latori tabili paito

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kiristi Oluwa wa. Pẹlu idunnu ni mo ki ọ kaabọ sinu oṣu miran ninu ọdun yi, iyẹn oṣu Igbe 2026. Adura mi ni pe ki Ọlọrun ṣe ohun gbogbo ti o ni ṣe pẹlu rẹ ni aṣepe ninu oṣu naa, ki O si tun fun ọ ni isinmi ni gbogbo ọna. Amin.

Gẹgẹ bi a ti ṣe mọ, eni jẹ ọjọ ti pupọ-julọ ninu awọn Kirisitiẹni kaakiri agbaye n ṣe ajọyọ ajiinde Jesu Kirisiti Oluwa wa. Bi o tilẹ wa jẹ wipe a ri awọn Kirisitiẹni ti ko ri idi fun irufẹ ajọyọ yi, paapaa julọ niwọn igba ti Jesu Oluwa wa ko pa a laṣẹ fun wa lati ṣe bẹẹ, a ko le sọ wipe nkan ti ko dara ni. Nkan ti mo n sọ ni pe ko si nkan ti o buru ninu ki a ya ọjọ kan sọtọ lati ṣe ajọyọ ajiinde, ki a si sọ fun gbogbo agbaye nkan ti Jesu ṣe fun igbala ọmọniyan.

Amọ ṣa o, ni ṣiṣe ajọyọ ajiinde, a ko tun wa gbọdọ fi ara wa fun ṣiṣe awọn nkan ti Oluwa wa wa lati gba wọn lọwọ wa. Eyi jasi pe, ajọyọ ajiinde wa ko gbọdọ yọri si imuti-para, apejẹ iṣọnu tabi iṣekuṣe. Dipo eyi, nṣe ni o yẹ ki o kọkọ jẹ ajọyọ fifi ọpẹ fun Ọlọrun fun bi O ti ṣaanu fun wa, ti O si ran Jesu lati ra wa pada.

Ekeji, ajọyọ wa gbọdọ jẹ eyi ti yoo tọ wa lati ran ara wa leti nkan ti ajiinde Jesu Kiristi yanju fun wa. Bi a ti ṣe ri ninu bibeli, nitori ajiinde rẹ ni a ṣe duro siwaju Ọlọrun lọwọlọwọ yi gẹgẹ bi ẹni idalare. Lafikun, nitori ajiinde rẹ ni a ṣe jẹ ẹda tuntun ati olododo eniyan niwaju rẹ lọwọlọwọ yi. Yatọ si iyẹn, nitori ajiinde rẹ ni a ṣe ni agbara lori Satani, ẹṣẹ ati aye yi lọwọlọwọ yi. (Wo: Róòmù 5:25; 2Kọ́ríntì 5:17-21)

Nitorina, nkan ti yoo jẹ ki ajọyọ ajiinde wa ni itunmọ ni ki a ma rin pẹlu afiyesi awọn nkan wọnyi. Ti a ko ba ma a rin pẹlu aifyesi wọn, ajọyọ ajiinde wa ko ni itunmọ. Nṣe ni a o kan ma fi han pe asan ni ohun ti O ṣe fun wa.

Wayi o, adura mi ni pe ohun ti Jesu ṣe fun iwọ ati emi nipasẹ iku, isinku ati ajiinde rẹ ko ni lailai ja si asan. Ṣugbọn awa naa gbọdọ ma a fi igba gbogbo ṣe asaro lori nkan ti O ṣe fun wa, ki a ba a le ma a fi ojoojumọ ṣe amulo rẹ lati jẹ ẹni ti Ọlọrun fẹ ki a jẹ. Mo ki ọ kaabọ lẹẹkansi sinu oṣu tuntun yi. Mo si tun gbadura pe ki o jẹ igbadun ere ajiinde Jesu Oluwa wa lẹkunrẹrẹ ninu aye rẹ ninu oṣu naa. Amin.

A ku Ajiinde.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu ọsẹ ti o so oṣu Ẹrẹ́nà ati Igbe 2026 papọ. Adura mi si ni pe ki Ọlọrun maa fi ojoojumọ ṣaanu fun ọ, ki O si ma jẹ ki eti rẹ di si ibawi yowu ti Ẹmi rẹ le mu tọ ọ wa, ki o ma ba ṣi aye rẹ silẹ fun iparun ojiji.

Ki ni idi ti awọn ọmọ Eli ṣe parun lalai si atunṣe? Idi ni pe eti wọn di si ibawi Ẹmi Ọlọrun. Bi a ti ṣe ri ninu bibeli, bi o tilẹ jẹ wipe awọn ọkunrin yi jẹ alufa ninu ile Ọlọrun, ọmọ Beliali, ọmọ Eṣu ni wọn. Ki ni idi? Idi ni pe wọn ko ka Ọlọrun si rara. (Wo: 1Sámúẹ́lì 2: 12-17)

Bawo gan an ni wọn ṣe wa di alufa inu ile Ọlọrun, niwọn igba ti o jẹ wipe wo ki ka a si? Ojuṣaaju! Nkan ti mo n sọ ni pe idi kan ṣoṣo ti wọn ṣe jẹ alufaa ninu ile Ọlọrun ni pe baba wọn jẹ olori alufa fun Isiraẹli ni asiko naa. Ti ko ba ki i ṣe olori alufa ni, a ko le fi wọn ṣe alufa ni ilẹ naa, bi o tilẹ jẹ wipe idile awọn alufa ni wọn ti wa.

Loni ẹwẹ, a tun ri ninu ọpọ ijọ awọn ti ko ni ibẹru Ọlọrun rara ti wọn si n ṣiṣẹ gẹgẹ bi adari. Ki ni idi? Ojuṣaaju! Eyi jasi pe idi ti awọn wọnyi ṣe jẹ adari ni pe wọn ni ibaṣepọ pẹlu awọn adari ijọ kan, ko ki i ṣe nitoripe Ọlọrun yan wọn gẹgẹ bi adari awọn eniyan rẹ. Nitorina, awọn naa ko le ṣe alaijọ awọn ọmọkunrin Eli, awọn ọmọ Beliali, ninu iwuwasi wọn.

