latori tabili paito

Olufẹ: Ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o so oṣu Òkúdù ati oṣu Agẹmọ 2025 papọ mọ ara wọn. Adura mi si ni pe ki Ọlọrun ṣe ohun gbogbo ti o ni i ṣe pẹlu aye rẹ ni aṣepe, bi a ti ṣe n wọ inu abala keji ọdun yi ninu ọsẹ naa. Amin.

Dafidi, ninu ọkan ninu awọn saamu rẹ, sọ wipe, “Oluwa yoo ṣe ohun ti n ṣe temi laṣepe; Oluwa, aanu rẹ duro laelae; Ma ṣe kọ iṣẹ ọwọ ara rẹ silẹ.” (Sáàmù 138:8) Tani yoo ṣe ohun ti o ni i ṣe pẹlu Dafidi ni aṣepe? Oluwa! Ki ni idi! Idi ni pe Oun nikan ni O ni agbara aṣepe lọwọ. Ti ko ba wa ṣe awọn nkan ti o ni i ṣe pẹlu aye wa ni aṣepe, ko si ohun yowu ti a le ṣe lati ṣe aye wa ni aṣepe ti yoo ṣiṣẹ.

Ṣe a wa nilo aṣepe ni abala aye wa kankan bi? Ti a ko ba wa mọ tabi lero pe a nilo aṣepe ni abala aye wa kan, a ko ni pongbẹ fun un tabi gbe igbesẹ lati lọ fun un. Dafidi, fun apẹrẹ, ri kedere pe oun nilo aṣepe in awọn abala aye oun kan ni asiko ti o kọ saamu yi. Lotitọ, Ọlọrun ti fun ni ipo ẹyẹ, ibalẹ-ọkan, ilera ti o peye ati ọrọ. Ṣibẹsibẹ, o si tun ri wipe awọn nkankan si wa ninu aye, ile ati ijọba rẹ ti o nilo ki a tun wọn ṣe, ki a si tun ṣe wọn ni aṣepe. Eyi ti yoo fi wa ko ọkan soke lori awọn nkan wọnyi tabi ti yoo maa lakaka lati mojuto wọn funrarẹ, nṣe ni o fa wọn le Ọlọrun lọwọ, ti o si sọ wipe, “Oluwa yoo ṣe ohun ti n ṣe temi laṣepe.”

Nibakana, awa naa kọkọ gbọdọ ṣe idamọ awọn nkan ti o nilo aṣepe ninu aye wa, bi o ti wu ki nkan ma dun fun wa to lọwọlọwọ yi. Aijẹbẹ, a ko ni ri idi ti a fi nilo lati fa wọn le Ọlọrun lọwọ, ẹnikanṣoṣo ti O ni agbara aṣepe lọwọ. Siwaju si, lẹyin igba ti a ba ti ṣe idamọ awọn nkan naa ti o nilo aṣepe ninu aye wa, a ko gbọdọ gbiyanju lati mojuto wọn pẹlu ọgbọn tabi okun wa. Dipo bẹẹ, nṣe ni ki a fa wọn le Ọlọrun lọwọ.

Ki ni idi ti a fi gbọdọ ṣe eyi? Idi, bi mo ti ṣe sọ tẹlẹ, ni wipe a ko ni agbara aṣepe lọwọ. Ọlọrun nikan ni O ni lọwọ. Ti a ba si wa tiraka lati ṣe bi Ọlọrun ni ṣiṣe awọn nkan ti o ni ṣe pẹlu aye wa ni aṣepe, bi o ti wu ki awọn nkan wọnyi rọrun to loju, ko ni pẹ rara ti a o fi ri wipe a ti jẹ ki nkan burúkú di bùrùkù mọ ara wa lọwọ.

Ranti Ọba Jeroboamu. Ranti wipe Ọlọrun ni O yan gẹgẹ bi ọba lori orilẹ-ede Isiraẹli. Ṣugbọn nigba ti o ri wipe awọn nkankan le pa ijọba oun lara, ko tọ Ọlọrun lọ lati ṣe iṣẹ ti O bẹrẹ ninu aye rẹ laṣepe. Nṣe ni o darale ọgbọn ara rẹ. Nitorina, o mu iparun wa sori ara rẹ, sori ile rẹ ati sori orilẹ-ede naa lapapọ. (Wo: 1Àwọn Ọba 11-14)

Wayi o, mo wa gbadura wipe a ko ni mu iparun wa sori ara wa tabi sori awọn miran ni ayika wa ninu igbiyanju wa lati ṣe awọn nkan ti o ni i ṣe pẹlu aye wa ni aṣepe. Amọ a gbọdọ kọ lati ma ko aye wa ati ọrọ aye wa le Ọlọrun lọwọ ninu adura fun aṣepe wọn. Idi si ni pe ọ̀rọ̀ wa jẹ ẹ logun, O si tun ni agbara lati ṣe ohun gbogbo ti o ni i ṣe pẹlu wa ni aṣepe.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o kẹyin oṣu Òkúdù 2025. Adura mi si ni pe ki eti rẹ ma ṣe lailai di si ohunkohun ti Ẹmi Ọlọrun ba n sọ fun ọ, ki o ba a le ma a fi igba gbogbo wa ni ailewu lati gbe igbe aye ti Ọlọrun fẹ ki o gbe. Amin.

Ninu iwe Heberu, oru ikẹta, a fun wa ni ikilọ yi: “Nitori naa gẹgẹ bi Ẹmi Mimọ ti wi: “Loni-in bi ẹyin ba gbọ ohun rẹ, Ẹ ma ṣe ṣe ọkan yin le…”” (Hébérù 3:7-8) Tani o n ba wa sọrọ nibiyi? Ẹmi Mimọ ni! Ki si ni O n ba wa sọ? O n sọ fun wa pe nigba ti oni ba si n jẹ oni, a ko gbọdọ ṣe ọkan wa le ti Ọlọrun ba n ba wa sọrọ. Eyi tunmọ si pe a ko gbọdọ sọ pe dandan lai ifẹ inu wa ni a o ṣe, nigba ti Ọlọrun tilẹ ti sọ fun wa ohun ti O fẹ ki a ṣe.

