Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ti o ga ni mo ki ọ kaabọ sinu ọsẹ miran ninu oṣu Ogun 2025. Adura mi ni pe ki ọrọ Ọlọrun ti o n fi igba gbogbo tọ ọ wa ninu ijọ yi ma kuna lati mu ifẹ rẹ ṣẹ ninu aye rẹ, ni orukọ Jesu. Amin.

Bi a ti ṣe ri ninu bibeli, igbakugba ti Ọlọrun ba sọrọ, nṣe ni yoo duro ti ọrọ naa lati mu wa si imuṣẹ (Jeremáyà 1:12). Ṣugbọn imuṣẹ ọrọ Ọlọrun ko ki i ṣadede waye. Iha ti awọn ti O n ba sọrọ ba kọ si ọrọ rẹ naa tun ṣe pataki. Aijẹbẹ, ọrọ rẹ le ma jẹ mimuṣẹ ninu aye wọn.

Fun apẹrẹ, bi o tilẹ jẹ wipe Ọlọrun ṣe ileri lati fi ilẹ Kenani fun awọn ọmọ Isiraẹli, ọpọ ninu wọn ti o jade lati Ijibiti wa ni ko le wọ ibẹ. Ki ni idi? Idi ni pe iha ti wọn kọ si ileri Ọlọrun ko dara. Wọn ko gbagbọ pe Ọlọrun le mu ileri ti O ṣe fun wọn ṣẹ. Nitorina, nigba ti O sọ fun wọn pe ki wọn wọ ilẹ naa lọ lati gba a, wọn kọ lati ṣe bẹẹ. (Wo: Númérì 13-14)

Wayi o, nitoripe wọn kọ lati wọ ilẹ Kenani lati gba a nigba ti Ọlọrun sọ wipe ki wọn ṣe bẹ ẹ, Oun naa wa pinnu pe Oun ko ni fun wọn ni ilẹ naa mọ afi awọn ọmọ wọn. Ki wa ni o pada ṣẹlẹ si wọn? Nṣe ni wọn ranmu ninu aginju titi gbogbo wọn fi ṣegbe.

Nibakanna, a ri ọpọ Kirisitiẹni loni ti o n ranmu laye nitoripe wọn kọ lati tẹwọgba ọrọ Ọlọrun fun aye wọn, ki wọn ṣi ṣiṣẹ tọ ọ. Ki wa ni idi ti wọn fi kọ lati tẹwọgba ọrọ rẹ, ki wọn si ṣiṣẹ tọ ọ? Ibẹru jẹ ọkan lara awọn idi wọnyi. Ti awọn eniyan ba n bẹru bi nkan ti yoo tẹyin ki wọn ṣiṣẹ lori ọrọ Ọlọrun yọ yoo ṣe ri, wọn le ma ṣiṣẹ lori rẹ.

Lotitọ, ko si ẹnikẹni ninu wa ti o le fọwọ sọya sọ wipe bi nkan ti yoo tẹyin ki a ṣiṣẹ lori ọrọ Ọlọrun yọ yoo ṣe ri re e. Ṣugbọn ti a ba ni igbẹkẹle ninu pe Ọlọrun ko ni lailai doju ti wa, a o ṣiṣẹ lori ọrọ rẹ, bi o tilẹ jẹ wipe a ko mọ nkan ti yoo tẹyin rẹ jade. Ti a ba si ṣe eyi, o di dandan ki a ri ogo rẹ.

Igberega tun jẹ idi miran ti awọn kan ko ki i fi ṣiṣẹ lori ọrọ Ọlọrun. Awọn wọnyi, bi Ọba Sọọlu ati Ọba Asa, ro wipe awọn mọ ju Ọlọrun lọ ati wipe ete ti wọn san ju ki wọn fi igbẹkẹle wọn sinu rẹ, ki wọn si ṣe ohun yowu ti O ba sọ fun wọn pe ki wọn ṣe. Ṣugbọn bibeli sọ wipe omugọ Ọlọrun san ju ọgbọn eniyan lọ. O tun sọ fun wa pe ki a ma gbẹkẹle oye wa tabi ki a ro wipe a gbọn loju ara wa ni mimojuto ọrọ aye wa. Aijẹbẹ, bi o ti ṣe ri fun Sọọlu ati Asa, ko ni pẹ ti yoo fi han si awa naa pe omugọ ni ọgbọn wa. (Wo: 1 Sámúẹ́lì 15; 2 Kíróníkà 16; Ìwé Òwe 3:5-7; 1 Kọ́ríntì 1:25)

Lafikun, a ri awọn ti ko ki i ṣiṣẹ lori ọrọ Ọlọrun nitoripe wọn ko ki i farabalẹ tẹti si nkan ti o n sọ fun wọn. Ki ni idi? Idi ni pe ifẹ owo, ifẹ iyi, ifẹ faaji tabi ifẹ ipo ko jẹ ki wọn roju-raaye. Nkan ti ko wa ye wọn ni wipe awọn nkan wọnyi ko le fun wọn ni itẹlọrun laye. Ọlọrun nikan ni o le fun wọn ni itẹlọrun. Niwọn igba ti wọn ko si wa ni kọbiara si nkan ti O n sọ fun wọn, nṣe ni wọn o ma fi ayeraye le itẹlọrun kiri, ti wọn ko si ni ri.

Wayi o, mo le ma mọ idi ti iwọ naa ko ki i fi ṣiṣẹ lori ọrọ Ọlọrun ti o n tọ ọ wa bi o ti ṣe tọ. Ṣugbọn mo mọ wipe ti o ko ba ṣiṣẹ lori ọrọ rẹ, ko si bi aye rẹ ṣe fẹ fidi mulẹ ninu ifẹ rẹ. Ti o ba wa fẹ ki aye rẹ fi idi mulẹ ninu ifẹ rẹ, gbe ibẹru, igberaga tabi ohunkohun ti ko jẹ ki o roju-raaye ti ṣẹgbẹ kan, ki o ba a le kọbiara si gbigbọ ati ṣiṣe ọrọ Ọlọrun ni ẹkunrẹrẹ. Njẹ ki o gba okun lati ṣe eyi ni kiakia, ki aye rẹ ba a le da ohun gbogbo ti Ọlọrun fẹ ki o da. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai-lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ti o ga ni mo ki ọ kaabọ sinu ọsẹ miran ninu oṣu Ògún 2026. Adura mi ni pe ki Ọlọrun ma a fi igba gbogbo jẹ ki ọkan rẹ wa ni pipe pẹlu rẹ, ki O ba a le ri ọ lo lati gbe ijọ rẹ ro lati jẹ ohun ti O fẹ ki o jẹ. Amin.

