Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kiristi Oluwa wa. Inu mi dun lati ki ọ kaabọ sinu oṣu ti o kẹyin ọdun yi, oṣu Ọ̀pẹ 2024. Adura mi ni pe ki Ọlọrun ṣe ohun gbogbo ti o ni i ṣe pẹlu rẹ lọdun yi ni aṣepe, ni orukọ Jesu. Amin.

Wayi o, ẹnikan le bere pe, “Ṣe Ọlọrun lotitọ si le ṣe ohun gbogbo ti o ni i ṣe pẹlu aye mi lọdun yi ni aṣepe, pẹlu wipe ẹyin ni aye mi wa ni ọpọlọpọ ọna?” Bẹẹni, O le ṣe e. Ko si bi aye rẹ ṣe rẹyin to tabi bi o ṣe jina to si imuṣẹ awọn erongba rẹ fun ọdun yi, Ọlọrun si tun le ṣe ohun gbogbo ti o ni i ṣe pẹlu rẹ ni aṣepe.

Bibeli sọ wipe, “Awa mọ wipe ninu ohun gbogbo Ọlọrun n ṣiṣẹ fun ire awọn ti o fẹran rẹ, ani fun awọn ẹni ti a pe gẹgẹ bi ipinnu rẹ.” (Róòmù 8:28) Eyi tunmọ si pe bi ohun gbogbo ti o n ṣẹlẹ ni ayika rẹ tilẹ n ṣiṣẹ lodi si ilọsiwaju, ibalẹ-ọkan ati ohun rere yowu ti o ni lọkan lati ni, nṣe ni Ọlọrun n ṣiṣẹ fun ire rẹ lati ṣe ohun gbogbo ti o ni i ṣe pẹlu rẹ ni aṣepe. Ta wa ni o le da Ọlọrun duro ti O ba n ṣiṣẹ? Ko si ẹni na ti o le da a duro ayafi iwọ nikan.

Wo o, ko si agbara naa laarin gbogbo nkan ti a da ti o to bẹẹ lati da Ọlọrun duro lati ṣe ọ ni rere tabi lati ṣe ohun gbogbo ti o ni i ṣe pẹlu aye rẹ ni aṣepe. Amọ iwọ le da a duro. Lọna wo? Akọkọ, o le e da a duro nipaṣẹ aigbagbọ. Awọn ọmọ Isiraẹli ti Mose ko jade lati Ijibiti da Ọlọrun duro lati fun wọn ni Ilẹ-Ileri nipasẹ aigbagbọ wọn. Ko ki i ṣe eṣu ni o da a duro lati fun wọn ni ilẹ ti o n ṣan fun wara ati fun oyin yi. Awọn ni wọn da a duro lati fi fun wọn. Nibakana, ti awa naa ko ba ma a fi gbogbo igba fi igbagbọ wa ninu Ọlọrun han nipa ṣiṣiṣẹ lori ọrọ rẹ, a le da a duro, di i lọwọ tabi fa ifasẹyin fun lori ṣiṣe ohun gbogbo ti o ni i ṣe pẹlu wa ni aṣepe.

Ekeji, o le di iṣẹ Ọlọrun lati ṣe ohun gbogbo ti o ni i ṣe pẹlu aye rẹ ni aṣepe nipasẹ aimoore. Jesu, ni igba kan, wo awọn adẹtẹ mẹwa kan ṣan kuro ninu ẹtẹ wọn. Ṣugbọn ọkan ṣoṣo ninu wọn, eyi ti o si jẹ ara Samaria, ni o pada wa lati dupẹ lọwọ rẹ. Ẹnikan ṣoṣo yi naa ti o pada wa lati dupẹ lọwọ rẹ si wa ni o tun gba ọrọ ibukun fun isọdipipe ati aṣepe lati ẹnu rẹ. Awọn yoku ko ri i gba. (Wo: Lúùkù 17:11-19)

O wa ṣeni laanu pe, ọpọ ninu aye loni ni Ọlọrun ko ti ṣe ọrọ aye wọn ni aṣepe nitoripe awọn naa, gẹgẹ bi awọn adẹtẹ mẹsan ni i, ya alaimore. Kiki igba ti wọn ba nilo nkan lọwọ Ọlọrun ni wọn a ma sọkun, yira nilẹ ati lọ si ọdọ awọn adari ijọ wọn lore-koore fun amọran ati adura. Amọ ti wọn ba ti bẹrẹ si ni ni iriri didara rẹ ninu aye wọn, nṣe ni wọn yoo ma da jẹ igbadun rẹ. Wọn ko ni dupẹ lọwọ Ọlọrun lọna ti o peye tabi mọ riri awọn ti O lo fun wọn. Ba wo wa ni wọn ṣe fẹ ni iriri aṣepe iṣẹ rẹ ninu aye wọn?

Siwaju si, a tun ri awọn ti o n di iṣẹ Ọlọrun ninu aye wọn lọwọ tabi ti o n da a duro nipasẹ ẹṣẹ. Jesu, ni asiko kan, sọ fun ọkunrin kan ti O wo san pe ki o maṣe dẹṣẹ mọ. Ki ni idi? Idi naa ni ki nkan ti o buru ju eyi ti o ṣẹlẹ si tẹlẹ ma ba a tun ṣẹlẹ si i. Eyi jasi pe bi o tilẹ jẹ wipe Ọlọrun, nipasẹ iwosan ti ọkunrin yi ṣẹṣẹ rigba lọwọ Jesu, ti bẹrẹ iṣẹ imupadabọsipo ninu aye rẹ, ti ko ba dẹkun lati ma a dẹsẹ, iṣẹ ti Ọlọrun n ṣe ninu aye rẹ ko ni jẹ aṣepe. Dipo eyi, nṣe ni iṣẹ naa yo dawọduro. Tani o wa mọ nkan ti eyi yoo jasi fun un? (Wo: Johanu 5:14)

Ni kukuru, mo fi awọn nkan wọnyi han ọ ki o ba a ye ọ pe awa nikan ni o le di Ọlọrun lọwọ lati ma ṣe ohun gbogbo ti o ni i ṣe pẹlu aye wa ni aṣepe. Niwọn igba ti eyi si ri bẹ ẹ, bi a ti ṣe n wọ awọn ọjọ ti o kẹyin ọdun yi, nṣe ni ki a ya ara wa ya ohunkohun ti o le di Ọlọrun lọwọ tabi da a duro lati ṣe gbogbo nkan ti o ni i ṣe pẹlu wa ni aṣepe. Bẹẹni, nṣe ni ki a ya ara wa ya aigbagbọ, aimoore ati oniruuru ẹṣẹ. Bi a si ṣe n ṣe eyi, oore-ọfẹ Ọlọun yoo ma a ṣan ninu aye wa lalai ni idiwọ fun aṣepe ohun gbogbo ti o ni i ṣe pẹlu wa. Amin.

A kú Oṣù Ọ̀pẹ 2024 o.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu Belu 2024. Mo si gbadura pe ki Ọlọrun ma fi ojoojumọ fun ọ ni okun lati jẹ olotitọ si ninu ọsẹ naa ati ni gbogbo iyoku ọdun aye rẹ. Amin.

Jesu Oluwa wa sọ wipe, “Ṣugbọn ẹni ti o ba foriti i titi de opin, oun naa ni a o gbala.” (Mátíù 24:13) Ki ni eyi tunmọ si? Lakọkọ, o tunmọ si pe irin igbagbọ wa pẹlu Ọlọrun gbọdọ jẹ lati ibẹrẹ de opin. Lafikun, o tun tunmọ si pe iṣẹ-isin wa fun Ọlọrun gbọdọ jẹ lati ibẹrẹ de opin. Aijẹbẹ, a ko ni le jẹ alabapin ogo ayeraye rẹ. Siwaju si, ko ni si ere kankan fun wa lati ọdọ Ọlọrun fun iṣẹ yowu ti O ba fun wa ti a ko ṣe ni aṣetan.

Ki ni idi ti Ọlọrun fun mu Enọku wọ inu ogo rẹ lọ, ti ko si jẹ ki o tọ iku wo? Idi ni pe o ṣe deede ninu irin igbagbọ rẹ pẹlu rẹ lati ibẹrẹ de opin. Ọkunrin yi ko bẹrẹ si ni ba Ọlọrun rin titi o fi pe ẹni arun-din-laadọrin ọdun. Ṣugbọn lẹyin igba ti o ti bẹrẹ si ni ba a rin, ko tun fi igba kankan dẹkun lati ma a ba a rin, bẹ ẹ si ni ko lalai yipada si ọtun tabi si osi. Nṣe ni o kan tẹsiwaju lati ma a fi otitọ ba a rin fun ọdunrun ọdun, titi a fi mu wọ inu ogo rẹ lọ. (Jẹ́nẹ́sísì 5:21-23)

Lafikun, ki ni idi ti Ọlọrun fi ri Nọa ati idile rẹ gbala kuro ninu ikun omi ti o pa gbogbo nkan alaaye run ni asiko wọn? Idi naa ni pe o ṣe olododo ni kikan ọkọ ti Ọlọrun ni ki o kan. Ko ṣiṣẹ lori kikan ọkan naa fun igba diẹ ki o si dawọ iṣẹ duro. Dipo bẹẹ, nṣe ni o fi ara rẹ jin lati kan ọkọ naa titi iṣẹ rẹ fi pari.