Njẹ ki wa ni idi ti ko fi yẹ ki a ṣe ọkan wa le ti Ọlọrun ba n ba wa sọrọ? Idi ni pe ṣiṣe eyi di dandan ki o yọri si idojuti, inira tabi iparun fun wa. Ranti nkan ti a sọ ninu bibeli nipa Farao ti o kọ lati jẹ ki awọn ọmọ Isiraẹli jade lati lọ sin Ọlọrun. A sọ wipe ọba yi ṣe ọkan rẹ le, o si kọ lati ṣe ohun ti Ọlọrun pa lasẹ. Lemọlemọ ni o n kọ eti didi si nkan ti Ọlọrun n sọ fun. Bawo wa ni ọrọ naa ṣe yọri si fun oun ati awọn eniyan rẹ? O yọri si nkan ti ko dara rara-rara ni. (Wo: Ẹ́kísódù 8:15:32)

Amọ ṣa o, ẹnikan le wa sọ wipe, “Ṣebi Ọlọrun funrarẹ ni O ṣe ọkan Farao le. Ṣe o wa yẹ ki ẹnikẹni ru ẹbi le lori bi?” Otitọ ni pe Ọlọrun ni O ṣe ọkan ọkunrin yi le. Ki si ni idi ti O fi ṣe bẹ ẹ? Akọkọ, O ṣe bẹ ẹ nitoripe ọkunrin naa funrarẹ ko fi igba kankan ṣetan lati gbọ nkan ti Ọlọrun ni lati ba a sọ. Eyi si n fi han wa pe aiṣetan wa lati gbọ nkan ti Ọlọrun n ba wa sọ di dandan ki o yọri si iṣele ọkan wa. Eyi tunmọ si pe igbakigba ti a ba yan lati kọ eti didi si nkan ti Ọlọrun n ṣọ fun wa, nṣe ni ọkan wa yoo jẹ ṣiṣe le si otitọ rẹ si i. Yoo wa ma ṣoro si fun wa lati ronupiwada ati lati gba ara wa kuro lọwọ idajọ rẹ. (Wo: Ẹ́kísódù 9:12; Ẹ́kísódù 10:20&27)

Idi miran ti Ọlọrun tun ṣe ṣe ọkan Farao le ni lati kọ wa pe Oun nikan ni O ni agbara lati jẹ ki awọn eniyan ronupiwada. Ti ko ba si lo agbara yi lati jẹ ki wọn ronupiwada, ko si nkankan ti a le sọ fun wọn tabi ṣe fun wa ti yoo jẹ ki wọn ronupiwada. Ranti pe igbakigba ti idajọ Ọlọrun ba wa sori Ijibiti nitori orikunkun Farao, nṣe ni yoo sọ fun Mose pe ki o ṣipẹ si Ọlọrun fun oun ati awọn eniyan rẹ. Ṣugbọn ni kete ti o ba ti ni iriri itura diẹ, nṣe ni yoo tun ṣe ọkan rẹ le lẹẹkan si.

Nitorina, nini iriri didara tabi aanu Ọlọrun ni ọna ti o ga ko to lati jẹ ki ẹnikẹni gbọran si lẹnu. Oun funrarẹ ni lati ṣiṣẹ lori ọkan wa lati jẹ ki a gbọ nkan ti O n sọ fun wa. Aijẹbẹ, bi O tilẹ fi wa sinu Edeni, bi O ti ṣe fun Adamu ati Efa, a o tun ṣe ọkan wa le si, ti a o si taari rẹ lati le wa jade kuro nibẹ.

Idi wa niyi ti o fi jẹ pe, bi o ti ṣe n lọ lọsẹ yi, o nilo lati kọ lati ma a fi ojoojumọ gbadura pe ki Ọlọrun ma jẹ ki o ṣe ọkan rẹ le si ohun yowu ti O ba n sọ fun ọ. Nipa bayi, iwọ yoo le ma fi igba gbogbo wa ni ailewu lati jẹgbadun didara ati aanu rẹ ni aye.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Òkúdù 2025. Adura mi si ni pe ki o gba itunu Ẹmi Ọlọrun lẹkunrẹrẹ nibikibi ti ara ba ti n ni ọ tabi ti irẹwẹsi ba ti ba ọkan rẹ. Amin.

Wayi o, ọkan lara ọna ti Ọlọrun ma n gba tu wa lara ni asiko idanwo tabi idojukọ ni nipa riran awọn eniyan lati ṣe awọn nkan ti yoo tu wa lara fun wa. Fun apẹrẹ, Pọọlu sọ eyi fun awọn ara Kọrinti nipa bi Ọlọrun ṣe tu wọn lara nigba ti wọn wa ni Makedonia:

“Nitori pe nigba ti awa tilẹ de Makedonia, ara wa ko balẹ, ṣugbọn a n pọn wa loju niha gbogbo, ija n bẹ lode, ẹru n bẹ ninu. Ṣugbọn ẹni ti n tu awọn onirẹlẹ ninu, ani Ọlọrun, o tu wa ninu nipa dide Titu de.” (2Kọrinti 7:5-6)

Njẹ o ri bayẹn? Pọọlu jẹ ki o ye wa yekeyeke pe nkan ko rọgbọ fun oun ati awọn akẹgbẹ rẹ rara nigba ti wọn n waasu iyinrere ni Makedonia. A yọ wọn lẹnu, a si tun pọn wọn loju ni ibi gbogbo ti wọn ya si. Eyi jasi pe gbogbo igba ni wọn fi n wa ni bebe iyọnu. Nitorina, ifoya ko jina si wọn rara.

Bawo wa ni Ọlọrun ṣe mojuto wọn ni asiko naa, ti nkan ko fi su wọn, ki wọn si sọ ireti nu? Nipa riran Titu, ọkan lara awọn akẹgbẹ wọn ninu iṣẹ iranṣẹ, si wọn ni. Ki wa ni Titu ṣe fun wọn nigba ti o de ọdọ wọn? Pọọlu ko mẹnuba nkan ti o ṣe ninu akọsilẹ naa. Ṣugbọn o sọ fun wa pe Ọlọrun lo wiwa ọkunrin naa lati tu wọn lara. Nitorina, bi o tilẹ jẹ wipe irẹwẹsi ti ba wọn ki o to de, wiwa rẹ fun ọkan wọn ni itura ati isọdọtun.

Nibakanna, Ọlọrun le ran awọn eniyan sinu aye wa lati tu wa lara ati lati gbe wa soke ninu awọn idanwo wa. Ṣugbọn njẹ a o da wọn mọ bi? Ti Pọọlu ko ba da Titu mọ gẹgẹ bi olutunu ti Ọlọrun ran lati tu wọn ninu ati lati gbe wọn soke ni Makedonia, njẹ ko ni padanu itunu ti o mu wa bi? Nṣe ni ko ba padanu rẹ. Lotitọ, oun ati awọn yoku le ti ma gbadura si Ọlọrun fun itura ninu gbogbo awọn idanwo wọn ni asiko naa. Ṣugbọn ti wọn ko ba da ẹni ti Ọlọrun ran lati tu wọn lara mọ, ti wọn ba kan lọ ri wiwa rẹ bi iṣọnu lasanlasan, nṣe ni wọn ko ba padanu idahun si adura wọn.

