CyberHawk – Page 5 – Búlọ́ọ̀gì Wa | Ìjọ Òtítọ́ Bíbélì

Lo o fun imọriri | Lati ọwọ: Paitọ J.O. Lawal

Ọjọ: Ọpẹ 05, 2021 | Atẹlera: Latori tabili | Nọmba: Vol. 10, No. 31

Olufẹ: ki oore-ọfẹ, aanu ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Olugbala ati Oluwa wa. O fun mi ni ayọ gidigidi lati ki ọ kaabọ sinu oṣu ti o pari ọdun yi, iyẹn oṣu Ọpẹ 2021. Mo si gbadura pe ki aye ati ile rẹ kun akunwọsilẹ fun ayọ ati alaafia ninu gbogbo oṣu naa, ni orukọ Jesu. Amin.

Wayi o, bi a ṣe wọ inu oṣu ti o kẹyin ọdun yi, mo fẹ gba ọ niyanju lati lo o lati mọ riri Ọlọrun ati awọn ti O ti lo lati bukun fun ọ ni ọna kan tabi omiran ninu ọdun naa. Ki si ni idi ti o fi yẹ ki o mọ riri Ọlọrun? Akọkọ, idi ni ni pe ifẹ rẹ fun ọ ni eyi (1Tẹsalonika 5:18). Ifẹ Ọlọrun ni pe ki ẹni kọọkan ti o n gbe ninu aye ti O da, ti o si n jẹ igbadun ipese rẹ ti o wa ninu aye naa lati fi ara rẹ han gẹgẹ bi ẹni ti o mọ oore, bi o ti wu ki igba ri fun iru ẹni bẹ. Nitorina, bi awọn nkankan ko ba tilẹ lọ deede fun wọn ninu aye yi ni asiko yi, wọn si nilo lati kọ bi a n ṣe n fi ọpẹ fun Ọlọrun fun awọn nkan ti o n lọ deede fun wọn. Idi si ni pe nkan ko ba ti buru ju bi o ṣe wa fun wọn lọ, ti ko ba ki i ṣe ti Ọlọrun (Saamu 124).

Ekeji, o nilo lati mọ riri Ọlọrun nitoripe eyi ni yoo ṣi ilẹkun silẹ fun ọ lati ri nkan gba si lọwọ rẹ ati lati tun ni iriri aṣepe awọn nkan ti o ti ri gba lọwọ rẹ (Saamu 50:23). Wo o, nkankinkan ti a ba ni lọwọlọwọ yi, bi o ti wu ki o dara tabi buru to, ko ki i ṣe ohun ti o dara julọ fun wa lati ni ni aye yi. Ko si igba ti nkan ti o dara ju eyi ti a ni lọwọ lọ ko ki i wa ni ọwọ Ọlọrun, awọn nkan ti o kọja nkan ti oye wa le gbe tabi tọpinpin rẹ (Efesu 3:20). Ti a ko ba si kọ lati ma fi ọpẹ fun Ọlọrun fun ẹbun wiwa laaye ati fun gbogbo awọn nkan rere ti o wa ninu aye wa, a ko ni fi ara wa han gẹgẹ bi ẹni ti o yẹ lati ri nkan pupọ miran gba si lọwọ rẹ tabi lati ri aṣepe awọn nkan ti ko lọ deede ninu aye wa.

Nitorina, eyi ti iwọ yoo fi ma wo awọn nkan ti ko lọ deede ninu aye rẹ, ti o o si ma ṣe aroye lori wọn, kọkọ fi aye silẹ lati fi ara balẹ ṣe agbeyẹwo awọn nkan ti o n lọ deede ninu aye rẹ, ki o si ma fi ọpẹ fun Ọlọrun fun wọn. Si ranti pe ọwọ rẹ ni ohun rere ati ohun ti o peye gbogbo ti n wa. Nitorina, ti ohunkohun ba n lọ deede ninu aye rẹ, Oun ni o wa nidi rẹ. O ṣi yẹ ki o mọ eyi, ki o si fi ọkan otitọ dupẹ lọwọ rẹ fun un. (Wo: Saamu 103:1-5; Aisaya 26:12; Jemisi 1:17)

Siwaju si, ma ṣe gbagbe ara rẹ nitori awọn nkan daradara melokan ti Ọlọrun ti ṣe fun ọ de ibi pe o ko ni ranti lati dupẹ lọwọ rẹ. Idi si nipe nkan si tun pọ ti o le ri gba lọwọ rẹ. Ti o ko ba wa fi ẹmi imoore han fun awọn nkan ti O ti ṣe fun ọ, njẹ o ko ni ma gbe ilẹkun ohun rere miran ti o le ri gba lọwọ rẹ ti mọ ara rẹ bi? Ranti awọn adẹtẹ mẹwa ti Jesu wo san. Ọkan ṣoṣo lara wọn ni o pada wa dupẹ lọwọ rẹ. Inu awọn yoku ti dun kọja ala, de ibi pe wọn ko ranti lati pada wa dupẹ lọwọ rẹ. Ọkunrin kan ti o si wa pada wa yi nikan naa ni o ri ọrọ ibukun miran gba si lọwọ rẹ — igbagbọ rẹ mu ọ lara da. Nibakan naa, iye awọn ti o ba pada tọ Ọlọrun wa ni opin ọdun yi lati dupẹ lọwọ rẹ fun gbogbo awọn nkan ti O ti ṣe fun wọn ninu ọdun naa nikan naa ni yoo ri ọpọ nkan gba si lọwọ rẹ, ti wọn yoo si tun ri aṣepe awọn nkan ti O ti ṣe fun wọn tẹlẹ.

Bawo wa ni o ṣe le fi ẹmi imoore han si Ọlọrun fun awọn nkan ti O ti ṣe fun ọ ni ọdun yi? Akọkọ, o le fi han nipa yiyin in pẹlu ọrọ rẹ, orin rẹ ati ijo rẹ (2Samuẹli 6:14; Luuku 17:15; Iṣe Apọsiteli 3:8). Ekeji, o le fi han nipa fifi nkan fun un. Eyi tunmọ si pe ki o fi nkan silẹ fun ọrọ ijọba rẹ, fun itankalẹ ihinrere rẹ. Nitorina, ti o ko ba i ti fi igba kankan ninu ọdun yi ṣe nkankan fun ijọba Ọlọrun ni mimọ riri awọn nkan ti O ti n ṣe ninu aye rẹ, mura lati ṣe bẹ ninu oṣu yi. Ẹkẹta, o le fi han nipa fifi gbogbo igba lo awọn nkan ti O fun ọ lati polongo ododo rẹ.

Ni akotan, bi mo ti ṣe tọkasi siwaju, ko ki i ṣe Ọlọrun nikan ni o yẹ ki o mọ riri rẹ ni opin ọdun yi; o yẹ ki tun mọ riri gbogbo awọn ti O ti lo lati bukun fun ọ, daabo bo ọ tabi fa ọ soke ninu ọdun naa. Mo mọ pe ko si ẹnikankan ninu wa ti o le mọ gbogbo awọn ti Ọlọrun ti lo tabi ti o n lo lati mu ki aye wa dara si ati ki o si tun wa ni ailewu si. Ṣugbọn awọn kan wa ti o jẹ wipe a le tọka si ipa ribiribi ti wọn ti ko ninu aye wa. O si yẹ ki a ronu si ọna ti a le fi mọ riri awọn naa pẹlu. Idi si ni pe ti wọn ko ba fi ara wọn jin fun Ọlọrun lati lo fun wa, o ṣeeṣe ki awọn irufẹ igbega tabi igbala kan ti a ri gba ni ọdun yi di ọrọ ọjọ iwaju.

Wayi o, ma ṣe ṣe awawi kankan lori ọrọ yi. Ko ki i ṣe gbogbo igba naa ni eniyan ma n nilo owo ti o pọ lati mọ riri awọn miran, ti a ba ni arojinlẹ. Nitorinaa, nṣe ni ki o ṣe bi Dafidi, ẹni ti o jẹ wipe, ni ọjọ ọpọ yanturu rẹ, o fi ẹbun ranṣẹ si gbogbo awọn ọrẹ rẹ ti wọn tẹwọgba, ti wọn si pese fun ni gbogbo akoko ti o n sa kaakiri nitori Sọọlu ọba (1Samuẹli 30:26-31). Ki Ọlọrun si busi fun ọ lọpọlọpọ pẹlu ohun rere gbogbo ni ọsu Ọpẹ yi, ki o ba le fi tọkantọkan fi imoore rẹ han si i ati si gbogbo awọn ti O ti lo fun ọ ninu ọdun yi, ni orukọ Jesu. Amin.

Ki o ni oṣu Ọpẹ 2021 ti o ga.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Lo o fun imọriri | Lati ọwọ: Paitọ J.O. Lawal Read More »

Jẹ olotitọ ninu iṣẹ isin rẹ si i | Paito J.O. Lawal

Leave a Comment

Ọjọ: Belu 28, 2021 | Atẹlera: Latori tabili Paitọ | Nọmba: Vol. 10, No. 30

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Kaabọ si ọjọ Isinmi ti o kẹyin oṣu Belu 2021. Mo gbadura pe ki didara Ọlọrun ṣan ni akunwọsilẹ ninu aye ati ile rẹ ni eyi ti o ku ki osu naa ati odun yi pari, ni orukọ Jesu. Amin.

Bi a ṣe n bẹrẹ ọsẹ yi, mo fẹ gba ọ niyanju pe ki o mu iṣẹ isin rẹ si Ọlọrun ni ọkunkundun ati tọkantọkan. Ki ni idi? Akọkọ, idi ni ki Ọlọrun ba a le lo lati mu ete rẹ ṣẹ ninu aye awọn eniyan. Ti a o ba sin Ọlọrun tọkantọkan ati ni ibamu pẹlu ifẹ rẹ, a le doju nkan ti o fẹ mu jade nipasẹ nkan ti a n ṣe ru. Eyi ko si ni dara fun wa tabi fun awọn ti a n sin nitori rẹ.

Fun apẹẹrẹ, bi o tilẹ jẹ pe awọn Juu aye igba Jesu Oluwa wa ni awọn alufa, olukọ ofin, Farisi ati Sadusi ti wọn n ṣiṣẹ lati sin wọn, sibẹsibẹ, Oluwa sọ pe wọn da bi agbo aguntan ti ko ni oluṣọ. Eyi tunmọ si pe iṣẹ iranṣẹ awọn adari ẹsin wọn yi ko mu ete Ọlọrun wa si imuṣẹ ninu aye wọn. Ki wa ni idi? Ṣe nitoripe nkankan n ṣe awọn eniyan yi ni? Rara o! Dipo bẹẹ, idi ni pe ọpọ ninu awọ adari ẹsiin wọn yi ni o jẹ alagabagebe, awọn ti ọkan wọn ko mura tan lati sin Ọlọrun ni ibamu pẹlu ifẹ rẹ. (Wo: Matiu 9:35-36; Matiu 23)

Wayi o, ti a ba ni ki a fi iṣẹ iranṣẹ awọn wọnyi we ti awọn diakoni meje akọkọ ninu ijọ, a o ri pe iyatọ nla gba a ni o wa ni aarin wọn. Idi si ni pe bi o tilẹ jẹ pe a ko ya awọn diakoni yi sọtọ lati waasu bikoṣe lati ṣe amojuto ounjẹ pinpin fun awọn ọmọ Ọlọrun, iṣẹ iranṣẹ wọn yọri si titan kalẹ ọrọ Ọlọrun si ati idagbasoke ijọ rẹ. Ki lo si fa a? Nkan ti o fa a naa ni pe awọn diakoni yi ṣe iṣẹ isin wọn pẹlu ọkan ti o ṣe olotitọ si Ọlọrun. Nitorina, ti a ba jẹ olotitọ si Ọlọrun ninu iṣẹ isin wa, O le lo ohunkohun ti a ba n ṣe, bi o ti wu ki o ma ja mọ nkankan to loju awọn eniyan, lati mu ete rẹ ṣẹ ninu aye awọn eniyan. Amọ ti a ko ba jẹ olotitọ si, bi mo ti ṣe sọ siwaju tẹlẹ, afaimọ ni ki a ma di iṣẹ rẹ lọwọ tabi ba a jẹ.