Njẹ o wa rọrun fun Nọa lati ṣe eyi? Rara o! Owo ara rẹ ni ọkunrin yi ma na lati kan ọkọ yi. Siwaju si, owo ara rẹ ni o ma tun na lati pese ounjẹ ti awọn idile rẹ ati gbogbo awọn ẹranko ati ẹyẹ ti yoo wa pẹlu rẹ ninu ọkọ naa yoo ma a jẹ fun gbogbo asiko ti wọn yoo fi wa ninu ọkọ yi. Sibẹsibẹ, o fi suuru ṣe nkan ti Ọlọrun ni ki o ṣe titi o fi pari rẹ. Ọlọrun naa si wa fi suuru duro de titi o fi pari ọka naa nitoripe O mọ wipe ọkan rẹ wa lori ki o pari iṣẹ naa. (Wo: Jẹ́nẹ́sísì 6; 1Pétérù 3:20)

Nitorina, a le reti pe ki Ọlọrun mu suuru fun ẹnikẹni ti o ba fi ara rẹ jin lati fi ododo ba a rin ati lati fi ododo ṣe iṣẹ rẹ lati ibẹrẹ de opin. Ẹni ti ko ba jẹ olotitọ ninu ifarajin rẹ si Ọlọrun ni O le ma mu suuru fun. Dipo eyi, nṣe ni yoo wa ẹlomiran ti yoo fi rọpo rẹ, bi O ti ṣe si Ọba Sọọlu.

Ni kukuru, nkan ti mo n sọ ni pe ẹni ti yoo pada wọ inu ogo Ọlọrun lẹyin aye yi ni ẹni naa ti o jẹ olotitọ ni biba a rin lati ibẹrẹ de opin, ko ki i ṣe ẹni ti o kọ ọ silẹ. Awọn eniyan le ni oniruuru idi lati kọ Oluwa silẹ. Fun apẹrẹ, Dẹma kọ ọ silẹ nitoripe o fẹ aye yi. Awọn miran si le kọ ọ silẹ nitoripe awọn oniwaasu kan ṣẹ wọn tabi nitoripe wọn woye wipe O lọra lati ṣe awọn nkankan fun wọn. Idi yowu ti wọn le ni lati kọ ọ silẹ, wọn ko ni wọ inu ogo rẹ. (Wo: 2Tímótì 4:10)

Lafikun, kiki awọn ti o ba n polongo ọrọ Ọlọrun lati ibẹrẹ de opin, ti wọn n gbadura lati ibẹrẹ de opin ati ti wọn n ṣe iṣẹ yowu ti O fun wọn lati ibẹrẹ de opin ni yoo gba ere lọwọ rẹ. Awọn ti o ba jẹ ki iṣẹ rẹ su wọn, ti wọn si pa a ti ko ni gba ere lọwọ rẹ. Wọn le lo irẹwẹsi, inunibini, ailowo-lọwọ tabi nkan miran gẹgẹ bi awawi lati ma pari iṣẹ ti O fun wọn. Ṣugbọn niwọn igba ti wọn ko ba ti pari iṣẹ ti a fun wọn, ki wọn ṣi pari rẹ daradara, ko ni si ere kankan fun wọn.

Nitorina, ti o ko ba fẹ ki gbogbo nkan ti o ti ṣe pẹlu Ọlọrun ati fun un ja si pabo, pinnu lọkan rẹ pe o ko ni pa irin igbagbọ rẹ tabi iṣẹ isin rẹ ninu ijọba rẹ ti fun idi kankan. Dipo eyi, nṣe ni iwọ yoo ma a ba a rin, ti o o si ma sin-in pẹlu otitọ titi de opin. Njẹ ki o ma fi ojoojumọ gba okun lati ṣe bẹ ẹ gẹgẹ, ni orukọ Jesu. Amin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu ọsẹ miran ninu oṣu Belu 2024. Mo si gbadura pe ki Ọlọrun ya aye rẹ ya ohunkohun ti o le ma fi idibajẹ sinu rẹ, ki Satani ma ba a le ri ọ lo lati fi idibajẹ sinu ijọ Ọlọrun ni ọna kankan. Amin.

Lara awọn nkan ti awọn apọsiteli igbaani sọ fun wa pe ki a kiyesi ninu ijọ ni awọn ọjọ ikẹyin yi ni awọn ayọkẹlẹ bale-ọla-jẹ. Awọn wo wa ni ayọkẹlẹ bale-ọla-jẹ? Awọn kan ninu ijọ ma ni, awọn ti o jẹ wipe awọn nan n sọ pe ti Kirisiti ni awọn n ṣe, bi awa yoku, ṣugbọn ti o jẹ wipe nṣe ni wọn n yọkẹlẹ fi idibajẹ sinu aye awọn eniyan Ọlọrun lati sọ wọn di alaiwulo fun Ọlọrun ati lati fi aaye silẹ fun Satani lati ṣiṣẹ laarin wọn.

Wayi o, lara awọn nkan ti awọn eniyan wọnyi ma n lo lati yọkẹlẹ fi idibajẹ sinu ijọ ni ẹkọ-eke ati ẹtan. Wo nkan ti Peteru sọ lori eyi:

“Ṣugbọn awọn wolii eke wa laarin awọn eniyan naa pẹlu, gẹgẹ bi awọn olukọni eke yoo ti wa laarin yin. Wọn yoo yọ́lẹ̀ mu ẹkọ odi ati egbe tọ yin wa, ani ti yoo ṣẹ́ Oluwa ti o ra wọn pada, wọn o si mu iparun ti o yara kankan wa sori ara wọn. Ọpọlọpọ ni yoo si maa tẹle ọna itiju wọn, ti wọn yoo si mu ki ọna otitọ di isọrọ-odi-si. Ninu iwa wọbia wọn, awọn ẹlẹkọ-odi wọnyi yoo maa rẹ ẹ yin jẹ nipa itan asan. Idajọ ẹni ti ko falẹ lati igba yii wa ati iparun wọn ti ko si toogbe.” (2Pétérù 2:1-3)

Njẹ o woye pe awọn adari ijọ ni awọn ti Peteru n sọrọ nipa nibiyi? Nitorina, ti a ba n sọrọ nipa awọn ayọkẹlẹ bale-ọla-jẹ ninu ijọ, ko yọ awọn adari ijọ silẹ. Adari ijọ le ma a yọkẹlẹ fi idibajẹ sinu aye awọn ọmọ Ọlọrun nipa ẹkọ-eke, awọn ẹkọ ti o n gbe iwa-wọbia, iṣekuṣe ati iṣọtẹ larugẹ. Fun apẹrẹ, arabinrin kan ti fi igba kan ri sọ fun mi pe pasitọ oun sọ fun oun pe ara ojuṣe ẹmi oun ni ki o ma ṣe tọju rẹ pẹlu ibalopọ. Ki si ni pasitọ yii lo lati gbe isọkuṣọ yi lẹsẹ? Iwe mimọ!

Oniwaasu tun le fi idibajẹ sinu aye awọn ọmọ Ọlọrun nipasẹ ala arosọ, iran arosọ, isọtẹlẹ arosọ ati itan arosọ, lati gbin ikoro sinu ọkan wọn lodi si awọn miran, pẹlupẹlu awọn ẹbi wọn. Awọn eniyan si wa loni ti wọn ti kẹyin si awọn ọkọ wọn, aya wọn, obi wọn tabi ọmọ wọn nitoripe awọn oniwaasu kan parọ fun wọn. Ti a ko ba si wa tipasẹ ọrọ Ọlọrun ati agbara Ẹmi Ọlọrun fọ awọn wọnyi mọ, o ṣeeṣe ki ibajẹ ati aiwulo fun Ọlọrun ma fi wọn silẹ fun gbogbo eyi ti o ku lọjọ aye wọn.

Nkan miran ti awọn ayọkẹlẹ bale-ọla-jẹ tun ma n lo lati fi idibajẹ sinu ijọ ni iṣekuṣe. Juuda ni eyi lati sọ fun wa lori ọrọ yi: “Nitori awọn eniyan kan n bẹ ti wọn n yọ wọle, awọn alaiwa-bi-Ọlọrun, ti n yi oore-ọfẹ Ọlọrun wa pada si wọbia, ti wọn si n ṣẹ́ Oluwa wa kanṣoṣo naa, ani Jesu Kirisiti Oluwa.” (Júúdà 4) Njẹ o ri bayẹn? Bi o tilẹ jẹ wipe awọn ayọkẹlẹ bale-ọla-jẹ n pe ara wọn ni Kirisitiẹni, wọn ko jamọ nkankan ju alaiwa-bi-Ọlọrun lọ.

