Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa ati Olurapada wa. Inu mi dun lati ki ọ kaabọ sinu ọsẹ miran ninu oṣu Èrèlé 2025. Adura mi si nipe ki Ọlọrun ya ọ ya gbogbo àṣà ti o le sọ ọ di oludena fun ilọsiwaju ijọ Ọlọrun tabi awọn miran ti o wa ninu aye rẹ. Amin.

Ninu iwe Nọmba, ori 32, Mose sọ eyi fun awọn ẹya Gadi ati Rubẹni:

“Mose sọ fun awọn ọmọ Gadi ati fun ọmọ Rubẹni pe, “Ṣe ki awọn arakunrin yin lọ si ogun, ki ẹyin ki o si joko si bi? Ki ni o de ti o fi mu irẹwẹsi ba awọn ọmọ Isirẹli lati lọ si ibi ilẹ ti Oluwa ti fi fun wọn? Eyi ni nnkan ti baba yin ṣe nigba ti mo ran wọn lati Kadesi-Baniya lati lọ wo ilẹ naa. Lẹyin igba ti wọn lọ si Afonifoji Esikolu ti wọn ri ilẹ naa, wọn mu irẹwẹsi ba awọn ọmọ Isirẹli lati wọ ilẹ ti Oluwa ti fi fun wọn.”” (Nọ́ḿbà 32:6-9)

Ki ni idi ti o ṣe sọ awọn ọrọ kobakungbe yi si wọn? Idi ni pe wọn tọrọ lati ni ipin ilẹ ti wọn ki gbogbo orilẹ-ede naa to rekọja Odo Jọdani lati gba ilẹ Kenani ti Ọlọrun fẹ fi fun wọn. Mose si ri eyi gẹgẹ bi àmì aiṣododo ati igbesẹ lati fi irẹwẹsi mu awọn eniyan naa lati ma tẹsiwaju lati gba ilẹ ti Ọlọrun fẹ fi fun wọn. Nitorina, o bẹrẹ si ni ba wọn wi gidigidi.

Amọ ṣa o, awọn eniyan yi tọrọ nkan ti wọn tọrọ nitoripe wọn ri wipe ilẹ ti o wa ni odikeji Odo Jọdani dara jọjọ fun ọsin ẹran. Awọn si ni ọpọlọpọ agbo maalu ati agbo aguntan. Ki wa lo fa ti Mose ṣe binu si wọn debi wipe o bẹrẹ si ni ba wọn wi? Idi ni pe ko fẹ ki wọn jẹ idi ti irẹwẹsi yoo ṣe mu awọn yoku lati ma lọ fun ohun ti Ọlọrun fẹ fun wọn, ki wọn si tipasẹ eyi ko sinu iyọnu.

Bi Mose ti ṣe fi han wọn, idi ti gbogbo wọn ṣe di ẹni ti o n ranmu lori aṣalẹ fun ogoji ọdun ni pe mẹwa lara awọn ọkunrin mejila ti wọn ran lati ṣe aamí ilẹ ti Ọlọrun fẹ fun wọn ni o mu iroyin ibi ati irẹwẹsi tọ awọn eniyan naa wa. Nitori awọn mẹwa yi si wa ni gbogbo orilẹ-ede ṣe jiya, ki a ko si gba wọn laye lati jẹgbadun ipese Ọlọrun fun wọn lẹkunrẹrẹ fun ogoji ọdun. Ti ọkunrin mẹwa pere ba wa le jẹ ki odidi orilẹ-ede jiya fun ogoji ọdun, wa wo irufẹ iṣoro ti odidi ẹya meji lara wọn le mu wa si ori wọn. Idi si ni yi ti Mose ṣe tete yari fun wọn.

Ni kukuru, awọn eniyan yi fi Mose lọkan balẹ lati ma yọnu rara. Wọn sọ fun wipe awọn ko tẹru ti yoo fi irẹwẹsi ṣe awọn eniyan wọn lati ma ri ipese Ọlọrun ti o darajulọ fun wọn gba. Dipo eyi, nṣe ni awọn yoo fi awọn ẹbi awọn silẹ, ti awọn yoo si tẹsiwaju pẹlu wọn lati wọ Ilẹ Ileri naa titi ẹya kọọkan yoo fi gba ilẹ ini tirẹ. Bẹẹ gẹgẹ ni wọn si ṣe. (Wo: Jọ́súà 22:1-9)

Irufẹ ẹkọ wo wa ni a ri kọ ninu gbogbo eyi? Akọkọ, oun naa ni pe ki a ma a ṣọ bi awọn ọrọ ati igbesẹ wa ṣe le pa awọn ti o wa ninu aye wa lara, paapaa julọ awọn eniyan Ọlọrun. Lotitọ, a le ni awọn idi ti o dara ti a fi fẹ sọ tabi ṣe ohun ti o wa lọkan wa. Ṣugbọn ni asiko ti nkan ti a o sọ tabi ṣe ba a le fi irẹwẹsi mu awọn miran tabi ti o ba le kun wọn pẹlu ilọwọwọ, ki wọn si ri jinna si nkan ti Ọlọrun ti ṣeto fun wọn, a nilo lati sọ ara wa. Aijẹbẹ, a le pada wa jẹ idi ti aye wọn ati aye ti awa naa pẹlu yoo fi wa ni ojukanna titi lailai.

Ekeji, nibi ti a ba ti ri wipe awọn ti o wa ninu aye wa n ṣe nkan ti yoo fi irẹwẹsi sinu wa tabi sinu awọn miran, nṣe ni o yẹ ki a sọrọ soke, bi Mose ti ṣe ṣe. Lotitọ, awọn wọnyi le ni idi ti o dara fun nkan ti wọn n ṣe. Amọ ti a ko ba sọrọ soke, ki a si jẹ ki wọn ṣe alaye ara wọn, a le ma mọ boya o yẹ ki a fi ààyè gba wọn tabi ki a yari fun wọn pẹlu iduro-ṣinṣin. Eyi si le jẹ ki Satani ri ààye lati lo wọn lati sọ irinajo si igbega ati isinmi ti ko pẹ di eyi ti o gun gbọọrọ tabi eyi ti ko ni ṣeeṣe rara mọ wa lọwọ.

