Blog – Page 23 – Búlọ́ọ̀gì Wa | Ìjọ Òtítọ́ Bíbélì

Tan ìhìnrere náà kálẹ̀. | Pst. J.O. Lawal. | Òkúdù 19, 2022. | Vol. 11, No. 7

Olufẹ: ki oore-ọfẹ ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu yi. Mo gbadura pe ki a ka ọ yẹ fun ipe Ọlọrun ti o ti ri gba ninu ọsẹ naa ati ni gbogbo iyoku ọjọ aye rẹ. Amin.

Ọkan lara awọn nkan ti Oluwa n reti ki ẹnikọọkan ti o ti jẹ ajogun didara ati igbala rẹ ma ṣe ni titan ihinrere awọn nkan ti O ti ṣe fun wọn de ọdọ awọn miran. Nipa ṣiṣe eyi, awọn ti wọn ba tan ihin naa de ọdọ wọn yoo le ni iwuri lati wa sọdọ rẹ lati ni iriri didara rẹ ninu aye ti awọn naa. Fun apẹẹrẹ, lẹyin igba ti O ti tu ọkunrin were ti awọn legioni ẹmi eṣu n gbe inu rẹ silẹ tan, Oluwa sọ fun pe, “Lọ si ile rẹ ki o si sọ fun awọn ara ile rẹ, bi Oluwa ti ṣe ohun nla fun ọ, ati bi o si ti ṣaanu fun ọ.” (Maaku 5:19)

Njẹ ọkunrin yi wa ṣe bi Oluwa ti paṣẹ fun bi tabi ko ṣe bẹẹ? O ṣe bẹẹ! Ka tilẹ sọ otitọ, o ṣe ju bi a ti lero pe yoo ṣe lọ. Ko ki i ṣe awọn ara ile rẹ nikan ni o sọ nkan ti Ọlọrun ṣe fun fun. Nṣe ni o tun lọ kaakiri lati ma sọ fun gbogbo awọn ti o bikita lati gbọ tirẹ ni agbegbe kan ti a n pe ni ‘Dekapoli, eyi ti o tunmọ si ‘Ilu Mẹwa’.

Iwọ naa gbe yẹwo. Ọkunrin yi lọ kaakiri agbegbe ilu mẹwa tan, o si n sọrọ nipa nkan ti Jesu ṣe fun nibẹ. Ki ni idi? Akọkọ, idi ni pe o mọ nkan ti Oluwa ṣe fun loore gidigidi. Ekeji, idi ni pe o fẹ ki awọn miran ti wọn wa labẹ ide Satani naa mọ pe wọn le gba idande nipa titọ Oluwa wa, bi o ti wu ki ọrọ wọn buru to.

Nibakana, ti Oluwa ba ti dara si wa nitootọ ninu ijọ wa, ojuṣe wa si ni lati jẹ ki awọn miran mọ nipa rẹ. Ti o ba jẹ pe nitootọ ni O n yi aye wa pada si rere, ti O si n mu ki a ni itẹsiwaju nipasẹ ọrọ rẹ, o wa yẹ ki a jẹ ki awọn ọrẹ, ẹbi, akẹgbẹ wa ni ibi iṣẹ tabi ni ile-ẹkọ ati aladugbo mọ pe awọn naa le jẹ alajọpin didara rẹ pẹlu wa. Bi mo si ti ṣe sọ siwaju, Ọlọrun funrarẹ n reti pe ki a ṣe eyi. Idi si ni pe ọkan pataki lara awọn idi ti O fi n ṣe rere fun wa ni ki a ba le jẹ ilẹkun fun lati le wọnu aye awọn ti o wa ni ayika wa, ki O si ṣe rere fun awọn naa pẹlu.

Nkan ti eyi wa tunmọ si ni pe ti a ba kọ lati tan ihinrere didara rẹ si wa de ọdọ awọn ti o wa ni ayika wa, ko ki i ṣe pe a n fi ara wa han gẹgẹ bi alanikanjọpọn nikan, nṣe ni a tun n di iṣẹ rẹ lọwọ. Ko si wa si bi a o ṣe ma fi anikanjọpọn di iṣẹ Ọlọrun lọwọ ti a ko si ni jẹ iya rẹ, okere ni o tabi o pọ. Boya eyi gan tilẹ ni idi ti awa kan fi n ni iriri ainitẹsiwaju ninu aye wa. Yoo wa bojumu ti a ba tete ronupiwada, ki a si bẹrẹ si ni fi itara dari awọn ti o wa ni ayika wa lati ni iriri didara Ọlọrun ti a n jẹ igbadun rẹ lọwọlọwọ.

Wayi o, eyi ko wa jasi pe ki a fi túláàsì tabi àrékérekè mu ẹnikẹni lati di alabapin pẹlu wa ninu igbadun didara Ọlọrun. Dipo bẹẹ, o tunmọ si pe ki a ṣe ohun gbogbo ti o wa ni ikawọ wa lati fun iye awọn yowu ti a ba ni oore-ọfẹ lati fun ni iwuri lati wa sọdọ Oluwa funra wọn, ki wọn ba le ri bi O ti ṣe le dara si wọn ati ṣe wọn ni aanu to. Ki Ẹmi Ọlọrun si ma fi gbogbo igba kọ ọkan wa ati fun un ni okun lati mu ọrọ yi ni pataki ninu aye wa, ni orukọ Jesu. Amin.

Ki o ni ọsẹ alarinrin.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Tan ìhìnrere náà kálẹ̀. | Pst. J.O. Lawal. | Òkúdù 19, 2022. | Vol. 11, No. 7 Read More »

Fi ara rẹ si ipo irẹlẹ. | Pst. J.O. Lawal. | Òkúdù 12, 2022. | Vol. 11, No. 6

Leave a Comment

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Òkúdù 2022. Mo si gbadura pe ki Ọlọrun jẹ ki ọkan rẹ wa ni itẹriba niwaju rẹ ni gbogbo igba, ki ainitẹsiwaju ma ba gba ijọba aye rẹ, ni orukọ Jesu. Amin.

Gẹgẹ bi a ti sọ fun wa ninu bibeli, idi ti angẹli Ọlọrun ti a n pe ni Satani loni fi di ẹni ti a n pe ni Satani ni igberaga. Ni ibẹrẹ-pẹpẹ, Ọlọrun da ni pipe ninu ẹwa ati ninu ọgbọn, a si tun fi si ipo nla laarin awọn angẹli Ọlọrun yoku. Ṣugbọn nigba ti o jẹ ki ẹwa rẹ ko si lori, Ọlọrun re jabọ kuro ni ipo atata ati ipo agbara ti o wa. (Isikiẹli 28:11-19)

Ki wa ni idi ti a fi sọ eyi fun wa ninu bibeli? Oun naa ni ki a le mọ pe Ọlọrun korira igberaga. Ki lo si fa ti O fi korira igberaga? Idi ni pe igberega jẹ ami wipe a ko fẹ gbe oriyin ti o jẹ tirẹ fun lori awọn nkan daradara ti a ni tabi ti a n gbe ṣe. Bi a si ti ri ninu bibeli, gbogbo wa ko jẹ nkankan lalaisi Ọlọrun ati pe a ko le da ohunkohun ni lailisi rẹ. Oun ni ẹlẹda wa ati ẹlẹda ohun gbogbo ti o n bẹ. Nitorina, ko si nkan ti a le sogo le lori ninu aye yi tabi ninu aye eyi ti o n bọ. Òun ti wà ki ohun gbogbo to wa ati pe ohun gbogbo wa lati ọdọ rẹ, wọn si tun jẹ tirẹ. (Wo: Saamu 24:1; Kolose 1:16:17; Ifihan 4:11)

Ṣugbọn nigba ti a ba kọ lati gba ododo yi, ti a si bẹrẹ si ni ṣe bi pe a ja mọ nkan, boya si Ọlọrun tabi si awọn eniyan, nṣe ni a n gbe ara wa gori ẹṣin aáyán, ti a si n fi ara wa si ipo ti Ọlọrun yoo fi re wa jabọ, gẹgẹ bi O ti ṣe re Satani jabọ. Bibeli sọ wipe, “Ọlọrun n kọ oju ija si awọn agberega; ṣugbọn O n fi oore-ọfẹ fun awọn onirẹlẹ.” Nitorina, iru ẹni yowu ti a jẹ tabi ipo yowu ti a wa ni aye yi, ni kete ti a ba ti fi aye gba igberaga ninu aye wa, ni kete ti a ba ti bẹrẹ si ni ronu tabi wiwu bi igba ti o jẹ pe Ọlọrun ni wa naa ni a o ti ri pe O ti n doju ija kọ wa. Ti a ba si wa kọ lati ronupiwada ni kiakia, ko ni pẹ rara ti a o fi ri pe a ti di ẹni itẹmọlẹ tabi pe a ti di ero ọrun apadi. (Wo: Jemisi 4:6; 1Peteru 5:5)

Nitorina, ma ṣe fi aye silẹ fun irufẹ igberaga kankan ninu aye rẹ, bi o ti wu ki aye ma lọ ni mẹlọmẹlọ fun ọ to tabi bi ipo atata ti o wa ti le ga to tabi bi o ti wu ki o wulo ni ọwọ Ọlọrun to. Ranti pe Satani naa ti fi igba kan ri jẹ ohun elo iyin ti o ga ni ọwọ Ọlọrun. Ṣugbọn igberaga ba aye rẹ jẹ. O ṣi le ba aye awa naa jẹ pẹlu. O le fi idibajẹ sinu ẹwa, ọgbọn, imọ, ipo ati iwulo wa, ti awa naa ba fi aye gba. O le sọ wa di eranko buburu, ẹranko buburu ti Ọlọrun ko ni fẹ ba ni ohunkohun ṣe pẹlu.