Nitorina, ọtọ ni ki Ọlọrun ran olutunu si wa ni idahun si adura wa; ọtọ ni ki awa naa da wọn mọ, ki a si fi aye gba wọn lati tu wa ninu. Ọkan lara awọn idi ti ọpọ ninu awọn ọmọ Ọlọrun ko ki i ṣe gbadun itunu rẹ ninu aye wọn bi o ti ṣe yẹ ni pe wọn ko da awọn ti o ran lati tun wọn ninu mọ. Ki ni idi? Idi kan pataki ni pe awọn eniyan wọnyi naa ni aleebu ti ara wọn. Nitorina, wọn le ni awọn iwa ti yoo rin awọn miran lara tabi ti yoo bi wọn ninu tabi ti yoo ṣi wọn lọna. Ti a ba si wa gbajumọ kiki awọn nkan ti ko dara ninu aye wọn, a le pada pa wọn ti, bu wọn tabi fi idibajẹ sinu aye wọn, ki a si padanu itunu ti Ọlọrun ran wọn lati fi fun wa.

Idi si ni yi ti a ṣe gbọdọ kọ lati ma gbadura si Ọlọrun lati ma fi igba gbogbo da awọn ti O n ran lati tu aye wa lara ati lati gbe wa soke mọ, ki a ba a le ba wọn ṣe pọ ni ọna ti o tọ, ki a si jẹ igbadun itunu ti wọn mu wa lẹkunrẹrẹ. Njẹ ki o gba okun lati ma fi ojoojumọ mu eyi ni pataki, ni orukọ Jesu. Amin.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. O dun mọ mi ninu lati ki ọ kaabọ sinu ọsẹ keji oṣu Okudu 2025. Mo si gbadura pe ki ọkan rẹ maa fi igba gbogbo wa ni imurasilẹ lati tẹwọgba lọwọ Ọlọrun ohun rere gbogbo ti O fẹ ki o ni. Amin.

Bi a ti ṣe ri ninu bibeli, ẹnikẹni ko le ri ohun rere kankan gba laye yi, ti ko ba jẹ wipe Ọlọrun ti pese ohun naa. Eyi jasi pe kiki nkan ti Ọlọrun ba fifun wa tabi pese nikan ni a le ri gba. Ti ko ba pese nkan, ko si ẹni naa, bi o ti wu ki igbagbọ rẹ ga to, ti o le ri ohun naa gba. (Wo: Jòhánù 3:27)

Amọ ṣa o, bi o tilẹ jẹ wipe Ọlọrun ti pese nkan fun wa, awa naa nilo lati fẹ lati ni nkan naa. Aijẹbẹ,nkan naa le ma lailai jẹ ti wa, ayaafi ti a ba ṣaanu fun wa. Fun apẹrẹ, bi a ti ṣe ri ninu bibeli, idile Sakaraya ati Elisabẹti wa ni ailọmọ fun ọpọlọpọ ọdun, bi o tilẹ jẹ wi pe olododo ni wọn jẹ niwaju Ọlọrun. Eyi ko si wa jẹ ki wọn yipada tọ oriṣa kankan lọ. Dipo bẹẹ, nṣe ni wọn tẹsiwaju lati ma a gbadura si Ọlọrun lati ṣaanu fun wọn ati lati mu ẹgan wọn kuro. (Wo: Lúùkù 1:5-7)

Njẹ bawo ni mo ṣe wa mọ pe wọn n gbadura si Ọlọrun lati mu ẹgan airọmọbi kuro ninu ile wọn? Mo mọ nitoripe, bi a ti tun ṣe ri ninu bibeli, nigba ti Ọlọrun ran angẹli Geburẹli lati fun wọn ni iyinrere idahun si adura wọn, nkan akọkọ ti o sọ fun Sakaraya ni pe, “Adura rẹ ti gba.” Nitorina, ti a ko ba rẹwẹsi ni gbigbadura si Ọlọrun, o di dandan ki a ri idahun gba si adura wa, niwọn igba ti o ba ti wa ni ibamu pẹlu ifẹ rẹ. Lotitọ, idahun naa le gba asiko diẹ ki o to de ọdọ wa. Ṣugbọn o di dandan ki o de. (Wo: Lúùkù 1:13)

Amọ ṣa o, njẹ idahun Ọlọrun si awọn adura wa yoo ba wa ni imurasilẹ nigbagbo bi? Njẹ a o wa ni imurasilẹ lati tẹwọgba lọwọ Ọlọrun ohun naa ti O fẹ ki a ni, eyi ti awa gan naa ti le ma gbadura ati pongbẹ fun, nigba ti a ba pada mu nkan naa tọ wa wa? Sakaraya ko si ni imurasilẹ lati tẹwọgba lọwọ Ọlọrun ọmọ ti o ti n fi ọpọlọpọ ọdun gbadura fun nigba ti Ọlọrun pada la ọna fun ọmọ naa lati tọ ẹbi rẹ wa. Ko gbagbọ pe Ọlọrun le fun awọn ni ọmọ nitootọ ni ọjọ ogbo wọn. (Wo: Lúùkù 1:11-20)

Ki wa ni o n gbadura si Ọlọrun fun ọmọ fun ni gbogbo awọn ọdun wọnni? O dabi ẹni pe o kan n gbadura lati mu gbogbo ododo daju ni. Ti Ọlọrun ko ba wa ṣaanu fun, bi o tilẹ jẹ wipe ko gbagbọ, oun ni ko ba jẹ idi ti iyawo rẹ ko ba fi jade laye lalai lọmọ.

Nitorina, adura gbigba si Ọlọrun lati fun wa ni nkan ko to. Ọkan wa tun gbọgbọ ma fi igba gbogbo wa ni imurasilẹ lati tẹwọgba nkan ti a n gbadura fun lọwọ rẹ, bi o ti wu ki idahun si adura naa pe to ati bi o ti wu ki o dabi enipe o ṣoro fun idahun si adura naa lati tẹ wa lọwọ. Aijẹbẹ, adura wa fun nkan naa le pada jasi pabo.