Ni kukuru, nigba ti Eli bẹrẹ si ni gba oniruuru iroyin ti ko dara nipa awọn ọmọkunrin rẹ yi, o pe wọn, o si ba wọn wi. Ṣe wọn wa gbọrọ si lẹnu? Rara, wọn ko gbọrọ si lẹnu. Ki ni idi? Wo nkan ti bibeli sọ nipa eyi:

“Bẹ̃kọ, ẹnyin ọmọ mi, nitori ki iṣe ihinrere li emi gbọ́: ẹnyin mu enia Ọlọrun dẹṣẹ̀. Bi ẹnikan ba ṣẹ̀ si ẹnikeji, onidajọ yio ṣe idajọ rẹ̀: ṣugbọn bi ẹnikan ba ṣẹ̀ sí Oluwa, tani yio bẹ̀bẹ fun u? Nwọn kò si fi eti si ohùn baba wọn, nitoriti Oluwa nfẹ pa wọn.” (1 Sámúẹ́lì 2:24-25)

Ki ni idi ti awọn ọmọkurin Eli ko ṣe gbọrọ si baba wọn lẹnu? Id ni pe Ọlọrun ti pinnu lati pa wọn run. Ki ni idi ti Ọlọrun fi pinnu lati pa wọn run? O pinnu lati pa wọn run nitoripe wọn ti sọ ki wọn ma kọ ọrọ ibawi rẹ silẹ di aṣa.

Wayi o, eyi n kọ wa pe ki a ma ṣe lailai kọ ibawi Ẹmi Ọlọrun silẹ. Idi si ni pe ṣiṣe bẹ ẹ le pada di aṣa fun wa laipẹ. Ti o ba si ti di aṣa fun wa lati ma a kọ ibawi rẹ silẹ, o di dandan ki a ṣi aye wa silẹ fun idajọ Ọlọrun, ti a ko ba ṣaanu fun wa. Adura mi wa ni pe ki o ma fi ori kunkun ṣi abala aye rẹ kankan silẹ fun idajọ rẹ. Amọ o gbọdọ ṣọ ara rẹ.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu ọsẹ miran ninu ọsu Ẹrẹ́nà 2026. Adura mi ni pe ki Ọlọrun fun ọ ni okun lati jẹ olotitọ si i ni ojoojumọ, ki O ba a le gbe ọ ga lati jẹ ohun gbogbo ti O fẹ ki o jẹ laye. Amin.

Bi a ti ṣe ri ninu bibeli, ọkan lara awọn nkan ti Ọlọrun ma n wo lati gbe awọn eniyan gẹ ni iha ti wọn kọ si awọn nkan kekeke ti O fa le wọn lọwọ. Wo bi Jesu Oluwa wa ti ṣe gbe eyi kalẹ fun wa:

“Ẹniti o ba ṣe olõtọ li ohun kikini, o ṣe olõtọ ni pipọ pẹlu: ẹniti o ba si ṣe alaiṣõtọ li ohun kikini, o ṣe alaiṣõtọ li ohun pipo pẹlu. Njẹ bi ẹnyin kò ba ti jẹ olõtọ ni mammoni aiṣõtọ, tani yio fi ọrọ̀ tõtọ ṣú nyin? Bi ẹnyin ko ba si ti jẹ olõtọ li ohun ti iṣe ti ẹlomiran, tani yio fun nyin li ohun ti iṣe ti ẹnyin tikara nyin? “ (Lúùkù 16:10-12)

Pẹlu nkan ti a ri nibiyi, Ọlọrun a ma a kọbiara si iha ti a ba kọ si amojuto awọn nkan kinkinkin. Ki ni idi? O jẹ ọkan lara awọn nkan ti yoo fi han boya a o jẹ olotitọ ati ẹni ti o wulo ni ṣiṣe amujuto nkan ti o pọ tabi bẹẹkọ. Nitorina, ti Ọlọrun ko ba ma a gbe ọ ga tabi busi fun ọ pẹlu awọn nkan rere, o le jẹ wipe o ko ki i ṣe olotitọ ninu awọn nkan kinkinkin.

Lafikun, a tun ri ninu ẹsẹ bibeli yi pe Ọlọrun a ma a kọbiara si iha ti a ba kọ si amojuto awọn nkan ti aye yi. Ki ni idi? Eyi jẹ ọkan lara awọn ọna ti O fi le e sọ boya a le ṣe amojuto nkan ti ẹmi daradara tabi bẹẹkọ. Idi si ni yi ti ko ki i fi fa awọn otitọ ati iṣẹ ẹmi le awọn ti o ti fi ara wọn han gẹgẹ bi ọlẹ tabi alaiṣododo ni ṣiṣe amojuto nkan ti aye yi. Wọn yoo jẹ ki akude tabi idibajẹ ba iṣẹ rẹ.

Ni ipari, lati inu awọn ẹsẹ bibeli naa, a ri wipe Ọlọrun ma n kọbiara si bi a ti ṣe n ṣe amojuto awọn dukia tabi iṣẹ awọn miran. Ti a ba mojuto nkan ti awọn miran daradara, a n fi ara wa han gẹgẹ bi ẹni ti o ṣetan lati gba awọn nkan rere ti O ni ni ipamọ fun wa. Ṣugbọn ti a ko ba mojuto nkan ti awọn miran dadarada, nṣe ni a o ma fi ara wa han bi ẹni ti ko ṣetan lati tẹwọgba awọn nkan rere ti O ni ni ipamọ fun wa. Eyi wa jasi pe ọkan lara awọn ọna ti Ọlọrun ma n gba dan wa wo lati mọ boya a ṣetan lati ri nkan gba si lọwọ rẹ tabi lati ri igbega gba lọwọ rẹ ni nipa wiwo bi a ti ṣe n ṣe amojuto nkan awọn miran. Ti iwo ko ba wa ma mojuto iṣẹ tabi nkan ti awọn miran ti n fi fun ọ daradara, nṣe ni ki o mọ wipe o ti n di igbega ati iṣoriire ara rẹ lọwọ.

Ni kukuru, koko ọrọ mi ninu gbogbo eyi ni pe Ọlọrun ma n ka bi a ti ṣe jẹ olododo si ni ṣiṣe amojuto awọn nkan kekeke ati awọn nkan ti aye yi si ni pataki gidigidi. Ti o ba wa fẹ ki O gbe ọ ga, ki O si tun busi fun ọ gidigidi, nṣe ni ki o bẹrẹ si ni fi otitọ ati ifarabalẹ han lori bi o ti ṣe n mojuto ohunkohun ti a ba ko le ọ lọwọ. Ranti Josefu. Ranti pe Ọlọrun ko ṣa dede gbe e ga lati di alamojuto ilẹ Ijibiti lalai kọkọ dan isododo rẹ wo gẹgẹ bi ọmọ ninu ile baba rẹ, gẹgẹ bi ẹru ni ile Potifari ati gẹgẹ bi ẹlẹwọn ni ilẹ Ijibiti.