Ṣe nkan ti o wa fẹ ni eyi? Ṣe o wa fẹ di ẹni ti Ọlọrun yoo ma lepa lati gbe ju sọnu tabi palẹ rẹ mọ? Mo mọ pe o ko fẹ ki nkan ri bẹ fun ọ. Ṣugbọn nkan le papa ri bẹ fun ọ, ti o ba fi aye gba irufẹ igberaga kan tabi omiran ninu aye rẹ, Nitori eyi, ṣọ ara rẹ. Kiyesi bi o ti ṣe n ba Ọlọrun ati awọn eniyan lopọ. Njẹ ki Ẹmi Ọlọrun ṣi oju rẹ si irufẹ igberaga yowu ti o le wa ninu rẹ, ki o ba le ṣe ohun ti o tọ nipa rẹ ki o to yọri si iṣubu rẹ, ni orukọ Jesu. Amin.

Ki o ni ọsẹ alarinrin.

Fi ara rẹ si ipo irẹlẹ. | Pst. J.O. Lawal. | Òkúdù 12, 2022. | Vol. 11, No. 6 Read More »

Ṣiṣẹ́ kárakára si fun un. | Pst. J.O. Lawal. | Òkúdù 05, 2022. | Vol. 11, No. 5

2 Comments

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Òkúdù 2022. Mo si gbadura pe ki ọkan rẹ ma fi gbogbo igba gba okun ati iwuri lati ma pọ si ninu iṣẹ Oluwa dipo ki o ma rẹwẹsi ninu rẹ ni gbogbo oṣu yi ati titi Oluwa wa yoo fi de. Amin.

Pọọlu, ninu lẹta rẹ kan si awọn ara Kọrinnti, sọ wipe, “Ṣugbọn nipa oore-ọfẹ Ọlọrun, ni mo ṣe ri bi mo ti ri: oore-ọfẹ rẹ ti a fi fun mi ko si jẹ asan; ṣugbọn mo ṣiṣẹ lọpọlọpọ ju gbogbo wọn lọ: ṣugbọn ki i ṣe emi, bi ko ṣe oore-ọfẹ Ọlọrun ti o wa pẹlu mi.” (1Kọrinnti 15:10) Bawo ni o ṣe ṣeeṣe fun Pọọlu lati ṣiṣẹ karakara fun Oluwa ju awọn apọsiteli rẹ yoku lọ? Nipasẹ oore-ọfẹ Ọlọrun ni. Nitorina, ko ki i ṣe nitori pe o ja fafa ju wọn lọ, ni imọ ju wọn lọ tabi ṣe olododo ju wọn lọ ni o se ṣiṣẹ karakara ju wọn lọ; dipo eyi, nitori pe o ṣe amulo ti o peye gbogbo nkan ti Ọlọrun pese fun lati sin in ni o ṣe ṣiṣẹ karakara ju wọn lọ.

Ṣe Pọọlu lotitọ wa ṣiṣẹ karakara ju gbogbo awọn apọsiteli Oluwa yoku lọ? Ni lilo oṣuwọn ti ara rẹ, o gbagbọ pe oun ṣiṣẹ julọ wọn lọ. Boya o wa jana tabi ko jana lori ọrọ yi jẹ nkan ti a o ma mọ nigba ti Oluwa wa ba de lati pin ere fun gbogbo awọn eniyan mimọ rẹ. Ṣugbọn, eyi ko ki i ṣe nkan ti o yẹ ki a ma ṣe àríyànjiyàn le lori. Nkan ti o ṣe pataki si wa lati kọbiara si lori ọrọ yi ni pe ọkunrin yi ko jẹ ki oore-ọfẹ Ọlọrun ti a tu le lori lẹkunrẹrẹ ṣofo. Dipo ki o fi ṣofo, nṣe ni o lo lati sin in tọkantọkan, lati sin lọpọlọpọ si titi ti akoko rẹ ni aye yi fi wa si opin.

Amọ ṣe awa naa le sọ nkankanna nipa ara wa? Ṣe a le sọ pe awa naa n ṣe amulo oore-ọfẹ Ọlọrun lati pọ si ninu iṣẹ irẹ? Pọọlu, ninu lẹta kanna si awọn ara Kọrinnti, sọ fun wọn pe, “Nitori naa ẹyin ara mi olufẹ, ẹ maa duro ṣinṣin, laiyẹsẹ, ki ẹ si maa tẹsiwaju ninu ṣiṣe iṣẹ Oluwa nigba gbogbo, niwọn bi ẹyin ti mọ pe iṣẹ yin kii ṣe asan ninu Oluwa.” (1Kọrinnti 15:58) Ṣe o ri bayi? A gba awọn ara yi niyanju lati ma ya ọ̀lẹ nidi iṣẹ Ọlọrun ṣugbọn lati ma fi ara wọn jin fun ni gbogbo igba.

Ki si ni idi? Idi ni pe laalaa wọn ko ni lọ lasan. Eyi tunmọ si pe Ọlọrun yoo pin wọn ni ere fun ohunkohun ti wọn ba ṣe fun. Iwọ naa wa ro wo. Bi o tilẹ jẹ wipe Oluwa ni O n pese ohun gbogbo ti a nilo lati sin in, sibẹsibẹ O ṣe ileri lati pin wa ni ere fun ohunkohun ti a ba ṣe fun un. Bi o si tun tilẹ jẹ wipe gbogbo ogo aṣeyọri wa ni ṣiṣẹ sin jẹ tirẹ nikan, sibẹsibẹ O ṣe ileri lati pin wa ni ere fun laalaa yowu ti a ba ṣe fun.

Idi wa niyi ti a ṣe nilo lati jígìrì, ti o ba jẹ wipe a ti n ṣun, ki a si mura si iṣẹ rẹ. Bẹẹni, a nilo lati dẹkun lati ma fi ara pamọ tabi sa fun iṣẹ rẹ tabi lati ma wa awawi fun bi a ṣe n rẹwẹsi ni ṣiṣe iṣẹ rẹ dipo ki a ma pọ si ni ṣiṣe e. A si tun nilo lati dẹkun lati ma fi oju alaṣeju tabi alaṣehan wo awọn ti o ba mura si iṣẹ rẹ layika wa. Idi si ni pe ko tọ si wa lati ṣe idajọ bi iṣẹ ẹnikẹni fun Ọlọrun ṣe munadoko si. Iṣẹ Ọlọrun pọ́nbélé ni eyi jẹ.

Iṣẹ tiwa, ẹwẹ, ni ki a ṣe bi Pọọlu ti ṣe, ki a si ma woye bi a ṣe le ṣe amulo oore-ọfẹ Ọlọrun ni ojumọ kọọkan lati ṣiṣẹ karakara si fun ju ti atẹyin wa lọ ati ju awọn ti o wa ni ayika wa lọ? Ki si ni idi? Ṣe ki a ba le ma fọ́nu lori iṣẹ wa ni? Rara O! Dipo bẹẹ, idi ni pe eyi yoo jẹ ki a le ru awọn ọmọ Ọlọrun ti o wa ni ayika wa soke lati ma fi ara wọn jin siwaju ati siwaju si lati fun ni iṣẹ-sin ti o tọ, ti o si munadoko. Adura mi si ni pe ki ọkan rẹ ma fi gbogbo igba gbinájẹ lati ṣe eyi, ni orukọ Jesu. Amin.

Kí o ní oṣù Òkúdù alárinrin

Ṣiṣẹ́ kárakára si fun un. | Pst. J.O. Lawal. | Òkúdù 05, 2022. | Vol. 11, No. 5 Read More »

ÀKỌ́RÍ: ẸKỌ NINU IWE TẸSALONIKA KINNI

Leave a Comment

(AYỌKA: 1TẸSALONIKA 1:1-10)

ÀKỌ́SÓRÍ: “”Nitori ẹyin tikarayin mọ, ara, pe ibẹwo wa si yin kii ṣe lasan.” (1Tẹsalonika 2:1)

Ọ̀RỌ̀ ÀKỌ́SỌ Gẹgẹ bi a ti ri ninu iwe Iṣe awọn Apọsiteli, ilu Tẹsalonika jẹ ọkan lara awọn ilu ti Pọọlu ati awọn alabaṣiṣẹ rẹ ninu ipolongo ihinrere Jesu ti waasu nigba ti o jade ni igba keji fun irinajo iṣẹ iranṣẹ rẹ gẹgẹ bi apọsiteli ati olukọ ọrọ Ọlọrun. Akoko diẹ perete ni wọn si ni lati waasu ni ilu yi. Idi si ni pe awọn Juu ti o wa nibẹ ko fi wọn lara balẹ rara. Nṣe ni wọn ṣe inunibini wọn to bẹẹ gẹẹ ti wọn fi nilo lati sa kuro ni ilu yi ni ọganjọ-oru. Wọn ko si tun fi wọn lọrun silẹ titi wọn fi ri wipe Pọọlu tun fi Beria, ilu miran ti wọn lọ nigba ti wọn kuro ni Tẹsalonika, silẹ fun wọn. Wọn si ṣe gbogbo eyi nitoripe wọn ko fẹ ki ihinrere Jesu Kirisiti tan kalẹ ni ibi gbogbo, ki o si sọ awọn ti o ba gbaagbọ di alabukunfun. (Wo: Iṣe Apọsiteli 17:1-15)

Amọ ṣa o, niwọn igba ti o jẹ wipe Pọọlu ati awọn arakunrẹ ninu iṣẹ-iranṣẹ ti ri oore-ọfẹ gba lọwọ Ọlọrun lati fun irugbin ọrọ rẹ sinu aye awọn kan ni Tẹsalonika, ko si inunibini kankan ti o le di irugbin yi lọwọ lati so eso rere. Lotitọ, Pọọlu gbiyanju, gẹgẹ bi a o ti ri ninu lẹta rẹ akọkọ si wọn, eyi ti a fẹ bẹrẹ si ni gbe yẹwo ninu ẹkọ yi, lati pada yọju si awọn ara yi. Ṣugbọn Sàtánì ko jẹ ki o ṣeeṣe fun. Idi si ni yi ti o fi wa pinu lati ran Timoti si wọn, ki o ba le bẹ wọn wo, ki o si mu iroyin wa nipa wọn. Nigba ti apọsiteli yi ati awọn yoku rẹ si wa pada bẹrẹ si ni gburo igbagbọ wọn, wọn ko le pa ayọ wọn mọ rara. Eyi lo si fa ti wọn ṣe kọ lẹta ti a fẹ gbe yẹwo yi si wọn lati gba wọn niyanju siwaju si ninu irinajo igbagbọ wọn.

