Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ kẹta ninu oṣu Belu 2025. Adura mi si ni pe ki Ọlọrun ma a fi ojoojumọ fun ọ ni okun lati mu ọrọ rẹ ni ọkunkundun, ki o ba a le so eso ti o yẹ ki o so ninu aye rẹ. Amin.

Jakọbu, ninu lẹta rẹ, sọ eyi fun wa: “Ṣugbọn ki ẹ jẹ oluṣe ọ̀rọ na, ki o má si ṣe olugbọ́ nikan, ki ẹ mã tàn ara nyin jẹ.” (Jákọ́bù 1:22) Ṣe ko ki i ṣe nkan ti o dara ni lati gbọ ọrọ Ọlọrun ni? Nkan ti o dara ni lati ṣe bẹ ẹ. Johanu tilẹ sọ fun wa ninu iwe Ifihan pe awọn odiwọn ibukun kan wa ti o ma n tẹle kika ọrọ Ọlọrun tabi gbigbọ ọ (Ìfihàn 1:3).

Amọ ṣa o, gbigbọ ọrọ Ọlọrun tabi kika a ko ma to. A tun nilo lati ṣe nkan ti ọrọ naa n sọ. Aijẹbẹ, ifẹ Ọlọrun ko ni wa si imuṣẹ ninu aye wa tabi lorilẹ aye. Niwọn igba ti ifẹ rẹ ko ba si ma wa si imuṣẹ ninu aye wa tabi ninu aye ti a wa, a ko le ni iriri alaafia ati ayọ ti a n fẹ ni.

Jesu Oluwa wa na sọ itan kan fun wa ni ibamu pẹlu ọrọ yi. O da lori baba kan ti o ni ọmọkunrin meji, ti o si sọ fun ọmọkunrin rẹ akọkọ, “Lọ ṣiṣẹ ninu ọgba ajara loni.” Nṣe wa ni ọdọmọkunrin naa sọ wipe oun kọ ni lọ. Nitorina, baba yi lọ si ọdọ ọmọkunrin rẹ keji, o si sọ fun pe, “Lọ ṣiṣẹ ninu ọgba ajara loni.” Ọdọmọkunrin naa si sọ wipe oun o lọ. Ṣugbọn ko lọ rara. Ọmọkunrin baba yi akọkọ, ẹwẹ, wa pada ni iyipada ọkan, o si lọ ṣiṣẹ ninu ọgba ajara baba rẹ. (Wo: Mátíù 21:28-31)

Ibere wa ni pe, “Tani o ṣe ifẹ baba rẹ ninu awọn ọdọmọkurin mejeeji yi?” Ọmọkunrin baba yi akọkọ ni o ṣe ifẹ rẹ. Ọmọkunrin rẹ keji ti o ṣe bi ẹni pe oun jẹ onigbọran ọmọ ko ṣe ifẹ baba rẹ rara. Nitorina, ti baba yi ba fẹ pin ẹnikẹni lere fun ṣiṣe ifẹ rẹ lọjọ naa, ọmọkunrin rẹ akọkọ ni yoo pin lere, ko ki i ṣe ọmọkunrin rẹ keji.

O wa ṣeni laanu pe, pupọ ninu wa ni o dabi ọmọkunrin baba yi keji. Nigba ti ọrọ Ọlọrun ba n tọ wa wa, nṣe ni a o ma mi ori wa ni ibamu pẹlu ọrọ naa, ti a o si tun ma pariwo fun ayọ nigba miran nitori nkan ti Ọlọrun n sọ fun wa. Ṣugbọn ti o ba di ki a ṣiṣẹ tọ nkan ti a n gbọ, ọtọ ni nkan ti a o ma ṣe. Wa gbiyanju a ti wo bi eyi yoo ṣe ma dun Ọlọrun lọkan to.

Ki a ma fọrọgun, Jakọbu sọ fun wa pe awọn ti o ba n ṣe ba yi kan n tan ara wọn jẹ ni. Idi si ni pe ọrọ Ọlọrun ti wọn ko ṣiṣẹ le lori ko le ṣe aye wọn tabi aye ti wọn wa ninu rẹ ni anfaani. Ko ni yi aye wọn tabi ọrọ aye wọn pada. Nitorina, nṣe ni wọn kan n fi akoko, okun ati owo ti wọn n ko sori gbigbọ tabi kika ọrọ naa ṣofo.

O wa ṣeeṣe ki o jẹ wipe bi iwọ naa ṣe ri ni eyi. O ma n ṣaba ṣe bi ẹni pe o n fọwọsowọpọ pẹlu Ọlọrun ti ọrọ rẹ ba n tọ ọ wa. Ṣugbọn nkan ti o wa ni ọkan rẹ ni iwọ yoo papa ṣe, ko ki i ṣe nkan ti O fẹ ki o ṣe. Nṣe ni o kan n tan ara rẹ jẹ. Nitorina, gbogbo asiko, okun ati owo ti o n na lori gbigbọ ati kika ọrọ rẹ di dandan ki o ṣofo. Idi si ni pe ọrọ Ọlọrun ti o ko ni ṣiṣẹ le lori ko le yi aye rẹ tabi igba pada fun ọ.

Wayi o, emi ko fẹ fi akoko, okun ati owo ti mo n na lori gbigbọ tabi kika ọrọ Ọlọrun ṣofo mọ. Dipo eyi, mo fẹ ki ọrọ rẹ ṣiṣẹ ninu aye mi, ki o si ṣe aye mi ni ohun gbogbo ti O fẹ ki o jẹ. Idi si niyi ti ma a fi ma fi ojoojumọ bere fun okun lati ma kan jẹ olugbọ ọrọ rẹ lasan ṣugbọn oluṣe ọrọ rẹ pẹlu. Njẹ iwọ naa yoo ṣe bẹẹ gẹgẹ bi? Ti iwọ naa yoo ba ṣe bẹẹ gẹgẹ, njẹ ọrọ rẹ ti o n gbọ ko tun ni ṣofo ninu aye rẹ mọ ṣugbọn yoo ma a so eso ti Ọlọrun fẹ ri ninu rẹ.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu ọsẹ miran ninu oṣu Belu 2025. Adura mi si ni pe ki Ọlọrun ma a fi ojoojumọ ṣe ọ yẹ pẹlu ohun gbogbo ti o nilo lati ṣe amulo ti o peye awọn ẹbun rẹ ninu aye awọn iranṣẹ rẹ ti o wa ninu aye rẹ, ki o ba a le jere awọn nkan ti O ran wọn lati ṣe ninu aye rẹ lẹkunrẹrẹ. Amin.