Nitorina, bi o ti wu ki ipo ti o wa kere tabi buru to, fi ara rẹ han gẹgẹ bi ẹni ti awọn eniyan ati Ọlọrun le fọkantan. Ti o ba si ni suuru, ko ni pẹ ti iwọ yoo fi ri ogo Ọlọrun fun igbega ati iṣoriire rẹ.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ẹrẹ́nà 2026. Adura mi ni pe ki Ọlọrun mu ki ọsẹ naa dara jọjọ fun iwọ ati idile rẹ. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju lati jẹ ẹnikan ti yoo ma fun awọn eniyan Ọlọrun ti o wa ni ayika rẹ ni iwuri lati ṣe ifẹ rẹ nipa ọrọ ati iṣe rẹ. Wo o, nkan ti awọn eniyan kan nilo lati fi ara wọn jin lẹkunrẹrẹ fun ṣiṣe ifẹ Ọlọrun ko ju ọrọ iwuri lati ẹnu ẹnikan lọ. Bẹẹ si ni, nkan ti awọn elomiran nilo lati wa awawi lati ma ṣe ifẹ Ọlọrun ko ju ẹnikan ti yoo ko irẹwẹsi ba wọn, yala nipa ọrọ tabi iṣe rẹ. Ti o ba wa fi aaye gba eṣu lati lo ọ lati ko irẹwẹsi si ba ẹnikẹni lati ma ṣe ifẹ Ọlọrun, mo daju pe Ọlọrun yoo ba ọ wi ni ibamu pẹlu nkan ti o ṣe.

Fun apẹrẹ, nigba ti o ku diẹ ki awọn ọmọ Isiraẹli wọ Ilẹ Ileri, lẹyin igba ti wọn ti ranmu ninu aginju fun ogoji ọdun, awọn ara Rubẹni ati awọn ara Gaadi wa sọdọ Mose pẹlu ẹbẹ kan. Oun naa si ni pe ki o gba wọn laaye lati ma sọda odo Jọdani si ilẹ awọn ara Kenani. Ki ni idi? Idi ni pe ibi ti o wa ṣaaju Jọdani dara pupọ fun awọn nkan ọsin. Awọn si wa ni agbo aguntan ati maalu ti o pọ. (Wo: Númérì 32:1-5)

Iha wo wa ni Mose kọ si ẹbẹ wọn? Wo nkan ti a kọ lori eyi ninu bibeli:

“Mose si wi fun awọn ọmọ Gadi ati fun awọn ọmọ Reubeni pe, Awọn arakunrin nyin yio ha lọ si ogun, ki ẹnyin ki o si joko nihinyi? Ẽṣe ti ẹnyin fi ntán ọkàn awọn ọmọ Israeli niyanju ati rekọja lọ sinu ilẹ ti OLUWA fi fun wọn? Bẹ̃li awọn baba nyin ṣe, nigbati mo rán wọn lati Kadeṣi-barnea lọ lati wò ilẹ na.” (Númérì 32:6-8)

Njẹ o ri bayẹn? Mose sọ fun awọn eniyan wọnyi pe nkan ti wọn ṣe jẹ nkan ti yoo ko irẹwẹsi si ba ọkan awọn ọmọ Isiraẹli yoku lati ma ṣe ifẹ Ọlọrun nipa sisọda Jọdani lati gba Ilẹ Ileri. O tilẹ fi asiko yi ran wọn leti pe idi ti gbogbo wọn ṣe ranmu ninu aginju fun ogoji ọdun ni pe awọn obi wọn ko irẹwẹsi ba ara wọn lati ma gba Ilẹ Ileri naa. Awọn ara Rubẹni ati awọn ara Gaadi yi wa nilo lati fi da Mose loju pe awọn yoo kọkọ sọda Jọdani lati ran awọn ọmọ Isiraẹli yoku lọwọ lati gba Ilẹ Ileri ki awọn to pada wa do si ilẹ ti ara wọn ki o to di pe o tẹwọgba ẹbẹ wọn.

Ki ni eyi n kọ wa? Oun naa ni pe Ọlọrun ko ki i fi oju rere wo ẹnikẹni ti o ba n fi irẹwẹsi si ọkan awọn miran lati ma ṣe ifẹ rẹ. Dipo bẹẹ, nṣe ni O ma n ṣe idajọ wọn. Niwọn igba ti a ko wa le sọ ọna ti yoo gba ṣe idajọ wa ti a ba lọ ko irẹwẹsi ba ẹnikẹni lati ma ṣe ifẹ rẹ, a ni lati kiyesara lati ma jẹ idi ti ẹnikẹni ko fi ni ṣe ohun ti Ọlọrun fẹ tabi jẹ igbadun ipese rẹ fun aye wọn nipa ohun ti a n sọ tabi ṣe. Njẹ ki Ẹmi Ọlọrun ma a fi igba gbogbo ran wa lọwọ lati wuwa ni ibamu plẹu awọn nkan wọnyi. Amin.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ ni ilọpo-ilọpo lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu idunnu ti o ga ni mo ki ọ kaabọ sinu ọsẹ miran ninu oṣu Ẹrẹ́nà 2026. Adura mi si ni pe ki Ọlọrun ṣe ọ ni onirẹlẹ ati oniwapẹlẹ ninu gbogbo ibaṣepọ rẹ pẹlu awọn ti o wa ni ayika rẹ, ki o ma ba sọ tabi ṣe ohunkohun si wọn ti yoo fi ọ si abẹ idajọ rẹ. Amin.

Bi a ti ṣe ri ninu bibeli, ọkan lara awọn nkan ti o ma n jẹ ki a bọ si abẹ idajọ Ọlọrun ni ki a ma fi ẹnu tẹnbẹlu awọn miran. Lotitọ, ko si ẹni ti o peye to ni iwuwasi ni aye yi. Ọlọrun nikan ni Ẹni naa ti O peye. Nitorina, awọn eniyan le ṣe aṣiṣe. Nibi ti eyi ba si ti ri bẹ, o di dandan ki a gbe igbesẹ lati fi nkan ti o tọ han wọn.