Bi a ti ṣe ri ninu bibeli, ẹni kan ṣoṣo ti O le gbe ijọ Ọlọrun ro ni Jesu Kirisiti Oluwa wa. Wo nkan ti O fi igbakan ri sọ fun awọn ọmọ ẹyin rẹ lori eyi:

“Emi wi fun ọ, iwọ ni Peteru ati pe ori apata yii ni emi yoo kọ ijọ mi le, ati ẹnu-ọna ipo-oku ki yoo le bori rẹ.” (Mátíù 16:18)

Ṣe o ri bayẹn? Tani o ni ijọ? Jesu Oluwa ni. O wa ṣeni laanu pe ọpọ awọn adari ijọ loni ni wọn ro wipe awọn ni wọn ni awọn ijọ Ọlọrun ti o wa ni abẹ isakoso wọn. Ṣugbọn awọn kọ ni wọn ku fun ẹṣẹ awọn ti o wa ni abẹ iṣakoso wọn. Lafikun, awọn kọ ni wọn tun awọn ti o wa ni abẹ iṣakoso wọn da.

Ẹni ti o ku fun ẹṣẹ gbogbo wa ni Jesu Oluwa. Ẹni ti O si tun gbogbo wa da ni Ọlọrun. Ti ẹnikẹni ba wa n gbiyanju lati gba aaye wọn, o di dandan ki ẹni naa ba ara rẹ ninu iyọnu bi o pẹ bi o ya. Idi si ni yi ti ọpọ awọn adari awọn eniyan Ọlọrun fi ṣe ba ara wọn ninu oniruuru iyọnu ti wọn ko tilẹ le ba ẹnikankan sọ loni. Wọn ti n gbiyanju lati gba aaye ti ko ki i ṣe ti wọn ninu aye awọn eniyan Ọlọrun.

Ni kukuru, niwọn igba ti o jẹ wipe Oluwa ni ẹni ti O ni ijọ, Oun nikan naa ni O le gbe ijọ rẹ ro lati jẹ ohun ti o yẹ ki o jẹ. O si ti sọ wipe Oun yoo ṣe bẹẹ gẹgẹ. Lọna wo? Ọkan lara ọna ti O fi n ṣe eyi ni nipa ṣiṣe ọmọ ijọ kọọkan yẹ lati ṣe awọn nkan ti yoo ja si igbero gbogbo awọn ọmọ ijọ yoku lapapọ.

Nitorina, ti o ba n ṣe ohunkohun ninu ijọ lọwọlọwọ yi ti o n bukun fun awọn eniyan Ọlọrun, nṣe ni ki o mọ wipe Jesu Kirisiti Oluwa funrarẹ ni O n ṣiṣẹ nipasẹ rẹ. Ti O ba si fẹ ki O ṣiṣẹ nipasẹ rẹ siwaju si lati bukun fun ọpọ eniyan si, nṣe ni ki o rẹ ara rẹ silẹ niwaju rẹ, ki o si fi ara rẹ si arọwoto rẹ.

Ọpọ ni o wa ninu ijọ loni ti Oluwa ko lo nitori igberaga wọn. Awọn wọnyi ro wipe ti awọn ko ba ṣe awọn nkankan ninu ijọ Ọlọrun, awọn nkan naa ko ni lailai jẹ ṣiṣe. Ṣugbọn nkan ti ko ye wọn ni pe wọn ko le ṣe ohun rere kankan fun ijọ kankan ti ko ba ṣe wipe Oluwa funrarẹ ba jẹ ki o ṣeeṣe fun wọn lati ṣe e. Niwọn igba ti eyi si ri bẹ ẹ, O le fi awọn miran rọpo wọn ni ọjọkọjọ ati ni asikokasiko.

Siwajusi, a ri ọpọ ninu ijọ ti Oluwa ko ma a lo nitoripe wọn ko fi ara wọn si arọwọto rẹ. Gbogbo igba ni wọn ma n ri awawi kan tabi omiran lati ma wa ni ibi ti O fẹ ki wọn wa ati lati ma ṣe ohun ti O fẹ ki wọn ṣe. Irufẹ awọn wọnyi n fojufo pe O le fi awọn miran rọpo wọn ti wọn ko ba tete ronupiwada.

Ki a ma fọrọgun, koko nkan ti a n sọ ni pe Oluwa le gbe ijọ rẹ ro yala pẹlu mi tabi laisi mi. Ti mo ba rẹ ara mi silẹ, ti mo si fi ara mi si arọwọto rẹ, yoo lo mi. Ṣugbọn ti mo ba n rin ninu igberaga tabi ti mo kọ lati fi ara mi si arọwọto rẹ, O di dandan ki o wa awọn miran ti yoo lo lati gbe ijọ rẹ ro. Eyi si wa le gba asiko nitootọ. Ṣugbọn O di dandan ki O ṣe ohun ti o yẹ. Njẹ yoo wa pin mi ni ere fun fifi ara mi si ipọ alaiwulo fun un bi? Rara o!

Nitorina, ẹ jẹ ki a ma a fi igba gbogbo fi si ọkan pe Oluwa yoo gbe ijọ rẹ ro yala pẹlu wa tabi laisi wa. Nipa ba yi, a o le rẹ ara wa silẹ ati fi ara wa si arọwọto rẹ ni igbakugba ati lasiko-kasiko. Nigba ti asiko ba si to, a o gba ere ti o ga lati ọwọ rẹ.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ miran ninu oṣu yi. Adura mi ni pe ki o ni iriri ibalẹ-ọkan Ọlọrun ti o kọja oye eniyan nibikibi ti ara ba ti n ni ọ ninu aye rẹ, ki ayọ rẹ ba a le kun. Amin.

Bi a ti ṣe n bẹrẹ ọsẹ yi, mo fẹ gba ọ niyanju pẹlu itan Pọọlu ati Sila ninu tubu ni ilu Filipi. Awọn ọkunrin wọnyi ni a mu, ti a na, ti a si tun sọ sinu tubu nitoripe wọn tu ẹrubinrin kan silẹ kuro lọwọ ẹmi eṣu ti o n lo o. Ṣugbọn, dipo ti eyi yoo fi fa irẹwẹsi si ọkan wọn, nṣe ni wọn bẹrẹ si ni gbadura, ti wọn si n yin Ọlọrun. Wo nkan ti Luuku sọ nipa eyi:

“Ṣugbọn larin ọganjọ Paulu on Sila ngbadura, nwọn si nkọrin iyìn si Ọlọrun: awọn ara tubu si ntẹti si wọn.” (Ìṣe Àpọ́sítélì 16:25)

Wayi o, bi gbogbo wa ti ṣe mọ, inu tubu jẹ ibi-ìdè, ibi inira ati ibi ti ireti ti pin. Sibẹsibẹ, Pọọlu ati Sila ni iriri ibalẹ-ọkan Ọlọrun ninu tubu. Itan wọn wa kọ wa pe awọn iṣẹlẹ aye wa ko nilo lati sakoso ọkan wa. Idi si ni pe lati ipasẹ idurotini Ọlọrun ni ibalẹ-ọkan otitọ ti n wa, eyi ti ko ni nkankan ṣe pẹlu ki iṣorọ ma wa.

Ki wa ni a le tipasẹ Pọọlu ati Sila kọ? Akọkọ ni pe ibalẹ-ọkan a ma wa nipasẹ gbigbẹkẹle Ọlọrun. Bi o tilẹ jẹ wi pe a na wọn, ti a si tun de wọn mọlẹ, Pọọlu ati Sila ko kun tabi ṣaroye. Dipo eyi, nṣe ni wọn gbẹkẹle Ọlọrun ninu inira wọn. Àìsáyà 26:3 sọ wipe, “Iwọ o pa a mọ li alafia pipé, ọkàn ẹniti o simi le ọ: nitoriti o gbẹkẹle ọ.” Nitorina, ti a ba fi igbẹkẹle wa sinu Ọlọrun, yoo fun wa ni ibalẹ-ọkan ti o peye.