Jesu Oluwa wa fi igba kan sọ nkan yi fun awọn eniyan ilu-abinibi rẹ:

“Ati adẹtẹ̀ pipọ ni mbẹ ni Israeli nigba woli Eliṣa; kò si si ọkan ninu wọn ti a wẹnumọ́, bikoṣe Naamani ara Siria.” (Lúùkù 4:27)

Ki ni idi ti O ṣe sọ eyi? O sọ ọ lati fi han wa pe ko ki i ṣe nkan tuntun ni fun awọn ti o sunmọ awọn ẹni-ami-ororo Ọlọrun lati má jere pupọ tabi rara lati ara oore-ọfẹ Ọlọrun ti o wa lori aye wọn. Ki ni idi? Idi ni pe wọn ma n ṣaba fi aye gba àrífín lati di wọn lọwọ lati ba awọn eniyan wọnyi lo lọna ti o yẹ.

Bi a ti ṣe ri ni ti ọrọ Eliṣa, eyi ti Jesu mẹnuba ninu ẹṣẹ bibeli ti o wa loke yẹn, bi o tilẹ jẹ wipe ọpọlọpọ adẹtẹ ni o wa ni Isiraẹli ni asiko rẹ, ko wo ọkankan ninu wọn san. Ṣe nitoripe ko ni agbara Ọlọrun to ni ko ṣe wa wo wọn san ni? Rara o! Idi ni pe wọn ko ka agbara Ọlọrun ti o wa ninu rẹ si to lati wa sọdọ rẹ fun iwosan. Ṣugbọn nigbati Namani, ẹni ti o jẹ ajeji patapata, wa sọdọ rẹ lati gba iwoṣan fun ẹtẹ rẹ, ọjọ kanna gan-an ni a wosan. Eyi tunmọ si pe ti awọn adẹtẹ ti o wa ni Isiraẹli naa ba wa sọdọ rẹ fun iwosan ni, a ko ba wo awọn naa san kuro ninu ẹtẹ wọn. (Wo: 2Àwọn Ọba 5)

Nibakanna, nigba ti Jesu lọ si ilu-abinibi rẹ, ko le ṣe iṣẹ iyanu ti o ga pupọ nibẹ. O si wa ti ṣe ọpọlọpọ iṣẹ iyanu ti o ga ni ọpọlọpọ ibimomiran ki O to wa sibẹ. Ki wa ni idi ti ko ṣe le ṣe ọpọ iṣẹ iyanu ni aarin wọn? Idi naa ni pe wọn ko ka oore-ọfẹ Ọlọrun ti o wa ninu aye rẹ si. Nitorina, wọn ko le tẹwọgba ati jẹgbadun ibukun Ọlọrun ti O mu wa fun wọn. (Wo: Máàkù 6:1-6)

O wa ṣeni laanu pe ọpọ awọn onigbagbọ loni naa ni o n padanu didara Ọlọrun ti o le e jẹ ti wọn nitoripe wọn ko ka oore-ọfẹ rẹ ti o wa ninu aye awọn iranṣẹ rẹ ti o n jiṣẹ fun wọn si to tabi rara. Awọn miran ti ko sunmọ awọn iranṣẹ Ọlọrun wọnyi le ma a jẹgbadun oore-ọfẹ Ọlọrun ninu aye wọn ni awọn ọna ti o ga, ki wọn si tun ma jẹ awọn ẹri iyanu. Ṣugbọn awọn ti wọn n ri wọn lore-koore le ma ma jẹgbadun pupọ didara Ọlọrun nipasẹ wọn. Idi si ni pe wọn ti fi aye gba arifin lati di wọn lọwọ lati ba wọn ṣe pọ ni awọn ọna ti yoo jẹ ki Ọlọrun le tipasẹ wọn bukun fun wọn lọna ti o ga.

Ti o ba wa jẹ wipe iwọ naa ko jẹgbadun didara Ọlọrun lọna ti o ga nipasẹ awọn iranṣẹ rẹ ti o wa ninu aye rẹ, o le fẹ yẹ ara rẹ wo. O ṣeeṣe ki o jẹ wipe o ti fi aye gba arifin lati di ọ lọwọ lati ba wọn ṣe pọ ni awọn ọna ti yoo jẹ ki oore-ọfẹ Ọlọrun ti o wa ninu aye wọn bukun fun ọ lalai ni idena. O wa ni lati ronupiwada lẹsẹkẹsẹ, ki o si bẹrẹ si ni ba wọn ṣe pọ pẹlu ìfẹ́, ìgbàgbọ́ ati ọ̀wọ̀. Nipa ṣiṣe eyi, awọn ilẹkun oore-ọfẹ Ọlọrun ti o wa ninu aye wọn yoo le jẹ ṣiṣi silẹ fun igbadun rẹ lailai si idiwọ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: Ki oore-ọfẹ, aanu ati alaafia pọ si fun ọ ni ilọpo-ilọpo lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu oṣu kọkanla ọdun yi, iyẹn oṣu Belu 2025. Adura mi si ni pe ki Ọlọrun ṣi oju rẹ lati ri awọn igbesẹ ti o tọ fun ọ lati gbe ki o ba a le ṣe amulo wiwa rẹ ninu aye rẹ fun aluyọ rẹ ni ibi yowu ti a ti n di ọ lọwọ laye. Amin.

Bi a ti ṣe ri ninu bibeli, lẹyin iku Usa, ọkunrin naa ti Ọlọrun lupa nitori ti o fọwọkan Apoti Ẹri, Dafidi pinnu lati gbe Apoti naa lọ si ile ọkunrin kan ti a n pe ni Obedi-Edomu. Idi si ni pe ẹru nkan ti o le ṣẹlẹ si awọn ara ile rẹ, ti a ba gbe Apoti naa wa si ọdọ wọn, ba a. Nitorina, ko ki i ṣe nitori inu-ire ni a fi gbe Apoti naa wa si ile Obedi. Dipo bẹẹ, nitoripe Dafidi ati awọn eniyan rẹ ri ṣiṣe eyi gẹgẹ bi ọna lati bọ lọwọ ibinu Ọlọrun ni. (Wo: 2Sámúẹ́lì 6:1-10)

Amọ ṣa o, si iyalẹnu wọn, lẹyin igba ti Apoti naa ti wa ni ọdọ Obedi-Edomu fun oṣu mẹta, iroyin tọ Dafidi wa pe Oluwa ti bukun fun ile ọkunrin naa ati ohun gbogbo ti o ni nitori Apoti rẹ ti o wa pẹlu rẹ. Wayi o, irufẹ iroyin bayi ko ṣa le dede tan kalẹ ti ko ba jẹ wipe iṣoriire Obedi-Edomu jẹ agbaayanu. Ṣugbọn iṣoriire rẹ yi jẹ agbaayanu, nitoripe o yara, o si pọ lọpọ-lọpọ, eyi ti o gba oṣu mẹta pere fun gbogbo awọn ti o wa ni ayika rẹ lati mọ pe o ti fi ipo eniyan lasan silẹ lati di ọlọrọ. (Wo: 2Sámúẹ́lì 6:11-15)

Nitorina, Dafidi ko fi asiko ṣofo rara lati lọ gbe Apoti naa kuro ni ile Obedi-Edomi wa si ile oun tikararẹ. Bi o tilẹ wa jẹ wipe a le ma le sọ wipe eyi ko dara, a ko ri akọsilẹ rẹ ninu bibeli pe oun naa ni iriri irufẹ iṣoriire ti Obedi-Edomu ni, lẹyin igba ti o gbe Apoti Oluwa wa si ile rẹ. Ki ni idi? A ko fun wa ni esi kankan si eyi ninu bibeli.