Wayi o, nitoripe awọn eniyan yi ko ni ibẹru Ọlọrun ninu wọn, gbogbo igba ni wọn ma n lo oniruuru arekereke lati tan awọn eniyan Ọlọrun wọnu iṣekuṣe tabi iṣẹ-oṣo. Ibikibi ti iṣedari ijọ kan ko ba si ti wa ni ifura tabi ti igboke-gbodo ko jẹ ki awọn adari ijọ naa gbájúmọ́ ojuṣe wọn, o ṣeeṣe ki aye ati ile ọpọ ti bajẹ tan ki wọn to mọ nkan ti o n ṣẹlẹ.

Siwaju si, awọn ayọkẹlẹ bale-ọla-jẹ ma tun n ṣaba yọkẹlẹ lo ọrọ-ẹyin lati pin awọn eniyan Ọlọrun niya ati lati fi idibajẹ ṣaarin wọn. A ri awọn ijọ loni ti wọn ti n rọju fun ọpọ ọdun lati kuro ni ipo arobo ninu ẹmi, ki wọn si pọ si ni iwulo lọwọ Ọlọrun, ti ko si ti i ṣeeṣe fun wọn. Ki ni idi? Awọn ayọkẹlẹ bale-ọla-jẹ ni ko ma jẹ ki wọn ni isinmi. Gbogbo igba ni wọn n ba ara wọn ja, ti wọn si tun n pari ija laarin ara wọn. Nitorina, wọn ko le gbajumọ igbero ara wọn pẹlu ọrọ Ọlọrun ati idagbasoke wọn ninu oore-ọfẹ Jesu Kirisiti.

Wayi o, ọrọ Ọlọrun ti sọ fun wa ṣiwaju pe idajọ kan ṣoṣo pere lo wa lọwọ Ọlọrun fun awọn ayọkẹlẹ bale-ọla-jẹ. Eyi si ni iparun kiakia. Ranti Kora, Datani, Abiramu ati Oni, awọn ti wọn fẹ fi idibajẹ saarin awọn ọmọ Isiraẹli nipasẹ iṣọte. Nṣe ni a pa ati awọn ati awọn ẹbi wọn run ni kiakia. Tun ranti Ananaya ati Safira, awọn ẹni ti wọn fẹ fi idibajẹ sinu ijọ iṣaaju nipasẹ ififunni pẹlu arekereke. Ni kiakia ni Ọlọrun pa wọn danu. (Wo: Númérì 16; Ìṣe Àpọ́sítélì 5:1-11)

Nitorina, ma ya ayọkẹlẹ bale-ọla-jẹ ninu ijọ Ọlọrun. O ko ni lọ jina rara ti idajọ yoo fi wa sori rẹ. Lafikun, ma ṣe ni nkankan ṣe pẹlu ẹnikẹni ti o ba jẹ ayọkẹlẹ bale-ọla-jẹ ninu ijọ, laarin ẹbi rẹ, ni adugbo rẹ tabi ni ibi-iṣẹ rẹ. Aijẹbẹ, o le pada jẹ alabapin ninu idajọ wọn. Njẹ ki Ẹmi Ọlọrun ṣe ọ ni alailabuku titi ipadabọ Jesu Kirisiti Oluwa wa. Amin.

Kí o ní ọ̀sẹ̀ alárinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lọpọ-yanturu lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Belu 2024. Adura mi ni pe ki Ọlọrun ma fi ojoojumọ fun ọ ni okun lati ma a tẹle tọkan-tọkan, ki iwọ naa ba a le ma a fi ojoojumọ ni iriri agbara rẹ fun ibalẹ-ọkan ati igbesoke rẹ. Amin.

Lara awọn itan inu bibeli ti o bani-ninujẹ julọ ni itan arakunrin kan ti a n pe ni Gehasi. Tani Gehasi? O jẹ iranṣẹ Wolii Eliṣa, eniyan Ọlọrun nla ni. Ki wa ni o bani-ninujẹ lori itan rẹ? Oun naa ni pe o pari ere-ije rẹ gẹgẹ bi adẹtẹ, bi o tilẹ jẹ wipe oun ni ko ba gba iṣẹ lọwọ Eliṣa gẹgẹ bi i wolii agba ni Isiraẹli.

Bawo wa ni ọkunrin yi ṣe pada di adẹtẹ? Idi kan gbogi ti o fi di adẹtẹ naa ni pe ko fi tọkan-tọkan tẹle eniyan Ọlọrun. Bawo ni a ṣe mọ eyi? Akọkọ, asiko kan wa ti eniyan Ọlọrun yi fun ni ọpa rẹ, ti o si paṣẹ fun pe ki o sare tete lọ fi ọpa yi le ọmọdekunrin kan ti o ku lori, ki ọmọdekunrin naa ba a le pada ji saye. Ara aṣẹ ti a si pa fun tun ni pe ko gbọdọ ki ẹnikẹni loju ọna tabi da ẹnikẹni ti o ba ki i lohun. (Wo: 2Àwọn Ọba 4:29)

Amọ ṣa o, bi a tun ṣe ri ninu akọsilẹ lori rẹ, nṣe ni Gehasi pada de lọjọ yi, ti o si sọ fun eniyan Ọlọrun pe ọmọdekunrin naa ko ji pada saye. Ki lo fa a? Ki lo ṣẹlẹ? A ko sọ fun wa. Ṣugbọn akọsilẹ kan soso ti a ri ninu bibeli ni eyi ninu eyi ti eniyan Ọlọrun yoo ti sọ fun ẹnikan lati lọ ṣe nkan pẹlu agbara Ọlọrun, ti ẹni naa yoo si pada wa lati sọ wipe, “Ko ṣiṣẹ.”

Bi a ti ṣe ri ninu Iwe mimọ, lẹyin igba ti a ti gba Elija soke ọrun, Eliṣa mu agbada rẹ, o si pin odo Jọdani niya pẹlu rẹ, gẹgẹ bi Elija ti ṣe ṣiwaju igbasoke rẹ. Bi o wa tilẹ jẹ wipe Elija ko kọ lati ṣe bẹ ẹ, nipa titẹle tọkan-tọkan, oun naa le gba Ẹmi Ọlọrun kannaa ti o ba Elija ṣiṣẹ lati le ṣe nkan ti o ṣe. (Wo: 2Àwọn Ọba 2)

Siwaju si, a tun ri ninu bibeli pe nigbati Jesu paṣẹ fun awọn ọmọ ẹyin rẹ lati jade lọ ọ waasu ati lati wo oniruuru aisan ati arun san, wọn gbọran si lẹnu. Bi ko tilẹ wa fun wọn ni ọpa tabi owo kankan lati mu lọwọ, gbogbo wọn ni wọn pada pẹlu ẹri ti o ga. Gbogbo wọn ni o le ṣe nkan ti Jesu ti n ṣe. (Wo: Luùkù 10:1-17)

Amọ ọrọ ti Gehasi ma yatọ patapata. Nṣe ni oun pada wa pẹlu iroyin buburu. Nitorina, eniyan Ọlọrun ni lati lọ gbadura fun ọmọdekunrin ti o ku naa funrarẹ, ki o ba a le ye. Mo si tun wa n bere lẹẹkan si, bi mo ti ṣe bere tẹlẹ, “Ki lo ṣele gan-an? Ṣe Gehasi ba ẹnikan sọrọ loju ọna si ọdọ ọmọdekunrin ti o ku yẹn ni? Tabi ṣe o kọkọ ya ibomiran naa ni? Tabi ṣe ko kan tilẹ gbagbọ pe ọmọdekurin naa yoo ye ni?” A ko fun wa ni idahun si awọn ibere wọnyi ninu bibeli. Bẹẹ si ni a ko fi otitọ ti o wa nidi ọrọ naa han eniyan Ọlọrun naa pẹlu ni asiko yi.

