Blog – Page 24 – Búlọ́ọ̀gì Wa | Ìjọ Òtítọ́ Bíbélì

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN AYỌKA: TÍMÓTÌ 4:7-11 ỌJỌ́RÚ 27, IGBE 2022

ÀKỌ́SÓRÍ: “Má ṣe fetí sí ọ̀rọ̀ tàbí ìtàn asán; ṣùgbọ́n tọ́ ara rẹ sí ìwà-bí-Ọlọ́run.” (Tímótì 4:11)

Ọ̀RỌ̀ ÀKỌ́SỌ

Bi a ti ṣe kọ ninu ẹkọ ti a kọ sẹyin lori titọ ara wa si iwa-bi-Ọlọrun, iwa-bi-Ọlọrun ko ki ṣa dede jẹyọ ninu aye eniyan, bi o tilẹ ti ni amuyẹ lati ọdọ Ọlọrun fun un. A gbọdọ tọ ara wa lati wa bi Ọlọrun ki iwa-bi-Ọlọrun to le bẹrẹ si ni jẹyọ laye wa lọna ti o ni apẹẹrẹ. Aijẹbẹ, bi a tilẹ pe ara wa ni ọmọ rẹ, iwa ati iṣeṣi wa le ma fi taratara jọ tirẹ ni ọna pupọ. Eyi si ni o jẹ ki ọpọ Kirisitiẹni loni ri bi wọn ti ṣe ri, ti igbe aye wọn ko si wú awọn ti o wa ni ayika wọn lori debi pe wọn yoo fẹ ba Ọlọrun ni ajọṣepọ. Ti a ba wa fẹ ki awọn ti o wa ni ayika wa tabi ni awujọ wa gba iwuri lati ba Ọlọrun ṣepọ nipasẹ igbe aye ti a ngbe, a gbọdọ tọ ara wa lati wa bi i rẹ.

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN

Bawo wa ni a ṣe le tọ ara wa si iwa-bi-Ọlọrun? A le tọ ara wa si iwa bi Ọlọrun nipa ṣiṣe amulo awọn ipese rẹ fun wa lati gbe igbe aye ti o dabi tirẹ. Ranti wipe Peteru ṣọ eyi fun wa nipa iwa-bi-Ọlọrun: “Gẹ́gẹ́ bí agbára Ọlọ́run ti fún wa ní ohun gbogbo tí í ṣe ti ìyè àti ìwà-bí-Ọlọ́run, nípa ìmọ̀ ẹni tí ó pè wá nípa ògo áti ọlá ńlá rẹ̀. Nípa èyí tí o ti fi àwọn ìlérí rẹ̀ tí ó tóbi púpọ̀ tí ó si ṣe iyebíye fún wa: pé nìpa ìwọ̀nyí ni kí ẹ̀yin kí ó le di alábáápín nínú ìwà bí Ọlọ́run, nígbà tí ẹ̀yin bá ti yọ kúrò nínú ìbàjẹ ti n bẹ ninu aye nipa ifẹkufẹẹ.” (2Pétérù 1:3-4) Njẹ o ri bayẹn? Nipa mimọ Ọlọrun, a ti di ajogun awọn ipese rẹ fun wa lati gbe igbe aye ìwà-bí-Ọlọ́run.

Lafikun, Pọọlu naa sọ eyi fun wa: “Nítorí oore-ọ̀fẹ́ Ọlọ́run tí ń mú ìgbàlà wà fùn gbogbo ènìyàn ti farahàn. Ó ń kọ wa pé, kí á ṣẹ́ àìwà-bí-Ọlọ́run àti ìfẹ́kúfẹ̀ẹ́ ayé, kí a si maa wà ní àìrékọjá, ní òdodo, àti ní ìwà-bí-Ọlọ́run ní ayé ìsinsìnyí.” (Títù 2:11-12) Ṣe o tun ri bayẹn? Ẹkọ wa fun gbogbo wa lati kọ lori bi a ti ṣe n gbe igbe aye iwa-bi-Ọlọrun ninu aye ti a wa yi. A si le kọ ẹkọ yi nipasẹ oore-ọfẹ Ọlọrun, eyi ti a tun le pe ni ipese rẹ.

Ki wa ni awọn nkan ti Ọlọrun ti pese fun lati gbe igbe ayẹ bi tirẹ ninu aye yi, ti a si le ṣe amulọ wọn? Awọn naa ni iwọnyi:

– Ẹ̀mí Ọlọ́run: Pataki ninu awọn ipese Ọlọrun fun gbogbo awọn ọmọ rẹ lati gbe igbe aye ìwà-bí-Ọlọ́run ni Ẹmi Mimọ rẹ ti O fun wa lati ma ba wa gbe titi lailai. Ki si ni idi ti Ọlọrun fi fun wọn ni Ẹmi rẹ lati ma ba wọn gbe titi lailai? Idi ni ki O ba le dari wọn sinu gbogbo ọtitọ ti wọn nilo lati mọ lati gbe irufẹ aye ti O fẹ ki wọn gbe ati lati fun wọn ni okun, igboya, oriya ati itunu ti wọn nilo lati gbe aye naa. Ọlọrun ti mọ pe ko si nkankan ti a le da se lailai jẹ wipe Ẹmi rẹ ṣe wa yẹ lati ṣe (Jòhánù 15:5). Idi naa niyi ti O fi fi Ẹmi rẹ jinki wa lọfẹ. Awa ni a wa gbọdọ kọ lati ma fi gbogbo igba rin pẹlu afiyesi pe a ko le gbe igba aye ìwà-bí-Ọlọ́run laifi ti Ẹmi mimọ ṣe. Niwọn igba ti a ba si ti da ara le Ẹmi yi fun okun, igboya, ifaraji ati ohun yowu ti a tun le nilo lati gbe igbe aye ti Ọlọrun fẹ ki a gbe, ko si ni ki a ma ṣe aṣeyọri ninu gbigbe igbe aye naa. (Wo: Ìsíkíẹ̀lì 36:27; Jòhánù 14:26; Jòhánù 16:12-15; 2Kọ́rínntì 3:4-6; Gàlátíà 5:16; Fílípì 3:3)

– Ọ̀rọ̀ Ọlọ́run: Bi a ti ṣe sọ siwaju, a nilo lati ṣe amulo wiwa Ẹmi Ọlọrun ninu aye wa lati gbe igba aye iwa-bi-Ọlọrun. Amọ ti a ko ba mọ ọna lati ṣe eyi, wiwa rẹ ninu wa ko ni jamọ nkankan taarataara. Ọkan lara ọna ti a wa le gba ṣe amulo wiwa rẹ ninu wa ati pẹlu wa ni fifi ara wa jin fun ọrọ iwe mimọ. Nkan ti a n sọ nipe ọrọ Ọlọrun, ti a kọ silẹ fun wa ninu bibeli, jẹ ọkan lara nkan ti Ẹmi Ọlọrun ma n lo lati ṣe awọn Ọmọ Ọlọrun yẹ fun igbe aye iwa mimọ. Iwọ naa wo nkan ti Pọọlu sọ fun awọn alagba ijọ Efesu lori eyi: “Njẹ nisinsinyi, ara, mo fi yin le Ọlọrun lọwọ ati ọrọ oore-ọfẹ rẹ, ti o le gbe yin duro, ti o si le fun yin ni ini laarin gbogbo awọn ti Oluwa sọ di mimọ.” (Iṣe Apọsiteli 20:32) Nitorina, ẹnikẹni ti o ba fẹ mọ ifẹ Ọlọrun daju lori bi o ṣe yẹ ki o gbe aye rẹ lati wu u ninu ohun gbogbo, ki o si tun duro ṣinṣin ninu ifẹ rẹ naa ti o mọ gbọdọ fi ara rẹ jin fun ọrọ Ọlọrun. O gbọdọ maa ka a, ki o maa tẹti gbọ ọ, ki o si ma ṣe asaro ninu rẹ lojoojumọ ki o ba le yee, ki o si le ṣe amulo rẹ (Jọ́súà 1:8; Mátíù 13:1-23). Aijẹbẹ, ko si bi yoo ṣe le gbe igbe aye iwa-bi-Ọlọrun.

– Ànfààní àdúrà gbígbà: Ipese Ọlọrun miran fun awọn ọmọ rẹ lati gbe igbe aye iwa-bi-Ọlọrun ni anfaani adura gbigba si i. Bi a ti ṣe ri ninu bibeli, gbogbo awa ti a jẹ ọmọ rẹ ninu Kirisiti Jesu ni a le tọ ọ wa pelu igboya ati laibẹru nigbakigba lati tẹwọgba awọn nkan ti O ti pese silẹ fun igbayegbadun wa ati igbayetẹlọrun wa (Éfésù 3:12; Hébérù 4:16). Nitorina, ẹnikẹni ninu wa ti o ba wa fẹ ri ifarahan iṣẹ Ẹmi Ọlọrun ninu rẹ ni ọna ti o peye, ti ko si fẹ ṣe alaini ohun ti o dara kankan lati gbe aye ti o wu Ọlọrun, gbọdọ fi ara rẹ jin fun adura gbigba, ni aisimi ati ni aiṣaarẹ. Bi Jesu Oluwa wa si ti fi ye wa, lalai ṣe pe a ba n fi gbogbo igba gbadura si Ọlọrun lati fun wa ni okun nipasẹ Ẹmi rẹ, ko si ni bi a ko ṣe ni ṣubu sinu idanwo Eṣu. Bẹẹni, o ṣeeṣe ki ọkan wa fẹ ṣe ohun ti o tọ, ti o si yẹ. Ṣugbọn niwọn igba ti ko ba ti si okun fun ailera ara wa, ko si bi iwa-bi-Ọlọrun yoo ṣe ṣeeṣe fun wa. Idi niyi ti a ko fi gbọdọ fi adura gbigba ṣere rara, boya adura gbigba fun ara wa ni o tabi adura gbigba pẹlu awọn ọmọ Ọlọrun miran, paapaa julọ awọn ti ijọ wa wa. (Wo: Lúùkù 22:31-32&39)