Lafikun, a ko ni akosilẹ rẹ ninu bibeli pe Abinadabu, ọkunrin ti Apoti naa wa ni ile rẹ ki a to gbe lọ si ile Obedi-Edomu, ni iriri irufẹ iṣoriire ti Obedi-Edomu ni, bi o tilẹ jẹ wipe Apoti naa wa ni ile rẹ fun ọpọlọpọ ọdun. Dipo eyi, nṣe ni o tun padanu ọkan lara awọn ọmọkunrin rẹ, Usa, nitori Apoti naa. O ma ṣe o! (Wo: 1Sámúẹ́lì 7:1-2; 2Sámúẹ́lì 6:3)

Ki wa ni o fa ti ọrọ ti Obedi-Edomu ṣe yatọ? Bi mo ti ṣe sọ siwaju, a ko fun wa ni idi kankan pato ninu bibeli. Ṣugbọn ọkunrin yi ni lati ṣe nkankan yatọ. Bẹẹni, o ni lati ṣe nkankan ti awọn yoku, pẹlupẹlu awọn alufa, ko ṣe ni mimojuto Apoti yii. Nitorina, bi o tilẹ jẹ wipe ko ki i ṣe ọmọ Isiraẹli nipa ibi, o ni irufẹ iriri iṣoriire ati ojurere lati ọdọ Ọlọrun ti awọn miran ko ni.

Njẹ ki wa ni o ṣe yatọ? A ko le mọ titi igba ti a o fi duro ni iwaju itẹ Ọlọrun. Ṣugbọn o damiloju pe ohun yowu ti o ṣe tọ ọ wa nipasẹ ifihan lati ọdọ Ọlọrun ni. Nigba ti o si ṣe, o fun ni gbogbo iyatọ aye yi.

Nibakanna, ti Ọlọrun ba le fi sinu ọkan wa awọn ifihan ohun ti a nilo lati ṣe lati ni iriri aluyọ ti o lagbara ni ibikibi ti a ti nilo rẹ ninu aye wa, nkan ti yoo tẹle yoo ya ati awa ati awọn ti o wa ni ayika wa lẹnu, ti a ba ṣiṣẹ le lori. Ki a tilẹ sọ otitọ, eyi yoo fun wa ni ẹri ti ko wọpọ jẹ. Nitorina, dipo ti a o fi ma gbiyanju lati ṣe awọn nkan ti awọn miran n ṣe, bi o ti wu ki o dara to, nṣe ni ki a kọ lati ma gbadura si Ọlọrun lati fun wa ni awọn ifihan nkan ti o yẹ ki a ṣe ni pato lati le tayọ ati lati le ṣoriire bi o ti tọ laye yi. Idi si ni pe nkan ti o ṣiṣẹ fun awọn miran le ma ṣiṣẹ fun wa. Njẹ ki a gba ojurere lati gba irufẹ awọn ifihan wọnyi, ni orukọ Jesu. Amin.

Ki o ni ọsẹ ibukun.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ ni ilọpo-ilọpo lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ miran ninu oṣu Ọ̀wàrà 2025. Mo gbadura pe ki gbogbo ilẹkun ipese Ọlọrun ti a ti mọ ọ jẹ ṣiṣi fun ọ ninu ọsẹ naa, ki ayọ rẹ ba a le kun akunwọsilẹ ninu ọṣẹ naa ati ni gbogbo awọn ọjọ ti o ku ninu ọdun yi. Amin.

Wayi o, ọkan lara awọn nkan ti o ma n ṣi ilẹkun ipese Ọlọrun fun awọn eniyan rẹ ni ilawọ si awọn iranṣẹ rẹ ti o n sin wa ninu ọrọ rẹ ati ninu adura. Fun apẹrẹ, ki ilẹkun ipese Ọlọrun ba a le ṣi fun opo ti Elija pade ni Sarefati, o ni lati lawọ si i. Bi o tilẹ wa jẹ wipe asiko iyan ni, ko wa awawi. Dipo eyi, nṣe ni o fifun un lati ara diẹ ti o ni. Nitorina, Ọlọrun ri daju pe ebi ko pa oun ati ọmọkunrin rẹ rara titi iyan ti o wa ni ilẹ naa fi lọ. (Wo: 1Àwọn Ọba 17)

Ki wa ni idi ti o fi jẹ wipe obinrin yi ni Ọlọrun ran Elija si ni asiko naa? Bi Jesu ti ṣe sọ fun wa, ọpọlọpọ opo ni o wa ni ilẹ Isiraẹli ni igba naa. Sibẹsibẹ, Ọlọrun ko ran Elija si ọkankan ninu wọn. Ki ni idi? Idi ni pe O mọ ọkan wọn. O mọ wipe ti Oun ba tilẹ sọ fun wọn pe ki wọn tọju Elija, wọn ko ni gbọ ti Oun. (Wo: Lúùkù 4:25-26)

O ti wa le jẹ wipe Ọlọrun ba awọn melokan sọrọ lara wọn lati tọju Elija. Ṣe wọn wa tẹti si nkan ti O sọ? Ti wọn ba tẹti si nkan ti O sọ ni, ko tun ni nilo lati ran ọkunrin naa lọ si ọdọ opo yi ni Sarefati. Ṣugbọn niwọn igba ti O ti ran-an lọ si Sarefati, kedere ni o han si wa pe opo yowu ti O tilẹ le ba sọrọ ni Isiraẹli lori titọju rẹ ko tẹti si ọrọ rẹ.

Amọ opo ti o wa ni Sarefati yi tẹti si Ọlọrun, O si tun gbọran si lẹnu. Bi a ti ṣe ri ninu bibeli, Ọlọrun ti kọkọ ba a sọrọ nipa Elija ki O to ran lati lọ wa a. Ki a tilẹ sọ otitọ, ọrọ Ọlọrun si Elija nipa rẹ ni pe: “Mo ti paṣẹ fun pe ki o tọju rẹ.” Nigba ti Elija si wa kan, o ṣe ifẹ Ọlọrun. Nitorina, a ṣi ilẹkun ipese ti a ko ṣi fun awọn opo yoku fun oun ati ọmọkunrin rẹ.

Ka wa sọ wipe ko tẹti si Ọlọrun tabi gbọran si lẹnu nkọ? Nṣe ni Ọlọrun ko ba ran Elija lọ si ọdọ ẹlomiran ti yoo gbọran si lẹnu. Ẹni naa si wa ni awọn ilẹkun ipese rẹ lati bori asiko iyan naa yo jẹ ṣiṣi fun.

