Author name: 23?Racing_Horse

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. O dun mọ mi ninu lati ki ọ kaabọ sinu ọsẹ miran ninu oṣu Igbe 2023. Mo si gbadura pe ki Ọlọrun ma fi gbogbo igba ri ọ lo lati tan iyinrere ọmọ rẹ Jesus Kirisiti kalẹ. Amin.

Bi a ti ṣe ri ninu bibeli, ọkan lara idi ti ọpọ fi tipasẹ iṣẹ iranṣẹ Jesu Kirisiti Oluwa wa di alabukunfun ni pe awọn ti a bukunfun nipasẹ rẹ n tan iyinrere rẹ kaakiri ọdọ gbogbo awọn ti o wa ni ayika wọn ati ni ibikibi ti wọn ba lọ. Fun apẹrẹ, lẹyin igba ti Jesu ti wo ọkunrun were kan san tan, O sọ eyi fun: “Lọ si ile si ọdọ awọn ẹbi rẹ, ki o si sọ fun wọn bi Ọlọrun ti ṣe ohun nla fun ọ, ati bi o si ti ṣaanu fun ọ.” (Maaku 5:19) Ṣe ọkunrin wa lọ tabi ko lọ? O lọ. Bibeli sọ wipe, “Nitori naa, ọkunrin yii pada lọ, o bẹrẹ si royin ni Dekapolisi nipa ohun nla ti Jesu ṣe fun un. Ẹnu si ya gbogbo eniyan.” (Maaku 5:20)

Wayi o, nkankan naa ni a n reti lati ọdọ wa. Bi Oluwa ti n bọ wa pẹlu ọrọ rẹ, ti O n yi aye wa pada, ti O si tun n ṣe oniruuru nkan iyanu fun wa ninu ijọ wa, nṣe ni o yẹ ki a ma tan iroyin didara rẹ si wa kaakiri. Ki ni idi? Idi ni ki awọn ti o ba gbọ wa naa ba le gba iwuru lati darapọ mọ wa lati ni iriri didara rẹ.
Njẹ o tilẹ mọ pe awọn ti Oluwa pa aṣẹ fun lati ma sọ ohunkohun nipa rẹ fun ẹnikẹni gan si papa tan iroyin didara rẹ kaakiri ibi gbogbo ti wọn lọ? Luuku, fun apẹrẹ, fi eyi han wa nipa nkan ti o ṣẹlẹ lẹyin ti Jesu ti wo ọkunrin adẹtẹ kan san:

“O si kilọ fun u pe, “Ki o ma ṣe sọ fun ẹnikan: ṣugbọn ki o lọ, ki o s fi ara rẹ han fun alufaa, ki o si ta ọrẹ fun iwẹnumọ rẹ, gẹgẹ bi Mose ti paṣẹ fun ẹri si wọn.” Ṣugbọn okiki rẹ n kan kalẹ: tobẹẹ ti ọpọ ijọ eniyan si jumọ pade lati gbọ ọrọ rẹ, ati lati gba dida ara lọdọ rẹ kuro lọwọ ailera wọn. Ṣugbọn Jesu a maa yẹra kuro, oun a si maa dawa lati gbadura.” (Luuku 5:14-16)

Njẹ o ri bayẹn? Bi o tilẹ jẹ wipe Oluwa paṣẹ fun okunrin adẹtẹ yi lọna ti o ye yekeyeke pe ki o ma sọ ohun kan fun ẹnikẹni nipa Oun, ọkunrin yi ko dakẹ jẹ nipa ọrọ naa. Dipo eyi, bi awọn ti O ti wosan tẹlẹ, nṣe ni ọkunrin yi naa n lọ kaakiri, ti o si n sọrọ laibikita nipa rẹ ati nkan ti o ṣe fun un fun awọn eniyan. Eyi si jẹ ki ọpọ eniyan wa si ọdọ rẹ lati wa gbọ ọrọ rẹ ati lati gba iwosan fun awọn aisan wọn.

Ṣe o wa tọna fun ọkunrin yi lati ṣe aigbọran si Jesu Oluwa gẹgẹ bi o ti ṣe? Rara! Ninu akọsilẹ Maaku lori iṣẹlẹ yi kanna, o jẹ ki o ye wa pe aigbọran ọkunrin yi ko jẹ ki o ṣeeṣe fun Jesu lati wọ ibi kankan lalai da boolọ-ooya silẹ. Nitorina, aigbọran rẹ da rugudu silẹ fun Oluwa. Ṣugbọn ọkunrin yi ko ro wipe oun ṣe nkan ti ko dara rara ni asiko yi. O kan ro lọkan rẹ pe alanikanjọpọn ni oun yoo jẹ ti oun ba fi otitọ nipa ẹni ti o wo oun san, ti o si mu oun larada pamọ. (Wo: Maaku 1:40-45)

Ni kukuru, ọkunrin yi, ti Oluwa pasẹ fun lati ma sọ ohunkohun fun ẹnikẹni nipa rẹ woye lọkan rẹ pe alanikanjọpọn ni oun yoo jẹ ti oun ko ba sọ fun ẹnikẹni nitootọ ohun ti Jesu ṣe fun oun. Ṣe awa gan ko wa ni jẹ alanikanjọpọn ti o ga ju ti a ba kọ lati tan iyinrere didara rẹ si wa kaakiri, awa ti a ko gba aṣẹ kankan ti o jọ mọ eyi ti ọkunrin yẹn gba?

Nitorina, ti o ba ti n ni iriri didara ati agbara Ọlọrun ninu aye rẹ lati igba ti o ti dara pọ wa ninu ijọ yi, alanikanjọpọn ni ọ ti o ba panumọ lori rẹ, ti o ko tan iroyin naa kalẹ de ọdọ awọn miran. Lotitọ, ti o ba le fi idi rẹ mulẹ pe iwọ ko i ti ni iriri didara ati agbara Ọlọrun lati igba ti o ti darapọ mọ wa, yoo ye wa ti o ba ni ọ lara lati tan iroyin naa kalẹ. Idi si ni pe ko si iroyin kankan ti o fẹ tan kalẹ. Ṣugbọn ti o ko ba le fi idi rẹ mulẹ (ti mo si mọ pe o ko le fi idi rẹ mulẹ), o nilo lati bẹrẹ lati maa tan iroyin awọn nkan ti Ọlọrun n ṣe fun ọ ati si ọ ninu awọn ipade wa de ọdọ awọn ti o wa ni ayika rẹ. Nipa ṣiṣe eyi, awọn naa yoo le darapọ mọ wa lati ni iriri didara Ọlọrun ninu aye wọn.

Wayi o, mo fẹ ki o mọ pe Ọlọrun n fi ọkan tan ọ lati ṣe eyi. O si di dandan ki O pin ọ lere fun isododo rẹ ni didari awọn miran si ọdọ rẹ̀ lati ni iri igbala, iwosan, itusilẹ ati isọdọtun. Nitorina, mu ọrọ yii ni pataki. Njẹ ki a ṣe ọkan rẹ le lati ṣe bẹẹ gẹgẹ, ni orukọ Jesu. Amin.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Igbe 2023. Adura mi si ni pe ki ayọ Ọlọrun ma fi gbogbo igba kun akunwọsilẹ ninu aye rẹ ninu ọsẹ naa ati ni gbogbo eyi ti o ku ninu ọdun yi. Amin.

Wayi o, bi o ti ṣe mọ, loni yi, awọn Kirisitiẹni kaakiri agbaye n ṣe ajọyọ ajinde Jesu Kirisiti Oluwa wa. Njẹ nkan ti o dara kọ ni eyi bi? Nkan ti o dara ni. Mo n sọ wipe ko buru rara lati ya ọjọ kan sọtọ lati sọ awọn eniyan agbaye ji nipa iku, isinku, ajinde ati igbasoke Jesu Kirisiti Oluwa wa ati iwulo awọn nkan wọnyi. Nitori, mo ki ọ ku ayọ ajinde, ti iwọ naa ba n kopa ninu ajọyọ naa.

Amọ ṣa o, nkan ti Ọlọrun n fẹ lati ọdọ wa ju eyi lọ. Nkan ti O n fẹ lati ọdọ wa ni ki a ma fi ojoojumọ ran ara wa leti iwulo nkan ti Jesu ṣe fun wa, ki a si tun ma fi tayọtayọ fi ara jin lati sin in nitori rẹ. Idi kan pataki si niyi ti bibeli fi sọ fun wa pe ijọba Ọlọrun ko wa nipa ti ododo ati alaafia nikan biko tun ṣe nipa ti ayọ ti Ẹmi Mimọ n fun ni pẹlu (Roomu 14:17).

