tun da ohun gbogbo ti Ọlọfun fẹ ki a da laye yi, wiwa sọdọ rẹ ko to rara. A tun gbọdọ rẹ ara wa silẹ lati kẹkọ lọdọ rẹ, bi Eliṣa ti ṣe fi irẹlẹ kẹkọ lọdọ Elija. Aijẹbẹ, wiwa wa si ọdọ rẹ le ma gbe nkankan ti o ni itunmọ ṣe ninu aye wa.

Nitorina, ri daju pe, dipo ti iwọ yoo fi ma tan ara rẹ jẹ, o n kẹkọ lọdọ Jesu Oluwa wa lotitọ lori ohun gbogbo ti o nilo lati jẹ igbadun ẹkunrẹrẹ Ibukun ti Ọlọrun ti fi fun ọ ati lati di ẹni ti O fẹ ki o jẹ laye yi. Ki o si ma fi ojoojumọ gba okun lati ọdọ Ẹmi Ọlọrun lati mu ọrọ yi ni pataki, ni orukọ Jesu. Amin.

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Owewe 2023. Mo si gbadura pe ki Ọlọrun ri ọ lo lọna ti o ga ninu ọsẹ naa lati dari ọpọ lati ni iriri didara ọmọ rẹ, Jesu Kirisiti. Amin.

Bi a ti ṣe fi han wa ninu bibeli, ọkan lara idi ti Jesu Oluwa wa ṣe ni ọpọ ti o n tọ ọ wa lati gba nkan kan tabi omiran lọwọ rẹ ni pe awọn ti o ti jẹ anfaani iṣẹ iranṣẹ rẹ ko dẹkun lati ma sọ fun awọn ọrẹ ati ebi wọn ati lati ma mu wọn tọ ọ wa. Fun apẹrẹ, Maaku fun wa ni iroyin yi nipa asiko kan ti Jesu wa si ile:

“Awọn ọkunrin kan wa, wọn gbe arọ tọ ọ wa, ẹni ti ọkunrin mẹrin gbe. Nigba ti wọn ko si le de ọdọ Jesu, nitori ọpọ eniyan, wọn da orule ile lu ni ọgangan ibi ti Jesu wa. Wọn si sọ ọkunrin arọ naa kalẹ ti oun ti ẹni rẹ niwaju Jesu. Nigba ti Jesu si ri igbagbọ wọn, o sọ fun arọ naa pe, “Ọmọ, a dari gbogbo ẹṣẹ rẹ ki ọ.”” (Máàkù 2:3-5)

Njẹ o ri bayẹn? Idi kan ṣoṣo ti ọkunrin arọ yẹn ṣe ni anfaani lati gba iwọsan lati ọwọ Jesu Oluwa wa ni pe awọn eniyan rẹ gbe wa si ile rẹ. Ṣugbọn wọn ko kan gbe wa si ile Oluwa nikan, wọn tun sa gbogbo ipa wọn lari ri Jesu. Oluwa si tọka si nkan ti wọn ṣe yi si igbesẹ igbagbọ. Nitorina, ko ki i ṣe igbagbọ ọkunrin arọ yi ni Oluwa wo lati wo o san bikoṣe igbagbọ awọn ti o gbe wa si ọdọ rẹ.

Lafikun, Johanu sọ fun wa ninu iyinrere rẹ nipa bi Anderu, lẹyin igba ti o ti pade Jesu, ṣe lọ lẹsẹkẹsẹ lati wa arakunrin rẹ, Simoni, ati lati mu wa sọdọ Oluwa. Nigba ti o si de ọdọ rẹ, O fun ni orukọ tuntun. O pe e ni ‘Peteru’. Nitorina, idi ti a ṣe n sọrọ nipa Apọsiteli Peteru nla ni ni pe arakunrin rẹ mu wa sọdọ Jesu Oluwa wa lati ni iriri igbala ati didara rẹ. (Wo: Johanu 1:40-41)

Siwaju si, Johanu sọ fun wa nipa bi Filipi ṣe mu ọrẹ rẹ Nataniẹli wa sọdọ Jesu Oluwa wa. Bi o si wa tilẹ jẹ wipe Nataniẹli kọkọ kọminu nipa pipade Oluwa, ọrẹ rẹ rọ ọ lati wa lati pade rẹ naa ki o to pinnu lori ọrọ rẹ. Wayi o, lẹyin igba ti o wa, ti Oluwa si fun ni awọn ifihan kan nipa ara rẹ, o jọwọ ara rẹ fun gẹgẹ bi Oluwa rẹ lati ọjọ naa lọ, o si tun wa di ọkan lara awọn apọsiteli rẹ. (Wo: Johanu 1:43-51)