– Ànfààní ìbáṣepọ̀ pẹ̀lú àwọn ọmọ Ọlọ́run míràn: Pataki lara awọn nkan ti ẹnikẹni ti o ba ṣẹṣẹ di atunbi ninu Jesu gbọdọ mọ ni pe nṣe ni a tun un bi sinu idile Ọlọrun, sinu agbo ile igbagbọ, sinu ara Kirisiti (1Kọ́rínntì 12:12-13; Gàlátíà 6:10; 1Tímótì 3:14-15). Nitorina, igbe aye ìwà-bí-Ọlọ́run ati ìgbáyégbádùn ko ki i ṣe adagbe ni fun un bikoṣe eyi ti yoo gbe pẹlu itọni, iranlọwọ ati ibawi awọn ọmọ Ọlọrun yoku. Idi si ni yi ti o fi gbọdọ pọn ni dandan fun ara rẹ lati darapọ mọ agbo awọn ọmọ Ọlọrun yowu ti o ba wa ni arọwọto rẹ, ti o si ri pe oye bi a ti ṣe n gbe aye tẹ Ọlọrun lọrun ye wọn. Awọn wọnyi ni Ọlọrun yoo ma lo lati kọ ọ, lati gba a niyanju, lati tu u ninu ati ran a lọwọ ni akoko ailera rẹ ati lati ṣe aṣọna fun ẹmi rẹ. Aijẹbẹ, ko si bi yoo ṣe le gbe igbe aye ìwà-bí-Ọlọ́run. Ọpọ ni aimọkan ti wa jẹ ki wọn ṣe aṣiṣe lori eyi, ti Eṣu si ti rapala wọle lati ṣi wọn lọna ati lati jẹ wọn niya, nitoripe wọn ko ṣe amulo ti o peye ibaṣepọ ti wọn ni anfaani rẹ pẹlu ijọ ọmọ Ọlọrun kankan. Wọn ro lọkan wọn pe awọn le da igbe aye Kirisitiẹni gbe ni. Amọ aṣiṣe yi gan an ni Eṣu lo lati ya wọn sọtọ lati rẹ wọn jẹ. Ti awa naa ko ba si fẹ ki Eṣu ni anfaani lati ya wa sọtọ kuro lọdọ awọn ọmọ Ọlọrun ti o le ran igbagbọ wa ati ìwà-bí-Ọlọ́run wa lọwọ, a gbọdọ mu ibaṣepọ pẹlu awọn ọmọ ijọ wa ni ọ́kúnkúndùn. (Wo: Ìṣe Àpọ́sítélì 20:28-31; Éfésù 4:11-16; Hébérù 3:12-13; Hébérù 10:24-25; Hébérú 12:15-17)

– Iṣẹ iranṣẹ awọn angẹli Ọlọrun: Bibeli sọ eyi fun wa nipa awọn angẹli: “Ẹ̀mí tí ń jísẹ́ ha kọ́ ni gbogbo wọn í ṣe bí, tí a n rán lọ láti maa jọ́sìn nítorí àwọn tí yoo jogún ìgbàlà?” (Hébérù 1:14) Ki ni nkan ti eyi n jẹ ki o ye wa? O n jẹ ki o ye wa pe iṣẹ iranṣẹ gbogbo awọn angẹli ni lati ṣiṣẹ ran awọn ọmọ Ọlọrun lọwọ. Idi si ni yi ti a fi kọ wa lati ma ṣoore fun awọn eniyan, paapaa-julọ awọn alejo ati awọn ti a ko mọ ri. Nitoripe a ko le sọ igba ti a o ṣoore fun angẹli kan tabi omiran ti a ran lati yọ wa ninu ewu tabi ran wa lọwọ (Hébérù 13:2). A si ri oniruuru àpẹrẹ ninu bibeli awọn ti a ran angẹli si lati ran igbe aye iwa mimọ wọn lọwọ tabi laye yọ wọn kuro ninu ewu ti o sọrọ mọ gbigbe igbe aye yi. Lọọti, Daniẹli ati Jesu Kirisiti Oluwa wa si wa lara awọn wọnyi (Jẹnẹsisi 19; Daniẹli 6; Luke 22:39-44). Nitorina, gbogbo awa ti a jẹ ọmọ Ọlọrun ni a nilo lati ma fi gbogbo igba fi sọkan pe awọn angẹli Ọlọrun rọgba yi wa ka lati ran igbe aye ìwà-bí-Ọlọ́run wa lọwọ. Niwọn ti a ba si n rin pẹlu afiyesi yi, ẹru ko ni fi igba kankan ba wa lati duro lori ẹsẹ wa lati ṣe ifẹ Ọlọrun, bi o ti wu ki inunibini awọn ti o wa ni ayika tabi awujọ wa to. Aiwa ni oye yi ni o jẹ ki ọpọ ọmọ Ọlọrun fi ibẹrubojo fi ara wọn jin fun oniruuru ẹṣẹ ati iwa aitọ lawujọ wọn.

Ọ̀RỌ̀ ÌPARÍ

Igbe aye ìwà-bí-Ọlọ́run jẹ eyi ti ọmọ rẹ kọọkan gbọdọ lepa lati gbe. Idi si ni pe Ọlọrun ti pese gbogbo nkan ti wọn nilo lati gbe igbe aye yi fun wọn. Awọn ti o ba wa lepa lati ṣe amulo awọn ipese yi nikan naa ni yoo ri igbe aye yi gbe pẹlu irọrun, nitoripe Ẹmi Ọlọrun yoo ṣe ni irọrun fun wọn.

ÌBÉÈRÈ

– Bawo ni o ṣe ṣe pataki si fun awọn ọmọ Ọlọrun lati ni oye ipese Ọlọrun fun wọn lati gbe igbe aye ti O fẹ ki wọn gbe?

– Mẹnuba diẹ lara awọn nkan ti o ṣe pataki julọ si ọ ninu ẹkọ yi.

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN AYỌKA: TÍMÓTÌ 4:7-11 ỌJỌ́RÚ 27, IGBE 2022 Read More »

Akori: Iyi dipo itiju | Lati ọwọ: J.O. Lawal | Ọjọ: Igbe 24, 2022 | Atẹlera: Latori tabili Paitọ Nọmba: Vol. 10, No. 51

Leave a Comment

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu yi. Adura mi si pe ki o ni iriri igbega iyanu ni gbogbo ibi ti a ti pa ọ ti, yan ọ jẹ, pọn ọ loju tabi ja o lole, ni orukọ Jesu. Amin.

Wayi o, mo gba adura yi fun ọ nitori pe o wa ni ibamu pẹlu nkan ti Ọlọrun ti sọ siwaju lati ẹnu ọkan lara awọn wolii rẹ igbaani nipa awọn eniyan rẹ. Ki si ni o sọ? O sọ wipe, “Kiyesi i, nigba naa ni emi o jẹ awọn ti n pọn ọ loju niya: emi a gba atiro la, emi o si ṣa ẹni ti a le jade jọ; emi o si sọ wọn di ẹni iyin ati olokiki ni gbogbo ilẹ ti a ti gan wọn.” (Sẹfanaya 3:19)

Njẹ o ri bayi? Akọkọ, Ọlọrun ṣe ileri lati ba awọn ti o n pọn awọn eniyan rẹ loju wi. Nitorina, ti a ba ri awọn ti o n pọn iwọ naa loju lọwọlọwọ yi, mo fẹ ki o mọ pe opin ti de ba iṣẹ ọwọ wọn. Idi si ni pe dandan ni ki Ọlọrun na ọwọ gan wọn, ki O si da ṣeriya fun wọn gẹgẹ bi iṣẹ ọwọ wọn ti ri. Ko wa ki i ṣe iṣẹ tirẹ ni lati mọ nkan ti yoo ṣe fun wọn bi ko ṣe iṣẹ tirẹ. Ṣugbọn o le mọ daju pe nigbati ti o ba ṣetan pẹlu wọn, wọn ko tun ni lailai ronu lati pọn ẹlomiran loju mọ, niwọn igba ti wọn ba ṣi n mi. Ti o ba bere lọwọ rẹ, Ọba Abimeleki igba aye Aburahamu yoo sọ fun bi o ti ma n ri ti Ọlọrun ba n da ṣeriya fun awọn apọniloju, bi o tilẹ jẹ pe aimọkanmọkan ni o sun wọn de bẹ. (Wo: Jẹnẹsisi 20)

Siwajusi, Ọlọrun sọ pe Oun yoo bu okiki ati iyi kun awọn eniyan rẹ ni gbogbo ibi ti wọn ti ba itiju pade sẹyin. Eyi ni yoo si jẹ iriri ti iwọ naa, ti o ba gba ọrọ rẹ pẹlu igbagbọ. Yoo jẹ ki awọn eniyan yọ mọ ọ ni gbogbo ibi ti wọn ti gan ọ tabi doju ti ọ tẹlẹ.

Ranti pe O ṣe ohun ti o jọ eyi fun Josefu. Ni ibi kanna ti o ti sinru gẹgẹ bi ẹru ati ẹlẹwọn ni o tun ti pada wa ṣiṣẹ gẹgẹ bi adari ijọba. Wa wo bi awọn eniyan bi Pọtifa ati aya rẹ yoo ṣe ma ṣe si i lẹyin-ọ-rẹyin. Iyẹn jẹ ọkan lara apẹẹrẹ bi Ọlọrun ti ṣe le gbe eniyan soke, ki O si tun bu iyi kun wọn ni ibi ti a ti gan wọn tẹlẹ. (Wo: Jẹnẹsisi 39-41)

Nitorina, ma ṣe ba ọkan jẹ, ipo yowu ti o le wa laye lọwọlọwọ yi. Dipo bẹẹ, tẹwọgba ọrọ Ọlọrun si ọ lori igbega ati iyi rẹ. Bẹẹni, tẹwọgba ọrọ rẹ nipa sisọ nkankanna pẹlu rẹ, bi o ti wu ki nkan ri fun ọ ni akoko yi. Ti o ko ba si rẹwẹsi, o di dandan ki o ni iriri imuṣẹ ọrọ rere rẹ nipa rẹ ni akoko ti o tọ.

Ki o ni ọsẹ ti o ga.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Akori: Iyi dipo itiju | Lati ọwọ: J.O. Lawal | Ọjọ: Igbe 24, 2022 | Atẹlera: Latori tabili Paitọ Nọmba: Vol. 10, No. 51 Read More »

ALAKALẸ ẸKỌ BIBELI ATI ALAYE | ỌJỌRU 13, IGBE 2022 | AKỌRI: TỌ ARA RẸ SI IWA-BI-ỌLỌRUN AYỌKA: TIMOTI 4:7-11 | J.O. LAWAL

Leave a Comment

AKỌSORI: “Ma ṣe feti si ọrọ tabi itan asan; ṣugbọn tọ ara rẹ si iwa-bi-Ọlọrun.” (Efesu 4:11)

ỌRỌ AKỌSỌ
Gẹgẹ bi a ti ṣe ri ninu bibeli, igba ikẹyin yoo jẹ igba ewu fun ọpọlọpọ eniyan, paapaa julọ fun awọn ti o jẹ ọmọ Ọlọrun (2Timoti 3:1-5). Ewu ti a si n sọrọ nipa yi kọja ewu ijamba ọkọ tabi ti ajakalẹarun tabi ti akitiyan awọn ika ati ọdaju eniyan; o tun ni i ṣe pẹlu ewu ọkan eniyan. Ewu ọkan eniyan yi si ni olori gbogbo ewu ti o wa laye. Ẹni ti o ba wa bori oniruuru ewu yowu ti o le wa laye ti ko si bori ewu ọkan rẹ ko bori nkankan rara. Amọ ẹni ti o ba ti bori ewu ọkan rẹ ti kogo ja. Ọna wo wa ni a le gba, gẹgẹ bi ọmọ Ọlọrun, lati bori gbogbo nkan ti o le ṣe ijamba fun ọkan wa? Ọna naa ni ki a tọ ara wa ni iwa-bi-Ọlọrun.

