Idi ti o ṣe le padanu agbara iyanu | PaitoJ.O. Lawal

Leave a Comment

Ọjọ: Agẹmọ 25, 2021
Atẹlera: Latori tabili Paitọ
Nọmba: Vol. 10, No. 12

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Olugbala wa. Pẹlu idunnu ni mo ki ọ kaabọ sinu ọsẹ ti o kẹyin oṣu Agẹmọ 2021. Mo si gbadura pe ki Ọlọrun jẹ ki oju rẹ wa ni ṣiṣi lati le ma fi gbogbo igba ṣe iyatọ laarin nkan ti ẹmi ati nkan ti ara, ki o ma ba fi igba kankan mọ padanu ipese rẹ fun alaafia ati igbega rẹ. Amin.

Ọkan lara idi ti ọpọ lara awọn ọmọ Ọlọrun loni ṣe ma n ṣaba padanu ipese rẹ fun alaafia ati iṣorire wọn ni adamọdi igbagbọ pe nkan ẹmi gbọdọ wa ni ọna ti o jọniloju tabi ti o ga. Ṣugbọn ko ki i ṣe gbogbo igba naa ni nkan ẹmi ma n jọniloju. Nkan ti mo n sọ ni pe ko ki i ṣe gbogbo igba naa ni iwosan, itusilẹ, isọdọtun tabi igbega lati ọwọ Ọlọrun ma n gba ọna ti o yani lẹnu ṣẹlẹ. Ti oye eyi ko ba si ye wa, o ṣeeṣe ki a padanu nkan ti O fi ranṣẹ si wa tabi ki a kọ ọ silẹ nitoripe ko gba ọna babara yọ si wa.

Fun apẹẹrẹ, lẹyin igba ti Jakọbu fi ile baba rẹ silẹ lati lọ si Harani, o duro lati sun ni ibikan ti ko fẹ ba irọrun de fun rara. Nkan kan ṣoṣo ti o ri nibi ti a n wi yi ko ju okuta kan ti o lo dipo irọri. Sibẹsibẹ, ni ibi kannaa yi, o la ala ri Ọlọrun, awọn angẹli rẹ ati ọrun. O tilẹ ti ri ọrọ ibukun gba lati ẹnu Ọlọrun ninu ala naa. Nigba ti o si ji, ẹru ba a, o si sọ wipe, “Oluwa n bẹ nihin-in yii nitootọ; emi ko si mọ…Ihin yii ti ni ẹru to? Eyi ki i ṣe ibomiran bi ko ṣe ile Ọlọrun, eyi si ni ẹnu bode ọrun.” (Jẹnẹsisi 28:16-17)

Nitorina, Ọlọrun le wa digbi nibikan, ki a si ma mọ, niwọn igba ti a ko ba ṣi wa ni oju lati ri i. Mo si mọ pe iwọ naa mọ pe igba gbogbo ni Ọlọrun ma fi n tọkantọkan wa ni gbogbo ipejọpọ awọn eniyan rẹ, nitoripe Jesu ti sọ fun wa pe, “Nibi ti ẹni meji tabi mẹta ba gbe wa ni orukọ mi, nibẹ ni Emi yoo wa ni aarin wọn.” Ṣugbọn melo ninu wa ni o n fi gbogbo igba mu ọrọ yi ni ọkunkundun, ki a ba le ṣe amulo rẹ? Melo ninu wa ni o n fi gbogbo igba rin pẹlu afiyesi pe nigbakugba ti a ba pejọ papọ pẹlu awọn eniyan Ọlọrun, Oluwa wa nibẹ pẹlu wa, ti O n wo ohun gbogbo ti a n ṣe, ti O si ṣetan lati pin wa ni ere fun igbagbọ wa tabi lati ba wa wi fun aiṣedede wa? (Wo: Matiu 18:20; Iṣe Awọn Apositeli 5:1-11)

Ailoye awọn nkan wọnyi ni o fa ti ọpọ fi n wa si ipade ijọ lọsọọsẹ, ti wọn ko si ni iriri iṣẹ iyanu Ọlọrun ni ọna gboogi kan tabi omiran. Eyi naa lo si tun fa ti ọpọ fi n ti ori oke de ori oke ati ọdọ wolii de ọdọ wolii, ti wọn n wa iṣẹ iyanu ti ko sọnu kaakiri. Ka tilẹ sọ otitọ, iṣẹ iyanu ti ọpọ n sare wa kaakiri ni wọn le ri gba wẹrẹ ni aarin ijọ wọn, ti o ba ṣe pe wọn n ṣe amulo to peye wiwa Ọlọrun ninu gbogbo ipejọpọ wọn.

Wo o, o le wa ninu ipejọpọ ti o kun fun itusilẹ agbara Ọlọrun lọpọ yanturu, ki o si ma mọ tabi gbadun rẹ, niwọn igba ti o ba ya akuri ninu ẹmi. Pọọlu so eyi fun wa: “Ni orukọ Jesu Kirisiti Oluwa wa, nigba ti ẹyin ba pe jọ ati ẹmi mi, pẹlu agbara Jesu Kirisiti Oluwa wa.” (1Korinnti 5:4) Njẹ o ri bayi? Igbakigba ti a ba pejọpọ ni orukọ Jesu Oluwa wa, agbara rẹ ma n wa nibẹ pẹlu wa lati gbala, wosan, tu silẹ, gbega ati pẹlupẹlu ṣe idajọ ibi. Nkan ti a si nilo ni ki a fiyesi eyi, bi o tilẹ je pe a ko ri agbara naa soju tabi mọ-ọn lara, ki a si tun ṣe amulo rẹ lati yi ọrọ aye wa pada si rere.

Ṣugbọn ti a ba ya akuri nipa ti ẹmi, awọn nkan ti ko le pe wa ni a o ma foju silẹ fun ninu awọn ipejọpọ wa. A le ma foju silẹ fun orin aladun, lero pe ninu rẹ agbara Ọlọrun wa. Tabi ki a ma foju silẹ fun ẹni kan ti yoo pariwo ọrọ Ọlọrun lewa lori tabi ẹni ti yoo fi ọrọ didun sọ wa ji lati gbadura tabi ẹni ti yoo ṣe nkan kan tabi omiran lati jẹ ki ara wa mi titi tabi ki ori wa dide jan an. Ti a ko ba si ri awọn nkan yi, a le ni lọkan pe Ọlọrun ko fi taratara wa ninu awọn ipade naa, ti O ba tilẹ wa ninu wọn rara.

Wayi o, ọna kan gboogi lati padanu agbara ati ipese Ọlọrun fun wa ni yẹn. Bi o tilẹ jẹ pe ko si nkankan ti o buru pẹlu orin ti o larinrin, iwasu ti o ga tabi adura ti o mu gbigbohun soke lọwọ ninu ipade awọn onigbagbọ, ko ki i ṣe awọn nkan wọnyi ni o ma n tu agbara tabi ibukun Ọlọrun silẹ fun awọn eniyan. Dipo eyi, Ọlọrun funrarẹ ni O ma n tu silẹ. Bẹẹni, wiwa rẹ ninu aye wa tabi ninu ipejọpọ wa ni o ma n tu agbara rẹ silẹ fun igbadun wa. Nitorina, dipo ti a o fi fi igbagbọ wa sinu rẹ lati ni iriri iṣẹlẹ iyanu, ti a ba fi sinu awọn akitiyan babara awọn eniyan kan, a ko ni ni iriri agbara rẹ ti a n fẹ lati ri rara. Ko ju bẹyẹn lọ.

Idi si ni yi ti a fi gbọdọ ma fi gbogbo igba gbadura pe ki Ọlọrun ṣe ọkan wa yẹ, ki a ma ba tipaṣẹ wiwa awọn nkan babara padanu ifihan agbara Ọlọrun. Ki Ọlọrun si dahun ibeere yi lori aye rẹ, ni orukọ Jesu. Amin.

Ki o ni ọsẹ alarinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Idi ti o ṣe le padanu agbara iyanu | PaitoJ.O. Lawal Read More »

IDAJỌ LAARIN AGBO IJỌ | Pst. J.O. Lawal

Leave a Comment

ỌJỌRU 21, AGẸMỌ 2021 | AYỌKA: ISIKIẸLI 34:17-22

AKỌSORI: AKỌSORI: “Njẹ o yẹ ki awa ti jẹ alailagbara ninu igbagbọ lee ma ru ẹru ailera ti awọn alailera, ki a ma si ṣe ohun ti o wu ara wa.” (Roomu 15:1)

ỌRỌ AKỌSỌ

Bi a ti ṣe ri ninu bibeli, loorekoore ni Ọlọrun ma n gbẹsan awọn eniyan rẹ lara awọn ika eniyan ti o n pọn wọn ni oju tabi ṣe wọn ni ibi. Eyi si yatọ si idajọ si ipo egbe ayeraye ti yoo ṣe fun gbogbo awọn ti ko mọ ọ tabi kọbiara si nigba ti wọn wa laye. (Wo: Iṣe Apositeli 12; Filipi 1:28; 2Tẹsalonika 1:6-10) Amọ ṣa o, ko ki i ṣe idajọ laarin awọn ika eniyan ati awọn ọmọ rẹ nikan ti Ọlọrun ma n ṣe. O tun ma n ṣe idajọ laarin awọn ọmọ rẹ ati ara wọn pẹlu. Idi si ni pe olotitọ ati olododo ni, ko si fẹ eke, aiṣododo, iyanjẹ tabi ipọniloju, yala laarin awọn ọmọ rẹ si ara wọn ni tabi laarin awọn ọmọ rẹ ati awọn ti aye yi. Ti a ko ba wa fi eyi sọkan, ki a si kiyesara nipa bi a ṣe n ba awọn ọmọ Ọlọrun miran lo pọ, paapaa julọ ninu ijọ ti a wa, ko si ni ki a ma ba idajọ Ọlọrun pade laye yi ni akoko kan tabi omiran.  

IDAJỌ LAARIN AGBO IJỌ

Njẹ a wa ri arigbamu ninu bibeli pe Ọlọrun ma n ṣe idajọ laarin awọn eniyan rẹ bi? Bẹẹni. Fun apẹẹrẹ, ninu iwe Isikiẹli, ori ikẹrin-le-lọgbọn, Oluwa sọ eyi fun awọn eniyan rẹ:

“Bi o ṣe ti yin, ẹyin ọwọ ẹran mi, bayii ni Oluwa Ọlọrun wi; Kiyesi i, emi o ṣe idajọ larin ẹran ati ẹran, laarin agbo ati abukọ. Ohun kekere ni ni oju yin ti ẹ ti jẹ oko daradara, ṣugbọn ẹyin si fi ẹsẹ tẹ oko yooku mọlẹ, ẹ si ti mu ninu omi jinjin, ṣugbọn ẹ si fi ẹsẹ ba eyi ti o ku jẹ? Bi o ṣe ti ọwọ ẹran mi ni, wọn jẹ eyi ti ẹ ti fi ẹsẹ yin tẹ mọlẹ; wọn si mu eyi ti ẹ ti fi ẹsẹ yin bajẹ. Nitori naa, bayii ni Oluwa Ọlọrun wi fun wọn, Kiyesi i, emi ani emi o ṣe idajọ laarin ọwọ ẹran ti o sanra, ati eyi ti o ru. Nitori ti ẹyin ti fi ẹgbẹ ati ejika gbun, gbogbo awọn ti o ṣe ailera ti ẹ si ti fi iwo yin kan wọn titi ẹ fi tu wọn kaakiri. Nitori naa ni emi o se gba ọwọ ẹran mi la, wọn ki yoo si jẹ ijẹ mọ, emi o si ṣe idajọ laarin ẹran ati ẹran.” (Isikiẹli 34:17-22)

Ki ni koko nkan ti Ọlọrun n ba awọn eniyan rẹ sọ ninu awọn ẹsẹ bibeli yi? Oun na ni pe O ṣetan lati ṣe idajọ wọn. Irufẹ idajọ wo ni O si fẹ ṣe laarin wọn? Idajọ iṣesi ati ibalopọ wọn si ara wọn! Eyi n fi ye wa wipe Ọlọrun ti o jẹ Baba gbogbo wa n wo iṣesi wa si ara wa ninu gbogbo awọn ijọ wa. O n wo bi a ṣe n ba ara wa lo pọ lati ri boya a n ṣe ni ọna ti o tọ ati ti o yẹ tabi bẹẹkọ. Ki wa ni awọn ẹsun ti Ọlọrun fi kan awọn eniyan rẹ ninu awọn ẹsẹ bibeli yi, ti O fi fẹ ṣe idajọ wọn ni dandan? Awọn naa niwọn yi:

–     Anikanjọpọn: gẹgẹ bi Ọlọrun ti fi idi rẹ mulẹ, awọn kan wa laarin awọn eniyan rẹ ti o jẹ pe ti ara wọn nikan ni wọn mọ. Idagbasoke, iserere ati ilọsiwaju ti ara wọn nipa ti ẹmi ati nipa ti ara nikan ni wọn mọ. Nitorina, igbesẹ bi yoo ṣe dara ati rọgbọ fun wọn nikan ni wọn n gbe. Ko si nkan ti o kan wọn pẹlu ti awọn ara wọn yoku. Eyi tunmọ si pe awọn wọnyi ko ki i fi igba kankan lepa lati ran awọn eniyan Ọlọrun yoku lọwọ pẹlu oye, imọ, nkan ini, adura ati gbajumọ wọn, ki awọn naa ba a le dagba soke nipa ti ẹmi ati nipa ti ara. Wọn ko ni ṣe afẹri tabi awari tabi amojuto awọn ara wọn lati ri pe wọn n gbe awọn igbesẹ ti o yẹ ki wọn gbe, ki aye wọn ba le ni itunmọ, ki igbagbọ wọn si fi ẹṣẹ mulẹ. Dipo eyi, nkan ti o wu wọn ni wọn a ma a ṣe. Awọn kanna yi si tun ni ẹnu ma n saba ya lati bu ẹnu atẹ lu awọn ti igbagbọ wọn ko fi ẹṣẹ mulẹ, ti irin wọn ko ṣe deede pẹlu Ọlọrun tabi ti aye wọn ko ni ilọsiwaju bi o ṣe yẹ ki o ni. Alanikanjọpọn ni wọn. O si di dan ki Ọlọrun ṣe idajọ wọn nigba ti osuwọn anikanjọpọn wọn ba kun, ti wọn si kọ lati ronupiwada. (Wo: Roomu 15:1; Filipi 2:3-4 &19-24; Kolose 4:12-13)