Bẹẹni, ni awọn igbakan, ni tootọ, Ọlọrun ma n mọn-ọn-mọn foju fo aiṣedeede awọn eniyan si ninu iṣẹ isin wọn, ti yoo si tun mu ki ete rẹ wa si imusẹ nipasẹ nkan ti wọn n ṣe. Fun apẹẹrẹ, igba kan wa ti Mose ati Arọni ṣe aigbọran si, ti wọn si tun ṣe aṣeyọri ninu iṣẹ ti O ran wọn. Eyi tunmọ si pe, pẹlupẹlu aigbọran awọn ọkunrin yi, Ọlọrun si tun ṣe iṣẹ iyanu fun awọn eniyan rẹ nipasẹ nkan ti wọn ṣe. Amọ ṣe wọn wa ri ere gba fun aiṣododo wọn? Oti o! Dipo eyi, nṣe ni a da seria fun wọn gidigidi. (Wo: Numeri 20:1-13)

Lafikun, ti a ba wo igbe aye Samusoni, a ri pe ẹkọ kan pataki ti o kọ wa ni pe o ṣeeṣe ki a jẹ alaiṣootọ si Ọlọrun ninu aye wa tabi ninu iṣẹ isin wa, ki a si tun ma ri iṣẹ tabi ọwọ agbara rẹ ninu ohun ti a n ṣe. Amọ ṣa o, bi a tun ṣe ri nipasẹ itan aye ọkunrin yi, ti a ba tẹsiwaju pẹlu aiṣodo si Ọlọrun ninu aye wa tabi ninu iṣẹ isin wa, akoko naa di dandan ki o de ti yoo jẹ ki oju wa ri ere aiṣododo wa gbogbo, eyi ti o si le ka wa laya. (Wo: Onidajọ 13-16)

Nitorina, ti o ko ba jẹ olododo ninu iṣẹ isin rẹ si Ọlọrun, mọ pe o di dandan ko lẹyin. Ọkan lara ọmọ ti eyi yoo si bi ni pe o ko ni ri ere tabi oriyin gba lọwọ rẹ fun ohunkohun ti o ba n ṣe. Awọn nkan miran ti o si tun le ti ẹyin rẹ jade wa ni emi tabi ẹnikankan ko le sọ. Ṣugbọn o le buru jọjọ. Idi si ni yi ti o fi nilo lati ṣe agbeyẹwo bi iṣẹ isin rẹ si Ọlọrun ṣe dangajia to. Ranti pe a ko le tan an jẹ tabi mu un ṣere. Eyi tunmọ si pe nkan ti o ba gbin naa ni o o ka. (Wo: Saamu 18:25-26; Galatia 6:7-8)

Ti o ba gbin ẹtan, aiṣododo tabi agabagebe ninu iṣẹ isin rẹ si i, eso ti iwọ naa yoo ka di dandan ki o fi han. TI o ba si gbin isododo, ifarabalẹ ṣiṣẹ ati ifẹ ninu iṣẹ isin rẹ si, eso ti o o ka naa yoo fi han. Nitorina, ye parọ tan ara rẹ jẹ mọ nipa iṣẹ isin rẹ si Ọlọrun, ki o si dojukọ otitọ nipa bi o ṣe dangajia si. Bẹẹni, ṣe agbeyẹwo didangajia iṣẹ isin rẹ si Ọlọrun pẹlu imọlẹ ọrọ rẹ, ki o ba le ṣe ohun ti o tọ nipa rẹ. Aijẹbẹ, ara rẹ nikan naa ni o o da lẹbi nigba ti Oun naa ba bẹrẹ si ni pin ọ lere gẹgẹ bi iṣẹ isin rẹ ṣe gba. Mo si gbadura pe o ko ni padanu ere isẹ isin rẹ si Ọlọrun nikẹyinkẹyin tabi ki o jẹ iya lọpọlọpọ nitori pe o ko sin in bi o ṣe tọ ati bi o ṣẹ yẹ, ni orukọ Jesu. Amin

Ki o ni ọsẹ alarinrin.

Jẹ olotitọ ninu iṣẹ isin rẹ si i | Paito J.O. Lawal Read More »

AKỌRI: ILANA FUN IRANWỌ GBIGBA NINU IJỌ AYỌKA: 1Timoti 5:3-16 | Paito J.O. Lawal

Leave a Comment

ỌJỌRU 24, BELU 2021

AKỌSORI: “Bi obinrin kan ti o gbagbọ ba ni awọn ibatan ti i ṣe opo, ẹ jẹ ki o maa ran wọn lọwọ, ki o ma si ṣe di ẹru naa le ijọ, ki wọn ki o le maa ran awọn ti i ṣe opo nitootọ lọwọ.” (1Timoti 5:16)

ỌRỌ AKỌSỌ
Bi a ti ṣe ri ni inu bibeli, ko si alaini kankan ninu awọn ọmọ Ọlọrun ti o kọkọ gbagbọ ninu Jesu ni igba aye awọn Apọsiteli akọkọ (Iṣe Apọsiteli 4:32-34). Ki si ni idi? Idi ni pe gbogbo wọn, paapaa julọ awọn ti a le pe ni ọlọrọ laarin wọn, n ran ara wọn lọwọ pẹlu awọn nkan ini wọn. Ọpọ ni o ta nkan ini wọn ni akoko yi, ti wọn si fun awọn apọsiteli ni owo ti wọn n pa nibẹ, ki wọn ba le lo wọn lati ran awọn alaini arin wọn lọwọ. Nigba ti o si ṣe, gbogbo wọn ti wọn gbagbọ kuro ni ipo alaini si ipo ẹni ti o ni anito ati aniṣẹku. Eyi si n jẹ ki o ye wa pe o ṣeeṣe ni ijọ wa kọọkan loni ki gbogbo wa ti a jẹ ọmọ Ọlọrun wa ni ipo ẹni ti o ni anito ati aniṣẹku. Awa naa kan nilo lati tọ ipasẹ awọn aṣaaju wa ni, ki a si fi ara wa jin lati ran ara wa lọwọ de ibi ti a o ti le sọ pe ko si alaini kankan ni aarin wa. Amọ ṣa o, ti a ko ba mọ ọna ti o tọ lati ṣe eleyi, o ṣeeṣe ki ififunni wa tabi iran ara wa lọwọ ma mu ete tabi erongba wa wa si imuṣẹ.

Bi a ti ṣe mọ, ọpọ ni o ti ri oniruuru iranwọ gba ninu ijọ ti ko si ja mọ nkankan fun wọn. Ọpọ ni a ti fun ni owo fun okowo tabi lati lọ si ile-ẹkọ, ti wọn si fi gbogbo nkan ti a fun wọn ṣofo. Awọn miran kan tilẹ pa irọ gba iranwọ ninu ijọ ni, ti wọn si wa jẹ ki awọn ti o ran wọn lọwọ ti ika abamọ bọ ẹnu. Idi si niyi ti o fi jẹ pe ọpọ ijọ Ọlọrun loni ni ko ki fi taratara kọbiara si ṣiṣe etọ iranwọ fun awọn ọmọ ijọ wọn. Mo ti lẹ ti gbọ lẹnu ẹnikan ri pe awọn adari ijọ kan sọ wipe, “Ṣọọṣi ko ki i ṣe baba keresi ti o ma n pin ẹbun ọfẹ.” Eyi si bi ẹni ti o gbọ ọrọ yi ninu gidigidi, to bẹẹ gẹẹ ti o fi sọ wipe, “Ti ṣọọṣi ko ba ki i ṣe baba keresi, ta wa ni o yẹ ki o jẹ baba keresi?”

Ti a ba si wo nitootọ, ko da bi ẹni pe nkan ti o buru ni ti ijọ Ọlọrun naa ba n ṣe bi baba keresi. Ṣugbọn ti a ba fi ẹsẹ ọrọ Ọlọrun tọ ọ, a o ri pe ijọ Ọlọrun ko ki i ṣe baba keresi ni tootọ, ti o kan ma n pin ẹbun lọfẹ lofo, lalai fi ti iru eni yowu ti o tọ ọ wa ṣe. Ka tilẹ sọ otitọ, baba keresi gan ti n fi ọgbọn ṣe bayi o. Awọn ti o ba sanwo lati wo o nikan ni o n pin ẹbun fun. Awọn ti ko ba sawọn iworan ko ni ri soju debi pe wọn yoo tilẹ gba ẹbun lọwọ rẹ. Eyi ko wa tunmọ si pe awọn ti o ba fi owo wọn mọ ijọ nikan ni o yẹ ki ijọ Ọlọrun ma ran lọwọ ni igba iṣoro tabi ipọnju. Ko tunmọ si rara pe awọn ti o ba n da idamẹwa ati ọrẹ deede nikan naa ni o yẹ fun iranwọ ijọ. Dipo eyi, o tunmọ si pe ilana wa ninu bibeli ti ijọ Ọlọrun gbọdọ ma tẹle ti wọn ba fẹ ṣe iranwọ fun ẹnikẹni, paapaa julọ ninu ijọ.

ILANA FUN IRANWỌ GBIGBA NINU IJỌ
Lakọkọ naa, a gbọdọ mọ pe ojuṣe wa ni gẹgẹ bi ijọ Ọlọrun kọọkan lati ma ran ara wa lọwọ nipa ti ẹmi ati nipa ti ara. Nitori naa, ko bojumu rara, ko si tun fi han pe a gbagbọ ninu Jesu nitootọ ati pe ifẹ rẹ n gbe inu ọkan wa ti a ba n wo awọn ara wa ti o wa ni ipo aini niran, ti a ko si gbe igbesẹ kankan lati ran wọn lọwọ nigba ti a wa ni ipo lati ṣe bẹẹ (Jemisi 2:14-17; 1Johanu 3:16-18). Amọ sa o, bi mo ṣe ti sọ siwaju, a gbọdọ mọ awọn ilana ti a la kalẹ sinu bibeli lori ọna ti a gbọdọ tẹle lati ma ran ara wa lọwọ ninu ijọ. Aijẹbẹ ifẹ Ọlọrun le ma wa si imuṣẹ nipasẹ iranwọ ti a ba n fun ara wa.