O wa ṣeni laanu pẹ ọpọ awọn eniyan Ọlọrun ni ko ki i ṣaba fi ayọ han ninu ijọsin wọn tabi iṣẹ iṣin wọn si i. Igba kan ṣoṣo ti diẹ miran lara wọn ma n fi ayọ tabi idunnu han rara lori ọrọ ti o ba ni i ṣe pẹlu Ọlọrun ni asiko ti wọn ba n kọ ori iyin tabi orin ọpẹ ninu awọn ipade ijọ wọn. Yatọ si eyi, ko si nkan miran ti wọn le ṣe fun Ọlọrun ti yoo jẹ pẹlu inu didun tabi ayọ. Inu wọn ko ki i dun lati gbadura. Inu wọn ko ki i dun lati fifunni. Inu wọn ko ki i dun lati gba ọrọ Ọlọrun. Inu wọn ko si ki i dun lati ke si ẹnikẹni lati wa tọ́ dídára Ọlọrun wo pẹlu wọn. Dipo eyi, ohunkohun ti wọn ba ṣe fun Ọlọrun ṣaba ma n jẹ pẹlu ikunsinu.

Ki ni idi? Idi pataki julọ ni pe inu wọn ko dun si ibaṣepọ wọn pẹlu Ọlọrun. Ti inu awọn eniyan ba dun si mimọ Ọlọrun ati wiwa ni ibaṣepọ pẹlu rẹ, ko si nkan ti wọn yoo ṣe fun un ti ko ni jẹ pẹlu ayọ. Wọn tilẹ ma fẹ ku fun pẹlu ayọ paapaa. Wo awọn apọsiteli igbaani. A sọ ninu bibeli pe igba kan wa ti a na wọn nitori iwaasu iyinrere. Sibẹsibẹ, wọn pada lọ si ile olukuluku wọn pẹlu ayọ pe a ka wọn yẹ lati jiya ati lati ṣẹsin nitori orukọ Jesu. Ki ni o fa ti wọn fi ṣe bayi? Oun naa ni pe ibaṣepọ wọn pẹlu Ọlọrun ati ọmọ rẹ Jesu Kirisiti n mu inu wọn dun. (Wo: Iṣe Apọsiteli 5:40-41)

Lafikun, a sọ fun wa ninu bibeli pe nigba ti Jesu pe Lefi agbowo-ode lati tẹle e, inu rẹ dun to bẹẹ gẹẹ ti o fi ṣe ase fun un (Luuku 5:27-28). Sakeu nkọ? Iha wo ni o kọ si ibẹwo Oluwa si ile rẹ? Iha ẹni ti iduunu rẹ ga pupọ ni o kọ si (Luuku 19:1-10). A si tun ri ọkan lara ti o kọ awọn Sáàmù wa ti oun naa sọrọ nipa idunnu rẹ si Ọlọrun pẹlu awọn ọrọ wọnyi: “Inu mi dun nigba ti wọn wi fun mi pe Ẹ jẹ ki a lọ sile Oluwa.” (Sáàmù 122)

Wayi o, awọn ti inu wọn ba dun si Ọlọrun ati ohunkohun ti o ba ni i ṣe pẹlu rẹ ni awọn ọna yi naa ni yoo ma fi gbogbo igba fi ara rẹ han, ti yoo si tun ma gbe ro lati ṣe oniruuru iṣẹ rere (Johanu 14:21). Nitorina, ti Ọlọrun ko ba ma fi ara rẹ han ọ siwaju ati ṣiwaju si, ti ko si tun ma ṣe ohunkohun lati bukun fun awọn miran nipasẹ rẹ, o yẹ ki o yẹ ara rẹ wo lati mọ boya inu rẹ dun si i. Ti inu rẹ ko ba si dun si i, a jẹ wipe awọn nkan kan wa ti inu rẹ dun si niyẹn. Bẹẹni, ti inu rẹ ko ba dun lati sin Ọlọrun ati lati gbe aye rẹ fun un, daju-ṣaka ni pe nkankan tabi ẹnikan wa ti inu rẹ dun si lati sin ati lati gbe aye rẹ fun. Ṣugbọn ṣe eyi yoo lere fun ọ nikẹyinkẹyin bi?

Iwọ naa wo nkan ti Mose sọ fun awọn ọmọ Israẹli lori ọrọ yi: “Nitori iwọ ko sin Oluwa Ọlọrun rẹ ni ayọ ati inu didun ni akoko alaafia. Nitori naa ninu ebi ati oungbẹ, ninu ihooho ati aini buburu, iwọ yoo sin awọn ọta a rẹ ti Oluwa ran si ọ. Yoo si fi ajaga irin bọ ọ ni ọrun, titi yoo fi run ọ.” (Ditarónómì 28:47-48) Ṣe o ri bayẹn? Awọn ti ko ba ni sin Ọlọrun pẹlu inu didn ati ayọ yoo pada sin Satani ati awọn ọmọ ogun rẹ ninu inira ati ibanujẹ. Mo wa gbadura pe ọrọ tirẹ ko ni yọri si eyi. Ṣugbọn ti o ba ri pe o ko ni inu didun tabi itara fun Ọlọrun rara tabi mọ, nṣe ni ko bọ si ori ekun rẹ, ki o si gbadura pe ki a da itara ati inu didun rẹ si i pada fun ọ ni kiakia. A o si gbọ ohun rẹ. Amin.

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu oṣu tuntun, oṣu Igbe 2023. Mo si gbadura pe ki Ọlọrun jẹ ki o pọ si gidigidi ninu ohun rere ati ohun ti o lere gbogbo ninu oṣu naa, ni orukọ Jesu. Amin.

Wayi o, bi a ti ṣe bẹrẹ oṣu tuntun yi, mo fẹ rọ ọ lati pa ọkan rẹ pọ lati fi ara rẹ jin lati fun Ọlọrun ni ijọsin otitọ. Ki ni idi? Akọkọ, idi ni pe awọn ti yoo fun un ni ijọsin otitọ ni O n wa. Jesu sọ wipe, “Ṣugbọn akoko n bọ, o si de tan nisinsin yii, nigba ti awọn olusin tootọ yoo maa sin Baba ni ẹmi ati ni otitọ: nitori iru wọn ni Baba n wa ki o maa sin oun. Ẹmi ni Ọlọrun: awọn ẹni ti n sin in ko le ṣe alaisin in ni ẹmi ati ni otitọ.” (Jòhánù 4:23-24)

Njẹ o ri bayẹn? Ko ki i ṣe gbogbo awọn ti o n sunmọ Ọlọrun lati jọsin fun naa ni O ma n gba ijọsin wọn. Dipo eyi, kiki awọn ti ọkan wọn ba wa ni pipe ninu ijọsin wọn, ti wọn si jẹ olotitọ si ninu ohun gbogbo ti wọn n ṣe fun un nikan ni O ma n gba ijọsin wọn. Awọn wọnyi, ki a tilẹ sọ otitọ, ni O ma n wa kaakiri lati fi ara rẹ ati agbara rẹ han.

Ni Kironika, ori 16, ẹsẹ 9, a sọ eyi fun wa: “Nitori oju Oluwa yi gbogbo aye ka lati fi agbara fun awọn ẹni ti o ni ọkan pipe si i…” Iwọ naa ronu nipa ọrọ yi daradara. Ọlọrun ma n fi gbogbo igba foju silẹ wa awọn ti ọkan wọn jẹ olotitọ si i. Ki si ni idi? Idi ni ki O ba le fi agbara rẹ han nitori wọn. Nitorina, ti iwọ ko ba ma fi ojoojumọ ri ifarahan agbara Ọlọrun ninu aye rẹ, bi o tilẹ jẹ pe ninu awọn nkan aye yi ti a ko ka si babara ni, yi o fẹ dara ki o yẹ ara rẹ wo boya o jẹ olotitọ si nitootọ, boya ọkan rẹ n fi gbogbo igba gbe ara le fun ohunkohun ti o nilo tabi ti o fẹ ki o jẹ ṣiṣe.