Yatọ si eyi, a gbọdọ ma a fi igba gbogbo fi ara wa jin fun ọrọ Ọlọrun, ki igbagbọ wa ba a le gba okun lati ma fi igba gbogbo wa ni imurasilẹ lati ri nkan gba lọwọ rẹ. Maria iya Jesu, fun apẹrẹ, ko fi igba kankan gbadura si Ọlọrun lati di iya olugbala araye. O tilẹ ṣeeṣe ki o ma fi igba kankan gbe yẹwo tabi ka si babara ẹṣẹ Iwe mimọ ti o sọrọ nipa wundia kan ti yoo loyun, ti yoo si bi olugbala. Ṣugbọn nigba ti angẹli Geburẹli wa lati sọ fun pe oun ni Ọlọrun yan lati jẹ iya olugbala, igbagbọ rẹ wa ni imurasilẹ lati tẹwọgba nkan ti Ọlọrun ti yan an fun. Nitorina, o sọ wipe, “Jẹ ki o ri fun mi gẹgẹ bi ọrọ rẹ.” O si ri bẹẹ. (Wo: Àìsáyà 7:14; Lúùkù 1:36)

Nibakanna, ti igbagbọ wa ba n fi igba gbogbo wa ni imurasilẹ lati ri gba lọwọ Ọlọrun, ohun yowu ti O ba fẹ ki a ni yoo jẹ ti wa, bi a ko tilẹ fi igba kankan ri gbadura fun un. Nitorina, nṣe ni ki a kọ lati ma a fi ojoojumọ bọ ara wa pẹlu ọrọ rẹ, ki a ba a le ma fi igba gbogbo ni igbagbọ to murasilẹ lati ri nkan gba lọwọ rẹ. Njẹ ki iwọ ati emi gba okun lati ṣe bẹẹ gẹgẹ, ni orukọ Jesu. Amin.

Kí o ní ọ̀sẹ̀ tí o ga.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Krisiti Oluwa wa. Pẹlu idunnu ni mo ki ọ kaabọ sinu oṣu kẹfa ọdun yi, iyẹn oṣu Òkúdù 2025. Mo si gbadura pe ki Ọlọrun ma a fi ojuoojumọ oṣu naa fun ọ ni okun lati ṣe amulo ti o peye oore-ọfẹ rẹ lati dagbasoke lati jẹ ohun gbogbo ti O fẹ ki o jẹ. Amin.

Ninu iwe awọn Heberu, onkowe yi sọ fun wa pe o ṣeeṣe ki idagbasoke wa ninu ẹmi ba idena pade. Ọkan lara awọn nkan ti o si le jẹ ki eyi waye ni aiṣetan wa lati ṣe akitiyan lati kọ otitọ Ọlọrun, lati ni oye rẹ ati lati ṣe amulo rẹ ninu aye wa. Wo bi o ti ṣe gbe ọrọ naa kalẹ:

“Nipa eyi awa ni ohun pupọ lati sọ, ti o si ṣoro lati tumọ, nitori pe ẹ yigbi ni gbogbọ. Nitori pe bayii o ti yẹ ki ẹ jẹ olukọni, ẹ tun wa ni ẹni ti ẹnikan yoo maa kọ ni ibẹrẹ ipilẹ ẹkọ awọn ọrọ Ọlọrun, ẹ si tun di iru awọn ti o n mu wara, ti wọn ko si fẹ ounjẹ lile.” (Hébérù 5:11-12)

Njẹ o ri bayẹn? Eniyan Ọlọrun yi ni ọpọlọpọ nkan ti o fẹ ba awọn ara ninu Oluwa ti o kọkọ gba lẹta rẹ yi sọ lori igbe aye igbagbọ ninu Kirisiti Jesu. Ṣugbọn o nira fun lati ṣe bẹẹ. Ki ni idi? Idi, gẹgẹ bi o ti ṣe sọ, ni pe wọn lọra lati kẹkọọ. Eyi ko si wa jasi pe wọn ko ni amuyẹ lati kẹkọọ ati lati ni oye nkan ti a n kọ wọn. Dipo bẹẹ, o jasi pe wọn ya ọlẹ ninu ki a kẹkọọ. A tun le sọ wipe eyi tunmọ si pe wọn ko ma ṣe akitiyan ti o nitunmọ kankan lati ni oye nkan ti a n kọ wọn ati lati fi wọn ṣiṣẹ ṣe.

Nitorina, bi eniyan Ọlọrun yi ti ṣe tẹsiwaju lati sọ ninu ẹsẹ bibeli naa, nigba ti o yẹ ki awọn eniyan wọnyi ti di olukọ, nigba ti o yẹ ki wọn ti di ẹni ti o n mojuto awọn ti o ṣẹṣẹ di onigbagbọ, nṣe ni awọn funralara wọn ṣi tun nilo ẹnikan ti yoo ṣẹṣẹ ma tun kọ wọn lẹẹkansi ni awọn nkan ipilẹ ọrọ Ọlọrun. Nigba ti o yẹ ki wọn ti di agbalala ninu ẹmi ti a le fa awọn ọmọ-ọwọ ninu ẹmi le lọwọ fun itọju, awọn funralara wọn si tun n fẹ ki a ma mojuto wọn bi ọmọ-ọwọ. Wa wo irufẹ iforo ti eyi ni lati jẹ fun eniyan Ọlọrun yi ati awọn adari awọn ara ninu Oluwa wọnyi. Bẹẹni, gbiyanju lati ro irufẹ irẹwẹsi ti eyi mu wa sinu ọkan wọn.

O si wa ṣeni laanu pe, loni gan, ẹwẹ, a si tun ri ọpọ awọn eniyan Ọlọrun ti awọn naa ya ọlẹ ninu ki a kọ awọn otitọ ẹmi ati ki a ṣe amulo awọn otitọ naa. Awọn wọnyi n jẹ ki awọn adari ijọ wọn ma kọ wọn ni nkankan naa ṣaaṣaa. Wọn n jẹ ki wọn ma ba wọn wi ṣaaṣaa lori bi wọn ṣe n gbe ile aye wọn ninu ẹtanu, ninu ikorira, ninu imọtara-ẹni-nikan, ninu ifẹkufẹ, ninu igberaga, ninu owu jijẹ ati ninu ainitara fun Ọlọrun. Nitorina, wọn n fa ifasẹyin fun iṣẹ iranṣẹ awọn adari wọn ati ti ijọ wọn – wọn n jẹ ki o nira fun wọn lati le kan si ati bukun fun ọpọ eniyan miran fun Oluwa.