Ekeji, a kọ nipasẹ wọn pe ibalẹ-ọkan a ma ja si iyin. Dipo ti wọn yoo fi ma kun sinu, Pọọlu ati Sila gbadura, wọn si tun kọ orin iyin si Ọlọrun lọganjọ oru. Ijọsin wọn fi han wa pe ọdọ Ọlọrun ni ibalẹ-ọkan ti ma n wa. Fílípì 4:7 sọ wipe, “Ati alafia Ọlọrun, ti o jù ìmọran gbogbo lọ, yio ṣọ ọkàn ati ero nyin ninu Kristi Jesu.” Eyi tunmọ si pe nibi ti ibalẹ-ọkan ba ti wa, ọkan wa yoo wa balẹ to lati yin Ọlọrun.

Ẹkẹta, a kọ lati ara nkan ti o ṣẹlẹ si Pọọlu ati Sila ninu tubu pe ibalẹ-ọkan a ma ṣiṣẹ fun itusilẹ agbara Ọlọrun. Bi wọn ti n yin Ọlọrun pẹlu ọkan ti o balẹ lẹkunrẹrẹ, Ọlọrun jẹ ki ilẹ mi titi, awọn ilẹkun tubu ṣi, a si ja gbogbo ide. Wa ranti wipe Sáàmù 34:19 sọ wipe, “Ọ̀pọlọpọ ni ipọnju olododo; ṣugbọn Oluwa gbà a ninu wọn gbogbo.” Nitorina, bi o ti wu ki isọro wa to, ibalẹ-ọkan lati ọdọ Ọlọrun le tu agbara rẹ silẹ lati yanju gbogbo wọn lẹyọkọọkan.

Ẹkẹrin, a kọ lati ara wọn pe iriri ibalẹ-ọkan lati ọdọ Ọlọrun le bukun fun awọn miran. Oluṣọ tubu ati idile rẹ gbagbọ ninu Jesu, wọn si di ẹni igbala nitori iriri ibalẹ-ọkan ti Pọọlu ati Sila ni ninu tubu. Mátíù 5:16, “Ẹ jẹ ki imọlẹ nyin ki o mọlẹ tobẹ̃ niwaju enia…” Nitorina, ti a ba fi aaye gba ibalẹ-ọkan lati ọdọ Ọlọrun lati jọba ninu aye wa, yoo jẹ ki awọn miran wa si ọdọ Ọlọrun nitori wa.

Ni akotan, ibalẹ-ọkan Ọlọrun wa fun wa pẹlupẹlu ni gbogbo asiko ti nkan nira. Adura ati iyin yoo fun igbagbọ wa ni okun ni asiko idanwo. Ọlọrun le sọ inu tubu di ile ẹri jijẹ. Igbagbọ rẹ ti ko yẹsẹ ni asiko iṣoro le dari awọn miran sọdọ Kirisii. Nitorina, bi o tilẹ wa ninu tubu loni, yala tubu aini, tubu aisan, tubu isoro ẹbi, tubu ijani-ni-tanmọ tabi tubu inunibini, ma ṣe sọ ireti nu. Ti o ba tẹsiwaju lati fi igbẹkẹle rẹ sinu Ọlọrun, ti o n gbadura si, ti o si n yin-in, yoo fun ọ ni ibalẹ-ọkan ati idande ni asiko ti o tọ.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu oṣu Ògún 2026. Adura mi si ni pe ki Ọlọrun mu gbogbo eto rere ti O ni fun aye rẹ ninu oṣu naa wa si imuṣẹ, ki O si tun lo ọ lati mu eto rere rẹ fun aye ọpọ awọn miran naa wa si imuṣẹ, ni orukọ Jesu. Amin.

Bi a ti ṣe ri ninu bibeli, bi o ti wu ki eniyan ma ja mọ nkankan to tabi ki o buru to laye yi, Ọlọrun si le mu eto rere rẹ fun aye wọn wa si imuṣẹ, ki O si tun lo wọn gẹgẹ bi irinṣẹ lati bukun fun aye wọn miran. Nkan ti O nilo ni ki wọn tẹti silẹ bẹlẹjẹ lati gbọ nkan ti O fẹ sọ fun wọn. Ki wọn si to mọ nkan ti o n ṣẹlẹ si wọn, yoo ti yi ohun gbogbo pada si rere fun wọn.

Fun apẹrẹ, nigba ti Jesu Oluwa wa pade arabinrin Samaria kan ni eti kanga Jakọbu ti o wa ni Sikari, nkan kan ṣoṣo ti O fẹ ni ki arabinrin yi tẹti si ohun ti O fẹ sọ fun-un. Ṣe o wa ṣetan lati gbọ tirẹ? Rara o! O kan fẹ pọn omi, ki o si poora ni. (Wo: Jòhánù 4)

Ki wa ni o fa ti ko fi fẹ ba ẹnikẹni sọrọ ni asiko naa? Idi ni pe o n gbiyanju lati sa fun otitọ ọrọ lori awọn iṣoro aye rẹ. Ṣugbọn nigba ti Oluwa, nipasẹ ifihan Ọlọrun, bẹrẹ si ni tu aṣiri otitọ ti o n sa a fun si i, o bẹrẹ si ni tẹti silẹ lati gbọ nkan ti O fẹ sọ. Nigba ti Oluwa si ṣetan pẹlu rẹ, nṣe ni o sure lọ sinu ilu rẹ lati pe gbogbo awọn ti o ri lati wa gbọ ọrọ rẹ. Iwọ naa wo nkan ti a sọ lori eyi ninu bibeli:

“Nigbana li obinrin na fi ladugbo rẹ̀ silẹ, o si mu ọ̀na rẹ̀ pọ̀n lọ si ilu, o si wi fun awọn enia pe, Ẹ wá wò ọkunrin kan, ẹniti o sọ ohun gbogbo ti mo ti ṣe ri fun mi: eyi ha le jẹ Kristi na? Nigbana ni nwọn ti ilu jade, nwọn si tọ̀ ọ wá.” (Jòhánù 4:28-30)

Njẹ o ri bayẹn? Nkan ti Jesu ba obinrin yi sọ ba ọkan rẹ pade debi wipe o wọ inu ilu rẹ lọ lati lọ pe awọn ti o wa nibẹ wa lati wa ri Jesu. Ṣugbọn arabinrin yi ki i ṣe ẹnikan ti a le pe ni obinrin rere. O jẹ enikan ti o ti ni ọkọ marun ọtọọtọ. Ọkunrin ti o si wa pẹlu rẹ ni asiko ti o pade Jesu yi gan ko ki i ṣe ọkọ rẹ. Ẹnikan ti wọn kan jọ n ṣe iṣekuṣe papọ ni ki a pe. Nitorina, obinrin yi ko le jẹ ẹnikan ti o ni orukọ rere ninu ilu naa.