`IJỌ ÀWÒKỌ́ṢE Wayi o, nkan akọkọ ti a ri ninu lẹta ni yi pe Pọọlu jẹ ki o ye wa ibi ti lẹta naa ti ṣe jade wa ati awọn ti a kọ ọ si nipa sisọ eyi: “Eyi ni iwe Pọọlu, Silifanu ati Timoti, ti a ko si ijọ awọn ara Tẹsalonika, ninu Ọlọrun Baba, ati ninu Jesu Kirisiti Oluwa: Ki Oore-ọfẹ ati alaafia Ọlọrun Baba wa ati Jesu Kirisiti Oluwa ki o wa pẹlu yin.” (1Tẹsalonika 1:1) Bawo ni a ṣe ṣe apejuwe awọn onigbagbọ yi? A pe wọn ni olugbe ninu Ọlọrun Baba ati Jesu Kirisiti Oluwa. Eyi tunmọ si pe ibugbe nipa ti ara nikan ni Tẹsalonika jẹ fun awọn ara yi. Wọn tun ni ibugbe miran nipa ti ẹmi, eyi si wa ninu Ọlọrun ati ninu Ọmọ rẹ Jesu Kirisiti Oluwa wa. Bẹẹ gẹgẹ ni o si ri fun gbogbo ọmọ Ọlọrun patapata. Ibi yowu ti a le wa ninu aye yi, ibugbe ti ara ni. Ṣugbọn a ni ibugbe miran ninu Jesu Kirisiti funrarẹ nipa ti ẹmi. Eyi si ni o fi wa si ipo lati lo aṣẹ ati agbara rẹ lati gbe igbe aye ti o tẹ ẹ lọrun, ti o si tun nitunmọ ni ibi yowu ti a ba wa.

Nkan ekeji ti Pọọlu mẹnuba ninu lẹta yi ni i ṣe pẹlu nkan ti wọn n ranti awọn ara Tẹsalonika yi fun, eyi ti o si jẹ ki wọn ma dupẹ lọwọ Ọlọrun lori wọn. Iwọ naa wo nkan ti o sọ nipa wọn: “Awa n dupẹ lọwọ Ọlọrun nigba gbogbo nitori gbogbo yin, awa si n ranti yin ninu adura wa; Ni aisinmi ni awa n ranti iṣẹ igbagbọ, laalaa, ifẹ, suuru ati ireti yin ninu Oluwa wa Jesu Kirisiti, niwaju Ọlọrun ati Baba wa. Awa si mọ pe Ọlọrun ni o yan yin, ara olufẹ.” (1Tẹsalonika 1:1-4) Kini Pọọlu ati awọn yoku rẹ n ranti nipa awọn ara Tẹsalonika ninu Kirisiti? Wọn n ranti iṣẹ igbagbọ wọn. Eyi tunmọ si pe igbagbọ wọn ko ki i ṣe ti ẹnu lasan – wọn n ṣiṣẹ tọ ọ lẹyin. Wọn tun n ranti laalaa ifẹ wọn ati suuru ti ireti ti wọn ni fun bibọ Jesu bi sinu aye wọn. Eyi lo si fa ti wọn ṣe n fi gbogbo igba ranti wọn ninu adura, ti wọn si n ṣọpẹ niwaju Ọlọrun lori aye wọn, nitori pe wọn mọ daju pe ọmọ Ọlọrun tootọ ni awọn wọnyi jẹ.

Njẹ awọn ara wa ninu Oluwa naa le fọwọ sọya pe ọmọ Ọlọrun ni a jẹ nitooto? Ki tilẹ ni wọn a ma ranti nipa wa nigba ti a ko ba si pẹlu wọn tabi wa nitosi? Njẹ wọn n ranti wa gẹgẹ bi onigbagbọ ododo, olufẹ Ọlọrun ati eniyan ati ẹni ti o n mura silẹ de bibọ Jesu bi? Abi nṣe ni wọn n ranti wa gẹgẹ bi onijagidijagan, ọbayejẹ, alaigbọran, gbeborun, alagbere ati bẹẹbẹẹ lọ? Eyi ni yoo sọ irufẹ adura ti wọn yoo ma gba fun wa ati pe boya wọn yoo ma fi ọpẹ fun Ọlọrun lori aye wa tabi bẹẹkọ.

Lotitọ, bi apọsiteli yi tun ṣe fi ye wa ninu lẹta yi, irufẹ ọrọ ihinrere Jesu ti awọn eniyan naa ba gbọ tabi ba n gbọ ni ipa pataki lati ko lori irufẹ igbagbọ ti wọn yoo ni ati bi yoo ti ṣe fi ẹṣẹ mulẹ to. Ni tiwọn, ihinrere ti wọn mu tọ awọn ara Tẹsalonika yi wa jẹ eyi ti o jade pẹlu Ẹmi Ọlọrun funrarẹ ati agbara rẹ ati pẹlu idaniloju ti o peye lati ọdọ awọn naa ti wọn n waasu. Eyi n jẹ ki o ye wa pe ọrọ ihinrere ti yoo so eso rere ninu aye awọn eniyan gbọdọ jẹ eyi ti Ẹmi Mimọ tẹle ati eyi ti ẹni ti o n waasu naa ni idaniloju nipa iṣẹ ti o le ṣe ninu aye awọn ti o ba gbagbọ. Nitorina, ti ko ba da wa loju pe ihinrere Jesu ni agbara lati gbala ati lati mu ifẹ Ọlọrun wa si imuṣẹ ninu aye awọn eniyan, a ko lẹtọ lati ma polongo rẹ. Nkan ti ko si ni jẹ ki o da wa loju naa ni wipe ko i ti ṣiṣẹ ninu aye awa tikalara wa. (Wo: 1Tẹsalonika 1:5)

Nkan ẹkẹta ti Pọọlu mẹnuba ninu lẹta nipa awọn ara Tẹsalonika wọnyi da lori ọna ti igbagbọ wọn n gba ran awọn onigbagbọ ti o wa ni ibomiran lọwọ. Iwọ naa wo awọn nkan ti o sọ nipa wọn:

“Ẹyin ṣe afarawe wa, ati ti Oluwa, lẹyin ti ẹyin ti gba ọrọ naa ninu ọpọlọpọ ipọnju pẹlu ayọ Ẹmi Mimọ: Ti ẹyin si jẹ apẹẹrẹ fun gbogbo awọn ti o gbagbọ ni Masedonia ati Akaya. Nitori lati ọdọ yin lọ ni ọrọ Oluwa ti jade, kii ṣe ni kiki Masedonia ati Akaya nikan, ṣugbọn ni ibi gbogbo ni iyin igbagbọ yin si Ọlọrun tan kalẹ to bẹẹ ti awa ko ni iṣoro ohunkohun. Nitori pe awọn tikarawọn royin bi ẹ ti tẹwọ gba wa nigba ti a wa sọdọ yin, ati bi ẹyin si ti yipada si Ọlọrun kuro ninu ibọriṣa lati maa sin Ọlọrun alaaye ninu otitọ; Ti ẹ si n mura silẹ de bibọ ọmọ rẹ lati ọrun wa, ẹni ti o ji dide kuro ninu oku, ani Jesu naa, ẹni ti n gba wa kuro ninu ibinu ti n bọ.” (1Tẹsalonika 1:6-10)

Pẹlu nkan ti Pọọlu sọ ninu lẹta yi, daju ṣaka ni pe awokọsẹ rere ni ijọ Tẹsalonika jẹ fun awọn ijọ Ọlọrun miran ti o wa laye ni akoko yi. Ki lo si jẹ ki o ri bẹ? Nkan ti o jẹ ki o ri bẹ ni wipe wọn kọkọ yipada kuro ninu ibọriṣa patapata lati maa sin Ọlọrun alaaye ninu otitọ. Eyi tunmọ si pe wọn ko ma ṣe igbagbọ ko-ṣeku-ko-ṣẹyẹ. Wọn ko ma sin Ọlọrun ni ẹgbẹ kan, ki wọn si tun ma bọ oriṣa ni ẹgbẹ miran. Wọn ko ma si Ọlọrun ni ẹgbẹ kan, ki wọn si tun ma gbe igbe aye iṣẹkuṣe, ole jija, ajinigbe tabi apaniyan ni ẹgbẹ miran. Dipo eyi, kedere ni o han si gbogbo awọn ti o wa ni ayika wọn pe wọn ti fi ara wọn jin patapata fun Ọlọrun.

Yatọ si iyẹn, awọn ara yi tun bẹrẹ si ni gbe igbe aye ti o fihan gbogbo eniyan pe wọn n mura silẹ de Jesu Kirisiti. Eyi jasi pe wọn ko jẹ ki nkan ti aye yi kankan gba ọkan wọn tabi jọba lori wọn. Dipo eyi, nṣe ni wọn n ṣe afarawe awọn apọsiteli ti o waasu fun wọn ati Jesu Kirisiti Ọmọ Ọlọrun ti a waasu rẹ fun wọn. Nitorinaa, Ọlọrun wa bẹrẹ si ni lo wọn gẹgẹ bi apẹẹrẹ igbagbọ otitọ fun awọn ọmọ rẹ yoku ti o wa ni ayika wọn ati awọn alaigbagbọ pẹlu.