Amọ ṣa o, a wa ri asiko kan ti a fi han Eliṣa pe Gehasi ko ma a tẹle tọkan-tọkan. Asiko yi si ni o gbẹyin Eliṣa lọ lati gba owo ati aṣọ diẹ lọwọ Naamani ara Siria. Naamani ni Ọlọrun ti wosan kuro ninu ẹtẹ rẹ. Eliṣa ko si gba ohunkohun lọwọ rẹ nitoripe o fẹ ki o lọ si ile, ki o s jẹ ki awọn eniyan rẹ mọ wipe Ọlọrun kan wa ti O n wo eniyan san lọfẹ. Ṣugbọn Gehasi gbẹ̀bùrú ba ẹri rẹ jẹ nipa gbigba nkan lọwọ rẹ. (Wo: 2Àwọn Ọba 5)

Nitorina, kedere bayi ni o han si eniyan Ọlọrun pe Gehasi ko ma a fi tọkan-tọkan tẹle tabi kọ ẹkọ kankan lara rẹ. Niwọn igba ti ko si tẹle eniyan Ọlọrun yi tọkan-tọkan, a jẹ wipe ko tẹle Ọlọrun tọkan-tọkan naa niyẹn. Eliṣa, bi a ti ṣe mọ ninu bibeli, jẹ eniyan Ọlọrun tootọ. Ki a wa sọ wipe Gehasi n tẹle tọkan-tọkan ni, nṣe ni oun naa ko ba mọ Ọlọrun lotitọ nipasẹ rẹ. Eyi ko ba si jẹ ki o pọ si ni iwulo ninu iṣẹ iranṣẹ. Amọ ọkan rẹ ko mọ. Nitorina, o padanu aaye rẹ ninu ete Ọlọrun, o si tun fa ẹtẹ Naamani si ori ara rẹ ati sori awọn arọmọdọmọ rẹ titi lailai.

Njẹ ki ni eyi n kọ wa? Oun naa ni pe ki a ma a tẹle Ọlọrun tọkan-tọkan. Ọna kan la si ti ṣe bẹ ẹ ni ki a ma a tẹle awọn ti O yan lati dari wa ninu ijọ, ti wọn si n ri ninu ifẹ rẹ lọna ti o han kedere, tọkan-tọkan. Ti awọn adari wa ninu ijọ ko ba n rin ninu ifẹ Ọlọrun, a ko nilo lati tẹle wọn rara. Dipo bẹ ẹ, nṣe ni ki a jina si wọn.

Ṣugbọn ti wọn ba n rin ninu ifẹ rẹ, nṣe ni a ki ma a tẹle wọn tọkan-tọkan. Eyi tunmọ si pe a ko gbọdọ lo oju-aye tabi ẹtan ni titẹle wọn. Dipo eyi, nṣe ni ki a ma a fi gbogbo igba mu ẹkọ wọn, aṣẹ wọn ati adura wọn ni ọkunkundun, ki a si tun ma a ṣiṣẹ le wọn lori. Aijẹbẹ, dipo ti a o fi ma a pada wa sọdọ wọn ni gbogbo igba pẹlu ẹri ti o ga, nṣe ni a o ma fi ọpọ igba mu iroyin ikuna wa tọ wọn wa, gẹgẹ bi Gehasi. Yatọ si iyẹn, a tun le padanu ààyè wa ninu ete Ọlọrun fun wa tabi ki a mu ara wa wa si abẹ idajọ rẹ.

Mo wa gbadura pe o ko ni padanu ààyè rẹ ninu ijọba Ọlọrun tabi di piparun labẹ idajọ rẹ. Ṣugbọn fi ara rẹ jin fun titẹle tọkan-tọkan. Yoo si dara fun ọkan rẹ.

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lọpọ yanturu lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu osu Belu, iyẹn oṣu kọkanla ọdun yi. Adura mi si ni pe ki Ọlọrun kun aye rẹ ninu oṣu naa pẹlu oniruuru ohun rere gbogbo ti yoo jẹ ki o gbagbe inira tabi adanu yowu ti o le ti ni iriri rẹ ninu ọdun yi, ni orukọ Jesu. Amin.

Wayi o, bi a ti ṣe n bẹrẹ oṣu tuntun naa, mo fẹ gba ọ niyanju lati fi ara rẹ jin siwaju ati siwaju si lati maa ni rin ninu ododo. Ki ni idi? Akọkọ, idi ni pe Ọlọrun ma n tẹ awọn ti o ba n rin ninu ododo lọrun pẹlu ohunkohun ti wọn ba nilo laye, bi o ti wu ki nkan le to nibi ti wọn wọn wa. Jesu sọ wipe, “Alabukun fun ni awọn ti ebi n pa, ti oungbẹ si n gbẹ fun ododo, nitoripe a o tẹ wọn lọrun.” O tun sọ wipe, “Ẹ kọkọ maa wa ijọba Ọlọrun naa, ati ododo rẹ; gbogbo awọn nnkan wọnyi ni a o si fi kun fun yin.” (Wo: Mátíù 5:6 & 6:33)

Nitorinaa, ti o ba fi ara rẹ jin fun ododo, Ọlọrun yoo ri daju pe o ko ṣe alaini ohunkohun ti o dara, bi o ti wu ki nkan buru to nibi ti o ba wa. Lotitọ, iwọ naa gbọdọ kọ bi a ti n tẹwọgba ipese Ọlọrun nipasẹ adura, ijẹwọ ọrọ Ọlọrun ati iṣẹ-afọkanṣe. Amọ o le fọkanbalẹ lori pe Ọlọrun ko ni fi ohunkohun ti o nilo dun ọ, ti o ba fi ara rẹ jin lati ma rin ninu ododo.

Idi keji ti o ṣe yẹ ki o fi ara rẹ jin lati ma rin ninu ododo ni pe Ọlọrun yoo pa ọ mọ bi o ba ti n ṣe bẹ ẹ. Ọkan lara awọn idi ti awọn eniyan ko ki i fẹ fi ara wọn jin fun igbe aye ododo ni ibẹru inunibini. Bi a si ti ṣe ri ninu bibeli, ẹnikẹni ti o ba fẹ gbe igbe aye iwa-bi-Ọlọrun ninu Kirisiti Jesu yoo ba inunibini pade (2Tímótì 3:12). Amọ ṣa o, bibeli tun fi han wa pe aabo wa fun gbogbo awọn ọmọ Ọlọrun ti o ba fi ara wọn jin fun rinrin ninu ododo kuro lọwọ inunibini. Wọn kan nilo lati kan si Ọlọrun fun un ni.
Fun apẹrẹ, nitori ifarajin Daniẹli fun ododo ni mimojuto iṣẹ rẹ, iyẹn gẹgẹ bi adari ijọba, awọn akẹgbẹ rẹ, ọpọ awọn ẹni ti o jẹ oṣo, ṣe inunibini rẹ gidigan-an. Nigba ti wọn si ri wipe awọn ko le sasi tabi ri aleebu ninu itayọ iṣẹ-iriju rẹ, wọn dẹ pakute fun un. Nitorina, a sọ ọ ninu iho awọn kiniun. (Wo: Dáníẹ́lì 6:1-18)

Njẹ Ọlọrun wa pa a ti bi? Rara o! Dipo bẹ ẹ, nṣe ni O ran angẹli kan lati pa awọn kiniun ti o wa pẹlu rẹ lẹnu mọ. Nitorina, wọn ko le e pa a lara. Nigbẹyingbẹyin, awọn ti o ditẹ mọ ọn, ati awọn aya ati awọn ọmọ wọn, ni o pada di jijẹ fun awọn kininu ti ebi n pa yi i. (Wo: Dáníẹ́lì 6:19-24)

Wayi o, eyi wa ni ibamu pẹlu ọrọ Ọlọrun ti o sọ wipe:

“Nitori yoo fi aṣẹ fun awọn angẹli nipa tirẹ lati pa ọ mọ ni gbogbo ọna rẹ; Wọn yoo gbe ọ soke ni ọwọ wọn, nitori ki iwọ ma ba a fi ẹṣẹ rẹ gun okuta. Iwọ yoo rin lori kinniun ati paramọlẹ, iwọ yoo tẹ kinniun nla ati ejo ni iwọ yoo fi ẹsẹ tẹ mọlẹ. “Nitori ti ifẹ rẹ si mi, Emi yoo gba ọ, emi yoo pa ọ mọ, nitori iwọ jẹwọ orukọ mi.”” (Sáàmù 91:11-14)

Nitorina, ma lailai tun bẹru pe a o ṣe inunibini rẹ mọ nitoripe o n ṣe nkan ti o dara ati ti o tọ niwaju Ọlọrun. Idi si ni pe iwọ yoo ri aabo rẹ gba. Eyi yoo si yọri si igbega rẹ ati si idojuti fun awọn ọta rẹ, gẹgẹ bi o ti ri fun Daniẹli.

Ki o ni oṣu Belu 2024 alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu oṣu ti o so oṣu Ọ̀wàrà ati oṣu Belu 2024 pọ mọ ara wọn. Adura mi si ni pe ki Ọlọrun tu ọ ninu nibikbi ti ara ti le ma ni ọ, bi o ti ṣe n lọ lọsẹ yi ati ni gbogbo eyi ti o ku ninu ọdun yi, ki O si tun kun ọkan rẹ pẹlu ayọ akunwọsilẹ. Amin.