Wo o, awọn ti ọkan wọn ko ba jẹ olotitọ si Ọlọrun kan n fi ijọsin wọn ṣofo ni (Máàkù 7:6-7). Eyi tunmọ si pe, asan ni ijọsin wọn, eyi ti Ọlọrun ko si le pin wọn ni ere fun. Njẹ Ọlọrun pin Kaini lere fun ọrẹ ti o mu wa fun bi? Rara o! Tabi ṣe Ọlọrun wo laala ti o ṣe lori ọrẹ ti o mu wa ki O si ti itori eyi fojufo otitọ ti o sorọ mọ ọkan rẹ ti ko wa ni pipe? Rara! Dipo eyi, gbogbo nkan ti o ṣe ni Ọlọrun kan si asan. Bi yoo si ti ṣe ri niyi fun ẹnikẹni ti ọkan rẹ ko ba wa ni pipe ninu ijọsin rẹ si Ọlọrun. Ohun gbogbo ti wọn ba n ṣe ni a o ka si asan. (Wo: Jẹnẹsisi 4:3-7)

Idi miran ti o tun ṣe ṣe pataki ki a fun Ọlọrun ni ijọsin otitọ ni pe ewu wa ninu ki a ma ṣe bẹ ẹ. A fun wa ni akọsilẹ iku ọkunrin kan ti a n pe ni Ananaya ati iyawo rẹ Safira ninu Iwe Ise Awọn Apọsiteli, ori 5. Ki ni idi ti wọn ṣe ku iku aitọjọ ti wọn ku? Idi ni pe ọkan wọn ko ṣe olotitọ si Ọlọrun. Wọn mu ẹtan wọ inu ijọsin wọn, a si ṣe idajọ wọn fun eyi lẹsẹkẹsẹ.

Wayi o, Ọlọrun le ma ṣe idajọ eniyan fun bi ko ṣe jẹ olotitọ si lẹsẹkẹsẹ. Iyẹn ko tunmọ si pe a ko ni ṣe idajọ ẹni naa ni asiko kan. O le jẹ wipe ago aiṣododo rẹ ni ko i ti kun. O si le jẹ wipe Ọlọrun n fun ni akoko lati ronupiwada ni. Tabi kẹ ki o jẹ wipe awọn eniyan kan n ṣipẹ fun iru ẹni yi, ti wọn si n bẹ Ọlọrun ki o ṣe aanu fun un. Ṣugbọn Ọlọrun ko ni kawọ-gbera titi lailai ki O si ma ṣe idajọ awọn alaiṣotitọ olujọsin, ti wọn ko ba ronupiwada. Ti o ba to asiko kan, yoo da ṣeria fun wọn ni ibamu pẹlu aiṣododo wọn, ki awọn miran ba le ti ara wọn kẹkọ.

Nitorina, ti ọkan rẹ ko ba ṣe deede pẹlu Ọlọrun ninu ijọsin rẹ, o nilo lati rẹ ara rẹ silẹ nisinsinyi, ki o si mojuto aisododo tabi ẹtan ti o wa ninu rẹ, ni igba ti asiko si wa fun ọ lati ṣe bẹ ẹ. Nipa ṣiṣe eyi, awọn nkan ti o n ṣe ni orukọ jijọsin fun Ọlọrun ko ni pada ja si asan tabi ki iwọ funrarẹ ṣi ilẹkun ṣilẹ fun idajọ rẹ lati wa sori rẹ. Adura mi si ni pe ki Ọlọrun, ninu aanu rẹ, mojuto ohunkohun ti o ba jẹ aleebu ninu ijọsin ti o n fun un, ni orukọ Jesu. Amin.

Ki o ni ọsẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia jẹ tirẹ lai ni odiwọn lati ọdọ Ọlọrun Baba wa ati Jesu Kirisiti Oluwa wa. Mo fi ọpẹ fun Ọlọrun fun bi O ti ṣe mu wa wọ inu ọsẹ ti o kẹyin oṣu yi, oṣu Ẹrẹ́nà 2023 lalaafia. Mo si gbadura pe ki O tun ṣe aṣeyọri ni ṣiṣe aye wa bi O ti ni lọkan pe ki wọn ri, ni ibamu pẹlu ete rere rẹ, ni orukọ Jesu. Amin.

Wayi o, eniyan le ma wo pe ṣe Ọlọrun tilẹ le kuna ni tootọ ni mimu nkan ti O fẹ ṣẹ ninu aye awọn eniyan? Ṣugbọn ọrọ Ọlọrun fi han wa pe Ọlọrun le kuna lotitọ ni mimu ete rẹ rere wa si imuṣẹ ninu aye eniyan. Ki si ni idi? Idi ni pe imuṣẹ ete rere Ọlọrun ninu aye wa ko ni i ṣe pẹlu Ọlọrun nikan; o ni i ṣe pẹlu awa naa. Bẹẹni, imuṣẹ ete rẹ ninu aye wa ni i ṣe pẹlu iha ti awa naa ba kọ si ọrọ oore-ọfẹ rẹ.

Bibeli sọ wipe ọrọ oore-ọfẹ Ọlọrun le gbe wa ro, ki o si tun fa ini wa ninu Kirisiti Jesu le wa lọwọ (Iṣe Apọsiteli 20:32). Ṣugbọn ọrọ rẹ ko kan ni dede gbe wa ro, ti a ko ba rẹ ara wa silẹ lati tẹwọgba ati lati ṣiṣẹ ni ibamu pẹlu rẹ. Lafikun, ọrọ ko ni jẹ ki a gba ini wa ninu Kirisiti, ki a si tun jẹ igbadun rẹ, ti a ko ba fi tọkantọkan tẹwọgba ati ṣe amulo rẹ.

Fun apẹẹrẹ, bi a tun ṣe fi han ninu bible, bi o tilẹ jẹ wipe Ọlọrun mu awọn ọmọ Isiraẹli jade lati Ijibiti fun idi kan ṣoṣo, eyi ti o si ni i ṣe pẹlu ki O mu wọn wọ ilẹ ti o n ṣan fun wara ati oyin, ko le e mu ọpọ ninu wọn wọ ibẹ. Ki ni idi? Idi naa ni i ṣe pẹlu iha ti wọn kọ si ọrọ rẹ. Ọpọ lara wọn ni ko mu ọrọ rẹ ti o n tọ wọn wa ni pataki. Iha ti wọn si kọ si ọrọ rẹ buru to bẹẹ gẹẹ ti Mose fi sọ fun wọn ni igba kan pe, “Lati igba ti mo ti mọ yin ni ẹ ti n ṣọtẹ si Oluwa.” (Ditarónómì 9:24)

Iwọ naa wa roonu jinlẹ lori ọrọ yi. Moṣe dari awọn eniyan yi niwọn ogoji ọdun tabi ki o le diẹ, o si tun kọ wọn ni ohun gbogbo ti wọn nilo lati mọ nipa ifẹ Ọlọrun. Ṣibẹsibẹ, ẹri rẹ nipa wọn ni pe wọn ya ọlọtẹ ati ẹni ti ko ṣetan lati tẹle Oluwa tọkantọkan. Nitorina, fun ogoji ọdun, awọn eniyan wọnyi gbọ ọrọ Ọlọrun ṣugbọn kọ lati tẹwọgba tabi lati jẹ ki o yi wọn pada. Alabajọ ti wọn ko fi dagba ninu ẹmi. Alabajọ ti ọpọ wọn ko fi de ile ini wọn.

O wa ṣeni laanu pe ọpọ ọmọ Ọlọrun loni ni ko yatọ pupọ si awọn ara Isiraẹli yi ti Mose dari. Bi o tilẹ jẹ wipe wọn ti wa ninu ijọ fun ọpọ ọdun, wọn ti kọ lati rẹ ara wọn silẹ niwaju ọrọ Ọlọrun. Nitorina, ti awọn adari wọn yoo ba jẹri nipa wọn, o ṣeeṣe ki ọ jẹ wipe nkan ti awọn naa yoo sọ ni pe, “Ọlọtẹ ni ọ lati igba ti mo ti mọ ọ,” tabi “Alagbere ni ọ lati igba ti mo ti mọ ọ,” tabi “Ahun ati aladanikanjọpọn ni o jẹ lati igba ti mo ti mọ ọ.

O wa ṣeeṣe pe bi ọrọ ti ri pẹlu rẹ leyi. O ṣeeṣe ki o jẹ wipe irufẹ ẹri ti ko dara yi ni awọn adari rẹ ni lati jẹ nipa rẹ. Ọrọ Ọlọrun n tọ ọ wa lẹkan si lọwọlọwọ yi, o si n sọ pe, “O ko nilo lati tẹsiwaju bayi, niwọn igba ti o le ronupiwada, ki a si tun ọ ṣe.” Ti o ba si gbọ ohun ti O n ṣọ fun ọ, ti o rẹ ara rẹ silẹ, ti o si tun yipada kuro ninu aṣiṣe rẹ, Oun yoo dariji ọ, yoo si tun fọ ọ mọ kuro ninu gbogbo aiṣododo rẹ. Igba naa ni ete rere rẹ yoo wa bẹrẹ si ni jẹyọ lẹkunrẹrẹ ninu aye rẹ.

