latori tabili paito

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o kẹyin oṣu yi, oṣu Sẹrẹ 2026. Adura mi ni pe ki alaafia Ọlọrun ti o kọja gbogbo oye eniyan ma a fi igba gbogbo jọba ninu aye rẹ, ni orukọ Jesu. Amin.

Wayi o, ọkan lara awọn nkan ti yoo jẹ ki alaafia Ọlọrun jọba ninu aye rẹ ni ki o fi tọkan-tọkan tẹwọgba iṣẹ iranṣẹ awọn adari ti O yan le ọ lori ninu ijọ rẹ. Ni igba kan ti Jesu Oluwa wa n ran awọn ọmọ ẹyin rẹ lati lọ waasu, O sọ eyi fun wọn:

“Ni ilekile ti ẹnyin ba wọ̀, ki ẹ kọ́ wipe, Alafia fun ile yi. Bi ọmọ alafia ba si mbẹ nibẹ̀, alafia nyin yio bà le e: ṣugbọn bi kò ba si, yio tún pada sọdọ nyin. Ni ile kanna ni ki ẹnyin ki o si gbé, ki ẹ mã jẹ, ki ẹ si mã mu ohunkohun ti nwọn ba fifun nyin; nitori ọ̀ya alagbaṣe tọ́ si i. Ẹ maṣe ṣi lati ile de ile.” (Lúùkù 10:5-7)

Ki ni yoo jẹ ki alaafia awọn iranṣẹ Kirisiti sọkalẹ sori awọn ti wọn n waasu si ati ti wọn n gbadura fun? Iha ti awọn eniyan naa ba kọ si wọn ni! Iha wo si ni o yẹ ki wọn kọ si wọn? Nṣe ni o yẹ ki wọn fi tọkan-tọkan tẹwọgba wọn ati iṣẹ iranṣẹ wọn.

Bawo wa ni a ṣe le fi han pe a tẹwọgba enikan ati iṣẹ iranṣẹ ẹni naa tọkan-tọkan? Akọkọ, a le ṣe eyi nipa mimu ọrọ Ọlọrun ti ẹni naa n kọ wa ni ọkunkundun. Ti a ko ba mu ọrọ Ọlọrun ti ẹni naa n kọ wa ni ọkunkundun, a ko le sọ wipe a tẹwọgba irufẹ ẹni naa ati iṣẹ iranṣẹ rẹ.

Ekeji, a le fi han pe a tẹwọgba awọn iranṣẹ Kirisiti ti a ran si wa tọkan-tọkan nipa ṣiṣe ‘Amin’ si adura wọn. Bi Jesu ti ṣe fi han wa ninu ẹsẹ bibeli yẹn, gbolohun adura awọn iranṣẹ rẹ ko ni ṣadede ṣiṣẹ ninu aye wa, nitoripe wọn kan gbadura fun wa. Gbolohun adura wa yoo ṣiṣẹ ninu aye wa ni ibamu pẹlu bi a ba ti ṣe fi tọkan-tọkan ṣe ‘Amin’ si adura naa too. Aijẹbẹ, alaafia wọn, alaafia ti o n ba awọn adura wọn fun wa rin ko ni sọkalẹ sori aye wa.

Nitorina, ti o ba ri pe adura awọn adari ijọ rẹ ko ma ṣiṣẹ fun ọ rara tabi to, o le jẹ wipe ọkan rẹ ko tọ si wọn ni. Nse ni ki o wa ba ara rẹ sọrọ lori eyi, ki o si jẹ ki ọkan rẹ wa ni pipe pẹlu wọn lati le ma a fi igba gbogbo ri alaafia wọn gba, alaafia ti o n ba iṣẹ iranṣẹ wọn rin. Aijẹbẹ, wa ijọ miran lati darapọ mọ.

Nkan ikẹta ti yoo fi han pe a tẹwọgba awọn iranṣẹ Kirisiti ti O ran si wa ni ki a ma a fi nkan ini wa gbe wọn ni igbọnwọ. Bi a ti ṣe ri ninu ẹsẹ bibeli ti o wa loke yẹn, Jesu ṣe apejuwe ẹnikẹni ti o ba bọ awọn iranṣẹ rẹ, ti o si tun fun wọn ni ile gbe, gẹgẹ bi ẹni alaafia. Nitorina, ko ki i ṣe nipa ṣiṣe ‘Amin’ si adura awọn adari ijọ wa nikan ni a le gba jẹ ki alaafia Ọlọrun ti wọn n polongo sọkalẹ sori aye wa. A tun le jẹ ki o sọkalẹ sori aye wa nipa titọju wọn. Ibi ti a ba si ti n ṣe eyi, awọn adura ti wọn gba ni kẹlẹkẹlẹ ati ikọkọ paapaa yoo wa wa kan, yoo si ṣe wa loore.

Wayi o, ko si ẹnikẹni ti o le sọ bi iha ti a kọ si awọn iransẹ Kirisiti ti a ran si wa yoo ṣe ran alaafia ati iṣoriire re wa laye to si. Ka nkan ti a sọ lori arabinrin Ṣunemu ti o tọju Eliṣa ati lori bi ṣiṣe eyi ṣe ran idile rẹ lọwọ (2Àwọn Ọba 4&8). Eyi yoo la ọ lọyẹ lori bi alaafia Ọlọrun ti awọn iranṣẹ rẹ n pe sinu aye wa nipasẹ awọn iṣẹ iranṣẹ wọn ṣe le yi itan aye wa pada titi lailai. Adura mi si ni pe ki Ọlọrun fun ọkan rẹ ni okun lati bẹrẹ si ni mu ọrọ yi ni ọkunkundun, ki ọkankan ninu awọn ohun rere ti O fẹ ki O ni laye yi ma ba a fo ọ ru, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu idunnu ni mo ki ọ kaabọ sinu ọsẹ miran ninu oṣu yi, oṣu Sẹ́rẹ́ 2026. Adura mi ni pe ki Ọlọrun ya aye rẹ ya ohun gbogbo ti o n di ọ lọwọ lati wulo fun un, ki o ma ba padanu ipo rẹ tabi ere rẹ ninu ijọba rẹ. Amin.

