Author name: CyberHawk

Akori : WOLII

Leave a Comment

ỌJỌRU 16, OKUDU 2021

AYỌKA: 2PETERU 1:20-22

AKỌSORI: AKỌSORI: “Nitori Oluwa Ọlọrun ki o ṣe nnkan kan ṣugbọn o fi ohun ikọkọ rẹ han awọn wolii iranṣẹ rẹ.” (Emọọsi 3:7)

ỌRỌ AKỌSỌ
Gẹgẹ bi a ṣe ri ninu bibeli, Ọlọrun ti ṣeto awọn kan fun wa ninu ijọ gẹgẹ bi adari, lati pese wa fun iṣẹ iranṣẹ ati lati jẹ ki a dagba soke lati dabi Jesu Kirisiti ni gbogbo ọna (Efesu 4:11-16). Lara awọn ti O ṣi seto fun eyi ni awọn ti a n pe ni wolii. Awọn wo gan wa ni a lẹtọ lati ma pe ni wolii Ọlọrun ninu ijọ loni? Ṣe gbogbo awọn ti a n pe ni wolii loni abi awọn ti o n pe ara wọn ni wolii loni naa ni wolii Ọlọrun? Ti ko ba ki i ṣe gbogbo wọn ni wolii rẹ, bawo ni a ṣe le da awọn wolii tootọ mọ? Ki ni ojuṣe wọn? Njẹ wọn tilẹ ni awọn nkan ti a le pe ni aal bi? Iha wo ni o yẹ ki a kọ si ọrọ tabi isọtẹlẹ wolii? Awọn nkan wọnyi ni a fẹ gbe yẹwo ninu ẹkọ bibeli yi. Mo si gbadura pe ki Ọlọrun, nipaṣẹ Ẹmi mimọ rẹ, fi imọ ati oye ti o peye fun wa lori ẹkọ yi, ki a ba le mọ riri awọn wolii otitọ ti O yan si aarin wa, ki a si tun ba le yẹra fun awọn eke wolii ti Eṣu le fẹ lo lọna kan tabi omiran lati ṣi wa lọna.

TANI WOLII?
Loju ọpọ eniyan, wolii jẹ ẹnikan ti o ma n ri iran si awọn eniyan ati ti o ma n sọ asọtẹlẹ. Ṣugbọn jijẹ wolii kọja riri iran tabi sisọ tẹlẹ si awọn eniyan. Bi a ṣe ri ninu bibeli, wolii jẹ ẹnikan ti Ọlọrun ya sọtọ lati fi ara rẹ, ifẹ rẹ ati ete rẹ han, ti O si tun n fi ọrọ rẹ si lẹnu loore-koore fun ẹkọ, ikilọ, igbaniniyanju, imuniduro, itunininu ati idajọ awọn eniyan. Iṣẹ iranṣẹ wolii wa le jẹ si awọn eniyan ijọ kan, agbegbe kan, ilu kan, orilẹ-ede kan tabi si oniruuru eniyan tabi orilẹ-ede. Ṣugbọn gbogbo rẹ ni i ṣe pẹlu ifẹ Ọlọrun ti O yan an, ti O si gbe iṣẹ le lọwọ. (Wo: Numeri 24:2-4&15-16; Jeremaya 1:4-11; Esikiẹli 2:1-3:4; 1Korinnti 14:3)

Eyi wa tunmọ si pe eniyan ko le di wolii nitori pe a kan da ororo le lori bi ami tabi nitori pe oun tẹle wolii kan tabi omiran kaakiri tabi nitori pe o jẹ ọmọ wolii. Ọlọrun funrarẹ gbọdọ yan fun iṣẹ iranṣẹ yi ni. Aijẹbẹ, a ba da garawa ororo le wa lori tabi ki a ma jẹun, ki a si tun ma sun pẹlu wolii, a ko le da wolii Ọlọrun. Fun apẹẹrẹ, Eliṣa ni Ọlọrun sọ fun Wolii Elija lati yan gẹgẹ bi wolii fun awọn eniyan rẹ. O si ṣe awari rẹ nitootọ lati pe si iṣẹ yi. Ṣugbọn ni ọjọ ti a fẹ gba Elija soke ọrun, o jẹ ki o ye ọkunrin yi pe ti Ọlọrun ko ba ro ni agbara lati ṣiṣẹ wolii ati lati wa ni aye olori awọn wolii yoku, ko si nkan ti oun le ṣe si. Ka wa sọ pe Ọlọrun ko ti yan Eliṣa lati ibẹrẹpẹpẹ ni, gbogbo bi o ṣe n tẹle Elija kaakiri ko ba kan ja si pabo ni. (Wo: 1Awọn Ọba 19:16; 2Awọn Ọba 2:1-16)

BAWO NI ỌLỌRUN NṢE FI ARA RẸ ATI IFẸ RẸ HAN WOLII?
Wayi o, ọna wo wa ni Ọlọrun n gba fi ara rẹ ati ifẹ rẹ han wolii? Gẹgẹ bi a ṣe ri ninu bibeli, Ọlọrun le fi ara rẹ ati ifẹ rẹ han wolii nipa bi ba a sọrọ ni ẹnu ko ẹnu (ojukoroju), ni inu iran tabi ni oju ala. Fun apẹẹrẹ, a sọ eyi fun wa ninu iwe Numeri, ori ikejila, lati ẹsẹ ikarun: “Oluwa si sọ kalẹ wa ninu ọwọn ikuukuu, o si duro ni ẹnu ọna agọ naa, o si pe Aarọni ati Miriamu: awọn mejeeji si jade wa. O si wi pe, Ẹ gbọ ọrọ mi nisinsinyi: bi wolii Oluwa ba n bẹ ninu yin, emi Oluwa yoo farahan fun un ni ojuran, emi o si ba a sọrọ ni oju ala. Mose iranṣẹ mi ko ri bẹẹ, oloootọ ni ninu gbogbo ile mi. Oun ni Emi n ba sọrọ ni ẹnu ko ẹnu ati ni gbangba, kii si i ṣe ni ọrọ ti o ṣe okunkun; apẹẹrẹ Oluwa ni oun o si ri…” (Numeri 12:5-8). Eyi fi han wa pe ko ki i ṣe ọna kan ṣoṣo ni Ọlọrun ma n gba fi ara rẹ ati ifẹ rẹ han awọn wolii rẹ. Orisirisi ọna ni. Oun nikan naa si ni O le sọ iru ọna ti yoo gba tabi ti yoo ma gba ju lati ba ẹnikẹni ti O ba yan gẹgẹ bi wolii rẹ sọrọ.

Njẹ eyi wa jasi pe gbogbo ẹni ti o ba ti n riran, lala tabi gbohun naa ni wolii tabi naa ni ẹni ti Ọlọrun n ba sọrọ? Rara o. Bi a ṣe ri ninu bibeli, ko ki i ṣe gbogbo awọn ti wọn n riran, lala tabi gbohun na ni wolii Ọlọrun. Peteru tilẹ sọ eyi fun wa: “Ṣugbọn awọn wolii eke wa laarin awọn eniyan naa pẹlu…” (2Peteru 2:1) Ti awọn wolii eke ba wa ni aye igbaani, o yẹ ki a le mọ pe wọn si tun wa sibẹ naa loni. Amọ, a kan nilo lati mọ pe ẹni ti o ba jẹ wolii tootọ yoo ma ri iran, la ala ati gbọ ohun Oluwa loorekoore, ni ibamu pẹlu ifẹ ati ete Ọlọrun.

IYATỌ LAARIN WOLII OTITỌ ATI WOLII EKE
Bawo wa ni a ṣe le mọ boya eke wolii ni eniyan tabi wolii Ọlọrun nitootọ ni? Lakọkọ, ti ọrọ ẹni ti o pe ara rẹ ni wolii ko ba wa si imuṣẹ, o ṣeeṣe ki o jẹ eke wolii. Bibeli sọ pe, “Nigba ti wolii kan ba sọrọ ni ọrukọ Oluwa, bi ohun naa ko ba ri bẹẹ, ti ko ba si ṣẹ, eyi naa ni ohun ti Oluwa ko sọ: wolii naa ni o fi sọrọ; ki iwọ ki o ma ṣe bẹru rẹ.” (Ditaronomi 18:22) Nitorina, ẹni ti o ba jẹ wolii Ọlọrun nitootọ, ọrọ ti o ba sọ ni orukọ Oluwa yoo ri bi o ṣe wi tabi ki o wa si imuṣẹ. Njẹ eyi tun wa jasi pe gbogbo wolii ti ọrọ rẹ ko ba ti wa si imuṣẹ ni eke? Rara! Fun apẹẹrẹ, wolii Oluwa tootọ ni Jona jẹ. Sibẹsibẹ, asọtẹlẹ rẹ si awọn ara Ninefe ko wa si imuṣẹ. Ki lo si fa? Ironupiwada awọn ara Ninefe ni o fa. Eyi tunmọ si pe iha ti a ba kọ si ọrọ Ọlọrun ti wolii ba sọ fun wa naa ni ipa ti o ga lati ko lori boya ọrọ naa yo wa si imusẹ tabi ko ni wa si imuṣẹ (Jeremaya 18:5-10). Amọ ṣa o, ti ohun gbogbo ba ri bi o ṣẹ yẹ ki wọn ri, ohunkohun ti wolii otitọ ba sọ ni orukọ Oluwa di dandan ki o wa si imuṣẹ.

Ekeji, a le mọ eke wolii nipa bi ọrọ rẹ ba ṣe ba ifẹ Ọlọrun ti a ti kọ sinu iwe mimọ mu si. Iwọ na wo nkan ti Ọlọrun sọ fun awọn eniyan rẹ: “Bi wolii kan ba dide laarin yin tabi alalaa kan, ti o si fi ami tabi iṣẹ iyanu kan han ọ, Ti ami naa tabi iṣẹ iyanu naa ti o sọ ba ṣẹ, wi pe, Ẹ jẹ ki a tele ọlọrun miiran lẹyin, ti iwọ ko mọ ri ki a si maa sin wọn; Iwọ ko gbọdọ feti si ọrọ wolii naa, tabi alalaa naa: nitori pe Oluwa Ọlọrun yin n dan yn wo ni, lati mọ bi ẹyin ba fi gbogbo aya yin, ati gbogbo ọkan yin fẹ Oluwa Ọlọrun yin.” (Ditaronomi 13:1-3) Nitorina, ẹnikẹni ti o ba pe ara rẹ ni wolii, ti ọrọ rẹ si lodi si nkan ti a kọ wa ninu bibeli, a ko gbọdọ feti si. O ṣeeṣe ki o jẹ pe eke wolii ni. Ti ko ba si ki i ṣe eke, a jẹ wipe o ti n fi aye gba Eṣu lati ya lo niyẹn, o si nilo adura ati ironupiwada. O wa ṣeni laanu pe ọpọ ọmọ Ọlọrun, ti o yẹ ki otitọ yi ye, ni o n tẹle awọn eke wolii ti wọn n kọ wọn lati wuwa lodi si ifẹ Ọlọrun. Irufẹ awọn wọnyi yoo si da ara wọn lẹbi nikẹyin ni.

Ekẹta, a le mọ eke wolii nipa bi iwa rẹ ba ṣe wa ni ibamu pẹlu ifẹ Ọlọrun si. Jesu sọ wipe: “Ẹ maa kiyesi awọn eke wolii ti o n tọ yin wa ni awọ agutan, ṣugbọn apanijẹ ikooko ni wọn ninu. Eso wọn ni ẹyin o fi mọ wọn…” (Matiu 7:15) Ọna wo ni Jesu sọ pe a o fi mọ awọn eke wolii o? Nipa eso ti aye wọn n so. Iru eso wo wa ni O n sọrọ nipa? O n sọrọ nipa eso Ẹmi mimọ, eso ododo, bi ifẹ, ayọ, igbagbọ, itẹriba, suuru, ikora-ẹni-nijaanu ati bẹẹbẹẹ lọ (Galatia 5:22-23). Ẹnikẹni ti o ba wa pe ara rẹ ni wolii, ti awọn nkan wọnyi ko si jẹyọ ninu aye rẹ ni ọna ti o ṣe fojuri, eke ni. O le ma yọ ina lẹnu, ki asọtẹlẹ rẹ si ma wa si imuṣẹ. Amọ eke ni. O tilẹ ṣeeṣe ki o jẹ pe nṣe ni o n dọgbọn si ọrọ ara rẹ ki asọtẹlẹ rẹ ba le ma wa si imuṣẹ. Idi ni pe asọtẹlẹ, iṣẹ iwosan, iṣẹ imularada ati awọn iṣẹ ami miran ṣe e dọgbọn si. Awọn eniyan le lo ẹmi oṣo tabi ti ajẹ lati ṣẹ awọn nkan wọnyi. Ṣugbọn eso Ẹmi Ọlọrun ko ṣe e dọgbọn si. Ti o ko ba ti ni Ẹmi rẹ ninu rẹ, o le so eso Ẹmi rẹ. Ko ju bayẹn lọ.