Nibakanna, kiki awa ti a ba n gbọran si Ọlọrun lẹnu lori ohunkohun ti O ba n sọ fun wa lori lilawọ si awọn ti o n bọ wa pẹlu ọrọ rẹ ati ti wọn n gbadura fun wa ni awọn ilẹkun ipese rẹ kan yoo jẹ ṣiṣi fun. Awọn ti o n fi gbogbo igba ṣe awawi lati ma ṣe ohun ti O palasẹ fun wa ko ni ri nkan miran jẹ ju awawi wọn lọ. Nitorina, ronupiwada bayi, ki o si dẹkun lati ma ṣe awawi fun pipa ifẹ Ọlọrun lori fifun awọn iranṣẹ rẹ ti o n jiṣẹ fun ọ ti. Aijẹbẹ, awọn ipese rẹ kan wa ti ko ni lailai jẹ tirẹ laye yi.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ọ̀wàrà 2025. Mo si gbadura pe ki Ọlọrun, bi a ti ṣe n bẹrẹ ọsẹ tuntun naa, mojuto ajaga yowu ti o le ma a rin ọ mọlẹ, ki O si tun tu ọ lara ni ibi yowu ti ara ti le ma a ni ọ, ni orukọ Jesu. Amin.

Wayi o, bi o tilẹ jẹ wipe otitọ ni pe Ọlọrun le mojuto gbogbo ajaga wa, ki O si tun tu wa lara, o tun ṣe pataki ki a ma gbe igbẹkẹlẹ wa ninu rẹ ju sọnu nitori ohun yowu ti a le ma a la kọja. Ṣe o ri, pe Ọlọrun n mojuto ọrọ wa ko tunmọ si pe lẹsẹkẹsẹ naa ni a o ni iriri itura. A le ma a ni iriri itura lẹsẹkẹsẹ. Ṣugbọn ti a ko ba gbe igbẹkẹle wa ninu rẹ sọnu, o di dandan ki a ni iriri ominira ti o peye kuro lọwọ ohun yowu ti Satani le ma gbiyanju lati lo lati fi pa wa run.

Fun apẹrẹ, nigba ti Ọlọrun ran Mose lọ si Ijibiti lati tu awọn ọmọ Isiraẹli silẹ, ko ki i ṣe lẹsẹkẹsẹ naa ni wọn ri itura gba. Dipo eyi, nṣe ni Farao mu nkan le si fun wọn. Ki a ti lẹ sọ otitọ, Mose ni lati pada sọdọ Ọlọrun lati sọ wipe:

“OLUWA, ẽtiṣe ti o fi ṣe buburu si awọn enia yi bẹ̃? ẽtiṣe ti o fi rán mi? Nitori igbati mo ti tọ̀ Farao wá lati sọ̀rọ li orukọ rẹ, buburu li o ti nṣe si awọn enia yi; bẹ̃ni ni gbigbà iwọ kò si gbà awọn enia rẹ.” (Ẹ́kísódù 5:22-23)

Ṣe lotitọ wa ni pe Ọlọrun ko gbe igbesẹ kankan lati tu awọn ọmọ Isiraẹli silẹ? Rara o! O ti bẹrẹ si ni ṣiṣẹ fun itusilẹ wọn ni asiko naa. Amọ ṣa o, Mose ati awọn eniyan naa nilo lati fi suuru tẹsiwaju lati ma a gbẹkẹ le e, ki wọn ba a le jẹgbadun ere gbogbo nkan ti O n ṣe lati gba wọn la lẹkunrẹrẹ. Njẹ wọn wa ṣe eyi? Bẹẹni. Nitorina, a papa tu wọn silẹ kuro ni Ijibiti, a si tun dari wọn wọ inu Ilẹ-Ileri.

Nibakana, awa naa nilo lati ma a fi suuru tẹsiwaju ni gbigbẹkẹle Ọlọrun, ki a ba a le ni iriri ẹkunrẹrẹ ere gbogbo nkan ti O n ṣe lati ṣe ohun gbogbo ti o n ṣe ti wa ni aṣepe. Nitorina, bibeli sọ eyi fun wa:

“Nitorina ẹ máṣe gbe igboiya nyin sọnu, eyiti o ni ère nla. Nitori ẹnyin kò le ṣe alaini sũru, nitori igbati ẹnyin ba ti ṣe ifẹ Ọlọrun tan, ki ẹnyin ki o le gbà ileri na.” (Hébérù 10:35-36)

Njẹ o ri bayẹn? Lakọkọ, a sọ wipe ki a ma ṣe gbe igbẹkẹle wa ninu Ọlọrun sọnu. Kini idi? Idi naa ni pe a o pin wa ni ere ti o ga lori rẹ. Eyi jasi pe, Ọlọrun ko ni lailai ja awọn ti ko ba gbe igbẹkẹle wọn ninu rẹ ju sọnu kulẹ. Ekeji, a sọ wipe ki a ni ifarada ni ṣiṣe ifẹ Ọlọrun ni asiko idojukọ aye wa. Eyi tunmọ si pe ki a ma ṣe dẹkun lati ma gbadura, lati ma ṣe aṣaro ninu ọrọ Ọlọrun, lati ma sọ ọrọ Ọlọrun si awọn idojukọ wa ati lati ma rin ninu ododo. Kini idi? Eyi nikan ni ọna fun wa lati ri imuṣẹ ifẹ rẹ ninu aye wa.

Wayi o, awọn idojukọ ti a n koju le jẹ ki o dabi ẹni pe ifasiko-ṣofo ni fun wa lati tẹsiwaju lati ma gbadura ati lati ma gbe igbesẹ ni ibamu pẹlu ọrọ Ọlọrun, paapaa julọ ti nkan ba n buru si fun wa dipo ki wọn ma a san si. Ṣugbọn ọrọ Ọlọrun ti sọ fun wa pe oju ko ni ti awọn ti ko ba gbe igbẹkẹle wọn ninu Ọlọrun ju sọnu. Nitorina, tẹsiwaju lati ma gbadura ati lati ma ṣiṣẹ ni ibamu pẹlu ọrọ Ọlọrun,. Nigba ti asiko ba si to, iwọ yoo kore didara ati igbala rẹ ninu aye rẹ lọna ti o ga.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olurapada wa. Pẹlu idunnu ni mo ki ọ kaabọ sinu ọsẹ miran ninu oṣu Òwàrà 2025. Adura mi ni pe ki Ọlọrun ma a fi ojoojumọ pa ọ mọ lati ma jẹ irinṣẹ ti Satani le ri lo lọnakọna, ki o ma ba a ṣilẹkun aye rẹ silẹ fun idajọ rẹ. Amin.

Jesu Oluwa wa sọ awọn ọrọ wọnyi si awọn ọmọ ẹyin rẹ nigbakan ri:

“Egbé ni fun aiye nitori ohun ikọsẹ̀! ohun ikọsẹ̀ ko le ṣe ki o ma de; ṣugbọn egbé ni fun oluwarẹ̀ na nipasẹ ẹniti ohun ikọsẹ̀ na ti wá!” (Mátíù 18:7)

Wayi o, ki ni a ri kọ lati ara awọn ọrọ Oluwa wọnyi? Akọkọ, a ri kọ pe aye wa ninu ijangbọn ati labẹ idajọ Ọlọrun. Ki ni idi? Idi ni pe awọn nkan ti o n mu awọn eniyan kọsẹ wa ninu rẹ. Lotitọ, gbogbo eniyan ni a bi pẹlu ẹṣẹ ninu wọn. Ṣugbọn ti a ko ba fun awọn eniyan ni anfaani lati dẹṣẹ si Ọlọrun, awọn iwa-aidara kan wa ti wọn le ma lailai wu laye.