–     Aikanisi: ki ni o ma n fa anikanjọpọn? Ọkan lara rẹ ni aikanisi. Niwọn igba ti a ko ba ka awọn miran ti o wa ni ayika wa, adugbo wa, ile-iṣẹ wa, ile-iwe wa, orilẹ-ede wa tabi ijọ wa si, ko si ni ki anikanjọpọn ma jọba ninu aye wa. Gẹgẹ bi Ọlọrun ti ṣe fi ẹsun kan awọn eniyan rẹ, a ri lara wọn awọn ti ko ni akasi ọmonikeji wọn. Wọn ko bikita boya aye wọn dara tabi ko dara. Wo ko bikita boya igbagbọ wọn duro deede tabi ko duro deede. Wọn ko si bikita boya wọn ko sinu panpẹ Esu, ki wọn si farapa, ṣubu, sọnu tabi padanu ẹmi wọn tabi ko ri i bẹẹ. Eyi si tunmọ si pe ọkan awọn ara wọn ko ṣe iyebiye si wọn bi ọkan ti wọn ṣe ṣe iyebiye si Ọlọrun to bẹẹ gẹẹ ti O fi fi ọmọ bibi rẹ Jesu Kirisiti Oluwa wa silẹ fun igbala ati irapada wọn (Johanu 3:16). O si ṣe ni laanu pe bi o ṣe ri gẹlẹ ni yi ni ọpọ ijọ wa loni. Ọkan awọn ara wa ninu Oluwa ko ṣe iyebiye si wa bi o ṣe ṣe iyebiye si Jesu Olugbala gbogbo wa. Nitorina a a ki i naani wọn ni ọpọlọpọ ọna, ayafi ti a ba n ri nkan gba lọwọ wọn. Ti a ba si n ri nkan gba lọwọ wọn naa, igbala ọkan wọn kọ ni o ṣe pataki si wa, bi ko ṣe nkan ti a n ri gba lọwọ wọn. Idi si ni yi ti a fi ri ọpọ ti aye wọn ko nitunmọ, ti ile wọn ko ṣe e ri tabi ti iṣẹ ọwọ wọn lodi si ifẹ Ọlọrun ninu ijọ loni, ti ko si si ẹni ti o n ba wọn ọn wi tabi yẹ wọn lọwọ wo. Irufẹ iṣesi yi, gẹgẹ bi Ọlọrun ti wi, di dandan ki o fa idajọ rẹ wa sori wa, ti a ba kọ lati ṣe atunṣe ni akoko.

–     Irẹnijẹ: Yatọ si awọn ẹṣun meji akọkọ ti a ti gbe yẹwo, Ẹṣun miran ti Ọlọrun tun fi kan awọn eniyan rẹ ni irẹnijẹ. Eyi jasi pe wọn n fi ọwọ ọla gba ara wọn loju, wọn n ṣe ara wọn leṣe, wọn n wuwa ibajẹ si ara wọn ati bẹẹ bẹẹ lọ. Ko si yẹ ki o ya wa lẹnu pe iru nkan bayi ma n ṣẹlẹ laarin awọn eniyan Ọlọrun. Idi ni pe niwọn igba ti a ko ba ti naani ara wa tabi ka ara wa si ni ibamu pẹlu ifẹ Ọlọrun, ko si ni ki a ma rẹ ara wa jẹ. A le ja ara wa lole, pọn ara wa loju, ba ara jẹ ninu iṣekuṣe, sọ ọrọ alufanṣa si ara wa, parọ tan ara wa jẹ tabi ṣeku pa ara wa (1Korinnti 5-6; Jemisi 4:1&5:1-6). Igba miran ẹwẹ, nipa aibikita fun ọkan, igbagbọ ati iduroṣinṣin awọn ara wa ninu Kirisiti, a le fi imọ ominira wa tabi ailoye wa ṣe ara wa ni ijamba (Roomu 14; 1Korinnti 8). Irufẹ awọn iṣeṣi yi ni o n le ọpọ ọmọ Ọlọrun kuro ninu ijọ loni, ti ko si tun jẹ ki ọpọ ti ko i ti kuro ninu ijọ duro deede lati sin Ọlọrun tọkantọkan. Yatọ si eyi, irufẹ awọn iwuwasi yi ni ko jẹ ki ọpọ ti ko gba Jesu gbọ fẹ ni nkankan ṣe pẹlu ijọ Ọlọrun.

Ṣe awọn nkan wọnyi le wa ma lọ ni aarin wa, ki Ọlọrun si fi ọwọ lẹran bi? Ko ṣeeṣe. Nitori pe Ọlọrun ni ifẹ gbogbo wa gẹgẹ bi ọmọ rẹ, o didan ti O ba ri wipe a ko tọju ara wa bi o ṣe yẹ tabi mojuto ara bi o ṣe tọ, ki O gbe igbesẹ idajọ lori wa ati laarin wa. Eyi ko tunmọ si pe ko fẹran wa. Dipo bẹ, o tunmọ si pe Oun, gẹgẹ bi Onidajọ ododo, ni lati ṣe ohun ti o tọ ati ti o yẹ lati ri pe ilera wa ninu ijọ awọn ọmọ rẹ ati wipe a ko fi aye silẹ fun awọn ti aye yi lati gan orukọ rẹ nipasẹ wa. Nigba ti O ba si wa n ṣe eyi, o ṣeeṣe ki idajọ rẹ mu ipalara wa fun wa ni oriṣiriṣi ọna.

Ti a ko ba gbagbe, nigba ti Kaini pa aburo rẹ Abẹẹli, Ọlọrun ko fi akoko ṣofo rara lati ṣe idajọ laarin awọn mejeeji. Ọlọrun tilẹ sọ fun pe nṣe ni ẹjẹ arakunrin rẹ n kigbe tantan fun idajọ ati igbẹsan ododo. Nitorina, Ọlọrun fi si abẹ eegun aṣedanu nidi iṣẹ ọgbin. O si tun sọ di alarinkirin, ẹni ti ọkan rẹ ko ni fi igba kankan balẹ. Bẹẹ gẹgẹ ni a si ri awọn ọmọ Ọlọrun ti igbe oro awọn ara wọn ti wọn ti han lemọ, yanjẹ, pọn loju tabi ba aye wọn jẹ n fi gbogbo igba wa si eti Ọlọrun. Bawo wa ni Ọlọrun ko ṣe ni ṣe idajọ awọn naa, bi O ṣe ṣe ti Kaini? Ko si ni, ayafi ti wọn ba tete ronupiwada. (Wo: Jẹnẹsis 4:1-16; Jemisi 5:1-6; 1Peteru 3:7).

Siwaju si, ninu ọkan lara lẹta rẹ si awọn ijọ Kọrinnti, Pọọlu jẹ ki o ye wọn pe ọkan gboogi lara idi ti ọpọ laarin wọn ṣe n ṣaisan tabi wa ni ailera, ti ọpọ miran ẹwẹ si ti ṣe jade laye laitọjọ ni pe Ọlọrun n ṣe idajọ laarin wọn. Ki lo si fa ti Ọlọrun fi n ṣe eyi? Idi ni pe wọn ko fi imọ ati oye ba ara wọn lo gẹgẹ bi ẹya ara Kirisiti. Bi a ṣe ri ninu bibeli, gbogbo awa ti  a gbagbọ ninu Jesu Kirisiti ni Ẹmi mimọ ti tẹwa bọ inu ara rẹ gẹgẹ bi ọkan. Nitorina, bi o ti wu ki a pọ to tabi ki ẹya wa yatọ to, ara kan naa ni gbogbo wa jẹ ninu Kirisiti Oluwa wa. A wa gbọdọ mọ eyi daju, ki a si ma ba ara wa lo pẹlu oye rẹ. Aijẹbẹ, ni awọn akoko kan, Ọlọrun ko ni ṣe meni tabi ṣe meji ju ki O bẹ wa wo pẹlu idajọ lọ. Irufẹ idajọ bẹ si le yọri si aisan, ailera, adanu, aṣedanu, iku ati bẹẹbẹẹ lọ, gẹgẹ bi o ti ri fun awọn ara Kọrinnti igbanni. (Iṣe Apositeli 5:1-11; Roomu 12:4-5; 1Korinnti 11:17-34 & 12:12-27)

A tilẹ tun ri ninu iwe Ifihan ti a fun Johanu pe Jesu Oluwa kọ lẹta si ijọ Tiatira wipe Oun yoo ṣe idajọ laarin wọn nitoripe wọn fi aye gba awọn kan lara wọn lati ma ṣi awọn ọmọ rẹ lọna lati ṣe agbere ati lati bọriṣa. Irufẹ idajọ wo si ni Oluwa fẹ mu wa si ori wọn nitori aironupiwada wọn? Idajọ aisan! Idajọ ipọnju nla! Idajọ iku. Nitorina, ti a ba dede ri pe ikoro bẹrẹ si ni farahan ninu ijọ kan, a nilo lati fura ni kiakia, ki a si bẹrẹ si ni wadi lati ṣe idajọ ara wa pẹlu ọrọ Ọlọrun. Nitori pe o le jẹ wipe ẹṣẹ si ara wa ati si ara Kirisiti ni o fa. (Wo: Ifihan 2:20-23)

ỌRỌ IPARI

Iha ti a kọ si ibaṣepọ pẹlu awọn ara wa ninu Oluwa, paapaa julọ awọn ọmọ ijọ wa, ṣe pataki pupọ. Idi si ni pe Ọlọrun Baba wa n wo gbogbo wa lati san wa ni ẹṣan gẹgẹ bi iṣesi wa si ara wa ba ṣe ri. Ti a ko ba wa fẹ ki O jẹ wa niya nitori aiṣedede wa si ara wa, a gbọdọ kiyesi lati ma ka ara wa si, ki a ma ba ara wa lo pẹlu ifẹ ti o peye, ki a si tun ma ṣe idajọ awọn iwa ti ko ba tọ ni aarin wa pẹlu ọrọ Ọlọrun ati ninu ododo.

IBEERE

–     Ṣe ẹkọ yi ṣe pataki fun awọn ọmọ Ọlọrun tabi ko ṣe pataki?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com  or call: 08037592851 (WhatsApp Number: 07085711280)

IDAJỌ LAARIN AGBO IJỌ | Pst. J.O. Lawal Read More »

Da wọn mọ; tẹwọ gba wọn; bukun fun wọn | Paito J.O. Lawal

Leave a Comment

Ọjọ: Agẹmọ 18, 2021 | Atẹlera: Latori tabili Paitọ | Nọmba: Vol. 10, No. 11

Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Agẹmọ 2021. Mo gbadura pe ki Ẹmi Ọlọrun ṣe ọkan rẹ yẹ, ki o ma ba fi igba kankan padanu ibẹwo rẹ sinu aye rẹ nipasẹ kikọ silẹ tabi ainani awọn eniyan ti O ti yan fun igbega, isorire ati ibalẹ-ọkan rẹ. Amin.

Bi a ṣe ri ninu bibeli, Ọlọrun ni eto daradara fun gbogbo awọn ọmọ rẹ. Bi Pọọlu tilẹ ṣe sọ fun wa, awọn eto Ọlọrun fun wa tobi, wọn si tun dara tobẹẹ gẹẹ ti ọkan wa ko fi le mọ bi wọn ṣe tobi tabi dara to. Nitorina, Ẹmi rẹ nikan naa ni o wa ni ipo lati fi wọn han wa ati lati tọka wọn si wa, ki a ba le gbadun wọn daradara. (Wo: 1Korinnti 2:9-12) Amọ ṣa o, Ẹmi Ọlọrun ko ki i fi gbogbo igba da a ṣiṣẹ lati mu ete Ọlọrun wa si imuṣẹ ninu aye awọn eniyan. Ọpọ igba, nṣe ni O ma n lo awọn miran ti O ti tọ, fun ni ẹbun ati ṣe ye ni awọn ọna kan lati mu ifẹ rẹ wa si imuṣẹ ninu aye awọn eniyan. Ti wọn ko ba si wa mọ wọn, tẹwọgba wọn, ki wọn si ba wọn lo pọ ni ọna ti o tọ, awọn ti O ti gbe dide lọna yi fun imuṣẹ eto rẹ daradara fun aye wọn, wọn le kuna lati ri imuṣẹ awọn eto yi.