OJUṢE WOLII
Pẹlu awọn nkan ti a ti wa sọ silẹ yi, ki wa ni ojuṣe ẹnikẹni ti a ba pe ni wolii? Ti a ko ba i ti gbagbe, a ti sọ siwaju pe ti a ba n sọrọ nipa wolii, a n sọrọ nipa ẹnikan ti o n ri ifihan Ọlọrun ati ifẹ rẹ gba, ki o ba le rin ninu rẹ, ki o si ba le tọ awọn ẹlomiran lati ṣe bẹẹ gẹgẹ. Eyi wa jasi pe akọkọ ninu ojuṣe wolii ni lati mọ Ọlọrun ati ifẹ rẹ. Ẹni ti ko ba ma mọ Ọlọrun ko le ṣe iṣẹ wolii. Ka ti lẹ sọ ododo, Ọlọrun ko le gbe iṣẹ wolii fun ẹni ti ko ba mọ ọn tabi ṣetan lati mọ ọn. Eyi ko wa jasi pe ko le gba ẹnu ẹni ti ko mọ ọn sọrọ rara. Ti O ba le gba ẹnu kẹtẹkẹtẹ Balaamu sọrọ, O le gba ẹnu ẹnikẹni, bi o tilẹ jẹ apaniyan, sọrọ tabi sọtẹlẹ (Numeri 22:21-31; Johanu 12:47-51).

Ṣugbọn ẹni yowu ti yo ba jẹ wolii ti Ọlọrun yo maa ti ẹnu rẹ sọrọ yoo jẹ ẹni ti o mọ ọn, ti o si tun mọ ifẹ rẹ. Bẹẹni, ibaṣepọ irufẹ ẹni bẹ pẹlu ti Ọlọrun gbọdọ munadoko. Eti rẹ gbodọ fi gbogbo igba wa ni yiya silẹ lati gbọ ọrọ Ọlọrun. Ọkan rẹ si gbọdọ fi gbogbo igba ma lepa lati ka ọrọ rẹ ati lati ṣe aṣaro ninu rẹ. Aijẹbẹ, wolii tara rẹ ni yoo jẹ; iṣẹ tara rẹ ni yoo si ma a jẹ pẹlu. Ailoye eyi ni o fa ti a fi ni ọpọ ti wọn pe ara wọn ni wolii loni ti Ọlọrun ko ye. Awọn wọnyi rope ki a kan riran, lala tabi gbohun ni o ma n sọ eniyan di wolii. Wọn ko mọ pe a gbọdọ ji pepe ninu imọ ọrọ Ọlọrun ki a ba le ma ṣe iyatọ ti o peye laarin ọrọ ti o ti ọdọ Ọlọrun wa ati eyi ti o ti ọdọ Eṣu wa. (Wo: Aisaya 50:4-5; Jeremaya 23:16-22)

Ojuse wolii keji ni lati gbe igbe aye rẹ ni ibamu pẹlu imọ Ọlọrun ati imọ ifẹ rẹ ti a ti fi han an, paapaa julọ lati inu iwe mimọ. Ẹnikẹni ti o ba wa pe ara rẹ ni wolii, ti igbesi aye rẹ si lodi si ọrọ inu iwe mimọ, n fi ara rẹ si abẹ idajọ Ọlọrun, yatọ si pe o wa ni abẹ ewu ayalo Eṣu. Irufẹ awọn wọnyi si ni Jesu n ba wi, nigba ti O sọ pe, “Ki i ṣe gbogbo ẹni ti n pe mi ni Oluwa, Oluwa, ni yoo wọle ijọba ọrun; bi ko ṣe ẹni ti n ṣe ifẹ ti Baba mi ti n bẹ ni ọrun. Ọpọlọpọ eniyan ni yoo wi fun mi ni ọjọ naa pe, Oluwa, Oluwa, awa ko ha sọtẹlẹ ni orukọ rẹ? Ati ni orukọ rẹ ki a fi le awọn ẹmi eṣu jade? Ati ni orukọ rẹ ki a fi ṣe ọpọ iṣẹ iyanu nla? Nigba naa ni emi o si wi fun wọn pe, Emi ko mọ yin ri, ẹ kuro lọdọ mi, ẹyin oniṣẹ ẹṣẹ.” (Matiu 7:21-23) Njẹ o ri bayi? Pe eniyan n sọtẹlẹ lorukọ Jesu ko jasi wipe ko ni pari irin ajo rẹ sinu ina ọrun apadi. Niwọn igba ti ko ba ti ma ṣe ifẹ Ọlọrun ninu ọrọ, iwa ati iṣe rẹ, eke ni Ọlọrun yoo ka si. Ọpọ si ni irufẹ awọn wọnyi ma n ṣi lọna nipaṣe awọn iwa irira wọn.

Ojuse wolii kẹta ni lati sọ ọrọ Ọlọrun ni ẹkunrẹrẹ fun awọn eniyan rẹ, lalai fi kun tabi yọ kuro nibẹ. Eyi jasi pe wolii Ọlọrun ko gbọdọ jẹ opurọ tabi ẹni ti ẹru lati sọ otitọ ma n ba. Idi si ni pe iha ti awọn eniyan yoo kọ si ọrọ rẹ duro lori imura, itara ati iduro ṣinṣin rẹ lati ba awọn eniyan sọ ọrọ Ọlọrun gẹgẹ bi Ọlọrun ti sọ. Boya awọn to n ba sọrọ wa gbọ tabi wọn ko gbọ o ko ki i ṣe iṣoro tirẹ. Eyi ti Ọlọrun n fẹ lati ọdọ rẹ ni lati sọ ọrọ rẹ lotitọ ati lẹkunrẹrẹ fun awọn yowu ti O ba ran an si. (Wo: Jeremaya 1:4-8; Isikiẹli 2:1-8 & 33:1-9) Ti Ọlọrun ko ba si ba sọrọ, ko yẹ ki o la ẹnu rẹ lati sọ nkankan.

Ṣe o wa ṣeeṣe ki Ọlọrun ma ni nkankan ti O fẹ ti ẹnu wolii ba eniyan sọ? O ṣeeṣe. A ri ninu iwe mimọ pe akoko kan wa ti Ọba Sọọlu n fẹ ki Ọlọrun ba oun sọrọ nipa ala, nipa Urimu tabi nipa awọn wolii. Ṣugbọn Ọlọrun ko da lohun. Ki lo fa? Idi ni pe ẹnikan ti ko naani ọrọ Ọlọrun ati alaigbọran ni. Aijẹbẹ, iba ti ma tẹlẹ ọrọ inu iwe mimọ, yala Ọlọrun ba sọrọ nipa iran, ala tabi wolii tabi ko ba sọrọ. Nitorina, awọn igba ma n wa ti Ọlọrun le pinnu lati ma ba eniyan sọrọ nipasẹ wolii, niwọn igba ti ẹni na ko ba ti ṣetan lati tẹle ọrọ iwe mimọ tabi ti ẹni naa jẹ olorikunkun. Igba miran ẹwẹ, o le ma jẹ ni kiakia ni Ọlọrun yo ba wolii rẹ sọrọ lori ọrọ ti awọn eniyan mu tọ ọ wa. Ti eyi ba si ribẹ, ẹni ti o ba jẹ wolii otitọ yoo ni suuru titi Ọlọrun yoo fi fi ifẹ rẹ lori ọrọ ti o wa nilẹ han an ni dipo ti yoo fi kan wa ikankan sọ. (Wo: 1Samuẹli 28:3-6; Isikiẹli 3:26-27; Jeremaya 42&43)

Amọ, nitori ailoye ọrọ Ọlọrun, ọpọ wolii loni lo ro wipe gbogbo igba ti awọn eniyan ba tọ wọn wa naa ni wọn gbọdọ ri nkan sọ tabi ri nkan sọ lẹsẹkẹsẹ. Eyi si lo fa ti Eṣu fi n ri wọn yaalo. O le jẹ nitori owo ti wọn fẹ gba lọwọ awọn ti o wa ni tabi nitori pe wọn ko fẹ ki wọn ma foju ẹni ti Ọlọrun ko ba sọrọ wo wọn. Eyi ti o wu ko jẹ, ijiya gidi n bẹ fun ẹnikẹni ti Ọlọrun ko ran niṣẹ bi wolii ti o si n jẹ iṣẹ tabi ẹni ti o n yi ọrọ Ọlọrun po. Bi Balaamu ṣe ni ojukokoro to gẹgẹ bi ariran, gbogbo igba ni o n jẹ ko ye awọn eniyan pe oun ko le sọ nkan ti Ọlọrun ko ba fi si oun lẹnu lati sọ. Sibẹsibẹ, Ọlọrun da ṣeria fun nitori ojukokoro rẹ. Ti iwọ naa, bi wolii, ba fi aye gba ojukokoro, ibẹru tabi ifẹ oriyin awọn eniyan lati ma a sọ ọrọ Ọlọrun bi ko ṣe tọ tabi lati jẹ iṣẹ ti ko ran ọ, o di dandan ki iwọ na jẹ iyan rẹ niṣu. (Wo: Book 23:11-12&25-26; Jeremaya 23:9-32)

AALA IṢẸ WOLII
Njẹ ṣe wolii tabi iṣẹ wolii ni aala bi? Bẹẹni. Bi wolii tilẹ jẹ ẹni ti Ọlọrun yan lati fi ara rẹ ati ifẹ rẹ han, ki o ba le tọ awọn eniyan sọna, kilọ fun wọn tabi fun wọn ni idajọ Ọlọrun, eyi ko tunmọ si pe gbogbo nkan naa ni o mọ tabi ti o le mọ nipa awọn ti Ọlọrun ran an si. Pọọlu sọ eyi fun wa: “Nitori imọ wa ko to nnkan, isọtẹlẹ wa ko si to nnkan pẹlu.” (1Kọrinnti 13:9) Eyi tunmọ si pe ọwọ nkan ti Ọlọrun ba fi han wolii rẹ nikan naa ni yoo mọ, ti yo si le sọrọ tabi ṣiṣẹ le lori. Eyi ti Ọlọrun ko ba fihan an, ko si nkan ti o le ṣe le lori. Idi si niyi ti a fi gbọdọ ma fi gbogbo igba lepa lati mọ gbogbo ifẹ Ọlọrun lati inu iwe mimọ. Aijẹbẹ, a le wa labẹ ewu ṣiṣe amulo ọrọ wolii ti o kan n fi abala diẹ lara ifẹ Ọlọrun fun wa han.

Fun apẹẹrẹ, Ọlọrun lo wolii Eliṣa lati sọ asọtẹlẹ fun arabinrin kan pe yoo bimọ, o si bimọ gẹgẹ bi asọtẹlẹ na. Amọ Ọlọrun ko wa fi han wolii yi pe ọmọ naa yoo ku nigba ti o ba dagba diẹ, ti o yẹ ki awọn obi rẹ bẹrẹ si ni gbadun rẹ. Nitorina, nigba ti ọmọ naa ku, wolii Eliṣa sọ wipe, “…Ọlọrun si pa a mọ fun mi, ko si sọ fun mi.” (2Awọn Ọba 4:27) Eyi n jẹ ki o ye wa pe gbogbo nkan naa kọ ni wolii ma n ri. Nitorina, a ko gbọdọ pa ọrọ iwe mimọ ti lati kan ma wa asọtẹlẹ wolii kaakiri. Aijẹbẹ, a le tipasẹ asọtẹlẹ wolii ṣina tabi kọsẹ.

IHA TI O YẸ KI A KỌ SI WOLII
Iha wo wa ni o yẹ ki a kọ si wolii ati iṣẹ iranṣẹ wọn? Akọkọ, a gbọdọ gba wọn gbọ, niwọn igba ti a ba ti mọ daju pe wolii otitọ niwọn ati wipe ọrọ wọn wa ni ibamu pẹlu ọrọ iwe mimọ. Ọba Jehoṣafati sọ eyi fun awọn eniyan rẹ ni akoko kan: “…Ẹ gba Oluwa Ọlọrun yin gbọ, bẹẹ ni a o fi ẹsẹ yin mulẹ; ẹ si gba awọn wolii rẹ gbọ, bẹẹ si ni ẹyin o ṣe rere.” (2Kironika 20:20) Yatọ si eyi, Jesu Oluwa wa naa sọ wipe, “Ẹni ti o ba gba wolii ni orukọ wolii, yoo jẹ ere wolii…” (Matiu 10:41) Nitorina, ti a ba fẹ ti ipasẹ wolii yowu ti Ọlọrun ba ran si wa lati jere ifẹ, oju-rere tabi aanu Ọlọrun, a gbọdọ gba a gbọ, ki a si tẹle ohunkokun ti o ba sọ fun wa. Eyi ti o ba jẹ mọ ki a ronupiwada, ki a ronupiwada. Eyi ti o ba si jẹ mọ ki a dupẹ lọwọ Ọlọrun, ki a si tun duro ṣiṣin ninu igbagbọ wa ati ododo rẹ, ki a ṣe bẹẹ gẹgẹ. Nipa bayi, a o le jere iṣẹ iranṣẹ wolii.