Amọ ṣa o, anfaani lati dẹṣẹ si Ọlọrun pọ jantirẹrẹ ninu aye. Nitorina, bi enikan ko tilẹ fẹ dẹṣẹ, o le ma ni okun to lati gbogun ti ọpọlọpọ itanjẹ lati dẹṣẹ ti o rọgba yi ka. Ta wa ni o n tan awọn eniyan jẹ lati dẹṣẹ? Esu ni. Oun ni o tan Efa jẹ lati ṣẹ si Ọlọrun. Oun yi kanna ni o si tun n tan ẹnikọọkan wa jẹ lati ṣẹ si Ọlọrun loni. (Wo: Jẹ́nẹ́sísì 3)

O wa yẹ ki iwọ naa ri bayi idi ti Jesu ṣe sọ wipe awọn nkan ti o n jẹ ki awọn eniyan dẹṣẹ ko le ṣalai ma waye. Wọn ko le ṣalai ma waye nitoripe Satani n bẹ ninu aye. Eyi jasi pe, niwọn igba ti Satani ati awọn iwin rẹ ba ninu aye yi, o di dandan ki a ma a dojukọ awọn iṣẹlẹ ti o le jẹ ki a kọsẹ, ki a si ṣubu sinu ẹṣẹ. Njẹ eyi wa tunmọ si pe a ko le ṣalai ma kọsẹ, ki a si ṣubu sinu ẹṣẹ? Rara o! A le yago fun eyi nipa oore-ọfẹ Ọlọrun. Ṣugbọn a ko le yago fun idanwo lati dẹṣẹ. Nitorina, a gbọdọ kọ lati ma a fi ojoojumọ duro sinu oore-ọfẹ Ọlọrun. Aijẹbẹ, oniruuru idanwo ni yoo bori wa.

Amọ ṣa o, Oluwa ko wa ma reti pe ki a kan ṣe amulo oore-ọfẹ rẹ lati ma ko sinu ẹṣẹ nikan. O tun n reti pe ki a ṣe amulo rẹ lati ma jẹ ki eṣu lo wa lati jẹ ki awọn miran ṣubu sinu ẹṣẹ. Ranti pe O ti sọ fun wa pe awọn nkan ti o n jẹ ki awọn eniyan dẹṣẹ ko le ṣalai ma waye. Ṣugbọn awọn nkan wọnyi ko ki n ṣaba wa lati ọdọ eṣu taara-taara. Lati ọdọ awọn eniyan bi ti wa ni wọn ti ma n ṣaba wa. Ti awa funrawa ko ba si wa kiyesara, a le da irinṣẹ ti Satani yoo lo lati jẹ ki awọn miran kọsẹ, ki wọn si tun ṣubu.

Njẹ ibi ti eyi ba ti wa ṣẹlẹ, gẹgẹ bi Jesu Kirisiti Oluwa wa ti fi han wa, a o gba ibawi ti o gbópọn lọdọ Ọlọrun ju ẹni ti a ti ṣinu ẹṣẹ lọ. Ranti pe ibawi Efa gbópọn ju ti Adamu lọ. Idi si ni pe nipasẹ rẹ ni Satani ṣe ṣe aṣeyọri lati gbe Adamu ṣubu. Eyi jasi pe eṣu lo lo o. Ti awa naa ba si fi aye gba a lati lo wa lati dari ẹnikẹni siniu ẹṣẹ, ti Ọlọrun si ni lati ba wa wi, ibawi tiwa di dandan ki o pọ ju ti ẹni naa lọ. Nitorina, ma ṣe jẹ ki eṣu lo ọ. Ki Ọlọrun ran ọ lọwọ.

Kí o ní ọ̀sẹ̀ tí ó suwọ̀n.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ miran ninu oṣu Ọ̀wàra 2025. Mo gbadura pe ki Ọlọrun pese ohun yowu ti o ṣe alaini anito rẹ ni ti itara rẹ lati jẹ ohun gbogbo ti O fẹ ki o jẹ laye, ni orukọ Jesu. Amin.

Bi a ti ṣe ri ninu Iwe Mimọ, ọkan lara awọn nkan ti yoo sọ boya a o da ẹni ti Ọlọrun fẹ ki a da tabi jẹ igbadun awọn ipese rẹ fun wa ni itara wa. Ti a ba ni itara ti o peye to lati jẹ ohun ti O fẹ ki a jẹ tabi lati jẹ igbadun awọn nkan ti O fẹ ki a jẹ igbadun, yoo ri daju pe oju ko ti wa. Idi si ni pe bibeli sọ wipe Olusẹṣan ni O jẹ fun awọn ti o ba farabalẹ tabi fi itara wa a (Hébérù 11:6).

Ṣugbọn ti a ko ba ni itara rara tabi ti o peye to lati jẹ ohun ti O fẹ ki a jẹ tabi lati ni awọn nkan ti O fẹ ki a ni, a le ma jẹ igbadun didara rara tabi bi o ti yẹ ki a jẹ, ti a ko ba ṣaanu fun wa. Nitorina, ti o ba ni adura kan ti o yẹ ki a ma a gba lore-koore, oun naa ni pe ki Ọlọrun ma a fi ojoojumọ jẹ ki itara wa fun un ati fun awọn nkan ti O ni nipamọ fun wa peye.

Fun apẹrẹ, nigba ti Wolii Eliṣa sọ fun Ọba Jehoasi Isiraẹli pe ki o ta ọfa iṣẹgun lori awọn ara Aramu, ẹmẹta pere ni o ta a. Eyi si bi wolii yi ninu. Ki ni idi? Idi ni pe iṣẹgun ẹmẹta lori awọn ara Aramu ko to lati fun Isiraẹli ni ominira patapata kuro lọwọ wọn. Wọn yoo nilo to iṣẹgun ẹmẹfa lori wọn ki wọn to le bọ patapata kuro lọwọ imunisin wọn. (Wo: 2Àwọn Ọ̀ba 13:14-19)

Ki wa lo fa ti ọba wọn fi ta ọfa iṣẹgun mẹta pere ni ọjọ naa? Idi ni pe ko ni itara to peye to lati bọ kuro ninu ajaga ika awọn ara Aramu. O kan ro wipe ti oun ba le ṣẹgun wọn ni igba mẹta, o yẹ ki iyẹn naa to. Nitorina, o padanu anfaani kan ṣoṣo ti o ni lati gba ominira ti o peye fun awọn eniyan rẹ kuro lọwọ awọn ti o n pọn wọn loju. O ma ṣe o!

