latori tabili paito – Page 23 – Búlọ́ọ̀gì Wa

Ariwo irọ́ | Pst. J.O. Lawal | Ògún 7, 2022 | Vol. 11, No. 14

Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu inu didun ni mo ki ọ kaabọ sinu ọsẹ kẹta ninu oṣu yi, oṣu Ògún 2020. Adura mi si ni pe ki a fun ọ ni okun nipasẹ Ẹmi Ọlọrun lati yi pada kuro ninu ohunkohun ti ko wa ni ibamu pẹlu igbe aye tuntun ti a pe ọ lati gbe ninu Kirisiti Jesu. Amin.

Ninu lẹta Pọọlu keji si Timoti, o sọ eyi fun: “Ṣugbọn ipilẹ Ọlọrun ti o daju duro ṣinṣin, o ni edidi yi wipe, Oluwa mọ awọn ti iṣe tirẹ. Ati ki olukuluku ẹniti n pe orukọ Oluwa ki o kuro ninu aiṣododo.” (2Timoti 2:19) Kini awọn koko ti o jẹ jade ninu ọrọ iyanju yi? Akọkọ ni pe otitọ Ọlọrun ko ki i yi pada rara. Bakan naa ni yoo ma wa, bi o ti wu ki igba tabi ibi ti a wa ri. Nitorina, nkan ti Ọlọrun sọ nipa ododo ko ni lailai yi pada. Nkan ti O si tun sọ nipa ẹṣẹ naa ko ni lailai yi pada. O wa ku si ọwọ wa lati yan lati duro lori ọrọ rẹ nipa awọn nkan wọnyi tabi lati tẹle ero ti ara wa.

Koko ekeji ti Pọọlu fẹ ki a di mu ni pe Ọlọrun mọ awọn ti o jẹ tirẹ ati awọn ti ko jẹ tirẹ daradara. Ko si igba ti ko le ya awọn tirẹ sọtọ laarin awọn ọpọ eniyan. Ranti pe ko ṣoro fun rara lati ya Noa ati idile rẹ sọtọ kuro laarin awọn ara aye igba tirẹ. Ko si tun ṣoro fun lati ya Lọọti ati idile rẹ sọtọ kuro laarin ilu Sodomu ati Gomora. Bẹẹ si ni, ko ṣoro fun lati ya ẹgbẹrun meje eniyan ti o jẹ tirẹ sọtọ fun ara rẹ ni akoko ti Ọba buruku ni, Ahabu, wa lori itẹ, bi o tilẹ jẹ pe gbogbo ilẹ naa ni ibọrisa ti gba kan ni igba naa. (Wo: Jẹnẹsisi 6; Jẹnẹsis 19; 1Awọn Ọba 19)

Nitorina, ko ki i ṣe iṣoro ni fun lati mọ awọn ti o jẹ tirẹ ni orilẹ-ede yi, bi o tilẹ jẹ wipe iye wa ti kọja igba miliọnu eniyan. Ti ko ba wa jẹ iṣoro fun Ọlọrun lati mọ eyi, o yẹ ki o mọ pe ko ki i ṣe iṣoro ni fun rara lati mọ iye awọn ti o jẹ tirẹ ninu ilu yi ati ninu ijọ yi. Ibere ti o kan yẹ ki a bere ni eyi: Njẹ Ọlọrun ri ọ gẹgẹ bi ọkan lara awọn eniyan rẹ ninu ilu yi ati ninu ijọ yi? Njẹ iwọ gan tilẹ mọ ara rẹ gẹgẹ bi ọkan lara awọn eniyan rẹ? Ọrọ yi si kọja ki o ma ṣe tokíní-tokéjì. Ti o ko ba ti mọ, a jẹ wipe o ko mọ naa niyẹn.

Ki a ma fọrọgun, Ọlọrun mọ pe ko ki i ṣe gbogbo awọn ti wọn n pe ara wọn ni Kirisitiẹni tabi ti wọn n lọ fun ipade ni sọọsi tabi ti wọn n fi ede fọ tabi ti wọn n sọ tẹlẹ tabi ti wọn n ṣiṣẹ iyanu naa ni wọn jẹ tirẹ. Jesu fi igba kan sọ fun awọn ti o wa gbọ iwaasu rẹ pe: “Ki iṣe gbogbo ẹniti npe mi li Oluwa, Oluwa, ni yio wọ ijọba ọrun; bikoṣe ẹniti nṣẹ ifẹ Baba mi ti mbẹ li ọrun. Ọpọlọpọ enia ni yio wi fun mi li ọjọ na pe, Oluwa, Oluwa, awa ko ha sọtẹlẹ li orukọ rẹ? ati orukọ rẹ ki a fi le awọn ẹmi eṣu jade? ati li orukọ rẹ ki a fi ṣe ọpọ iṣẹ iyanu nla? Nigbana li emi o si wi fun wọn pe Emi ko mọ nyin ri, ẹ kuro lọdọ mi, ẹnyin oniṣẹ ẹṣẹ.” (Matiu 7:21-23)

Njẹ o ri bayi? Ọpọ ti o n lọ si ipade sọọsi, ti o n jẹ orukọ ti a mu lati inu bibeli tabi ti o n ṣe oniruuru iṣẹ ni orukọ Jesu ni yoo ba ara wọn ka àánú nigba ti Oluwa wa ba de. Idi si ni pe ko mọ wọn gẹgẹ bi eniyan rẹ. Ki si ni idi? Idi naa ni pe wọn ko fi ara wọn jin fun ifẹ rẹ. Bi Pọọlu ti ṣe sọ fun wa ninu ọrọ iyanju rẹ si Timoti yẹn, gbogbo awọn ti o n ke pe orukọ Jesu ni o gbọdọ yipada kuro ninu iwa ika, ki wọn si fi ara wọn ji fun ododo. Eyi jẹ dandan fun wọn lati ṣe. Aijẹbẹ, ariwo irọ ni wọn n pa pe awọn jẹ ti rẹ.

Ṣe o wa le jẹ pe ariwo irọ ni awa naa n pa pe a jẹ ti Jesu bi? Ṣe o le jẹ wipe gbogbo igba ti Ọlọrun ba wo wa, oju ti O fi n wo wa ni oju awọn ti wọn n tan ara wọn jẹ, awọn ti wọn n tan ara wọn jẹ lori ifarajin wọn si? Oju ti O si fi n wo wa niyẹn, niwọn igba ti a ba kọ lati yi pada kuro ninu agbere, ojukokoro, igberaga, agabagebe, irọ pipa, iṣeṣo tabi iwa ika miran ti awọn eniyan ma n wu, bi o tilẹ jẹ wipe a n ke pe orukọ Jesu.

Wayi o, ọrọ Ọlọrun n tọ wa wa bayi, o si n sọ fun wa pe ki a dẹkun lati ma tan ara wa jẹ, ki a si dojukọ eyi ti n ṣe otitọ nipa ọrọ aye wa, ki Ọlọrun ba le gba wa la lotitọ kuro lọwọ awọn nkan ti o ti n pa aye wa run. Adura mi si ni pe ki a ya ọkan rẹ ya ohunkohun ti o ba ni i ṣe pẹlu itanra-ẹni-jẹ, ti o ba ṣe pe o n tan ara rẹ jẹ, ki o ba le jọwọ ara rẹ lotitọ fun Jesu Kirisiti Oluwa wa, ki o si ni iriri agbara igbala rẹ. Amin.

Ki o ni ọsẹ ayọ.

Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ariwo irọ́ | Pst. J.O. Lawal | Ògún 7, 2022 | Vol. 11, No. 14 Read More »

Wọn bẹbẹ lati fífúnni | Láti ọwọ́: J.O. Lawal | Ọjọ́: Ògún 7, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 14

Leave a Comment

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ tuntun miran ninu oṣu Ògún 2022. Mo si gbadrua pe ki Ọlọrun jẹ ki o tayọ ninu ohun rere gbogbo ninu ọsẹ naa ati ni gbogbo eyi ti o ku ti ọdun yi yoo fi pari, ni orukọ Jesu. Amin.

Wayi o, bi a ti ṣe n bẹrẹ ọsẹ tuntun yi, mo fẹ gba ọ niyanju pẹlu ọrọ Pọọlu si awọn ara Kọrinnti nipa awọn ara Masidonia, eyi ti o wipe: “Pẹlupẹlu, ara, awa n sọ fun yin ni ti oore-ọfẹ Ọlọrun ti a fifun awọn ijọ Makedonia. Bi o ti jẹ pe a dan wọn wo nipa ipọnju, ọpọlọpọ ayọ ati idegongo aini wọn ti kun a kun wọ silẹ ninu ọrọ ilawọ wọn. Nitori mo jẹrii pe gẹgẹ bi agbara wọn, ani ju agbara wọn, wọn ṣe e lati ifẹ inu ara wọn. Wọn n fi ẹbẹ pupọ rọ wa ni ti ẹbun atinuwa yii, lati ba a le ni ipin ninu iṣẹ-iranṣẹ fun awọn eniyan mimọ. Ati eyi, ki i ṣe bi awa ti ro ri, ṣugbọn wọn tete kọ fi awọn funra wọn fun Oluwa, ati fun wa, nipa ifẹ Ọlọrun.” (2Kọrinnti 8:1-5)

Kini idi ti Pọọlu fi sọ nkan wọnyi nipa awọn ara Masidonia fun awọn ara Kọrinnti? Idi ni pe o fẹ ki wọn fi wọn ṣe awokọṣe. Ki si ni o fẹ ki wọn ti ara awọn ara Masidonia yi kọ? Ohun naa ni ifarajin wọn lati lawọ si iṣẹ Oluwa. Dajudaju, akoko kan wa ti awọn ijọ Ọlọrun ti igba aye bibeli n ṣe ìkówójọ fun iṣẹ rẹ ati lati ran awọn eniyan rẹ kan lọwọ. Bi o tilẹ wa jẹ wipe akoko yi jẹ akoko ọ̀dá burúkú fun awọn ara Masidonia, wọn si papa fifunni.