Amọ ṣa o, yala awọn eniyan ṣe aṣiṣe nitootọ tabi a kan ro wipe wọn ṣe aṣiṣe ni, ọna ti a gba da si ọrọ wọn ni yoo sọ boya wọn yo gbọ ti wa tabi wọn ko ni gbọ. Oun naa ni yoo tun sọ boya a o gba oriyin lọdọ Ọlọrun tabi a ko ni i gba a.

Fun apẹrẹ, nigba ti awọn ọrẹ Joobu wa si ọdọ rẹ ni asiko inira rẹ, o ro wipe wọn wa lati tu u ninu ni. Ṣugbọn dipo ti wọn yoo fi tu u ninu, nṣe ni gbogbo wọn pada n fi ẹnu tẹnbẹlu rẹ, ti wọn n fi ẹsun kan pe o ṣe awọn nkan ti ko ṣe. Ṣe o wa gbo ti wọn? Rara o, ko gbọ ti wọn. Ṣe o tẹwọgba gbogbo irọ ti wọn n pa mọ-ọn? Rara o, ko tẹwọ gba a. (Wo: Jóòbù 2:11-13)

Ki ni idi ti Joobu ko ṣe gbọ ti wọn? Akọkọ, idi ni pe wọn ko wadi daju awọn iroyin buburu ti wọn gbọ nipa rẹ ki wọn to ma fi ẹsun kan pe o n wuwa ika. Idi keji ni pe gbogbo wọn ni wọn n sọrọ kobakungbe si dipo ọrọ itunu, ti wọn ko si tilẹ kọbiara si pe o wa ninu iroro ti o ga ati wipe o ti padanu gbogbo awọn ọmọ rẹ ati ọrọ̀ rẹ. Nitorina, ki a tilẹ sọ wipe otitọ ni ọrọ wọn, ko si bi ẹni ti o wa ninu irora bi tirẹ yoo ṣe tẹti gbọ awọn ọrọ kobakungbe ati ibanininujẹ ti wọn n sọ si.

Wayi o, bawo wa ni Ọlọrun ṣe da si ọrọ naa? O da si pẹlu ibinu. Ta si ni O binu si? Awọn ọrẹ Joobu ni! Ki ni idi? Akọkọ, idi ni pe wọn ṣi imọ rẹ ti wọn ni lo lati fẹnu tẹnbẹlu Joobu. Idi keji ni pe wọn ko tu ọkunrin na lara rara; nṣe ni wọn tun dakun irora rẹ. Bi Ọlọrun ṣe wa sọ fun wọn, wọn nilo lati lọ bẹ ẹ fun iforiji ati adura. Aijẹbẹ, ibinu rẹ yoo wa sori wọn. (Wo: Jóòbù 42:7-9)

Nibakanna, ibinu Ọlọrun le sọkalẹ si ori ẹnikẹni ninu wa fun fifi ẹnu tẹnbẹlu awọn miran. Wo o, Ọlọrun n wo gbogbo awọn ibaṣepọ wa lati ri bi a ti ṣe n ṣe ninu wọn. Ibi ti O ba si ti ri pe a n fi ailakasi wu aye tabi igbagbọ awọn miran lewu pẹlu ọrọ wa, ko ni fi oju fo. Lotitọ, ninu aanu rẹ, O le pe akiyesi wa si aṣiṣe wa, bi O ti ṣe ṣe fun awọn ọrẹ Joobu, ki a ba a le ronupiwada, ki a si ṣe ohun ti o tọ. Ṣugbọn O tun le pinnu lati ṣe idajọ wa lalai kilọ fun wa rara, bi O ti ṣe ṣe idajọ Miriamu ati Aarọni fun bi wọn ti ṣe fẹnu tẹnbẹlu Mose nigba kan. (Wo: Númérì 12)

Nitorina, bi o tilẹ jẹ wipe ko si nkan ti o buru ninu ki a fi aṣiṣe awọn eniyan han wọn ti wọn ba ṣe aṣiṣe, a nilo lati ri daju pe a ko ṣe eyi lori awọn nkan ti a ko i ti ṣe iwadi wọn daju. Yatọ si iyẹn, a tun nilo lati kọ bi a ti ṣe n fẹsọ ba awọn eniyan wi, ti a ba tilẹ mọ daju pe wọn ti ṣe aṣiṣe. Aijẹbẹ, nkan ti o yẹ ki o jẹ ọrọ ibawi le di ọrọ ifẹnu-tẹnbẹlu ẹni. Eyi si le ma mu ete ti o wa ni ọkan wa ṣẹ. Dipo bẹ ẹ, o tilẹ tun le fi wa si abẹ idajọ Ọlọrun. Njẹ ki Ọlọrun ma jẹ ki a fi iwa omugọ fi ara wa si abẹ idajọ rẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa ati Olugbala wa. Pẹlu ayọ ti o ga ni mo ki ọ kaabọ sinu oṣu kẹta ọdun yi, oṣu Ẹrẹ́nà 2026. Adura mi ni pe ki Ọlọrun ṣe atunṣe ohun gbogbo ti ko wa ni ibamu pẹlu ifẹ rẹ ninu aye rẹ, ki ifarahan ibukun rẹ ninu aye rẹ ma ba ni idena mọ. Amin.

Wayi o, mo gba adura yi fun ọ nitoripe awọn asiko kan a ma wa ti awọn ibukun Ọlọrun kan le ma jẹyọ ninu aye wa nitoripe awọn nkan kan ti ko bojumu ninu aye wa nilo amojuto. A wa le ma kọbiara si awọn nkan ti ko bojumu wọnyi, ki a ba a le fi igbẹkẹle wa sinu Ọlọrun lati mojuto wọn. Dipo bẹ, o le jẹ wipe awọn nkan ti ko bojumu ninu aye awọn miran ti o wa ni ayika wa ni oju wa yoo wa lara rẹ. Ti a ko ba si yi oju wa kuro lara awọn nkan ti ko bojumu ninu aye awọn miran si awọn nkan ti ko bojumu ninu aye waa, ki a ba a le mojuto wọn, ifarahan awọn ibukun Ọlọrun kan ko ni dẹkun lati ma fo wa ru.

