Author name: 23?Racing_Horse

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ miran ninu oṣu Sẹrẹ 2025. Mo si gbadura pe ki Ọlọrun dari rẹ nipasẹ Ẹmi rẹ lati gbe gbogbo igbesẹ ti o tọ fun ọ lati tayọ ni gbogbo ọna rẹ ninu ọdun naa, ni orukọ Jesu. Amin.

Wayi o, ni ibẹrẹ ọdun bi eyi, nkan ti o wopọ ni ki awọn eniyan ma pongbẹ lati gbe igbe aye ti o suwọn si ati lati ri ere ti o suwọn ju ti atẹyinwa lọ lori awọn akitiyan wọn. Ko si si nkan ti o buru ninu eyi. Amọ ṣa o, pe a n pongbẹ lati gbe igbe aye ti o suwọn si ko to fun wa lati gbe igbe aye ti o suwọn si. Nibakanna, pe a n pongbẹ lati ri ere ti o suwọn ju tatẹyinwa lọ laye ko to fun wa lati ri ere ti o suwọn ju tatẹyinwa lọ. Ti a ko ba ma a ṣe awọn nkan ti yoo jẹ ki a gbe igbe aye ti o suwọn si ati ti yoo jẹ ki a ri ere ti o suwọn ju tatẹyinwa lọ lori awọn akitiyan wa lọna ti o peye, a ko ni gbe igbe aye ti o suwọn si tabi ri ere ti o suwọn si.

Bibeli sọ wipe, “Ki a ma ṣe tan yin jẹ; a ko le gan Ọlọrun: nitori ohunkohun ti eniyan ba funrugbin, ohun ni yoo si ka.” (Gàlátíà 6:7) Ki ni eyi tunmọ si? Nkan ti o tunmọ si ni pe Ọlọrun ti fi ofin kan kalẹ ti o sọ wipe ohun ti eniyan ba gbin laye yi ni yoo ka. Nitorina, lakọkọ, o ko le kore ohun ti o ko ba gbin. Ekeji, o ko le yi ikore ohun ti o ba ti gbin pada – ohun ti o ba gbin naa ni o o ka.

Nitorina, ti o ba fẹ gbe igbe aye ti o suwọn si, ti o si tun fẹ je ere ti o suwọn si lori awọn akitiyan rẹ lọdun yi, ibere akọkọ ti o gbọdọ bere lọwọ ara rẹ ni pe, “Njẹ mo n gbin ohunkohun rara ti o le jẹ ki n gbe igbe aye ti o suwọn si ati ti o le jẹ ki n jere ti o suwọn ju tatẹyinwa lọ?” Ti o ko ba gbin nkankan sinu aye yi, ko yẹ ki o reti ikore kankan lori ohun ti o ko gbin. Kiki awọn ti o ba n gbin nkan ni o ni anfaani lati ma foju sọna fun ikore nkan ti wọn n gbin.

Ibere keji ti o nilo lati bere lọwọ ara rẹ ni pe, “Irufẹ irugbin wo ni mo n gbin?” Bi mo ti ṣe sọ siwaju, o ko le yi ikore irugbin yowu ti o ba ti gbin pada. Nkan ti o ba gbin naa ni iwọ yoo ka. Nitorina, ti o ba fẹ igbe aye ti o suwọn ju tatẹyinwa lọ, ti o si tun fe ere ti o suwọn ju tatẹyinwa lọ lọdun yi, o ṣeeṣe ki o nilo lati parọ irugbin ti o n fun. Fun apẹrẹ, ti o ba jẹ pe irugbin ti ibẹru, imẹlẹ, anikanjọpọn, ẹtanu, ikunsinu tabi ọrọ buburu ti fi idibajẹ si ni o n fun, o gbọdọ parọ rẹ si irugbọin igbagbọ, ifẹ, iṣẹ-aṣekara, iṣoore, adura gbigba ati ọrọ Ọlọrun. Aijẹbẹ, ko si bi o ti ṣe tiraka to lọdun yi, o ko le gbe igbe aye ti o suwọn si tabi jẹ ere ti o suwọn ju tatẹyinwa lọ. Dipo bẹẹ, o ṣeese ki nkan tun wa buru si fun ọ.

Siwaju si, bi o tilẹ wa jẹ wipe irugbin igbagbọ, ifẹ, iṣẹ-aṣekara, iṣoore, adura gbigba ati ọrọ Ọlọrun ni o n fun, o tun nilo lati fun ọpọlọpọ awọn irugbin yi si, ki o ba a le ni ikore wọn lọna ti o pọ si lati ara igbe aye ti suwọn si ati ere ti o suwọn si. Ranti pe nkan ti o ba gbin naa ni o o ka. Lotitọ, Ọlọrun le fun ọ ni ikore irugbin ti o gbin ni ilọpo-ilọpo lọna ti o ga. Amọ ṣa o, nkan ti o ba gbin nikan naa ni O le sọ di ilọpo fun ọ, ko si ṣe eyi ti o ko ba gbin. Nitorina, ti o ba jẹ ọgọrun irugbin ni o fun, ọgọrun irugbin yi naa ni yoo sọ di ilọpo-ilọpo fun ọ. Ti o ba si jẹ ẹgbẹrun irugbin ni o fun, ẹgbẹrun kan yi naa ni yoo sọ di ilọpo-ilọpo fun ọ. Ko si ojuṣaaju pẹlu rẹ.

Nitorina, ti o ba n fẹ lati ni iriri iṣorire ati ijẹgbadun ti o suwọn ju tatẹyinwa lọ ninu ọdun yi, ṣetan lati fun irugbin rere ti o pọ ju tatẹyinwa lọ. Bi o si ti ṣe n ṣe eyi, mo gbadura pe ki Ọlọrun sọ ere ilakaka rẹ di ilọpo-ilọpo fun ọ, ki O si tun fun ọ ni isinmi ni gbogbo ayika rẹ, ni orukọ Jesu. Amin.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ si ọjọ Isinmi akọkọ ninu ọdun tuntun yi, ọdun 2025. Daju ṣaka ni pe nitori didara Oluwa si wa ni a ṣe wa laaye ati ni alaafia lati ri ọdun tuntun naa. Nitorina, mo fẹ ki o darapọ mọ mi lati kọ orin yi ti o sọ pe:

O ṣeun, Oluwa
O ṣeun, Oluwa
Gbogbo nkan ti mo le sọ naa ko ju pe ‘O ṣeun, Oluwa’.

Wayi o, bi a ti ṣe n bẹrẹ ọdun yi, mo fẹ gba fun iwọ naa adura Apọsiteli Johanu fun ọrẹ rẹ kan, ti o ka bayi: “Olufẹ, emi n gbadura pe ki o le ma a jẹgbadun ilera ti o peye, ki o si maa dara fun ọ ninu ohun gbogbo, ani bi o ti dara fun ọkan rẹ.” (3Jòhánù 3) Ki ni nkan akọkọ ti Johanu n tọrọ lọwọ Ọlọrun lati ṣe fun ọrẹ rẹ? Ohun naa ni pe ki O jẹ ki o ma a jẹgbadun ilera ti o peye.

