latori tabili paito

Olufẹ: ki oore-ọfẹ, alaafia ati aanu jẹ tirẹ lailodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o pari oṣu Agẹmọ 2023. Mo si gbadura pe ọkankan ninu awọn nkan ti Ọlọrun fẹ ki o ni ninu oṣu naa ko ni fo ọ ru, ni orukọ Jesu. Amin.

Wayi o, ọkan lara awọn nkan ti a fi han wa ninu Iwe mimọ ni pe ko to ki Ọlọrun fẹ ki a ni nkan tabi ki a da nkan. Awọn naa gbọdọ nifẹ, ki a si tun ma lakaka, lati jẹ ohun ti O fẹ ki a jẹ. Eyi si tun gbọdọ wa ni ibamu pẹlu ifẹ rẹ. Aijẹbẹ, a ko ni da ohun ti O fẹ ki a da.

Fun apẹrẹ, ninu iwe Aisaya, Ọlọrun sọ eyi fun wa: “Bi ẹyin ba fẹ, ti ẹ si gbọran, ẹyin oo jẹ ire ile naa.” (Aisaya 1:19) Kini ọrọ yi n fi han wa? Akọkọ, o n fi han wa pe Ọlọrun fẹ ki a ni, ki a si tun jẹ igbadun awọn nkan ti o dara julọ nibikibi ti a ba wa. Irọ o, a le ma ma jẹ igbadun igbe aye ti o dara julọ nibi ti a wa lọwọlọwọ yi, yala nitori ìbí wa, ìpele ẹ̀kọ́ wa, ailoye bi a ti ṣe n ni owo ati lo o ati bẹẹbẹẹ lọ. Ṣugbọn eyi ko le yi otitọ ti o wa ninu pe ifẹ Ọlọrun ni pe ki ni, ki a si tun jẹgbadun awọn nkan ti o dara julọ nibi ti a ba wa pada.

Ekeji, ẹsẹ Iwe mimọ yi n fi han wa pe bi o tilẹ jẹ wipe Ọlọrun fẹ awọn nkan ti o dara julọ fun wa, awa naa ni ipa ti a gbọdọ ko ki a ba le ni awọn nkan wọnyi, ki a si tun ba le jẹ igbadun wọn. Ki si ni awọn ipa yi? Akọkọ, a gbọdọ fẹ lati ni ati lati jẹgbadun nkan ti Ọlọrun fẹ fun wa. Ọlọrun ko ni fi tipatipa mu wa lati ni ohunkohun tabi lati tẹwọgba ohukohun lọwọ rẹ. Awa ni a gbọdọ nifẹ lati ni ohun ti O n naa si wa. Aijẹbẹ, a ko ni ni.

Ọlọrun, fun apẹrẹ, fẹ ki gbogbo awọn ọmọ Isiraẹli ti Mose ko jade lati Ijibiti tẹwọgba ilẹ Kenani, ilẹ ti o n ṣan fun wara ati fun oyin. Ṣugbọn ọpọ ninu wọn ni ko mori de ilẹ naa. Ki lo fa? Wọn ko ni ifẹ lati nawọ gan ilẹ yi. Ki si ni idi ti wọn ko fi ṣetan lati nawọ gan an? Ibẹru! Ibẹru awọn omiran ti o wa ni ilẹ naa ni ko jẹ ki wọn fẹ lati gba a. Ṣugbọn Ọlọrun mọ wipe awọn omiran wa nibẹ ki O to nawọ ilẹ naa si wọn. Nkan ẹyokan ṣoṣo ti O si fẹ lati ọdọ wọn ni ki wọn ṣetan lati tẹwọ gba. Ilẹ naa ko ba si di ti wọn. Ṣugbọn nitoripe wọn ko nifẹ lati tẹwọ gba, wọn padanu rẹ, wọn si ṣegbe sinu aginju. Kiki awọn ti o nifẹ lati tẹwọ gba ilẹ naa laarin wọn ni o wọ ibẹ.

Ti awa naa ba fẹ lati ni ohun ti Ọlọrun fẹ fun wa, yoo fa a le wa lọwọ, bi o ti wu ki riri nkan naa gba dabi ẹni ti o le to. Bawo si ni a ṣe le fi han pe a nifẹ lati ni ohun ti o dara julọ ti Ọlọrun fẹ ki a ni laye yi, ki a si tun jẹ ẹni ti o fẹ ki a jẹ lọna ti o dara julọ? Nipa fifi itara ṣe aṣaro ninu ọrọ rẹ lati mọ awọn nkan ti O ti pese fun igbadun wa. Nipa gbigba adura si laisimi lati mu gbogbo ete ra daradara fun wa ṣẹ. Ati nipa gbigbe gbogbo igbesẹ ododo ti a ni agbara lati gbe lati jẹ ẹni ti O fẹ ki a jẹ ati lati ni ohun ti O fẹ ki a ni.

Nkan ekeji ti a nilo lati ni ati lati jẹgbadun awọn nkan ti o dara julọ ti Ọlọrun fẹ ki a ni laye yi ni igbọran. Ọlọrun ni awọn ọna tirẹ lati jẹ ki a ni ati ki a jẹ igbadun ipese rẹ fun wa. Nipa titẹle awọn ọna yi nikan si ni a ṣe le gba jẹgbadun wọn. Nitorina, bi a tilẹ nifẹ lati ni awọn nkan ti Ọlọrun fẹ ki a ni ati lati da ohun ti O fẹ ki a da, ti a ko ba tẹlẹ awọn ọna ati ete rẹ fun wa pẹlu ọkan igbọran, a o ṣina. Ti ba tilẹ wa ni awọn nkan ti O fẹ ki a nipa titẹle awọn ọna ti ara wa, o di dandan ki ijiya tẹle, ijiya yi si le gba awọn nkan ti o san ju awọn ti a ti ri danu kuro lọwọ wa.

Fun apẹrẹ, igba kan wa ti Ọlọrun fẹ fun awọn ọmọ Isiraẹli ni omi mu lati inu apata kan. O si sọ fun Mose pe ki o sọrọ si apata naa ni oju ẹnikọọkan wọn ati wipe apata naa yoo sun omi jade fun wọn ti o ba ti ṣe bẹ ẹ. Ṣugbọn nitoripe inu n bi Mose gidigidi ni asiko naa si awọn eniyan naa, o ṣe aigbọran si Ọlọrun nipa lilu apata naa ni igba meji pẹlu ọpa rẹ. Si iyalẹnu awọn ti o wa ni ibẹ, omi tu jade lati inu apata yi fun gbogbo wọn lati mu. Ṣugbọn Ọlọrun wa sọ fun pe ko ni wọ ilẹ ileri naa nitori aigbọran rẹ. (Wo: Numeri 20:1-13)

Ṣe o wa ri bayi pe o ṣeeṣe ki a ma ṣe aigbọran si Ọlọrun, ki a si tun ma ni iriri didara ati ojurere rẹ ninu aye wa lọna kan tabi omiran. Ṣugbọn gẹgẹ bi o ti ri fun Mose, aigbọran awa naa le gba awọn nkan ti o dara julọ ti Ọlọrun fẹ ki a ni danu kuro lọwọ wa. Nitorina, a gbọdọ ṣọ ara wa, ki a si ri daju pe bi a ti ṣe n fi ifẹ wa han lati ni awọn nkan ti Ọlọrun fẹ ki a ni naa ni a tun ṣe n gbọran si aṣẹ rẹ. Adura mi ni pe ki okun lati ṣe eyi ma fi igba gbogbo ṣiṣẹ ninu wa. Amin.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ tuntun miran ninu oṣu Agẹmọ 2023. Mo gbadura pe ki Ọlọrun ma fi igba gbogbo pa ọ mọ kuro ninu idibajẹ awọn ọjọ ikẹyin yi, ki O si tun mu ọ duro ni mimọ ati ailabawọn niwaju Jesu Oluwa wa nigba ti O ba de. Amin.

Ni aipẹ yi, mo ri lori ẹrọ ayelujara awọn fọnran awọn ọdọkunrin ati ọdọbinrin wa kan ni orilẹ-ede yi ninu eyi ti wọn ti n bọ ara wọn si ihoho pẹlu aibikita nitori pe wọn fẹ ṣe ere idaraya. Wọn pe ere idaraya naa ni ipenija ayò ife-yíyípadà. Ọpọlọpọ ni o si n kopa ninu ìsínwín yi pẹlu igboya. Ki si ni idi? Wọn ṣa fẹ mu inu ara wọn dun, ki wọn si gbagbe irora ati ibanujẹ wọn. Wọn ko si wa kọ ohunkohun ti wọn ni lati ṣe ki eyi ba le waye. Awọn miran tilẹ tun ri gẹgẹ bi ọna lati pa owo pẹlu irọrun lori ẹrọ ayelujara.