Njẹ bi o tilẹ wa jẹ wipe Oluwa wa ko si ninu aye yi lọwọ-lọwọ yi nipa ti ara, gbogbo igba ni O ma n wa ninu gbogbo ipade awọn ti o gbagbọ ninu rẹ nipasẹ Ẹmi rẹ. O ma n wa nibẹ lati kọ, wosan, tu silẹ ati yi aye awọn ti o wa ninu awọn ipade wọnyi pada. Ti iwọ naa ba ti wa n ni iriri didara ati iyipada rẹ ninu aye rẹ ninu ijọ yi, o yẹ ki iwọ naa ma mu awọn ọrẹ rẹ, ẹbi rẹ ati awọn aladugbo rẹ tọ ọ wa lati ni iriri kan naa, ki o si ma jẹ alanikanjọpọn. (Wo: Mátíù 18:20)

Wo o, o ko le sọ bi nkan ti Oluwa le ṣe fun awọn yowu ti o ba mu tọ ọ wa ṣe le ga to. O ko le sọ bi mimu wọn wa sọdọ rẹ ṣe le yi aye wọn, ile wọn ati ọjọ-ọla wọn pada. Ṣe Anderu le sọ pe arakunrin rẹ, Peteru, yoo jẹ ẹni ti Oluwa yoo lọ ni ọna ti o ga ti O gba lo o nigba ti o kọkọ mu wa sọdọ rẹ? Ko le sọ! Ṣugbọn nipa mimu wa sọdọ rẹ, o ṣi ilẹkun silẹ fun lati di irinṣẹ iyin ti o ga lọwọ rẹ.

Nibakana, nipa mimu awọn ọrẹ, ẹbi ati aladugbo rẹ wa sọdọ Oluwa, o ṣeeṣe ki iwọ naa ṣi ilẹkun silẹ fun wọn lati di irinṣẹ iyin ti o ga ni ọwọ rẹ. Nitorina, bi o ti ṣe n lọ ni ọṣẹ yi, bẹrẹ si ni wo awọn ti iwọ naa yoo mu wa si ọdọ Oluwa laarin awọn ti o wa ni ayika rẹ. Mo si gbadura pe ki Ọlọrun fi aaye gba ọ lati le mu wọn wa sọdọ rẹ, ki O si tun kun ọ pẹlu ọgbọn ati igboya ti o peye lati ṣe bẹẹ gẹgẹ, ni orukọ Jesu. Amin.

Ki o ni ọsẹ ti larinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Òwewè 2023. Mo si gbadura pe ki Ọlọrun ya ọkan rẹ ya ohun gbogbo ti ko tọ ti o n jẹ ki awọn ibaṣepọ rẹ kan, ti o si tun n di iriri didara rẹ lọwọ ninu aye rẹ. Amin.

Wayi o, ọkan lara awọn nkan ti o ma n jẹ ki o ṣoro fun wa lati ni ibaṣepọ ti o larinrin pẹlu awọn ti o wa ninu aye wa ni imọtaraẹninikan. Ki ni imọtaraẹninikan? Imọtaraẹninikan ni ki a lọ fun nkan ti a fẹ lalai bikita nipa ọna ti yoo gba pa awọn miran lara. Eyi jasi pe, o ṣa fẹ nkan ti o fẹ ni, o ko si bikita boya eyi pa ẹnikẹni lara tabi pa wọn run.

Nitorina, imọtaraẹninikan ni ipilẹ fun gbogbo iwa ibi ti a n wu laye. Oun ni idi ti awọn eniyan ṣe n jale, ṣe iṣekuṣe, fi ipa bani lopọ, paniyan, ṣẹ oṣo owo ati bẹẹbẹẹ lọ. Wọn kan ṣa fẹ nkan ti wọn fẹ fun ara wọn ni. Wọn ko si bikita nipa nkan ti wọn nilo lati ṣe lati ni i ati bi ọna ti wọn gba lati ni nkan yi ṣe le pa awọn miran lara. Tara wọn nikan ni wọn mọ.