Amọ wo Namani. Bi o tilẹ jẹ wipe Eliṣa jẹ wolii orilẹ-ede ti o jẹ ọta rẹ, itara rẹ lati gba iwosan fun ẹtẹ rẹ jẹ ki o wa si ọdọ rẹ. Bi o si tun tilẹ jẹ wipe ipo ọgagun ẹgbẹ-ogun orilẹ-ede rẹ ni o wa, o gbe igberaga rẹ ju si ẹgbẹ kan lati ṣe nkan ti wolii sọ fun pe ki o ṣe. Ki ni idi? Idi ni pe o ni itara lati gba iwosan rẹ. Ṣe o wa ri gba tabi ko ri gba? O ri gba! (Wo: 2Àwọn Ọba 5)

Nitorina, bi o tilẹ jẹ wipe Ọlọrun ko ki i fi igba gbogbo wo itara wa ki O to ṣe nkan fun wa, awọn nkankan wa ni aye yi ti ko ni lailai ṣe fun wa tabi jẹ ki a jẹ igbadun rẹ, ti a ko ba ni itara to fun wọn. Bawo wa ni a ṣe ni itara si lati jẹ ohun ti Ọlọrun fẹ ki a jẹ ati lati ṣe awọn nkan ti O fẹ ki a ṣe? Eyi yoo han lati ara iha ti a kọ si ọrọ Ọlọrun, adura gbigba ati ibaṣepọ pẹlu awọn Kiristiẹni bi ti wa.

Ti a ba mu awọn nkan wọnyi ni ọkunkundun, a jẹ wipe a ni itara nitootọ fun Ọlọrun ati fun awọn nkan ti O ni ni ipamọ fun wa niyẹn. Ṣugbọn ti a ko ba mu wọn ni ọkunkundun, nṣe ni a n fi han pe imuṣẹ ete rẹ fun aye wa ko ka wa lara pupọ tabi rara. Nitorina, a le e ma lailai ni iriri imuṣẹ ete rẹ fun aye wa. Njẹ eyi yo wa suwọn bi? Rara!

Nitorina, gbadura pe ki Ọlọrun, ninu aanu rẹ ma fi ojoojumọ pese ohun gbogbo ti o kudiẹ-kaato ninu itara rẹ fun un. Nipa ṣiṣe eyi, ete rere rẹ fun aye rẹ yoo le jẹ mimuṣẹ lẹkunrẹrẹ.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaaifa jẹ tirẹ lalai ni odiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ ti o so oṣu Òwewè ati Ọ̀wàrà 2025 mọ ara wọn. Adura mi si ni pe ki Ọlọrun ma a fi ojoojumọ kọ ọkan rẹ lati ma tun lailai ṣe awawi mọ fun aitẹwọgba ìfẹ́ rẹ̀ fun aye rẹ, ki ohun gbogbo ba a le dara fun ọ ati fun ohun gbogbo ti o jẹ tirẹ. Amin.

Wayi o, mo gba adura yi fun ọ nitoripe iran wa jẹ iran eyi ti o fi ara rẹ jin fun awawi ṣiṣe lati ma ṣe ohun ti o tọ, gẹgẹ bi Jesu Kirisiti Oluwa wa ti ṣe tọkasi fun wa. Ti awa ti a si jẹ ọmọ Ọlọrun ko ba kiyesi ara wa, awa naa yoo kan ri wipe nṣe ni a n ṣe awawi ni gbogbo igba fun aigbe ninu ifẹ Ọlọrun fun aye wa. Iwọ naa wo nkan ti Jesu sọ lori eyi:

“Ṣugbọn kili emi iba fi iran yi wé? O dabi awọn ọmọ kekeke ti njoko li ọjà ti nwọn si nkọ si awọn ẹgbẹ wọn, Ti nwọn si nwipe, Awa fun fère fun nyin ẹnyin kò jó; awa si ṣọ̀fọ fun nyin, ẹnyin kò sọkun. Nitori Johanu wá, kò jẹ, bẹ̃ni kò mu, nwọn si wipe, o li ẹmi èṣu. Ọmọ-enia wá, o njẹ, o si nmu, nwọn wipe, Wò o, ọjẹun, ati ọmuti, ọrẹ́ awọn agbowode ati awọn ẹlẹṣẹ. Ṣugbọn a dare fun ọgbọ́n lati ọdọ awọn ọmọ rẹ̀ wá.” (Mátíù 11:16-19)

Ki ni nkan ti a ri nibiyi nipa iran yi? A ri wipe o jẹ iran aláíníkan-án-ṣe. Idi si ni yi ti o fi kun fun awawi ṣiṣe lati ma ṣe ifẹ Ọlọrun. Bi Oluwa wa ti fi han wa ninu awọn ẹṣẹ bibeli ti o wa loke yẹn, bi o tilẹ jẹ wipe Oun ati Johanu Onitẹbọmi ko gba ọna kanna ṣe iṣẹ iranṣẹ wọn, awọn mejeeji ni Ọlọrun ran lati bukunfun araye. Eyi si n fi han wa pe ki a ma ṣe ṣe agbeyẹwo iṣẹ iranṣẹ ẹnikẹni lori awọn nkan ti ode; dipo bẹ ẹ, nṣe ni ki a ṣe e ni ibamu pẹlu eso ti o n so. Ti o ba n so eso ododo Ọlọrun, a jẹ wipe ti Ọlọrun ni. Ṣugbọn ti ko ba so eso ododo rẹ, bi o tilẹ dabi ẹni wipe o jẹ mimọ ni ode, ko ki i ṣe ti Ọlọrun. Ki o si dakun fi eleyi si ọkan.

Ni kukuru, a ri wipe awọn Juu aye igba Jesu Kirisiti Oluwa wa ko tẹwọgba ati Oun ati Johanu Onitẹbọmi, bi o tilẹ jẹ wipe ọna ọtọtọ ni wọn gba ṣe iṣẹ iranṣẹ wọn. Ki ni idi? Wọn ko níkan-ań-ṣe ni. Bi a tun ṣe ri ninu awọn ẹsẹ bibeli yẹn, ọna ti Johanu n gba ṣe iranṣẹ rẹ fi han pe ko bikita pupọ nipa ounjẹ, aṣọ, ilegbe tabi ibaṣepọ pẹlu awọn eniyan. O kan ṣa fẹ polongo ọrọ Ọlọrun si gbogbo orilẹ-ede ni, ki o si pese wọn fun Mesaya wọn. Boya wọn wa gbọ si lẹnu tabi wọn ko gbọ si lẹnu, ko bikita rara. Nitorina, awọn eniyan n pe ni aṣiwin ọkunrin. Eyi jasi pe, awawi wọn lati ma tẹwọ gba a ati ọrọ Ọlọrun ti o mu tọ wọn wa ni pe ko ma a ṣe bi eniyan gidi. (Wo: Máítù 3:4; Máàkù 1:6)

Ṣugbọn nigba ti Jesu de, ti O si bẹrẹ iṣẹ iranṣẹ tirẹ, gbogbo nkan ti Johanu kọ lati ṣe ni Oun ṣe. O jẹun. O mu. O ba awọn eniyan, pẹlupẹlu awọn ẹlẹṣẹ, ṣe pọ. A o wa ro wipe wọn yoo tẹwọgba nitoripe Oun ṣe bi eniyan gidi. Ṣugbọn dipo ti wọn yoo fi tẹwọgba ati ọrọ Ọlọrun ti O mu wa, nṣe ni awọn eniyan n pe ni alajẹbanu ati ọmutipara.

