Author name: 23?Racing_Horse

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ọ̀wàrà 2025. Mo si gbadura pe ki Ọlọrun, bi a ti ṣe n bẹrẹ ọsẹ tuntun naa, mojuto ajaga yowu ti o le ma a rin ọ mọlẹ, ki O si tun tu ọ lara ni ibi yowu ti ara ti le ma a ni ọ, ni orukọ Jesu. Amin.

Wayi o, bi o tilẹ jẹ wipe otitọ ni pe Ọlọrun le mojuto gbogbo ajaga wa, ki O si tun tu wa lara, o tun ṣe pataki ki a ma gbe igbẹkẹlẹ wa ninu rẹ ju sọnu nitori ohun yowu ti a le ma a la kọja. Ṣe o ri, pe Ọlọrun n mojuto ọrọ wa ko tunmọ si pe lẹsẹkẹsẹ naa ni a o ni iriri itura. A le ma a ni iriri itura lẹsẹkẹsẹ. Ṣugbọn ti a ko ba gbe igbẹkẹle wa ninu rẹ sọnu, o di dandan ki a ni iriri ominira ti o peye kuro lọwọ ohun yowu ti Satani le ma gbiyanju lati lo lati fi pa wa run.

Fun apẹrẹ, nigba ti Ọlọrun ran Mose lọ si Ijibiti lati tu awọn ọmọ Isiraẹli silẹ, ko ki i ṣe lẹsẹkẹsẹ naa ni wọn ri itura gba. Dipo eyi, nṣe ni Farao mu nkan le si fun wọn. Ki a ti lẹ sọ otitọ, Mose ni lati pada sọdọ Ọlọrun lati sọ wipe:

“OLUWA, ẽtiṣe ti o fi ṣe buburu si awọn enia yi bẹ̃? ẽtiṣe ti o fi rán mi? Nitori igbati mo ti tọ̀ Farao wá lati sọ̀rọ li orukọ rẹ, buburu li o ti nṣe si awọn enia yi; bẹ̃ni ni gbigbà iwọ kò si gbà awọn enia rẹ.” (Ẹ́kísódù 5:22-23)

Ṣe lotitọ wa ni pe Ọlọrun ko gbe igbesẹ kankan lati tu awọn ọmọ Isiraẹli silẹ? Rara o! O ti bẹrẹ si ni ṣiṣẹ fun itusilẹ wọn ni asiko naa. Amọ ṣa o, Mose ati awọn eniyan naa nilo lati fi suuru tẹsiwaju lati ma a gbẹkẹ le e, ki wọn ba a le jẹgbadun ere gbogbo nkan ti O n ṣe lati gba wọn la lẹkunrẹrẹ. Njẹ wọn wa ṣe eyi? Bẹẹni. Nitorina, a papa tu wọn silẹ kuro ni Ijibiti, a si tun dari wọn wọ inu Ilẹ-Ileri.

Nibakana, awa naa nilo lati ma a fi suuru tẹsiwaju ni gbigbẹkẹle Ọlọrun, ki a ba a le ni iriri ẹkunrẹrẹ ere gbogbo nkan ti O n ṣe lati ṣe ohun gbogbo ti o n ṣe ti wa ni aṣepe. Nitorina, bibeli sọ eyi fun wa:

“Nitorina ẹ máṣe gbe igboiya nyin sọnu, eyiti o ni ère nla. Nitori ẹnyin kò le ṣe alaini sũru, nitori igbati ẹnyin ba ti ṣe ifẹ Ọlọrun tan, ki ẹnyin ki o le gbà ileri na.” (Hébérù 10:35-36)

Njẹ o ri bayẹn? Lakọkọ, a sọ wipe ki a ma ṣe gbe igbẹkẹle wa ninu Ọlọrun sọnu. Kini idi? Idi naa ni pe a o pin wa ni ere ti o ga lori rẹ. Eyi jasi pe, Ọlọrun ko ni lailai ja awọn ti ko ba gbe igbẹkẹle wọn ninu rẹ ju sọnu kulẹ. Ekeji, a sọ wipe ki a ni ifarada ni ṣiṣe ifẹ Ọlọrun ni asiko idojukọ aye wa. Eyi tunmọ si pe ki a ma ṣe dẹkun lati ma gbadura, lati ma ṣe aṣaro ninu ọrọ Ọlọrun, lati ma sọ ọrọ Ọlọrun si awọn idojukọ wa ati lati ma rin ninu ododo. Kini idi? Eyi nikan ni ọna fun wa lati ri imuṣẹ ifẹ rẹ ninu aye wa.

Wayi o, awọn idojukọ ti a n koju le jẹ ki o dabi ẹni pe ifasiko-ṣofo ni fun wa lati tẹsiwaju lati ma gbadura ati lati ma gbe igbesẹ ni ibamu pẹlu ọrọ Ọlọrun, paapaa julọ ti nkan ba n buru si fun wa dipo ki wọn ma a san si. Ṣugbọn ọrọ Ọlọrun ti sọ fun wa pe oju ko ni ti awọn ti ko ba gbe igbẹkẹle wọn ninu Ọlọrun ju sọnu. Nitorina, tẹsiwaju lati ma gbadura ati lati ma ṣiṣẹ ni ibamu pẹlu ọrọ Ọlọrun,. Nigba ti asiko ba si to, iwọ yoo kore didara ati igbala rẹ ninu aye rẹ lọna ti o ga.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olurapada wa. Pẹlu idunnu ni mo ki ọ kaabọ sinu ọsẹ miran ninu oṣu Òwàrà 2025. Adura mi ni pe ki Ọlọrun ma a fi ojoojumọ pa ọ mọ lati ma jẹ irinṣẹ ti Satani le ri lo lọnakọna, ki o ma ba a ṣilẹkun aye rẹ silẹ fun idajọ rẹ. Amin.

Jesu Oluwa wa sọ awọn ọrọ wọnyi si awọn ọmọ ẹyin rẹ nigbakan ri:

“Egbé ni fun aiye nitori ohun ikọsẹ̀! ohun ikọsẹ̀ ko le ṣe ki o ma de; ṣugbọn egbé ni fun oluwarẹ̀ na nipasẹ ẹniti ohun ikọsẹ̀ na ti wá!” (Mátíù 18:7)

Wayi o, ki ni a ri kọ lati ara awọn ọrọ Oluwa wọnyi? Akọkọ, a ri kọ pe aye wa ninu ijangbọn ati labẹ idajọ Ọlọrun. Ki ni idi? Idi ni pe awọn nkan ti o n mu awọn eniyan kọsẹ wa ninu rẹ. Lotitọ, gbogbo eniyan ni a bi pẹlu ẹṣẹ ninu wọn. Ṣugbọn ti a ko ba fun awọn eniyan ni anfaani lati dẹṣẹ si Ọlọrun, awọn iwa-aidara kan wa ti wọn le ma lailai wu laye.