Yatọ si eyi, a nilo lati bọwọ fun awọn wolii ti Ọlọrun n lo fun wa, ki a si ma fi nkan ini wa ran iṣẹ iranṣẹ wọn lọwọ, gẹgẹ bi a ṣe kọ wa ninu bibeli. Idi si ni pe eyi ni ere lori pupọ niwaju Ọlọrun. Amọ, ti a ba n ri wọn fin tabi sọ ọrọ odi si wọn, a le wa si abẹ idajọ Ọlọrun ti o lewu. (Wo: Numeri 12; 1Awọn Ọba 17:7-24; 2Awọn Ọba 4:8-37; Emọọsi 7:10-17; Matiu 10:40-42; 1Tẹsalonika 5:12-13)

Ni afikun, a ko gbọdọ gbagbe pe ẹlẹran ara ni wolii kọọkan. Nitorina, bi a ti ṣe sọ siwaju, a ko gbọdọ tẹle wolii kankan ti isọtẹlẹ rẹ tabi igbe aye rẹ ko ba ti wa ni ibamu pẹlu ifẹ Ọlọrun. A gbọdọ ma fi gbogbo igba ranti ọrọ Pọọlu ti o sọ wipe, “Ẹ maa ṣe afarawe mi, ani gẹgẹ bi emi ti n ṣe afarawe Kirisiti.” (1Kọrinnti 11:1) Aijẹbẹ, ọrọ wa le dabi ti wolii ọdọ kan ti agba wolii kan ṣi lọna, ti o si jẹ ki o ṣegbe (1Awọn Ọba 13).

ỌRỌ IPARI
Ni akotan, wolii jẹ ẹnikan ti Ọlọrun yan lati fi ara rẹ ati ifẹ rẹ han, ki O ba le lo o lati fi ifẹ ati ete rẹ han si awọn eniyan. Amọ, ko wa ki i ṣe gbogbo wolii naa ni Ọlọrun yan, ko si ki i ṣe gbogbo wolii ti Ọlọrun yan naa ni o ma n fi ododo jẹ iṣẹ ti o gbe fun wọn. Idi si ni yi ti ọmọ Ọlọrun kọọkan fi gbọdọ ni imọ ti o peye nipa wolii ati iṣẹ wọn, ki o ma ba bọ sọwọ awọn eke wolii ati ki o ma ba duro lori iṣọtẹlẹ ti ko fi gbogbo ifẹ Ọlọrun han, ki o si kọsẹ.

IBEERE

  • Bawo ni ẹkọ yi ṣe ran imọ ati oye rẹ nipa wolii ati iṣẹ iranṣẹ rẹ lọwọ si?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (Whatsapp Number : 07085711280)

Akori : WOLII Read More »

Duro de Oluwa | Paito J.O. Lawal

Leave a Comment

Ọjọ: Okudu 13, 2021 | Nọmba: Vol. 10, No. 6

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Okudu 2021. Adura mi si ni pe ki a pa iwọ ati idile rẹ mọ lati ri ire ti Ọlọrun yoo mu wa fun orilẹ-ede yi, ni orukọ Jesu. Amin.

Dafidi, ninu ọkan ninu awọn orin rẹ, sọ pe, “Ṣugbọn emi ti gbagbọ lati ri ire Oluwa ni ilẹ alaaye. Duro de Oluwa; ki o si tuju ka, yoo si mu ọ ni aya le: mo ni duro de Oluwa.” (Saamu 27:13-14) Ki ni igbagbọ ọkunriin yi? Igbagbọ rẹ ni pe yoo ri ire Oluwa ni ilẹ alaaye. Ki si ni idi ti o fi igbagbọ lọna yi? Idi ni pe o n duro de Oluwa ti ko ki i jani kulẹ.

Bi a ti ṣe ri ninu iwe mimọ, gẹgẹ bi ọdọmọkurin, Dafidi dojukọ inunibini ti o le koko lati ọdọ Sọọlu, ti o jẹ ọba lori Isiraẹli ni akoko ti a n wi yi. Nitorina, oun, awọn jagunjagun rẹ ati awọn ẹbi wọn ni lati ma fi gbogbo igba sa lati ibikan si ibomiran; wọn ko si le gbe aye bi awọn eniyan gidi ṣe n gbe aye. Igba kan tilẹ wa, ẹwẹ, ti a sọ ina si agọ wọn ti wọn n lo fi igba diẹ, ti awọn ara Amaleki si ko gbogbo awọn iyawo ati ọmọ wọn lọ. Eyi si ni awọn jagunjagun lara tobẹẹ gẹẹ ti wọn fi bẹrẹ si ni sọrọ nipa lilẹ ni okuta, nitori wọn woye pe ibaṣepọ wọn pẹlu rẹ ko mu ikankan wa fun wọn ju idamu lọ.

Sibẹsibẹ bibeli sọ pe Dafidi ko ba ọkan jẹ nitori awọn nkan wọnyi. Dipo eyi, o fun ara rẹ ni okun ninu Oluwa, niwọn igba ti O mọ pe o di dandan ki O fun oun ni iṣẹgun ni gbogbo ọna, ki O si tun fi opin si gbogbo awọn ọjọ irinkinri rẹ ni ọjọ kan (1Samuẹli 30:6). Idi ni yi ti o ṣe sọ pe oun ni igbagbọ pe oun yoo ri didara Oluwa ni ilẹ alaye. Ṣe o wa ri tabi ko ri? O ri. O ri didara Ọlọrun ni oju ẹmi rẹ, ko si ki i ṣe lẹyin iku rẹ. Ko kan di ọba lori orilẹ-ede Isiraẹli nikan, o tun ni oore-ọfẹ ti ko wọpọ lati fi ọkan lara awọn ọmọkunrin rẹ jọba lori ilẹ na ki o to ku.

Ṣugbọn ki lo fa ti Dafidi fi ri didara Oluwa nikẹyinkẹyin ni oju ẹmi rẹ, pẹlu gbogbo iriri buruku ti o ni gẹgẹ bi ọdọmọkunrin? Bi a ti ṣe ri ninu ẹsẹ bibeli ti o wa loke yi, nitoripe o duro de Oluwa dipo ki o sọ ireti nu ni. Oluwa ti yan gẹgẹ bi ọba dipo Sọọlu; O si tun fun ni ọpọlọpọ ileri ti o ga, ti o si tun dara. Ṣugbọn ki o to le ri imuṣẹ awọn nkan wọnyi, o nilo lati fi igbagbọ ati suuru rẹ ninu Oluwa han. Lotitọ, o nilo lati ṣe eyi fun ọdun melokan. Amọ, igbagbọ rẹ ninu Ọlọrun ati suuru rẹ ko ja si pabo. Nitorina, o wa le sọ fun awọn miran ninu orin rẹ ti o wa loke pe ki awọn naa ṣe bi oun ṣe ṣe, ti wọn ba fẹ ri didara Oluwa ni ilẹ alaye.

Njẹ wọ na fẹ lati ri didara Oluwa ni oju aye rẹ bi? Njẹ iwọ na fẹ wa laye ati lalaafia nigbati Ọlọrun ba dana ṣun aṣọ ẹgan orilẹ-ede yi, ti O si tun wọ ni aṣọ ogo ati iyin? Ẹmi fẹ wa laye ati ni alaafia nigba ti eyi ba ṣẹle.  Mo si tun fẹ ki idile mi wa laye ati lalaafia pẹlu nigba ti o ba ṣẹlẹ. Mo si wa ni igbagbọ bi ti Dafidi pe Oluwa ti o dara, ẹni ti o gba wa la kuro lọwọ ẹṣẹ wa, ti O si mu wa wa sinu ijọba ologo rẹ, yoo jẹ ki eyi ri bẹ. Nitorina, irufẹ nkan yowu ti mo le ri tabi gbọ, mi o ni ba ọkan jẹ tabi igbe igbagbọ mi ninu rẹ sọnu. Dipo bẹ, nṣe ni ma mu ọkan le, ti ma si tun duro de e. Bẹẹni, emi o duro de e nitoripe o n ṣe itọju me, O si tun ṣe gbọkanle. Njẹ iwọ naa yoo ha ṣe bakanna bi?

Ki o ni ọṣẹ alarinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

Duro de Oluwa | Paito J.O. Lawal Read More »

Pada tọọ wa pẹlu idupẹ | Paitọ J.O. Lawal

Leave a Comment

Ọjọ: Okudu 06, 2021 | Nọmba: Vol. 10, No. 5

Olufẹ: kaabọ sinu ọsẹ keji ninu oṣu Okudu 2021. Ki oore-ọfẹ ati aanu Ọlọrun maa ṣan lori aye rẹ ati nipasẹ aye rẹ laini odiwọn ninu ọsẹ naa ati ni gbogbo eyi ti o ku ninu ọdun yi, ni orukọ Jesu. Amin.

Wayi o, bi o tilẹ jẹ pe o dara jọjọ lati ma gbadura ni iru ọna yi ati lati ma reti pe ki Ọlọrun dahun, a tun nilo lati jẹ ki o ye wa pe ti a ko ba ma fi imoore ti o peye han lori gbogbo awọn nkan ti O ti n ṣe fun wa, ko yẹ ki a maa reti ki O tun ṣe jubẹẹ lọ fun wa. Mi o wa sọ pe o di dandan ki Ọlọrun ma ṣe ju bi O ṣe n ṣe fun wa latẹyin wa lọ, ti a ko ba fi imoore han si fun awọn nkan ti O ti ṣe fun wa. Ọlọrun ni Oun jẹ; ko ki i ṣe eniyan. Nitorina, ko ki i fi gbogbo igba duro de wa lati dupẹ lọwọ rẹ tabi fi imoore han si fun awọn nkan ti O ti ṣe fun wa tabi ti O n ṣe fun wa ki O to o ṣe jubẹẹ lọ si fun wa.

Sibẹsibẹ, gbogbo igba ni O ma n reti pe ki a fi imoore wa han lori awọn nkan ti O n ṣe ninu aye wa tabi ti O ti ṣe fun wa. Fun apẹẹrẹ, Luuku, ninu iwe ihinrere rẹ, sọ fun wa bi awọn adẹtẹ mẹwa kan ṣe tọ Jesu Oluwa wa fun iwosan. Nigbati wọn si de, ko le wọn danu. Dipo eyi, O ṣaanu fun wọn, O si sọ fun wọn pe ki wọn lọ fi ara wọn han awọn alufa. Nitorina, wọn lọ, bi O ti ṣe paṣẹ fun wọn. Nigba ti wọn si n lọ, lojiji ni wọn ri pe a ti wẹ wọn mọ — ẹtẹ wọn ti poora. (Wo: Luuku 17:11-14)

Ki wa ni nkan ti o tọ fun awọn ọkunrin wọnyi lati ṣẹ? Pẹlu imọ kekere ti mo ni nipa bi o ṣe yẹ ki a ma ṣe nkan, mo gbagbọ pe nṣe ni o yẹ ki wọn pada tọ Jesu lọ lati kọkọ fi tọkantọkan dupẹ lọwọ rẹ fun nkan ti O ṣe fun wọn. Lotitọ, pẹlu bi nkan ṣẹ ri wọn ni akoko yẹn, wọn le ma ni oore-ọfẹ lati ni owo lọwọ tabi awọn nkan miran ti wọn le mu tọ Jesu wa lati dupẹ lọwọ rẹ. Amọ, o tilẹ wa kere ju, wọn le pada sọdọ rẹ lati dupẹ lọwọ rẹ fun iwosan wọn, ki wọn to wa bẹrẹ si ni woye nkan ti wọn fẹ ṣe pẹlu ibẹrẹ tuntun ti O ti fun aye wọn.

Njẹ wọn wa ṣe eleyi bi? Ṣe gbogbo wọn naa lo pada lọ wa Jesu ri lati fi imoore wọn han si fun nkan ti O ṣe fun wọn? O ti o! Ẹnikan ṣoṣo lara wọn, ara Samaria kan, nikan naa lo pada tọ ọ wa lati juba rẹ ati lati dupẹ lọwọ rẹ fun iwosan ti o rigba. Eyi ko si dun mọ Oluwa ninu rara tobẹ ti O fi sọ pe, “Awọn mẹwaa ki a sọ di mimọ? Awọn mẹsan yooku ha da? A ko ri ẹnikan ti o pada wa fi ogo fun Ọlọrun, bikoṣe alejo yii. O si wi fun un pe, Dide ki o si maa lọ; igbagbọ rẹ mu ọ lara da.” (Luuku 17:17-19)

Eyi tunmọ si pe Oluwa gan n reti ki awọn ọkunrin mẹwẹẹwa yi pada wa lati dupẹ lọwọ rẹ fun iwosan wọn. Ko kuku sọ pe ki wọn mu owo tabi ohun miran wa fun Oun. Bẹẹ si ni ko gba nkankan lọwọ wọn ki O to wo wọn san, nitoripe iwosan jẹ ẹbun ọfẹ Ọlọrun ni gbogbo igba. Eyi naa ko si tun wa jasi pe nkan ti ko dara ni pe ki wọn mu owo tabi ohun ini wọn miran wa lati fi imoore wọn han si i, bi o tilẹ jẹ pe o fẹrẹ daniloju pe ko ni i gba lọwọ wọn. Ko si nkan ti o buru nibẹ rara.

