Blog – Page 28 – Búlọ́ọ̀gì Wa | Ìjọ Òtítọ́ Bíbélì

Orisun rẹ jẹ ẹ loogun pẹlu | Paitọ J.O. Lawal

Ọjọ: Ogun 29, 2021 | Atẹlera: Latori tabili Paitọ | Nọmba: Vol. 10, No. 17

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki a kaabọ si ọjọ isinmi ti o kẹyin oṣu Ogun 2021. Mo si gbadura pe ki Oluwa ṣe ohun gbogbo ti o ni i ṣe pẹlu ọrọ aye rẹ ninu oṣu naa ni aṣepe, ni orukọ Jesu. Amin.

Ni aipẹ yi, mo ni itakurọsọ pẹlu ọdọmọbinrin kan ti ọkan rẹ n poruru nitori eto iṣuna ile rẹ ati nitori pe nkan ko lọ deede fun wọn gẹgẹ bi wọn ṣe fẹ. Bi o si ṣe sọ fun mi, ọkan rẹ poruru lori ọrọ yi to bẹẹ gẹẹ ti o fi bẹrẹ si ni ronu ni akoko kan lati di ‘Ọmọ yahuu.’ A si wa mọ pe awọn ti a n pe ni ‘Ọmọ yahuu’ yi ko yatọ si gbajuẹ ati ole. Yatọ si pe gbajuẹ ati ole ni wọn, wọn tun jẹ aṣeṣo. Eyi tunmọ si pe ọpọ wọn, ti ko ba tilẹ jẹ gbogbo wọn, ni wọn ni nkan kan tabi omiran ni i ṣe pẹlu awọn iwin tabi ẹmi aimọ lati ni owo. Ti wọn ko ba si ronupiwada, o di dandan ki wọn parun ki aye wọn gan an to bẹrẹ.

Ṣugbọn ki wa lo fa a ti arabinrin yi fi ronu lati da ‘Ọmọ yahoo’? Ibeere ti mo si bere lọwọ rẹ gan an niyi. Mo ni, “Kirisitiani ni ọ, eyi ti o si ni iṣẹ lọwọ. Ki lo wa fa a ti o fi gbero lati ṣe iru nkan yi?” Idahun rẹ si jọ ni loju diẹ. O jọ ni loju nitoripe, gẹgẹ bi o ti ṣe wi, o ti ṣe alabapade awọn ‘Ọmọ Yahuu’ ninu ipade sọọsi lọpọ, o si n wo bi wọn ṣe n nawo ninu awọn ipade yi ati bi awọn kan ti a n pe ni adari ijọ ṣe n yin wọn, pọn wọn le ati gbadura fun wọn. Eyi si jẹ ki o ni ero pe wọn n ṣe fọrifọri fun oun ati pe oun ati ọkọ oun naa nilo lati ṣe nkankan lori eto isuna wọn.

A wa dupẹ lọwọ Ọlọrun nitoripe, bi o tilẹ jẹ pe arabinrin yi gbero lati tọwọ bọ iṣẹ ibi yi, Ẹmi Mimọ ko gba fun. Ṣugbọn koko ọrọ gan ni pe ọpọ ni o wa ninu sọọsi loni ti wọn n ṣe oniruuru iṣẹ ti ko ba ofin mu, ti ara wọn si balẹ laarin wa nitoripe ko si ẹni ti o n ba wọn wi tabi kilọ fun wọn. Bi o si ti wa wu ki wọn fi fun sọọsi to tabi ki awọn kan kọrin yin wọn to, iṣẹ wọn ati ọrẹ wọn jẹ irira si Ọlọrun.

Nitorina, yatọ si pe wọn ko ni ri ere kankan gba lọwọ rẹ fun nkan ti wọn n ṣe, Oun yoo tun ba wọn wi ni akoko ti ọ tọ fun awọn iṣẹ ibi ti wọn n ṣe ati fun igboya ti wọn ni lati ro pe awọn le fun Ọlọrun ni abẹtẹlẹ pẹlu ere iwa ika. Ni abẹ majẹmu atijọ, Ọlọrun sọ fun awọn eniyan rẹ pe, “Ki agbere ki o ma ṣe si ninu awọn ọbinrin Isirẹli, tabi oniwa Sodomu ninu awọn ọmọkunrin Isiraẹli. Iwọ ko gbọdọ mu owo ọya agbere, tabi owo aja, wa sinu ile Oluwa Ọlọrun rẹ fun ẹjẹkẹjẹẹ: nitori pe irira ni ani awọn mejeeji si Oluwa Ọlọrun rẹ.” (Ditaronomi 23:17-18)

Njẹ o ri bayi? Nkan ti a n ṣẹ fun ounjẹ oojọ wa jẹ Ọlọrun logun. Ọna ti owo n gba wọle si wa lọwọ jẹ ẹ logun. Ti a ba si n ṣe ohun ti O korira, ki a ya ma mu owo tabi ọrẹ wa fun lati ipasẹ rẹ. Idi si ni pe bi eniyan ko ba mọ nkan ti a n dan an wo, Oun mọ nkan ti a n dan an wo, yoo si pin wa lere bi o ṣe tọ ati bi o ṣe yẹ. Si wa wo o, ko ki i ṣe awa nikan ni yoo da jẹ iya radarada ti a n ṣe yi; gbogbo awọn adari ijọ ti o n ki wa laya tabi ran wa lọwọ lati ṣe e naa yoo ba wa nipin ninu ijiya naa lọna ti o ga.

Ki ni idi ti Ọlọrun fi papa pa Balaamu ariran run? Idi ni wipe o fẹran ere iṣẹ ibi. O jẹ ọkunrin kan ti o ṣetan lati sọtẹlẹ fun ẹnikẹni, gbadura fun ẹnikẹni tabi fi ẹnikẹni gegun ti a ba fun ni owo ti o to owo, lalai wadi nkan ti irufẹ ẹni bẹ gan n ṣe. Nitorina, Ọlọrun pa a run, gẹgẹ bi o ṣe di dandan fun un lati pa gbogbo awọn oniwaasu ti wọn n tọ isisẹ rẹ arun pẹlu, ti awọn naa ba fi akoko ṣofo lati ronupiwada. (Wo: Numeri 22-24 & 31:8)

Nitorina, ma fi gbogbo igba ranti pe bi o tilẹ jẹ wipe Ọlọrun fẹ ki a lawọ si Oun, ibi ti awọn nkan ti a n fun un ti n wa jẹ ẹ logun pẹlu. Idi si ni yi ti o ko gbọdọ lọwọ si ohun aimọ kankan tabi ki o gba ki ẹnikẹni ti ọ lati lọwọ si (Efesu 4:28). Aijẹbẹ, nṣe ni o o kan ma fi gbogbo nkan ti o n fun Ọlọrun tabi sọọsi ṣofọ — iparun rẹ ko si ni sun lọ.

Ki o ni ọsẹ ti o ga.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Orisun rẹ jẹ ẹ loogun pẹlu | Paitọ J.O. Lawal Read More »

Ohun buburu kan | Paitọ J.O. Lawa

Leave a Comment

Ọjọ: Ogun 22, 2021 | Atẹlera: Latori tabili Paitọ | Nọmba: Vol. 10, No. 16

Olufẹ: ki oore-ọfẹ ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọṣẹ tuntun miran ninu oṣu Ogun 2021. Adura mi si ni pe ki Ẹmi Ọlọrun ma fi gbogbo igba di ọ lọwọ lati ma fẹ tabi ṣe ohun kankan ti yoo ṣi aye silẹ fun idajọ Ọlọrun lati wa si ori rẹ, ni orukọ Jesu. Amin.

Wayi o, adura yi le ma fi taratara dabi adura kan to nipọn tabi loorin loju ọpọlọpọ. Ṣugbọn Pọọlu gba iru rẹ fun awọn ara Kọrinnti nigba ti o sọ bayi, “Njẹ awa n gbadura si Ọlọrun ki ẹyin ki o ma ṣe ṣe ohun buburu kan…” (2Korinnti 13:7) Nitorina, bi o tilẹ jẹ wipe adura yi dabi ọkan ti ko lowura lọtiti, adura ti o ba ọrọ iwe mimọ mu ni gbogbo ọna ni. Niwọn igba ti o si ti ba ọrọ iwe mimọ mu, gbigba rẹ le jasi iyatọ laarin iye ati iku tabi laarin igbesoke ati ijakulẹ fun wa.

Fun apẹẹrẹ, Rubẹni ko gba egun baba rẹ nitoripe o jẹ ọdọmọkunrin onijagidijagan kan, ẹni ti o ma n fi gbogbo igba da wahala ati irora silẹ. Dipo eyi, o gba egun sori rẹ nitori nkan buburu ẹyọkan ṣoṣo ti o ṣe. O ba iyawo baba rẹ lopọ. Idi ti o ṣe ṣe eleyi ni a ko sọ fun wa ninu bibeli. Boya nṣe ni arabinrin yi tilẹ fi arekereke mu, bi aya Potifa naa ṣe fẹ fi arekereke mu Josefu. A ko mọ. Ṣugbọn ẹṣẹ ẹyọkan ṣoṣo yi jẹ ki oun ati awọn arọmọdọmọ rẹ sọ aye titayọ wọn nu ninu aye yi. (Wo: Jẹnẹsisi 35:21-22 & 43:3-4)

Lafikun, ki ni o pa Nadabu ati Abihu, meji ninu awọn ọmọ Aaroni, ni ọjọ kanna ati ni akoko kanna? Igbesẹ odi kan ṣoṣo ti wọn ma gbe ni. Eniyan daadaa si ni wọn o. Yatọ si eyi, alufa ti Ọlọrun fi amin ororo yan tun ni wọn pẹlu. Amọ nigba ti wọn fi ajeji ina rubọ niwaju Ọlọrun, ina ti ọdọ rẹ jade si wọn, o si jo awọn mejiji run lẹsẹkẹsẹ. A ko tilẹ fun wọn ni ikilọ tabi aye ati ronupiwada. Nitorina, nkan buburu ẹyọkan bayi le ṣi ilẹkun aye wa silẹ fun idajọ kiakia tabi fun ọjọ aye ti o fi ojoojumọ kun fun iyọnu. (Wo: Lẹfitiku 10:1-2)

Wo o, awọn eniyan le ma ṣe oniruuru nkan ti ko dara, ki a si ma jẹ wọn niya lẹsẹkẹsẹ tabi ni ọna kan ti o lagbara tabi ti o ṣe fojuri. Ṣugbọn ti wọn ba kan lọ gbe igbesẹ aidara kan si, eyi ti o tilẹ le ma dabi ẹni ti o buru to ti awọn eyi ti wọn ti n gbe tẹlẹ, wọn le ba ara wọn ninu babanla iyọnu pẹlu Ọlọrun. Nkan ti o ṣẹlẹ si ọba Bẹliṣasari ni eyi. Ọlọrun ko lu pa tabi gba ijọba lọwọ rẹ fun ọkankan lara gbogbo awọn nkan buruku ti o ti n ṣe ki o to di ọjọ ti oun ati awọn eniyan rẹ woye pe ki awọn lo awọn nkan iṣura tẹmpili Ọlọrun fun awẹjẹwẹmu wọn. Ṣugbọn lọjọ ti o ṣe eyi, a paṣẹ idajọ iku fun. A si pa a, a si tun fa ijọba rẹ le ẹlomiran lọwọ. (Wo: Daniẹli 5)

Nibakanna, eniyan le ti ma ṣe ohun gbogbo daradara niwaju Ọlọrun, ki o si ma gba oriyin lati ọdọ rẹ. Ṣugbọn iwa aidara kan ti o ba wu bayi le jẹ ki o padanu ẹmi rẹ, iṣẹ iranṣẹ rẹ tabi aye rẹ ninu ijọba Ọlọrun. Ranti Mose. Iwa aida ẹyọkan pere naa lo wu ti o si padanu iṣẹ iranṣẹ didari awọn ọmọ Isiraẹli wọ ilẹ ileri. Nitorina, nkan buburu kan le ba ohun gbogbo jẹ fun wa. (Wo: Numeri 20:1-13)

Idi niyi ti mo si fi ri adura Pọọlu fun awọn ara Kọrinnti gẹgẹ bi eyi ti o ṣe pataki pupọ si mi ati pẹlupẹlu si gbogbo ọmọ Ọlọrun. Ki si ni adura naa? Ohun na ni pe ki a ṣọ wa lati ma ṣe ṣe ohun aidara kankan, boya eyi ti yoo yọri si iku fun wa ni o tabi eyi ti yoo yọri si ijakulẹ, iparun, ibanujẹ tabi igbe aye radarada fun wa, ni orukọ Jesu. Amin.

Ki o ni ọsẹ ti o ga.

Ohun buburu kan | Paitọ J.O. Lawa Read More »

Idajọ ẹtan | Paitọ J.O. Lawal

Leave a Comment

Ọjọ: Ogun 15, 2021 | Atẹlera: Latori tabili Paitọ | Nọmba: Vol. 10, No. 15

Olufẹ: ki oore-ọfẹ, aanu ati alaafia jẹ pipọsi fun ọ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ogun 2021. Adura mi si ni pe ki ọkan rẹ ma fi gbogbo igba gba okun lati ọdọ Ẹmi Ọlọrun lati rin ninu ifẹ ati otitọ inu pẹlu awọn eniyan Ọlọrun ti o wa ninu aye rẹ, ki o ma ba ṣilẹkun aye rẹ silẹ fun idajọ Ọlọrun dipo ki o ma gbadun ẹkunrẹrẹ ayọ ibaṣepọ Kirisitiẹni si Kirisitiẹni. Amin.

Bibeli sọ wipe, “Ẹ ma si ṣe purọ fun ẹnikeji yin, ẹyin sa ti bọ ogbologbo ara ẹṣẹ ni silẹ ati iṣẹ buburu rẹ; Ẹ si ti gbe ara tuntun ni wọ, eyi ti a sọ di tuntun gẹgẹ bi aworan ẹni ti o da a, sinu imọ kikun.” (Koloso 3:9-10) Njẹ o ri bayi? Irọ pipa, eke ṣiṣe tabi ẹtan jẹ ọmọ iṣẹda iku ti Ọlọrun yọ danu kuro ni aye wa nigba ti a di atunbi. Nitorina, a ko gbọdọ gba a laye ninu aye wa tabi ninu ibaṣepọ wa pẹlu ara wa. Aijẹbẹ, a o ma ṣilẹkun aye wa silẹ fun idajọ Ọlọrun. Tani o si mọ ọna ti O le gba dawa lẹjọ? Ko si!