Nkan ti eyi si fi n han wa ni wipe Ọlọrun ko kan fẹ ki a di atunbi ninu Jesu Kirisiti nikan; O tun fẹ ki a bẹrẹ si ni gbe igbe aye ti yoo jẹ awokọṣe fun gbogbo awọn ti o ba wa ni ayika wa. Ṣe bayi ni o si wa ri fun wa? Ṣe awokọṣe onigbagbọ tootọ ni a jẹ gẹgẹ bi ijọ tabi gẹgẹ bi ẹnikọọkan fun awọn ti o wa ni ayika wa? Abi ṣe a kan n gbe igbe aye ti o wu wa ni, igbe aye ti ko ni itunmọ, igbe aye ti ko jọ wipe a mọ pe ohun gbogbo ko pin si aye yi ati pe Jesu Oluwa wa n bọ ni ọjọ kan lati mu wa si ọdọ rẹ ati lati ṣe idajọ aye yi?

O wa ṣeni laanu pe ọpọ awa ti a pe ara wa ni onigbagbọ loni ni a ko bikita rara nipa irufẹ igbe aye ti a n gbe ati ipa ti o n ko lori aye awọn ti o wa ni ayika wa. Ọpọ ninu wa si tun ni ko tilẹ fẹ gbọ pe Jesu n pada bọ wa rara. Eyi si n jẹ ki irufẹ igbagbọ ti a gba kọ eniyan lominu, yatọ si pe o n di itankalẹ ihinrere Jesu lọwọ laarin awọn alaigbagbọ.

Ọ̀RỌ́ ÌPARÌ Ni kukuru, lẹta yi n fi han wa pe ifẹ Ọlọrun fun wa ni pe ki a ma gbe igbe aye igbagbọ ti o n buyi fun orukọ Jesu, ti o n jẹ ki ihinrere Jesu wu awọn eniyan lati gbọ, ti o si tun ru awọn ọmọ Ọlọrun miran soke lati mu iduro ṣinṣin wọn ninu Kirisiti ni pataki.

ÌBÉÈRÈ – Kini pataki julọ si ọ ninu ẹkọ yi?

Lati ọwọ Johnson O. Lawal Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

ALAYTHIA BIBLE CHURCH (ÌJỌ ÒTÍTỌ́ BÍBÉLÌ) ÀLÀKALẸ̀ Ẹ̀KỌ́ BÍBÉLÌ ÀTI ÀLÀYÉ ỌJỌ́RÚ 01, ÒKÚDÙ 2022.

ÀKỌ́RÍ: ẸKỌ NINU IWE TẸSALONIKA KINNI Read More »

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN (2) | Pst. J.O Lawal |TÍMÓTÌ 4:7-11 | ỌJỌ́RÚ 25, ÈBÌBÍ 2022

Leave a Comment

ÀKỌ́SÓRÍ: “Má ṣe fetí sí ọ̀rọ̀ tàbí ìtàn asán; ṣùgbọ́n tọ́ ara rẹ sí ìwà-bí-Ọlọ́run.” (Tímótì 4:11)

Ọ̀RỌ̀ ÀKỌ́SỌ

Ninu ẹkọ ti a kọ kẹyin lori ọna lati tọ ara wa si iwa-bi-Ọlọrun, a mẹnuba awọn ipese Ọlọrun fun wa lati gbe igbe aye iwa-bi-Ọlọrun ati pataki ki a ṣe amulo wọn. Ki si wa ni awọn ipese wọnyi? Awọn naa ni Ẹmi mimọ, ọrọ Ọlọrun, anfaani adura gbigba, anfaani ibaṣepọ pẹlu awọn ọmọ Ọlọrun ati iṣẹ iranṣẹ awọn angẹli. Ninu ẹkọ eyi ẹwẹ, a tun fẹ wo igbesẹ miran ti a nilo lati ma a gbe lati le tọ ara wa si iwa-bi-Ọlọrun. Lalai si mọ igbesẹ yi, ki a si ma gbe e, yoo ṣoro fun wa lati ma fi gbogbo igba gbe igbe aye ẹni ti o wa bi Ọlọrun.

YẸRA FUN IBASEPỌ AIDỌGBA PẸLU AWỌN ALAIGBAGBỌ

Igbesẹ miran wo lo wa yẹ ki a ma gbe lati tọ ara wa si iwa-bi-Ọlọrun yatọ si pe ki a ma ṣe amulo awọn ipese Ọlọrun fun wa lati ṣe bẹẹ? Oun naa ni o ni i ṣe pẹlu yiyẹra fun ibasepọ ti ko dọgba pẹlu awọn alaigbagbọ. Iwọ naa wo ọkan lara awọn nkan ti Pọọlu sọ lori ọrọ yi: “Ki a ma tan yin jẹ: ẹgbẹ buburu ba iwa rere jẹ.” (1Kọrinnti 15:33) Ki ni idi ti o fi nira fun ọpọ lati gbe igbe aye iwa-bi-Ọlọrun loni? Oun naa la ri ninu ọrọ ti Pọọlu sọ silẹ yi. O ni ki a ma ṣe jẹ ki ẹnikẹni tan wa jẹ: ẹgbẹ buburu ma n ba iwa rere jẹ. Eyi jasi pe niwọn igba ti a ba n kọwọ rin pẹlu awọn alaiwa-bi-Ọlọrun, o didan ki awa na ma wuwa bi ti wọn lẹkọkan tabi ni ọpọ igba. Niwọn igba ti a ba si ti n wuwa bi wọn ti ṣe n wuwa, ko si ni ki o ma mu ipalara wa fun igbe aye iwa-bi-Ọlọrun wa.

Pọọlu tun sọ eyi lori ọrọ yi kannaa: “Ẹ ma ṣe fi aidọgba dapọ pẹlu awọn alaigbagbọ: nitori idapọ kin ni ododo ni pẹlu aiṣododo? Idapọ ki ni imọlẹ si ni pẹlu okunkun? Irẹpọ kin ni Kirisiti ni pẹlu Belili? Tabi ipin wo ni ẹni ti o gbagbọ ni pẹlu alaigbagbọ? Irẹpọ ki ni Tẹmpili Ọlọrun ni pẹlu oriṣa? Nitori ẹyin ni tẹmpili Ọlọrun alaaye; gẹgẹ bi Ọlọrun ti wi pe, Emi o maa gbe inu wọn, emi o si maa rin ninu wọn; emi o si jẹ Ọlọrun wọn, wọn o si jẹ eniyan mi.” (2Kọrinnti 6:14-16)

Ṣe o tun ri bayi? A ki wa nilọ nibiyi pe ki a ma ṣe fi aidọgba dapọ pẹlu awọn alaigbagbọ. Eyi tunmọ si pe ibadapọ pẹlu awọn alaigbagbọ pin si ọna meji pataki. Akọkọ ni ibadọpọ ti o dọgba. Eyi ni i ṣe pẹlu ibaṣepọ wa pẹlu awọn alaigbagbọ ti o jẹ obi wa, ọmọ wa, aya wa, ọkọ wa, ara wa, ibatan wa, aladugbo wa, ọga wa nibi iṣẹ, akẹgbẹ wa nibi iṣẹ tabi ni ile-iwe ati bẹẹbẹẹ lọ. A ko le sọ wipe a ko ni ni nkankan ṣe pẹlu awọn eniyan yi nitoripe alaigbagbọ ni wọn. A gbọdọ ni nkan ṣe pẹlu wọn, ki a si ma ṣe ojuṣe wa lori wọn ni gbogbo igba. Ayafi ti a ba fẹ fi aye yi silẹ nikan ni a ko ṣe ni ni nkankan ba awọn ẹni wọnyi ṣe papọ. (Wo: 1Kọrinnti 5:10)

Irufẹ ibadapọ keji ti a le ni pẹlu awọn alaigbagbọ, eyi ti a si n kilọ fun wa ninu bibeli pe ki a ma ni, ni ibapadọ aidọgba. Ki ni idi ti a si ṣe n kiwa nilọ pe ki a ma ni irufẹ ibadapọ yi pẹlu wọn? Idi ni pe nigba ti a wa jẹ ododo, awọn je aiṣododo. Nigba ti awa si jẹ imọlẹ, awọn jẹ okunkun. Bẹẹ si ni, nigba ti awa jẹ Kirisiti, awọn jẹ Belili. Eyi lo wa tunmọ si pe, ni akọkọ, ibaṣepọ yowu ti a o ni pẹlu awọn alaigbagbọ ti yoo sọ wa di alaiṣododo si Ọlọrun tabi si eniyan jẹ eyi ti a gbọdọ yẹra fun.

Nkan ti a n sọ ni pe niwọn igba ti ibaṣepọ wa pẹlu alaigbagbọ kan tabi omiran tabi awọn eto tabi irinṣẹ ti wọn gbe kalẹ ba ti jẹ eyi ti ko ni jẹ ki a jẹ olotitọ ni sisin Ọlọrun tabi si awọn eniyan, yala awọn ẹbi wa ni, ijọba ni, ijọ Ọlọrun ni, akẹgbẹ wa ni tabi aladugbo wa ni, ko tọna. A si gbọdọ fi opin si, ti o ba jẹ wipe o ti n waye. Aijẹbẹ, a ko ni le gbe igbe aye iwa-bi-Ọlọrun.