Ka tilẹ wa wo lati ẹgbẹ miran, gẹgẹ bi ofin Mose, awọn nkan kan wa ti ẹnikẹni ti o ba gba iwẹnumọ kuro ninu arun bi ti ẹtẹ gbọdọ ko wa si ọdọ alufa ti you ṣe iwẹnumọ ẹṣẹ fun. Idi si ni yi ti Oluwa fi sọ fun awọn ọkunrin wọnyi lati lọ fi ara wọn han awọn alufa. Bi ofin na si tun ṣe tẹsiwaju lati sọ, awọn nkankan wa lara awọn nkan ti irufẹ ẹni na ba ko wa ti yoo jẹ ti alufa ti o n ṣipẹ si Ọlọrun lori ọrọ rẹ. Ti o ba wa tọ fun alufa ti ko ṣe nkankan lori bi wọn ṣe gba ilera lati gba ọrẹ lọwọ wọn, ki wa ni ki a sọ nipa ti ẹni ti o wo wọn san? Ṣe ko lẹtọ lona ti o ga ju ti alufakalufa lọ lati gba ọrẹ ọpẹ pẹlu ijọsin lọwọ wọn? O lẹtọ. (Wo: Lẹfitiku 14:1-31)

Ṣugbọn ko tilẹ wa reti nkan miran lati ọdọ wọn ju ọrọ iyin ati ọpẹ lọ. Amọ, o wa ṣeni laanu pe ẹnikan ṣoṣo ninu wọn ni o pada wa lati fun ni eyi. Ẹnikan ti o pada wa lati fi imoore han yi nikan naa si ni o ri ọrọ Ibukun miran si gba lati ẹnu rẹ — igbagbọ rẹ mu ọ lara da. Nkan ti ọrọ ibukun miran yoo wa jasi ninu aye ọkunrin yi Ọlọrun nikan ni O le sọ. Ṣugbọn o ṣa ri nkan gba si lati ọwọ rẹ ju awọn yoku lọ nitoripe o pada wa lati dupẹ.

Ki gan wa ni itan yi n kọ wa? Ohun naa ni pe awọn nkan kan wa ti a le ma rigba lọwọ Ọlọrun, ti a ko ba kọ lati ma fi imoore han si fun awọn nkan ti O n ṣe fun wa. O ṣi n ṣe oniruuru nkan fun wa ti ọgbọn wa, owo wa, ipo wa, iyi wa tabi ẹkọ wa ko le ri fun wa. Nitorina, ẹ jẹ ki a ye jẹ abaramoorejẹ, ki a si bẹrẹ si ni fi tọkantọkan, ori pipe ati pẹlupẹlu awọn nkan ini wa fi imoore wa han si fun awọn nkan ti O n ṣe fun wa. Mo si gbadura pe ki a sọ ọkan wa ji, ki a si tun fun wọn ni okun lati ma fi gbogbo igba ṣe ohun ti o tọ lori ọrọ yi, ni orukọ Jesu. Amin.

Ki o ni ọsẹ alarinrin.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

Pada tọọ wa pẹlu idupẹ | Paitọ J.O. Lawal Read More »

AKỌRI: ṢIṢE AMULO TO PEYE IṢEDARI IJỌ ỌLỌRUN (2) AYỌKA: EFESU 4:11-16

Leave a Comment

ỌJỌRU 02, OKUDU 2021

AKỌSORI: AKỌSORI: “Awọn agba Juda si kọle, wọn si ṣe aṣeyọri nipa iyanju Hagai wolii ati Sakaria ọmọ Iddo…” (Ẹsira 6:14)

ỌRỌ AKỌSỌ

Bi a ti ṣe ri ninu ẹkọ ti a kọ kẹyin, ara awọn idi ti Ọlọrun fi ṣe agbekalẹ iṣedari ninu ijọ rẹ ni ki a ba le tọju awọn ọmọ rẹ lati dagbasoke ninu ẹmi, eyi ti o ni i ṣe pẹlu ki iwa ati iṣe wọn jọ ti Kirisiti ni gbogbo ọna. Idi miran ni o tun ni i ṣe pẹlu pipese wọn fun iṣẹ iranṣẹ. Ọmọ Ọlọrun kọọkan ni o ni ojuṣe ninu idile rẹ. Ṣugbọn ti a ko ba ṣe e yẹ lati mọ ojuṣe naa ati lati maa ṣe ni ibamu pẹlu ifẹ Ọlọrun, ko si ni ki o ma ba nkan jẹ. Nitorina, ara ojuṣe awọn adari ijọ ti Ọlọrun pese fun wa ni lati pese wa lati jẹ yiyẹ fun iṣẹ iranṣẹ yowu ti Ọlọrun ba ni fun wa. Yatọ si eyi, bi a tun ṣe ri ninu ẹkọ ti a kọ sẹyin, idi miran ti Ọlọrun ṣe gbe awọn adari kalẹ fun wa ninu ijọ ni lati tọ wa sọna lati di ọkan ninu igbagbọ ati imọ wa ninu Kirisiti. Lotitọ, ọkan ni wa ninu Ẹmi ati ninu ara Kirisiti. Amọ ti a ko ba dagbasoke ninu igbagbọ wa ati ninu imọ ẹni ti Kirisiti jẹ, a ko ni ri ara wa gẹgẹ bi ọkan, ki a si ma ṣiṣẹ papọ ninu aye yi bi ọkan.

Ki awọn erongba ati ete wọnyi ti o n jẹ ki Ọlọrun pese awọn adari fun wa ninu ijọ wa ba le wa si imuṣẹ, a gbọdọ kọ iha ti o tọ ati ti o yẹ si awọn adari yowu ti Ọlọrun ba fun wa. Ti a ko ba i ti gbagbe, nkan ti o jẹ ki awọn ijọ ti Joṣua dari fi ilẹ-ileri ṣe erejẹ, bi o tilẹ jẹ pe wọn ba ọpọlọpọ idojukọ pade, ni pe wọn kọ iha ti o tọ ati ti o yẹ si iṣedari rẹ. Amọ awọn obi awọn wọnyi, ti Mose ko jade lati Ijibiti, ko ma wọ ile ileri pẹlu wọn. Idi si ni pe wọn ko kọ iha ti o tọ si iṣedari Mose. Wọn ko fi gbogbo ara gba Mose gẹgẹ bi ojiṣẹ Ọlọrun si wọn. Bẹẹ si ni wọn ko fi gbogbo ọkan wọn gba gbogbo ọrọ Ọlọrun ti o mu tọ wọn wa gbọ. Oun funrarẹ gan ṣe apejuwe wọn gẹgẹ bi aṣọtẹ si Ọlọrun. Nitorina, bi o tilẹ jẹ pe a mu wọn jade lati wọ ilẹ ileri ni, wọn kuna lati wọ ibẹ nitori aigbagbọ ati iṣorikunkun wọn si Ọlọrun ati iṣedari ti o yan fun wọn.

ṢIṢE AMULO TO PEYE IṢEDARI IJỌ ỌLỌRUN (2)

Ti awa na ko ba fẹ padanu ete ati ipese Ọlọrun fun aye wa gẹgẹ bi ijọ rẹ, ijọ ti O fi ẹjẹ ọmọ rẹ, Jesu Kirisiti, ra, ani ti a ba fẹ jẹ irufẹ eniyan ti o fẹ ki a jẹ ni aye yi, ki a si ṣe gbogbo ojuṣe ti o yan fun wa ni ọna ti o tẹ ẹ lọrun, awa na gbọdọ kọ iha ti o tọ si iṣedari yowu ti O ba gbe kalẹ si aarin wa. Amọ ti a ko ba mọ iru iha ti o tọ ati ti o yẹ fun wa lati kọ si awọn adari ti Ọlọrun yan fun wa, ko si bi a ko ṣe ni ma kọ iha ti ko yẹ si wọn, eyi ti o le mu ipalara ti o ko ṣe e fẹnu sọ wa fun wa. Ki wa ni iha tabi awọn iha ti o yẹ ki a kọ si awọn adari ti Ọlọrun gbe kalẹ fun wa? Pataki lara wọn ni iwọnyi:

–     Ri wọn bi ẹlẹran ara: Lakọkọ, a ko gbọdọ fi igba kankan gbagbe pe eniyan bi tiwa naa ni awọn adari yowu ti Ọlọrun ba fun wa; wọn ọn ki i ṣe Ọlọrun. Nitorina ailera tabi aleebu oriṣiriṣi ni o le yi wọn ka, yala nipa ti ara tabi ti ẹmi tabi yala nipa igbe aye wọn ki wọn to mọ Jesu tabi lẹyin ti wọn ti mọ ọn. Eyi tunmọ si pe a le ni orisirisi idi lati gan wọn tabi lati ma kọbiara si wọn tabi lati ma mu wọn ni pataki. Ṣugbọn niwọn igba ti o ba jẹ pe Ọlọrun ni o fi wọn ṣe adari wa, ti a ba gba ohunkohun laye lati jẹ ki a gan wọn tabi mu wọn ṣere, ko si bi ete Ọlọrun lori aye wa ṣe le wa si imuṣẹ bi o ṣe yẹ. A tilẹ tun le fa jọgọdi si ori ara wa nipa eyi, paapaa julọ ti o ba jẹ pe irufẹ awọn adari bẹẹ n rin ninu ifẹ Ọlọrun. (Wo: Numeri 12; 2Awọn Ọba 2:23-25; Matiu 23:1-3; 1Timoti 4:12; Jemisi 3:1-2; Heberu 5:1-2). Yatọ si eyi, nitoripe ẹlẹran ara ni awọn adari yowu ti a le ni ninu ijọ, wọn le ṣe aṣiṣe, ṣina, ṣubu tabi sọ igbagbọ wọn nu. Nitorina, a gbọdọ kọ lati tẹle wọn ni iwọn bi awọn naa ba ṣe tẹle Jesu ni. Lakọkọ, eyi si tunmọ si pe awa gan an gbọdọ mọ Jesu funra wa. Aijẹbẹ, a ko ni mọ ti adari kan ti a n tẹle ba pada lẹyin ra, eyi si le pa imuṣe ete ati erongba Ọlọrun lori aye wa run. Ekeji, o tunmọ si pe a ko gbọdọ lo iṣubu, iṣina tabi ikuna adari kankan gẹgẹ bi awawi fun sisọ igbagbọ wa nu. (Wo: 1Kọrinnti 11:1)

–     Ba wọn lo pẹlu ọwọ: Ti a ba fẹ ki iṣedari awọn adari ti Ọlọrun yan fun wa ninu ijọ mu ifẹ rẹ wa si imuṣẹ ninu aye wa, a gbọdọ ba wọn lo pẹlu ọwọ. Fun apẹẹrẹ, bibeli sọ eyi fun wa: “Ṣugbọn awa n bẹ yin, ara, lati maa mọ awọn ti n ṣe laalaa laarin yin, ti wọn si n ṣe olori yin ninu Oluwa: ti wọn si n kilọ fun yin; Ki ẹ si ma bu ọla fun wọn gidigidi ninu ifẹ, nitori iṣẹ wọn. Ẹ si maa wa ni alaafia laarin ara yin.” (1Tẹsalonika 5:12-13) Eyi ko wa tunmọ si pe ki a sọ wọn di oriṣa ti a n bọ ni aarin wa tabi ki a jẹ ki wọn gba aaye Ọlọrun ninu aye wa. Ṣugbọn a gbọdọ bọwọ fun wọn gidigidi ninu ifẹ. Nitori kini? Ṣe nitoripe wọn gbayi niwaju Ọlọrun ju wa lọ ni tabi nitoripe ami ororo rẹ pọ lori aye wọn ju ti wa lọ? Rara o! Aye kan na ni Ọlọrun to wa si gẹgẹ bi ọmọ niwaju rẹ. Ifaminororo yan kan naa si ni o fi fun gbogbo wa. Amọ nitori iṣẹ iṣedari ti Ọlọrun gbe fun wọn, O fẹ ki a fi tifẹtifẹ (lalai fi ti oju aye ṣe) bọwọ fun wọn. Aijẹbẹ, ete ti O fi yan wọn sori wa ko ni wa si imuṣẹ.

–     Tẹriba lati tẹle itọni wọn: Yatọ si ki a bọwọ fun awọn adari wa ninu ijọ, a gbọdọ farabalẹ ma tẹle itọni wọn. Ki ni itunmọ ki a sọ pe a bọwọ fun eniyan, ki a ma wa gbọran si lẹnu? Ko ni itunmọ. O si tun lewu fun wa. Idi ni yi ti bibeli ṣe sọ pe, “Ẹ maa gbọ ti awọn ti n ṣe olori yin, ki ẹ si maa tẹriba fun wọn: nitori awọn ni n ṣọ ẹṣọ nitori ọkan yin laisinmi, bi awọn ti yoo ṣe iṣiro, ki wọn ki o le fi ayọ ṣe eyi, ni aisi ibanujẹ, nitori eyi ki yoo ja si ere fun yin.” (Heberu 13:17) Njẹ o ri bayi? Ọlọrun yan awọn adari fun wa ninu ijọ ki wọn ba le tọ wa sọna ninu irin igbagbọ wa ati ki wọn si tun ba le pa wa mọ kuro lọwọ awọn ọta ọkan wa. Wọn a si ma ṣe eyi nipa bibọ wa pẹlu ọrọ rẹ, nipa gbigba adura fun wa ati nipa ṣiṣe iṣẹ ẹṣọ lori aye wa. Ti a ko ba wa tẹriba lati gbọ nkan ti wọn n sọ fun wa, niwọn igba ti o si wa ni ibamu pẹlu ifẹ Ọlọrun, ko si bi ete Ọlọrun ṣe fẹ wa si imuṣẹ lori aye wa. Yatọ si eyi, a ko le mu inu wọn dun. Niwọn igba ti inu awọn ti o n dari wa ninu ijọ ko ba si dun si wa, yala nitori aiṣedeede wa tabi nitori aigbọran wa, iṣẹ iranṣẹ wọn ko le yọri si ere fun wa. Idi ni yi ti adari ijọ ṣe le ma gbadura fun itẹsiwaju tabi aabo awọn ọmọ ijọ rẹ, ki adura rẹ lori wọn si ma gba.