Wayi o, awọn nkan wọnyi jẹ ki ara awọn ọrọ ti Jesu Oluwa wa sọ nipa awọn ọjọ ikẹyin wa si ọkan mi. O sọ wipe, “Ẹṣẹ yoo wa nibi gbogbo, yoo si sọ ifẹ ọpọ di tutu, ṣugbọn ẹni ti o ba foriti i dopin ni a o gba la.” (Matiu 24:12-13) Ki ni yoo wọpọ ni ibi gbogbo ni awọn ọjọ ikẹyin? Ẹṣẹ! Iṣekuṣe! Ẹtan! Bawo wa ni wiwọpọ awọn nkan wọnyi yoo ṣe pa awọn ọmọ Ọlọrun lara? Yoo jẹ ki ifẹ ọpọ ninu wọn fun Ọlọrun di tutu. Eyi jasi pe wọn ko ni ni itara lati gbe aye wọn fun Oluwa tabi lati sin in. Idi fun eyi si ni pe awọn naa fẹ ba awọn ọrẹ wọn, ololufẹ wọn, ẹbi wọn, aladugbo wọn ati bẹẹbẹẹ lọ ti ko mọ Oluwa rẹ́.

Ṣugbọn Oluwa tun wa jẹ ki o ye wa pe kiki awọn ti o ba duro ṣinṣin ninu ifẹ wọn si i ati ninu ifarajin wọn fun un titi de opin ni yoo ṣe igbala wọn ni aṣepe. Awọn ti o ba kọ ọ silẹ tabi ti wọn kọ igbe aye ododo silẹ nitori iwa ika, iṣekuṣe, ẹtan, ẹtanu tabi ilara ti o n waye ni ayika wọn ko le ṣe alaima sọ ẹmi wọn nu. Nitorina, ma ṣe jẹ ki ọkankan ninu awọn nkan buruku ti awọn ti o wa ni ayika rẹ n ṣe lati tọju ara wọn, daabo bo ara wọn tabi mu inu ara wọn dun jẹ ki ina ifẹ rẹ fun Ọlọrun ku. Dipo eyi, nṣe ni ki o bu ẹnu atẹ lu awọn iṣẹ ọwọ wọn, ki o kẹyin si wọn, ki o si dirọ mọ Oluwa. Eyi yoo si jasi ọgbọn fun ọ.

Ranti pe Jesu Oluwa wa sọ wipe, “Nitori ẹnikẹni ti o ba fẹ gba ẹmi rẹ la, yoo sọ ẹmi rẹ nu ṣugbọn ẹnikẹni ti o ba sọ ẹmi rẹ nu nitori mi, yoo ri i.” (Matiu 16:25) Nkan ti eyi tunmọ si ni pe gbogbo awọn ọrẹ rẹ, ẹbi rẹ, akẹgbẹ rẹ ni ibi iṣẹ tabi ni ile-iwe, aladugbo rẹ tabi awọn ọmọ ijọ rẹ gan paapaa ti wọn ro wipe awọn yoo gba ara awọn la tabi pe awọn yoo mu inu ara wọn dun nipa ole jija, imutipara tabi ikopa ninu iṣẹ aṣewo tabi iṣeṣo owo yoo ri lọjọ kan pe awọn ko gba ara awọn la tabi mu inu ara wọn dun rara ati pe nṣe ni awọn pa ara awọn run. Ti iwọ naa ba si wa gba fun wọn lati tan ọ lati kopa ninu ẹṣẹ wọn, iwọ naa yoo ri lọjọ kan pe nṣe ni iwọ naa ti pa ara rẹ ati boya awọn ti o fẹran pẹlu run ninu ilakaka rẹ lati gba ẹmi rẹ la.

Ewo ni yoo wa jẹ ninu rẹ? Ṣe nṣe ni o o duro gẹgẹ bi olotitọ si Oluwa, bi o ti wu ki idojukọ ti aye yi n ju si ọ to, ki o si gbẹkẹle fun iṣẹgun, alaafia ati ayọ ni asiko gbogbo? Abi nṣe ni o o darapọ mọ gbogbo awọn eniyan ti o wa ni ayika rẹ ti wọn n fi ojoojumọ pa ara wọn run nigba ti wọn n gbiyanju lati gba ara wọn la? Ọwọ rẹ naa ni o ku si. Njẹ adura mi fun ọ wa ni pe ki Ẹmi Ọlọun fun ọkan rẹ ni okun lati ma fi iwa omugọ darapọ mọ aye yi ni sisa ere ije ti o di dandan ki o pari sinu iparun. Amin.

Ki o ni ọsẹ ologo.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lalailodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu miran ninu ọdun yi, iyẹn oṣu Agẹmọ 2023. Mo si gbadura pe ki Ọlọrun ya aye ra ye ohunkohun ti o ni i ṣe pẹlu aiwa-bi-Ọlọrun ti o n di ẹkunrẹrẹ ifarahan ibukun rẹ lọwọ ninu aye rẹ, ni orukọ Jesu. Amin.

Gẹgẹ bi a ti ṣe sọ fun wa ninu bibeli, gbogbo awa ti a ti di atunbi lati ọwọ Ọlọrun ati nipasẹ igbagbọ wa ninu Kirisiti Jesu ni a ti bukun fun pẹlu gbogbo awọn ibukun ti o wa ninu awọn ọrun ninu rẹ (Efesu 1:3). O wa yẹ ki awọn ibukun wọnyi ma fi ara han ninu aye wa, ninu agọ ara wa, ninu ile wa, ninu iṣẹ wa, ninu okowo wa, ninu iṣẹ iranṣẹ wa ati bẹẹbẹẹ lọ. Ti wọn ko ba si ma fi ara ha ninu wọn, o yẹ ki a mọ idi rẹ. Nkan ti mo n sọ ni pe ti ko ba han kedere ninu aye wa pe ajogun ibukun Ọlọrun ni a jẹ, o yẹ ki a mọ nkan ti o fa.

Bi a sa ti ṣe mọ lati inu bibeli, bi o tilẹ jẹ wipe ẹru ni Josẹfu jẹ ni ile Potifa, ọkunrin yi si le sọ pe ara-ọtọ ni ọdọmọkunrin yi jẹ, pe alabakunfun lati ọwọ Ọlọrun ni o n ṣe (Jẹnẹsisi 39:1-6). Lafikun, bi o tilẹ jẹ wipe Daniẹli, Ṣediraki, Meṣaki ati Abẹdinigo wọ ilu Babiloni bi ẹru, gbogbo awọn ọba ti wọn ba ṣiṣẹ ni wọn le sọ pe alabakun fun lati ọwọ Ọlọrun ni wọn jẹ (Daniẹli 1-6). Siwaju si, bi o tilẹ jẹ wipe Labani ṣe ohun gbogbo ti o le ṣe lati yan Jakọbu jẹ ati lati ri daju pe ko ṣe rere labẹ rẹ, ko wa le jiyan pe Jakọbu gan ni idi ti Ọlọrun ṣe n bukun fun ile rẹ (Jẹnẹsisi 30:27-28).

Nitorina, awọn iṣẹlẹ aye wa, bi o ti wu ki wọn ma suwọn to, ko le di ifarahan ibukun Ọlọrun lọwọ ninu aye wa. Idi si ni pe ibukun Ọlọrun ni agbara ju nkan ti asiko kan tabi egun kan le di lọwọ lọ. Amọ ṣa o, nipasẹ iha ti a kọ si Ọlọrun ati si ọrọ rẹ, awa funrawa le di ifarahan agbara rẹ lọwọ ninu aye wa.