Ranti pe Jesu Oluwa wa sọ eyi fun wọn:

“Etiṣe ti iwọ si nwò ẹrún igi ti mbẹ li oju arakunrin rẹ, ṣugbọn iwọ ko kiyesi ìti igi ti mbẹ li oju ara rẹ? Tabi iwọ o ti ṣe wi fun arakunrin rẹ pe, Jẹ ki emi yọ ẹrún igi ti mbẹ li oju rẹ, si wò o, ìti igi mbẹ li oju iwọ tikararẹ. Iwọ agabagebe, tètekọ́ yọ ìti igi jade kuro li oju ara rẹ na, nigbana ni iwọ o si to riran gbangba lati yọ ẹrún igi ti mbẹ li oju arakunrin rẹ kuro.” (Mátíù 7:3-5)

Njẹ o ri bayẹn? A le mura si ṣiṣe agbeyẹwo iṣoro aye awọn miran, ki a si kuna lati kọkọ mojuto awọn iṣoro aye ti awa funralara wa, awọn iṣoro ti o ṣeeṣe ki o tobi ju ti wọn lọ. Agabagebe si ni a n pe eyi. Agabagebe ni nitori pe ti a ko ba kọkọ mojuto awọn iṣoro aye wa ti o ga, a ko le ran awọn miran lọwọ lati mojuto awọn iṣoro pẹẹ-pẹẹ-pẹẹ inu aye wọn.

Nitorina, dipo ti iwọ yoo fi ma fi asiko rẹ ṣofo lori gbigbe awọn nkan ti ko bojumu ninu aye awọn ti o wa ni ayika rẹ wo, nṣe ni ki o bẹrẹ si ni ba Ọlọrun sọrọ lori awọn nkan ti ko bojumu ti o ti ri ninu aye ara rẹ. Bi o si ṣe n ṣe eyi, aanu rẹ yoo ṣan lọpọlọpọ si ọdọ rẹ fun imupadabọsipo rẹ.

Fun apẹrẹ, nigba ti Dafidi ati awọn eniyan rẹ n sa lọ fun Abusalomu, ọkunrin kan ti a n pe ni Ṣimei bẹrẹ si ni ṣepe fun ati oun ati awọn oṣiṣẹ ijọba rẹ, o si tun n lẹ wọn ni okuta. Nigba ti ọkan lara awọn jagungun rẹ si tọrọ fun aaye lati lo ge ori ọkunrin naa danu, Dafidi ba a wi. Ki ni idi? Idi ni pe Ṣimei ko ni ọlọtẹ ti o le jade kuro ni aafin rẹ. Ọmọkunrin rẹ gagan, Abusalomu, ni o le jade. Abusalomu si le e le jade kuro ni aafin rẹ lọna yi nitoripe o kuna gẹgẹ bi baba. (Wo: 2Sámúẹ́lì 16:5-13)

Ti a ba wa ri ẹnikẹnu ti Dafidi nilo lati mojuto ọrọ rẹ ni asiko naa, ara rẹ ni, ko ki i ṣe Ṣimei. Nkan ti o si ṣe gẹlẹ niyẹn. O gbajumọ rironu nipa ikuna ara rẹ gẹgẹ bi baba ati gbigbadura si Ọlọrun fun aanu. Ṣe Ọlọrun wa a da lohun tabi ko da lohun? O da lohun.

Nitorina, ti a ba fẹ ki aanu ati ojurere Ọlọrun ṣiṣẹ ninu aye wa lalai si idena, a nilo lati kọkọ gbajumọ amojuto awọn nkan ti o wa ninu aye wa ti ko wa ni ibamu pẹlu ifẹ rẹ, dipo ti a o fi gbajumọ sisọ ọrọ lori awọn nkan ti ko bojumọ ninu aye awọn miran. Njẹ ki ẹmi Ọlọrun ma a fi ojoojumọ fun wa ni okun ti a nilo lati ṣe eyi, ki ọkankan ninu awọn ibukun ti o yẹ fun aye wa ma ba a fo wa ru mọ. Amin.

Kí o ní oṣù Ẹrẹ́nà 2026 tí ó lárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ ti o pari oṣu yi, oṣu Èrèlé 2026. Adura mi ni pe ki Ọlọrun ma a fi igba gbogbo jẹ ki ọkan rẹ wa ni ipo irẹlẹ lati tẹwọgba ọrọ rẹ, bi o tilẹ jẹ wipe ọrọ ibawi ni, ki ete rẹ fun aye rẹ ba a le wa si imuṣẹ ni kikun. Amin.

Ọkan lara awọn nkan ti o ṣoro fun wa ju lati tẹwọgba lọwọ Ọlọrun ni ọrọ ibawi. Ko ki i ṣaba nira fun wa lati tẹwọgba ọrọ ibukun tabi oriyin rẹ. Ṣugbọn ti O ba wa pinnu lati ba wa wi, a le binu si tabi binu si awọn ti O n lo lati ba wa wi. Eyi si di dandan ki o di imuṣẹ ete rẹ inu aye wa lọwọ tabi ki o ṣi aye wa silẹ fun idajọ.

Bi a ti ṣe ri ninu Iwe Mimọ, Ọlọrun ko ki i ba wa wi nitoripe o kan wu u lati ma a bu ẹnu atẹ lu wa tabi lu iṣẹ ọwọ wa. Dipo eyi, nṣe ni O ma n ba wa wi nigba ti a ba kuna. O si n ba wa wi ki a ba a le ronupiwada, ki a si ma ṣi ilẹkun aye wa silẹ fun idajọ rẹ. Iha ti a ba wa kọ si ibawi rẹ ni yoo sọ boya ọrọ ibawi naa yoo ṣe aye wa lore tabi ko ni ṣe e lore.