TỌ ARA RẸ SI IWA-BI-ỌLỌRUN
Pọọlu, ninu lẹta rẹ kan si Timoti sọ eyi fun un: “Ma ṣe feti si ọrọ tabi itan asan; ṣugbọn tọ ara rẹ si iwa-bi-Ọlọrun. Nitori ere-idaraya ti ara ni ere diẹ, ṣugbọn iwa-bi-Ọlọrun ni ere fun ohun gbogbo, o ni ileri ti aye isinsinyi ati ti eyi ti n bọ. Otitọ ni ọrọ naa, o si yẹ fun itẹwọgba gbogbo eniyan. Nitori fun eyi ni awa n ṣe laalaa ti a si n jijakkadi, nitori awa ni ireti ninu Ọlọrun alaaye, ẹni ti i ṣe Olugbala gbogbo eniyan, paapaa julọ awọn ti o gbagbọ. Nkan wọnyi ni ki o maa palaṣẹ ki o si maa kọ awọn eniyan.” (1Timoti 4:7-11)

Ki ni koko aṣẹ ti Pọọlu pa fun Timoti ninu abala lẹta rẹ yi si? Oun naa ni pe ki o tọ ara rẹ si iwa-bi-Ọlọrun. Akọkọ naa, o kọkọ sọ fun pe ki o ma ṣe fi akoko rẹ ṣofo lori awọn nkan ti ko ni ran igbe aye iwa-bi-Ọlọrun rẹ lọwọ. Awa naa si gbọdọ di eyi mu ṣinṣin. Oniruuru nkan lo wa laye yi ti ko le ran igbe aye igbagbọ wa lọwọ. Oniruuru sinima, eto, ẹkọ ati bẹẹbẹẹ lọ lo wa ti ko le ran igbagbọ wa lọwọ rara. Yoo si dara pupọ ti a ba le mọ awọn nkan wọnyi ki a si yẹra fun wọn. Aijẹbẹ, ṣa dede ni a o ri pe aiwa-bi-Ọlọrun bẹrẹ si ni jẹyọ ninu aye wa, bi o tilẹ jẹ pe ọmọ rẹ ni a jẹ. (Wo: 2Tim 2:16)

Ki wa ni idi ti Timoti fi nilo lati tọ ara rẹ si iwa-bi-Ọlọrun? Pataki lara awọn idi naa ni yi:

Ifẹ Ọlọrun ni fun un lati ṣẹ bẹ: Idi akọkọ ti Pọọlu fi paṣẹ fun Timoti lati tọ ara rẹ bi a ti ṣe e wa bi Ọlọrun ni pe ifẹ Ọlọrun ni fun un lati ṣe bẹ. Ti ko ba ki i ṣe ifẹ Ọlọrun ni fun un lati ṣe bẹ ẹ, a jẹ wipe ifakoko ati ifagbara ṣofo lasan ni ṣiṣe bẹẹ ko ba ja si fun. Ṣugbọn ifẹ Ọlọrun ni fun gbogbo ọmọ rẹ lati ma gbe igbe aye ẹni ti o dabi rẹ. Idi ti O filẹ fi da wa ni ki a ba le ma gbe igbe aye ẹni ti o dabi rẹ. Ilodi si igbe aye yi ni o si fa ti idajọ rẹ fi n bọ lori awọn ọmọ alaigbọran. (Wo: Efesu 5:3-7; 1Tẹsalonika 4:3-8;1Peteru 1:15-16)
O ni amuyẹ lati tọ ara rẹ si iwa-bi-Ọlọrun: Ọtọ ni ki a paṣẹ fun eniyan lati ṣe nkan tabi ki a gba a niyanju lati ṣe nkan; ọtọ si tun ni ki o ni amuyẹ lati ṣe e. Ko si bi a ti ṣe pariwo mọ eniyan to tabi gba a niyanju to lati ṣe nkan, ti ko ba ni amuyẹ lati ṣe, asan ati ofo ni gbogbo ariwo, iyanju tabi ikilọ wa si yoo ja si. Nibakanna, ti Timoti ko ba ni amuyẹ lati gbe igbe aye ẹni ti o wa bi Ọlọrun, aṣẹ ti Pọọlu pa fun lati tọ ara rẹ ni iwa-bi-Ọlọrun ko ni ni itumọ rara. Nitorina, idi ti Pọọlu fi sọ fun ọkunrin yi lati tọ ara rẹ ni iwa-bi-Ọlọrun ni pe o ni amuyẹ lati ṣe bẹ. Ẹnikẹni ti o ba jẹ ọmọ Ọlọrun ni amuyẹ lati gbe igbe aye iwa-bi-Ọlọrun. Wo nkan ti Peteru sọ fun wa lori eyi: “Gẹgẹ bi agbara Ọlọrun ti fun wa ni ohun gbogbo ti i ṣe ti iye ati iwa-bi-Ọlọrun, nipa imọ ẹni ti o pe wa nipa ogo ati ọla nla rẹ. Nipa eyi ti o ti fi awọn ileri rẹ ti o tobi pupọ ti o si ṣe iyebiye fun wa: pe nipa iwọnyi ni ki ẹyin ki o le di alabaapin ninu iwa bi Ọlọrun, nigba ti ẹyin ba ti yọ kuro ninu ibajẹ ti n bẹ ninu aye nipa ifẹkufẹẹ.” (2Peteru 1:3-4) Njẹ o ri bayi pe gbogbo awa ti a jẹ ọmọ Ọlọrun ni a ti fun ni ohun gbogbo ti a nilo lati gbe igbe aye iwa-bi-Ọlọrun, bi o tilẹ jẹ wipe inu aye ibajẹ ati irukerudo ni a n gbe. Ti a ko ba wa gbe igbe aye ẹni ti o wa bi Ọlọrun, ko ni jẹ nitori pe a ko le ṣe bẹ ẹ; dipo eyi, yoo jẹ nitoripe a jẹ ope niti ipese Ọlọrun fun wa lati gbe igbe aye yi tabi nitoripe a kọ lati ṣe amulo ipese rẹ fun wa. (Wo: Titu 2:11-12)
Iwa bi Ọlọrun ko ki i ṣa dede waye: Otitọ ni pe gbogbo wa ti a jẹ ọmọ Ọlọrun ni a ti ṣe yẹ ninu ọkan wa nipasẹ Ẹmi mimọ rẹ lati gbe igbe aye iwa-bi-Ọlọrun. Amọ ṣa o, iwa-bi-Ọlọrun ko ki i kan dede waye. Eniyan gbọdọ tọ ara rẹ lati wa bi Ọlọrun ni. Idi si ni pe aye ti a wa jẹ aye ti oniruuru nkan wa ti ko ni jẹ ka fẹ gbe igbe aye iwa-bi-Ọlọrun. Ifẹ owo, ifẹ ipo, ifẹ iyi, ifẹkufẹ ti ara ati bẹẹbẹẹ lọ ni o kun inu aye yi, ti ko si ni fẹ ki a gbe igbe aye ti Ọlọrun fẹ ki a gbe. Yatọ si eyi, ọpọ igba ni ẹran ara wa gan yo fẹ tako iwa-bi-Ọlọrun nitori ifẹkufẹ rẹ. Ti a ko ba wa fi eleyi sọkan, ki a si bẹrẹ si ni kọ ara wa lati yago fun ohunkohun ti o ni i ṣe pẹlu aiwa-bi-Ọlọrun ati lati tẹramọ awọn nkan ti yoo mu ki a gberu si ni gbigbe igbe aye iwa-bi-Ọlọrun, ko si bi a o ṣe ma gbe igbe aye yi lojoojumọ. Idi si niyi ti Pọọlu ṣe sọ fun Timoti pe ki o tọ ara rẹ lati ma gbe igbe aye iwa-bi-Ọlọrun. Ko kan ni dede waye funrarẹ o. Eyi ko ki i ṣe ọrọ pe ti Ọlọrun ba fẹ ki n gbe igbe aye to wu u, yoo mọ bi yoo ṣe mu mi lati ṣe bẹ. Ọlọrun ti ṣe ohun gbogbo ti O nilo lati ṣe ki a ba le gbe igbe aye ti o wu u. Ọwọ wa lo wa ku si lati pinnu bi Daniẹli lati gbe igbe aye naa ti O fẹ fun wa ati lati tọ ara wa lati ma gbe awọn igbesẹ ti o wa ni ibamu pẹlu aye naa. Ranti pe, ko si bi eniyan, fun apẹẹrẹ, ti ṣe ni ọpọlọ lati mọ iṣiro to, ti ko ba fi ara rẹ jin lati kọ ati lati ṣe aṣaro ninu awọn ofin ti o sorọ mọ iṣiro, ko ni mọ nkankan nipa iṣiro – yoo kan ṣa ma gbodo ni kilasi ni. Bẹẹ gẹgẹ naa ni o ti ṣe ri pẹlu Kirisitẹni ti ko ni ṣe amulo oore-ọfẹ Ọlọrun lati tọ ara rẹ ni iwa-bi-Ọlọrun. Yoo kan ṣa ma kọsẹ ninu idibajẹ ni. (Wo: Galatia 5:16-17; 1Johanu 2:15-17)
Iwa bi Ọlọrun ni ere fun ohun gbogbo: Idi miran gbogi ti Pọọlu ṣe sọ fun Timoti lati tọ ara rẹ ni iwa-bi-Ọlọrun ni pe o ni ere lori fun ohun gbogbo ninu aye yi ati ninu ijọba Ọlọrun ayeraye ti o n bọ. Eyi tunmọ si pe fun anfaani Timoti ni Pọọlu ṣe sọ nkan yi fun un. Fun anfaani ọmọ Ọlọrun kọọkan naa si ni awa naa ṣe gba aṣẹ kanna lati ọwọ rẹ pe ki a tọ ara wa ni iwa-bi-Ọlọrun. Ti a ba wa ni ki a bẹrẹ si ni sọrọ lori ere iwa-bi-Ọlọrun, o di dandan ki ilẹ kun. Ṣugbọn, ti awa naa ba wo ayika wa, awọn wo ni o ni ibalẹ-ọkan ju ninu aye yi? Awọn ti o wa bi Ọlọrun ni! Awọn wo ni ile wọn n roju, ti ọna wọn n roju julọ? Awọn ti o wa bi Ọlọrun ni! Awọn wo ni ko nilo lati bẹru awọn aisan ti o n ti ara iṣekuṣe wa tabi bẹru pe ki awọn agbofinro ma wa ka awọn mọle nitori ipasipayọ owo ilu tabi idigunjale? Awọn ni ko nilo lati yọnu lori boya awọn eniyan yoo gbẹri wọn jẹ tabi wọn ko ni gbẹri wọn jẹ? Awọn ti o wa bi Ọlọrun ni, nitori pe igbe aye wọn kun fun ẹri rere. Awọn si tun ni ko nilo lati bẹru nkan ti yoo kẹyin aye wọn, nitori ti wọn mọ pe dundun ni ọsan yoo so fun wọn ni ikẹyin aye wọn. Nitorina, ti o ba tọ ara rẹ ni iwa-bi-Ọlọrun, fun anfaani ara rẹ ni. Ti o ba tọ awọn ọmọ rẹ tabi awọn oṣiṣẹ rẹ ni iwa-bi-Ọlọrun, fun anfaani ara rẹ ati anfaani ara wọn ni. Ṣugbọn ti o ba ro pe aṣẹ Ọlọrun yi si wa ko ni itunmọ, o di dandan ki o kabamọ rẹ lọjọ kan.