Ki ni idi ti eyi ṣe ṣe pataki? O ṣe pataki nitoripe lalai si ilera ti o peye, yoo nira, iyẹn ti o ba tilẹ ṣeeṣe, fun ẹnikẹni lati ṣe nkankan ti o nitumọ fun Ọlọrun, fun ara rẹ tabi fun awọn miran. Lafikun, lalai si ilera ti o peye, awọn eniyan ko le gbadun aye wọn tabi ohunkohun ti wọn ni. Emi si wa fẹ ki o le gbe oniruuru nkan ti o nitumọ ṣe fun Ọlọrun, fun ara rẹ ati fun awọn miran lọdun yi. Mo tun fẹ ki o le jẹgbadun aye rẹ, awọn ibaṣepọ rẹ ati ohun rere yowu ti Ọlọrun ba ṣe fun ọ tabi fi fun ọ ninu ọdun naa. Nitorina, gẹgẹ bi Johanu ti ṣe gbadura fun ilera ti o peye fun ọrẹ rẹ, emi naa tun n gba ladura fun iwọ naa pe ki o jẹdadun ilera ti o peye ni gbogbo ọdun tuntun yi, ki o ba a le ni okun to lati ṣe ohun rere yowu ti ọkan rẹ ba n fẹ lati ṣe ati ki o ba a le jẹgbadun aye rẹ ati ohun gbogbo ti o ni. Amin.

Ki ni nkan keji ti Johanu n tọrọ lọwọ Ọlọrun fun ọrẹ rẹ? Oun naa ni pe ki o le maa dara fun ninu ohun gbogbo. Njẹ iwọ naa ko ha fẹ ki o dara fun ọ ninu ohun gbogbo ninu ọdun yi bi? Njẹ o ko ha fẹ ki o dara fun ẹbi rẹ, okowo rẹ, ẹkọ rẹ, iṣẹ-iranṣẹ rẹ ati ohun yowu ti o ni i ṣe pẹlu aye rẹ bi ninu ọdun yi? Emi n fẹ ki o dara fun mi ninu ohun gbogbo lọdun yi. Adura mi naa si wa ni pe ki o dara fun iwọ naa ninu ohun gbogbo ni ojoojumọ ọdun tuntun yi. Amin.

Nkan ẹkẹta ti Johanu bere lọwọ Ọlọrun fun ọrẹ rẹ ni pe ki o ma a dara fun ọkan rẹ ninu ibaṣepọ rẹ pẹlu Ọlọrun. Eyi tunmọ si pe Johanu fẹ ki Ọlọrun jẹ ki ọrẹ rẹ ji pepe nipa ti ẹmi. Ko fẹ ki o kan jẹ aláásìkí ati alara-pipe eniyan ti o n gbe igbe aye alaiwa-bi-ọlọrun, igbe aye omugọ tabi igbe aye ti ko nitunmọ. Emi naa ko wa fẹ ki iwọ naa kan jẹ aláásìkí ati alara-pipe eniyan ti o n gbe igbe aye aibikita tabi igbe aye alaiwulo ninu ọdun yi. Idi si ni yi ti adura mi fun iwọ naa ni pe ki Ọlọrun jẹ ki o ji pepe nipa ti ẹmi ni gbogbo ọna ninu ọdun yi, ki o ba a le lo ilera ati ọrọ rẹ lati buyi fun un.

Ni kukuru, awọn adura mi fun ọ ni iwọnyi, bi a ti ṣe n bẹrẹ ọdun yi. Bi mo si ti ṣe n foju-sọna lati gbe oniruuru nkan nla ṣe pẹlu rẹ ninu ọdun naa, njẹ ki oore-ọfẹ Jesu Kirisiti Oluwa wa, ifẹ Ọlọrun ati idapọ Ẹmi mimọ wa pẹlu rẹ lati isinsinyi lọ ati titi lailai. Amin.

A kú ọdún tuntun o.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ti o ga ni mo ki ọ kaabọ sinu ọsẹ ti o so ọdun yi, ọdun 2024, pọ mọ ọdun ti a n wo niwaju wa yi, iyẹn ọdun 2025. Adura mi si ni pe ki Ọlọrun ri daju pe o wọ inu ọdun tuntun naa pẹlu akunwọsilẹ ayọ, ni orukọ Jesu. Amin.

Wayi o, ọkan lara awọn ọna lati ni iriri akunwọsilẹ ayọ lori ohun gbogbo ti o ni i ṣe pẹlu aye wa ni ki a gbadura. Jesu sọ eyi fun wa nipa ayọ: “Titi di isinyii ẹ ko tii beere ohunkohun ni orukọ mi: ẹ beere, ẹ o si ri gba, ki ayọ yin ki o le kun.” (Jòhánù 16:24) Njẹ o ri bayẹn? Bawo ni a ṣe le ni iriri ayọ ti o kun tabi ẹkunrẹrẹ ayọ ninu aye wa? Nipasẹ gbigbadura si Ọlọrun ni.

Nitorina, ohun ti a nilo lati ṣe ni ki a ṣe idamọ awọn abala aye wa ninu eyi ti inu wa ko ti dun rara tabi ninu eyi ti ayọ wa ko ti kun, ki a si bẹrẹ si ni ba Ọlọrun sọrọ lori wọn. Jesu si ti wa fi da wa loju pe ti a ba ṣe eyi, a o ri idahun si adura wa gba, eyi yoo si yọri si ẹkunrẹrẹ ayọ fun wa. O wa ku si ọwọ wa yala lati gbadura lati ni iriri ẹkunrẹrẹ ayọ ninu aye wa tabi lati ma gbadura, ki a si wa ninu ibanujẹ.

Fun apẹrẹ, bi a ti ṣe sọ fun wa ninu bibeli, Hana fi igbakan ri jẹ onibanujẹ obinrin. Ki ni idi? Akọkọ, idi ni ni pe o ya agan. Ekeji, idi ni pe iyawo ọkọ rẹ keji, iyẹn Pẹnina, ma n pọn loju nitori iyagan rẹ. Lotitọ, ọkọ rẹ, Elikana, ma n saba gbiyanju lati tu u ninu ati lati mu inu rẹ dun. Ṣugbọn idunu ti o n fun ko fi igba kankan to lati ma jẹ ki o sọkun tabi banujẹ mọ.

Amọ ṣa o, ni ọjọ kan, Hana pinnu lati ba Ọlọrun sọrọ lori nkan ti o n fi ojoojumọ ba ninujẹ. Lẹyin asiko adura naa wayi, ibanujẹ poora ninu aye rẹ. Iwọ naa wo diẹ lara nkan ti bibeli sọ lori eyi:“…Bẹẹ ni obinrin naa ba tirẹ lọ, o si jẹun, ko si fa oju ro mọ.” (1Sámúẹ́lì 1:18) Njẹ o ri bayẹn? Nipasẹ adura, ayọ Oluwa gbera dide ninu ọkan Hana, o si le ibanujẹ rẹ lọ. Yatọ si iyẹn, nipasẹ adura rẹ lọjọ yẹn, o ri ọmọdekunrin kan gba lọwọ Oluwa. Eyi si tun wa jẹ ki ayọ rẹ kun akunwọsilẹ.

Nibakanna, ti awa naa ba le gbadura si Ọlọrun lori ohunkohun ti o n yọ wa lẹnu tabi ti o n kun wa pẹlu ibanujẹ, yoo da wa lohun. Lọna wo? Yoo kọkọ jẹ ki ayọ rẹ gbera dide ninu ọkan wa, ki o si le ibanujẹ wa danu. Siwaju si, yoo tun jẹ ki idahun si adura wa ki o farahan. Nipa eyi, ayọ rẹ ti o wa ninu ọkan wa yoo bẹrẹ si kun akunwọsilẹ, yoo si tun yọri si fifi ọpẹ fun un.