Ki a tilẹ sọ otitọ, nkan mẹta pataki ni Pọọlu sọ ninu ẹsẹ bibeli ti o wa ni oke yi nipa iha ti awọn ara yi kọ si fififunni ni akoko yi. Akọkọ, o sọ wipe wọn fifunni pẹlu ayọ akunwọsilẹ. Nitorina, aini wọn yọri si ìlawọ́ ti o jọjú. Eyi wa jẹ kayefi. Bawọ ni aini ṣe le yọri si lilawọ? Ni kukuru, bi Pọọlu ti ṣe fi han wa, nigba ti ẹniyan ba ni ayọ akunwọsilẹ, bi o tilẹ wa ni ipo aini, sibẹsibẹ yoo wa ọna lati lawọ ati lati fifunni. Nitorina, ti o ko ba lawọ, o ṣeeṣe ki o jẹ wipe ayọ Oluwa ninu rẹ ko kun tabi ki o ma ṣan wọ silẹ.

Ekeji, Pọọlu sọ wipe awọn eniyan yi fifunni kọja agbara wọn. Lotitọ, afiwe lasan ni eyi, nitori ko si ẹni ti o le fun eniyan ni ikan ti ko ba ni. Nitorina, nkan ti Pọọlu n sọ ni pe awọn ara yi ya gbogbo eniyan lẹnu nipa fififunni wọn. Wọn lawọ lati fifunni kọja nkan ti gbogbo awọn eniyan ro wipe wọn yoo ṣe, pẹlu bi asiko ti ṣe ri fun wọn. Eyi, lẹẹkansi, si ri bẹ nitoripe ọkan wọn kun fun ayọ akunwọsilẹ lati fifunni.

O wa bani-ninujẹ loni pe ọpọ ninu ijọ lo ma n fi gbogbo igba wa ọna lati fi nkan yowu ti wọn ba ri fun iṣẹ Ọlọrun, fun awọn adari wọn ati fun awọn ara wọn ti o wa ni ipo aini. Idi si ni pe fififunni ko wu wọn lori. Wọn ri gẹgẹ bi ajaga ti ko ni idi ti Ọlọrun kan mọn-ọn-mọn gbe le aye wọn lori. Boya nṣe ni iwọ naa ri lilawọ si iṣẹ Oluwa gẹgẹ bi ajaga ti ko ni idi. Awọn ara Masidonia ko ri bayi rara. Dipo bẹẹ, nṣe ni wọn ri gẹgẹ bi nkan ayọ lati fifun Oluwa ati awọn eniyan Rẹ. Bi o si ti yẹ ki o ri gan an ni eyi, nitori ti a ba ri bi nkan ayọ lati ri gba lọwọ Oluwa, nṣe ni o tun yẹ ki a ri bi nkan ayọ lati fifun un tabi fifun ẹni yowu ti O ba fẹ ki a fifun.

Nkan ẹkẹta ti Pọọlu mẹnuba nipa awọn ara Masidonia ni pe wọn pẹlu itara ni wọn ṣe fifunni. Gẹgẹ bi o ti fi ye wa, nṣe ni awọn ara yi n bẹbẹ ki a fun wọn ni anfaani lati fifunni ni akoko ti n sọ yi. NJẸ IWỌ TI WA BẸBẸ RI LATI FIFUN OLUWA? Ni kukuru, awọn ara yi bẹbẹ. Ki si ni idi ti wọn ṣe bẹbẹ lati fifunni? O ṣeeṣe ki o jẹ wipe apọsiteli yi ko fẹ ki wọn kopa ninu fififunni ni akoko yi nigba ti o wo bi nkan ṣe ri fun wọn. Ṣugbọn wọn ko fẹ ṣe alaikopa ninu ibukun ti o sorọ mọ fififunni ati ririgba. Nitorina, wọn bẹ ẹ lati jẹ ki awọn naa kopa ninu ọrọ naa. Nigba ti a si gba wọn laaye lati ṣe bẹ ẹ, wọn fifunni ni ọna ti o kọja ireti awọn eniyan.

O wa ṣeni laanu wipe ọpọ ninu wa loni ni yoo ṣe ohun yowu ti ba le ṣe lati ma kopa ninu fififunni ninu awọn ijọ wa. Fun apẹrẹ, ti aṣọna kan ba ṣèèṣì gbe apo ọrẹ kọja wa ninu ipade ijọ kan, o ti kọja lọ naa niyẹn – a ko ni fi nkankan silẹ fun iṣẹ Ọlọrun mọ. Nkan ti a ko wa mọ ni wipe bi a ti ṣe n wa ọna lati má kopa ninu lilawọ si iṣẹ Ọlọrun ati si awọn ti O fẹ ki a fifun, bẹẹ naa ni awọn àjẹmọ́nú ti o sorọ mọ fififunni yoo ṣe ma wa ọna lati yago fun wa. Ọrọ Ọlọrun wa n tọ wa wa bayi, o si n sọ fun wa pe ki a yi iwa wa pada, ki a si kẹkọ lara awọn ara Masidonia dipo ti a o fi ma fi gbogbo igba wa àwáwí lati ma kopa ninu fififun iṣẹ Oluwa. Bẹẹni, ni igba miran, o le ma rọrun fun wa lati fifunni, bi ko ti ṣe rọrun fun awọn ara Masidonia naa ni akoko ti a n sọ yi. Ṣugbọn ti ọkan wa ba tọ, bi ọkan ti awọn ara yi ṣe tọ, a o fifunni pẹlu ayọ ati ni ẹkunrẹrẹ. Ọlọrun yoo si tẹwọgba ẹbun wa ni ibamu pẹlu nkan ti a ni dipo ni ibamu pẹlu nkan ti a ko ni. Ki o ni ọsẹ aladun. Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Wọn bẹbẹ lati fífúnni | Láti ọwọ́: J.O. Lawal | Ọjọ́: Ògún 7, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 14 Read More »

Má jẹ́ aláìwúlò olùrànlọ́wọ́ | Pst. J.O. Lawal | Ọjọ́: Agẹmọ 31, 2022 | Vol. 11, No. 13

Leave a Comment

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu ọdun yi, eyi ti ṣe ọsẹ akọkọ ninu oṣu Ògún ti ọdun 2022. Mo ṣi gbadura pe ki Ọlọrun, ẹni ti O ti n tọju wa latẹyin wa, tẹsiwaju lati ma pa wa mọn ni awọn akoko ewu yi, ki O si tun tẹsiwaju lati jẹ ki a ma pọ si ni iwulo, ni orukọ Jesu. Amin.

Bi a ti ṣe ri ninu bibeli, ni oniruuru asiko laye yi, Ọlọrun ma n mọnmọn gbin wa sinu aye oniruuru eniyan lati le jẹ oluranlọwọ tabi olutunu fun wọn. Eyi ko si ki i ṣe lati fi wa ṣe ẹru fun wọn rara, bi o tilẹ wa jẹ wipe a le ni lati ṣe awọn iṣẹ ti o jẹ mọ ti ẹru ni igba miran. Dipo eyi, O n ṣe eyi lati jẹ ki a le wa ni imurasilẹ fun awọn aye giga ti O fẹ gbe wa lọ tabi fun awọn iṣẹ nla ti O fẹ fun wa.Fun apẹrẹ, ki Josefu to di igbakeji fun Farao, o ti kọkọ jẹ iransẹ ati oluranlọwọ fun Pọtifa ati fun alakoso túbú ti a mu u lọ, iyẹn lẹyin igba ti iyawo Potifa ṣe akoba fun un. Awọn iriri ati ẹkọ ti o si ba pade nigba ti o n sin awọn eniyan yi si wa lara awọn nkan ti o ran an lọwọ nigba ti o bẹrẹ si ni dari orilẹ-ede Ijibiti.