Fun apẹẹrẹ, ti Ananaya ati Safira iyawo rẹ ba lero pe Ọlọrun le fun wọn ni idajọ iku lori pe wọn fi ẹtan ba awọn awọn eniyan rẹ lo pọ ni, o ṣeeṣe ki wọn ma ṣe bi wọn ṣe ṣe nigba yẹn. Ṣugbọn nitori pe wọn ko ni lọkan rara pe O le e ṣe bẹ, wọn parọ nipa fi fifunni wọn, a si da seria fun wọn lẹsẹkẹsẹ. Awọn mejeeji si ni Ọlọrun da lẹjọ, ti O si tun pa ni ọjọ kannaa. (Wo: Iṣe Apọsiteli 5:1-11)

Wayi o, ẹnikan wa le sọ wipe, “Ṣebi ọpọ laarin awọn ọmọ Ọlọrun lo si ma n wuwa ẹlẹtan loorekoore. Sibẹsibẹ, ko ki i ṣe gbogbo igba ti wọn ba ṣe eleyi ni Ọlọrun n lu wọn pa. Ki lo wa fa ti ọrọ ti Ananaya ati ti iyawo rẹ ṣe yatọ niwaju rẹ?” Lakọkọ, a gbọdọ jẹ ki o ye wa pe wipe Ọlọrun ko ṣe idajọ iku fun awọn eniyan lẹsẹkẹsẹ nitori pe wọn wuwa ẹtan tabi ṣe nkan buburu miran ko tunmọ si pe ko ma ṣe idajọ fun wọn rara. O ni ọpọ ọna ti O fi n ṣe idajọ awọn eniyan. Ti wọn ko ba si ni ifura, wọn le ma fi akoko kankan mọ pe a n ṣe idajọ wọn.

Ekeji, a nilo lati jẹ ki o ye wa pe ko ki i ṣe pe Ọlọrun fi ojusaaju bọ ọrọ Ananaya ati iyawo rẹ. Nkan ti o ṣẹlẹ ni pe O kan pinnu lati fi wọn jofin ni, ki wọn ba le jẹ arikọgbọn fun awọn miran ti wọn le fẹ ma rin nipasẹ wọn. Adura mi si ni pe o ko ni gbe igbesẹ kankan ti yoo jẹ ki Ọlọrun fi ọ se arikọngbọn ọna ti O n gba ṣe idajọ ibi fun awọn eniyan. Amin. Ṣugbọn ki gan an lo fa ti Ọlọrun fi lo Ananaya ati Safira gẹgẹ bi arikọgbọn fun awọn miran? Idi ni wipe wọn gbiyanju lati fi ẹtan lọlẹ ninu ijọ rẹ. Awa naa si gbọdọ kiyesara lori irufẹ awọn nkan ti a n filọlẹ ninu ijọ Ọlọrun, nitori pe O n wo wa, yoo si pin wa lere gẹgẹ bi iṣẹ ọwọ wa ba ṣe ri.

Ni kukuru, bi akọsilẹ bibeli ṣe fi ye wa, nkan ti o ṣẹlẹ si Ananaya ati aya rẹ ṣẹlẹ ni akoko ti ifẹ Kirisiti n jọba lotitọ ninu aye awọn eniyan rẹ ati lori ọrọ aye wọn. Ifẹ yi si gbakoso aye wọn to bẹẹ gẹẹ ti awọn ti wọn ni awọn nkan ini to lowura bẹrẹ si ni ta wọn, ti wọn si n mu owo ti wọn pa nibẹ wa fun awọn apọsiteli lati pin fun awọn ti o ṣe alaini ni aarin wọn. Eyi gan an lo le iṣẹ jade kuro laarin wọn, nitoripe bibeli sọ wipe, “Ko si alaini kankan ni aarin wọn ni akoko yi.” (Wo: Iṣe Apọsiteli 4:32-35)

Nitorina, gbogbo awọn ara ni akoko yi, iye yowu ti wọn jẹ, ni wọn n ba ara wọn lo pẹlu otitọ ati ifẹ. Bi Ọlọrun si ṣe fẹ ki o ri ni eyi, nitoripe eyi ni yoo jẹ ki awọn ti aye yi mọ pe ọmọlẹyin Kirisiti Jesu Oluwa ni wọn nitootọ. O wa ṣe ni laanu pe, ni akoko kannaa yi, Satani ṣe aṣeyọri lati mu ki Ananaya ati iyawo rẹ bẹrẹ si ni ronu yatọ ati wuwa yatọ. Bi wọn ṣe pẹ to lori eleyi ni a ko mọ. Ṣugbọn a mọ pe, ni akoko kan, awọn naa, gẹgẹ bi awọn ara yoku, ṣeleri lati ta ilẹ wọn kan ati lati mu owo rẹ wa sinu ijọ. Wọn si ṣe bẹẹ gẹgẹ.

Amọ ṣa o, wọn ko ṣetan lati mu gbogbo owo ti wọn pa nidi ilẹ ti wọn ta naa wa siwaju Ọlọrun. Nitori naa, wọn fi diẹ lara rẹ pamọ fun ara wọn. Njẹ eyi jẹ nkan ti o buru bi? Rara o! Awọn ni o ni owo yi lakọkọ, bi Peteru ṣe sọ fun wọn lẹyinọrẹyin. Nitori naa, wọn ni aṣẹ lati sọ bi wọn ṣe fẹ ẹ lo o. Ṣugbọn lati wa gbiyanju lati tan awọn eniyan Ọlọrun yoku jẹ, awọn eniyan rẹ ti wọn nifẹ wọn, ti ọrọ aye wọn si jẹ wọn logun, ki wọn si jẹ ki o dabi ẹni pe owo ti wọn fi silẹ ju iye ti wọn fi silẹ lọ jẹ eyi ti ko ṣe itẹwọgba ni ọwọ Ọlọrun. Idi niyi ti O ṣe ṣe idajọ ẹtan wọn, ti O si lo eyi lati fun awọn miran bi tiwọn ni anfaani lati kẹkọ ati lati ronupiwada.

Ni bakanna, ti awa naa ko ba ni rin pẹlu ifẹ ati ọkan otitọ pẹlu awọn ara wa ninu oluwa, boya nipa awọn ọna ti a n gba lo nkan ini wa tabi ẹbun ẹmi wa ni tabi nipa awọn ọna ti a n gba ṣe awọn nkan miran, a le ma ṣi ilẹkun silẹ fun idajọ Ọlọrun, eyi ti o si le ja si iku ti ara. Nitorina, ẹ jẹ ki a fi aye gba ọrọ Ọlọrun lati fọ wa mọ kuro ninu aiṣododo ati agabagebe gbogbo, nigba ti eyi si ṣeeṣe. Ki Ẹmi Ọlọrun si ran iwọ ati emi lọwọ lati ṣe ohun ti o tọ lori ọrọ yi, ni orukọ Jesu. Amin.

Ki o ni ọsẹ adun o.

Idajọ ẹtan | Paitọ J.O. Lawal Read More »

ALAYTHIA BIBLE CHURCH (IJỌ OTITỌ BIBELI)
ALAKALẸ ẸKỌ BIBELI ATI ALAYE
ỌJỌRU 11, OGUN 2021

Leave a Comment

AKỌRI: PASITỌ AYỌKA: JOHANU 21:15-17

AKỌSORI: AKỌSORI: “Ẹ kiyesara yin, ati si gbogbo agbo ti Ẹmi Mimọ fi yin ṣe alabojuto rẹ, lati maa bọ ijọ Ọlọrun, ti o fi ẹjẹ rẹ ra.” (Iṣe Awọn Apositeli 20:28)

ỌRỌ AKỌSỌ
Ninu lẹta rẹ si awọn ara Efesu, apọsiteli Pọọlu sọ eyi nipa Jesu: “O si ti fi awọn kan fun ni bii apọsiteli; ati awọn miiran bii wolii ati awọn miiran bii ẹfanjẹlisiti ati wọn miiran bii olusọ-aguntan ati olukọni; Lati pese awọn eniyan mimọ silẹ fun iṣẹ iranṣẹ, fun imudagba ijọ, ti i ṣe ara Kirisiti.” (Efesu 4:11-12) Pẹlu nkan ti o sọ yi, kedere ni a ri pe lara awọn ti Jesu Oluwa wa funrarẹ yan fun ijọ awọn eniyan rẹ fun imuyẹ fun iṣẹ iranṣẹ ati fun idagbasoke wọn ni a ti ri awọn ti a n pe ni oluṣọ-aguntan ati olukọni. Awọn wọnyi naa si ni ọpọ mọ si pasitọ loni. Awọn wo gan wa ni a le pe ni pasitọ? Ki ni awọn amuyẹ ti a n i lati ri ninu eniyan ki a to le tọka si gẹgẹ bi pasitọ? Ki ni ojuṣe pasitọ? Njẹ iṣẹ iranṣẹ rẹ ni aala bi? Iha wo ni o yẹ ki ijọ Ọlọrun kọ si awọn pasitọ wọn? Wọnyi ni awọn ibeere ti a o ma tipasẹ ẹko yi ti o da lori iṣẹ iranṣẹ pasitọ dahun. Mo si gbadura pe ki Ọlọrun lo ẹkọ naa lati wẹ aimọkan yowu ti a ba ni lori iṣẹ iranṣẹ pasitọ danu kuro ninu aye wa, ki a ba le ma ba awọn pasitọ ijọ wa lo ni ọna ti o yẹ ati ki awa yowu ti a jẹ pasitọ naa le mu iṣẹ iranṣẹ wa lọkunkundun, ki a si tun ṣe atunṣe nibi ti o ba ti yẹ. Amin.

TANI PASITỌ?
Ọpọ loni ni a n pe ni pasitọ ti wọn ko si ki i ṣe pasitọ rara – inagijẹ laṣan ni apẹle yi jẹ fun wọn. A n pe awọn kan ni pasitọ nitoripe wọn ma n fi gbogbo igba gbe bibeli kaakiri tabi waasu si awọn ti o wa ni ayika wọn. A si n pe awọn miran ni pasitọ nitoripe wọn ti lọ si ile-ẹkọ bibeli kan tabi omiran, ti wọn si n wọ aṣọ ẹgbẹjọda onikọla ati ti wọn si wa lori ijọ Ọlọrun kan tabi omiran gẹgẹ bi adari. Awọn miran ẹwẹ ni a n pe ni pasitọ nitori iṣedeede wọn ninu ijọ wọn. Sugbọn eniyan ko ki i ṣe pasitọ tabi olusọ-aguntan nitori awọn nkan wọnyi. Eniyan jẹ pasitọ nitori pe Ọlọrun yan an, O si tun fun ni awọn ẹbun Ẹmi Mimọ ti o ṣe pataki lati duro gẹgẹ bi olusọ-aguntan ati olukọni fun awọn ọmọ rẹ.

Nkan ti a n sọ ni wipe, gẹgẹ bi Pọọlu ṣe fi ye wa ninu lẹta rẹ si awọn ara Efesu ti o wa loke, pasitọ jẹ ẹnikan ti Jesu Oluwa wa yan, ti O si tun ṣe yẹ lati jẹ oluṣọ-aguntan, alabojuto ati olukọni fun awọn ọmọ Ọlọrun. Fun apẹẹrẹ, lẹyin ajinde rẹ, Jesu fi ara han diẹ lara awọn ọmọ ẹyin rẹ lọjọ kan, a si kọ eyi silẹ nipa nkan ti O sọ fun Peteru:

“Lẹyin igba ti wọn jẹun owurọ tan, Jesu wi fun Simoni Peteru pe, Simoni, ọmọ Jona, iwọ fẹ mi ju awọn wọnyi lọ bi? O si wi fun un pe, Oluwa; Iwọ mọ pe mo fẹran rẹ, O wi fun un pe, Maa bọ awọn ọdọ-agutan mi. O tun wi fun un nigba keji pe, Simoni, ọmọ Jona, iwọ fẹ mi bi? O wi fun un pe, Bẹẹ Oluwa; iwọ mọ pe mo fẹran rẹ. O wi fun un pe, Maa bọ awọn agutan mi. O wi fun un nigba kẹta pe, Simoni, ọmọ Jona, iwọ fẹran mi bi? Inu Peteru bajẹ, nitori ti o wi fun un nigba ẹkẹta pe, Iwọ fẹran mi bi? O si wi fun un pe, Oluwa, iwọ mọ ohun gbogbo; iwọ mọ pe, mo fẹran rẹ. Jesu wi fun un pe, Maa bọ awọn agutan mi.” (Johanu 21:1l5-17)

Bi a ti ṣe ri ninu awọn ẹsẹ bibeli yi, Jesu funrarẹ ni O yan Peteru lati ṣe amujoto awọn aguntan rẹ. Oun ko wa ni yan ẹnikẹni lati ṣe ohunkohun ti ko ba ṣetan lati mu ẹni naa yẹ lati ṣe e. Nitori eyi, nipa sisọ fun Peteru lati bọ tabi tọju awọn aguntan rẹ, o tunmọ si pe O ti pinnu lọkan rẹ lati ṣe arakunrin yi yẹ fun iṣẹ naa niyẹn. Awọn wo wa ni aguntan rẹ ti O n tọka si nigba ti O n ba Peteru sọrọ? Gbogbo ijọ awọn ti o gbagbọ ninu rẹ, awọn eniyan mimọ rẹ, ni aguntan rẹ. (Cf. Luuku 12:32; Johanu 10:1-16)

Ni kukuru, pasitọ jẹ ẹni kan ti Jesu yan, ti O si mu yẹ lati ṣe amujoto awọn ọmọlẹyin rẹ nibi yowu ti wọn le wa ati iye yowu ti wọn le jẹ, ki ifẹ rẹ ba le wa si imuṣẹ ninu aye wọn. Iru awọn ẹni bẹẹ ni a si tun tọka si ninu bibeli gẹgẹbi alagba tabi biṣọọbu. Boya wọn wa jẹ pasitọ lori ijọ Ọlọrun kekere tabi pupọ kọ ni koko. Koko ni pe Jesu yan wọn, O si ṣe wọn yẹ lati ṣe amojuto awọn ọmọ rẹ. (Wo: Iṣe Apọsiteli 19:1-7; 1Timoti 1:3; Titu 1:5)

KI NI AWỌN AMUYẸ PASITỌ?
Ki wa ni awọn nkan ti o gbọdọ wa ninu eniyan ki a to le ri gẹgẹ bi ẹnikan ti Jesu ti yan lati jẹ pasitọ tabi oluṣọ-agutan fun awọn ọmọ rẹ? Pọọlu mẹnuba pataki lara awọn nkan wọnyi ninu lẹta rẹ akọkọ si Timoti, eyi ti o ka bayi:
“Otitọ ni ọrọ naa, bi ẹnikan ba fẹ lati jẹ biṣọọbu, iṣẹ rere ni o n fẹ. Nitori bisọọbu gbọdọ jẹ alailẹgan, alaya kan, ẹni ti o lee ko ara rẹ ni ijanu, ẹni ti n fi ọgbọn ṣe ohun gbogbo, olorukọ rere, olufẹ alejo ṣiṣe, ẹni ti o ni oore-ọfẹ lati kọ awọn eniyan. Ẹni ti kii ṣe omuti, tabi oniwahala, bi ko ṣe onisuuru, kii ṣe onija, tabi olufẹ owo; Ẹni ti o lee ṣe akoso idile rẹ daradara, ti awọn ọmọ rẹ si le gbọ tirẹ pẹlu itẹriba ni ohun gbogbo; (Nitori bi ọkunrin kan ko ba mo bi oun o ti ṣe ikawọ idile ara rẹ, oun o ha ti ṣe le tọju ijọ Ọlọrun?) Ki o ma ṣe jẹ ẹni tuntun ninu igbagbọ, ki o ma baa gberega, ki o si ṣubu gẹgẹ bi Eṣu ti ṣe. O si yẹ ki o ni ẹri rere pẹlu lọdọ awọn alaigbagbọ: ki o ma baa bọ sinu ẹgan ati sinu idẹkun Eṣu.” (1Timoti 3:1-7)

Bi mo ti ṣe sọ siwaju, ni igba aye awọn apositeli Pọọlu, ara awọn apele ti a tun le lo fun pasitọ tabi oluṣọ-aguntan ni biṣọọbu tabi alagba. Nitorina, awọn amuyẹ ti Pọọlu sọ pe eniyan gbọdọ ni ki Timoti to le fi ṣe biṣọọbu tabi alamojuto fun awọn ọmọ Ọlọrun naa ni pasitọ gbọdọ ni. Lotitọ Ọlọrun nikan naa ni o le yan eniyan, ki O si tun ṣe yẹ lati jẹ pasitọ. Amọ ko digba ti Ọlọrun ba kọ si wa lati ọrun pe pasitọ ni ẹnikan ki a to mọ boya pasitọ ni tabi pasitọ kọ. Ti a ba ti kiyesi awọn amuyẹ ti Pọọlu sọrọ nipa wọn ninu awọn ẹṣẹ bibeli ti o wa loke yi ninu aye eniyan, a le sọ daju boya a ṣe e yẹ lati jẹ pasitọ tabi bẹẹ kọ.