Fun apẹẹrẹ, Ọlọrun ran Jesu Oluwa wa lati kọkọ ṣe awari awọn aguntan Israẹli ti O ṣọnu, ki O to tọ awọn araye yoku lọ pẹlu ẹbun ọfẹ igbala rẹ (Matiu 10:5-6 & 15:24). Idi niyi ti o fi jẹ wipe awọn ni wọn kọkọ gbọ awọn iwaasu oore-ọfẹ rẹ, ti wọn si tun kọkọ jẹ igbadun ifamin-ororo yan rẹ lati wosan, tu silẹ ati mu padabọ sipo. Ṣugbọn ṣe wọn tẹwọgba a, ki wọn si tun ba a lopọ ni ọna ti o peye bi? Rara o! Dipo eyi, gẹgẹ bi orilẹ-ede, nṣe ni wọn kọ ọ silẹ, tabuku rẹ, ṣe inunibini si, ti wọn si tun pa a nigbẹyingbẹyin. (Wo: Johanu 1:10-13)

Bawo wa ni ti awọn eniyan rẹ, awọn ti ilu abinibi rẹ, nibi ti a ti wo o dagba? Njẹ awọn naa tẹwọ gba bi, bi o tilẹ jẹ ẹya wọn ọn ni? Rara o! Dipo eyi, iriri rẹ laarin wọn gan tilẹ tun buru ju ti eyi ti O ri ni awọn ibomiran. Iwọ naa wo nkan ti Maaku sọ lori eyi: “Oun ko si le ṣe iṣẹ agbara kan nibẹ ju pe o gbe ọwọ rẹ le awọn alaisan diẹ, o si mu wọn larada. Ẹnu si ya a nitori aigbagbọ wọn…” (Maaku 6:5-6)

Ni aifọrọgun, nigba ti o ku diẹ ki iṣẹ iranṣẹ rẹ laarin awọn eniyan orilẹ-ede rẹ wa si opin, O sukun fun olu-ilu wọn, Jerusalẹmu, O si tun sọ awọn ọrọ sunukun yi: “I ba ṣe pe iwọ mọ lonii yii, ani iwọ, ohun tii ṣe ti alaafia rẹ! ṣugbọn nisinsinyi wọn pamọ kuro ni oju rẹ. Nitori ọjọ n bọ fun ọ, ti awọn ọta rẹ yoo wa yara ka ọ, wọn o si yi ọ ka, wọn o si ka ọ mọ niha gbogbo. Wọn o si wo ọ palẹ ati awọn ọmọ rẹ ninu rẹ; wọn ki yoo si fi okuta kan silẹ lori ara wọn; nitori ti iwọ ko mọ ọjọ ibẹwọ rẹ.” (Luuku 19:42-44) Lafikun, O tun sọ wipe, “Jerusalẹmu, Jerusalẹmu, iwọ ti o pa awọn wolii, ti o si sọ okuta lu awọn ti a aran si ọ; igba meloo ni emi n fẹ radọ bo awọn ọmọ rẹ, gẹgẹ bi agbebọ ti i radọ bo awọn ọmọ rẹ labẹ apa rẹ, ṣugbọn ẹyin ko fẹ! Ṣa wo o, a fi ile yin silẹ fun yin ni ahoro. Mo wi fun yin, ẹyin ki yoo ri mi mọ lati isinsinyi lọ, titi ẹyin o fii wi pe, Olubukun ni ẹni ti n bọ wa ni orukọ Oluwa.” (Matiu 23:37-39)

Iwọ naa wo ọrọ yi. Tipẹtipẹ ni awọn eniyan wọnyi ti n gbadura, ti wọn si tun duro de Ọlọrun lati wa gba wọn la. Ṣugbọn nigba ti O ran Olugbala ti wọn nilo si wọn, wọn ko tẹwọ gba a. Ki si ni idi? Idi ni pe wọn ko da a mọ gẹgẹ bi Olugbala wọn. Nitorina, O sọ fun wọn pe ile wọn ni a o fi silẹ ni ahoro titi wọn o fi da mọ, tẹwọgba, ki wọn si tun bukunfun.

Ni bakan naa, niwọn igba ti awa naa ko ba da wọn mọ, tẹwọgba wọn, ki a si tun bukun fun wọn, awọn ti Ọlọrun tipasẹ Ẹmi rẹ ran lati tọ wa, gbe wa ro, wo wa san ati gbe wa ga, nṣe ni aye wa yoo wa ni ojukan, ti yoo si tun jẹ ahoro ni ọna pupọ. Idi si ni yi ti o fi jẹ pe olori adura kan ti o yẹ ki a ma fi gbogbo igba gba fun ara wa ni pe ki awọn eniyan ati nkan ti Ọlọrun ti pese tabi ran fun aye wa lati jẹ nkan ti o yẹ ki wọn jẹ ma ṣe farasin fun wa. Nitori naa, lẹkan si, adura mi fun ọ, bi o ṣe n tẹsiwaju ninu irinajo aye rẹ, ni pe ki a ṣe ọkan rẹ yẹ lati da wọn mọ, ki o si tun tẹwọgba wọn ni ọna ti o yẹ, awọn eniyan ati nkan ti Ọlọrun ti pese fun aye rẹ lati jẹ nkan ti o yẹ ki o jẹ, ni orukọ Jesu. Amin.

Ki o ni ọsẹ ti o ga.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Da wọn mọ; tẹwọ gba wọn; bukun fun wọn | Paito J.O. Lawal Read More »

AKỌRI: WOLII (2) AYỌKA: MATIU 16:1-4

Leave a Comment

ỌJỌRU 14, AGẸMỌ 2021

AKỌSORI: AKỌSORI: “Awọn eniyan pupọ si wa sọdọ rẹ, wọn si wi pe, Johanu ko ṣe iṣẹ, ami kan: ṣugbọn otitọ ni ohun gbogbo ti Johanu sọ nipa ti ọkunrin yii.” (Johanu 10:41)

ỌRỌ AKỌSỌ

Ninu ẹkọ ti a n kọ lori wolii ati iṣẹ iranṣẹ rẹ, a ri daju lati inu bibeli pe wolii jẹ ẹnikan ti Ọlọrun n fi ara rẹ ati ifẹ rẹ han ki O ba a le lo o lati fi ifẹ rẹ tabi ara rẹ han awọn eniyan. Eyi si kọja ki a sọ asọtẹlẹ; dipo bẹẹ, o ni i ṣe pẹlu fifi ifẹ, ete, ero tabi eto Ọlọrun han si awọn eniyan. A si tun ri pe Ọlọrun le fi ara rẹ ati ifẹ rẹ han wolii nipasẹ ala tabi iran tabi nipasẹ biba sọrọ ni ẹnukoẹnu. Amọ ṣa o, ẹnikẹni ti o ba pe ara rẹ ni wolii, ti ko wa fi ara rẹ jin fun ọrọ Ọlọrun ko ni le ṣe iyatọ ti o peye laarin ala, iran tabi ohun ti o wa lati ọdọ Ọlọrun ati eyi ti o wa lati ọdọ Eṣu. Yatọ si eyi, ko tun ni mọ igba ti o yẹ ki o gbe ẹnu dakẹ ati igba ti o yẹ ki o sọrọ. Eyi ni o si fa a ti a fi ni ọpọlọpọ wolii eke kaakiri agbaye loni.

WOLII ATI IṢẸ IYANU

Wayi o, ara nkan ti a tun nilo mọ nipa wolii ni pe iṣẹ iranṣẹ rẹ ko ki i fi gbogbo igba ni i ṣe pẹlu ki a ṣe iṣẹ ami tabi iṣẹ iyanu. Lotitọ, bi a ṣe ri ninu bibeli, awọn wolii kan wa ti o jẹ pe Ọlọrun lo wọn fun oniruuru iṣẹ ami ati iyanu. O ṣi ṣe eyi ni ọpọ igba lati jẹ ki awọn eniyan gba a gbọ. Jesu tilẹ fi igba kan sọ eyi fun awọn ara Juu: “Bi ko ṣe pe ẹyin ba ri ami ati iṣẹ iyanu, ẹyin ki yoo gbagbọ lae.” (Johanu 4:48) Nitorina, awọn kan wa ti o jẹ pe ti ko ba ṣe pe wọn ba ri ami tabi iyanu Ọlọrun, wo ko ni gba a gbọ. O le jẹ nitori ipọnju ti o pọ fun wọn tabi nitori itanjẹ orisirisi awọn eke ojiṣẹ Ọlọrun ti wọn ti ba pade tabi nitori ibaṣepọ wọn pẹlu agbara okunkun ni wọn ko ṣe fẹ ni nkankan ṣe pẹlu Jesu tabi Ọlọrun. Ṣugbọn ti awọn wọnyi ba ri iṣẹ ami ati iyanu otitọ, wọn le tipasẹ rẹ gbagbọ, ki wọn si kọ ẹṣẹ, ibọriṣa ati awọn iwa eeri wọn silẹ.

Fun apẹẹrẹ, a ri wipe nigba ti Ọlọrun ran Mose pada lọ si Ijibiti lati mu awọn eniyan rẹ jade, O fun ni aṣẹ lati ṣe oniruuru iṣẹ ami ati iṣẹ iyanu. Ki si ni idi? Ni akọkọ, O ṣe eyi ki awọn ọmọ Isiraẹli, ti iya ti jẹ fun ọpọlọpọ ọdun, ti wọn si ti bẹrẹ si ni ro wipe Ọlọrun awọn baba wọn ti kọ wọn silẹ tabi pe ko ni agbara lati gba wọn, ba le gbagbọ ninu rẹ ati ninu ẹni ti o ran an niṣẹ. Nitorina, bibeli sọ eyi fun wa: “Mose ati Aarọni lọ, wọn ko gbogbo agba awọn ọmọ Isiraẹli jọ: Aaroni sọ gbogbo ọrọ ti Oluwa ti sọ fun Mose, o si ṣe iṣẹ ami naa ni oju awọn eniyan naa. Awọn eniyan naa si gbagbọ: nigba ti wọn gbọ pe, Oluwa ti bẹ awọn ọmọ Isiraẹli wo, ati pe o ti ri ipọnju wọn, nigba naa ni wọn tẹ ori wọn ba, wọn si sin in.” (Ẹkisodu 4:29-31)

Idi keji ti Ọlọrun fi fun Mose ni aṣẹ ati agbara lati ṣe iṣẹ ami ati iyanu ni lati le fi dandan mu Farao lati tu awọn eniyan rẹ silẹ. Iwọ na wo nkan ti Ọlọrun sọ fun Mose lori eyi: “Emi si mọ pe ọba Ijibiti ki yoo jẹ ki ẹyin ki o lọ, bi ko ṣe nipa ọwọ agbara. Emi o si na ọwọ mi, emi o si fi iṣẹ-iyanu mi gbogbo kọlu Ijibiti ti emi o ṣe laarin rẹ: lẹyin eyi ni oun o too jẹ ki ẹ lọ.” (Ẹkisodu 3:19-20) A si ri pe bẹẹ gẹgẹ ni Ọlọrun ṣe si ọba Ijibiti ati awọn eniyan rẹ, ki o to di pe wọn gbagbọ pe Ọlọrun ni agbara lori wọn, ti wọn si tu awọn ọmọ Isiraẹli silẹ.

Siwaju si, ni igba aye ọba Ahabu, a ri wipe ibọriṣa ati iṣẹ oṣo gbilẹ to bẹẹ gẹẹ ti awọn eniyan Isiraẹli fi gbagbe Ọlọrun patapata, ti wọn ko si mọ bi o ṣe yẹ ki wọn sin in mọ. Nitorina, nigba ti Ọlọrun ṣetan lati mu wọn padabọsipo, O kọkọ fi iyan ọdun mẹta ati abọ bẹ wọn wo nipasẹ ọrọ ẹnu wolii rẹ, Elija. Lẹyin eyi, O tun wa lo wolii yi lati mu ki ina sọkalẹ lati ọrun sori ẹbọ sisun rẹ, ki o ba le fi awọn oriṣa ti wọn n bọ ati awọn wolii awọn oriṣa yi han gẹgẹ bi eke. (Wo: 1Awọn Ọba 17&18)

Nitorina, ọkan pataki lara idi ti Ọlọrun fi ma n tipasẹ awọn wolii rẹ ṣe iṣẹ ara ati iṣẹ iyanu ni lati jẹ ki awọn eniyan le gba a gbọ ki wọn si ronupiwada, kọ ibọriṣa silẹ tabi ri gẹgẹ bi alagbara lori ohun gbogbo. A si tun fi idi eyi mulẹ nipasẹ iṣẹ iranṣẹ awọn apositeli, ẹfanjẹlisiti ati wolii Jesu ti wọn lọ kaakiri agbaye lati polongo ọrọ rẹ fun araye. A ri wipe pupọ ninu ibi ti wọn lọ ni wọn ti ṣe ọpọlọpọ isẹ ara ati iṣẹ iyanu ti o pe akiyesi awọn eniyan si ihinrere Jesu, ti o si tun jẹ ki wọn gbagbọ. (Wo: Iṣe Awọn Apositeli 5:12, 8:4-8 & 14:3)

Amọ ṣa o, ko ki i ṣe gbogbo igba naa ni Ọlọrun ma n lo awọn wolii tabi awọn iranṣẹ rẹ miran fun iṣẹ ami tabi iṣẹ iyanu. Ailoye eyi si n jẹ ki ọpọ padanu awọn ibukun tabi aabo ti wọn ko ba ma ri gba lati ara awọn wolii Ọlọrun ti O n ran si wọn. Nkan ti mo n sọ ni wipe ọpọ ni o ro pe ẹni ti ko ba ti ma ṣe iṣẹ ara tabi iṣẹ iyanu ko ki i ṣe wolii otitọ. Ṣugbọn pataki julọ ninu iṣẹ iranṣẹ wolii ni lati fi ifẹ, ete ati ero Ọlọrun han awọn eniyan, ki i ṣe lati ṣe iṣẹ iyanu. Iṣẹ iyanu melo ni awọn wolii bi Aisaya, Jeremaya, Emọọsi, Miika, Daniẹli ati bẹẹbẹẹ lọ ṣe? A ko ni akọsilẹ wọn. Ṣugbọn wọn fi tọkantọkan fi ifẹ ati eto Ọlọrun han gbogbo awọn ti O ran wọn si.

Bi a tilẹ tun ṣe ri ninu akọsori wa, Johanu onitẹbọmi ti o fi Jesu han fun awọn Juu gẹgẹ bi ọmọ Ọlọrun gan ko ṣe iṣẹ iyanu kankan (Johanu 10:41). Sibẹsibẹ, Jesu sọ wipe ko si wolii naa tabi eniyan naa ti a bi ninu obinrin ti o ga ju Johanu yi lọ niwaju Ọlọrun, ayafi awọn ọmọ ijọba ọrun (Matiu 11:11). Eyi si n jẹ ki o ye wa wipe Ọlọrun ko ki i gbe odiwọn pataki iṣẹ wolii kan tabi omiran le ori iye iṣẹ iyanu ti wọn ṣe ṣugbọn lori bi wọn ṣe fi tọkantọkan jẹ iṣẹ yowu ti o ba gbe le wọn lọwọ si.