ỌRỌ IPARI
Akoko ti a wa yi jẹ akoko igbẹyin aye. Akoko igbẹyin aye si jẹ eyi ti o ku fun oniruuru idibajẹ ati iwa ika ti o le ṣe ijamba fun ọkan eniyan. Awọn ti o ba wa wa bi Ọlọrun nikan naa ni yoo yege ni akoko yi, ti idibajẹ aye yi ko si ni sọ aye wọn di radarada, ki o si tari wọn lọ sinu ọrun apadi. O wa yẹ ki gbogbo awọn ọmọ Ọlọrun kun fun ọpẹ pe a ti fun wọn ni ohun gbogbo ti wọn nilo lati gbe igbe aye iwa-bi-Ọlọrun, lọkan, lero, niwa ati ni iṣe. Amọ ṣa o, ti wọn ko ba kọ lati ṣe amulo awọn nkan ti Ọlọrun ti pese fun wa lati gbe igbe aye ti o wu u, asan ati ofo ni gbogbo ilakaka rẹ lori wọn yoo jasi. Eyi jasi pe idibajẹ aye yi yoo ṣe wọn leṣe, yoo si sọ wọn di alailere ọmọ. Adura mi wa ni pe iwọ ko ni di alailere ọmọ Ọlọrun, ni orukọ Jesu. Amin. Amọ iwọ naa gbọdọ pinnu lati tọ ara rẹ lati wa bi Ọlọrun. Alaafia ni fun ọ.

IBERE
Ki ni o ṣe pataki julọ si ọ ninu ẹkọ yi?

Lati ọwọ Johnson O. Lawal

ALAKALẸ ẸKỌ BIBELI ATI ALAYE | ỌJỌRU 13, IGBE 2022 | AKỌRI: TỌ ARA RẸ SI IWA-BI-ỌLỌRUN AYỌKA: TIMOTI 4:7-11 | J.O. LAWAL Read More »

Njẹ o tilẹ n gbe aye nitootọ? | Pst. J.O. Lawal. | Igbe 17, 2022. | Vol. 10, No. 50

1 Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Igbe. Adura mi si ni pe ki gbogbo nkan ti o sorọ mọ wiwa Jesu Kirisiti saye nitori ọmọ eniyan jẹ mimuṣẹ ninu aye rẹ, ni orukọ Jesu. Amin.

Bi o ti ṣeeṣe ki o mọ, ni ọjọ Aiku toni, ọpọ onigbagbọ kaakiri aye ni o n yayọ ajinde Jesu Kirisiti Oluwa wa lati inu ipo oku wa. Bi o tilẹ wa jẹ wipe a ko fun wa ni aṣẹ kankan taarataara ninu bibeli pe ki a ya ọjọ kan sọtọ lọdun ninu eyi ti a o ti bọ si gbangba tabi parapọ ṣe ajọyọ ajinde Jesu, ko ki i ṣe nkan ti o buru ni fun awọn onigbagbọ lati ṣe bẹẹ. Nkan ti ko wa ni dara rara ni ki a jẹ ki ajọyọ wa lori ajinde rẹ pari lọjọ naa.

Lafikun, ko tun ni dara rara ki a ma yọ ni gbangba lori ajinde Jesu nigba ti a ko so eso ajinde naa. Eyi gan si isoro ni ọpọ igba pẹlu ọpọ ti o pe ara wọn ni onigbagbọ ninu Kirisiti Jesu. Wọn ko sọ eso ajinde Kirisiti rara. Ki si ni idi? Idi ni pe wọn ko mọ pe o yẹ ki awọn ma gbe aye awọn lati mu idi ti Jesu ṣe ku fun wọn, ti a si tun ji dide ṣẹ tabi wọn ko ka tilẹ kọbiara rara.

Ni kukuru, ti a ko ba ma so eso ajinde Jesu, ko tọ fun wa lati ma ṣe ajọyọ rẹ. Ki a tilẹ sọ otitọ, o yẹ ki aye fura si igbagbọ yowu ti a ba sọ pe a ni ninu rẹ, ti a ko ba so eso ajinde rẹ. Idi si ni pe bibeli sọ eyi si gbogbo awa ti a gbagbọ ninu rẹ, ti a si ti darapọ mọ ninu iku, isinku ati ajinde rẹ: “N jẹ awa o ha ti wi? Awa o ha tẹsiwaju lati maa dẹsẹ bi, ki oore-ọfẹ ki o le maa pọ si i? Ki a ma ri. Awa ẹni ti o ti ku si igbe-aye-ẹṣẹ, awa o ha ṣe tun wa laaye ninu rẹ? Ẹyin ko ha mọ wi pe gbogbo awa ti a ti batisi sinu idapọ pẹlu Kirisiti Jesu, a ti batisi wa sinu iku rẹ pẹlu? Pẹlupẹlu, awa ku, a si ti sin wa pọ pẹlu rẹ nipa ibatisi: ki awa ki o le maa gbe igbe-aye ọtun, gẹgẹ bi a ti ji Kirisiti dide kuro ninu oku nipa ogo Baba.” (Roomu 6:1-4)

Yatọ si iyẹn, o tun sọ eyi si wa: “Nitori ifẹ Kirisiti n dari wa; nitori awa ro bayii pe, bi ẹnikan ba ti ku fun gbogbo eniyan, njẹ gbogbo wọn ni o ti ku: O si ti ku fun gbogbo wọn, pe ki awọn ti o wa laaye ki o ma si ṣe wa laaye fun ara wọn mọ, bi ko ṣe fun ẹni ti o ku nitori wọn, ti o si ti jinde.” (2Kọrinnti 5:14-15) Njẹ o ri bayi? A ji Jesu Kirisiti dide kuro ninu ipo oku ki o ba le ṣeeṣe fun wa lati gbe igbe aye ọtun ni. O ku, a si tun ji dide fun wa ki a ma ba gbe aye wa fun ara wa mọ bi ko ṣe fun ẹni ti o ku fun wa, ti a si tun ji dide.

Nitorina, ti nkan ti O ṣe fun wa ba ja mọ nkankan loju wa lotitọ, o di dandan ki a dẹkun lati ma gbe aye lati tẹ ara wa lọrun tabi lati tẹ ẹlomiran lọrun. Dipo bẹẹ, nṣe ni a o bẹrẹ si ni gbe aye wa lati tẹ ẹ lọrun. Ṣe nkan ti a si n ṣe ni eyi? Ṣe nkan ti mo n ṣe ni eyi? Njẹ mo n gbe aye mi lati tẹ ẹni ti o jẹ ki atunbi mi sinu ẹbi Ọlọrun ṣeeṣe? Abi nṣe ni mo n gbe aye mi fun ara mi, fun awọn ọrẹ mi, fun idile mi, fun adugbo mi tabi fun ile-iṣẹ kan ti mo yan laayo?

Ka ma fa ọrọ gun, a nilo lati mọ pe ti a ba n gbe aye wa fun ara wa tabi fun ẹnikẹni tabi ohunkohun yatọ si Jesu Kirisiti Oluwa wa, a ko ri aye gbe rara. Bẹẹni, nṣe ni a n gbe aye wa lodi si idi ti o fi yẹ ki a gbe aye. Lotitọ, gbigbe aye wa fun ara wa tabi fun elomiran tabi ohun miran yatọ si fun Jesu le mu inu wa dun, jẹ ki a ro pe a ti di ẹni nla tabi jẹ ki a ro pe a ti ṣe oriire. Amọ, bi mo ti ṣe sọ fun wa tẹlẹ, bi igba ti a ko ba ri aye gbe rara ni. Ti eniyan ko ba si ri aye gbe, a jẹ wipe o ti fi anfaani lati gbe aye rẹ ṣofo niyẹn; o ti fi aye rẹ ṣofo paapaa, ko si tọ lati ri oriyin kankan gba lati ọdọ Ọlọrun.

Nitorina, bi o ti ṣe n lọ lọsẹ yi ati bi o ti ṣeeṣe ki o darapọ mọ awọn miran lati yọ ayọ ajinde Jesu, ri daju pe o n gbe aye rẹ lati mu ete rẹ ṣe fun ọ ni. Aijẹbẹ, gbogbo nkan ti o n ṣe yo kan ja si pabo ni. Adura mi si ni pe ki aye rẹ ati gbogbo iṣẹ rẹ ninu aye yi ma ṣe ja si pabo, ni orukọ Jesu. Amin.

Ki o ni ọsẹ alarinrin.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Njẹ o tilẹ n gbe aye nitootọ? | Pst. J.O. Lawal. | Igbe 17, 2022. | Vol. 10, No. 50 Read More »

Ko ni i ṣe pẹlu jijẹ gaba lori wọn | Pst. J.O. Lawal | Igbe 03, 2022. | Vol. 10, No. 48

Leave a Comment

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa at Jesu Kirisiti Oluwa wa. Mo fi tayọtayọ ki ọ kaabọ sinu ọsẹ miran ninu oṣu Igbe 2022. Mo si gbadura pe ki a ma fi gbogbo igba kọ ọ lati sin Ọlọrun tọkantọkan, ki o ba le ri ohun rere gbogbo ti o ni i ṣe pẹlu ṣiṣe bẹ gba, ni orukọ Jesu. Amin.