Ẹkẹta, ti awọn kan ti wọn ni awọn idi ti o tọ lati gba pe awọn igbesẹ wa yoo di wọn lọwọ tabi da wahala silẹ fun wọn laye ba ko wa loju, nṣe ni ki a fi suuru ati irẹlẹ ti o peye ṣalaye ara wa fun wọn. Aijẹbẹ, a le sọ nkan ti o bajẹ di balumọ. Ti awọn eniyan Gadi ati Rubẹni ba lọ yan lati ma ba a Mose jiyan ni, dipo ti wọn yoo fi ṣalaye ara wọn, o ṣeeṣe ki o gbadura si Ọlọrun lodi si wọn. Eyi si le jẹ ki wọn gba idajọ ti o kira lọwọ Ọlọrun, gẹgẹ bi Datani, Kora ati awọn ti o wa pẹlu wọn ṣe gba idajọ ni ọwọ rẹ. (Wo: Nọ́ḿbà 16)

Nitorina, ma tọ ara rẹ lati ma jiyan pẹlu awọn eniyan ti wọn ba fi ẹsun kan ọ lori ọrọ kankan. Dipo eyi, nṣe ni ki o ma fi suuru ati irẹlẹ ṣalaye ara rẹ fun wọn. Nipa eyi, iwọ yoo le wo ibaṣepọ rẹ pẹlu wọn ṣan, dipo ti o o tun fi ba a jẹ si. Njẹ ki Ẹmi Ọlọrun ma fi igba gbogbo kun ọ pẹlu ọgbọn ati okun lati ṣe bẹẹ gẹgẹ. Amin.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu oṣu keji ọdun yi, iyẹn oṣu Èrèlé 2025. Adura mi si ni pe ki Ọlọrun, nipasẹ Ẹmi rẹ ti o wa ninu rẹ, jẹ ki o rẹ ara rẹ silẹ niwaju rẹ, ki O ba a le dari rẹ lati ni iriri ẹkunrẹrẹ ojurere ati didaara rẹ ninu gbogbo oṣu naa, ni orukọ Jesu. Amin.

Bi a ti ṣe n bẹrẹ oṣu yi, mo fẹ gba ọ niyanju pẹlu awọn ọrọ wọnyi lati inu ọkan lara awọn saamu Dafidi:

“Emi yoo kọ ọ, emi yoo si fi ẹṣẹ rẹ le ọna iwọ yoo rin. Emi o gba ọ ni iyanju, emi yoo si maa fi oju mi tọ ọ. Ma ṣe dabi ẹṣin tabi ibaka, ti ko ni oye, ẹnu ẹni ti a gbọdọ fi ijanu bọ, ki wọn ma ba a sun mọ ọ.” (Sáàmù 32:8-9)

Tani o n sọrọ nibyi? Ọlọrun! Tani O n ba a sọrọ? Emi! Iwọ! Gbogbo wa! Ki si ni O n ba wa sọ? Akọkọ, O n sọ fun wa pe Oun ṣetan lati tọ ati lati kọ wa ni ọna ti o yẹ ki a gba laye. Eyi jasi pe ko ki i ṣe gbogbo ọna ti a ba gba laye yi naa ni yoo yọri si ibalẹ-ọkan ati iṣoriire fun wa. O ni ọna pato ti o yẹ ki a gba lati ni awọn nkan wọnyi. Ẹnikanṣoṣo ti O si mọ ọna yi, ti O si tun le dari wa sinu rẹ naa ni Ọlọrun, ẹlẹda wa.

Nkan keji ti Ọlọrun sọ ni pe Oun yoo ma a gba wa niyanju, Oun yoo si tun ma a daabo bo wa. Eyi tunmọ si pe O ṣetan lati ri daju wipe ọrọ aye wa ko lailai dojuru ati wipe a ko lailai wa lalai si aabo. Ki wa ni a nilo lati ṣe lati jẹgbadun ẹkọ, itọni ati aabo rẹ ni ojoojumọ aye wa? A kan nilo lati fọwọsowọpọ pẹlu rẹ ni. Njẹ a o wa fọwọsowọpọ pẹlu rẹ? Ṣe iwọ yoo fọwọsowọpọ pẹlu Ọlọrun lati dari rẹ lati jẹgbadun ipesẹ rẹ ti o dara-julọ fun aye rẹ?

Bi a ti ṣe ri ninu ẹṣẹ bibeli ti o wa loke yẹn, Ọlọrun kilọ fun wa lati ma jẹ alagidi bi awọn ẹranko. Ki ni idi? A ko ki i ṣe ẹranko. Eniyan ti a da ni aworan ati irisi rẹ ni a jẹ. Nitorina, a ni oye, a si wa ni ipo ẹni ti O le kọ, ti O si tun le dari. Awọn ẹranko ko ni oye. Nitoripe wọn ko ni oye, o ko le ṣalaye nkan fun wọn tabi jiroro pẹlu wọn. Nitorina, o nilo lati tan wọn jẹ tabi mu wọn ni tipatipa lati fọwọsowọpọ pẹlu rẹ. Aijẹbẹ, o ko ni i le mu wọn ṣe ohun yowu ti o fẹ ki wọn ṣe fun ọ.

Nibakanna, ti a ba yan lati ma ṣe bi ẹranko ninu ibaṣepọ wa pẹlu Ọlọrun, ko ni i le fi irọrun kọ wa tabi dari wa lati ni iriri alaafia ati iṣoriire ninu aye wa bi O ti ṣe fẹ. Eyi wa jasi pe ti yoo ba ri ohun rere kankan gbeṣe ninu aye wa, yoo nilo lati mu wa gbọran si lẹnu ni ọna ti o le. Amọ ko ki i ṣaba ṣe eyi. Idi si nipe ko si aridaju pe a o gbọran si lẹnu, bi O tilẹ mu wa kẹkọ lọna ti o le.

Fun apẹrẹ, mo ti igbakanri fi wakati melokan gba enikan nijanju lori igbeyawo rẹ. Ṣibẹṣibẹ, nṣe ni o lọ ọ ṣe idakeji ohun ti mo sọ fun un. Nibayi, igbeyawo rẹ meji ọtọọtọ lo ti forisanpọn. Ti o ba si tun wa tun ọkọ miran fẹ loni, ko si aridaju pe igbeyawo tuntun naa ko tun ni forisanpọn. Idi si ni pe igba ti o ba to bẹrẹ si ni gbọran si Ọlọrun lẹnu ni yoo too dẹkun lati ma kẹkọ lọna ti o le.

Mo ba ọ sọ eyi ki o ba a le mọ wipe Ọlọrun ko fẹ ki a kọ ohunkohun laye yi ni ọna ti o le. Idi si ni pe a tilẹ le ma wa laye lati pitan rẹ. Nitorina, O fẹ kọ wa, dari wa ati daabo bo wa. Amọ a gbọdọ ya ara wa ya ohun gbogbo ti o n jẹ agidi, ki a si rẹ ara wa silẹ lati kẹkọ lọdọ rẹ ati lati ma a tẹle. Mo si gbadura pe ki gbogbo wa ma fi ojoojumọ ri okun gba lati ṣe bẹ ẹ gẹgẹ. Amin.

Kí o ní oṣù Èrèlé 2025 alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: Ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu Sẹrẹ. Mo si gbadura pe ki Ọlọrun ma fi ojoojumọ fun ọ ni iwuri lati ma ṣe amulo ti o peye oore-ọfẹ rẹ lati jẹ alagbara ninu rẹ, ki ọjọ ibi kankan ma ba bori rẹ. Amin.

Ninu lẹta rẹ si awọn ara Efesu, Pọọlu sọ wipe, “Nitori naa, ẹ gbe gbogbo ihamọra Ọlọrun wọ, ki ẹyin le duro tiiri si ọjọ ibi, nigba ti ẹyin ba si ti ṣe ohun gbogbo tan ki ẹ si duro.” (Éfésù 6:13) Ki ni aṣẹ si awọn eniyan Ọlọrun nibiyi? Oun naa ni pe ki wọn gbe gbogbo imọra Ọlọrun wọ. Eyi jasi pe ki wọn ṣe amulo ohun yowu ti Ọlọrun ti pese fun aabo wọn lati da aabo bo ara wọn. Nitorina, eyi ko ki i ṣe nkan ti Ọlọrun yoo ṣe fun wọn; dipo bẹẹ, o jẹ nkan ti wọn yoo ṣe fun ara wọn.