Ṣugbọn bi o tilẹ jẹ wipe Oluwa mọ ohun gbogbo nipa iwa buburu rẹ, ko da a lẹbi rara. O kan ba sọrọ lori pataki ki o mọ Ọlọrun lotitọ, ki o si bẹrẹ si ni sin-in ninu ẹmi ati ni ododo ni. Eyi lo si yi aye rẹ pada. Eyi ni o jẹ ki o gbagbẹ nipa pe oun ko ni orukọ rere, ti o si sure lọ sọ fun gbogbo awọn ti o le ri ninu ilu rẹ lati wa wo Jesu. Jesu Oluwa si wa tipasẹ rẹ ni anfaani lati bukun fun ọpọ eniyan ninu ilu rẹ.

Wayi o, ti Ọlọrun ba le lo obinrin ti ko ni orukọ rere yi lati yi aye ọpọ pada ninu ilu rẹ, wa ro nkan ti O le ṣe pẹlu awọn ti o ni orukọ rere. Sibẹsibẹ, ko ki i ri ọpọ awa ti a ni orukọ rere lo lati bukun fun awọn ti o wa ni ayika wa. Ki ni idi? Idi ni pe a ko ki i fun wọn ni idi ti o daju lati tọ Ọlọrun wa nipasẹ igbagbọ ninu Kirisiti Jesu.

Arabinrin Samaria yi fun awọn ara ilu rẹ ni idi to daju lati wa sọdọ Jesu Oluwa. Ko kan ba wọn sọrọ nipa iriri rẹ pẹlu Jesu ṣakala. Ti o ba jẹ wipe o kan lọ sọrọ sakala nipa rẹ ni, wọn ko ba ma ti tọ ọ wa fun igbala. Nitorina, ti a ba fẹ ki awọn eniyan tipasẹ wa tọ Jesu Oluwa wa wa, ki wọn si di alabukunfun, a ko le ma sọrọ sakala nipa rẹ. Ti a ko ba si ni sọrọ sakala nipa rẹ, yoo jẹ wipe aye wa ti gba iyipada nipasẹ rẹ nitootọ niyẹn.

Ṣe aye rẹ ti wa gba iyipada nipasẹ Jesu Kirisiti Oluwa wa nitootọ? Ti o ba ti gba iyipada nipasẹ rẹ, bẹrẹ si ni fun awọn ti o wa ni ayika rẹ ni idi ti o daju lati tọ ọ wa, idi ti o daju lati gbọ ọrọ rẹ, idi ti o daju lati gbadura si i ati idi ti o daju lati fi aye wọn fun. Bi o ba si ṣe n ṣe eyi, Ẹmi Ọlọrun yoo ma a ba ọ ṣiṣẹ lati yi aye wọn pada ati lati mu ogo wa fun Ọlọrun.

Kí o ní oṣù Ògún 2026 alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: Ki oore-ofẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ ti o gbẹyin ninu oṣu Agẹmọ. Adura mi ni pe ki Ọlọrun ri daju pe igbagbọ rẹ ko yẹ bi o ti wu ki awọn nkan ti Satani n ju si ọ ti to, ni orukọ Jesu. Amin.

Ọkan lara nkan ti a ri ninu Iwe mimọ ni pe Ọlọrun, lati igba de igba, ma n fi aaye gba Satani lati dan awọn ọmọ rẹ wo. Eyi ko si ni i ṣe pẹlu ki wọn ba a le kuna. Dipo bẹẹ, o ni i ṣe pẹlu fifi igbagbọ wọn han ninu rẹ gẹgẹ bi ojulowo, ki a ba a le fi ogo fun nipasẹ iduro ṣinṣin wọn. (Wo: 1Pétérù 1:6-7)

Fun apẹrẹ, ọkan lara awọn idi ti Ọlọrun fi fi aaye gba Satani lati dan Joobu wo ni ki o le han kedere si Satani pe ojulowo ni igbagbọ Joobu ninu rẹ, ko ki i ṣe ofege. Ṣaaju idanwo yi, Satani ti sọ fun Ọlọrun pe idi ti Joobu fi jẹ olododo si ni pe o n jẹ igbadun ibukun ati aabo rẹ. Eyi jasi pe, ti Ọlọrun ba mu aabo Joobu kuro, ti O si fi aaye gba Satani lati pọn-ọn loju, ko ni sin Ọlọrun mọ – nṣe ni yoo bẹrẹ si ni gbe ṣepe. (Wo: Jóòbù 1&2)

Bawo wa ni Ọlọrun ṣe fẹ fi han Satani pe nkan ti o ro nipa Joobu ko ri bẹ ẹ? Nipa fifi aaye gba a lati dan-an wo ni. Ṣe Joobu wa kuna bi? Rara o, ko kuna. Ki ni idi? Idi ni pe Ọlọrun pa a mọ. Ọlọrun ko jẹ ki Satani dan-an wo kọja nkan ti o le farada. Lafikun, Ọlọrun fun ni okun lati farada idanwo naa.

Nibakanna, Ọlọrun le pa awa naa mọ nigba ti eṣu ba n dan wa wo. Lọna wo? Lakọkọ, gẹgẹ bi O ti ṣe fun Joobu, ko ni gba ki a dan wa wo kọja agbara wa. Ekeji, yoo ṣe wa yẹ pẹlu ohun gbogbo ti a nilo lati rin ni iṣẹgun lori awọn idanwo Satani. (Wo: 1 Kọ́ríntì 10:13)

Sugbọn awa naa gbọdọ kọ iha ti o tọ si awọn idanwo tabi idojukọ ti o n tọ wa wa. Lọna wo? Akọkọ, a ko gbọdọ lero wipe a le bori wọn nipa ọgbọn tabi ilakaka wa. Aijẹbẹ, a o jọ ara wa loju gẹgẹ bi Peteru ti ṣe jọ ara rẹ loju nigba ti o ṣẹ Jesu. Ekeji, a gbọdọ gbẹkẹle Ọlọrun patapata fun gbogbo nkan ti a nilo, pẹlupẹlu suuru, lati bori gbogbo idanwo wa. Ẹkẹta, a gbọdọ ma a fi igba gbogbo ran ara wa leti wipe olododo ni Ọlọrun, Ẹni ti ko ni jẹ ki a dan wa wo kọja nkan ti agbara wa le gbe ṣugbọn ti yoo gbe wa ro ni gbogbo asiko idanwo naa.