Amọ ti o ba kọ lati gbọ ohun ti Ọlọrun n sọ fun, ti o si tẹsiwaju ninu ọna iṣọtẹ, igberaga, iṣekuṣe, anikanjọpọn, ahun tabi imẹlẹ, nṣe ni ki o mọ pe o le tẹsiwaju bi eyi fun gbogbo iyoku ọjọ aye rẹ ki o si ma da ẹni ti Ọlọrun fẹ ki O da tabi gbadun awọn nkan ti O fẹ ki o gbadun laye yi. Adura mi wa ni pe ki a ya ọkan rẹ ya ohunkohun ti o ni iṣe pẹlu agidi ti o n di ọ lọwọ lati fi rẹ ara rẹ silẹ niwaju Ọlọrun ati niwaju ọrọ rere rẹ ti o n tọ ọ wa. Amin.

Ki o ni ọṣẹ ibukun.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ miran ninu oṣu Ẹrẹna. Adura mi pe ki Ọlọrun ma fi gbogbo igba fun ọ ni okun ninu ọrọ ati iwa rere gbogbo, ki o ma ba ṣe jẹ alailere ni ọnakọna. Amin.

Ọkan lara awọn nkan ti a jẹ ki o ye wa yekeyeke ninu iwe mimọ ni pe a ko gbọdọ fa sẹyin ninu iṣoore. Idi si ni pe Ọlọrun yoo pin wa lere fun u. Fun apẹẹrẹ, nigba ti o n kọ lẹta si awọn ara Galatia, Pọọlu sọ wipe, “Ẹ ma si ṣe jẹ ki aarẹ ọkan mu wa ni ṣiṣe rere, ntiori ti a o kore nigba ti akoko ba de, bi a ko ba ṣe aarẹ.” (Gàlátíà 6:9) Njẹ o ri bayi? Ti ko ba ṣeeṣe fun wa lati ṣaarẹ ni ṣiṣe rere ni, a ko ni pa irufẹ aṣẹ yi fun wa. Ti awọn iṣẹlẹ ti o le jẹ ki a rẹwẹsi ni ṣiṣoore ko ba si ni, a ko ni sọ fun wa pe ki a ma ṣaarẹ ni ṣiṣe rere.

Ṣugbọn irufẹ awọn iṣẹlẹ yi wa. Wo awọn idojukọ ti a n ba pade ni orilẹ-ede yi, fun apẹẹrẹ. Owo epo ti lọ soke kọja aala. Ọda owo fun nina tun wa kaakiri. Ojoojumọ ni a tun nilo lati ba ina ọba ti o n ṣe ṣégeṣège finra. Awọn nkan wọnyi si n jẹ ki owó ọjá ati owọ́ ọ̀yà lo soke si lojoojumọ, bi o tilẹ jẹ wipe owo ti ọpọ n pa ko ma a pọ si.

Wayi o, nitori awọn nkan wọnyi, ọpọ ti o lawọ tẹlẹ ninu fififun Ọlọrun ati awọn eniyan ti n fa sẹyin, ti wọn si n lo bi nkan ti ṣe ri gẹgẹ bi awawi wọn lati ma lawọ ṣoore mọ. Ti awọn ti o ba wa lawọ tẹlẹ ri ba n ṣe bayi, ki ni o ro wipe awọn ti ko fi igba kankan lawọ yoo ṣe? Amọ ṣa o, ọrọ Ọlọrun naa ti woye pe awọn nkan ti o le jẹ ki a fa sẹyin ni ṣiṣoore le ṣẹlẹ. Idi si ni yi ti o fi sọ fun wa pe ki a ma ṣe fa ṣẹyin ninu rẹ. Ki si ni idi? Idi nipe nigba ti akoko ba to, Ọlọrun yoo fun wa ni ere gbogbo iṣoore wa. Ko ni fi oju fo ọkankan tabi gbagbe ọkankan lara wọn.

Nitorina, ti o ba ti n fa ṣẹyin ni fififun awọn ti o wa ninu aye rẹ, o nilo lati tun ifarajin rẹ lati ma fifun wọn ṣe. Ti o ba si ti n fa sẹyin ni fififun iṣẹ Ọlọrun ati fififun awọn ti o n bọ ọ pẹlu ọrọ rẹ, o nilo lati tun ifarajin rẹ ni ṣiṣe eyi ṣe. Aijẹbẹ, nṣe ni o o ja ara rẹ lole awọn ere ti o yẹ ki o tẹle fififunni rẹ. Ranti wipe o ko le kore ohun ti o ko ba gbin. Nitorina, ti o ba kọ lati furugbin nitori pe o ro wipe irugbin ti o ni ko to nkan, ti o si jẹ gbogbo rẹ, ko ni si nkankan ti o o kore ni asiko ikore.

Eyi, bi mo ṣe gbagbọ, ni Pọọlu ni ni ọkan nigba ti o sọ nkan wọnyi fun awọn ara Kọrinti nipa ififunni wọn: “Ati ninu eyi ni mo fi imọran mi fun yin: nitori eyi ṣe anfaani fun yin, ẹyin ti o kọkọ bẹrẹ niwọn ọdun ti o kọja, ki i ṣe lati ṣe nnkan, ṣugbọn lati fẹ pẹlu. Njẹ nisinsin yii, ẹ pari ṣiṣe iṣẹ naa pẹlu; ki o baa le ṣe pe, bi imura tẹlẹ fun ṣiṣe ti wa, bẹẹ ni ki ipari si wa lati inu agbara yin. Nitori bi imura tẹlẹ ba wa ṣaaju, o jasi itẹwọgba gẹgẹ bi ohun ti eniyan ba ni, ki i ṣe gẹgẹ bi ohun ti ko ni.” (2Kọrinti 8:10-12)

Pẹlu nkan ti Pọọlu sọ nibi, o han kedere pe awọn ara Kọrinti ti fi igba kan ri fi ara wọn jin fun ṣiṣoore lati ran awọn ijọ Ọlọrun ti o ṣe alaini lọwọ. Pọọlu tilẹ sọ wipe ọrọ awọn ara yi kọja ki a kan ni itara lati fifunni nikan, wọn tun jafafa lati ṣe bẹẹ pẹlu. Ṣugbọn ni ikorita kan, fun awọn idi ti a ko mọ, wọn bẹrẹ si ni fa ṣẹyin ni fififunni, wọn ko si pari nkan ti wọn dawọle.

Nitorina, Pọọlu nilo lati ba wọn sọrọ lori ọrọ yi ninu lẹta rẹ si wọn. O si sọ fun wọn pe ko to ki eniyan fi imura rẹ lati fifunni han; o tun nilo lati jẹ ki ififunni rẹ wa ni idọgba pẹlu imura rẹ, ni ibamu pẹlu nkan ini rẹ. Bi o si tun ṣe tẹsiwaju lati fi han, niwọn igba ti imura lati fifunni ba ti wa, ohun yowu ti a ba fifunni yoo jẹ itẹwọgba ni iwaju Ọlọrun, ni ibamu pẹlu ohun ti a ni dipo eyi ti a ko ni.

Nitorina, niwọn igba ti o ba ti ni nkan lọwọ, ri daju pe o n fifunni lati ara rẹ dipo ti o o fi ma wa awawi. Idi si ni pe ko ki i ṣe awọn awawi rẹ ni Ọlọrun yoo pin ọ lere fun bikoṣe igbọran rẹ si ọrọ rẹ. Adura mi wa ni pe ki o ma ṣe fi igba kankan ba ara rẹ ni ipo ti ọda yoo fi da ọ debi pe o ko ni ni nkankan ti iwọ yoo le fifunni, ni orukọ Jesu. Amin.

Ki o ni ọṣẹ alaafia.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo fi tayọtayọ ki ọ kaabọ sinu ọsẹ miran ninu oṣu Ẹrẹna 2023. Adura mi si ni pe ki Ọlọrun ma fi gbogbo igba ri ọ lo lati fu didara rẹ han si gbogbo awọn ti o wa ninu aye rẹ, ni orukọ Jesu. Amin.

Ọlọrun, bi a ti ṣe ri ninu Bibeli, ma n fi gbogbo igba foju silẹ wa awọn ti yoo lo lati fi ifẹ rẹ ati didara rẹ si awọn ọmọ eniyan han. Nkan ti O si fẹ ni awọn ti yoo fi ara wọn silẹ fun tọkantọkan lati lo wọn. Bi wọn ko tilẹ wa ni amuyẹ pataki kankan ti o le ya wọn sọtọ laarin awọn eniyan, yoo ṣe wọn yẹ pẹlu ohun gbogbo ti wọn nilo lati le mu ete rẹ ṣẹ. Ti wọn ba si tẹsiwaju lati ma sin pẹlu otitọ, o ṣeeṣe ki orukọ wọn di eyi ti gbogbo aye yoo mọ.