Nkan keji ti ọrọ yi tun fi ye wa ni pe ibadapọ yowu ti a le ni pẹlu awọn alaigbagbọ ti o si le sọ imọlẹ wa di okunkun jẹ eyi ti ko gbọdọ waye rara. Bẹẹni ibadapọ yowu ti a le ni pẹlu wọn ti yoo jẹ ki a bẹrẹ si ni ṣe nkan ikọkọ tabi ti ko ni jẹ ki a le ba wọn wi ninu aiwa-bi-Ọlọrun wọn jẹ eyi ti a ko gbọdọ jẹ ki o waye. Nitori irufẹ awọn ibaṣepọ yi ni o ma n sọ ọmọ Ọlọrun di ẹlẹṣẹ nikẹyinkẹyin.

Nkan ẹkẹta ti ọrọ Pọọlu tun n fi ye wa ni pe ibadapọ yowu ti a le ni pẹlu awọn alaigbagbọ ti ko ni jẹ ki a le ṣe iyatọ wa si wọn, ti ko ni jẹ ki awọn eniyan mọ pe ti Kirisiti ni a jẹ ati pe a ko ki i ṣe ti Eṣu jẹ eyi ti a ko gbọdọ faye gba. Ibadapọ aidọgba ni. O si wa ṣe ni laanu loni pe ọpọ awọn ọmọ Ọlọrun ni a ko le ṣe iyatọ laarin wọn ati awọn alaigbagbọ ti wọn jọ n ko ara wọn kaakiri. Idi si ni pe aguntan wọn ti ba aja rin, o si ti jẹ ìgbẹ́, o ti ba ẹkùn rin, o ti wọ ẹ̀wù ẹ̀jẹ̀.

Lotitọ, kíkọ̀ lati ni ibaṣepọ aidọgba pẹlu awọn alaigbagbọ le ma ba irọrun de. O tilẹ le fi aye silẹ fun inunibini lati ọdọ wọn. Ṣugbọn ti ibaṣepọ ayeraye ti a ni pẹlu Ọlọrun ba jẹ wa logun, a gbọdọ fi ara da ohun yowu ti o ba ti ẹyin kíkọ̀ lati fi aidọgba lo pọ pẹlu awọn alaigbagbọ le mu lọwọ. Aijẹbẹ, gbogbo awọn iwa palapala, iwa omugọ ati iwa eeri ti a ti kọ silẹ nitoripe a jẹ ti Jesu ko ni ṣalai tun ma ma fi ara han ninu aye wa.

ỌRỌ IPARI

Ti a ba fẹ ṣe aṣẹyọri ni gbigbe igbe aye iwa-bi-Ọlọrun, a gbọdọ yẹra fun fifi aidọgba ba awọn alaigbagbọ ti o wa ninu aye wa tabi ni ayika wa lopọ. Eyi ni yoo fi iyatọ han laarin awa ati awọn. Aijẹbẹ, ibaṣepọ wa pẹlu wọn ko ni ṣai pa igbe aye iwa-bi-Ọlọrun wa lara.

IBEERE

Irufẹ ibadapọ melo ni a le ni pẹlu awọn alaigbagbọ? Darukọ wọn.

Ki ni o ṣe pataki julọ si ọ ninu ẹkọ yi?

Lati ọwọ Johnson O. Lawal

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

Ọ̀NÀ LÁTI TỌ́ ARA RẸ SÍ ÌWÀ-BÍ-ỌLỌ́RUN (2) | Pst. J.O Lawal |TÍMÓTÌ 4:7-11 | ỌJỌ́RÚ 25, ÈBÌBÍ 2022 Read More »

Tun àfojúsùn rẹ ṣe | Láti ọwọ́: J.O. Lawal | Ọjọ́: Èbìbí 29, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 4

Leave a Comment

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu ọdun yi, eyi ti i ṣe ọsẹ ti o so oṣu Èbìbí ati Òkúdù pọ mọ ara wọn. Mo si gbadura pe ki ọkan rẹ ma fi igba gbogbo gba okun lati mu iṣẹ-iranṣẹ yowu ti Ọlọrun gbe le ọ lọwọ ninu ijọba rẹ ni ọkunkundun, ki o ma ba ja a kulẹ, ki o si tun padanu ere rẹ. Amin.

Jesu Oluwa wa ni igba kan ri sọ eyi fun awọn ọmọ ẹyin rẹ: “Ounjẹ mi ni lati ṣe ifẹ ẹni ti o ran mi, ati lati pari iṣẹ rẹ.” (Jòhánù 4:34) Ni akoko miran ẹwẹ, O tun sọ eyi naa fun wọn: “Emi ko le ṣe alaiṣe iṣẹ ẹni ti o ran mi, nigba tii ṣe ọsan: oru n bọ wa nigba ti ẹnikan ki yoo le ṣe iṣẹ mọ.” (Jòhánù 9:4) Ki ni idi ti Jesu Oluwa wa fi sọrọ bi eyi? Lakọkọ, O sọ eyi nitoripe O mọ pe Ọlọrun gbe iṣẹ-iransẹ kan le Oun lọwọ lati gbe ṣe ninu aye yi. Ekeji, O ṣọ eyi nitoripe O mọ ojuṣe rẹ ni ojuṣe rẹ. Eyi lo si jẹ ki O mu iṣẹ iranṣẹ ti Ọlọrun fun ni ọkunkundun. Ẹkẹta, O sọ awọn nkan wọnyi nitoripe O mo wipe Oun ko ni gbogbo ayeraye lati ṣe iṣẹ ti Ọlọrun gbe fun un. Nitorina, ti ko ba gbajumọ iṣẹ naa, ki O si ṣe ni ‘ohun tí ó bá gbà ni a ó fún’, ko ni pari iṣẹ naa titi akoko rẹ ni aye yi yoo fi pari.

Ni bakanna, ẹnikọọkan wa naa ti gba iṣẹ iranṣẹ kan tabi omiran ni ọwọ Oluwa. Ẹnikọọkan wa ni o ni iṣẹ kan tabi omiran ti Ọlọrun ti yan fun un lati ṣe fun ati fun ijọba rẹ ni aye yi. Nkan ti bibeli ṣọ fun wa ni eyi. O wa ku si ọwọ wa lati mọ irufẹ iṣẹ-iranṣẹ ti a ti rigba lọwọ rẹ, ki a si bẹrẹ si ni ṣe pẹlu ifarabalẹ ati pẹlu imura lati pari rẹ ni akoko. Pọọlu, nigba ti o n ba awọn alagba ijọ Efesu sọrọ lori awọn nkan wọnyi, sọ eyi nipa ara rẹ: “Ṣugbọn emi ko ka ẹmi mi si nnkan bi ohun ti o ṣọwọn fun mi, ki emi ki o baa le fi ayọ pari ire-ije mi ati iṣẹ-iranṣẹ ti mo ti gba lọdọ Jesu Oluwa, lati maa royin iyinrere oore-ọfẹ Ọlọrun.” (Iṣe Apọsiteli 20:24)

Ṣe o ti wa ri pe afojusun ti Pọọlu ni fun aye rẹ ko yatọ rara si eyi ti Jesu Oluwa wa ni fun aye tirẹ naa? Afojusun Pọọlu naa ni fun lati ṣe ifẹ Ọlọrun pẹlu aye rẹ ati lati pari iṣẹ rẹ. Njẹ eyi yoo wa rọrun fun bi? Ko lero pe yoo rọrun fun oun. O tilẹ sọ wipe Ẹmi Mimọ ti kilọ fun oun tẹlẹ pe ki oun ma lero pe yoo rọrun fun oun (Ìṣẹ Àpọ́sítélì 20:22-23). Sibẹsibẹ, boya o rọrun fun o tabi ko rọrun fun, o pinnu lọkan rẹ lati ṣe ifẹ Ọlọrun pẹlu aye rẹ ni gbogbo ọna ati lati fi ifarabalẹ pari iṣẹ ti O gbe fun. Ki si ni idi? Idi ni pe o mọ wipe ẹni ti o pe oun, ti o si ya oun sọtọ fun ara rẹ yo ma fi igba gbogbo wa pẹlu oun ati pe yoo ri daju pe oun ṣe aṣeyọri.

Wayi o, ti awa naa ba mura lati rin pẹlu afiyesi ti Jesu Oluwa wa ati Pọọlu ni nipa gbigbe aye wa fun Ọlọrun ati ṣiṣe iṣẹ rẹ, ko si bi a o ṣe ja Ọlọrun kulẹ, bi o ti wu ki nkan le to tabi bi o ti wu ki nkan ma rọrun fun wa to. Amọ ṣe irufẹ ọkan ti a fi n gbe aye niyi bi? Njẹ a n gbe aye pẹlu afiyesi pe o yẹ ki a fi aye wa jin lati dun Ọlọrun ninu ati lati ṣe iṣẹ ti o gbe fun wa, iṣẹ yowu ti o le jẹ ati asiko yowu ti aye wa le wa?

Ti a ko ba ma rin pẹlu afiyesi yi, a kan n fi aye wa ṣofo ni. Lotitọ, o le ma dabi pe a n fi aye wa ṣofo, paapaa julọ ti awọn eniyan ba n yin wa fun awọn aṣeyọri ti a ti ṣe ni awọn abala aye wa kan. Ṣugbọn akoko n bọ, bi o ti ṣe de ba Jona, ti a o ri daju ṣaka pe inu ikun ẹja n la kan, ni inu okunkun birimu-birimu, nibi ti ko ti si èrè, nibi ti ko ti si oriyin, ni gbogbo ere ti a n sa lodi si ifẹ Ọlọrun yoo pari si. Igba yi gan ni a o to wa mọ pe asan lori asan ni gbogbo nkan ti a ti fi aye wa gbe ṣe. Adura mi wa ni pe ki ere-ije rẹ ati laalaa rẹ ninu aye yi ma ja si asan ni ikẹyinkẹyin, ni orukọ Jesu. Amọ iwọ naa gbọdọ tun afojusun rẹ ṣe, ti o ba mọ pe ko da lori bi iwọ yoo ṣe ṣe ifẹ Ọlọrun, ki o si pari iṣẹ ti O gbe fun ọ.