Ki wa ni awọn ilana ti a gbọdọ tẹle? Bi a ti ṣe ri ninu bibeli, iwọnyi ni pataki julọ lara awọn ilana naa:

A gbọdọ ri daju pe ọmọ Ọlọrun ni ẹni ti a fẹ ran lọwọ: Ṣe awọn ọmọ Ọlọrun nikan ni o yẹ ki awọn Kirisitẹni ma ran lọwọ? Rara o! Bibeli sọ wipe, “Njẹ bi a ti n ri akoko, ẹ jẹ ki a maa ṣoore fun gbogbo eniyan, ati paapaa fun awọn ti i ṣe ara wa ninu igbagbọ.” (Galatia 6:10) Yatọ si eyi, o tun sọ wipe, “ Ṣugbọn bi ẹnikẹni ko ba pese fun awọn ibatan rẹ, paapaa fun idile rẹ, o ti ṣẹ ohun naa ti a gbagbọ, o si buru ju alaigbagbọ lọ.” (1Timoti 5:8) Nitori naa, ko ki i ṣe awọn ti o jẹ ọmọ Ọlọrun nikan ni o yẹ ki a ma ran lọwọ gẹgẹ bi ọmọ Ọlọrun. Gbogbo awọn ti Ọlọrun ba fun wa ni aye ati anfaani lati ran lọwọ ni a gbọdọ ma ran lọwọ. Ṣugbọn, a gbọdọ ri daju pe a kọkọ mojuto ile wa tabi idile wa ki a to a ṣe eleyi. Aijẹbẹ, a o jẹbi niwaju Ọlọrun. Yatọ si eyi, a tun gbọdọ mu riran awọn ọmọ Ọlọrun ti o wa ni ayika wa lọwọ, paapaa julọ awọn ọmọ ijọ wa. A si ri pe bibeli fi idi rẹ mulẹ pe a gbọdọ mu riran awọn ọmọ Ọlọrun ti a jọ n ṣepọ ni pataki ju riran awọn ti ko ki i ṣe ọmọ Ọlọrun lọwọ lọ. Idi si ni pe ẹya ara kan naa ni wa ninu Kirisiti Jesu (1Kọrinnti 12). Ko bojumu to lati pa awọn ọmọ ijọ wa ti o ṣe alaini ti, ki a si wa ma lo owo ti awọn ọmọ ijọ miran kojọ lati ma ṣe iranwọ fun awọn alaigbagbọ. Bi awọn aṣaaju wa ninu igbagbọ ti ṣe ṣe kọ ni yẹn. Nitorina, ki a to fun ẹnikẹni ni iranwọ ti o tọ si ọmọ Ọlọrun, paapaa julọ gẹgẹ bi ijọ Ọlọrun, a gbọdọ ri daju ṣaka pe ọmọ Ọlọrun ni ẹni bẹẹ ni tootọ. O si tunmọ si pe o gbọdọ kọja ọrọ ẹnu; a gbọdọ ri ninu iwa ati iṣe ẹni naa pe ọmọ Ọlọrun ti aye rẹ kun fun eso ẹmi ni. Aijẹbẹ, o ṣeeṣe ki ẹni naa ṣi oore-ọfẹ naa lo, ki o si tun mu ipalara ba ijọ Ọlọrun. Apẹẹrẹ eyi si kunlẹ jantirẹrẹ.
Iṣedari ijọ ni lati mọ nipa iranwọ ṣiṣe laarin ọmọ ijọ kan si omiran: Bi a ti ṣe ri ninu bibeli, ni igba ti ijọ Jesu bẹrẹ si ni pade, ti wọn si n ran ara wọn lọwọ, awọn apọsiteli ati awọn diakoni ni o n ṣe iṣakoso iṣẹ iranwọ yi. Awọn ni awọn ti o n ta nkan ini wọn n ko owo fun lati pin fun awọn ọmọ ijọ gẹgẹ bi aini ẹnikọọkan wọn ṣe ri. Idi si ni pe awọn ni o wa ni ipo lati tọpinpin, nipa ọgbọn Ẹmi mimọ ati oye ọrọ Ọlọrun, igbe aye ọmọ ijọ kọọkan ati lati mọ irufẹ iranwọ ti wọn nilo. Eyi tunmọ si pe ko ki i ṣe pe awọn eniyan kan dede n mu ẹni ti o ba wu wọn lati ran lọwọ. Ka sọ wipe bẹẹ lo ṣe ri ni, ọpọ ni ko ba kabamọ lori riran awọn ọmọ ijọ kan lọwọ. Bẹẹ si ni ọpọ ko ba tun ṣe kabamọ pe wọn gba iranwọ awọn kan. Yatọ si eyi, ikunsinnu ko ba wa laarin awọn ti wọn ro pe a ko ran awọn lọwọ to. A si ri lotitọ pe akoko kan wa ti awọn opo kan bẹrẹ si ni kun pe wọn awọn ti o n pin ounjẹ ojoojumọ fun wọn ti ti ẹlẹyamẹya ati ojuṣaaju bọ ọrọ naa. Eyi ni o si fa a ti awọn apọsiteli ṣe ni ki wọn yan awọn ti wọn kun fun Ẹmi mimọ, ti wọn si tun ni ọgbọn Ọlọrun ninu wọn lati ma mojutọ ọrọ naa. Nitori naa, ti a ko ba fẹ ṣe aṣiṣe ni riran awọn eniyan lọwọ ninu ijọ tabi ki a mu ki o fa ikunsinu tabi ipalara, a gbọdọ ṣe nipasẹ awọn adari wa ni. Awọn adari wa naa si gbọdọ ṣe ni ọna ti ojuṣaaju ko fi ni wọ ọ nipa fifi aye gba awọn ti o kun fun Ẹmi mimọ ati ọgbọn Ọlọrun lati ṣe amojuto ọrọ naa. (Wo: Iṣe Apọsiteli 4:34-37 & 6:1-7; 1Timoti 5:21)
Ẹni naa gbọdọ fi ara rẹ jin fun igbe aye iwa mimọ ati isin ninu ijọ: Yatọ si pe ki eniyan jẹ ọmọ Ọlọrun, bi mo ṣe sọ siwaju, o tun gbọdọ fi ara rẹ han ninu ijọ gẹgẹ bi ẹni ti o fi aye rẹ jin fun iwa mimọ ati sisin Ọlọrun. Fun apẹẹrẹ, Pọọlu, nigba ti o n fun Timoti ni alakalẹ lori awọn nkan ti o yẹ ki o wo ki o to ma ran opo kankan lọwọ pẹlu owo ijọ Ọlọrun, sọ fun pe, “Ma ṣe kọ orukọ opo ti o ba din ni ọgọta ọdun silẹ bi opo ti o yẹ fun iranlọwọ, oun si gbọdọ ti jẹ obinrin oloootọ si ọkọ rẹ, Ẹni ti a lee jẹrii rẹ fun iṣẹ rere, ti o ti tọ ọmọ rẹ bi o ti yẹ, ẹni ti o maa n gba alejo, ti o ti ṣe iranṣẹ fun awọn eniyan mimọ ninu irẹlẹ, ti o si maa n ran awọn ti a n pọn loju lọwọ, ẹni ti n lepa lati ṣe rere” (1Timoti 5:9-10) Pẹlu nkan ti Pọọlu sọ nibiyi, a ri pe ẹni yowu ti ijọ yoo ba ran lọwọ gbọdọ jẹ ẹni ti igbe aye ti o n gbe fi ogo fun Ọlọrun, ti oun naa si tun kun fun iṣẹ rere. Nitori naa, ẹni ti a ko ba le gbẹri rẹ jẹ pe igbe aye rẹ wa ni ibamu pẹlu ifẹ Ọlọrun ati pe o tun kun fi iṣe rere ni sisin ijọ Ọlọrun ko lẹtọ si iranwọ ijọ. Aijẹbẹ, ọpọ ni yoo ma lo iranwọ ti wọn gba ninu ijọ lati ṣe iranu tabi lati gbe igbe aye ti ko fi ogo fun Ọlọrun.
Awọn ti o n gba iranwọ ko gbọdọ jẹ ọlẹ tabi alaifẹkanṣe: Pọọlu, ninu lẹta rẹ si awọn ara Tẹsalonika kilọ fun wọn lati ma ṣe ran ẹnikẹni laarin wọn lọwọ lati jẹ ọlẹ tabi alainikanṣe. O tilẹ tun sọ siwaju si fun wọn pe ilana ti awọn fun wọn ni pe ẹnikẹni ti ko ba ṣiṣẹ ko lẹtọ si ounjẹ. Eyi tunmọ si pe ọlẹ, boya ninu ijọ ni o tabi ni ibomiran, ko lẹtọ si ounjẹ tabi iranlọwọ. Awọn ti wọn ṣetan lati ṣiṣẹ tọkantara ni iranwọ wulo fun. Idi si ni pe afojusun iranwọ ninu ijọ ki i ṣe lati pọn awọn kan loju ki a ba le tu awọn kan lara bikoṣe lati mu wa de ibi ti ko ti ni si alaini ni aarin wa. Eyi tunmọ si pe ti a ba ran ọ lọwọ loni, ki iwọ naa ba le ran ẹlomiran lọwọ lọla ni. Ti o ba wa ya ọlẹ, njẹ eyi yoo ṣeeṣe bi? Ko ni i ṣeeṣe. Abi ṣe o wa dara ki awọn kan ma fi tọkantara sin Ọlọrun ati fẹ awọn ara wọn pẹlu nkan ini wọn, ki awọn kan si ma fi imẹlẹ ati iwa ọlẹ jẹ igbadun laala wọn? Ko dara rara. Nitori naa, ijọ Ọlọrun ko lẹtọ lati fun ọmọ ijọ alapamaṣiṣẹ kankan ni owo iranwọ. (Wo: 2Kọrinnti 8:13-14; 2Tẹsalonika 3:6-15; 1Timoti 5:9-15)
Iranwọ ti o tọ si awọn arugbo ko gbọdọ lọ sọdọ awọn ọdọ: Nkan miran ti a tun fi lọlẹ fun wa ninu bibeli ni pe ko ki i ṣe gbogbo ọmọ ijọ naa ni o nilo iranwọ owo lati ọdọ ijọ. Yatọ si pe eniyan jẹ Kiristiẹni ti a le gba ẹri rẹ jẹ, niwọn igba ti o ba si jẹ ọdọ, ti o ṣi le ṣiṣẹ, ko yẹ ki a tun ma ran lọwọ bi arugbo. Eyi ko sọ wipe ki a ma ran lọwọ rara o, paapaa julọ ti ba wa ninu iṣoro. Amọ a gbọdọ ran lọwọ gẹgẹ bi ọdọ ni, ki i ṣe gẹgẹ bi arugbo ti ko ni ẹnikankan ti o le ran an lọwọ. Eyi si lo fa a ti Pọọlu ṣe sọ fun Timoti pe awọn opo ti ko ba i ti pe ọgọta ọdun ko yẹ ki o wa lori iwe awọn ti ijọ yoo ma fi owo ran lọwọ. Idi si nipe awọn wọnyi si le tun ọkọ ni, ki wọn si tun ma ṣiṣẹ lẹgbẹkan. Aijẹbẹ, a o kan ma ran awọn ọmọ ijọ wa lọwọ lati ya ọlẹ, atojubọle ati alainikannṣe ni. (Wo: 1Timoti 5:9-15)
Awọn ti o n gba iranwọ gbọdọ jẹ ẹni ko ni ẹbi ti o le ran wọn lọwọ: Yatọ si awọn ilana ti a ti mẹnuba nipa riran awọn ọmọ Ọlọrun lọwọ ninu ijọ, a tun gbọdo ri daju pe awọn ti a ba fẹ ran lọwọ jẹ awọn ti ko ni ẹbi tabi ara ti o gbagbọ tabi ti o ṣetan lati ran wọn lọwọ. Bi a ṣe fi ye wa ninu bibeli, awọn ti wọn ba ni ọmọ tabi ara ti o le ran wọn lọwọ ko nilo lati tun ma gba iranwọ ijọ Ọlọrun. O yẹ ki a jẹ ki awọn ọmọ wọn tabi ara wọn mọ ojuṣe wọn si wọn ni, ki wọn si maa ṣe e. Eyi tunmọ si pe awa ti a ba ni obi ninu ijọ ko yẹ ki a tun jẹ ki wọn di bukata ijọ. Nṣe ni o yẹ ki a ma mojuto wọn. Aijẹbẹ, asan ni igbagbọ wa ja si, a ko si san ju awọn alaigbagbọ lọ. Nitori naa, a gbọdọ kọ awọn ọmọ Ọlọrun lati ma ṣe jẹ ki awọn ara wọn ti o yẹ ki wọn maa tọju di bukata ijọ Ọlọrun. Idi si nipe eyi yoo fi aye silẹ fun ijọ lati ran awọn miran ti ko ni oluranlọwọ lọwọ. Amọ ti a ko ba jẹ ki eyi ye awọn ọmọ Ọlọrun, a o kan ri pe ijọ Ọlọrun bẹrẹ si ni ru ajaga ti ko yẹ ki o ru ni. Eyi yoo si ran ọpọ lọwọ lati ma gbe igbe aye ojukokoro ati ọkanjua. (Wo: 1Timoti 5:4-8&16)
Odiwọn iranwọ si ẹnikẹni gbọdọ wa lori oun ti ijọ ni dipo nkan ti ijọ ko ni: Ko si ẹnikẹni ti o le fun eniyan ni nkan ti ko ba ni. Idi si ni yi ti Ọlọrun fi jẹ ki o ye wa pe gbogbo fififunni wa gbọdọ da lori nkan ti a ni dipo nkan ti a ko ni (2Kọrinnti 8:12). Eyi wa jasi pe ti ijọ Ọlọrun ba fẹ ran ẹnikẹni lọwọ, iranwọ naa gbọdọ wa lori gbedeke nkan ti ijọ ni ni dipo eyi ti ko ni. Idi ni yi ti awọn ọmọ Ọlọrun ti o ba ni lọwọ daradara ṣe gbọdọ ma fi gbogbo igba fi owo tabi nkan iranwọ silẹ fun awọn ara wọn ninu ijọ. Ko ki i ṣe nkan ti o dara ni ki ijọ Ọlọrun ma jẹ gbese nitori pe wọn fẹ ran ọmọ ijọ kan lọwọ tabi nitori pe wọn ni awọn akanṣe iṣẹ kan. Ti a ba fẹ ki a ma ran awọn ọmọ ijọ wa lọwọ lọna ti o peye, nṣe ni ki awa naa bẹrẹ si ni ṣe awọn nkan ti yo jẹ ki o ṣeeṣe.