–     Ran iṣẹ wọn lọwọ: O tun ṣe pataki ki a kọ bi a ṣe le ran iṣẹ awọn adari ti Ọlọrun yan fun wa lọwọ, ki a si ma da wọn da ohunkohun ti wọn ba n ṣe lati jẹ ki ete Ọlọrun wa si imuṣẹ lori aye wa ati lori aye awọn onigbagbọ bi tiwa miran. Iṣẹ Ọlọrun kọja nkan ti ẹnikan le da ṣe. Ara idi ti Ọlọrun si ṣe fun wa ni awọn adari ninu ijọ ni yi: ki wọn ba le pese wa lati ṣe iṣẹ rẹ. Ti a ba wa jẹ ọmọ ti o n gbẹkọ, yoo han ninu iha ti a ba kọ si iṣẹ iranṣẹ awọn adari wa. Ki ni idi ti Ọlọrun fi yan idile Aaroni fun iṣẹ alufa lori awọn eniyan rẹ? Idi ni pe o jẹ ọkan gboogi lara awọn ti o n ran Mose lọwọ (Ẹkisodu 17:10-13). Ki si ni idi ti O fi yan Joṣua gẹgẹ bi adari ti yoo rọpo Mose? Idi ni pe oun na jẹ ara awọn ti o n ran Mose lọwọ. Oun tilẹ ti n ran an lọwọ lati igba ewe rẹ (Ẹkisodu 24:13). Bawo ni ti Timoti ati Titu ṣe jẹ ti Pọọlu fi yan wọn lati ṣe idari ara wọn ijọ ti Ọlọrun lo o lati fi lọlẹ? O lo wọn nitoripe wọn wa lara awọn ti o n ran iṣẹ iranṣẹ rẹ lọwọ (Iṣe Apositeli 16:1-5). Ti awa na ba fẹ pọ si ni iwulo lọwọ Ọlọrun, a gbọdọ kọ bi a ṣe n fi tọkantara ran iṣẹ iranṣẹ awọn adari wa lọwọ. O le jẹ nipa gbigba adura fun wọn tabi nipa fififunni tabi nipa biba wọn mojuto awọn ojuṣe wọn kọọkan ki wọn ba le ri aye si lati ṣe awọn iṣẹ ti Ọlọrun fun wọn ti ẹlomiran ko le ba wọn ṣe. A ṣa gbọdọ wa ọna lati ri pe a n ran iṣẹ iranṣẹ wọn lọwọ ni ibamu pẹlu ifẹ Ọlọrun.

ỌRỌ IPARI

Ọlọrun ṣe agbekalẹ iṣedari fun wa ninu ijọ lati jẹ ki a le di ohun gbogbo ti O fẹ ki a da, ki a si le ṣe ohun gbogbo ti O fẹ ki a ṣe. Amọ iha ti a ba kọ si awọn adari ti O yan fun wa ni yoo sọ boya ifẹ, ete ati erongba rẹ lori wa yoo wa si imuṣẹ tabi bẹẹkọ.

IBEERE

–     Darukọ awọn aleebu nipa ti ara ti o le wa ninu aye adari ijọ Ọlọrun.

–     Awọn ọna wo ni o ro pe o le gba ran iṣẹ iranṣẹ awọn adari ijọ rẹ lọwọ? Njẹ o tilẹ mọ wọn?

Lati ọwọ Johnson O. Lawal

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com  or call: 08037592851 (WhatsApp Number: 07085711280)

AKỌRI: ṢIṢE AMULO TO PEYE IṢEDARI IJỌ ỌLỌRUN (2) AYỌKA: EFESU 4:11-16 Read More »

Idajọ ninu ile Ọlọrun | Paitọ J.O. Lawal

Leave a Comment

Ọjọ: Ebibi 30, 2021 | Nọmba: Vol. 10, No. 4

Olufẹ: ki oore-ọfẹ ati aanu jẹ tirẹ lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu ọsẹ yi. Mo si gbadura pe ki ọkan rẹ ma fi gbogbo igba gba okun nipasẹ Ẹmi Ọlọrun lati duro gẹgẹ bi olooto si Oluwa, ki o si tun fidimulẹ pẹlu iduroṣinṣin ninu ododo rẹ, ni orukọ Jesu. Amin.

Gẹgẹ bi Oluwa ti ṣe fi ye mi, ọkan pataki lara awọn nkan ti o n di itankalẹ ati igbooro si ọrọ Ọlọrun ni ilẹ wa lọwọ ni igbe aye ọpọ awọn ti o pe ara wọn ni ọmọ Ọlọrun ti ko wa ni ibamu pẹlu ododo rẹ. Eyi jasi pe idi ti pupọ eniyan si ko ṣe ma tọ Jesu Oluwa wa fun igbala ni pe wọn ko ri eso igbala ninu aye ọpọ awa ti a n fẹnu sọ pe O ti gba wa la. Bawo ni a ṣe le so fun awọn eniyan ki wọn tọ Jesu wa fun ominira kuro lọwọ Eṣu ati awọn ẹṣẹ wọn, nigba ti o han kedere pe awa gan si n gbe igbe aye ẹru Eṣu ati ẹṣẹ? Ta gan ni yoo kọbiara si wa?

Wo o, ko ki i ṣe pe awọn eniyan ko fẹ ni igbala kuro lọwọ ẹṣẹ, asakasa, imisi buburu, aisan, egun atirandiran, iṣẹ ati bẹẹbẹẹ lọ; wọn kan fẹ ri awọn ti aye wọn yoo jẹri han wọn pe o ṣeeṣe ki eniyan ri igbala gba kuro lọwọ awọn nkan wọnyi ni. Ọlọrun si ti gba wa, O tun wa bi, O kun wa fun Ẹmi Mimọ rẹ, O si tun gbin wa si ibikibi ti a ba wa lati jẹ irufẹ ẹri yi fun awọn eniyan. O wa ṣeni laanu pe ọpọ wa gan ni oye ete ati erongba rẹ ko ye. Nitorina, a n sọ ete ati erongba rẹ di aṣan nipa awọn igbe aye ti a n gbe ti o lodi si nkan ti a da wa lati gbe.

Lotitọ, eyi ko jẹ ajoji rara si ijọ. Nigba aye awọn apositeli igbaani gan, irufẹ awọn nkan wọnyi n ṣẹlẹ laarin awọn ọmọ Ọlọrun. A si ri awọn kan ti wọn pe ara wọn ni onigbagbọ ni igba na ti wọn ko dẹkun ole jija, pansaga ṣiṣe, lilu awọn eniyan ni jibiti, yiyan odi, gbigbe igbe aye ojukokoro, yiyan awọn oṣiṣẹ wọn jẹ tabi ṣiṣe iṣẹ ajẹ tabi oṣo. Awọn apaniyan, alagabagebe ati ọmuti paapaa wa ninu ijọ ni awọn ọjọ wọnni. Nitorina, ko si ọkankan ninu awọn iwa ibi ti a n ri ninu ijọ loni ati laarin awọn ọmọ Ọlọrun ti o jẹ tuntun tabi ti o jẹ ajoji si akoko wa. (Woo: Roomu 2:21-22; 1Korinnti 5; Jemisi 4:1-2&5:1-6)

Amọ ṣa o, awọn apositeli Oluwa igbaani naa tun wa jẹ ki o yewa yekeyeke nipasẹ awọn akọsilẹ wọn pe irufẹ ẹnikẹni ti o ba pe ara rẹ ni ọmọ Ọlọrun ti o si n ṣe awọn nkan wọnyi ko ma gan orukọ Oluwa, ki o si ma tabuku oore-ọfẹ rẹ lasan, nṣe ni o tun n ba iṣẹ igbala ti O n ṣe ninu aye yi jẹ. Nitorina, nṣe ni iru ẹni bẹ yẹ ki o ma reti ifarahan ibinu Ọlọrun si i (Roomu 2:1-11; Heberu 0:26-31). Eyi si kọja nkan ti a n sun ṣiwaju di ọjọ idajọ. Dipo bẹ, o jẹ eyi ti yo bẹrẹ si ni ni iriri rẹ lati inu aye yi lọ.

Idi si ni yi ti Peteru ṣe sọ fun wa pe, “Nitori akoko naa de, ti idajọ yoo bẹrẹ lati ile Ọlọrun wa…” (1Peteru 4:17) Njẹ o ri bayi? Apositeli yi ko sọrọ nibi nipa idajọ ti o n bọ ni ọjọ Oluwa. Dipo eyi, o n sọrọ nipa idajọ Ọlọrun ti o n lọ lọwọlọwọ ati ni bayibayi ninu aye yi. O si n sọ pe ijọ Ọlọrun gan ko ni ribi yẹ idajọ yi si. Ka tilẹ so otitọ, aarin wọn ati lori wọn gan ni yoo ti bẹrẹ. 

Nitorina, ti o ba n mọn ọn mọn ṣe awọn nkan ti o lodi si ododo Ọlọrun, mọ wipe o jẹ ọkan lara awọn ti yoo foju wina idajọ rẹ. Ọna ti yoo wa gba ṣe idajọ rẹ ni ẹnikẹni ko le sọ. Ṣugbọn pẹlu nkan ti Jesu Oluwa sọ si ijọ Tiatira ati eyi Pọọlu sọ si awọn ara Korinnti, a ri mọ pe Ọlọrun le ṣe idajọ awọn eniyan rẹ pẹlu aisan, ailera, aṣedanu tabi pẹlupẹlu iku (1Korinnti 11:28-30; Ifihan 2:20-23). Ti o ko ba wa ti ni iriri ọkankan ninu awọn nkan wọnyi, bi o tilẹ jẹ pe inu ẹṣẹ ni o n gbe, jẹ ki o ye ọ pe Ọlọrun kan n fun ọ ni akoko lati ronupiwada ni. Ti o ba si wa kuna lati ronupiwada ni aarin gbedeke akoko ti O fun ọ, a jẹ pe laiṣe aniani, o di dandan ki Oṣe idajọ rẹ ninu ododo rẹ. Ibi ti eyi yoo wa yọri si fun ọ ni n ko le sọ. Nitorina, ronupiwada bayi, ki o si tun sọ fun awọn alabapin rẹ ninu ẹṣẹ dida ki awọn naa ronupiwada. Aijẹbẹ, o ṣeeṣe ki ẹ parun si abẹ ibinu Ọlọrun nikẹyinkẹyin.

Ki o ni ọsẹ ti o ga.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

Idajọ ninu ile Ọlọrun | Paitọ J.O. Lawal Read More »

Aabo rẹ ko ni ṣalai wa lori rẹ | Paitọ J.O. Lawal

Leave a Comment

Ọjọ: Ebibi 23, 2021 | Nọmba: Vol. 10, No. 3

Olufẹ: ki oore-ọfẹ ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Kaabọ sinu ọsẹ ti o kẹyin oṣu Ebibi 2021. Adura mi si ni pe ki Ọlọrun ma fi gbogbo igba siji bo ọ kuro lọwọ gbogbo ibi, ibiyowu ti wọn le ti ma bọ, ni orukọ Jesu. Amin.

Wayi o, mo gba adura yi fun ọ nitoripe o wa ni ibamu pẹlu ọrọ Ọlọrun si wa. Ki si ni ọrọ rẹ sọ? Lakọkọ, ọrọ rẹ sọ pe, “Nitori iwọ, Oluwa, ni iṣe aabo mi, iwọ ti fi ọga ogo ṣe ibugbe rẹ. Buburu kan ki yoo ṣẹlẹ si ọ, bẹẹ ni arunkarun ki yoo sun mọ ile rẹ. Nitori ti yoo fi aṣẹ fun awọn angẹli rẹ nitori rẹ lati pa ọ mọ ni ọna rẹ gbogbo. Wọn o gbe ọ soke ni ọwọ wọn, ki iwọ ki oo ma baa fi ẹsẹ rẹ gun okuta.” (Saamu 91:9-12) Ṣe o ri bayi? Niwọn igba ti a ba n gbe ninu Ọlọrun nipasẹ Kirisiti Jesu, ibi kankan ki yoo ṣubu lu wa, bẹẹ si ni ajalu kankan ki yoo sumọ ibugbe wa. Ki si ni idi? Idi ni pe yoo ri daju pe awọn angẹli mimọ rẹ rọgba yi wa ka lati pa wa mọ ni gbogbo ọna wa.