Wayi o, ki ni idi ti o ṣe ṣe pataki ki awọn eniyan Ọlọrun ṣe eyi? Oun naa ni ki wọn ba a le duro ṣinṣin nigba ti ọjọ ibi ba de. Nitorina, daju-ṣaka ni pe awọn ọjọ ibi kan yoo tọ ọmọ Ọlọrun kọọkan wa. Lotitọ, ko si ọjọ kan ti ko ni ibi ninu rẹ, o kere tabi o pọ. Ṣugbọn awọn ọjọ kan a ma a wa ninu eyi ti o jẹ wipe a n taari awọn ibi kan si ọkọọkan ninu wa. Nitori irufẹ awọn ọjọ wọnyi gan ni a ṣe nilo lati wa ni aabo pẹlu ihamọra Ọlọrun.

Fun apẹrẹ, asiko kan wa ti awọn kan kora wọn jọ papọ lati gbogun ti Daniẹli lati parun. Lọna wo? Nipa titan Ọba Darusi jẹ lati pasẹ pe ki gbogbo awọn ti o wa ninu ijọba rẹ ma ṣe gbadura si ọlọrun-kọlọrun kankan ayafi oun. Bi aṣe naa si ṣe sọ, aigbọran si i yoo sọ ẹni ti ọrọ ba kan di ero inu iho kiniun. (Wo: Dáníẹ́lì 6:1-9)

Ki wa lo fa ti awọn ọkunrin yi ṣe gbe irufẹ igbese yi? Idi ni pe wọn mọ pe idi ti awọn ko ṣe ri Daniẹli parun ṣaaju asiko naa ni pe o jẹ aladura ati ẹnikan ti o bẹru Ọlọrun. Nitorina, ero wọn ni pe ti awọn ba le di lọwọ lati ma gbadura fun o kere ju oṣu kan, o yẹ ki ọwọ awọn le tẹ ẹ, ki awọn si ri parun. Ti o ba si wa tẹsiwaju lati ma a gbadura, lodi si aṣẹ ọba, a jẹ wipe inu iho awọn kininu ni yoo ti ba ara rẹ niyẹn. Nitorina, ni ti wọn o, ko si ọna abayọ rara fun ọkunrin naa.

Amọ wọn kuna. Wọn kuna nitoripe Daniẹli ko lailai dẹkun lati ma a gbadura si Ọlọrun, bi o tilẹ jẹ wipe eyi tako aṣẹ ọba. Dipo bẹẹ, nṣe ni o tẹsiwaju lati ma a gbadura ati lati ma a gbadura lọna ti awọn ọta rẹ gan yoo fi mọ wipe o n gbadura. Ṣugbọn ọjọ ibi ni asiko yi jẹ fun un. Ọjọ ti gbogbo awọn ika ijoye Ọba Darusi gbogun ti ni. Ọjọ ti ọba funrarẹ gan ko le ran an lọwọ tabi gbala ni o jẹ. (Wo: Dáníẹ́lì 6:10)

Ki lo wa fa ti o fi tẹsiwaju lati ma a gbadura si Ọlọrun? O tẹsiwaju lati ma a gbadura si i nitoripe o ti ri daju-daju pe Ọlọrun ni ohun gbogbo fun oun. Ọkunrin yi ti n ṣe aṣaro lori ọrọ Ọlọrun, ti o si tun gbadura fun ọpọ ọdun saaju asiko yi. Eyi si ti gbe igbagbọ rẹ ro debi wipe ko si ihalẹ ẹnikẹni ti o le mi i. Nitorina, bi o tilẹ jẹ wipe gbogbo eniyan gbogun ti lasiko naa, ko tilẹ mira rara. Idi si ni pe o mọ wipe Ọlọrun le pa oun mọ.

Ṣe Ọlọrun wa pa a mọ tabi ko pa a mọ? Ọlọrun ma pa a mọ, O si tun dojuti gbogbo awọn ọta rẹ. Ṣugbọn ka wa sọ wipe ko ma gbe igbagbọ rẹ ro ki ọjọ ibi yi to de nkọ? Njẹ ko ni di ẹni iparun bi? Yoo fẹrẹ di ẹni iparun.

Ki gan wa ni koko nkan ti a n sọ? Oun naa ni pe ko yẹ ki a duro de ọjọ ibi ki a to bẹrẹ si ni gbe igbagbọ wa ninu Ọlọrun ro tabi ki a to bẹrẹ si ni wa aabo rẹ. Ki a tilẹ sọ otitọ, a le e ma ranti tabi ki a ma ni igboya to lati wa aabo Ọlọrun nigba ti ọjọ ibi ba de, ti ko ba ti mọ wa lara tẹlẹ lati ma fa aye wa le e lọwọ.

Iwọ naa ro eyi wo: Njẹ eni ti ko ni gbadura nigba ti ko si ofin ti o lodi si adura gbigba yoo gbadura bi, ti ofin ba a le wa ti o lodi si i? Ko fẹrẹ jọ bẹẹ! Nitorina, ko ni fẹ ṣeeṣe ki o fi igbagbọ ninu Ọlọrun han lọjọ ibi, igbagbọ ti o ko ni ninu rẹ ni asiko ti nkan rọrun fun ọ. Idi niyi ti o fi jẹ pe nisinsinyi gan an ni o yẹ ki o gbe gbogbo ihamọra Ọlọrun wọ. Aijẹbẹ, o ko ni ni idahun fun eṣu nigba ti ojọ ibi ba de.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Sẹrẹ 2025. Adura mi si ni pe ki Ọlọrun sọ ọ ji lati ṣe idamọ gbogbo ojuṣe iṣẹ iranṣẹ rẹ, ki O si tun fun ọ ni okun lati bẹrẹ si ni ṣe wọn lalai dẹsẹ duro. Amin.

Pọọlu, ninu lẹta rẹ kan si Timoti, sọ eyi fun un: “…Ṣe iṣẹ rẹ laṣepe.” (2Tímótì 4:5) Ki ni idi ti o ṣe sọ eyi fun un? O sọ eyi fun un nitoripe o mọ daju pe o mọ iṣẹ iranṣẹ rẹ ati awọn ojuṣe ti o soro mọ-ọn. Ti Timoti ko ba mọ ojuṣe iṣẹ iranṣẹ, ko si bi yoo ṣe le mọ-ọn-mọ mu wọn ṣẹ. Lotitọ, o le ṣeesi ṣe diẹ lara ojuṣe iṣẹ iranṣẹ rẹ, bi ko tilẹ mọ wọn. Ṣugbọn ko si bi o ṣe le mọ-ọn-ọn ṣe awọn ojuṣe ti ko mọ rara gẹgẹ bi ojuṣe rẹ laṣepe.