ỌRỌ IPARI
Riran awọn ọmọ Ọlọrun lọwọ nipa ti ara lati le da duro, ki wọn ma si ṣe wa ni ipo alaini ṣe pataki pupọ. Amọ ti a ko ba tẹle ilana bibeli lati ma ṣe eyi, ko si ni ki a ma kabamọ lori rẹ tabi ki a da rugudu silẹ ninu ijọ.

IBEERE

Bawo ni ẹkọ yi ṣe ṣe pataki to fun awọn ọmọ Ọlọrun?
Awọn nkan miran wo ni o le sọ pe a tun fi ẹsẹ wọn mulẹ ninu bibeli gẹgẹ bi ilana ti o yẹ ki a tẹle lati ran awọn ọmọ Ọlọrun lọwọ?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

AKỌRI: ILANA FUN IRANWỌ GBIGBA NINU IJỌ AYỌKA: 1Timoti 5:3-16 | Paito J.O. Lawal Read More »

Ma jẹ kan da ọ lẹbi | Paito J.O. Lawal

Leave a Comment

Ọjọ: Belu 21, 2021 | Atẹlera: Latori tabili Paitọ | Nọmba: Vol. 10, No. 29

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Belu 2021. Mo gbadura pe ki ọsẹ naa kun akunwọsilẹ pẹlu didara ati ojurere Ọlọrun fun ọ ati fun ile rẹ, ni orukọ Jesu. Amin.

Bi a ṣe n bẹrẹ ọsẹ tuntun yi, jẹ ki n ran ọ leti ọrọ Pọọlu, ti o sọ wipe, “Nitori naa, ẹ ma ṣe jẹ ki ẹnikẹni maa ṣe idajọ yin ni ti jijẹ, mimu, ọjọ ase, tabi oṣu tuntun, tabi ọjọ isinmi: Awọn ti i ṣe ojiji ohun ti o n bọ, ṣugbọn Kirisiti ni otitọ.” (Kolose 2:16-17) Ki ni koko ọrọ apọsiteli yi nibi yi? Oun naa ni pe a ko gbọdọ gba ki ẹnikẹni ṣe idajọ wa pẹlu ofin Mose.

Ki wa lo fa ti Pọọlu fi sọ eyi? Idi ni pe loorekoore ni a o ma pade awọn eniyan ti wọn yoo fẹ ṣe idajọ wa tabi da wa lẹbi pẹlu ofin yi. Bẹẹni, loorekoore ni a o ma ri awọn eniyan ti wọn yoo fẹ ma gbe odiwọn didangajia wa niwaju Ọlọrun lori bi a ṣe fi ara jin si ofin yi to, ti wọn o si sọ ominira wa ninu Kirisiti di radarada (Galatia 2:4-5). Mo ranti, fun apẹrẹ, bi ọkan lara awọn ọmọbirin kan ti o darapọ mọ awọn akọrin wa nigba ti a kọkọ bẹrẹ awọn ipade wa ṣe bẹrẹ si ni ṣaroye nitori awọn arabinrin wa kan ti wọn n wọ ṣokoto wa fun isin. Nigba ti mo si bere lati mọ idi ti o ṣe n ṣe eyi, o sọ wipe idi ni pe nkan ti wọn n ṣe ko wa ni ibamu pẹlu nkan ti bibeli sọ. Abala bibeli wo si ni o n tọka si? Daju saka, abala ti a ti ri ofin Mose ni.

O wa ṣe ni laanu pe arabinrin yi gan funrarẹ ma n wọ ṣokoto ti ko ba si ni awọn ipade ṣọọṣi. Nigba ti mo si bere lọwọ rẹ pe, “Ṣugbọn mo ti ri ọ ni igboro lọpọ igba pẹlu ṣokoto. Ki wa lo de ti ko fi buru ki iwọ wọ ṣokoto ti o ko ba si ni ipade ṣọọṣi, ti o wa ro pe o buru ki awọn miran wọ ọ wa si ipade ṣọọṣi?” Eyi ti yoosi fi fun mi ni idahun taara, nṣe ni o kan sọ pe, “Mo ṣa mọ pe ko tọ, gẹgẹ bi ọrọ bibeli, ki obirin ma wọ awọn nkan ti o jẹ ti ọkunrin.” Bi o si ṣe dẹkun lati ma wa si awọn ipade ṣọọṣi wa niyẹn patapata.

Wayi o, nkan ti o ṣe yi ko ni orukọ meji ju agabagebe lọ. Agabagebe ni ki eniyan gba pe nkankan ko dara, gẹgẹ bi ọrọ Ọlọrun ti wi, ki o si tun ma ṣe e, boya ni kọrọ tabi ni gbangba. Agabagebe si tun ni pẹlu ti eniyan ba n da awọn miran lẹbi fun ohun ti oun funrarẹ n ṣe. O tilẹ tun wa burujai ti eniyan ba tun wa n da alare ni ẹbi. Ọpọ awọn ọmọ Ọlọrun loni ni o si n da awọn ọmọ rẹ miran lẹbi. Ki si ni idi? Idi naa ni pe wọn ko kọbiara si otitọ inu iwe mimọ.

Fun apẹẹrẹ, gẹgẹ bi Pọọlu ti fi han wa ninu ẹṣẹ bibeli ti o wa ni oke yẹn, ọkan lara awọn otitọ ti a ko ki i kọbiara si ni pe Kirisitiẹni ko gbọdọ gba ki a da oun lẹbi lori nkan ti ofin Mose sọ. Ki si ni idi? Idi ni pe Ọlọrun ko fi igba kankan fun ni ofin yi. Dipo eyi, awọn ọmọ Isiraẹli ni a fun gẹgẹ bi ofin orilẹ-ede wọn nigba ti a ko wọn jade kuro ni Ijibiti. Ọlọrun si tun wa pa a ti sẹgbẹ kan nigba ti Jesu ti mu ohun ti o wa ninu rẹ ṣe, ti O si ti la ọna tuntun ati ọna iye lati sin in silẹ fun wa. (Wo: Ẹkisodu 24:12; Iṣe Apọsiteli 15:1-29; Heberu 8-10)

Njẹ gbogbo eleyi wa tunmọ si pe Kirisitiẹni ko le kọ nkankan nipa Ọlọrun lati ara ofin Mose bi? Rara! O le kọ ọpọlọpọ nkan lati ara rẹ. O ṣi yẹ ko tiraka de oju gongo lati kọ ohunkohun ti o ba le kọ lati ara rẹ. Amọ ṣa o, bi Pọọlu ṣe tẹsiwaju lati fi han wa, ojiji nkan ti Ọlọrun fẹ ki awọn eniyan rẹ mọ nipa rẹ ati nipa aye lasan ni ofin yi jẹ. Inu Kirisiti Jesu gangan ni otitọ wa. Eyi jasi pe ti o ba fẹ mọ otitọ nipa Ọlọrun ati nipa aye nitootọ, Jesu Kiristi Oluwa wa ni o gbọdọ gbajumọ. Oun ni ọna, otitọ ati iye. Ko si si ẹnikẹni ti o le wa si ọdọ Ọlọrun tabi mọ Ọlọrun tabi aye bikoṣe nipasẹ rẹ. (Wo: Johanu 14:4) Nitori naa, kiki otitọ ti a ba fihan nipa rẹ ninu iwe mimọ ni o yẹ ki a kọbiara si, ki a si tun gbajumọ. Lafikun, kiki otitọ ti a ba fihan ninu iwe mimọ nipa rẹ ni a gbọdọ ma lo gẹgẹ bi ipilẹ fun mimọ itunmọ awọn nkan miran ti a ba sọ ninu rẹ. Idi si ni pe otitọ ti a sọ nipa rẹ nikan ni o le sọ wa di ominira lati gbe igbe aye ti Ọlọrun fẹ ki a gbe.