Ṣugbọn ṣe o tilẹ mọ pe awọn angẹli Ọlọrun rọgba yi ọ ka lati daabo bo ọ? Bibeli sọ fun wa pe gbogbo awa ti a ti wa sọdọ Ọlọrun nipasẹ Jesu Kirisiti ni a ti wa ni awujọ awọn angẹli ti wọn n yọ, ti iye wọn ko si ṣe e ka. O si tun sọ fun wa pe gbogbo awọn angẹli yi ni o n fi ojoojumọ gba aṣẹ lọdọ Ọlọrun lati sin wa. Ṣe a wa le fi oju ara yi ri wọn? Rara o! Ṣugbọn wọn rọgba yi wa ka, wọn si n ṣiṣẹ karakara lati ri pe a wa ni ailewu lati ni iriri imuṣẹ ifẹ Ọlọrun ninu aye wa ni ọna ti o peye. (Wo: Heberu 1:14 & 12:22)

O yẹ ki iwọ na wa ri idi ti bibeli ṣe tẹnumọ pe ajalu, iṣẹlẹ ẹru ati ipọniloju yoo jina si wa (Aisaya 54:14-15). Mi o wa fẹ ki o ṣi nkan ti a n sọrọ le lori nibiyi gbọ o. Ko ki i ṣe pe iṣẹlẹ buburu ko ni fẹ ṣẹlẹ si wa rara. Niwọn igba ti a ba wa ninu aye yi, ko si ki Eṣu ma lepa lati ri pe nkan buruku ṣẹlẹ si wa, boya a jẹ ọmọ Ọlọrun tabi bẹẹkọ. Ṣugbọn nitoripe a jẹ ọmọ Ọlọrun, gbogbo igba ni aabo rẹ ma n wa lori wa nipasẹ awọn angẹli alagbara rẹ. Awọn wọnyi a si ma fi gbogbo igba ri daju pe nkan yowu ti Eṣu le ṣe, awọn iṣẹlẹ ibi ti o ti gbimọ lati fi kọ lu wa ko sunmọ wa rara.

Mo wa fẹ ki o ranti nkan ti o ṣẹlẹ nigba ti awọn ọmọ Isiraẹli ṣẹṣẹ jade lati Ijibiti wa. Wọn jade taijade tan ni Farao tun pe gbogbo ogun rẹ jọ lati le wọn mu. Ṣugbọn bibeli sọ pe, “Angẹli Ọlọrun naa ti o ṣaaju ogun Israẹli, si ṣi lọ ṣẹyin wọn; ọwọn ikuukuu si ṣi kuro niwaju wọn, o si duro lẹyin wọn: O si wa si laarin ogun awọn ara Ijibiti ati ogun Isiraẹli; o si ṣe ikuukuu ati okunkun fun awọn ti ọhun, ṣugbọn o ṣe imọlẹ ni oru fun awọn ti ihin: bẹẹ ni ekin ni ko sun mọ ekeji ni gbogbo oru naa.” (Ekisodu 14:19-20) Kaasa! Gbeyẹwo! Angẹli Oluwa ti O n daabo bo orilẹ-ede Isiraẹli ri pe ogun Ijibiti ko le sunmọ wọn. O si ri pe bẹẹ gẹgẹ ni ọrọ naa ṣe ri titi gbogbo ogun Ijibiti ti o n lepa wọn fi parun sinu okun pupa.

Nibakanna, iwọ naa ni awọn angẹli ti a ti yan lati daabo bo ọ. Wọn o si ma ri daju ni gbogbo igba pe bi o ti wu ki ajalu, rogbodiyan, ajakalẹarun tabi aisan ti Eṣu ran si ọ le sunmọ ọ pẹkipẹki tabi le to, wọn ko fi ọwọ kan ọ tabi pa ọ lara. Nitorina, gbe gbogbo ibẹru rẹ ju danu, ki o si ma fi igba gbogbo rin pẹlu afiyesi pe iwọ naa ni awọn ẹṣọ tirẹ, awọn ẹṣọ ti Ọlọrun ran lati pa ọ mọ. Aijẹbẹ, nipasẹ ẹru, o le fi ẹnu ara rẹ fa jọgọdọ sori ara rẹ (Iwe owe 18:21).

Siwaju si, o tun nilo lati fi ara rẹ jin lati duro ninu ifẹ Ọlọrun ati lati ma a rin ninu ododo rẹ nikan yatọ si ododo ti ara rẹ. Aijẹbẹ, o le fi ọwọ ara rẹ ṣilẹkun silẹ fun Eṣu lati pọn ọ loju. Kini idi ti Jona fi ba ara rẹ ninu ikun ẹja? Ṣebi nitoripe o ṣe aigbọran si aṣẹ Ọlọrun ti o daju saka ni. Ki ni idi ti Lọti fi padanu ọrọ rẹ ni ọjọ kan? Ṣebi nitoripe o muleti awọn ti o n gbe igbe aye ti o lodi si ifẹ Ọlọrun ni? Ki si ni idi ti Ọlọrun fi fi aye gba Jobu lati ni awọn iriri buruku ti o ni ni asiko kan ni igbesi aye rẹ? Ọkan lara awọn idi naa ni pe Ọlọrun fẹ ẹ fihan an pe ninu ododo ara rẹ ni o ti n rin fun igba pipẹ, ti o si n ro pe awọn iṣẹ rere oun ni o fun oun ni amuyẹ lati ri aabo Ọlọrun gba.

Nitorina, ti a ko ba fẹ ṣilẹkun aye wa silẹ fun ajalu, awa naa gbọdọ mu gbogbo aṣẹ Ọlọrun ni ọkunkundun, ki a si tun gbọkanle fun aabo wa dipo ki a gbọkanle iṣẹ rere wa. Niwọn igba ti a ba si n ṣe eyi, ti awọn wahala tabi ajalu kan ba tilẹ wa si ọdọ wa nipaṣẹ aṣiṣe, aigbọran tabi ete buburu awọn kan, Ọlọrun yoo ri daju pe awọn angẹli rẹ wa pẹlu wa lati pa wa mọ nipa pipa awọn kiniun ti a ran lati pa wa run lẹnu mọ. (Wo: Daniẹli 6; Iṣe Awọn Apositeli 27)

Ki o ni ọsẹ adun.

Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

Aabo rẹ ko ni ṣalai wa lori rẹ | Paitọ J.O. Lawal Read More »

KI YOO RI BẸẸ LAARIN YIN | Paito J.O. Lawal

Leave a Comment

ALAKALẸ ẸKỌ BIBELI ATI ALAYE | ỌJỌRU 19, EBIBI 2021 | AKỌRI: KI YOO RI BẸẸ LAARIN YIN AYỌKA: MATIU 20:20-28

AKỌSORI: AKỌSORI: “Ṣugbọn ki yoo ri bẹẹ laarin yi: ṣugbọn ẹnikẹni ti o ba fẹ di nla ninu yin, jẹ ki o ṣe iranṣẹ yin; Ati ẹnikẹni ti o ba fẹ ṣe olori ninu yin, ẹ jẹ ki o maa ṣe ọmọ-ọdọ yin.” (Matiu 20:26-27)

ỌRỌ AKỌSỌ
Ipo jẹ ọkan pataki lara awọn nkan ti a ma n wo mọ awọn eniyan lara lati mọ iru iha ti a o kọ si wọn tabi si ibaṣepọ wa pẹlu wọn. Fun apẹẹrẹ, ti eniyan ba wa ni ipo ọla tabi ipo atata ninu aye yi, awọn eniyan a ma bọwọ fun tabi wa ojurere rẹ, bi wọn ko tilẹ fẹran rẹ tabi bi o tilẹ n ṣiwawu. Idi si ni pe wọn ko ni fẹ ki o lo ipo rẹ lati pọn wọn loju tabi jẹ wọn niya. Yatọ si eyi, ti eniyan ba wa ni ipo giga, awọn araye a tete ma kọbiara si i. Wọn le ma kiyesi awọn ti ko si ni ipo ọla tabi ṣe bi igba ti wọn ri wọn nijoko. Ṣugbọn ni kese ti wọn ba ti foju gaani ẹni ti o wa ni ipo giga bayi naa ni wọn yoo ti ma sare kaakiri lati ri pe wọn mu ni inu dun. Idi si ni yi ti ọpọ fi ma n lakaka lati de ipo nla, ipo ọla tabi ipo iyi ninu aye yi. Awọn miran ko tilẹ kọ nkan ti wọn ṣe tabi irufẹ ara ti wọn da lati de ipo ọla, ipo giga tabi ipo atata laye. Bi a ṣe mọ, ko si ẹni ti o fẹ ki awọn eniyan kọ iyan oun kere nibi ti o ba wa tabi ki wọn fi ọwọ yẹnpẹrẹ mu un. Gbogbo eniyan ni wọn ma fẹ ki wọn ri awọn bi eniyan pataki, ẹni ti aye n waari tabi bọwọ fun. Nitorina, ti ẹnikan ba mọ pe ti oun ba gbe awọn igbesẹ kan, o didan ki oun naa de ipọ nla, yoo fẹ gbe igbesẹ naa lalai fi ti atunbọtan rẹ ṣe, paapaa julọ ti ko ba mọ Ọlọrun. Ọpọ ni o si ti tipasẹ eyi ṣe ara wọn ati awọn miran ni ijamba, ti wọn si ti padanu ẹmi ati ọkan wọn.

KI YOO RI BẸẸ LAARIN YIN
O tun wa ṣe ni laanu pe ni arin awọn ọmọ Ọlọrun naa, iyẹn ninu ijọ Kirisiti, a tun ri pe iha ti awọn ti aye yi kọ si wiwa ni ipo ati lilo ipo ko fẹrẹ yatọ rara. Idi si ni pe oye nkan ti Ọlọrun ka si ipo giga ati bi a ṣe n de ibẹ ko ye ọpọ ninu wa paapaa. Nitorina, awa naa a ma ja si ipo ninu ijọ. Bẹẹni, a n ditẹ ara wa, sa ogun si ara wa, jin ara wa lẹṣẹ, ran agbenipa si ara wa ati bẹẹbẹẹ lọ nitori ipo. Ṣugbọn Ọlọrun fẹ ki a mọ pe eyi ko yẹ ki o ribẹ rara laarin wa. Ti a ba si wa kọ lati mọ ifẹ rẹ lori iha ti o yẹ ki a kọ si ipo ninu ijọba rẹ, ko si ni bi a ko se ni ba nkan jẹ ninu ijọ rẹ. Ti a ba si ba nkan jẹ ninu ijọ rẹ, o di didan ki a ba idajọ rẹ pade, ki a si tun padanu oriyin rẹ nigbati opin ohun gbogbo ba de.

Idi gan wa niyi ti Jesu fi farabalẹ kọ awọn ọmọ ẹyin rẹ nigba ti o wa ni aye lẹkọ lori iha ti o yẹ ki wọn kọ si ipo gẹgẹ bi ọmọ ijọba Ọlọrun. Fun apẹẹrẹ, a ri akọsilẹ yi ninu bibeli nipa iṣẹlẹ ti o mu ki O ṣe alaye lẹkunrẹrẹ fun wọn lori ifẹ Ọlọrun nipa ipo giga ninu ijoba rẹ ati ọna ti a le gba de ibẹ. Akọsilẹ naa ni eyi:

“Nigba naa ni iya awọn ọmọ Sebede ba awọ ọmọ rẹ tọ ọ wa, o sin in, o si n fẹ ohun kan ni ọwọ rẹ. O si bi i pe, kin ni iwọ n fẹ? O wi fun un pe, Jẹ ki awọn ọmọ mi mejeeji ki o maa jokoo, ọkan ni ọwọ ọtun rẹ, ọkan ni ọwọ osi ni ijọba rẹ. Ṣugbọn Jesu dahun, o si wi pe, Ẹyin ko mọ ohun ti ẹyin n beere. Ẹyin ha le mu ninu ago ti emi o mu, ati ki a fi ibatisi ti a o fi batisi mi batisi yin? Wọn wi fun un pe, Awa le ṣe e. O si wi fun wọn pe, Loootọ ni ẹyin oo mu ninu ago mi, ati ninu ibatisi ti a o fi batisi mi i a o si fi batisi yin: ṣugbọn niti ọwọ ọtun ati ni ọwọ osi mi, kii ṣe ti emi lati fifunni bi ko ṣe pe fun kiki awọn ẹni ti a pese rẹ silẹ fun lati ọdọ Baba mi wa. Nigba ti awọn mẹwaa yooku gbọ, wọn binu si awọn arakunrin wọn mejeeji. Ṣugbọn Jesu pe wọn sọdọ rẹ, o si wi pe, Ẹyin mọ pe awọn ọba Keferi a maa lo agbara lori wọn, ati awọn ẹni-nla ninu wọn a maa lo aṣẹ lori wọn. Ṣugbọn ki yoo ri bẹẹ laarin yin: ṣugbọn ẹnikẹni ti o ba fẹ di nla ninu yin, jẹ ki o ṣe iranṣẹ yin; Ati ẹnikẹni ti o ba fẹ ṣe olori ninu yin, ẹ jẹ ki o maa ṣe ọmọ-ọdọ yin: Ani gẹgẹ bi ọmọ-eniyan ko ti wa ki a ṣe iranṣẹ fun un, bi ko ṣe lati ṣe iranṣẹ funni, ati lati fi emi rẹ ṣe irapada ọpọlọpọ eniyan.” (Matiu 20:20-28)

Ki ni ẹbẹ iya awọn ọmọ Sebede da le lori? Ipo ni o da le lori. Iya yi fẹ ki awọn ọmọ rẹ mejeji ti o jẹ ọmọlẹyin Jesu, iyẹn Jemisi ati Johanu, di ipo ti o ga julọ mu ninu ijọba rẹ. Bi o si ṣe yẹ ki o ri, eyi bi awọn ọmọlẹyin yoku ninu gidigidi. Ṣugbọn a ko ri ka pe o bi Jesu ninu rara. Ko tilẹ titori ẹbẹ wọn yi barajẹ tabi le wọn danu kuro lọdọ rẹ. Ki ni idi? Idi ni pe Ọlọrun ko lodi si ki eniyan lero tabi nifẹ lati de ipo giga tabi lati di ẹni giga. A tilẹ tun ri ninu bibeli pe O ṣe ileri fun awọn eniyan rẹ lati fi wọn ṣe ori ati ẹni iwaju ninu aye yi, ti O si fi idi eyi mulẹ ni ọpọlọpọ igba (Ditaronomi 28:13).