Ọrọ iyanju mi si ọ, bi a ti ṣe n bẹrẹ ọsẹ yi, ni a mu lati ara awọn nkan diẹ ti Ọlọrun tipasẹ Wolii Aisaya ba wa sọ, eyi ti o si ka bayi:

“Emi ni, ani emi ni ẹni ti n tu yin ninu: ta ni iwọ ti iwọ o fi bẹru eniyan ti yoo ku, ati ọmọ eniyan ti a ṣe bi koriko. Ti iwọ si gbagbe Oluwa Ẹlẹdaa rẹ ti o ti na awọn ọrun, ti o si ti fi ipilẹ aye sọlẹ; ti iwọ si ti n bẹru nigba gbogbo lojoojumọ nitori irunu aninilara ni, bi ẹni pe o ti mura lati panirun? Nibo ni irunu aninilara ha gbe wa? Onde ti a ti ṣi nipo yara ki a baa le tu u silẹ, ati ki o ma baa ku sinu iho, tabi ki ounjẹ rẹ ma baa tan.” (Àìsáyà 51:12-14)

Ki ni nkan akọkọ ti Ọlọrun kede si wa nibiyi? Oun naa ni pe Oun ni olutunu wa. Eyi jasi pe ti ko ba ṣe pe O ba tu wa ninu, ẹnikẹni ko le tu wa ninu. Eyi si ni alaye fun bi ọpọ ni orilẹ-ede wa loni, pẹlu awọn Kiristiẹni naa, ṣe n sorikọ, ti ọkan wọn si n poruru. Eyi ti wọn yoo fi ma a wo Ọlọrun fun itunu, nṣe ni wọn n wo awọn eniyan kan tabi ijọba fun itunu. Niwọn igba ti wọn ba si n ṣe eyi, wọn ko ni lailai ni iriri itunu otitọ lori gbogbo awọn nkan ti o n lepa lati dojuti wọn tabi lati pa wọn run.

Nkan ẹkeji ti Ọlọrun sọ fun wa nipasẹ Aisaya, bi a ti ṣe ri ninu awọn ẹsẹ yẹn, ni pe aṣiṣe ni lati fi ààyè gba ibẹru eniyan lati jẹ ki a gbagbe pe Oun ni Ọlọrun ati Ẹlẹdaa wa. Lotitọ, a le ni oniruuru awọn eniyan ni ayika wa ti wọn ti mura tan lati pọn wa loju tabi pa wa run. Ijọba ilẹ wa gan le ma ni nkan miran ti o n ṣe ju ki o ma pa wa lara ati ki o ma mu aye le fun wa lọ.

Sibẹsibẹ, a ko gbọdọ gbagbe pe ijọba wa ko ki i ṣe ẹlẹdaa wa, bẹẹ si ni awọn ọdaran ti o wa ni ilẹ wa naa ko ki i ṣe ẹlẹdaa wa. Ọlọrun ni Ẹlẹdaa wa. Nitorina, a ko gbọdọ fi aye gba ohunkohun ti ijọba wa tabi ti awọn ọdaran ti o wa ni awujọ wa le e ma a ṣe lati jẹ ki a ma fi igba gbogbo gbe ninu ibẹru ati ifoya. Idi si ni pe Ọlọrun Ẹlẹdaa wa yoo tu wa lara lotitọ, yoo si tun yi ohun gbogbo ti a n ṣe lodi si wa pada si rere fun wa.

Iwọ naa tun wo nkan ti Ọlọrun sọ fun wa lati ipasẹ Aisaya lẹẹkan si. O sọ wipe bi o tilẹ jẹ wipe awọn aninilara ti mura tan lati pa wa run, Oun yoo sọ ete-ibi wọn si wa di asan. Nitorina, bi a tilẹ n duro lati ri nkan ti ete wọn lati pọn wa loju yoo ja mọ, a ko ni ri nkankan.

Lafikun, Ọlọrun sọ wipe Oun ti n ran irawọ si awọn ti ọrọ orilẹ-ede yi ti fi sinu atimọle, ti wọn ko si le tọju ara wọn ati ẹbi wọn bi o ti ṣe yẹ. O sọ wipe wọn ko ni ku sinu ipo ti wọn wa yi. Idi si nipe Oun yoo gba wọn, O yoo si tun tẹ ebi ti o n pa wọn lọrun.

Njẹ o wa gba awọn nkan wọnyi gbọ bi? Ṣe o gbagbọ pe Ọlọrun yoo tu gbogbo wa ni orilẹ-ede yi ti ara n ni, ti a si n woju rẹ fun iranlọwọ ninu lotitọ? Ṣe o gbagbọ pe, gẹgẹ bi Ẹlẹdaa wa, O ni agbara lati fooro gbogbo awọn ti o n pọ wọn loju ati ti o n ṣiṣẹ lati fi wa sinu tubu iṣẹ ati idojuti titi lailai?

Ti o ba gba awọn nkan wọnyi gbọ, nṣe ni ki o ya fi opin si gbogbo ibẹru rẹ. Bẹẹni, fi opin si ibẹru pe iwọ ati ile rẹ yoo ku sinu ebi tabi pe o ko ni i le fun awọn ọmọ rẹ ni ẹkọ ti o ye kooro tabi pe nṣe ni iwọ yoo ku gẹgẹ bi ayalegbe tabi pe o ko ni lailai tẹgbẹ laye. Idi si ni pe Ọlọrun Ẹlẹdaa rẹ yoo tu ọ ninu lọna ti o peye. Eyi yoo si jẹ ki o gbagbe gbogbo awọn ọjọ inira ati ibanujẹ rẹ. Bẹẹ si ni yoo ri, ni orukọ Jesu. Amin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lai-lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ miran ninu oṣu Ọ̀wàrà 2024. Adura mi si ni pe ki Ọlọrun ya aye rẹ ya ohunkohun ti o ba n di ọ lọwọ lati so eso lọpọlọpọ pẹlu ọrọ Ọlọrun, ni orukọ Jesu. Amin.

Bi a ti ṣe ri ninu Iwe mimọ, ko to lati kan gbọ ọrọ Ọlọrun; o tun ṣe pataki ki a tun so eso nkan ti ọrọ ti a gbo n sọrọ nipa. Aijẹbẹ, gbogbo nkan ti a n gbọ yoo kan ṣofo danu lasan ni. Ọna kan pataki lati so eso nkan ti ọrọ ti a n gbọ n sọrọ nipa ni ki a gbe igbesẹ lori nkan ti ọrọ naa sọ. Sibẹsibẹ, ọpọ awọn ẹni ti o n gbọ ọrọ Ọlọrun ni ko ki i ṣiṣẹ le lori. Bibeli tilẹ sọrọ nipa awọn kan ti wọn ma n fi igba gbogbo kẹkọ ṣugbọn ti wọn ko si pàpà ni imọ otitọ. Ki ni idi ti eyi ṣe ri bẹ? Ki ni idi ti ẹnikan yoo fi ma fi igba gbogbo wa fun ipade ijọ, ti ko si tun ni ni imọ otitọ nkan ti Ọlọrun n ba a sọ, ka ma tilẹ ti sọ wipe ki o ṣiṣe le nkan ti a n ba a sọ? (2Tímótì 3:7)

Ki a ma deena pa ẹnu, gẹgẹ bi Oluwa ti fi han nipasẹ ọkan lara awọn owe rẹ, ọkan lara idi ti eyi fi ri bẹẹ ni pe awọn eniyan ma n jẹ ki ẹ̀gún fun nkan ti wọn n gbọ pa. Ki wa si ni awọn ẹgun ti Oluwa n sọrọ nipa? Nkan ti O sọ nipa wọn ni eyi: “Awọn wọnyi ni awọn ti a fun saarin ẹ̀gún: awọn ti o gbọ ọrọ naa. Aniyan aye, ati itanjẹ ọrọ, ati ifẹkufẹẹ ohun miiran si bọ sinu wọn, wọn fun ọrọ naa pa, bẹẹ ni o si jẹ alai-leso.” (Máàkù 4:18-19)

Njẹ o ri bayẹn? Lara awọn ẹgun ti o ma n fun ọrọ Ọlọrun pa ninu aye awọn eniyan aniyan. Eyi jasi pe, nigba ti awọn eniyan ba fi ara wọn jin lati ma ṣaniyan lori awọn iṣoro wọn, dipo ti wọn yoo fi maa ṣe aṣaro lori nkan ti Ọlọrun n ba wọn sọ, o di dandan ki awọn aniyan wọn wọnyi fun ọrọ ti wọn ti gba pa ti o ba to asiko kan. Nitorina, ọrọ naa ko ni ṣiṣẹ ninu aye wọn. O si wa ṣeni laanu pe, a ri ọpọ eniyan ti o n wa fun ipade ijọ, ti wọn si n fi gbogbo asiko wọn ṣe aniyan lori awọn iṣoro wọn dipo ti wọn yoo fi ma tẹtẹ si ọrọ Ọlọrun ti a n kọ wọn. Bawo wa ni irufẹ awọn wọnyi ṣe fẹ so eso rere pẹlu ọrọ Ọlọrun?