Nitorina, bi o tilẹ jẹ wipe a ti wa ni awọn ọjọ ti o kẹyin ọdun yi, mo fẹ ki o mọ wipe ko i ti pẹ ju rara fun ibanujẹ lati di eewọ fun aye rẹ ni gbogbo ọna tabi pẹ ju fun ọ lati ni iriri ẹkunrẹrẹ ayọ lori ohun gbogbo ti o n ni ọ lara. O kan nilo lati gbadura si Ọlọrun ni, bi Hana ti ṣe. Bẹẹni, gbadura si pẹlu ọkan otitọ, ki o si sọ ohun gbogbo ti o n da ọkan rẹ laamu fun un ati ohun ti o fẹ ki O ṣe lori wọn. Yoo si da ọ lohun, yoo le ibanujẹ rẹ danu, yoo si tun ṣe iṣẹ iyanu ti yoo jẹ ki ayọ rẹ kun akunwọsilẹ fun ọ, iyẹn ki ọdun yi to pari.

Wayi o, bi mo ti ṣe n foju sọna fun ẹri rẹ, njẹ ki oore-ọfẹ Jesu Kirisiti Oluwa wa, ifẹ Ọlọrun ati ibadapọ Ẹmi Mimọ jẹ tirẹ lati isinsinyi lọ ati titi lailai. Amin.

A ku imura ọdun o.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ kẹrin oṣu Ọpẹ 2024. Mo si gbadura pe ki Ọlọrun ṣe ayọ rẹ ni akunwọsilẹ ni gbogbo ọjọ yoku ninu ọdun yii. Amin.

Wayi o, bi gbogbo wa ti ṣe mọ, asiko ti a wa yi jẹ eyi ti ọpọ eniyan kaakiri gbogbo agbaye ka si asiko ajọyọ. Bi o si ti wa jẹ pe ko buru ti awa naa ba darapọ ninu ajọyọ naa, a ko gbọdọ gbagbe pe ohunkohun ti a ba n ṣe gẹgẹ bi onigbagbọ ninu Kirisiti Jesu gbọdọ jẹ pẹlu oye ati ni iwọntunwọnsi. Aijẹbẹ, a le ba ajọyọ ara wa jẹ.

Fun apẹrẹ, bi a ti ṣe ri ninu Iwe Mimọ, Dafidi ni asiko kan dari awọn ọmọ Isiraẹli ninu ajọyọ ti o ga lati gbe Apoti Ẹri Oluwa lati ibi ti o wa tẹlẹ lọ si ibi ti o ṣẹṣẹ pese silẹ fun ninu ilu rẹ. O wa ṣeni laanu pe bi ajọyọ naa ti n lọ lọwọ, Ọlọrun lu ẹnikan pa. Bẹẹni, Ọlọrun pa ọdọmọkurin kan ti a n pe ni Usa nitoripe o fi ọwọ kan Apoti Ẹri rẹ nigbati o n gbiyanju lati ma jẹ ki apoti yi re jabọ kuro ninu kẹkẹ ti a gbe sinu rẹ. Eyi si ba ajọyọ ọjọ naa jẹ. (Wo: 2Sámúẹ́lì 6:1-7)

Ki wa ni o jẹ ki Ọlọrun ba ajọyọ awọn eniyan rẹ jẹ lọna yi? Ti o ba jẹ wipe Satani ni o ba ajọyọ wọn jẹ, ko ni jẹ kayefi. Ṣugbọn ko ki i ṣe Satani ni o ba ajọyọ wọn jẹ — Ọlọrun ni o ba a jẹ. Si wa wo o, Oun naa ni wọn n yin lọjọ ti a n wi yi o. Ki wa lo fa ti O fi ba ajọyọ wọn jẹ?

Ni kukuru, gẹgẹ bi Dafidi ti sọ lẹyin-ọ-rẹyin, nitoripe wọn ko tẹle ilana Ọlọrun ni mimojuto Apoti Ẹri rẹ ni O ṣe ba ajọyọ wọn jẹ. O wa jasi pe aimọkan-mọkan wọn ni o fi aye silẹ fun idajọ Ọlọrun ti o sọ ọjọ ajọyọ di ọjọ ẹkun fun gbogbo orilẹ-ede wọn lati wa sori wọn. Eyi si n kọ wa pe aimọkan-mọkan le ba ajọyọ jẹ. Nitorina, bi o ti ṣe n yọ lori didara Ọlọrun ni asiko yi, ma gbagbe ara rẹ debi wipe o o bẹrẹ si ni tọwọbọ awọn nkan ti o ko ni oye nipa wọn tabi awọn nkan ti o ga ju ọ lọ. Aijẹbẹ, idajọ Ọlọrun tabi ikọlu Satani le run ajọyọ rẹ.

Siwaju si, bi mo ti ṣe sọ tẹlẹ, ajọyọ wa ni asiko yi gbọdọ jẹ iwọntunwọnsi. Jẹun ni iwọntunwọnsi. Mu ni iwọntunwọnsi. Wọṣọ ni iwọntunwọnsi. Si tun na owo ni iwọntunwọnsi. Ma sọ ara rẹ di alajẹnu nitoripe asiko ajọyọ ni o wa. Ma si ko sinu gbese tabi ki o fi iwa omugo naa owo rẹ nitori ajọyọ. Aijẹbẹ, o le ba orukọ ara rẹ jẹ.

Bibeli sọ eyi fun gbogbo awọn ọmọ Ọlọrun: “Ẹ maa ṣe ohun gbogbo bi o ti tọ ati bi o ti yẹ.” (1Kọ́ríntì 14:40) Lotitọ, lori awọn ipade wa gan ni a mọ-ọn-mọ sọ ọrọ yi le. Amọ o tun ṣe e lo pẹlu fun bi a ti ṣe n mojuto aye wa. A gbọdọ ṣe ohun gbogbo ni iwọntunwọnsi ati lẹsẹẹsẹ. Nitorina, bi a ti ṣe n yọ lori didara Ọlọrun, a gbọdọ ṣe e pẹlu ọgbọn. Aijẹbẹ, a le si ilẹkun aye wa silẹ fun awọn ijamba, ewu tabi abamọ ti o ṣe e yago fun, ki a si ba ajọwọ wa jẹ. Mo gbadura wipe ọdun yi ko ni pari pẹlu abamọ ati ibanujẹ fun ọ tabi fun ile rẹ, ni orukọ Jesu. Amin.

A ku imura ọdun Keresi o

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ọ̀pẹ 2024. Adura mi si ni pe Satani ko ni ṣe aṣeyọri rara lati ri ọ lo lati ṣe ara rẹ tabi awọn miran ni ijamba ni gbogbo eyi ti o ku ninu ọdun yi. Amin.

Ọkan lara awọn aṣẹ ti a pa fun wa ninu Iwe Mimọ ni pe ki a ma ṣe fun eṣu laaye (Éfésù 4:27). Eyi jasi pe a ko gbọdọ fun ni anfaani lati ṣiṣẹ ninu aye wa tabi lati lo wa lati ṣiṣẹ ninu aye awọn miran. Ṣugbọn ti a ko ba ti ilẹkun ọkan wa mọ ohun gbogbo ti o n jẹ ibi, Satani le ṣe aṣeyọri lati ri wa lo lati pa ara wa tabi awọn miran lara kọja ero ọkan wa.