Ti a o ba i ti gbagbe, a ti ri idi ti Ọlọrun fi ma n lo awọn wolii rẹ lati ṣe iṣẹ iyanu. Amọ ko ki i ṣe gbogbo igba ni O ma n ṣe eyi tabi ni o nilo lati ṣe eyi. Ibikibi ti Ọlọrun ba ti mọ pe awọn eniyan ri iṣẹ iyanu rẹ to lati gbagbọ, O le ma ṣe iṣẹ iyanu miran fun wọn nibẹ mọ. Fun apẹẹrẹ, ninu iwe Matiu ti a n gbe yẹwo fun ẹkọ yi, a ri eyi ka:

“Awọn Farisi pẹlu awọn Sadusi si wa, wọn n dan an wo, wọ si n fẹ ki o fi ami han fun wọn lati ọrun wa. Ṣugbọn o dahun o si wi fun wọn pe, Nigba ti o ba di aṣalẹ, ẹyin a wi pe, ọjọ yoo dara: nitori ti oju ọrun pọn. Ati ni owurọ ẹyin a wi pe, ọjọ ki yoo dara lonii, nitori ti oju ọrun pọn, o si ṣu dẹdẹ. A! Ẹyin agabagebe, ẹyin lee mọ ami oju ọrun; ṣugbọn ẹyin ko le mọ ami akoko wọnyi? Iran buburu ati pansaga n fẹ ami: a ki yoo si fi ami fun un, bi ko ṣe ami ti Jona wolii. O si fi wọn silẹ, oo kuro nibẹ.” (Matiu 16:1-4)

Njẹ o ri bayi? Jesu kọ jalẹ lati ṣe iṣẹ ami kan tabi omiran fun awọn Farisi ati Sadusi ti o tọ ọ wa. Ki si ni idi? Idi ni wipe wọn ti ni aafani lati ri ọpọlọpọ iṣẹ iyanu ati iṣẹ ami ti Ọlọrun jẹ ki O ṣe. Sibẹsibẹ, wọn ko gbagbọ. Akoko kan wa ti O tilẹ sọ wipe egbe ni fun awọn ilu bi Korasini, Kapanaumu ati Bẹtisaida nitoripe bi o tilẹ jẹ pe O ṣe ọpọlọpọ iṣẹ iyanu ninu wọn, wọn ko ronupiwada kuro ninu ẹṣẹ wọn (Matiu 11:20-24). Nitorina, fun ẹni ti ko ba ni i gbagbọ rara, bi o tilẹ ri ẹgbẹgbẹrun iṣẹ ara ati iṣẹ iyanu wolii, bi Farao na ni ọkan rẹ yoo ṣe yigbe, ti ko si ni ronupiwada. Ti Ọlọrun ba wa kọ lati fi iṣẹ ami han iru ẹni bẹ, njẹ o buru bi? Ko buru rara.

Yatọ si eyi, ara awọn idanwo ti Eṣu fun Jesu, gẹgẹ bi akọsilẹ bibeli, ni pe ki o sọ okuta di akara (Matiu 4:1-4; Luuku 4:1-4). O si fẹ ki o ṣe eyi ki o ba le fi ara rẹ han gẹgẹ bi ọmọ Ọlọrun. Njẹ Jesu wa ṣe gẹgẹ bi o ti wi bi?  Rara o! Ki si ni idi ti ko fi ṣe bẹ? Idi ni wipe Jesu ko kan le dede ṣe iṣẹ iyanu ti ko ba ṣe wipe Ọlọrun lo ni ko ṣe e (Johanu 5:19 & 14:10). Eyi tunmọ si pe ifẹ Ọlọrun ni O n fi gbogbo igba tẹle; ko ki i ṣe ifẹ ti ara rẹ (John 8:29). Nitorina, niwọn igba ti o jẹ pe ifẹ Eṣu ni pe ki O sọ okuta di akara, ko le da lohun rara. A si gbọdọ jẹ ki eyi yewa yekeyeke, ki a ma ba titori pe a fẹ jẹ ki o ye awọn eniyan pe ti Ọlọrun ni a nṣe nitootọ jẹ iṣẹ ti ko ran wa.

Ni afikun, ko ki i ṣe gbogbo iṣẹ iyanu naa ni o ma n ti ọwọ Ọlọrun wa. Adamọdi iṣẹ iyanu wa. Awọn wolii eke naa a ma ṣe iyanu nipaṣẹ agbara awọn ẹmi Eṣu. Idi niyi ti Jesu Oluwa wa fi sọ eyi fun wa: “Nitori awọn eke Kirisiti, ati eke wolii yoo dide, wọn o si fi ami ati ohun iyanu nla han: tobẹẹ bi o le ṣe e ṣe, wọn o tan awọn ayanfẹ paapaa.  Wo o, mo wi fun yin tẹlẹ.” (Matiu 24:24-25) Njẹ o ri bayi? Ti a ko ba ṣọra, a le tipaṣẹ iṣẹ ara tabi iṣẹ iyanu kọsẹ tabi ṣọnu.

Ni kukuru, a ko le sọ pe eniyan ko ki i ṣe wolii Ọlọrun tabi wolii otitọ nitoripe ko ṣe iṣẹ ara tabi iṣẹ iyanu ni ibamu pẹlu erongba wa. A ko si le gbe odiwọn pataki iṣẹ wolii kankan le bi o ṣe ṣe iṣẹ iyanu to. Ọlọrun ti O n gbe iṣẹ le awọn wolii rẹ lọwọ naa ni o le sọ bi iṣẹ wolii kan ṣe ṣe pataki si ati irufẹ iṣẹ iyanu tabi iṣẹ ara ti yoo ṣe tabi ti ko ni i ṣe.

ỌRỌ IPARI

A gbọdọ yago fun fifi iṣẹ iyanu ṣe ami tabi odiwọn boya enikan jẹ wolii Ọlọrun tootọ tabi wolii eke. Boya wolii kan yoo ṣe iṣẹ iyanu tabi ko ni i ṣe ku si ọwọ Ọlọrun; ko si ni i ṣe pẹlu eniyan rara. Nitorina, pataki iṣẹ wolii ni ki o fi ifẹ Ọlọrun ati ete rẹ han si awọn eniyan bi o ṣe tọ ati bi o ṣe yẹ, ki oun na si gbe igbe aye ti o wa ni ibamu pẹlu otitọ Ọlọrun ti o mọ. Ti o ba ti ṣe eyi, iṣẹ iranṣẹ rẹ yoo jẹ itẹwọgba niwaju Ọlọrun, bi ko tilẹ wa pẹlu iṣẹ ami ati iṣẹ iyanu.

IBEERE

–     Ọna wo ni ẹkọ yi gba ran imọ ati oye rẹ lọwọ lori iṣẹ iranṣẹ wolii?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com  or call: 08037592851 (WhatsApp Number: 07085711280)

AKỌRI: WOLII (2) AYỌKA: MATIU 16:1-4 Read More »

O le jẹ ki o gbagbe gbogbo iyọnu rẹ | Paito J.O. Lawal

Leave a Comment

Ọjọ: Agẹmọ 11, 2021 | Atẹlera: Latori tabili Paitọ | Nọmba: Vol. 10, No. 10

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Kaabọ sinu ọsẹ miran ninu oṣu Agẹmọ. Adura mi fun ọ si ni pe ki Ọlọrun jẹ ki o ni iriri awọn nkan ti yoo jẹ ki o gbagbe awọn ọdun iyọnu rẹ ati awọn nkan buburu ti awọn eniyan ti ṣe si o, ni orukọ Jesu. Amin.

Bi a ti ṣe ri ninu bibeli, bi o tilẹ jẹ wipe Josẹfu pada wa di ẹni nla, gẹgẹ bi ete Ọlọrun fun un, ọna ti o gba goke agba jẹ eyi ti ko rọrun rara. Lakọkọ, awọn ẹbi rẹ gan an, iyẹn awọn arakunrin rẹ ti wọn jọjọ jẹ ẹjẹ kanna, ni wọn gbimọ papọ lodi si, ti wọn si ta a si oko ẹru. Ki wa ni idi? Idi ni wipe wọn n jowu rẹ, ọkan wọn si tun koro si i. Ko dun mọ wọn ninu rara pe baba wọn fẹran rẹ ju gbogbo wọn lọ ati pe ko si tun fi pamọ. Lafikun, wọn ko fẹran bi o ṣe jẹ pe gbogbo igba naa ni o ma n fi ẹjọ awọn iwa aida wọn sun – ko kan dun mọ wọn ninu rara pe aye tirẹ tọọ, ko si lọjupọ bi ti wọn. Siwaju si, wọn ko fẹran bi o ṣe jẹ pe oun nikan naa ni o ma n fi gbogbo igba lala pe oun yoo di ẹni giga ju gbogbo wọn lọ. Nitorina, wọn ṣe ohun gbogbo ti wọn le ṣe lati yanju rẹ. (Wo: Jẹnẹsisi 37)

Ṣugbọn nitori pe Ọlọrun nifẹ rẹ, ko si tun pa a ti, o ba ara rẹ gẹgẹ bi ẹru nile ọkunrin kan ti o mọ riri aye rẹ ti o tọ ati ijafafa rẹ lẹnu iṣẹ, ti o si tun fi aye gba a lati gberu si. Nitorina, lẹyin igba diẹ, o di ẹni ti o ṣe pataki julọ ninu ilẹ olowọ rẹ. O di alamojuto ọrọ ọkunrin yi, awọn ẹru rẹ ati ohun gbogbo ti o n lọ ninu ile rẹ. O wa ṣeni laanu pe, nigba ti o wa dabi ẹnipe aye rẹ fẹ bẹrẹ si ni lojutu pada ni awọn ika ẹmi ti wọn ti pinnu lati ba aye rẹ jẹ ti iyawo olowo rẹ lati gbe awọn igbese omugo ati iṣekuṣe kan ti o jẹ ki o ba ara rẹ ninu ẹwọn. (Wo: Jẹnẹsisi 39)

Sibẹsibẹ, Ọlọrun ko pa ọdọmọkunrin yi ti, bi o tilẹ jẹ pe inu ẹwọn ni o wa. Dipo eyi, O jẹ ki o ba ojurere pade lẹẹkan si, ki o si tun pade ọlọla eniyan kan ti o papa wa ṣi ilẹkun igbega ati ibalẹ ọkan fun (Jẹnẹsisi 40). Eyi si ni nkan ti bibeli sọ nipa rẹ nigbati o bi akọbi ọmọ rẹ lẹyin ọdun diẹ si: “Josẹfu si sọ orukọ akọbi ni Manase: wi pe, Nitori ti Ọlọrun mu mi gbagbe gbogbo iṣẹ mi, ati gbogbo ile baba mi.” (Jẹnẹsisi 41:52)

Iwọ na ro wo. Ọlọrun jẹ ki Josẹfu gbagba gbogbo iyọnu ati gbogbo ikoro ti o jẹ lati ọwọ awọn arakunrin rẹ. Eyi tunmọ si pe, Ọlọrun jẹ ki awọn iṣẹlẹ kan ṣẹlẹ ti o mu gbogbo inira, ibanujẹ, abamọ ati ibinu rẹ, paapaa si awọn ti o ṣẹ kuro. Nitorina, o wa le gbe iyoku ọjọ aye rẹ ninu ọrọ, ayọ ati ibalẹ-ọkan. Nkan ara ma leyi o!

Lọna kanna, Ọlọrun yi i kanna ti O jẹ ki Josẹfu gbagbe gbogbo iyọnu ati ikoro ọkan rẹ le jẹ ki iwọ naa gbagbe gbogbo iyọnu, ibanujẹ, inira ati ibinu rẹ, paapaa si awọn ti Eṣu ti lo tabi ti o n lo lati ṣe ọ nika tabi ni ọ lara. Bẹẹni, O le mu awọn iṣẹlẹ waye ti yoo jẹ ki o gbagbe patapata bi o ṣe n ri ti eniyan ba n jiya tabi ti o ba wa ninu inira. Nkan ti o si nilo lati ṣe ko ju ki o fi gbogbo ọkan rẹ gbẹkẹ le e, ki o si tun ni ikọbiarasi ti o tọ bi ti Josẹfu. Oun yoo si mu ọ wa si ipo naa laye yi ti ọkan rẹ yoo ti kun fun ayọ to bẹẹ gẹẹ ti o ko fi ni ri aye lati sọkun, kabamọ tabi ronu lati gbẹsan lara ẹnikẹni fun ohun yowu ti o ṣẹ si ọ.

Wo o, awọn ti o ri aye lati bu awọn miran, korira wọn tabi wa bi wọn yoo ṣe gbẹsan lara wọn ri bayi nitori pe wọn ko i ti ni iriri odiwọn ayọ Oluwa to koju osuwọn ni. Ti a ba sọ iru awọn ẹni bẹẹ sinu odo ayọ rẹ, ti o si bo wọn mọlẹ, gbogbo ibinu, aroye ati ikorira wọn ni yoo poora, ti gbogbo afojusun wọn ko si ni kọja bi wọn yoo ṣe ma jẹgbadun ẹkunrẹrẹ ibukun ti Ọlọrun ti tu si wọn lori. Ki wa gan ni o fẹ? Ṣe o fẹ ma fi gbogbo iyoku ọjọ aye rẹ ṣe aroye, korira tabi bu awọn elomiran fun ipa ti wọn ko ninu laasigbo ati ajalu rẹ ni? Abi ṣe ni o fẹ lati gbe iyoku aye rẹ ninu ẹkunrẹrẹ ayọ Oluwa, nibi ti o ko ti ni ri aye lati ranti ikuna tabi irora atẹyinwa tabi ranti iwa ika awọn ti wọn ṣe aidara si ọ?

Niti temi o, ma a gbe iyoku aye mi pẹlu ọkan ti ko si ikorira, ibanujẹ, ikoro tabi ẹsan kankan ninu rẹ ṣugbọn ti o kun fun kiki ayọ ati ọpẹ si Ọlọrun. Idi si ni pe o dami loju pe O n ṣiṣẹ lati jẹ ki ohun gbogbo, pẹlu iwa ika awọn eniyan si mi, ṣiṣẹ pọ fun rere ati itẹsiwaju mi ati fun iyin orukọ ologo rẹ (Roomu 8:28). Mo si gbadura pe ki iwọ naa ri okun gba ninu rẹ lati ni irufẹ ọkan kanna, ni orukọ iyebiye ti Jesu. Amin

Ki o ni ọsẹ alarinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

O le jẹ ki o gbagbe gbogbo iyọnu rẹ | Paito J.O. Lawal Read More »

Sọ iriri rẹ pẹlu rẹ fun wọn | Paito J.O. Lawal

Leave a Comment

Ojo: Igbe 11, 2021 | Atelera: Latori tabili Paitọ | Nomba: Vol. 9, No. 49

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olurapada wa. Kaabọ sinu ọsẹ miran ninu oṣu igbe 2021. Ki o si ni iriri isinmi Ọlọrun ati ibalẹ ọkan lẹkunrẹrẹ ni gbogbo ọsẹ na, ni orukọ Jesu. Amin.