Pẹlu gbogbo nkan ti a n sọ yi, o wa jasi pe a ko gbọdọ gba ki ẹnikẹni lo ogboju tabi ẹtan lati ti wa lati bẹrẹ si ni gbe igbe aye kankan ti ko wa ni ibamu pẹlu awọn nkan ti a fi han wa nipa Jesu Oluwa wa ninu Iwe mimọ. A ko si tun gbọdọ barajẹ tabi ba ọkan jẹ nitoripe inu awọn kan ko dun si wa nitoripe a kọ lati ma gbe aye wa ni ibamu pẹlu ofin Mose tabi awọn aṣa awọn eniyan kan ti o lodi si otitọ Jesu. Ṣugbọn o wa di dandan ki a banujẹ tabi ki a tilẹ gba fun awọn ti wọn fẹ fi ogboju tan wa kuro ninu otitọ Jesu pẹlu ẹsin tabi ifarajin eke, ti a ko ba mọ otitọ ti a kọ nipa rẹ ninu Iwe mimọ, ki a si tun tẹsiwaju ninu rẹ. Nitorina, mu gẹgẹ bi iṣẹ rẹ lati ma fi gbogbo igba kọ nipa otitọ ti a fi han nipa rẹ ninu Iwe mimọ, ki O si tun ma ṣe amulo rẹ. O ko si ni lugbadi asiṣe tabi aṣeju ẹnikẹni.

Ki o ni ọsẹ alarinrin.

Ma jẹ kan da ọ lẹbi | Paito J.O. Lawal Read More »

Jẹ alaṣepe |Pst. J.O. Lawal |Ọjọ: Belu 14, 2021 |Nọmba: Vol. 10, No. 28

Leave a Comment

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Kaabọ sinu ọsẹ miran ninu oṣu Belu 2021. Adura mi fun ọ si ni pe ki o ma fi gbogbo igba gba okun lati jẹ alaṣepe ohun rere gbogbo ti o ba dawọ le, ni orukọ Jesu. Amin.

Pẹlu awọn nkan ti a ri ninu bibeli nipa iṣesi Ọlọrun, ko ki i ṣe ẹnikan ti O ma n dawọ le nkan ti ko ni lọkan lati pari tabi ti ko ni agbara lati pari (Johanu 4:34; Filipi 1:6; Heberu 12:2). Nitorina, ti O ba bẹrẹ iṣẹ rere kankan ninu aye wa tabi fun aye wa, O didan ko pari rẹ, ti a ko ba da lọwọ duro pẹlu aigbagbọ tabi iṣiwawu. Fun apẹẹrẹ, ọpọ ninu awọn ọmọ Isiraẹli ti O ko jade lati Ijibiti ni ko wọ ilẹ Kenani. Ki lo si fa? Ṣe nitoripe ko le pari nkan ti O bẹrẹ ni? Rara o! Dipo bẹẹ, nitori aigbagbọ, aimoore ati oniruuru ifarahan agidi laarin wọn ni wọn ko ṣe wọ ilẹ naa. Nitorina, niwọn igba ti a ko ba ti ya alaigbagbọ tabi alaigbọran si Ọlọrun lẹnu, a le fi sọkan pe yoo pari ohun rere yowu ti O ba dawọ le ninu aye wa, pẹlupẹlu mimu wa lalaafia wọn inu ijọba ayeraye rẹ. (Wo: 1Kọrinnti 10:1-12; Heberu 3:19)

Wayi o, niwọn igba ti Ọlọrun Baba wa jẹ alaṣepe ohun gbogbo ti O ba dawọ rẹ le, awa na, gẹgẹ bi ọmọ rẹ, gbọdọ tọ ara wa lati ni aṣa ki a ma ṣe aṣepe ohun rere gbogbo ti a ba dawọ le tabi ti a ba fa le wa lọwọ. Ranti pe a sọ fun wa ninu bibeli pe ki a jẹ alawokọṣe Ọlọrun, gẹgẹ bi ọmọ rẹ ọwọn (Efesu 5:1). Nitorina, a gbọdọ gbaradi lati ṣe ohunkohun ti a ba fẹ ṣe, yala fun Ọlọrun ni, fun ara wa ni tabi fun awọn miran ni, pẹlu ọkan ti o ṣetan lati ṣe e ni aṣepe.

Ki si ni idi ti eyi fi ṣe pataki? Akọkọ, o ṣe pataki nitoripe ẹni ti o ba ṣe iṣẹ de opin nikan naa ni o le mu idi iṣe naa wa si imuṣẹ ni ẹkunrẹrẹ. Ẹni ti ko ba pari iṣẹ ti o n ṣe, yoo pa ere idi iṣe naa lara ni ọna kan tabi omiran. Fun apẹẹrẹ, ti Jesu Oluwa ko ba pari iṣẹ ti Ọlọrun ran wa si aye lati wa ṣe ni, njẹ igbala wa yoo ṣe e ṣe bi? Rara! Tabi ti agbaṣẹṣe ti o ẹ ki o ṣe ọna kan ba kọ lati pari iṣẹ naa, ṣe awọn ti ọna naa wa fun yoo jẹ igbadun rẹ rara tabi bi o ṣe yẹ ki wọn jẹ? Rara! Nitori eyi, ti a ko ba pari iṣẹ rere yowu ti a dawọ le, a yoo ba idi ti o ṣe yẹ ki iṣẹ naa jẹ ṣiṣe jẹ tabi ki a pa igbadun idi iṣẹ naa lara.

Ekeji, ẹni ti o ba pari iṣẹ ni o pa nkan elo ati akoko fun iṣẹ naa mọ. Ṣugbọn ẹni ti o bẹrẹ nkan, ti ko si pari rẹ kan fi akoko, okun, nkan elo fun iṣẹ naa ati aye rẹ ṣofo lasan ni. A si ri ọpọ ti o jẹ pe wọn kan ma n fi aye, nkan elo fun iṣe, akoko ati oore-ọfẹ ṣofo lasan ni. Idi si ni pe wọn ko ki i fi igba kankan pari iṣẹ rere yowu ti wọn ba dawọ le. Ti awa naa ba si da bi wọn, a jẹ pe nṣe ni awa naa n fi aye wa ati, o tun ṣe e ṣe, aye awọn miran ṣofo lori asan ni.

Idi kẹta ti o ṣe ṣe pataki ki a kọ aṣa ṣiṣe ni aṣepe ohun rere yowu ti a ba dawọ le tabi ti a ba fa le wa lọwọ lati ọwọ eniyan tabi Ọlọrun ni pe ẹni ti o ba pari iṣẹ ti a fun ni a tun le fọwọ ṣọya fun ni iṣẹ miran si. Ẹni ti o pa iṣẹ ti a fun ti tabi ti o ṣe e laabọ ti fi nkankan han nipa ara rẹ, eyi ti o tunmọ si pe ko ni amuyẹ alaṣepe. Iru ẹni yi, bi Oluwa si ṣe fi ye wa, ko yẹ fun iṣẹ iranṣẹ ninu ijọba Ọlọrun. Lotitọ, lẹkọọkan, awọn eniyan le foju fo aini amuyẹ yi lara rẹ, ki wọn si tun fun ni iṣẹ tuntun miran tabi awọn ojuṣe ti o pọ si. Ṣugbọn Ọlọrun ko ni foju fo alebu yi titi ẹni naa yoo fi tọ ara rẹ lati jẹ alaṣepe ohunkokun ti o ba dawọ le (Luuku 6:62).

Idi miran ti o ṣe tun ṣe ṣe pataki ni pe ẹni ti o ba ṣe ni aṣepe iṣẹ rere ti o dawọ le nikan naa ni yoo gba ere ati oriyin lọdọ Ọlọrun ati pẹlupẹlu lọdọ awọn eniyan. Ẹni ti o ba pa iṣẹ ti a fun ti fun idi kan tabi omiran, bi idi naa ṣe le jọ bi ẹni ti o mọgbọn wa to, ko ni gba ere tabi oriyin ti o tọ si alaṣepe iṣẹ. Lotitọ, lẹkọọkan, iru ẹni bẹ le gba ọrọ iwuri lọdọ awọn eniyan fun bi o ṣe gbiyanju. Ṣugbọn Ọlọrun ko ki i fun awọn eniyan ni oriyin nitoripe wọn gbiyanju lati ṣe iṣẹ ti O gbe le wọn lọwọ. Dipo eyi, nṣe ni O ma n fun wọn ni oriyin nitoripe wọn ṣe iṣẹ rẹ laṣepe. Nitorina, ti a ba fẹ ma fi gbogbo igba gba oriyin Ọlọrun lori awọn nkan ti O ba fa le wa lọwọ, a gbọdọ kọ bi a ṣe n pari iṣẹ ti a ba fun wa, ti a ko si ni pa a ti (Ẹkisodu 40:33-34; 1Awọn Ọba 7:51-8:11).

Bawo wa ni a ṣe le tọ ara wa lati jẹ alaṣepe iṣẹ? Akọkọ, a gbọdọ kọ lati ma ṣe fi ara wa jin fun iṣẹkiṣẹ (boya ti Ọlọrun ni o tabi ti eniyan ni) ti a ko ba lero lati ri pe a pari rẹ. Ekeji, a gbọdọ ma fi gbogbo igba farabalẹ ṣe iṣiro nkan ti ohun yowu ti a ba fẹ ṣe yoo na wa ki a to gba lati dawọ le tabi ki a to dawọ le (Luuku 14:28-32). Eyi tunmọ si pe a gbọdọ mọ bi a ṣe to, ki a si gba bi a ṣe to. A gbọdọ mọ nkan ti ipa wa ati nkan ini wa ka ati eyi ti wọn ko ka. Aijẹbẹ, ọpọ igba ni a o ma ri pe a n dawọ le awọn nkan ti a ko ni ipa tabi ipinnu ọkan lati ṣe ni aṣepe. Ki Ẹmi Ọlọrun wa fun ọkan wa ni okun lati mu awọn nkan wọnyi ni pataki, ki a ba dẹkun ati ma fi aye wa ṣofo lori awọn nkan ti ko ni fun wa ni oriyin lati ọdọ Ọlọrun tabi ṣe anfaani fun ọmọniyan.

Ki o ni ọṣẹ ti o ga.

Jẹ alaṣepe |Pst. J.O. Lawal |Ọjọ: Belu 14, 2021 |Nọmba: Vol. 10, No. 28 Read More »

Fi ara rẹ si ipo iwulo | Pst. J.O. Lawal

Leave a Comment

Belu 07, 2021 | Nọmba: Vol. 10, No. 27

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ keji ninu oṣu Belu 2021. Mo si wa gbadura pe ki Ọlọrun ro ọ ni agbara lati pọ si ni iwulo ati ilere-lori ninu ijọba rẹ ninu ọsẹ naa ati ni gbogbo eyi ti o ku ni ọjọ aye rẹ, ni orukọ Jesu. Amin.

Wayi o, mo gba adura yi fun ọ nitori pe iwulo awọn eniyan mu ọmu laya Ọlọrun gidigidi. Idi si ni yi ti O ṣe ti bukun ẹnikọọkan ti o wa laye lara wọn pẹlu amuyẹ kan tabi omiran lati jẹ ki wọn le wulo fun ara wọn ati fun awọn yoku ti o wa ni aye. Idi naa si tun ni yi ti O fi bukun ọmọ rẹ kọọkan pẹlu okereju ẹbun ẹmi kan lati jẹ ki wọn wulo, ki wọn si lere lori ninu ijọba rẹ. Nitorina, ti a ko ba wulo ninu ijọba rẹ, paapaa julọ laarin awọn ti a jọ wa ninu ijọ kaa naa, ko ni jẹ nitori pe a ko le wulo ni; dipo bẹẹ, yoo jẹ nitori pe a kọ lati wulo ni.