Wayi o, ibi ti awọn eniyan ko ba ti ni oye yi lati le ṣe amulo rẹ, nigba ti eṣu ba n dan wọn wo, o ṣeeṣe ki wọn bẹrẹ si ni kun si Ọlọrun tabi ki wọn bẹrẹ si ni gboju le ẹran ara fun nkan ti o jẹ wipe Ẹmi Ọlọrun nikan ni O le ṣe. Eyi yoo si ja si iṣubu fun wọn, ti a ko ba ṣaanu fun wọn. Nitorina, bi o ti wu ki awọn nkan ti Satani n gbe ko ọ loju ri, yala wọn tobi ni tabi wọn kere, fi awọn nkan wọnyi si ọkan lati ṣiṣẹ tọ wọn. Dipo ki oju ki o si ti ọ, nṣe ni a o jẹ ki o ni iriri awọn asiko itura ati imupadabọsipo ti o ga lati ọdọ Oluwa.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ ati aanu jẹ tirẹ lati ọdọ Ọlọrun Baba wa ati Jesu Kirisiti Olurapada wa. Mo ki ọ pẹlu ayọ kaabọ sinu ọsẹ miran ninu oṣu yi, iyẹn oṣu Agẹmọ 2025. Adura mi ni pe ki ibukun kọọkan ti o ti gba lọfẹ lati ọwọ Ọlọrun ṣiṣẹ ninu aye rẹ ninu ọsẹ naa lati jẹ ki o tayọ ninu ohun gbogbo ti o ba n ṣe. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju pẹlu awọn ọrọ inu Iwe mimọ yi:

“Emi o si ṣe awọn ati ibi ti o yi oke mi ká ni ibukún; emi o si jẹ ki ojò ki o rọ̀ li akoko rẹ̀, òjo ibukún yio wà.” (Ìsíkíẹ̀lì 34:26)

Gbogbo ọmọ Ọlọrun ni o nifẹ lati ma a ni iriri awọn ibukun rẹ ninu aye wọn. Amọ ṣa o, ileri Ọlọrun kọja ki O kan fun wa ni ibukun diẹ ranpẹ; o ni i ṣe pẹlu ki O rọ ojo ibukun sori wa – ibukun yanturu, ibukun ti o n ṣan bi odo ati ibukun ti o bọ si asiko. Gẹgẹ bi ojo ti ma n sọ ilẹ-gbigbẹ di ọtun, ti yoo si mu eso wa, bẹẹ gẹgẹ ni ibukun Ọlọrun a ma a mu isọdọtun, imupadabọsipo ati ibisi ba gbogbo abala aye awọn ẹniyan.

Ki wa ni a n pe ni ojo ibukun? Akọkọ, a ni ibukun nipa ti ẹmi. Awọn ibukun wọnyi a ma a tọ wa gẹgẹ bi igbala ati idarij-ẹṣẹ, ẹbun Ẹmi Mimọ ati eso Ẹmi, ti yoo si yọri si idagbasoke nipa ti ẹmi. Ranti pe Jesu Oluwa wa, ninu Jòhánù 7:38-39, ṣeleri awọn odo omi iye fun gbogbo awọn ti o ba gbagbọ ninu rẹ. Awọn wọnyi ni odo Ẹmi Mimọ. Awa ti a si ni Ẹmi yi ninu aye wa ti ni awọn odo ibukun rẹ ninu aye wa lati ma ṣan ninu wa ati nipasẹ wa.

Siwaju si, a tun ni awọn ibukun nkan ti a le fojuri. Ọlọrun a ma a pese fun awọn aini awọn ọmọ rẹ, nipa ṣiṣi oniruuru ilẹkun fun igbega, ilọsiwaju ati igbaye-gbadun wọn. Idi ni yi ti Pọọlu fi sọ ninu iwe Fílípì 4:19 pe, “Ṣugbọn Ọlọrun mi yio pèse ni kikún fun gbogbo aini nyin, gẹgẹ bi ọrọ̀ rẹ̀ ninu ogo ninu Kristi Jesu.”

Ni afikun, a tun ni awọn ibukun imupadabọsipo. Ọlọrun a ma da nkan ti o sọnu pada. O ma n yi ibanujẹ pada si ayọ. Jóẹ́lì 2:25 sọ wipe, “Emi o si mu ọdun wọnni padà fun nyin wá, eyi ti ẽṣú on iru kòkoro jewejewe, ati iru kòkoro keji, ati iru kòkoro jewejewe miràn ti fi jẹ…” Nitorina, bi awọn ibukun Ọlọrun ba ti n ṣiṣẹ ninu aye wa, a le reti pe ki O mu awọn nkan ti a ti sọnu padabọsipo fun wa.

Amọ ṣa o, bi o tilẹ jẹ wipe awọn ibukun Ọlọrun wa nilẹ ni kiakia ati lọfẹ fun gbogbo eniyan, awọn nkankan wa ti awọn eniyan naa gbọdọ ṣe lati ri wọn gba ati lati jẹ igbadun wọn. Ki ni awọn nkan wọnyi? Akọkọ, awọn eniyan gbọdọ ronupiwada, ki wọn si yipada si Ọlọrun. Ẹṣẹ a ma di riri awọn ibukun Ọlọrun gba ati ifarahan wọn lọwọ. (Wo: Àìsáyà 59:1-2)

Ekeji, a gbọdọ gbọran si ọrọ Ọlọrun. Igbọran si Ọlọrun a ma n mu ojurere rẹ wọ tọ eniyan (Ditarónómì 28:1-2). Ẹkẹta, a gbọdọ jẹ olotitọ ni sinsin Ọlọrun. Ọlọrun a ma a san awọn ti o n farabalẹ wa ati sin-in lẹsan (Hébérù 11:6). Ẹkẹrin, a gbọdọ ma a gbe igba aye igbagbọ. Gba ileri Ọlọrun gbọ, ki O si tun dirọ mọ wọn, bi o ko tilẹ ti ri wọn soju (Hébérù 6:12).

Ni akotan, bi o ti wu ki o dabi ẹni pe ọrọ aye rẹ gbẹ to lọwọlọwọ yi, Ọlọrun lagbara lati jẹ ki o ni iriri awọn ojo ibukun rẹ ni ojoojumọ. Nitorina, gbẹkẹle, duro ṣinṣin ninu otitọ, si tẹsiwaju lati ma a rin ninu igbọran. Ọlọrun kanna ti o ṣeleri ojo ibukun jẹ olotitọ lati mu ọrọ rẹ ṣẹ. Mo si gbadura pe ki Ọlọrun jẹ ki gbogbo abala aye rẹ ti o gbe ni iriri ojo ibukun rẹ ti o ga, bi o ti ṣe n lọ lọsẹ yi, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ṣe ki ọ kaabọ sinu ọsẹ miran ninu oṣu Agẹmọ 2026. Adura mi si ni pe ki oore-ọfẹ Ọlọrun ti a n tu lori aye rẹ nigba gbogbo ma lalai ṣofo, ni orukọ Jesu. Amin.

Wayi o, mo gba adura yi fun ọ nitoripe o ṣeeṣe ki oore-ọfẹ Ọlọrun ṣofo ninu aye wa. Eyi jasi pe, o ṣeeṣe ki oore-ọfẹ Ọlọrun kuna lati ṣe nkan ti o ye ki o ṣe ninu aye wa. Idi si ni yi ti a fi kilọ fun wa pẹlu awọn ọrọ Apọsiteli Pọọlu wọnyi:

“NJẸ bi alabaṣiṣẹpọ pẹlu rẹ̀, awa mbẹ̀ nyin ki ẹ máṣe gbà ore-ọfẹ Ọlọrun lasan.” (2 Kọ́ríntì 6:1)

Ṣe o ri bayẹn? O ṣeeṣe ki a tẹwọgba oore-ọfẹ Ọlọrun lasan. Lọna wo ni eyi ṣe ṣeeṣe? O le waye nipasẹ ikuna wa lati ṣiṣe lori ọrọ Ọlọrun ti o n tọ wa wa. Bẹẹni, o ṣeeṣe ki a gbọ ọrọ Ọlọrun ninu ipade ijọ kan lọwọlọwọ yi, ki a si kuro ninu ipade na lati lo ṣe nkan ti o lodi patapata si nkan ti a gbọ. Nibakanna, o ṣeeṣe ki a ka bibeli ara wa lọwọlọwọ yi, ki a si tun dide kuro nibi ti a ti ka lati lọ ṣe nkan ti o lodi patapata si nkan ti a ṣẹṣẹ ka tan.