Amọ ṣa o, anfaani lati dẹṣẹ si Ọlọrun pọ jantirẹrẹ ninu aye. Nitorina, bi enikan ko tilẹ fẹ dẹṣẹ, o le ma ni okun to lati gbogun ti ọpọlọpọ itanjẹ lati dẹṣẹ ti o rọgba yi ka. Ta wa ni o n tan awọn eniyan jẹ lati dẹṣẹ? Esu ni. Oun ni o tan Efa jẹ lati ṣẹ si Ọlọrun. Oun yi kanna ni o si tun n tan ẹnikọọkan wa jẹ lati ṣẹ si Ọlọrun loni. (Wo: Jẹ́nẹ́sísì 3)

O wa yẹ ki iwọ naa ri bayi idi ti Jesu ṣe sọ wipe awọn nkan ti o n jẹ ki awọn eniyan dẹṣẹ ko le ṣalai ma waye. Wọn ko le ṣalai ma waye nitoripe Satani n bẹ ninu aye. Eyi jasi pe, niwọn igba ti Satani ati awọn iwin rẹ ba ninu aye yi, o di dandan ki a ma a dojukọ awọn iṣẹlẹ ti o le jẹ ki a kọsẹ, ki a si ṣubu sinu ẹṣẹ. Njẹ eyi wa tunmọ si pe a ko le ṣalai ma kọsẹ, ki a si ṣubu sinu ẹṣẹ? Rara o! A le yago fun eyi nipa oore-ọfẹ Ọlọrun. Ṣugbọn a ko le yago fun idanwo lati dẹṣẹ. Nitorina, a gbọdọ kọ lati ma a fi ojoojumọ duro sinu oore-ọfẹ Ọlọrun. Aijẹbẹ, oniruuru idanwo ni yoo bori wa.

Amọ ṣa o, Oluwa ko wa ma reti pe ki a kan ṣe amulo oore-ọfẹ rẹ lati ma ko sinu ẹṣẹ nikan. O tun n reti pe ki a ṣe amulo rẹ lati ma jẹ ki eṣu lo wa lati jẹ ki awọn miran ṣubu sinu ẹṣẹ. Ranti pe O ti sọ fun wa pe awọn nkan ti o n jẹ ki awọn eniyan dẹṣẹ ko le ṣalai ma waye. Ṣugbọn awọn nkan wọnyi ko ki n ṣaba wa lati ọdọ eṣu taara-taara. Lati ọdọ awọn eniyan bi ti wa ni wọn ti ma n ṣaba wa. Ti awa funrawa ko ba si wa kiyesara, a le da irinṣẹ ti Satani yoo lo lati jẹ ki awọn miran kọsẹ, ki wọn si tun ṣubu.

Njẹ ibi ti eyi ba ti wa ṣẹlẹ, gẹgẹ bi Jesu Kirisiti Oluwa wa ti fi han wa, a o gba ibawi ti o gbópọn lọdọ Ọlọrun ju ẹni ti a ti ṣinu ẹṣẹ lọ. Ranti pe ibawi Efa gbópọn ju ti Adamu lọ. Idi si ni pe nipasẹ rẹ ni Satani ṣe ṣe aṣeyọri lati gbe Adamu ṣubu. Eyi jasi pe eṣu lo lo o. Ti awa naa ba si fi aye gba a lati lo wa lati dari ẹnikẹni siniu ẹṣẹ, ti Ọlọrun si ni lati ba wa wi, ibawi tiwa di dandan ki o pọ ju ti ẹni naa lọ. Nitorina, ma ṣe jẹ ki eṣu lo ọ. Ki Ọlọrun ran ọ lọwọ.

Kí o ní ọ̀sẹ̀ tí ó suwọ̀n.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ miran ninu oṣu Ọ̀wàra 2025. Mo gbadura pe ki Ọlọrun pese ohun yowu ti o ṣe alaini anito rẹ ni ti itara rẹ lati jẹ ohun gbogbo ti O fẹ ki o jẹ laye, ni orukọ Jesu. Amin.

Bi a ti ṣe ri ninu Iwe Mimọ, ọkan lara awọn nkan ti yoo sọ boya a o da ẹni ti Ọlọrun fẹ ki a da tabi jẹ igbadun awọn ipese rẹ fun wa ni itara wa. Ti a ba ni itara ti o peye to lati jẹ ohun ti O fẹ ki a jẹ tabi lati jẹ igbadun awọn nkan ti O fẹ ki a jẹ igbadun, yoo ri daju pe oju ko ti wa. Idi si ni pe bibeli sọ wipe Olusẹṣan ni O jẹ fun awọn ti o ba farabalẹ tabi fi itara wa a (Hébérù 11:6).

Ṣugbọn ti a ko ba ni itara rara tabi ti o peye to lati jẹ ohun ti O fẹ ki a jẹ tabi lati ni awọn nkan ti O fẹ ki a ni, a le ma jẹ igbadun didara rara tabi bi o ti yẹ ki a jẹ, ti a ko ba ṣaanu fun wa. Nitorina, ti o ba ni adura kan ti o yẹ ki a ma a gba lore-koore, oun naa ni pe ki Ọlọrun ma a fi ojoojumọ jẹ ki itara wa fun un ati fun awọn nkan ti O ni nipamọ fun wa peye.

Fun apẹrẹ, nigba ti Wolii Eliṣa sọ fun Ọba Jehoasi Isiraẹli pe ki o ta ọfa iṣẹgun lori awọn ara Aramu, ẹmẹta pere ni o ta a. Eyi si bi wolii yi ninu. Ki ni idi? Idi ni pe iṣẹgun ẹmẹta lori awọn ara Aramu ko to lati fun Isiraẹli ni ominira patapata kuro lọwọ wọn. Wọn yoo nilo to iṣẹgun ẹmẹfa lori wọn ki wọn to le bọ patapata kuro lọwọ imunisin wọn. (Wo: 2Àwọn Ọ̀ba 13:14-19)

Ki wa lo fa ti ọba wọn fi ta ọfa iṣẹgun mẹta pere ni ọjọ naa? Idi ni pe ko ni itara to peye to lati bọ kuro ninu ajaga ika awọn ara Aramu. O kan ro wipe ti oun ba le ṣẹgun wọn ni igba mẹta, o yẹ ki iyẹn naa to. Nitorina, o padanu anfaani kan ṣoṣo ti o ni lati gba ominira ti o peye fun awọn eniyan rẹ kuro lọwọ awọn ti o n pọn wọn loju. O ma ṣe o!