Fun apẹrẹ, nigba ti Mose pari pipe ibukun Ọlọrun sori awọn ọmọ Isiraẹli, o tẹsiwaju lati sọ nkan kan ti o le di ifarahan awọn ibukun yi lọwọ laarin wọn fun wọn. O so wipe, “Ri i daju pe ko si ọkunrin tabi obinrin, idile tabi ẹya laarin yin lonii ti ọkan an rẹ yoo yi kuro lọdọ Oluwa Ọlọrun wa lati lọ ati lati sin awọn ọlọrun awọn orilẹ ede naa; ri i daju pe ko si gbongbo ti o n mu iru eso kikan bẹẹ jade laarin yin. Nigba ti iru ẹni bẹẹ ba gbọ ibura yii, ki o gbadura ibukun sori ara rẹ nigba naa ni ki o ronu, “Emi yoo wa lalaafia, bi o tilẹ jẹ pe mo ti fi aake kọri nipa lilọ ninu ọna ti ara a mi.” Eyi yoo mu ijalu wa sori ilẹ tutu ati sori ilẹ gbigbẹ bakan naa.” (Deutaronomi 29:18-19)

Njẹ o ri bayẹn? Ibọriṣa ma n di ifarahan awọn ibukun Ọlọrun lọwọ. Ibọriṣa yoo mu ajalu ba ohun gbogbo ti o wa ninu aye rẹ, boya o dara ni tabi o buru. Nitorina, ti o ba n kopa ninu ibọriṣa, ko si bi o ti mura to lati gbadura ati lati gbawẹ, awọn ibukun Ọlọrun ko ni farahan ninu aye rẹ. Bẹẹni, niwọn igba ti o ba n kopa ninu ibọriṣa lọna kan tabi omiran, ti o n tẹriba fun awọn ọlọrun miran tabi ti o n bẹ wọn lọwẹ fun isoriire, ilera tabi aabo rẹ, awọn ibukun ti a ti fi fun ọ ninu Kirisiti Jesu ko ni ṣiṣẹ bi o ti yẹ ki wọn ṣiṣẹ.

Awọn idi niwọnyi ti ati Pọọlu ati Johanu ṣe sọ fun wa ninu awọn lẹta wọn lati sa fun ibọriṣa ati lati ya ara wa ya ohun gbogbo ti o n jẹ oriṣa (1Kọrinti 10:14; 1Johanu 5:21). Nitorina, jina si ohunkohun ti o n jẹ oriṣa ati ohunkohun ti o ba sorọ mọ ibọriṣa. Aijẹbẹ, o di dandan ki o ru owu Ọlọrun soke. Ti o ba si ru owu rẹ soke nipasẹ ipa ti o n ko ninu ibọriṣa, o gbọdọ reti pe ki O gbegidina ifarahan awọn ibukun rẹ ninu aye rẹ. Nitorina, bi o tilẹ n jẹwọ ọrọ ibukun rẹ, ti o n gbadura tabi ti awọn iranṣẹ Ọlọrun n bukun fun ọ, ko ni ṣiṣẹ. Gbogbo rẹ yoo kan ṣofo lasan ni. Ti ko ba si ki i ṣe nkan ti o fẹ ni eyi, ti o ko fẹ ki awọn adura rẹ ati awọn adura ti awọn miran n gba fun ọ ja si asan, nṣe ni ki o jina rere si ibọriṣa.

Siwaju si, ti o ko ba fẹ jẹ idi ti idena yoo ṣe ba ilọsiwaju awọn ti o wa ninu aye rẹ, jina si ibọriṣa. Idi si ni pe, bi a ti ṣe ri ninu bibeli, ko ki iṣe gbogbo igba naa ni o jẹ kiki awọn ti o n kopa ninu ibọriṣa nikan ti o ma n jiya rẹ; awọn igba miran ma n wa ti awọn ti o wa ninu aye wa naa ma n kopa ninu ijiya wọn. Idi niyi ti Mose ṣe sọ fun awọn ọmọ Isiraẹli ninu ẹsẹ bibeli ti o wa loke yẹn lati ma sọ ara wọn ati lati ri daju pe ko si ọkankan ninu wọn ti o n kopa ninu ibọriṣa. Aijẹbẹ, ko ki i ṣe ori aye rẹ ti o gbẹ nikan ni irufẹ ẹni bẹ yoo mu ajalu wa, yoo tun mu wa sori aye ti awọn naa ti a bomirin, ti o n gberu pẹlu.

Nibakan naa, iwọn naa ko gbọdọ fi aye gba awọn ti o pe ara wọn ni Kirisitiẹni ti o wa ninu aye rẹ lati ma kopa ninu ohunkohun ti o n jẹ ibọriṣa. Nṣe ni o yẹ ki o kilọ fun wọn gidigidi. Ti wọn ko ba si gbọ, o gbọdọ jina si wọn. Aijẹbẹ, o ṣeeṣe ki iwọ naa kopa ninu ijiya wọn. Wayi o, awọn ti o sọ pe awọn mọ Ọlọrun ti o tun n kopa ninu ibọriṣa nikan ni eyi n tọka si (1Kọrinti 5:9-11). Nitorina, ma ṣe lo ilana yi lati ba awọn alaigbagbọ ti o wa ni ayika rẹ lo pọ. Ki a si ma fi gbogbo igba kun ọ pẹlu okun ati ọgbọn ti o peye lati yago fun ohun gbogbo ti o ni i ṣe pẹlu ibọriṣa, ni orukọ Jesu. Amin.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ ti o kẹyin oṣu Okudu 2023. Adura mi ni pe ki Ọlọrun ma fi gbogbo igba pa ọ mọ ki ifẹ awọn ọna ti awọn ti aye yi n tọ ma ba gba ọkan rẹ, ki o ma ba ko ara rẹ sinu itiju tabi iparun, ni orukọ Jesu. Amin.

Bi a ti ṣe fi han wa ninu bibeli, igba kan wa ti ọmọ-ọba kan ti a n pe ni Ṣẹkẹmu fi ipa ba Dina, ọmọbinrin Jakọbu, lo pọ. Lẹyin-ọ-rẹyin, eyi si wa jẹ ki awọn ẹgbọn rẹ, Lefi ati Simeoni, jade lati gbẹsan nipa pipa gbogbo ilu ọmọ-ọba yi run. Nitorina, ko ki i ṣe nkan tuntun ni ki awọn eniyan fi ipa ba eniyan lopọ. Ko si ki i ṣe nkan tuntun naa ni ki awọn eniyan gbe gbogbo igbesẹ ti wọn ni agbara lati gbe, eyi ti o le yọri si ki wọn pa gbogbo ẹbi, ilu tabi ẹya kan run, lati gbẹsan ẹṣẹ ẹnikanṣoṣo. Nitorina, ki o to ṣe ika fun ẹnikẹni, ma fi gbogbo igba ranti pe ko ki i ṣe gbogbo eniyan naa ni o ma n fi igbẹsan silẹ fun Ọlọrun. Awọn miran le lọ debi wipe ki wọn fi iya jẹ gbogbo idile rẹ nitori ẹṣẹ rẹ si wọn. (Wo: Jẹnẹsis 34)

Ṣugbọn ṣa, bawo ni Dina ṣe di ẹni ti ọkunrin yi n fi ipa balopọ? Bibeli dahun eyi fun wa nipa sisọ pe, “Dina ọmọbinirin Lia, ti o bi fun Jakọbu si jade lọ lati wo awọn ọmọbinrin ilu naa. Nigba ti Ṣẹkẹmu, ọmọ Hamori, ara Hifi, ọmọ ọba ilu naa ri i, o mu un, o fi ipa baa lo pọ, o si ba a jẹ, o sọ ọ di alaimọ.” (Jẹnẹsisi 34:1-2) A jẹ pe nkan ti o fi aye gba Ṣẹkẹmu lati ri nkan ṣe si Dina ni pe o fi ile baba rẹ silẹ lati lọ bẹ awọn ọmọbinrin ilẹ naa wo. Ti ko ba fi ile baba rẹ silẹ lati lọ da nkan pọ mọ awọn ọmọge ilẹ naa ni, ko ba ma ti lugbadi ifipabanilopọ.

Kini eyi n sọ fun ọ? Ohun naa ni pe o ye ki o mọ irufẹ ibi ti ori rẹ yoo jẹ ki ẹsẹ rẹ gbe ọ lọ. Ko ki i ṣe ibi gbogbo naa ni o wa ni ailewu fun ọ lati lọ. Ko ki i ṣe gbogbo ọrẹ tabi alabajọṣiṣẹpọ naa ni ko si ewu fun ọ lati bẹ wo. Nitorina, ki o to bẹrẹ si ni bẹ awọn eniyan wo tabi ba wọn jade, ri daju pe o mọ bi ibi ti wọn n mu ọ lọ ṣe jẹ ailewu fun ọ si. Ti o ko ba mọ daju pe ibi ti o n lọ ko ni wu ọ ni ewu, iyẹn ti ko ba si nkan miran n bẹ, o yẹ ki o mọ pe lilọ si ibẹ ko to nkan ti o yẹ ki gbẹmi ara rẹ le lori, ti ko ba ki i ṣe iyinrere Jesu ni o n gbe ọ lọ si ibẹ.