Judasi Isikariọtu, fun apẹrẹ, joko pẹlu gbogbo awọn apọsiteli yoku nigbati ti Jesu Oluwa wa n kọ wọn ni ọrọ Ọlọrun ni asiko diẹ ṣaaju igba ti a mu, ti a si kan an mọ agbelebu. Ọkunrin yi wa pẹlu wọn nigba ti Jesu n fọ ẹsẹ wọn, ti O si tun n tun wọn kọ lori pataki ki wọn fi ara wọn jin lati ma a sin ara wọn ninu ifẹ. Sibẹsibẹ, o kuro laarin wọn lalẹ ọjọ kanna lati lọ mu awọn ti yoo mu Oluwa, ti wọn yoo si kan mọ agbelebu wa sọdọ rẹ. Ṣe ko wa fi oore-ọfẹ Ọlọrun ti o ri gba ṣofo bi? O fi ṣofo. (Wo: Jòhánù 13)

Lafikun, nigba ti Ọlọrun n ba Isikiẹli sọrọ lori awọn ti o n wa sọdọ rẹ lati gbọ iwaasu rẹ, O sọ eyi:

“Iwọ ọmọ enia, sibẹ awọn ọmọ enia rẹ nsọ̀rọ si ọ lẹba ogiri ati lẹba ilẹkun ile, ẹnikini si sọ fun ẹnikeji, olukuluku fun arakunrin rẹ̀ wipe, Wá, emi bẹ̀ ọ si gbọ́ ọ̀rọ ti o ti ọdọ Oluwa jade wá. Nwọn si tọ̀ ọ wá, bi enia ti iwá, nwọn si joko niwaju rẹ bi enia mi, nwọn si gbọ́ ọ̀rọ rẹ, ṣugbọn nwọn kì yio ṣe wọn: nitori ẹnu wọn ni nwọn fi nfi ifẹ pupọ hàn, ṣugbọn ọkàn wọn tẹ̀le ojukokoro wọn. Si kiyesi i, iwọ jẹ orin ti o dùn pupọ fun wọn, ti ẹnikan ti o ni ohùn daradara, ti o si le fún ohun-elò orin daradara: nitori nwọn gbọ́ ọ̀rọ rẹ, ṣugbọn nwọn kò ṣe wọn.” (Ìsíkíẹ̀lì 33:30-32)

Tani Oluwa n tọka si ninu awọn ẹsẹ yi? Awọn ti o n fi itara wa sọdọ Isikiẹli lati wa gbọ iwaasu rẹ! Ko tọka si awọn ti ko nifẹ rara lati gbọ nkan ti o n sọ. Dipo eyi, awọn ti o n fi itara wa sọdọ rẹ lati gbọ iwaasu rẹ ni o n tọka si. Sibẹsibẹ, awọn ti o n wa sọdọ eniyan Ọlọrun yi ko ni lọkan rara lati ṣiṣẹ tọ nkan ti o n kọ wọn. Ki a tilẹ sọ otitọ, Oluwa sọ fun Isikiẹli pe kọja adẹrinpoṣonu loju wọn. Ki wa ni awọn eniyan yi n ṣe si oore-ọfẹ Ọlọrun ti o n tọ wọn wa? Wọn n fi sofo.

Ki wa ni bibeli sọ nipa awọn ti o ba n fi oore-ọfẹ Ọlọrun ṣofo? O sọ wipe o di dandan ki idajọ Ọlọrun sọkalẹ sori wọn. Mo gbadura pe idajọ Ọlọrun ko ni wa sori rẹ. Ṣugbọn o kọ gbọdọ kan ma a gbọ ọrọ rẹ nikan lalai ma a gbe igbesẹ lati ṣiṣẹ le lori. Lotitọ, a le ri awọn abala aye rẹ nibi ti o ti ṣe alailera ni ṣiṣiṣẹ tọ ọrọ Ọlọrun. Nṣe si ni ki o ke pe e lati fun ọ ni okun ti o nilo lati ṣe ifẹ rẹ ni awọn abala wọnyi. Yoo si da ọ lohun. (Wo: Hébérù 10:26-31)

Pọọlu sọ eyi fun wa nipa iha ti o kọ si oore-ọfẹ Ọlọrun:

“Ṣugbọn nipa õre-ọfẹ Ọlọrun, mo ri bi mo ti ri: õre-ọfẹ rẹ̀ ti a fifun mi kò si jẹ asan; ṣugbọn mo ṣiṣẹ lọpọlọpọ jù gbogbo wọn lọ: ṣugbọn kì iṣe emi, bikoṣe õre-ọfẹ Ọlọrun ti o wà pẹlu mi.” (1 Kọ́ríntì 15:10)

Ṣe o ri bayẹn? Idi ti Pọọlu ko ṣe fi oore-ọfẹ Ọlọrun lori aye rẹ ṣofo ni pe o n ṣiṣẹ karakara pẹlu ọrọ Ọlọrun ti o n gba. Nitorina, o di ẹni naa ti Ọlọrun fẹ ki o da. Iwọ naa si gbọdọ bẹrẹ si ni ṣe bẹẹ gẹgẹ, ti o ba nitootọ fẹ jẹ ẹni ti Ọlọrun fẹ ki o jẹ. Njẹ ki Ẹmi Ọlọrun ma a fi gbogbo igba kun ọ pẹlu okun lati ṣe bẹẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu oṣu Agẹmọ 2026. Adura mi si ni pe ki Ọlọrun jẹ ki o ma a fi igba gbogbo rẹ ara rẹ silẹ lati tẹwọgba ẹkọ to ye kooro nipasẹ igbagbọ ninu Kirisiti Jesu, ki o ma ba a lugbadi irọ eṣu ni abala aye rẹ kankan, ni orukọ Jesu. Amin.