Lafikun, ki Eliṣa to di olori awọn wolii yoku ti o wa ni orilẹ-ede Isiraẹli, o ti kọkọ sin Elija ni ọpọ ọna, ti o si tun ran an lọwọ. Akoko ti o si lo pẹlu eniyan Ọlọrun yi wa wa lara awọn nkan ti o ran lọwọ lati mọ bi a ti ṣe lo ọrọ Ọlọrun, paapaa julọ ni akoko ti nkan ko ba rọgbọ. (Wo: Jẹnẹsisi 39-41; 1Awọn Ọba 19 – 2Awọn Ọba 2)

Amọ ṣa o, o gbọdọ ye wa pe idi ti Josefu ati Eliṣa ṣe papa de ibi giga ti Ọlọrun fẹ ki wọn de, ti wọn si tun ṣe aṣeyọri ni ibẹ ni pe wọn fi ara wọn si ipo ẹni ti o wulo fun awọn ti o yẹ ki wọn sin ni akoko ti o yẹ ki wọn sin wọn. Fun apẹrẹ, ti o ba jẹ wipe Josefu ko wulo fun Pọtifa ni, ko ni fi gbogbo dukia rẹ si ikawọ rẹ. Tabi ka sọ wipe ko wulo fun alakoso tubu ti a mu lọ ni, o ṣeeṣe ki o ma ri anfaani ti o ri lati pade ọkunrin naa ti o pada yọ ọ jade.

Nitorina, nibikibi ti o ba wa, ripe o da awọn ti Ọlọrun fẹ ki O sin, ran lọwọ tabi tu lara mọ, ki o si fi ara rẹ si ipo ẹni ti o wulo jọjọ tabi ti iwulo rẹ ko ṣe fẹnu sọ fun wọn, dipo ti o o fi sọ ara rẹ di ajaga alainitunmọ fun wọn. Ma ṣe dabi awọn ọrẹ Joobu mẹta ti wọn wa lati tu u lara amọ ti wọn wa pada fi kun ipọnju rẹ. Iwọ naa wo ọrọ rẹ nipa wọn: “Ẹyin n fi eke pe otitọ, oniṣegun ti ko le wo ni san ni yin. O ṣe! Ẹ ba kuku pa ẹnu yin mọ patapata! Eyi ni iba ṣi ṣe ọgbọn yin.

“Yato si eyi, ma ṣe da bi Johanu Maaku, ẹni na ti o jẹ wipe, ni igba ti o ṣi jẹ ewe ninu iṣẹ iranṣẹ, o pa Pọọlu ati Banaba ti nigba ti wọn rin irin-ajo iṣẹ itankalẹ ihinrere akọkọ wọn. Gẹgẹ bi Luuku ti ṣe fi ye wa, ọkunrin yi tẹle awọn apọsiteli yi lati ran wọn lọwọ ni ọna yowu ti wọn ba ti nilo rẹ ni. Eyi tunmọ si pe o ṣeeṣe ki wọn nilo rẹ lati ba wọn mojuto ile wọn, ṣe eto fun iriin-ajo wọn, ba wọn kọ lẹta tabi pin lẹta, ba wọn mojuto sisan owo ori wọn ati bẹẹbẹẹ lọ. Ṣugbọn lalai si idi kan gbogi, o fi wọn silẹ nigba ti iṣẹ gan ṣẹṣẹ n bẹrẹ. Nitorina, iranṣẹ ti ko wulo rara ni o jẹ fun wọn ni akoko yi, bi o tilẹ jẹ wipe ẹbi Banaba ni o jẹ. Abalajọ ti Pọọlu ko ṣe fẹ ki wọn mu lọwọ nigba ti wọn fẹ rin irin-ajo iṣẹ ijinhinrere wọn lẹkeji. (Wo: Iṣe Apọsiteli 13:5&13; Iṣe Apọsiteli 15:36-41)A wa dupẹ lọwọ Ọlọrun pe Maaku taji kuro loju orun rẹ lẹyin-ọrẹyin, o si bẹrẹ si ni fi ara rẹ sipo ẹni ti o mọ ojuṣe rẹ ni sinsin awọn adari ijọ ti Ọlọrun fẹ ki o sin. Nitorina, nigba ti o ṣe diẹ si, Pọọlu sọ fun Timoti lati mu lọwọ wa si ọdọ oun nitori ti o ti di ẹni ti o wulo fun ninu iṣẹ iranṣẹ rẹ (2Timoti 4:11).

Bi Ọlọrun si ṣe fẹ ki nkan ri fun gbogbo wa ni eyi. O fẹ ki a dagba soke si lati di ẹni ti o wulo gidigidi fun awọn ti o wa ninu aye wa, paapaa julọ awọn adari wa, boya ni ile ni o, tabi ninu ijọ tabi ni ibi iṣẹ.Ṣe o ri, awọn olori, pẹlupẹlu awọn obi wa, ko ki fẹ ki awọn eniyan ti o wa ni ṣakani wọn jẹ ajaga si wọn lọrun bikoṣe oluranlọwọ. Iṣẹ ti o wa ni ọwọ wọn pọ to fun wọn lati ṣe, wọn ko si fẹ awọn ọmọlẹyin tabi oṣiṣẹ ti yoo jẹ ki iṣẹ wọn le si afi awọn ti yoo jẹ ki iṣẹ naa rọrun si fun wọn. Nitorina, ti o ko ba ma mu ki iṣẹ awọn adari rẹ rọrun si fun wọn, ibi yowu ti o le wa, o ko wulo fun wọn. Niwọn igba ti iwọ ko ba si wulo fun wọn, awọn adari rẹ ko ni ri idi lati gbe o ga. Ọlọrun paapa ko ni ṣi ilẹkun fun ọ lati pọ si ni iwulo, ti o ko ba wulo fun awọn eniyan ti o fẹ ki o sin tabi ran lọwọ. Nitorina, ji kuro loju orun rẹ, gẹgẹ bi Maaku naa ti ṣe ji, ki o si bẹrẹ si ni fi ara rẹ si ipo ẹni ti o wulo fun awọn ti Ọlọrun fẹ ki o sin. Ki o si to mọ nkan ti o n ṣẹlẹ, ọpọlọpọ ilẹkun anfaani lati de ibi giga yoo bẹrẹ si ni ṣi fun ọ kaakiri-kaakiri.Ki o ni ọsẹ alarinrin.Copyright © 2022, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Má jẹ́ aláìwúlò olùrànlọ́wọ́ | Pst. J.O. Lawal | Ọjọ́: Agẹmọ 31, 2022 | Vol. 11, No. 13 Read More »

Tají, kí o si ṣe iṣẹ́ rẹ | Pst. J.O. Lawal | Agẹmọ 24, 2022 | Vol. 11, No. 12

Leave a Comment

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ ku u kalẹ sinu ọsẹ ti o kẹyin oṣu Agẹmọ 2022. Adura mi si pe ki ọkan rẹ gba igboya ati oriya ti o peye lati gba aye rẹ ninu ijọba Ọlọrun ati ṣe gbogbo ojuṣe iranṣẹ rẹ. Amin.

Pọọlu, ninu lẹta rẹ kan si Timoti sọ fun pe, “Ṣùgbọ́n máa ṣe pẹ̀lẹ́ nínú ohun gbogbo, máa farada ìpọ́njú, ṣe iṣẹ́ ajínyìnrere, ṣe iṣẹ́ ìránṣẹ́ rẹ láṣepé.” (2Timoti 4:5) Ki ni akotan aṣẹ ti Pọọlu pa fun Timoti nibi yi? Oun naa ni pe ki o ri daju pe ko fi ohunkohun ti o ni i ṣe pẹlu iṣẹ iranṣẹ rẹ silẹ lalai ṣe. Eyi tunmọ si pe o gbọdọ ri daju pe ohun gbogbo ti Ọlọrun fẹ ki o ṣe ni o ṣe.

Ṣugbọn ki wa ni yoo jẹ ki Timoti ṣe aṣeyọri ni ṣiṣe ohun gbogbo ti Ọlọrun fẹ ki o ṣe lorilẹ aye yi? Akọkọ, o gbọdọ ni imọ nkan ti Ọlọrun fẹ ki o ṣe lọna ti o peye ati ti o daju. Ko si bi o ṣe fẹ ṣe iṣẹ iranṣẹ rẹ laṣepe ti ko ba mọ nkan ti iṣẹ iranṣẹ naa da le lori. Ekeji, o gbọdọ mọ ojuṣe rẹ ni tirẹ. Eyi jasi pe o gbọdọ ri iṣẹ ti Ọlọrun fẹ ki o ṣe gẹgẹ bi iṣẹ rẹ, ki o si tun fi tọkantọkan fi ara rẹ jin lati ṣe.