Amọ wo Namani. Bi o tilẹ jẹ wipe Eliṣa jẹ wolii orilẹ-ede ti o jẹ ọta rẹ, itara rẹ lati gba iwosan fun ẹtẹ rẹ jẹ ki o wa si ọdọ rẹ. Bi o si tun tilẹ jẹ wipe ipo ọgagun ẹgbẹ-ogun orilẹ-ede rẹ ni o wa, o gbe igberaga rẹ ju si ẹgbẹ kan lati ṣe nkan ti wolii sọ fun pe ki o ṣe. Ki ni idi? Idi ni pe o ni itara lati gba iwosan rẹ. Ṣe o wa ri gba tabi ko ri gba? O ri gba! (Wo: 2Àwọn Ọba 5)

Nitorina, bi o tilẹ jẹ wipe Ọlọrun ko ki i fi igba gbogbo wo itara wa ki O to ṣe nkan fun wa, awọn nkankan wa ni aye yi ti ko ni lailai ṣe fun wa tabi jẹ ki a jẹ igbadun rẹ, ti a ko ba ni itara to fun wọn. Bawo wa ni a ṣe ni itara si lati jẹ ohun ti Ọlọrun fẹ ki a jẹ ati lati ṣe awọn nkan ti O fẹ ki a ṣe? Eyi yoo han lati ara iha ti a kọ si ọrọ Ọlọrun, adura gbigba ati ibaṣepọ pẹlu awọn Kiristiẹni bi ti wa.

Ti a ba mu awọn nkan wọnyi ni ọkunkundun, a jẹ wipe a ni itara nitootọ fun Ọlọrun ati fun awọn nkan ti O ni ni ipamọ fun wa niyẹn. Ṣugbọn ti a ko ba mu wọn ni ọkunkundun, nṣe ni a n fi han pe imuṣẹ ete rẹ fun aye wa ko ka wa lara pupọ tabi rara. Nitorina, a le e ma lailai ni iriri imuṣẹ ete rẹ fun aye wa. Njẹ eyi yo wa suwọn bi? Rara!

Nitorina, gbadura pe ki Ọlọrun, ninu aanu rẹ ma fi ojoojumọ pese ohun gbogbo ti o kudiẹ-kaato ninu itara rẹ fun un. Nipa ṣiṣe eyi, ete rere rẹ fun aye rẹ yoo le jẹ mimuṣẹ lẹkunrẹrẹ.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaaifa jẹ tirẹ lalai ni odiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ ti o so oṣu Òwewè ati Ọ̀wàrà 2025 mọ ara wọn. Adura mi si ni pe ki Ọlọrun ma a fi ojoojumọ kọ ọkan rẹ lati ma tun lailai ṣe awawi mọ fun aitẹwọgba ìfẹ́ rẹ̀ fun aye rẹ, ki ohun gbogbo ba a le dara fun ọ ati fun ohun gbogbo ti o jẹ tirẹ. Amin.

Wayi o, mo gba adura yi fun ọ nitoripe iran wa jẹ iran eyi ti o fi ara rẹ jin fun awawi ṣiṣe lati ma ṣe ohun ti o tọ, gẹgẹ bi Jesu Kirisiti Oluwa wa ti ṣe tọkasi fun wa. Ti awa ti a si jẹ ọmọ Ọlọrun ko ba kiyesi ara wa, awa naa yoo kan ri wipe nṣe ni a n ṣe awawi ni gbogbo igba fun aigbe ninu ifẹ Ọlọrun fun aye wa. Iwọ naa wo nkan ti Jesu sọ lori eyi:

“Ṣugbọn kili emi iba fi iran yi wé? O dabi awọn ọmọ kekeke ti njoko li ọjà ti nwọn si nkọ si awọn ẹgbẹ wọn, Ti nwọn si nwipe, Awa fun fère fun nyin ẹnyin kò jó; awa si ṣọ̀fọ fun nyin, ẹnyin kò sọkun. Nitori Johanu wá, kò jẹ, bẹ̃ni kò mu, nwọn si wipe, o li ẹmi èṣu. Ọmọ-enia wá, o njẹ, o si nmu, nwọn wipe, Wò o, ọjẹun, ati ọmuti, ọrẹ́ awọn agbowode ati awọn ẹlẹṣẹ. Ṣugbọn a dare fun ọgbọ́n lati ọdọ awọn ọmọ rẹ̀ wá.” (Mátíù 11:16-19)

Ki ni nkan ti a ri nibiyi nipa iran yi? A ri wipe o jẹ iran aláíníkan-án-ṣe. Idi si ni yi ti o fi kun fun awawi ṣiṣe lati ma ṣe ifẹ Ọlọrun. Bi Oluwa wa ti fi han wa ninu awọn ẹṣẹ bibeli ti o wa loke yẹn, bi o tilẹ jẹ wipe Oun ati Johanu Onitẹbọmi ko gba ọna kanna ṣe iṣẹ iranṣẹ wọn, awọn mejeeji ni Ọlọrun ran lati bukunfun araye. Eyi si n fi han wa pe ki a ma ṣe ṣe agbeyẹwo iṣẹ iranṣẹ ẹnikẹni lori awọn nkan ti ode; dipo bẹ ẹ, nṣe ni ki a ṣe e ni ibamu pẹlu eso ti o n so. Ti o ba n so eso ododo Ọlọrun, a jẹ wipe ti Ọlọrun ni. Ṣugbọn ti ko ba so eso ododo rẹ, bi o tilẹ dabi ẹni wipe o jẹ mimọ ni ode, ko ki i ṣe ti Ọlọrun. Ki o si dakun fi eleyi si ọkan.

Ni kukuru, a ri wipe awọn Juu aye igba Jesu Kirisiti Oluwa wa ko tẹwọgba ati Oun ati Johanu Onitẹbọmi, bi o tilẹ jẹ wipe ọna ọtọtọ ni wọn gba ṣe iṣẹ iranṣẹ wọn. Ki ni idi? Wọn ko níkan-ań-ṣe ni. Bi a tun ṣe ri ninu awọn ẹsẹ bibeli yẹn, ọna ti Johanu n gba ṣe iranṣẹ rẹ fi han pe ko bikita pupọ nipa ounjẹ, aṣọ, ilegbe tabi ibaṣepọ pẹlu awọn eniyan. O kan ṣa fẹ polongo ọrọ Ọlọrun si gbogbo orilẹ-ede ni, ki o si pese wọn fun Mesaya wọn. Boya wọn wa gbọ si lẹnu tabi wọn ko gbọ si lẹnu, ko bikita rara. Nitorina, awọn eniyan n pe ni aṣiwin ọkunrin. Eyi jasi pe, awawi wọn lati ma tẹwọ gba a ati ọrọ Ọlọrun ti o mu tọ wọn wa ni pe ko ma a ṣe bi eniyan gidi. (Wo: Máítù 3:4; Máàkù 1:6)

Ṣugbọn nigba ti Jesu de, ti O si bẹrẹ iṣẹ iranṣẹ tirẹ, gbogbo nkan ti Johanu kọ lati ṣe ni Oun ṣe. O jẹun. O mu. O ba awọn eniyan, pẹlupẹlu awọn ẹlẹṣẹ, ṣe pọ. A o wa ro wipe wọn yoo tẹwọgba nitoripe Oun ṣe bi eniyan gidi. Ṣugbọn dipo ti wọn yoo fi tẹwọgba ati ọrọ Ọlọrun ti O mu wa, nṣe ni awọn eniyan n pe ni alajẹbanu ati ọmutipara.