Wayi o, ti Timoti ko ba wa ma a ṣe awọn ojuṣe iṣẹ iranṣẹ rẹ laṣepe, Ọlọrun ko ni i le bukun fun ẹnikọọkan ti O fẹ tipasẹ iṣẹ iranṣẹ rẹ bukun fun bi O ti ṣe fẹ. Ṣe inu Ọlọrun yoo si dun si eyi bi? Rara, inu rẹ ko ni dun si. Nitorina, nṣe ni yoo nilo lati wa awọn ọna ti yoo gba sọ ọ ji lati ṣe gbogbo nkan ti o yẹ ki o ṣe tabi ki O wa awọn miran ti wọn yoo ṣe ohun ti o yẹ ki o ṣe ṣugbọn ti o n pati.

Nibakanna, Ọlọrun n reti ki ọmọ rẹ kọọkan ninu ijọ loni ṣe idamọ awọn ojuṣe iṣẹ iransẹ rẹ, ki o si bẹrẹ si ni ṣe wọn. Aijẹbẹ, ko ni le bukun fun awọn ti O fẹ tipasẹ rẹ bukun fun. Ibi ti eyi ba si ti ribẹ, yoo nilo lati wa ọna lati sọ wọn ji lati ṣe awọn iṣẹ ti wọn n pa a ti tabi lati wa awọn miran ti wọn yoo ṣe e.

O wa ṣeni laanu pe bi o tilẹ jẹ wipe Ọlọrun n ṣe ohun gbogbo ti O le ṣe lati sọ ọpọ wa ji si awọn nkan ti o jẹ ojuṣe iṣẹ iransẹ wa, ọpọ igba ni a ko ki i ṣetan lati sọji nitori ibẹru, imẹlẹ, ailepa-ọkan-pọ, ojukokoro tabi aimọkanmọkan. Nitorina, ọpọ igba, ni Oun naa ma n nilo lati pe awọn miran lati ṣe awọn nkan ti a n kọ lati ṣe. Idi si niyi ti o fi jẹ wipe, ni ọpọ awọn ijọ Kirisitiẹni, awọn perete ti o fi ara wọn jin fun ọrọ Ọlọrun naa ni o tun ma n ṣaba fi ara wọn jin fun adura gbigba, ibẹwo, ififunni ati mimojuto awọn ile ijọsin wọn.

Fun apẹrẹ, ninu lẹta rẹ kan si awọn ara Kọrinti, o sọ eyi fun wọn: “Mo layọ fun wiwa Sitefana ati Foritunatu ati Akayaku: nitori eyi ti o ku nipa ti yin wọn ti fi kun un.” (1Kọ́ríntì 16:17) Njẹ o ri bayẹn? Daju-ṣaka ni pe alagba ijọ Kọrinti ni awọn ọkunrin mẹta wọnyi. Eyi jasi pe wọn gbọdọ ni ọpọlọpọ ojuṣe ti wọn n gbe ni asiko naa. Sibẹsibẹ, bi ijọ Kọrinti yoo ti tobi to ni asiko yẹn, awọn ọkunrin mẹta yi i naa ni o tun fi nkan ini wọn ran Pọọlu lọwọ lati mojuto nkan ti gbogbo ijọ wọn yẹ ki o ṣe.

Njẹ eyi wa jẹ nkan ti o dara lati ma ṣẹlẹ ninu ijọ Ọlọrun kankan? Rara o! Ṣe awọn perete ni o yẹ ki wọn ma gbe gbogbo ẹru ti o yẹ ki gbogbo awọn ọmọ ijọ wọn ma a gbe? Rara o! Ṣe ko tilẹ ṣeeṣe ki o rẹ awọn perete wọnyi tabi ki irẹwẹsi mu wọn ni asiko kan, ki wọn si ma fẹ ṣe nkankan mọ? O ṣeeṣe. A si ti ri awọn eniyan ti irẹwẹsi mu, ti wọn si dẹkun lati ma lọ si awọn ipade ijọ wọn patapata nitoripe ẹru ti wọn n gbe wọ wọn lọrun.

Siwaju si, bi irẹwẹsi ko tilẹ mu awọn wọnyi, ṣe ko ki i ṣe awọn nikan ni Ọlọrun yoo pin ni ere ti o ye ki o jẹ ti gbogbo ijọ wọn? Awọn nikan naa ni yoo pin ni ere yi. Idi si ni pe Ọlọrun ko ni lailai pin eniyan lere fun ohun ti ẹni naa ko ba ṣe fun un. Yatọ si iyẹn, idagbasoke ati ilọsiwaju ijọ ninu eyi ti o jẹ wipe awọn perete nikan ni o ṣe ohun gbogbo ti o yẹ ki o jẹ ṣiṣe yoo lọra. Eyi yoo si jẹ ki o ri idi ti a fi ni ọpọlọpọ ijọ ni ilẹ wa ti wọn ti wa fun ọpọ ọdun ṣugbọn ti wọn si tun jẹ èwe ninu isesorere ati iwulo.

Ni kukukru, mo n sọ awọn nkan wọnyi fun ọ lati jẹ ki o mọ wipe ko ki i ṣe nkan ti o dara ni fun wa gẹgẹ bi ijọ lati fi awọn nkan ti o yẹ ki gbogbo wa ma a ṣe fun Ọlọrun silẹ fun awọn kiki awọn melokan lati ṣe. Ti eyi ba si ri bẹ, a jẹ wipe a ti n ṣeesi di idagbsoke ati iwulo ijọ wa lọwọ niyẹn ati wipe o ṣeeṣe ki a tilẹ ti ma fi irẹwẹsi kun ọkan awọn kọọkan larin wa. Nitorina, a nilo lati ronupiwada, ki a si bẹrẹ gbe ojuṣe wa ninu adura gbigba, ififunni, ibẹniwo ati bẹẹbẹẹ lọ. Nigba naa ni ijọ waa yoo bẹrẹ si ni dagbasoke ati pọ si ni iwulo bi o ti ṣe tọ, nigba naa si tun awa naa ko ni padanu ere wa si ọwọ awọn miran.

Ki o ni ọsẹ atata.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ miran ninu oṣu Sẹrẹ 2025. Mo si gbadura pe ki Ọlọrun dari rẹ nipasẹ Ẹmi rẹ lati gbe gbogbo igbesẹ ti o tọ fun ọ lati tayọ ni gbogbo ọna rẹ ninu ọdun naa, ni orukọ Jesu. Amin.

Wayi o, ni ibẹrẹ ọdun bi eyi, nkan ti o wopọ ni ki awọn eniyan ma pongbẹ lati gbe igbe aye ti o suwọn si ati lati ri ere ti o suwọn ju ti atẹyinwa lọ lori awọn akitiyan wọn. Ko si si nkan ti o buru ninu eyi. Amọ ṣa o, pe a n pongbẹ lati gbe igbe aye ti o suwọn si ko to fun wa lati gbe igbe aye ti o suwọn si. Nibakanna, pe a n pongbẹ lati ri ere ti o suwọn ju tatẹyinwa lọ laye ko to fun wa lati ri ere ti o suwọn ju tatẹyinwa lọ. Ti a ko ba ma a ṣe awọn nkan ti yoo jẹ ki a gbe igbe aye ti o suwọn si ati ti yoo jẹ ki a ri ere ti o suwọn ju tatẹyinwa lọ lori awọn akitiyan wa lọna ti o peye, a ko ni gbe igbe aye ti o suwọn si tabi ri ere ti o suwọn si.