Ki o ni ọsẹ ti o ga.

Tun àfojúsùn rẹ ṣe | Láti ọwọ́: J.O. Lawal | Ọjọ́: Èbìbí 29, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 4 Read More »

Ó burú jọjọ bí kò tilẹ̀ jẹ́ tuntun | J.O. Lawal

Leave a Comment

LTP-Ebibi-2022_11_3

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Ebibi 2022. Mo gbadura pe ki iwọ ati ohun gbogbo ti o jẹ tirẹ ma fi gbogbo igba wa ni ipamọ kuro ninu gbogbo erongba ati akitiyan ibi awọn ọta ẹsin Kirisitiẹni, ni orukọ Jesu. Amin.

Ni aipẹ yi, igbe-rara jade lọ lati ibi gbogbo ni orilẹ-ede yi lodi si ipakupa ti a pa Debora Yakubu Samuẹli, ọmọ ile-iwe giga ti awọn olukọ kan ti o wa ni ipinlẹ Sokoto. Bi iṣẹlẹ yi ṣe wa buru jọjọ to, ti o si jẹ eyi ti a gbọdọ bu ẹnu atẹ lu pẹlu, ko jẹ tuntun tabi ajeji si aye yi. Irufẹ awọn iṣẹlẹ bẹẹ ti ṣẹlẹ sẹyinsẹyin, bi wọn si tun ti ṣe n ṣẹlẹ lọwọlọwọ yi kaakiri gbogbo agbaye, paapaa-julọ ni awọn ibi ti awọn eniyan ti ro pe ojuṣe wọn ni lati gbe Ọlọrun nija tabi lati da aabo bo iyi rẹ.

Njẹ o tilẹ mọ pe ni abẹ idari awọn alufa ijọ Katoliki mimọ ti Roomu, ni ọgọọgọrun ọdun sẹyin, ọpọlọpọ awọn eniyan rere ati olododo eniyan ni a sọ ni okuta pa, ti a ge lori tabi ti a dana sun laitọ nitori isọrọ-odi tabi isọkusọ? Nitorina, ti ijọ ko ba pa awọn ọmọ rẹ mọ loni, ko ki i ṣe nitoripe ko lailai ṣe bẹẹ ri; dipo eyi, o je nitoripe Ẹmi Ọlọrun ti fọ ọ mọ kuro ninu aimọkanmọkan rẹ, ti O si tun ti tun un ṣe.

Siwaju si, ko yẹ ki a gbagbe pe idi ti awọn adari ẹsin Juu ti igba aye Jesu fi pa a nipa ika. Nitori isọrọ-odi ni. Awọn Juu wọnyi, bi a ti ṣe ri ninu bibeli, ko fi aye gba isọrọ-odi rara-rara. Nitorina, nigba ti Jesu bẹrẹ si ni pe ara rẹ ni ọmọ Ọlọrun, wọn ṣiro ọrọ rẹ si isọrọ-odi, wọn si bẹrẹ si ni bere fun ori rẹ. Ṣugbọn awọn adari wọn ko kan dede ki i mọlẹ ni oju ọna, ki wọn si pa a, bi awọn ọgọrọ eniyan ti inu n bi yoo ti ṣe. Dipo eyi, nṣe ni wọn mu, wọn wa awọn ti yoo jẹri lodi si, wọn si wa da ẹjọ iku fun.

Ki wa lo de ti wọn ko pa Jesu fun isọrọ-odi lẹsẹkẹsẹ ti wọn ti ri mu? Akọkọ, idi ni pe wọn mọ pe ọpọ ni ilẹ naa ni o gbagbọ pe eniyan Ọlọrun tootọ ni Jesu jẹ. Nitori eyi, ti ko ba wa jẹ pe a fi idi rẹ mulẹ daju pe O ṣe nkan èèwọ̀ kan, bi ki O sọ ọrọ odi si Ọlọrun, wọn ko le nawọ gan lailai ba ibinu awọn eniyan pade. Ka tilẹ tun gbe iyẹn sẹgbẹ kan, o lodi si ofin Mose lati pa ẹnikẹni lọna yi lalai ṣe pe a kọkọ gbọ ẹjọ rẹ lọna ti o yẹ. A kọkọ gbọdọ wa o kere ju ẹlẹri meji lati jẹri lodi si. Lẹyin eyi, a gbọdọ fi aye gba oun naa funrarẹ lati wi àwíjàre. Aijẹbẹ, nṣe ni a o ma ta ẹjẹ alaiṣẹ silẹ niwaju Ọlọrun ti a ba pa a. Bẹẹ gẹgẹ si ni a ṣe ṣe si Jesu ki a to da ẹjọ iku fun un lọna aitọ. (Wo: Ditaronomi 17:2-7; Matiu 26:57-66)

Idi keji ti a ko fi pa Jesu ni ẹsẹkẹsẹ ti a mu ni pe ofin miran ti o tun ga ju ti Mose lọ wa ni ilẹ naa nigba naa, iyẹn ofin awọn ara Roomu. Ko si wa si bi wọn yoo ṣe pa gbajumọ eniyan bi ti Jesu, bi O tilẹ jẹbi ẹsun ti a fi kan an, lalai ṣe pe wọn kọkọ gbọ ẹjọ rẹ ni ibamu pẹlu ofin yi, ti wọn ko ni bọ sinu iyọnu ti awọn adari ijọba Roomu ti o wa lori wọn ba mura lati ṣe agbeyẹwo ọrọ naa. Idi niyi ti a ṣe mu Jesu lọdọ sọdọ Pọ́ntíù Pílátù, ki o ba le fi ountẹ jan ẹjọ iku ti a ti da fun un. A ko ba wi wa tu u silẹ, ti ko ba jẹ wipe Pilatu jẹ adari ojo ati kòṣekukòṣẹyẹ kan. (Wo: Johanu 18:26-19:16)

Nitorina, ko ki n ṣe nkan tuntun ni ki a pa awọn olododo laitọ labẹ afiboju ẹsin. Iru nkan wọnyi si ma n ṣaba waye nibi ti awọn adari ba ti jẹ ojo bi ti Pilatu, ti wọn si tun fẹran iyin awọn eniyan ju iyin Ọlọrun lọ. Fun apẹẹrẹ, Pọọlu gan, ni akoko kan, ko ba di ẹni ti ọgọrọ awọn Juu kan ti inu n bi ko ba faya pẹrẹpẹrẹ nitori iru ọrọ yi, ti o ba jẹ pe ọgagun awọn jagunjagun Roomu ti a fi si Jerusalẹmu ni akoko yi jẹ ojo tabi lọra lati tete da si ọrọ naa. (Wo: Iṣe Apọsiteli 21:17-23:35)

Ki ni koko ti mo fẹ mu jade lori ọrọ yi? Oun naa ni pe bi a ti ṣe n bere fun idajọ ododo fun Debora Yakubu Samuẹli ati ti a si tun n gbadura pe ki Ọlọrun tu awọn ẹbi rẹ ninu, a ko gbọdọ kuna, gẹgẹ bi ọmọ Ọlọrun, lati kẹkọ lati ara nkan ti o ṣẹlẹ si. Ki si ni awọn ẹkọ fun wa ninu ọrọ naa? Akọkọ ni pe a gbọdọ ma fi gbogbo igba ṣọ ara ṣe ninu ibaṣepọ wa pẹlu awọn ẹlẹsin miran, paapaa-julọ awọn ti o korira ẹsin Kirisitiẹni, ki wọn ma ba fi akoko kankan ni idi ti o daju lati sọrọ odi si wa tabi lati da wa lẹbi.

Ẹkọ keji fun wa ninu ọrọ yi ni pe nibikibi ti iṣedari ibi ti a n gbe ba ti jẹ ojo tabi alailootọ, Ọlọrun le ma le lo o lati da aabo bo wa kurọ lọwọ iwa ika. Nitorina, ti ko ba jẹ wipe a mọ daju pe Ọlọrun fẹ lo ijiya tabi iku wa nibẹ lati ṣe ara rẹ logo, a gbọdọ ṣọra ṣe ni didasi ohunkohun ti o ba ni i ṣe pẹlu ọrọ ẹsin nibẹ. Aijẹbẹ, o ṣeeṣe ki a sun ninu Kirisiti ki akoko wa to to. Njẹ ki Ọlọrun gbogbo oore-ọfẹ tẹsiwaju lati ma pa gbogbo awọn ọmọ rẹ ni orilẹ-ede yi ati ni ibi gbogbo lagbaye mọ kuro lọwọ ibi gbogbo. Amin.

Kí o ní ọ̀sẹ̀ tí ó ga.

Ó burú jọjọ bí kò tilẹ̀ jẹ́ tuntun | J.O. Lawal Read More »

Ǹjẹ́ ọkàn rẹ ṣe déédé níwájú rẹ̀ bí? | Pst. J.O. Lawal | Èbìbí 15, 2022 | Vol. 11, No. 2

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọṣẹ miran ninu oṣu yi. Mo si tun gbadura pe ki Ọlọrun ṣe ọkan rẹ yẹ niwaju rẹ ni gbogbo igba, ki eré-ìje Kirisitiẹni rẹ ninu aye yi ma ba ja si asan. Amin.