Nkan ẹkẹta ti Timoti nilo lati ṣe nkan ti Ọlọrun fẹ ki o ṣe ni amuyẹ lati ṣe. Eniyan le gba iṣẹ ti a fun ni iṣẹ rẹ, ki o si jẹ ẹni ti o ṣetan lati ṣe ojuṣe rẹ lori iṣẹ naa. Ṣugbọn ti ko ba ni amuyẹ ti o nilo lati ṣe iṣẹ ọhun, imura rẹ ati itara rẹ lati ṣe di dandan ki o ja si pabo. Nitorina, ko to fun Timoti lati ni lọkan lati ṣe nkan ti Ọlọrun fẹ ki o ṣe; o tun ṣe pataki fun ki o ni amuyẹ lati ṣe. Ọpẹ wa ni fun Ọlọrun pe ko ki i fun ẹnikẹni ni iṣẹ lalai pese ohun gbogbo ti ẹni naa yoo nilo lati ṣe iṣẹ naa fun un. (Wo: 2Kọrinnti 3:5-6; 2Timoti 3:16-17)

Amọ ṣa o, pe eniyan mọ nkan ti Ọlọrun fẹ ki o ṣe, ṣetan lati ṣe ojuṣe rẹ ati ni amuyẹ lati ṣe ojuṣe rẹ ko tunmọ si pe yoo ṣe. Ki wa lo le fa ki awọn nkan wọnyi pe sinu aye eniyan ki o si tun ma ṣe ohun ti Ọlọrun fẹ ki o ṣe? Ibẹru, fun apẹrẹ, le fa a. Nigba ti Ọlọrun kọkọ fi ara han Gidioni, O pe ni alagbara ọkunrin. O tilẹ sọ fun pe ki o lọ ninu agbara rẹ lati gba awọn eniyan rẹ la kuro lọwọ awọn ọta wọn. Ṣugbọn ọkunrin yi bẹru kọja ki o le ṣe ohunkohun ni akoko naa. Ọlọrun wa nilo lati ṣe aṣepe iṣẹ lori igbagbọ rẹ fun akoko kan ki o to di wipe o taji lati ṣe iṣẹ iranṣẹ rẹ. A si wa ri ọpọ ọmọ Ọlọrun loni ti awọn naa da bi ọkunrin yi. Eniyan takuntakun ninu ijọba Ọlọrunn ni wọn jẹ ninu ọkan wọn. Amọ o ṣeeṣe ki wọn pari igbesi aye wọn bi alaiwulo ẹda nitori ibẹru. Ọrọ tirẹ ko wa ni ri bẹ ni orukọ Jesu. Amin. (Wo: Onidajọ 6; Saamu 82:6)

Lafikun, irẹwẹsi le pa ina ẹmi eniyan, ki o si di lọwọ lati ṣe aṣepe awọn ojuṣe iṣẹ iranṣẹ rẹ. Fun apẹrẹ, ti eniyan ko ba ri irufẹ abajade ti o fọkan si nidi ṣiṣe ifẹ Ọlọrun tabi ti o ba n ba ọpọlọpọ idojukọ pade, o ṣeeṣe ki irẹwẹsi ba ọkan rẹ, ki o si pa iṣẹ rẹ ti. Mose fi igbakan woye pe iku ya ju ẹsin lọ fun oun nitori àjàgà iṣẹ iranṣẹ rẹ ti o fẹ ya a ni were. Ṣugbọn nigba ti o ba Ọlọrun ṣọrọ le lori, O sọ ohun ti o nilo lati ṣe ki àjàgà rẹ ba le fuyẹ. Nigba ti o si ṣe e, ko tun fi igba kankan rẹwẹsi mọ. Nitorina, ti irẹwẹsi ba ba ọkan rẹ lori iṣẹ iranṣẹ rẹ tabi lori ohunkohun laye yi, o kan nilo lati ba Ọlọrun sọrọ lori rẹ ni. Oun yoo si fi ipese rẹ lati mojuto àjàgà yowu ti o n fa irẹwẹsi fun ọkan rẹ han ọ. (Wo: Numeri 11)

Wayi o, mo mu awọn nkan wọnyi tọ ọ wa lati kan ran ọ leti pe, gẹgẹ bi ọmọ Ọlọrun, o ni iṣẹ iranṣẹ ninu ijọba rẹ ti iwọ naa gbọdọ ṣe ni aṣepe bi Timoti. Ti o ko ba si ti gbajumọ, o nilo lati taji were, ki O si gbadura si Ọlọrun lati fun ọ ni okun lati mojuto ohunkohun ti o ba n di ọ lọwọ lati ṣe iṣẹ naa, yala ailoye ni, imẹlẹ ni, ero àìkójúòṣùnwọ̀n ni, ibẹru ni, irẹwẹsi ni tabi iyọlẹnu awọn kan ni. Aijẹbẹ, wa fi oore-ọfẹ Ọlọrun ti o wa lori aye rẹ ṣofo nigbẹyin. Ko si wa si ẹni ti yoo fi oore-ọfẹ rẹ ṣofo ti a ko ni san lẹsan rẹ. Nitorina, bi mo ti ṣe sọ tẹlẹ, taji, ki o si gbajumọ ohun ti a da ọ, ti a si tun pe ọ lati ṣe. Ki Ọlọrun ṣi pese ohun gbogbo ti o kudiẹ-kaato ni imura ati ifarajin rẹ lati ṣe aṣepe iṣẹ iranṣẹ rẹ, ni orukọ Jesu. Amin.

Ki o ni ọsẹ ti o ga.

Tají, kí o si ṣe iṣẹ́ rẹ | Pst. J.O. Lawal | Agẹmọ 24, 2022 | Vol. 11, No. 12 Read More »

Fún ànfààní rẹ ni | Láti ọwọ́: J.O. Lawal | Ọjọ́: Agẹmọ 17, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 11

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Agẹmọ 2022. Ki Ọlọrun ma fi gbogbo igba pese fun gbogbo aini rẹ lati inu ẹkunrẹrẹ ọrọ ologo rẹ ninu Kirisiti Jesu. Amin.

Wayi o, Pọọlu ni o kọkọ gba adura yi ninu lẹta rẹ si awọn ijọ Filipi. Ki si ni idi ti o fi gba a fun wọn? Idi naa ni pe wọn mu inu rẹ dun jọjọ pẹlu awọn ẹbun kan ti wọn fi ṣọwọ si i. Bi o ti wa tọka si ninu lẹta rẹ si wọn, ko fi inu didun rẹ han nitoripe ti ko ba ri ẹbun wọn ko le wa ni ifọkanbalẹ. O le wa ni ifọkanbalẹ lalai ri ẹbun wọn. Idi si ni pe o jẹ ẹnikan ti Ọlọrun ti kọ ni bi a ti ṣe n gbe aye gbadun bi o ti wu ki asiko ri, yala owo pọ lọwọ rẹ ni tabi ko pọ. (Wo: Filipi 4:10-13)

Nitorina, bi ko ba tilẹ si ẹnikankan ninu awọn ti Ọlọrun ti lo o lati fi idi wọn mulẹ ninu otitọ Jesu ti yoo ran an lọwọ, yoo si tun wa ni ifọkanbalẹ. Ọlọrun yoo ri daju pe o wa ni ifọkanbalẹ. Ranti wipe Ọlọrun ti lo ẹyẹ ìwò, ẹyẹ aimọ, ri lati gbe ounjẹ wa fun iranṣẹ rẹ Elija, laarọ ati ni irọlẹ, ni akoko iyan, ni akoko ti ko si ẹnikẹni ti o ri tirẹ ro. Nibakanna, O le tọju gbogbo awọn iranṣẹ rẹ ti wọn ba gbẹkẹle, boya awọn eniyan fi aye silẹ lati mojuto wọn tabi wọn ko ṣe bẹ ẹ. (Wo: 1Awọn Ọba 17:2-6)

Amọ ṣa o, bi Pọọlu tun ṣe jẹ ki o yẹ wa ninu lẹta rẹ si awọn ara Filipi yi, fun anfaani wọn ni ti wọn ba fi fun un lati ara nkan ini wọn. Ki si ni idi? Akọkọ, nipa ṣiṣe eyi, wọn yoo ma mu ifẹ Ọlọrun fun aye wọn ṣẹ. Ọlọrun ti paṣẹ pe ki gbogbo awọn ti o n waasu ihinrere ma ti ipasẹ rẹ gbọ bukata ara wọn. Nitorina, ẹnikẹni ti o ba n kopa ninu iṣẹ iranṣẹ wọn, ti o si n tipasẹ rẹ di alabukunfun gbọdọ ma kopa ninu aini wọn pẹlu. (Wo: Luuku 10:5-7; Filipo 4:14; 1Kọrinnti 9:14; Galatia 6:6)

Siwajusi, bi Pọọlu ti ṣẹ fi han awọn ara yi, nipa pipin lara nkan ini wa fun awọn ti o n bọ wa pẹlu ọrọ Ọlọrun, nṣe ni a n to ìṣura jọ sinu àpò-ìṣura wa ti o wa lọdọ Ọlọrun. Nitorina, bi o tilẹ jẹ wipe eniyan ni a n fi fun un, niwọn igba ti a ba ti fi fun wọn pẹlu ọyaya ati lalai kun sinu, Ọlọrun funrarẹ yoo gba ẹbun wa bi ọrẹ ati ẹbọ olóòórùn-dídùn, eyi ti o tẹẹ lọrun, ti o ṣi tun jẹ itẹwọgba si i. Niwọn igba ti O ba si ti gba ẹbun wa lọna yi, a le mọ daju pe yoo pin wa ni ere fun un ni akoko ti o tọ ati ni ọna ti o yẹ. (Wo: Galatia 6:6-10; 2Kọrinnti 9:6-8; Filipi 4:18-19)