Bibeli sọ wipe, “Ki a ma ṣe tan yin jẹ; a ko le gan Ọlọrun: nitori ohunkohun ti eniyan ba funrugbin, ohun ni yoo si ka.” (Gàlátíà 6:7) Ki ni eyi tunmọ si? Nkan ti o tunmọ si ni pe Ọlọrun ti fi ofin kan kalẹ ti o sọ wipe ohun ti eniyan ba gbin laye yi ni yoo ka. Nitorina, lakọkọ, o ko le kore ohun ti o ko ba gbin. Ekeji, o ko le yi ikore ohun ti o ba ti gbin pada – ohun ti o ba gbin naa ni o o ka.

Nitorina, ti o ba fẹ gbe igbe aye ti o suwọn si, ti o si tun fẹ je ere ti o suwọn si lori awọn akitiyan rẹ lọdun yi, ibere akọkọ ti o gbọdọ bere lọwọ ara rẹ ni pe, “Njẹ mo n gbin ohunkohun rara ti o le jẹ ki n gbe igbe aye ti o suwọn si ati ti o le jẹ ki n jere ti o suwọn ju tatẹyinwa lọ?” Ti o ko ba gbin nkankan sinu aye yi, ko yẹ ki o reti ikore kankan lori ohun ti o ko gbin. Kiki awọn ti o ba n gbin nkan ni o ni anfaani lati ma foju sọna fun ikore nkan ti wọn n gbin.

Ibere keji ti o nilo lati bere lọwọ ara rẹ ni pe, “Irufẹ irugbin wo ni mo n gbin?” Bi mo ti ṣe sọ siwaju, o ko le yi ikore irugbin yowu ti o ba ti gbin pada. Nkan ti o ba gbin naa ni iwọ yoo ka. Nitorina, ti o ba fẹ igbe aye ti o suwọn ju tatẹyinwa lọ, ti o si tun fe ere ti o suwọn ju tatẹyinwa lọ lọdun yi, o ṣeeṣe ki o nilo lati parọ irugbin ti o n fun. Fun apẹrẹ, ti o ba jẹ pe irugbin ti ibẹru, imẹlẹ, anikanjọpọn, ẹtanu, ikunsinu tabi ọrọ buburu ti fi idibajẹ si ni o n fun, o gbọdọ parọ rẹ si irugbọin igbagbọ, ifẹ, iṣẹ-aṣekara, iṣoore, adura gbigba ati ọrọ Ọlọrun. Aijẹbẹ, ko si bi o ti ṣe tiraka to lọdun yi, o ko le gbe igbe aye ti o suwọn si tabi jẹ ere ti o suwọn ju tatẹyinwa lọ. Dipo bẹẹ, o ṣeese ki nkan tun wa buru si fun ọ.

Siwaju si, bi o tilẹ wa jẹ wipe irugbin igbagbọ, ifẹ, iṣẹ-aṣekara, iṣoore, adura gbigba ati ọrọ Ọlọrun ni o n fun, o tun nilo lati fun ọpọlọpọ awọn irugbin yi si, ki o ba a le ni ikore wọn lọna ti o pọ si lati ara igbe aye ti suwọn si ati ere ti o suwọn si. Ranti pe nkan ti o ba gbin naa ni o o ka. Lotitọ, Ọlọrun le fun ọ ni ikore irugbin ti o gbin ni ilọpo-ilọpo lọna ti o ga. Amọ ṣa o, nkan ti o ba gbin nikan naa ni O le sọ di ilọpo fun ọ, ko si ṣe eyi ti o ko ba gbin. Nitorina, ti o ba jẹ ọgọrun irugbin ni o fun, ọgọrun irugbin yi naa ni yoo sọ di ilọpo-ilọpo fun ọ. Ti o ba si jẹ ẹgbẹrun irugbin ni o fun, ẹgbẹrun kan yi naa ni yoo sọ di ilọpo-ilọpo fun ọ. Ko si ojuṣaaju pẹlu rẹ.

Nitorina, ti o ba n fẹ lati ni iriri iṣorire ati ijẹgbadun ti o suwọn ju tatẹyinwa lọ ninu ọdun yi, ṣetan lati fun irugbin rere ti o pọ ju tatẹyinwa lọ. Bi o si ti ṣe n ṣe eyi, mo gbadura pe ki Ọlọrun sọ ere ilakaka rẹ di ilọpo-ilọpo fun ọ, ki O si tun fun ọ ni isinmi ni gbogbo ayika rẹ, ni orukọ Jesu. Amin.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ si ọjọ Isinmi akọkọ ninu ọdun tuntun yi, ọdun 2025. Daju ṣaka ni pe nitori didara Oluwa si wa ni a ṣe wa laaye ati ni alaafia lati ri ọdun tuntun naa. Nitorina, mo fẹ ki o darapọ mọ mi lati kọ orin yi ti o sọ pe:

O ṣeun, Oluwa
O ṣeun, Oluwa
Gbogbo nkan ti mo le sọ naa ko ju pe ‘O ṣeun, Oluwa’.

Wayi o, bi a ti ṣe n bẹrẹ ọdun yi, mo fẹ gba fun iwọ naa adura Apọsiteli Johanu fun ọrẹ rẹ kan, ti o ka bayi: “Olufẹ, emi n gbadura pe ki o le ma a jẹgbadun ilera ti o peye, ki o si maa dara fun ọ ninu ohun gbogbo, ani bi o ti dara fun ọkan rẹ.” (3Jòhánù 3) Ki ni nkan akọkọ ti Johanu n tọrọ lọwọ Ọlọrun lati ṣe fun ọrẹ rẹ? Ohun naa ni pe ki O jẹ ki o ma a jẹgbadun ilera ti o peye.

Ki ni idi ti eyi ṣe ṣe pataki? O ṣe pataki nitoripe lalai si ilera ti o peye, yoo nira, iyẹn ti o ba tilẹ ṣeeṣe, fun ẹnikẹni lati ṣe nkankan ti o nitumọ fun Ọlọrun, fun ara rẹ tabi fun awọn miran. Lafikun, lalai si ilera ti o peye, awọn eniyan ko le gbadun aye wọn tabi ohunkohun ti wọn ni. Emi si wa fẹ ki o le gbe oniruuru nkan ti o nitumọ ṣe fun Ọlọrun, fun ara rẹ ati fun awọn miran lọdun yi. Mo tun fẹ ki o le jẹgbadun aye rẹ, awọn ibaṣepọ rẹ ati ohun rere yowu ti Ọlọrun ba ṣe fun ọ tabi fi fun ọ ninu ọdun naa. Nitorina, gẹgẹ bi Johanu ti ṣe gbadura fun ilera ti o peye fun ọrẹ rẹ, emi naa tun n gba ladura fun iwọ naa pe ki o jẹdadun ilera ti o peye ni gbogbo ọdun tuntun yi, ki o ba a le ni okun to lati ṣe ohun rere yowu ti ọkan rẹ ba n fẹ lati ṣe ati ki o ba a le jẹgbadun aye rẹ ati ohun gbogbo ti o ni. Amin.