Ni afikun, Oluwa sọ fun wa pe itanjẹ ọrọ ati ilepa awọn eniyan naa tun wa lara awọn nkan ti o ma n fun ọrọ Ọlọrun pa ninu aye awọn eniyan. Eyi jasi pe nigba ti awọn eniyan ba ti fẹ fi tipa-tipa ni owo, ipo, iyi tabi igbadun, bi wọn tilẹ n gbọ ọrọ Ọlọrun, ọwọ wọn yoo ti kun debi pe wọn ko ni ri aye lati ṣe aṣaro lori ọrọ rẹ ati lati lo ninu aye wọn. Nitorina, ọrọ naa ko ni i le ṣiṣẹ ninu aye wọn, ki o si yi ati awọn ati igba wọn pada.

Idi niyi, bi mo ti ṣe sọ siwaju, ti a fi ri ọpọ eniyan ti o n wa si ipade ijọ lọsọọsẹ, ti aye wọn ko si yipada. Bẹẹni, idi niyi ti ọpọ fi n gbọ ọrọ Ọlọrun lọsọọsẹ ninu awọn ipade ijọ wọn, ti wọn si tun n gbe igbesẹ omugọ lori aye wọn, igbeyawo wọn, okowo wọn ati bẹẹ-bẹẹ lọ. Wọn ko jẹ ki ọrọ Ọlọrun ko ṣiṣẹ ninu aye wọn, ki o si sọ wọn da ẹni ti Ọlọrun fẹ ki wọn da. Dipo eyi, nṣe ni wọn n fun ọrọ naa pa nipasẹ awọn ibaṣepọ aimọ, ilepa ọrọ, ipo ati iyi ati itara fun aye-jijẹ.

Ṣe ki a wa pa gbogbo awọn ibaṣepọ wa ti sẹgbẹ kan nitoripe a fẹ wa pẹlu Jesu bi? Rara o! Ọrọ Ọlọrun ko pa a lasẹ fun wa pe ki a ṣe bẹ ẹ. Amọ ṣa o, o pa a laṣẹ fun wa lati ya gbogbo awọn ibaṣepọ wa si mimọ. Eyi jasi pe, o fẹ ki a ṣe amojuto awọn ibaṣepọ wa lọna ti o fi ogo fun Ọlọrun. Ibaṣepọ pẹlu ẹnikẹni, wayi, ti ko ba ti fi ogo fun Ọlọrun gbọdọ jẹ kikọ-silẹ fun wa. Aijẹbẹ, ibaṣepọ naa ko ni dẹkun lati ma fun ọrọ Ọlọrun pa ninu aye wa.

Lafikun, ṣe ko wa tọna fun wa ni lati ni ọrọ, lati wa ni ipo giga tabi lati jẹ gbajumọ? Rara o, eyi ko buru o. Amọ ti a ba fi aye gba ọkankan ninu awọn nkan wọnyi lati jẹ akọkọ ninu aye wa, ko si bi ọrọ Ọlọrun yoo ti le so eso ninu aye wa bi o ti tọ. Bawo wa ni ti faaji? Ṣe Ọlọrun ko fẹ ki jẹgbadun ara wa ni? O kuku fẹ ki a jẹgbadun ara wa. Amọ ti a ba wa sọ ohun gbogbo nipa aye yi di ọrọ faaji, ki a si bẹrẹ si ni ro wipe nkan yoo ṣe wa, ti a ko ba lọ si awọn ode kan, wo awọn sinima kan tabi jẹ awọn nkan adidun kan, ko si bi ọrọ Ọlọrun yoo ti ṣe so eso ninu aye wa bi o ti ọ — yoo ti di fifun pa.

Nitorina, ti isesorere rẹ pẹlu ọrọ Ọlọrun ti o n gbọ ba jẹ ọ logun rara, nṣe ni ki o ṣe idamọ ohunkohun ti o le ma fun ọrọ yi pa ninu ayẹ rẹ, ki o si mojuto lẹsẹkẹsẹ. Aijẹbẹ, bi o tilẹ n tẹti si ọrọ Ọlọrun titi Jesu yoo fi de, aye rẹ ko ni yipada lati da ohun ti Ọlọrun fẹ ki o da. Ṣe nkan ti o wa fẹ niyẹn bi? Mo gbadura pe ki o gba okun lati ọdọ Ẹmi Ọlọrun lati bẹrẹ si ni ṣe ohun ti o tọ lati iṣẹju yi lọ, ni orukọ Jesu. Amin.

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Mo ba ọ yọ ninu Oluwa bi a ti ṣe wọ inu ọsẹ miran ninu oṣu Ọ̀wàrà 2024. Adura mi ni pe ki a pa ẹsẹ rẹ mọ kuro ni ọna iparun ni ọsẹ yi ati ni gbogbo eyi ti o ku ninu ọdun yi, ni orukọ Jesu. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju pẹlu ọrọ Solomọni ti o sọ wipe: “Ma ṣe jẹ ọlọgbọn loju ara a rẹ, bẹru Oluwa ki o si korira ibi. Eyi yoo mu ilera fun ara a rẹ ati okun fun awọn egungun rẹ”(Ìwé Òwe 3:7-8) Ki ni aṣẹ ti a pa fun wa nibiyi? Oun naa ni pe ki a ma ṣe jẹ ọlọgbọn loju ara wa ninu ohunkohun ti o ni i ṣe pẹlu ibaṣepọ wa pẹlu Ọlọrun. Eyi jasi pe a ko gbọdọ lailai ro wipe a mọ ju Ọlọrun Ẹlẹda wa lọ. Idi si ni pe a ko mọ ju u lọ tabi mọ to o rara. Ti a ba si gba pe a ko ni imọ to Ọlọrun ninu ohunkohun, nṣe ni a o rẹ ara wa silẹ niwaju rẹ, ti a o si ma rin ninu ibẹru rẹ.

O wa ṣeni laanu pe Solomọni gan ti o sọ awọn ọrọ yi kuna lati pa wọn mọ lori ọrọ igbeyawo ti ara rẹ. Lọna wo? Ni kukuru, Ọlọrun, ninu ọgbọn rẹ, ti sọ fun awọn ọmọ Isiraẹli lati ma ba awọn eniyan orilẹ-ede ti o wa ni ayika wọn da nkan pọ niti igbeyawo. Ki ni idi? Ṣe nitoripe ko fẹran awọn eniyan wọnyi ni? Rara o! Ọlọrun fẹran awọn naa pẹlu. Amọ Oun kọ ni wọn n sin bikoṣe ere ati awọn ẹmi eṣu. Niwọn igba ti eyi si ri bẹ, ti awọn ọmọ Isiraẹli ba bẹrẹ si ni fẹ wọn, ti wọn si tun gbe wọn niyawo, ko ni i pẹ rara ti wọn yoo fi tan wọn wọ inu ibọriṣa. Nitorina, Ọlọrun kilọ fun wọn gidigidi lati ma fẹ wọn tabi gbe wọn niyawo. (Wo: Ẹ́kísódù 34:16; Ditarónímì 7:3-4)

Ṣugbọn Solomọni kọ ọrọ ọgbọn Ọlọrun yi silẹ patapata, o si tẹsiwaju lati fẹ oniruuru ajeji obinrin. Ki ni idi? O ni lati jẹ wipe o ṣe eyi nitoripe o woye pe oun gbọn to lati ṣakoso awọn obinrin wọnyi. Ranti wipe Ọlọrun fun ni ọgbọn ati oye ti ko lodiwọn, bi iyanrin eti okun. Eyi lo si jẹ ki o ro wipe oun ni yoo tọ awọn obinrin yi i lati ma sin Ọlọrun dipo ki awọn tọ ọ lati ma sin awọn oriṣa wọn.

Amọ ṣa o, Ọlọrun kannaa ti O fun ni ọgbọn ni O tun pasẹ fun oun ati awọn eniyan rẹ lati ma ṣe fẹ tabi gbe awọn ajeji niyawo. Ti o ba si wa jẹ wipe oun gan an gba ọrọ oun tikararẹ ti o sọ wipe, “Ma ṣe jẹ ọlọgbọn ni oju ara rẹ,” gbọ ni, ko ba ti mọ wipe ohunkohun ti o ba ni i ṣe pẹlu iyapa kuro ninu aṣẹ Ọlọrun ki i ṣe ifarahan ọgbọn rara. Dipo bẹ, o ni i ṣe pẹlu ki a ma ṣe bi ọlọgbọn loju ara wa. Eyi jasi pe a n gbe igbesẹ ni ibamu pẹlu ọgbọn ara wa. Nigba ti a ba si wa kọ ọgbọn Ọlọrun silẹ bi eyi lati tẹle ọgbọn ara wa, a o pada ri nikẹyin-kẹyin pe iṣe omugọ ni gbogbo nkan ti a n pe ni ọgbọn wa.