Ki wa ni ki awọn adari ijọ ṣe si irufẹ awọn eniyan wọnyi? Ọna wo ni ki awọn adari gba lati mojuto awọn ti o n fooro ilakaka wọn lati tọ wọn ninu ifẹ Ọlọrun? Ni kukuru, bi onkọwe iwe Heberu ṣe sọ fun wa, nigba ti o ba to asiko kan, wọn yoo dẹkun lati ma tọju awọn ọlẹ-ẹmi onigbagbọ wọnyi bi ìkókó. Bẹẹni, wọn yoo nilo lati bẹrẹ si ni kọ wọn ni awọn nkan ti wọn ko fẹ kọ ati lati dẹkun lati ma mojuto wọn bi ọmọ-ọwọ ninu ẹmi nipa mimu wọn ṣe awọn nkan ti wọn ko fẹ ṣe funra wọn. (Wo: Hébérù 6:1-3)

Ṣe eyi yoo wa mu inu irufẹ awọn onigbagbọ wọnyi dun bi? Rara! Ki a tilẹ sọ otitọ, o le jẹ ki awọn miran lara wọn dẹkun patapata lati ma wa sinu ipade awọn ọmọ Ọlọrun. Amọ, yala o mu inu wọn dun tabi ko mu inu wọn dun, nkan ti o gbọdọ jẹ ṣiṣẹ gbọdọ jẹ ṣiṣe, ki awọn wọnyi ma ba a le di idagbasoke awọn ijọ wọn lọwọ mọ. Nitorina, ti o ba ti jẹ ọmọ Ọlọrun fun ọdun meji tabi ju bẹẹ lọ, ti o si tun wa kọ lati dagbasoke ninu igbagbọ rẹ ki o ba a le di ẹni ti adari ijọ rẹ le fi ọkan tan pẹlu oniruuru ojuṣe, o lọra lati kẹkọọ niyẹn, o si tun ya ọlẹ ninu ẹmi. Ti o ba si tẹsiwaju lati ri bi eleyi, ti o n fa ifasẹyin fun awọn adari ijọ rẹ, o le ma pẹ ti awọn naa yoo fi bẹrẹ si ni yẹra fun ọ, ki o ba a le dẹkun lati ma jẹ ìkókó ninu ẹmi. Eyi ko si le jẹ nkan ti yoo ba ọ lara mu.

Nitorina, sọji ki o to pẹ ju, ki o si bẹrẹ si ni gbadura si Ọlọrun pe ki O fun ọ ni itara ati okun ti o peye lati bẹrẹ si ni ṣe amulo oore-ọfẹ rẹ lati dadasoke ninu ẹmi lọna ti o peye. Aijẹbẹ, ko ni pẹ rara ti awọn ti wọn di atunbi lẹyin rẹ yoo fi di olukọ rẹ ninu Oluwa.

Kí o ní oṣù Òkúdù 2025 alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: Ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu Èbìbí 2025. Adura mi si ni pe gbogbo iṣẹ rere Ọlọrun lori aye rẹ ni yoo jẹ aṣepe, ni ibamu pẹlu nkan ti o nilo lojoojumọ, ni orukọ Jesu. Amin.

Pọọlu, ninu lẹta rẹ si awọn ara Filipi, sọ eyi fun wa nipa Ọlọrun: “Nitori pe Ọlọrun ni o n ṣiṣẹ ninu yin, lati fẹ ati lati ṣiṣẹ fun ete rere rẹ.” (Fílípì 2:13) Njẹ o ri bayẹn? Ọlọrun n ṣiṣẹ ninu aye gbogbo awọn ti a jẹ ọmọ rẹ. Ki ni idi? Idi ni ki O ba a le mu ete rere rẹ fun aye wa ṣẹ.

Eyi jasi pe Ọlọrun ko joko tẹtẹrẹ. Ko ma a sun tabi kawọ-gbera, nigba ti awa n ṣiṣẹ karakara, ti a si n wọya-ija pẹlu Satani ati awọn ẹmikẹmi rẹ, ki a ba a le ja mọ nkan laye. Dipo eyi, nṣe ni Oun naa n ṣiṣẹ ninu aye wa, ki O ba a le ri daju pe gbogbo erongba rẹ ni rere fun wa wa si imuṣẹ ati wipe gbogbo akitiyan wa laye ko ja si pabo.

Wayi o, a le ma ri nkan ti Ọlọrun n ṣe ni awọn abala aye wa kan. O tilẹ le ma dabi igba ti o n ṣiṣẹ rara ninu aye wa. Eyi ko wa jasi pe ko ma ṣiṣẹ. Ọrọ rẹ sọ fun wa pe O n ṣiṣẹ ninu aye wa. Otitọ si ni ọrọ rẹ ni gbogbo igba. Nitorina, yala a le e ri nkan ti O n ṣe lati mu ete rere lori aye wa wa si imuṣẹ tabi a ko le e ri, nṣe ni ki a ṣa gba nkan ti ọrọ rẹ sọ gbọ, ki a si bẹrẹ si ni gbe igbesẹ ni ibamu pẹlu rẹ. Ti a ko ba si rẹwẹsi, a o ri ifarahan awọn iṣẹ rerẹ rẹ ninu aye wa nigba ti asiko ba to.

O wa ṣeni laanu pe, ọpọ ninu wa fẹran lati gbajumọ nkan ti Satani ati awọn ẹmikẹmi rẹ n ṣe lati ba aye wa jẹ ju nkan ti Ọlọrun n ṣe lati sọ wa di ẹni ti o yẹ ki a da lọ. Ki a tilẹ sọ ododo, kiki nkan ti Satani n ṣe ni awọn miran ninu wa ma n ṣaba gbajumọ. A ko ki i tilẹ fojusọna rara lati ri nkan ti Ọlọrun n ṣe. Eyi si jẹ ọkan lara awọn idi ti a ko fi ma ri ifarahan ogo rẹ ati aṣepe iṣẹ rere rẹ ninu aye wa bi o ti ṣe yẹ ki o ri.

Lotitọ, iṣẹ Satani wa. Aisan, arun, Ìṣẹ́, ijamba ati iku wa. Lafikun, irora ati ibanujẹ wa. Awọn nkan wọnyi si le farahan wa to bẹẹ gẹẹ ti a o fi ro wipe ko si ọna abayọ kuro lọwọ wọn fun wa. Nkan ti Satani naa si fẹ ni eyi. O fẹ ki a ma a ro wipe ko si ọna abayọ fun wa kuro lọwọ awọn nkan ti o n lo lati pọn wa loju. Ni kete ti a ba si ti bẹrẹ si ni ronu bayi, a o yi oju wa kuro lara nkan ti Ọlọrun n ṣe lati gba wa la ati lati gbe wa soke.