Ṣe iwọ naa wa ri wipe wọn ko níkan-ań-ṣe? Bẹẹni, wọn ko níkan-án-ṣe, wọn ko si tun ni lọkan lati mu Ọlọrun ni pataki. Nitorina, wọn le lo ohunkohun gẹgẹ bi awawi wọn fun sisa jina si ifẹ rẹ fun wọn, eyi ti yoo si pada jẹ ki wọn pa ara wọn run.

O wa ṣeni laanu pe ọrọ ko ti yipada loni rara. Iran wa ko ti yipada rara. A ko si níkan-ań-ṣe sibẹsibẹ. Nitorina, a le lo ohunkohun gẹgẹ bi awawi wa fun kikọ Ọlọrun silẹ. Fun apẹrẹ, mo ka ninu iroyin laipẹ yi nipa gbajumọ ọdọmọkunrin kan ti o sọrọ lori idi ti oun fi juwọ si ijọ ninu ifọrọjomitoro-ọrọ kan. Ki si ni idi rẹ? Gẹgẹ bi o ti ṣe sọ, nigba ti o wa ọkọ ayọkẹlẹ rẹ de ile-ijọsin rẹ ni kutukutu owurọ ọjọ isinmi kan, wọn dari rẹ lati lọ fidi ọkọ naa gunlẹ si ita. Ṣugbọn bi o ti ṣe n ṣe eyi lọwọ ni o ri wipe, nṣe ni wọn n dari awọn kan lara awọn ti o de lẹyin rẹ lati fi idi ọkọ ti wọn gunlẹ sinu ile. Ki ni idi? Idi ni wipe awọn ọkọ ti awọn wọnyi lowo-lori ju tirẹ lọ. Nitorina, dipo ti yoo fi gbe ọkọ rẹ si ita, nṣe ni o kan wa nkan rẹ pada lọ si ile. Lati igba yi, ẹwẹ, naa si ni ko ti lọ si ipade ijọ kankan mọ.

Ṣe o wa tọna lati ṣe bi eleyi si ẹnikẹni ninu ijọ kankan? Rara o! Ṣugbọn ti o ba jẹ wipe Ọlọrun ati igbala ọkan rẹ ni o n lepa, o ko ni fi aye gba irufẹ nkan bi eyi lati le ọ jina si ijọ. Amọ ṣa o, ti o ko ba níkan-ań-ṣe, ti o ko si ṣetan lati ṣẹ ifẹ Ọlọrun, o le lo ohunkohun, pẹlupẹlu nkan ti ko ni itumọ bi ọna ti a gba to awọn aga inu ijọ kan, gẹgẹ bi awawi rẹ lati sa jina si ijọ tabi lati ma paarọ ijọ bi ẹni n paarọ aṣọ.

Ki a ma fọrọgun, ọrọ Ọlọrun n tọ ọ wa bayi, o si n kilọ fun ọ pe ki o dẹkun lati ma a ṣe awawi fun àínikan-án-ṣe rẹ ni ti ṣiṣe ifẹ Ọlọrun. Idi si ni pe ko si awawi rẹ kankan ti yoo le yọ ọ kuro ninu ewu ni ọjọ ti Oluwa ba de lati ṣe idajọ gbogbo araye. Nitorina, kilọ fun ara rẹ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ kẹta ninu oṣu Owewe 2025. Adura mi ni pe ki eti rẹ ma tun lailai di si ohùn Ẹmi Ọlọrun, ki o ma ba a ṣegbe pẹlu aye okunkun yi.

Bi a ti ṣe ri ninu iwe Ifihan, ọkan lara awọn nkan ti Jesu Oluwa wa n sọ fun awọn ijọ rẹ ti O kọ lẹta si ni pe ẹnikẹni ti o ba ni eti ki o gbọ nkan ti Ẹmi Ọlọrun n sọ fun awọn ijọ. Eyi n sọ fun wa pe ko ki i ṣe gbogbo eniyan naa ni o ni eti lati gbọ ohun Ẹmi Ọlọrun, yala fun igbega tabi fun aabo wọn. Nkan ti awọn kan ni eti lati gbọ ni ohùn ara wọn tabi ohùn eṣu. Nitorina, irufẹ nkan yowu ti Ọlọrun le ma a sọ fun wọn nipasẹ Ẹmi rẹ, wọn ko le e gbọ.

Fun apẹrẹ, pẹlu gbogbo ikilọ ti Wolii Mikaiah fun Ahabu, ọba yi ko gbọran si lẹnu. Ọrọ rẹ ko tilẹ ri aye wọ eti rẹ lati yi i lọkan pada, ki a ba a le pa mọ kuro ninu iku ti o n duro de e ni oju ogun. Amọ ṣa o, ọrọ awọn wolii Ahabu wọ eti rẹ, o si ki i laya lati lọ si oju ogun ti yoo gba ẹmi rẹ. Ki ni idi? Awọn wolii wọnyi sọ nkan ti o fẹ gbọ fun un. (Wo: 1Awọn Ọba 22; 2Kironika 18)

Nitorina, ọkan lara awọn idi ti eti awọn eniyan ṣe ma n di si ohùn Ẹmi Ọlọrun ni pe kiki nkan ti wọn fẹ gbọ naa ni wọn fẹ gbọ. Ti wọn ba si nilo lati san owo fun ẹnikan lati sọ nkan ti wọn fẹ gbọ fun wọn, wọn yoo fi tayọtayọ san an. Abalajọ ti bibeli ṣe sọ wipe:

“Nitoripe ìgba yio de, ti nwọn kì yio le gba ẹkọ́ ti o yè kõro; ṣugbọn bi nwọn ti jẹ ẹniti eti nrìn nwọn ó lọ kó olukọ jọ fun ara wọn ninu ifẹkufẹ ara wọn.” (2Tímótì 4:3)

Wayi o, o wa ṣeeṣe ki iwọ naa jẹ ọkan lara awọn ti a n sọrọ nipa. Gbogbo awọn oniwaasu ati eniyan ti o n gbọ ọrọ wọn jẹ kiki awọn ti yoo sọ nkan ti o fẹ gbọ fun ọ. Ṣugbọn ṣe nkan ti o fẹ gbọ yi gan ni o nilo lati gbọ? Ti nkan ti o fẹ gbọ ko ba ki i ṣe nkan ti o nilo lati gbọ, a jẹ wipe o ko yatọ si Ahabu niyẹn. Nitorina, o ti n ṣi ilẹkun aye rẹ silẹ fun ewu. Ti o ba si kọ lati ronupiwada lasiko, o di dandan ki o run aye ati ọkan rẹ lọjọkan.