Bẹẹni, ko si ni ki idi ma wa ti a ko fi ni wulo fun Ọlọrun ati fun awọn eniyan rẹ. O le jẹ ẹru, ọrọ aye wa, anikanjọpọn tabi imẹlẹ. Ṣugbọn bi Oluwa ti ṣe tọka si fun wa, awọn ti o ba fi ara wọn si ipo iwulo pẹlu ẹbun ti Ọlọrun fun wọn nikan naa ni yoo jẹ ki wọn di pataki si ninu aye yi ati ninu ijọba rẹ. Ko si wa si nkan miran tii awọn ti o kọ lati wulo fun le reti ninu aye wọn ju adinku ninu pataki wọn, ilọsiwaju wọn ati awọn ohun rere miran laye yi. (Wo: Luuku 19:12-27)

Nitorina, ti o ko ba fẹ adinku pataki rẹ ninu ijọba Ọlọrun ati ninu awọn nkan ti aye miran, bẹrẹ si ni fi ara rẹ si ipo iwulo pẹlu awọn ẹbun ẹmi rẹ, ẹbun ti ara ti o ni, amuyẹ rẹ, imọ ijinlẹ rẹ ati nkan ini rẹ. O ṣi le bẹrẹ ni kiakia lati arin wa. Nkan akọkọ ti o si nilo lati ṣe eyi naa ni ki o kọkọ ronu nipa bi o ṣe le lo awọn ibukun Ọlọrun ninu aye rẹ lati ran igbagbọ ẹnikọọkan wa lọwọ, ki o si bẹrẹ si ni lo awọn Ibukun naa lati ṣe bẹẹ pẹlu ẹmi itẹriba.

Fun apẹẹrẹ, wo nkan ti a sọ nipa Apolo, lẹyin igba ti a ti fi ọna Oluwa han ni ọna ti o peye: “Nigba ti o si n fẹ kọja lọ si Akaya, awọn arakunrin gba a ni iyanju, wọn si kọwe si awọn ọmọ ẹyin ki wọn ki o gba a: nigba ti o si de, o ran awọn ti o gbagbọ nipa oore-ọfẹ lọwọ pupọ.” (Iṣe Apọsiteli 18:27) Njẹ o ri bayi? Ni kese ti Apolo de si aarin awọn ara Kọrinnti naa ni o ti bẹrẹ si ni ṣe awọn nkan ti o ran igbagbọ wọn lọwọ ni ọna ti o ga.

Iwọ wa n kọ o? Ki ni iwọ naa n ṣe lọwọlọwọ yi lati ran igbagbọ awọn miran ninu ijọ yi lọwọ? Ki ni o n ṣe lati ri pe wọn fi ara wọn jin fun Ọlọrun ati igbe aye ododo siwaju ati siwaju si? Ti ko ba si nkankan ti o n ṣe lati ran idagbasoke igbagbọ wa lọwọ, a jẹ pe o n kuna niyẹn. Ki a si sọ otitọ, o ko yatọ si ẹnikẹni ti o le ma ṣiṣẹ lati pa igbagbọ wa run. Bẹẹ ṣi ni a ri awọn eniyan kaakiri awọn ijọ Ọlọrun loni ti wọn n pa igbagbọ awọn ara wọn run tabi fi idibajẹ ba a dipo ki wọn ma ran an lọwọ. Iru awọn ẹni bẹẹ ko wa ni lọ lai jẹ iya ẹṣẹ wọn, bi a ti ṣe ri ninu iwe mimọ, gẹgẹ bi iwọ naa ti o ko ṣe nkankan lati ran igbagbọ awọn ara rẹ lọwọ ko ṣe ni lọ lai jẹ iya. (Wo: 1Timoti 1:18-20)

Nitori naa, ji kuro loju orun rẹ, ki o si bẹrẹ si ni fi ara rẹ si ipo iwulo fun Ọlọrun ati fun awọn eniyan rẹ. Ẹnu yoo si wa ya ọ lati ri bi aye rẹ yoo ṣe bẹrẹ si ni pọ si ni pataki laarin awọn ọmọ Ọlọrun ati laarin awọn ti aye yi.

Ki o ni ọṣẹ alarinrin.

Fi ara rẹ si ipo iwulo | Pst. J.O. Lawal Read More »

Titun yin kọ lẹẹkan si | Paitọ J.O. Lawal

Leave a Comment

Ọjọ: Owara 31, 2021 | Atẹlera: Latori tabili Paitọ | Nọmba: Vol. 10, No. 26

Olufẹ: ki oore-ọfẹ ati aanu jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ miran ninu ọdun yi. Mo si tun gbadura pe ki ayọ ati alaafia Ẹmi Ọlọrun kun ọkan ati ile rẹ ni gbogbo ọsẹ naa, ni orukọ Jesu. Amin.

Ni igba kan ri, mo gbọ ti oniwaasu kan n sọrọ lori bi igbimọ alagba ijọ kan ṣe kọ lẹta ni akoko kan si olu-ile iṣakoso ijọ wọn pe ki wọn tiransifa paitọ wọn kuro lọdọ wọn. Idi ti wọn si ṣe ṣe eyi ni pe paitọ naa ko ni iwaasu miran lati igba ti o ti de ọdọ wọn ju ‘ronupiwada, ki a si gba ọ la’ lọ. Nigba ti wọn si ni ki paitọ yi ṣalaye ara rẹ, o sọ wipe ko ki i kuku ṣe pe ohun ko ni nkan miran lati waasu le lori si awọn ara yi bi ko ṣe pe wọn ko i ti fi igba kankan ṣiṣẹ lori nkan ẹyọkan ṣoṣo ti oun ti n fi i waasu si wọn. “Ki wa ni idi,” gẹgẹ bi o tun ṣe sọ siwaju, “ti o fi yẹ ki oun kọ wọn ni awọn nkan tuntun miran, nigba ti wọn kọ lati ṣe amulo nkan ẹyọkan ṣoṣo ti oun ti n kọ wọn?”

Ki wa ni koko ọrọ yi? Oun naa ni pe laijẹpe awọn ọmọ Ọlọrun bẹrẹ si ni fi ori pipe ṣe amulo awọn nkan ti wọn n kọ wọn, awọn oniwaasu ti wọn ba mọ nkan ti wọn n ṣe ko ni dẹkun ati ma tun wọn kọ. Idi si ni yi ti Pọọlu ṣe sọ fun awọn ara Filipi pe, “Ni akotan, ara, ẹ maa yọ ninu Oluwa. Ki i sii ṣe inira fun mi lati kọwe ohun kan naa si yin, ṣugbọn eyi jẹ ohun ti o dara fun yin.” (Filipi 3:1) Njẹ o ri bayi? Pọọlu ko ri gẹgẹ bi inira rara lati ṣe agbeyẹwo awọn nkan ti o ti kọ awọn ara yi tẹlẹ lẹkaansi. Ki si ni idi? Idi ni pe ṣiṣe bẹẹ yoo ran wọn lọwọ lati duro ṣinṣin ninu ifẹ Ọlọrun.

Wayi o, mo mọ pe o ma n saba bi ọpọ wa ninu ti awọn paito wa ba n ran wa leti tabi tun wa kọ ni awọn nkan ti a ti mọ tẹlẹtẹlẹ. Ṣugbọn a tun gbọdọ jẹ ki o ye wa pe ti a ba n ṣiṣẹ lọna ti o tọ pẹlu awọn nkan ti a mọ gẹgẹ bi otitọ Ọlọrun si wa, a ko ni nilo ẹnikẹni lati ran wa leti tabi tun wa kọ lati ṣe bẹẹ. Igba ti a ba n ṣe bi ẹni ti oye nkan ti wọn kọ wa ko ye tabi bi alakọgbagbe tabi bi alagidi akẹkọ ni o jẹ didan ki a tun wa kọ tabi ran wa leti nkan ti a ti kọ sẹyin.

Fun apẹẹrẹ, mo woye pe bi o tilẹ jẹ wipe ẹkọ lori ki a ma mọ riri awọn paitọ wa ati awọn adari ijọ wa miran bi ti wọn, awọn ti wọn n bọ wa loorekoore pẹlu ọrọ Ọlọrun ati ti wọn n mojuto wa nipa agbara Ọlọrun, ni a ti fi ọpọlọpọ igba kọ ọpọ ọmọ Ọlọrun, perete lara wọn ni o mu ni ọkunkundun. Nkan ti mo n sọ ni pe ọpọ ninu awọn ijọ wa ni o jẹ pe diẹ lara awọn ti o wa nibẹ ni o ma n ṣaba mọọmọ pinnu lọkan wọn lati mọ riri awọn adari wọn, ki i si ṣe pẹlu ọrọ ẹnu lasan ṣugbọn pẹlu awọn nkan ini wọn pẹlu. (Wo: Luuku 10:1-8; 1Kọrinnti 9:14; Galatia 6:6)

Yoo tilẹ ya ọ lẹnu pe pupọ ninu awọn ọmọ Ọlọrun ni ko i ti fi igba kankan ri mọọmọ lọ ba awọn paitọ wọn lati sọ fun pe, “Ẹ ma ṣeun sa fun iṣẹ rere ti ẹ n ṣe,” tabi ṣe nkankan fun wọn ti yoo mu inu wọn dun. Ṣugbọn ti awọn ara kan naa yi ba gbọ pe awọn adari ijọ wọnyi ṣe aṣemaṣe kan ti o ni i ṣe pẹlu agbere tabi ikowojẹ, wọn ko ni lọra rara lati tan iroyin ibi naa kalẹ tabi lati lo ohunkohun ti o ba wa ni ikawọ wọn lati ba aye awọn adari naa jẹ. Ko wa jẹ iyalẹnu, ẹwẹ, pe adura ati iṣure awọn oniwaasu yi ko le duro lori awọn ọmọ ijọ wọnyi lati ṣiṣẹ fun wọn.

Njẹ o tilẹ ro nitootọ pe gbogbo ọrọ adura tabi ire ti a ba su fun awọn eniyan naa ni o le ba le wọn lori tabi ṣiṣẹ ni rere fun wọn? Rara o! Jesu ti fi igba kan ri sọ eyi fun awọn apọsiteli rẹ: “Ni ilekile ti ẹyin ba wọ, ki ẹ kọ wi pe, Alaafia fun ile yii. Bi ọmọ alaafia ba si wa nibẹ, alaafia yin yoo ba le e: ṣugbọn bi ko ba si, yoo tun pada sọdọ yin. Ni ile kan naa ni ki ẹyin ki o si gbe, ki ẹ maa jẹ, ki ẹ si maa mu ohunkohun ti wọn ba fi fun yin; nitori owo iṣẹ alagbaṣe tọ si i. Ẹ ma ṣe ṣi lati ile de ile.” (Luuku 10:5-7) Ṣe iwọ naa ri bayi? Ọrọ iṣure le pada sọdọ ẹni ti o sọ, ti ẹni ti o sọ ọ si ko ba tẹwọgba bi o ṣe yẹ. Nitorina, bi paitọ rẹ ba tilẹ n fi gbogbo igba gbadura fun ọ lati ṣorire ati lati ṣe aṣeyọri ni aye yi, niwọn igba ti o ko ba ba a lopọ gẹgẹ bi Ọlọrun ṣe fẹ ki o ṣe, adura ibukun rẹ le ma duro sori aye rẹ, ki o si ṣiṣẹ fun ọ bi o ṣe tọ ati bi o ṣe yẹ.