Fun apẹrẹ, nigbati Mose wa lati gba awọn ọmọ Isiraẹli la kuro ni Ijibiti, awọn ara Ijibiti sọ ipọnju wọn di ilọpo-ilọpo. Nitorina, bi o tilẹ jẹ wipe Ọlọrun ti bẹrẹ si ni ṣiṣẹ lori ọrọ wọn lati tu wọn silẹ, wọn ko kọbiara si nkan ti O n ṣe rara; kiki nkan ti wọn kọbiara si ni ipọnju wọn. Ti Mose naa ba wa lọ dabi ti wọn ni, ti o jẹ pe kiki ipọnju wọn nikan ni o n kọbiara si, dipo ti yoo fi gbajumọ nkan ti Ọlọrun n ṣe, itusilẹ wọn kuro ni Ijbiti ko ba di ọjọ miran-ọjọ ire. (Wo: Ẹ́kísódù 5)

Ṣugbọn bi o tilẹ jẹ wipe Mose ri ipọnju awọn ara Isiraẹli yi, ti inu rẹ ko si dun si, ko gbajumọ ipọnju yi. Dipo eyi, nṣe ni o tẹ oju rẹ mọ Ọlọrun ati nkan ti O n ṣe lati gba wọn la. Nitorina, o ṣeeṣe fun lati gba itusilẹ lati ọwọ Ijibiti fun wọn nigba ti asiko to.

Nibakanna, bi o tilẹ jẹ wipe a le ri nkan ti Satani n ṣe lati pa wa lara, ti inu wa ko si dun si, a ko gbọdọ gbajumọ rara-rara. Aijẹbẹ, nkan ti o n ṣe yi ni a o ma fi asiko wa ṣofo lati sọrọ le lori. Eyi yoo si mu ki irẹwẹsi ba ọkan wa. Ṣugbọn ti o ba jẹ wipe Ọlọrun ati nkan ti O n ṣe ninu aye wa ni a tẹjumọ, bi o ti wu ki ohun ti Satani n ṣe ti ma pa wa lara to, ọkan wa yoo ma fi ojoojumọ gba okun lati fi suuru duro de e titi yoo fi mu ete rere rẹ ṣẹ ni abala kọọkan aye wa ati ni asiko ti o tọ. Nitorina, gbajumọ nkan ti Ọlọrun n ṣe ninu aye rẹ ati ni ayika rẹ. Iwọ ko si ni lailai padanu ifarahan ogo rẹ kankan mọ.

Kí o ní ọ̀ṣẹ̀ ológo.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufe: Ki oore-ọfẹ, aanu ati alaafia di ilọpo-ilọpo si fun ọ lalai ni odiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ miran ninu oṣu Èbìbí 2025. Adura mi si pe ki Ọlọrun ya aye rẹ ya ohunkohun ti o le e ma ṣiṣẹ lodi si ifarahan oore-ọfẹ rẹ̀ ni ẹkunrẹrẹ ninu aye rẹ, ki o ba a le di gbogbo nkan ti O fẹ ki o da, ki O si tun jẹgbadun gbogbo nkan ti O fẹ ki o jẹgbadun laye. Amin.

Wayi o, ọkan lara awọn nkan ti o ma n di ifarahan oore-ọfẹ Ọlọrun lọwọ ninu aye awọn ọmọ rẹ ni ẹṣẹ. Irufẹ ẹṣẹ wo si ni eyi? Irufẹ ẹṣẹkẹṣẹ ni! Eyi tunmọ si pe bi iṣekuṣe ṣe le di ifarahan oore-ọfẹ Ọlọrun lọwọ ninu aye awọn ọmọ rẹ naa ni ojukokoro, ole-jija, ẹtanu, imutipara, owu-jijẹ ati ifọrọ-batẹnijẹ ṣe le e di lọwọ.

O wa ṣeni laanu pe, ọpọ ninu wa ni oye eyi ko ye. A ro wipe kiki awọn ẹṣẹ ti o han kedere bi agbere, imutipara ati ole-jija nikan ni o le di ifarahan oore-ọfẹ Ọlọrun lọwọ ninu aye wa. Ṣugbọn ẹ̀ṣẹ̀kẹ́ṣẹ̀ ni o le di ifarahan oore-ọfẹ rẹ lọwọ ninu aye wa. Idi si ni yi ti Pọọlu ṣe bere ibere yi lọwọ gbogbo wa: “Njẹ a le tẹsiwaju lati ma dẹṣẹ ki oore-ọfẹ le ma a pọ si bi?” Idahun re si ni pe, “Irọ o, a ko le tẹsiwaju lati ma gbe ninu ẹṣẹ, ki a si tun ma reti ọpọ oore-ọfẹ Ọlọrun si ninu aye wa.”

Ki ni idi ti eyi fi ri bẹ? Idi ni pe a nilo oore-ọfẹ Ọlọrun lati rin ni iṣẹgun lori ẹṣẹ. O si ti wa pese oore-ọfẹ lọfẹ-lọfẹ fun wa lati ṣe bẹẹ (Títù 2:11). Ti a ko ba wa ma a rin ni iṣẹgun lori ohun gbogbo ti o n jẹ ẹṣẹ, a jẹ wipe a ko i ti ma ṣe amulo ti o peye oore-ọfẹ rẹ niyẹn. Nitorina, a ko lẹtọ lati reti ifarahan oore-ọfẹ rẹ ninu aye wa lọpọlọpọ si.

Nkan ti a n sọ ni pe fun wa lati le ni iriri ifarahan oore-ọfẹ Ọlọrun ti o ga tabi pọ si ninu aye wa, a nilo lati kọkọ bẹrẹ si ni ṣe amulo ti o peye irufẹ oore-ọfẹ yowu ti O ti fifun wa naa. Ti a ko ba ṣe amulo ti o peye oore-ọfẹ ti O ti fifun wa naa, ko le e fun wa si i. Lotitọ, awọn eniyan le ma a gbadura pe ki a ri ọpọ oore-ọfẹ gba si. Ṣugbọn kiki igba ti a ba n lo oore-ọfẹ ti Ọlọrun ti pese fun wa naa, ni ọna ti o tọ ati ti o yẹ, ni adura yi yoo ṣiṣẹ.

Wo Samusoni, fun apẹrẹ. Nigba ti o bẹrẹ si ni kopa ninu iṣẹkuṣe, ṣe Ọlọrun sọ oore-ọfẹ rẹ ninu aye rẹ di ilọpo-ilọpo si? Rara! Dipo eyi, nigba ti o to asiko kan, nṣe ni oore-ọfẹ naa dawọ iṣẹ duro. Nitorina, o bọ si ọwọ awọn ọta rẹ, wọn si ṣe e ni baṣubaṣu. Eyi si n fi han wa pe a ko le ma lo oore-ọfẹ Ọlọrun lati gbe igbe aye ti o lodi si ifẹ rẹ, ki a si tun ma reti pe ki o ma a fi gbogbo igba ṣiṣẹ daradara fun wa tabi pe ki o ma pọ si ninu aye wa.