Nitorina, ki o to kọ ẹyin si ohun yowu ti ẹnikẹni le ma a sọ fun ọ, kọkọ bere lọwọ ara rẹ naa boya nkan ti ẹni na n sọ jẹ nkan ti o nilo lati gbọ tabi eyi ti o ko nilo lati gbọ. Ti o ba si jẹ ohun ti o nilo lati gbọ ni, ti o jẹ ohun ti yoo ṣe aye rẹ ni anfaani, ti yoo si tun darí rẹ̀ si ọna ti o yẹ, mọ wipe ohùn Ẹmi Ọlọrun ni o n ba ọ sọrọ. Nitorina, tẹwọgba, bi o tilẹ dun ọ. Eyi yio si jẹ ọgbọn fun ọ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Òwewè 2025. Adura mi ni pe ki Ọlọrun ma a fi ojoojumọ fi okun fun ọkan rẹ lati mu ọrọ rẹ ni pataki, ki o ba a le ma fi igba gbogbo ṣe aṣeyọri ninu ohun gbogbo ti o ba n ṣe, ni orukọ Jesu. Amin.

Bi a ti ṣe ri ninu bibeli, irufẹ ẹni yowu ti a le jẹ laye, Ọlọrun fẹ ki a mu ọrọ rẹ ni pataki. Ki ni idi? Idi ni pe nipasẹ ọrọ rẹ nikan ni a ṣe le ṣe aṣeyọri lotitọ laye, ki a si tun jẹ igbadun aṣeyọri wa. Nitorina, bi o ba tilẹ jẹ ọba lori awọn eniyan, o nilo ọrọ Ọlọrun lati jẹ ọba alaṣeyọri, ọba ti awọn ti o wa labẹ iṣakoso rẹ yoo ma a gberu si.

Wo ọrọ ilana ti Mose fun ẹnikẹni ti yoo ba jẹ ọba lori awọn eniyan Isiraẹli:

“Yio si ṣe, nigbati o ba joko lori itẹ́ ijọba rẹ̀, ki on ki o si kọ iwé ofin yi sinu iwé kan fun ara rẹ̀, lati inu eyiti mbẹ niwaju awọn alufa awọn ọmọ Lefi: Yio si wà lọdọ rẹ̀, on o si ma kà ninu rẹ̀ li ọjọ́ aiye rẹ̀ gbogbo: ki o le ma kọ́ ati bẹ̀ru OLUWA Ọlọrun rẹ̀, lati ma pa gbogbo ọ̀rọ ofin yi mọ́ ati ilana wọnyi, lati ma ṣe wọn: Ki àiya rẹ̀ ki o má ba gbega jù awọn arakunrin rẹ̀ lọ, ati ki o má ba yipada kuro ninu ofin na, si ọwọ́ ọtún, tabi si òsi: ki on ki o le mu ọjọ́ rẹ̀ pẹ ni ijọba rẹ̀, on, ati awọn ọmọ rẹ̀, lãrin Israeli.” (Ditarónómì 17:18-20)

Ki ni nkan akọkọ ti ẹnikẹni ti o ba di ọba lori awọn eniyan Isiraẹli gbọdọ ṣe? O gbọdọ gba ẹda iwe ofin Ọlọrun kan fun ara rẹ. Ki ni idi? Akọkọ, idi ni ki o ba a le fi ara rẹ jin fun kika ati ṣiṣe aṣaro ninu rẹ ni gbogbo ọjọ aye rẹ. Ekeji, idi ni ki o ba a le kiyesi lati ma a gbe ile aye rẹ ni ibamu pẹlu ọrọ Ọlọrun. Ti o ba si ṣe eyi, gẹgẹ bi Mose ti ṣe fi han, oun ati awọn arọmọdọmọ rẹ yoo ṣe rere, wọn yoo si tun jọba fun asiko ti o pẹ lori ilẹ naa.

Ṣe o wa ri bayi pe fun ẹnikẹni ti o jẹ ọba ni Isiraẹli gan lati ṣoriire ati lati ni ọpọlọpọ arọmọdọmọ rẹ gẹgẹ bi ọba lẹyin rẹ, o gbọdọ mu ọrọ Ọlọrun ni pataki. Ko le pa ọrọ rẹ ti tabi ki o sọ wipe oun ko raaye fun un. Aijẹbẹ, ijọba rẹ ko ni tọjọ.

O wa ṣeni laanu, gẹgẹ bi a tun ṣe ri ninu bibeli, pe ọpọ awọn ti o jọba lori awọn ọmọ Isiraẹli ni ko mu ọrọ Ọlọrun ni ọkunkundun. Nitorina, ijọba wọn ko tojọ. Dipo bẹ ẹ, nigba ti o to asiko kan, nṣe ni Ọlọrun ni lati ran gbogbo awọn eniyan naa lọ si igbekun nitori wọn. A si tun wa ri pe nkan kanna ni o n ṣẹlẹ laye ti a wa ninu rẹ loni. Ibikibi ti awọn adari ko ba ti mu ọrọ Ọlọrun ni pataki, wọn ko le ṣoriire. Dipo eyi, dandan ni ki wọn dari awọn eniyan wọn sinu oniruuru igbekun.

Ka mọ fọrọgun, koko nkan ti mo n sọ ni pe niwọn igba ti awọn ọba gan nilo lati mu ọrọ Ọlọrun ni pataki fun wọn lati ṣoriire laye, awa ti a ko wa ki i ṣe ọba ko gbọdọ ro wipe a le ṣoriire laye lalai mu ọrọ rẹ ni pataki. Nitorina, ti o ko ba i ti ma mu ọrọ Ọlọrun ni pataki, o nilo lati ronupiwda fun anfaani ara rẹ. Lọna wo? Akọkọ, wa ẹda bibeli fun ara rẹ ti o le ka yekeyeke. Ekeji, fi ara rẹ jin lati ma a ka a ati lati ma ṣe aṣaro ninu rẹ. Bi o ba si ṣe n ṣe eyi, ko ni pẹ rara ti iwọ naa yoo fi ri wipe o n gbe aye rẹ ni ibamu pẹlu nkan ti Ọlọrun n sọ fun ọ.

Wayi o, ẹnikẹni ti o ba n fi ojoojumọ gbe aye rẹ ni ibamu pẹlu nkan ti Ọlọrun sọ di dandan ki o ṣe aṣeyọri laye. O le bẹrẹ ni ibi kekere laye bi Dafidi. Sibẹsibẹ, Ọlọrun yoo ri daju pe o ṣoriire. O si tun le ba ọpọlọpọ idojukọ pada laye bi Josefu tabi Jobu. Ọlọrun yoo si tun ri daju pe o ṣoriire. Nitorina, irufẹ ipo yowu ti o le wa laye lọwọlọwọ yi, mu ọrọ Ọlọrun ni pataki. Iṣoriire otitọ ati eyi ti o n bani kalẹ yoo si jẹ tirẹ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa ati Olurapada wa. Inu mi dun lati ki ọ kaabọ sinu ọsẹ keji ninu ọsu Òwewè 2025. Adura mi ni pe ki Ọlọrun fooro gbogbo ete eṣu lodi si ọ ninu ọsẹ naa ati ni gbogbo eyi ti o ku ninu ọdun naa, ki gbogbo ete rere rẹ fun aye rẹ fun ọdun naa ba a le jẹ mimuṣẹ lẹkunrẹrẹ. Amin.