Ọkan lara awọn nkan ti a sọ fun wa ninu bibeli nipa awọn ọjọ ikẹyin ni pe wọn jẹ ọjọ ninu eyi ti ọpọ ti o n pe ara wọn ni onigbagbọ ninu Kirisiti Jesu ko ni fẹ fi aaye gba ẹkọ to ye kooro. Wo nkan ti Pọọlu sọ lori eyi:

“Nitoripe ìgba yio de, ti nwọn kì yio le gba ẹkọ́ ti o yè kõro; ṣugbọn bi nwọn ti jẹ ẹniti eti nrìn nwọn ó lọ kó olukọ jọ fun ara wọn ninu ifẹkufẹ ara wọn. Nwọn ó si yi etí wọn pada kuro ninu otitọ, nwọn ó si yipada si ìtan asan.” (2 Tímótì 4:3-4)

Njẹ o ri bayẹn? Awọn ọjọ ikẹyin jẹọjọ ninu eyi ti awọn eniyan ko ni fẹ fi ara da ẹkọ to ye kooro. Wọn jẹ ọjọ ninu eyi ti awọn eniyan yoo yi eti wọn kuro lọdọ otitọ lati gbọ awọn itan ti ko ni ṣe aye wọn lanfaani. Wọn si tun jẹ awọn ọjọ ninu eyi ti a o ti ri ọpọ olukọ bibeli ti wọn yoo ma a kọ awọn eniyan ni nkan ti eti ti o n rin wọn fẹ gbọ, ti wọn yoo si ma a fun wọn ni nkan ti wọn fẹ dipo nkan ti wọn nilo, gẹgẹ bi Arọni ti ṣe si awọn ọmọ Isiraẹli ninu aginju. (Wo: Ẹ́kísódù 32)

Ki wa lo le fa ti awọn ti a mọ si Kirisitiẹni ko ni fẹ fi aaye gba ẹkọ ti o ye kooro tabi ti wọn yoo fi ma a sa fun otitọ ti o yẹ lati tu wọn silẹ? Nkan kan pataki ti o n fa ni pe ọkan wọn ko pe pẹlu Ọlọrun. Nitorina, wọn ko ma a sin-in nitoripe wọn ti mọ daju pe nkan ti o tọna fun awọn lati ṣe ni eyi. Dipo bẹẹ, wọn n sin-in nitori awọn nkan ti wọn lero pe awọn o le ri gba lọwọ rẹ. Idi ni yi ti wọn fi ma n lọ lati ijọ kan si ijọ miran ati lati ori-oke adura kan si ori-oke adura miran.

Njẹ eyi yoo wa jẹ ki aye wọn dara si bi? Rara o! Ko ni jẹ ki aye wọn dara si nitoripe nkan ti wọn n ṣe jẹ eyi ti yoo pada fun Satani ni anfaani si lati ba aye wọn jẹ nipasẹ awọn oluṣọ-aguntan, wolii, ajinyinrere ati apọsiteli eke. A si ri ọpọ ti wọn ti lugbadi ni ọna yi, ti wọn ko si ni igboya to lati sọ awọn iriri buburu ti wọn ti ni.

Ni kukuru, ti o ko ba fẹ lugbadi irọ ati iwa ika eṣu bi ti awọn wọnyi, má sálọ fun otitọ. Lotitọ, otitọ ko ki i fi igba gbogbo dun lati gbọ. Ṣugbọn ti a ba tẹwọgba, ti a si ṣiṣẹ tọ ọ, yoo pada jẹ ki aye dun fun wa. Mo wa gbadura pe ki Ọlọrun ma a fi ojoojumọ fun ọ ni okun lati tẹwọgba otitọ rẹ, bi o ti wu ki o koro to ni eti rẹ, ki a ba a le fi adun si ohun gbogbo ti o ni i ṣe pẹlu aye rẹ. Amin.

Kí o ní oṣù Agẹmọ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olurapada wa. Pẹlu inu didun ni mo ki ọ kaabọ sinu ọsẹ ti o so oṣu Òkúdù ati Agẹmọ ọdun 2026 papọ mọ ara wa. Adura mi si ni pe ohunkohun laye yi ko ni ṣe aṣeyọri lati tan ọ lati ma fi ara rẹ jin fun Ọlọrun mọ, ki o si wa tipasẹ eyi bọ si abẹ idajọ rẹ, ni orukọ Jesu. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju pẹlu awọn ọrọ Iwe Mimọ yi ti o sọ pe:

“Nigbana ni Mose duro li ẹnubode ibudó, o si wipe, Ẹnikẹni ti o wà ni ìha ti OLUWA, ki o tọ̀ mi wá. Gbogbo awọn ọmọ Lefi si kó ara wọn jọ sọdọ rẹ̀.” (Ẹ́kísódù 32:26)

Wayi o, Ọlọrun si n bere ibeere kaana ni oni: “Tani o wa ni iha ti Oluwa?” Ninu aye ti o kun fun ẹṣẹ, aiṣododo ati airoju, onigbagbọ kọọkan gbọdọ yan iha ẹni ti yoo wa, yala iha ti Oluwa ni tabi iha ti aye yi.

Ki wa ni o tunmọ si lati wa ni iha ti Oluwa? Akọkọ, o tunmọ si yiyan igbọran dipo aigbọran. Jòhánù 14:15 sọ wipe, “Bi ẹnyin ba fẹran mi, ẹ ó pa ofin mi mọ́.” Ekeji, o tunmọ si diduro fun ododo. Róòmù 12:2 sọ wipe, “Ki ẹ má si da ara nyin pọ̀ mọ́ aiye yi…”

Ẹkẹta, wiwa ni iha ti Oluwa tunmọ si titẹle Kirisiti tọkan-tọkan. Lúùkù 9:23 sọ wipe, “O si wi fun gbogbo wọn pe, Bi ẹnikan ba nfẹ lati mã tọ̀ mi lẹhin, ki o sẹ́ ara rẹ̀, ki o si gbé agbelebu rẹ̀ ni ijọ gbogbo, ki o si mã tọ̀ mi lẹhin.” Ẹkẹrin, wiwa ni iha ti Oluwa tunmọ si jijẹ olododo ni sisin Ọlọrun. Jóṣúà 24:15 sọ wipe, “…Sugbọn bi o ṣe ti emi ati ile mi ni, OLUWA li awa o ma sìn.”

Ọlọrun n wa awọn ọkunrin ati obinrin ti yoo duro digbi fun un, lalai kọbiara si nkan ti ṣiṣe eyi yoo na wọn. Wiwa ni iha ti Oluwa ko ki i wa fi gbogbo igba jẹ nkan ti ọpọ eniyan n fẹ, ṣugbọn iha iṣẹgun ni o ma fi igba gbogbo jẹ. Nitorina, Ọlọrun n bere lọwọ ọkọọkan wa loni, “Njẹ o wa ni iha temi?” Nṣe si ni ki a jẹ ki idahun wa dabi ti Joṣua, ti o sọ wipe, “Bi o ṣe ti emi ati ile me, Oluwa ni awa o ma a sin.”

Adura mi ni pe ki Ọlọrun, Baba wa, ma a fi ojoojumọ ran ọ lọwọ lati duro ṣinṣin ni iha tirẹ. Mo si tun gbadura pe ki O fun ọ ni igboya lati ma a gbọran si lẹnu, lati ma a sin in ati lati ma a tẹle pẹlu otitọ ni gbogbo ọjọ aye rẹ. Amin.

Kí O ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu ọsu Òkúdù 2026. Adura mi si pe ki a ya aye rẹ ya ohunkohun ti o n di ọ lọwọ lati jẹ igbadun awọn ibukun rẹ ti a ti tu sori aye rẹ lẹkunrẹrẹ. Amin.