Bi a ti ṣe ri ninu bibeli, Ọlọrun ru ọkunrin kan ti a n pe ni Nehemáyà soke ni asiko kan lati dari awọn eniyan Juda lati tun odi Jerusalẹmu mọ. Nigba ti o si ba wọn eniyan yi sọrọ nipa rẹ, gbogbo wọn bẹrẹ si ni ṣiṣẹ, ẹnikọọkan n ṣe iṣẹ yi ni ibi ti o ti sunmọ-ọn ju. Ki ni idi? Idi ni pe iṣẹ yi pe gbogbo wọn – iṣẹ yi wa fun anfaani gbogbo awọn eniyan Juda. (Wo: Nehemáyà 2&3)

Amọ ṣa o, awọn kan laarin wọn kọ lati darapọ mọ wọn lati ṣe iṣẹ yi. Wo nkan ti a sọ nipa wọn:

“Ati lọwọkọwọ wọn ni awọn ará Tekoa tun ṣe, ṣugbọn awọn ọlọla kò fi ọrùn si iṣẹ Oluwa wọn.” (Nehemáyà 3:5)

Ki ni idi ti awọn ọlọla Tẹkoa ko ṣe darapọ mọ awọn yoku lati tun odi Jerusalẹmu mọ? A ko fun wa ni idahun kankan si eyi ninu akọsilẹ naa. O le je igberaga ni o fa a. Tabi kẹ, o le jẹ wipe awọn naa n jere lati ara bi nkan ti ṣe ri fun odi yi ni asiko naa, ki wọn ma a jere lati ara idamu awọn eniyan wọn. A ko mọ idi ni pato.

Amọ ṣa o, a mọ odi Jerusalẹmu, a si tun pari rẹ ni kiakia, laarin ọjọ meji-le-ni-aadota (Nehemáyà 6:15). A pari awọn odi yi, bi o tilẹ jẹ wipe awọn ọta awọn eniyan Juda n gbogun ti wọn. Bẹẹni, a mọ awọn odi yi tan lalai si ọwọ awọn ọlọla Tẹkoa nibẹ. Ṣugbọn yoo wa ninu akọsilẹ titi lailai pe nigba ti awọn eniyan Ọlọrun n ṣiṣẹ lati tun odi ilu Ọlọrun, Jerusalẹmu, mọ ati lati fi opin si iriri ẹgan ti wọn n ni, awọn ọlọla Tẹkoa ko kopa nibẹ.

Wayi o, ẹkọ wo ni a ri kọ lati ara eyi? Ohun naa ni pe yala a dara mọ awọn eniyan Ọlọrun yoku, paapaa julọ awọn ti ijọ wa, lati ṣe iṣẹ Ọlọrun tabi a ko dara pọ mọ wọn, iṣẹ rẹ yoo jẹ ṣiṣe. Lotitọ, o le ni oniruuru idi tabi awawi lati ma ko ipa tirẹ ni ṣiṣe iṣẹ Ọlọrun. Iṣẹ rẹ yoo jẹ ṣiṣe, sibẹsibẹ. Amọ yoo wa ninu akọsilẹ pe o ko yọju nigba ti awọn yoku n ṣe iṣẹ rẹ.

Ṣe Ọlọrun, yoo wa pin ọ lere fun iṣẹ ti o ko ṣe fun un bi? Rara o! Nitorina, gbe gbogbo awawi ti o n ṣe lati ma ko ipa tirẹ ni ṣiṣe iṣẹ Ọlọrun ju sọnu, ki o si bẹrẹ si ni ṣe iṣẹ naa tọkan-tọkan. Njẹ ki O ṣe ọ yẹ pẹlu ohun gbogbo ti o nilo lati ṣe iṣẹ rẹ ni ọna ti yoo gba pin ọ ni ere. Amin.

Ki o ni ọsẹ alarinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu ọdun 2026. Adura mi ni pe ki Ọlọrun mu ete rere rẹ fun aye rẹ fun ọdun yi ṣẹ, ni orukọ Jesu. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju lati bẹrẹ si ni gbadura pe ki Ọlọrun la ọna fun gbogbo awọn eniyan ti o nilo fun ete rere rẹ lati wa si imuṣẹ ninu aye rẹ lati bẹrẹ si ni tọ ọ wa lalai si idaduro. Aijẹbẹ, ọdun yii le kọja lọ, ti ete rẹ ko si ni wa si imuṣẹ ninu aye rẹ.

Ki ni o fa ti Dafidi fi le di ọba lori Isiraẹli, pẹlu gbogbo nkan ti Ọba Sọọlu ṣe lati doju ija kọ ati lati pa a run? Idi kan pataki fun eyi ni pe Ọlọrun la ọna fun awọn eniyan ti o tọ lati wọ inu aye rẹ wa ni asiko ti o yẹ. Fun apẹrẹ, ni kete ti o pa Goliati ni Jonatani wọ inu aye rẹ wa. Ọkunrin yi ṣi ṣetan lati ku ki o ba a le di ọba, bi o tilẹ jẹ wipe ọkan lara awọn arẹmọ Ọba Sọọlu ni oun funrarẹ jẹ.

Lafikun, bi a ti ṣe fi han wa ninu 1Kironika 11 ati 12, Dafidi ni oniruuru awọn akọni jagunjagun ti Ọlọrun ran si lati fi ẹsẹ rẹ mulẹ gẹgẹ bi ọba lori Isiraẹli. Awọn eniyan wọnyi si wa fi ara wọn jin fun debi wipe ti o ba kan da nkankan gẹgẹ bi aba, nṣe ni wọn yoo gba bi aṣẹ, ti wọn yoo si ṣiṣẹ le lori, bi o tilẹ jẹ wipe eyi le la ẹmi wọn lọ. Abalajọ ti ijọba Isiraẹli ṣe wa ni ailewu ni abẹ iṣedari rẹ, lẹyin igba ti Ọlọrun ti pada fi si ori itẹ.