Wayi o, ọkan lara awọn nkan ti o le jẹ ki iriri isinmi lati ọdọ Ọlọrun ati ibalẹ ọkan ma fi gbogbo igba pọ si fun wa ni ki ọpọlọpọ eniyan ninu aye yi di ẹni igbala ati ẹni isọdọtun nipasẹ igbagbọ ninu Kirisiti Jesu. Awọn ẹni ti a ba ti gbala, ti a si tun ti sọ aye wọn di ọtun nipasẹ Jesu Kirisiti Oluwa wa ki i da wahala silẹ ni awujọ. Wọn ki i jale, digunjale, fipabanilopọ, lu owo ara ilu ni ponpo, ṣẹ oṣo owo, lo ogun oloro tabi ni awọn aladugbo wọn lara. Nitorina, bi iru awọn wọnyi ba ṣe pọ si ni awujọ wa naa ni a o ṣe gbadun alaafia ati ibalẹ ọkan to. Idi gan si ni yi ti a fi gba wa ni iyanju ninu iwe mimọ lati ma ma gbadura fun ara wa nikan ṣugbọn fun gbogbo eniyan pẹlu, nitoripe Ọlọrun le ti ipasẹ adura wa dari wọn lati ni igbala. (Wo: 1Timoti 2:1-4)

Ṣugbọn adura gbigba pe ki Ọlọrun dari awọn eniyan lati ni igbala nikan ko to lati jẹ ki wọn ri igbala. A tun gbọdọ ma a ba wọn sọrọ nipa igbala naa ninu Kirisiti Jesu ti Ọlọrun n fi i lọ wọn lọfẹ. Ko si di igba ti a ba di ajinhinrere ki a to le ṣe eyi; a kan nilo lati ni iriri igbala yi funrawa ni. Ṣe a ti gba wa la kuro ninu ẹṣẹ wa? Ṣe a ti ni iriri itusilẹ kuro lọwọ agbara Ẹsu lotitọ? Ṣe aye wa n fi ojoojumọ gbadun ifẹ ati didara Ọlọrun ni ọna ti o kọja afẹnusọ? Ti gbogbo awọn nkan wọnyi ba jẹ otitọ niha tiwa, a jẹ wipe a ti ni anito nkan ti a nilo lati pe awọn ti o wa ni ayika wa lati wa kopa ninu iriri ti a n ni pẹlu Ọlọrun nipasẹ Kirisiti Jesu niyẹn.

Fun apẹẹrẹ, ni igba kan ri, Jesu Oluwa wa ba obinrin ara Samaria kan ni gbolohun fun iṣẹju bi melokan lẹba kanga omi kan ni ilu kan ti a n pe ni Sikari. Wayi o, obinrin yi ni lati jẹ oniwahala eniyan kan, ẹni ti ọpọ eniyan ko ni fẹ ba da nkankan pọ. Idi si ni pe, bi akọsilẹ iṣẹlẹ yi ti fi han wa, o ti ṣe igbeyawo ni igba marun ati wipe ọkunrin ti o wa pẹlu rẹ ni akoko yi gan ko ki i ṣe ọkọ rẹ rara – wọn kan jọ n ṣe ajumọgbepọ ni. Nitorina, ko fẹrẹ jọ wipe obinrin rere ni. Sibẹsibẹ, nigba ti Jesu ṣetan pẹlu nkan ti O n ba a sọ, ti O si fi ọna lati tan ohungbẹ rẹ fun ifẹ ati ibalẹ ọkan han an, ko fi akoko ṣofo rara lati lọ ko gbogbo awọn ti o ni anfaani lati ko lati inu ilu rẹ wa lati pade Jesu. (Wo: Johanu 4:4-45)

Njẹ ẹsẹ ọrọ Ọlọrun meloo ni obinrin yi mọ lati le ṣe nkan ti o ṣe yi? Perete! Ka tilẹ sọ otitọ, ko nilo lati mọ ẹsẹ ọrọ Ọlọrun pupọ lati le ko awọn eniyan wa pade Jesu. O kan nilo lati le fi itara sọ fun wọn iriri ohun tikararẹ pẹlu Jesu ni ati bi iriri yi ṣe fun ni odiwọn igbagbọ ti o nilo lati le ni igbe aye ọtun ati igbe aye ti o nitunmọ.

Ni ọna kanna, nkan ti a nilo lati le pe awọn eniyan lati wa sọdọ Jesu ko ki i ṣe imọ bibeli ti o ga. Dipo eyi, nkan ti a nilo ni itara ti o ga lati le ba wọn sọrọ lori awọn nkan daradara ti aye wa ti ni iriri rẹ nipasẹ ibadapọ wa pẹlu rẹ, ki awọn naa ba le e tọ ọ wa lati ni awọn iriri ti o tun dara ju awọn eyi ti a ti ni lọ. Bi wọn ba si ṣe n tọ ọ wa, ti aye wọn si n yipada, awujọ wa naa yoo bẹrẹ si ni ni iriri alaafia ati iṣinmi ti o ga ju tatẹyinwa lọ.

Nitorina, bi o ṣe n lọ ni ọse yi, pinnu lọkan rẹ pe eniyan pupọ si yoo tipasẹ rẹ gbọ ihinrere awọn nkan ti Jesu Oluwa ti ṣe fun ọ, ti O n ṣe fun ọ ati ti O si n ṣe pẹlu rẹ. Mo si gbadura pe ki Ọlọrun, nipasẹ Ẹmi rẹ, kun ọ pẹlu itara ti o ga lati ṣe eyi, ni orukọ Jesu. Amin.

Ki o ni oṣẹ atata.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to alaythiabiblechurch@gmail.com/alaythia4all@gmail.com  or call: 08037592851 (WhatsApp Number: 07085711280)

Sọ iriri rẹ pẹlu rẹ fun wọn | Paito J.O. Lawal Read More »

Ọna ti o n gba di ipese rẹ lọwọ | Paitọ J.O. Lawal

Leave a Comment

Ọjọ: Agẹmọ 04, 2021 | Atẹlera: Latori tabili Paitọ | Nọmba: Vol. 10, No. 9

Olufẹ: ki oore-ọfẹ ati alaafia jẹ tirẹ lailodiwọn lati ọdọ Ọlọrun Baba wa ati Jesu Kiristi Oluwa wa. Pẹlu ayọ ni mo ki ọ kaabọ sinu ọsẹ akọkọ ninu oṣu Agẹmọ 2021. Mo si gbadura pe ki a ṣọ ọ lati ma ṣe ṣe ohunkohun ninu oṣu naa ti yoo di ipese Ọlọrun lọwọ lati ṣan wọ inu aye at ile rẹ, ni orukọ Jesu. Amin.

Wayi o, ọkan lara awọn nkan ti o le di ṣisan ipese Ọlọrun sinu aye wa lọwọ tabi ti o le di wa lọwọ lati ri ipese rẹ gba ni ki a ni ahun, ahun si Ọlọrun ati ahun si awọn ti O fẹ ki a lawọ si. Fun apẹẹrẹ, nigba ti O n ba awọn eniyan rẹ sọrọ nipasẹ wolii Hagai, Ọlọrun sọ eyi:

“Ẹ kiyesi ọna yin. Ẹ gun ori oke nla lọ, ẹ si mu igi wa, ki ẹ si kọ ile naa; inu mi yoo si dun si i, a o si yin mi logo ni Oluwa wi. Ẹyin ti n reti ọpọ, ṣugbọn kiyesi i, diẹ ni ẹ ri: nigba ti ẹyin si mu un wa ile, mo si fẹ ẹ danu. Nitori kin ni? ni Oluwa awọn ọmọ ogun wi. Nitori ti ile mi ti o dahoro; ti olukuluku yin si n sare fun ile ara rẹ. Nitori naa ni a ṣe da iri ọrun duro lori yin, a si da eso ilẹ duro. Mo si ti pe ọda sori ilẹ, ati sori oke nla, ati sori ọka, ati sori waini titun, ati sori ororo, ati sori ohun ti ilẹ mu jade, ati sori eniyan, ati sori maluu, ati sori gbogbo iṣẹ ọwọ yin.” (Hagai 1:7-11)

Njẹ o ri bayi? Ọlọrun, ninu ẹṣẹ bibeli yi, sọ wipe Oun ni o wa nidi ijakulẹ ati oṣi ti awọn eniyan rẹ n ba finra. Eyi tunmọ si wipe Oun ni O n di wọn lọwọ lati jẹgbadun ibukun rẹ ninu aye wọn ati lori ọrọ aye wọn. Ki si ni idi? Bi O ṣe fihan, idi ni wipe wọn ko lawọ si i. Gbogbo wọn gbajumọ kikọ ile ti ara wọn ati mimojuto awọn okowo wọn. Ṣugbọn wọn ko ṣe eyi fun ile rẹ ti o wa ni aarin wọn. Wọn kan ṣa kọ lati fi akoko wọn tabi awọn nkan ni wọn jin lati kọ ile yi. Nitornia, wọn bẹrẹ si ni iriri aṣedanu. Bi Ọlọrun si ṣe tẹsiwaju lati sọ fun wọn, laijẹ pe wọn ba ronipiwada, ti wọn si bẹrẹ si ni fi akoko wọn ati awọn nkan ini wọn jin fun kikọ tẹmpili rẹ, nkan ko ni rọgbọ fun wọn rara.

Nibakanna, ti awa naa ba kọ iṣẹ ijọba Ọlọrun silẹ, ti a ko si fi akoko wa tabi nkan ini wa jin lati ṣe e, nṣe ni a o ma di ṣisan ibukun rẹ ninu aye wa lọwọ. Lotitọ, O ti bukun fun wa pẹlu gbogbo ibukun ẹmi inu awọn ọrun ninu Kirisiti Jesu (Efesu 1:3). Amọ sa o, a le di isẹ awọn ibukun yi lọwọ nipa anikanjọpọn ati iwa ahun. Nitorina, bi o tilẹ jẹ wipe a ti bukun fun wa ni aini odiwọn, a tun le ba iforo ailodiwọn naa pade ninu aye wa nitori iwa ahun wa.

Lafikun, nigba ti O n sọrọ nipasẹ Malaki, Ọlọrun fi ẹsun kan awọn eniyan rẹ pe wọn n ja Oun lole nipa ṣiṣe alailotọ ni mimu idamẹwa ati ọrẹ wọn wa lati tọju awọn alufa rẹ, awọn alaini ni ilẹ naa ati awọn ajoji aarin wọn. Eyi tunmọ si pe ni igbakugba ti a ba tọju fun ara wa nkan ti Ọlọrun fẹ ki a fun awọn elomiran, a n ja lole niyẹn. Bawo wa ni a ṣe fẹ ja Ọlọrun lole, ki a si tun ma reti ki ibukun rẹ ṣan lalai ni idiwọ ninu aye wa? Ko le ṣeeṣe. (Wo: Malaki 3:8-12)

Siwaju si, Ọlọrun sọ wipe nigba ti awọn eniyan yi gan ba tun wa mu ọrẹ wa fun, ọrẹ ti o fọ loju, ti o yarọ tabi ti o n ṣaisan ni wọn ma n mu tọ ọ wa. Iwọ naa ro wo. Awọn eniyan yi ko lojuti to bẹẹ gẹẹ ti wọn fi n mu wa fun Ọlọrun awọn nkan ti wọn ko le fun awọn ọga wọn nibi iṣẹ, awọn gomina wọn tabi awọn ana wọn. Eyi si bi Ọlọrun ninu to bẹẹ gẹẹ ti O fi sọ fun wọn pe ki wọn kuku gbe ilẹkun tẹmpili wọn ti, ki wọn si ye mu ẹbọ ati ọrẹ ti ko nitunmọ wa fun un mọ. Ti O ba wa ri awọn nkan ti wọn n mu wa fun un bi nkan ti ko wulo, njẹ yoo ha pin wọn ni ere fun un bi? Rara! (Wo: Malaki 1:6-14)

Ni ọna kanna, ti awa naa ba n ja Ọlọrun lole nipa ṣiṣe ahun si awọn ti O ti pa aṣẹ fun wa lati lawọ si, nṣe ni a o ma ti ferese ipese rẹ mọ ara wa, bi awọn eniyan igba aye Malaki ti ṣe ṣe. Ti a ba si wa n mu awọn afọju, abirun ati alaisan ọrẹ (awọn nkan ti o kere si wa jọjọ ati ti o kere si oore-ọfẹ rẹ lori aye wa) wa fun iṣẹ rẹ tabi fun awọn ti O fẹ ki a fun ni nkan, a ko ni ri ere kankan gba lọwọ rẹ fun fifi funni wa, boya laye yi tabi ninu ijọba ayeraye rẹ. Bawo ni yo sẹ wa banininujẹ to, ti mo ba wa rigbọ lọjọ kan pe gbogbo fifi funni mi ni mo ṣe lasan? Yio dunni jọjọ.

Ẹwẹ, ẹnikan wa le sọ pe, “Ṣebi bibeli sọ wipe fifi funni wa gbọdọ jẹ niwọn nkan ti a ba ni dipo eyi ti a ko ni. Nkan ti mo si n ṣe n eyi. Ki wa lo tun fa a ti Ọlọrun tabi ẹnikan yoo tun ṣe wa ma a sọ wipe mi o ṣe to?” Ootọ ọrọ ni! Amọ ki ẹni naa tun jẹ ki o ye oun pe Ọlọrun mọ ohun gbogbo ti a ni. Nitorina, O mọ igba ti nkan ti a n fi funni lati ara nkan ini wa kere jọjọ si oore-ọfẹ rẹ to wa lori aye wa. Nigbakugba ti eyi ba si ri bẹ, nṣe ni a n yan an jẹ, ti a ko si ni ri nkankan gba lọwọ rẹ fun fifi funni wa. Nitori eyi, fi ara rẹ balẹ lati mojuto ifarajin rẹ si lilawọ nitori pe Ọlọrun naa n fi ara balẹ mojuto. Mo si gbadura pe ki O ma fi gbogbo ri ọ gẹgẹ bi olotitọ ninu awọn nkan wọnyi, ni orukọ Jesu. Amin.