Njẹ o tilẹ mọ pe awọn ibi kan wa ti ko yẹ ki o mu iyinrere Jesu lọ, ti ko ba jẹ wipe o gba aṣẹ taara-taara lati ọdọ Oluwa lati ṣe bẹ ẹ? A ri ka ninu iwe mimọ pe Ẹmi Kirisiti kọ fun Apọsiteli Pọọlu ati awọn akẹgbẹ rẹ lati lọ waasu ni awọn ibikan. Kini idi? A ko sọ fun wa. Ṣe o wa le jẹ wipe Ọlọrun ko fẹ ki awọn ti o wa ni awọn ibi wọnyi di ẹni igbala ni? Rara, ko jẹ jẹ bẹẹ. Idi si ni pe bibeli sọ fun wa pe Ọlọrun fẹ ki a gba gbogbo eniyan la. (Wo: Iṣe Apọsiteli 16:6-8; 1Timoti 2:3-4)

Ki lo wa fa, nigbana, ti O fi kọ fun awọn ọkunrin yi lati wọ awọn ibi ti a sọ yi lọ lati waasu iyinrere ninu wọn? O le jẹ wipe o ṣeeṣe ki ewu wu wọn nibẹ ni asiko yi. Nitorina, ki iwọ, gẹgẹ bi ọkunrin, to bẹrẹ si ni mu iyinrere lọ si ọdọ awọn aṣewo ni ile itura wọn, ri daju pe o gbọ daradara lati ẹnu Ọlọrun. Ki iwọ naa pẹlu, gẹgẹ bi obinrin, to bẹrẹ si ni mu iyinrere tọ awọn ẹru-iku igbooro lọ ni abẹtẹ wọn, ri daju pe Ẹmi Ọlọrun ni o n dari rẹ. Aijẹbẹ, o ṣeeṣe ki iwọ naa lugbadi irufẹ nkan ti o ṣe Dina Jakọbu.

Nikukuru, bi a tilẹ ṣe ri ni ti ọrọ Dina, ko jade tọ awọn ọmọbinrin ilu naa lọ nitoripe o fẹ yi wọn pada kuro ninu ibọriṣa sọdọ Ọlọrun. Dipo bẹẹ, o lọ lati ki wọn ni. Eyi tunmọ si pe o ri wọn gẹgẹ bi ọrẹ, o si fẹ wa pẹlu wọn. O tilẹ ṣeeṣe ki o jẹ pe bi o ti ṣe da wa nile ni o su u ni ọjọ ti a n wi yi, ti o si wo pe ki oun kuro ni ile wọn ti ko ni arinrin, ile ti awẹjẹ-wẹmu ko ma lọ nibẹ, ile ti ko si orin taka-sufe lati jo si nibẹ ati ti ko si tun si awọn adẹrin poṣonu nibẹ lati jẹ ki eniyan gbagbe ibanujẹ rẹ. Ṣugbọn nigba ti ilẹ ọjọ yi yoo fi su, o ti wa ye oun gan funrarẹ pe ile wọn ti ko dun yẹn gan ni ibikan ṣoṣo ti ewu ko ti le wu ninu ilu naa.

Loni, a ni ọpọlọpọ Kirisitiẹni, paapaa julọ awọn ti o jẹ obinrin, ti awọn naa, bi Dina Jakọbu, ro wipe ilana ijọba Ọlọrun ko tasánsán to. Nitorina, wọn fẹ tọ diẹ wo lara iṣesi ti awọn ti aye yi. Rara o, awọn ko ṣetan lati rin ni ihoho wọ ọja bi ti wọn tabi lọ si awọn patí alẹ bi ti wọn tabi ko awọn ọrẹkunrin tabi ọrẹbinrin jọ bi ti wọn. Ṣugbọn wọn ṣa a fẹ tọ diẹ wo lara nkan ti wọn n ṣe. Eyi si ma n farahan ninu bi wọn ti ṣe n mura ati ninu iṣesi wọn nigba ti wọn ko ba si ninu awọn ipade ijọ wọn ati nipa ọna ti wọn n gba lo awọn ohun elo ibaraẹni-sọrọ ti ori ẹrọ ayelujara.

Wayi o, ko si ni ki irufẹ awọn eniyan yi, ti a ko ba ṣaanu fun wọn, ma fẹrẹ run aye wọn lọna kan tabi omiran bi Dina Jakọbu. Nigba ti eyi ba si ti wa ri bẹ ẹ tan, ohun gbogbo ti wọn ti n lakaka lati pa mọ ninu aye wọn ni wọn yo padanu laarin iṣẹju aaya. O wa le je wipe itiju ti yoo tẹle eyi gan ni yoo kuku fi idi iparun wọn mulẹ. Nitorina, ki o to gbesẹ rẹ jade kuro ninu aala aṣẹ Ọlọrun fun ọ, má ronú nìkan nipa ohun ti yoo jẹ èrè re nipa ṣiṣe bẹ, ṣugbọn tun ronu nipa ohun ti o o padanu nipa ṣiṣe e. Adura mi si ni pe ki Ọlọrun ma jẹ ki o fi agọ̀ tabi agídí sar lọ si ibikibi ti a o ti pa ọ run. Amin.

Ki o ni ọsẹ alayọ.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Okudu 2023. Adura mi si ni pe ki Ọlọrun ma fi gbogbo igba dari rẹ lati gbe awọn igbesẹ ati lati ṣe awọn nkan ti yoo jẹ ki awọn eniyan ma dupẹ lọwọ rẹ nitori rẹ ati ti yoo jẹ ki wọn ma gbadura fun ọ. Amin.

Wayi o, ọkan lara awọn nkan ti yoo ti awọn eniyan lati dupẹ lọwọ Ọlọrun fun aye rẹ ati lati gbadura tọkan-tọkan fun ọ ni ififunni ti a ṣe lọna ti o yẹ (2Kọrinti 9:12-14). Lọdun melokan sẹyin, mo pese akọsilẹ kan fun ẹkọ bibeli fun ijọ Ọlọrun kan ti mo n lọ nigbanna. Lẹyin ọjọ melokan ti oniruru ẹgbẹ ti o wa ninu ijọ yi ti lo akọsilẹ yi fun awọn ipade ẹkọ bibeli wọn, ṣa dede ni ọkan lara awọn adari awọn ẹgbẹ naa fi ẹbun kan ranṣẹ si mi.

Ki lo wa fa ti adari ẹgbẹ yi ṣe fi ẹbun naa ranṣẹ si mi? Gẹgẹ bi o ti ṣe sọ, bi o ti n ka akọsilẹ ẹkọ bibeli ti mo pese yi, nṣe ni Ẹmi Ọlọrun ṣi oju rẹ lati ri otitọ bibeli kan ti o ṣe igbagbọ rẹ ni anfaani ni ọna ti o ga. Nitorina, nibi ti o ti n kan ẹkọ yi gangan naa ni o ti pinnu pe oun yo fun ẹni ti o pese akọsilẹ ẹkọ naa ni ebun. O si ṣe bẹẹ gẹgẹ.

Iha wo ni mo wa kọ si eyi? Akọkọ na, mo dahun pẹlu ọpẹ si Ọlọrun. Mo dupẹ lọwọ rẹ fun bi O ti ṣe fun mi ni ọrọ lati le bukun awọn eniyan rẹ. Mo tun dupẹ lọwọ rẹ fun bi O ti jẹ ki nkan ti mo n ṣe bukun fun o kere ju ẹnikan. Mo tun wa dupẹ lọwọ rẹ fun bi O ti ṣe ti ẹni yi lati bukun fun mi pẹlu ẹbun naa. Ti ko ba ṣe pe o fun mi ni ẹbun ni tabi pe o wa sọ fun mi pe nkan ti mo kọ bukun fun oun, ko si bi mo ti fẹ mọ pe o tipasẹ nkan ti mo kọ di alabukunfun. O wa ṣeeṣe ki a ri awọn miran ninu ijọ yi ti a bukun fun awọn naa nipasẹ akọsilẹ ẹkọ bibeli yi kanna. Amọ mi o le mọ wọn titi a o fi de ọrun. Idi ti mi o si fi ni mọ wọn afi igba ti a ba de ọrun ni pe wọn ko yọju lati mọ riri mi fun bi Ọlọrun ti ṣe lo mi lati bukun fun wọn.