Ki ni nkan keji ti Johanu n tọrọ lọwọ Ọlọrun fun ọrẹ rẹ? Oun naa ni pe ki o le maa dara fun ninu ohun gbogbo. Njẹ iwọ naa ko ha fẹ ki o dara fun ọ ninu ohun gbogbo ninu ọdun yi bi? Njẹ o ko ha fẹ ki o dara fun ẹbi rẹ, okowo rẹ, ẹkọ rẹ, iṣẹ-iranṣẹ rẹ ati ohun yowu ti o ni i ṣe pẹlu aye rẹ bi ninu ọdun yi? Emi n fẹ ki o dara fun mi ninu ohun gbogbo lọdun yi. Adura mi naa si wa ni pe ki o dara fun iwọ naa ninu ohun gbogbo ni ojoojumọ ọdun tuntun yi. Amin.

Nkan ẹkẹta ti Johanu bere lọwọ Ọlọrun fun ọrẹ rẹ ni pe ki o ma a dara fun ọkan rẹ ninu ibaṣepọ rẹ pẹlu Ọlọrun. Eyi tunmọ si pe Johanu fẹ ki Ọlọrun jẹ ki ọrẹ rẹ ji pepe nipa ti ẹmi. Ko fẹ ki o kan jẹ aláásìkí ati alara-pipe eniyan ti o n gbe igbe aye alaiwa-bi-ọlọrun, igbe aye omugọ tabi igbe aye ti ko nitunmọ. Emi naa ko wa fẹ ki iwọ naa kan jẹ aláásìkí ati alara-pipe eniyan ti o n gbe igbe aye aibikita tabi igbe aye alaiwulo ninu ọdun yi. Idi si ni yi ti adura mi fun iwọ naa ni pe ki Ọlọrun jẹ ki o ji pepe nipa ti ẹmi ni gbogbo ọna ninu ọdun yi, ki o ba a le lo ilera ati ọrọ rẹ lati buyi fun un.

Ni kukuru, awọn adura mi fun ọ ni iwọnyi, bi a ti ṣe n bẹrẹ ọdun yi. Bi mo si ti ṣe n foju-sọna lati gbe oniruuru nkan nla ṣe pẹlu rẹ ninu ọdun naa, njẹ ki oore-ọfẹ Jesu Kirisiti Oluwa wa, ifẹ Ọlọrun ati idapọ Ẹmi mimọ wa pẹlu rẹ lati isinsinyi lọ ati titi lailai. Amin.

A kú ọdún tuntun o.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ti o ga ni mo ki ọ kaabọ sinu ọsẹ ti o so ọdun yi, ọdun 2024, pọ mọ ọdun ti a n wo niwaju wa yi, iyẹn ọdun 2025. Adura mi si ni pe ki Ọlọrun ri daju pe o wọ inu ọdun tuntun naa pẹlu akunwọsilẹ ayọ, ni orukọ Jesu. Amin.

Wayi o, ọkan lara awọn ọna lati ni iriri akunwọsilẹ ayọ lori ohun gbogbo ti o ni i ṣe pẹlu aye wa ni ki a gbadura. Jesu sọ eyi fun wa nipa ayọ: “Titi di isinyii ẹ ko tii beere ohunkohun ni orukọ mi: ẹ beere, ẹ o si ri gba, ki ayọ yin ki o le kun.” (Jòhánù 16:24) Njẹ o ri bayẹn? Bawo ni a ṣe le ni iriri ayọ ti o kun tabi ẹkunrẹrẹ ayọ ninu aye wa? Nipasẹ gbigbadura si Ọlọrun ni.

Nitorina, ohun ti a nilo lati ṣe ni ki a ṣe idamọ awọn abala aye wa ninu eyi ti inu wa ko ti dun rara tabi ninu eyi ti ayọ wa ko ti kun, ki a si bẹrẹ si ni ba Ọlọrun sọrọ lori wọn. Jesu si ti wa fi da wa loju pe ti a ba ṣe eyi, a o ri idahun si adura wa gba, eyi yoo si yọri si ẹkunrẹrẹ ayọ fun wa. O wa ku si ọwọ wa yala lati gbadura lati ni iriri ẹkunrẹrẹ ayọ ninu aye wa tabi lati ma gbadura, ki a si wa ninu ibanujẹ.

Fun apẹrẹ, bi a ti ṣe sọ fun wa ninu bibeli, Hana fi igbakan ri jẹ onibanujẹ obinrin. Ki ni idi? Akọkọ, idi ni ni pe o ya agan. Ekeji, idi ni pe iyawo ọkọ rẹ keji, iyẹn Pẹnina, ma n pọn loju nitori iyagan rẹ. Lotitọ, ọkọ rẹ, Elikana, ma n saba gbiyanju lati tu u ninu ati lati mu inu rẹ dun. Ṣugbọn idunu ti o n fun ko fi igba kankan to lati ma jẹ ki o sọkun tabi banujẹ mọ.

Amọ ṣa o, ni ọjọ kan, Hana pinnu lati ba Ọlọrun sọrọ lori nkan ti o n fi ojoojumọ ba ninujẹ. Lẹyin asiko adura naa wayi, ibanujẹ poora ninu aye rẹ. Iwọ naa wo diẹ lara nkan ti bibeli sọ lori eyi:“…Bẹẹ ni obinrin naa ba tirẹ lọ, o si jẹun, ko si fa oju ro mọ.” (1Sámúẹ́lì 1:18) Njẹ o ri bayẹn? Nipasẹ adura, ayọ Oluwa gbera dide ninu ọkan Hana, o si le ibanujẹ rẹ lọ. Yatọ si iyẹn, nipasẹ adura rẹ lọjọ yẹn, o ri ọmọdekunrin kan gba lọwọ Oluwa. Eyi si tun wa jẹ ki ayọ rẹ kun akunwọsilẹ.

Nibakanna, ti awa naa ba le gbadura si Ọlọrun lori ohunkohun ti o n yọ wa lẹnu tabi ti o n kun wa pẹlu ibanujẹ, yoo da wa lohun. Lọna wo? Yoo kọkọ jẹ ki ayọ rẹ gbera dide ninu ọkan wa, ki o si le ibanujẹ wa danu. Siwaju si, yoo tun jẹ ki idahun si adura wa ki o farahan. Nipa eyi, ayọ rẹ ti o wa ninu ọkan wa yoo bẹrẹ si kun akunwọsilẹ, yoo si tun yọri si fifi ọpẹ fun un.

Nitorina, bi o tilẹ jẹ wipe a ti wa ni awọn ọjọ ti o kẹyin ọdun yi, mo fẹ ki o mọ wipe ko i ti pẹ ju rara fun ibanujẹ lati di eewọ fun aye rẹ ni gbogbo ọna tabi pẹ ju fun ọ lati ni iriri ẹkunrẹrẹ ayọ lori ohun gbogbo ti o n ni ọ lara. O kan nilo lati gbadura si Ọlọrun ni, bi Hana ti ṣe. Bẹẹni, gbadura si pẹlu ọkan otitọ, ki o si sọ ohun gbogbo ti o n da ọkan rẹ laamu fun un ati ohun ti o fẹ ki O ṣe lori wọn. Yoo si da ọ lohun, yoo le ibanujẹ rẹ danu, yoo si tun ṣe iṣẹ iyanu ti yoo jẹ ki ayọ rẹ kun akunwọsilẹ fun ọ, iyẹn ki ọdun yi to pari.