Gẹgẹ bi a si ti ṣe ri, awọn amuyẹ naa ko ni nkankan ṣe pẹlu pe ki a lọ si ile ẹkọ bibeli tabi ki a so kọla funfun mọ ọrun tabi ki a de ade biṣọọbu. Dipo eyi, lakọkọ, wọn ni i ṣe pẹlu ki eniyan jẹ ọmọ Ọlọrun ti aye rẹ n ti n so eso ẹmi fun akoko ti o kojuosuwọn, ti a si le jẹri nipa rẹ. Ki si ni idi? Idi ni wipe pataki iṣẹ pasitọ ni ki o ṣe amojuto awọn ọmọ Ọlọrun lati jẹ ki aye wọn ri bi Ọlọrun ṣe fẹ ki wọn ri. Ti aye tirẹ gan ko ba wa jẹ apẹẹrẹ nkan ti Ọlọrun fẹ ri ninu aye awọn ọmọ rẹ, ti oun funrarẹ ko ma so eso ẹmi fun igba ti o ṣe diẹ to lati jẹ ki awọn eniyan mọ pe dajudaju ọmọ Ọlọrun tootọ ni o jẹ, bawo ni o ṣe le jẹ pasitọ tootọ ati rere?

Ekeji, awọn amuyẹ ti Pọọlu n sọrọ nipa ni i ṣe pẹlu ki eniyan ni ẹbun ẹmi lati kọ ọrọ Ọlọrun. Gẹgẹ bi a si tun ṣe ri ninu lẹta rẹ si awọn ara Efesu, akopọ ni Jesu fi iṣẹ pasitọ ati olukọni ṣe. Idi si ni pe ko si bi eniyan ṣe fẹ jẹ pasitọ to dangajia ti ko ba le kọ awọn eniyan ni ọrọ Ọlọrun. Bawo ni o ṣe fẹ fi ifẹ Ọlọrun han si awọn ti o n ṣedari, ti ko ba le kọ wọn ni ọna ti o ye kooro? Nitorina, ẹnikẹni to ko ba le fi arabalẹ kọ awọn eniyan ni ọrọ Ọlọrun pẹlu suuru ati lẹsẹẹsẹ ko ki i ṣe pasitọ, bi o tilẹ n wọ kọla tabi bi o tilẹ ti lọ si ile-ẹkọ bibeli kan tabi omiran.

Wayi o, ẹni ti yo wa kọ eniyan ni ọrọ Ọlọrun naa gbọdọ mọ Ọlọrun ati ọrọ rẹ daju. O gbọdọ ni oye gbogbo ifihan Ọlọrun ti o wa ninu bibeli ati bi awọn ifihan yi ṣe gbọdọ tọ iṣiṣẹ aye awọn eniyan. Bẹẹni o gbọdọ le sọ daju bi Pọọlu ṣe sọ fun awọn alagba ijọ Efesu pe, “Emi ko fa sẹyin lati sọ ohunkohun ti o le ṣanfani fun yin ati lati sọ gbogbo ipinnu Ọlọrun fun yin.” (Wo: Iṣe Apositeli 20:20&27) Aijẹbẹ, a ko le pe ni ẹni amuyẹ fun iṣẹ pasitọ. Idi ni yi ti a fi ni awọn eke pasitọ ati olukọ. Awọn wọnyi ni awọn apositeli igbaani kilọ fun wa lati kiyesara fun. Ko si soro lati mọ wọn. Idi ni si pe eso ti aye wọn n so yoo fi wọn han. Yatọ si pe wọn yoo jẹ ẹlẹkọ odi, ẹni ti o n tẹle ẹkọ awọn ẹmi eṣu, wọn o tun jẹ opurọ, oniṣẹkuṣe ati ẹni ti aye rẹ ko wa ni ibamu pẹlu ọrọ Ọlọrun ti o ye kooro. Awọn wọnyi ni a gbọdọ yẹra fun, ki wọn ma ba a ṣi wa lọna, ki wọn si gba igbagbọ wa danu kuro lọwọ wa. (Wo: 1Timoti 4:1-5; 2Timoti 4:3; 2Peteru 2; Juudu)

Ẹkẹta, awọn amuyẹ ti Pọọlu n sọrọ nipa ni i ṣe pẹlu ki ẹni ti a n wo bi pasitọ ni ẹbun iṣakoso. Bawo ni a ṣe wa fẹ mọ boya ẹni naa ni ẹbun lati ṣe akoso tabi amojuto awọn ọmọ Ọlọrun? Pọọlu ni ki a wo bi o ṣe n ṣe akoso ile rẹ, gẹgẹ bi ẹni ti o ti gbeyawo, ti o si tun ti bimọ. Ti ko ba wa i ti gbeyawo tabi bi ọmọ nkọ? A le wo bi o ṣe n ṣe akoso awọn ti o wa labẹ rẹ ni bi iṣẹ rẹ tabi ki a dan wo fun igba diẹ pẹlu isakoso awọn eniyan Ọlọrun perete, ki a si wo bi yoo ṣe ṣe si. Nikukuru, a ko gbọdọ kanju fi ẹnikẹni si ipo pasitọ tabi adari ijọ, niwọn igba ti a ko ba i ti ri awọn amuyẹ ti bibeli tọka si ninu aye rẹ. (Wo: 1Timoti 3:10&5:22)

Amuyẹ miran ti a tun nilo lati ri ninu ẹnikẹni ti a le pe ni pasitọ ni ifẹ ati itara lati ṣe amujuto awọn ọmọ Ọlọrun, ki ifẹ rẹ ba a le wa si imuṣẹ ninu aye wọn. Eyi tunmọ si pe pasitọ ko ki i ṣe ẹnikan ti a o ma mu ni ori tabi mu ni ọrun ki o to tara ṣaṣa mu ọrọ awọn ọmọ Ọlọrun ti o wa ni abẹ akoso rẹ ni ọkunkundun. Dipo eyi o jẹ ẹni ti Ọlọrun ti fi ifẹ ati ṣe rere awọn ọmọ rẹ si ni ọkan, ti o si ṣetan lati fi ifẹ yi han ni igba ti o wọ ati igba ti ko wọ. (Wo: Johanu 10:11-13; Roomu 1:11; 2Tẹsalonika 2:17-3:5; 1Peteru 5:2)

KI NI IṢẸ TABI OJUṢE PASITỌ?
Pẹlu awọn nkan ti a ti gbeyẹwo lori amuyẹ pasitọ, ki wa ni awọn nkan ti a le pe ni ojuṣe rẹ? Ki gan ni idi ti Ọlọrun fi n yan pasitọ sori awọn ijọ rẹ? Idi ni pe ko fẹ ki awọn eniyan rẹ dabi aguntan ti ko ni olusọ. Mose, ki o to fi aye silẹ, gba adura yi si Ọlọrun: “Jẹ ki Oluwa, Ọlọrun ẹmi gbogbo eniyan, ki o yan ọkunrin kan sori ijọ. Ti yoo maa ṣaaju wọn jade lọ, ti yoo si maa ṣaaju wọn wole wa, ti yoo si maa sin wọn lọ, ti yoo si maa mu wọn bọ; ki ijọ eniyan Oluwa ki o ma baa dabi agutan ti ko ni olusọ.” (Numeri 27:16-17) Eyi n fi idi rẹ mulẹ fun wa pe a nilo olusọ-aguntan ninu aye wa ati pe a ko le da ṣe akoso aye wa funra wa (Jeremaya 10:23-24). Ẹni kan ṣoṣo ti o ṣi le se akoso aye wa lọna ti a o fi da ẹni ti o yẹ ki a da ninu Jesu Kirisiti. Idi niyi ti O fi pe ara rẹ ni Oluṣọ-aguntan rere ati alakoso ọkan wa (Johanu 10:11; 1Peteru 2:25).

Amọ ṣa o, bi o tilẹ jẹ pe Jesu gan ni olori oluṣọ-aguntan, ko si ni aye lọwọlọwọ bayi pẹlu wa. Ẹmi mimọ rẹ ni o wa pẹlu wa. Nitori eyi ni O ṣe ma n ṣe awọn eniyan bi ti wa yẹ nipasẹ Ẹmi mimọ rẹ lati ṣe lara iṣẹ rẹ gẹgẹ bi pasitọ gbogbo wa. Ki wa ni awọn iṣẹ tabi ojuṣe yi? Koko rẹ naa ni ṣiṣe amojuto awọn ọmọ Ọlọrun ki ete ati ifẹ rẹ ba le wa si imuṣẹ ninu ati lori aye wọn, ki wọn si pari ere ije wọn ninu aye yi si inu ijọba rẹ (Iṣe Aposteli 20:28; Kolose 1:28-29; 1Peteru 5:2). Eyi si ni i ṣe pẹlu awọn nkan wọnyi:

Mimojuto aye ara rẹ lati duro ṣinṣin ninu ifẹ Ọlọrun (Iṣe Apositeli 20:28; 1Timoti 4:15-16).
Diduro niwaju awọn ọmọ Ọlọrun gẹgẹ bi apẹẹrẹ ifẹ Ọlọrun (1Timoti 4:12; Titu 2:7-8; 1Peteru 5:3).
Kikọ awọn ọmọ Ọlọrun ni ife rẹ, ki wọn ba le mọ iyatọ laarin ohun ti o tọ ati eyi to ko tọ (Lẹfitiku 10:8-11; Malaki 2:7; Esikiẹli 44:23; 1Timoti; 2Timoti; Titu).
Adura gbigba fun iduro ṣinṣin awọn ọmọ Ọlọrun ninu ifẹ rẹ ati fun aabo kuro lọwọ awọn onigbagbọ eke ati ikẹkun Eṣu (Iṣe Apọsiteli 6:3-4; Kolose 4:12).
Ibawi ati itọsọna awọn ọmọ Ọlọrun, ki ijọ rẹ ba le wa ni ilera (1Korinnti 5; 1Timoti 1:3-7; Titu 1:5-16).
Imupada awọn ọkan ti o ṣako lọ (Iṣikiẹli 34:1-6; Galatia 6:1).

BAWO NI PASITỌ ṢE YẸ KI O ṢE IṢẸ RẸ?
Wayi o, ọtọ ni ki pasitọ mọ ojuṣe rẹ, ọtọ si ni ki o ṣe e. Ọtọ tun ni ki pasitọ ṣe ojuṣe rẹ, ọtọ tun si ni ki o ṣe ni ọna ti o ba ifẹ Ọlọrun mu. Pọọlu, ninu lẹta rẹ kan si awọn ara Kọrinnti, sọ wipe ki olukuluku ti o n ṣiṣẹ fun Ọlọrun kiyesara lori ọna ti o n gba a ṣe. Ki si ni idi? Idi ni pe ọna ti a ba gba ṣe iṣẹ rẹ ni yoo so boya yoo yọri si mimu ifẹ, ete ati ipinnu rẹ ṣẹ tabi bẹẹkọ. Yatọ si eyi, ọna ti a ba gba ṣe iṣẹ rẹ ni yoo so boya awa funrawa yoo ri ere gba lati ọwọ rẹ tabi bẹẹkọ. (Wo: 1Kọrinnti 3:5-15 & 9:24-27)

Idi si niyi ti Peteru ṣe gba awọn oluṣọ-aguntan ni iyanju pẹlu awọn ọrọ yi: “Awọn alagba ti n bẹ laarin yin ni mo gbaniyanju, emi ẹni ti i ṣe alagba bi ẹyin, ati ẹlẹrii iya Kirisiti, ati alabaapin ninu ogo ti a o fihan: Ẹ maa ṣe oluṣọ-aguntan awọn eniyan ti Ọlọrun fi sabẹ akoso yin, ẹ maa bojuto wọn, ki i ṣe afipaṣe, bi ko ṣe tifẹtifẹ, bẹẹ ni ki i ṣe ọrọ ere ijẹkujẹ, ṣugbọn pẹlu ọkan ti o mura tan. Bẹẹ ni ki i ṣe bi ẹni ti n lo agbara lori ijọ ti n bẹ labẹ akoso yin, ṣugbọn ki ẹ ṣe ara yin ni apẹrẹ fun wọn. Nigba ti olori Oluṣọ-aguntan ba si de, ẹyin o gba ade ogo ti ki i sa.” (1Peteru 5:1-4)

Pẹlu nkan ti Peteru sọ yi, a ri wipe oluṣọ-aguntan lakọkọ gbọdọ mọ pe oun kọ ni o ni awọn ti o wa ni abẹ akoso rẹ – Ọlọrun ni o ni wọn. Nitorinaa, ko gbọdọ lo ipo ati aṣẹ rẹ lati rẹ wọn jẹ tabi ja wọn lole tabi mu wọn ṣubu tabi mu wọn parun. Dipo eyi, o gbọdọ ṣetan lati sin wọn pẹlu itara, tọkantọkan ati tifẹtifẹ. Yatọ si eyi, o gbọdọ fi gbogbo igba duro niwaju wọn gẹgẹ bi apẹẹrẹ nkan ti Ọlọrun fẹ ri ninu aye wọn. Aijẹbẹ, Ọlọrun ko le ti ipasẹ rẹ mu gbogbo ifẹ rẹ ṣẹ ninu aye awọn ọmọ rẹ. Bẹẹ si ni oun naa ko le ri ere gba lọwọ Ọlọrun fun iṣẹ iriju rẹ. (Wo: 2Kọrinnti 10:8&13:10)

Siwaju si, pasitọ gbọdọ gbe ọkan rẹ le Ọlọrun nikan fun amuyẹ ati aṣeyọri rẹ gẹgẹ bi oluṣọ awọn aguntan Ọlọrun. Pọọlu sọ eyi fun wa: “Kii ṣe pe awa to fun ara wa lati ṣiro ohunkohun bi ẹni pe lati ọdọ awa tikarawa; ṣugbọn tito wa ti ọdọ Ọlọrun wa. Ẹni ti o fun wa ni agbara eyi ti o to lati jẹ iranṣẹ majẹmu tuntun naa; kii ṣe ti iwe, bi ko ṣe ti ẹmi: nitori iwe a maa pani, ṣugbọn ẹmi a maa sọni di aaye.” (2Korinnti 3:5-6) Peteru naa tun sọ wipe, “…bi ẹnikẹni ba n ṣe iṣẹ isin, ki o ṣe e bi agbara ti Ọlọrun fi fun un…” (1Peteru 4:11) Eyi tunmọ si pe pasitọ tabi iranṣẹ Ọlọrun kankan ko gbọdọ gboju le ohun miran yatọ si Ọlọrun fun amuyẹ ati aṣeyọri rẹ. Ko gbọdọ gbojule imọ-ijinlẹ rẹ, ẹkọ rẹ, adura gbigba rẹ, ẹkọ bibeli tabi imọ bibeli rẹ, owo, eniyan, ẹgbẹ okunkun ati bẹẹbẹẹ lọ. Aijẹbẹ, yoo kuna gidigidi.