O wa ṣenu laanu pe ọpọ ọmọ Ọlọrun ni oye ko ye pe idi ti aye wọn ko fi gbooro si labẹ awọn paitọ ni ọpọ igba kọ ni pe nkan n ṣe awọn paitọ naa ninu ẹmi. Dipo eyi, idi ni pe wọn ko ba wọn lopọ bi Ọlọrun ṣe fẹ ki wọn ma ṣe. Ti wọn ba si ronupiwada kuro ninu aigbọran wọn yi, ti wọn si dẹkun lati ma ko awọn nkan ti o yẹ ki wọn fi ran awọn paitọ wọn lọwọ lọ si awọn ori-oke kan, wọn yoo bẹrẹ si ni ri pe awọn tilẹ le ṣe rere daradara labẹ iṣẹ iranṣẹ ojoojumọ awọn paitọ naa ju bi wọn ti le ṣe lọ labẹ iṣẹ-iranṣẹ ẹkọọkan awọn ẹni amin ororo wolii ti wọn fẹ titori wọn ku. Njẹ wọn yoo wa ronupiwada bi? (Wo: Matiu 10:40-42)

Ka ma fọrọgun, koko nkan ti mo n sọ lati atẹyinwa naa ni pe ti paitọ rẹ ba nilo lati tun ọ kọ ni awọn ẹkọ bibeli kan lẹkaansi, iyẹn ko tunmọ si pe ko ni nkan miran ti o le kọ ọ; dipo eyi, o le jẹ wipe nitoripe o ko i ti ma ṣe amulo nkan ti o ti kọ bi o ti tọ ni. Ti o ko ba si ma ṣe amulo ti o peye awọn nkan ti a ti kọ ọ daradara, o le jẹ wipe awọn nkan naa ko i ti ye ọ to ni tabi ki o jẹ alakọgbagbe tabi ki o jẹ alagidi kan. Ko wa si eyi ti o bojumu ninu awọn nkan wọnyi. Nitori naa, dẹkun jijẹ ẹni ti o lọra lati kẹkọ, alakọgbagbe tabi alagidi, ki o si bẹrẹ si ni mu awọn nkan ti a n kọ ọ ni ọkunkundun. Nipa ṣiṣe eyi, iwọ naa yoo le fi awọn ẹkọ ipilẹ ti igbagbọ Kirisitiẹni silẹ, ki o si di ẹni ti o to oju bọ ninu ẹmi (Heberu 5:11-6:3).

Ki o ni ọsẹ ti o ga.

Titun yin kọ lẹẹkan si | Paitọ J.O. Lawal Read More »

Iranṣẹ gbogbo eniyan | Paito J.O. Lawal

Leave a Comment

Ọjọ: Owara 24, 2021 | Atẹlera: Latori tabili Paitọ | Nọmba: Vol. 10, No. 25

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ ti o kẹyin oṣu Ọwara 2021. Adura mi si pe ki o lo eyi ti o ku ninu ọdun yi ninu ẹkunrẹrẹ ayọ Ẹmi, ni orukọ Jesu. Amin.

Bi a ṣe n bẹrẹ ọsẹ yi, jẹ ki n ran ọ leti ọrọ Jesu Oluwa wa ti o sọ wi pe, “…Bi ẹnikẹni ba n fẹ ṣe ẹni iwaju, oun naa ni yoo ṣe ẹni ikẹyin gbogbo wọn, ati iranṣẹ gbogbo wọn.” (Maaku 9:35) Pẹlu nkan ti Oluwa sọ nibiyi, kedere ni a ri pe Ọlọrun ko lodi si ki awọn ọmọ rẹ di asiwaju tabi ẹni akọkọ ninu aye yi. Bi a tilẹ ṣe ri, lara awọn nkan ti o ṣeleri lati ṣe fun awọn ọmọ Isiraẹli, ti wọn ba pa aṣẹ rẹ mọ, ni lati sọ wọn di ori dipo iru ni aarin awọn orilẹ-ede aye gbogbo (Ditaronomi 28:13). Nitorina, ko lodi si erongba rẹ ki iwọ ati emi jẹ ori dipo iru nibikibi ti a ba ti ba ara wa ninu aye yi.

Amọ ọna wo wa ni a le gba jẹ irufẹ ori ti Ọlọrun fẹ ki a jẹ, ti ko si ni mọ ni aye yi nikan sugbọn ti yoo tun jẹ bẹẹ gẹgẹ ninu ijọba ayeraye rẹ pẹlu? Bawo ni a ṣe le di ipo pataki mu ninu eto rẹ fun ohun gbogbo? Oun naa ni Oluwa n ba wa sọrọ le lori ninu ẹsẹ bibeli yẹn. O si sọ wipe nipa jijẹ iranṣẹ gbogbo eniyan ni.

Ki wa ni o tunmọ si lati jẹ iranṣẹ fun gbogbo eniyan? Ṣe o wa ja si pe ki a di ọmọ ti gbogbo eniyan a ma pe ran niṣẹ ni bi? A bi ṣe o wa jasi pe ki a di akitan fun gbogbo eniyan, ki a di ẹni ti ẹnikẹni le ṣe baṣabaṣa bi o ba ṣe wu wọn? Rara o! Ki wa ni o tunmọ si?

Ni kukuru, a le mọ nkan ti o tunmọ si nipa wiwo bi Jesu Oluwa wa ṣe ṣe nigba ti o wa laye yi. Ranti pe O sọ wipe Oun ko wa sinu aye ki wọn ba le sin Oun ṣugbọn ki Oun ba le sin awọn eniyan, ki Oun si fi ẹmi Oun silẹ fun irapada ọpọ (Maaku 10:45). Bawo wa ni O si ṣe sin awọn eniyan? Ṣe nipa dida ọmọ ti gbogbo wọn n pe ran niṣẹ ni tabi dida ẹni ti wọn kan le ṣe bi o ba ṣe wu wọn si ni? Rara o! Dipo eyi, o sin wọn nipa lilọ lati ibikan si ibikan lati ṣe awọn nkan ti yoo mu ki ifẹ Ọlọrun wa si imuṣẹ ninu aye wọn.

Lotitọ, awọn akoko kan wa ti awọn eniyan bu u, ti wọn si tun gan an nitori awọn nkan ti O sọ nipa ibaṣepọ rẹ pẹlu Ọlọrun. Ki a tilẹ sọ otitọ, wọn papa wuwa aidara si, ti wọn si tun pa a nitori ti o pe ara rẹ ni Ọmọ Ọlọrun. Ṣugbọn ni gbogbo akoko ti O fi ṣe iṣẹ iranṣẹ rẹ laarin awọn eniyan rẹ, gbogbo wọn pata ni o bọwọ fun ati awọn ọta rẹ gan paapaa.

Nitori naa, jijẹ iranṣẹ gbogbo eniyan ko tunmọ si pe ki a sọ ara wa di ẹni ti ko naani ara rẹ ati ti awọn eniyan le ṣe bi o ba ṣe wu wọn si. Dipo eyi, o tunmọ si pe ki a gbe aye wa ni ọna ti o jẹ wipe awọn nkan ti a ba ṣe tabi sọ yoo mu ete Ọlọrun wa si imuṣẹ ninu aye awọn ti o wa ni ayika wa ati awọn ti a n ba ṣepọ, lọna kan tabi omiran. Ti o ba si jẹ pe bi eyi ni a ṣe n ṣe, ko wa ni ja mọ nkankan ni oju wa lati ṣiṣẹ ẹru tabi ti ọmọ aperannisẹ, niwọn igba ti yoo ba yọri si imuṣẹ ete Ọlọrun ninu aye awọn ẹlomiran.

Igba kan wa, fun apẹẹrẹ, ti Jesu Oluwa wa fọ ẹsẹ awọn apọsiteli rẹ, nkan ti o jẹ iṣẹ fun awọn ẹru. O ṣe eyi lati fi han wọn pe oye tabi ipo lasan kọ ni o ma n sọ eniyan di giga bikoṣe igbaradi rẹ lati ṣe ohunkokun ti o ba tọ fun lati ṣe lati sin awọn ti o wa ni abẹ akoso rẹ, bi o tilẹ ni i ṣe pẹlu fifọ ẹsẹ wọn. Ṣe eyi wa jẹ ki awọn apọsiteli yi ri fin? Rara! Dipo bẹẹ, o jẹ ki wọn bọwọ fun gidigidi si ni. Yatọ si eyi, o tun jẹ apẹẹrẹ fun wọn lori nkan ti O ti n kọ wọn tẹlẹ pe ẹnikẹni ti o ba fẹ di ẹni akọkọ tabi ẹni giga ninu ijọba Baba rẹ gbọdọ ṣetan lati sin awọn miran ni ọnakọna ti yoo mu ki ifẹ Ọlọrun wa si imuṣẹ ninu aye wọn. (Wo: Johanu 13:1-17)

Ti awa naa, ẹwẹ, ba fẹ di ipo ti o ga ninu ijọba Ọlọrun Baba wa mu, a gbọdọ ṣetan lati sin awọn ara wa ati awọn ti o wa ninu aye yi pẹlu wa ni ọnakọna ti ifẹ Ọlọrun yoo fi wa si imuṣẹ ninu aye wọn. Ṣugbọn ṣe a o rẹ ara wa silẹ lati ṣe eyi bi abi nṣe ni a o tunbọ ma ro pe a to nkan ti a ko to? Adura mi ni pe ki a ṣe ọkan wa ni rirẹ silẹ lati sin gbogbo awọn ti Ọlọrun fẹ ki a si ni ọna ti yoo yọri si igbega wa ninu ijọba ayeraye rẹ. Amin.

Ki o ni ọsẹ alarinrin.

Iranṣẹ gbogbo eniyan | Paito J.O. Lawal Read More »

Ọlọrun n ṣiṣẹ ninu rẹ | Paito J.O. Lawal

Leave a Comment

Ọjọ: Owara 17, 2021 | Nọmba: Vol. 10, No. 24

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Olurapada wa. Inu mi dun lati ki ọ kaabọ sinu ọsẹ tuntun yi. Adura mi si nipe ki a ṣe ni aṣepe ohun gbogbo ti o ni i ṣe pẹlu aye rẹ ni kiakia, ki aye rẹ ba le wa ni ibi ti Ọlọrun fẹ ki o wa, ni orukọ Jesu. Amin.

Wayi o, o dami loju saka pe bi nkan yoo ṣe ri gẹlẹ fun ọ niyi nitori pe ẹni ti o n ṣiṣẹ ninu rẹ jẹ Ọlọrun funrarẹ. Pọọlu, nigba ti o n ba awọn Kirisitian ilu Filipi sọrọ lori pataki ki wọn mu ọrọ igbala wọn ni ọkunkundun, ran wọn leti wipe wọn le ṣe eyi nitori pe Ọlọrun n ṣiṣẹ ninu wọn lati fẹ ati lati ṣiṣẹ ni ibamu pẹlu ete rere rẹ fun wọn (Filipi 2:12-13). Iwọ naa ro wo. Igbala awọn ara yi ko ki i ṣe bukata wọn nikan bi ko ṣe ti Ọlọrun naa pẹlu. Lotitọ, awọn nkankan wa ti o yẹ ki awọn naa maa ṣe lati le ni ẹkunrẹrẹ iriri igbala ti Jesu ti ra fun wọn. Ṣugbọn awọn nikan kọ ni yoo ma ṣe awọn nkan wọnyi. Wọn ko tilẹ nikan le da awọn nkan wọn yi, ohun yowu ti wọn jẹ, ṣẹ. Ẹni ti yoo jẹ ki wọn le ṣe wọn ni Ọlọrun. Pọọlu si wa fi da wọn loju pe o didan ki Ọlọrun ri pe iṣẹ naa jẹ ṣiṣe. Njẹ eyi ko wa dara pupọ lati mọ bi? O dara.