Wayi o, bi mo ti ṣe n foju sọna fun ẹri rẹ, njẹ ki oore-ọfẹ Jesu Kirisiti Oluwa wa, ifẹ Ọlọrun ati ibadapọ Ẹmi Mimọ jẹ tirẹ lati isinsinyi lọ ati titi lailai. Amin.

A ku imura ọdun o.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ kẹrin oṣu Ọpẹ 2024. Mo si gbadura pe ki Ọlọrun ṣe ayọ rẹ ni akunwọsilẹ ni gbogbo ọjọ yoku ninu ọdun yii. Amin.

Wayi o, bi gbogbo wa ti ṣe mọ, asiko ti a wa yi jẹ eyi ti ọpọ eniyan kaakiri gbogbo agbaye ka si asiko ajọyọ. Bi o si ti wa jẹ pe ko buru ti awa naa ba darapọ ninu ajọyọ naa, a ko gbọdọ gbagbe pe ohunkohun ti a ba n ṣe gẹgẹ bi onigbagbọ ninu Kirisiti Jesu gbọdọ jẹ pẹlu oye ati ni iwọntunwọnsi. Aijẹbẹ, a le ba ajọyọ ara wa jẹ.

Fun apẹrẹ, bi a ti ṣe ri ninu Iwe Mimọ, Dafidi ni asiko kan dari awọn ọmọ Isiraẹli ninu ajọyọ ti o ga lati gbe Apoti Ẹri Oluwa lati ibi ti o wa tẹlẹ lọ si ibi ti o ṣẹṣẹ pese silẹ fun ninu ilu rẹ. O wa ṣeni laanu pe bi ajọyọ naa ti n lọ lọwọ, Ọlọrun lu ẹnikan pa. Bẹẹni, Ọlọrun pa ọdọmọkurin kan ti a n pe ni Usa nitoripe o fi ọwọ kan Apoti Ẹri rẹ nigbati o n gbiyanju lati ma jẹ ki apoti yi re jabọ kuro ninu kẹkẹ ti a gbe sinu rẹ. Eyi si ba ajọyọ ọjọ naa jẹ. (Wo: 2Sámúẹ́lì 6:1-7)

Ki wa ni o jẹ ki Ọlọrun ba ajọyọ awọn eniyan rẹ jẹ lọna yi? Ti o ba jẹ wipe Satani ni o ba ajọyọ wọn jẹ, ko ni jẹ kayefi. Ṣugbọn ko ki i ṣe Satani ni o ba ajọyọ wọn jẹ — Ọlọrun ni o ba a jẹ. Si wa wo o, Oun naa ni wọn n yin lọjọ ti a n wi yi o. Ki wa lo fa ti O fi ba ajọyọ wọn jẹ?

Ni kukuru, gẹgẹ bi Dafidi ti sọ lẹyin-ọ-rẹyin, nitoripe wọn ko tẹle ilana Ọlọrun ni mimojuto Apoti Ẹri rẹ ni O ṣe ba ajọyọ wọn jẹ. O wa jasi pe aimọkan-mọkan wọn ni o fi aye silẹ fun idajọ Ọlọrun ti o sọ ọjọ ajọyọ di ọjọ ẹkun fun gbogbo orilẹ-ede wọn lati wa sori wọn. Eyi si n kọ wa pe aimọkan-mọkan le ba ajọyọ jẹ. Nitorina, bi o ti ṣe n yọ lori didara Ọlọrun ni asiko yi, ma gbagbe ara rẹ debi wipe o o bẹrẹ si ni tọwọbọ awọn nkan ti o ko ni oye nipa wọn tabi awọn nkan ti o ga ju ọ lọ. Aijẹbẹ, idajọ Ọlọrun tabi ikọlu Satani le run ajọyọ rẹ.

Siwaju si, bi mo ti ṣe sọ tẹlẹ, ajọyọ wa ni asiko yi gbọdọ jẹ iwọntunwọnsi. Jẹun ni iwọntunwọnsi. Mu ni iwọntunwọnsi. Wọṣọ ni iwọntunwọnsi. Si tun na owo ni iwọntunwọnsi. Ma sọ ara rẹ di alajẹnu nitoripe asiko ajọyọ ni o wa. Ma si ko sinu gbese tabi ki o fi iwa omugo naa owo rẹ nitori ajọyọ. Aijẹbẹ, o le ba orukọ ara rẹ jẹ.

Bibeli sọ eyi fun gbogbo awọn ọmọ Ọlọrun: “Ẹ maa ṣe ohun gbogbo bi o ti tọ ati bi o ti yẹ.” (1Kọ́ríntì 14:40) Lotitọ, lori awọn ipade wa gan ni a mọ-ọn-mọ sọ ọrọ yi le. Amọ o tun ṣe e lo pẹlu fun bi a ti ṣe n mojuto aye wa. A gbọdọ ṣe ohun gbogbo ni iwọntunwọnsi ati lẹsẹẹsẹ. Nitorina, bi a ti ṣe n yọ lori didara Ọlọrun, a gbọdọ ṣe e pẹlu ọgbọn. Aijẹbẹ, a le si ilẹkun aye wa silẹ fun awọn ijamba, ewu tabi abamọ ti o ṣe e yago fun, ki a si ba ajọwọ wa jẹ. Mo gbadura wipe ọdun yi ko ni pari pẹlu abamọ ati ibanujẹ fun ọ tabi fun ile rẹ, ni orukọ Jesu. Amin.

A ku imura ọdun Keresi o

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ọ̀pẹ 2024. Adura mi si ni pe Satani ko ni ṣe aṣeyọri rara lati ri ọ lo lati ṣe ara rẹ tabi awọn miran ni ijamba ni gbogbo eyi ti o ku ninu ọdun yi. Amin.

Ọkan lara awọn aṣẹ ti a pa fun wa ninu Iwe Mimọ ni pe ki a ma ṣe fun eṣu laaye (Éfésù 4:27). Eyi jasi pe a ko gbọdọ fun ni anfaani lati ṣiṣẹ ninu aye wa tabi lati lo wa lati ṣiṣẹ ninu aye awọn miran. Ṣugbọn ti a ko ba ti ilẹkun ọkan wa mọ ohun gbogbo ti o n jẹ ibi, Satani le ṣe aṣeyọri lati ri wa lo lati pa ara wa tabi awọn miran lara kọja ero ọkan wa.