Ṣe iwọ naa wa ri wipe wọn ko níkan-ań-ṣe? Bẹẹni, wọn ko níkan-án-ṣe, wọn ko si tun ni lọkan lati mu Ọlọrun ni pataki. Nitorina, wọn le lo ohunkohun gẹgẹ bi awawi wọn fun sisa jina si ifẹ rẹ fun wọn, eyi ti yoo si pada jẹ ki wọn pa ara wọn run.

O wa ṣeni laanu pe ọrọ ko ti yipada loni rara. Iran wa ko ti yipada rara. A ko si níkan-ań-ṣe sibẹsibẹ. Nitorina, a le lo ohunkohun gẹgẹ bi awawi wa fun kikọ Ọlọrun silẹ. Fun apẹrẹ, mo ka ninu iroyin laipẹ yi nipa gbajumọ ọdọmọkunrin kan ti o sọrọ lori idi ti oun fi juwọ si ijọ ninu ifọrọjomitoro-ọrọ kan. Ki si ni idi rẹ? Gẹgẹ bi o ti ṣe sọ, nigba ti o wa ọkọ ayọkẹlẹ rẹ de ile-ijọsin rẹ ni kutukutu owurọ ọjọ isinmi kan, wọn dari rẹ lati lọ fidi ọkọ naa gunlẹ si ita. Ṣugbọn bi o ti ṣe n ṣe eyi lọwọ ni o ri wipe, nṣe ni wọn n dari awọn kan lara awọn ti o de lẹyin rẹ lati fi idi ọkọ ti wọn gunlẹ sinu ile. Ki ni idi? Idi ni wipe awọn ọkọ ti awọn wọnyi lowo-lori ju tirẹ lọ. Nitorina, dipo ti yoo fi gbe ọkọ rẹ si ita, nṣe ni o kan wa nkan rẹ pada lọ si ile. Lati igba yi, ẹwẹ, naa si ni ko ti lọ si ipade ijọ kankan mọ.

Ṣe o wa tọna lati ṣe bi eleyi si ẹnikẹni ninu ijọ kankan? Rara o! Ṣugbọn ti o ba jẹ wipe Ọlọrun ati igbala ọkan rẹ ni o n lepa, o ko ni fi aye gba irufẹ nkan bi eyi lati le ọ jina si ijọ. Amọ ṣa o, ti o ko ba níkan-ań-ṣe, ti o ko si ṣetan lati ṣẹ ifẹ Ọlọrun, o le lo ohunkohun, pẹlupẹlu nkan ti ko ni itumọ bi ọna ti a gba to awọn aga inu ijọ kan, gẹgẹ bi awawi rẹ lati sa jina si ijọ tabi lati ma paarọ ijọ bi ẹni n paarọ aṣọ.

Ki a ma fọrọgun, ọrọ Ọlọrun n tọ ọ wa bayi, o si n kilọ fun ọ pe ki o dẹkun lati ma a ṣe awawi fun àínikan-án-ṣe rẹ ni ti ṣiṣe ifẹ Ọlọrun. Idi si ni pe ko si awawi rẹ kankan ti yoo le yọ ọ kuro ninu ewu ni ọjọ ti Oluwa ba de lati ṣe idajọ gbogbo araye. Nitorina, kilọ fun ara rẹ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ kẹta ninu oṣu Owewe 2025. Adura mi ni pe ki eti rẹ ma tun lailai di si ohùn Ẹmi Ọlọrun, ki o ma ba a ṣegbe pẹlu aye okunkun yi.

Bi a ti ṣe ri ninu iwe Ifihan, ọkan lara awọn nkan ti Jesu Oluwa wa n sọ fun awọn ijọ rẹ ti O kọ lẹta si ni pe ẹnikẹni ti o ba ni eti ki o gbọ nkan ti Ẹmi Ọlọrun n sọ fun awọn ijọ. Eyi n sọ fun wa pe ko ki i ṣe gbogbo eniyan naa ni o ni eti lati gbọ ohun Ẹmi Ọlọrun, yala fun igbega tabi fun aabo wọn. Nkan ti awọn kan ni eti lati gbọ ni ohùn ara wọn tabi ohùn eṣu. Nitorina, irufẹ nkan yowu ti Ọlọrun le ma a sọ fun wọn nipasẹ Ẹmi rẹ, wọn ko le e gbọ.

Fun apẹrẹ, pẹlu gbogbo ikilọ ti Wolii Mikaiah fun Ahabu, ọba yi ko gbọran si lẹnu. Ọrọ rẹ ko tilẹ ri aye wọ eti rẹ lati yi i lọkan pada, ki a ba a le pa mọ kuro ninu iku ti o n duro de e ni oju ogun. Amọ ṣa o, ọrọ awọn wolii Ahabu wọ eti rẹ, o si ki i laya lati lọ si oju ogun ti yoo gba ẹmi rẹ. Ki ni idi? Awọn wolii wọnyi sọ nkan ti o fẹ gbọ fun un. (Wo: 1Awọn Ọba 22; 2Kironika 18)

Nitorina, ọkan lara awọn idi ti eti awọn eniyan ṣe ma n di si ohùn Ẹmi Ọlọrun ni pe kiki nkan ti wọn fẹ gbọ naa ni wọn fẹ gbọ. Ti wọn ba si nilo lati san owo fun ẹnikan lati sọ nkan ti wọn fẹ gbọ fun wọn, wọn yoo fi tayọtayọ san an. Abalajọ ti bibeli ṣe sọ wipe:

“Nitoripe ìgba yio de, ti nwọn kì yio le gba ẹkọ́ ti o yè kõro; ṣugbọn bi nwọn ti jẹ ẹniti eti nrìn nwọn ó lọ kó olukọ jọ fun ara wọn ninu ifẹkufẹ ara wọn.” (2Tímótì 4:3)

Wayi o, o wa ṣeeṣe ki iwọ naa jẹ ọkan lara awọn ti a n sọrọ nipa. Gbogbo awọn oniwaasu ati eniyan ti o n gbọ ọrọ wọn jẹ kiki awọn ti yoo sọ nkan ti o fẹ gbọ fun ọ. Ṣugbọn ṣe nkan ti o fẹ gbọ yi gan ni o nilo lati gbọ? Ti nkan ti o fẹ gbọ ko ba ki i ṣe nkan ti o nilo lati gbọ, a jẹ wipe o ko yatọ si Ahabu niyẹn. Nitorina, o ti n ṣi ilẹkun aye rẹ silẹ fun ewu. Ti o ba si kọ lati ronupiwada lasiko, o di dandan ki o run aye ati ọkan rẹ lọjọkan.