Fun apẹẹrẹ, nitoripe Judasi Isikariọti ko ti ilẹkun ọkan rẹ mọ ojukokoro, Satani ṣe aṣeyọri lati mu un lẹru ati lati lo lati ṣẹ́ Jesu Kirisiti Oluwa wa. Nigbati iye rẹ si wa sọ pada, ti o ri wipe Satani ti ya ohun lo, ara rẹ ko gba itiju ti o tẹle. Nitorina, lẹkaansi, Satani kun ọkan rẹ pẹlu abamọ ati ibanujẹ to bẹẹ ti o fi lọ pokunso. Ti awa naa ko ba wa gbe ilẹkun ọkan wa ti mọ ojukokoro, Satani le ṣe aṣeyọri ni lilo wa lati pa awọn ti a fẹran run ati ara wa pẹlu. (Wo: Mátíù 27:3-5; Jòhánù 13:2&27)

Ọba Sọọlu nkọ? Nitoripe o kọ lati ti ilẹkun ọkan rẹ mọ ẹtanu ati owu jijẹ, Satani mu un lẹru, o si sọ ọ di apaniyan. O wa pa ojuṣe rẹ gẹgẹ bi ọba ti, o si bẹrẹ si ni le Dafidi, ọdọmọkurin alaiṣẹ ti ko ṣe ni ibi, kaakiri, lati ibikan si ibomiran, lati mu un ati lati pa a. Ko si wa dẹkun lati ma fi aye rẹ ṣofo lọna yi titi o fi ku.

Nibakana, ti a ba fi aye gba owu tabi ẹtanu ninu ọkan wa, Satani le mu wa lẹru, ki o si bẹrẹ si ni lo wa lati lepa iparun awọn alaiṣẹ, dipo ti a o fi ma lepa imuṣẹ awọn eto Ọlọrun fun aye wa. Nibi ti eyi ba si ti ri bẹ ẹ, o di dandan ki a fi aye wa ṣofo.

Lafikun, nipasẹ igberaga, Satani le mu ọkan wa lẹru, ki o si bẹrẹ si ni lo wọn lati ṣe awọn nkan ti a o pada kabamọ, awọn nkan ti yoo fi wa si abẹ idajọ Ọlọrun. Fun apẹrẹ, nitori igberaga Dafidi, nitoripe o fẹ ma fi bi awọn ọmọ Isiraẹli ṣe pọ to yangan, Satani ṣe aṣeyọri ni lilo o lati ṣe ikaniyan wọn. Nipa ṣiṣe eyi, o fi ara rẹ ati awọn eniyan naa si abẹ idajọ Ọlọrun. Ti ko ba wa jẹ wipe Ọlọrun ṣaanu fun ilẹ naa ni, boya eniyan perete ni a ko ba fi silẹ láàyè. (Wo: 1Kíróníkà 21)

Ṣe o wa ri bayi pe bi a tilẹ fẹran Ọlọrun gidigidi bi Dafidi, ti a ba fi aye gba igberaga ninu ọkan wa, Satani le ya wa lo. Ta wa ni o mọ irufẹ ipalara ti o le ṣe nipasẹ wa? Nitorina, bi a ti wọ inu awọn ọjọ ti o gbẹyin ọdun yi, ri daju pe o fi aye gba ọrọ Ọlọrun lati ya ọ ya ohun gbogbo ti o n jẹ ero ibi, paapaa julọ, igberaga, etanu, owu, ojukokoro, ainitẹlọrun ati ifẹkufẹ. Nipa ṣiṣe eyi, Satani ko ni le e ri ọ lo lati ba ayọ ati ibalẹ-ọkan ara rẹ jẹ tabi lati pa awọn miran run. Njẹ ki Ẹmi Ọlọrun fun ọ ni okun lati ṣe bẹẹ gẹgẹ, ni orukọ Jesu. Amin.

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu ọsẹ keji ninu oṣu Ọ̀pẹ 2024. Mo si gbadura pe ki ọkan rẹ ma fi igba gbogbo gba okun lati má kọ Ọlọrun alaaye silẹ fun ọlọrunkọlọrun miran, bi o ti wu ki idojukọ rẹ le e to laye yi, ki o ba a le ma fi ojoojumọ ri ifarahan iyanu agbara rẹ fun ire rẹ. Amin.

Bibeli sọ pe, “Nitori ti oju Oluwa n lọ siwa, sẹyin ni gbogbo aye, lati fi agbara fun awọn ti ọkan wọn wa ni pipe si ọdọ rẹ…” (2Kíróníkà 16:9) Njẹ o ri bayi? Gbogbo igba ni Ọlọrun n foju wa awọn ti O le fi agbara rẹ han fun wọn. Ki si ni yoo jẹ ki O fi agbara rẹ han fun igbala, aabo tabi igbega wọn? Fifi gbogbo ọkan wọn jin fun jin fun ni yoo jẹ ki O ṣe bẹ ẹ.

Wo o, ti o ba fi gbogbo ọkan rẹ jin fun Ọlọrun, wa mu ọrọ rẹ, adura gbigba ati ibadapọ pẹlu awọn ara ninu ijọ ni ọkunkundun. Lafikun, ti o ba fi gbogbo ọkan rẹ jin fun Ọlọrun, o ko ni lailai yi pada kuro lọdọ rẹ si ọdọ ọlọrun miran fun iranwọ. O wa ṣeni laanu pe ọpọ ninu ijọ loni ni o ti yipada kuro lọdọ Ọlọrun si idi iṣẹ oṣo lati di olowo, lati gba iwosan fun ailera wọn tabi lati gba itusilẹ kuro lọwọ iyagan wọn.

Wayi O, irufẹ awọn eniyan wọnyi ko le ni iriri agbara Ọlọrun fun ire wọn bi o ti ṣe tọ. Dipo eyi, ti wọn ba lọra lati ronupiwada, idajọ Ọlọrun le wa sori wọn, ki O si pa ati awọn ati awọn nkan ti wọn gba lọwọ oṣu tabi ti wọn n gbiyanju lati daabo bo run. Bi a ti ṣe ri ninu bible, idi pataki ti Ọba Ahasaya ṣe ku lati ipasẹ ọgbẹ ti o ni nigba ti o ṣubu ninu aafin rẹ ko ju pe o tọ ọlọrun miran lọ fun iwosan dipo Ọlọrun alaaye. Lafikun, ọkan gbogi lara idi ti Ọba Asa ṣe ku ṣaaju asiko rẹ ni pe o kọ lati tọ Ọlọrun lọ fun iwosan rẹ — awọn oniṣegun rẹ nikan ti o n tọ lọ. (Wo: 2Àwọn Ọba 1; 2Kíróníkà 16)

Ṣe o wa ri bayi pe awọn ti ko fi ọkan wọn jin patapata fun Ọlọrun fun ohunkohun ti wọn ba nilo ṣeeṣe ki wọn padanu lọna meji. Akọkọ, wọn yoo padanu ifarahan agbara rẹ fun wọn. Ekeji, wọn yoo padanu ohun yowu ti wọn n gbiyanju lati pa mọ tabi daabo bo lalai fi ti iranwọ rẹ ṣe.