Fun apẹrẹ, bi o tilẹ jẹ wipe Ọba Asa jẹ ọba oniwa-bi-Ọlọrun, nigba ti Ọlọrun ba a wi fun fifi igbẹkẹle rẹ sinu eniyan dipo sinu rẹ, o binu. O binu si Ọlọrun debi wipe o fi wolii ti Ọlọrun ran si sinu atimọle, o si tun pọn melokan lara awọn eniyan ilẹ rẹ loju. Nitorina, ọrọ ibawi ti a ran si ko le ṣe ni ire, ki o si yi pada kuro ni oju ọna iparun. Abalajọ ti o fi ku sinu aisan ati ṣaaju asiko rẹ. (Wo: 2Kíróníkà 16)

Amọ ṣa o, si iyalẹnu eniyan, nigba ti Ọlọrun ran ọrọ ibawi rẹ nipasẹ Wolii Elija si Ọba Ahabu, ọba ika yẹn, o tẹwọgba pẹlu irẹlẹ. Ọrọ naa rẹ ọkan rẹ silẹ debi wipe o fa aṣọ rẹ ya, o gba awẹ, o si n lọ kaakiri pẹlu irẹlẹ. Nitorina, dipo ti Ọlọrun yoo fi ṣe idajọ rẹ lẹsẹkẹsẹ, O sun idajọ rẹ siwaju di asiko ọmọ rẹ. (Wo: 1Àwọn Ọba 21)

Ṣe o wa ri bayi pe a le mọ eniyan si olododo eniyan, ki o si tun jẹ ẹni ti o n kọ iha ti ko dara si ibawi. A si wa le mọ eniyan gẹgẹ si ika tabi alaiwulo eniyan, ki o si wa kọ iha ti o dara si ibawi. Nibi ti eyi ba ti si ti wa ri bẹ, ẹni ti a n pe ni alaida eniyan naa yoo ni iriri aanu Ọlọrun fun idariji ati ipamọ. Ṣugbọn iwọ, pẹlu gbogbo ododo rẹ, yoo padanu didara rẹ nitori agidi ati iha ti ko dara ti o n kọ si ọrọ ibawi rẹ.

Nitorina, igbakigba ti Ọlọrun ba n ba ọ wi fun ṣiṣe ohun ti ko dara tabi ti ko tọna, tẹwọgba ibawi naa pẹlu irẹlẹ. Ma ṣe jiyan. Ma ṣe gbiyanju lati wi awijare. Lotitọ, ẹni ti Ọlọrun n lo lati ba ọ wi le sọrọ lile si ọ. Sibẹsibẹ, tẹwọgba ọrọ ibawi ti o n tọ ọ wa, niwọn igba ti o ba ti jẹ otitọ. Ti o ba tilẹ si wa ro wipe aigbọraẹniye ni o waye, si rẹ ara rẹ silẹ to lati kọkọ gbọ ọrọ ibawi ti o n tọ ọ wa ki o to ṣalaye ara rẹ. Nipa ṣiṣe bayi, o ko ni fi ara rẹ han gẹgẹ bi alagidi eniyan, ki o si ṣi ilẹkun aye rẹ silẹ fun idajọ Ọlọrun.

Wa ranti wipe o ko mọ gbogbo nkan. Ko si ẹnikẹni ninu wa ti o mọ gbogbo kan. Ọlọrun nikan ni O mọ gbogbo nkan. Ti yoo ba si le mu ete rere rẹ ṣẹ ninu aye wa, a gbọdọ ma a kọ iha ti o tọ si ibawi. Aijẹbẹ, o ṣeeṣe ki a pari aye wa bi Ọba Asa. Njẹ ki eyi ma ṣe jẹ ipin wa laye, ni orukọ Jesu. Amin.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Èrèlé 2026. Adura mi ni pe ki Ọlọrun ma tete fi igba gbogbo kun ọkan rẹ pẹlu ọgbọn ati irẹlẹ ti o peye lati ma a fi igba gbogbo yan awọn nkan ti yoo dun mọ-ọn ninu ati ti ko ni fi ọ tabi awọn miran ti o wa ninu aye rẹ sinu iyọnu. Amin.

Bi a ti ṣe mọ nipasẹ bibeli, Ọba Hesekaya jẹ ọkan lara diẹ ninu awọn ọba Juda ti o sin Ọlọrun lotitọ ati tọkan-tọkan. Nitorina, Ọlọrun bukunfun gidigidi, O si tun fun ni isinmi kuro lọwọ gbogbo awọn ọta rẹ. Sibẹsibẹ, nkan ti a kọ sinu bibeli lori bi Ọlọrun ti ṣe dan an wo nigba ti ijọba rẹ n wa si opin ni eyi:

“Ṣugbọn niti awọn ikọ̀ awọn ọmọ-alade Babeli, ti nwọn ranṣẹ si i, lati bère ohun-iyanu ti a ṣe ni ilẹ na, Ọlọrun fi i silẹ lati dán a wò, ki o le mọ̀ ohun gbogbo ti o wà li ọkàn rẹ̀.” (2Kíróníkà 32:31)

Ki ni idi ti Ọlọrun fi fi Hesekaya silẹ lati dan an wo ati lati mọ ohun gbogbo ti o wa ninu ọkan rẹ? Ṣe lotitọ ni pe Ọlọrun nilo lati dan an wo ki O to mọ nkan ti o wa ninu ọkan rẹ ni? Rara o! Ọlọrun ti mọ nkan ti o wa ninu ọkan rẹ tẹlẹtẹlẹ. Nitorina, idanwo naa ko ki i ṣe fun Ọlọrun lati mọ nkan ti o wa ninu ọkan rẹ ṣugbọn fun oun alara lati mọ nkan ti o wa ninu ọkan ara rẹ.

Njẹ ọna wo wa ni Ọlọrun gba dan an wo? O dan an wo nipa fifi aaye gba lati pinnu lori ọrọ kan funrarẹ. Bi akọsilẹ naa ti ṣe lọ, lẹyin igba ti Ọlọrun wo o san tan, ti O si tun fun ni ọdun marun-din-logun si laye, awọn oniṣẹ kan wa lati Babiloni lati ki i. Laisi fi ọrọ naa to Ọlọrun leti lori bi o ti ṣe yẹ ki o ṣe si awọn onisẹ yi, o fi gbogbo titobi rẹ ati ọla rẹ, ohun gbogbo ti o wa ninu aafin ati ninu ijọba rẹ, han wọn. (Wo: 2Àwọn Ọba 20:12-19)

Ki ni idi ti o ṣe ṣe eyi? Ipongbẹ fun oriyin awọn eniyan! Ipongbẹ lati ṣe ṣekarimi! Ki si ni o fa ti o fi wu u lati ṣe ṣekarimi ni asiko naa? Igberega! Nitorina, igberaga ti wa ninu Hesekaya tipẹ-tipẹ. Ṣugbọn ko farahan titi Ọlọrun fi jẹ ki o pinnu funrarẹ lori bi yoo ti ṣe ṣe si awọn oniṣẹ ti o wa lati Babiloni. Igba ti o wa tẹ ara rẹ lọrun tan ni Ọlọrun ṣẹṣẹ ran Wolii Aisaya si lati sọ atunbọtan igberaga rẹ fun. Ọlọrun sọ fun pe yoo padanu ohun gbogbo ti o fi han awọn ara Babaloni, pẹlupẹlu awọn arọmọdọmọ oun tikararẹ rẹ, si ọwọ wọn lẹyin iku rẹ. O ma ṣe o!