Yatọ si awọn nkan wọnyi, nigba ti a ba mu ifẹ Ọlọrun ṣẹ lori aye wa nipa fi fifun awọn ojisẹ rẹ si wa, yatọ si wipe a o jẹ ki wọn kun fun ọpẹ si Ọlọrun nitori wa, a o tun ru wọn soke lati fi tọkantọkan gbadura fun ire wa, bi Pọọlu ti ṣe ṣe fun awọn ara Filipi ninu lẹta rẹ si wọn. Ta lo si wa mọ iru ipa ti irufẹ awọn adura ti a ba gba lọna yi le ko lori aye wa? (Wo: 2Kọrinnti 9:12-14)

Wayi o, ti o ko ba wa ti fi ara rẹ jin fun pipin lara awọn nkan daradara ti o ni fun awọn ojiṣẹ ti Ọlọrun n lo fun ọ, mọ wipe o ti ma rin ninu ifẹ rẹ fun ọ ni ọna ti o peye ati wipe o tun n ja ara rẹ lole awọn nkan kan ti ko ba ti jẹ tirẹ. Nitorina, ji ọkan rẹ lati mu ọrọ yi ni ọkunkundun. Si pinu lori ọna ti iwọ naa yoo gba lati ma fi igba gbogbo ran wọn lọwọ ni ibamu pẹlu bi Ọlọrun ti ṣe bukun fun ọ pẹlu owo. Ki Ọlọrun si fun ọ ni okun lati tayọ lori ọrọ yi, ni orukọ Jesu. Amin. Ma gbadun!

Fún ànfààní rẹ ni | Láti ọwọ́: J.O. Lawal | Ọjọ́: Agẹmọ 17, 2022 | Àtẹ̀léra: Látorí tábìlì Pásítọ̀ | Nọ́múbà: Vol. 11, No. 11 Read More »

Má fi ìgbẹ́kẹ̀lé rẹ sínú wọn | J.O. Lawal | Agẹmọ 10, 2022 | Vol. 11, No. 10

Leave a Comment

Àtẹ̀léra: Látorí tábìlì Pásítọ̀

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa. Inu mi dun lati ki ọ kaabọ sinu ọsẹ tuntun miran ninu oṣu Agẹmọ 2022. Adura mi si ni pe ki Ọlọrun jẹ ki ọkan rẹ gba okun ati iwuri lati ma fi gbogbo igba fi igbekẹle rẹ si inu rẹ. Amin.

Ni awọn ọjọ melokan ṣẹyin, oniruuru ìfọ̀rọ̀-jomitoro-ọ̀rọ̀ ni o n lọ lori tani o yẹ ki o jẹ olori orilẹ-ede yi ti o n bọ tabi ta ni o yẹ ki a dibo fun. Niwọn igba ti o si tọ fun ẹnikọọkan lati tẹle ẹri ọkan rẹ lori ọrọ yi, o tun ṣe pataki ki a ma kọ eti didi si ọrọ ti Ọlọrun ṣọ fun wa nipa fifi igbẹkẹle wa sinu eniyan. Aijẹbẹ, a ni ye lugbadi awọn nkan ti a fi ọwọ ara wa yan.

Ki si ni ọrọ Ọlọrun si wa lori ọrọ yi? Oun naa ni o sọ pe, “Ẹ ma ṣe gbẹke yin le awọn ọmọ alade, ani le ọmọ eniyan, lọwọ ẹni ti ko si iranlọwọ.” (Saamu 146:3) Ki ni aṣẹ ti a pa fun wa nibi yi? Oun naa ni pe ki a ma fi igbẹkẹle wa sinu ẹlẹran ara, bi o ti wu ki wọn gbajumọ, jẹ olododo tabi ni agbara to ni oju wa. Ki wa ni idi? Bi onisaamu yi ti ṣe wi, idi ni pe wọn ko ni agbara lati gba wa la tabi fa wa lọwọ soke.

Lotitọ, eniyan le ni lọkan lati ṣoore fun wa, gba wa la tabi fa wa lọwọ soke. Ṣugbọn pe a ni lọkan lati ṣe nkan ko tunmọ si pe a ni agbara lati ṣe, bi idojukọ tilẹ wa. Ọlọrun nikan ni O ni agbara lati ṣe ohun yowu ti O ba gbero lati ṣe, boya aye fẹ tabi wọn kọ. Ti ko ba si wa ro eniyan ni agbara lati ṣe ohun ti o n gbero lọkan rẹ, bi o ti wu ki nkan naa dara to, erongba rẹ, ete rẹ ati akitiyan rẹ di dandan ki o ja si pabo (Saamu 127:1-2; Owe 19:21). Nitorina, a ko gbọdọ fi ireti wa fun igbe aye ọtun tabi fun orilẹ-ede ọtun sinu eniyan afi sinu Ọlọrun. Idi si ni pe ti Ọlọrun ko ba fun wọn ṣe, gbogbo ileri ati ero rere wọn lati mu ku aye dẹrun si fun wa di dandan ki o ja si asan.

Idi miran ti a ko fi gbọdọ fi igbẹkẹle wa sinu eniyan ni pe wọn jẹ àràmọ̀ndà. Eyi tunmọ si pe, wọn le pe pa iwa tabi iṣe da. Iyipada yi ṣi le jẹ fun rere tabi fun buburu, o le jẹ si daradara si tabi si idibajẹ si. Nitorina, ti Ọlọrun ba tilẹ yan eniyan lati ṣe awọn oore kan fun wa, o ṣi ṣeeṣe ki ẹni naa ma ṣe oore naa lẹyin-ọ-rẹyin. Akoko kan le de, ki wọn yi pada fun igba diẹ tabi patapata kuro ninu ifẹ Ọlọrun lati ṣe ti ara wọn.

Fun apẹrẹ, bibeli jẹ ki o ye wa pe Jeroboamu, iyẹn ọba akọkọ ti apakan orilẹ-ede Isiraẹli ti o wa ni iha ariwa, jẹ ayoo Ọlọrun. Ọlọrun lo yan pẹlu ami-ororo lati jọba lori awọn eniyan rẹ, lati tu wọn lara ati lati dari wọn sinu ifarajin ti o tọ si i. Ṣugbọn nigba ti ọkunrin yi fi idi mulẹ tan gẹgẹ bi ọba, ko lepa lati ṣe ifẹ Ọlọrun fun ara rẹ tabi fun awọn eniyan rẹ rara. Dipo eyi, nṣe ni o yipada patapata kuro ninu ijọsin Ọlọrun lati ma bọ awọn oriṣan miran, awọn oriṣa ti oun tikararẹ da. O si tun dari awọn eniyan rẹ lati ṣe bakanna. (Wo: 1Kings 11-14)

Njẹ eyi wa ya Ọlọrun lẹnu bi? Rara o! Iru awọn nkan wọnyi ko ki ya a lẹnu rara. Idi si ni pe O mọ pe aramọnda ni a jẹ. O mọ pe Oun da wa lati le yi pada. Boya iyipada si rere wa ni o tabi si buburu, ko si ẹyi ti ipa rẹ ko ka ninu rẹ. Amọ, ni ọpọ igba, awa ni a ko ki i wa ni igbaradi lati koju iyipada awọn eniyan. Nitorina, ti wọn ba ti yipada, ti wọn si ja wa kulẹ, nṣe ni a ko ni mọ nkan ti o yẹ ki a ṣe mọ, ti a o si yọnda ara wa fun irufẹ asiko ti ko rọọrun yowu ti iyipada wọn ba bi fun wa. Idi kan pataki si ni yi ti orilẹ-ede wa fi wa ni ibi ti o wa loni.

Ni kukuru, Ọlọrun tun wa n bawa sọrọ lẹkan si, O si n sọ fun wa pe ki a ma fi igbẹkẹle wa sinu eniyan afi sinu rẹ, bi a tun ṣe n wọ asiko idibo miran lọ. Idi si ni pe Oun ko ki i yipada kuro ninu ododo ṣiṣe (2Timoti 2:13). Nitorina, a le gbẹkẹle ni gbogbo igba lati ṣe wa ni ire, bi awọn eniyan tilẹ ja wa kulẹ. Yatọ si eyi, O tun ni agbara lati wo ilẹ wa san, yọ wa kuro ninu ẹrọfọ ẹgan ti a wa ati fi ẹsẹ wa mulẹ sori apata ti o le koko.

Si wa wo nkan ti onisaamu ẹkan sọ siwaju si nipa Ọlọrun fun wa:

“Ibukun ni fun ẹni ti o ni Ọlọrun Jakọbu ni oluranlọwọ rẹ; ireti ẹni ti n bẹ lọdọ Oluwa Ọlọrun rẹ. Ẹni ti o da ọrun oun aye, okun ati ohun gbogbo ti o wa ninu wọn: ẹni ti o pa otitọ mọ titi aye: Ẹni ti o n ṣe idajọ ododo fun ẹni ti a ni lara: ẹni ti o n fi ounjẹ fun ẹni ti ebi n pa. Oluwa tu awọn ara ẹwọn silẹ: Oluwa gbe awọn ti a tẹ lori ba dide; Oluwa fẹ awọn olododdo: Oluwa pa awọn alejo mọ; o tu awọn alaini baba ati opo lara, ṣugbọn ọna awọn eniyan buburu ni yoo yipo.” (Saamu 146:5-9)

Adura mi ni pe ki awọn nkan wọn ati eyi ti o pọ ju bẹẹ lọ jẹ iriri wa kaakiri orilẹ-ede yi ni awọn oṣu ati ọdun ti o n bọ, ni orukọ Jesu. Amin.