Nigba ti Abusalomu bẹrẹ ọtẹ rẹ, ọkunrin kan ti a n pe ni Ahitofeli darapọ mọ. Ta si wa ni ọkunrin yi? Ọrẹ Dafidi, iyẹn baba Abusalomu, ni. Yatọ si pe o jẹ ọrẹ Dafidi, o tun wa jẹ ọkan lara awọn ti o n gba a nimọran. Amọ ṣa o, ọkunrin yi kọja ẹni ti o kan ma n gba eniyan nimọran. O jẹ ẹnikẹni ti Ọlọrun diidi fun ni ẹbun lati gba awọn eniyan nimọran. Wo nkan ti a sọ ninu bibeli nipa rẹ:

“Imọ̀ Ahitofeli ti ima gbà nijọ wọnni, o dabi ẹnipe enia mbere nkan li ọwọ́ Ọlọrun: bẹ̃ni gbogbo ìmọ Ahitofeli fun Dafidi ati fun Absalomu si ri.” (2Sámúẹ́lì 16:23)

Njẹ o ri bayẹn? Lilọ si ọdọ Ahitofeli fun imọran ni awọn ọjọn wọnni dabi lilọ si ọdọ Ọlọrun funrarẹ fun imọran. Iyẹn jasi pe, o ko le gbe nkan gbagi tabi ki o kuna niwọn igba ti o ba n tẹle imọran rẹ. Abalajọ ti ara Dafidi ko ṣe balẹ nigba ti o gbọ wipe ọkunrin yi ti darapọ mọ Abusalomu lati ditẹ mọ ọn. O mọ wipe niwọn igba ti Abusalomu ba si n gbọran si i lẹnu, oun ni yoo ma a bori. Ka si to wi, ka to fọ, yoo ti fi idi ara rẹ mulẹ ṣinṣin gẹgẹ bi ọba lori Isiraẹli.

Nitorina, Dafidi gbadura si Ọlọrun lori ọrọ naa. Wo nkan ti a sọ ninu bibeli lori eyi:

“Ẹnikan si sọ fun Dafidi pe, Ahitofeli wà ninu awọn ọlọ̀tẹ̀ Absalomu. Dafidi si wipe, Oluwa, emi bẹ̀ ọ, sọ ìmọ Ahitofeli di asan.” (2Sámúẹ́lì 15:31)

Ki ni Dafidi ni ki Ọlọrun ṣe? O ni ki O sọ imọran Ahitofeli di ọrọ omugọ ni eti Abusalomu. Ki ni idi? Idi ni wipe ọna kan ṣoṣo fun Abusalomu lati fidirẹmi niyẹn. Ṣe Ọlọrun wa da a lohun tabi ko da lohun? O da a lohun. O lo ọkunrin kan ti a n pe ni Huṣai lati sọ imọran Ahitofeli di ọrọ omugọ ni eti Abusalomu ati awọn agbaagba Isiraẹli ti o wa pẹlu rẹ. Nitorina, Abusalomu pada kuna ninu ija fun itẹ-ọba naa. Ahitofeli funrarẹ naa si pada pokunso. (Wo: 2Samuẹli 17&18)

O wa yẹ ki o ṣakiyesi pe Dafidi ko gbadura pe ki Ọlọrun pa Ahitofeli tabi Abusalomu, bi o tilẹ jẹ wipe awọn mejeeji ni wọn n lepa ẹmi ati itẹ rẹ. Dipo eyi, nṣe ni o gbadura pe ki Ọlọrun fooro ete wọn. Nigba ti Ọlọrun si fooro ete wọn, nṣe ni wọn padanu ẹmi wọn.

Nibakanna, a ko nilo lati gbadura pe ki Ọlọrun pa ẹnikẹni ti o n ṣiṣẹ lodi si wa. Nṣe ni a nilo lati sọ fun pe ki O fooro ete wọn, ki O sọ nkan ija yowu ti wọn n lo lodi si wa di korofo. Yoo si da wa lohun. Ti ẹnikẹni ba wa ku tabi jẹ iya gidigidi nigba ti Ọlọrun n dahun adura wa, a ko ni bi wa lere ẹjẹ wọn.

Nitorina, ma ṣe iyọnu nitori awọn ti wọn n ṣiṣẹ lodi si o, ti wọn n tiraka lati re ọ jabọ tabi lati pa ọ run, bi o ti wu ki iye wọn pọ to. Dipo eyi, nṣe ni ko gbadura pe ki Ọlọrun so ohun yowu ti wọn ba n sọ tabi ṣe lodi si ọ di asan. Yoo si da ọ lohun, yoo si tun ri daju pe a ko doju ti ọ.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọjọ ti o pari oṣu yi ati pẹlu sinu ọsẹ akọkọ ninu oṣu kẹṣan odun yi, iyẹn oṣu Owewe 2025. Adura mi ni pe ki Ọlọrun ri daju pe ohun rere gbogbo ti O ni ni ipamọ fun ọ ni awọn oṣu ti o ku ninu ọdun naa jẹ tirẹ lotitọ, ni orukọ Jesu. Amin.

Bi a ti ṣe n bẹrẹ ọsẹ tuntun yi, mo fẹ gbọ ọ niyanju pẹlu ọrọ Apọsiteli Pọọlu ti o sọ pe:

“Ki ẹ má si da ara nyin pọ̀ mọ́ aiye yi: ṣugbọn ki ẹ parada lati di titun ni iro-inu nyin, ki ẹnyin ki o le ri idi ifẹ Ọlọrun, ti o dara, ti o si ṣe itẹwọgbà, ti o si pé.” (Róòmù 12:2)

Ki ni idi ti o fi sọ fun wa pe ki a ma ṣe ba aye yi rẹ mọ? Idi naa ni pe a ti di ọmọ Ọlọrun. Ki a to di ọmọ Ọlọrun, nṣe ni a n gbe aye wa ni ibamu pẹlu irin awọn ẹni ti aye yi. A n sọrọ bi wọn ṣe n sọrọ. A n ronu bi wọn ti ṣe n ronu. A n mura bi wọn ti ṣe n mura. A si tun n le awọn nkan ti wọn n le.

Ṣugbọn nibayi ti a ti di ọmọ Ọlọrun, nṣe ni o yẹ ki a ma gba igbe aye ti o yatọ. Bẹẹni, nṣe ni o yẹ ki a ma gbe aye wa bi ọmọ Ọlọrun dipo bi ọmọ eṣu. A ko wa ni gbe aye wa yatọ si ti awọn ti aye yi niwọn igba ti a ba si n ronu bi wọn ti ṣe n ronu. A le ma lọ si awọn ipade ṣọọsi o, ki a ma gbadura ni orukọ Jesu ati ki a tilẹ tun ma gbe bibeli kaakiri. Ṣugbọn niwọn igba ti a ba si n ronu bi ti awọn ti aye yi, a ko ni gbe igbe aye ti o yatọ si ti wọn ninu isọrọ wa, imura wa ati bi a ti ṣe n ṣe si awọn miran.