NJẸ IṢẸ IRANṢẸ PASITỌ NI AALA BI?
Ṣe iṣẹ iranṣẹ pasitọ wa ni alaa tabi gbedeke bi tabi ko ni? A bi ki a sọ pe ṣe ti eniyan ba jẹ pasitọ lotitọ, ṣe gbogbo ọmọ Ọlọrun naa ni o jẹ pasitọ fun? Pọọlu sọ eyi fun awọn ara Korinnti: “Ṣugbọn awa ki yoo ṣogo rekọja ara wa, ṣugbọn ero wa ni lati duro ni ala naa, ti Ọlọrun ti pin fun wa, ani lati de ọdọ yin. Nitori awa ko koja aaye wa rara, bi ẹni pe awa ko de ọdọ yin. Nitori awa tilẹ de ọdọ yin pẹlu ninu iyinrere Kirisiti. Awa ko sogo rekọja ala wa, lori iṣẹ elomiran; ṣugbọn awa ni ireti pe, bi igbagbọ yin ti n dagba si, ki ala wa laarin yin pẹlu maa dagba soke si i.” (1Kọrinnti 10:13-15)

Ki ni eyi n fi ye wa? Oun fi ye wa pe boya pasitọ ni wa ni o tabi apositeli tabi ajinhinrere tabi wolii, iṣẹ iranṣẹ ẹnikọọkan wa ni aala, o ni ibi ti Ọlọrun pin fun wa lati ṣe iṣẹ rẹ. Nitorina, ibi ti aala iṣẹ iranṣẹ wa ba de ni o yẹ ki a ti mura lati lo aṣẹ tabi anfaani ti O ba fun wa. A ko lẹtọ lati lo awọn nkan yi lori tabi laarin awọn ọmọ Ọlọrun ti ko ko si abẹ akoso wa. O wa ṣeni laanu pe ọpọ iranṣẹ Ọlọrun ni ko mọ eyi. Nitorinaa, ọpọ igba ni wọn ma n fẹ ki awọn ti ko mọ wọn ri bu ọwọ fun wọn tabi ran iṣẹ iranṣẹ wọn lọwọ tabi tẹlẹ aṣẹ tabi imọran wọn nitoripe wọn jẹ pasitọ, wolii ati bẹẹbẹẹlọ. Nigba ti eyi ko ba si waye, wọn a sọ da ibinu. Eyi si le fa idajọ Ọlọrun wa si ori wọn, bi idajọ rẹ ṣe wa si ori Mose nitoripe ko fi ọwọ Ọlọrun wọ awọn eniyan rẹ ni ọjọ kan. (Wo: Numeri 20:1-12)

Nitori naa, ti o ba jẹ pasitọ, mọ awọn ti Ọlọrun yan ọ gẹgẹ bi pasitọ lori wọn, ki o si jẹ ki lilo aṣẹ rẹ tabi anfaani iṣẹ iranṣẹ rẹ mọ ni aarin wọn. Ti Ọlọrun si ba wa tun jẹ ki alaa iṣẹ iranṣẹ rẹ gbooro si, o tun le tẹsiwaju lati lo aṣẹ ati anfaani iṣẹ iranṣẹ rẹ lati ṣe amojuto awọn miran ti O ba tun fi si abẹ akoso rẹ. Ṣugbọn ma ṣe ṣe aṣiṣe lati ṣakoso aye awọn ti Ọlọrun ko fi si abẹ akoso rẹ. Eyi le ko ba ọ lọna ti ko ṣe e fẹnusọ.

IHA WO NI O YẸ KI A KỌ SI AWỌN PASITỌ WA?
Bi a ti ṣe ri, Ọlọrun lo ma n ṣe awọn eniyan yẹ lati jẹ pasitọ tabi oluṣọ-aguntan tun awọn ọmọ rẹ. Amọ, o tun wa yẹ ki o ye wa pe bi o ti wu ki Ọlọrun ṣe awọn eniyan yẹ to fun iṣẹ iranṣẹ yi, ti a ko ba kọ iha ti o tọ si wọn ati si iṣẹ iranṣẹ wọn, ifẹ, ete ati ipinnu Ọlọrun ko le fi taratara wa si imuṣẹ ninu aye wa, ti o ba tilẹ wa si imuṣẹ rara. Fun apẹẹrẹ, bi o tilẹ jẹ pe Mose jẹ oluṣọ-aguntan tootọ, ti Ọlọrun si ṣe yẹ lati ṣe amojuto awọn eniyan rẹ ati lati ṣe itọni wọn wọ ilẹ-ileri, meji pere ninu awọn agbagba ti o ko jade lati Ijibiti ni o wọ ile ileri naa. Ki ni o si fa? Iha ti wọn kọ si iṣedari rẹ lo fa. Ti awa naa ko ba si kọ iha ti o tọ si awọn ti Ọlọrun yan fun wa gẹgẹ bi oluṣọ-aguntan lati ṣe idari wa wo ile ogo rẹ lalai ni ailabawọn, o ṣeeṣe ki ifẹ, ete ati ipinnu rẹ ma wa si imuṣẹ lori aye wa, paapaa julọ ninu aye yi. (Wo: 1Korinnti 10:1-11)

Nitori naa, o yẹ ki a mọ iha ti o tọ lati kọ si awọn pasitọ wa. Ki wa ni awọn iha naa ti o yẹ ki a kọ si wọn? Akọkọ, a gbọdọ bọwọ fun wọn gidigidi gẹgẹ bi iriju Ọlọrun laarin wa. A ko gbọdọ ri wọn fin tabi ba wọn lopọ pẹlu ailoye. Eyi ko si ki i ṣe nitori pe wọn ṣe iyẹbibiye niwaju Ọlọrun ju wa lọ ṣugbọn nitori iṣẹ ti o gbe fun wọn fun idagbasoke, ipamọ ati iduro-ṣinṣin wa. (Wo: 1Tẹsalonika 5:12-13)

Ekeji, a gbọdọ gbọran si wọn lẹnu, niwọn igba ti ọrọ, irin ati iṣeṣi wọn ba ti wa ni ibamu pẹlu ọrọ ati ifẹ Ọlọrun. A gbọdọ mọ daju wipe Ọlọrun ti fun wọn ni aṣẹ lati ṣe amojuto wa fun idagbasoke, igbeniro ati iduro ṣinṣin ninu imọ Kirisiti ati ninu igbagbọ. Yatọ si eyi, Ọlọrun yoo bere lọwọ wọn bi wọn ba ṣe ṣe itọju ati amojuto wa si. Ko wa ni dara ki wọn ma ṣe iṣẹ wọn laarin wa pẹlu ikẹdun, omije, ibanujẹ tabi ẹru. Eyi ko ni yọri si ire tabi ayọ fun wa. Idi kan pataki si ni yi ti ọpọ ọmọ Ọlọrun ko ṣe ma ṣe orire, ki wọn si gberu si ninu igbagbọ wọn labẹ akoso awọn oluṣọ-aguntan wọn, bi o tilẹ jẹ pe wọn ti pẹ kanrikese ninu ijọ ti wọn wa. Oun naa ni o tun fa ti awọn miran ṣe ti ṣegbe laitọjọ ati lairotẹlẹ, bi o tilẹ jẹ pe awọn pasitọ wọn n gbadura fun wa kikan. Niwọn igba ti a ko ba si yipada, ki a si bẹrẹ si ni mu iṣedari awọn oluṣọ-aguntan wa ni ọkunkundun, nkan ko ni yipada fun wa ninu ọpọ awọn ijọ wa. (Wo: Luuku 13:6-9; 1Kọrinnti 16:10-11; 2Kọrinnti 10:8&13:10; Heberu 13:7&17)

Ẹkẹta, a ko gbọdọ gbagbe rara pe ẹlẹran ara ni awọn pasitọ tabi oluṣọ-aguntan wa naa. Nitori naa, wọn le ṣe aṣiṣe tabi kuna. Idi niyi ti a fi gbọdọ ma fi gbogbo igba tẹle ọrọ Pọọlu ti o sọ wipe, “Ẹ maa ṣe afarawe mi, ani gẹgẹ bi emi ti n ṣe afarawe Kirisiti.” (1Korinnti 11:1) Eyi wa ja si pe niwọn bi awọn pasitọ wa ba ṣe tẹle Kirisiti ni ọrọ, iwa ati iṣe ni ki awa naa ṣe tẹle wọn. Ni ọnakọna ti wọn ko ba ti tẹle, awa naa ko gbọdọ tẹle wọn. Aijẹbẹ, a le tipasẹ eyi kuna tabi ṣubu ninu irinajo igbagbọ wa.

Ẹkẹrin, a gbọdọ mọ pe ojuṣe wa ni lati ran iṣẹ iranṣẹ awọn pasitọ wa lọwọ pẹlu ogbọn wa, nkan ini wa, oye wa, imọ-ijinlẹ wa ati bẹẹbẹẹ lọ. Ki ni idi? Aṣẹ Jesu Kirisiti ni pe ki a ṣe bẹ. Yatọ si eyi, ti awa gan ba mọ ohun ti o tọ fun wa, o yẹ ki oye ye wa pe ti eniyan ba n fi gbogbo igba fi ara rẹ jin lati ṣe itọju ati ikẹ wa, o yẹ ki a ma fi ẹmi imore han loore-koore. Eyi tunmọ si pe ko ki i ṣe isoro ati aniyan wa nikan ni o yẹ ki a jẹ ki wọn jẹ alabapin ninu wọn; o tun yẹ ki a jẹ ki wọn jẹ alabapin iṣorire, ayọ ati ọpọ yanturu wa. Aijẹbẹ, a le ba ijiya Ọlọrun pade, gẹgẹ bi awọn ara igbaani ti ṣe ba pade. (Wo: Malaki 3:8-12; 1Kọrinnti 9:14; Galatia 6:6; Filipi 4:10-19)

ỌRỌ IPARI
Ni akotan, pasitọ ni ẹni naa ti Ọlọrun ṣe yẹ lati jẹ oluṣọ-aguntan fun awọn ọmọ rẹ. Ki a ba si le gbadun iṣẹ iranṣẹ rẹ, a gbọdọ mọ daju, ki a bọwọ fun, ki a ran iṣẹ iranṣẹ rẹ lọwọ, ki a si gbọran si lẹnu ni ibamu pẹlu aṣẹ Ọlọrun.

IBEERE

Bawo ni iṣẹ pasitọ ṣe ṣe pataki to ninu ijọ Ọlọrun?
Awọn kan a ma sọ wipe wolii ga ju pasitọ lọ ninu ijọ. Njẹ otitọ ni eyi tabi irọ ni?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

ALAYTHIA BIBLE CHURCH (IJỌ OTITỌ BIBELI)
ALAKALẸ ẸKỌ BIBELI ATI ALAYE
ỌJỌRU 11, OGUN 2021 Read More »

Ọna lati di ọta Ọlọrun | Paito J.O. Lawal

Leave a Comment

Ọjọ: Ogun 08, 2021 | Atẹlera: Latori tabili Paitọ | Nọmba: Vol. 10, No. 14

Olufẹ: kaabọ sinu ọsẹ keji ninu oṣu Ogun 2021. Ki oore-ọfẹ Jesu Kirisiti Oluwa wa, ifẹ ti Ọlọrun ati ibadapọ Ẹmi Mimọ wa pẹlu rẹ nisinsinyi ati titi lailai. Amin.

Bi a ṣe n bẹrẹ ọsẹ tuntun yi, mo fẹ gba ọ niyanju pẹlu ọrọ Apọsiteli Pọọlu, ti o sọ wipe, “Njẹ oju rere eniyan ni emi n wa ni tabi ti Ọlọrun? Tabi emi n fẹ lati wu eniyan, nitori pe, bi emi ba si n wu eniyan, emi ki yoo le ṣe iranṣẹ Kirisiti.” (Galatia 1:10) Njẹ eyi wa tunmọ si pe ko dara rara lati gba oriyin awọn eniyan tabi lati dun wọn ninu? Rara o! Dipo bẹẹ, o tilẹ ṣe pataki ki a kọ lati ma ṣe awọn nkan ti o dun mọ awọn eniyan ninu, paapaa julọ awọn ti a jọ n ṣepọ ninu aye wa. Idi si ni pe eyi yoo mu ki ifẹ, alaafia ati iṣọkan ti o wa ni aarin wọn siwa gbooro si.

Ki si ni Ọlọrun n fẹ laarin awọn eniyan? O n fẹ ifẹ, alaafia ati iṣọkan laarin wọn. Nitorina, nigba ti a ba n lepa lati tẹ awọn eniyan lọrun, ki a ba le mu awọn nkan wọnyi waye, inu Ọlọrun n dun si wa. Ẹnikẹni ti ko ba si ni kẹkọ, ki o si tun ma ṣiṣẹ lati dun awọn eniyan ninu ni ọna yi ko daju pe yoo le fi ara rẹ jin fun ikoraẹni-nijanu ti eniyan gbọdọ ni lati le dun Ọlọrun ninu.

Amọ ṣa o, a nilo lati ṣọra lati ma ṣe ṣẹ Ọlọrun nigba ti a ba n gbiyanju lati tẹ awọn eniyan lọrun. Eyi si ni koko ọrọ ti Pọọlu tẹ pẹpẹ rẹ silẹ fun wa ninu ẹsẹ bibeli yẹn. O fẹ ki a mọ pe bi o tilẹ jẹ wipe Ọlọrun ma n fẹ ti a tiraka lati tẹ awọn eniyan lọrun, ki ibaṣepọ wa pẹlu wọn ba le dan mọran, ki o si jẹ eyi ti o ni alaafia, ko fẹ ki a fi eleyi ba ibaṣepọ wa pẹlu rẹ jẹ.

Ki wa ni eyi tunmọ si? Ni kukuru, o tunmọ si pe Ọlọrun funrarẹ ni O gbọdọ sọ fun wa ọna ti a gbọdọ gba tẹ awọn eniyan lọrun. Lotitọ, awọn eniyan le fẹ ki a rin ni awọn ọna kan ki inu wọn ba le dun tabi yọ si wa. Ṣugbọn wọn ko ki i ṣe ẹlẹda wa, bẹẹ si tun ni wọn ko ki i ṣe ẹni ti yoo ṣe idajọ wa tabi pin wa ni ere fun awọn nkan ti a ba ṣe ni aye yi, boya rere ni tabi buburu. Nitori naa, bi o tilẹ jẹ wipe ko buru ki wọn fẹ ki a tẹ wọn lọrun ni ọna kan tabi omiran, igba ti nkan ti wọn n fẹ ba tẹ Ọlọrun nikan ni a gbọdọ ṣe. Ti nkan ti wọn n fẹ ko ba tẹ ẹ lọrun tabi wa ni ibamu pẹlu ifẹ rẹ, a gbọdọ kọ lati ṣee fun wa tabi lati fi le wọn lọwọ.