Amuyẹ pataki wo ni Peteru, Jemisi ati Johanu ni ti wọn fi di ẹni ti Ọlọrun n lo lati fi ogo rẹ han kaakiri agbaye? Ko si amuyẹ pataki kankan ti wọn ni ti a mọ nipa rẹ! Lotitọ bibeli sọrọ awọn eniyan bi Josẹfu, Solomọni ati Daniẹli ti wọn tayọ ninu ọgbọn, imọ ati oye. Ṣugbọn a ko ṣe apejuwe awọn ọkunrin ti Jesu kọkọ pe lati jẹ apọsiteli rẹ ni mimu iyinrere oore-ọfẹ Ọlọrun kaakiri agbaye gẹgẹ bi awọn ti o ni amuyẹ pataki kankan. Dipo eyi, a sọ fun wa ninu bibeli pe ọpọ ninu wọn ni ko lọ ile ẹkọ. Sibẹsibẹ Ọlọrun lo wọn lati ṣe awọn nkan babara, awọn nkan ti o kọja nkan ti ọgbọn araye le gbe.

Ki wa lo fa ti Ọlọrun ṣe lo irufẹ awọn eniyan yi? Bibeli sọ wipe nitori ki ẹnikẹni ma ba le sogo pe nitori awọn amuyẹ kan ti oun ni ni Ọlọrun ṣe n lo oun. Ọlọrun le lo ẹnikẹni, lalai fi ti amuyẹ tabi aleebu rẹ ṣe. Bibeli tilẹ jẹ ki o ye wa pe Ọlọrun le lo awọn ope eniyan lati dojuti awọn ọlọgbọn eniyan ati awọn ti a ko ka si nkankan lati doju ti awọn eniyan pataki. (Wo: 1Kọrinti 1:26-29)

Njẹ ki wa ni Ọlọrun nilo lati le lo irufẹ awọn eniyan yi? Akọkọ, O nilo ki wọn wa ni arọwọto rẹ. Ki a wa wa ni arọwọto Ọlọrun niru ọna yi kọja ki a kan wa ni ibi ti O wa. O tun ni i ṣe pẹlu ki a jẹ ki O mọ pe a wa ni arọwoto rẹ fun iwulo rẹ. Eniyan le wa ni ibikan, ki o si ma fi ara rẹ silẹ lati ran ẹnikẹni lọwọ tabi lati sin ẹnikẹni. Nitorina, ti o ba fẹ ki Ọlọrun lo ọ, lalai fi nkan ti o ni tabi ti o ko ni ṣe, ma fi gbogbo igba fi ara rẹ han bi ẹni ti o wa ni arọwọto rẹ fun lilo rẹ. (Wo: Aisaya 6:1-8)

Ekeji, Ọlọrun nilo awọn ti yoo lo lati fi tọkantọkan fi ara rẹ jin fun un (Róómù 12:1; Jèmíísì 4:7). Eyi tunmọ si pe wọn gbọdọ rẹ ara wọn silẹ fun lati ṣe awọn nkan ti O fẹ ki wọn ṣe gẹgẹ bi O ti fẹ ki wọn ṣe e yatọ si bi wọn ti ro o lọkan ara wọn. O wa jasi pe ẹnikẹni ti ko ba ṣetan lati rẹ ara rẹ silẹ niwaju Ọlọrun ati lati ṣe iṣẹ rẹ bi O ti ṣe fẹ ko le jẹ lilo fun lati mu ete rẹ ṣẹ, bi ẹni naa tilẹ wa ni arọwọto rẹ.

Ẹkẹta, Ọlọrun nilo ki irufẹ awọn ti yoo lo ṣetan lati ṣe afọmọ ara wọn. Nkan ti Ọlọrun n fẹ kọja nkan ti a le ṣe fun un; o tun ni i ṣe pẹlu iru ọkan ti a fi ṣe e. Iru ọkan ti a fi ṣe iṣẹ rẹ ni yoo so boya iṣẹ naa yoo munadoko to lati mu ete rẹ ṣẹ tabi boya yoo fi idibajẹ si iṣẹ naa. Nitorina, a gbọdọ mura silẹ fun lati fọ wa mọ kuro ninu ohunkohun ti o le ba iṣẹ rẹ jẹ tabi sọ di alailere lati ọwọ wa. Ẹnikẹni ti o ba wa lodi si ọrọ ibawi, ọrọ ikilọ tabi ọrọ itọni ko yẹ ni ẹni ti O le lo fun iṣẹ rẹ, bi o ti wu ki ẹni naa ni ẹbun to. (Wo: 2Tímótì 2:20-21)

Ni kukuru, awọn apọsiteli igbaani yi ni awọn nkan ti Ọlọrun n wo yi, bi o tilẹ jẹ wipe wọn ko ki ṣe ọjọgbọn, gbajumọ tabi ọlọrọ eniyan ni akoko ti Oluwa pe wọn. Gbogbo wọn fi ara wọn si arọwọto fun Oluwa lati lo, wọn rẹ ara wọn silẹ lati sin in bi O ti ṣe fẹ, wọn si tun jọwọ ara wọn fun lati wẹ wọn ati lati ṣọ wọn di mimọ. Nitorina, O mu wọn, O gbe wọn ro, O si tun lo wọn ni awọn ọna ti ẹnikẹni ko ro wipe o ṣeeṣe. Ti awa naa ba si fẹ ki O lọ wa ni ọna kanna, nṣe ni ki awa naa ṣe bi wọn ti ṣe ṣe.

Ki o ni ọsẹ alarinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu oṣu Ẹrẹ́nà 2023. Adura mi ni pe ki Ọlọrun gbe ọ ro lati jẹ ẹni naa ti yoo le ma fi gbogbo igba gbẹkẹle lati di dẹkun iwa ibi tabi lati ṣe idajọ rẹ nibikibi ti o ba wa, ki ododo rẹ ba le jọba nibẹ, ni orukọ Jesu. Amin.

Wayi o, ṣiṣe idajọ ibi tabi idajọ iwa aidara awọn eniyan ko ki fi gbogbo igba jẹ nkan ti o rọrun lati ṣe, pẹlupẹlu ninu ijọ Ọlọrun. Idi si ni pe ọpọ igba ni awọn eniyan ma n koro oju si tabi gbogun ti. Sibẹsibẹ, nkan ti o gbọdọ ma waye loorekoore ni, ti a ba fẹ ki awujọ wa wa ni ilera, ki o si tun wa ni ailewu fun wa lati gbe. Kiki awọn ti o ba si ṣetan lati ṣe idajọ iwa bi ati iwa aidara ni awọn ọna ti o tọna nikan naa ni o le jẹ adari otitọ fun Ọlọrun, yala nipa nkan ti aye yi ni tabi nipa nkan ti ẹmi.

Solomọni, ninu iwe rẹ, Oniwaasu, sọ eyi fun wa: “Nigba ti a ko ba tete ṣe idajọ fun ẹlẹṣẹ kiakia, ọkan awọn eniyan a maa kun fun ọpọlọpọ imọ lati ṣe ibi.” (Ìwé Oníwàásù 8:11) Ṣe o ri bayi? Ti awọn eniyan ba n ṣiwawu, ti ko si si ẹni ti yoo da wọn lẹjọ fun iwa aidara wọn, nṣe ni awọn ati awọn miran ti wọn ri bi wọn ti ṣe n ṣe ika ti wọn si n mu u jẹ yoo gba okun si lati tun ṣiwawu ṣiwaju si i. Ti eyi ba si tẹsiwaju, ti akoko kan ba to, Ọlọrun yoo nilo lati gbe igbesẹ lati ṣe idajọ awọn ika funrarẹ.

Fun apẹẹrẹ, asiko kan wa ti awọn ọkunrin Isiraẹli ti Mose ko jade lati Ijibiti wa bẹrẹ si ni ti ọwọ bọ ẹṣẹ agbere pẹlu awọn ọmọbinrin Moabu. Awọn ọmọbinrin yi si lo eyi lati tan wọn wọ inu ibọriṣa lọ. Nitorina, Ọlọrun ran ajakalẹ-arun si arin wa lati pa wọn run. Ki ni idi? Idi ni pe ko si ẹnikankan ti o mojuto tabi ṣe idajọ ọrọ naa nigba ti o bẹrẹ. Ki a ni pe ẹnikan ti mojuto ọrọ naa, ti o si tun ṣe idajọ rẹ nigba ti o ṣẹṣẹ bẹrẹ ni, ọpọ ninu awọn ọkunrin naa ko ba ma ti kopa ninu radarada naa ati pe Ọlọrun ko ba ma ti gbe igbesẹ lori rẹ.