Nitorina, ti a ba ri ọna kan tabi omiran ti o ko ti fi ọkan rẹ jin patapata fun Ọlọrun, ti a ba ri abala aye rẹ kan ninu eyi ti o ti n wa iranlọwọ fun ara rẹ lọdọ awọn miran yatọ si Ọlọrun, nṣe ni ki o yara tete ronupiwada. Aijẹbẹ, nigba ti awọn ọmọ Ọlọrun yoku ba n ni ẹri giga didara rẹ lati jẹ, o ṣeeṣe ki o jẹ wipe nṣe ni wa ma a yíràá ninu inira ati idojuti. Adura mi ni pe eyi ko ni jẹ ipin rẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kiristi Oluwa wa. Inu mi dun lati ki ọ kaabọ sinu oṣu ti o kẹyin ọdun yi, oṣu Ọ̀pẹ 2024. Adura mi ni pe ki Ọlọrun ṣe ohun gbogbo ti o ni i ṣe pẹlu rẹ lọdun yi ni aṣepe, ni orukọ Jesu. Amin.

Wayi o, ẹnikan le bere pe, “Ṣe Ọlọrun lotitọ si le ṣe ohun gbogbo ti o ni i ṣe pẹlu aye mi lọdun yi ni aṣepe, pẹlu wipe ẹyin ni aye mi wa ni ọpọlọpọ ọna?” Bẹẹni, O le ṣe e. Ko si bi aye rẹ ṣe rẹyin to tabi bi o ṣe jina to si imuṣẹ awọn erongba rẹ fun ọdun yi, Ọlọrun si tun le ṣe ohun gbogbo ti o ni i ṣe pẹlu rẹ ni aṣepe.

Bibeli sọ wipe, “Awa mọ wipe ninu ohun gbogbo Ọlọrun n ṣiṣẹ fun ire awọn ti o fẹran rẹ, ani fun awọn ẹni ti a pe gẹgẹ bi ipinnu rẹ.” (Róòmù 8:28) Eyi tunmọ si pe bi ohun gbogbo ti o n ṣẹlẹ ni ayika rẹ tilẹ n ṣiṣẹ lodi si ilọsiwaju, ibalẹ-ọkan ati ohun rere yowu ti o ni lọkan lati ni, nṣe ni Ọlọrun n ṣiṣẹ fun ire rẹ lati ṣe ohun gbogbo ti o ni i ṣe pẹlu rẹ ni aṣepe. Ta wa ni o le da Ọlọrun duro ti O ba n ṣiṣẹ? Ko si ẹni na ti o le da a duro ayafi iwọ nikan.

Wo o, ko si agbara naa laarin gbogbo nkan ti a da ti o to bẹẹ lati da Ọlọrun duro lati ṣe ọ ni rere tabi lati ṣe ohun gbogbo ti o ni i ṣe pẹlu aye rẹ ni aṣepe. Amọ iwọ le da a duro. Lọna wo? Akọkọ, o le e da a duro nipaṣẹ aigbagbọ. Awọn ọmọ Isiraẹli ti Mose ko jade lati Ijibiti da Ọlọrun duro lati fun wọn ni Ilẹ-Ileri nipasẹ aigbagbọ wọn. Ko ki i ṣe eṣu ni o da a duro lati fun wọn ni ilẹ ti o n ṣan fun wara ati fun oyin yi. Awọn ni wọn da a duro lati fi fun wọn. Nibakana, ti awa naa ko ba ma a fi gbogbo igba fi igbagbọ wa ninu Ọlọrun han nipa ṣiṣiṣẹ lori ọrọ rẹ, a le da a duro, di i lọwọ tabi fa ifasẹyin fun lori ṣiṣe ohun gbogbo ti o ni i ṣe pẹlu wa ni aṣepe.

Ekeji, o le di iṣẹ Ọlọrun lati ṣe ohun gbogbo ti o ni i ṣe pẹlu aye rẹ ni aṣepe nipasẹ aimoore. Jesu, ni igba kan, wo awọn adẹtẹ mẹwa kan ṣan kuro ninu ẹtẹ wọn. Ṣugbọn ọkan ṣoṣo ninu wọn, eyi ti o si jẹ ara Samaria, ni o pada wa lati dupẹ lọwọ rẹ. Ẹnikan ṣoṣo yi naa ti o pada wa lati dupẹ lọwọ rẹ si wa ni o tun gba ọrọ ibukun fun isọdipipe ati aṣepe lati ẹnu rẹ. Awọn yoku ko ri i gba. (Wo: Lúùkù 17:11-19)

O wa ṣeni laanu pe, ọpọ ninu aye loni ni Ọlọrun ko ti ṣe ọrọ aye wọn ni aṣepe nitoripe awọn naa, gẹgẹ bi awọn adẹtẹ mẹsan ni i, ya alaimore. Kiki igba ti wọn ba nilo nkan lọwọ Ọlọrun ni wọn a ma sọkun, yira nilẹ ati lọ si ọdọ awọn adari ijọ wọn lore-koore fun amọran ati adura. Amọ ti wọn ba ti bẹrẹ si ni ni iriri didara rẹ ninu aye wọn, nṣe ni wọn yoo ma da jẹ igbadun rẹ. Wọn ko ni dupẹ lọwọ Ọlọrun lọna ti o peye tabi mọ riri awọn ti O lo fun wọn. Ba wo wa ni wọn ṣe fẹ ni iriri aṣepe iṣẹ rẹ ninu aye wọn?

Siwaju si, a tun ri awọn ti o n di iṣẹ Ọlọrun ninu aye wọn lọwọ tabi ti o n da a duro nipasẹ ẹṣẹ. Jesu, ni asiko kan, sọ fun ọkunrin kan ti O wo san pe ki o maṣe dẹṣẹ mọ. Ki ni idi? Idi naa ni ki nkan ti o buru ju eyi ti o ṣẹlẹ si tẹlẹ ma ba a tun ṣẹlẹ si i. Eyi jasi pe bi o tilẹ jẹ wipe Ọlọrun, nipasẹ iwosan ti ọkunrin yi ṣẹṣẹ rigba lọwọ Jesu, ti bẹrẹ iṣẹ imupadabọsipo ninu aye rẹ, ti ko ba dẹkun lati ma a dẹsẹ, iṣẹ ti Ọlọrun n ṣe ninu aye rẹ ko ni jẹ aṣepe. Dipo eyi, nṣe ni iṣẹ naa yo dawọduro. Tani o wa mọ nkan ti eyi yoo jasi fun un? (Wo: Johanu 5:14)

Ni kukuru, mo fi awọn nkan wọnyi han ọ ki o ba a ye ọ pe awa nikan ni o le di Ọlọrun lọwọ lati ma ṣe ohun gbogbo ti o ni i ṣe pẹlu aye wa ni aṣepe. Niwọn igba ti eyi si ri bẹ ẹ, bi a ti ṣe n wọ awọn ọjọ ti o kẹyin ọdun yi, nṣe ni ki a ya ara wa ya ohunkohun ti o le di Ọlọrun lọwọ tabi da a duro lati ṣe gbogbo nkan ti o ni i ṣe pẹlu wa ni aṣepe. Bẹẹni, nṣe ni ki a ya ara wa ya aigbagbọ, aimoore ati oniruuru ẹṣẹ. Bi a si ṣe n ṣe eyi, oore-ọfẹ Ọlọun yoo ma a ṣan ninu aye wa lalai ni idiwọ fun aṣepe ohun gbogbo ti o ni i ṣe pẹlu wa. Amin.

A kú Oṣù Ọ̀pẹ 2024 o.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu Belu 2024. Mo si gbadura pe ki Ọlọrun ma fi ojoojumọ fun ọ ni okun lati jẹ olotitọ si ninu ọsẹ naa ati ni gbogbo iyoku ọdun aye rẹ. Amin.