Amọ ṣa o, a le reti pe ki ifarahan oore-ọfẹ Ọlọrun ninu aye wa bẹrẹ si ni yoro tabi ki o tilẹ dawọ iṣẹ duro patapata, ti a ko ba lo o rara tabi ti a ba a n ṣi i lo. Eyi yoo si fi wa si ikawọ eṣu lati jẹ niya. Ti a ko ba wa fẹ ki eyi ṣẹlẹ si wa, a nilo lati kọ bi a ti ṣe n ṣe amulo oore-ọfẹ rẹ ti O fun wa lati rin ni iṣẹgun lori ẹṣẹ ati lati ṣe awọn iṣẹ rere ti O fẹ ki a ṣe. A si le ṣe eyi nipa fifi ara wa jin fun ọrọ rẹ, adura gbigba ati ibaṣepọ pẹlu awọn Kirisitiẹni. Adura mi si ni pe ki ọkan wa ma a fi ojoojumọ gba okun lati ṣe amulo ti o peye gbogbo oore-ọfẹ ti Ọlọrun ti fifun wa, ki O ba a le ma fi igba gbogbo sọ ọ di ilọpo-ilọpo fun wa lati jẹ gbogbo nkan ti O fẹ ki a jẹ laye, ni orukọ Jesu. Amin.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. O jẹ nkan idunnu ti o ga fun mi lati ki ọ kaabọ sinu oṣu Èbìbí 2025 ati lati tun ki ọ kaabọ sinu ayẹyẹ ajọdun ọdun kẹtala ijọ wa. Adura mi ni pe ki Ọlọrun tẹsiwaju lati ma a gbe wa ro lati jẹ ohun gbogbo ti o fẹ ki a jẹ nipa agbara Ẹmi mimọ rẹ. Amin.

Nkan ayọ ni o jẹ nitootọ lati mọ wipe a ti n pade gẹgẹ bi ijọ ninu ilu yi fun ọdun mẹtala gbako. O si yẹ ki a mọ riri Ọlọrun fun ohun gbogbo ti O ti ṣe ninu wa, fun wa ati nipasẹ wa laarin awọn ọdun mẹtala yi. O tun yẹ ki a mọ riri rẹ fun awọn nkan ti yoo si tun ṣe ni aarin wa, fun wa ati nipasẹ wa ninu ọdun ti a ṣẹṣẹ n bẹrẹ rẹ yi gẹgẹ bi ijọ. Adura mi si ni pe iṣẹ rere rẹ ko ni lailai dawọ duro ni aarin wa, ni orukọ Jesu. Amin.

Amọ ṣa o, bi a ti ṣe n ṣe ajọyọ didara Ọlọrun si wa loni gẹgẹ bi ijọ, nkankan wa ti o ṣe pataki gan-an ki a kiyesi. Eyi si ni nkan ti O n ro nipa wa gẹgẹ bi ijọ. Ti a ba bere kaakiri, awọn eniyan yoo ni oniruuru nkan lati sọ nipa ijọ wa. Awọn nkan ti wọn yoo sọ si le dun un gbọ leti tabi ki o ma dun rara. Amọ a ko le gbe odiwọn bi a ti ṣe n ṣe daradara si gẹgẹ bi ijọ lori nkan ti awọn eniyan n ro tabi n sọ nipa wa. A ko tilẹ le gbe odiwọn bi a ti ṣe n ṣe daradara si lori nkan ti a n ro nipa ara wa. Odiwọn otitọ lori bi a ti ṣe n ṣe daradara si wa lọwọ Ọlọrun nikan. Yoo si wa dara ki gbogbo wa ma a gbadura pe ki O fi ohun ti O n ro nipa wa han wa, ki a ba a le fi ara wa jin lati ma gbe igbesẹ ni ibamu pẹlu rẹ.

Bi a ti ṣe ri ninu iwe Ifihan, Oluwa sọ eyi nipa ijọ Laodikea:

“Nitori ti iwọ wi pe, emi ni ọrọ, emi si n pọ si i ni ọrọ, emi ko si ṣe alaini ohunkohun; ti iwọ ko si mọ pe, oṣi ni iwọ, ẹni-ikaaanu, talaka, afọju, ati ẹni ihoho. Emi fun ọ ni imọran pe ki o ra wura lọwọ mi ti a ti da ninu ina, ki iwọ le di ọlọrọ; ati aṣọ funfun, ki iwọ le fi wọ ara rẹ, ati ki itiju ihoho rẹ ma ba han, ki iwọ si fi ohun ikunra kun oju rẹ, ki iwọ le riran.” (Ìfihàn 3:17-18)

Njẹ o ri bayẹn? Ijọ yi ro wipe ọlọrọ ninu ẹmi ni oun ati wipe oun ko nilo ohunkohun. Ṣugbọn Oluwa sọ fun pe otoṣi, ẹni-ikaaanu, talaka, afọju ati ẹni ihoho ni o jẹ ninu ẹmi. Nitorina, ẹni kan ṣoṣo ti o mọ ipo ti ijọ kọọkan wa lotitọ ni Oluwa funrarẹ. Ti ko ba si sọ ipo ti a wa fun wa, a le e ro wipe a n ṣe daradara, nigba ti o jẹ wipe nṣe ni a n kuna, tabi ki a ro wipe a ko ṣe daradara, nigba ti o si jẹ wipe a n ṣe daradara niwaju Ọlọrun.

Nitorina, bi mo ti ṣe sọ tẹlẹ, ẹ jẹ ki a fi ara wa jin fun adura gbigba tọkantọkan pe ki Ọlọrun fi nkan ti O n ro nipa wa gẹgẹ bi ijọ han wa, ki a ma ba a ma a gbe igbesẹ lori iyi ti a ko ni niwaju Ọlọrun, ki a si sọ ipo ati ere wa ninu ijọba rẹ nu. Mo ba gbogbo wa yọ lẹẹkan si, bi a ti ṣe n ṣe ajọyọ ajọdun ọdun miran lori didara Ọlọrun si wa gẹgẹ bi ijọ. Adura mi ni pe ki Ọlọrun jẹ ki a duro ṣinṣin ninu gbogbo ifẹ rẹ si wa, ki O si tun ma a fi gbogbo igba jẹ ki ojurere ati aanu rẹ sinmi sori wa. Amin.

A kú àjọyọ̀ o.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ ti o so oṣu Igbe ati Ebibi 2025 papọ mọra wọn. Mo si gbadura pe ki Ọlọrun tun ọ ṣe ni ibi yowu ti o ba ti n kuna laye, ki gbogbo ete rere rẹ fun ọ ba a le jẹ mimuṣẹ lalai si idena. Amin.