Ni kukuru, igba ti Mose yoo fi ṣọji lati ṣe idajọ ọrọ naa, ọpọ eniyan ni o ti sọ ẹmi wọn nu. Nigba ti o tilẹ tun wa bẹrẹ si ni ba awọn onidajọ aarin awọn eniyan naa sọrọ lati ṣe iwadi ọrọ na ati lati ṣe idajọ awọn ti o kopa ninu rẹ, nṣe ni ọmọkurin ọkan lara awọn adari wọn tun mọ ọmọbirin Moabu kan wọ inu agọ rẹ lọ niwaju gbogbo wọn lati ṣe iṣekuṣe pẹlu rẹ. Eyi, bi mo to ṣe sọ ṣẹyin, ni o ma n ṣaba ṣẹlẹ nigba ti awọn eniyan ba n ṣiwawu, ti ko si si ẹni ti yoo da wọn lẹkun. Nṣe ni aya wọn yoo ki si lati ṣe nkan ti o buru ju eyi ti wọn ti ṣe ṣẹyin lọ. (Wo: Nọmba 25)

Ki a wa fọpẹ fun Ọlọrun pe ọdọmọkurin alufa kan kọ lati fi aye gba radarada yi lati tẹsiwaju ni ilẹ naa. Ẹni na ni Finehasi, ọmọ-ọmọ Aarọni. Ọkunrin yi mu ọ̀kọ̀ rẹ, o tẹle alagidi ọmọ Isiraẹli yi, o si pa oun ati ẹnikeji rẹ nibi ti wọn ti n wuwa ibi wọn. Nigba ti o si ṣe eyi tan, bi akọsilẹ iṣẹlẹ naa tun ṣe fi ye wa, lẹsẹkẹsẹ ni ajakalẹ-arun naa ṣiwọ. Ọlọrun wa sọ awọn ọrọ iwuri yi nipa rẹ fun Mose:

“Finehasi, ọmọ Eliasa, ọmọ Aarọni alufaa ti yi ibinu mi pada kuro lara awọn ọmọ Isiraẹli, nipa itara rẹ nitori mi laarin wọn, ki emi ki o ma baa ṣe run awọn ọmọ Isiraẹli ninu ọwọ mi. Nitori naa wi pe, kiyesi i, emi fi majẹmu alaafia mi fun un. Yoo jẹ tirẹ ati ti iru ọmọ rẹ lẹyin rẹ, ani majemu iṣẹ alufaa titi aye; nitori ti o ṣe itara fun Ọlọrun rẹ, o si ṣe etutu fun awọn ọmọ Isiraẹli” (Nọ́mbà 25:11-13)

Njẹ o ri bayẹn? Ọlọrun sọ wipe idi ti Oun ko ṣe pa awọn ọmọ Isiraẹli run fun ẹṣẹ wọn ni asiko ti a n sọ yi ni Finehasi. Lọna wo? Gẹgẹ bi Ọlọrun ti sọ, Finehasi ṣe etutu fun ẹṣẹ awọn eniyan naa nipa ṣiṣe idajọ ọkunrin yẹn ati enikeji rẹ ninu ẹṣẹ wọn. Nitorina, igbakigba ti awa naa ba n ṣe idajọ iwa aidara tabi iwa-ika-ki-iwa-ika ni ọna ti o tọ, bi igba ti a n ṣe etutu fun ẹṣe awọn eniyan wa ni. Bi Ọlọrun si ṣe gboriyin fun Finehasi ni igba yẹn naa ni yoo ṣe gbe oriyin fun awọn naa.

Nitorina, ibibiki ti o ba ti wa ni ipo lati ṣe idajọ iwa ibi tabi lati ṣe idajọ iwa aidara awọn eniyan, ma ṣe lọra rara lati ṣe e. Bẹẹni, awọn ti ọrọ naa kan, pẹlupẹlu ninu ijọ, le da ọ lẹbi tabi sọ ọ ni orukọ-ko-rukọ fun ṣiṣe bẹ ẹ. Ṣugbọn o nilo lati ṣe ohun ti o nilo lati ṣe. Aijẹbẹ, gẹgẹ bi Eli ti o kuna lati ṣe idajọ iwa ibi awọn ọmọkunrin rẹ, nṣe ni iwọ naa yoo ma ranṣẹ pe Ọlọrun wa lati ṣe idajọ ọrọ naa funrarẹ. Ta wa ni o mọ ọna ti yoo gba dajọ?

Ki o ni ọsẹ ologo.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore-ọfẹ, aanu ati alaafia di pupọ si fun ọ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ ti so oṣu Èrèlé ati oṣu Ẹrẹ́nà mọ ara wọn. Mo si gbadura pe ki Ọlọrun jẹ ki ọkan rẹ ma fi gbogbo igba tẹ́wọ́gba ọrọ rẹ ti O sọ silẹ fun igbala ọkan rẹ pẹlu irẹlẹ. Amin.

Ninu ẹpisiteli rẹ, Jèmíìsì sọ eyi fun wa nipa ọrọ Ọlọrun ati nipa iha ti o yẹ ki a kọ si: “Nitori naa, ẹ lepa lati bori gbogbo eeri ati iwa buburu ti o gbilẹ yika, ki ẹ si fi ọkan tutu gba ọrọ naa ti a gbin ti o le gba ọkan yin la.” (Jákọ́bù 1:21) Ki ni o yẹ ki a ṣe pẹlu ọrọ Ọlọrun ti a n gbin sinu ọkan wa? Gẹgẹ bi apọsiteli yi ti ṣe wi, nṣe ni o yẹ ki a tẹwọgba pẹlu irẹlẹ. Eyi tunmọ si pe niwọn igba ti nkan ti o n tọ wa wa ba ti jẹ ọrọ Ọlọrun, a ko gbọdọ kọ ọ silẹ, gbe ju sẹgbẹkan tabi ba a jiyan. Dipo eyi, nṣe ni o yẹ ki a tẹwọ gba a pẹlu irẹlẹ, pẹlu imoye pe bi ọrọ rẹ tilẹ da bi ọrọ omugọ leti wa, agọ̀ Ọlọrun ṣi gbọn ju ọgbọn wa lọ. (Wo: 1Kọ́ríntì 1:25)

Idi wo wa ni o ṣe yẹ ki a fi irẹlẹ tẹwọgba ọrọ Ọlọrun, bi Jemiisi ti ṣe sọ fun wa? Idi naa ni pe ọrọ naa le gba ọkan wa la. Ọrọ Ọlọrun ni agbara lati gba wa la kuro lọwọ aye ibajẹ yi ati kuro lọwọ gbogbo ete eṣu lati pa wa run. Ṣugbọn a ko ni ni iriri agbara igbala ọrọ rẹ ti a ko ba fi irẹlẹ tẹwọ gba a, ki a si tun ṣe amulo rẹ.

O wa ṣeni laanu pe ọpọ ti o pe ara wọn ni ọmọ Ọlọrun, ti wọn si n gbọ ọrọ rẹ loorekoore ni ko ko ki rẹ ara wọn silẹ lati tẹwọ gba a ati lati ṣe amulo rẹ. Ki si ni idi? Idi ni pe wọn gberaga. Wọn ro wipe awọn gbọn tabi jafafa ju Ọlọrun lọ ati wipe awọn le mojuto ara wọn lalai fi tirẹ ṣe. Ṣugbọn ṣe a ri ẹni naa lara wa ti o gbọn bi Ọlọrun ẹlẹda wa? Ṣe a ri ẹni naa ti o le mojuto ọrọ aye rẹ funrarẹ lalai ma pa a run nikẹyinkẹyin? Ko si ẹni naa lara wa ti o dangajia fun eyi.

Amọ igbakigba ti a ba kọ ohun ti Ọlọrun n sọ fun wa silẹ, ti a si yan lati ṣe bi a ti ṣe fẹ, nkan ti a n sọ ni pe a lọpọlọ ju u lọ ati wipe a ko nilo itọni tabi ipese rẹ. Ibi yowu ti eyi ba si ti ri bẹ ẹ, o di dandan ki igbala fo wa ru. Eyi si ni alaye fun bi a ti ṣe ri ọpọ ọmọ Ọlọrun ti ko kuro loju kanna fun ọpọ ọdun tabi ti ko ni iriri igbala kuro lọwọ awọn iṣẹ eṣu kan ninu aye wọn. Wọn n fi gbogbo igba gbọ ọrọ Ọlọrun ṣugbọn wọn ko fi irẹlẹ tẹwọ gba a. Nitorina, ọrọ naa ko le e gba wọn la.