Ki o ni ọsẹ ologo.

Má fi ìgbẹ́kẹ̀lé rẹ sínú wọn | J.O. Lawal | Agẹmọ 10, 2022 | Vol. 11, No. 10 Read More »

Ikú tó farasin | Pst. J.O. Lawal | Agẹmọ 03, 2022 | Vol. 11, No. 9

Leave a Comment

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Agẹmọ 2022. Adura mi si ni pe ki Ọlọrun, ninu aanu rẹ, ma fi gbogbo igba pa iwọ ati ohun gbogbo ti o jẹ tirẹ mọ kuro ninu gbogbo ewu pakute Eṣu ti o farasin. Amin.

Bi akọsilẹ bibeli ti ṣe lọ, igba meji ọtọọtọ ni ọba Isiraẹli, Sọọlu, ba Dafidi sọrọ lori ki o fi ọmọ rẹ ṣaya. Igba akọkọ, Merabu, ọmọbinrin rẹ agba, ni o kọkọ fi lọ ọ. Ṣugbọn ọdọmọkurin yi kọ jalẹ. O sọ fun pe awọn eniyan oun ko lowo tabi ni iyi to lati jẹ àna ọba. Nitorina, Sọọlu jami lẹnu ọrọ naa, o si fi ọmọ rẹ fun elomiran. (Wo: 1Sámúẹ́lì 18:17-19)

Lẹyin igba ti o ṣe diẹ si, ẹwẹ, awọn iranṣẹ Ṣọọlu tun sọ fun pe ọmọbirin rẹ kekere, iyẹn Mikali, ti yo ifẹ fun Dafidi. Nitorina, lẹsẹkẹsẹ ni o sọ fun wọn pe ki wọn ba Dafidi sọrọ lẹkan si pe anfaani miran tun ti ṣi ṣilẹ fun lati di àna ọba ati wipe nkan kanṣoṣo ti o nilo lati ṣe ni ki o mu ọgọ́rùn-ùn nkan ọmọkunrin awọn ara Filisitini wa – loba pari. Eyi wa tunmọ si pe Dafidi kọkọ gbọdọ pa ọgọ́rùn-ún ọmọkọrun Filisitini ki o to le ri nkan ọmọkunrin wọn. (Wo: 1Samuẹli 18:20-25)

Ki gan wa lo fa ti Sọọlu ṣe taku lori fifi ọkan lara awọn ọmọbinrin rẹ fun Dafidi gẹgẹ bi aya? Ṣe oun nikan ni ọkunrun ti o dangajia to lati fẹ awọn ọmọ rẹ ni? Rara! Abi ṣe inu rẹ lo dun to bẹẹ si Dafidi ti o fi fẹ ki o jẹ àna rẹ ni dandan? Rara! Bibeli jẹ ki o ye wa pe Ṣọọlu n jowu Dafidi ni akoko yi nitori aṣeyọri rẹ gẹgẹ bi jagunjagun ati nitori iyi ti o ni laarin awọn eniyan. Nitorina, ko ki i ṣe nitoripe inu rẹ dun si lati ni gẹgẹ bi àna ni o ṣe fẹ ki o fẹ ọkan lara awọn ọmọbinrin rẹ; dipo eyi, nitoripe o fẹ lo ọrọ igbeyawo naa gẹgẹ bi pakute iku fun un ni. Ti ko ba wa jẹ pe Ọlọrun wa pẹlu rẹ, nṣe ni ko ba di oku nibi ti o ti n ṣe akitiyan lati di ana ọ̀ba. (Wo: 1Sámúẹ́lì 18:29-27)

Ki wa ni koko ọrọ yi? Oun naa ni pe awọn igba ma n wa ti ojurere awọn eniyan kan si wa tabi ti awọn nkan ti wọn n tọrọ lọwọ wa le jẹ oògùn iku, iparun tabi ẹsin ti a fi ewe ṣúgà pọn. Ti Ọlọrun ko ba si ṣi wa ni oju lati ri nkan ti awọn eniyan wọnyi n gbero lati ṣe si wa, ki O si fi ọna abayọ han wa, o ṣeeṣe ki a lugbadi ete ibi wọn. Nitorina, a ko gbọdọ fi igba kankan lero pe a o wa ni ipamọ nitori pe iwa wa dara si awọn ti o wa ni ayika wa, nitoripe a wa ni mimọ niwaju Ọlọrun tabi nitoripe a ma n fi gbogbo igba ṣọraṣe ninu ibaṣepọ wa pẹlu awọn elomiran. Dipo eyi, nṣe ni ki a ma fi gbogbo igba fa ara wa le Ọlọrun lọwọ fun ipamọ. Nitoripe ti Oun ko ba pa wa mọ, a ko le wa ni ipamọ, bi o ti wu ki a ni ifura to tabi bi awọn igbesẹ wa lati wa ni ipamọ ṣe le munadoko to (Saamu 127:1).

Ranti Ùráyà, ọkan lara awọn jagunjagun Dafidi. Ranti pe oun funrarẹ ni o mu lẹta idajọ iku rẹ lọ sọdọ awọn ti o ṣeto iku rẹ. Bẹẹ si ni ko mọ nkankan titi o fi parun. Bawo ni ko ba tilẹ ṣe mọ pe ọba ti o fi ọkan tan, ti o si ṣetan lati ku fun ni ọjọkọjọ ati ni akokokakoko le fi idajọ iku pamọ sinu lẹta ti o gbe le e lọwọ? Tabi ba wo ni o ṣe fẹ mọ pe gbogbo ojurere ati aanu ti ọba n fi han fun ni awọn wakati ikẹyin rẹ laye jẹ ete lasanlasan lati jẹ ki o gba ọmọ-àlè gẹgẹ bi ọmọ? Ko si bi o ṣe fẹ mọ awọn nkan wọnyi ti o ko ba ṣe pe a ba fun ni iṣipaya wọn. Nitorina, o ṣegbe nitoripe ko ni iṣipaya awọn nkan ti o le jẹ ki o gbaradi, ki o si bọ ninu iku ti o n bọ wa mu lọ. (Wo: 2Sámúẹ́lì 11)

Eyi jẹ ki o ye wa pe awọn eniyan daradara, awọn olootọ eniyan ati awọn olododo eniyan le lugbadi iwa ika awọn eniyan, pẹlupẹlu awọn ti wọn fi ọkan tan, ti Ọlọrun ko ba ṣaanu fun wọn, ki O si tun daabo bo wọn. Nitorina, mo n sọ fun ẹ lẹẹkan si pé kí o kọ́ lati ma fi gbogbo igba fa ara rẹ ati ohun gbogbo ti o jẹ tirẹ le Ọlọrun lọwọ fun ipamọ dipo ki o gbójúlé didara tabi jijafafa rẹ. Adura mi si ni pe ki Oun, ninu ẹkunrẹrẹ aanu rẹ, ma fi gbogbo igba fi gbogbo pakute ọta ti o farasin han ọ, ki O si tun ma ko ẹṣẹ rẹ yọ kuro ninu wọn. Amin.

Ki o ni oṣu Agẹmọ ti o ga.

Ikú tó farasin | Pst. J.O. Lawal | Agẹmọ 03, 2022 | Vol. 11, No. 9 Read More »

Ọ̀tá ara rẹ | Pst. J.O. Lawal | Òkúdù 26, 2022 | Vol. 11, No. 8

Leave a Comment

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Tayọtayọ ni mo fi ki ọ kaabọ sinu ọsẹ ti o kẹyin oṣu Òkúdù 2022. Adura mi si ni pe ki Ọlọrun ya aye rẹ ya ohun gbogbo ti o n di ifarahan ibukun rẹ lọna ti o peye ninu aye rẹ lọwọ, ni orukọ Jesu. Amin.

Ninu ààlọ́ ti Jesu pa lori ọkunrin kan ti o fun awọn iranṣẹ rẹ ni owo kan lati fi ṣiṣẹ, a ri ẹkọ atigbadegba kan ti o ṣe pataki dimu. Oun naa si ni pe ẹnikẹni ti ko ba ni fi ọpọlọ pipe ṣe amulo awọn ibaṣepọ, amuyẹ, anfaani tabi oore-ọfẹ ti Ọlọrun fun laye yi ko ni pọ si ni iṣẹ rere ati ni awọn nkan daradara ti aye yi. Kiki awọn ti o ba n lo ọpọlọ wọn lati fi gbogbo igba ṣe amulo awọn nkan ti Ọlọrun fun wọn ni yoo tẹsiwaju lati ma pọ si ni iṣẹ rere ati ni nkan daradara.