Siwaju si, ki ni idi ti iyinrere Jesu Kirisiti si ṣe n lọ si ibi gbogbo ni agbaye loni? Idi ni pe lati ibẹrẹ-pẹpẹ iṣẹ iranṣẹ rẹ ni Ọlọrun ti n fun ni awọn ọkunrin ati obinrin ti o ṣe fọkantan gẹgẹ bi ọmọlẹyin rẹ. A si ri lara awọn wọnyi awọn ti wọn ṣetan lati padanu ẹmi wọn ni mimu iyinrere rẹ lọ si opin aye, ki a ba a le tipasẹ rẹ gba ọpọ eniyan la.

Nitorina, fun ete Ọlọrun lati wa si imuṣẹ ninu aye wa lẹkunrẹrẹ, awọn eniyan kan ti O ti yan lati ran wa lọwọ gbọdọ tọ wa wa ni asiko, ki wọn si fi tọkan-tọkan ṣe ifẹ rẹ ninu aye wa. O wa ṣeni laanu pe ọpọ aye, ile, okowo ati ijọ ni ko ma a ni iriri imusẹ ete Ọlọrun ninu wọn loni nitori pe awọn eniyan ti o tọ ko si ninu wọn. Ti awa naa ko ba wa fẹ padanu imuṣẹ ete Ọlọrun ninu aye wa, a gbọdọ bẹrẹ si ni gbadura si i pe ki O la ọna fun gbogbo awọn oluranlọwọ ti O ti yan fun wa lati tọ wa wa ni kiakia. Mo si gbadura pe ki gbogbo irufẹ awọn eniyan yi bẹrẹ si ni wọle sinu aye rẹ lati mu ete Ọlọrun ṣẹ ninu rẹ ni kiakia, ni orukọ Jesu. Amin.

Kí o ní ọ̀sẹ̀ alárinrin.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lẹkunrẹrẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ kinni ninu oṣu kinni ọdun tuntun yi, ọdun 2026. Adura mi ni pe ki Ọlọrun jẹ ki o pọ si gidigidi ni iwulo ni ọwọ rẹ ninu ọdun naa, ni orukọ Jesu. Amin.

Bi a ti ṣe n bẹrẹ ọdun tuntun yi, mo fẹ ran ọ leti awọn ọrọ Pọọlu kan ti o sọ wipe:

“Njẹ ẽhatiṣe, ará? nigbati ẹnyin pejọ pọ̀, ti olukuluku nyin ni psalmu kan, ẹkọ́ kan, ède kan, ifihàn kan, itumọ̀ kan. Ẹ mã ṣe ohun gbogbo lati gbe-ni-ro.” (1Kọ́ríntì 14:26)

Ki ni nkan ti a ri kọ lati ara nkan ti apọsiteli yi sọ nibiyi? Akọkọ, oun naa ni pe o yẹ ki ẹnikọọkan wa ni nkankan ti yoo fi bukun fun awa yoku nigbakigba ti a ba pade fun ipade ijọ wa. Eyi jasi pe ko yẹ ki a wa fun ipade ijọ kankan lati kan jẹ alabukun fun lati ipasẹ awọn miran ṣugbọn lati tun jẹ ẹni ti yoo bukun fun awọn miran pẹlu.

Nitorina, igbakugba ti o ba n bọ ni ipade ijọ kan tabi omiran ni ọdun yi, ri daju pe o ni nkankan pẹlu rẹ lati fi bukun fun awa yoku. O le jẹ ọrọ iwuri. O le jẹ ọrọ adura tabi isọtẹlẹ. O si le jẹ ẹbun kan tabi omiran. Ṣa a ri daju pe o ko wa ni ọwọ ofo ṣugbọn pẹlu nkan kan ti yoo jasi ibukun fun awa yoku. Ki Ọlọrun si fun ọ ni okun lati le jẹ olotitọ ni ṣiṣe eyi. Amin.

Nkan ekeji ti a kọ lati ara nkan ti Pọọlu sọ ninu ẹsẹ bibeli yẹn ni pe ohunkohun ti ẹnikẹni ninu wa ba ṣe ninu awọn ipade ijọ wa gbọdọ wa fun igbero awọn miran. Nitorina, a ko gbọdọ ri ọkankan ninu wa ti yoo sọ tabi ṣe ohunkohun ti yoo pa igbagbọ, aye tabi ile awọn miran lara tabi run ninu ọkankan ninu awọn awọn ipade wa. Dipo eyi, ohun gbogbo ti a o ma ṣe tabi sọ gbọdọ jẹ eyi ti a mọ-ọn-mọ sọ lati bukun fun awọn yoku wa ati lati gbe wọn ro. Ti ko ba si da ọ loju pe o ko ni sọ tabi ṣe ohunkohun ti ko ni pa ẹlomiran lara ninu awọn ipade wa, yoo ṣan ki o kuku joko si ile.

Wayi o, mo mọ pe ko ni wu ọ lati kan joko si ile ni igba yowu ti a ba n ni ipade gẹgẹ bi ijọ ni ọdun yi, ti o ba jẹ ọmọ Ọlọrun nitootọ. Dipo eyi, ti Ọlọrun ba fẹ, nṣe ni iwọ yoo fẹ lati wa ninu gbogbo ipade ti a ba ni. Nitorina, gbadura pe ki Ọlọrun fun ọ ni okun lati le kopa ninu gbogbo ipade ti a o ma ni ni ọna ti ohun gbogbo ti iwọ yoo ma sọ tabi ṣe yoo fi jẹ eyi ti yoo bukun fun gbogbo wa. Yoo si ri bẹ ẹ fun ọ ni gbogbo ọdun naa, ni orukọ Jesu. Amin.

A ku ọdun tuntun o.

Copyright © 2026, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ ti o so ọdun yi, 2025, pọ mọ ọdun ti o n bọ, 2026. Adura mi ni pe ki Ọlọrun ṣe ọ yẹ pẹlu ohun gbogbo ti o nilo lati lọ si inu ọdun tuntun naa, ki o si ṣaṣeyọri ninu rẹ, ni orukọ Jesu. Amin.