Wayi o, ti ẹnikẹni ninu wa ba fẹ sin Ọlọrun pẹlu tọkantọkan nitootọ, o gbọdọ fi ọrọ wọnyi ti Jesu Oluwa wa sọ sọkan: “Ẹyin mọ pe, awọn ti a n ka si olori awọn Keferi, a maa lo ipa lori wọn: ati awọn ẹni nla wọn a maa fi ọla tẹri wọn ba. Ṣugbọn ki yoo ri bẹẹ laarin yin: ṣugbọn ẹnikẹni ti o ba fẹ jẹ olori laarin yin, oun ni yoo ṣe iranṣẹ yin: Ati ẹnikẹni ninu yin ti o ba fẹ ṣe olori oun ni yoo ṣe ọmọ-ọdọ gbogbo yin. Nitori ọmọ eniyan tikalararẹ ko wa ki a ba maa ṣe iranṣẹ fun un, bi ko ṣe lati maa ṣe iranṣẹ funnni, ati lati fi ẹmi rẹ ṣe irapada fun ọpọlọpọ eniyan.” (Maaku 10:42-45)

Njẹ o ri bayi pe Oluwa ko lodi si ki a di giga? O fẹ ki a jẹ ẹni giga, paapaa julọ ninu ijọba rẹ. Amọ ṣa o, O tun wa fẹ ki a mọ pe ọna kan ṣoṣo ti Ọlọrun fi le ri wa bi ẹni giga ninu ijọba rẹ ni ki a fi ara wa jin lati ma sin awọn miran. Eyi ko wa tunmọ si pe ki a sọ ara wa di ẹru gbogbo eniyan, ki a si jẹ ki wọn ma ṣe wa tabi sọrọ si wa bi o ti ṣe wu wọn. Dipo eyi, o tunmọ si pe, pẹlu ọkan irẹlẹ, ki a fi ara wa si ipo ti O ti le lo wa lati mu ifẹ rẹ ṣe ninu aye awọn eniyan.

Bi Oluwa ti ṣe fi ye wa ninu ẹsẹ bibeli yẹn, Oun funrarẹ wa si aye lati sin awọn eniyan ni, ko ki i ṣe lati jẹ ki wọn sin in. Ọna wo ni o si gba sin wọn? O sin wọn nipa ṣiṣe awọn nkan ti yoo jẹ ki ifẹ Ọlọrun wa si imuṣẹ ninu aye wọn. Fun apẹẹrẹ, O kọ wọn ni ọrọ Ọlọrun, O wo awọn alailera wọn san, O ji awọn oku wọn dide, O si tun ku nikẹyinkẹyin fun ẹṣẹ wọn. Ki si ni idi? Idi ni ki wọn ba le jẹ iru ẹni ti Ọlọrun fẹ ki wọn jẹ, ni ẹmi, ni ọkan ati ni ara.

Ni ọna kanna, o yẹ ki awa naa ma sin awọn eniyan bi O ti ṣe ṣe. Bi o tilẹ jẹ wipe ko si ẹni ti o ran wa lati ku fun ẹṣẹ ẹnikẹni, ọpọ nkan miran ni a le ṣe lati sin awọn eniyan, ki a si mu ki ifẹ Ọlọrun wa si imuṣẹ ninu aye wọn. A le ma gbadura fun wa, kọ wọn ni ọrọ Ọlọrun, pin nkan ini wa fun wọn, tọ wọn sọna ti wọn ba n kuna, mojuto ọrọ aye wọn, jẹ ki ile ipade wa rọrun fun wọn lati jọsin, ran iṣẹ iranṣẹ wọn lọwọ ati bẹẹbẹẹ lọ.

Ni kukuru, ti a ba n sọrọ nipa iṣẹ isin ninu ijọba Ọlọrun, o ni i ṣe pẹlu nkan ti a le fun awọn eniyan dipo nkan ti a le rigba lọwọ wọn. O wa ṣeni laanu pe ọpọ ni eyi ko ye. Nitorina, ọpọ igba ni wọn ma n ro pe iṣẹ isin ninu ijọba Ọlọrun ni i ṣe pẹlu ki a ni agbara lati ṣakoṣo awọn ọmọ Ọlọrun bi a ti ṣe fẹ ati lati gba ohunkohun ti o ba wu wa ni ọwọ wọn. Awọn kan tilẹ ṣetan lati ṣe nkan yowu ti o ba gba lati ni agbara lori awọn ọmọ Ọlọrun. Idi niyi ti a fi ni awọn adari ijọ loni ti o n lo ẹmi oṣo, ẹmi ajẹ, afọṣẹ, itanjẹ ati bẹẹbẹẹ lọ lati ṣiṣẹ.

Iru awọn wọnyi ko yatọ si Simoni oṣo ti igba aye bibeli, ti o fẹ ra ẹbun Ọlọrun pẹlu owo. Ki si ni idi? O fẹ fi dandanla wa ni ipo apaṣẹ lori awọn ara ilu rẹ bi o ti ṣe tẹlẹtẹlẹ. Iru wọn ko si tun yatọ si Diotirifisi igba aye bibeli ti o ṣetan lati ba awọn apọsiteli Oluwa wọ iya ija nitoripe o ṣa a fẹ ni aṣẹ lori awọn ọmọ Ọlọrun. Otitọ ọrọ wa ni pe irufẹ awọn wọnyi ko le rin jinna ninu ilepa wọn lati jẹ gaba lori awọn eniyan Ọlọrun. Idi si nipe, bopẹ-boya, Ọlọrun, ti O ni gbogbo ẹmi, yoo da ṣeriya fun wọn ni ibamu pẹlu iṣẹ ọwọ wọn. (Wo: Iṣe Apọsiteli 8:14-24; 3Johannu 9-10)

Nitorina, ma ṣe ṣe awokọṣe wọn tabi rin ni ipasẹ wọn. Dipo eyi, ṣe awọkọse Jesu Oluwa wa, ti O fi ara rẹ jin lati sin wa, ki aye wa ba le jẹ amuṣẹ ifẹ Ọlọrun. Ọlọrun yi, ti ko si ki i rẹ ẹnikẹni jẹ, yoo pin ọ lere bi o ti ṣe tọ ati yẹ fun ohun gbogbo ti o n ṣe fun awọn eniyan rẹ, ti o ko ba rẹwẹsi.

Ki o ni ọsẹ ti o ga.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ko ni i ṣe pẹlu jijẹ gaba lori wọn | Pst. J.O. Lawal | Igbe 03, 2022. | Vol. 10, No. 48 Read More »

Wu wọn lori lati jẹ ki Ibukun rẹ ṣiṣẹ | Pst. J.O. Lawal | Igbe 03, 2022 | Vol. 10, No. 48

1 Comment

Olufẹ: ki oore-ọfẹ ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu tuntun miran ninu ọdun yi, iyẹn oṣu Igbe. Adura mi si ni pe ki o ri ifarahan ẹkunrerẹ Ibukun Ọlọrun ninu aye rẹ ni gbogbo oṣu naa, ni orukọ Jesu. Amin.

Gẹgẹ bi a ti sọ fun wa ninu bibeli, ti o si jẹ okodoro ọrọ, Ọlọrun ti bukun fun wa pẹlu gbogbo ibukun ẹmi ti o wa ninu awọn ọrun (Efesu 1:3). Nitorina, ko si ẹnikankan ti o tun le fun ọ ni ibukun miran tabi ibukun ara ọtọ kan tabi ibukun ti o ga ju eyi ti Ọlọrun ti fun ọ lọ. O ti ni gbogbo Ibukun ti o nilo ninu aye yi lati jẹ ohun gbogbo ti o yẹ ki o jẹ ati lati gbadun ara rẹ ni ọna ti o peye.

Amọ ṣa o, niwọn igba ti o jẹ wipe nkan ẹmi pọnbele ni Ibukun jẹ, a gbọdọ mọ bi a ti ṣe le jẹ ki o ṣiṣẹ, ki iriri rẹ ti a o ni ma ba jẹ ninu ẹmi nikan. Eyi jasi pe, a nilo lati ri ifarahan awọn Ibukun ti a ti rigba lati ọwọ Ọlọrun ninu ẹmi nipa ti ara pẹlu. Aijẹbẹ, awọn ti aye yi ko ni ri wa bi alabukunfun rara ati pe awọn naa gan paapaa ko ni jẹ igbadun aye wa bi o ti ṣe tọ gẹgẹ bi ẹni ti a bukun fun.

Bawo wa ni a ṣe le jẹ ki Ibukun Ọlọrun ṣiṣẹ? Akọkọ, a le jẹ ki wọn ṣiṣẹ nipa sisọ nkankanna pẹlu Ọlọrun nipa aye wa ati nipa ṣiṣiṣẹ tọ ọrọ wa lẹyin. Nkan ti eyi tunmọ si ni pe nigbakugba ti a ba n sọ nkankanna pẹlu Ọlọrun lori ododo wa, alaafia wa, ilera wa, iṣoriire wa, aabo wa ati awọn nkan daradara ti aye yi miran, ti a si tun n gbe igbesẹ ni ibamu pẹlu nkan ti a n sọ, nṣe ni a n mu ki Ibukun Ọlọrun ṣiṣẹ. Bopẹ bosiya, a o bẹrẹ si ni ri ifarahan nipa ti ara awọn nkan ti o jẹ otitọ nipa aye wa ninu ẹmi.

Ekeji, a le mu ibukun Ọlọrun ṣiṣẹ nipasẹ adura gbigba. Jesu sọ wipe, “Ẹ beere, ẹ o si ri gba, ayọ yin yoo si kun.” Eyi tunmọ si pe nipasẹ adura a le ri ifarahan awọn nkan ti Ọlọrun ti wulẹ fun wa ninu ẹmi lojutaye. Eyi, bi Jesu Oluwa wa si ṣe sọ, jẹ ọna kan ti a fi le jẹ ki ayọ wa kun lori awọn oniruuru nkan ti o ni i ṣe pẹlu aye wa. (Wo: Johanu 16:24)

Ọna miran lati mu Ibukun Ọlọrun ṣiṣẹ ninu aye wa ni ki awọn miran, paapaa julọ awọn ti o ni aṣẹ kan tabi omiran lori aye wa, pe Ibukun rẹ sori wa. Ma ṣe gbagbe pe mo ti sọ siwaju pe ko si ẹni naa ti o le fun wa ni Ibukun ti o ga, dara tabi pọ ju eyi ti Ọlọrun ti fun wa lọ. Ṣugbọn, awọn kan wa, nitoripe Ọlọrun ti fun wọn ni aṣẹ kan tabi omiran lori wa, le mu ki awọn ibukun rẹ kan ti o ti jẹ tiwa tẹlẹ ṣiṣẹ nipasẹ ọrọ adura wọn. Eyi yoo si jẹ ki a bẹrẹ si ni ri ifarahan awọn Ibukun naa ninu aye wa.

Nkan ti mo n sọ ni pe awọn ti o ni aṣẹ nitootọ lori aye wa lọna kan tabi omiran, gẹgẹ bi awọn obi wa, adari ijọ wa, ọkọ wa, olugbawaṣiṣẹ, ọga wa lẹnu iṣẹ ati awọn adari ilu tabi ti ijọba wa, le mu awọn ibukun Ọlọrun kan tabi omiran ṣiṣẹ ninu aye wa nipaṣẹ ire ti wọn ti ọkan ṣu fun wa. Idi si niyi ti a fi gbọdọ kọ lati ma mu inu wọn dun, ni ibamu pẹlu ifẹ Ọlọrun, ki ori wọn ba le ma ya loorekoore lati pe ire Ọlọrun sori wa.