Njẹ ki ni eyi wa n kọ wa? Oun naa ni pe ọkan lara awọn ọna ti Ọlọrun ma n gba fi ibi ti o farasin ninu ọkan awọn eniyan han wọn ni nipa fifi aaye gba wọn lati yan awọn nkan kan funra wọn. Nitorina, a gbọdọ kọ lati ma gbadura pe ki Ọlọrun ma lailai fi wa silẹ lati yan ohunkohun, yala o tobi ni tabi o kere, funra wa, lalai fun wa ni ọgbọn rẹ. Nipa bayi, a ko ni lailai yan ohunkohun ti yoo pa aye wa tabi aye awọn ti a fẹran run.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu yi. Adura mi ni pe ki Ọlọrun pa ọ mọ ninu ọsẹ naa ati ni gbogbo iyoku ọdun yi kuro ninu gbogbo ikọlu eṣu. Amin.

Ọkan lara awọn nkan ti a sọ fun wa ninu bibeli ni pe ọta wa ni eṣu jẹ. Eyi jasi pe, ko ki i ṣe ọrẹ wa, a ko si gbọdọ ri gẹgẹ bi ọrẹ. Dipo eyi, nṣe ni a gbọdọ ma a fi igba gbogbo ṣọ ara wa fun un. Aijẹbẹ, yoo ba aye wa

Wo nkan ti Peteru sọ fun nipa rẹ:

“Ẹ mã wà li airekọja, ẹ mã ṣọra; nitori Èṣu, ọtá nyin, bi kiniun ti nke ramuramu, o nrìn kãkiri, o nwá ẹniti yio pajẹ kiri: Ẹniti ki ẹnyin ki o kọ oju ija si pẹlu iduroṣinṣin ninu igbagbọ́, ki ẹnyin ki o mọ̀ pe ìya kanna ni awọn ara nyin ti mbẹ ninu aiye njẹ.” (1 Pétérù 5:8-9)
jẹ.

Njẹ o ri bayẹn? Peteru n sọ fun wa nibiyi pe Satani ko kan ki i ṣe ọta wa lasan; ọta ti o jafafa ni. Iha wo wa ni ki a kọ si i? Akọkọ, a gbọdọ ma fi igba gbogbo wa ni ikiyesara fun un. Eyi tunmọ si pe, a gbọdọ ma a fi igba gbogbo kiyesi awọn anfaani ti o le fẹ lo lodi si wa, ki a ba a le mu wọn kuro.

Woo, Satani ṣetan lati lo anfaani yowu ti o ba ri lodi si wa, ti a ba fi aaye gba. O le lo awọn ibaṣepọ wa lodi si wa. O le lo awọn nkan ini wa lodi si wa. O si tun le lo aikiyesra tabi imẹlẹ wa lodi si wa. O wa ku si ọwọ wa lati tete da ẹnikẹni tabi ohunkohun ti o ba fẹ lo lodi si wa mọ, ki a si tete gbe igbesẹ lati di i lọwọ.

Nkan ekeji ti Peteru sọ fun wa ni pe ki a kọju ija si esu. Eyi jasi pe, a gbọdọ kọ lati ma gbogun ti I ati lati le danu kuro ninu aye wa. Ṣe a wa le ṣe eyi? Bẹẹni, a le e ṣe. Ti a ko ba le le eṣu jina si aye wa ni, Ọlọrun ko ni sọ fun wa pe ki a ṣe bẹ ẹ. Idi ti O ṣe sọ fun wa pe ki a ṣe bẹ ẹ ni pe a le e ṣe bẹ ẹ.

Bawo wa ni a ṣe le ṣe bẹ ẹ? Nkan meji ni a nilo! Akọkọ ni pe ki a fi igbẹkẹle wa sinu Ọlọrun, ki a si ṣe ohunkohun ti O ba sọ fun wa pe ki a ṣe lati le eṣu jina si aye wa. Nkan ekeji ni ki a duro ṣinṣin ni ṣiṣe ohun yowu ti Ọlọrun ba sọ fun wa pe ki a ṣe lati le eṣu danu. Eyi tunmọ si pe a gbọdọ ma a fi igba gbogbo ṣe ohunkohun ti O ba sọ fun wa pe ki a ṣe titi Satani yoo fi salọ kuro lọdọ wa.

Wayi o, ki ni nkan naa ti Ọlọrun n sọ fun wa pe ki a ṣe lati le Satani jinna si aye wa, ile wa ati awọn adugbo wa? O n sọ fun wa pe ki a fi ara wa jin fun ṣiṣe aṣaro ninu ọrọ rẹ, fun pipolongo ọrọ rẹ ati fun ṣiṣe amulo ọrọ rẹ. O tun n sọ fun wa pe ki a fi ara wa jin fun adura gbigba lai sinmi. Lafikun, O n sọ fun wa pe ki a mu ibaṣepọ wa pẹlu awọn eniyan rẹ ni ọkunkundun. Ti a ba si ti n ṣe awọn nkan wọnyi, ti a ko si rẹwẹsi, a o le ma a fi igba gbogbo le Satani jinna si wa.

Nkan ẹkẹta ti Peteru sọ fun wa ninu awọn ẹsẹ bibeli yẹn ni pe ki a ma a fi igba gbogbo ranti pe awa nikan kọ ni eṣu n kọlu. Gbogbo awọn ọmọ Ọlọrun bi ti wa ni o n kọlu pẹlu. Nitorina, a ko gbọdọ ro wipe awa nikan ni awọn iyọnu ti o n tọ wa wa n tọ wa, ki a si sọ ireti nu. Dipo eyi, nṣe ni ki a tẹsiwaju lati ma kọju ija si eṣu ati iṣẹ rẹ ninu aye wa. A o si ma a fi igba gbogbo rin ni iṣẹgun lori rẹ.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ akọkọ ninu oṣu Èrèlé ọdun 2026. Adura mi ni pe ki Ọlọrun mu aye re padabọsipo nibikibi ti o ba ti nilo imupadabọsipo ninu oṣu naa, ni orukọ Jesu. Amin.