Bi gbogbo wa ti ṣe mọ, nṣe ni a ma n dagba si pẹlu ọjọ kọọkan ti Ọlọrun ba fi kun aye wa. Ṣugbọn bi o ti wu ki a dagba to laye yi, igba gbogbo ni Ọlọrun ma n ni ohun tuntun ti O fẹ ṣe fun wa tabi fi fun wa. Iṣetan wa ni yoo wa sọ boya ohun ti O fẹ ṣe fun wa tabi fi fun wa naa yoo pada jẹ tiwa nitootọ.

Fun apẹrẹ, Ọlọrun sọ eyi fun Jọsua nigba ti o ti dari awọn ọmọ Isiraẹli wọ inu ipin wa tan, ti o si tun ti di ògbó:

“JOṢUA si gbó o si pọ̀ li ọjọ́; OLUWA si wi fun u pe, Iwọ gbó, iwọ si pọ̀ li ọjọ́, ilẹ pipọ̀pipọ si kù lati gbà.” (Jọ́súà 13:1)

Ki ni o de ti o jẹ wipe ọkunrin arugbo kan ni Ọlọrun n sọ awọn nkan wọnyi fun? Ki ni o de ti ko ma a sọ wọn fun awọn ọdọkunrin kan tabi omiran ni ilẹ naa? Idi ni pe Ọlọrun ko i ti ṣetan pẹlu Jọsua ni asiko naa, bi o tilẹ jẹ wipe o ti di ogbo. Niwọn igba ti oun naa ba si ṣetan lati tewọgba ohun yowu ti Ọlọrun fẹ ki o ni, ọjọ ori rẹ ko le jẹ iṣoro fun Ọlọrun.

Nibakanna, iye yowu ti ọjọ ori rẹ le jẹ lọdun yi tabi iye yowu ti ọjọ ori rẹ le jẹ ni ọdun ti o n bọ, Ọlọrun ko i ti ṣetan pẹlu rẹ, niwọn igba ti ẹmi ba si wa ni ẹnu rẹ. O si ni oniruuru ohun rere ati daradara ti O fẹ ṣe fun ọ ati ti O fẹ fi fun ọ. Ṣugbọn o ni lati ṣetan lati tẹwọgba ohun ti O fẹ ki o ni, ki o si ma lọ ọjọ ori rẹ gẹgẹ bi awawi lati padanu awọn ibukun rẹ.

Ma gbagbe pe Ọlọrun mọ iye ọjọ ori rẹ. Lafikun, O mọ gbogbo kudiẹ-kudiẹ rẹ. Niwọn igba ti ko ba si lo ọjọ ori rẹ tabi awọn kudiẹ-kudiẹ rẹ gẹgẹ bi awawi lati ma gbe ọ ga, fa ọ lọwọ soke tabi wo ọ san, iwọ naa ko gbọdọ lo wọn gẹgẹ bi awawi lati ma ni itẹsiwaju tabi lati ma a gbe ninu ailera laye. Dipo eyi, bi i Maria iya Jesu, nṣe ni ki iwọ naa tẹwọgba ohun yowu ti O fẹ ki o ni nipa sisọ wipe, “Jẹ ki o ri fun mi ni ibamu pẹlu ọrọ rẹ ati ifẹ inu rẹ.” Bi o si ṣe n ṣe eyi, iwọ yoo ri bi yoo ti ṣe pese ohun rere gbogbo ti o nilo lati ni iriri ẹkunrẹrẹ imuṣẹ ete rere rẹ fun aye rẹ fun ọ.

A ku imura ọdun tuntun o.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Inu mi dun lati ki ọ kaabọ sinu ọsẹ miran ninu oṣu Ọ̀pẹ 2025. Mo gbadura pe ki Ọlọrun tẹsiwaju lati ma a fun ọ ni okun lati pọ si ni iwulo ni ọwọ rẹ, ni orukọ Jesu. Amin.

Bi a ti ṣe n bẹrẹ ọsẹ yi, mo fẹ ran ọ leti awọn ọrọ Jesu kan ti o lọ bayi:

“Ẹniti kò ba wà pẹlu mi, o nṣe odi si mi; ẹniti kò ba si bá mi kopọ̀, o nfọnka.” (Mátíù 12:30)

Wayi o, ki ni koko nkan ti Jesu fẹ mujade nipa sisọ awọn nkan wọnyi? Oun naa ni pe a ko le jẹ kòṣeku-kòṣẹyẹ ninu aye yi tabi ninu ijọba rẹ. Ti a ko ba si ni iha tirẹ, a jẹ wipe a lodi si niyẹn. A si ri awọn kan ti wọn ma n sọ wipe awọn ko ni nkankan lodi si Jesu ati igbe aye Kirisitiẹni ṣugbọn ti wọn ko fẹ da Kirisitiẹni. Awọn miran lara wọn tilẹ ma n lọ si ipade ijọ awọn eniyan Ọlọrun nigba miran pẹlu awọn ọrẹ wọn tabi awọn ẹbi wọn. Ṣugbọn ni ti Jesu o, gbogbo wọn lo lodi si. Nitorina, wọn ko ni ri gẹgẹ bi ọrẹ wọn ṣugbọn bi onidajọ ati ọta wọn ni ọjọ idajọ.

Lafikun, a tun ri awọn ti wọn n pe ara wọn ni Kirisitiẹni ṣugbọn ti wọn ko ni darapọ mọ awọn yoku ninu ijọ wọn lati ṣe ohunkohun fun Ọlọrun. Ki si ni idi ti wọn ko ki i fi darapọ mọ awọn miran lati ṣe nkankan fun Oluwa? Wọn le sọ wipe iṣẹ pọ ju fun awọn lati ṣe bẹẹ. Wọn si le sọ wipe oju n ti awọn ni tabi wipe ẹru n ba awọn lati ṣe bẹẹ ni. Wọn tilẹ le sọ wipe nkan ti wọn ṣe ninu ijọ wọn ko nitumọ si awọn, paapaa julọ ti ko ba ki i ṣe wipe awọn ni wọn mu aba lati ṣe nkan naa wa.