Jesu Oluwa wa sọ wipe, “Ṣugbọn ẹni ti o ba foriti i titi de opin, oun naa ni a o gbala.” (Mátíù 24:13) Ki ni eyi tunmọ si? Lakọkọ, o tunmọ si pe irin igbagbọ wa pẹlu Ọlọrun gbọdọ jẹ lati ibẹrẹ de opin. Lafikun, o tun tunmọ si pe iṣẹ-isin wa fun Ọlọrun gbọdọ jẹ lati ibẹrẹ de opin. Aijẹbẹ, a ko ni le jẹ alabapin ogo ayeraye rẹ. Siwaju si, ko ni si ere kankan fun wa lati ọdọ Ọlọrun fun iṣẹ yowu ti O ba fun wa ti a ko ṣe ni aṣetan.

Ki ni idi ti Ọlọrun fun mu Enọku wọ inu ogo rẹ lọ, ti ko si jẹ ki o tọ iku wo? Idi ni pe o ṣe deede ninu irin igbagbọ rẹ pẹlu rẹ lati ibẹrẹ de opin. Ọkunrin yi ko bẹrẹ si ni ba Ọlọrun rin titi o fi pe ẹni arun-din-laadọrin ọdun. Ṣugbọn lẹyin igba ti o ti bẹrẹ si ni ba a rin, ko tun fi igba kankan dẹkun lati ma a ba a rin, bẹ ẹ si ni ko lalai yipada si ọtun tabi si osi. Nṣe ni o kan tẹsiwaju lati ma a fi otitọ ba a rin fun ọdunrun ọdun, titi a fi mu wọ inu ogo rẹ lọ. (Jẹ́nẹ́sísì 5:21-23)

Lafikun, ki ni idi ti Ọlọrun fi ri Nọa ati idile rẹ gbala kuro ninu ikun omi ti o pa gbogbo nkan alaaye run ni asiko wọn? Idi naa ni pe o ṣe olododo ni kikan ọkọ ti Ọlọrun ni ki o kan. Ko ṣiṣẹ lori kikan ọkan naa fun igba diẹ ki o si dawọ iṣẹ duro. Dipo bẹẹ, nṣe ni o fi ara rẹ jin lati kan ọkọ naa titi iṣẹ rẹ fi pari.

Njẹ o wa rọrun fun Nọa lati ṣe eyi? Rara o! Owo ara rẹ ni ọkunrin yi ma na lati kan ọkọ yi. Siwaju si, owo ara rẹ ni o ma tun na lati pese ounjẹ ti awọn idile rẹ ati gbogbo awọn ẹranko ati ẹyẹ ti yoo wa pẹlu rẹ ninu ọkọ naa yoo ma a jẹ fun gbogbo asiko ti wọn yoo fi wa ninu ọkọ yi. Sibẹsibẹ, o fi suuru ṣe nkan ti Ọlọrun ni ki o ṣe titi o fi pari rẹ. Ọlọrun naa si wa fi suuru duro de titi o fi pari ọka naa nitoripe O mọ wipe ọkan rẹ wa lori ki o pari iṣẹ naa. (Wo: Jẹ́nẹ́sísì 6; 1Pétérù 3:20)

Nitorina, a le reti pe ki Ọlọrun mu suuru fun ẹnikẹni ti o ba fi ara rẹ jin lati fi ododo ba a rin ati lati fi ododo ṣe iṣẹ rẹ lati ibẹrẹ de opin. Ẹni ti ko ba jẹ olotitọ ninu ifarajin rẹ si Ọlọrun ni O le ma mu suuru fun. Dipo eyi, nṣe ni yoo wa ẹlomiran ti yoo fi rọpo rẹ, bi O ti ṣe si Ọba Sọọlu.

Ni kukuru, nkan ti mo n sọ ni pe ẹni ti yoo pada wọ inu ogo Ọlọrun lẹyin aye yi ni ẹni naa ti o jẹ olotitọ ni biba a rin lati ibẹrẹ de opin, ko ki i ṣe ẹni ti o kọ ọ silẹ. Awọn eniyan le ni oniruuru idi lati kọ Oluwa silẹ. Fun apẹrẹ, Dẹma kọ ọ silẹ nitoripe o fẹ aye yi. Awọn miran si le kọ ọ silẹ nitoripe awọn oniwaasu kan ṣẹ wọn tabi nitoripe wọn woye wipe O lọra lati ṣe awọn nkankan fun wọn. Idi yowu ti wọn le ni lati kọ ọ silẹ, wọn ko ni wọ inu ogo rẹ. (Wo: 2Tímótì 4:10)

Lafikun, kiki awọn ti o ba n polongo ọrọ Ọlọrun lati ibẹrẹ de opin, ti wọn n gbadura lati ibẹrẹ de opin ati ti wọn n ṣe iṣẹ yowu ti O fun wọn lati ibẹrẹ de opin ni yoo gba ere lọwọ rẹ. Awọn ti o ba jẹ ki iṣẹ rẹ su wọn, ti wọn si pa a ti ko ni gba ere lọwọ rẹ. Wọn le lo irẹwẹsi, inunibini, ailowo-lọwọ tabi nkan miran gẹgẹ bi awawi lati ma pari iṣẹ ti O fun wọn. Ṣugbọn niwọn igba ti wọn ko ba ti pari iṣẹ ti a fun wọn, ki wọn ṣi pari rẹ daradara, ko ni si ere kankan fun wọn.

Nitorina, ti o ko ba fẹ ki gbogbo nkan ti o ti ṣe pẹlu Ọlọrun ati fun un ja si pabo, pinnu lọkan rẹ pe o ko ni pa irin igbagbọ rẹ tabi iṣẹ isin rẹ ninu ijọba rẹ ti fun idi kankan. Dipo eyi, nṣe ni iwọ yoo ma a ba a rin, ti o o si ma sin-in pẹlu otitọ titi de opin. Njẹ ki o ma fi ojoojumọ gba okun lati ṣe bẹ ẹ gẹgẹ, ni orukọ Jesu. Amin.

Ki o ni ọsẹ alarinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu ọsẹ miran ninu oṣu Belu 2024. Mo si gbadura pe ki Ọlọrun ya aye rẹ ya ohunkohun ti o le ma fi idibajẹ sinu rẹ, ki Satani ma ba a le ri ọ lo lati fi idibajẹ sinu ijọ Ọlọrun ni ọna kankan. Amin.

Lara awọn nkan ti awọn apọsiteli igbaani sọ fun wa pe ki a kiyesi ninu ijọ ni awọn ọjọ ikẹyin yi ni awọn ayọkẹlẹ bale-ọla-jẹ. Awọn wo wa ni ayọkẹlẹ bale-ọla-jẹ? Awọn kan ninu ijọ ma ni, awọn ti o jẹ wipe awọn nan n sọ pe ti Kirisiti ni awọn n ṣe, bi awa yoku, ṣugbọn ti o jẹ wipe nṣe ni wọn n yọkẹlẹ fi idibajẹ sinu aye awọn eniyan Ọlọrun lati sọ wọn di alaiwulo fun Ọlọrun ati lati fi aaye silẹ fun Satani lati ṣiṣẹ laarin wọn.