Imọtaraẹninikan, bi mo ti ṣe sọ tẹlẹ, naa ni idi ti awọn eniyan ko ṣe le fi irẹpọ gbe ninu igbeyawo wọn, ni adugbo wọn, ni ibi iṣẹ wọn ati ninu ijọ Ọlọrun wọn pẹlu. Ohun kan ṣoṣo ti wọn ma n ro ko ju nkan ti wọn fẹ lọ ati bi wọn yoo ti ṣe ri i. Wọn ko ni ronu nipa bi oun ti wọn fẹ ati ọna ti wọn gba lati ri yoo ṣe pa awọn ti o wa pẹlu wọn tabi ni ayika wọn lara. Nitorina, o di dandan ki wọn ba atako pade, eyi ti o si le lewu tabi ki o na wọn ni nkan ti o pọ jọjọ.

Ni ọdun melokan ṣẹyin, oorun buruku kan ti ko ṣe farada rara ni o ki mi nigba ti mo pada de lati ibi iṣẹ. “Kini o ṣẹlẹ nibi?” mo bere lọwọ awọn ti a jọ n gbele. “Ki lo de ti oorun buruku yi ṣe gba ibi gbogbo kan?” Wọn si sọ fun mi pe awọn ara ile ti o wa lẹgbẹ wa ni o ko ṣalanga wọn, ti wọn si da omi rẹ si oju ọna wa.

Ki wa lo fa ti wọn ṣe ṣe eyi? Ṣe wọn ronu nipa bi nkan ti wọn ṣe yi ṣe le pa ilera wọn ati ti awọn aladugbo wọn lapapọ lara? Irọ o! Ṣe wọn tilẹ ro wipe oorun ti o n jade lati ipasẹ nkan ti wọn ṣe yi yoo le gbogbo awọn ti o wa ni adugbo kuro ni ile wọn? Irọ o! Awọn kan ṣa ri wipe iho ti o n gba omi ile igbọnsẹ wọn ti kun, o si nilo ki wọn ko o. Nitorina, wọn ko o, wọn si da a si oju ọna. Eyi si wa jẹ ki awọn aladugbo kan ke si awọn oṣiṣe eto ilera ti ijọba melokan lati wa bẹ wọn wo ati lati fun wọn ni ijiya ti o tọ.

Ki wa ni koko ọrọ mi? Oun naa ni pe imọtaraẹninikan yoo mu ki aye ṣoro fun iwọ ati awọn ti o wa ni ayika rẹ. Idi si ni yi ti ọrọ Ọlọrun ṣe sọ fun wa pe, “Ẹ ma ṣe ohunkohun ninu ilepa-ara tabi ogo asan, ṣugbọn ni irẹlẹ ọkan ki olukuluku ro awọn ẹlomiran si ẹni ti o san ju oun lọ. Ki olukuluku yin ma ṣe ro ohun ti ara rẹ nikan, ṣugbọn ti ẹlomiran pẹlu.” (Fílípì 2:3-4) Njẹ o ri bayẹn? Ti a ba fẹ alaafia ni ile wa, ni adugbo wa, ni ibi iṣẹ wa ati ninu ijọ wa, ẹnikọọkan wa ko gbọdọ ma lepa ohun ti o fẹ fun ara rẹ nikan ṣugbọn ohun ti awọn miran naa fẹ fun ara wọn pẹlu.

Se o ri, ti ko ba ki i ṣe ọrọ ti ara wa nikan ni a mọ, ti ọrọ ti awọn miran naa jẹ wa logun pẹlu, a o fi iṣọra ati oye ba wọn lopọ. Nitorina, a ko ni gbe igbesẹ ti yoo pa wọn run nigba ti a ba n gbiyanju lati tẹ ara wa lọrun tabi ki a ma fi ẹtanu ba wọn lo ti wọn ba nilo lati kọ lati fun wa ni awọn nkan kan ti a tọrọ lọwọ wọn. Ṣugbọn ti a ba n gbe igbesẹ ti o n pa aye tabi ayọ awọn miran run nitoripe a fẹ tẹ ara wa lọrun tabi ti a ba n sọ awọn miran di ọta wa nitoripe wọn ko fun wa ni awọn nkan kan ti a bẹbẹ fun (awọn nkan ti ko ki ṣe ẹtọ wa), nṣe ni a n rin ninu imọtaraẹninikan. Bi o ti wa wu ki a lọ soke to ni aye yi, ibanujẹ ati irora ko ni jina si aye wa.

Nitorina, ṣe ayewo aye rẹ fun oniruuru imọtaraẹninikan ti o le wa nibẹ, ki o si ri daju pe o mojuto pẹlu ọrọ Ọlọrun ati pẹlu agbara Ẹmi rẹ. Ki Ọlọrun si fun ọ ni okun lati ṣe eyi. Amin.
Ki o ni ọṣẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)