Ni kukuru, ni ti Jesu o, nṣe ni gbogbo irufẹ awọn bayi ti ko ba ṣe akojọ n tu iṣẹ rẹ ka. Wọn le ma fi oju eyi wo nkan ti wọn n ṣe o. Ṣugbọn nkan ti wọn n ṣe niyẹn. Ọjọ kan si n bọ ti a o jẹ wọn niya fun pipa iṣẹ Ọlọrun run. Ti a o ba si sọ otitọ, a tilẹ ti n jẹ awọn kan niya lọwọlọwọ yi fun pipa iṣẹ Ọlọrun run lalai mọ. Awọn ni ko kan mọ pe a n jẹ awọn niya.

Nitorina, o ko le jẹ kòṣeku-kòṣẹyẹ ninu ijọba Ọlọrun. Ti o ba fẹ wa ninu ile, kuku duro sinu ile, ki o si fi ara rẹ han gẹgẹ bi ẹni ti o wulo. Aijẹbẹ, nṣe ni ki o duro si ita ki ẹnikẹni ma ba a ro wipe ti Jesu ni o n ṣe, bi o tilẹ jẹ wipe o ko ki i ṣe tirẹ.

Ki o ni ọsẹ alarinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo ki ọ kaabọ sinu ọsẹ miran ninu oṣu Ọ̀pẹ 2025. Adura mi ni pe ki Ọlọrun jẹ ki ọsẹ naa dun fun iwọ ati ẹbi rẹ ni gbogbo ọna, ni orukọ Jesu. Amin.

Bi a ti ṣe n wọ inu awọn ọjọ ti o gbẹyin ọdun yi, mo fẹ gba ọ niyanju pẹlu awọn ọrọ adura Mose yi:

“Bẹ̃ni ki iwọ ki o kọ́ wa lati ma ka iye ọjọ wa, ki awa ki o le fi ọkàn wa sipa ọgbọ́n.” (Sáàmù 90:12)

Ki ni eyi tunmọ si? Njẹ o tunmọ si pe ki Ọlọrun kọ wa ni bi a ti ṣe le mọ ọjọ ori wa bi? Rara o! A ko nilo Ọlọrun lati kọ wa lati mọ iye ọjọ ori wa. Awọn obi wa ati awọn mọlẹbi wa ti o wa nibẹ nigba ti a bi wa le ṣe eyi. Ki a tilẹ sọ otitọ, wọn o ti ṣe eyi ti o ba jẹ wipe wọn ni imọ-ẹkọ diẹ.

Lafikun, mimọ iye ọjọ ori wa kọ ni yo jẹ ki a ma a gbe igbe aye ọgbọn, nitori a ri ọpọ awọn ti o jẹ agbalagba ti wọn n gbe igbe aye omugọ. Dipo eyi, mimọ bi a ti ṣe le ṣe amulo ti o peye ọjọ kọọkan ti Ọlọrun ba fun wa ni yoo jẹ ki a le gbe igbe aye ọlọgbọn. Eyi gan-an si ni adura Mose yi dale lori. O jẹ igbe si Ọlọrun lati kọ wa lati ma fi aye wa ṣofo.

Lati ara nkan ti a ri ninu Iwe Mimọ, o ṣeeṣe ki a fi aye wa ṣofo. A o si fi aye wa ṣofo, ti a ba n fi awọn ọjọ wa ṣofo. Idi ni yi ti a fi nilo Ọlọrun lati kọ wa bi a ti le lo ọjọ kọọkan lati ṣe kiki awọn nkan ti o lere lori.

Wayi o, mi o mọ bi o ti ṣe lo awọn ọjọ ti Ọlọrun fun ọ ni ọdun yi. Mi o mọ boya o fi wọn ṣofo lori awọn nkan ti ko lere ni tabi boya o lo wọn lati ṣe awọn nkan ti yoo jẹ ki Ọlọrun gboriyin fun ọ. Ṣugbọn mo fẹ ki o mọ wipe o ko nilo lati fi ojọ kankan ṣofo mọ lori awọn nkan ti ko lere. O ko si ni fi ọjọ kankan ṣofo mọ lori awọn nkan ti ko lere, ti o ba le bere lọwọ Ọlọrun pe ki O kọ ọ bi o ti ṣe le ṣe amulo ti o peye ọjọ kọọkan.

Nitorina, bi o ti ṣe n wọ awọn ọjọ ti o gbẹyin ọdun yi, fi sinu adura rẹ lojoojumọ pe ki Ọlọrun ma kọ ọ ni bi o ko ṣe ni fi aye rẹ ṣofo. Nipa bayi, a o le gbe ọ ro lati gbe iyoku ọjọ aye rẹ ninu ọgbọn dipo ninu omugọ. Njẹ ki o gba okun lati ṣe bẹẹ gẹgẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa ati Olugbala wa. Inu mi dun lati ki ọ kaabọ sinu ọsẹ miran ninu oṣu Ọ̀pẹ 2025. Adura mi si ni pe ki Ọlọrun kun ọkan rẹ pẹlu ayọ akunwọsilẹ ninu gbogbo ọsẹ naa, ni orukọ Jesu Oluwa wa. Amin.

Bi a ti ṣe n bẹrẹ ọsẹ tuntun yi, mo fẹ gba ọ niyanju pẹlu awọn ọrọ wọnyi lati ọdọ Pọọlu si awọn ijọ Korinti:

“Ṣugbọn bi ẹnyin ti pọ̀ li ohun gbogbo, ni igbagbọ́, ati ọ̀rọ, ati ìmọ, ati ninu igbiyanjú gbogbo, ati ni ifẹ nyin si wa, ẹ kiyesi ki ẹnyin ki o pọ̀ ninu ẹbun ọfẹ yi pẹlu.” (2Kọ́ríntì 8:7)

Njẹ o ri bayẹn? Pọọlu fẹ ki awọn ọmọ ijọ Kọrinti tayọ ninu ilawọ, bi wọn ti ṣe tayọ ninu igbagbọ, imọ, itara ati ifẹ. Ki ni idi? Akọkọ, idi ni pe ifẹ Ọlọrun ni fun wọn lati ṣe bẹẹ gẹgẹ. Ekeji, o ni lati jẹ wipe wọn ti wa lẹyin awọn ijọ Ọlọrun yoku ninu ilawọ ni asiko yi. Ẹkẹta, idi ni pe ko fẹ ki wọn padanu awọn ere ti o sorọ mọ lilawọ.