Ninu iwe Iṣe awọn Apọsiteli, a ri akọsilẹ arakunriin kan ti a n pe ni Simoni Oṣó. Ọkunrin yi, bi akọsilẹ naa ti ṣe lọ, je olugbe ilu awọn ara Samaria kan ti Filipi ti kọkọ waasu ihinrere Jesu Kirisiti. Nigba ti o si ri awọn iṣẹ iyanu ati ara ti ajinhinrere yi ṣe, ẹnu yaa to bẹẹ gẹẹ ti oun naa fi ṣe iribọmi ni orukọ Oluwa bi awọn ara Samaria yoku ti o wa ninu ilu yi. (Ìṣe Àpọ̀sítélì 8:5-24)

Ṣugbọn oṣo ni ọkunrin yi jẹ, oṣo ti o ti fi akoko kanrí jọ awọn eniyan wọnyi loju pẹlu agbara àlùpàyídà ati oṣo rẹ. Nitorina, nipa ṣiṣe iribọmi ni orukọ Jesu, o n fihan pe oun gba pe Filipi n ṣiṣẹ pẹlu agbara ti o ga, ti o si pọ ju ti oun lọ. Eyi si jẹ nkan ti gbogbo ọmọ Ọlọrun gbọdọ fi sọkan. A n ṣiṣẹ pẹlu agbara ati aṣẹ ti o ga julọ ni ibi yowu ti awọn ẹda Ọlọrun le wa. Nitori eyi, nṣe ni o yẹ ki a gbe gbogbo ibẹru iṣẹ awọn ajẹ, oṣo ati alafọsẹ ti a ni ju ṣọnu. Bẹẹni, nṣẹ ni o yẹ ki a gbe gbogbo ibẹru Eṣu ati awọn ẹmi aimọ rẹ ti a ni ju danu. Idi si ni pe a ni aṣẹ ati agbara lori wọn ninu Kirisiti Jesu – abẹ atẹlẹṣẹ wa ni gbogbo wọn wa. (Wo: Luuku 10:19; Roomu 16:20; 1Johanu 2:14; 1Johanu 4:4)

Ni kukuru, lẹyin igba ti o ti ṣe iribọmi ni orukọ Jesu, Simoni bẹrẹ si ni tẹle Filipi lọ si ibikibi ti o ba lọ, nitoripe awọn iṣẹ ami ati iṣẹ iyanu ti o n ri jọ ọ loju pupọ. Eyi tunmọ si pe oun naa bẹrẹ si ni ṣe bi ọmọ Ọlọrun, bi Kirisitiẹni tootọ. Ṣugbọn nigba ti awọn Apọsiteli Peteru ati Johanu de si ilu kannaa yi, ti wọn si bẹrẹ si ni gbe ọwọ le awọn ti o gbagbọ lori lati gba Ẹmi mimọ, ete ibi inu ọkan Simoni farahan.

Ki gan an lo ṣe? O gbiyanju lati fun wọn ni owo lati rẹ ẹbun Ẹmi mimọ. Ki si ni idi? Idi ni pe oun naa fẹ maa ṣe ohun ti Filipi ati awọn apọsiteli yi n ṣe. O si ni itara lati ṣe to bẹẹ gẹẹ ti o fi ṣetan lati fi owo ra agbara lati ṣe bẹ ẹ. Nitorina, ko jẹ tuntun lati ri awọn eniyan ti wọn ṣetan lati gbe igbesẹ-ki-gbesẹ, pẹlupẹlu didara pọ mọ ẹgbẹ okunkun tabi lilo afọsẹ ati ẹmi oṣo, ti yoo jẹ ki wọn le ma jọ awọn eniyan loju, ki wọn si ma fi ara wọn han gẹgẹ bi eniyan pataki ninu ijọba Ọlọrun.

Bawo wa ni Peteru ṣe fesi si nkan ti Simoni ṣe? O da lohun nipa sisọ awọn ọrọ wọnyi:

“Ki owo rẹ ṣegbe pẹlu rẹ, nitori iwọ ro lati fi owo ra ẹbun Ọlọrun. Iwọ ko ni ipa tabi ipin ninu ọran yii: nitori ọkan rẹ ko ṣe deedee niwaju Ọlọrun. Nitori naa ronupiwada kuro ninu iwa buburu rẹ yii, ki o si gbadura sọdọ Ọlọrun, boya yoo dari ete ọkan rẹ ji ọ. Nitori ti mo woye pe, iwọ kun fun owu kikoro, ati wi pe ẹrú ẹ̀ṣẹ̀ ni iwọ n ṣe.”

Njẹ o ri bayẹn? Ki ni iṣoro ti Simoni ni? Ohun naa ni pe ọkan rẹ ko ṣe deede pẹlu Ọlọrun. Ko fi igba kankan di atunbi ni tootọ. Ko fi igba kankan ni ipa ninu Kirisiti. Ẹ si wa wo o, o n ṣe wọle-wọde pẹlu Filipi ati awọn apọsiteli yi o. O sun mọ wọn pẹkipẹki, o si tun jẹ igbadun ibaṣepọ pẹlu wọn. O tilẹ ṣeeṣe ki o ti ba wọn jẹun papọ ni awọn igba kan tabi ki o ti ba wọn jẹ awọn iṣẹ kọọkan ri. Sibẹsibẹ, ọkan rẹ ko ṣe deede.

Nitorina, pe o n wa si ipade ijọ loorekoore tabi pe o n ṣe wọle-wọde pẹlu awọn oniwasu ati awọn onigbagbọ kan tabi omiran ko tunmọ si pe ọkan rẹ ṣe deede. Lotitọ, awọn eniyan le ma mọ nkan ti o n lọ ninu ọkan rẹ, ti a ko ba fi han wọn, bi a ti ṣe niti Simoni. Wọn le ma mọ pe o kun fun owu, ojukokoro, idibajẹ ati ẹtanu. Ṣugbọn Ọlọrun mọ. Iwọ naa si mọ pẹlu. Ti o ko ba si ronupiwada lakoko ti o tọ, ọjọ kan le de ti awọn iṣẹlẹ kan yoo tu aṣiri ete eke ati ika inu ọkan rẹ.

Yatọ si iyẹn, niwọn igba ti ọkan rẹ ko ba ti ṣe deede niwaju Ọlọrun, bi o tilẹ jẹ atunbi ni tootọ, o di dandan ki o pa iriri didara Ọlọrun ti o yẹ ki o ni lara. Eyi si ni alaye fun bi igbega, iwosan, isesorere, ibalẹ-ọkan ati iṣoriire ti awọn onigbagbọ kan n wa ko ni lailai jẹ ti wọn. Ọkan wọn ko ṣe deede. Ti wọn ko ba si ronupiwada, ko si ni ki nkan ma bajẹ ju bayi lọ fun wọn. Nitori eyi, ṣọ kan rẹ pẹlu ìfarabalẹ̀ ti o ga, ki o si tun ti ilẹ̀kuǹ rẹ̀ mọ́ ojukokoro, ẹtanu, owu ati èrò ìkà gbogbo. Ki Ọlọrun oore-ọfẹ jẹ ki o le ma fi gbogbo igba ṣe eyi fun anfaani ara rẹ, ni orukọ Jesu. Amin.

Ǹjẹ́ ọkàn rẹ ṣe déédé níwájú rẹ̀ bí? | Pst. J.O. Lawal | Èbìbí 15, 2022 | Vol. 11, No. 2 Read More »

Kí ni ìwọ ń ṣe níhìn-ín | Pásítọ̀ J.O. Lawal

Leave a Comment

Ọjọ́: Èbìbí 08, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 1

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Kaabọ sinu osẹ tuntun miran ninu oṣu Èbìbí 2022. Adura mi si ni pe ki Ọlọrun ri daju pe a fi idi rẹ mulẹ si ibugbe ti o tọ fun ete rẹ lati wa si imu ṣẹ ninu aye rẹ, ni orukọ Jesu. Amin.

Ni igba kan ri, Ọlọrun fi ara han Wolii Elija ni ori oke Horẹbu, O si bere ibere nla yi lọwọ rẹ lẹẹmeji: “Kini o n ṣe nibiyi?” Wayi o, igba wo ni a ma n bere iru ibere yi lọwọ eniyan? Akọkọ, a ma n bere rẹ lọwọ wọn nigba ti a ko ba reti lati ri wọn ni ibi ti a ti ri wọn, ti o si jẹ wipe ibomiran ni a n woye pe o yẹ ki wọn wa. Ẹkeji, a ma n bere rẹ lọwọ wọn nigba ti a ba fẹ mọ nkan ti wọn n ṣe nibi ti wọn wa ati ti a ba fẹ ẹ mọ boya nkan naa ti wọn n ṣe nibẹ to lati mu wa si ibẹ tabi duro si ibẹ.

Nitorina, nigba ti Ọlọrun bere lọwọ Elija pe, “Ki ni iwọ n ṣe nihin-yin?” akọkọ, O fẹ ki o mọ pe Oun ko reti lati ri nibẹ ni akoko naa. Ẹkeji, O fẹ mọ nkan ti o ba wa si ibẹ. Ṣe ko wa mọ nkan ti o ba wa sibẹ ni? O mọ ọn. Ṣibẹsibẹ, O fẹ ti ẹnu oun tikararẹ gbọ. (Wo: 1Ọba 19)

Kama fa ọrọ gun, idi yowu ti Elija fi wa ni Horẹbu ni akoko yi ko ja mọ nkankan si Ọlọrun. Idi si nipe ko yẹ ki o tilẹ wa nibẹ rara. Lotitọ, idamu aye ni o ti lọ si ibẹ lati tọrọ fun iku. Ṣugbọn ko yẹ ki o wa ni ibẹ. Idi si ni pe iṣẹ rẹ laye ko i ti pari. Nitorina, Ọlọrun sọ fun pe ki o gba ọna ti o gba wa pada lati lọ pari iṣẹ rẹ. O si ṣe bẹẹ gẹgẹ.