Bi akọsilẹ naa ti ṣe lọ, ọkunran kan ti o n lọ si irin-ajo jinjin pinnu lọkan rẹ lati fun awọn ọmọ ọdọ rẹ kan ni diẹ lara owo rẹ, ki wọn ba le fi ṣiṣẹ. Eyi jasi pe ko fẹ ki owo rẹ kan joko kalẹ sinu kolo rẹ, ki eruku ma bo mọ ibẹ nigba ti ko ba si nile. Nitorina, o fun awọn iranṣẹ rẹ lara rẹ lati ṣiṣẹ, gẹgẹ bi ipa ẹnikọọkan wọn ti mọ. O fun ẹnikan ni talẹnti marun-un. O fun elomiran ni talẹnti meji. O si tun fun elomiran ẹwẹ ni talẹnti kan.

Wayi o, lẹyin ọjọ pipẹ, ọkunrin yi pade lati irin-ajo rẹ, o si bẹrẹ si ni ṣe agbeyẹwo nkan ti awọn ọmọ ẹyin rẹ ṣe pẹlu owo ti o fun wọn. Si iyalẹnu rẹ, meji pere lara wọn ni o ṣiṣẹ pẹlu owo ti o fun wọn, ti wọn si sọ di pupọ si. Ọkunrin ti o gba talẹnti marun-un jẹ ere talẹnti marun-un miran pẹlu owo ti a fun. Bẹẹ si ni pẹlu, ọkunrin ti o gba talẹnti meji naa jẹ ere talẹnti meji miran pẹlu owo ti a fun. Amọ awawi lasan ni ọkunrin ti a fun ni talẹnti kan mu wa. Ko ṣe nkankan pẹlu talẹnti ti a fun. Nitorina ko jẹ ere kankan pẹlu rẹ.

Ki wa lo fa ti ọkunrin yi ko fi ṣe nkankan pẹlu talẹnti tirẹ? Idahun ti awọn eniyan ṣaba ma n fun ibere yi ni pe ọkunrin yi ko ṣe nkankan pẹlu talẹnti tirẹ nitoripe o woye pe o ti kere ju, ti a ba ṣe afiwe re pẹlu eyi ti a fun awọn yoku. Ṣugbọn eyi ko ki i ṣe idi ti ko fi lo rara. Lakọkọ, oluwa wa fun ẹnikọọkan wọn ni owo ti o fun un ni ibamu pẹlu ipa rẹ. Nitorina, nkan ti ipa iranṣẹ yi ka ni a fun. Ekeji, awọn olukọtan jẹ ki o ye wa pe talẹnti kan ni akoko yi dabi ki a ko owo iṣẹ ojumọ alagbese kan jọ fun bi ogun ọdun. Nitorina, ọpọlọpọ owo ni a fun ọkunrin yi.

Eyi wa jẹ ki o ye wa pe ko ki i ṣe nitoripe owo ti a fun kere ni ko ṣe ṣe nkankan pẹlu rẹ. Dipo bẹẹ, gẹgẹ bi ọrọ oun funrarẹ, nitoripe ẹru lati padanu owo naa n ba a ni ko ṣe ṣe nkankan pẹlu rẹ (Matiu 25:25). Ṣugbọn bi oluwa rẹ ti ṣe sọ fun, ti o ba jẹ wipe o fi owo yi si ile ifowopamọsi ni, nṣe ni ko ba gba a pada pẹlu èlé lori rẹ. Nitorina, ẹ̀rù ko to gẹgẹ bi idi fun lati ma ṣe nkankan pẹlu aduru owo nla yi. O ni iṣoro miran, eyi si ni imẹlẹ. O tunmọ si pe nitoripe ọkunrin yi ya ọlẹ ninu ọpọlọ rẹ ati pẹlu ọwọ rẹ ni ko ṣe gbiyanju rara lati wo ọna ti o le gba sọ owo ti a fun di pupọ si. Nitori eyi, o wa papa jẹ ki nkan ti oluwa rẹ ko fẹ ki o ṣẹlẹ ṣẹlẹ — o jẹ ki owo rẹ kan wa ni ojukan laipọsi.

Ki a ma fa ọrọ gun, yatọ si ijiya ti a fun ọkunrin ọlẹ ati alailere yi, oluwa rẹ tun paṣẹ pe ki a gba owo ti a fun kuro lọwọ rẹ, ki a si fun ọkan lara awọn iransẹ ti wọn ti fi ara wọn han gẹgẹ bi ẹni ti o dangajia lati ri nkan gba si lọwọ ọga wọn. Ni ipari, Jesu Oluwa wa wa sọ wipe bi nkan ti ṣe ri gẹlẹ niyi ninu ijọba Ọlọrun. Awọn ti o ba kọbiara si nkan ti Ọlọrun fun wọn – eniyan, dukia, amuyẹ, ẹbun, ẹkọ, ipo ati bẹẹbẹẹ lọ – bi o ti wu ki awọn nkan yi kere tabi ki wọn ma ṣe pataki to – ti wọn si n ṣe amulo to peye wọn nikan naa ni yoo tẹsiwaju lati maa gbe ga ati lati jẹ ki wọn ma pọ si ni nkan rere. Ṣugbọn awọn ti ko ṣe nkankan pẹlu nkan ti O fun wọn ko ni ireti mi ju pe ki a tun gba nkan ti a fun wọn kuro lọwọ wọn, bi o ti wu ki nkan naa kere to. Eyi si ni alaye fun bi awọn otoṣi eniyan ni ọpọ igba ṣe ma n toṣi si ati ti awọn olowo ati gbajumọ eniyan ni ọpọ igba ṣe ma n di olowo ati ilumọọka si.

Nitorina, ti o ko ba ma ṣe amulo awọn nkan ti Ọlọrun fun ọ tabi tí Ó ti jẹ ki o ri gba nipa oore-ọfẹ rẹ, nṣe ni o n fi ara rẹ han bi alailere ati bi ẹni ti ibi giga ko tọ si laye yi. Iwọ gan an wa ni ọta ara rẹ lori ọrọ yi, bi awawi rẹ ṣe wu ko ri. Iwọ ni o n de ara rẹ lọna, ti o si tun n ja ara rẹ kulẹ. Nitorina, ma ṣe reti ki nkan dara si fun ọ nigba ti o jẹ pe yoo buru si ni.

Wayi o, adura mi ni pe ki nkan ma fi gbogbo igba dara siwaju ati siwaju fun ọ dipo ko ma buru si. Ṣugbọn gbigbadura nipa rẹ nikan ko to. Iwọ na nilo lati ji kuro ninu oorun rẹ, ki o ye wa awawi fun ikuna tabi ìṣẹ́ rẹ mọ, ki O si ṣe ìdámọ̀ ati àmúlò ohun gbogbo ti Ọlọrun fun ọ ti o le lo lati pọ si ni iwulo, iṣẹ rere ati dukia ni aye yi. Bi o ba si ṣe n ṣe eyi, iyalẹnu ni yoo jẹ fun ọ nigba ti o ba ri bi awọn iIbukun Ọlọrun ti o ti farasin ninu aye ṣe bẹrẹ si ni farahan ni ẹkunrẹrẹ.

Ki o ni ọsẹ alarinrin.

Ọ̀tá ara rẹ | Pst. J.O. Lawal | Òkúdù 26, 2022 | Vol. 11, No. 8 Read More »

Tan ìhìnrere náà kálẹ̀. | Pst. J.O. Lawal. | Òkúdù 19, 2022. | Vol. 11, No. 7

Leave a Comment

Olufẹ: ki oore-ọfẹ ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu yi. Mo gbadura pe ki a ka ọ yẹ fun ipe Ọlọrun ti o ti ri gba ninu ọsẹ naa ati ni gbogbo iyoku ọjọ aye rẹ. Amin.

Ọkan lara awọn nkan ti Oluwa n reti ki ẹnikọọkan ti o ti jẹ ajogun didara ati igbala rẹ ma ṣe ni titan ihinrere awọn nkan ti O ti ṣe fun wọn de ọdọ awọn miran. Nipa ṣiṣe eyi, awọn ti wọn ba tan ihin naa de ọdọ wọn yoo le ni iwuri lati wa sọdọ rẹ lati ni iriri didara rẹ ninu aye ti awọn naa. Fun apẹẹrẹ, lẹyin igba ti O ti tu ọkunrin were ti awọn legioni ẹmi eṣu n gbe inu rẹ silẹ tan, Oluwa sọ fun pe, “Lọ si ile rẹ ki o si sọ fun awọn ara ile rẹ, bi Oluwa ti ṣe ohun nla fun ọ, ati bi o si ti ṣaanu fun ọ.” (Maaku 5:19)

Njẹ ọkunrin yi wa ṣe bi Oluwa ti paṣẹ fun bi tabi ko ṣe bẹẹ? O ṣe bẹẹ! Ka tilẹ sọ otitọ, o ṣe ju bi a ti lero pe yoo ṣe lọ. Ko ki i ṣe awọn ara ile rẹ nikan ni o sọ nkan ti Ọlọrun ṣe fun fun. Nṣe ni o tun lọ kaakiri lati ma sọ fun gbogbo awọn ti o bikita lati gbọ tirẹ ni agbegbe kan ti a n pe ni ‘Dekapoli, eyi ti o tunmọ si ‘Ilu Mẹwa’.