Amọ ṣa o, bi o tilẹ jẹ pe Ọlọfun ko lodi si ki a wa ni ipo ọla tabi ipo giga ninu aye yi, ọna ti a gba de ibẹ ati nkan ti a n lo ipo naa fun ṣe pataki si pupọ. Nibakaana, Ọlọrun ko lodi si ki a wa ni ipo tabi aaye ti o ga ninu ijọba rẹ. Amọ ọna lati de irufẹ ipo yi yatọ gedegbe si ọna lati de ipo giga tabi ipo atata ninu aye yi.

use this link

Lotitọ, ẹni ti Ọlọrun ko ba gba laaye lati de ipo kan tabi ekeji ninu aye yi ko le debẹ, bi o ti wu ki o tiraka to. Amọ, ọpọ wa naa ni o mọ pe oniruuru ọna ni awọn ti aye yi n gba lati de ipo ọla tabi ipo atata. A si tun mọ pe oniruuru nkan ti o wu wọn ni wọn si n fi awọn ipo wọn ṣe. Fun apẹẹrẹ, Jesu ninu ọrọ rẹ si awọn ọmọlẹyin rẹ sọ pe awọn ti o wa ni ipo nla ninu aye yi maa n lo agbara ati aṣẹ lori awọn ti o wa ni abẹ isakoso wọn (Matiu 20:25). Eyi tunmọ si pe ko ki i ṣe gbogbo igba naa ni awọn nkan ti wọn n lo ipo wọn fun dara tabi bojumu. Ṣugbọn nigba ti o je pe aṣe ati agbara wa lọwọ wọn, ara ti o ba wu wọn ni wọn le fi awọn ti o wa ni abẹ wọn da.

Amọ bi Jesu ṣe fi ye awọn ọmọ ẹyin rẹ ninu akọsilẹ yi, ijọba Ọlọrun ko ki i ṣe ibi ti eniyan ti n lo ipo rẹ bi o ṣe wu. Ko tilẹ ki i ṣe ibi ti eniyan ti le de ipo giga, ti ifẹ Ọlọrun lori bi a ṣe n de ipo giga tabi lo ipo wa ko ba ye. Lakọkọ, Jesu jẹ ki o ye awọn ọmọ ẹyin rẹ pe bi eniyan tilẹ fi aye rẹ silẹ fun iku tabi ijiya nitori rẹ, ko tunmọ si pe yoo di ipo nla tabi ipo atata mu ninu ijọba rẹ (Matiu 20:22-23). Lẹkeji, O tun jẹ ki o ye wọn pe bi eniyan tilẹ di ipo pataki bi ti apositeli mu ninu ijọ tabi boya o n tilẹ n tẹẹle kaakiri ko tunmọ si pe yoo di ipo nla tabi ipo pataki mu ninu ijọba baba rẹ. Idi si ni pe Ọlọrun gan funrarẹ ni yoo sọ ipo ti ẹnikọọkan wa yo dimu ninu ijọba rẹ (1Korinnti 12:18).

Nitorina ko ni si ojusaaju rara. Aye ti Ọlọrun ba to ẹnikọọkan wa si ni yoo ti ba ara rẹ. Nkan ti ẹnikọọkan wa ba si ṣe ni yoo gba. Lotitọ, eniyan le lo oriṣiriṣi ọna alumọkọrọyin ninu ijọ Ọlọrun ninu aye yi lati fi awọn ọmọ Ọlọrun si abẹ isakoso rẹ. Bẹẹ si ni eniyan le lo ipo rẹ gẹgẹ bi olori ninu ijọ lati jẹ awọn ọmọ Ọlọrun niya, lati pọn wọn loju, lati ja wọn lole tabi lati fi idibajẹ sinu aye wọn. Eyi ko wa jasi pe nigbati Ọlọrun ba fi idi ijọba ayeraye rẹ mulẹ ninu aye yi, irufẹ ẹni bẹ yoo tun wa ni ipo pataki nibẹ, ti o ba ti ẹ ni oore-ọfẹ lati wa nibẹ. Ki a tilẹ ṣọ otitọ, ọpọ awọn adari ijọ ti awọn eniyan n sare tẹle kaakiri loni, ti wọn n to ki wọn to ri wọn tabi ti wọn ti sọ di ọlọrun kekeke ninu aye wọn loni lo jẹ pe ipo ti a o ti ba wọn ni ijọba ọrun yoo ya wa lẹnu gidigidi.

Ọna wo wa ni a le gba di ipo nla tabi ipo atata mu ni ijọba Ọlọrun. Laiṣe aroye pupọ, Jesu sọ fun wa pe ọna sinsin awọn eniyan, paapaa julọ, awọn ọmọ Ọlọrun ni. Iwọ na gbe ọrọ rẹ wo lẹkansi: Ẹyin mọ pe awọn ọba Keferi a maa lo agbara lori wọn, ati awọn ẹni-nla ninu wọn a maa lo aṣẹ lori wọn. Ṣugbọn ki yoo ri bẹẹ laarin yin: ṣugbọn ẹnikẹni ti o ba fẹ di nla ninu yin, jẹ ki o ṣe iranṣẹ yin; Ati ẹnikẹni ti o ba fẹ ṣẹ olori ninu yin, ẹ jẹ ki o maa ṣe ọmọ-ọdọ yin: Ani gẹgẹ bi ọmọ-eniyan ko ti wa ki a ṣe iranṣẹ fun un, bi ko ṣe lati ṣe iranṣẹ funni, ati lati fi emi rẹ ṣe irapada ọpọlọpọ eniyan.” (Matiu 20:25-28) Ṣe o ri bayi? Laarin awa ọmọ Ọlọrun, awọn nkan ti awọn ti aye yi n ṣe pẹlu ipo wọn ko gbọdọ waye rara. Eyi tunmọ si pe a ko gbọdọ ri ẹni ti yoo sọra rẹ di abaṣẹwa laarin wa. A ko si tun gbọdọ ri ẹni ti yoo ma lo ipokipo ti o ba wa ninu ijọ lati lo agbara lori awọn ọmọ Ọlọrun nipa jijẹ wọn niya, pipọn wọ loju, fifi idibajẹ sinu aye wọn, jija wọn lole tabi sisọ ọrọ odi si wọn.

Dipo eyi, a gbọdọ fi ara wa jin lati ma sin ara wa ni ibamu pẹlu ifẹ Ọlọrun ni. Bẹẹni, a gbọdọ ma fi ipokipo ti a ba wa sin ara wa lati di gbogbo nkan ti Ọlọrun fẹ ki a da, ki a si tun ṣe gbogbo nkan ti O fẹ ki a ṣe. Ki si ni idi? Idi akọkọ ni pe Jesu funrarẹ, ti o jẹ Oluwa wa, gan fi ipo rẹ ninu aye yi sin gbogbo eniyan ni, ti o si ku fun ẹṣẹ wọn. Idi keji ni pe aparo kan ko ga ju aparo miran lọ laarin ara wa nitoripe ara kanna ni gbogbo wa (Matiu 23:9). Lotitọ, a fi ye wa ninu ọrọ Ọlọrun ki a bu ọla fun awọn adari ijọ wa. Ṣugbọn ko ki i ṣe nitoripe wọn tobi ju wa lọ niwaju Ọlọrun ni a ṣe sọ eyi fun wa bikoṣe nitori iṣẹ ti wọn n ṣe laarin wa (1Tẹsalonika 5:12-13). Nitorina, bi a ba ṣe n bu ọla fun awọn adari wa ni awọn naa gbọdọ ma fi ara wọn jin lati sin wa. Gẹgẹ bi Jesu si ṣe fi ye wa, nipa ṣiṣe eyi ni Ọlọrun ṣe le fiwa si ipo giga ninu ijọba rẹ. Njẹ olusin fun awọn ọmọ Ọlọrun ni a wa ri ara si bi abi ọga ati apaṣẹ lori wọn? Ipo wọn gan ni a o ti ba ara wa ninu ijọba Ọlọrun nigba ti Jesus ba de?

ỌRỌ IPARI
Ko si ẹni ti Ọlọrun ko fẹ fun ipo nla ninu ijọba rẹ. Amọ, eyi kọja ọrọ ẹnu tabi pe a di ipo nla mu ninu aye yi. Ti a ko ba fi ara wa jin, bi Jesu ṣe ṣe nigbati O wa ni aye yi, lati lo ipokipo ti a ba wa lati sin awọn ọmọ Ọlọrun ati awọn eniyan bi o ṣe tọ ati bi o ṣe yẹ, aifamọ ki a ma ba ijakulẹ pade nigba ti a ba de ijọba ayeraye rẹ, bi o ti wu ki a lọla to loju awọn eniyan ninu aye yi.

IBEERE

  • Ki ni idi ti awọn eniyan fi ma n gba ọnakọna ti o wu wọn lati de ipo nla?
  • Ọna wo ni a le gba lati ran awọn ọmọ Ọlọrun ti wọn n ṣi ipo wọn lo lọwọ lati ṣe atunṣe?
  • Ki ni idi ti awọn eniyan fi ma n gba ọnakọna ti o wu wọn lati de ipo nla?
  • Ọna wo ni a le gba lati ran awọn ọmọ Ọlọrun ti wọn n ṣi ipo wọn lo lọwọ lati ṣe atunṣe?

    • Lati ọwọ Johnson O. Lawal

    Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 07085711280)

    KI YOO RI BẸẸ LAARIN YIN | Paito J.O. Lawal Read More »

    AKỌRI: ILANA FUN IRANWỌ GBIGBA NINU IJỌ AYỌKA: 1Timoti 5:3-16

    Igbega ti ko ṣe e gan | J.O. Lawal

    Leave a Comment

    Ọjọ: Ebibi 16, 2021 | Nọmba: Vol. 10, No. 2

    Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Mo ki ọ kaabọ sinu ọsẹ tuntun miran ninu oṣu Ebibi 2021, mo si tun gbadura pe, lati ọsẹ yi lọ, ki o bẹrẹ si ni iriri igbega iyanu ti awọn eniyan ko le gan tabi fẹnu tẹnbẹlu ju tatẹyinwa lọ, ni orukọ Jesu. Amin.

    Wayi o, ọkan lara awọn nkan ti yoo jẹ ki o ṣeeṣe fun awọn eniyan lati ri igbega rẹ, ki wọn si ma fi ẹnu tẹnbẹlu rẹ ni ifarahan ọgbọn Ọlọrun ti o ṣe e fojuri ninu aye rẹ. Fun apẹẹrẹ, bible sọ eyi nipa Dafidi: “Dafidi a si maa lọ si ibikibi ti Sọọlu ran an, a maa huwa ọlọgbọn: Ṣọọlu si fi i jẹ olori ogun, o si dara loju gbogbo awọn eniyan, ati pẹlupẹlu loju awọn iranṣẹ Sọọlu.” (1Samuẹli 18:5) Njẹ o ri bayi? Bi o tilẹ jẹ pe ọdọmọde ni Dafidi nigba ti o darapọ mọ iṣinru ilu labẹ Ọba Sọọlu, a fi ṣe ọgagun lori awọn jagunjagun rẹ.

    Ki wa ni idi ti a ṣe fi ọdọmọkunrin ṣe ọgagun lọna yi? Ṣe nitoripe o pa Golayati ni? Rara o! Abi ṣe nitoripe o jẹ ọrẹ ọmọ ọba, Jonatani, ẹni ti o jẹ ọmọ ọba alade ni akoko yi ni bi? Rara o! Lotitọ, Dafidi, lodi si ohun ti awọn eniyan ro, pa asaju jagunjagun awọn ara Filisitini, Golayati. Eyi ṣi sọ di olokiki eniyan. Lafikun, lotitọ ni o jẹ ọrẹ ọmọ ọba ti o lagbara, ti awọn eniyan si n waari fun, iyẹn Jonatani. Ṣugbọn gbogbo awọn nkan wọnyi ko wa ja si pe o dangajia to lati dari awọn jagunjagun ilẹ na, ọpọ ẹni ti wọn julọ, tabi lati fun wọn ni iwuri lati ṣe aṣeyọri.