Njẹ eyi yo wa mu inu wọn dun bi? Ṣe ki a ṣe nkan ti ko dun mọ awọn eniyan ninu le mu ki inu wọn dun si wa bi? Rara o! Ṣugbọn gẹgẹ bi ọmọ ti o mọ ojuṣe rẹ si Ọlọrun, pataki julọ ninu gbogbo ilepa wa ni aye yi ni ki a tẹ ẹ lọrun, ki a si tun mu inu rẹ dun, ko ki i ṣe ki a tẹ awọn eniyan lọrun ati ki a mu inu wọn dun (2Korinnti 5:9). Lotitọ, ni ọpọ igba, ti a be tẹ Ọlọrun lọrun, ti si mu inu rẹ dun, a o tẹ awọn eniyan lọrun ati mu inu wọn dun pẹlu. Ṣugbọn a ma n ri awọn igba miran ti o jẹ wipe jijẹ itẹwọgba niwaju rẹ yoo gbe wa kọlu awọn eniyan. Eyi yoo si jẹ nitori ikorira wọn fun ododo ati otitọ rẹ (Johanu 3:19-21).

Sibẹsibẹ, bi a ba tilẹ gbe wa kọlu eniyan nitoripe a fẹ tẹ Ọlọrun lọrun, a ko gbọdọ ba ọkan jẹ tabi ba ara jẹ. Idi si ni pe o ṣan pupọpupọ lati jẹ ọta eniyan, ki a si fi igba diẹ jiya ikọsilẹ, eebu ati inunibini wọn ju ki a jẹ ọta Ọlọrun, ki a wa sọnu titi ayeraye. Ti o ba ni awọn eniyan gẹgẹ bi ọta rẹ, Ọlọrun le gba ọ ni ọwọ wọn. Ṣugbọn ti o ba ni Ọlọrun gẹgẹ bi ọta ayeraye rẹ, tani yoo gba ọ lọwọ rẹ? Ko si!

Jemisi sọ wipe, “Ẹyin pansaga ọkunrin, ati pansaga obinrin, ẹ ko mọ pe ibarẹ aye iṣọta Ọlọrun ni? Nitori naa ẹnikẹni ti o ba fẹ lati jẹ ọrẹ aye di ọta Ọlọrun.” (Jemisi 4:4) Njẹ o ri bayi? Ti o ba titori nkankan, boya ẹru, owo, igbadun, ipo tabi ifẹ si oriyin awọn eniyan, di ọrẹ aye, o ti di ọta Ọlọrun niyẹn o. Nkan ti yoo si ti ẹyin rẹ yọ ko ni dara fun ọ tabi fun ọ ni igbadun kankan, boya ni aye yi tabi ni eyi ti o n bọ.

Ranti Pilatu. Kini idi ti o fi tu ọdanran silẹ lati lọ tẹsiwaju ninu igbe aye ẹṣẹ rẹ ṣugbọn ti o da alailẹbi eniyan lẹbi iku? Idi ni pe o fẹ tẹ awọn eniyan lọrun (Maaku 15:15). Nitori naa, o di ọta Ọlọrun ati ọta otitọ ati idajọ ododo nitoripe o fẹ ṣe nkan ti o wu awọn eniyan. Mo wa n wo iru ẹjọ ti o fẹ ro fun un ni ọjọ idajọ, ti o ba jẹ pe ko ri igbala nipasẹ igbagbọ ninu Kirisiti Jesu ki o to ku. Mo si tun n wo nkan ti iwọ naa yoo ri wi fun ni ọjọ ti O ba bẹ ọ wo, ti o ba fi aye gba ara rẹ lati di ọta rẹ nitoripe o fẹ jẹ ọrẹ awọn alagbere, oniṣina, ole, gbajuẹ, oṣo tabi ika eniyan kan tabi omiran. Amọ ṣa o, adura mi ni pe ohunkohun ko ni ṣe aṣeyọri lati sọ ọ di ọta Ọlọrun, ni orukọ Jesu. Amin.

Ki o ni ọsẹ ti o ga.

Ọna lati di ọta Ọlọrun | Paito J.O. Lawal Read More »

Sa fun iṣekuṣe | Paito J.O. Lawal

Leave a Comment

Ọjọ: Ogun 01, 2021 | Atẹlera: Latori tabili Paitọ | Nọmba: Vol. 10, No. 13

Olufẹ: Ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu kẹjọ ọdun yi, oṣu Ogun. Mo gbadura pe ki a ba ọ to aye rẹ lọna ti o o fi le ni iriri ẹkunrẹrẹ ibukun Ọlọrun ninu oṣu naa, ni orukọ Jesu. Amin.

Bi a ṣe n bẹrẹ oṣu yi, jẹ ki n ran ọ leti ọrọ Apositeli Pọọlu ti o sọ pe, “Ẹ maa sa fun agbere. Gbogbo ẹṣẹ ti eniyan n da o jẹ ti ode ara; ṣugbọn ẹnikẹni ti o n ṣe agbere, o n ṣe si ara oun tikararẹ. Tabi, ẹyin ko mọ pe ara yin ni tẹmpili Ẹmi mimọ, ti n bẹ ninu yin, ti ẹyin ti gba lọwọ Ọlọrun? Ẹyin kii ṣi i ṣe ti ara yin mọ. Nitori Ọlọrun ti ra yin ni iye kan: nitori naa, ẹ lo ara yin lati yin Ọlọrun logo, ati ẹmi yin pẹlu, ti i ṣe ti Ọlọrun.” (1Korinnti 6:17-20) Ki ni aṣẹ ti a ri gba nibiyi? Oun naa ni pe ki a sa fun agbere. Ki wa ni itumọ ki a sa fun nkan? O tunmọ si pe ki a fi ẹsẹ fẹ ti a ba ti kẹfin nkan naa.

Nitori naa, nigba ti Pọọlu sọ fun wa pe ki a sa fun agbere, nkan ti o n sọ ni pe ki a fi ẹsẹ fẹ ti a ba ti kẹfin ohunkohun ti o ni i ṣe pẹlu agbere. Fun apẹẹrẹ, nigbati aya Potifa bẹrẹ si ni yọ Josẹfu lẹnu pẹlu ifẹkufẹ, oun naa bẹrẹ si ni yẹra fun. Bibeli sọ wipe,“Bi o ti n sọ fun Josẹfu lojoojumọ, ti oun ko si gbọ tirẹ lati dubulẹ ti i, tabi lati ba a lo pọ.” (Jẹnẹsisi 39:10) Njẹ o ri bayẹn? Bi o tilẹ jẹ pe obinrin yi fi ojoojumọ fi ṣe iṣẹ ṣe lati tan Josẹfu lati ba a lopọ, oun kọ gbọ tirẹ tabi duro si gberigberi rẹ. Mo mọ daju pe ti o ba jẹ pe ko ki i ṣe ẹru Potifa ni, ti o kan jẹ ọkan lara awọn oṣiṣẹ rẹ, nṣe ni ko ba fi iṣẹ silẹ ba tirẹ lọ. Ṣugbọn nigba ti ko wa ti ṣeeṣe fun lati fi iṣẹ silẹ, ti o si jẹ dandan ki o ri obirin yi lojoojumọ, oun naa wa fi ṣe iṣẹ ṣe lati ma yago fun.

Ni ikẹyin, ọjọ kan de ti gbogbo awọn ọmọ ọdọ ile naa ko si nile. Ojọ yi gan ni arabinrin yi gba aṣọ rẹ mu, ti o sọ fun pe, “Ani wa ba mi lopọ!” Ṣugbọn o fi asọ rẹ silẹ si lọwọ, o si sa jade kuro ninu ile naa. Ki ni idi ti o ṣe salọ? Idi ni pe o le ko sinu panpẹ agbere ti ko ba ṣe bẹẹ. Wo o, iṣekuṣe jẹ ẹṣẹ ti o ma n gba ọkan ati ara eniyan. Nitori naa, o ko le sọ akoko ti o o dẹ ara rẹ silẹ fun un, ti o ba n fi gbogbo igba wa pẹlu ẹnikẹni ti o n fi gbogbo igba dan ọ wo pẹlu rẹ. Idi ni yi ti a fi pa a laṣẹ fun wa lati sa fun un. Aijẹbẹ, a o ti ṣubu sinu rẹ tan ki a to mọ nkan ti o n ṣẹlẹ.

Ṣugbọn ki wa ni idi ti a fi pa a laṣẹ fun wa lati sa fun oniruuru iṣekuṣe? Kini idi ti a fi paṣẹ fun wa lati jinna rere si nkan ti o da bi ẹni pe o dun un gbadun? Idi ni pe o n ba agọ ara wa, ti o jẹ ti Ọlọrun, jẹ, o si tun n sọ di eleeri. Gẹgẹ bi Pọọlu ṣe fi ye wa ninu awọn ẹṣẹ bibeli yẹn, agọ ara wa ko ki i ṣe tiwa bikoṣe ti Ọlọrun ti o san gbese fun irapada wa. Niwọn igba ti o si ti jẹ pe tirẹ ni wọn n ṣe, Oun naa ti wa bẹrẹ sini gbe inu wọn nipasẹ Ẹmi Mimọ rẹ. Nitori naa, awa nikan kọ ni a n gbe inu agọ ara yi; Ẹmi Ọlọrun naa n gbe inu rẹ pẹlu wa. Idi si niyi ti a ko fi gbọdọ sọ di idibajẹ tabi ki a tabuku rẹ ni ọnakọna. Aijẹbẹ, a le tipasẹ eyi di ẹni iparun, nitoripe Pọọlu sọ fun wa siwaju si pe ti ẹnikẹni ba ba tẹmpili Ọlọrun jẹ, Ọlọrun naa yoo pa ẹni naa run (1Korinnti 3:16-17).

Wayi o, o wa yẹ ki o ye wa pe ibalopo takọtabo gan kọ ni a ni ki a sare jinna si bikoṣe agbere. Nitori naa, ibalopọ takọtabo kọ ni iyọnu; aṣilo rẹ gan an ni wahala. Ipongbẹ fun ibalopo, bi ebi ati ongbẹ, jẹ ẹbun ti Ọlọrun tikararẹ fun wa lati ma fi ifẹ wa han. Ṣugbọn ninu igbeyawo nikan ni a ti fun wa ni aye lati fi ifẹ han nipa pipongbẹ fun ibalopọ. Nitori naa, ti o ko ba i ti lọkọ tabi laya, aṣiṣe gba a ni yoo jẹ fun ọ lati fi ara rẹ jin fun irufẹ ibalopọ yowu ti o ba fi ara rẹ jin fun, yala ibalọpọ laarin ọkunrin si obinrin, ibalopọ laarin ọkunrin si ọkunrin, ibalopọ laarin obinrin si obinrin, ibalopọ laarin ọkunrin si ẹranko tabi ibalopọ laarin obinrin si ẹranko. O tilẹ bu ọ ku paapaa lati ma ba ara rẹ ni ibalopọ, eyi ti wọn n pe loni ni masitọbesan.

Wo o, nṣe ni o n ba agọ ara rẹ jẹ, ti o ba n kopa ninu ọkankan ninu awọn nkan wọnyi. Bi mo si ṣe sọ fun ọ siwaju, ara rẹ ko ki i ṣe tirẹ bi ko ṣe ti Ọlọrun. Nitori naa, igbakugba ti o ba fi nkan ibajẹ rẹ, nṣe ni oun ṣilẹkun aye rẹ silẹ fun iparun. Irufẹ iparun ti o wa le jẹ tabi akoko ti yio wa sori rẹ ni n ko le sọ. O le jẹ iparun idile rẹ lọjọ iwaju tabi iparun ete Ọlọrun lati gbe ọ ga tabi iparun agọ ara rẹ nipaṣẹ awọn aisan buburu kan tabi omiran. Ṣugbọn o di dandan ki iparun naa wa, ti o ba kọ lati ronupiwada ni igba ti o ni anfaani lati ṣe bẹẹ.

Nitori naa, sa fun ẹnikẹni tabi ohunkohun ti o ba le fa ọ wọnu ẹṣẹ agbere. Ma si ṣe fi aye gba irọ ti awọn alaiwa-bi-Ọlọrun, paapaa julọ awọn oṣere wa, n tan kalẹ nipa ibalopọ lati dari rẹ sinu iparun afọwọfa. Ifẹ Ọlọrun ni ki o ko ara rẹ nijanu, ki o si jina si agbere (1Tẹsalonika 4:3-6). Nitori naa, ko si nkankan ti o ṣe ọ, ti o ba yẹra fun agbere, ti o si wa ni mimọ. Ki Ọlọrun si tẹsiwaju lati ma fi okun kun ọkan rẹ lati ṣe eyi, bi o ti wu ki awọn ti o wa ni ayika rẹ ya ọniṣekuṣe to, ni orukọ Jesu. Amin.

Ki o ni oṣu Ogun 2021 alarinrin.

Sa fun iṣekuṣe | Paito J.O. Lawal Read More »

Idi ti o ṣe le padanu agbara iyanu | PaitoJ.O. Lawal

Leave a Comment

Ọjọ: Agẹmọ 25, 2021
Atẹlera: Latori tabili Paitọ
Nọmba: Vol. 10, No. 12

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Olugbala wa. Pẹlu idunnu ni mo ki ọ kaabọ sinu ọsẹ ti o kẹyin oṣu Agẹmọ 2021. Mo si gbadura pe ki Ọlọrun jẹ ki oju rẹ wa ni ṣiṣi lati le ma fi gbogbo igba ṣe iyatọ laarin nkan ti ẹmi ati nkan ti ara, ki o ma ba fi igba kankan mọ padanu ipese rẹ fun alaafia ati igbega rẹ. Amin.

Ọkan lara idi ti ọpọ lara awọn ọmọ Ọlọrun loni ṣe ma n ṣaba padanu ipese rẹ fun alaafia ati iṣorire wọn ni adamọdi igbagbọ pe nkan ẹmi gbọdọ wa ni ọna ti o jọniloju tabi ti o ga. Ṣugbọn ko ki i ṣe gbogbo igba naa ni nkan ẹmi ma n jọniloju. Nkan ti mo n sọ ni pe ko ki i ṣe gbogbo igba naa ni iwosan, itusilẹ, isọdọtun tabi igbega lati ọwọ Ọlọrun ma n gba ọna ti o yani lẹnu ṣẹlẹ. Ti oye eyi ko ba si ye wa, o ṣeeṣe ki a padanu nkan ti O fi ranṣẹ si wa tabi ki a kọ ọ silẹ nitoripe ko gba ọna babara yọ si wa.