Iwọ naa gbe yẹwo. Ọkunrin yi lọ kaakiri agbegbe ilu mẹwa tan, o si n sọrọ nipa nkan ti Jesu ṣe fun nibẹ. Ki ni idi? Akọkọ, idi ni pe o mọ nkan ti Oluwa ṣe fun loore gidigidi. Ekeji, idi ni pe o fẹ ki awọn miran ti wọn wa labẹ ide Satani naa mọ pe wọn le gba idande nipa titọ Oluwa wa, bi o ti wu ki ọrọ wọn buru to.

Nibakana, ti Oluwa ba ti dara si wa nitootọ ninu ijọ wa, ojuṣe wa si ni lati jẹ ki awọn miran mọ nipa rẹ. Ti o ba jẹ pe nitootọ ni O n yi aye wa pada si rere, ti O si n mu ki a ni itẹsiwaju nipasẹ ọrọ rẹ, o wa yẹ ki a jẹ ki awọn ọrẹ, ẹbi, akẹgbẹ wa ni ibi iṣẹ tabi ni ile-ẹkọ ati aladugbo mọ pe awọn naa le jẹ alajọpin didara rẹ pẹlu wa. Bi mo si ti ṣe sọ siwaju, Ọlọrun funrarẹ n reti pe ki a ṣe eyi. Idi si ni pe ọkan pataki lara awọn idi ti O fi n ṣe rere fun wa ni ki a ba le jẹ ilẹkun fun lati le wọnu aye awọn ti o wa ni ayika wa, ki O si ṣe rere fun awọn naa pẹlu.

Nkan ti eyi wa tunmọ si ni pe ti a ba kọ lati tan ihinrere didara rẹ si wa de ọdọ awọn ti o wa ni ayika wa, ko ki i ṣe pe a n fi ara wa han gẹgẹ bi alanikanjọpọn nikan, nṣe ni a tun n di iṣẹ rẹ lọwọ. Ko si wa si bi a o ṣe ma fi anikanjọpọn di iṣẹ Ọlọrun lọwọ ti a ko si ni jẹ iya rẹ, okere ni o tabi o pọ. Boya eyi gan tilẹ ni idi ti awa kan fi n ni iriri ainitẹsiwaju ninu aye wa. Yoo wa bojumu ti a ba tete ronupiwada, ki a si bẹrẹ si ni fi itara dari awọn ti o wa ni ayika wa lati ni iriri didara Ọlọrun ti a n jẹ igbadun rẹ lọwọlọwọ.

Wayi o, eyi ko wa jasi pe ki a fi túláàsì tabi àrékérekè mu ẹnikẹni lati di alabapin pẹlu wa ninu igbadun didara Ọlọrun. Dipo bẹẹ, o tunmọ si pe ki a ṣe ohun gbogbo ti o wa ni ikawọ wa lati fun iye awọn yowu ti a ba ni oore-ọfẹ lati fun ni iwuri lati wa sọdọ Oluwa funra wọn, ki wọn ba le ri bi O ti ṣe le dara si wọn ati ṣe wọn ni aanu to. Ki Ẹmi Ọlọrun si ma fi gbogbo igba kọ ọkan wa ati fun un ni okun lati mu ọrọ yi ni pataki ninu aye wa, ni orukọ Jesu. Amin.

Ki o ni ọsẹ alarinrin.

Tan ìhìnrere náà kálẹ̀. | Pst. J.O. Lawal. | Òkúdù 19, 2022. | Vol. 11, No. 7 Read More »

Fi ara rẹ si ipo irẹlẹ. | Pst. J.O. Lawal. | Òkúdù 12, 2022. | Vol. 11, No. 6

Leave a Comment

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Òkúdù 2022. Mo si gbadura pe ki Ọlọrun jẹ ki ọkan rẹ wa ni itẹriba niwaju rẹ ni gbogbo igba, ki ainitẹsiwaju ma ba gba ijọba aye rẹ, ni orukọ Jesu. Amin.

Gẹgẹ bi a ti sọ fun wa ninu bibeli, idi ti angẹli Ọlọrun ti a n pe ni Satani loni fi di ẹni ti a n pe ni Satani ni igberaga. Ni ibẹrẹ-pẹpẹ, Ọlọrun da ni pipe ninu ẹwa ati ninu ọgbọn, a si tun fi si ipo nla laarin awọn angẹli Ọlọrun yoku. Ṣugbọn nigba ti o jẹ ki ẹwa rẹ ko si lori, Ọlọrun re jabọ kuro ni ipo atata ati ipo agbara ti o wa. (Isikiẹli 28:11-19)

Ki wa ni idi ti a fi sọ eyi fun wa ninu bibeli? Oun naa ni ki a le mọ pe Ọlọrun korira igberaga. Ki lo si fa ti O fi korira igberaga? Idi ni pe igberega jẹ ami wipe a ko fẹ gbe oriyin ti o jẹ tirẹ fun lori awọn nkan daradara ti a ni tabi ti a n gbe ṣe. Bi a si ti ri ninu bibeli, gbogbo wa ko jẹ nkankan lalaisi Ọlọrun ati pe a ko le da ohunkohun ni lailisi rẹ. Oun ni ẹlẹda wa ati ẹlẹda ohun gbogbo ti o n bẹ. Nitorina, ko si nkan ti a le sogo le lori ninu aye yi tabi ninu aye eyi ti o n bọ. Òun ti wà ki ohun gbogbo to wa ati pe ohun gbogbo wa lati ọdọ rẹ, wọn si tun jẹ tirẹ. (Wo: Saamu 24:1; Kolose 1:16:17; Ifihan 4:11)

Ṣugbọn nigba ti a ba kọ lati gba ododo yi, ti a si bẹrẹ si ni ṣe bi pe a ja mọ nkan, boya si Ọlọrun tabi si awọn eniyan, nṣe ni a n gbe ara wa gori ẹṣin aáyán, ti a si n fi ara wa si ipo ti Ọlọrun yoo fi re wa jabọ, gẹgẹ bi O ti ṣe re Satani jabọ. Bibeli sọ wipe, “Ọlọrun n kọ oju ija si awọn agberega; ṣugbọn O n fi oore-ọfẹ fun awọn onirẹlẹ.” Nitorina, iru ẹni yowu ti a jẹ tabi ipo yowu ti a wa ni aye yi, ni kete ti a ba ti fi aye gba igberaga ninu aye wa, ni kete ti a ba ti bẹrẹ si ni ronu tabi wiwu bi igba ti o jẹ pe Ọlọrun ni wa naa ni a o ti ri pe O ti n doju ija kọ wa. Ti a ba si wa kọ lati ronupiwada ni kiakia, ko ni pẹ rara ti a o fi ri pe a ti di ẹni itẹmọlẹ tabi pe a ti di ero ọrun apadi. (Wo: Jemisi 4:6; 1Peteru 5:5)

Nitorina, ma ṣe fi aye silẹ fun irufẹ igberaga kankan ninu aye rẹ, bi o ti wu ki aye ma lọ ni mẹlọmẹlọ fun ọ to tabi bi ipo atata ti o wa ti le ga to tabi bi o ti wu ki o wulo ni ọwọ Ọlọrun to. Ranti pe Satani naa ti fi igba kan ri jẹ ohun elo iyin ti o ga ni ọwọ Ọlọrun. Ṣugbọn igberaga ba aye rẹ jẹ. O ṣi le ba aye awa naa jẹ pẹlu. O le fi idibajẹ sinu ẹwa, ọgbọn, imọ, ipo ati iwulo wa, ti awa naa ba fi aye gba. O le sọ wa di eranko buburu, ẹranko buburu ti Ọlọrun ko ni fẹ ba ni ohunkohun ṣe pẹlu.

Ṣe nkan ti o wa fẹ ni eyi? Ṣe o wa fẹ di ẹni ti Ọlọrun yoo ma lepa lati gbe ju sọnu tabi palẹ rẹ mọ? Mo mọ pe o ko fẹ ki nkan ri bẹ fun ọ. Ṣugbọn nkan le papa ri bẹ fun ọ, ti o ba fi aye gba irufẹ igberaga kan tabi omiran ninu aye rẹ, Nitori eyi, ṣọ ara rẹ. Kiyesi bi o ti ṣe n ba Ọlọrun ati awọn eniyan lopọ. Njẹ ki Ẹmi Ọlọrun ṣi oju rẹ si irufẹ igberaga yowu ti o le wa ninu rẹ, ki o ba le ṣe ohun ti o tọ nipa rẹ ki o to yọri si iṣubu rẹ, ni orukọ Jesu. Amin.

Ki o ni ọsẹ alarinrin.

Fi ara rẹ si ipo irẹlẹ. | Pst. J.O. Lawal. | Òkúdù 12, 2022. | Vol. 11, No. 6 Read More »