Ni kukuru, ẹni ti o yọju lati fi imọriri han si mi pẹlu ẹbun mu ara mi ya lati dupẹ lọwọ Ọlọrun nitori rẹ. Lafikun, o tun fun mi ni iwuri lati gbadura fun un. Iwọ naa mọ pe bi ẹnikan ba jọ wa loju pẹlu ẹbun rẹ, paapaa julọ nigba ti a ko reti rẹ, o pọn dandan ki a bẹrẹ si ni gbadura fun iru ẹni bẹ lẹsẹkẹsẹ. Irufẹ adura bayi si ma n jẹ adura atọkanwa. Nitorina, o di dandan ki o ṣiṣẹ agbara, niwọn igba ti o ba ti wa ni bamu pẹlu ifẹ Ọlọrun.

Wayi o, yatọ si pe ẹni yi ru mi soke lati gbadura fun nipasẹ ẹbun rẹ, o tun gbin irugbin imoriya sinu ọkan mi laitilẹ mọ. Ti o ba mọ pe nkan ti o n ṣe ko ja si asan ati pe o n bukun fun o kere ju ẹnikan, ti o si n jẹ ki ẹni naa fẹ di ẹni ti o n bukun fun awọn miran, o di dandan ki ara ya ọ lati tẹramọ nkan naa ti o n ṣe. A si ri awọn kan ti wọn ti tẹsiwaju ninu aye wọn lọna yi lati lọ jẹ ibukun fun ẹgbẹlẹgbẹ eniyan nipasẹ iwuri ti wọn rigba lati ọdọ ẹnikan ṣoṣo pere.

Ki ni koko ọrọ mi? Oun naa ni pe o nilo lati kọ bi a ti ṣe n mọ riri ẹnikẹni ti Ọlọrun ba n lo lati bukun fun ọ, paapaa julọ ninu ijọ. Ti o ba si wa jẹ pe iwọ nikan ṣoṣo ni yoo fi imọriri han si ẹni yi laarin gbogbo awọn ti Ọlọrun n lo wọn lati bukun fun, ri daju pe o ṣe bẹẹ. Idi si ni pe o le sọ bi imọriri rẹ yoo ṣe rin to ni jijẹ ki ẹni naa di ẹni ti o wulo ati ti o tun jẹ olododo si ninu ṣiṣe ifẹ Ọlọrun.

Ninu lẹta rẹ si awọn ara Filipi, Pọọlu sọrọ nipa bi oun ti ṣe ma n dupẹ lọwọ Ọlọrun ni igba gbogbo ti o ba ranti wọn ati bi o ti ṣe ma n fi ayọ gbadura fun wọn. O tilẹ mọ-ọn-mọ gbadura fun wọn ninu lẹta rẹ yi pe ki Ọlọrun pese fun gbogbo aini wọn lati inu ọrọ ologo rẹ ninu Kirisiti Jesu (Filipi 4:19). Ki ni idi? Idi ni pe awọn ara yi jẹwọ ara wọn leralera pe awọn mọ riri iṣẹ iranṣẹ rẹ ati awọn nkan ti Ọlọrun n tipasẹ rẹ ṣe. Wo diẹ lara nkan ti o sọ nipa wọn ninu lẹta rẹ: “Ẹyin paapaa si mọ pẹlu, ẹyin ara Filipi, pe ni ibẹrẹ iyin rere, nigba ti mo kuro ni Makẹdonia, ko si ijọ kan ti o fun mi ni iranlọwọ owo, bi ko ṣe ẹyin nikan ṣoṣo. Nitori nigba ti mo wa ni Tẹsalonika, ẹyin ranṣẹ, ẹ si tun ranṣẹ lati pese fun aini mi. Kii ṣe nitori ti emi n fẹ ẹbun naa, ṣugbọn emi n fẹ eso ti yoo maa di pupọ nitori yin.” (Filipi 4:15-17)

Njẹ o ri bayẹn? Laarin gbogbo awọn ijọ ti Ọlọrun n lo Pọọlu lati bukun fun ni asikọ yẹn, ijọ awọn ara Filipi nikan ni o n fi gbogbo igba fun ni iranlọwọ ati iwuri. Abalajọ ti inu rẹ ṣe ma n dun nigba gbogbo ti o ba ranti wọn ati ti o ba n gbadura fun wọn. Ti iwọ naa ba fẹ ki awọn ti o n mojuto ọ ninu ijọ rẹ ma fi gbogbo igba fi idunnu mojuto ọ dipo ti wọn yoo kan fi ma ṣe eyi gẹgẹ bi ojuṣe wọn lati ṣe, a jẹ wipe o gbọdọ kọ bi a ti ṣe n mọ riri wọn. Ti o ba si wa jẹ wipe iwọ nikan ṣoṣo ni yoo ma ṣe eyi, bi ti ijọ awọn ara Filipi, ṣe bẹẹ. Idi si di ni pe o ko le ṣọ ọna ti Ọlọrun le gba lo iwuri ti o n fun wọn lọwọlọwọ yi lati jẹ ki wọn ṣe iṣẹ iranṣẹ wọn ni aṣepe. Adura mi si ni pe ki Ọlọrun fun ọ ni okun lati mu ọrọ yi ni pataki, ni orukọ Jesu. Amin.

Kí o ní ọ̀sẹ̀ alárinrin

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Àkórí: Wọn kò ní sinmi títí ìfẹ́ rẹ̀ yóò fi jẹ́ ṣíṣe
Láti ọwọ́: J.O. Lawal
Ọjọ́: Okúdù 11, 2023
Àtẹ̀léra: Látorí tábìlì Pásítọ̀
Nọ́múbà: Vol. 12, No. 6

Olufẹ: ki oore-ọfẹ ati alaafia jẹ tirẹ lalai-lodiwọn lati ọdọ Ọlọrun Baba wa ati Jesu Kirisiti Olurapada wa. Mo ki ọ kaabọ sinu ọsẹ miran ninu oṣu Okudu 2023. Mo si gbadura pe ki Ọlọrun sọ gbogbo awọn ti O ti yan lati gbe o ga ji lati ma gbero lati sinmi titi wọn yoo fi ṣe ifẹ rẹ fun ọ. Amin.

Lẹyin igba ti Ruutu ti ba Boasi sọrọ lori boya yoo ṣeeṣe ki igbeyawo waye laarin wọn tabi ko ni ṣeeṣe, gẹgẹ bi iya ọkọ rẹ, Naomi, ti ṣe pa a lasẹ fun, o pada wa sile lati jẹ ki iya yi mọ bi nkan ti ṣe lọ. Nigba ti yoo si fesi, o sọ fun un pe, ”Duro, ọmọbinrin mi titi ti iwọ yoo fi mọ bi ohun gbogbo yoo ti ri. Nitori pe ọkunrin naa ko ni sinmi titi ti ọrọ naa yoo fi yanju lonii.” (Ruutu 3:18) O si wa jẹ nkan ti o jọ ni loju pe Boasi ṣe gẹgẹ bi Naomi ti ṣe sọ wipe yoo ṣe. Ko farabalẹ sinmi rara titi o fi ri daju pe ọrọ igbeyawo Ruutu di yiyanju.

Ta wa lo jẹ ki eyi ṣelẹ? Ọlọrun ni. Oun ni O tari Boasi lati ma sare lọ-sare bọ lọjọ ti a n wi yi titi Ruutu ko fi nilo lati yọnu mọ lori jijẹ opo tabi wiwa lalai ni ọmọ laye. Ti iwọ naa ba si fa aye rẹ le lọwọ, gẹgẹ bi Ruutu se ṣe, Oun naa yoo ri daju pe awọn eniyan n sare lọ-sare bọ fun ọ, ti wọn ko si ni sinmi titi wọn yoo fi fi idi rẹ mulẹ si ibi ipo isesorere, isinmi ati iṣoriire ti O ti pese silẹ fun ọ.