Wayi o, nitoripe Solomọni kọ ọgbọn Ọlọrun silẹ, ti o si tẹlẹ ọgbọn ẹlẹran-ara lori ọrọ igbeyawo rẹ, o pada di omugọ ọba. Wo nkan ti bibeli sọ lori eyi:

“O si ni ẹẹdẹgbẹrin (700) obinrin, awọn ọmọ ọba ati ọọdunrun (300) ale, awọn iyawo rẹ si yi i ni ọkan pada. Bi Solomoni si ti di arugbo, awọn iyawo rẹ si yi ni ọkan pada si ọlọrun miiran, ọkan rẹ ko si ṣe deede pẹlu Oluwa Ọlọrun rẹ, gẹgẹ bi ọkan Dafidi baba rẹ ti ṣe. O tọ Asitoreti oriṣa awọn ara Sidoni lẹyin, ati Milikomi oriṣa irira awọn ọmọ Amoni. Bẹẹ ni Solomọni ṣe buburu niwaju Oluwa, ko si tọ Oluwa lẹyin ni pipe, bi Dafidi baba rẹ ti ṣe.” (1Àwọn Ọba 11:3-6)

Njẹ o ri bayẹn? Awọn ajeji obirin ti Solomọni kojọ pada ṣi i lọna nigba ti o darugbo tan, ki ko si ni okun-inu mọ lati ma kọbiara si iyọlẹnu wọn. Nitorina, nkan ti ọgbọn Ọlọrun sọ wipe yoo ṣẹlẹ gan an lo papa wa ṣẹlẹ. Eyi si jẹ ki Solomọni padanu pupọjulọ lara ijọba rẹ si ọwọ ọkan lara awọn ọmọ ti o wa labẹ iṣakoso rẹ. O ma ṣe o! (Wo: 1Awọn Ọba 11:26-39)

Ki wa ni koko ọrọ yi gan an? Oun naa ni pe ti ọgbọn Ọlọrun ba ti ba wa sọrọ lori nkan, nṣe ni ki a tẹwọgba oun ti o sọ, ki a si ma ṣe wa ọna miran, yala ọna miran ti o rọrun ni tabi eyi ti ko rọrun. Idi si ni pe ọna omugọ ni ọnakọna ti o ba yatọ si eyi ti ọgbọn Ọlọrun ti fi han. Ọna yi ko si ni mu ilera ati alaafia wa sinu aye wa bikoṣepe yoo le wọn jinna si wa, bi o ti ṣe ri fun Solomọni. Nitorina, ṣọra lati ma jẹ ọlọgbọn loju ara rẹ nidi okowo rẹ, ibi-iṣẹ rẹ, ile-iwe rẹ, adugbọ rẹ, eto-isuna rẹ, iṣẹ-isin Kirisitiẹni rẹ, igbeyawo rẹ tabi ibaniṣọrẹ rẹ. Idi si ni pe ṣiṣe bẹẹ di dandan ko fi ọ han gẹgẹ bi omugọ nikẹyin-kẹyin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ tuntun miran ninu oṣu Ọ̀wàrà 2024. Mo si gbadura pe ki Ọlọrun ma fi ojoojumọ pa ọ mọ kuro ninu ohun gbogbo ti o ni i ṣe pẹlu igbesẹ tipa-tikuuku, bi o ti wu ki nkan ti o n dojukọ laye yi ri, ki o ma ba ba alaafia, ayọ ati aye rẹ jẹ pẹlu ọwọ ara rẹ. Amin.

Bi a ti ṣe ri ninu bibeli, bi o tilẹ jẹ wipe Ọlọrun fẹ ki awọn eniyan rẹ ni ohun gbogbo ti wọn nilo lati gbe igbe aye ti o ni itumọ, ko fẹ ki wọn sọ nini ohunkohun di tipa-tikuuku. Idi si ni pe awọn ti o ba n ri irin tipa-tikuuku ko ni ṣe alai-ma ṣe awọn nkan omugọ ati awọn nkan ti o le pa wọn lara, ninu ilakaka wọn lati ni awọn nkan ti wọn fẹ. Nitorina, bi wọn tilẹ pada ni awọn nkan ti wọn n fẹ yi, nkan ti wọn yoo fi di le tobi to ẹmi awọn tikalara wọn. Ko tilẹ si wa si idaniloju pe wọn yoo ri nkan ti wọn n fẹ naa. Ti wọn ko ba si ri, a jẹ wipe wọn pofo ọna meji niyẹn.

Fun apẹrẹ, nitoripe Ọba Sọọlu fẹ fi tipa-tikuuku pa ijọba rẹ mọ, o fi igbakanri gbe igbesẹ lati ru ẹbọ ti o yẹ ki Samuẹli ru. Ṣe alufaa ni oun ni? Rara o! Boya o si ni awọn ifihan kan lati ọdọ Ọlọrun lori irufẹ ẹbọ ti o yẹ ki o ru ni asiko naa? Rara o! Ki wa lo fa ti o fi gbe igbesẹ lati ru ẹbọ naa? O ṣe bẹẹ nitoripe o fẹ fi tipa-tikuuku pa ijọba rẹ mọ. (Wo: 1Sámúẹ́lì 13)

Amọ ṣe oun lo fa ijọba yi le ara rẹ lọwọ? Rara o, oun ma kọ ni. Ọlọrun ni O fi fun un. Ki wa lo jẹ ki o ro wipe ohun le pa nkan naa ti ko fun ara rẹ mọ fun ara rẹ? Agọ̀ lo fa a! Nitori igbesẹ agọ ti o si gbe yi, Ọlọrun sọ fun pe ijọba rẹ ko ni pe titi ṣugbọn yoo wa si opin lori rẹ.

Lafikun, igba miran kan tun wa ti ọkunrin yi pinnu lati tọ àjẹ́ kan lọ nitoripe o fẹ fi tipa-tìpa mọ ibi ti ogun kan ti o fẹ ba awọn ara Filistini ja yoo yọri si. O ti gbiyanju lati jẹ ki Ọlọrun ba oun sọrọ lori ibi ti ogun naa yoo jasi. Ṣugbọn Ọlọrun ko ṣetan lati sọ ohunkohun fun un, niwọn igba ti o jẹ wipe oun funrarẹ ko ri ti Ọlọrun ro tẹlẹ ki o to di asiko iṣoro rẹ yi. Nigba ti o si ti wa mura lati fi tipa-tikuuku mọ ibi ti ogun naa yoo ja si, yala Ọlọrun ba a sọrọ lori rẹ tabi ko ba a sọrọ, o gba ọdọ àjẹ kan lọ fun ayẹwo. Bi o si ṣe sọ ọkan rẹ nu pẹlu ijọba rẹ ni eyi. (Wo: 1Sámúẹ́lì 28)

Ki wa ni nkan wọnyi n sọ ọ fun wa? Oun naa ni pe a ko gbọdọ fi aye gba nkan yowu ti a fẹ lọkan wa lati ni tabi lati ṣe lati jẹ ki a ma gbe igbesẹ tipa-tikuuku. Bi mo ti ṣe sọ tẹlẹ, ko si nkan ti a fẹ ni ibamu pẹlu ifẹ Ọlọrun ti ko ni fẹ fi fun wa. Ṣugbọn asiko ti o ba tọ ni yoo to fun wa ni ohun yowu ti a nilo. Nitorina, a gbọdọ mu suuru pẹlu rẹ. Aijẹbẹ, ko si ni ki a ma sọ ọrọ wa di tipa-tikuuku.

Wayi o, ti a ba fi le jẹ ki ọrọ tipa-tikuuku ba aye wa, nṣe ni a o bẹrẹ si ni wa ohun ti ko sọnu kaakiri ni awọn ibi ti ko yẹ ki a de rara. Nitorina, ọmọ Ọlọrun le ba ara rẹ ni ile oṣo fun iṣeṣo-owo tabi fun eso inu. Tabi ki ọmọ Ọlọrun ba ara rẹ ninu igbeyawo ofege nitoripe o ṣa fẹ lo gbe òkè-òkun. Lẹyin-ọ-rẹyin, ayọ, ibalẹ-ọkan ati iṣoriire ti o ro wipe o yoo ni yoo ba fo o ru. Eyi si tun wa yatọ si pe yoo tun padanu ọkan rẹ pẹlu.

Nitorina, bi o ti wu ki o ni itara to lati ni nkan tabi bi o ti wu ki a ma figun mọ ọ to lati ṣe nkan, nṣe ni ki o kọ́ lati ma fi igbẹkele rẹ sinu Ọlọrun ati lati ma duro de asiko rẹ. Nipa ṣiṣe eyi, o ko ni pada wa padanu alaafia, ayọ ati ọkan rẹ ninu ilakaka rẹ lati ni ayọ tabi lati ṣe aṣeyọri laye.