Ni ọna kanna, a ri awọn eniyan loni ti o wa ni ibi ti ko tọ ki wọn wa ni aye. Eyi si ni idi ti wọn ko ṣe gberu si tabi ri imuṣẹ ete Ọlọrun lori aye wọn. Lotitọ, bi Elija tabi Haga, iranṣẹbirin Sara, idamu aye ni o le wọn kuro ni ibi ti Ọlọrun fẹ ki wọn wa lọ si ibi ti ko yẹ ki wọn wa. Ṣibẹsibẹ, bi o ti wu ki ara tu wọn to ni ibi to ko tọ fun wọn lati wa ti wọn si wa yi, ete Ọlọrun ko le wa si imuṣẹ lori aye wọn lẹkunrẹrẹ. (Wo: Jẹnẹsisi 16)

Nitorina, wọn nilo lati ri nkan wọnyi, ki wọn si kuro ni ibi ti wọn wa lọ si ibi ti Ọlọrun fẹ ki wọn wa. Oun gan si ti wa n kọ si wọn pe, “Ki ni oun ṣe nibi ti o wa yi? Njẹ o mọ wipe ko yẹ ki o wa ni ibi yi? Njẹ o mọ wipe ete ati ileri mi fun ọ ko le wa si imuṣẹ nibi ti o wa yi?” Amọ ṣe wọn tilẹ le gbọ ohun rẹ? Ti wọn ba si le gbọ, ṣe wọn ṣetan lati gbera lati ibi ti wọn wa lọ si ibi ti o fẹ ki wọn wa, ki wọn ba le ri ààyè lati gberu ati lati ni iriri imuṣẹ ete rẹ rere fun wọn?

Boya iwọ naa si wa jẹ ọkan lara irufẹ awọn eniyan yi. Adura mi fun ọ ni pe ki Ọlọrun ṣi eti rẹ lati gbọ ohun ti o n sọ fun ọ, ki O si tun fun ọ ni okun lati gbe igbesẹ ni ibamu pẹlu rẹ, ni orukọ Jesu. Amin.

Kí o ní ọ̀sẹ̀ ìtura.

Kí ni ìwọ ń ṣe níhìn-ín | Pásítọ̀ J.O. Lawal Read More »

Bì wọ́n lulẹ̀ | Lati ọwọ: J.O. Lawal | Ọjọ́: Èbìbí 01, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 10, No. 52

Leave a Comment

Olùfẹ́: kí oore-ọ̀fẹ́, àánú àti àlááfìà jẹ́ tìrẹ lati ọdọ Ọlọrun Baba wa ati Jesu Kirisiti Oluwa wa. Pẹlu inu didun ni mo ki ọ kaabọ sinu oṣu karun ọdun yi, oṣu Èbíbí. Adura mi si ni pe ki Ọlọrun jẹ ki ayọ rẹ ma fi gbogbo ọjọ inu oṣu naa kun akunwọsilẹ, ni orukọ Jesu. Amin.

Laipẹ yi, nṣe ni gbogbo awọn aye ti o wa lori ẹrọ ayelukara wa kun fun iroyin ọmọdebirin ọmọ ọdun mẹwa kan ti wọn sọ pe awọn ọmọ ilẹ-ẹkọ rẹ kan fi ipa ba lopọ, iyẹn nigba ti wọn wa ni Dubai fun awọn ere-idaraya agbaye kan. Lati igba na si wa ni oniruuru esi ọrọ ti n jade lori iṣẹlẹ naa. Awọn kan sọ pe awọn obi ọmọ yi lo yẹ ki a bu fun iṣẹlẹ naa. Awọn miran sọ wipe ile-iwe ọmọ naa ni o yẹ ki a bu fun aiwulo awọn adari rẹ ni mimojuto awọn ọmọ naa. Awọn miran ẹwẹ si sọ wipe awọn gbajumọ kan ati awọn aṣa aibikita ti wọn ni lati ma fi awọn fọnran igbe aye iṣekuṣe wọn sori ẹrọ ayelukara ni o yẹ ki a bu fun iṣẹlẹ naa.

Amọ ṣa o, emi ti wa bere awọn ibere wọnyi lọwọ ara mi lori ọrọ naa: Melo ninu wa gan lo san ju awọn ọmọ yi lọ lotitọ pẹlu igbe aye ti a n gbe lọwọlọwọ yi? Melo ninu wa ni o san ju wọn lọ nigba ti awa naa wa ni ọjọ ori ti wọn wa yi? Mo ṣa ranti daradara pe nigba ti emi paapaa wa ni bi ọjọ ori ọmọ yi, emi naa ni awọn erokero ti ara mi ati awọn ẹmi eṣu ti o n yọ mi lẹnu ti mo ni lati doju ija kọ. Nitorina, emi naa ko ba ti dabi ọkan ninu wọn tabi ki o tilẹ buru fun mi ju wọn lọ.

Ki wa lo fa a ti n ko ṣe dabi ọkan lara wọn? Oore-ọfẹ Ọlọrun ni ko jẹ ki n dabi ọkan lara wọn. Ọna wo si ni oore-ọfẹ rẹ gba ṣe eyi? Akọkọ, o fun mi ni awọn obi ti ko fi aye silẹ fun mi lati dabi wọn, yala nipa ọrọ wọn ni tabi nipa iwa wọn. Ekeji, o fi mi ṣinu ijọ ti mo ti n fi gbogbo igba gbọ ọrọ Ọlọrun, gba adura ati gbọ ọrọ iyanju awọn ẹni-bi-Ọlọrun. Nitorina, awọn erokero wọnyi ti ko ba ti ba aye mi jẹ ko ri aye lati gberu tabi lati fi ara han ninu iṣesi mi.

Nitorinaa, ti o ba jẹ obi, jẹ ki Ọlọrun lo ọ lati pa awọn ọmọ rẹ ati awọn ọmọ miran ni ayika rẹ mọ. Lọna wo? Mojuto irufẹ agbegbe ti o ṣeto silẹ fun awọn ọmọ wọnyi lati dagba ninu rẹ nipa iṣesi rẹ ati ọrọ ẹnu rẹ. Idi si ni pe eyi ni agbara pupọ lati sọ boya ibi yoo bori wọn tabi ko ni bori wọn. Ti o ko ba ki si ṣe obi, o nilo lati ba ara rẹ sọ otitọ ọrọ lori awọn ero buburu ati ifẹkufẹẹ ti o n lepa lati fi ara han ninu iṣesi rẹ. Aijẹbẹ, o di dandan ki wọn bori rẹ, ki wọn si pa aye rẹ run. Lotitọ, aye le ma mọ tabi gbọ nipa bi aye rẹ ṣe bajẹ, gẹgẹ bi wọn ti gbọ nipa ti ọmọdebirin yẹn ati awọn miran bi tirẹ. Ṣugbọn ko ja mọ nkankan boya wọn gbọ si tabi wọn ko gbọ si. Ti aye rẹ ba ti bajẹ, o ti bajẹ naa niyẹn.

Idi si ni yi ti o ṣe gbọdọ ba ara rẹ sọ otitọ ọrọ nipa awọn ero buburu ati ifẹkufẹẹ ti o ni. Ma ṣe dibọn, ki o ṣe bi igba ti wọn ko si nibẹ. Dipo eyi, mojuto wọn. Gbogbo wa naa ni awọn nkan wọnyi n fi ojoojumọ yọ lẹnu. Jesu ati awọn apọsiteli igbaani naa gan fi ojoojumọ ba iyọlẹnu awọn nkan wọnyi pade. Eyi lo si fa ti Peteru ṣe kọ iwe si awọn ijọ Ọlọrun, ti o sọ wipe, “Olùfẹ́, mo bẹ̀ yín bí álejó áti èrò, láti fá sẹ́yín kúrò nínú ífẹ́kúfẹẹ́ ara, tí ń bá ọkán yín jagun.” (1Pétérù 2:11) Nitorina, gbogbo igba ni erokero, ero ibajẹ ati ero iparun ma n gbogun ti ọkan wa. A si gbọdọ gba eyi gẹgẹ bi ododo. Aijẹbẹ, a ko ni le mojuto wọn bi o ti tọ ati bi o ti yẹ.

Lotitọ, awọn ero buburu yi ko ki i ṣe tiwa. Satani ni o ni wọn. Fun apẹrẹ, ko ki i ṣe aba Jesu ni lati fo silẹ lati ori tente Tẹmipili, ki O si ku. Aba ti Satani ni iyẹn. Bẹẹ si ni ko ki i ṣe ero Judasi Isikariọti ni lati da Jesu. Ero Satani ni. Iyatọ ti o wa wa laarin Jesu ati Judasi ni nkan ti awọn mejeji ṣe si awọn erokero ti Satani fi si wọn lọkan. Nigba ti Jesu bi awọn ero buburu yi lulẹ pẹlu ọrọ Ọlọrun, nṣe ni Judasi fi aye gba wọn lati gbakoso aye rẹ, ki wọn si pa a run. (Wo: Matiu 4:1-11; Johanu 13:2, 2Kọrinnti 10:5)

Nibakanna, ti a ko ba fẹ ki awọn eru buburu ti o n ba ọkan wa jagun fi ara han ninu aye wa, ki wọn si ba aye wa jẹ, a gbọdọ ṣe amulo ti o peye ọrọ Ọlọrun, adura gbigba ati ibaṣepọ pẹlu awọn ọmọ Ọlọrun lati le da awọn ero wọnyi mọ ati lati le bi wọn lulẹ. A si gbọdọ ṣetan lati ṣe eyi lojoojumọ, nitori ojoojumọ ni Satani ṣetan lati ba aye wa jẹ, niwọn igba ti aye ba ti ṣi ṣilẹ fun un. Nitorina, ji kuro ninu oorun ti o n sun, ki o si gbaradi fun ohun yowu to ba de. Ijakadi igbagbọ wa ni eyi. Ijakadi ti o si dara ni, nitori a ti ni awọn nkan ti a nilo lati rin ninu iṣẹgun ninu ijakadi naa ni ojumọ kọọkan ti o ba mọ.

Ki o ni oṣu Èbìbí 2022 alárinrin.

Bì wọ́n lulẹ̀ | Lati ọwọ: J.O. Lawal | Ọjọ́: Èbìbí 01, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 10, No. 52 Read More »