Wayi o, ọkan lara awọn ọna lati ni iriri imupadabọsipo lati ọwọ Ọlọrun ni ki a ma sọ ireti, bi awọn nkan ti a n dojukọ laye ti wu ki o ri. Bibeli sọ wipe, “Nitoripe olõtọ a ṣubu nigba meje, a si tun dide: ṣugbọn enia buburu yio ṣubu sinu ibi.” (Ìwé Òwe 24:16) Njẹ o ri bayẹn? Bi olododo tilẹ ni iriri ikuna lera-lera laye yi, yoo dide pada. Ki ni idi ti o ṣe le e dide pada? Idi ni pe ko sọ ireti nu ninu ara rẹ tabi ninu Ọlọrun.

O wa ṣeni laanu pe, ko ki i ṣe gbogbo olododo eniyan tabi ọmọ Ọlọrun ni a le sọ eyi nipa wọn. Ẹkan ṣoṣo ni awọn miran ṣubu ti wọn ko si dide mọ lailai. Ki ni idi? Wọn sọ ireti nu? Fun apẹrẹ, lẹyin iṣubu Samusoni, Ọlọrun fun ni anfaani miran lati ni iriri imupadabọsipo. Lọna wo? O jẹ ki irun ori rẹ, ti a o jẹ amin ipe ati agbara rẹ ninu aye rẹ, bẹrẹ si ni wu pada. (Wo: Onídájọ́ 16:21-22)

Ṣugbọn ṣe o wa ṣe amulo ti o peye anfaani fun imupadabọsipo yi? Rara o! Dipo bẹẹ, nṣe ni o lo anfaani naa lati gbẹsan. O gbadura si Ọlọrun pe ki o da okun oun pada fun oun lẹẹkan ṣi, ki oun ba a le gbẹsan lara awọn ọta oun fun oju oun ti wọn yọ. O tilẹ sọ fun Ọlọrun pe ki O jẹ ki oun ku pẹlu awọn ọta oun nigba ti o n ba n gbẹsan lara wọn. Ṣe Ọlọrun wa da lohun tabi ko da lohun? O da lohun. O fun ni nkan ti o bere fun. Nitorina, ni ọjọ kanna yi, o pa pupọ ninu awọn ọta rẹ nigba ti o n ku ju igba ti o wa laye lọ. (Wo: Onídájọ́ 16:26-30)

Njẹ bi Ọlọrun wa ṣe fẹ ki nkan pari fun Samusoni ni yi bi? Rara o! Ṣe Ọlọrun jẹ ki irun ori rẹ kun pada ki o ba a le ku pẹlu awọn ara Filisitini ni bi? Rara o! Ki wa ni idi ti O fi jẹ ki irun ori rẹ kun pada? O jẹ ki o kun pada ki o ba a le ni anfaani fun imupadabọsipo aye ati iṣẹ iranṣẹ rẹ. Nitorina, dipo ti o fi bere lọwọ Ọlọrun pe ki O jẹ ki oun ku pẹlu awọn ọta oun, nṣe ni ko ba sọ pe ki O ṣaanu fun oun, ki O fun oun ni oju tuntun, ki O si tun da oun pada si idi iṣẹ iranṣẹ oun. Ṣe Ọlọrun yoo wa da lohun, ti o ba ṣe eyi? Mo gbagbọ pe ko ba da lohun ti o ba ṣe bẹẹ.

Bi a ti ṣe ri ninu bibeli, igba kan wa ti o gbadura si Ọlọrun fun omi bi o ti n ku lọ, ti O si da lohun. O jẹ ki omi jade lati inu ilẹ wa fun un lati mu. Omi yi si di orisun omi ti awọn miran pẹlu bẹrẹ si ni jẹ igbadun rẹ lati igba naa lọ. Nitorina, ti o ba jẹ wipe o bere fun oju tuntun lọwọ Ọlọrun ni, ko ba da lohun tabi ki O fi ọna ti yoo gba gbe aye lati ṣe aṣeyọri ninu iṣẹ iranṣẹ rẹ han, bi o tilẹ jẹ wipe ko ni oju. (Wo: Onídájọ́ 15:18-19)

Ṣugbọn Samusoni ko sọ fun Ọlọrun pe ki O mu oun padabọsipo lọna yi. Nṣe ni o bere fun iku dipo eyi. Idi si ni pe o ti sọ ireti nu lori gbigbe aye lati da nkan Ọlọrun fẹ ki o da. Ti awa naa, bi tirẹ, ba sọ ireti nu lori ki a da nkan ti Ọlọrun fẹ ki a da laye yi nitori awọn idojukọ wa tabi nitori awọn iriri ikuna ti a ti ni, nṣe ni a o ma ti ilẹkun imupadabọsipo Ọlọrun mọ ara wa. Nipa bayi, ete rere rẹ fun aye wa ko ni lalai wa si imuṣẹ.

Nitorina, ma ṣe sọ ireti rẹ lori aye rẹ tabi ninu Ọlọrun nu fun idi kankan. Dipo eyi, nṣe ni ki o ma fi igba gbogbo ran ara rẹ leti ẹṣẹ Iwe mimọ ti o wa loke yẹn, ti o n sọ fun wa pe bi olododo eniyan ba tilẹ ṣubu ni igba meje, yoo dide pada. Iwo naa yoo dide pada, bi o ti wu ki awọn iriri iṣubu tabi ikuna ti o ti ni laye ri. Ranti pe idi ti arabinrin onisun-ẹjẹ yẹn ko ṣe ku si ipo ti o wa ni pe ko sọ ireti nu, bi o tilẹ jẹ wipe awọn dọkita ti wọn n mojuto yan-an jẹ lọna ti o buru jọjọ (Máàkù 5:25-34). Nitorina, iwọ naa ko gbọdọ sọ ireti nu. Njẹ ki a fun ọ ni okun ti o peye lati ma sọ ireti nu laye yi titi gbogbo ete rere Ọlọrun fun ọ yoo fi wa si imuṣẹ. Amin.

A kú oṣù Èrèlé 2026.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)