Lafikun, bi a ti ṣe fi han wa ninu bibeli, aṣalẹ ọjọ ti o ku ọla ti ọta Mọdekai, iyẹn Hamani, yoo yẹgi fun, ni Ọba Ahasiwerusi ko ni isinmi titi o fi ni ki wọn ba oun gbe iwe akọsilẹ awọn nkan ti o n ṣẹlẹ ninu ijọba rẹ. Igba ti wọn si wa n ka a fun un ni o ri mọ pe oun ti fi ohun kan pataki silẹ lai ṣe. Ko fun Mọdekai ni nkankan tabi bu ọla fun lori bi o ti ṣe gba ẹmi rẹ la nigbakan sẹyin lọwọ awọn ti o fẹ gbẹmi rẹ. (Wo: Esteri 6)

Nitorina, ninu ainibalẹọkan rẹ, o ronu titi lori ọrọ yi ti ilẹ ọjọkeji fi mọ, ti Hamani si fi wọle wa lati ba a sọrọ lori bi yoo ti ṣe so Mọdẹkai rọ sori igi. Iṣẹlẹ yi si wa ni Ọlọrun lo lati doju ete Hamani delẹ. Nitorina, dipo ki o gba aṣẹ lọwọ ọba lati so Mọdekai rọ, nkan ti Hamani ri gba ni aṣẹ lati bu ọla fun un kaakiri gbogbo ilu Susa.

Kini eyi n sọ fun wa? Oun sọ fun wa pe ki Ọlọrun ba ṣetan lati bu ọla fun eniyan ati lati gbe e ga, O mọ bi yoo ṣe ta awọn ti o yẹ ki o ṣiṣẹ yi ji, bi wọn tilẹ jẹ ọta rẹ, ti ko si ni jẹ ki wọn ni ibalẹọkan titi wọn yoo fi ṣe iṣẹ naa. Eyi si ni yoo jẹ iriri rẹ ninu ọsẹ tuntun yi ati ni gbogbo eyi ti o ku ninu ọdun yi. Ọlọrun yoo ji gbogbo awọn ti O ti yan lati gbe ọ ga ati lati bu ọla fun ṣugbọn ti wọn n sun. Yoo ji wọn, yoo si jẹ ki wọn wa ni ainifọkanbalẹ titi wọn yoo fi ṣe ifẹ rẹ fun aye rẹ.

Ti o ba wa gba eyi gbọ, nṣe ni ki o le ṣiṣe aniyan kuro ninu ọkan rẹ. Wa bẹrẹ si ni dupẹ lọwọ rẹ, ki o si tun ma fiyin fun fun ohun ti o n ṣe. Ki o si to mọ bi o ti ṣe n lọ, gbogbo awọn nkan daradara ti O n ti ṣe fun idalare ati igbega rẹ ni iwọ naa yoo bẹrẹ si ni ri ifarahan wọn, ti eyi yoo si jẹ ki awọn eniyan ma a yin orukọ mimọ rẹ nipasẹ rẹ. Amin.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Mo yọ pẹlu rẹ bi a ti ṣe wọ inu oṣu tuntun miran ninu ọdun yi, oṣu Òkúdù 2023. Adura mi ni pe ki Ọlọrun kọ ọkan rẹ lati ma wa ni iduro-ṣinṣin ati lati ma yẹṣẹ ni gbigbẹkẹle ati ni ṣiṣe ifẹ rẹ, ki ọkankan ninu ohun rere gbogbo ti O fẹ ṣe ninu aye re ma ba fo ọ ru, ni orukọ Jesu. Amin.

Nigba ti O n ṣalaye owe afunrugbin ti o lọ fun irugbin rẹ, Jesu Oluwa wa sọ eyi nipa awọn ti aye wọn yoo so eso ọrọ Ọlọrun ti o n tọ wọn wa: “Ṣugbọn ti ilẹ rere ni awọn ti wọn fi ọkan otitọ ati rere gbọ ọrọ naa, wọn diimu ṣinṣin, wọn si fi suuru so eso.” (Luuku 8:15) Ki ni awọn nkan ti yoo jẹ ki ọrọ Ọlọrun so awọn eso ti O fẹ ri ninu aye wa, bi Jesu Oluwa wa ti fi han wa? Akọkọ ni gbigbọ ọrọ Ọlọrun.

Bibeli sọ wipe igbagbọ ma n wa nipa gbigbọ ọrọ Kirisiti (Roomu 10:17). Nitorina, gbigbọ nkan ti Ọlọrun ni lati sọ tabi ti o n sọ ṣe pataki gidigidi. Igba ti a ba si to gbọ ohun ti O n sọ nipa ara rẹ, nipa aye wa ati nipa ọrọ aye wa ni a to le reti pe ki a gbẹkẹle lati tọju wa tabi reti pe ki a mọ ohun ti O fẹ lati ọdọ wa. Nitorina, ti aye wa yoo ba so eso igbagbọ ninu Ọlọrun ati eso ohun ti Ọlọrun fẹ, a gbọdọ gbọ ọrọ igbagbọ ninu rẹ ati ọrọ ti yoo fi ifẹ rẹ fun aye wa han. Eyi jasi pe, a gbọdọ fun irugbin igbagbọ ninu rẹ ati irugbin ifẹ rẹ sinu ọkan wa. Aijẹbẹ, ko le si ikore ohun ti a ko gbin.

Nkan keji ti yoo jẹ ki ọrọ Ọlọrun so eso ninu ọkan wa ni ki ọkan wa diimu ṣinṣin. Ọtọ ni ki a fun irugbin si ori ilẹ kan; ọtọ tun si ni ki ilẹ naa fi aaye gba. Ti ipo ti ilẹ naa wa ko ba fi aaye gba irugbin yi lati gberu ati lati dagba so eso, o di dandan ki irugbin naa ku tabi ki o kan dagba lasan lalai so eso. Bẹẹ gẹẹ, ko to fun wa lati kan gbọ ọrọ Ọlọrun; o tun ṣe pataki ki a fi aye gba a lati dagba ati lati le so eso ninu aye wa. Ti a ko ba fi aye gba ọrọ Ọlọrun lati gbe inu wa, iyẹn ti a ko ba tẹwọgba ọrọ rẹ gẹgẹ bi ohun ti a nilo lati fi ṣiṣẹ ṣe ninu aye wa, ko ni mu awọn nkan ti o yẹ ki mu jade ninu aye wa jade. Yoo kan ṣofo lasan ni, bi a ti ṣe ri aridaju rẹ ninu aye ọpọ ti o ti gbọ ọrọ rẹ ni ọpọlọpọ igba, ti aye wọn ko si tun gba iyipada nipasẹ ọrọ naa.

Nkan ẹkẹta ti yoo jẹ ki ọrọ Ọlọrun so eso ninu aye wa ni ki a fi a ma fi ifarada ṣe amulo rẹ. Wo o, bi a tilẹ fun irugbin wa si ori ilẹ ti o dara, ilẹ ti o ni ohun gbogbo ti o le jẹ ki irugbin naa ṣe daradara, a si tun gbọdọ jẹ ki irugbin naa pẹ to lori ilẹ naa lati le dagba ati lati le mu ikore wa. Bi gbogbo awọn agbẹ ti ṣe mọ, gbogbo irugbin ni o ni akoko fun iseso tirẹ. Nitorina, a gbọdọ fi suuru mojuto, ki a si tun duro de titi yoo fi ṣetan. Aijẹbẹ, nṣe ni a o parun ki asiko rẹ to to, ti a o si padanu ikore wa, ti a o si tun fi laala wa ṣofo.

Bẹẹ gẹgẹ, gbogbo irugbin ọrọ Ọlọrun ti a ba gbin si ori ọkan wa ni o ni asiko iseso tirẹ. Ti a ko ba si fẹ padunu eyi, a gbọdọ fi suuru mojuto titi yoo fi se eso. Eyi tunmọ si pe, a gbọdọ tẹsiwaju lati ma ṣe amulo rẹ, ki a si tun ma gbadura lori ohunkohun ti Ọlọrun ba sọ fun wa nipa ara rẹ, aye wa ati ọrọ aye wa titi a o fi ri esi ṣiṣe bẹ ẹ. Pe a ko i ti ma ri esi ṣiṣe amulo ohun ti Ọlọrun sọ ko tunmọ si pe a ko ni ri i. Irugbin ọrọ kọọkan ti Ọlọrun sọ fun wa di dandan ki o dagba ninu wa, ki o si tun se eso, ti a ba fi aaye gba a. Ṣugbọn bi siso eso rẹ yoo ṣe ya si jẹ nkan ti a le ma le sọrọ le lori – o ni i ṣe pẹlu iṣesi irugbin naa ati irufẹ idojukọ ti o nilo lati mojuto ninu aye wa.