Wayi o, ṣe a tilẹ ri awọn ere ti o sorọ mọ ilawọ nitootọ? Bẹẹni! Ọkan lara wọn si ni pe o le jẹ ki awọn eniyan dide nitori rẹ, nigba ti o ko tilẹ lero rẹ. Fun apẹrẹ, bibeli sọ fun wa nipa asiko kan ti awọn adari Juu kan lọ ṣipẹ si Jesu lati wa wo iransẹ Balogun Ọrun Roomu kan san. Ki si ni idi ti wọn ṣe dide nitori ọkunrin yi lati ba Jesu sọrọ, bi o tilẹ jẹ wipe keferi ni ọkunrin naa? Idi ni pe ọkunrin yi tayọ ninu ilawọ rẹ si wọn. O kọ sinagọgu kan fun wọn. Nitorina, wọn ko kan le joko tẹtẹrẹ, ki wọn si maa woran titi ọkunrin yi yoo fi padanu iranṣẹ rẹ ti o ṣe iyebiye si. Ṣe Jesu wa da wọn lohun tabi ko da wọn lohun? O da wọn lohun. (Wo: Lúùkù 7:1-10)

Lafikun, a tun sọ fun wa ninu bibeli nipa arabinrin kan ti a n pe ni Dọ́kàsì ati nipa bi o ti ṣe ṣaisan, ti o si ku. Ṣe awọn ọmọ ijọ rẹ wa gba iku rẹ bi amuwa Ọlọrun? Rara o! Dipo eyi, nṣe ni wọn ran lara wọn lati lọ pe Peteru wa lati gbadura fun un. Ki ni idi? Idi ni pe o tayọ ninu ilawọ rẹ. O ti ran ọpọlọpọ ninu ijọ yi, paapaa julọ awọn opo, lọwọ ṣaaju iku rẹ. Ṣe Peteru wa jẹ ipe wọn tabi ko jẹ? O jẹ ẹ. Nitorina, a mu Dọ́kàsí pada saye lati tẹsiwaju lati maa jẹ olubukun fun awọn ti o wa ni ayika rẹ. (Wo: Ìṣe Àpọ́sítélì 9;36-43)

Nibakana, awọn igba miran ma n wa ti yoo ya wa lẹnu lati ri awọn iransẹ Ọlọrun kan ti wọn yoo fi ohun gbogbo ti wọn n ṣe silẹ lati lọ gbadura fun awọn eniyan kan tabi lati wa ni awọn ayẹyẹ wọn. Diẹ lara wa tilẹ le ro wipe ainikanṣe ni o n fa eyi tabi ifarahan ojuṣaaju. Ṣugbọn ọpọ igba ni o jẹ wipe ilawọ awọn ti ọrọ kan ni o ṣe okunfa nkan ti a n ri yi. Ṣe awa naa ko ki wa mu ni pataki awọn ti o ba lawọ si wa? Ṣe a ki tilẹ nigba miran fi ohun gbogbo ti a n ṣe silẹ lati kan ran wọn lọwọ tabi lati ṣe nkankan lati mu inu wọn dun?

Ṣe o wa ri bayi pe o dara lati tayọ ni ilawọ. Nitorina, ma jẹ ki ilawọ rẹ si awọn eniyan, paapaa julọ awọn eniyan Ọlọrun, jẹ ẹkọọkan. Dipo eyi, jẹ ki o jẹ nkan ti gbogbo awọn ti o wa ni ayika rẹ yoo mọ ọ si. Ọjọ kan si n bọ, nigba ti o ko tile lero rẹ rara, ti yoo jẹ ki awọn eniyan dide lati ṣoore fun ọ.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ni mo fi ki ọ kaabọ sinu ọjọ ti o pari oṣu kọkanla ọdun yi. Adura mi si ni pe ki oṣu tuntun ti a fẹ wọ inu rẹ ninu ọsẹ naa dun fun wa ni gbogbo ọna, ni orukọ Jesu. Amin.

Wayi o, bi a ti ṣe n bẹrẹ ọsẹ tuntun yi, mo fẹ gba ọ niyanju lati ma a fi igba gbogbo ṣọ́ bi o ti ṣe n ṣe si ẹnikẹni ti o ba ti fi ara rẹ jin fun iṣẹ iranṣẹ ninu ijọba Ọlọrun, ki o ma ba mu wọn pa iṣẹ iranṣẹ wọn ti. Ṣe a le mu ki awọn eniyan pa iṣẹ iranṣẹ ti Ọlọrun fun wọn ti lotitọ? Bẹẹni, a le e ṣe bẹẹ. Ko si ki i wa ṣe awọn ti o jẹ ọmọ ijọ nikan ni o le mu ki awọn iranṣẹ Ọlọrun pa iṣẹ iranṣẹ wọn ti; awọn adari ijọ bi ti wọn naa le mu ki wọn pa iṣẹ iranṣẹ wọn ti.

Fun apẹrẹ, nigba ti a gbe pasitọ tuntun wa si inu ijọ ti mo n lọ ni igba kan, nkan akọkọ ti o ṣe ni pe o din owo ti a n san fun awọn ti o n ṣiṣẹ inu ile-iṣẹ inu ijọ yi ku. Ki ni idi? Idi ti o sọ wipe oun ṣe ṣe bẹ ni pe wọn ko ṣe iṣẹ to lati gba irufẹ owo ti pasitọ ti tẹlẹ n ṣan fun wọn. Ṣugbọn owo ti pasitọ ti tẹlẹ n ṣan fun wọn gan ko to iye ti a n san fun awọn akẹgbẹ wọn nita. Idi ti o si ṣe n san iye ti o n san fun wọn ni pe ko fẹ ki wọn fi igba kankan bẹrẹ si ni ro wipe idi ti awọn ko fi le tọju ara wọn ati awọn ẹbi wọn lọna ti o peye ni pe awọn n ṣiṣẹ fun Ọlọrun.