Ọkan lara awọn nkan ti a kọ́ ninu bibeli ni pe ironupiwada otitọ le e yi ọkan Ọlọrun pada. Ṣugbọn a wa ni awọn ọrọ Iwe mimọ ti o sọ fun wa pe Ọlọrun ki i yi ọkan rẹ pada. Eyi tunmọ si pe ti O ba ti pinnu lati ṣe nkan, ko si ohunkohun ti o le di lọwọ lati ṣe e. Ki wa ni ki a ṣe pẹlu irufẹ awọn ẹsẹ Iwe mimọ yi? Ṣe ki a pa wọn ti gẹgẹ bi eyi ti ko wulo ni? Ki a ma ri! A ko le pa ẹsẹ Iwe mimọ kankan ti gẹgẹ bi eyi ti ko wulo. Idi si nipe ko si ẹsẹ Iwe mimọ ti ko wulo. Dipo bẹẹ, gbogbo ẹsẹ Iwe mimọ ni o ti ọdọ Ọlọrun wa, ti o si wulo fun igbero wa. (Wo: Númérì 23:19; 1Sámúẹ́lì 15:29; 2Tímótì 3:16-17)

Amọ ṣa o, bi o tilẹ jẹ wipe a ni awọn ẹsẹ Iwe mimọ ti o sọ fun wa pe Ọlọrun ko ki i yi ọkan rẹ pada, a tun ni awọn ẹsẹ Iwe mimọ miran ti awọn naa n fi awọn nkan ti o le yi Ọlọrun lọkan pada han wa. Ọkan lara awọn nkan naa ti o si le jẹ ki O yi ọkan rẹ pada, bi mo ti ṣe sọ siwaju, ni ironupiwada otitọ. Fun apẹrẹ, Ọlọrun ni igba kan ran Wolii Elija si Ahabu lati ṣe idajọ oun ati ile rẹ fun pipa Naboti, ọkunrin alaiṣẹ kan. Ọlọrun sọ wipe Oun yoo pa gbogbo idile ọba yi run, Oun o si tun fi ẹran wọn fun awọn aja ati ẹyẹ jẹ. (Wo: 2Àwọn Ọba 21:17-24)

Wayi o, bi a ti ṣe ri ninu bibeli, Ahabu jẹ ọba kan ti o buru pupọ, ti o si tun gberaga. Yatọ si eyi, arabinrin ti o fẹ, iyẹn Jesebẹli, tun wa buru ju oun alara gan lọ. Awọn mejeji yi si wa mu ijọba ẹru wa sori awọn eniyan Ọlọrun. Sibẹsibẹ, nigba ti ọkunrin yi gbọ ọrọ idajọ Ọlọrun, ko ni ki a ra Elija ko, ko bẹrẹ si ni bu u tabi ki o ma ba yan odi. Ko tilẹ ba jiyan lori ọrọ naa. Dipo bẹẹ, nṣe ni o rẹ ara rẹ silẹ, ti o fa aṣọ rẹ ya, ti o wọ aṣọ ọfọ, ti o si tun gba ààwẹ̀. (Wo: 1Àwọn Ọba 21:17-27)

Ki wa lo jẹ ki Ahabu ṣe bayẹn? Idi ni pe o mọ wipe oun jẹbi. O mọ wipe ko si awawi fun pipa ọkunrin alaiṣẹ kankan. Nitorina, nkan ti o tọ ni fun Ọlọrun lati ṣe idajọ rẹ ni ibamu pẹlu iṣẹ ọwọ rẹ. Nkan kan ti o kan le fi ireti rẹ sinu rẹ ni aanu. Ọna kan ṣoṣo fun lati si ri aanu Ọlọrun gba ni ki o rẹ ara rẹ silẹ, ki o si gba ẹṣẹ rẹ gẹgẹ bi ẹṣẹ. Aijẹbẹ, idajọ ti a ti ṣe fun oun ati idile rẹ di dandan ki o wa sori wọn.

Wayi o, ṣe Ọlọrun, ni asiko yi, wa fi aanu ati idariji fun Ahabu bi tabi ko fi fun un? O fi fun un. Bibeli sọ wipe, “Nigba naa ni ọrọ Oluwa si tọ Elijah ara Tiṣibi wa wi pe, “Njẹ iwọ ti ri bi Ahabu ti rẹ ara rẹ silẹ niwaju mi? Nitori ti o ti rẹ ara rẹ silẹ, emi ki yoo mu ibi naa wa ni ọjọ rẹ, ṣugbọn emi yoo mu u wa si ile rẹ ni ọjọ ọmọ rẹ.” (1Àwọn Ọba 21:28-29)

Njẹ o ri bayẹn? Nitoripe Ahabu gba ẹṣẹ rẹ lẹṣẹ, Ọlọrun sun ọjọ ibi ti O fẹ mu wa sori oun ati ile rẹ siwaju di awọn ọjọ awọn ọmọ rẹ. Eyi ja si pe Ọlọrun yi ọkan rẹ pada fun igba diẹ. Ti awọn ọmọ Ahabu naa ba wa lọ pa ẹṣẹ rẹ ti ni, ti wọn si rẹ ara wọn silẹ niwaju Oluwa, idajọ ti O pasẹ le wọn lori ko ba ma ti waye ni awọn ọjọ wọn. Ki a tilẹ sọ otitọ, Ọlọrun gan an tilẹ le pa ipinnu rẹ lati ṣe idajọ idile wọn rẹ. Ṣugbọn wọn ko yipada kuro ninu ẹṣẹ baba wọn. Nitorina, a pada pa gbogbo wọn run ni, gẹgẹ bi Ọlọrun ti ṣeleri. (Wo: 2Àwọn Ọba 9)

Ki a ma fọrọgun, koko nkan ti a n sọ naa ni pe a le yi ọkan Ọlọrun pada nipasẹ ironupiwada otitọ. Nitorina, ti o ba yẹ Ọlọrun fi iya jẹ ọ fun nkankan ti o n ṣe ti ko dara, o le jẹ ki O yi ọkan rẹ pada nipa rironupiwada nitootọ. Ṣugbọn ti o ba tẹsiwaju lati ma a rin ninu igberega si i, ti o si kọ lati gba ẹṣẹ rẹ tabi aṣiṣe rẹ ni ẹṣẹ, idajọ rẹ le wa sori ri ki o to mọ nkan ti o n sẹlẹ. Ta wa ni o mọ bi eyi ṣe le buru fun ọ to. Nitorina, rẹ ara rẹ silẹ bayi, ki o si ronupiwada kuro ninu ẹṣẹ rẹ. Njẹ ki o ri okun ninu rẹ lati ṣe bẹẹ gẹgẹ. Amin.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)