Wayi o, lara awọn nkan ti awọn eniyan wọnyi ma n lo lati yọkẹlẹ fi idibajẹ sinu ijọ ni ẹkọ-eke ati ẹtan. Wo nkan ti Peteru sọ lori eyi:

“Ṣugbọn awọn wolii eke wa laarin awọn eniyan naa pẹlu, gẹgẹ bi awọn olukọni eke yoo ti wa laarin yin. Wọn yoo yọ́lẹ̀ mu ẹkọ odi ati egbe tọ yin wa, ani ti yoo ṣẹ́ Oluwa ti o ra wọn pada, wọn o si mu iparun ti o yara kankan wa sori ara wọn. Ọpọlọpọ ni yoo si maa tẹle ọna itiju wọn, ti wọn yoo si mu ki ọna otitọ di isọrọ-odi-si. Ninu iwa wọbia wọn, awọn ẹlẹkọ-odi wọnyi yoo maa rẹ ẹ yin jẹ nipa itan asan. Idajọ ẹni ti ko falẹ lati igba yii wa ati iparun wọn ti ko si toogbe.” (2Pétérù 2:1-3)

Njẹ o woye pe awọn adari ijọ ni awọn ti Peteru n sọrọ nipa nibiyi? Nitorina, ti a ba n sọrọ nipa awọn ayọkẹlẹ bale-ọla-jẹ ninu ijọ, ko yọ awọn adari ijọ silẹ. Adari ijọ le ma a yọkẹlẹ fi idibajẹ sinu aye awọn ọmọ Ọlọrun nipa ẹkọ-eke, awọn ẹkọ ti o n gbe iwa-wọbia, iṣekuṣe ati iṣọtẹ larugẹ. Fun apẹrẹ, arabinrin kan ti fi igba kan ri sọ fun mi pe pasitọ oun sọ fun oun pe ara ojuṣe ẹmi oun ni ki o ma ṣe tọju rẹ pẹlu ibalopọ. Ki si ni pasitọ yii lo lati gbe isọkuṣọ yi lẹsẹ? Iwe mimọ!

Oniwaasu tun le fi idibajẹ sinu aye awọn ọmọ Ọlọrun nipasẹ ala arosọ, iran arosọ, isọtẹlẹ arosọ ati itan arosọ, lati gbin ikoro sinu ọkan wọn lodi si awọn miran, pẹlupẹlu awọn ẹbi wọn. Awọn eniyan si wa loni ti wọn ti kẹyin si awọn ọkọ wọn, aya wọn, obi wọn tabi ọmọ wọn nitoripe awọn oniwaasu kan parọ fun wọn. Ti a ko ba si wa tipasẹ ọrọ Ọlọrun ati agbara Ẹmi Ọlọrun fọ awọn wọnyi mọ, o ṣeeṣe ki ibajẹ ati aiwulo fun Ọlọrun ma fi wọn silẹ fun gbogbo eyi ti o ku lọjọ aye wọn.

Nkan miran ti awọn ayọkẹlẹ bale-ọla-jẹ tun ma n lo lati fi idibajẹ sinu ijọ ni iṣekuṣe. Juuda ni eyi lati sọ fun wa lori ọrọ yi: “Nitori awọn eniyan kan n bẹ ti wọn n yọ wọle, awọn alaiwa-bi-Ọlọrun, ti n yi oore-ọfẹ Ọlọrun wa pada si wọbia, ti wọn si n ṣẹ́ Oluwa wa kanṣoṣo naa, ani Jesu Kirisiti Oluwa.” (Júúdà 4) Njẹ o ri bayẹn? Bi o tilẹ jẹ wipe awọn ayọkẹlẹ bale-ọla-jẹ n pe ara wọn ni Kirisitiẹni, wọn ko jamọ nkankan ju alaiwa-bi-Ọlọrun lọ.

Wayi o, nitoripe awọn eniyan yi ko ni ibẹru Ọlọrun ninu wọn, gbogbo igba ni wọn ma n lo oniruuru arekereke lati tan awọn eniyan Ọlọrun wọnu iṣekuṣe tabi iṣẹ-oṣo. Ibikibi ti iṣedari ijọ kan ko ba si ti wa ni ifura tabi ti igboke-gbodo ko jẹ ki awọn adari ijọ naa gbájúmọ́ ojuṣe wọn, o ṣeeṣe ki aye ati ile ọpọ ti bajẹ tan ki wọn to mọ nkan ti o n ṣẹlẹ.

Siwaju si, awọn ayọkẹlẹ bale-ọla-jẹ ma tun n ṣaba yọkẹlẹ lo ọrọ-ẹyin lati pin awọn eniyan Ọlọrun niya ati lati fi idibajẹ ṣaarin wọn. A ri awọn ijọ loni ti wọn ti n rọju fun ọpọ ọdun lati kuro ni ipo arobo ninu ẹmi, ki wọn si pọ si ni iwulo lọwọ Ọlọrun, ti ko si ti i ṣeeṣe fun wọn. Ki ni idi? Awọn ayọkẹlẹ bale-ọla-jẹ ni ko ma jẹ ki wọn ni isinmi. Gbogbo igba ni wọn n ba ara wọn ja, ti wọn si tun n pari ija laarin ara wọn. Nitorina, wọn ko le gbajumọ igbero ara wọn pẹlu ọrọ Ọlọrun ati idagbasoke wọn ninu oore-ọfẹ Jesu Kirisiti.

Wayi o, ọrọ Ọlọrun ti sọ fun wa ṣiwaju pe idajọ kan ṣoṣo pere lo wa lọwọ Ọlọrun fun awọn ayọkẹlẹ bale-ọla-jẹ. Eyi si ni iparun kiakia. Ranti Kora, Datani, Abiramu ati Oni, awọn ti wọn fẹ fi idibajẹ saarin awọn ọmọ Isiraẹli nipasẹ iṣọte. Nṣe ni a pa ati awọn ati awọn ẹbi wọn run ni kiakia. Tun ranti Ananaya ati Safira, awọn ẹni ti wọn fẹ fi idibajẹ sinu ijọ iṣaaju nipasẹ ififunni pẹlu arekereke. Ni kiakia ni Ọlọrun pa wọn danu. (Wo: Númérì 16; Ìṣe Àpọ́sítélì 5:1-11)

Nitorina, ma ya ayọkẹlẹ bale-ọla-jẹ ninu ijọ Ọlọrun. O ko ni lọ jina rara ti idajọ yoo fi wa sori rẹ. Lafikun, ma ṣe ni nkankan ṣe pẹlu ẹnikẹni ti o ba jẹ ayọkẹlẹ bale-ọla-jẹ ninu ijọ, laarin ẹbi rẹ, ni adugbo rẹ tabi ni ibi-iṣẹ rẹ. Aijẹbẹ, o le pada jẹ alabapin ninu idajọ wọn. Njẹ ki Ẹmi Ọlọrun ṣe ọ ni alailabuku titi ipadabọ Jesu Kirisiti Oluwa wa. Amin.

Kí o ní ọ̀sẹ̀ alárinrin.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lọpọ-yanturu lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Belu 2024. Adura mi ni pe ki Ọlọrun ma fi ojoojumọ fun ọ ni okun lati ma a tẹle tọkan-tọkan, ki iwọ naa ba a le ma a fi ojoojumọ ni iriri agbara rẹ fun ibalẹ-ọkan ati igbesoke rẹ. Amin.

Lara awọn itan inu bibeli ti o bani-ninujẹ julọ ni itan arakunrin kan ti a n pe ni Gehasi. Tani Gehasi? O jẹ iranṣẹ Wolii Eliṣa, eniyan Ọlọrun nla ni. Ki wa ni o bani-ninujẹ lori itan rẹ? Oun naa ni pe o pari ere-ije rẹ gẹgẹ bi adẹtẹ, bi o tilẹ jẹ wipe oun ni ko ba gba iṣẹ lọwọ Eliṣa gẹgẹ bi i wolii agba ni Isiraẹli.