Wayi o, ọkan lara awọn nkan ti o ma n ṣaba di ifarahan awọn ibukun Ọlọrun ninu aye awọn eniyan rẹ lọwọ ni ki wọn ma ba awọn adari ti a yan le wọn lori ninu ijọ lo pọ ni ibamu pẹlu ifẹ rẹ. Ki si ni ifẹ rẹ lori bi a ṣe n ba awọn adari ti o wa lori wa ninu ijọ ṣe pọ? Ifẹ rẹ ni a sọ fun wa ni kukuru ninu awọn ẹsẹ Iwe mimọ wọnyi:

“Ṣugbọn awa mbẹ̀ nyin, ará, lati mã mọ awọn ti nṣe lãla larin nyin, ti nwọn si nṣe olori nyin ninu Oluwa, ti nwọn si nkìlọ fun nyin; Ki ẹ si mã bu ọla fun wọn gidigidi ninu ifẹ nitori iṣẹ wọn. Ẹ si mã wà li alafia lãrin ara nyin.” (1 Tẹsalóníkà 5:12-13)

“Ẹ mã gbọ ti awọn ti nṣe olori nyin, ki ẹ si mã tẹriba fun wọn: nitori nwọn nṣọ ẹṣọ nitori ọkàn nyin, bi awọn ti yio ṣe iṣíro, ki nwọn ki o le fi ayọ̀ ṣe eyi, li aisi ibinujẹ, nitori eyiyi yio jẹ ailere fun nyin.” (Hébérù 13:17)

“Gẹgẹ bẹ̃li Oluwa si ṣe ìlana pe, awọn ti nwasu ihinrere ki nwọn o si ma jẹ nipa ihinrere.” (1 Kọ́ríntì 9:14)

Ki ni a ri nibiyi? Akọkọ, a ri wipe ifẹ Ọlọrun fun wa ni pe ki a bu ọla ti o ga fun awọn ti O yan gẹgẹ bi adari fun wa ninu ijọ. Eyi si gbọdọ farahan ninu bi a ti ṣe n ba wọn sọrọ ati bi a ti ṣe n ba wọn ṣe pọ. Ki ni idi? Ṣe nitoripe wọn san ju wa lọ niwaju Ọlọrun ni? Rara? Dipo bẹẹ, nitori iṣẹ rẹ ti wọn n ṣe ni aarin wa ni.

Wayi o, ko ki i wa ṣe kiki igba ti wọn ba n ṣe daradara si wa nikan ni a ni lati bọwọ fun wọn ni ọna yi; a ni lati bọwọ fun wọn pẹlu ni igba ti wọn ba n ba wa wi. Ọkan lara awọn idi ti Ọlọrun fi fi idi ijọba Dafidi mulẹ ni pe ko dẹkun lati ma a bọwọ fun Ọba Sọọlu gidigidi, bi o tilẹ jẹ wipe ọkunrin na ti ṣina. Ko yan asiko ti yoo bọwọ fun ati asiko ti ko ni bọwọ fun. Ti awa naa ba fẹ ki ibukun Ọlọrun fi idi mulẹ ninu aye wa, a ko gbọdọ yan igba ti a o ma bọwọ fun awọn adari ijọ wa. Dipo eyi, gbogbo igba ni a gbọdọ fi ọwọ ti o ga han fun wọn, nitoripe eyi ni ifẹ Ọlọrun fun wa. Ti a ba si wa ri eyi ti o n ṣiwawu ninu wọn, bi o tilẹ jẹ wipe a n bọwọ fun un, Ọlọrun yoo ṣe idajọ onitọun funrarẹ ni ọna tirẹ.

Nkan keji ti a fi han wa lori ifẹ Ọlọrun fun wa ni biba awọn adari wa ṣe pọ ni i ṣe pẹlu ki a tẹriba fun aṣẹ wọn. Ki ni eyi tunmọ si? O tunmọ si pe niwọn igba ti adari ijọ kan ba ti n dari rẹ ni ibamu pẹlu ifẹ Ọlọrun, nṣe ni ki o fi tọkantọkan ma a tẹle aṣẹ rẹ. Ki ni idi? Idi ni pe Ọlọrun yoo bere lọwọ rẹ bi o ti ṣe n ṣe. Irufẹ ijiyin wo ni yoo wa fun un nipa rẹ?

Nigbati Kora, Datani, Abiramu ati Oni gbimọ pọ lodi si Mose ati Aroni, Mose sọ fun Ọlọrun pe ki O ma tẹwọgba ọrẹ wọn. Ọlọrun ko si tẹwọgba. Yatọ fun iyẹn, O tun jẹ ki ilẹ lanu lati gbe ati awọn ati awọn ẹbi wọn mi laaye. Nitorina, bi o tilẹ jẹ wipe awọn naa ni ibukun Ọlọrun lori aye wọn, awọn ibukun wọnyi ko le pa wọn mọ kuro lọwọ idajọ rẹ. Eyi si waye nitori iha ti ko dara ti wọn kọ si awọn adari wọn. Ṣe iwọ naa wa ri idi ti a ṣe sọ fun wa pe ainitẹriba fun awọn adari ijọ wa ko le ṣiṣẹ gbe wa? (Wo: Númérì 16)

Siwaju si, ifẹ Ọlọrun ni fun wa lati ran awọn adari ijọ wa lọwọ pẹlu owo wa ati awọn nkan ti ara miran. Eyi ko si ki i ṣe nkan ti a o ma ṣe ni ẹkọọkan tabi nigbati a ba n woye pe ki wọn gba awọn akanṣe adura kan fun wa. Dipo eyi, o gbọdọ jẹ nkan ti a o fi ara wa jin lati ma a ṣe. Ọkankan ninu wa ko si ni awawi lati ma ṣe e. Idi si ni pe bi o tilẹ jẹ wipe ife omi kan pere ni a le ma a fun wọn loorekoore, Ọlọrun yoo tẹwọgba fun wa, yoo si tun pin wa lere fun un.

O wa ṣeni laanu pe, bi o tilẹ jẹ wipe ọpọ awọn ọmọ Ọlọrun ni a ti kọ ni awọn nkan wọnyi leralera, wọn ko ko ki i ṣiṣẹ le wọn lori. Ọkan lara awọn idi si ni yi ti ifarahan ìṣẹ́, ìjákulẹ̀ ati ailera ṣe wọpọ ninu ọpọ ijọ awọn eniyan Ọlọrun. Awa ni a n ṣiṣẹ lodi si ibukun rẹ ninu aye wa.

Wo o, ti o ko ba ri adari ijọ kan gẹgẹ bi ẹni ti ko lẹtọ si ọwọ, igbọran ati iranlọwọ rẹ, kuro ninu ijọ rẹ, ki o si lọ si ibi ti o ti le fi tọkan-tọkan bọwọ fun, gbọran si ati ṣe iranlọwọ fun adari ibẹ. Aijẹbẹ, nṣe ni iwọ yoo ma ṣiṣẹ lodi si iṣoriire ara rẹ. Adura mi si ni pe ki Ẹmi Ọlọrun dari rẹ sinu ironupiwada nibikibi ti o ba ti n kuna lori ọrọ yi ni kiakia. Amin.

Kí o ní ọ̀sẹ̀ alárinrin

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)