Fun apẹẹrẹ, bi o tilẹ jẹ wipe ibukun ti a fun Aburahamu ti fikalẹ sori ẹbi rẹ, a nilo lati mu ṣiṣẹ ninu aye ọkọọkan ninu awọn arọmọdọmọ rẹ ki wọn to le ni iriri tabi ifarahan rẹ. Fun apẹẹrẹ, ti a ba wo aye Isaki, a ri wipe igbọran rẹ si Ọlọrun ni akoko iyan buruku kan ni o kẹ ki Ibukun yi ṣiṣẹ fun iṣoriire rẹ laye (Jẹnẹsisi 26). Lafikun, adura rẹ fun aya rẹ tun jẹ ki Ibukun yi ṣiṣẹ lodi si iyagan wọn, ti awọn naa si di ọlọmọ laye (Jẹnẹsisi 25:21). Ṣugbọn ni ti Isọ, a ri wipe ire Isaki ni o yẹ ki o mu Ibukun yi ṣiṣẹ ninu aye rẹ. Nitorina, Isaki paṣẹ fun lati pese ounjẹ adidun ti yoo mu ki inu oun dun to bẹẹ gẹẹ ti oun yoo gbadura pataki ti yoo mu ki Ibukun baba oun ṣiṣẹ ninu aye rẹ fun. Bi o wa tilẹ jẹ wipe Isọ kọ ni o pada gba Ibukun yi, Jakọbu, ẹni ti o gba a, ko kuna rara lati mu inu baba wọn, Isaki, dun pẹlu ounjẹ ara ọtọ ti o gbe wa fun. Nitorina, Ibukun naa di titu silẹ lati ṣiṣẹ ninu aye rẹ nipa ire Isaki, aye rẹ ko si ri bakanna mọ lati igba naa lọ.

Nibakanna, ti awa naa ba kọ lati ma mu ki inu awọn ti o ni aṣẹ lori wa dun nipasẹ awọn nkan ti a n ṣe fun wọn ati ṣi wọn, ọpọ igba ni a o ri pe ori wọn yoo wu lati sọ awọn ọrọ ti yoo jẹ ki awọn Ibukun Ọlọrun kan ṣiṣẹ ninu aye wa, ti a o si bẹrẹ si ni ri ifarahan awọn Ibukun naa lojutaye. Ṣugbọn ti a ba ro pe ọrọ ire wọn ko ja mọ nkankan si wa, boya nitori imọ ti a ni pe a kuku ti gba gbogbo Ibukun ọrun lati ọwọ Ọlọrun, a jẹ wipe awọn ifarahan awọn Ibukun Ọlọrun kan wa ti a le ma ni titi ọjọ aye wa yoo fi tan lorilẹ niyẹn. Nitorina, ẹ jẹ ka kẹkọ lati ara Jakọbu, ki a si ma wo, loorekoore, awọn ọna ti a le gba wu awọn ti o ni aṣẹ lori wa lori lati mu Ibukun Ọlọrun ṣiṣẹ ninu aye wa. Ki Ọlọrun si rẹ ọkan wa silẹ lati mu ọrọ yi lọkunkundun, ni orukọ Jesu. Amin.

Ọsẹ ire o.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Wu wọn lori lati jẹ ki Ibukun rẹ ṣiṣẹ | Pst. J.O. Lawal | Igbe 03, 2022 | Vol. 10, No. 48 Read More »

Ere ẹni ami-ororo Oluwa | Pst. J.O. Lawal |Ẹrẹna 27, 2022 | Nọmba: Vol. 10, No. 47.

Leave a Comment

Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ni mo ki ọ kaabọ sinu ọsẹ ati awọn ọjọ ti o kẹyin Oṣu Ẹrẹna 2022. Mo si gbadura pe ki Ọlọrun jẹ ki ojurere rẹ ru bo ori aye rẹ lọsẹ yi, ki o si dari oniruuru ohun rere ati ohun daradara ti iṣẹ aṣekara ko le fun ọ lailai sọdọ rẹ, ni orukọ Jesu. Amin.

Wayi o, ko to lati kan ma gbadura si Ọlọrun lati jẹ ki ojurere rẹ bori aye wa, ki oniruuru nkan iyanu si ma ṣẹlẹ si wa. O tun ṣe pataki pẹlu ki awa naa ma ṣe awọn nkan ti yoo jẹ ki ojurere rẹ ṣiṣẹ ninu aye wa. Ọkan lara awọn nkan naa si ni lilawọ si awọn ti Ọlọrun ti fi ami ororo rẹ yan lati ma bọ wa pẹlu ọrọ rẹ, lati ma gbadura fun wa ati lati ma tọ wa ni ipa ọna ododo rẹ. Wo nkan ti Jesu sọ nipa eyi: “Ẹni ti o ba gba yin, o gba mi, ẹni ti o ba si gba mi, o gba ẹni ti o ran mi. Ẹni ti o ba gba wolii ni orukọ wolii, yoo jẹ ere wolii; ẹni ti o ba si gba olododo ni orukọ olododo yoo jẹ ere olododo. Ẹnikẹni ti o ba fi kiki aago omi tutu fun ọkan ninu awọn onirẹlẹ wọnyi mu nitori orukọ ọmọ-ẹyin, loootọ ni mo wi fun yin, ki yoo padanu ere rẹ.” (Matiu 10:40-42)

Njẹ iwọ naa ri bayi? Ẹnikẹni ti o ba gba ẹni ami-ororo Ọlọrun nitori pe o gba pe lotitọ Ọlọrun ni o ran ko ni ṣalai ri ere ẹni ami-ororo naa gba. Bi o tilẹ jẹ pe ife omi tutu kan lasan ni o fun un mu, ko ni ṣalai ri ere rẹ gba. Irufẹ nkan ti ere yi yoo wa jẹ nikan naa ni ẹnikẹni ko le sọ. Iyẹn ni i ṣe pẹlu bi Ọlọrun ba ti ṣe dari ẹni ami-ororo rẹ naa lati bukun fun ẹni yowu ti ọrọ naa kan.

Fun apẹẹrẹ, ere ti arabinrin Ṣunemu gba lati ọdọ Ọlọrun nipasẹ Eliṣa ni ọmọkunrin kan ti Satani ko ri pa jẹ, lẹyin igba ti o ti jẹ agan fun ọdun melokan (2 Awọn Ọba 4:8-37). Lafikun, ere ti opo Sarefati gba lọwọ Ọlọrun lati ipasẹ Elija ni ipamọ aye rẹ ati ti ọmọ rẹ ni gbogbo akoko ti iyan ti o buru jọjọ ni ilẹ naa fi mu un (1Awọn Ọba 17). Bẹẹ si ni ere ti Maria, arabinrin Mata, gba lọwọ Jesu Oluwa fun lilawọ rẹ si ni orukọ ti a o ma fi gbogbo igba mẹnuba ati gboriyin fun ninu ijọba Ọlọrun ati ni ibi gbogbo ti a ba ti polongo ihinree (Matiu 26:6-13)

Nitorina, ko si ẹni naa ti o le sọ ni pato ọna ti Ọlọrun yoo gba pin awọn ti o lawọ si awọn iranṣẹ rẹ lere. Amọ o di dandan ki O pin wọn lere pẹlu awọn nkan ti owo, iṣẹ aṣekara tabi ọpọlọ pipe ko le ri gba lailai. O wa ṣeni laanu pe ọpọ wa ni a n padanu awọn nkan wọnyi. Ko si ki i ṣe nitoripe a ko le ri wọn gba ni a ṣe n padanu wọn. Idi ti a ṣe n padanu wọn ni pe a jẹ ahun, ọkanjua tabi alaikọbiara si nkan. Elo ni ife omi tutu kan fẹ naa ẹnikẹni ninu wa? Owo ti ko ja mọ nkan ni. Sibẹsibẹ, ọpọ wa ni a n padanu awọn ire ti ko ba jẹ ti wa nitoripe a lọra lati fun awọn ẹni ami-ororo Ọlọrun arin wa ni ife omi lasan. Iwo naa gbe ọrọ yi yẹwo.

Njẹ mo wa n sọ pe nṣe ni ki o ma le pasitọ tabi adari ijọ rẹ kaakiri pẹlu ife omi, boya oungbẹ n gbẹ tabi ko gbẹ? Rara o! Abi ṣe mo wa n sọ pe niwọn igba ti o ba ti n fun awọn adari ijọ rẹ ni ife omi tutu mu loorekoore, o ti ṣe nkan ti Ọlọrun fẹ ki o ṣe? Rara o! Lotitọ, ti o ba jẹ pe ife omi nikan ni agbara rẹ gbe nitootọ lati fi ran adari ijọ rẹ ati ẹni ami-ororo ti Oluwa ran si ọ lọwọ, ko si nkan ti o buru nibẹ. Ọlọrun yoo pin ọ lere fun un, ni ibamu pẹlu oṣuwọn rẹ.

Amọ ṣa o, otitọ ibẹ ni pe ọpọ ninu wa ni o ri jajẹ kọja ki o kan ma gbe ife omi kaakiri. Ọlọrun ko reti pe ki a ṣe kere si bi a ti ṣe to niwaju rẹ. Aijẹbẹ, nṣe ni a o ma yan ara wa jẹ. Wo nkan ti O sọ ninu ofin Mose si awọn eniyan rẹ lori ọrọ yi: “Ṣugbọn ifibu ni fun ẹlẹtan naa, ti o ni akọ ninu ọwọ-ẹran rẹ, ti o si jẹjẹẹ, ti o si fi ohun abuku rubọ si Oluwa; nitori Ọba nla ni Emi, ni Oluwa awọn ọmọ-ogun wi, ẹru si ni orukọ mi laarin awọn keferi.” (Malaki 1:14) Njẹ o ri bayẹn? Amọ ṣa, a dupẹ lọwọ Ọlọrun pe a ko si labẹ egun kankan nitoripe Jesu ti ba wa yanju ohun gbogbo ti o ni i ṣe pẹlu egun. Ṣugbọn, a kọ eyi silẹ lati kọ wa pe iwa ailọwọ gbaa ni lati fun Ọlọrun tabi awọn iranṣẹ rẹ ni nkan ti o kere si ibukun rẹ lori aye wa. Irufẹ iwuwasi yi ni o si ṣọ Ananaya ati Safira aya rẹ di ẹni ti Ọlọrun n lu pa dipo ki o pin ni ere (Iṣe Apọsiteli 5:1-11).