Fun apẹẹrẹ, lẹyin igba ti Jakọbu fi ile baba rẹ silẹ lati lọ si Harani, o duro lati sun ni ibikan ti ko fẹ ba irọrun de fun rara. Nkan kan ṣoṣo ti o ri nibi ti a n wi yi ko ju okuta kan ti o lo dipo irọri. Sibẹsibẹ, ni ibi kannaa yi, o la ala ri Ọlọrun, awọn angẹli rẹ ati ọrun. O tilẹ ti ri ọrọ ibukun gba lati ẹnu Ọlọrun ninu ala naa. Nigba ti o si ji, ẹru ba a, o si sọ wipe, “Oluwa n bẹ nihin-in yii nitootọ; emi ko si mọ…Ihin yii ti ni ẹru to? Eyi ki i ṣe ibomiran bi ko ṣe ile Ọlọrun, eyi si ni ẹnu bode ọrun.” (Jẹnẹsisi 28:16-17)

Nitorina, Ọlọrun le wa digbi nibikan, ki a si ma mọ, niwọn igba ti a ko ba ṣi wa ni oju lati ri i. Mo si mọ pe iwọ naa mọ pe igba gbogbo ni Ọlọrun ma fi n tọkantọkan wa ni gbogbo ipejọpọ awọn eniyan rẹ, nitoripe Jesu ti sọ fun wa pe, “Nibi ti ẹni meji tabi mẹta ba gbe wa ni orukọ mi, nibẹ ni Emi yoo wa ni aarin wọn.” Ṣugbọn melo ninu wa ni o n fi gbogbo igba mu ọrọ yi ni ọkunkundun, ki a ba le ṣe amulo rẹ? Melo ninu wa ni o n fi gbogbo igba rin pẹlu afiyesi pe nigbakugba ti a ba pejọ papọ pẹlu awọn eniyan Ọlọrun, Oluwa wa nibẹ pẹlu wa, ti O n wo ohun gbogbo ti a n ṣe, ti O si ṣetan lati pin wa ni ere fun igbagbọ wa tabi lati ba wa wi fun aiṣedede wa? (Wo: Matiu 18:20; Iṣe Awọn Apositeli 5:1-11)

Ailoye awọn nkan wọnyi ni o fa ti ọpọ fi n wa si ipade ijọ lọsọọsẹ, ti wọn ko si ni iriri iṣẹ iyanu Ọlọrun ni ọna gboogi kan tabi omiran. Eyi naa lo si tun fa ti ọpọ fi n ti ori oke de ori oke ati ọdọ wolii de ọdọ wolii, ti wọn n wa iṣẹ iyanu ti ko sọnu kaakiri. Ka tilẹ sọ otitọ, iṣẹ iyanu ti ọpọ n sare wa kaakiri ni wọn le ri gba wẹrẹ ni aarin ijọ wọn, ti o ba ṣe pe wọn n ṣe amulo to peye wiwa Ọlọrun ninu gbogbo ipejọpọ wọn.

Wo o, o le wa ninu ipejọpọ ti o kun fun itusilẹ agbara Ọlọrun lọpọ yanturu, ki o si ma mọ tabi gbadun rẹ, niwọn igba ti o ba ya akuri ninu ẹmi. Pọọlu so eyi fun wa: “Ni orukọ Jesu Kirisiti Oluwa wa, nigba ti ẹyin ba pe jọ ati ẹmi mi, pẹlu agbara Jesu Kirisiti Oluwa wa.” (1Korinnti 5:4) Njẹ o ri bayi? Igbakigba ti a ba pejọpọ ni orukọ Jesu Oluwa wa, agbara rẹ ma n wa nibẹ pẹlu wa lati gbala, wosan, tu silẹ, gbega ati pẹlupẹlu ṣe idajọ ibi. Nkan ti a si nilo ni ki a fiyesi eyi, bi o tilẹ je pe a ko ri agbara naa soju tabi mọ-ọn lara, ki a si tun ṣe amulo rẹ lati yi ọrọ aye wa pada si rere.

Ṣugbọn ti a ba ya akuri nipa ti ẹmi, awọn nkan ti ko le pe wa ni a o ma foju silẹ fun ninu awọn ipejọpọ wa. A le ma foju silẹ fun orin aladun, lero pe ninu rẹ agbara Ọlọrun wa. Tabi ki a ma foju silẹ fun ẹni kan ti yoo pariwo ọrọ Ọlọrun lewa lori tabi ẹni ti yoo fi ọrọ didun sọ wa ji lati gbadura tabi ẹni ti yoo ṣe nkan kan tabi omiran lati jẹ ki ara wa mi titi tabi ki ori wa dide jan an. Ti a ko ba si ri awọn nkan yi, a le ni lọkan pe Ọlọrun ko fi taratara wa ninu awọn ipade naa, ti O ba tilẹ wa ninu wọn rara.

Wayi o, ọna kan gboogi lati padanu agbara ati ipese Ọlọrun fun wa ni yẹn. Bi o tilẹ jẹ pe ko si nkankan ti o buru pẹlu orin ti o larinrin, iwasu ti o ga tabi adura ti o mu gbigbohun soke lọwọ ninu ipade awọn onigbagbọ, ko ki i ṣe awọn nkan wọnyi ni o ma n tu agbara tabi ibukun Ọlọrun silẹ fun awọn eniyan. Dipo eyi, Ọlọrun funrarẹ ni O ma n tu silẹ. Bẹẹni, wiwa rẹ ninu aye wa tabi ninu ipejọpọ wa ni o ma n tu agbara rẹ silẹ fun igbadun wa. Nitorina, dipo ti a o fi fi igbagbọ wa sinu rẹ lati ni iriri iṣẹlẹ iyanu, ti a ba fi sinu awọn akitiyan babara awọn eniyan kan, a ko ni ni iriri agbara rẹ ti a n fẹ lati ri rara. Ko ju bẹyẹn lọ.

Idi si ni yi ti a fi gbọdọ ma fi gbogbo igba gbadura pe ki Ọlọrun ṣe ọkan wa yẹ, ki a ma ba tipaṣẹ wiwa awọn nkan babara padanu ifihan agbara Ọlọrun. Ki Ọlọrun si dahun ibeere yi lori aye rẹ, ni orukọ Jesu. Amin.

Ki o ni ọsẹ alarinrin.

Idi ti o ṣe le padanu agbara iyanu | PaitoJ.O. Lawal Read More »

IDAJỌ LAARIN AGBO IJỌ | Pst. J.O. Lawal

Leave a Comment

ỌJỌRU 21, AGẸMỌ 2021 | AYỌKA: ISIKIẸLI 34:17-22

AKỌSORI: AKỌSORI: “Njẹ o yẹ ki awa ti jẹ alailagbara ninu igbagbọ lee ma ru ẹru ailera ti awọn alailera, ki a ma si ṣe ohun ti o wu ara wa.” (Roomu 15:1)

ỌRỌ AKỌSỌ

Bi a ti ṣe ri ninu bibeli, loorekoore ni Ọlọrun ma n gbẹsan awọn eniyan rẹ lara awọn ika eniyan ti o n pọn wọn ni oju tabi ṣe wọn ni ibi. Eyi si yatọ si idajọ si ipo egbe ayeraye ti yoo ṣe fun gbogbo awọn ti ko mọ ọ tabi kọbiara si nigba ti wọn wa laye. (Wo: Iṣe Apositeli 12; Filipi 1:28; 2Tẹsalonika 1:6-10) Amọ ṣa o, ko ki i ṣe idajọ laarin awọn ika eniyan ati awọn ọmọ rẹ nikan ti Ọlọrun ma n ṣe. O tun ma n ṣe idajọ laarin awọn ọmọ rẹ ati ara wọn pẹlu. Idi si ni pe olotitọ ati olododo ni, ko si fẹ eke, aiṣododo, iyanjẹ tabi ipọniloju, yala laarin awọn ọmọ rẹ si ara wọn ni tabi laarin awọn ọmọ rẹ ati awọn ti aye yi. Ti a ko ba wa fi eyi sọkan, ki a si kiyesara nipa bi a ṣe n ba awọn ọmọ Ọlọrun miran lo pọ, paapaa julọ ninu ijọ ti a wa, ko si ni ki a ma ba idajọ Ọlọrun pade laye yi ni akoko kan tabi omiran.

IDAJỌ LAARIN AGBO IJỌ

Njẹ a wa ri arigbamu ninu bibeli pe Ọlọrun ma n ṣe idajọ laarin awọn eniyan rẹ bi? Bẹẹni. Fun apẹẹrẹ, ninu iwe Isikiẹli, ori ikẹrin-le-lọgbọn, Oluwa sọ eyi fun awọn eniyan rẹ:

“Bi o ṣe ti yin, ẹyin ọwọ ẹran mi, bayii ni Oluwa Ọlọrun wi; Kiyesi i, emi o ṣe idajọ larin ẹran ati ẹran, laarin agbo ati abukọ. Ohun kekere ni ni oju yin ti ẹ ti jẹ oko daradara, ṣugbọn ẹyin si fi ẹsẹ tẹ oko yooku mọlẹ, ẹ si ti mu ninu omi jinjin, ṣugbọn ẹ si fi ẹsẹ ba eyi ti o ku jẹ? Bi o ṣe ti ọwọ ẹran mi ni, wọn jẹ eyi ti ẹ ti fi ẹsẹ yin tẹ mọlẹ; wọn si mu eyi ti ẹ ti fi ẹsẹ yin bajẹ. Nitori naa, bayii ni Oluwa Ọlọrun wi fun wọn, Kiyesi i, emi ani emi o ṣe idajọ laarin ọwọ ẹran ti o sanra, ati eyi ti o ru. Nitori ti ẹyin ti fi ẹgbẹ ati ejika gbun, gbogbo awọn ti o ṣe ailera ti ẹ si ti fi iwo yin kan wọn titi ẹ fi tu wọn kaakiri. Nitori naa ni emi o se gba ọwọ ẹran mi la, wọn ki yoo si jẹ ijẹ mọ, emi o si ṣe idajọ laarin ẹran ati ẹran.” (Isikiẹli 34:17-22)

Ki ni koko nkan ti Ọlọrun n ba awọn eniyan rẹ sọ ninu awọn ẹsẹ bibeli yi? Oun na ni pe O ṣetan lati ṣe idajọ wọn. Irufẹ idajọ wo ni O si fẹ ṣe laarin wọn? Idajọ iṣesi ati ibalopọ wọn si ara wọn! Eyi n fi ye wa wipe Ọlọrun ti o jẹ Baba gbogbo wa n wo iṣesi wa si ara wa ninu gbogbo awọn ijọ wa. O n wo bi a ṣe n ba ara wa lo pọ lati ri boya a n ṣe ni ọna ti o tọ ati ti o yẹ tabi bẹẹkọ. Ki wa ni awọn ẹsun ti Ọlọrun fi kan awọn eniyan rẹ ninu awọn ẹsẹ bibeli yi, ti O fi fẹ ṣe idajọ wọn ni dandan? Awọn naa niwọn yi:

– Anikanjọpọn: gẹgẹ bi Ọlọrun ti fi idi rẹ mulẹ, awọn kan wa laarin awọn eniyan rẹ ti o jẹ pe ti ara wọn nikan ni wọn mọ. Idagbasoke, iserere ati ilọsiwaju ti ara wọn nipa ti ẹmi ati nipa ti ara nikan ni wọn mọ. Nitorina, igbesẹ bi yoo ṣe dara ati rọgbọ fun wọn nikan ni wọn n gbe. Ko si nkan ti o kan wọn pẹlu ti awọn ara wọn yoku. Eyi tunmọ si pe awọn wọnyi ko ki i fi igba kankan lepa lati ran awọn eniyan Ọlọrun yoku lọwọ pẹlu oye, imọ, nkan ini, adura ati gbajumọ wọn, ki awọn naa ba a le dagba soke nipa ti ẹmi ati nipa ti ara. Wọn ko ni ṣe afẹri tabi awari tabi amojuto awọn ara wọn lati ri pe wọn n gbe awọn igbesẹ ti o yẹ ki wọn gbe, ki aye wọn ba le ni itunmọ, ki igbagbọ wọn si fi ẹṣẹ mulẹ. Dipo eyi, nkan ti o wu wọn ni wọn a ma a ṣe. Awọn kanna yi si tun ni ẹnu ma n saba ya lati bu ẹnu atẹ lu awọn ti igbagbọ wọn ko fi ẹṣẹ mulẹ, ti irin wọn ko ṣe deede pẹlu Ọlọrun tabi ti aye wọn ko ni ilọsiwaju bi o ṣe yẹ ki o ni. Alanikanjọpọn ni wọn. O si di dan ki Ọlọrun ṣe idajọ wọn nigba ti osuwọn anikanjọpọn wọn ba kun, ti wọn si kọ lati ronupiwada. (Wo: Roomu 15:1; Filipi 2:3-4 &19-24; Kolose 4:12-13)

– Aikanisi: ki ni o ma n fa anikanjọpọn? Ọkan lara rẹ ni aikanisi. Niwọn igba ti a ko ba ka awọn miran ti o wa ni ayika wa, adugbo wa, ile-iṣẹ wa, ile-iwe wa, orilẹ-ede wa tabi ijọ wa si, ko si ni ki anikanjọpọn ma jọba ninu aye wa. Gẹgẹ bi Ọlọrun ti ṣe fi ẹsun kan awọn eniyan rẹ, a ri lara wọn awọn ti ko ni akasi ọmonikeji wọn. Wọn ko bikita boya aye wọn dara tabi ko dara. Wo ko bikita boya igbagbọ wọn duro deede tabi ko duro deede. Wọn ko si bikita boya wọn ko sinu panpẹ Esu, ki wọn si farapa, ṣubu, sọnu tabi padanu ẹmi wọn tabi ko ri i bẹẹ. Eyi si tunmọ si pe ọkan awọn ara wọn ko ṣe iyebiye si wọn bi ọkan ti wọn ṣe ṣe iyebiye si Ọlọrun to bẹẹ gẹẹ ti O fi fi ọmọ bibi rẹ Jesu Kirisiti Oluwa wa silẹ fun igbala ati irapada wọn (Johanu 3:16). O si ṣe ni laanu pe bi o ṣe ri gẹlẹ ni yi ni ọpọ ijọ wa loni. Ọkan awọn ara wa ninu Oluwa ko ṣe iyebiye si wa bi o ṣe ṣe iyebiye si Jesu Olugbala gbogbo wa. Nitorina a a ki i naani wọn ni ọpọlọpọ ọna, ayafi ti a ba n ri nkan gba lọwọ wọn. Ti a ba si n ri nkan gba lọwọ wọn naa, igbala ọkan wọn kọ ni o ṣe pataki si wa, bi ko ṣe nkan ti a n ri gba lọwọ wọn. Idi si ni yi ti a fi ri ọpọ ti aye wọn ko nitunmọ, ti ile wọn ko ṣe e ri tabi ti iṣẹ ọwọ wọn lodi si ifẹ Ọlọrun ninu ijọ loni, ti ko si si ẹni ti o n ba wọn ọn wi tabi yẹ wọn lọwọ wo. Irufẹ iṣesi yi, gẹgẹ bi Ọlọrun ti wi, di dandan ki o fa idajọ rẹ wa sori wa, ti a ba kọ lati ṣe atunṣe ni akoko.

– Irẹnijẹ: Yatọ si awọn ẹṣun meji akọkọ ti a ti gbe yẹwo, Ẹṣun miran ti Ọlọrun tun fi kan awọn eniyan rẹ ni irẹnijẹ. Eyi jasi pe wọn n fi ọwọ ọla gba ara wọn loju, wọn n ṣe ara wọn leṣe, wọn n wuwa ibajẹ si ara wọn ati bẹẹ bẹẹ lọ. Ko si yẹ ki o ya wa lẹnu pe iru nkan bayi ma n ṣẹlẹ laarin awọn eniyan Ọlọrun. Idi ni pe niwọn igba ti a ko ba ti naani ara wa tabi ka ara wa si ni ibamu pẹlu ifẹ Ọlọrun, ko si ni ki a ma rẹ ara wa jẹ. A le ja ara wa lole, pọn ara wa loju, ba ara jẹ ninu iṣekuṣe, sọ ọrọ alufanṣa si ara wa, parọ tan ara wa jẹ tabi ṣeku pa ara wa (1Korinnti 5-6; Jemisi 4:1&5:1-6). Igba miran ẹwẹ, nipa aibikita fun ọkan, igbagbọ ati iduroṣinṣin awọn ara wa ninu Kirisiti, a le fi imọ ominira wa tabi ailoye wa ṣe ara wa ni ijamba (Roomu 14; 1Korinnti 8). Irufẹ awọn iṣeṣi yi ni o n le ọpọ ọmọ Ọlọrun kuro ninu ijọ loni, ti ko si tun jẹ ki ọpọ ti ko i ti kuro ninu ijọ duro deede lati sin Ọlọrun tọkantọkan. Yatọ si eyi, irufẹ awọn iwuwasi yi ni ko jẹ ki ọpọ ti ko gba Jesu gbọ fẹ ni nkankan ṣe pẹlu ijọ Ọlọrun.