Ṣe o ri, awọn eniyan ma n gbe aye wọn ni ibamu pẹlu ironu wọn ni. Nitorina, ti o ba fẹ ki wọn yi bi wọn ṣe n gbe aye pada, o o nilo lati yi bi wọn ti ṣe n ronu pada. Idi si ni yi ti Pọọlu ko kan ṣe sọ fun wa pe ki a ma ba aye yi rẹ mọ, o tun sọ fun wa pe ki a gba iyipada aye wa nipa titun ironu wa ṣe. Ki ni yoo mu iyipada ba aye wa? Yiyi ironu wa pada ni.

Bawo wa ni a ṣe le yi ironu wa pada? Bawo ni a ṣe le fọ ironu wa mọ, ki a ba le ma ronu yatọ si bi awọn ti aye yi ṣe n ronu? Nipa fifi ara wa jin fun ọrọ Ọlọrun ni. Bi a ba ṣe n fi ara wa jin fun ọrọ rẹ si naa ni a o ṣe bẹrẹ si ni ma a ronu yatọ si – a o bẹrẹ si ni ma a ronu ni ibamu pẹlu ifẹ rẹ fun wa. Bi a ba si ṣe n ronu ni ibamu pẹlu ifẹ rẹ fun wa si naa ni a o ṣe yirapada si lati da ẹni ti O fẹ ki a da.

Pọọlu, fun apẹrẹ, ti o fun wa ni ọrọ iyanju Ẹmi yi ti kọkọ fi igbakan ri jẹ aṣekupani ati ika eniyan. Sibẹsibẹ, o wa pada di ọkan lara awọn Kiristiẹni ti o ga julọ ti o ti gbe orilẹ-aye yi. Ki a tilẹ sọ otitọ, iriri iyipada ti aye rẹ ni da a loju debi wipe o le sọ fun awọn Kirisitiẹni miran pe ki wọn ma fi oun ṣe awokọṣe (1Kọ́ríntì 11:1). Bawo ni eyi ṣe ṣẹlẹ? O ṣẹlẹ lati ipasẹ ifarajin rẹ fun ọrọ Ọlọrun. Ọrọ Ọlọrun ni o yi ironu rẹ pada. Bi ọrọ Ọlọrun si ṣe n yi ironu rẹ pada naa ni aye rẹ n gba iyipada. Nigba ti o si wa to asiko kan, gbogbo awọn ti o wa ni ayika rẹ wa ri wipe o ti di ẹniyan ọtọ nitootọ – o ti dabi Kirisiti.

Wayi o, niwọn igba ti Pọọlu ti funrarẹ ni iriri awọn nkan wọnyi, o wa n sọ fun awa naa pe ki a ṣe amulo ọrọ Ọlọrun lati yi ironu wa pada. Bayi ni aye wa yoo ṣe gba iyipada lati jẹ nkan ti Ọlọrun fẹ ki wọn jẹ. Nitorina, fi ara rẹ jin fun ọrọ Ọlọrun ki o ba le yi bi o ti ṣe n ronu pada. Ki o si to mọ nkan ti o n ṣẹlẹ, aye rẹ yoo ti yipada lati da nkan naa ti Ọlọrun fẹ ki o da.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ ti o kẹyin oṣu Ògún 2025. Adura mi si ni pe ki Ọlọrun mojuto gbogbo ẹrù ti Satani n lepa lati lo lati pa ọ run tabi lati kun aye rẹ pẹlu inira. Àmín.

Ki ni idi ti mo fi gba adura yi fun ọ? Idi naa ni pe ko si ẹrù ti o n gbe ti Ọlọrun ko le mojuto fun ọ. Ki a tilẹ sọ otitọ, Ọlọrun ko fẹ ki o da gbe ẹrù aye rẹ kankan gbe funrarẹ. Nkan ti O fẹ ni pe ki O ba ọ gbe ọkọọkan ninu ẹrù rẹ fun ọ. Iwọ naa wo nkan ti Dafidi sọ lori eyi ninu ọkan ninu awọn saamu rẹ:

“Olubukun ni Ọlọrun, si Ọlọrun Olugbala wa, ẹni ti o n fi ojojumọ gba ẹru wa ru.” (Saàmù 68:19)

Njẹ o ri bayẹn? Bawo ni Ọlọrun ṣe n ba wa gbe ẹrù wa si? Ṣe fun igba diẹ ni? Rara o! Ṣe fun awọn ọsẹ tabi oṣu melokan ni? Rara o! Dipo bẹẹ, nṣe ni O n ba wa gbe ẹrù wa lojoojumọ. Ki si ni idi ti O fi n ba wa gbe wọn ni ojumọ kọọkan? Idi ni pe O fẹran wa, O si n fẹ ṣe ikẹ wa. (Cf. 1Pétérù 5:7)

O wa ṣeeni laanu pe ọpọ ninu wa ni ko mọ pe Ọlọrun ma n fi ojoojumọ gba ẹrù wa ru. A kan ro wipe awọn nkan rere ti o n ṣẹlẹ si wa laye kan ṣa dede n ṣẹlẹ ni ati wipe awọn nkan buruku ti ko ṣẹlẹ si wa ko ṣẹlẹ si wa nitori ododo, iwa-bi-Ọlọrun tabi ikiyesara wa. Ṣugbọn awọn nkan rere ti o n ṣẹlẹ si wa n ṣẹlẹ si wa nitoripe Ọlọrun n gba ẹrù wa ru ni. Nibakana, awọn nkan buruku ti ko ṣẹlẹ si wa ko ṣẹlẹ si wa nitoripe Ọlọrun n ṣiṣẹ fun aabo wa ni.

Amọ ṣa o, Ọlọrun fẹ ki a mọ daju-ṣaka pe idi ti awọn ẹrù ti aye n ju si wa ko ṣe ti pa wa run ni pe Oun n ba wa gba wọn ru. Nitorina, awọn ẹrù aye wa kan wa ti O le ma fi ọwọ kan rara ti ko ba ṣe wipe a mọ-ọn-mọ fa wọn le e lọwọ lati mojuto fun wa. Njẹ a o wa fa awọn ẹrù wa le lọwọ lati mojuto fun wa bi? Tabi nṣe ni a o tẹsiwaju lati ma tiraka lati gbe wọn funralara wa titi wọn yoo fi tẹ wa rẹ mọlẹ?