Amọ nṣe ni pasitọ tuntun yi kan ba gbogbo nkan jẹ. Nitorina, ko pẹ rara ti ọpọ ninu awọn oṣiṣẹ inu ile-iṣẹ ijọ yi bẹrẹ si ni kuro. Ṣe wọn wa n kuro nitoripe wọn ko fẹ Ọlọrun ni tabi nitoripe wọn ko fẹ sin in? Rara O! Idi ti wọn ṣe wa ṣiṣẹ ninu ile-iṣẹ ijọ yi ti wọn ko lọ bẹrẹ okowo ti ara wọn tabi ki wọn lọ sisẹ ni awọn ile-iṣẹ miran ni pe wọn fẹran Ọlọrun, wọn si fẹ sin in. Ṣugbọn nigba ti wọn ri wipe pasitọ wọn ko bikita rara nipa igbaye-gbadun wọn, wọn bẹrẹ si ni kuro. O si wa san bi wọn ti ṣe kuro yi ju ki wọn duro, ki wọn si ma kun sinu lọ.

Ki a ma fọrọgun, nitoripe wọn kuro ni ọna yi, ipalara bẹrẹ si ni ba awọn iṣẹ ti wọn n ṣe. Yatọ si eyi, ko si iwuri fun awọn miran ti wọn ri bi a ti ṣe ṣe si wọn lati wa ṣiṣẹ ni ile-iṣẹ ijọ yi. Idi si ni pe awọn naa ko fẹ ni irufẹ iriri kan naa. Ṣugbọn tani o jẹ ki awọn eniyan wọnyi pa iṣẹ iranṣẹ wọn ti? Adari ijọ wọn ni! Ọlọrun nikan ni o wa mọ iye awọn ti awọn adari ijọ wọn ti jẹ ki wọn pa iṣẹ iranṣẹ wọn ti lọna kanna.

Nitorina, ko ki i ṣe kiki awọn ọmọ ijọ nikan ni o le mu ki awọn iranṣẹ Ọlọrun pa iṣẹ iranṣẹ wọn ti; awọn adari ijọ naa le mu ki wọn pa iṣẹ iranṣẹ wọn ti. Ibi ti eyi ba si ti waye, o di dandan ki ipalara ba awọn nkan kan ti Ọlọrun fẹ ṣe ninu aye awọn eniyan fun saa kan. Bẹẹni, ipalara yoo ba awọn nkan wọnyi titi yoo fi ri awọn iransẹ tuntun miran ti yoo fun ni iwuri lati bẹrẹ si ni ṣe wọn.

Bi a ti ṣe ri ninu bibeli, ni asiko Nehemaya, iparala bẹrẹ si ni ba iṣẹ Ọlọrun lasiko kan nitoripe awọn Juu ati awọn adari wọn jẹ ki awọn ọmọ Lefi ti o n ṣiṣẹ ninu tẹmpili pa iṣẹ iranṣẹ wọn ti. Lọna wo? Iwọ naa wo nkan ti Nehemaya sọ lori eyi ninu bibeli:

“Mo si mọ̀ pe, a kò ti fi ipin awọn ọmọ Lefi fun wọn; awọn ọmọ Lefi ati awọn akọrin, ti nṣe iṣẹ, si ti salọ olukuluku si oko rẹ̀. Nigbana ni mo si ba awọn ijoye jà, mo si wipe, Ẽṣe ti a fi kọ̀ ile Ọlọrun silẹ? Mo si ko wọn jọ, mo si fi wọn si ipò wọn. Nigbana ni gbogbo Juda mu idamẹwa ọka ati ọti-waini titun ati ororo wá si ile iṣura.” (Nehemáyà 13:10-12)

Ṣe o ri bayẹn? Nitoripe awọn eniyan wọnyi kọ lati mojuto awọn ọmọ Lefi ati awọn akọrin ti wọn n ṣiṣẹ ninu tẹmpili Ọlọrun, wọn fi iṣẹ Ọlọrun silẹ, wọn si pada lọ si oko wọn ati si idi okowo wọn. Ta wa ni o lero pe eyi ni lati pa lara ju? Awọn eniyan naa ni! Awọn ni ko ni ni iriri Ibukun ti o sorọ mọ iṣẹ iranṣẹ awọn ọmọ Lefi ati awọn akọrin yẹn bi o ti ṣe yẹ. Ti Nehemaya ko ba wa tete da si ọrọ naa ni, Ọlọrun nikan ni O mọ bi nkan ti wọn n ṣe yi ko ba ṣe pa iṣoriire, alaafia ati ilera orilẹ-ede wọn lapapọ lara si.

Wayi o, ko ki i wa ṣe kiki ki a ma fi owo wa ran awọn iranṣẹ Ọlọrun ti o wa ni aarin wa lọwọ to nikan ni o le jẹ ki wọn pa iṣẹ iranṣẹ wọn ti. A tun le jẹ ki wọn pa iṣẹ iranṣẹ wọn ti nipa sisọ awọn ọrọ kobakungbe si wọn, nipa pipa irọ mọ wọn tabi nipa didi ọtẹ mọ wọn. Nigba ti a ba si ṣe eyi, a le mọ daju pe yoo pa iṣẹ ti Ọlọrun fẹ tipasẹ wọn ṣe ninu aye wa ati ninu aye awọn miran lara. Ṣe Ọlọrun yoo wa gboriyin fun wa fun eyi bi? Rara o! Dipo eyi, nṣe ni yoo fẹrẹ fi iya jẹ wa. Eyi ko si ni suwọn rara.