Ṣe awọn nkan wọnyi le wa ma lọ ni aarin wa, ki Ọlọrun si fi ọwọ lẹran bi? Ko ṣeeṣe. Nitori pe Ọlọrun ni ifẹ gbogbo wa gẹgẹ bi ọmọ rẹ, o didan ti O ba ri wipe a ko tọju ara wa bi o ṣe yẹ tabi mojuto ara bi o ṣe tọ, ki O gbe igbesẹ idajọ lori wa ati laarin wa. Eyi ko tunmọ si pe ko fẹran wa. Dipo bẹ, o tunmọ si pe Oun, gẹgẹ bi Onidajọ ododo, ni lati ṣe ohun ti o tọ ati ti o yẹ lati ri pe ilera wa ninu ijọ awọn ọmọ rẹ ati wipe a ko fi aye silẹ fun awọn ti aye yi lati gan orukọ rẹ nipasẹ wa. Nigba ti O ba si wa n ṣe eyi, o ṣeeṣe ki idajọ rẹ mu ipalara wa fun wa ni oriṣiriṣi ọna.

Ti a ko ba gbagbe, nigba ti Kaini pa aburo rẹ Abẹẹli, Ọlọrun ko fi akoko ṣofo rara lati ṣe idajọ laarin awọn mejeeji. Ọlọrun tilẹ sọ fun pe nṣe ni ẹjẹ arakunrin rẹ n kigbe tantan fun idajọ ati igbẹsan ododo. Nitorina, Ọlọrun fi si abẹ eegun aṣedanu nidi iṣẹ ọgbin. O si tun sọ di alarinkirin, ẹni ti ọkan rẹ ko ni fi igba kankan balẹ. Bẹẹ gẹgẹ ni a si ri awọn ọmọ Ọlọrun ti igbe oro awọn ara wọn ti wọn ti han lemọ, yanjẹ, pọn loju tabi ba aye wọn jẹ n fi gbogbo igba wa si eti Ọlọrun. Bawo wa ni Ọlọrun ko ṣe ni ṣe idajọ awọn naa, bi O ṣe ṣe ti Kaini? Ko si ni, ayafi ti wọn ba tete ronupiwada. (Wo: Jẹnẹsis 4:1-16; Jemisi 5:1-6; 1Peteru 3:7).

Siwaju si, ninu ọkan lara lẹta rẹ si awọn ijọ Kọrinnti, Pọọlu jẹ ki o ye wọn pe ọkan gboogi lara idi ti ọpọ laarin wọn ṣe n ṣaisan tabi wa ni ailera, ti ọpọ miran ẹwẹ si ti ṣe jade laye laitọjọ ni pe Ọlọrun n ṣe idajọ laarin wọn. Ki lo si fa ti Ọlọrun fi n ṣe eyi? Idi ni pe wọn ko fi imọ ati oye ba ara wọn lo gẹgẹ bi ẹya ara Kirisiti. Bi a ṣe ri ninu bibeli, gbogbo awa ti a gbagbọ ninu Jesu Kirisiti ni Ẹmi mimọ ti tẹwa bọ inu ara rẹ gẹgẹ bi ọkan. Nitorina, bi o ti wu ki a pọ to tabi ki ẹya wa yatọ to, ara kan naa ni gbogbo wa jẹ ninu Kirisiti Oluwa wa. A wa gbọdọ mọ eyi daju, ki a si ma ba ara wa lo pẹlu oye rẹ. Aijẹbẹ, ni awọn akoko kan, Ọlọrun ko ni ṣe meni tabi ṣe meji ju ki O bẹ wa wo pẹlu idajọ lọ. Irufẹ idajọ bẹ si le yọri si aisan, ailera, adanu, aṣedanu, iku ati bẹẹbẹẹ lọ, gẹgẹ bi o ti ri fun awọn ara Kọrinnti igbanni. (Iṣe Apositeli 5:1-11; Roomu 12:4-5; 1Korinnti 11:17-34 & 12:12-27)

A tilẹ tun ri ninu iwe Ifihan ti a fun Johanu pe Jesu Oluwa kọ lẹta si ijọ Tiatira wipe Oun yoo ṣe idajọ laarin wọn nitoripe wọn fi aye gba awọn kan lara wọn lati ma ṣi awọn ọmọ rẹ lọna lati ṣe agbere ati lati bọriṣa. Irufẹ idajọ wo si ni Oluwa fẹ mu wa si ori wọn nitori aironupiwada wọn? Idajọ aisan! Idajọ ipọnju nla! Idajọ iku. Nitorina, ti a ba dede ri pe ikoro bẹrẹ si ni farahan ninu ijọ kan, a nilo lati fura ni kiakia, ki a si bẹrẹ si ni wadi lati ṣe idajọ ara wa pẹlu ọrọ Ọlọrun. Nitori pe o le jẹ wipe ẹṣẹ si ara wa ati si ara Kirisiti ni o fa. (Wo: Ifihan 2:20-23)

ỌRỌ IPARI

Iha ti a kọ si ibaṣepọ pẹlu awọn ara wa ninu Oluwa, paapaa julọ awọn ọmọ ijọ wa, ṣe pataki pupọ. Idi si ni pe Ọlọrun Baba wa n wo gbogbo wa lati san wa ni ẹṣan gẹgẹ bi iṣesi wa si ara wa ba ṣe ri. Ti a ko ba wa fẹ ki O jẹ wa niya nitori aiṣedede wa si ara wa, a gbọdọ kiyesi lati ma ka ara wa si, ki a ma ba ara wa lo pẹlu ifẹ ti o peye, ki a si tun ma ṣe idajọ awọn iwa ti ko ba tọ ni aarin wa pẹlu ọrọ Ọlọrun ati ninu ododo.

IBEERE

– Ṣe ẹkọ yi ṣe pataki fun awọn ọmọ Ọlọrun tabi ko ṣe pataki?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

IDAJỌ LAARIN AGBO IJỌ | Pst. J.O. Lawal Read More »

Da wọn mọ; tẹwọ gba wọn; bukun fun wọn | Paito J.O. Lawal

Leave a Comment

Ọjọ: Agẹmọ 18, 2021 | Atẹlera: Latori tabili Paitọ | Nọmba: Vol. 10, No. 11

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Agẹmọ 2021. Mo gbadura pe ki Ẹmi Ọlọrun ṣe ọkan rẹ yẹ, ki o ma ba fi igba kankan padanu ibẹwo rẹ sinu aye rẹ nipasẹ kikọ silẹ tabi ainani awọn eniyan ti O ti yan fun igbega, isorire ati ibalẹ-ọkan rẹ. Amin.

Bi a ṣe ri ninu bibeli, Ọlọrun ni eto daradara fun gbogbo awọn ọmọ rẹ. Bi Pọọlu tilẹ ṣe sọ fun wa, awọn eto Ọlọrun fun wa tobi, wọn si tun dara tobẹẹ gẹẹ ti ọkan wa ko fi le mọ bi wọn ṣe tobi tabi dara to. Nitorina, Ẹmi rẹ nikan naa ni o wa ni ipo lati fi wọn han wa ati lati tọka wọn si wa, ki a ba le gbadun wọn daradara. (Wo: 1Korinnti 2:9-12) Amọ ṣa o, Ẹmi Ọlọrun ko ki i fi gbogbo igba da a ṣiṣẹ lati mu ete Ọlọrun wa si imuṣẹ ninu aye awọn eniyan. Ọpọ igba, nṣe ni O ma n lo awọn miran ti O ti tọ, fun ni ẹbun ati ṣe ye ni awọn ọna kan lati mu ifẹ rẹ wa si imuṣẹ ninu aye awọn eniyan. Ti wọn ko ba si wa mọ wọn, tẹwọgba wọn, ki wọn si ba wọn lo pọ ni ọna ti o tọ, awọn ti O ti gbe dide lọna yi fun imuṣẹ eto rẹ daradara fun aye wọn, wọn le kuna lati ri imuṣẹ awọn eto yi.

Fun apẹẹrẹ, Ọlọrun ran Jesu Oluwa wa lati kọkọ ṣe awari awọn aguntan Israẹli ti O ṣọnu, ki O to tọ awọn araye yoku lọ pẹlu ẹbun ọfẹ igbala rẹ (Matiu 10:5-6 & 15:24). Idi niyi ti o fi jẹ wipe awọn ni wọn kọkọ gbọ awọn iwaasu oore-ọfẹ rẹ, ti wọn si tun kọkọ jẹ igbadun ifamin-ororo yan rẹ lati wosan, tu silẹ ati mu padabọ sipo. Ṣugbọn ṣe wọn tẹwọgba a, ki wọn si tun ba a lopọ ni ọna ti o peye bi? Rara o! Dipo eyi, gẹgẹ bi orilẹ-ede, nṣe ni wọn kọ ọ silẹ, tabuku rẹ, ṣe inunibini si, ti wọn si tun pa a nigbẹyingbẹyin. (Wo: Johanu 1:10-13)

Bawo wa ni ti awọn eniyan rẹ, awọn ti ilu abinibi rẹ, nibi ti a ti wo o dagba? Njẹ awọn naa tẹwọ gba bi, bi o tilẹ jẹ ẹya wọn ọn ni? Rara o! Dipo eyi, iriri rẹ laarin wọn gan tilẹ tun buru ju ti eyi ti O ri ni awọn ibomiran. Iwọ naa wo nkan ti Maaku sọ lori eyi: “Oun ko si le ṣe iṣẹ agbara kan nibẹ ju pe o gbe ọwọ rẹ le awọn alaisan diẹ, o si mu wọn larada. Ẹnu si ya a nitori aigbagbọ wọn…” (Maaku 6:5-6)

Ni aifọrọgun, nigba ti o ku diẹ ki iṣẹ iranṣẹ rẹ laarin awọn eniyan orilẹ-ede rẹ wa si opin, O sukun fun olu-ilu wọn, Jerusalẹmu, O si tun sọ awọn ọrọ sunukun yi: “I ba ṣe pe iwọ mọ lonii yii, ani iwọ, ohun tii ṣe ti alaafia rẹ! ṣugbọn nisinsinyi wọn pamọ kuro ni oju rẹ. Nitori ọjọ n bọ fun ọ, ti awọn ọta rẹ yoo wa yara ka ọ, wọn o si yi ọ ka, wọn o si ka ọ mọ niha gbogbo. Wọn o si wo ọ palẹ ati awọn ọmọ rẹ ninu rẹ; wọn ki yoo si fi okuta kan silẹ lori ara wọn; nitori ti iwọ ko mọ ọjọ ibẹwọ rẹ.” (Luuku 19:42-44) Lafikun, O tun sọ wipe, “Jerusalẹmu, Jerusalẹmu, iwọ ti o pa awọn wolii, ti o si sọ okuta lu awọn ti a aran si ọ; igba meloo ni emi n fẹ radọ bo awọn ọmọ rẹ, gẹgẹ bi agbebọ ti i radọ bo awọn ọmọ rẹ labẹ apa rẹ, ṣugbọn ẹyin ko fẹ! Ṣa wo o, a fi ile yin silẹ fun yin ni ahoro. Mo wi fun yin, ẹyin ki yoo ri mi mọ lati isinsinyi lọ, titi ẹyin o fii wi pe, Olubukun ni ẹni ti n bọ wa ni orukọ Oluwa.” (Matiu 23:37-39)

Iwọ naa wo ọrọ yi. Tipẹtipẹ ni awọn eniyan wọnyi ti n gbadura, ti wọn si tun duro de Ọlọrun lati wa gba wọn la. Ṣugbọn nigba ti O ran Olugbala ti wọn nilo si wọn, wọn ko tẹwọ gba a. Ki si ni idi? Idi ni pe wọn ko da a mọ gẹgẹ bi Olugbala wọn. Nitorina, O sọ fun wọn pe ile wọn ni a o fi silẹ ni ahoro titi wọn o fi da mọ, tẹwọgba, ki wọn si tun bukunfun.

Ni bakan naa, niwọn igba ti awa naa ko ba da wọn mọ, tẹwọgba wọn, ki a si tun bukun fun wọn, awọn ti Ọlọrun tipasẹ Ẹmi rẹ ran lati tọ wa, gbe wa ro, wo wa san ati gbe wa ga, nṣe ni aye wa yoo wa ni ojukan, ti yoo si tun jẹ ahoro ni ọna pupọ. Idi si ni yi ti o fi jẹ pe olori adura kan ti o yẹ ki a ma fi gbogbo igba gba fun ara wa ni pe ki awọn eniyan ati nkan ti Ọlọrun ti pese tabi ran fun aye wa lati jẹ nkan ti o yẹ ki wọn jẹ ma ṣe farasin fun wa. Nitori naa, lẹkan si, adura mi fun ọ, bi o ṣe n tẹsiwaju ninu irinajo aye rẹ, ni pe ki a ṣe ọkan rẹ yẹ lati da wọn mọ, ki o si tun tẹwọgba wọn ni ọna ti o yẹ, awọn eniyan ati nkan ti Ọlọrun ti pese fun aye rẹ lati jẹ nkan ti o yẹ ki o jẹ, ni orukọ Jesu. Amin.

Ki o ni ọsẹ ti o ga.

Da wọn mọ; tẹwọ gba wọn; bukun fun wọn | Paito J.O. Lawal Read More »

AKỌRI: WOLII (2) AYỌKA: MATIU 16:1-4

Leave a Comment

ỌJỌRU 14, AGẸMỌ 2021

AKỌSORI: AKỌSORI: “Awọn eniyan pupọ si wa sọdọ rẹ, wọn si wi pe, Johanu ko ṣe iṣẹ, ami kan: ṣugbọn otitọ ni ohun gbogbo ti Johanu sọ nipa ti ọkunrin yii.” (Johanu 10:41)

ỌRỌ AKỌSỌ

Ninu ẹkọ ti a n kọ lori wolii ati iṣẹ iranṣẹ rẹ, a ri daju lati inu bibeli pe wolii jẹ ẹnikan ti Ọlọrun n fi ara rẹ ati ifẹ rẹ han ki O ba a le lo o lati fi ifẹ rẹ tabi ara rẹ han awọn eniyan. Eyi si kọja ki a sọ asọtẹlẹ; dipo bẹẹ, o ni i ṣe pẹlu fifi ifẹ, ete, ero tabi eto Ọlọrun han si awọn eniyan. A si tun ri pe Ọlọrun le fi ara rẹ ati ifẹ rẹ han wolii nipasẹ ala tabi iran tabi nipasẹ biba sọrọ ni ẹnukoẹnu. Amọ ṣa o, ẹnikẹni ti o ba pe ara rẹ ni wolii, ti ko wa fi ara rẹ jin fun ọrọ Ọlọrun ko ni le ṣe iyatọ ti o peye laarin ala, iran tabi ohun ti o wa lati ọdọ Ọlọrun ati eyi ti o wa lati ọdọ Eṣu. Yatọ si eyi, ko tun ni mọ igba ti o yẹ ki o gbe ẹnu dakẹ ati igba ti o yẹ ki o sọrọ. Eyi ni o si fa a ti a fi ni ọpọlọpọ wolii eke kaakiri agbaye loni.