Nitorina, ti a ba fẹ ki ọrọ Ọlọrun ki o so eso ododo, iwosan ati iṣoriire ninu wa, a nilo lati fi ifarada ṣe amulo rẹ titi a o fi ri pe ododo rẹ, ilera rẹ ati iṣoriire rẹ n jẹyọ ninu aye wa lẹkunrẹrẹ. Naamani, fun apẹrẹ, nilo lati wẹ ara rẹ ninu odo Jọdani ni igba meje ki a to wẹ ẹtẹ rẹ danu. Eyi ko wa tunmọ si pe iwọ naa gbọdọ ṣe ohun ti Ọlọrun so fun ọ lori awọn ọrọ aye rẹ kan ni ẹẹmeje, ki awọn isoro naa to jẹ yiyanju. Dipo eyi, o tunmọ si pe awọn igba kan ma n wa ti o jẹ wipe ki a ṣe amulo ọrọ Ọlọrun ni ẹẹkan tabi ẹẹmeji lori awọn ọrọ aye wa kan ko to lati fun wa ni ojutu lori wọn. A nilo lati duro ṣinṣin lori ṣiṣe amulo ọrọ rẹ fun igba ti o ṣe diẹ titi awọn esi ti a fẹ ri yoo fi wọle.

Wayi o, bi a o ṣe nilo lati pe to lori ṣiṣe amulo ohun ti Ọlọrun sọ ki a ba le ri eso rẹ lori awọn ọrọ aye kan ko ma ki i ṣe nkan ti mo le sọ. Ṣugbọn mo le sọ pe ti a ko ba rẹwẹsi tabi gbe igbẹkẹle wa ninu rẹ ju sọnu, a ko ni dojuti wa. Awọn esi ti a n foju sọna si yoo wa, yoo tilẹ tun ju ireti wa lọ paapaa. Ṣugbọn ti a ba n ṣe foniku-fọlande pẹlu ṣiṣẹ amulo ọrọ rẹ, ti a n gbọlude loorekoore kuro nidi ṣiṣe amulo ọrọ rẹ, nṣe ni a n fa irugbin ọrọ rẹ tu kuro lori ilẹ ọkan wa. Nitorina, ko le si ikore. Nṣe ni a o ri pe a ti fi irugbin ọrọ rẹ ati asiko ati ifarajin awa tikarawa ṣofo. Mo si wa gbadura pe ki opin de si ohunkohun ti o ni i ṣe pẹlu fifi ọrọ Ọlọrun ṣofo ti o n waye lọwọlọwọ ninu aye wa, ni orukọ Jesu. Amin.

Ki o ni ọsẹ ire.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo fi tayọtayọ ki ọ kaabọ sinu ọsẹ ti o so oṣu Èbìbí ati Òkúdù 2023 pọ mọ ara wọn. Mo si gbadura pe ki oju rẹ ṣi lati mọ ohun gbogbo ti o wa ni ọwọ rẹ ti o yẹ ki o gbin gẹgẹ bi irugbin iṣoriire ati pe ki ọkan rẹ gba okun ati itọni lati gbin awọn nkan wọnyi si ibi ti wọn yoo ti dagba, ti wọn yoo si tun mu ikore ti o ga wa fun ọ, ni orukọ Jesu. Amin.

Jesu Oluwa wa, nigbakan ti O n waasu si awọn Juu, sọ eyi: “Loootọ, loootọ ni mo wi fun yin, bi ko ṣe pe alikama ba bọ si ilẹ, ti o ba si ku, o wa ni oun nikan; ṣugbọn bi o ba ku, a si so ọpọlọpọ eso.” (Johanu 12:24) O si sọ awọn ọrọ wọnyi lati jẹ ki o ye awọn eniyan bi o ti ṣe ṣe pataki to fun un, gẹgẹ bi ọmọ bibi kan ṣoṣo Ọlọrun, lati ku ki Ọlọrun ba le ni ọpọlọpọ ọmọ ninu ogo rẹ (Heberu 2:10). Nitorina, nṣe ni ohun ti O sọ ni asiko yi n tọka si nkan ti ẹmi.

Amọ ṣa o, a ko gbọdọ gbagbe pe awọn ọrọ Oluwa wa wọnyi n kọkọ tọka si nkan ti ara, eyi ti gbogbo awọn ti o jẹ agbẹ si mọ. Agbẹ kọọkan ni o mọ pe lati sọ irugbin kan di ẹgbẹlẹgbẹ irugbin, a kọkọ gbọdọ gbin in sibikan. Eyi jasi pe, a kọkọ gbọdọ jọwọ irugbin naa fun iku. Aijẹbẹ, ko ni kuro ni irugbin kan debi pe yoo wa di ilọpọ lọwọ wa. Ṣugbọn ni kete ti a ba ti gbin sinu ilẹ ti o dara, a ti fun un ni anfaani niyẹn lati dagba ati lati sọ ara rẹ di ilọpo-ilọpo lọwọ wa.

Wayi o, ko ki i ṣe idi iṣẹ ọgbin nikan ni ilana yi ti wulo. Ko fẹrẹ si abala aye yi ti ko ti wulo. Fun apẹrẹ, ti o ba fẹ ki ọrọ rẹ pọ si, ọkan lara nkan ti o gbọdọ fi ara rẹ jin fun ni gbigbin owo rẹ sori okowo kan tabi omiran. Aijẹbẹ, ohun ti o ni ko ni pọsi. Ayafi ti yoo ba tun dinku si.

O wa ṣeni laanu pe ọpọ awọn ọmọ Ọlọrun ni oye nkan yi ko ye. Lotitọ, wọn fẹ pọ si ni ọrọ, ki wọn si le ṣe gbogbo awọn nkan nla ti Ọlọrun fẹ ki wọn fi owo ṣe. Nitorina, wọn a ma gbadura, gbaawẹ ati pẹlupẹlu fun awọn eniyan Ọlọrun ni nkan. Ṣugbọn wọn ko ma gbin owo ti Ọlọrun fun wọn sori okowo tabi katakara kankan, ki o ba le pada tọ wọn wa ni ilọpo-ilọpo. Dipo eyi, ni ọpọ igba, nṣe ni wọn a ko ohun gbogbo ti o ba ti ọdọ Ọlọrun tọ wọn wa jẹ, ti wọn a si tun ma duro ki O fi awọn nkan miran ranṣẹ.

Eyi ko wa le yọri si ki wọn ni ọrọ. O dara lotitọ ki a ma gbadura, nitori, nipasẹ adura, a le ri awọn ipese Ọlọrun fun wa lati gbadun aye wa gba. O si tun dara ki a ma fifun awọn ti o n bọ wa pẹlu ọrọ Ọlọrun, nitori nipa ṣiṣe eyi, a le gba awọn iṣẹ iyanu ti yoo gba wa lọwọ iyan tabi ti yoo fun wa ni iyara lati ṣe aṣeyọri. Amọ, a tun gbọdọ ni oye pe adura ko le jẹ ki irugbin ti a ko gbin dagba. Bẹẹ si ni, awọn iṣẹ iyanu ipese kan wa ti Ọlọrun ko ki i ṣe lojoojumọ. Iṣẹ iyanu Mana gan ko waye titi lailai fun awọn ọmọ Isiraẹli. O wa si opin ni asiko kan. O wa si opin nigba ti awọn ọmọ Isiraẹli de ibi ti wọn ti le ṣiṣẹ ọgbin lati kore wara ati oyin ti Ọlọrun ti pese silẹ fun wọn.