Nitorina, ẹ jẹ ki a yẹ ara wa wo finni-finni, ki a si ri daju pe a ko ma ṣe ohunkohun lati mu ki iranṣẹ Ọlọrun kankan pa iṣẹ iranṣẹ rẹ ti. Njẹ ki Ọlọrun fun wa ni okun lati ṣe ohun ti o tọ lori ọrọ yi ki o to pẹ ju. Amin.

Kí o ní ọ̀sẹ̀ alárinin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)

Olufẹ: ki oore-ọfẹ, aanu ati alaafia jẹ tirẹ lalai lodiwọn lati ọdọ Ọlọrun Baba wa ati Jesu Kirisiti Oluwa wa. Pẹlu ayọ ti o ga ni mo fi ki ọ kaabọ sinu ọsẹ miran ninu oṣu Belu 2025. Adura mi si ni pe ki Ọlọrun ya aye rẹ ya ohunkohun ti o ti fi gbedeke sori ilọsiwaju rẹ, ki gbogbo iriri ainilosiwaju le wa si opin ninu aye rẹ. Amin.

Ọkan lara awọn nkan ti o ma n ṣaba di ilọsiwaju awọn ọmọ Ọlọrun lọwọ ni aifi tọkan-tọkan fi ara wọn jin fun Ọlọrun. Ki si ni idi ti a ki i fi fi gbogbo igba fi tọkan-tọkan fi ara wa jin fun un? Idi kan pataki ni pe ifẹ wa lati ni awọn nkan daradara aye yi ati lati da bi awọn ti o wa ni ayika wa ko ki n ṣaba jẹ ki a roju-raye.

Ṣe ko dara ki a ni awọn nkan ti o dara ti aye yi ni tabi ki a wa ni ipo pataki laye? O dara. Ki a tilẹ sọ otitọ, Ọlọrun ko lodi si ki a ni awọn nkan daradara ti aye yi tabi ki a wa ni ipo ti o ga laye. Dipo eyi, bi a ti sọ fun wa ninu bibeli, Oun funrarẹ ni O ma n fi ohun gbogbo fun wa fun igbadun wa (1Tímótì 6:17).

Amọ ṣa o, awa ti a jẹ ọmọ Ọlọrun ni lati mọ wipe a ko le ni awọn nkan ti aye yi to dara nipa sisare tẹle wọn lasan tabi nipa ṣiṣe aniyan lati ni wọn lasan. Bi a ba tilẹ ni ohunkohun ni ọna yi, ko si aridaju pe nkan naa yoo jẹ nkan ti a nilo tabi nkan ti a le jẹgbadun. Ọna kan ṣoṣo ti a fi wa le ni awọn nkan daradara aye yi ti a nilo, ki a si tun jẹgbadun wọn, ni ki Ọlọrun, Baba wa, ki o mu wọn wa fun wa tabi ki o dari wa si ibi ti a o ti ri wọn.

Idi si ni yi ti Jesu Oluwa wa fi sọ eyi fun wa:

“Nitorina ẹ maṣe ṣe aniyan, wipe, Kili a o jẹ? tabi, Kili a o mu? tabi, aṣọ wo li a o fi wọ̀ wa? Nitori gbogbo nkan wọnyi li awọn keferi nwá kiri. Nitori Baba nyin ti mbẹ li ọrun mọ̀ pe, ẹnyin kò le ṣe alaini gbogbo nkan wọnyi. Ṣugbọn ẹ tète mã wá ijọba Ọlọrun na, ati ododo rẹ̀; gbogbo nkan wọnyi li a o si fi kún u fun nyin.” (Mátíù 6:31-33)

Njẹ o ri bayẹn? Ọlọrun ko fẹ ki a ma ṣe aniyan lori ohunkohun ti a nilo laye. Lafikun, ko fẹ ki a sọ ohun gbogbo nipa aye wa di ifagagbaga pẹlu awọn miran. Dipo eyi, O fẹ ki a ma fi igba gbogbo fi ṣe akọkọ ninu ohun gbogbo ti a ba n ṣe. Nipa bayi, yoo le fun wa ni ohun gbogbo ti a nilo laye ati agbara lati jẹgbadun wọn.

O wa ṣeni laanu pe ọpọ wa ni ko ma a rin ninu imọlẹ otitọ yi. Nitorina, nṣe ni a n fi igba gbogbo ṣe ara wa leṣe nipa fifi agagbaga pẹlu awọn ti aye yi lati ni awọn nkan daradara aye. Ti a ko ba si ronupiwada, ki a bẹrẹ si ni fi Ọlọrun ṣe akọkọ, ki a si tun gbe e leke ohun gbogbo ti a nilo tabi ti a fẹ laye, a ko ni ye ṣi ilẹkun aye wa silẹ fun ewu lai nidi.

Ranti wipe Ọlọrun mọ ohun gbogbo ti a nilo. Ko si tun wa mọ ohun gbogbo ti a nilo nkan, O tun n fẹ lati fun wa ni ohun gbogbo ti a nilo. Amọ ti a ko ba fun ni aaye ti o tọ si ninu aye wa, a ko ni dẹkun lati ma ṣiṣẹ lodi si awọn nkan ti O n ṣe lati mu inu wa dun laye. Ibi ti eyi ba si ti ri bẹẹ, ko si ẹnikẹni ti a o le dalẹbi bi ko ṣe ara wa.
Nitorina, bi o ti ṣe n lọ ni ọsẹ yi, pinnu ninu ọkan rẹ lati ma fi Ọlọrun ṣe akọkọ ninu ohun gbogbo ti o ni i ṣe pẹlu aye rẹ. Njẹ ki Ẹmi Ọlọrun fun ọ ni okun lati ṣe bẹẹ gẹgẹ, ni orukọ Jesu. Amin.

Kí o ní ọ̀sẹ̀ alárinrin.

Copyright © 2025, Reality Desk, a ministry of Alaythia Bible Church –This material is the sole property of Reality Desk. It may be copied for personal non-commercial use only in its entirety free of charge. All copies must contain this copyright notice. Please direct any questions you may have to pastor@abcministryng.com or call: 08037592851 (WhatsApp Number: 08146472876)