Boya bi nkan si ṣe ri fun iwọ naa ni eyi. Boya idi ti ọrọ Ọlọrun ko fi ma a ṣiṣẹ ninu aye rẹ ni pe iwọ naa ko rẹ ara rẹ silẹ lati tẹwọ gba a ati lati ṣe ohun ti O n sọ fun ọ nipa aye rẹ, igbagbọ rẹ, iṣẹ rẹ, okowo rẹ, ẹkọ rẹ, igbeyawo rẹ, ilera rẹ, eto isuna rẹ ati bẹẹ bẹẹ lọ. A jẹ wipe o nilo lati ronupiwada, ki o si yi ọna rẹ pada niyẹn. Ki ni láríjà ki o ma lo ọpọlọpọ wakati lọsọọsẹ lati gbọ ọrọ ti o ko ni ṣiṣẹ le lori? Ṣe ko kuku san ki o ma gbọ rara?

Ni kukuru, ti a ba fẹ sọ otitọ, ki o ma gbọ ọrọ Ọlọrun rara buru ju ki o gbọ ki o ma mulo lọ. Idi si ni pe gbogbo anfaani lati di ẹni igbala ni ipasẹ rẹ ni iwọ yoo ti ti ilẹkun rẹ mọ ara rẹ. Nitorina, o nilo lati tẹsiwaju lati ma gbọ ọrọ rẹ. Ṣugbọn iyẹn ko to fun ọrọ yi lati ṣiṣẹ ninu aye rẹ. Fun un lati ṣiṣẹ ninu aye rẹ ati lati ya ọ ya ainitẹsiwaju ati iparun, o nilo lati rẹ ara rẹ silẹ lati tẹwọ gba a ati lati ṣe amulo rẹ. Adura mi si ni pe ki ọkan rẹ gba okun lati ma fi gbogbo igba ṣe eyi, ni orukọ Jesu. Amin.

Kí o ní ọ̀sẹ̀ tí ó dára.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Àkórí: Tí ààyò Ọlọ́run bá le kùnà
Láti ọwọ́: J.O. Lawal
Ọjọ́: Èrèlé 19, 2022
Àtẹ̀léra: Látorí tábìlì Pásítọ̀
Nọ́múbà: Vol. 11, No. 42

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Èrèlé 2023. Mo gbadura pe ki Ọlọrun jẹ ki alaafia rẹ jọba ninu aye wa ati ni ibi gbogbo ni orilẹ-ede yi ninu gbogbo ọsẹ naa, ni orukọ Jesu. Amin.

Ko jẹ iroyin mọ pe, gẹgẹ bi orilẹ-ede, a ti wọnu awọn ọsẹ idibo. Awọn eniyan kaakiri orilẹ-ede yi yoo si bẹrẹ si ni jade lọ lati lọ di ibo wọn fun awọn oludije ti o ba wu wọn. Bi o tilẹ wa jẹ wipe ko ki i ṣe iṣẹ mi ni lati sọ ẹni ti o yẹ ki o dibo fun tabi ti ko yẹ ki o dibo fun lara awọn oludije ti o wa nilẹ han ọ, iṣẹ mi ni lati sọ fun ọ pe ki o ma ṣe fi igbẹkẹle rẹ sinu ọkankan ninu wọn ṣugbọn sinu Ọlọrun.

Lotitọ, o jẹ dandan ki o ni idi ti o ṣẹ fẹ fi ibo rẹ gbe ẹni ti o fẹ fi gbe wọle wọle. Amọ, bi o ti wu ki idi ti o ṣe mu eni yi suwọn ati dangajia to, ma ṣe fi igbẹkẹle rẹ sinu ẹni naa ayafi sinu Ọlọrun. Ki si ni idi ti ko ṣe yẹ ki o fi igbẹkẹle rẹ sinu wọn? Idi naa ni pe bi ẹni naa tilẹ jẹ oludije ti Ọlọrun funrarẹ yan, o ṣi le kuna.

Eyi, o wa ṣeni lanu, ni ko ye ọpọ awọn adari ijọ wa ti o n sọtẹlẹ ati ti o n sọ oniruuru ọrọ nipa awọn kan ti wọn gbagbọ pe Ọlọrun ti yan lati jẹ adari fun orilẹ-ede wa ati awọn ipinlẹ wa. Eyi ko si ye wọn nitoripe wọn ko ma kiyesi ọrọ Iwe mimọ. Iwe mimọ fi han wa pe bi o tilẹ jẹ wipe Ọlọrun ni o ya eniyan si ipo adari, ko tunmọ si pe yoo ṣe daradara tabi pe yoo jẹ alabukun fun awọn eniyan rẹ. O ṣeeṣe ki o pada jẹ egun fun wọn ati idojuti fun Ọlọrun.

Fun apẹrẹ, a sọ fun wa ninu bibeli pe Ọlọrun ni o yan Sọọlu, ọmọ Kiṣi, ti O si tun ta ororo le lori gẹgẹ bi ọba akọkọ fun Isiraẹli. Ṣe o wa ṣe daradara bi? Rara o, ko ṣe daradara. Nitorina, ni igba ti o to asiko kan, ọrọ rẹ su Ọlọrun. Iwọ naa wo nkan ti a sọ ninu bibeli lori eyi: “Nigba naa ni ọrọ Ọlọwa tọ Samuẹli wa pe, “Emi kaanu gigigidi pe mo fi Sọọlu jọba, nitori pe o ti yipada kuro lẹyin mi, ko si pa ọrọ mi mọ.” Inu Samuẹli si bajẹ gidigidi, o si kepe Oluwa ni gbogbo oru naa.” (1Samuẹli 15:10-11) Njẹ o ri bayẹn? Bi o tilẹ jẹ wipe Ọlọrun funrarẹ ni o yan Sọọlu, ti O si tun de ni ade gẹgẹ bi Ọba, O pada kabamọ pe Oun yan an.

Wayi o, awọn eniyan a ma sọ ni ọpọ igba pe Ọlọrun ko ki i kabamọ lori ohunkohun. Amọ ero tara wọn lasan ni eyi, o si lodi si nkan ti o wa ninu iwe minọ. Bi a ti ṣe ri ninu Iwe mimọ, awọn asiko kan wa ti Ọlọrun kabamọ pe Oun ṣe awọn nkankan. Ko si wa pa irọ fun ara rẹ ni awọn asiko yi. Dipo bẹẹ, nṣe ni O dojukọ eyi ti o jẹ ododo nipa awọn nkan naa ti o mu abamọ wa fun un, ti O si mojuto wọn. Nitorina, ti iwọ naa ba n ni ero abamọ tabi ijakulẹ lori awọn igbesẹ kan ti o gbe sẹyin, awọn igbesẹ ti o dabi ẹni pe o dara ni akoko naa ṣugbọn ti o ti wa yipada si eyi ti ko suwọn, ma ṣe gbogun ti ara rẹ pupọju. Dipo eyi, nṣe ni o ko gbajumọ eyi ti o jẹ okodoro ọrọ lori nkan ti o ṣẹlẹ, ki o si ṣe nkan ti o tọ nipa rẹ.

Ọlọrun nilo lati dojuko nkan ti o jẹ otitọ lori ọrọ Sọọlu ati lati ṣe ohun ti o yẹ lori rẹ. O nilo lati ta ororo le elomiran lori dipo rẹ, bi o tilẹ jẹ wipe o ṣi wa lori itẹ. Ṣe inu rẹ wa dun pe Oun ni lati ṣe eyi? Rara! Bawo wa ni ti Wolii Samuẹli ti o ṣoju fun Ọlọrun lati fi Sọọlu jọba? Ṣe inu tirẹ dun si bi ọkunrin ṣe ṣina, ti a ko si le mu wa si ironupiwada? Rara! Dipo bẹẹ, a jẹ ki o ye wa ninu bibeli pe nṣe ni o n ṣọfọ lori Sọọlu titi Ọlọrun fi da a lẹkun rẹ, ti O si sọ fun pe ki o lọ ya elomiran sọtọ dipo rẹ.