Fun ọpọ ọdun, Jakọbu n gbe ẹrù awọn ẹṣẹ rẹ si arakunrin rẹ, Isau, funralara rẹ. Diẹ si lo ku ki ẹrù naa tẹ rẹ mọlẹ. Ṣugbọn ni ọjọ ti o fa ẹrù naa le Ọlọrun lọwọ ninu adura gan-an naa ni o gba itusilẹ kuro lọwọ rẹ. Ọlọrun mojuto ẹrù naa ni ọna ti o jẹ wipe oun gan ko le sọ idi naa pato ti Isau, ti o ṣigun jade lati wa kọ lu oun ati idile rẹ, fi kan dede bẹrẹ si ni fi ifẹ han si, ti o si tun n sọ ọrọ itunu si. (Wo: Jẹ́nẹ́sísì 32-33)

Ni kukuru, eyi n fi han wa pe ti ko ba ṣe wipe a ba kọ lati ma a fa awọn ẹrù wa le Ọlọrun lọwọ ninu adura, a le ma mọ irufẹ itura ati ibalẹ-ọkan ti O le fi fun wa. Bẹẹni, o le dabi ẹni wipe ko si ẹnikẹni ayafi iwọ nikan ti o le ba ọ gbe ẹrù naa ti o n gbe fun ọ. Ṣugbọn okodoro ibẹ ni pe iwọ funrarẹ ko le gbe ẹrù kankan ti Ọlọrun ko ba ba ọ gbe. Nitorina, ma ṣe jẹ ki ẹrù kankan, boya ti ẹṣẹ, ibẹru, aini tabi aisan ni, pa ọ run. Dipo bẹ ẹ, fa a le Ọlọrun lọwọ. Idi si ni pe O fẹran rẹ, O si ti fi ara rẹ jin lati ma a gbe gbogbo ẹrù rẹ fun ọ ni ojoojumọ. Njẹ ki o ni iriri asiko itura ti o ga, bi o ti ṣe n ṣe eyi, ni orukọ Jesu. Àmín.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ti o ga ni mo ki ọ kaabọ sinu ọsẹ miran ninu oṣu Ògùn 2025. Adura mi si ni pe ki Ọlọrun ma a fi ojoojumọ fun ọ ni okun ninu ọsẹ naa ati ni gbogbo iyoku ọdun aye rẹ lati gbe igbe aye ti inu rẹ dun si gidigidi. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju pẹlu awọn ọrọ Pọọlu wọnyi ti o sọ wipe:

“Ṣugbọn kọ̀ ọrọ asan ati itan awọn agba obinrin, si mã tọ́ ara rẹ si ìwa-bi-Ọlọrun. Nitori ṣíṣe eré ìdaraya ní èrè diẹ, ṣugbọn ìwa-bi-Ọlọrun li ère fun ohun gbogbo, o ni ileri ti aiye isisiyi ati ti eyi ti mbọ̀.” (1Tímótì 4:7-8)

Ki ni nkan akọkọ ti apọsiteli yi sọ fun wa? Oun naa ni pe ki a ma ṣe fi asiko wa ṣofo lori awọn itan ti ko gbe iwa-bi-Ọlọrun larugẹ ati ti ko wa ni ibamu pẹlu otitọ ti Ọlọrun n sọ fun wa. A si ni ọpọlọpọ irufẹ awọn itan yi lati aṣa kan de aṣa miran. Wọn dabi igba ti wọn n sọ otitọ lori aye nitoripe wọn ti di àtẹnudẹ́nu fun ọpọlọpọ iran awọn eniyan. Ṣugbọn wọn ko ki i ṣe otitọ rara, nitoripe wọn lodi si nkan ti Ọlọrun n sọ fun wa nipasẹ Iwe mimọ rẹ. Ti a ko ba si fẹ ki wọn pa aye ati ọkan wọn run, a gbọdọ takete si wọn.

Nkan ekeji ti Pọọlu sọ fun wa ninu awọn ẹsẹ bibile yẹn ni pe ki a tọ ara wa si iwa-bi-Ọlọrun. Ki ni idi? Idi akọkọ ni pe iwa-bi-Ọlọrun ki i ṣadede waye. Lotitọ, ọmọ Ọlọrun ni wa, a si tun ni nkan ti o n je ki eniyan gbe igbe aye iwa-bi-Ọlọrun ninu wa (2Pétérù 1:3). Amọ ti a ko ba fi ara fun awọn nkan ti yoo gbe iwa-bi-Ọlọrun larugẹ, iwa-bi-Ọlọrun ko ni jẹyọ ninu aye wa.

O wa ṣeni laanu pe ọpọ ọmọ Ọlọrun ni ko mọ eyi. Wọn ro wipe ti eniyan ba ti di atunbi, ṣadede ni awọn ti o wa ni ayika rẹ yoo bẹrẹ si ni ri bi ẹni-bi-Ọlọrun. Ṣugbọn eyi ko ri bẹ rara. Ti ẹni naa ki ba fi ara rẹ jin fun ọrọ Ọlọrun, fun adura gbigba ati ibaṣepọ pẹlu awọn eniyan Ọlọrun, iwa-bi-Ọlọrun ko ni jẹyọ ninu aye rẹ. Yatọ si iyẹn, ti ẹni naa ko ba bẹrẹ si ni mọ-ọn-mọ gbe igbesẹ lati ṣe awọn nkan ti o tọ ati lati yẹra fun awọn nkan ti ko tọ, awọn eniyan ko ni mọ si ẹni-bi-Ọlọrun. Nitorina, ti o ba fẹ ki awọn eniyan ri ọ gẹgẹ bi ẹni-bi-Ọlọrun, o nilo lati mọ-ọn-mọ bẹrẹ si ni tọ ara rẹ lati ma ṣe awọn nkan ti yoo gbe iwa-bi-Ọlọrun larugẹ ninu aye rẹ.

Idi miran ti Pọọlu tun ṣe sọ fun wa pe ki a tọ ara wa si iwa-bi-Ọlọrun ni pe awọn anfaani ti o sọrọ mọ pọ jọjọ. Awọn anfaani yi ko kan ki wa ṣe ti aye yi nikan; wọn tun jẹ anfaani ayeraye. Iwọ naa gba eyi ro: awọn iṣoro kan wa ti o ko le ni ninu aye yi, ti o ba n gbe igbe aye iwa-bi-Ọlọrun. Fun apẹrẹ, ti o ko ba ki i ṣe ọmọti, awọn irufẹ idojuti kan wa ti o ko le ni iriri wọn laye. Ṣugbọn ti o ba jẹ ọmọti, o di dandan ki o ma dojuti ara rẹ loore-koore.

Nitorna, ti o ko ba fẹ awọn iṣoro kan ninu aye rẹ, o kan nilo lati tọ ara rẹ si iwa-bi-Ọlọrun ni. Lafikun, ti o ba fan iyin Ọlọrun ninu aye yi ati nigba ti o ba de ọrun, nṣe ni ko o ma a fi ojoojumọ tọ ara rẹ si iwa-bi-Ọlọrun. Njẹ ki Ẹmi Ọlọrun fun ọ ni okun lati ṣe bẹ ẹ gẹgẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)