Adura mi wa ni pe a ko ni farapa, di oku tabi di ẹni ti a n rẹ silẹ ni ibi ti o yẹ ki Ọlọrun ti san wa lẹsan pẹlu oniruuru nkan daradara. Amọ awa naa gbọdọ tọ ara wa lati ni iwuwasi ti o tọ lori lilawọ si Ọlọrun ati awọn ti O n lo lati bukun fun wa. Ki Ẹmi rẹ rere si jẹ ki eyi ri bẹ fun ẹnikọọkan wa, ni orukọ Jesu. Amin.

Ọsẹ ayo o.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ere ẹni ami-ororo Oluwa | Pst. J.O. Lawal |Ẹrẹna 27, 2022 | Nọmba: Vol. 10, No. 47. Read More »

Ma sọ imọ ohun ti ọ tọ nu | Paito J.O. Lawal

Leave a Comment

Ọjọ: Ẹrẹna 20, 2022 | Atẹlera: Latori tabili Paitọ| Nọmba: Vol. 10, No. 46

Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa ati Olugbala wa. Kaabọ sinu ọsẹ miran ninu oṣu Ẹrẹna 2022. Adura mi ni pe awọn ibi ọjọ ikẹyin yi ko ni ya ọ niwere ati pe ko ni jẹ ki iwọ naa pada da awọn nkan ti o ti fi gbogbo ọjọ aye rẹ lodi si, ni orukọ Jesu. Amin.

Bibeli sọrọ nipa asiko kan ni ilẹ Isiraẹli ti ẹnikọọkan n ṣe ohun ti o tọ loju ara rẹ (Onidajọ 17:6 & 21:25). Eyi jasi pe, fun apẹẹrẹ, ti ẹnikan ba ro pe nkan ti o tọ ni lati mu ọmọbinrin aladugbo rẹ kan ṣaya, lalai gba aṣẹ lọdọ baba onitọun, o le e ṣe bẹ ẹ, niwọn igba ti o ba ti ni ipa tabi agbara lati ṣe bẹ ẹ. Iwọ naa wa wo bi iwa ika yoo ti ṣe gbilẹ to ni ilẹ naa ni akoko yẹn. Awọn eniyan n wu oniruuru iwa aitọ, wọn si tun da ara wọn lare pe awọn n ṣe bẹ ẹ.

Ki lo wa ti wọn, gbogbo orilẹ-ede yi, sinu iru okunkun birimubirumu yi? Sisọ imọ nkan ti o tọ nu lo tiwọn sibẹ. Ma gbagbe pe a ko imọ ifihan Ọlọrun lori bi a ṣe n gbe ninu ododo le awọn eniyan wọnyi lọwọ. Nitorina, wọn wa ni ipo lati mọ ohun ti o tọ ati ohun ti ko tọ. Ti akoko kan ba wa de ninu igbesi aye wọn, ninu eyi ti o jẹ wipe imọ ohun ti o tọ tabi ti ko tọ wa di ọrọ oju ti ẹnikọọkan ba fi wo, a jẹ wipe wọn ti kọ ọrọ Ọlọrun silẹ niyẹn. Eyi si lo fa ti wọn fi bẹrẹ si ni fa ara wọn ya pẹrẹpẹrẹ, ti wọn si n ba ilẹ wọn jẹ pẹlu itajẹsilẹ ati oniruuru iwa eeri. Nitorina, wọn ko le ṣe rere gẹgẹ bi orilẹ-ede tabi gberi laarin awọn orilẹ-ede agbaye yoku ni igba naa. (Wo: Onidajọ 17-21)

Nibakanaa, igbakigba ti awa naa ba pa ọrọ Ọlọrun ati ifihan rẹ lori bi a ti ṣe n gbe aye ti ṣẹgbẹ kan, o di dandan ki a sọ imọ ohun ti o tọ ati eyi ti ko tọ nu. Nibi ti eleyi ba si ti ri bẹ ẹ, awọn nkan ti yoo pa aye wa ati awujọ wa lara ati awọn nkan ti yoo jẹ ki alaafia, ayọ ati iṣoriire jina si wa nikan naa ni a o ma ṣe. Wo ọpọ lara awa ti a pe ara wa ni Kirisitiẹni loni. Njẹ a n gbe aye wa lori gbedeke ọrọ Ọlọrun bi tabi lori oju ti a ba fi wo bi nkan ti ṣe ri? Ti a ba n gbe aye wa lori gbeke ifihan Ọlọrun, o di dandan ki a mọ, fun apẹẹrẹ, pe awọn nkan bi ibaraẹnilopọ laigbeyawo, riba gbigba, irọ pipa, ibanijẹ, odi yiyan, lilu owo ilu ni ponpo, iwe yiyi, ogun owo ṣiṣe, iṣẹ gbajuẹ ati awọn nkan buruku miran ti ọpọ wa n ṣe laibikita loni ko dara.

Ṣugbọn a ko ri nkan ti ko dara pẹlu awọn nkan wọnyi mọ. Idi si ni pe oju ara wa ni a fi n wo bi nkan ti ṣe ri, ti a si fi n ṣe idajọ nkan ti o tọ ati eyi ti ko tọ, ko ki i ṣe oju Ọlọrun mọ. Awa naa ti wa dabi awọn ti aye yi, ti wọn ti sọ imọ ohun ti o tọ ati eyi ti ko tọ nu, ti wọn si wa n fi tayọtayọ sọ pe ko si nkan ti o buru ninu ki ọkunrin ma ba ọkunrin ẹgbẹ rẹ lopọ ati awọn nkan radarada miran ti o fi ara pẹ — ohun gbogbo ni i ṣe pẹlu oju ti ẹnikọọkan ba fi n wo o. Bi mo ṣe wa sọ tẹlẹ, ibikibi ti ọrọ ba ti ri bi eyi, ko si ni ki a ma ba aye ara wa ati ti awọn miran pẹlu jẹ, nikẹyinkẹyin.

Wayi o, ọpọ igba lo wa jẹ pe a le ma ba aye ara wa jẹ ki a ma mọ lẹsẹkẹsẹ pe a n ṣe bẹ. Fun apẹẹrẹ, ko han kedere si Samusoni lẹsẹkẹsẹ pe ẹṣẹ agbere ti o tọwọ bọ n ba aye rẹ jẹ. Ṣugbọn ẹṣẹ yi n yọ kẹlẹkẹlẹ sọ di alailagbara ati alailokun ninu ọkan rẹ. Akoko kan si wa de ti ẹṣẹ naa bori rẹ patapata, ti o si ṣọ di ẹlẹmi kukuru. (Wo: Onidajọ 16)

Nitorina, bi ko ba tilẹ da bi ẹni pe awọn nkan aida ti o n kopa ninu rẹ n ba aye rẹ jọ lọwọlọwọ bayi, ọjọ kan n bọ ti iwọ naa yo ri kedere pe awọn nkan yi ti n ba aye rẹ jẹ lọna ti ko han si ọ tipẹtipẹ. Adura mi si ni pe ki Ọlọrun da imọ ohun ti o tọ ati ti o yẹ pada sinu ọpọlọ rẹ, ki O si tun dari rẹ lati ronupiwada lọgan, ki ọjọ iparun ati idojuti ti o n bọ wa ma ba de saye rẹ nikẹyinkẹyin. Amin.

Ki o ni ọsẹ iyanu.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ma sọ imọ ohun ti ọ tọ nu | Paito J.O. Lawal Read More »

Ki O ba le kọ ọ bi a ti ṣe n jagun | Paito J.O. Lawal

Leave a Comment

Ọjọ: Ẹrẹna 13, 2022 | Atẹlera: Latori tabili Paitọ | Nọmba: Vol. 10, No. 45

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Olurapada wa. Kaabọ sinu ọsẹ tuntun miran ninu oṣu yi. Mo gbadura pe ki a ma fi gbogbo ṣe ọkan rẹ yẹ pẹlu igboya ti o peye lati ṣe amulo oore-ọfẹ Ọlọrun lati rin ninu iṣẹgun lori idojukọ yowu ti o le ba pade ni aye yi, ni orukọ Jesu. Amin.

Ọpọ igba ni awọn eniyan ma n fẹ mọ idi ti Ọlọrun nigbamiran fi ma n fi aye silẹ fun awọn ọmọ rẹ lati ni awọn idojukọ kan tabi omiran ni aye yi. Ṣe nitoripe ko ni ifẹ wọn ni? Rara o! Ṣe nitoripe ọrọ wọn ko fi taratara mumu laya rẹ ni? Rara o! Abi ṣe nitoripe ọrọ aye wọn ko jẹ logun ni? Rara o! Ki wa gan lo fa ti O fi ma n fi aye gba Satani, olori-ọta awọn ọmọ rẹ, lati kọju ija si wọn pẹlu oniruuru idojukọ ati idanwo ti o ṣeeṣe ki o pa wọn run?

Ka ma ṣaroye pupọ, a ni idahun ti o dangajia si awọn ibere yi ninu bibeli. Fun apẹẹrẹ, a sọ eyi fun wa ninu rẹ: “Ko si idanwo kan ti o ti i ba yin, bi ko ṣe iru eyi ti o mọ niwọn fun eniyan: ṣugbọn olododo ni Ọlọrun, ẹni ti ki yoo jẹ ki a dan yi wo ju bi ẹyin ti le gba; ṣugbn ti yoo si ṣe ọna atiyọ pẹlu ninu idanwo naa, ki ẹyin ki o ba le gba a.” (1Kọrinnti 10:13) Pẹlu nkan ti a sọ fun wa nibi, a ri idi mẹta pataki ti Ọlọrun fi n jẹ ki a dojukọ iṣoro ati idanwo laye. Idi akọkọ lara wọn si nipe awọn eniyan bi ti wa ti dojukọ irufẹ iṣoro tabi idojukọ yowu ti a le ma dojukọ, gẹgẹ bi a ti ri awọn eniyan ti o n dojukọ irufẹ iṣoro yowu ti a le ma dojukọ lọwọlọwọ yi. Nitorina, a ko gbọdọ ri idojukọ tabi idanwo kankan ti o ba ba wa gẹgẹ bi kayefi, nitoripe ko ki i ṣe kayefi. Dipo eyi, o jẹ eyi ti o wọpọ laarin awọn eniyan.

Idi miran ti Ọlọrun fi n fi aye silẹ fun wa lati dojukọ awọn nkan wọnyi ni pe Oun ni alakoso aye ati gbogbo ẹda lapapọ. Nitorina, O ni agbara lati sọ irufẹ iṣoro ti yo wa sinu aye wa tabi ti ko ni wa. O si ti wa ṣe ileri pe Oun ko ni jẹ ki a dojukọ iṣoro kankan ti a ko ni le bori. Nitorina, ti o ba wa sọdọ rẹ, mọ wipe idi ni pe Ọlọrun mọ pe o le bori rẹ. Njẹ o wa le bori iṣoro tabi idojukọ yowu ti o ba wa si ọdọ rẹ lotitọ bi? Bẹẹni, o le bori rẹ. O le bori rẹ nitoripe Ọlọrun yoo ri daju pe ohun gbogbo ti o nilo lati bori rẹ ni o wa ni ikawọ rẹ. Eyi si ni idi kẹta ti O fi n fi aye gba isoro lati ya ọdọ wa. O n fi aye gba wọn nitoripe O mọ pe ipese rẹ fun wa lati bori wọn ti wa nilẹ fun wa.