Ni ọna kaana, nitori pe awọn naa ti di ọmọ Ọlọrun nipasẹ Jesu Kirisiti, O ti bẹrẹ si ni ṣiṣẹ ninu aye wa. Ki o too di pe a di ọmọ rẹ, Eṣu ni o n ṣiṣẹ ninu aye wa, ti o si n ṣe wọn radarada ni oniruuru ọna. Idi niyi ti bibeli ṣe pe ni ẹmi ti o n ṣiṣẹ ninu awọn alaigbọran si Ọlọrun (Efesu 2:2). Ṣugbọn nibayi ti a ti di ọmọ Ọlọrun, O ti wa lati gbe ninu wa ati lati gba akoso aye wa. Bẹẹni, O ti wa lati gbe ninu wa lati ṣiṣẹ. Iru iṣẹ wo si ni O wa gbe inu wa ṣe? Ohun gbogbo ti o wa ni ibamu pẹlu ete rẹ ni rere fun wa!

Nitorina, wiwa si imuṣẹ ete Ọlọrun ni rere fun wa ko da lori akitiyan wa nikan; o tun ni i ṣe pẹlu akitiyan rẹ pẹlu. Idi si niyi ti a fi le mọ daju pe aye wa yoo pada da nkan ti o yẹ ki wọn da naa ni, bi o ti wu ki ibi ti a wa lọwọlọwọ yi ri. Njẹ eyi ye ọ bi? Ọlọrun le sọ aye wa da nkan ti o yẹ ki o da, lalai fi ti ibi ti O ti ri aye naa he ṣe. Nitorina, Pọọlu sọ fun awọn ara Filipi pe, “Ohun kan yii ṣaa da mi loju pe, Ọlọrun ẹni ti o ti bẹrẹ iṣẹ rere ninu yin, yoo ṣe aṣepe rẹ titi di ọjọ naa ti Jesu Kirisiti yoo de.” (Filipi 1:6) Dafidi naa tun sọ wipe, “Oluwa yoo ṣe oun ti i ṣe ti emi ni aṣepe…” (Saamu 138:8)

Njẹ o ri bayi? A le fọkan tan Ọlọrun lati pari nkan ti O bẹrẹ ninu wa. Bẹẹni, a le fi ọkan tan lati ṣe laṣepe ete rẹ rere si wa. A kan nilo lati fọwọsowọpọ pẹlu rẹ ni gbogbo ọna ni. Oun yoo fi sinu ọkan wa gbogbo erongba ti o wa ni ibamu pẹlu ete rẹ fun wa, yoo si tun pese ohun gbogbo ti a nilo lati mu awọn erongba naa wa si imuṣẹ. Ṣugbọn a nilo lati fẹran ara ti O fẹ fi aye wa da, ki a si tun ṣetan lati gbe igbese yowu ti O ba fẹ ki a gbe lati jẹ ki eyi wa si imuṣẹ (Isaiah 1:19).

Njẹ a wa nifẹ si nkan ti Ọlọrun fẹ ṣe pẹlu aye wa bi? Ṣe a si tun ṣetan lati jẹ ohun gbogbo ti O n ṣiṣẹ ninu wa lati jẹ? Ti o ba jẹ bẹ, a o mu ọrọ rẹ ni ọkunkundun. A o ma ka ọrọ rẹ, gbe yẹwo ati ṣe aṣaro ninu rẹ, ki a ba le ṣe gẹgẹ bi o ti wi (Jọshua 1:8). Siwaju si, a ko ni jẹ agberaga, alagidi tabi ẹniti ara rẹ kọ ibawi nigbakigba ti O ba n ba wa wi. Dipo eyi, a o tẹwọgba ibawi rẹ pẹlu ifẹ ati ọwọ, niwọn igba ti a mọ pe, gẹgẹ bi Baba wa ti o jẹ, nkan ti o dara julọ fun wa ni O ni lọkan ati pe ibawikibawi ti O ba fun wa ninu ifẹ ni o ti jẹyọ (Heberu 12:5-13).

Kini idi ti pupo-julọ ninu awọn ọmọ Isiraẹli ti Mose mu jade lati Ijibiti ko ṣe de ilẹ ileri, pẹlu ohun gbogbo ti Ọlọrun ṣe fun wọn ati ni aarin wọn? Idi akọkọ ni pe wọn ko mu ọrọ Ọlọrun ni ọkunkundun. Idi keji ni pe wọn kọ lati gba ibawi rẹ. Ti awa naa ko ba wa fẹ ki iṣẹ rẹ ti O n ṣe ninu aye wa ja si pabo, a ko gbọdọ ri bi ti wọn. Dipo eyi, a gbọdọ tọ ara wa lati mu ọrọ rẹ ati ibawi rẹ ni ọkunkundun. Adura mi si pe ki ọkan rẹ gba okun lati ṣe bẹẹ gẹgẹ, ni orukọ Jesu. Amin.

Ki o ni ọsẹ ologo.

Ọlọrun n ṣiṣẹ ninu rẹ | Paito J.O. Lawal Read More »

Tan iroyin naa ka | Paitọ J.O. Lawal

Leave a Comment

Ọjọ: Owara 10, 2021 | Atẹlera: Latori tabili Paitọ | Nọmba: Vol. 10, No. 23

Olufẹ: ki oore-ọfẹ, aanu ati alaafia di pipọsi fun lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Ọwara 2021. Njẹ ki iro ayọ ati iṣẹgun gba ẹnu rẹ kan ninu ọsẹ naa ati ni gbogbo eyi ti o ku ninu ọdun yi, ni orukọ Jesu. Amin.

Mo fẹ ran ọ leti, bi a ṣe n bẹrẹ ọṣẹ tuntun yi, pe ajigbese ni ọ si Ọlọrun lati tan ihinrere ọrọ rẹ ti o n yi ọ pada, ti o si n gbe ọ soke nipasẹ ijọ yi. Ki ni idi ti Oluwa ṣe n fi gbogbo igba ni ọpọ eniyan ti o n tọ ọ wa lati gbọ ihinrere ati lati gba iwosan? Idi ni pe awọn ti ọrọ rẹ n yi aye wọn pada n tan iroyin nipa rẹ ati awọn nkan ti o n ṣe kalẹ.

Fun apẹrẹ, Maaku sọ eyi nipa iha ti awọn ti o ni anfaani lati gbọ ọrọ rẹ ati lati ri iṣẹ iyanu rẹ kọ si i: “Ẹnu si ya gbogbo wọn, to bẹẹ ti wọn fi n bi ara wọn leere, wi pe, Kin ni eyi? ẹkọ titun ni eyi? nitori ti o fi agbara paṣẹ fun awọn ẹmi aimọ, wọn si gbọ tirẹ. Lojukan naa okiki rẹ si kan yi gbogbo ẹkun Galili ka.” (Maaku 1:27-28) Iwọ na wo bayẹn. Awọn ti o ti ara iṣẹ iranṣẹ Jesu di alabakunfun ni wọn ṣiṣẹ fun iponlogo iṣẹ iranṣẹ naa. Nitorina, Oluwa ko nilo lati tẹ atẹjade, lẹ iwe pelebe kaakiri tabi ṣe ifilọ lori redio, tẹlifiṣan tabi ẹrọ ayelukara ki awọn eniyan to mọ ọn tabi mọ iṣẹ iranṣẹ rẹ.

Ni bakan naa, bi ko tilẹ si nkan ti o buru nipa rẹ, awa naa ko nilo lati tẹ atẹjade tabi le iwe pelebe kaakiri igboro nipa awọn ipade wa tabi nipa awọn nkan ti Ọlọrunn ṣe nipasẹ Ẹmi rẹ laarin wa lọsọọsẹ ki awọn eniyan to mọ nipa rẹ, ki wọn si darapọ mọ wa. Gbogbo wa ti a jẹ alajọpin ninu didara rẹ si wa ninu ijọ yi kan nilo lati gba a gẹgẹ bi iṣẹ lati tan iroyin naa kalẹ ni. Lo ba tan. Ẹmi Ọlọrun yoo si mojuto ohunkohun ti o ba ku.

Bibeli sọ wipe, “Oluwa ti sọrọ: ọpọlọpọ si ni ogun awọn ẹni ti n fi ayọ royin rẹ.” (Saamu 68:11) Ti a ba ka ẹṣẹ yi lati inu Iwe mimọ ti ede Heberu, a ri wipe obinrin gan ni awọn ogun eniyan ti a sọ wipe wọn fi ayọ royin ọrọ Oluwa yi. Nitorina, pe o jẹ obinrin ko tunmọ si pe o ko le tan ihin rere bi Ọlọrun ṣe n yi aye rẹ pada ninu ijọ yi pẹlu ọrọ rẹ ati nipasẹ Ẹmi rẹ kalẹ. O le tan an kalẹ. O si yẹ ki o ma tan an kalẹ.

Njẹ o tilẹ mọ pe awọn ọmọde gan ko gbẹyin ninu ọrọ yi? Fun apẹẹrẹ, igba kan wa ti awọn adari ẹṣin Juu n ṣaroye si Jesu lori pe awọn ọmọ kan n kọrin lati yin. Ki si ni esi ti o fun wọn? Esi ti O fun wọn ni pe, “Ṣe ẹyin ko ri ka ninu iwe mimọ ni pe, ‘Lati ẹnu wọn ọmọ-ọwọ ati awọn ọmọ-ọmu ni iwọ ti mu iyin pe?’” Nitorina, o yẹ ki a fun awọn ọmọ wa gan ni iwuri ati oriyin lati ma tan iroyin bi Ọlọrun ṣe n bukun fun wọn ninu ijọ yi kalẹ. (Matiu 21:14-16)

Amọ ṣa o, ti a ba jẹ alanikanjọpọn ati amọtaraẹninikan, ti a kan n ronu nipa ara wa nikan, ko si bi a ṣe fẹ ni iwuri lati tan iroyin bi Ọlọrun ṣe n bukun fun wa ninu ijọ yi kalẹ. Lafikun, ti a ba ya ojo, a le ma sọ nkankan fun awọn ti o wa ni ayika wa ti o nilo ifọwọkan ọrọ Ọlọrun ati ti Ẹmi rẹ. Nitorina, adura mi ni pe ki a kun ọkan wa pẹlu ifẹ Kirisiti ati pẹlu odiwọn itara ati igboya ti o peye lati tan ihinrere ore-ọfẹ rẹ ti a n jẹ gbadun kalẹ, ni orukọ Jesu. Amin.

Ki o ni ọṣẹ alarinrin.

Tan iroyin naa ka | Paitọ J.O. Lawal Read More »

Author name: CyberHawk