Ki o ni ọsẹ arinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ọna ti o n gba di ipese rẹ lọwọ | Paitọ J.O. Lawal Read More »

Ewu onibeji | Paito J.O. Lawal

Leave a Comment

Ọjọ: Okudu 20, 2021 | Nọmba: Vol. 10, No. 7

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọṣẹ miran ninu oṣu Okudu 2021. Mo gbadura pe ki a mu ọkan rẹ ro lati ma fi gbogbo igba fi aye gba ọrọ yowu ti Ọlọrun yoo ma mu tọ ọ wa ni gbogbo iyoku ọjọ aye rẹ ati lati ṣe rere pẹlu rẹ, ni orukọ Jesu. Amin.

Mo gba adura yi fun ọ nitori pe ọrọ Ọlọrun fi ye wa daju ṣaka pe ko ki i ṣe gbogbo awọn ti o n ka tabi gbọ ọrọ Ọlọrun naa ni o ma n jere rẹ nikẹyinkẹyin. Ki si ni idi? Idi ni pe ki a to le jere ọrọ Ọlọrun, a ko kan gbọdọ ka a tabi gbọ ọ lasan; a tun gbọdọ ṣe amulo rẹ. Kiki ẹni ti o ba si n ṣe amulo ọrọ rẹ ti o ka tabi gbọ ni yoo ni iriri ẹkunrẹrẹ ibukun nkan ti O n sọ. Ẹni ti o ba kan gbọ ọrọ rẹ tabi ka a lasan, ṣugbọn ti ko ṣe amulo rẹ kan n tan ara rẹ jẹ ni – ko ni ri ilapa nkan ti o yẹ ki ọrọ naa ṣe ninu aye rẹ. (Wo: Matiu 7:24-27; Jemisi 1:12-25; Ifihan 1:3)

Nitorina, afojusun wa ti a ba n ka tabi gbọ ọrọ Ọlọrun gbọdọ duro lori ṣiṣe amulo rẹ. Aijẹbẹ, yatọ si pe ọrọ naa ko ni mu ifẹ rẹ ṣe ninu aye wa, yoo tun wa duro tako wa gẹgẹ bi ẹlẹrii nigba ti Ọlọrun ba bẹrẹ idajọ rẹ (Johanu 12:48). Fun apẹẹrẹ, igba kan wa ti awọn adari awọn Juu perete ti o ku ni ilẹ Juda tọ Jeremaya wa lati sọ fun pe ki o ba wọn wa oju Ọlọrun, ki wọn ba le mọ ibi ti o yẹ ki wọn lọ tabi duro si. Wọn tilẹ tun sọ siwaju fun pe, “Ki Oluwa ki o ṣe ẹlẹrii otitọ ati ododo laarin wa, bi awa ko ba ṣe gẹgẹ bi gbogbo ọrọ ti Oluwa Ọlọrun rẹ yoo ran ọ si wa. Ibaa ṣe rere, ibaa ṣe ibi, awa o gba ohun Oluwa Ọlọrun wa gbọ, sọdọ ẹni ti awa ran ọ: ki o le dara fun wa, bi awa ba gba ohun Oluwa Ọlọrun gba gbọ.” (Jeremaya 42:5-6)

Njẹ o ṣe akiyesi pe awọn eniyan wọnyi sọ pe awọn o ṣe amulo ọrọ Ọlọrun, boya o ba wọn lara mu tabi ko ba wọn lara mu? Ṣibẹṣibẹ, nigba ti Jeremaya pada de pẹlu ọrọ Ọlọrun fun wọn, esi wọn si ni pe, “Iwọ ṣe eke! Oluwa, Ọlọrun wa ko ran ọ lati wi pe, Ẹ ma lọ si ijibiti lati ṣatipo nibẹ: Ṣugbọn Baruku, ọmọ Neraya ni o fi ọrọ si ọ ni ẹnu si wa, nitori lati fi wa le awọn ara Kalidia lọwọ, lati pa wa ati lati ko wa ni igbekun lọ si Babeli.” (Jeremaya 43:2-3) Nitorina, wọn kọ ọrọ Oluwa silẹ, wọn si ṣe gẹgẹ bi ọgbọn ati ifẹ inu wọn.

Ki wa ni idi ti awọn eniyan yi ṣe sọ fun Jeremaya ki o ba wọn wadi ero Ọlọrun fun wọn, nigba ti wọn ko ṣetan lati gba ohun yowu ti ifẹ rẹ fun wọn ba jẹ? Idi ni pe wọn ko mọ pe kiba san fun wọn lati ma mọ ifẹ Ọlọrun rara ju kan mọ ifẹ rẹ tan, ki wọn si wa kọ jalẹ lati ṣe lọ. Ko si nkan miran ti eyi yo yọri si fun wọn ju iya onibeji lọ. Wọn ko kan ni jẹ iya fun aiṣe ifẹ Ọlọrun lasan; wọn o tun jẹ iya lori pe wọn mọ ifẹ rẹ, wọn si tun wa mọ-ọn-mọ kọ ọ silẹ.

Nitorina, Jeremaya sọ eyi fun wọn: “Oluwa ti sọ ni ti yin ẹyin iyoku Juda, ẹ ma lọ si Ijibiti: ẹ mọ dajudaju pe emi ti jẹrii sii yin ni oni yii. Nitori ọkan yin ni ẹyin tan jẹ, nigba ti ẹyin ran mi si Oluwa Ọlọrun yin, wi pe, Gbadura fun wa si Oluwa, Ọlọrun wa: ati gẹgẹ bi gbogbo eyi ti Oluwa Ọlọrun wa yoo wi, bẹẹ ni ki o sọ fun wa, awa o si ṣe e. Emi si ti sọ fun yin loniii, ṣugbọn ẹyin ko gbọ ohun Oluwa, Ọlọrun yin, ati gbogbo eyi ti oun ti ran mi sii yin. Njẹ nitori naa, ẹ mọ dajudaju pe, ẹyin yoo ku nipa ida, nipa iyan, ati nipa ajakalẹ arun, ni ibẹ naa nibi ti ẹyin fẹ lati lọ ṣe atipo.” (Jeremaya 42:19-22) Njẹ o ri bayi? Aṣiṣe gba a ni, itanraẹnijẹ si ni pẹlu lati ṣafẹri ifẹ Ọlọrun tan, ki a tun wa kọ jalẹ lati ṣe nkan ti O n sọ fun wa. Ewu onibeji ni eleyi yoo mu wa sori wa.

O wa ṣe ni laanu pe ọpọ wa ko ni oye pe nkan ti a n fa sori ara wa ni eyi, nigba ti a ba wa si awọn ipade wa tabi ti a wa ri awọn adari wa, ti a gbọ ọrọ Ọlọrun lori bi o ṣe yẹ ki a gbe aye wa, ti a si tun wa kuro lati lọ ṣe idajeki nkan ti a gbọ. Ki wa ni larija pe a n wa gbọ ọrọ Ọlọrun, nigba ti o jẹ pe nṣe ni yoo tun ko wa sinu iyọnu ti o pọ si? Ṣe ko ni san fun wa lati kuku yago fun ọrọ rẹ patapata ju ki a gbọ tan, ki a tun wa ma sọ fun ara wa pe, “Nkan ti o ba wu oniwaasu ni o le fi ẹnu rẹ sọ. Nkan ti emi o n ṣe n bẹ ninu mi?” Ko si ọmọ ti eleyi yoo bi fun wa bi ko ṣe ijiya ati inira ti o ga si, bi o ṣe ṣeeṣe ki o ti ma ṣẹlẹ ninu aye rẹ lọwọlọwọ bayi. Nkan ti mo n sọ na ni pe irufẹ iha yi si ọrọ Ọlọrun yoo kan jẹ ki iya rẹ pọ ju ti awọn ti ko tilẹ mọ ifẹ Ọlọrun rara lọ ni.

Nitorina, ma fi ara rẹ sinu iyọnu si mọ nipa kikọ lati ṣe amulo otitọ ọrọ Ọlọrun ti o mọ. Mo si gbadura pe ki a dari rẹ sinu ironupiwada ati imupadabọsipo ni ibi yowu ninu aye rẹ ti o ba ti n jiya nitori eyi, ni orukọ Jesu. Amin.

Ki o ni ọṣẹ ti o ga.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Ewu onibeji | Paito J.O. Lawal Read More »

Akori : WOLII

Leave a Comment

ỌJỌRU 16, OKUDU 2021

AYỌKA: 2PETERU 1:20-22

AKỌSORI: AKỌSORI: “Nitori Oluwa Ọlọrun ki o ṣe nnkan kan ṣugbọn o fi ohun ikọkọ rẹ han awọn wolii iranṣẹ rẹ.” (Emọọsi 3:7)

ỌRỌ AKỌSỌ
Gẹgẹ bi a ṣe ri ninu bibeli, Ọlọrun ti ṣeto awọn kan fun wa ninu ijọ gẹgẹ bi adari, lati pese wa fun iṣẹ iranṣẹ ati lati jẹ ki a dagba soke lati dabi Jesu Kirisiti ni gbogbo ọna (Efesu 4:11-16). Lara awọn ti O ṣi seto fun eyi ni awọn ti a n pe ni wolii. Awọn wo gan wa ni a lẹtọ lati ma pe ni wolii Ọlọrun ninu ijọ loni? Ṣe gbogbo awọn ti a n pe ni wolii loni abi awọn ti o n pe ara wọn ni wolii loni naa ni wolii Ọlọrun? Ti ko ba ki i ṣe gbogbo wọn ni wolii rẹ, bawo ni a ṣe le da awọn wolii tootọ mọ? Ki ni ojuṣe wọn? Njẹ wọn tilẹ ni awọn nkan ti a le pe ni aal bi? Iha wo ni o yẹ ki a kọ si ọrọ tabi isọtẹlẹ wolii? Awọn nkan wọnyi ni a fẹ gbe yẹwo ninu ẹkọ bibeli yi. Mo si gbadura pe ki Ọlọrun, nipaṣẹ Ẹmi mimọ rẹ, fi imọ ati oye ti o peye fun wa lori ẹkọ yi, ki a ba le mọ riri awọn wolii otitọ ti O yan si aarin wa, ki a si tun ba le yẹra fun awọn eke wolii ti Eṣu le fẹ lo lọna kan tabi omiran lati ṣi wa lọna.

TANI WOLII?
Loju ọpọ eniyan, wolii jẹ ẹnikan ti o ma n ri iran si awọn eniyan ati ti o ma n sọ asọtẹlẹ. Ṣugbọn jijẹ wolii kọja riri iran tabi sisọ tẹlẹ si awọn eniyan. Bi a ṣe ri ninu bibeli, wolii jẹ ẹnikan ti Ọlọrun ya sọtọ lati fi ara rẹ, ifẹ rẹ ati ete rẹ han, ti O si tun n fi ọrọ rẹ si lẹnu loore-koore fun ẹkọ, ikilọ, igbaniniyanju, imuniduro, itunininu ati idajọ awọn eniyan. Iṣẹ iranṣẹ wolii wa le jẹ si awọn eniyan ijọ kan, agbegbe kan, ilu kan, orilẹ-ede kan tabi si oniruuru eniyan tabi orilẹ-ede. Ṣugbọn gbogbo rẹ ni i ṣe pẹlu ifẹ Ọlọrun ti O yan an, ti O si gbe iṣẹ le lọwọ. (Wo: Numeri 24:2-4&15-16; Jeremaya 1:4-11; Esikiẹli 2:1-3:4; 1Korinnti 14:3)

Eyi wa tunmọ si pe eniyan ko le di wolii nitori pe a kan da ororo le lori bi ami tabi nitori pe oun tẹle wolii kan tabi omiran kaakiri tabi nitori pe o jẹ ọmọ wolii. Ọlọrun funrarẹ gbọdọ yan fun iṣẹ iranṣẹ yi ni. Aijẹbẹ, a ba da garawa ororo le wa lori tabi ki a ma jẹun, ki a si tun ma sun pẹlu wolii, a ko le da wolii Ọlọrun. Fun apẹẹrẹ, Eliṣa ni Ọlọrun sọ fun Wolii Elija lati yan gẹgẹ bi wolii fun awọn eniyan rẹ. O si ṣe awari rẹ nitootọ lati pe si iṣẹ yi. Ṣugbọn ni ọjọ ti a fẹ gba Elija soke ọrun, o jẹ ki o ye ọkunrin yi pe ti Ọlọrun ko ba ro ni agbara lati ṣiṣẹ wolii ati lati wa ni aye olori awọn wolii yoku, ko si nkan ti oun le ṣe si. Ka wa sọ pe Ọlọrun ko ti yan Eliṣa lati ibẹrẹpẹpẹ ni, gbogbo bi o ṣe n tẹle Elija kaakiri ko ba kan ja si pabo ni. (Wo: 1Awọn Ọba 19:16; 2Awọn Ọba 2:1-16)

BAWO NI ỌLỌRUN NṢE FI ARA RẸ ATI IFẸ RẸ HAN WOLII?
Wayi o, ọna wo wa ni Ọlọrun n gba fi ara rẹ ati ifẹ rẹ han wolii? Gẹgẹ bi a ṣe ri ninu bibeli, Ọlọrun le fi ara rẹ ati ifẹ rẹ han wolii nipa bi ba a sọrọ ni ẹnu ko ẹnu (ojukoroju), ni inu iran tabi ni oju ala. Fun apẹẹrẹ, a sọ eyi fun wa ninu iwe Numeri, ori ikejila, lati ẹsẹ ikarun: “Oluwa si sọ kalẹ wa ninu ọwọn ikuukuu, o si duro ni ẹnu ọna agọ naa, o si pe Aarọni ati Miriamu: awọn mejeeji si jade wa. O si wi pe, Ẹ gbọ ọrọ mi nisinsinyi: bi wolii Oluwa ba n bẹ ninu yin, emi Oluwa yoo farahan fun un ni ojuran, emi o si ba a sọrọ ni oju ala. Mose iranṣẹ mi ko ri bẹẹ, oloootọ ni ninu gbogbo ile mi. Oun ni Emi n ba sọrọ ni ẹnu ko ẹnu ati ni gbangba, kii si i ṣe ni ọrọ ti o ṣe okunkun; apẹẹrẹ Oluwa ni oun o si ri…” (Numeri 12:5-8). Eyi fi han wa pe ko ki i ṣe ọna kan ṣoṣo ni Ọlọrun ma n gba fi ara rẹ ati ifẹ rẹ han awọn wolii rẹ. Orisirisi ọna ni. Oun nikan naa si ni O le sọ iru ọna ti yoo gba tabi ti yoo ma gba ju lati ba ẹnikẹni ti O ba yan gẹgẹ bi wolii rẹ sọrọ.