Fun apẹẹrẹ, nitoripe Judasi Isikariọti ko ti ilẹkun ọkan rẹ mọ ojukokoro, Satani ṣe aṣeyọri lati mu un lẹru ati lati lo lati ṣẹ́ Jesu Kirisiti Oluwa wa. Nigbati iye rẹ si wa sọ pada, ti o ri wipe Satani ti ya ohun lo, ara rẹ ko gba itiju ti o tẹle. Nitorina, lẹkaansi, Satani kun ọkan rẹ pẹlu abamọ ati ibanujẹ to bẹẹ ti o fi lọ pokunso. Ti awa naa ko ba wa gbe ilẹkun ọkan wa ti mọ ojukokoro, Satani le ṣe aṣeyọri ni lilo wa lati pa awọn ti a fẹran run ati ara wa pẹlu. (Wo: Mátíù 27:3-5; Jòhánù 13:2&27)

Ọba Sọọlu nkọ? Nitoripe o kọ lati ti ilẹkun ọkan rẹ mọ ẹtanu ati owu jijẹ, Satani mu un lẹru, o si sọ ọ di apaniyan. O wa pa ojuṣe rẹ gẹgẹ bi ọba ti, o si bẹrẹ si ni le Dafidi, ọdọmọkurin alaiṣẹ ti ko ṣe ni ibi, kaakiri, lati ibikan si ibomiran, lati mu un ati lati pa a. Ko si wa dẹkun lati ma fi aye rẹ ṣofo lọna yi titi o fi ku.

Nibakana, ti a ba fi aye gba owu tabi ẹtanu ninu ọkan wa, Satani le mu wa lẹru, ki o si bẹrẹ si ni lo wa lati lepa iparun awọn alaiṣẹ, dipo ti a o fi ma lepa imuṣẹ awọn eto Ọlọrun fun aye wa. Nibi ti eyi ba si ti ri bẹ ẹ, o di dandan ki a fi aye wa ṣofo.

Lafikun, nipasẹ igberaga, Satani le mu ọkan wa lẹru, ki o si bẹrẹ si ni lo wọn lati ṣe awọn nkan ti a o pada kabamọ, awọn nkan ti yoo fi wa si abẹ idajọ Ọlọrun. Fun apẹrẹ, nitori igberaga Dafidi, nitoripe o fẹ ma fi bi awọn ọmọ Isiraẹli ṣe pọ to yangan, Satani ṣe aṣeyọri ni lilo o lati ṣe ikaniyan wọn. Nipa ṣiṣe eyi, o fi ara rẹ ati awọn eniyan naa si abẹ idajọ Ọlọrun. Ti ko ba wa jẹ wipe Ọlọrun ṣaanu fun ilẹ naa ni, boya eniyan perete ni a ko ba fi silẹ láàyè. (Wo: 1Kíróníkà 21)

Ṣe o wa ri bayi pe bi a tilẹ fẹran Ọlọrun gidigidi bi Dafidi, ti a ba fi aye gba igberaga ninu ọkan wa, Satani le ya wa lo. Ta wa ni o mọ irufẹ ipalara ti o le ṣe nipasẹ wa? Nitorina, bi a ti wọ inu awọn ọjọ ti o gbẹyin ọdun yi, ri daju pe o fi aye gba ọrọ Ọlọrun lati ya ọ ya ohun gbogbo ti o n jẹ ero ibi, paapaa julọ, igberaga, etanu, owu, ojukokoro, ainitẹlọrun ati ifẹkufẹ. Nipa ṣiṣe eyi, Satani ko ni le e ri ọ lo lati ba ayọ ati ibalẹ-ọkan ara rẹ jẹ tabi lati pa awọn miran run. Njẹ ki Ẹmi Ọlọrun fun ọ ni okun lati ṣe bẹẹ gẹgẹ, ni orukọ Jesu. Amin.

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu ọsẹ keji ninu oṣu Ọ̀pẹ 2024. Mo si gbadura pe ki ọkan rẹ ma fi igba gbogbo gba okun lati má kọ Ọlọrun alaaye silẹ fun ọlọrunkọlọrun miran, bi o ti wu ki idojukọ rẹ le e to laye yi, ki o ba a le ma fi ojoojumọ ri ifarahan iyanu agbara rẹ fun ire rẹ. Amin.

Bibeli sọ pe, “Nitori ti oju Oluwa n lọ siwa, sẹyin ni gbogbo aye, lati fi agbara fun awọn ti ọkan wọn wa ni pipe si ọdọ rẹ…” (2Kíróníkà 16:9) Njẹ o ri bayi? Gbogbo igba ni Ọlọrun n foju wa awọn ti O le fi agbara rẹ han fun wọn. Ki si ni yoo jẹ ki O fi agbara rẹ han fun igbala, aabo tabi igbega wọn? Fifi gbogbo ọkan wọn jin fun jin fun ni yoo jẹ ki O ṣe bẹ ẹ.

Wo o, ti o ba fi gbogbo ọkan rẹ jin fun Ọlọrun, wa mu ọrọ rẹ, adura gbigba ati ibadapọ pẹlu awọn ara ninu ijọ ni ọkunkundun. Lafikun, ti o ba fi gbogbo ọkan rẹ jin fun Ọlọrun, o ko ni lailai yi pada kuro lọdọ rẹ si ọdọ ọlọrun miran fun iranwọ. O wa ṣeni laanu pe ọpọ ninu ijọ loni ni o ti yipada kuro lọdọ Ọlọrun si idi iṣẹ oṣo lati di olowo, lati gba iwosan fun ailera wọn tabi lati gba itusilẹ kuro lọwọ iyagan wọn.

Wayi O, irufẹ awọn eniyan wọnyi ko le ni iriri agbara Ọlọrun fun ire wọn bi o ti ṣe tọ. Dipo eyi, ti wọn ba lọra lati ronupiwada, idajọ Ọlọrun le wa sori wọn, ki O si pa ati awọn ati awọn nkan ti wọn gba lọwọ oṣu tabi ti wọn n gbiyanju lati daabo bo run. Bi a ti ṣe ri ninu bible, idi pataki ti Ọba Ahasaya ṣe ku lati ipasẹ ọgbẹ ti o ni nigba ti o ṣubu ninu aafin rẹ ko ju pe o tọ ọlọrun miran lọ fun iwosan dipo Ọlọrun alaaye. Lafikun, ọkan gbogi lara idi ti Ọba Asa ṣe ku ṣaaju asiko rẹ ni pe o kọ lati tọ Ọlọrun lọ fun iwosan rẹ — awọn oniṣegun rẹ nikan ti o n tọ lọ. (Wo: 2Àwọn Ọba 1; 2Kíróníkà 16)

Ṣe o wa ri bayi pe awọn ti ko fi ọkan wọn jin patapata fun Ọlọrun fun ohunkohun ti wọn ba nilo ṣeeṣe ki wọn padanu lọna meji. Akọkọ, wọn yoo padanu ifarahan agbara rẹ fun wọn. Ekeji, wọn yoo padanu ohun yowu ti wọn n gbiyanju lati pa mọ tabi daabo bo lalai fi ti iranwọ rẹ ṣe.

Nitorina, ti a ba ri ọna kan tabi omiran ti o ko ti fi ọkan rẹ jin patapata fun Ọlọrun, ti a ba ri abala aye rẹ kan ninu eyi ti o ti n wa iranlọwọ fun ara rẹ lọdọ awọn miran yatọ si Ọlọrun, nṣe ni ki o yara tete ronupiwada. Aijẹbẹ, nigba ti awọn ọmọ Ọlọrun yoku ba n ni ẹri giga didara rẹ lati jẹ, o ṣeeṣe ki o jẹ wipe nṣe ni wa ma a yíràá ninu inira ati idojuti. Adura mi ni pe eyi ko ni jẹ ipin rẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)