Nitorina, ki o to kọ ẹyin si ohun yowu ti ẹnikẹni le ma a sọ fun ọ, kọkọ bere lọwọ ara rẹ naa boya nkan ti ẹni na n sọ jẹ nkan ti o nilo lati gbọ tabi eyi ti o ko nilo lati gbọ. Ti o ba si jẹ ohun ti o nilo lati gbọ ni, ti o jẹ ohun ti yoo ṣe aye rẹ ni anfaani, ti yoo si tun darí rẹ̀ si ọna ti o yẹ, mọ wipe ohùn Ẹmi Ọlọrun ni o n ba ọ sọrọ. Nitorina, tẹwọgba, bi o tilẹ dun ọ. Eyi yio si jẹ ọgbọn fun ọ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lọpọlọpọ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Òwewè 2025. Adura mi ni pe ki Ọlọrun ma a fi ojoojumọ fi okun fun ọkan rẹ lati mu ọrọ rẹ ni pataki, ki o ba a le ma fi igba gbogbo ṣe aṣeyọri ninu ohun gbogbo ti o ba n ṣe, ni orukọ Jesu. Amin.

Bi a ti ṣe ri ninu bibeli, irufẹ ẹni yowu ti a le jẹ laye, Ọlọrun fẹ ki a mu ọrọ rẹ ni pataki. Ki ni idi? Idi ni pe nipasẹ ọrọ rẹ nikan ni a ṣe le ṣe aṣeyọri lotitọ laye, ki a si tun jẹ igbadun aṣeyọri wa. Nitorina, bi o ba tilẹ jẹ ọba lori awọn eniyan, o nilo ọrọ Ọlọrun lati jẹ ọba alaṣeyọri, ọba ti awọn ti o wa labẹ iṣakoso rẹ yoo ma a gberu si.

Wo ọrọ ilana ti Mose fun ẹnikẹni ti yoo ba jẹ ọba lori awọn eniyan Isiraẹli:

“Yio si ṣe, nigbati o ba joko lori itẹ́ ijọba rẹ̀, ki on ki o si kọ iwé ofin yi sinu iwé kan fun ara rẹ̀, lati inu eyiti mbẹ niwaju awọn alufa awọn ọmọ Lefi: Yio si wà lọdọ rẹ̀, on o si ma kà ninu rẹ̀ li ọjọ́ aiye rẹ̀ gbogbo: ki o le ma kọ́ ati bẹ̀ru OLUWA Ọlọrun rẹ̀, lati ma pa gbogbo ọ̀rọ ofin yi mọ́ ati ilana wọnyi, lati ma ṣe wọn: Ki àiya rẹ̀ ki o má ba gbega jù awọn arakunrin rẹ̀ lọ, ati ki o má ba yipada kuro ninu ofin na, si ọwọ́ ọtún, tabi si òsi: ki on ki o le mu ọjọ́ rẹ̀ pẹ ni ijọba rẹ̀, on, ati awọn ọmọ rẹ̀, lãrin Israeli.” (Ditarónómì 17:18-20)

Ki ni nkan akọkọ ti ẹnikẹni ti o ba di ọba lori awọn eniyan Isiraẹli gbọdọ ṣe? O gbọdọ gba ẹda iwe ofin Ọlọrun kan fun ara rẹ. Ki ni idi? Akọkọ, idi ni ki o ba a le fi ara rẹ jin fun kika ati ṣiṣe aṣaro ninu rẹ ni gbogbo ọjọ aye rẹ. Ekeji, idi ni ki o ba a le kiyesi lati ma a gbe ile aye rẹ ni ibamu pẹlu ọrọ Ọlọrun. Ti o ba si ṣe eyi, gẹgẹ bi Mose ti ṣe fi han, oun ati awọn arọmọdọmọ rẹ yoo ṣe rere, wọn yoo si tun jọba fun asiko ti o pẹ lori ilẹ naa.

Ṣe o wa ri bayi pe fun ẹnikẹni ti o jẹ ọba ni Isiraẹli gan lati ṣoriire ati lati ni ọpọlọpọ arọmọdọmọ rẹ gẹgẹ bi ọba lẹyin rẹ, o gbọdọ mu ọrọ Ọlọrun ni pataki. Ko le pa ọrọ rẹ ti tabi ki o sọ wipe oun ko raaye fun un. Aijẹbẹ, ijọba rẹ ko ni tọjọ.

O wa ṣeni laanu, gẹgẹ bi a tun ṣe ri ninu bibeli, pe ọpọ awọn ti o jọba lori awọn ọmọ Isiraẹli ni ko mu ọrọ Ọlọrun ni ọkunkundun. Nitorina, ijọba wọn ko tojọ. Dipo bẹ ẹ, nigba ti o to asiko kan, nṣe ni Ọlọrun ni lati ran gbogbo awọn eniyan naa lọ si igbekun nitori wọn. A si tun wa ri pe nkan kanna ni o n ṣẹlẹ laye ti a wa ninu rẹ loni. Ibikibi ti awọn adari ko ba ti mu ọrọ Ọlọrun ni pataki, wọn ko le ṣoriire. Dipo eyi, dandan ni ki wọn dari awọn eniyan wọn sinu oniruuru igbekun.

Ka mọ fọrọgun, koko nkan ti mo n sọ ni pe niwọn igba ti awọn ọba gan nilo lati mu ọrọ Ọlọrun ni pataki fun wọn lati ṣoriire laye, awa ti a ko wa ki i ṣe ọba ko gbọdọ ro wipe a le ṣoriire laye lalai mu ọrọ rẹ ni pataki. Nitorina, ti o ko ba i ti ma mu ọrọ Ọlọrun ni pataki, o nilo lati ronupiwda fun anfaani ara rẹ. Lọna wo? Akọkọ, wa ẹda bibeli fun ara rẹ ti o le ka yekeyeke. Ekeji, fi ara rẹ jin lati ma a ka a ati lati ma ṣe aṣaro ninu rẹ. Bi o ba si ṣe n ṣe eyi, ko ni pẹ rara ti iwọ naa yoo fi ri wipe o n gbe aye rẹ ni ibamu pẹlu nkan ti Ọlọrun n sọ fun ọ.

Wayi o, ẹnikẹni ti o ba n fi ojoojumọ gbe aye rẹ ni ibamu pẹlu nkan ti Ọlọrun sọ di dandan ki o ṣe aṣeyọri laye. O le bẹrẹ ni ibi kekere laye bi Dafidi. Sibẹsibẹ, Ọlọrun yoo ri daju pe o ṣoriire. O si tun le ba ọpọlọpọ idojukọ pada laye bi Josefu tabi Jobu. Ọlọrun yoo si tun ri daju pe o ṣoriire. Nitorina, irufẹ ipo yowu ti o le wa laye lọwọlọwọ yi, mu ọrọ Ọlọrun ni pataki. Iṣoriire otitọ ati eyi ti o n bani kalẹ yoo si jẹ tirẹ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)