Njẹ eyi wa jasi pe gbogbo ẹni ti o ba ti n riran, lala tabi gbohun naa ni wolii tabi naa ni ẹni ti Ọlọrun n ba sọrọ? Rara o. Bi a ṣe ri ninu bibeli, ko ki i ṣe gbogbo awọn ti wọn n riran, lala tabi gbohun na ni wolii Ọlọrun. Peteru tilẹ sọ eyi fun wa: “Ṣugbọn awọn wolii eke wa laarin awọn eniyan naa pẹlu…” (2Peteru 2:1) Ti awọn wolii eke ba wa ni aye igbaani, o yẹ ki a le mọ pe wọn si tun wa sibẹ naa loni. Amọ, a kan nilo lati mọ pe ẹni ti o ba jẹ wolii tootọ yoo ma ri iran, la ala ati gbọ ohun Oluwa loorekoore, ni ibamu pẹlu ifẹ ati ete Ọlọrun.

IYATỌ LAARIN WOLII OTITỌ ATI WOLII EKE
Bawo wa ni a ṣe le mọ boya eke wolii ni eniyan tabi wolii Ọlọrun nitootọ ni? Lakọkọ, ti ọrọ ẹni ti o pe ara rẹ ni wolii ko ba wa si imuṣẹ, o ṣeeṣe ki o jẹ eke wolii. Bibeli sọ pe, “Nigba ti wolii kan ba sọrọ ni ọrukọ Oluwa, bi ohun naa ko ba ri bẹẹ, ti ko ba si ṣẹ, eyi naa ni ohun ti Oluwa ko sọ: wolii naa ni o fi sọrọ; ki iwọ ki o ma ṣe bẹru rẹ.” (Ditaronomi 18:22) Nitorina, ẹni ti o ba jẹ wolii Ọlọrun nitootọ, ọrọ ti o ba sọ ni orukọ Oluwa yoo ri bi o ṣe wi tabi ki o wa si imuṣẹ. Njẹ eyi tun wa jasi pe gbogbo wolii ti ọrọ rẹ ko ba ti wa si imuṣẹ ni eke? Rara! Fun apẹẹrẹ, wolii Oluwa tootọ ni Jona jẹ. Sibẹsibẹ, asọtẹlẹ rẹ si awọn ara Ninefe ko wa si imuṣẹ. Ki lo si fa? Ironupiwada awọn ara Ninefe ni o fa. Eyi tunmọ si pe iha ti a ba kọ si ọrọ Ọlọrun ti wolii ba sọ fun wa naa ni ipa ti o ga lati ko lori boya ọrọ naa yo wa si imusẹ tabi ko ni wa si imuṣẹ (Jeremaya 18:5-10). Amọ ṣa o, ti ohun gbogbo ba ri bi o ṣẹ yẹ ki wọn ri, ohunkohun ti wolii otitọ ba sọ ni orukọ Oluwa di dandan ki o wa si imuṣẹ.

Ekeji, a le mọ eke wolii nipa bi ọrọ rẹ ba ṣe ba ifẹ Ọlọrun ti a ti kọ sinu iwe mimọ mu si. Iwọ na wo nkan ti Ọlọrun sọ fun awọn eniyan rẹ: “Bi wolii kan ba dide laarin yin tabi alalaa kan, ti o si fi ami tabi iṣẹ iyanu kan han ọ, Ti ami naa tabi iṣẹ iyanu naa ti o sọ ba ṣẹ, wi pe, Ẹ jẹ ki a tele ọlọrun miiran lẹyin, ti iwọ ko mọ ri ki a si maa sin wọn; Iwọ ko gbọdọ feti si ọrọ wolii naa, tabi alalaa naa: nitori pe Oluwa Ọlọrun yin n dan yn wo ni, lati mọ bi ẹyin ba fi gbogbo aya yin, ati gbogbo ọkan yin fẹ Oluwa Ọlọrun yin.” (Ditaronomi 13:1-3) Nitorina, ẹnikẹni ti o ba pe ara rẹ ni wolii, ti ọrọ rẹ si lodi si nkan ti a kọ wa ninu bibeli, a ko gbọdọ feti si. O ṣeeṣe ki o jẹ pe eke wolii ni. Ti ko ba si ki i ṣe eke, a jẹ wipe o ti n fi aye gba Eṣu lati ya lo niyẹn, o si nilo adura ati ironupiwada. O wa ṣeni laanu pe ọpọ ọmọ Ọlọrun, ti o yẹ ki otitọ yi ye, ni o n tẹle awọn eke wolii ti wọn n kọ wọn lati wuwa lodi si ifẹ Ọlọrun. Irufẹ awọn wọnyi yoo si da ara wọn lẹbi nikẹyin ni.

Ekẹta, a le mọ eke wolii nipa bi iwa rẹ ba ṣe wa ni ibamu pẹlu ifẹ Ọlọrun si. Jesu sọ wipe: “Ẹ maa kiyesi awọn eke wolii ti o n tọ yin wa ni awọ agutan, ṣugbọn apanijẹ ikooko ni wọn ninu. Eso wọn ni ẹyin o fi mọ wọn…” (Matiu 7:15) Ọna wo ni Jesu sọ pe a o fi mọ awọn eke wolii o? Nipa eso ti aye wọn n so. Iru eso wo wa ni O n sọrọ nipa? O n sọrọ nipa eso Ẹmi mimọ, eso ododo, bi ifẹ, ayọ, igbagbọ, itẹriba, suuru, ikora-ẹni-nijaanu ati bẹẹbẹẹ lọ (Galatia 5:22-23). Ẹnikẹni ti o ba wa pe ara rẹ ni wolii, ti awọn nkan wọnyi ko si jẹyọ ninu aye rẹ ni ọna ti o ṣe fojuri, eke ni. O le ma yọ ina lẹnu, ki asọtẹlẹ rẹ si ma wa si imuṣẹ. Amọ eke ni. O tilẹ ṣeeṣe ki o jẹ pe nṣe ni o n dọgbọn si ọrọ ara rẹ ki asọtẹlẹ rẹ ba le ma wa si imuṣẹ. Idi ni pe asọtẹlẹ, iṣẹ iwosan, iṣẹ imularada ati awọn iṣẹ ami miran ṣe e dọgbọn si. Awọn eniyan le lo ẹmi oṣo tabi ti ajẹ lati ṣẹ awọn nkan wọnyi. Ṣugbọn eso Ẹmi Ọlọrun ko ṣe e dọgbọn si. Ti o ko ba ti ni Ẹmi rẹ ninu rẹ, o le so eso Ẹmi rẹ. Ko ju bayẹn lọ.

OJUṢE WOLII
Pẹlu awọn nkan ti a ti wa sọ silẹ yi, ki wa ni ojuṣe ẹnikẹni ti a ba pe ni wolii? Ti a ko ba i ti gbagbe, a ti sọ siwaju pe ti a ba n sọrọ nipa wolii, a n sọrọ nipa ẹnikan ti o n ri ifihan Ọlọrun ati ifẹ rẹ gba, ki o ba le rin ninu rẹ, ki o si ba le tọ awọn ẹlomiran lati ṣe bẹẹ gẹgẹ. Eyi wa jasi pe akọkọ ninu ojuṣe wolii ni lati mọ Ọlọrun ati ifẹ rẹ. Ẹni ti ko ba ma mọ Ọlọrun ko le ṣe iṣẹ wolii. Ka ti lẹ sọ ododo, Ọlọrun ko le gbe iṣẹ wolii fun ẹni ti ko ba mọ ọn tabi ṣetan lati mọ ọn. Eyi ko wa jasi pe ko le gba ẹnu ẹni ti ko mọ ọn sọrọ rara. Ti O ba le gba ẹnu kẹtẹkẹtẹ Balaamu sọrọ, O le gba ẹnu ẹnikẹni, bi o tilẹ jẹ apaniyan, sọrọ tabi sọtẹlẹ (Numeri 22:21-31; Johanu 12:47-51).

Ṣugbọn ẹni yowu ti yo ba jẹ wolii ti Ọlọrun yo maa ti ẹnu rẹ sọrọ yoo jẹ ẹni ti o mọ ọn, ti o si tun mọ ifẹ rẹ. Bẹẹni, ibaṣepọ irufẹ ẹni bẹ pẹlu ti Ọlọrun gbọdọ munadoko. Eti rẹ gbodọ fi gbogbo igba wa ni yiya silẹ lati gbọ ọrọ Ọlọrun. Ọkan rẹ si gbọdọ fi gbogbo igba ma lepa lati ka ọrọ rẹ ati lati ṣe aṣaro ninu rẹ. Aijẹbẹ, wolii tara rẹ ni yoo jẹ; iṣẹ tara rẹ ni yoo si ma a jẹ pẹlu. Ailoye eyi ni o fa ti a fi ni ọpọ ti wọn pe ara wọn ni wolii loni ti Ọlọrun ko ye. Awọn wọnyi rope ki a kan riran, lala tabi gbohun ni o ma n sọ eniyan di wolii. Wọn ko mọ pe a gbọdọ ji pepe ninu imọ ọrọ Ọlọrun ki a ba le ma ṣe iyatọ ti o peye laarin ọrọ ti o ti ọdọ Ọlọrun wa ati eyi ti o ti ọdọ Eṣu wa. (Wo: Aisaya 50:4-5; Jeremaya 23:16-22)

Ojuse wolii keji ni lati gbe igbe aye rẹ ni ibamu pẹlu imọ Ọlọrun ati imọ ifẹ rẹ ti a ti fi han an, paapaa julọ lati inu iwe mimọ. Ẹnikẹni ti o ba wa pe ara rẹ ni wolii, ti igbesi aye rẹ si lodi si ọrọ inu iwe mimọ, n fi ara rẹ si abẹ idajọ Ọlọrun, yatọ si pe o wa ni abẹ ewu ayalo Eṣu. Irufẹ awọn wọnyi si ni Jesu n ba wi, nigba ti O sọ pe, “Ki i ṣe gbogbo ẹni ti n pe mi ni Oluwa, Oluwa, ni yoo wọle ijọba ọrun; bi ko ṣe ẹni ti n ṣe ifẹ ti Baba mi ti n bẹ ni ọrun. Ọpọlọpọ eniyan ni yoo wi fun mi ni ọjọ naa pe, Oluwa, Oluwa, awa ko ha sọtẹlẹ ni orukọ rẹ? Ati ni orukọ rẹ ki a fi le awọn ẹmi eṣu jade? Ati ni orukọ rẹ ki a fi ṣe ọpọ iṣẹ iyanu nla? Nigba naa ni emi o si wi fun wọn pe, Emi ko mọ yin ri, ẹ kuro lọdọ mi, ẹyin oniṣẹ ẹṣẹ.” (Matiu 7:21-23) Njẹ o ri bayi? Pe eniyan n sọtẹlẹ lorukọ Jesu ko jasi wipe ko ni pari irin ajo rẹ sinu ina ọrun apadi. Niwọn igba ti ko ba ti ma ṣe ifẹ Ọlọrun ninu ọrọ, iwa ati iṣe rẹ, eke ni Ọlọrun yoo ka si. Ọpọ si ni irufẹ awọn wọnyi ma n ṣi lọna nipaṣe awọn iwa irira wọn.

Ojuse wolii kẹta ni lati sọ ọrọ Ọlọrun ni ẹkunrẹrẹ fun awọn eniyan rẹ, lalai fi kun tabi yọ kuro nibẹ. Eyi jasi pe wolii Ọlọrun ko gbọdọ jẹ opurọ tabi ẹni ti ẹru lati sọ otitọ ma n ba. Idi si ni pe iha ti awọn eniyan yoo kọ si ọrọ rẹ duro lori imura, itara ati iduro ṣinṣin rẹ lati ba awọn eniyan sọ ọrọ Ọlọrun gẹgẹ bi Ọlọrun ti sọ. Boya awọn to n ba sọrọ wa gbọ tabi wọn ko gbọ o ko ki i ṣe iṣoro tirẹ. Eyi ti Ọlọrun n fẹ lati ọdọ rẹ ni lati sọ ọrọ rẹ lotitọ ati lẹkunrẹrẹ fun awọn yowu ti O ba ran an si. (Wo: Jeremaya 1:4-8; Isikiẹli 2:1-8 & 33:1-9) Ti Ọlọrun ko ba si ba sọrọ, ko yẹ ki o la ẹnu rẹ lati sọ nkankan.