O wa yẹ ki o ri bayi pe ko si ikankan lara wa ti o yẹ ki o ma bẹru lati dojukọ iṣoro tabi idojukọ. Amọ ọpọ igba ni ẹru ma n ba wa lati dojukọ wọn. Ki si ni idi? A fẹ wa ni ifọkanbalẹ ati lalai ni idamu kankan ni gbogbo igba. Ṣugbọn otitọ ti o wa nibẹ ni pe ti a ko ba ba idojukọ pade laye, awọn ipo wa ti a ko le de, awọn nkan wa ti a ko le gbese ati pe awọn irufẹ igbadun ati itura kan wa ti a ko le ni iriri wọn. Niwọn igba ti Ọlọrun si mọ eyi, ni oorekoore, O ma n fi aye gba awọn iṣoro tabi idanwo oniruuru lati wọ inu aye wa wa. Nipa eyi, a o le kọ lati ṣe amulo oore-ọfẹ rẹ ti o to bẹẹ, ti o si tun ju bẹẹ lọ, fun wa lati rin ni iṣẹgun lori wọn ati lati gba aye ti o tọ si wa laye.

Iwọ naa wo nkan ti a sọ lori ọrọ yi nipa bi O ti ṣe ba awọn ọmọ Isiraẹli lo pọ:

“Iwọnyi ni awọn orilẹ-ede ti Oluwa fi silẹ, lati maa fi wọn dan Isiraẹli wo, ani iye awọn ti ko mọ gbogbo ogun Kenaani; Nitori idi yii pe, ki iran awọn ọmọ Isiraẹli le mọ, lati maa kọ wọn ni ogun, ani iru awọn ti ko ti mọ ọn ni iṣaaju ri. Awọn ni awọn Filistini marun-un, ni gbogbo awọn Kenaani, awọn ara Sidoni ati awọn Hifi ti n gbe oke Lebanoni, lati oke Baali-hamoni lọ de atiwọ Hamati. Iwọnyi ni a o si maa fi dan Isiraẹli wo, lati mọ bi wọn o feti si ofin Oluwa ti o fi fun awọn baba wọn lati ọwọ Mose wa.” (Awọn Onidajọ 3:1-4) Njẹ o ri bayi? Ọkan lara idi ti Ọlọrun fi fi awọn ọta awọn ọmọ Isiraẹli yi silẹ si ayika wọn ni lati kọ wọn ni bi a ti ṣe n jagun. Eyi tunmọ si pe O fi wọn silẹ lati kọ wọn lati ṣe amulo oore-ọfẹ rẹ. Ọwọ wọn lo wa ku si lati ṣe amulo ọrọ oore-ọfẹ rẹ fun iṣẹgun wọn lori awọn ọta yi tabi lati kọ ọrọ rẹ silẹ, si ikuna, abamọ ati idojuti.

Ni bakanna, a gbọdọ kọ lati ri gbogbo awọn idojukọ wa gẹgẹ bi ọna fun Ọlọrun lati kọ wa ni ijagun ẹmi dipo ti a o fi ma bẹru wọn tabi ti a o fi sọreti nu nitori wọn. Bẹẹni, a gbọdọ ri wọn gẹgẹ bi ọna lati mu ọrọ Ọlọrun ni ọkunkundun ati lati ṣe amulo oore-ọfẹ rẹ fun iṣẹgun wa. Niwọn igba ti a ba si n gbe aye wa lọna yi, a ko tun ni fi igba kankan bẹru idojukọ kankan mọ. Dipo eyi, a o ma fi gbogbo igba darapọ mọ Pọọlu lati ṣe amulo oore-ọfẹ Ọlọrun ati lati ma sọ pe, “Ninu gbogbo nkan wọnyi, awa ju ẹni ti o ṣegun lọ nipa ẹni ti o fẹ wa.”

Ki O ni ọsẹ ti o ga.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ki O ba le kọ ọ bi a ti ṣe n jagun | Paito J.O. Lawal Read More »

Ẹbun ololufẹ | Paito J.O. Lawal

Leave a Comment

Ọjọ: Ẹrẹna 06, 2022 | Atẹlera: Latori tabili Paitọ | Nọmba: Vol. 10, No. 44

Olufẹ: ki oorẹ-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ tuntun miran ninu oṣu Ẹrẹna 2022. Adura mi si ni pe ki a kọ ọkan rẹ lati mọ ifẹ Ọlọrun siwaju ati siwaju si, ki o ba le ma fi gbogbo igba fi ara rẹ ati awọn nkan ini rẹ jin fun lalai fa sẹyin rara. Amin.

Ki ni idi ti Maria, arabinrin Mata, ṣe gbe keregbe ikunra oloorun didun ti o niye lori pupọ, ti o si tu gbogbo ikunra inu rẹ si ẹsẹ Jesu? Idi ni pe o fẹran rẹ gidigidi. Ki si ni idi ti o ṣe fẹran rẹ gidigidi? Idi ni pe Jesu naa ti fi ifẹ ailodiwọn han si arabinrin yi ati idile rẹ. Ranti pe ọrẹ ni Jesu jẹ si idile arabinrin yi, ti O si ma n fi gbogbo igba bẹ wọn wo lati mọ bi o ti ṣe n lọ pẹlu wọn, ti O si tun n yi aye wọn pada pẹlu awọn ẹkọ ti O n kọ wọn. Si ranti pẹlu pe Oun kan yi naa ni o ji arakunrin ọmọbinrin yi dide kuro ninu oku, lẹyin igba ti a ti gbe sinu iboji fun ọjọ mẹrin gbako. Ni ọjọ ti o si wa tu ikunra oniyebiye yi si ẹsẹ Jesu, nṣe ni a n ṣe ase lati mọ riri rẹ fun awọn nkan ti O ti ṣe fun idile naa.

Nitorina, nitoripe Maria ti mọ ifẹ Oluwa, ti o si tun ti jẹ igbadun rẹ ni o ṣe yẹẹ si pẹlu nkan ini rẹ bi o ti ṣe ṣe. Bi o tilẹ wa jẹ pe nkan ti o fi fun un yi jẹ nkan ti o niye lori pupọ, ti o niye lori debi pe O to san owo oṣu ẹnikan fun odidi ọdun kan, ko wo o pe o ti pọju lati lo lati yẹẹ si. Nitorina, Oluwa sọ wipe gbogbo ibi ti a ba ti waasu ihinrere ni agbaye ni a o ti ma sọ nkan ti arabinrin yi ṣe ni iranti rẹ. Idi naa si ni yi ti a ṣe n ka, ti a si tun ṣe n sọrọ nipa rẹ loni. (Wo: Matiu 26:6-13; Maaku 14:1-9; Johanu 12:1-8)

Nibakan naa, ti awa naa ba ti mọ ifẹ Oluwa, ti a si tun ti n gbadun rẹ, ti a ba ti gba aye wa la nitootọ, ti a si tun ti yi wọn pada nipasẹ ifẹ rẹ, o di dandan ki awa naa fẹ fi ifẹ han si pada. Ti o ba si ri bẹ, ko ki i ṣe aye wa nikan ni a o fẹ ki o jẹ tirẹ, a o tun fẹ ki ohun gbogbo ti a ni jẹ tirẹ pẹlu. Ki a ma tilẹ fa ọrọ gun, ko si nkan ti a ni ti a ro pe o pọju lati fifun un.

Wo bi a ti ṣe n mojuto awọn ibaṣepọ wa nipa ti ara, fun apẹẹrẹ. A ko ki i ṣaba bikita bi awọn nkan ti a ba fẹ fun ẹni ti a fẹran gidigidi ti ṣe wọn si. Dipo eyi, nkan ti a o ma bere lọwọ ara wa ni, “Njẹ owo ti o wa lọwọ mi to ra nkan yi?” Ti a ba si ti ri mọ pe a ni owo ti o to lati ra ohun yowu ti a ba fẹ fun ẹni naa ti a fẹran, nṣe ni a ra a ni kiakia lalai ṣeju pẹrẹ.

Ki ni koko nkan ti mo n ṣọ? Oun naa ni pe ti o ko ba ki fifun Oluwa ati ọrọ rẹ ni ọna ti o ga, o ṣeeṣe pe ifẹ rẹ si ni ko to nkan.Ti ifẹ rẹ si ba pọ gidigidi, wa a fun ni ohukohun lati yẹẹ si, lalai wo bi nkan naa ti ṣe wọn to tabi nkan ti awọn eniyan yoo sọ le lori. Awọn eniyan ṣaroye lori ẹbun Maria si Jesu. Wọn sọ pe o kan fi ṣofo ni. Wọn sọ pe ko mọ owo naa rara. Ṣugbọn ṣe o bikita? Rara! Ṣe Oluwa wa naa gan tilẹ bikita? Rara o. Dipo eyi, Oluwa sọ `pe, “Anfaani lati yẹ mi si ninu ifẹ bi eleyi ko ni fi gbogbo igba wa nibẹ fun yin. Amọ nisisiyi ti o wa nibẹ, arabinrin yi ti ṣe ohun ti o tọ nipa ṣiṣe amulo rẹ.”

Wo o, awọn olufẹ Ọlọrun tootọ nikan naa ni o ma ṣe idamọ awọn anfaani lati yẹ ẹ si pẹlu nkan ini wọn. Nitorina, ti iwọ ko ba i ti ma a ri anfaani lati yẹ Ọlọrun si pẹlu nkan ini rẹ, boya ni ọna ti o ga ni o tabi ni ọna ti o kere, o yẹ ki o yẹ itara ina ifẹ rẹ si i wo. Idi si ni pe ojoojumọ ni anfaani lati yẹ ẹ si ma n farahan. Amọ ṣa o, awọn ọkan ti o ba kun akunwọsilẹ pẹlu ifẹ si nikan naa ni yoo ri awọn anfaani yi, ti yoo si tun ṣe amulo wọn. Adura mi si ni pe ki a kun ọkan rẹ pẹlu ifẹ si i, ki iwọ naa ba le ma fi gbogbo igba da awọn anfaani lati yẹ ẹ si ni ọna ti awọn eniyan ko ni dẹkun lati ma sọrọ nipa mọ .

Ki o ni ọsẹ alarinrin.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ẹbun ololufẹ | Paito J.O. Lawal Read More »