    Ti a ba wo daradara, ọrọ iṣedari awọn jagunjagun la n ṣo nibi yi, awọn ti a ti kọ lati doju kọ iku nigbakigba, lọjọkọjo ati nibikibi. Nitorina, Dafidi ni lati ju ọrẹ ọmọ-ọba alade lọ lati dari wọn. Siwaju si, o ni lati ju akikanju ologun lọ lati dari wọn. O nilo ibọwọfun wọn ki wọn to le tẹle. Ko si to le ri ibọwọfun wọn gba, o nilo lati fi han wọn pe oun koju osuwọn lati daabo bo wọn ati lati dari wọn lati ni iṣẹgun, bi o ti wu ki asiko ri.

    sites

    Eyi gan wa si ni o ṣe. O huwa ọlọgbọn ninu gbogbo iṣẹ ti oluwa rẹ, Ọba Sọọlu, ran. Eyi tunmọ si pe gbogbo awọn jagunjagun ti wọn n kiyesi ri pe gbogbo nkan ti o ni i ṣe pẹlu eto ogun jija ati awọn jagunjagun ti a fa le lọwọ ni o mojuto pẹlu ọgbọn ati ori pipe. Nitorina, nigbati a fi ṣe ọgangun wọn, gbogbo wọn ni o gba pe ipo naa tọ si. Ko si ẹni ti o ro lara wọn pe ojusaaju ni o gbe de ipo na. Dipo eyi, nṣe ni gbogbo wọn tẹwọgba tayọtayọ, ti wọn si rẹ ara wọn silẹ labi iṣedari rẹ.

    Wayi o, irufẹ igbesoke tabi igbega ti iwọ na nilo ninu aye rẹ ni eyi. Iwọ na nilo igbega ti awọn ti o korira rẹ gan yoo gba pe o tọ si ọ. Ki o si ba le ni iru igbega yi, iwọ naa, gẹgẹ bi Dafidi, nilo lati ma huwa bi ọlọgbọn nibikibi ti o ba wa, lalai fi ti ọjọ ori rẹ tabi ipo rẹ lawujọ ṣe. Nitorina, lati isinsinyi lọ, iṣẹkiṣẹ ti a ba fun ọ ni ibi iṣẹ rẹ, ile-iwe rẹ, adugbo rẹ, idile rẹ tabi ninu ijọ, ṣe daradara ati pẹlu ọgbọn ori dipo eyi ti wa fi ṣe jakujaku. Bẹẹni, ri daju pe ountẹ titayọ ati ọgbọn wa lara ohunkokun ti o ba ṣe.

    Ki wa ni idi ti eyi fi ṣe pataki? O ṣe pataki nitoripe awọn eniyan n wo ọ ni gbogbo igba, boya o mọ tabi o ko mọ. Bi o ba si ṣe n mojuto nkan ti a fi si abẹ akoso rẹ si jẹ ọkan lara awọn nkan ti yo sọ boya wọn o ri ọ gẹgẹ bi ẹni ti ipo giga tọ si ni aye yi tabi bẹẹkọ. Lotitọ, Ọlọrun ko nilo ero awọn eniyan lati gbe ọ ga tabi fa ọ soke. O le gbe o ga boya wọn fi ọwọ si tabi wọn ko fi ọwọ si. Amọ ṣa o, ti o ba fẹ gbadun igbega rẹ, ki o si pọ si ni iwulo pẹlu rẹ, o ṣe pataki ki awọn ti o wa ni ayika rẹ ri ọ gẹgẹ bi ẹni ti ipo ti o wa tọ si. Aijẹbẹ, o ṣeeṣe ki o kabọmọ nikẹyinkẹyin pe o wa ni ipo giga yowu ti o ba wa, nigbati awọn ti o ye ki ẹ jọ ma ṣiṣẹ pọ tabi awọn ti o yẹ ki wọn ma fun ọ ni iwuri ba n gan ọ.

    O wa jasi ọpẹ fun wa pe, nipasẹ Kirisiti Jesu, gbogbo wa ni ilẹkun gbogbo iṣura ọgbọn, imọ ati oye ṣi silẹ fun (1Korinnti 1:30; Col 2:2-3). Gbogbo nkan ti a si nilo lati ri ifarahan awọn nkan wọnyi ninu aye ko ju ki a fi ara wa jin si ọrọ Ọlọrun ati adura gbigba lọ. Nitorina, bi o ṣe n lọ ni ọsẹ yi, tun iṣẹ ṣe lori ifarajin rẹ si ọrọ rẹ ati adura gbigba. Yoo si ya ọ lẹnu bi ọgbọn rẹ yo ṣe farahan lọna ti o ṣe fojuri ninu aye rẹ ninu ohun gbogbo ti o ba ṣe ati bi awọn eniyan yoo ṣe bẹrẹ si ni tẹwọgba ọ, ti wọn o si ma ba ọ yọ nitori igbega rẹ.

    Ki o ni ọsẹ ti o ga.

    Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

    Igbega ti ko ṣe e gan | J.O. Lawal Read More »

    Ọlọrun ati Eniyan | Paito J.O. Lawal

    Leave a Comment

    Ọjọ: Ebibi 09, 2021 | Nọmba: Vol. 10, No. 1

    Olufẹ: ki oore-ọfẹ, aanu ati alaafia jẹ tirẹ titi lailai lati ọdọ Ọlọrun Baba wa ati Jesu Kirisiti Oluwa wa. Kaabọ sinu ọsẹ miran ninu oṣu Ebibi 2021. Mo gbadura pe ki Ọlọrun, nipa agbara iyanu rẹ, mu gbogbo erongba rẹ ni rere fun ọsẹ na wa si imuṣẹ, ni orukọ Jesu. Amin.

    Ọsẹ yi ni o pe ọdun mẹsan gbako ti a bẹrẹ si ni pade gẹgẹ bi ijọ ninu ilu yi. Nitorina, lakọkọ, o yẹ ki a dupẹ lọwọ Ọlọrun fun bi O ṣe pe wa jade kuro ninu okunkun sinu imọlẹ iyanu rẹ, ki a ba le ma ba Oun ati Ọmọ rẹ, Jesu Kirisiti, ṣe papọ. A tun gbọdọ dupẹ lọwọ rẹ fun bi O ṣe fi wa ṣe aṣoju ijọba ainipẹkun rẹ ninu aye okunkun yi. Ki orukọ mimọ rẹ jẹ gbigbega titi lailai. Amin.

    Wayi o, bi a ṣe bẹrẹ ọdun miran papọ ninu ibadapọ pẹlu Ọlọrun ati ọmọ rẹ Jesu Kirisiti, ati pẹlu ara wa, o ni awọn nkan meji kan ti mo fẹ ki o mu ni ọkunkundun. Akọkọ, mu ibaṣepọ rẹ pẹlu Ọlọrun ni ọkunkundun. Ma ṣe gbagbe pe nkan ti o ṣe wa yẹ lati jẹ ọmọ ijọ yi ni ibaṣepọ wa pẹlu Ọlọrun. Bẹẹni, nitoripe gbogbo wa jẹ ọmọ Ọlọrun ni a ṣe n ba ara wa ṣepọ gẹgẹ bi ẹbi kan, ti a si n jẹgbadun ifẹ rẹ ati ifẹ ara wa.

    Nitorina, ju ohun gbogbo lọ, o gbọdọ mọ ibaṣepọ ati ibadapọ rẹ pẹlu Ọlọrun ni ọkunkundun. Niwọn igba ti o ko ba mu ni pataki bi o ṣe yẹ ki o mu, ko si bi ẹnikankan lara wa ṣe fẹ jẹ alabukunfun nipasẹ ibaṣepọ wa pẹlu rẹ bi o ṣe yẹ ki o ri. Nitorina, fi Ọlọrun ṣiwaju ohun gbogbo. Si fi eyi han nipa lilepa lati gbẹkẹle fun ohun gbogbo ti o nilo ati lati ṣe ohun ti o dun mọ ọn ninu ninu ohun gbogbo. Bi o ba si ṣe n ṣe eyi, Oun naa yoo ri daju pe ohun gbogbo ti o ni i ṣe pẹlu aye rẹ ni O ṣe ni aṣepe ati wipe o ko ṣe alaini ohunkohun ti o nilo lati gbe igbe aye eleso ati igbe aye ti o ni itunmọ. (Wo: Matiu 6:33)

    Siwaju si, mo tun fẹ ki o mu gbogbo awọn eniyan ti Ọlọrun ti gbin sinu aye rẹ ni pataki, lati ori awọn ara ile rẹ. Ki ni idi ti eyi fi ṣe pataki? O ṣe pataki nitoripe ifẹ Ọlọrun ni o jẹ fun ọ. Ti o ba ka iwe mimọ daradara, o ko ni ṣe alairi pe ọrọ awọn eniyan ati bi wọn ṣe n ṣe ma n fi gbogbo igba jẹ Ọlọrun logun (Saamu 8:3-8). Bi o tilẹ jẹ pe Ọlọrun ni Oun jẹ, ti ko si ni tu irun kankan lara rẹ ti O ba pinnu lati pa wa ti tabi lati ma ni nkankan ṣe pẹlu wa, sibẹsibẹ, O ka wa si pataki niwaju rẹ, O si ma n fẹ fi gbogbo igba ṣe wa daradara. Idi si ni pe O ni ifẹ wa, O si ma wa nkan ti o san julọ fun wa ni gbogbo igba.

    Nitorina, niwọn igba ti a jẹ ọmọ rẹ, a ko gbọdọ wuwa yatọ si i. Eyi jasi pe awa naa gbọdọ jẹ olufẹ awọn eniyan, bi Ọlọrun ṣe jẹ olufẹ wọn. A si tun gbọdọ fi tọkankan jẹ ki ọrọ wọn jẹ wa logun, paapaa julọ awọn ti O ti gbin sinu aye wa, ki a si ma fi gbogbo igba wa bi a ṣe le ṣe wọn ni ire. Aijẹbẹ, ko si bi a ṣe fẹ jẹ iranṣẹ Jesu Kirisiti daradara.

    check that

    Mo woye pe o yẹ ki o mọ pe iṣẹ iranṣẹ kọja sinsin Ọlọrun; o tun ni i ṣe pẹlu sinsin awọn eniyan pẹlu. Ka tilẹ sọ otitọ, nitoripe Ọlọrun fẹ ki a sin awọn eniyan ni O ṣe bukun fun wa pẹlu awọn ẹbun Ẹmi rẹ ti a ni ati pẹlu awọn nkan ini miran ti o wa ni arọwọto wa gẹgẹ bi ijọ rẹ (1Korinnti 12:4-7). Nitorina, a ko le sọ pe a n sin in, nigbati a ko ba sin awọn eniyan. A ko si le sin awọn eniyan ni ọna ti o tọ ati ti o yẹ, ti ọrọ wọn ati awọn nkan ti o n lọ ninu aye wọn ko ba jẹ wa logun. Njẹ o tilẹ mọ pe a ko le tọju awọn ọkọ, aya, ọmọ, obi ati ara wa bi o ṣe yẹ, ti a ko ba ni ifẹ otitọ si itẹsiwaju aye wọn?

    Nitorina, yatọ si igbẹkẹle rẹ ninu Ọlọrun, nkan pataki miran ti yoo jẹ ki o di iranṣe Jesu Kirisiti daradara ni ifẹ aiṣẹtan ti o ba ni si ilọsiwaju awọn eniyan. Bawọ ni aye ati itẹsiwaju awọn ẹbi rẹ ṣe jẹ ọ logun si? Bawo ni aye ati ilọsiwaju awọn ọmọ ijọ yi, ti o n ba darapọ ni ọsọọsẹ, ṣe jẹ ọ logun si? Bawo si ni aye ati ilọsiwaju awọn eniyan yoku ti o sunmọ ọ lọnakan tabi omiran ṣe jẹ ọ logun si? Bi ọrọ awọn wọnyi ba ṣe jẹ ọ logun si naa ni o o ṣe mura si lati wa oju Ọlọrun lori ọrọ aye wọn ati lati ṣe amulo awọn amuyẹ ati nkan ini ti Ọlọrun fun ọ lati ran wọn lọwọ.

    Ti o ba wa kiyesi pe ọrọ awọn eniyan ko ki i ka ọ lara rara, o nilo lati bẹrẹ si ni gbadura si Ọlọrun gidigidi lori rẹ. Idi ni pe eyi n fihan pe o ko fi aye gba ifẹ Ọlọrun lati ṣan bi odo lainidiwọ ninu aye rẹ niyẹn. Ifẹ, ifẹ ti Ọlọrun, ni o n jẹ ki a mu ọrọ ati igbayegbadun awọn eniyan lọkunkundun. Ibi ti eleyi ko ba si ti ma ṣan lainidiwọ, bintin bayi ni ọrọ awọn eniyan yoo ri loju wa. Gbadura, nitori eyi, pe ki Ọlọrun jẹ ki ifẹ rẹ ma ṣan bi odo lainidiwọ ninu aye rẹ, gẹgẹ bi o ṣe tọ, ki O ba le lo ọ lati bukun fun gbogbo awọn ti O ni lọkan lati tipasẹ rẹ sọ di alabukunfun.

    Lẹkan si, mo ki ọ kaabọ sinu ọdun ibadapọ ti o ga pẹlu Ọlọrun ati pẹlu ara wa miran. Mo si gbadura pe ki gbogbo wa pọ si ni siso eso rere ati ni iwulo ju tatẹyin wa lọ, ni orukọ Jesu. Amin.

    Ki o ni ọsẹ alarinrin.

    Copyright © 2021, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministry.com  or call: 08037592851 (WhatsApp Number: 07085711280)

    Ọlọrun ati Eniyan | Paito J.O. Lawal Read More »