Ki o ni ọsẹ ologo.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ ti o so oṣu Òwewè ati Ọ̀wàrà 2024 pọ mọ ara wọn. Adura mi si ni pe ki Ọlọrun ma fi igba gbogbo jẹ ki ọkan rẹ pongbẹ fun un, ki o ba a le e mọ ọn bi o ti ṣe yẹ ki o mọ ọn ati ki o ba a le gbadun ohun rere gbogbo ti O ni ni ipamọ fun ọ. Amin.

Bibeli sọ eyi fun wa nipa ọna lati mọ Ọlọrun ni ọna ti o peye ati lati gba itẹlọrun lọwọ rẹ laye yi: “Alabukun-fun ni awọn ti ebi n pa, ti oungbẹ n gbẹ nitori ododo, nitori wọn yoo yo.” (Mátíù 5:6) Ki ni eyi n sọ fun wa? Oun naa nipe bi o tilẹ jẹ wipe Ọlọrun fẹ fi ara rẹ han wa, ti O si tun fẹ mu ete rere rẹ fun aye wa ṣẹ, kiki awa ti ebi n ba pa wa, ti oungbẹ si tun n gbẹ wa fun un ati fun awọn nkan ti O ni fun wa ni yoo pada gba itẹlọrun lẹkunrẹrẹ. Awọn ti ebi ko pa wọn, ti oungbẹ ko si tun gbẹ wọn fun un n fi han pe awọn ko nilo rẹ. Nitorina, bi wọn tilẹ n fi ẹnu jẹwọ rẹ gẹgẹ bi Ọlọrun wọn, gbogbo nkan ti wọn le reti lati jẹgbadun lọwọ rẹ ko ju awọn ibukun gbogbogboo rẹ lọ.

Ti o ba wo inu bibeli, iwọ yoo ro wipe awọn ti o mọ Ọlọrun daradara, ti wọn si tun jẹgbadun Ibukun rẹ ni awọn ọna ti ko wọpọ ni awọn ti o fi han pe ebi ati oungbẹ fun un n pa awọn gidigidi. Fun apẹrẹ, a sọ eyi fun wa nipa Mose ati awọn ọmọ Isiraẹli: “O fi ọna rẹ han fun Mose, iṣẹ rẹ fun awọn ọmọ Isiraẹli.” (Sáàmù 103:7) Njẹ o ri bayi pe iyatọ ti o ga wa lara bi Ọlọrun ti ṣe ba Moṣe lo pọ ati bi O ti ṣe ba awọn ọmọ Isiraẹli lo pọ? Gbogbo nkan ti awọn ọmọ Isiraẹli n ri ko ju awọn iṣẹ iyanu Ọlọrun ti a ṣe fun wọn lọ. Wọn ko ni oye idi ti O ṣe n ṣe awọn iṣẹ yi tabi nkan ti wọn le ṣe lati jẹ ki awọn iṣẹ yi waye.

Ṣugbọn Mose le sọ idi ti Ọlọrun ṣe ṣe ohunkohun ti O ṣe fun awọn ọmọ Isiraẹli. O si tun le sọ idi ti Ọlọrun ṣe un wọn ni awọn ofin ti O fun wọn pẹlu. Idi si ni pe oun mọ ọna Ọlọrun. Bawo lo ṣe wa mọ ọna Ọlọrun? Ṣe nitoripe Ọlọrun pe, ti O si tun ran an lati lọ tu orilẹ-ede Isiraẹli silẹ kuro ni Ijibiti ni? Rara o! Dipo eyi, titoripe ebi n pa a, oungbẹ si tun n gbẹ ẹ lati mọ Ọlọrun ati lati mọ ọna rẹ ni o ṣe ribẹ. Iwọ naa wo diẹ lara awọn adura rẹ si Ọlọrun:

“Bi iwọ ba ni inu didun pẹlu mi, kọ mi ni ọna rẹ, ki emi ki o le mọ ọ, ki n si le maa wa oju rere rẹ pẹlu. Ranti wi pe orilẹ-ede yii eniyan rẹ ni.” (Ẹ́kísódù 33:13)

“Mose si wi pe, “Nisinsin yii fi ogo rẹ han mi.”” (Ẹ́kísódù 33:18)

Njẹ o ri bayẹn? Ko tẹ Mose lọrun lati kan jẹ adari orilẹ-ede Israẹli. Bẹẹ si ni ko tẹ lọrun lati kan jẹ oniṣẹ-iyanu. Dipo bẹẹ, o tun fẹ mọ Ọlọrun ni ọna ti o peye, ki o si tun ri ogo rẹ. Ki ni idi? Idi ni pe o mọ wipe fun igba diẹ naa ni oun fi le jẹ adari orilẹ-ede Israẹli ati oniṣẹ-iyanu. Nigba ti o ba ya, yoo ku, yoo si fi ohun gbogbo silẹ. Ṣugbọn ti o ba mọ Ọlọrun, ti o si ri ogo rẹ, yoo ma a ba a gbe titi lailai. Niwọn igba ti o si jẹ wipe nkan ti ebi n pa a fun, ti oungbẹ si n gbẹ ẹ fun ni eyi, Ọlọrun fi tẹ lọrun.

Tun wo Dafidi naa. Ki ni idi ti o ṣe mọ Ọlọrun bi o ti ṣe mọ ọn, bi o tilẹ jẹ wipe ko ki i ṣe alufaa tabi wolii bi ti Mose? Idi ni wipe ebi n pa oun naa, oungbẹ si tun n gbẹ ẹ fun un. O tilẹ fi igba kan sọ wipe, “Ọlọrun o, tọkantọkan ni mo n ṣafẹri rẹ; oungbẹ rẹ n gbẹ ọkan mi, ara mi si n fa si ọ.” (Wo: Sáàmù 63:1)

Nitorina, ti ebi ba n pa awa naa, ti oungbẹ si n gbẹ wa fun Ọlọrun, dipo fun awọn ere ori ẹrọ mohunmaworan, ẹfẹ, ariya ati awọn nkan miran ti ko ki ṣaba gbe aye eniyan ro, Oun yoo tẹ wa lọrun pẹlu ẹkunrẹrẹ rẹ, aye yoo si ri ogo rẹ ninu wa. Otitọ ti o si wa wa nibẹ ni pe idi ti pupọ-julọ lara wa ko ṣe ma ni iriri ogo Ọlọrun ninu aye wa bi o ti ṣe tọ ni pe ebi ati oungbẹ wa fun un ko to. Bawo wa ni a ṣe le fihan pe ebi n pa wa ati pe oungbẹ n gbẹ wa fun gidigidi? A le fihan nipa fifi itara lọ fun ọrọ rẹ, adura gbigba ati ibaṣepọ pẹlu awọn ọmọ rẹ ni aisimi.

Ranti pe bi o tilẹ jẹ wipe arugbo ati olukọ ti o ga ni Isiraẹli ni Nikodemu, o rẹ ara rẹ silẹ, o si wa kọ ẹkọ lọdọ Jesu Oluwa ni alẹ ọjọ kan (Jòhánù 3:1-2). Ki ni idi? Oungbẹ n gbẹ ẹ lati mọ Ọlọrun si. Emi naa si wa ranti pe, ni awọn ọdun melokan sẹyin, mo ṣe debi wipe mo n ya awọn iwe Kirisitiẹni ati awọn akasilẹ iwaasu lọwọ awọn ti ko tilẹ ki i ṣe ọmọ ijọ mi, nitoripe mo fẹ mọ Ọlọrun si i. Ọpọ igba ni mo si ma n ji ni ọganjọ oru lati ka awọn iwe yi tabi lati gbọ awọn akasilẹ iwaasu yi, ki n ba le da wọn pada fun awọn ti o ni wọn ni asiko. Ki ni a n pe eyi? Ebi ati ipongbẹ fun Ọlọrun! Ṣe o wa lere lori tabi ko ni? O lere lori.

Nitorina, ti ebi ba n pa iwọ naa, ti oungbẹ si n gbẹ ọ fun Ọlọrun, o di dandan ki o mọ ọn, ki o si tun jẹgbadun rẹ kọja ireti rẹ. Ṣugbọn ti ebi ko ba pa ọ, ti oungbẹ ko si tun gbẹ ọ fun un, awọn nkankan wa ti o ko le lailai mọ nipa rẹ tabi jẹgbadun lati ọwọ rẹ. Nitorina, gbadura pe ki O ma fi ojoojumọ ji ebi ati ipongbẹ otitọ fun ninu rẹ lọna ti o ga, ki o ba le ni iriri ẹkunrẹrẹ rẹ.

Kí ó ní ọ̀sẹ̀ alárinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)