Kini koko ọrọ mi? Oun naa ni pe bi o tilẹ jẹ wipe awọn eni iyasọtọ Ọlọrun ni o dibo fun ninu awọn eto idibo ti o n bọ yi, o ko le fi ọwọ rẹ sọya pe wọn ko ni ja ọ kulẹ, nitori wọn le ja ati Ọlọrun ati iwọ kulẹ. Ti ẹni iyasọtọ Ọlọrun ba wa ja wa ku lẹ, ṣe a wa le fọwọ sọya pe awọn ayanfẹ tiwa ko ni ja wa kulẹ? A ko le ṣe bẹ. Ti wọn ba wa ja wa kulẹ, ki ni a fẹ ṣe? Ṣe awa naa yoo wa ma ṣọfọ bi Samuẹli titi di akoko idibo miran ni bi, iyẹn lẹyin ọdun mẹrin si asiko yi?

Adura mi ni pe ko ni si ọkankan ninu awọn ti yoo di adari wa ninu eto idibo yi ti yoo pada wa jẹ ki a ṣọfọ ni orilẹ-ede yi. Ṣugbọn a gbọdọ kiyesara lati ma fi igbẹkẹle wa sinu ẹnikankan ninu wọn ayafi sinu Ọlọrun. Nipa ṣiṣe bayi, bi wọn ba tilẹ ja wa kulẹ, a o le gbojule Ọlọrun lati yi ikuna wọn pada si rere fun wa.

Kí o ní ọ̀sẹ̀ alárinrin.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)

Olufẹ: ki oore ọfẹ ati aanu di pupọ si fun ọ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Èrèlé 2023. Mo si gbadura pe ki Ọlọrun tikararẹ ṣe ọ ni mimọ ati ailabuku, lọkan, lẹmi ati lara, nigba ti Jesu Oluwa ati Olugbala wa ba de. Amin.

Bi a ti ṣe ri ninu iwe mimọ, Jesu Kirisiti Oluwa wa n pada bọ wa fun ijọ rẹ ni akoko ti Ọlọrun Baba ti yan. Ṣugbọn ko ki i ṣe ijọ eleeri tabi ijọ ti o ti dibajẹ ni O n pada bọ wa fun. Dipo eyi, O n pada bọ wa fun ijọ ti ko ni abuku, ti ko ni abawọn ati eyi ti yo wa ni ibarẹ pẹlu rẹ nigba ti o ba de. (Wo: Efesu 5:26; 2Peteru 3:14)

Amọ ṣe a wa le wa ni ailabawọn, ailabuku ati aini ohunkohun ti le fa idojuti nigba ti O ba pada wa? Bẹẹni, a le e wa bẹ ẹ. A le e wa bẹ ẹ nitoripe Ẹmi Ọlọrun wa ninu wa, O si n fi gbogbo ara ṣiṣẹ lati ri pe eyi ri bẹ. Bẹẹni, O n ṣiṣẹ ni gbogbo igba lati ri daju pe iṣẹ rere ti O bẹrẹ ninu wa nigba ti a ṣẹṣẹ di atunbi jẹ ṣiṣe titi di ọjọ Oluwa. Nitorina, wiwa ni ailabuku wa nigba ti Jesu ba de ko da lori ifẹ wa tabi ilakaka wa ṣugbọn o da lori iṣẹ Ẹmi Ọlọrun ninu wa ati lori wa. (Wo: Filipi 1:6 & 2:12-13)

Amo ṣa o, awa naa si wa tun gbọdọ ni lọkan lati wa ni ailabaku nigba ti O ba pada de. Yatọ si iyẹn, a tun gbọdọ ma ṣe amulo oore-ọfẹ rẹ lati gbe igbe aye ti O fẹ ki a gbe. Aijẹbẹ, o ṣeeṣe ki o jẹ wipe awa gan ni a o papa wa fooro iṣẹ ti O n ṣe lati jẹ ki a wa ni alailabuku.
Siwaju si, o ṣe pataki ki a ma fi oju silẹ lati ṣọ ara wa, ki Satani ma ba ṣe aṣeyọri ni titan ẹnikẹni kuro laarin wa lọ si ibi ti yoo ti pa igbagbọ ati aye wọn run. Bibeli sọ awọn nkan wọnyin fun wa lori ọrọ yi:

“Ẹ kiye sara, ara, ki ẹnikẹni ninu yin ki o ma ṣe ni ọkan buburu ati ti aigbagbọ, eyi ti yoo mu yin kuro lọdọ Ọlọrun alaiye.” (Heberu 3:12)

“Ẹ maa kiye sara ki ẹnikẹni ki o ma ṣe kuna oore-ọfẹ Ọlọrun, ki gbongbo ikoro kan ki o ma baa hu soke ki o si yọ yin lẹnu, ọpọlọpọ a ti ipa rẹ di aimọ. Ki ẹnikẹni ma baa di alagbere tabi alaiwa-bi-Ọlọrun bi Isọ, ẹni ti o ti itori okele ounjẹ kan ta ogun ibi rẹ. Nitori ẹyin mọ pe lẹyin naa, nigba ti o fẹ lati jogun ibukun naa, a kọ ọ (nitori ko ri aaye ironupiwada) bi o tilẹ jẹ wi pe o fi omije wa a gidigidi.” (Heberu 12:15-17)

Njẹ o ri bayẹn? Ti gbogbo wa ba fẹ wa ni mimọ ati ailabuku nigba ti Jesu Oluwa wa ba pada de, a gbọdọ fi oju silẹ lati ma ṣọ ara wa. Nipa ṣiṣe eyi, a o le gbe igbesẹ akin lati tọ ara wa sọna, lati ba ara wa wi ati lati daabo bo awọn ara wa, ti a ba kẹfin pe Satani n ṣiṣẹ lati fi pakute mu wọn nipasẹ owu jijẹ, ojukokoro, ẹtanu, iṣọtẹ, ainitẹlọrun, pansaga tabi iṣẹ ẹran ara miran.

Fun apẹrẹ, nigba ti awọn ara ile Kloe ti ijọ awọn ara Kọrinti ri pe ẹran ara ti gba ijọba ijọ yi, wọn ko fi akoko ṣofo rara lati fi to Apọsiteli Pọọlu, ti o jẹ adari wọn ninu ẹmi, leti. Wọn ri wipe iyapa, owu jijẹ, igberaga, iṣekuṣe, iyanjẹ ati aibikita fun igbagbọ awọn ti wọn ṣi jẹ ọmọ ọwọ ninu igbagbọ ti n fa ijọ yi ya. Nitori eyi wọn kọ lẹta si apọsiteli yi, wọn si bere fun amojuto rẹ ni kiakia. Idi niyi ti o ṣe kọ 1Kọrinti. Nitorina, lẹta yi jẹ idahun si ipohunrere ati adura awọn ọmọ ijọ kan ti wọn fẹ ri pe ijọ Ọlọrun wa ni mimọ ati ni ailabuku nigba ti Jesu ba de.

O wa ṣeni laanu pe, loni, ti awọn ara kan ba n ṣe nkan ti o jọ mọ eyi, ti wọn bẹrẹ si ni gbe igbesẹ lati ri wipe ijọ wọn wa ni yiya si mimọ si Oluwa, nṣe ni awọn ara miran yoo ma pe wọn ni orukọ, ti wọn yoo si ma ba wọn ja. Ki ni idi? Idi ni pe ifẹ wọn si okunkun si wa digbi. Nitorina, wọn ko fẹ ki iṣẹ rẹ di fifihan tabi mimojuto. Ti a ba wa fi aye gba irufẹ awọn wọnyi lati pa otitọ lẹnu mọ tabi tẹ ori rẹ ba laarin wa, nṣe ni a o ma ran wọn lọwọ lati pa ara wọn ati awọn miran run ati lati ba orukọ Ọlọrun jẹ.

Nitorina, ti wiwa wa ni ailabuku nigba ti Jesu ba de ba ka ọ lara, fi oju rẹ silẹ, ki i si ṣe lati ṣọ ara rẹ nikan ṣugbọn lati ṣọ awọn ara rẹ yoku naa. Ti o ba si wa ri wipe wọn n kuna ni ọna kan tabi omiran, ma ṣe fa ṣẹyin rara lati koju wọn tabi awọn ti o le ran wọn lọwọ pẹlu otitọ, yala inu wọn dun si tabi ko dun si. Amọ ọjọ kan n bọ ti wọn yoo dupẹ lọwọ rẹ fun ṣiṣe oun ti o tọna lati gba wọn la tabi ti wọn yoo da ara wọn lẹbi fun kikọ ifẹ Ọlọrun fun aye wọn silẹ.

Ki o ni ọṣẹ ti o ga.

Copyright © 2023, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com or call: 08037592851 (WhatsApp Number: 07085711280)