WOLII ATI IṢẸ IYANU

Wayi o, ara nkan ti a tun nilo mọ nipa wolii ni pe iṣẹ iranṣẹ rẹ ko ki i fi gbogbo igba ni i ṣe pẹlu ki a ṣe iṣẹ ami tabi iṣẹ iyanu. Lotitọ, bi a ṣe ri ninu bibeli, awọn wolii kan wa ti o jẹ pe Ọlọrun lo wọn fun oniruuru iṣẹ ami ati iyanu. O ṣi ṣe eyi ni ọpọ igba lati jẹ ki awọn eniyan gba a gbọ. Jesu tilẹ fi igba kan sọ eyi fun awọn ara Juu: “Bi ko ṣe pe ẹyin ba ri ami ati iṣẹ iyanu, ẹyin ki yoo gbagbọ lae.” (Johanu 4:48) Nitorina, awọn kan wa ti o jẹ pe ti ko ba ṣe pe wọn ba ri ami tabi iyanu Ọlọrun, wo ko ni gba a gbọ. O le jẹ nitori ipọnju ti o pọ fun wọn tabi nitori itanjẹ orisirisi awọn eke ojiṣẹ Ọlọrun ti wọn ti ba pade tabi nitori ibaṣepọ wọn pẹlu agbara okunkun ni wọn ko ṣe fẹ ni nkankan ṣe pẹlu Jesu tabi Ọlọrun. Ṣugbọn ti awọn wọnyi ba ri iṣẹ ami ati iyanu otitọ, wọn le tipasẹ rẹ gbagbọ, ki wọn si kọ ẹṣẹ, ibọriṣa ati awọn iwa eeri wọn silẹ.

Fun apẹẹrẹ, a ri wipe nigba ti Ọlọrun ran Mose pada lọ si Ijibiti lati mu awọn eniyan rẹ jade, O fun ni aṣẹ lati ṣe oniruuru iṣẹ ami ati iṣẹ iyanu. Ki si ni idi? Ni akọkọ, O ṣe eyi ki awọn ọmọ Isiraẹli, ti iya ti jẹ fun ọpọlọpọ ọdun, ti wọn si ti bẹrẹ si ni ro wipe Ọlọrun awọn baba wọn ti kọ wọn silẹ tabi pe ko ni agbara lati gba wọn, ba le gbagbọ ninu rẹ ati ninu ẹni ti o ran an niṣẹ. Nitorina, bibeli sọ eyi fun wa: “Mose ati Aarọni lọ, wọn ko gbogbo agba awọn ọmọ Isiraẹli jọ: Aaroni sọ gbogbo ọrọ ti Oluwa ti sọ fun Mose, o si ṣe iṣẹ ami naa ni oju awọn eniyan naa. Awọn eniyan naa si gbagbọ: nigba ti wọn gbọ pe, Oluwa ti bẹ awọn ọmọ Isiraẹli wo, ati pe o ti ri ipọnju wọn, nigba naa ni wọn tẹ ori wọn ba, wọn si sin in.” (Ẹkisodu 4:29-31)

Idi keji ti Ọlọrun fi fun Mose ni aṣẹ ati agbara lati ṣe iṣẹ ami ati iyanu ni lati le fi dandan mu Farao lati tu awọn eniyan rẹ silẹ. Iwọ na wo nkan ti Ọlọrun sọ fun Mose lori eyi: “Emi si mọ pe ọba Ijibiti ki yoo jẹ ki ẹyin ki o lọ, bi ko ṣe nipa ọwọ agbara. Emi o si na ọwọ mi, emi o si fi iṣẹ-iyanu mi gbogbo kọlu Ijibiti ti emi o ṣe laarin rẹ: lẹyin eyi ni oun o too jẹ ki ẹ lọ.” (Ẹkisodu 3:19-20) A si ri pe bẹẹ gẹgẹ ni Ọlọrun ṣe si ọba Ijibiti ati awọn eniyan rẹ, ki o to di pe wọn gbagbọ pe Ọlọrun ni agbara lori wọn, ti wọn si tu awọn ọmọ Isiraẹli silẹ.

Siwaju si, ni igba aye ọba Ahabu, a ri wipe ibọriṣa ati iṣẹ oṣo gbilẹ to bẹẹ gẹẹ ti awọn eniyan Isiraẹli fi gbagbe Ọlọrun patapata, ti wọn ko si mọ bi o ṣe yẹ ki wọn sin in mọ. Nitorina, nigba ti Ọlọrun ṣetan lati mu wọn padabọsipo, O kọkọ fi iyan ọdun mẹta ati abọ bẹ wọn wo nipasẹ ọrọ ẹnu wolii rẹ, Elija. Lẹyin eyi, O tun wa lo wolii yi lati mu ki ina sọkalẹ lati ọrun sori ẹbọ sisun rẹ, ki o ba le fi awọn oriṣa ti wọn n bọ ati awọn wolii awọn oriṣa yi han gẹgẹ bi eke. (Wo: 1Awọn Ọba 17&18)

Nitorina, ọkan pataki lara idi ti Ọlọrun fi ma n tipasẹ awọn wolii rẹ ṣe iṣẹ ara ati iṣẹ iyanu ni lati jẹ ki awọn eniyan le gba a gbọ ki wọn si ronupiwada, kọ ibọriṣa silẹ tabi ri gẹgẹ bi alagbara lori ohun gbogbo. A si tun fi idi eyi mulẹ nipasẹ iṣẹ iranṣẹ awọn apositeli, ẹfanjẹlisiti ati wolii Jesu ti wọn lọ kaakiri agbaye lati polongo ọrọ rẹ fun araye. A ri wipe pupọ ninu ibi ti wọn lọ ni wọn ti ṣe ọpọlọpọ isẹ ara ati iṣẹ iyanu ti o pe akiyesi awọn eniyan si ihinrere Jesu, ti o si tun jẹ ki wọn gbagbọ. (Wo: Iṣe Awọn Apositeli 5:12, 8:4-8 & 14:3)

Amọ ṣa o, ko ki i ṣe gbogbo igba naa ni Ọlọrun ma n lo awọn wolii tabi awọn iranṣẹ rẹ miran fun iṣẹ ami tabi iṣẹ iyanu. Ailoye eyi si n jẹ ki ọpọ padanu awọn ibukun tabi aabo ti wọn ko ba ma ri gba lati ara awọn wolii Ọlọrun ti O n ran si wọn. Nkan ti mo n sọ ni wipe ọpọ ni o ro pe ẹni ti ko ba ti ma ṣe iṣẹ ara tabi iṣẹ iyanu ko ki i ṣe wolii otitọ. Ṣugbọn pataki julọ ninu iṣẹ iranṣẹ wolii ni lati fi ifẹ, ete ati ero Ọlọrun han awọn eniyan, ki i ṣe lati ṣe iṣẹ iyanu. Iṣẹ iyanu melo ni awọn wolii bi Aisaya, Jeremaya, Emọọsi, Miika, Daniẹli ati bẹẹbẹẹ lọ ṣe? A ko ni akọsilẹ wọn. Ṣugbọn wọn fi tọkantọkan fi ifẹ ati eto Ọlọrun han gbogbo awọn ti O ran wọn si.

Bi a tilẹ tun ṣe ri ninu akọsori wa, Johanu onitẹbọmi ti o fi Jesu han fun awọn Juu gẹgẹ bi ọmọ Ọlọrun gan ko ṣe iṣẹ iyanu kankan (Johanu 10:41). Sibẹsibẹ, Jesu sọ wipe ko si wolii naa tabi eniyan naa ti a bi ninu obinrin ti o ga ju Johanu yi lọ niwaju Ọlọrun, ayafi awọn ọmọ ijọba ọrun (Matiu 11:11). Eyi si n jẹ ki o ye wa wipe Ọlọrun ko ki i gbe odiwọn pataki iṣẹ wolii kan tabi omiran le ori iye iṣẹ iyanu ti wọn ṣe ṣugbọn lori bi wọn ṣe fi tọkantọkan jẹ iṣẹ yowu ti o ba gbe le wọn lọwọ si.

Ti a o ba i ti gbagbe, a ti ri idi ti Ọlọrun fi ma n lo awọn wolii rẹ lati ṣe iṣẹ iyanu. Amọ ko ki i ṣe gbogbo igba ni O ma n ṣe eyi tabi ni o nilo lati ṣe eyi. Ibikibi ti Ọlọrun ba ti mọ pe awọn eniyan ri iṣẹ iyanu rẹ to lati gbagbọ, O le ma ṣe iṣẹ iyanu miran fun wọn nibẹ mọ. Fun apẹẹrẹ, ninu iwe Matiu ti a n gbe yẹwo fun ẹkọ yi, a ri eyi ka:

“Awọn Farisi pẹlu awọn Sadusi si wa, wọn n dan an wo, wọ si n fẹ ki o fi ami han fun wọn lati ọrun wa. Ṣugbọn o dahun o si wi fun wọn pe, Nigba ti o ba di aṣalẹ, ẹyin a wi pe, ọjọ yoo dara: nitori ti oju ọrun pọn. Ati ni owurọ ẹyin a wi pe, ọjọ ki yoo dara lonii, nitori ti oju ọrun pọn, o si ṣu dẹdẹ. A! Ẹyin agabagebe, ẹyin lee mọ ami oju ọrun; ṣugbọn ẹyin ko le mọ ami akoko wọnyi? Iran buburu ati pansaga n fẹ ami: a ki yoo si fi ami fun un, bi ko ṣe ami ti Jona wolii. O si fi wọn silẹ, oo kuro nibẹ.” (Matiu 16:1-4)

Njẹ o ri bayi? Jesu kọ jalẹ lati ṣe iṣẹ ami kan tabi omiran fun awọn Farisi ati Sadusi ti o tọ ọ wa. Ki si ni idi? Idi ni wipe wọn ti ni aafani lati ri ọpọlọpọ iṣẹ iyanu ati iṣẹ ami ti Ọlọrun jẹ ki O ṣe. Sibẹsibẹ, wọn ko gbagbọ. Akoko kan wa ti O tilẹ sọ wipe egbe ni fun awọn ilu bi Korasini, Kapanaumu ati Bẹtisaida nitoripe bi o tilẹ jẹ pe O ṣe ọpọlọpọ iṣẹ iyanu ninu wọn, wọn ko ronupiwada kuro ninu ẹṣẹ wọn (Matiu 11:20-24). Nitorina, fun ẹni ti ko ba ni i gbagbọ rara, bi o tilẹ ri ẹgbẹgbẹrun iṣẹ ara ati iṣẹ iyanu wolii, bi Farao na ni ọkan rẹ yoo ṣe yigbe, ti ko si ni ronupiwada. Ti Ọlọrun ba wa kọ lati fi iṣẹ ami han iru ẹni bẹ, njẹ o buru bi? Ko buru rara.

Yatọ si eyi, ara awọn idanwo ti Eṣu fun Jesu, gẹgẹ bi akọsilẹ bibeli, ni pe ki o sọ okuta di akara (Matiu 4:1-4; Luuku 4:1-4). O si fẹ ki o ṣe eyi ki o ba le fi ara rẹ han gẹgẹ bi ọmọ Ọlọrun. Njẹ Jesu wa ṣe gẹgẹ bi o ti wi bi? Rara o! Ki si ni idi ti ko fi ṣe bẹ? Idi ni wipe Jesu ko kan le dede ṣe iṣẹ iyanu ti ko ba ṣe wipe Ọlọrun lo ni ko ṣe e (Johanu 5:19 & 14:10). Eyi tunmọ si pe ifẹ Ọlọrun ni O n fi gbogbo igba tẹle; ko ki i ṣe ifẹ ti ara rẹ (John 8:29). Nitorina, niwọn igba ti o jẹ pe ifẹ Eṣu ni pe ki O sọ okuta di akara, ko le da lohun rara. A si gbọdọ jẹ ki eyi yewa yekeyeke, ki a ma ba titori pe a fẹ jẹ ki o ye awọn eniyan pe ti Ọlọrun ni a nṣe nitootọ jẹ iṣẹ ti ko ran wa.

Ni afikun, ko ki i ṣe gbogbo iṣẹ iyanu naa ni o ma n ti ọwọ Ọlọrun wa. Adamọdi iṣẹ iyanu wa. Awọn wolii eke naa a ma ṣe iyanu nipaṣẹ agbara awọn ẹmi Eṣu. Idi niyi ti Jesu Oluwa wa fi sọ eyi fun wa: “Nitori awọn eke Kirisiti, ati eke wolii yoo dide, wọn o si fi ami ati ohun iyanu nla han: tobẹẹ bi o le ṣe e ṣe, wọn o tan awọn ayanfẹ paapaa. Wo o, mo wi fun yin tẹlẹ.” (Matiu 24:24-25) Njẹ o ri bayi? Ti a ko ba ṣọra, a le tipaṣẹ iṣẹ ara tabi iṣẹ iyanu kọsẹ tabi ṣọnu.

Ni kukuru, a ko le sọ pe eniyan ko ki i ṣe wolii Ọlọrun tabi wolii otitọ nitoripe ko ṣe iṣẹ ara tabi iṣẹ iyanu ni ibamu pẹlu erongba wa. A ko si le gbe odiwọn pataki iṣẹ wolii kankan le bi o ṣe ṣe iṣẹ iyanu to. Ọlọrun ti O n gbe iṣẹ le awọn wolii rẹ lọwọ naa ni o le sọ bi iṣẹ wolii kan ṣe ṣe pataki si ati irufẹ iṣẹ iyanu tabi iṣẹ ara ti yoo ṣe tabi ti ko ni i ṣe.

ỌRỌ IPARI

A gbọdọ yago fun fifi iṣẹ iyanu ṣe ami tabi odiwọn boya enikan jẹ wolii Ọlọrun tootọ tabi wolii eke. Boya wolii kan yoo ṣe iṣẹ iyanu tabi ko ni i ṣe ku si ọwọ Ọlọrun; ko si ni i ṣe pẹlu eniyan rara. Nitorina, pataki iṣẹ wolii ni ki o fi ifẹ Ọlọrun ati ete rẹ han si awọn eniyan bi o ṣe tọ ati bi o ṣe yẹ, ki oun na si gbe igbe aye ti o wa ni ibamu pẹlu otitọ Ọlọrun ti o mọ. Ti o ba ti ṣe eyi, iṣẹ iranṣẹ rẹ yoo jẹ itẹwọgba niwaju Ọlọrun, bi ko tilẹ wa pẹlu iṣẹ ami ati iṣẹ iyanu.

IBEERE

– Ọna wo ni ẹkọ yi gba ran imọ ati oye rẹ lọwọ lori iṣẹ iranṣẹ wolii?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

AKỌRI: WOLII (2) AYỌKA: MATIU 16:1-4 Read More »