Ṣe o wa ṣeeṣe ki Ọlọrun ma ni nkankan ti O fẹ ti ẹnu wolii ba eniyan sọ? O ṣeeṣe. A ri ninu iwe mimọ pe akoko kan wa ti Ọba Sọọlu n fẹ ki Ọlọrun ba oun sọrọ nipa ala, nipa Urimu tabi nipa awọn wolii. Ṣugbọn Ọlọrun ko da lohun. Ki lo fa? Idi ni pe ẹnikan ti ko naani ọrọ Ọlọrun ati alaigbọran ni. Aijẹbẹ, iba ti ma tẹlẹ ọrọ inu iwe mimọ, yala Ọlọrun ba sọrọ nipa iran, ala tabi wolii tabi ko ba sọrọ. Nitorina, awọn igba ma n wa ti Ọlọrun le pinnu lati ma ba eniyan sọrọ nipasẹ wolii, niwọn igba ti ẹni na ko ba ti ṣetan lati tẹle ọrọ iwe mimọ tabi ti ẹni naa jẹ olorikunkun. Igba miran ẹwẹ, o le ma jẹ ni kiakia ni Ọlọrun yo ba wolii rẹ sọrọ lori ọrọ ti awọn eniyan mu tọ ọ wa. Ti eyi ba si ribẹ, ẹni ti o ba jẹ wolii otitọ yoo ni suuru titi Ọlọrun yoo fi fi ifẹ rẹ lori ọrọ ti o wa nilẹ han an ni dipo ti yoo fi kan wa ikankan sọ. (Wo: 1Samuẹli 28:3-6; Isikiẹli 3:26-27; Jeremaya 42&43)

Amọ, nitori ailoye ọrọ Ọlọrun, ọpọ wolii loni lo ro wipe gbogbo igba ti awọn eniyan ba tọ wọn wa naa ni wọn gbọdọ ri nkan sọ tabi ri nkan sọ lẹsẹkẹsẹ. Eyi si lo fa ti Eṣu fi n ri wọn yaalo. O le jẹ nitori owo ti wọn fẹ gba lọwọ awọn ti o wa ni tabi nitori pe wọn ko fẹ ki wọn ma foju ẹni ti Ọlọrun ko ba sọrọ wo wọn. Eyi ti o wu ko jẹ, ijiya gidi n bẹ fun ẹnikẹni ti Ọlọrun ko ran niṣẹ bi wolii ti o si n jẹ iṣẹ tabi ẹni ti o n yi ọrọ Ọlọrun po. Bi Balaamu ṣe ni ojukokoro to gẹgẹ bi ariran, gbogbo igba ni o n jẹ ko ye awọn eniyan pe oun ko le sọ nkan ti Ọlọrun ko ba fi si oun lẹnu lati sọ. Sibẹsibẹ, Ọlọrun da ṣeria fun nitori ojukokoro rẹ. Ti iwọ naa, bi wolii, ba fi aye gba ojukokoro, ibẹru tabi ifẹ oriyin awọn eniyan lati ma a sọ ọrọ Ọlọrun bi ko ṣe tọ tabi lati jẹ iṣẹ ti ko ran ọ, o di dandan ki iwọ na jẹ iyan rẹ niṣu. (Wo: Book 23:11-12&25-26; Jeremaya 23:9-32)

AALA IṢẸ WOLII
Njẹ ṣe wolii tabi iṣẹ wolii ni aala bi? Bẹẹni. Bi wolii tilẹ jẹ ẹni ti Ọlọrun yan lati fi ara rẹ ati ifẹ rẹ han, ki o ba le tọ awọn eniyan sọna, kilọ fun wọn tabi fun wọn ni idajọ Ọlọrun, eyi ko tunmọ si pe gbogbo nkan naa ni o mọ tabi ti o le mọ nipa awọn ti Ọlọrun ran an si. Pọọlu sọ eyi fun wa: “Nitori imọ wa ko to nnkan, isọtẹlẹ wa ko si to nnkan pẹlu.” (1Kọrinnti 13:9) Eyi tunmọ si pe ọwọ nkan ti Ọlọrun ba fi han wolii rẹ nikan naa ni yoo mọ, ti yo si le sọrọ tabi ṣiṣẹ le lori. Eyi ti Ọlọrun ko ba fihan an, ko si nkan ti o le ṣe le lori. Idi si niyi ti a fi gbọdọ ma fi gbogbo igba lepa lati mọ gbogbo ifẹ Ọlọrun lati inu iwe mimọ. Aijẹbẹ, a le wa labẹ ewu ṣiṣe amulo ọrọ wolii ti o kan n fi abala diẹ lara ifẹ Ọlọrun fun wa han.

Fun apẹẹrẹ, Ọlọrun lo wolii Eliṣa lati sọ asọtẹlẹ fun arabinrin kan pe yoo bimọ, o si bimọ gẹgẹ bi asọtẹlẹ na. Amọ Ọlọrun ko wa fi han wolii yi pe ọmọ naa yoo ku nigba ti o ba dagba diẹ, ti o yẹ ki awọn obi rẹ bẹrẹ si ni gbadun rẹ. Nitorina, nigba ti ọmọ naa ku, wolii Eliṣa sọ wipe, “…Ọlọrun si pa a mọ fun mi, ko si sọ fun mi.” (2Awọn Ọba 4:27) Eyi n jẹ ki o ye wa pe gbogbo nkan naa kọ ni wolii ma n ri. Nitorina, a ko gbọdọ pa ọrọ iwe mimọ ti lati kan ma wa asọtẹlẹ wolii kaakiri. Aijẹbẹ, a le tipasẹ asọtẹlẹ wolii ṣina tabi kọsẹ.

IHA TI O YẸ KI A KỌ SI WOLII
Iha wo wa ni o yẹ ki a kọ si wolii ati iṣẹ iranṣẹ wọn? Akọkọ, a gbọdọ gba wọn gbọ, niwọn igba ti a ba ti mọ daju pe wolii otitọ niwọn ati wipe ọrọ wọn wa ni ibamu pẹlu ọrọ iwe mimọ. Ọba Jehoṣafati sọ eyi fun awọn eniyan rẹ ni akoko kan: “…Ẹ gba Oluwa Ọlọrun yin gbọ, bẹẹ ni a o fi ẹsẹ yin mulẹ; ẹ si gba awọn wolii rẹ gbọ, bẹẹ si ni ẹyin o ṣe rere.” (2Kironika 20:20) Yatọ si eyi, Jesu Oluwa wa naa sọ wipe, “Ẹni ti o ba gba wolii ni orukọ wolii, yoo jẹ ere wolii…” (Matiu 10:41) Nitorina, ti a ba fẹ ti ipasẹ wolii yowu ti Ọlọrun ba ran si wa lati jere ifẹ, oju-rere tabi aanu Ọlọrun, a gbọdọ gba a gbọ, ki a si tẹle ohunkokun ti o ba sọ fun wa. Eyi ti o ba jẹ mọ ki a ronupiwada, ki a ronupiwada. Eyi ti o ba si jẹ mọ ki a dupẹ lọwọ Ọlọrun, ki a si tun duro ṣiṣin ninu igbagbọ wa ati ododo rẹ, ki a ṣe bẹẹ gẹgẹ. Nipa bayi, a o le jere iṣẹ iranṣẹ wolii.

Yatọ si eyi, a nilo lati bọwọ fun awọn wolii ti Ọlọrun n lo fun wa, ki a si ma fi nkan ini wa ran iṣẹ iranṣẹ wọn lọwọ, gẹgẹ bi a ṣe kọ wa ninu bibeli. Idi si ni pe eyi ni ere lori pupọ niwaju Ọlọrun. Amọ, ti a ba n ri wọn fin tabi sọ ọrọ odi si wọn, a le wa si abẹ idajọ Ọlọrun ti o lewu. (Wo: Numeri 12; 1Awọn Ọba 17:7-24; 2Awọn Ọba 4:8-37; Emọọsi 7:10-17; Matiu 10:40-42; 1Tẹsalonika 5:12-13)

Ni afikun, a ko gbọdọ gbagbe pe ẹlẹran ara ni wolii kọọkan. Nitorina, bi a ti ṣe sọ siwaju, a ko gbọdọ tẹle wolii kankan ti isọtẹlẹ rẹ tabi igbe aye rẹ ko ba ti wa ni ibamu pẹlu ifẹ Ọlọrun. A gbọdọ ma fi gbogbo igba ranti ọrọ Pọọlu ti o sọ wipe, “Ẹ maa ṣe afarawe mi, ani gẹgẹ bi emi ti n ṣe afarawe Kirisiti.” (1Kọrinnti 11:1) Aijẹbẹ, ọrọ wa le dabi ti wolii ọdọ kan ti agba wolii kan ṣi lọna, ti o si jẹ ki o ṣegbe (1Awọn Ọba 13).

ỌRỌ IPARI
Ni akotan, wolii jẹ ẹnikan ti Ọlọrun yan lati fi ara rẹ ati ifẹ rẹ han, ki O ba le lo o lati fi ifẹ ati ete rẹ han si awọn eniyan. Amọ, ko wa ki i ṣe gbogbo wolii naa ni Ọlọrun yan, ko si ki i ṣe gbogbo wolii ti Ọlọrun yan naa ni o ma n fi ododo jẹ iṣẹ ti o gbe fun wọn. Idi si ni yi ti ọmọ Ọlọrun kọọkan fi gbọdọ ni imọ ti o peye nipa wolii ati iṣẹ wọn, ki o ma ba bọ sọwọ awọn eke wolii ati ki o ma ba duro lori iṣọtẹlẹ ti ko fi gbogbo ifẹ Ọlọrun han, ki o si kọsẹ.

IBEERE

  • Bawo ni ẹkọ yi ṣe ran imọ ati oye rẹ nipa wolii ati iṣẹ iranṣẹ rẹ lọwọ si?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (Whatsapp Number : 07085711280)

Akori : WOLII Read More »

Duro de Oluwa | Paito J.O. Lawal

Leave a Comment

Ọjọ: Okudu 13, 2021 | Nọmba: Vol. 10, No. 6

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Okudu 2021. Adura mi si ni pe ki a pa iwọ ati idile rẹ mọ lati ri ire ti Ọlọrun yoo mu wa fun orilẹ-ede yi, ni orukọ Jesu. Amin.

Dafidi, ninu ọkan ninu awọn orin rẹ, sọ pe, “Ṣugbọn emi ti gbagbọ lati ri ire Oluwa ni ilẹ alaaye. Duro de Oluwa; ki o si tuju ka, yoo si mu ọ ni aya le: mo ni duro de Oluwa.” (Saamu 27:13-14) Ki ni igbagbọ ọkunriin yi? Igbagbọ rẹ ni pe yoo ri ire Oluwa ni ilẹ alaaye. Ki si ni idi ti o fi igbagbọ lọna yi? Idi ni pe o n duro de Oluwa ti ko ki i jani kulẹ.

Bi a ti ṣe ri ninu iwe mimọ, gẹgẹ bi ọdọmọkurin, Dafidi dojukọ inunibini ti o le koko lati ọdọ Sọọlu, ti o jẹ ọba lori Isiraẹli ni akoko ti a n wi yi. Nitorina, oun, awọn jagunjagun rẹ ati awọn ẹbi wọn ni lati ma fi gbogbo igba sa lati ibikan si ibomiran; wọn ko si le gbe aye bi awọn eniyan gidi ṣe n gbe aye. Igba kan tilẹ wa, ẹwẹ, ti a sọ ina si agọ wọn ti wọn n lo fi igba diẹ, ti awọn ara Amaleki si ko gbogbo awọn iyawo ati ọmọ wọn lọ. Eyi si ni awọn jagunjagun lara tobẹẹ gẹẹ ti wọn fi bẹrẹ si ni sọrọ nipa lilẹ ni okuta, nitori wọn woye pe ibaṣepọ wọn pẹlu rẹ ko mu ikankan wa fun wọn ju idamu lọ.

Sibẹsibẹ bibeli sọ pe Dafidi ko ba ọkan jẹ nitori awọn nkan wọnyi. Dipo eyi, o fun ara rẹ ni okun ninu Oluwa, niwọn igba ti O mọ pe o di dandan ki O fun oun ni iṣẹgun ni gbogbo ọna, ki O si tun fi opin si gbogbo awọn ọjọ irinkinri rẹ ni ọjọ kan (1Samuẹli 30:6). Idi ni yi ti o ṣe sọ pe oun ni igbagbọ pe oun yoo ri didara Oluwa ni ilẹ alaye. Ṣe o wa ri tabi ko ri? O ri. O ri didara Ọlọrun ni oju ẹmi rẹ, ko si ki i ṣe lẹyin iku rẹ. Ko kan di ọba lori orilẹ-ede Isiraẹli nikan, o tun ni oore-ọfẹ ti ko wọpọ lati fi ọkan lara awọn ọmọkunrin rẹ jọba lori ilẹ na ki o to ku.

Ṣugbọn ki lo fa ti Dafidi fi ri didara Oluwa nikẹyinkẹyin ni oju ẹmi rẹ, pẹlu gbogbo iriri buruku ti o ni gẹgẹ bi ọdọmọkunrin? Bi a ti ṣe ri ninu ẹsẹ bibeli ti o wa loke yi, nitoripe o duro de Oluwa dipo ki o sọ ireti nu ni. Oluwa ti yan gẹgẹ bi ọba dipo Sọọlu; O si tun fun ni ọpọlọpọ ileri ti o ga, ti o si tun dara. Ṣugbọn ki o to le ri imuṣẹ awọn nkan wọnyi, o nilo lati fi igbagbọ ati suuru rẹ ninu Oluwa han. Lotitọ, o nilo lati ṣe eyi fun ọdun melokan. Amọ, igbagbọ rẹ ninu Ọlọrun ati suuru rẹ ko ja si pabo. Nitorina, o wa le sọ fun awọn miran ninu orin rẹ ti o wa loke pe ki awọn naa ṣe bi oun ṣe ṣe, ti wọn ba fẹ ri didara Oluwa ni ilẹ alaye.

Njẹ wọ na fẹ lati ri didara Oluwa ni oju aye rẹ bi? Njẹ iwọ na fẹ wa laye ati lalaafia nigbati Ọlọrun ba dana ṣun aṣọ ẹgan orilẹ-ede yi, ti O si tun wọ ni aṣọ ogo ati iyin? Ẹmi fẹ wa laye ati ni alaafia nigba ti eyi ba ṣẹle.  Mo si tun fẹ ki idile mi wa laye ati lalaafia pẹlu nigba ti o ba ṣẹlẹ. Mo si wa ni igbagbọ bi ti Dafidi pe Oluwa ti o dara, ẹni ti o gba wa la kuro lọwọ ẹṣẹ wa, ti O si mu wa wa sinu ijọba ologo rẹ, yoo jẹ ki eyi ri bẹ. Nitorina, irufẹ nkan yowu ti mo le ri tabi gbọ, mi o ni ba ọkan jẹ tabi igbe igbagbọ mi ninu rẹ sọnu. Dipo bẹ, nṣe ni ma mu ọkan le, ti ma si tun duro de e. Bẹẹni, emi o duro de e nitoripe o n ṣe itọju me, O si tun ṣe gbọkanle. Njẹ iwọ naa yoo ha ṣe bakanna bi?

Ki o ni ọṣẹ alarinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

Duro de Oluwa | Paito J.O. Lawal Read More »