Nitorina, bi o tilẹ jẹ wipe Ọlọrun ṣetan lojoojumọ lati ṣe iṣẹ iyanu lati pese ohun ti a nilo ati lati sọ wọn di ilọpo-ilọpo fun wa, O tun jẹ ki o ye wa lati ipasẹ ọrọ rẹ pe ko ki i ṣe gbogbo nkan ti O ba fun wa naa ni burẹdi fun wa lati jẹ. Apa kan lara ipese rẹ fun wa jẹ irugbin ti a nilo lati gbin, ki a ba le gbe ipese rẹ fun aye wa ro. Ṣugbọn ti a ba tẹsiwaju lati ma fi aimoye jẹ ohun ti o yẹ ki a gbin, ko si bi a o ti ṣe le sọ ipese Ọlọrun fun wa di ilọpo-ilọpo, ti a o si tun le gbe ipese rẹ fun wa ro. Nitorina, dipo ti a o fi ma fi igba gbogbo ri ikore awọn nkan ti a gbin gba, eyi ti o jẹ iṣẹ iyanu funrarẹ, nṣe ni a o kan ri pe ọpọ igba ni a o ma duro de iṣẹ iyanu ipese miran ti a o tun ko jẹ bi a ti ṣe ma n ṣe. (Wo: 2Kọrinti 9:9-10)

O wa yẹ ki iwọ naa ri bayẹn idi ti ọpọ awọn eniyan Ọlọrun ṣe ma n pada ku sinu iṣẹ. Eyi ko yẹ ki o ri bẹ rara. Ṣugbọn ko ni ye ribẹ niwọn igba ti a ko ba ti mọ ifẹ Ọlọrun fun wa lori ilọrọ wa. Ki si ni ifẹ rẹ fun wa lori ilọrọ wa? Akọkọ, ifẹ rẹ ni pe ki a fi igbẹkẹle wa sinu rẹ nikan fun ọrọ wa, nitori Oun ni O ma n fun eniyan ni amuyẹ lati di ọlọrọ. Ekeji, ifẹ rẹ ni ki a ya irugbin wa sọtọ kuro lara burẹdi wa. Ẹkẹta ni pe ki a gbin irugbin wa si ibi ti o tọ, iyẹn sori okowo ti o tọ ati sinu awọn eniyan ti o tọ. Nipa ṣiṣe eyi, aṣẹ ibukun rẹ ti o sọ pe, “Niwọn igba ti aye ba ṣi wa, igba ọgbin ati ikore ko ni ṣe alaima wa,” ko ni kuna lati ṣiṣẹ ninu aye wa fun ilọrọ wa (Jẹnẹsisi 8:22).

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ miran ninu oṣu Èbìbí 2023. Mo si gbadura pe ki ọkan rẹ ma fi gbogbo ṣe ifẹ Ọlọrun fun ọ pẹlu iyara ati otitọ ni gbogbo asiko, ki ẹlomiran ma ba gba ààyé rẹ ninu ijọba ayeraye Ọlọrun. Amin.

Johanu Onitẹbọmi, nigbakan ti o n waasu fun awọn ọmọ Isiraẹli, sọ eyi fun wọn: “Ẹ so eso ti o yẹ fun ironupiwada. Ki ẹ ma si ṣe ro ninu ara yin pe, ‘Awa ni Abrahamu ni baba.’ Emi wi fun yin, Ọlọrun le mu awọn ọmọ jade lati inu awọn okuta wọnyi wa fun Abrahamu.” (Mátíù 3:8-9) Ki ni idi ti o fi sọ awọn ọrọ wọnyi si wọn? Idi ni pe bi o tilẹ jẹ wipe a ti fi ifẹ Ọlọrun han wọn nipasẹ awọn Iwe mimọ wọn, wọn ko ma gbe ni ibamu pẹlu rẹ. Sibẹsibẹ wọn ko dẹkun a ti ma dunnu lori wipe wọn jẹ arọmọdọmọ Aburahamu.

O wa ṣeni laanu wipe ọpọ loni lo dabi awọn wọnyi. Orukọ ati iyi awọn obi wọn tabi ti awọn baba ati iya awọn obi wọn ni wọn n fi ṣaye. Ṣugbọn awọn funrawọn ko ni orukọ rere tabi iyi kankan ti o le jẹ ki ẹnikẹni ti o ba mọ nkan ti o n ṣe fẹ da nkankan pọ pẹlu wọn. Nkan ti wọn ko si mọ ni pe ti wọn ko ba gbe igbe aye wọn ni ibamu pẹlu orukọ rere ati iyi awọn ti wọn ti ara wọn jade, asiko kan n bọ ti ko ni si ẹnikẹni ti yoo ka ibaṣepọ wọn pẹlu awọn ti wọn ti ara wọn jade wa si mọ. Dipo eyi, nṣe ni wọn yoo yi oju pada sọdọ awọn ti o n rin ni ipasẹ awọn ẹni nla yi, ti wọn yoo si bẹrẹ si ni kan sara si orukọ wọn.

Eyi gan wa ni nkan ti Johanu Onitẹbọmi n fi han awọn eniyan rẹ, awọn ara Isiraẹli, nigbati o sọ awọn ọrọ inu Iwe mimọ ti o wa loke yi fun wọn. O fẹ ki wọn mọ pe wọn ko le jẹ ogun ibaṣepọ Aburahamu pẹlu Ọlọrun. Nṣe ni awọn naa yoo nilo lati fidi ibaṣepọ wọn pẹlu rẹ mulẹ nipa mimu un ni pataki gẹgẹ bi Aburahamu ti ṣe. Ki si ni idi? Idi ni wipe nṣe ni a ma n fi idi ibaṣepọ lọlẹ ni, a ki i jogun rẹ.

Wo o, pe ẹnikan jẹ ọrẹ ti o dara si awọn obi rẹ ti o ti ku ko tunmọ si pe yoo jẹ ọrẹ daradara si iwọ naa pẹlu. Ti o ko ba ba ẹni naa lo bi awọn obi rẹ ti ṣe ba a lo, ti o ba ya, o le yi ọkan rẹ pada nipa rẹ, ki o si ma ni nkankan ṣe pẹlu rẹ mọ. Ṣe eyi wa jasi pe o ti yi ọkan rẹ pada nipa awọn obi rẹ naa? Rara o! Ọrọ ibaṣepọ rẹ pẹlu awọn obi rẹ ko ni iṣoro. Ṣugbọn ko si bi yoo ṣe tẹsiwaju pẹlu rẹ ninu ibaṣepọ kan naa, ti o ko ba ni fun ni irufẹ ọwọ ati ifẹ ti awọn obi rẹ fun un.

Nibakanaa, Johanu fẹ ki awọn Juu yi mọ pe ti wọn ko ba ni mu Ọlọrun ni pataki bi baba-nla wọn, Aburahamu, ti ṣe ṣe, wọn ko ni jẹgbadun Ọlọrun bi o ti ṣe jẹ igbadun rẹ. Dipo eyi, nṣe ni Ọlọrun yoo wa awọn ọmọ miran fun ara rẹ ti yoo ba lo pọ bi Aburahamu ti ṣe ṣe, bi O tilẹ wa nilo lati gbe awọn ọmọ naa dide lati ara awọn okuta kan. Nkan ti eyi si n sọ fun wa ni pe ti a ko ba ni ṣe ifẹ Ọlọrun lati ọkan wa, ti o ba to asiko kan, yoo wa awọn miran ti yoo ṣe Oun ti O fẹ lati rọpo wa, bi o tilẹ jẹ wipe idile awọn ti wọn ti sin in, ti wọn si fẹran rẹ ni a ti jade wa.

A si wa ri apẹrẹ ninu Iwe mimọ lori bi O ti ṣe rọpo awọn kan ti wọn ko ni ṣe ifẹ rẹ pẹlu awọn ti o ṣetan lati ṣe ohun ti O fẹ. Fun apẹrẹ, O fi Samuẹli rọpo awọn ọmọkunrin Eli, O si fi ṣe onidajọ fun Isiraẹli dipo wọn. O tun rọpo Ọba Sọọlu pẹlu Dafidi, bi o tilẹ jẹ wipe Dafidi ko ki i ṣe ọmọ-ọba. Adura mi si pe o ko ni ba ọrọ rẹ de ibi ti yoo ti rọpọ iwọ naa pẹlu ẹlomiran ninu ijọba rẹ, ninu idile rẹ, ni adugbo rẹ tabi ni ibi iṣẹ tabi ile-iwe rẹ.

Ṣugbọn iwọ naa nilo lati bẹrẹ si ni mu ibaṣepọ rẹ pẹlu rẹ ni ọkunkundun. O nilo lati bẹrẹ si ni mu ṣiṣe ifẹ rẹ ni pataki. Ki ni awọn nkan ti O fẹ ki o ṣe? Awọn ibo wo ni O fẹ ki O lọ? Awọn eniyan wo ni O fẹ ki o ran lọwọ pẹlu nkan ini rẹ? O nilo lati fi ara balẹ lati gbadura ati lati kẹkọ ninu ọrọ rẹ lati mọ awọn nkan wọnyi ati lati fi ara rẹ jin fun wọn. Aijẹbẹ, ojọkan yo jọkan ti yoo jasi dandan fun un lati wa ẹlomiran lati ṣe ohun ti o kọ lati ṣe, nitoripe iṣẹ rẹ ko jẹ alaimaṣe.

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)