Bawo wa ni ọkunrin yi ṣe pada di adẹtẹ? Idi kan gbogi ti o fi di adẹtẹ naa ni pe ko fi tọkan-tọkan tẹle eniyan Ọlọrun. Bawo ni a ṣe mọ eyi? Akọkọ, asiko kan wa ti eniyan Ọlọrun yi fun ni ọpa rẹ, ti o si paṣẹ fun pe ki o sare tete lọ fi ọpa yi le ọmọdekunrin kan ti o ku lori, ki ọmọdekunrin naa ba a le pada ji saye. Ara aṣẹ ti a si pa fun tun ni pe ko gbọdọ ki ẹnikẹni loju ọna tabi da ẹnikẹni ti o ba ki i lohun. (Wo: 2Àwọn Ọba 4:29)

Amọ ṣa o, bi a tun ṣe ri ninu akọsilẹ lori rẹ, nṣe ni Gehasi pada de lọjọ yi, ti o si sọ fun eniyan Ọlọrun pe ọmọdekunrin naa ko ji pada saye. Ki lo fa a? Ki lo ṣẹlẹ? A ko sọ fun wa. Ṣugbọn akọsilẹ kan soso ti a ri ninu bibeli ni eyi ninu eyi ti eniyan Ọlọrun yoo ti sọ fun ẹnikan lati lọ ṣe nkan pẹlu agbara Ọlọrun, ti ẹni naa yoo si pada wa lati sọ wipe, “Ko ṣiṣẹ.”

Bi a ti ṣe ri ninu Iwe mimọ, lẹyin igba ti a ti gba Elija soke ọrun, Eliṣa mu agbada rẹ, o si pin odo Jọdani niya pẹlu rẹ, gẹgẹ bi Elija ti ṣe ṣiwaju igbasoke rẹ. Bi o wa tilẹ jẹ wipe Elija ko kọ lati ṣe bẹ ẹ, nipa titẹle tọkan-tọkan, oun naa le gba Ẹmi Ọlọrun kannaa ti o ba Elija ṣiṣẹ lati le ṣe nkan ti o ṣe. (Wo: 2Àwọn Ọba 2)

Siwaju si, a tun ri ninu bibeli pe nigbati Jesu paṣẹ fun awọn ọmọ ẹyin rẹ lati jade lọ ọ waasu ati lati wo oniruuru aisan ati arun san, wọn gbọran si lẹnu. Bi ko tilẹ wa fun wọn ni ọpa tabi owo kankan lati mu lọwọ, gbogbo wọn ni wọn pada pẹlu ẹri ti o ga. Gbogbo wọn ni o le ṣe nkan ti Jesu ti n ṣe. (Wo: Luùkù 10:1-17)

Amọ ọrọ ti Gehasi ma yatọ patapata. Nṣe ni oun pada wa pẹlu iroyin buburu. Nitorina, eniyan Ọlọrun ni lati lọ gbadura fun ọmọdekunrin ti o ku naa funrarẹ, ki o ba a le ye. Mo si tun wa n bere lẹẹkan si, bi mo ti ṣe bere tẹlẹ, “Ki lo ṣele gan-an? Ṣe Gehasi ba ẹnikan sọrọ loju ọna si ọdọ ọmọdekunrin ti o ku yẹn ni? Tabi ṣe o kọkọ ya ibomiran naa ni? Tabi ṣe ko kan tilẹ gbagbọ pe ọmọdekurin naa yoo ye ni?” A ko fun wa ni idahun si awọn ibere wọnyi ninu bibeli. Bẹẹ si ni a ko fi otitọ ti o wa nidi ọrọ naa han eniyan Ọlọrun naa pẹlu ni asiko yi.

Amọ ṣa o, a wa ri asiko kan ti a fi han Eliṣa pe Gehasi ko ma a tẹle tọkan-tọkan. Asiko yi si ni o gbẹyin Eliṣa lọ lati gba owo ati aṣọ diẹ lọwọ Naamani ara Siria. Naamani ni Ọlọrun ti wosan kuro ninu ẹtẹ rẹ. Eliṣa ko si gba ohunkohun lọwọ rẹ nitoripe o fẹ ki o lọ si ile, ki o s jẹ ki awọn eniyan rẹ mọ wipe Ọlọrun kan wa ti O n wo eniyan san lọfẹ. Ṣugbọn Gehasi gbẹ̀bùrú ba ẹri rẹ jẹ nipa gbigba nkan lọwọ rẹ. (Wo: 2Àwọn Ọba 5)

Nitorina, kedere bayi ni o han si eniyan Ọlọrun pe Gehasi ko ma a fi tọkan-tọkan tẹle tabi kọ ẹkọ kankan lara rẹ. Niwọn igba ti ko si tẹle eniyan Ọlọrun yi tọkan-tọkan, a jẹ wipe ko tẹle Ọlọrun tọkan-tọkan naa niyẹn. Eliṣa, bi a ti ṣe mọ ninu bibeli, jẹ eniyan Ọlọrun tootọ. Ki a wa sọ wipe Gehasi n tẹle tọkan-tọkan ni, nṣe ni oun naa ko ba mọ Ọlọrun lotitọ nipasẹ rẹ. Eyi ko ba si jẹ ki o pọ si ni iwulo ninu iṣẹ iranṣẹ. Amọ ọkan rẹ ko mọ. Nitorina, o padanu aaye rẹ ninu ete Ọlọrun, o si tun fa ẹtẹ Naamani si ori ara rẹ ati sori awọn arọmọdọmọ rẹ titi lailai.

Njẹ ki ni eyi n kọ wa? Oun naa ni pe ki a ma a tẹle Ọlọrun tọkan-tọkan. Ọna kan la si ti ṣe bẹ ẹ ni ki a ma a tẹle awọn ti O yan lati dari wa ninu ijọ, ti wọn si n ri ninu ifẹ rẹ lọna ti o han kedere, tọkan-tọkan. Ti awọn adari wa ninu ijọ ko ba n rin ninu ifẹ Ọlọrun, a ko nilo lati tẹle wọn rara. Dipo bẹ ẹ, nṣe ni ki a jina si wọn.

Ṣugbọn ti wọn ba n rin ninu ifẹ rẹ, nṣe ni a ki ma a tẹle wọn tọkan-tọkan. Eyi tunmọ si pe a ko gbọdọ lo oju-aye tabi ẹtan ni titẹle wọn. Dipo eyi, nṣe ni ki a ma a fi gbogbo igba mu ẹkọ wọn, aṣẹ wọn ati adura wọn ni ọkunkundun, ki a si tun ma a ṣiṣẹ le wọn lori. Aijẹbẹ, dipo ti a o fi ma a pada wa sọdọ wọn ni gbogbo igba pẹlu ẹri ti o ga, nṣe ni a o ma fi ọpọ igba mu iroyin ikuna wa tọ wọn wa, gẹgẹ bi Gehasi. Yatọ si iyẹn, a tun le padanu ààyè wa ninu ete Ọlọrun fun wa tabi ki a mu ara wa wa si abẹ idajọ rẹ.

Mo wa gbadura pe o ko ni padanu ààyè rẹ ninu ijọba Ọlọrun tabi di piparun labẹ idajọ rẹ. Ṣugbọn fi ara rẹ jin fun titẹle tọkan-tọkan. Yoo si dara fun ọkan rẹ.

Ki o ni ọsẹ ti o ga.

Copyright © 2024, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 08146472876)